Tag: Youtube

ការប្រៀបធៀបទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ
ទីភ្នាក់ងារអវកាសអាម៉េរិក (ណាសា-NASA) កាលពីថ្ងៃទី 02 ឧសភា បានចែករំលែកវីដេអូមួយស្ដីពីបណ្ដាប្រហោងខ្មៅខ្នាតយក្សដែលមានម៉ាសធំជាងព្រះអាទិត្យចាប់ពី 100,000 ដងដល់ 66 ពាន់លានដង។
ព្រះអាទិត្យគឺជាវត្ថុតែមួយគត់នៅក្នុងទិដ្ឋភាពដំបូង ហើយវាតូចទៅៗនៅពេលកាមេរ៉ាថយក្រោយឆ្ងាយទៅៗ។ ប្រហោងខ្មៅធំជាងម៉ាសព្រះអាទិត្យ 100,000 ដង ស្ថិតក្នុងកាឡាក់ស៊ី J1601 មានស្រមោលកណ្ដាលតូចជាងព្រះអាទិត្យ។
ស៊ុមទិដ្ឋភាពបន្តគឺជាគន្លងគោចររបស់ភពពុធ (Mercury)។ ប្រហោងខ្មៅនៅកណ្ដាលកាឡាក់ស៊ី Circinus មានម៉ាសធំជាងព្រះអាទិត្យមួយលានដង។
បន្ទាប់មកគឺជាគន្លងគោចររបស់ផែនដី។ ប្រហោងខ្មៅនៅកណ្ដាលកាឡាក់ស៊ី M32 ដែលជាកាឡាក់ស៊ីរណបរបស់កាឡាក់ស៊ី Andromeda មានម៉ាសធំជាងព្រះអាទិត្យពីរលានដង។
ប្រហោងខ្មៅ Sagittarius A* នៅកណ្ដាលកាឡាក់ស៊ីមីលគីវ៉េ មានម៉ាសធំជាងបួនលានដង ធៀបនឹងម៉ាសព្រះអាទិត្យ។
កាឡាក់ស៊ី NGC 7727 មានប្រហោងខ្មៅធំៗចំនួនពីរ ក្នុងនោះ ប្រហោងខ្មៅតូចជាងគេមានម៉ាសធំជាងព្រះអាទិត្យ 6 លានដង។
https://www.youtube.com/watch?v=jU1DsipURcM
វីដេអូបង្ហាញពីទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ
តមកទៀត យើងហោះឆ្លងកាត់គន្លងគោចររបស់ភពព្រហស្បតិ៍ (Jupiter), ភពណេបទូន (Neptune) និងខ្សែក្រវាត់អាចម៍ផ្កាយ (Kuiper)។ បន្ទាប់មកគឺជាប្រហោងខ្មៅដែលធំជាងគេរបស់ NGC 7727 ដែលធំជាង 150 លានដងធៀបនឹងម៉ាសព្រះអាទិត្យ។
ចំណែកប្រហោងខ្មៅរបស់កាឡាក់ស៊ី Andromeda អាចមានម៉ាសធ្ងន់ជាងព្រះអាទិត្យ 140 លានដង។ កាឡាក់ស៊ី Cygnus A មានប្រហោងខ្មៅដែលធំជាង 2.5 ពាន់លានដងធៀបនឹងម៉ាសព្រះអាទិត្យ។
ពេលនេះយើងនឹងហោះឆ្លងកាត់ពពកផ្កាយដុះកន្ទុយដែលព័ទ្ធជុំវិញប្រព័ន្ធព្រះអាទិត្យ (Oort cloud)។ ប្រហោងខ្មៅ M87 ដែលធ្ងន់ជាងម៉ាសព្រះអាទិត្យ 5.4 ពាន់លានដងគឺជាប្រហោងខ្មៅដំបូងគេដែលត្រូវបានថតដោយផ្ទាល់។
ប្រហោងខ្មៅ TON 618 ស្ថិតក្នុងកាឡាក់ស៊ីមួយដែលនៅឆ្ងាយសែនឆ្ងាយ រហូតដល់ពន្លឺរបស់វាត្រូវការពេល 10 ពាន់លានឆ្នាំទើបមកដល់ផែនដី។ ដោយមានម៉ាសធំជាង 66 ពាន់លានដងនៃម៉ាសព្រះអាទិត្យ TON 618 គឺជាប្រហោងខ្មៅធំបំផុតដែលមនុស្សធ្លាប់បានរកឃើញនៅក្នុងចក្រវាលដែលអ្នកវិទ្យាសាស្ត្រអាចសង្កេតឃើញ។
May 3, 2023
អ្នកគាំទ្ររៀបចំខ្លួនដូចគ្រូបង្វឹក Honda របស់ U-22 កម្ពុជា បង្កការភ្ញាក់ផ្អើលលើវេទិកាទស្សនិកជននៅស៊ីហ្គេម
អ្នកគាំទ្រពិសេសមួយរូបមកពីប្រទេសជប៉ុន ដែលមានរូបរាងមុខមាត់ និងស្លៀកពាក់ដូចទៅនឹងគ្រូបង្វឹក Keisuke Honda របស់ U-22 កម្ពុជា បានធ្វើឱ្យមានការភ្ញាក់ផ្អើលខ្លាំងពេលបង្ហាញវត្តមាននៅឯកីឡដ្ឋានជាតិអូឡាំពិកកម្ពុជាក្នុងព្រឹត្តិការណ៍ស៊ីហ្គេមលើកទី 32។
ការប្រកួតពីរលើករបស់ U-22 កម្ពុជា មានវត្តមានអ្នកគាំទ្រពិសេសម្នាក់នៅលើវេទិកាសម្រាប់ទស្សនិកជនក្នុងកីឡដ្ឋានជាតិអូឡាំពិក។ អ្នកគាំទ្រដែលមកពីប្រទេសជប៉ុននេះ មានរូបរាងមុខមាត់ដូចទៅនឹងគ្រូបង្វឹក Keisuke Honda នៃក្រុមបាល់ទាត់បុរសវ័យក្រោម 22 ឆ្នាំ (U-22) របស់កម្ពុជា។
ពេលបង្ហាញខ្លួននៅលើវេទិកាទស្សនិកជនភ្លាម «Honda ក្លែងក្លាយ» ក៏ទទួលបានចំណាប់អារម្មណ៍ច្រើនពីអ្នកគាំទ្រកម្ពុជា។ អ្នកគាំទ្រកម្ពុជាក៏ចូលចិត្តអ្នកគាំទ្រពិសេសរូបនេះ។
បុរសសង្ហាម្នាក់នេះ តាមពិតគឺជា Makihika ដែលជា KOL (Key Opinion Leader ឬអ្នកផ្ដល់យោបល់ដែលមានឥទ្ធិពល) ជនជាតិជប៉ុនមួយរូប។ Makihika ត្រូវបានគេស្គាល់ច្រើននៅលើបណ្ដាញសង្គម ដោយមានឆានែល TikTok និង YouTube មានអ្នកតាមដានជាង 600,000 នាក់។
Makihika កំពុងតែល្បីឈ្មោះខ្លាំង ដោយសារមានរូបរាងមុខមាត់ដូចទៅនឹងគ្រូបង្វឹក Keisuke Honda។ Makihika និយាយថា «ខ្ញុំគាំទ្រ Honda ទើបបានជាតាមដានដំណើររបស់គាត់។ ខ្ញុំបានស្វែងយល់អំពីឥរិយាបថ ការស្លៀកពាក់ ការធ្វើខ្លួនរបស់ Honda ដើម្បី «សំដែង» ជារូបគាត់»។
Makihika តែងតែមកកាន់កម្ពុជានៅពេលមានព្រឹត្តិការណ៍ប្រកួតធំៗរបស់ក្រុមបាល់ទាត់កម្ពុជា។ Makihika និយាយថា គាត់មកកាន់កម្ពុជាច្រើនថ្ងៃមកហើយ និងមានវត្តមាននៅលើវេទិកាទស្សនិកជនរបស់កីឡដ្ឋានជាតិអូឡាំពិកដើម្បីផ្ដល់កម្លាំងចិត្តដល់ U-22 កម្ពុជា។
Makihika នឹងធ្វើដំណើរជាមួយក្រុម U-22 កម្ពុជា ក៏ដូចជានិមិត្តរូប Honda របស់គាត់ នៅក្នុងការប្រកួតទាំងឡាយនាពេលខាងមុខនៅស៊ីហ្គេមលើកទី 32 នេះ៕
Makihika
Makihika (ពាក់វ៉ែនតា)
Makihika
Makihika (ពាក់វ៉ែនតា)

Makihika
គ្រូបង្វឹក Honda ពិត
May 3, 2023
ប្រទេសចិនចាប់ផ្ដើមខួងអណ្ដូងប្រេងជ្រៅជាងគេបង្អស់នៅទ្វីបអាស៊ី
សាជីវកម្ម Sinopec ចាប់ផ្ដើមខួងអណ្ដូងប្រេង Yuejin 3-3 ជម្រៅ 9,472 ម៉ែត្រ នៅតំបន់បាតខ្ទះ Tarim ដែលស្ថិតក្នុងតំបន់ស្វយ័ត Xinjiang ប្រទេសចិន កាលពីថ្ងៃទី 01 ឧសភា 2023។
អណ្ដូងប្រេង Yuejin 3-3 នឹងជាជំហានដ៏ធំមួយនៅក្នុងសកម្មភាពរុករកប្រេងឧស្ម័នមហាជ្រៅ ជួយឱ្យប្រទេសចិនបង្កើនការផលិតប្រេងឆៅរបស់ខ្លួន។ តាមផែនការ សាជីវកម្មចិន Sinopec គ្រោងនឹងសម្រេចបានដំណាក់កាលខួងក្នុងរយៈពេល 170 ថ្ងៃ។
អណ្ដូងប្រេង Yuejin 3-3 ស្ថិតក្នុងគម្រោងខួងដីមហាជ្រៅ Deep Earth ដែលបច្ចុប្បន្នបខួងអណ្ដូងបានចំនួន 120 កន្លែងដែលមានជម្រៅជាង 8,000 ម៉ែត្រ នៅតំបន់បាតខ្ទះ Tarim ។ នេះគឺជាតំបន់បាតខ្ទះដែលផ្ទុករ៉េប្រេងធំជាងគេបង្អស់នៅប្រទេសចិន ដោយកាន់កាប់ជាង 60% នៃធនធានប្រេងឧស្ម័នក្នុងដីមហាជ្រៅរបស់ប្រទេសនេះ។
ថ្វីបើការខួងអណ្ដូងប្រេងជ្រៅខ្លាំងគឺជារឿងលំបាក ប៉ុន្តែបន្ទាប់ពីបានអភិវឌ្ឍបច្ចេកវិទ្យា និងបច្ចេកទេសទំនើប ប្រទេសចិនក៏អាចដោះស្រាយបញ្ហានេះបានប្រសើរជាងមុន។ នេះបើតាម Wang Long ដែលជាអ្នកជំនាញប្រចាំវិទ្យាស្ថានស្រាវជ្រាវបច្ចេកទេសប្រេងឧស្ម័ន Sinopec។
អណ្ដូងប្រេង Yuejin 3-3 ស្ថិតក្នុងគម្រោងខួងដីមហាជ្រៅ Deep Earth
លោក Wang Long ឱ្យដឹងថា «រយៈពេលនៃការខួងកាលពីបីឆ្នាំមុនគឺ 280 ថ្ងៃ ប៉ុន្តែបច្ចុប្បន្នបានថយមកនៅត្រឹម 97 ថ្ងៃ ខណៈដែលសុក្រឹតភាពនៅពេលខួងក៏កើនពី 60% ឡើងដល់ជាង 90%»៕
May 2, 2023
រកឃើញដីកម្រនៅលើភពក្រៅប្រព័ន្ធព្រះអាទិត្យ ដែលមានកម្ដៅបួនពាន់អង្សាសេ
ក្រុមអ្នកវិទ្យាសាស្ត្របានរកឃើញសារធាតុ terbium ជាលើកដំបូងនៅក្នុងបរិយាកាសរបស់ KELT-9b ដែលជាភពមួយក្នុងចំណោមភពក្រៅប្រព័ន្ធព្រះអាទិត្យដែលក្ដៅបំផុតធ្លាប់ត្រូវបានកត់ត្រានាពេលកន្លង។
KELT-9b មានសីតុណ្ហភាពជាមធ្យម 4,000 អង្សាសេ វិលជុំវិញផ្កាយមេ KELT-9 ដែលមានចម្ងាយពីផែនដីប្រហែល 670 ឆ្នាំពន្លឺ (មួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ)។ ភពនេះតែងតែជាទីចាប់អារម្មណ៍របស់អ្នកតារាសាស្ត្រចាប់តាំងពីត្រូវបានរកឃើញកាលពីឆ្នាំ 2016។
លទ្ធផលនៃការស្រាវជ្រាវថ្មីដែលបានប្រកាសលើទស្សនាវដ្ដី Astronomy and Astrophysics បានឱ្យដឹងថា ក្រុមអ្នកវិទ្យាសាស្ត្របានរកឃើញលោហធាតុ terbium ដែលជាដីកម្រ នៅក្នុងបរិយាកាសរបស់ KELT-9b។
Terbium ត្រូវបានអ្នកវិទ្យាសាស្ត្រស៊ុយអែត Carl Gustaf Mosander រកឃើញជាលើកដំបូងក្នុងអណ្ដូងរ៉ែ Ytterby នៅប្រជុំកោះ Stockholm កាលពីឆ្នាំ 1843។ សារធាតុ terbium គឺជាដីដ៏កម្រ ក្នុងនោះ 99% នៃការផលិត terbium របស់ពិភពលោក គឺធ្វើឡើងនៅ Bayan Obo ដែលជាតំបន់ទាញយករ៉ែក្នុងដែនដីម៉ុងហ្កោលីខាងក្នុងរបស់ប្រទេសចិន។
ភព KELT-9b វិលជុំវិញផ្កាយមេ KELT-9
ការរកឃើញខាងលើនេះពិតជាមានសារសំខាន់ក្នុងការស្វែងយល់អំពីបណ្ដាភពនៅក្រៅប្រព័ន្ធព្រះអាទិត្យ។ «កាន់តែយល់ច្បាស់អំពីលក្ខណៈសម្បត្តិរបស់បណ្ដាភព យើងក៏កាន់តែមានឱកាសច្រើនក្នុងការស្វែងរកឃើញផែនដី 2.0 ក្នុងអនាគត» Nicholas Borsato មកពីសាកលវិទ្យាល័យ Lund ដែលជាសមាជិករបស់ក្រុមស្រាវជ្រាវអំពីភព KELT-9b បញ្ជាក់ដូច្នេះ៕
April 29, 2023
សម្រាប់អ្នកអសមត្ថភាពបន្តពូជ៖ «តើការបង្កកំណើតដោយប្រើឧបករណ៍វិទ្យាសាស្ត្រ បែប IVF គឺជាអ្វី?»
ការបង្កកំណើតក្នុងមន្ទីរពិសោធន៍ ឬឧបករណ៍វិទ្យាសាស្ត្រ ដោយប្រើប្រាស់វិធីសាស្ត្រ IVF ដែលគេអាចហៅបានថា «ការបង្កកំណើតដោយវិធីពាក់កណ្ដាលវិទ្យាសាស្ត្រ» ច្រើនធ្វើឡើងនៅពេលស្ត្រីមានជំងឺប្រចាំកាយ ឬក្រោយការព្យាបាលជំងឺហើយនាំឱ្យស្ត្រីបាត់បង់សមត្ថភាពបន្តពូជ ឬមួយស្ត្រីអស់រដូវនៅពេលឈានដល់វ័យចំណាស់។
ស្ត្រីមួយចំនួនដែលជួបបញ្ហាខាងលើ ប៉ុន្តែនៅតែចង់មានផ្ទៃពោះគឺត្រូវជ្រើសរើសវិធីសាស្ត្រ IVF (In Vitro Fertilization) ដោយត្រូវឆ្លងកាត់ដំណាក់កាលបង្កកពងមេជីវិតញី ដើម្បីទុកសម្រាប់បង្កកំណើតជាមួយមេជីវិតឈ្មោល នៅពេលណាដែលសមស្រប។
វដ្តនៃការបង្កកំណើតដោយវិធីសាស្ត្រ IVF
វដ្តនៃការបង្កកំណើតដោយវិធីសាស្ត្រ IVF ដែលចាប់ផ្តើមពីការបង្កកពងមេជីវិតញី មានដូចខាងក្រោម៖
1– ពងមេជីវិតញីដែលត្រូវបានយកមកបង្កកទុក នឹងត្រូវយកទៅរំលាយឱ្យត្រលប់ទៅរកសភាពដើម
2– ពងដែលអ្នកជំនាញយល់ថាអាចប្រើបាន និងត្រូវយកទៅបង្កកំណើតជាមួយមេជីវិតឈ្មោល
3– ពងមេជីវិតញី ក្រោយពីត្រូវបានរំលាយឱ្យត្រលប់ទៅរកសភាពដើម ហើយបានបង្កកំណើតដោយជោគជ័យនឹងចាប់ផ្តើមវិវឌ្ឍទៅជាអំប្រ៊ីយ៉ុង (embryo)
វដ្ដរបស់ អំប្រ៊ីយ៉ុង (embryo)
4– ក្នុងចំណោមអំប្រ៊ីយ៉ុងទាំងអស់អាចមានមួយទៅពីរ ឬអាចបី (សម្រាប់មនុស្សស្រីដែលមានអាយុច្រើនជាង 40 ឆ្នាំ) នឹងត្រូវបានបញ្ចូលទៅក្នុងស្បូន ដើម្បីចាប់ផ្ដើមដំណាក់កាលរីកចម្រើនទៅតាមលក្ខណៈធម្មជាតិ។
October 20, 2021
ការចិញ្ចឹមកូនក្នុងសតវត្សរ៍ទី21 តើត្រូវត្រៀមរួចជាស្រេចសម្រាប់កូនប៉ុនណាទើបគ្រប់គ្រាន់?
ត្រូវតែទទួលស្គាល់ថា ពិភពលោកសព្វថ្ងៃនេះវិលលឿនមែនទែន មិនដូចសម័យយើងកាលពីអតីតឡើយ។ ក្មេងដែលកើត និងធំធាត់ឡើងក្នុងយុគសតវត្សរ៍ទី21 នេះ កំពុងជួបនឹងយុគសម័យដែលមានការផ្លាស់ប្ដូរលឿនបំផុតក្នុងប្រវត្តិសាស្ត្ររបស់មនុស្សជាតិ។ លោកឪពុក អ្នកម្ដាយខ្លួនឯងក៏កំពុងប្រឈមនឹងភាពសាកល្បងដែលមិនធ្លាប់កើតមានពីមុនមកដូចគ្នាដែរ ឧទាហរណ៍ដូចជា មុខរបរអាជីពជាច្រើនក្នុងអតីតកាល ត្រូវបានរលាយបាត់ ខណៈពេលជាមួយគ្នា ក៏មានមុខរបរអាជីពថ្មីៗដែលមិននឹកស្មានដល់បានកើតឡើងដែរ ដូចជា Youtuber ឬ Caster ការសរសេរកូដ ឬ Coding របស់លេង ឬវិធីការរៀនយល់ដឹងបែបថ្មីៗ ដែលធ្វើឱ្យពេលខ្លះបទពិសោធកាលពីអតីតកាលរបស់ឪពុកម្ដាយ លែងអាចជួយក្នុងការចិញ្ចឹមមើលថែកូនបានតទៅទៀត។ល។
រឿងតែមួយគត់ដែលឪពុកម្ដាយក្នុងយុគសតវត្សរ៍ទី21 នេះធ្វើបានល្អបំផុត គឺការត្រៀមរួចជាស្រេចសម្រាប់កូនជាមួយការរៀនយល់ដឹង និងប្រឈមជាមួយបញ្ហាគ្រប់ស្ថានការណ៍ដែលកើតឡើង ដើម្បីអ្វីដែលថា ទោះជាគេ(កូនៗ)នឹងជួបរឿងអ្វីនាពេលអនាគត ក៏អាចទប់ទល់បានយ៉ាងទាន់ពេលវេលា និងត្រៀមជាស្រេចក្នុងការរៀនយល់ដឹងពីរឿងរ៉ាវផ្សេងៗដែលកើតឡើង បានយ៉ាងមានប្រសិទ្ធភាពបំផុត។
តើឪពុកម្ដាយអាចត្រៀមភាពប្រុងប្រៀបរួចជាស្រេចឱ្យកូនយ៉ាងណា?
1.បង្ហាត់កូនឱ្យចេះជួយខ្លួនឯង
អាចបង្ហាត់បង្រៀនបានតាំងពីកូននៅតូច ដូចជាញ៉ាំបាយ ងូតទឹក ដុសសម្អាតធ្មេញ…ធ្វើឱ្យកូនមានអារម្មណ៍ថា ខ្លួនគេអាចទៅរួច ធ្វើអ្វីក៏បាន ស្រឡាញ់ និងមានមោទនភាពលើខ្លួនឯង ឬដែលហៅថា Self-esteem ដែលជាដំណាក់កាលដំបូងរបស់ការអភិវឌ្ឍខួរក្បាល។
2.បណ្ដោយឱ្យកូនលេង ព្រោះការលេង គឺជាការងាររបស់ក្មេង
ក្នុងអំឡុងពេលដែលកូនលេង នឹងកើតមានការតាំងគោលដៅរយៈពេលខ្លីម្ដងម្កាលដោយធម្មជាតិ។ មានការប្រើម្រាមដៃទាំង10 និងប្រព័ន្ធប្រសាទប៉ះពាល់ទាំង5 ធ្វើឱ្យខួរក្បាលផ្នែកខាងមុខបានទទួលការអភិវឌ្ឍ។ ឧទាហរណ៍ការលេងដែលជួយជំរុញខួរក្បាលរបស់កូន ដូចជាការផាត់ពណ៌ សូនរូបជាមួយដីឥដ្ឋ លេងតម្រៀបដុំឈើ និងលេងតោងឡើង ជាដើម។
3.សាងសម្ព័ន្ធភាពដ៏ល្អដោយការចិញ្ចឹមមើលថែកូនបែបវិជ្ជមាន
ដោយការបង្ហាត់បង្រៀនកូនដោយហេតុផល បើកឱកាសឱ្យកូនចេះគិតវិភាគ យល់ដឹង ដោះស្រាយកែខៃបញ្ហាដោយខ្លួនឯង ដែលទាំងអស់នេះនឹងជួយអភិវឌ្ឍ “ខួរក្បាលផ្នែកខាងគិត” បន្តឆ្ពោះទៅរកការរៀនយល់ដឹង។ ការសម្លុត ការទិតៀន ការបញ្ជួសបន្សោក ឬការដាក់ទោសឱ្យរាងចាល នឹងធ្វើឱ្យកូនមានអារម្មណ៍ថា គ្មានសុវត្ថិភាព និងខួរក្បាលមិនបានទទួលការអភិវឌ្ឍ។
4.យកចិត្តទុកដាក់រឿងភោជនាហារ
ជាពិសេសបំផុតសារធាតុអាហារដែលប្រើក្នុងការអភិវឌ្ឍខួរក្បាលកូន មានដូចជា ប្រូតេអ៊ីន អាស៊ីតខ្លាញ់ចាំបាច់ DHA និងARA សារធាតុដែក អ៊ីយ៉ូដ វីតាមីនA និងវីតាមីនB12 ដែលអ្នកម្ដាយអាចធ្វើបានតាំងពីកើតដំបូងតាមរយៈការចិញ្ចឹមកូនដោយទឹកដោះម្ដាយរយៈពេលយ៉ាងតិច 6ខែ តាមដោយការមើលថែទាំកូនឱ្យបានទទួលសារធាតុអាហារទៅតាមវ័យដែលស័ក្តិសម ដូចជា ស៊ុត ត្រីសមុទ្រ បន្លែល្ពៅ ការ់ុត បន្លែស្លឹកបៃតង និងទឹកស៊ុបដែលមានប្រយោជន៍ជាដើម។

ជាសរុបទៅក៏គឺ បើសួរថា តើការចិញ្ចឹមកូនក្នុងសម័យនេះ មានអ្វីដែលខុសប្លែកពីមុនខ្លះនោះ?…ចម្លើយគឺ គោលការណ៍គ្រឹះមិនខុសគ្នាទេ តែនឹងខុសគ្នាក៏ត្រង់រឿងតិចណូឡូជី ដូច្នេះយើងត្រូវត្រៀមឱ្យកូនឱ្យរួចជាស្រេចក្នុងការរៀនយល់ដឹងគ្រប់ពេលវេលា។ សង្គត់ធ្ងន់លើការអភិវឌ្ឍជំនាញគ្រប់ផ្នែក ទាំងជំនាញការដោះស្រាយបញ្ហាឱ្យបាន និងជំនាញការរស់នៅ រួមទាំងយកចិត្តទុកដាក់រឿងភោជនាហារដែលមានផលប្រយោជន៍ដល់ខួរក្បាល ដើម្បីឱ្យកូនអាចរស់នៅក្នុងសង្គមបានយ៉ាងមានសេចក្ដីសុខ និងក្លាយជាបុគ្គលដែលទទួលបានជោគជ័យក្នុងសតវត្សរ៍ទី21 នេះ៕
December 3, 2020
ការចិញ្ចឹមកូនក្នុងសតវត្សរ៍ទី21 ត្រូវត្រៀមជាស្រេចសម្រាប់កូនប៉ុនណាទើបគ្រប់គ្រាន់?
ត្រូវទទួលស្គាល់ថា ពិភពលោករាល់ថ្ងៃនេះវិលលឿនមែនទែន មិនដូចយុគសម័យយើងកាលពីអតីតឡើយ ក្មេងដែលកើត និងធំធាត់ឡើងក្នុងយុគសតវត្សរ៍ទី21នេះ កំពុងជួបជាមួយយុគសម័យដែលមានការផ្លាស់ប្ដូរលឿនបំផុតក្នុងប្រវត្តិសាស្រ្តរបស់មនុស្សជាតិ។ ឪពុកម្ដាយខ្លួនឯងក៏កំពុងតែប្រឈមនឹងការសាកល្បងដែលមិនធ្លាប់កើតឡើងពីមុនដូចគ្នាដែរ ឧទាហរណ៍ដូចជា អាជីពមុខរបរជាច្រើនកាលពីអតីតកាលត្រូវរលាយបាត់អស់ ខណៈពេលជាមួយគ្នាក៏មានអាជីពថ្មីៗដែលមិនធ្លាប់នឹកស្មានបានកើតឡើង ដូចជា Youtuber ឬ Caster ការសរសេរ Coding របស់លេង ឬវិធីការរៀនយល់ដឹងបែបថ្មីៗដែលធ្វើឱ្យបទពិសោធកាលពីអតីតកាលរបស់ឪពុកម្ដាយលែងអាចជួយក្នុងការចិញ្ចឹមកូនបានតទៅទៀត។
3រឿងចម្បងៗគឺ Skillsets /ចំណេះដឹង/វិធីគិត ដែលឪពុកម្ដាយមិនធ្លាប់ជួបពីមុនមក ដូចជា Collaborative skills, Active learning, Analytical thinking ទាំងអស់នេះធ្វើឱ្យកើតមានសម្ពាធក្នុងការចិញ្ចឹមកូនដែលឪពុកម្ដាយត្រូវព្យាយាមត្រៀមកូនឱ្យរួចជាស្រេច តែទោះជាប្រឹងព្យាយាមយ៉ាងណា ក៏យើងគ្មានថ្ងៃដឹងបានឡើយថា វាគ្រប់គ្រាន់ឬអត់? ព្រោះពិភពលោកនាពេលអនាគត អាចមានរឿងជាច្រើនទៀតដែលយើងគិតមិនដល់ ទាំងផ្នែកការរស់នៅ ការរៀនសូត្រ និងធ្វើការនាពេលអនាគត រួមទាំងការរស់នៅរួមគ្នាក្នុងសង្គមផងដែរ។
រឿងមួយគត់ដែលឪពុកម្ដាយក្នុងសតវត្សរ៍ទី21 ធ្វើបានល្អបំផុតគឺ ការត្រៀមឱ្យរួចជាស្រេចឱ្យកូន ជាមួយនឹងការរៀនយល់ដឹង និងប្រឈមជាមួយគ្រប់ស្ថានការណ៍ដែលកើតឡើង ដើម្បីថា ទោះជាគេនឹងជួបរឿងអ្វីនៅពេលអនាគត ក៏អាចទប់ទល់បានយ៉ាងទាន់សភាពការណ៍ ត្រៀមជាស្រេចក្នុងការរៀនយល់ដឹងរឿងរ៉ាវផ្សេងៗដែលកើតឡើងបានយ៉ាងពេញប្រសិទ្ធភាពបំផុត។
ដែលមុននឹងត្រៀមឱ្យរួចជាស្រេចនេះ ឪពុកម្ដាយត្រូវមានការយល់ដឹងពាក់ព័ន្ធការអភិវឌ្ឍខួរក្បាលរបស់កូន ព្រោះខួរក្បាលបំពេញតួនាទីពាក់ព័ន្ធនឹងការរៀនយល់ដឹង ការគិត និងការចងចាំ ជាឧបករណ៍ដ៏សំខាន់ក្នុងការរៀនយល់ដឹងយ៉ាងគ្មានទីបញ្ចប់។ ដោយតាំងពីកើតមករហូតដល់អាយុ 6ឆ្នាំ ជាអំឡុងពេលដែលខួរក្បាលសាងកោសិកាប្រសាទចំនួនដ៏ច្រើន ធ្វើឱ្យខួរក្បាលមានទំហំដ៏ធំ និងធំឡើងលឿន។ បន្ទាប់ពីនោះក្នុងអំឡុងអាយុ 6-12ឆ្នាំ ជាអំឡុងវ័យដែលមានការតភ្ជាប់ការធ្វើការងាររបស់ខួរក្បាលឱ្យមានប្រសិទ្ធភាពខ្លាំងឡើង ដោយកម្មវិធីដែលហៅថា Synaptic pruning ឬកម្មវិធីកាត់តុបតែងចរន្តប្រព័ន្ធប្រសាទ។ កោសិកាខួរក្បាលផ្នែកណាបានប្រើ បានត្រូវជំរុញនឹងត្រូវបានរក្សាទុក ផ្នែកដែលមិនបានប្រើក៏នឹងត្រូវកាត់ចោល។ កោសិកាប្រសាទផ្នែកដែលត្រូវបានជ្រើសរើសរក្សាទុក នឹងបានទទួលការអភិវឌ្ឍបន្ត ដូច្នេះ បើខួរក្បាលកុមារមិនបានទទួលការអភិវឌ្ឍ កោសិកាខួរក្បាលដែលគួរមានឱកាសអភិវឌ្ឍ ក៏នឹងចុះខ្សោយបាត់ទៅ ធ្វើឱ្យជំនាញ ឬសមត្ថភាពផ្សេងៗបាត់បង់អស់នៅពេលធំឡើង។ ក្រៅពីនេះ ខួរក្បាលនៅត្រូវការ គ្លុយខូស(ជាតិស្ករ) និងអុកស៊ីហ្ស៊ែនដែលជាថាមពលចម្បងក្នុងការធ្វើការងារ ជាពិសេសអុកស៊ីហ្ស៊ែន ដែលខួរក្បាលត្រូវការច្រើនដល់ទៅ 20%របស់អុកស៊ីហ្ស៊ែនដែលមនុស្សយើងដកដង្ហើមចូលទៅក្នុងរាងកាយ។ រឹតតែមានការរៀនយល់ដឹងច្រើន ខួរក្បាលរឹតតែត្រូវការសារធាតុអាហារ និងអុកស៊ីហ្ស៊ែនច្រើនឡើងដែរ។
តើឪពុកម្ដាយអាចត្រៀមភាពត្រៀមរួចជាស្រេចឱ្យកូនយ៉ាងណាបាន?
1. បង្ហាត់ឱ្យកូនចេះជួយខ្លួនឯង : អាចបង្ហាត់បានតាំងពីកូននៅតូច ដូចជាញ៉ាំបាយ ងូតទឹក ដុសធ្មេញខ្លួនឯង ធ្វើឱ្យកូនមានអារម្មណ៍ថា ខ្លួនឯងអាចប្រើការបាន ធ្វើអ្វីក៏បាន ស្រឡាញ់ និងមានមោទនភាពលើខ្លួនឯង ឬដែលហៅថា Self-esteem ដែលជានេះដំណាក់កាលដំបូងរបស់ការអភិវឌ្ឍខួរក្បាល។
2. បណ្ដោយឱ្យកូនលេង ព្រោះការលេង គឺការងាររបស់កូន : អំឡុងពេលដែលកូនលេង នឹងកើតមានការកំណត់គោលដៅរយៈខ្លីជាលើកៗដោយធម្មជាតិ។ មានការប្រើម្រាមដៃទាំងដប់ និងប្រព័ន្ធប្រសាទប៉ះពាល់ទាំង5 ធ្វើឱ្យខួរក្បាលផ្នែកខាងមុខបានទទួលការអភិវឌ្ឍ។ ឧទាហរណ៍ ការលេងដែលជួយជំរុញខួរក្បាលកូន មានដូចជា ការផាត់ពណ៌ សូនរូបដីឥដ្ឋ លេងតម្រៀបរូប តោងឡើង ជាដើម។
3. សាងសម្ព័ន្ធភាពដ៏ល្អដោយការចិញ្ចឹមកូនបែបវិជ្ជមាន : ដោយការបង្ហាត់បង្រៀនកូនដោយហេតុផល បើកឱកាសឱ្យកូនចេះគិតវិភាគ យល់ដឹង ដោះស្រាយបញ្ហាដោយខ្លួនឯង ដែលនឹងជួយអភិវឌ្ឍ “ខួរក្បាលផ្នែកគិត” បន្តឆ្ពោះទៅរកការរៀនយល់ដឹងដ៏ច្រើនទៀត។ ឯការសម្លុត ទិតៀន ចម្អក ឬដាក់ទោសឱ្យរាងចាល នឹងធ្វើឱ្យកូនមានអារម្មណ៍ថាមិនមានសុវត្ថិភាព ហើយខួរក្បាលមិនបានទទួលការអភិវឌ្ឍ។
4. យកចិត្តទុកដាក់រឿងភោជនាហារ : ជាពិសេសបំផុត សារធាតុអាហារដែលប្រើក្នុងការអភិវឌ្ឍខួរក្បាលរបស់កូន មានដូចជា ប្រូតេអ៊ីន អាស៊ីតខ្លាញ់ចាំបាច់ DHA និង ARA សារធាតុដែក អ៊ីយ៉ូដ វីតាមីន A វីតាមីន B12 ដែលអាចធ្វើបានតាំងពីពេលកូនកើតមក ដោយការចិញ្ចឹមកូនដោយទឹកដោះម្ដាយយ៉ាងតិច 6ខែ តាមដោយការមើលថែទាំកូនឱ្យបានទទួលអាហារស័ក្តិសមទៅតាមវ័យ ដូចជា ស៊ុត ត្រីសមុទ្រ ល្ពៅ មើមការ៉ុត បន្លែស្លឹកបៃតង ទឹកស៊ុបដែលមានគុណប្រយោជន៍ ជាដើម។
ជាសរុបទៅគឺ បើសួរថា តើការចិញ្ចឹមកូនក្នុងសម័យនេះ មានអ្វីដែលខុសប្លែកពីសម័យមុនខ្លះនោះ ចម្លើយក៏គឺ គោលការណ៍ជាមូលដ្ឋានគ្រឹះមិនខុសគ្នាទេ បើខុសក៏ត្រង់រឿថតិចណូឡូជី ដូច្នេះយើងត្រូវត្រៀមកូនឱ្យរួចជាស្រេចក្នុងការរៀនយល់ដឹងគ្រប់ពេលវេលា ដោយសង្កត់ធ្ងន់លើការអភិវឌ្ឍជំនាញគ្រប់ផ្នែក ទាំងជំនាញការធ្វើឱ្យខ្លួនមានសុវត្ថិភាព និងជំនាញក្នុងការរស់នៅ រួមទាំងយកចិត្តទុកដាក់លើរឿងភោជនាហារដែលមានផលល្អចំពោះខួរក្បាល ដើម្បីឱ្យកូនអាចរស់នៅក្នុងសង្គមបានយ៉ាងមានសេចក្ដីសុខ និងក្លាយជាបុគ្គលដែលទទួលបានជោគជ័យក្នុងសតវត្សរ៍ទី 21នេះ៕
November 6, 2020
វីដេអូដំបូងបង្អស់របស់ YouTube និងរឿងរ៉ាវដ៏អស្ចារ្យនៅពីក្រោយ
វីដេអូដំបូងគេបង្អស់នៅលើ Youtube មានរយៈពេលត្រឹមតែ18វិនាទីប៉ុណ្ណោះ ប៉ុន្តែ នៅខាងក្រោយវីដេអូនេះ គឺជារឿងរ៉ាវដ៏អស្ចារ្យដែលនាំឱ្យ Youtube ក្លាយជាបណ្ដាញសង្គមចែករំលែកវីដេអូធំបំផុតក្នុងពិភពលោកនាបច្ចុប្បន្ន។
កាលពី15ឆ្នាំមុន ពោលគឺនៅថ្ងៃទី23មេសាឆ្នាំ2005 សហស្ថាបនិករបស់ Youtube គឺលោក Jawed Karim ដែលត្រូវបានគេស្គាល់ថាជាម្ចាស់គណនី “jawed” នៅលើ Youtube បានបង្ហោះវីដេអូខ្លីមួយដែលមានរយៈពេល18វិនាទី និងមានចំណងជើងថា “ខ្ញុំនៅឯសួនសត្វ” (Me at the zoo)។
ខ្លឹមសារនៃវីដេអូនេះ គឺជាទិដ្ឋភាពដែលលោក Jawed Karim កំពុងឈរនៅក្នុងសួនសត្វ ដោយមានទ្រុង និងសត្វដំរីជាច្រើនក្បាលនៅខាងក្រោយ។ លោក Jawed Karim ចាប់ផ្ដើមដោយការនិយាយថា “បានហើយ យើងកំពុងនៅឯសួនសត្វ នៅខាងមុខសត្វដំរីជាច្រើនក្បាល”។
“ប្រការដែលអស្ចារ្យអំពីបុរសទាំងនេះ នោះគឺពួកគេមានភ្លុកយ៉ាងវែងៗ” Karim បានបញ្ចប់វីដេអូរបស់ខ្លួន ដោយមិនអាចធ្វើឱ្យខ្លីជាងនេះបាន។
លោក Jawed Karim សហស្ថាបនិករបស់ Youtube
វីដេអូដំបូងគេបង្អស់នេះ មិនបានប្រើពាក្យពេចន៍ដែលពួក YouTuber សព្វថ្ងៃនិយាយគ្រប់ៗគ្នានោះទេ ដូចជាឃ្លា “សូមជួយចុច like បើសិនជាអ្នកចូលចិត្តខ្លឹមសារនេះ” ឬថា “ដើម្បីតាមដានវីដេអូថ្មីៗបំផុតរបស់យើងខ្ញុំ សូមចុចsubscribe និងចុចរូបកណ្ដឹង” ។ល។ វីដេអូនេះក៏មិនត្រូវបានបន្ថែម-បន្ថយពន្លឺ ឬពណ៌ ឬមួយកម្មវិធីទីបីណាមួយទាំងអស់។ ទិដ្ឋភាពទាំងមូលត្រូវបានថតយ៉ាងសាមញ្ញជាទីបំផុតដោយកំលោះម្នាក់ដែលមិនមានគេស្គាល់ច្រើន ហើយក៏មិនមានគោលបំណងច្បាស់លាស់។
វីដេអូនេះ បើសិនជាត្រូវបានបង្ហោះនៅក្នុងពេលបច្ចុប្បន្ន នោះប្រហែលជាពិបាកនឹងទាក់ទាញមនុស្សឱ្យចូលមើលសូម្បីត្រឹមតែ100លើក។ ក៏ប៉ុន្តែ ដោយសារតែជាវីដេអូដំបូងគេបង្អស់នៅលើ Youtube វីដេអូនេះបានទាក់ទាញអ្នកចូលមើលដល់ទៅជាង93លានលើក និងការចុច “like” ជាង3លានលើកផងដែរ។
ការចាប់ផ្ដើមរបស់បណ្ដាញសង្គម “យក្ស” ក្នុងពិភពលោក
Jawed Karim កើតឆ្នាំ1979 និងធំឡើងនៅប្រទេសអាល្លឺម៉ង់ តែបានធ្វើដំណើរជាមួយគ្រួសារមករស់នៅសហរដ្ឋអាមេរិកកាលពីឆ្នាំ1992។ បុរសនេះបានបញ្ចប់ការសិក្សានៅវិទ្យាល័យ Central ហើយក៏បានបន្តការសិក្សានៅសាកលវិទ្យាល័យ Illinois។
លោក Karim ជាមួយនឹងលោក Chad Hurley និងលោក Steve Chen
Karim បានចាកចោលសាលារៀននៅមុនពេលបញ្ចប់ការសិក្សា ដើម្បីក្លាយជាបុគ្គលិករបស់ក្រុមហ៊ុន PayPal ប៉ុន្តែ ក្រោយមកគាត់ក៏បានបន្តការសិក្សារហូតបានទទួលសញ្ញាបត្រផ្នែកវិទ្យាសាស្ត្រកុំព្យូទ័រក្នុងឆ្នាំ2004។
ក្នុងអំឡុងធ្វើការឱ្យ Paypay លោក Karim ក៏បានស្គាល់ Chad Hurley និង Steve Chen។ អ្នកទាំង3 ក្រោយមកក៏មានគំនិតបង្កើតគេហទំព័រចែករំលែងវីដេអូដែលមានឈ្មោះថា Youtube នៅក្នុងឆ្នាំ2005។
គំនិតខាងលើនេះ បានកើតឡើងបន្ទាប់ពី Karim យល់ថា មានការលំបាកខ្លាំងក្នុងការស្វែងរកទិន្នន័យនៅលើអ៊ីនធើណិតដែលពាក់ព័ន្ធនឹងព្រឹត្តិការណ៍សំខាន់ៗក្នុងពិភពលោក ដូចជាគ្រោះមហន្តរាយរលកយក្សនៅមហាសមុទ្រឥណ្ឌានាឆ្នាំ2004 ឬហេតុការណ៍លេចសុដន់របស់កំពូលតារាចម្រៀង Janet Jackson នៅលើឆាកតន្ត្រីជាដើម។ល។
Karim មានគំនិតបង្កើតគេហទំព័រចែករំលែកវីដេអូ ហើយក៏បានយកគំនិតនេះទៅពិភាក្សាជាមួយ Hurley និង Chen។ ពួកគេក៏បានរួមដៃគ្នា បង្កើតគេហទំព័រ Youtube នេះឡើង។
បន្ទាប់ពីការបង្ហោះវីដេអូដំបូងដែលមានចំណងជើងថា “Me at the zoo” ដូចដែលបានលើកឡើងខាងដើម Youtube ក៏ចាប់ផ្ដើមដំណើរការកំណែសាកល្បងនៅក្នុងខែឧសភា ឆ្នាំ2005 ហើយមកដល់ខែវិច្ឆិកា ពួកគេមានកំណែផ្លូវការ។ ចាប់តាំងពីពេលនោះមក Youtube កាន់តែមានមនុស្សចូលប្រើប្រាស់ ដោយការបង្ហោះ និងចែករំលែកវីដេអូកាន់តែច្រើនឡើងពីមួយថ្ងៃទៅមួយថ្ងៃ។
ក្រោយរយៈពេល1ឆ្នាំនៃការបង្ហាញខ្លួន នៅខែតុលា ឆ្នាំ2006 ក្រុមហ៊ុន Google បានប្រកាសទិញ Youtube ក្នុងតម្លៃ1.65ពាន់លានដុល្លារអាមេរិក។ ក៏ប៉ុន្តែ ទឹកប្រាក់ដ៏ច្រើនសន្ធឹកសន្ធាប់ដែល Google បានចំណាយ គឺពិតជាមហាស័ក្ដិសម ខណៈដែលពេលនេះ Youtube បានក្លាយជាកម្មវិធីចែករំលែកវីដេអូធំជាងគេបង្អស់ក្នុងពិភពលោក ដោយទាក់ទាញមនុស្សចូលមើលប្រមាណជាជាង2ពាន់លានលើកជារៀងរាល់ខែ និង1ពាន់លានម៉ោងក្នុង1ថ្ងៃៗ។
លោក Karim កាលណោះត្រូវបានជ្រើសរើសជាទីប្រឹក្សាសម្រាប់ Youtube ខណៈដែលគាត់កំពុងជានិស្សិតនៅសាលាStanford។ Karim ក៏ទទួលបានភាគហ៊ុនចំនួន 137,443ហ៊ុននៅក្នុងក្រុមហ៊ុន Google ដែលប្រហាក់ប្រហែលនឹង 185លានដុល្លារនាបច្ចុប្បន្ន(ខែឧសភា ឆ្នាំ2020)៕
ប្រភព៖ សារព័ត៌មានបរទស
May 4, 2020
កំពូលអ្នករកលុយ Youtube ល្បីម្នាក់ ចេញមុខសូមទោស
ដោយយោងតាមសារព័ត៌មាន Teenee ដែលបានចេញផ្សាយនៅថ្ងៃទី4 ខែមករា ឆ្នាំ2018នេះ បានដកស្រង់ព័ត៌មាន ABC News បានឱ្យដឹងថា កំពូលអ្នកលេងបណ្ដាញសង្គមយូធូប (Youtube) ល្បីម្នាក់ដែលអាចរកចំណូលបានពីគណនីយូធូបរាប់ម៉ឺនដុល្លារ មានឈ្មោះថា Logan Paul មានវ័យ 22 ឆ្នាំ បានចេញមុខសូមទោសជាសាធារណៈទៅកាន់មហាជន បន្ទាប់ពីលោកបានបង្ហោះវីដេអូចុងក្រោយមួយ បង្ហាញពីការសើចចំអក មើលងាយប្រមាថដល់សាកសពក្រុមមនុស្សធ្វើអត្តឃាតនៅក្នុងព្រៃដ៏អាណោចអាធ័មមួយ គឺព្រៃអត្តឃាត អាអូឃិងៈហារៈ នៅក្នុងតំបន់ភ្នំហ្វូជិ ប្រទេសជប៉ុន។
ក្រោយពីវីដេអូនោះត្រូវបានបង្ហោះឡើង ភ្លាមៗនោះក៏ទទួលបានអ្នកចូលទស្សនារាប់ពាន់ រាប់ម៉ឺននាក់ ប៉ុន្តែជាអកុសល កំពូលអ្នករកលុយពីយូធូបម្នាក់នេះ ត្រូវបានមហាជនសម្ដែងមតិរិះគន់នៅខាងក្រោមវីដេអូថា លោកមិនគោរពដល់វិញ្ញាណក្ខន្ធមនុស្សដែលបានធ្វើអត្តឃាតយ៉ាងអាណោចអាធ័មនៅក្នុងព្រៃ និងថែមទាំងសើចចំអក កំប្លែងលេងសើចគ្មានសុជីវធម៌ មើលងាយប្រមាថដល់សេចក្ដីទុក្ខសោករបស់សាកសព។ ដូច្នេះហើយ ក្រោយរងការិះគន់ បុរសវ័យ 22 ឆ្នាំខាងលើនេះ ត្រូវបានគេដកហូតការងារជាច្រើនកន្លែង និងលែងអនុញ្ញាតឱ្យរកលុយនៅលើយូធូបជាបន្ដទៀត ដែលជាហេតុបណ្ដាលឱ្យលោកបាត់បង់ប្រាក់ចំណួលអស់រាប់ម៉ឺនដុល្លារនៅក្នុងមួយខែៗ។
វីដេអូសូមទោសរបស់បុរសនេះ បានរៀបរាប់ថា ខ្លួនមិនធ្លាប់ត្រូវគេជេរប្រមាថរិះគន់យ៉ាងចាស់ដៃបែបនេះពីមុនទេ ព្រោះលោកក៏មិនធ្លាប់ធ្វើរឿងខុសឆ្គងបែបនេះពីមុនមកដូចគ្នាដែរ ក្ដីអស់សង្ឃឹម និងការរអៀសខ្លួនបានធ្វើឱ្យលោកដឹងពីកំហុសខ្លួនជាខ្លាំង ហើយលោកក៏ជាមនុស្សម្នាក់ព្រមទទួលកំហុសមួយនេះដែរ។
គួរបញ្ជាក់ផងដែរថា ព្រៃអត្តឃាត អាអូឃិងៈហារៈ ដែលស្ថិតនៅតំបន់ភ្នំ ហ្វូជិ ប្រទេសជប៉ុន គឺជាព្រៃ ឬជាកន្លែងមួយសម្រាប់មនុស្ស និងក្រុមមនុស្សដែលមានបំណងចង់ស្លាប់មកធ្វើអត្តឃាតបញ្ចប់ជីវិត និងបញ្ហារបស់ខ្លួន ហើយក៏ជាទីកន្លែងបញ្ចប់ជីវិតដ៏ពេញនិយម និងល្បីល្បាញមួយនៅក្នុងប្រទេសជប៉ុន រហូតបានក្លាយជាកន្លែងទាក់ទាញភ្ញៀវទេសចរ ដែលចង់ដឹង នឹងចង់ឃើញពីភាពភ័យខ្លាចនៅក្នុងព្រៃនេះទៀតផង។ នៅខាងមុខផ្លូវទៅកាន់ព្រៃមរណៈមួយនេះ ក៏មានការបិទបដាណែនាំ និងដាស់តឿនដល់មនុស្សដែលសម្រេចចិត្តគិតខ្លីថា «សូមទៅពិគ្រោះជាមួយគ្រូពេទ្យផ្លូវចិត្តជាមុនសិន មុនសម្រេចចិត្តមកធ្វើអត្តឃាតនៅទីនេះ»៕
January 4, 2018
Youtube Channels ល្អបំផុតសម្រាប់សិស្សវិទ្យាល័យលើពិភពលោក
នៅក្នុងសតវត្សរ៍ទី21នេះ បណ្តាញបច្ចេកវិទ្យាបានកែសម្រួលថ្នាក់រៀនមួយចំនួនពីការបង្រៀនតាមបែបបុរាណ មកជាថ្នាក់រៀនបច្ចេកវិទ្យា (flip classroom)។ ទន្ទឹមនឹងនេះ សិស្សក៏អាចសិក្សាស្រាវជ្រាវបានដោយខ្លួនឯងផងដែរនៅគ្រប់ពេលទំនេររបស់ខ្លួនតាមរយៈគេហទំព័រសំខាន់ៗ រួមទាំង Channels Youtube ដែលធ្វើការផ្សព្វផ្សាយពីចំណេះដឹងជាសាធារណៈផងដែរ។
Youtube ត្រូវបានបង្កើតឡើងនៅក្នុងឆ្នាំ 2005 តែវាទើបត្រូវបានគេប្រើប្រាស់ច្រើននៅក្នុងវិស័យអប់រំនាពេលថ្មីៗនេះតាមរយៈការអភិវឌ្ឍមុខងារថ្មីៗ ដែលឆ្លើយតបនឹងការអប់រំ។ ម្យ៉ាងវិញទៀតតាមរយៈការស្ទង់មតិនៅសហរដ្ឋអាមេរិកបានរកឃើញថា មានសិស្សភាគច្រើនប្រើប្រាស់ Youtube ក្នុងគោលបំណង 2 សំខាន់ៗ គឺការកម្សាន្ត និងមុខងារអប់រំរបស់វា។
ដោយមើលឃើញថា Youtube មានសារៈសំខាន់សម្រាប់សិស្សវិទ្យាល័យ គេហទំព័រ education world ដែលជាគេហទំព័រអប់រំដ៏ល្បីល្បាញមួយបង្ហាញថាមាន Channels Youtube មួយចំនួនកំពុងក្លាយជា Channel ដែលមានតម្លៃជាសកល និងល្អបំផុតសម្រាប់សិស្សវិទ្យាល័យ ដូចជា ៖
1. Crash Course
វាជា Channel មួយដែលពោរពេញទៅដោយភាពទាក់ទាញជាមួយនឹងរូបភាពកំប្លុកកំប្លែង និងរូបតុក្កតាគួរឱ្យទាក់ទាញជាមួយនឹងមេរៀនអក្សរសិល្ប៍ រូបវិទ្យា ប្រវត្តិវិទ្យា ជីវវិទ្យា សង្គមវិទ្យា និងមេរៀនប្រកបដោយគុណតម្លៃជាច្រើនទៀត។ វីដេអូទាំងអស់នោះ ភាគច្រើនគឺសុទ្ធសឹងតែឆ្លើយតបទៅនឹងមេរៀនរបស់សិស្សនៅក្នុងសាលា ព្រមទាំងអាចជួយឱ្យសិស្សដឹងនូវព័ត៌មានពាក់ព័ន្ធនឹងការសិក្សាច្រើនមុនពេលមេរៀនសំខាន់ពិតប្រាកដចូលមកដល់ទៀតផង។
2. Big Think
Big Think ជា Channel ដែលត្រូវបានបង្ហាញដោយអ្នកជំនាញពូកែៗ ដែលបង្ហាញពីគំនិត និងជំនាញដែលត្រូវមាននៅក្នុងសតវត្សរ៍ទី21នេះ។ ជាធម្មតាវីដេអូនៅក្នុង Channel នេះជាវីដេអូបែបសាមញ្ញ តែវាបានបំផុសគំនិតសិស្សឱ្យមានការគិតយ៉ាងស៊ីជម្រៅ និងអប់រំផ្លូវចិត្តបានល្អថែមទៀតផង។ ប្រធានបទសំខាន់ៗនៃ Channel នេះមានដូចជា វិទ្យាសាស្រ្តនយោបាយ ចិត្តវិទ្យា និងសង្គមសាស្ត្រ ជាដើម។
3. TED-Ed
សិស្សភាគច្រើននៅលើពិភពលោករួមទាំងកម្ពុជាផង ប្រហែលជាបានស្គាល់ TED-Ed ដែលជា Channel Youtube ល្បីមួយដែលប្រមូលផ្តុំដោយគំនិតទូលំទូលាយ ព្រមទាំងបង្ហាញពីប្រធានបទ និងចំណេះដឹងដែលមនុស្សគ្រប់គ្នាស្មានមិនដល់។ រហូតមកដល់ពេលនេះ មានវីដេអូដែលផលិតឡើងជាគំនូរជីវចលមិនតិចជាង 500 រឿងទេ ដែលត្រូវបានបង្ហោះនៅក្នុង Channel អប់រំមួយនេះ។ វាក៏បានបែងចែកជាផ្នែកសំខាន់ៗចំនួន 2 ដើម្បីអប់រំមនុស្ស គឺ TEDYouth Talks និង TED-Ed Professional Development។
4. Bright Storm
Bright Storm ជា Channel ដែលបង្ហាញពីវីដេអូរបស់គ្រូបង្រៀនជាច្រើនដែលបង្រៀននៅលើក្តាខៀន។ អ្នកដែលបង្រៀននៅក្នុងវីដេអូទាំងអស់នេះ សុទ្ធសឹងតែជាអ្នកដែលមានបទពិសោធ និងសមត្ថភាពខ្ពស់ក្នុងការបង្រៀន។ វាក៏បានបង្ហាញផងដែរនូវភ័ស្តុតាងពិសោធជាក់ស្តែងនៅក្នុងមេរៀននីមួយៗដើម្បីឱ្យសិស្សងាយយល់ និងកម្សាន្តក្នុងពេលដែលកំពុងសិក្សាជាមួយវីដេអូផងដែរ៕
May 24, 2017