Tottenham - La Reine Media

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?

(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។

លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។

ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។

ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។

បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។

តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស

យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕

May 30, 2023

លោក Pochettino ៖ Tottenham ត្រូវតែទិញចូលកីឡាករថ្មី ដើម្បីប្រជែងដណ្តើមពាន

លោក Mauricio Pochettino មានការព្រួយបារម្ភថា ក្រុមមាន់ខ្នាយមាស Tottenham នឹងមិនអាចធ្វើការប្រជែងដណ្តើមពានក្របខ័ណ្ឌ Premier League បានទេ ប្រសិនបើលោកមិនទិញចូលកីឡាករថ្មីៗដែលអាចបង្ខំឲ្យខ្សែប្រយុទ្ធ Harry Kane ខ្សែបម្រើ Dele Alli និងកីឡាករសំខាន់ៗជាច្រើនផ្សេងទៀត បង្កើនកម្រិតលេងរបស់ពួកគេទេនោះ។

លោក Pochettino ទទួលស្គាល់ថា Tottenham មិនអាចធ្វើការប្រជែងផ្នែកហិរញ្ញវត្ថុជាមួយនឹងក្លិបដែលមានទ្រព្យធនច្រើនឡើយ ប៉ុន្តែ លោកមានការប្តេជ្ញាចិត្តក្នុងការនៅជាមួយក្រុមរបស់លោកដែលបានបញ្ចប់ក្នុងចំណាត់ថ្នាក់លេខ២ បន្ទាប់ពីក្រុម Chelsea កាលពីរដូវកាលមុន។ គ្រូបង្វឹករូបនេះ មិនទាន់បានទិញចូលកីឡាករណាម្នាក់នៅរដូវក្តៅនេះឡើយ ខណៈដែលខ្សែការពារ Kyle Walker បានចាកចេញពី Spurs ទៅកាន់ក្លិប Manchester City ក្នុងតម្លៃខ្លួនដ៏ខ្ពស់មួយ។ អ្នកចាត់ការទូទៅរូបនេះ ជឿជាក់ថា ភាពរឹងមាំក្នុងក្រុមអាចនឹងបាត់បង់ ប្រសិនបើកីឡាករដែលមានស្រាប់មិនមានការប្រកួតប្រជែងជាមួយនឹងកីឡាករចំណូលថ្មី ឬក៏ធ្វើឲ្យកៅអីរបស់ពួកគេក្នុងក្រុមស្ថិតក្នុងការគំរាមទេនោះ។ លោក Pochettino បានឲ្យដឹងថា៖ «តើក្លិប Manchester City, Liverpool, Chelsea និងក្លិបផ្សេងទៀតបានព្យាយាមក្នុងការធ្វើឲ្យរដូវកាលរបស់ពួកគេកាន់តែល្អប្រសើរឡើងយ៉ាងដូចម្តេច?

ការនាំយកកីឡាករ និងព្យាយាមដាក់សម្ពាធបន្ថែមទៀតទៅលើតារាឆ្នើមៗ និងកីឡាករសំខាន់ៗរបស់ពួកគេ គឺជារឿងដែលយើងត្រូវតែធ្វើដែរសម្រាប់ក្រុមរបស់យើង»។

ក្រោយពីបានចូលរួមជាមួយនឹងក្លិប Tottenham កាលពីឆ្នាំ2014មក លោក Pochettino បានបញ្ជាក់ថា ការរំពឹងទុកផ្សេងៗបានផ្លាស់ប្តូរ ស្របពេលមានការព្រួយបារម្ភថា កីឡាករឆ្នើមៗអាចនឹងចាកចេញ ប្រសិនបើក្លិបនេះ មិនបានឈ្នះកៅអីទៅលេងក្នុងក្របខ័ណ្ឌ Champions League ទេនោះ៕
ប្រភពព័ត៌មាន៖ The Guardian

August 2, 2017

លោក Mourinho ថា Tottenham នឹងក្លាយជាគូប្រជែងដ៏ចម្បងសម្រាប់ពាន Premier League

លោក Jose Mourinho បានចាត់ទុក Tottenham ជាគូប្រជែងដ៏ខ្លាំងក្នុងការឈ្នះពានក្របខ័ណ្ឌ Premier League នៅរដូវកាលខាងមុខនេះ និងបានធ្វើការប្រៀបធៀបការប្រជែងរបស់លោកនៅឯក្លិប Manchester United ទៅនឹងការប្រជែងដែលលោកធ្លាប់បានជួបប្រទះកាលពីមុនក្នុងពេលដឹកនាំក្លិប Real Madrid តាមរយៈការបញ្ជាក់ថា ក្លិបនេះ ត្រូវបានគេមើលរំលងទៅលើ «ការវិវឌ្ឍនៃកីឡាបាល់ទាត់» នៅពេលលោកបានចូលកាន់តំណែងជំនួសលោក Louis van Gaal កាលពីរដូវក្តៅមុន។

លោក Mourinho តែងតែបានឈ្នះពានជើងឯកក្នុងរាល់រដូវកាលទី២នៃអាជីពដឹកនាំរបស់លោក ប៉ុន្តែ គេជឿជាក់ថា ការសម្រេចបាននូវសមិទ្ធផលនេះម្តងទៀត នឹងក្លាយជារឿងដ៏លំបាកក្នុងយុទ្ធនាការខាងមុខនេះ។ គ្រូបង្វឹករូបនេះមានអារម្មណ៍ថា Man United គឺជាបេក្ខភាពក្នុងការប្រជែងដណ្តើមពានលីកជាលើកទី21របស់ពួកគេ ប៉ុន្តែបានចាត់ទុក Spurs គឺជាបេក្ខភាពដ៏ចម្បងពីព្រោះពួកគេបានរក្សាទុករាល់កីឡាករសំខាន់ៗទាំងអស់ លើកលើកលែងតែ Kyle Walker ម្នាក់ប៉ុណ្ណោះ។

ខ្សែការពារអន្តរជាតិអង់គ្លេសរូបនេះ ត្រូវបានលក់ទៅឲ្យក្លិប Manchester City ពីព្រោះអ្នកជំនួសកន្លែងរបស់គេគឺកីឡាករ Kieran Trippier ក៏ជាតារាឆ្នើមផងដែរ។ នៅពេលដែលត្រូវបានចោទសួរឲ្យលោកធ្វើការប៉ាន់ប្រមាណទៅលើឱកាសរបស់លោកក្នុងការជួយឲ្យក្រុម Man United ក្លាយជាម្ចាស់ជើងឯកម្តងទៀតនោះ លោក Mourinho បានឆ្លើយថា៖ «ខ្ញុំគិតថា យើងមិនមែនជាបេក្ខភាពដ៏ធំឡើយសម្រាប់ការឈ្នះពាន ប៉ុន្តែយើងគ្រាន់តែជាបេក្ខភាពមួយប៉ុណ្ណោះ។

គ្រប់គ្នានិយាយអំពីទំហំនៃការបណ្តាក់ទុនលើកីឡាករថ្មីៗនៅឯ Man City ប៉ុន្តែមានក្រុមមួយផ្សេងទៀតដែលខ្ញុំមានអារម្មណ៍ថា ទំហំនៃការបណ្តាក់ទុនរបស់ពួកគេក៏ស្ថិតក្នុងកម្រិតអស្ចារ្យផងដែរ គឺ Tottenham។ ពួកគេរក្សាទុក Dele Alli, Harry Kane និង Toby Alderweireld ហើយពួកគេក៏ទុក Eric Dier ផងដែរ។ ពួកគេចង់ទុករាល់កីឡាករដែលពួកគេចង់ទុក»៕
ប្រភពពី៖ The Guardian

July 26, 2017

Kyle Walker បំពេញការផ្ទេរទៅ Man City ជាផ្លូវការក្នុងតម្លៃខ្លួន53លានផោន

Kyle Walker បច្ចុប្បន្ន ក្លាយជាខ្សែការពារដែលមានតម្លៃខ្លួនខ្ពស់ជាងគេបំផុតរបស់ពិភពលោក ក្រោយពីក្លិប Manchester City បានបំពេញការផ្ទេររបស់គេពីក្លិប Tottenham ក្នុងតម្លៃខ្លួនគោលចំនួន 50លានផោន (ស្មើនឹង65.4លានដុល្លារអាមេរិក) ដែលនឹងកើនដល់53លានផោន សម្រាប់ខ្សែការពារស្លាបស្តាំអន្តរជាតិអង់គ្លេសរូបនេះ។

បើបូកទាំងប្រាក់ឧបត្ថម្ភផ្សេងៗ ការផ្ទេរនេះនឹងបំបែកកំណត់ត្រាលើតម្លៃខ្លួន50លានផោនដែលក្លិប Paris St-Germain បានចំណាយទិញខ្សែការពារ David Luiz ពីក្លិប Chelsea កាលពីឆ្នាំ2014 ហើយក៏នឹងធ្វើឲ្យ Walker ក្លាយជាកីឡាករអង់គ្លេសដែលមានតម្លៃខ្ពស់ជាងគេបំផុតផងដែរ។ អតីតខ្សែការពាររបស់ក្លិប Sheffield United រូបនេះបានទទួលស្គាល់ថា៖ «វាហាក់ដូចជាមានអារម្មណ៍ចម្លែកបន្តិច។ ខ្ញុំបានស្ថិតនៅជាមួយនឹងក្លិប Tottenham អស់រយៈពេលជាច្រើនឆ្នាំមកហើយ ប៉ុន្តែ ខ្ញុំពិតជារំភើបណាស់ចំពោះការចាប់ផ្តើមទំព័រថ្មីមួយក្នុងអាជីពរបស់ខ្ញុំ។ ខ្ញុំពិតជាចង់ចាប់ផ្តើមលេងណាស់។ ខ្ញុំពិតជារំភើបក្នុងការចុះហត្ថលេខាជាមួយនឹងក្លិប Man City»។

Walker បានបន្ថែមទៀតថា៖ «ជាមួយនឹងទំហំរបស់ក្លិបនេះ យើងត្រូវតែបន្ត និងប្រជែងយកពានសំខាន់ៗទាំងអស់ពីគ្រប់ទិសទី ហើយជាការរំពឹងទុក ពានទាំងនោះអាចបន្ថែមទៅលើប្រវត្តិរូបរបស់ខ្ញុំ ពីព្រោះមិនធ្លាប់បានឈ្នះពានច្រើនឡើយមកទល់ពេលនេះ ក្នុងអាជីពរបស់ខ្ញុំ។ Tottenham គឺជាក្លិបដ៏អស្ចារ្យមួយ ព្រោះពួកគេបានជួយខ្ញុំឲ្យស្ថិតក្នុងទីតាំងដែលខ្ញុំកំពុងឈរនៅទីនេះ។ ខ្ញុំបានរៀនសូត្រជាច្រើន ជាពិសេសក្រោមការដឹកនាំរបស់លោក Mauricio Pochettino ហើយគាត់ពិតជាអស្ចារ្យណាស់ចំពោះខ្ញុំ»៕
ប្រភពពី៖ The Guardian

July 15, 2017

អ្នកចាំទី Cech ផ្ទុះកំហឹង ក្រោយ Arsenal ចាញ់ក្រុម Spurs

អ្នកចាំទី Petr Cech របស់ក្រុម Arsenal មិនបានព្យាយាមលាក់បាំងនូវកំហឹង និងការខកចិត្តដែលរូបគេមានអារម្មណ៍ឡើយ ក្រោយពីការរងបរាជ័យក្នុងលទ្ធផល ២-០ ក្រោមស្នាដៃក្រុម Tottenham Hotspur កាលពីថ្ងៃអាទិត្យ បានផ្តល់នូវការខកចិត្តដ៏ធំមួយដល់ក្រុមកាំភ្លើងធំក្នុងការប្រជែងយកកៅអីក្នុងក្របខ័ណ្ឌ Champions League។

គ្រាប់បាល់ស៊ុតបញ្ចូលទីពីសំណាក់ខ្សែបម្រើ Dele Alli និងខ្សែប្រយុទ្ធ Harry Kane បានជួយឲ្យក្រុម Spurs ដែលស្ថិតក្នុងចំណាត់ថ្នាក់លេខ២នៅលើតារាង Premier League នោះ នាំមុខ១៧ពិន្ទុដាច់លើក្រុម Arsenal និងជួយឲ្យក្រុមមាន់ខ្នាយមាសមួយនេះ ត្រូវបញ្ចប់ដោយស្ថិតនៅពីលើ Arsenal ជាលើកទី១បើគិតចាប់តាំងពីឆ្នាំ១៩៩៥។ Tottenham នៅតែស្ថិតក្នុងការប្រជែងពាន ខណៈដែលក្រុមរបស់លោក Mauricio Pochettino កំពុងតែដេញតាមពីក្រោយក្រុម Chelsea ៤ពិន្ទុ ហើយក្រុមទាំងពីរនៅសល់៤ប្រកួតដូចគ្នានៅរដូវកាលនេះ។

ផ្ទុយទៅវិញក្រុម Arsenal កំពុងតែស្ថិតក្នុងចំណាត់ថ្នាក់លេខ៦ និងដេញតាមពីក្រោយក្រុមឈរលេខ៤ Manchester City ដល់ទៅ៦ពិន្ទុ បើទោះបីក្រុមកាំភ្លើងធំនៅសល់មួយប្រកួតក្នុងដៃក៏ដោយ។ ការប្រកួតបន្ទាប់របស់ Arsenal គឺការធ្វើជាម្ចាស់ផ្ទះទទួលក្រុម Manchester United ដែលកំពុងតែស្ថិតក្នុងចំណាត់ថ្នាក់លេខ៥ និងនាំមុខ៥ពិន្ទុពីលើក្រុម Arsenal របស់លោក Arsene Wenger នៅចុងសប្តាហ៍នេះ។ Cech បានប្រាប់គេហទំព័ររបស់ Arsenal ថា៖ «ខ្ញុំមានអារម្មណ៍ខឹង និងខកចិត្តណាស់ ពីព្រោះនេះមិនមែនជាការប្រកួតដែលយើងចង់ចាញ់ឡើយ ហើយនេះជាការខកចិត្តដ៏ធំបំផុតសម្រាប់យើង»៕

ប្រភពព័ត៌មាន៖ Reuters

May 2, 2017

Alli និង Kane ជួយឲ្យ Spurs បំបាក់មុខកាំភ្លើងធំ និងរក្សាសម្ពាធលើតោខៀវ

ខ្សែបម្រើ Dele Alli និងខ្សែប្រយុទ្ធ Harry Kane បានជួយឲ្យក្រុមមាន់ខ្នាយមាស Tottenham Hotspur ស្ថិតក្នុងការប្រជែងដណ្តើមពាន Premier League ខណៈដែលក្រុមរបស់ពួកគេបាក់ក្រុមកាំភ្លើងធំ Arsenal ក្នុងលទ្ធផល ២-០ នាកីឡដ្ឋាន White Hart Lane ក្នុងការប្រកួតរវាងក្រុមស្ថិតក្នុងទីក្រុងឡុងដ៍តែមួយកាលពីថ្ងៃអាទិត្យ។

ក្រុមកំពុងនាំមុខ Chelsea បានបន្ថែមការនាំមុខរបស់ពួកគេរហូតដល់ទៅ៧ពិន្ទុតាមរយៈការផ្តួលក្រុម Everton ៣-០ ក្នុងការប្រកួតមួយគូមុននេះនៅថ្ងៃដដែលនោះ ប៉ុន្តែ ក្រុម Spurs របស់លោក Mauricio Pochettino បានកាត់បន្ថយគម្លាតនោះឲ្យនៅត្រឹម៤ពិន្ទុវិញ ជាមួយនឹងការបង្ហាញពីទម្រង់លេងយ៉ាងល្អ។ គ្រាប់បាល់បញ្ចូលទីទាំង២គ្រាប់នោះបានកើតឡើងនៅក្នុងចន្លោះពេល១៤៦វិនាទីក្នុងតង់ទី២ ខណៈដែល Alli បានស៊ុតបាល់បំប៉ោងសំណាញ់ទីពីបាល់ក្រឡក ហើយ Kane បានស៊ុតបាល់ប៉េណាល់ទីដើម្បីធ្វើឲ្យគ្រាប់បាល់សរុបរបស់ពួកគេកើនដល់១៧គ្រាប់ និង២១គ្រាប់រៀងៗខ្លួនក្នុងយុទ្ធនាការនារូវកាលនេះ។

Spurs នឹងបញ្ចប់ដោយស្ថិតក្នុងចំណាត់ថ្នាក់ពីលើក្រុម Arsenal ជាលើកទី១បើគិតចាប់តាំងពីឆ្នាំ១៩៩៥ ដើម្បីបញ្ចប់ការរង់ចាំអស់រយៈពេល២២ឆ្នាំ។ Spurs នឹងត្រូវលេងនៅកីឡដ្ឋាន Wembley នៅរដូវកាលក្រោយ នៅមុនពេលប្តូរទៅកាន់កីឡដ្ឋានថ្មីរបស់ពួកគេ ដែលនឹងត្រូវសាងសង់នៅលើទីតាំងនៃកីឡដ្ឋានរបស់ពួកគេនាពេលបច្ចុប្បន្ន។ ។ លោក Mauricio Pochettino អ្នកចាត់ការទូទៅរបស់ក្រុម Tottenham បានប្រាប់សារព័ត៌មាមន BBC ថា៖ «ខ្ញុំពិតជារីករាយណាស់។ វាជាការប្រកួតដ៏សំខាន់មួយ ហើយវាជាការបង្ហាញពីទម្រង់លេងគួរជាទីពេញចិត្តមួយ»៕

ប្រភពព័ត៌មាន៖ The Guardian

May 1, 2017

មាន់ខ្នាយមាស Spurs សម្លឹងរកការផ្តល់ការខកចិត្តដល់កាំភ្លើងធំ ថ្ងៃអាទិត្យនេះ

ក្រុម Tottenham Hotspur នឹងសម្លឹងរកការបន្ថែមការខកចិត្តដល់ក្រុម Arsenal នៅពេលដែលក្រុមទាំងពីរជួបគ្នាក្នុងការប្រកួតរវាងក្រុមស្ថិតក្នុងទីក្រុងឡុងដ៍តែមួយ នាកីឡដ្ឋាន While Hart Lane នៅរាត្រីថ្ងៃអាទិត្យនេះ។

។ ក្រុមមាន់ខ្នាយមាសមួយនេះ នឹងឈានទៅកាន់ការប្រកួតនេះទាំងការជឿជាក់ ក្រោយពីបានកត់ត្រាជ័យជម្នះដល់ទៅ៤លើកពីការប្រកួត៥លើកចុងក្រោយរបស់ពួកគេ ហើយអ្វីដែលគួរឲ្យកត់សម្គាល់នោះគឺថា ពួកគេក៏ដណ្តើមបានជ័យជម្នះ៥លើកពីការប្រកួតក្នុងផ្ទះខ្លួនឯងទាំង៥លើកចុងក្រោយរបស់ពួកគេងផងដែរ។ ក្រោយពីបានយកឈ្នះលើក្រុមឡើងទម្រង់លេង Crystal Palace ទាំងប្រផិតប្រផើយក្នុងលទ្ធផល ១-០ កាលពីពាក់កណ្តាលសប្តាហ៍នេះ លោក Mauricio Pochettino អ្នកចាត់ការទូទៅរបស់ Spurs បានសន្យាថា នឹងមិនបោះបង់ការប្រជែងដណ្តើមពាន Premier League ហើយនិងប្រយុទ្ធរហូតដល់ដំណាក់កាលចុងក្រោយ។

គ្រូបង្វឹករូបនេះបានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»។ ដោយឡែក ក្រុម Arsenal នឹងឈានទៅកាន់ការប្រកួតនេះជាមួយនឹងជ័យជម្នះ៣លើ ស្មើ១លើក និងចាញ់១លើកពីការប្រកួត៥លើកចុងក្រោយរបស់ពួកគេ ប៉ុន្តែ ក្រុមកាំភ្លើងធំមួយនេះ ដណ្តើមបានជ័យជម្នះតែពីរលើកគត់ពីការប្រកួតកៅដី៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង១០:៣០ទៀបភ្លឺ៕

ការជួបគ្នា៣លើកចុងក្រោយរវាងក្រុមទាំងពីរ

06.11.16 Arsenal 1-1 Tottenham

05.03.16 Tottenham 2-2 Arsenal

08.11.15 Arsenal 1-1 Tottenham

April 28, 2017

លោក Pochettino៖ Spurs ត្រៀមលក្ខណៈរួចរាល់ក្នុងការប្រយុទ្ធជាមួយ Chelsea

លោក Mauricio Pochettino បានអះអាងថា ការដណ្តើមបានជ័យជម្នះដ៏សំខាន់របស់ក្រុម Tottenham ក្នុងលទ្ធផល ១-០ នៅលើទឹកដីក្រុម Crystal Palace បានបង្ហាញថា ពួកគេត្រៀមលក្ខណៈរួចរាល់ក្នុងការដណ្តើមយកឱកាសភ្លាមៗ ប្រសិនបើក្រុម Chelsea ភ្លាត់ស្នៀតក្នុងការប្រជែងពាន។

ក្រុមរបស់លោក Pochettino បានកាត់បន្ថយគំលាតដេញតាមពីក្រោយក្រុមតោខៀវ Chelsea ឲ្យនៅត្រឹម៤ពិន្ទុ ខណៈនៅសល់៥ប្រកួតទៀត ក្រោយពីគ្រាប់បាល់ស៊ុតបញ្ចូលទីយ៉ាងល្អនៅជិតបញ្ចប់ការប្រកួតរបស់ខ្សែបម្រើ Christian Eriksen បានជួយឲ្យពួកគេដណ្តើមបានជ័យជម្នះដ៏សំខាន់នៅកីឡដ្ឋាន Selhurst Park កាលពីថ្ងៃពុធ។ ក្រុមមាន់ខ្នាយមាស Spurs ហាក់បានជួបការលំបាកក្នុងការបំភ្លេចការខកចិត្តរបស់ពួកគេពីការធ្លាក់ចេញពីយុទ្ធនាការដណ្តើមពាន FA Cup វគ្គពាក់កណ្តាលផ្តាច់ព្រ័ត្រ កាលពីសប្តាហ៍មុន ក្រោមស្នាដៃក្រុម Chelsea ខណៈដែល Tottenham ស្ទើរតែបានខ្ជះខ្ជាយឱកាសក្នុងការរក្សាការដាក់សម្ពាធលើ Chelsea ទៅហើយ នៅមុនពេលធ្វើការស្រោចស្រង់វិញ។ ក្រុម Tottenham ហាក់ដូចជាស្ថិតក្រោមសម្ពាធដូចកាលពីរដូវកាលមុនដែរ ដែលនៅពេលនោះពួកគេបានអនុញ្ញាតឲ្យក្រុម Leicester ឈ្នះពាន ក្រោយពីផ្តល់ការប្រជែងដល់ពួកគេក្នុងរយៈពេលដ៏ខ្លី។

ប៉ុន្តែ លោក Pochettino ជឿជាក់ថា ស្មារតីប្រយុទ្ធដែលក្រុមរបស់លោកបានបង្ហាញដើម្បីផ្តួលក្រុមឡើងទម្រង់លេង Crystal កំពុងតែធ្វើឲ្យពួកគេមានឱកាសជាច្រើនក្នុងការឈ្នះពានជាលើកទី១ បើគិតចាប់តាំងពីឆ្នាំ១៩៦១។ លោក Pochettino បានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»៕

ទស្សនាវីដេអូ Highlights៖

ប្រភពពី: Worldsoccertalk

April 27, 2017

Kante របស់តោខៀវ ជាប់ឈ្មោះជាកីឡាករឆ្នើមប្រចាំឆ្នាំ

ការបង្ហាញទម្រង់លេងយ៉ាងល្អរបស់ខ្សែបម្រើដ៏មានឥទ្ធិពល N’Golo Kante សម្រាប់ក្រុមតោខៀវ Chelsea បានទទួលផលតបស្នងវិញសម្រាប់ការខិតខំរបស់គេកាលពីថ្ងៃអាទិត្យ ក្រោយពីបានឈ្នះពានកីឡាករបាល់ទាត់អាជីពឆ្នើមប្រចាំឆ្នាំរបស់អង់គ្លេស (PFA)។

ខ្សែបម្រើអន្តរជាតិបារាំងវ័យ២៦ឆ្នាំរូបនេះ បានយកឈ្នះលើខ្សែប្រយុទ្ធ Harry Kane របស់ក្លិប Tottenham និងខ្សែប្រយុទ្ធ Romelu Lukaku របស់ក្លិប Everton ដើម្បីលើកពានកិត្តិយសមួយនេះ។ វាអាចប្រហែលជាមិនមែនជាពានតែមួយដែលរូបគេនឹងត្រូវលើកនៅរដូវកាលនេះឡើយ ខណៈដែលរូបគេស្ថិតយ៉ាងប្រៀកក្នុងការក្លាយជាកីឡាករដំបូងគេក្នុងការឈ្នះពានលីកពីរឆ្នាំជាប់ៗគ្នាជាមួយនឹងក្លិបផ្សេងគ្នា។

Kante បានឲ្យដឹងថា៖ «ក្នុងការត្រូវបានគេជ្រើសរើសឲ្យជាប់ជាកីឡាករឆ្នើមប្រចាំឆ្នាំ ពិតជាមានន័យណាស់សម្រាប់ខ្ញុំ។ វាមានន័យថា ពិភពលោកត្រូវបានជ្រើសរើស ហើយវាគឺជារយៈពេលពីររដូវកាលដ៏អស្ចារ្យ ដោយរដូវកាលទីមួយជាមួយនឹងក្លិប Leicester ហើយយើងកំពុងតែស្ថិតក្នុងទម្រង់លេងយ៉ាងល្អជាមួយនឹង Chelsea។ ក្នុងការក្លាយជាកីឡាករឆ្នើមប្រចាំឆ្នាំ វាគឺជាកិត្តិយសមួយ»៕

ប្រភពព័ត៌មាន៖ The Mirror

April 24, 2017

Tag: Tottenham