TAI - La Reine Media

ហេតុអ្វីអគារខ្ពស់ជាងគេនៅតៃវ៉ាន់ មិនបាក់រលំក្នុងរញ្ជួយដីជាង 7 រិចទ័រ?

Taipei 101 ដែលជាអគារមានកម្ពស់ 508 ម៉ែត្រ នៅតែមានសុវត្ថិភាព គ្រាដែលរញ្ជួយដីកើតឡើង។ ភាពអស្ចារ្យនេះគឺដោយសារគ្រឹះដ៏រឹងមាំ និងប្រព័ន្ធកាត់បន្ថយភាពរញ្ជួយដែលមានប៉ោលទម្ងន់ 730 តោន ព្យួរនៅក្នុងអគារ។

រញ្ជួយដីមួយបានកើតឡើងកាលពីវេលាម៉ោង 7 និង 58 នាទី ថ្ងៃទី 3 មេសា នៅភាគខាងកើតកោះតៃវ៉ាន់ ក្នុងជម្រៅ 15.5 គីឡូម៉ែត្រក្រោមដី។

យោងតាមប្រធានមជ្ឈមណ្ឌលរញ្ជួយដីតៃវ៉ាន់ Wu Chien-fu នេះគឺជារញ្ជួយដីកម្លាំងខ្លាំងបំផុតនៅលើកោះនេះ ក្នុងរង្វង់ 25 ឆ្នាំកន្លង។

ក្នុងពេលរញ្ជួយដីកើតឡើង អគារ Taipei 101 ដែលមានកម្ពស់ 508 ម៉ែត្រ នៅតែឈរទ្រឹងដូចធម្មតា។ Taipei 101 ស្ថិតនៅក្នុងទីក្រុងតៃប៉ិ កោះតៃវ៉ាន់។ កោះតៃវ៉ាន់ ស្ថិតនៅក្បែរខ្សែក្រវាត់ភ្លើងរបស់មហាសមុទ្រប៉ាស៊ីហ្វិក ទើបវាទទួលរងគ្រោះរញ្ជួយដីជាញឹកញាប់។

កោះតៃវ៉ាន់ ស្ថិតនៅលើព្រំដែនផ្លាកទិចតូនិចចំនួន 42 ដែលកំពុងធ្វើសកម្មភាព ហើយឆ្នេរសមុទ្រភាគខាងកើតដែនដីនេះ បានកើតមានរញ្ជួយដីរាប់មិនអស់។

Taipei 101 ដែលធ្លាប់ជាប់ឈ្មោះជាអគារខ្ពស់ជាងគេលើពិភពលោកចាប់ពីឆ្នាំ 2004 ដល់ 2009 ត្រូវបានបំពាក់គ្រឿងទប់ទល់នឹងរញ្ជួយដីមួយចំនួន ជួយឱ្យវាមានភាពរឹងមាំខ្លាំង ដែលគេជឿថា អាចទប់ទល់នឹងរញ្ជួយដីកម្លាំងខ្លាំងជាងគេក្នុងវដ្ដ 2,500 ឆ្នាំ។

សមត្ថភាពទប់ទល់នឹងភាពញាប់ញ័រដោយសាររញ្ជួយដីបានយ៉ាងល្អរបស់ Taipei 101 គឺបានមកពីការរួមផ្សំរវាងភាពបត់បែនប្រកបដោយភាពទន់ភ្លន់ និងគ្រឹះដ៏រឹងមាំ។ ដើម្បីរក្សារចនាសម្ព័ន្ធពីការបែកបាក់ អគារនេះអាចយោលយោគទៅតាមភាពញាប់ញ័ររបស់រញ្ជួយដី និងព្យុះ។ បង្គោលសសរចំនួន 380 ដើម ក្នុងនោះមួយដើមៗត្រូវបានបោះជម្រៅ 80 ម៉ែត្រទៅក្នុងដី ជួយពង្រឹងគ្រឹះរបស់អគារឱ្យកាន់តែមាំ។

ក៏ប៉ុន្តែ អ្វីដែលពិសេសជាងគេ គឺ ប៉ោល។ នេះគឺជាមួយក្នុងចំណោមប្រព័ន្ធកាត់បន្ថយភាពញាប់ញ័រធំជាងគេលើពិភពលោក។ ប្រយោលទាំងនេះត្រូវបានដាក់ចាប់ពីជាន់ទី 92 ចុះមកដល់ជាន់ទី 88 របស់អគារ Taipei។ ដុំប្រយោលពណ៌លឿង មានទម្ងន់ប្រហែល 730 តោននេះ យោលយោគយ៉ាងថ្នមៗ ទប់ទល់នឹងកម្លាំងខ្យល់។

ប៉ោលនេះនឹងយោលយោគទៅមក អាស្រ័យទៅលើចលនារបស់អគារ ដើម្បីបំបាត់កម្លាំងដែលធ្វើឱ្យអគារយោលយោគ។ ប៉ោលនេះក៏ត្រូវបានបំពាក់អង្គញាណមួយចំនួន ដែលជួយឱ្យដឹងអំពីចលនារបស់អគារ និងកែតម្រូវចលនារបស់កូនប្រយោលទៅតាមចលនារបស់អគារ ដោយមិនបាច់ប្រើប្រាស់ថាមពល ឬការបញ្ជាពីខាងក្រៅ។ វាដំណើរការដោយយោងទៅតាមចលនារបស់អគារ និងកម្លាំងទំនាញ។

ប៉ោលដែលមានអង្កត់ផ្ចិតប្រហែល 6 ម៉ែត្រនេះ អាចផ្លាស់ទីបាន 1.5 ម៉ែត្រ ទៅតាមគ្រប់ទិស ដែលអាចកាត់បន្ថយភាពយោលយោគប្រហែលពី 30 ទៅ 40%។

កូនប្រយោលនេះត្រូវបានច្នៃឡើងពីបន្ទះដែកថែប និងដាក់ត្រួតលើគ្នា ហើយមានទម្ងន់ស្មើនឹង 0.24% បើធៀបនឹងទម្ងន់សរុបរបស់អគារ Taipei 101។ ប្រព័ន្ធប្រយោលនេះមានតម្លៃរហូតដល់ 4 លានដុល្លារអាម៉េរិក។

April 4, 2024

ផលិតផលរូបនាគកំពុងទាក់ទាញអតិថិជននៅប្រទេសចិន

ជិតដល់រដូវបុណ្យចូលឆ្នាំប្រពៃណីជាតិចិន គេឃើញថា គ្រឿងអលង្ការមាស ឬផ្ទាំងរូបភាពបិទទូរស័ព្ទដែលមានរូបនាគនៅប្រទេសចិន កំពុងតែលក់ដាច់ខ្លាំង។

តួលេខរបស់ផ្សារអនឡាញ Taobao (ចិន) បង្ហាញថា ចំនួនលើកនៃការស្វែងរកបណ្ដាផលិតផលដែលទាក់ទងនឹងរូបនាគនៅលើថ្នាលនេះ បានកើនឡើងច្រើនជាងមុន 640 ដង រាប់ចាប់ពីថ្ងៃទី 27 ធ្នូ 2023 ដល់ 02 មករា 2024។ ក្នុងនោះ ចំនួនលើកនៃការស្វែងរកគ្រឿងអលង្ការមានរូបនាគ បានកើនឡើងច្រើនជាងមុនរហូតដល់ 500 ដង។

«នាគត្រូវបានចាត់ទុកថាជានិមិត្តរូបនៃអំណាច និងឋានៈក្នុងវប្បធម៌ចិន។ ចំណែកមាសគឺជាគ្រឿងអលង្ការផង និងជាឧបករណ៍សម្រាប់ទុនដាក់ទ្រព្យសម្បត្តិផង តែងតែត្រូវបានទិញជារៀងរាល់រដូវបុណ្យចូលឆ្នាំប្រពៃណីជាតិចិន។ ដូច្នេះហើយ ទើបមានមនុស្សជាច្រើនទិញគ្រឿងអលង្ការធ្វើពីមាសមានរូបនាគ ដើម្បីបួងសួងសូមភាភជ័យក្នុងឆ្នាំថ្មី» Xie Zhihui អនុប្រធានទទួលបន្ទុកផ្នែកលក់នៅហាងមាស Chow Tai Seng បានប្រាប់ China Daily ដូច្នេះ។

មិនមែនតែនៅប្រទេសចិននោះទេ បណ្ដាយីហោល្បីៗលើពិភពលោកក៏កំពុងចាប់យកនិន្នាការខាងលើផងដែរ។ ក្រុមហ៊ុនគ្រឿងសម្អាង Shu Uemura (ជប៉ុន) ក៏បានដាក់លក់ប្រភេទក្រែមលាបបបូរមាត់មាន ពិសេសមួយដែលមានកំណត់បរិមាណ ក្នុងនោះ សម្បករបស់ផលិតផលនេះមានរូបនាគពណ៌លឿង។ ចំណែក Fila ក៏ដាក់លក់អាវប៉ាក់រូបនាគ ខណៈ Shanghai Disney Resort ចេញលក់របស់លេងកម្សាន្តធ្វើពីក្រណាត់មានរូបនាគផងដែរ៕

January 22, 2024

កត្តាជាច្រើនដែលនាំឱ្យគេសង្ឃឹមថា សេដ្ឋកិច្ចពិភពលោកក្នុងឆ្នាំ 2024 នឹងល្អប្រសើរជាងបច្ចុប្បន្ន

សន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ ហើយនេះគឺជាមូលហេតុដែលគ្រប់គ្នាមានសុទិដ្ឋិនិយមចំពោះសេដ្ឋកិច្ចរបស់ឆ្នាំ 2024។

ទំព័រ Financial Times ថ្មីៗនេះបានចេញផ្សាយថា 2023 គឺជាឆ្នាំដ៏ប្រសើរមួយចំពោះសេដ្ឋកិច្ចពិភពលោក នៅពេលសន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup (Global’s Global Citigroup Economic Surprise Index) បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ។

និន្នាការសេដ្ឋកិច្ចខាងលើនេះក៏ស្ដែងឱ្យឃើញនូវមូលហេតុជាច្រើនដែលគ្រប់គ្នាអាចជឿជាក់បានចំពោះសេដ្ឋកិច្ចក្នុងឆ្នាំ 2024។ ខាងក្រោមនេះគឺជាកត្តាមួយចំនួនដែលអាចជំរុញឱ្យសេដ្ឋកិច្ចក្នុងឆ្នាំ 2024 ល្អប្រសើរជាងឆ្នាំ 2023៖

ទីមួយ៖ សេដ្ឋកិច្ចពិភពលោកបានបង្ហាញនូវលទ្ធភាពងើបឡើងវិញដ៏គួរឱ្យចាប់អារម្មណ៍។ យោងតាមសន្ទស្សន៍សកលរបស់ Fitch Ratings នៅក្នុងត្រីមាសទីបីនៃឆ្នាំ 2023 ផលិតផលក្នុងស្រុកសរុប (GDP) របស់ពិភពលោក គឺខ្ពស់ជាង 9% បើធៀបនឹងដំណាក់កាលមុនវិបត្តិសុខភាពសកល។

ទីពីរ៖ អតិផរណាកំពុងថយចុះលឿន។ អតិផរណារបស់ពិភពលោកស្ថិតនៅក្នុងកម្រិត 8.9% កាលពីឆ្នាំ 2022 ហើយគ្រោងនឹងថយចុះ 5.1% នៅចុងឆ្នាំ 2024។

ទីបី៖ ការព្រួយបារម្ភអំពីវដ្ដនៃគោលនយោបាយរូបិយវត្ថុបែប «ភ្នំតុ (Table Mountain)» ដែលការប្រាក់ត្រូវបានដំឡើងខ្ពស់ខ្លាំង និងរក្សាកម្រិតកំពូលក្នុងរយៈពេលយូរ បានថយចុះ។

ទីបួន៖ ការផ្ទុះឡើងរបស់ទីផ្សារហិរញ្ញវត្ថុ។ សន្ទស្សន៍លំដាប់កំពូលនានារបស់ Wall Street ភាគច្រើនជិតស្មើ ឬលើសពីកម្រិតខ្ពស់បំផុតក្នុងខែធ្នូ ឆ្នាំ 2023។ ទីផ្សារមូលបត្របំណុលក៏បញ្ចប់ឆ្នាំចាស់ប្រកបដោយភាពខ្លាំងក្លា។

ចុងក្រោយ៖ ឆ្នាំ 2023 គឺជាឆ្នាំល្អចំពោះវិស័យបច្ចេកវិទ្យា ដូចទៅនឹងអ្វីដែលមនុស្សមួយចំនួនបានរំពឹងទុក៕

December 30, 2023

ឥណ្ឌណេស៊ី ចាប់ផ្ដើមដំណាក់កាលទីបីនៃគម្រោងកសាងរដ្ឋធានីថ្មី

កាលពីថ្ងៃទី 20 ធ្នូ 2023 ឥណ្ឌូណេស៊ី បានសម្ពោធដំណាក់កាលទីបីនៃគម្រោងកសាងរដ្ឋធានីថ្មី (IKN) Nusantara នៅក្នុងខេត្ត Kalimantan ខាងកើត ដែលស្ថិតនៅលើកោះ Borneo ក្រោមអធិបតីភាពប្រធានាធិបតី Joko Widodo ។

យោងតាមសារព័ត៌មាននានា នៅក្នុងពិធីសម្ពោធបើកការដ្ឋានសាងសង់មន្ទីរពេទ្យពហុព្យាបាលមជ្ឈិម ដែលមានឯកទេសខាងបេះដូង និងជំងឺដាច់សរសៃឈាមខួរក្បាល ប្រធានាធិបតី Joko Widodo លើកឡើងថា នេះគឺជាមន្ទីរពេទ្យទីបួនដែលត្រូវបានសាងសង់នៅ Nusantara ក្នុងរយៈពេលបីខែកន្លងមកនេះ។

លោកសម្ដែងក្ដីសង្ឃឹមថា នៅពេលមន្ទីរពេទ្យទាំងនេះផ្ដើមដំណើរការចាប់ពីឆ្នាំ 2024 ប្រជាជននឹងមិនចាំបាច់ធ្វើដំណើរទៅកាន់ប្រទេសជិតខាងដូច ម៉ាឡេស៊ី សិង្ហបុរី ឬទៅកាន់ប្រទេសជប៉ុន និងសហរដ្ឋអាម៉េរិក ដើម្បីព្យាបាលជំងឺដូចមុនទៀតឡើយ។

មុននោះ អាជ្ញាធរគ្រប់គ្រង IKN (OIKN) បានឱ្យដឹងថា ពិធីសម្ពោធបើកការដ្ឋានដំណាក់កាលទីបីនៃគម្រោងកសាងរដ្ឋធានីថ្មីដែលមានតម្លៃជាង 30 ពាន់លានដុល្លារអាម៉េរិកនេះ នឹងត្រូវបានធ្វើឡើងនៅថ្ងៃទី 20-21 ខែធ្នូ 2023 នៅក្នុងតំបន់ចំនួនបី គឺ តំបន់បៃតង តំបន់ស្ថាប័នរដ្ឋ និងតំបន់អេកូឡូស៊ី។

យោងតាមអ្នកនាំពាក្យរបស់ OIKN លោក Troy Pantouw ដំណាក់កាលទីបីរួមមាន បណ្ដាគម្រោងដាំព្រៃឈើ ប្រព័ន្ធគមនាគមន៍ដែលដំណើរការដោយអគ្គិសនី សណ្ឋាគារ មន្ទីរពេទ្យ រួមនឹងគម្រោងជាច្រើនផ្សេងទៀត ដែលមានទុនវិនិយោគសរុបប្រមាណ 645 លានដុល្លារអាម៉េរិក។

ឥណ្ឌូណេស៊ី បានប្រកាសអំពីគម្រោងរើរដ្ឋធានីចេញពីកោះជ្វា (Java) ដែលមានប្រជាជនច្រើនជាងគេលើពិភពលោក កាលពីខែមេសា 2019។ ប៉ុន្មានខែក្រោយមក ប្រធានាធិបតីប្រទេសនេះក៏បានប្រកាសថា ស្រុក Penajam Paser ខាងជើង និង Kutai Kertanegara នៃខេត្ត Kalimantan ខាងកើត ត្រូវបានជ្រើសរើសជាទីតាំងសម្រាប់កសាងរដ្ឋធានីថ្មី។

បើតាមផែនការ Nusantara នឹងដើរតួនាទីជាមជ្ឈមណ្ឌលរដ្ឋបាលរបស់ឥណ្ឌូណេស៊ី ក្នុងគ្រាដែលរដ្ឋធានីបច្ចុប្បន្ន គឺ ហ្សាការតា នឹងក្លាយជាមជ្ឈមណ្ឌលសេដ្ឋកិច្ច និងហិរញ្ញវត្ថុ។ Nusantara នឹងត្រូវបានគ្រប់គ្រងដូចទៅនឹងតំបន់ស្វយ័ត ទៅតាមរដ្ឋធម្មនុញ្ញ ក្នុងនោះ មេដឹកនាំរដ្ឋធានីថ្មីនេះនឹងមានឋានៈជារដ្ឋមន្ត្រី៕

December 22, 2023

រថយន្តអគ្គិសនីអាចនឹងក្ដោបក្ដាប់ 2/3 នៃទីផ្សាររថយន្តនៅឆ្នាំ 2030

ការរីកចម្រើនដ៏ឆាប់រហ័សរបស់ទីផ្សារអឺរ៉ុប និងចិន នឹងជួយឱ្យការជួញដូររថយន្តអគ្គិសនីមានកំណើនខ្ពស់ខ្លាំងនៅចុងទសវត្សរ៍នេះ។

លទ្ធផលនៃការសិក្សាស្រាវជ្រាវថ្មីមួយរបស់វិទ្យាស្ថាន Rocky Mountain Institute (RMI) បានបង្ហាញថា ដោយសារតែតម្លៃថ្មផ្ទុកថាមពលថយចុះ រថយន្តអគ្គិសនីអាចនឹងមានតម្លៃស្មើនឹងរថយន្តប្រេងសាំងនៅទ្វីបអឺរ៉ុបចាប់ពីឆ្នាំ 2024 និងទីផ្សារអាម៉េរិកចាប់ពីឆ្នាំ 2026 ហើយនឹងក្ដោបក្ដាប់ 2/3 នៃចំនួនរថយន្តសរុបដែលបានលក់ចេញនៅឆ្នាំ 2030។

របាយការណ៍របស់ RMI បានព្យាករថា តម្លៃថ្មផ្ទុកថាមពលនឹងថយចុះពាក់កណ្ដាលនៅទសវត្សរ៍នេះ ដោយធ្លាប់ពី 151 ដុល្លារ/គីឡូវ៉ាត់ម៉ោងនៅឆ្នាំ 2022 ចុះមកនៅត្រឹមប្រហែល 60 – 90 ដុល្លារ/គីឡូវ៉ាត់ម៉ោង ដែលនឹងជួយឱ្យរថយន្តអគ្គិសនីធ្លាក់ថ្លៃមកស្មើនឹងរថយន្តប្រើប្រាស់ប្រេងសាំងនៅគ្រប់ទីផ្សារចាប់ពីឆ្នាំ 2030។

តាមធម្មតា ថ្មផ្ទុកថាមពលតែងតែកាន់កាប់ប្រហែល 40% នៃតម្លៃសរុបរបស់រថយន្តអគ្គិសនីមួយគ្រឿង។ RMI ឱ្យដឹងថា តម្លៃនេះកំពុងថយចុះបន្តិចម្ដងៗនៅពេលបណ្ដាក្រុមហ៊ុនផលិតរថយន្តនាំគ្នាវិនិយោគទៅលើគីមី វត្ថុធាតុ និងសបវ៉ែររបស់ថ្មផ្ទុកថាមពលប្រភេទថ្មី ដើម្បីបង្កើតបានរថយន្តអគ្គិសនីដែលមានប្រសិទ្ធភាពកាន់តែខ្ពស់។

លទ្ធផលនៃការសិក្សាស្រាវជ្រាវក្នុងគម្រោងសេដ្ឋសាស្ត្ររបស់សាកលវិទ្យាល័យ Exeter University បង្ហាញថា បរិមាណរថយន្តអគ្គិសនីដែលលក់ចេញនឹងកើនទៅតាមលេខគុណ។ យោងតាមការស្រាវជ្រាវនេះ រថយន្តអគ្គិសនីនឹងមានតម្លៃស្មើនឹងរថយន្តដំណើរការដោយឥន្ធនៈនៅឆ្នាំ 2024 នៅអឺរ៉ុប, ឆ្នាំ 2025 នៅប្រទេសចិន, 2026 នៅសហរដ្ឋអាម៉េរិក និង 2027 នៅប្រទេសឥណ្ឌា ចំពោះរថយន្តខ្នាតមធ្យម និងឆាប់ជាងនេះចំពោះរថយន្តខ្នាតតូច៕

September 16, 2023

យន្តហោះកូនកាត់ឧទ្ធម្ភាគចក្រសង្គ្រោះបន្ទាន់ ល្បឿន 460 គីឡូម៉ែត្រ/ម៉ោង

យានជំនិះហោះឡើង និងចុះចតបញ្ឈរត្រង់ JA1 Pulse បំពាក់ស្លាបចក្រអគ្គិសនី 8 គ្រឿង អាចដឹកបុគ្គលិកសង្គ្រោះបន្ទាន់ទៅកាន់ទីតាំងមានជនរងគ្រោះបានយ៉ាងឆាប់រហ័ស។

ក្រុមហ៊ុនអាម៉េរិក Jump Aero ឱ្យដឹងថា រូបរាងរបស់ JA1 Pulse ដែលជាយានជំនិះហោះឡើង និងចុះចតបញ្ឈរត្រង់ដំណើរការដោយអគ្គិសនី (eVTOL) ត្រូវបានផលិតឡើងដើម្បីប្រើប្រាស់ក្នុងការដឹកបុគ្គលិកសង្គ្រោះបន្ទាន់ទៅកាន់គោលដៅបានលឿនបំផុត។ JA1 Pulse ទទួលបានការបញ្ជាទិញជាមុន ប៉ុន្តែ Jump Aero មិនទាន់ប្រកាសជាផ្លូវការអំពីពេលវេលាដំណើរការរបស់យន្តហោះកូនកាត់ឧទ្ធម្ភាគចក្រអគ្គិសនីនេះនៅឡើយ។

JA1 Pulse មានរូបរាងបែប tail-sitter ដែលមានន័យថា ពេលចតលើដី វានឹង «អង្គុយ» ដោយកន្ទុយ ចំណែកក្បាល និងស្លាបចក្របែរទៅលើ។ វាហោះឡើងដូចឧទ្ធម្ភាគចក្រ ប៉ុន្តែនៅពេលហោះឡើងដល់កម្ពស់សមល្មម វានឹងហោះទៅមុខដូចយន្តហោះធម្មតា។

ប្រព័ន្ធបញ្ជានៅលើយានជំនិះនេះមានលក្ខណៈសាមញ្ញ មិនត្រូវការការហ្វឹកហាត់បើកបរស៊ីជម្រៅ។ ទន្ទឹមនឹងនេះ JA1 Pulse នឹងមិនបង្កគ្រោះថ្នាក់ធ្ងន់ធ្ងរ បើសិនវាជួបបញ្ហា។ បើយានជំនិះនេះមិនអាចបន្តដំណើរពេលកំពុងហោះហើរ ពីឡុតនឹងប្រើប្រាស់ឆត្រយោង។

តាមគម្រោង JA1 Pulse នឹងអាចហោះក្នុងល្បឿន 463 គីឡូម៉ែត្រ/ម៉ោង អាចដឹកឧបករណ៍ ឬអ្នកបើកបរដែលមានទម្ងន់ 150 គីឡូក្រាម និងអាចហោះដល់គ្រប់គោលដៅដែលស្ថិតក្នុងរង្វង់ 50 គីឡូម៉ែត្រ ដោយប្រើពេល 8 នាទី។

ម៉ូទ័ររបស់ស្លាបចក្រនីមួយៗទទួលថាមពលពីថ្មផ្ទុកអគ្គិសនីកម្លាំង 11 គីឡូវ៉ាតម៉ោង អាចបញ្ចូលថាមពលដំណាលគ្នាតាមរយៈឌុយតែមួយ។

ដោយសារតែមិនប្រើប្រាស់សម្រាប់ការដឹកអ្នកជំងឺ ដូច្នេះ JA1 Pulse មិនមែនជាយានដែលនឹងចូលមកជំនួសឡានសង្គ្រោះបន្ទាន់ឡើយ។ នៅពេលមានហេតុការណ៍បន្ទាន់ ទាំងយាននេះ ទាំងរថយន្តសង្គ្រោះបន្ទាន់ នឹងត្រូវបានបញ្ជូនទៅកាន់កន្លែងកើតហេតុដំណាលគ្នា ហើយ JA1 Pulse នឹងទៅដល់មុន។ ពេលនោះ ពីឡុតជាបុគ្គលិកសង្គ្រោះបន្ទាន់នឹងជួយដោះស្រាយមុនដោយប្រើប្រាស់ឧបករណ៍វេជ្ជសាស្ត្រនៅលើយាននេះ។ ពេលឡានពេទ្យទៅដល់ បុគ្គលិកលើឡាននឹងទទួលចាត់ចែងការងារបន្ត ហើយ JA1 Pulse អាចងាកទៅបំពេញភារកិច្ចថ្មី៕

September 9, 2023

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ

ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។

«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។

ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។

ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ

Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។

ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។

កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019

កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។

ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។

បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕

Jennie (Blackpink) កាលនៅជាអ្នកហាត់ការ

August 7, 2023

YouTube លុបវីដេអូរាប់ពាន់របស់ឆានែលនៅវៀតណាម ដោយជឿថា បានរំលោភគោលការណ៍

YouTube បានលុបវីដេអូចំនួនរាប់ពាន់ដែលនិយាយអំពីតួអង្គ Wolfoo ដោយសារមានការតវ៉ាថា បានរំលោភកម្មសិទ្ធិបញ្ញារបស់ Peppa Pig ប៉ុន្តែខាងក្រុមហ៊ុនវៀតណាមថា មិនបានធ្វើខុសគោលការណ៍។

Sconnect ជាក្រុមហ៊ុនផលិតវីដេអូរបស់វៀតណាម ដែលនៅពីក្រោយតួអង្គភាពយន្តគំនូរជីវចល Wolfoo យល់ថា YouTube បានលុបវីដេអូទាំងនេះដោយខុសច្បាប់ បណ្ដាលឱ្យឆានែលនានារបស់ក្រុមហ៊ុននេះ ត្រូវបាត់បង់វីដេអូជាង 3,000 និងចំនួនអ្នកចូលមើលរាប់ពាន់លានលើក។

ក្នុងរបាយការណ៍ដែលបានផ្ញើលទៅកាន់អាជ្ញាធរវៀតណាមកាលពីចុងខែកក្កដា Sconnect ឱ្យដឹងថា បណ្ដាវីដេអូរបស់ពួកគេត្រូវបានបណ្ដាញសង្គមរបស់ Google លុបចោលដោយលើកហេតុផលថា បានរំលោភលើគោលការណ៍កម្មសិទ្ធិបញ្ញាស្ដីពីរូបភាព និងសំឡេង។ ភាគីដែលបានរាយការណ៍ទៅ YouTube គឺ Entertainment One (EO) ដែលជាក្រុមហ៊ុននៅពីក្រោយតួអង្គគំនូរជីវចលជ្រូក Peppa។

យោងតាម Sconnect ទាំង EO ទាំង YouTube សុទ្ធតែមិនបានលើកឡើងភ័ស្ដុតាងច្បាស់លាស់ដែលបង្ហាញថា បណ្ដាវីដេអូ Wolfoo បានរំលោភលើគោលការណ៍កម្មសិទ្ធិរូបភាព និងសំឡេងនៅក្នុងវីដេអូរបស់ Peppa Pig។ ក្រៅពីនេះ សំឡេង និងរូបភាពទាំងនេះក៏សុទ្ធតែមាននៅក្នុងជីវភាពប្រចាំថ្ងៃ។

ក្រុមហ៊ុនវៀតណាមខាងលើឱ្យដឹងថា បានផ្ញើការតវ៉ានេះទៅកាន់តំណាង YouTube តាំងពីខែមិថុនា ប៉ុន្តែក្រោយរយៈពេលជាងមួយខែ នៅតែមិនទាន់ទទួលបានចម្លើយ។ ចំណែកចំនួនវីដេអូដែលត្រូវបានលុប និងមិនអាចស្ដារឡើងវិញបាន នៅតែបន្តកើនឡើង គ្រាដែលឆានែលជាច្រើនមិនអាចបង្ហោះវីដេអូថ្មី បង្កឱ្យមានការខាតបង់យ៉ាងធ្ងន់ធ្ងរ។

យោងតាមការគណនានៅលើទំព័រ SocialBlade ឆានែល Wolfoo Family របស់ Sconnect បានបត់បង់ចំនួនអ្នកចូលមើលអស់ប្រហែល 2.4 ពាន់លានលើក ក្រោយពីវីដេអូនានារបស់ឆានែលនេះត្រូវបានលុបកាលពីខែឧសភា 2023។

ក្នុងពេលដែលអាជ្ញាធរវៀតណាមកំពុងរកដំណោះស្រាយ ភាគីខាង YouTube និង EO មិនទាន់បញ្ចេញប្រតិកម្មអ្វីនៅឡើយ ទាក់ទងនឹងការតវ៉ារបស់ Sconnect៕

August 1, 2023

ចិនចាប់ផ្ដើមបង្ហោះផ្កាយរណបអ៊ីនធើណិតបំពាក់ផ្ទាំងសូឡា ដើម្បីប្រជែងនឹងអាម៉េរិក

ថ្មីៗនេះ ប្រទេសចិនបានបាញ់បង្ហោះផ្កាយរណប Lingxi-03 ដែលមានស្លាបបំពាក់ផ្ទាំងសូឡាមហាស្ដើង និងស្ថិតក្នុងគម្រោងអភិវឌ្ឍផ្កាយរណប 13,000 គ្រឿង ដើម្បីប្រកួតប្រជែងនឹង SpaceX របស់អាម៉េរិក។

ផ្កាយរណប Lingxi-03 ដែលត្រូវបានអភិវឌ្ឍដោយក្រុមហ៊ុន GalaxySpace នៅទីក្រុងប៉េកាំង ត្រូវបានបាញ់បង្ហោះពីមជ្ឈមណ្ឌលបាញ់បង្ហោះផ្កាយរណប Taiyuan ក្នុងខេត្ត Shanxi ភាគកណ្ដាលប្រទេសចិន ដោយរ៉ុក្កែត Long March 2D កាលពីព្រឹកថ្ងៃទី 23 កក្កដា។

ផ្ទាំងសូឡាដែលត្រូវបានបំពាក់លើស្លាបផ្កាយរណប អាចកាច់កោង កម្រាស់ប្រហែល 1 មិល្លីម៉ែត្រ ដែលស្មើនឹង 5% នៃកម្រាស់របស់ផ្ទាំងសូឡាធម្មតា។ ផ្ទាំងសូឡារបស់ផ្កាយរណបនេះមានប្រវែង 9 ម៉ែត្រ និងទទឹង 2.5 ម៉ែត្រ នៅពេលលាតសន្ធឹង។

GalaxySPace គឺជាក្រុមហ៊ុនដែលត្រូវបានបង្កើតឡើងកាលពីឆ្នាំ 2018 និងជាក្រុមហ៊ុនដំបូងគេនៅប្រទេសចិន ដែលផ្គត់ផ្គង់អ៊ីនធើណិតពីផ្កាយរណប។ តាមផែនការ ក្រុមហ៊ុននេះនឹងបាញ់បង្ហោះផ្កាយរណបអ៊ីនធើណិតជាបន្តបន្ទាប់ចំនួន 13,000 គ្រឿង ដើម្បីអាចប្រកួតប្រជែងនឹងក្រុមហ៊ុនអាម៉េរិក SpaceX ដែលបច្ចុប្បន្នមាន ផ្កាយរណប Starlink ជាង 4,500 គ្រឿង កំពុងដំណើរការនៅលើមេឃ។

នាពេលអនាគតដ៏ខ្លីខាងមុខ ផែនដីនឹងមានផ្កាយរណបច្រើនជាង 60,000 គ្រឿង ហោះហើរលើគន្លងតារាវិថី ដែលភាគច្រើនគឺជាផ្កាយរណបរបស់អាម៉េរិក ពិសេសគឺ Starlink របស់ SpaceX៕

July 28, 2023

យន្តហោះដឹកអ្នកដំណើរល្បឿនលឿនជាងសំឡេង Overture អាចហោះបានជាង 2,000 គីឡូម៉ែត្រ/ម៉ោង

យន្តហោះ Overture របស់ក្រុមហ៊ុនអាម៉េរិក Boom Supersonic បំពាក់ម៉ាស៊ីនដែលមានកម្លាំងរុញច្រាន 16 តោន គ្រោងនឹងអាចដឹកអ្នកដំណើរបានពី 65 ទៅ 80 នាក់។

នៅក្នុងព្រឹត្តិការណ៍ពិព័រណ៍អាកាសចរណ៍ Paris Air Show ចាប់ពីថ្ងៃទី 19 ដល់ 25 មិថុនា នៅទីក្រុងប៉ារីស ក្រុមហ៊ុន Boom Supersonic បានប្រកាសកិច្ចព្រមព្រៀងជាបន្តបន្ទាប់ជាមួយនឹងអ្នកផ្គត់ផ្គង់ថ្មីៗ និងបង្ហើបឱ្យដឹងខ្លះៗអំពីគម្រោងយន្តហោះល្បឿនលឿនជាងសំឡេង Overture និងម៉ាស៊ីន Symphony។ នេះបើតាមទំព័រ New Atlas។

បណ្ដាដៃគូថ្មីៗរបស់ Boom Supersonic រួមមានដូចជា ក្រុមហ៊ុនអ៊ីតាលី Leonardo, ក្រុមហ៊ុនអេស្ប៉ាញ Aernnova និង Aciturri ជាដើម។ ក្រៅពីនេះ Boom Supersonic ក៏ប្រកាសព័ត៌មានស្ដីពីប្រព័ន្ធហោះហើរ បច្ចេកវិទ្យាអេឡិចត្រូនិច ឧបករណ៍ចុះចត ក៏ដូចជាម៉ាស៊ីនសម្រាប់យន្តហោះនេះផងដែរ។

ក្នុងនោះ ឥន្ធនៈ SAF (SAF-Sustainable aviation fuels) ក៏នឹងត្រូវបានប្រើប្រាស់សម្រាប់យន្តហោះ Overture។ SAF គឺជាឥន្ធនៈអាកាសចរណ៍ដែលត្រូវបានកំណត់ថា អាចកកើតឡើងវិញបាន។

តាមគម្រោង Overture នឹងអាចដឹកអ្នកដំណើរបានចាប់ពី 65 ដល់ 80 នាក់ និងអាចហោះក្នុងល្បឿនកម្រិត Mach 1.7 (លឿនជាងសំឡេង 1.7 ដង) ឬប្រហែលនឹង 2,100 គីឡូម៉ែត្រ/ម៉ោង ពេលហោះលើសមុទ្រ។ Overture អាចត្រូវបានដាក់ឱ្យដំណើរការចាប់ពីឆ្នាំ 2029៕

June 28, 2023

Tag: TAI