Tag: Sport

ធ្វើជាម្ចាស់ថ្មីរបស់ MU អ្នកវិនិយោគមកពីកាតាសម្រេចចិត្តលុបបំបាត់ «គោលការណ៍ Ronaldo»
Sheikh Jassim bin Hamad al-Thani ចង់លុបបំបាត់គោលការណ៍ដែលរារាំងកីឡាករទទួលបានប្រាក់បៀវត្សខ្ពស់ជាង បើធៀបនឹងមិត្តរួមក្រុមដទៃដែល Manchester United កំពុងអនុវត្ត។
ទំព័រ Sun Sport ថ្មីៗនេះបានរាយការណ៍ថា ម្ចាស់ថ្មីដ៏មានសក្ដានុពលរបស់ Man United នឹងលុបចោលការកំណត់ស្ដីពីប្រាក់បៀវត្សក្នុងសម័យរបស់គ្រូបង្វឹក Erik ten Hag ដែលបង្កើតឡើងដើម្បីកាត់បន្ថយការចំណាយរបស់ក្លឹប បន្ទាប់ពីការចាក់ចេញរបស់ Cristiano Ronaldo កាលពីចុងឆ្នាំមុន។
យោងតាមអ្វីដែលគេហៅថា «គោលការណ៍ Ronaldo» ក្លឹប Man United បានកំណត់ប្រាក់បៀវត្សអតិបរមាប្រចាំសប្ដាហ៍ត្រឹម 200,000 ផោនអង់គ្លេស ហើយនឹងមិនផ្ដល់ប្រាក់បៀវត្សលើសពីនេះដល់កីឡាករណាទាំងអស់។ គោលការណ៍នេះត្រូវបានដាក់ឈ្មោះមិនផ្លូវការទៅតាមឈ្មោះរបស់ Ronaldo ព្រោះតែកំពូលតារាបាល់ទាត់ព័រទុយហ្កាល់រូបនេះ ធ្លាប់ទទួលបានប្រាក់បៀវត្ស 385,000 ផោន/សប្ដាហ៍ នៅក្នុងការធ្វើការឱ្យក្លឹបនេះលើកទីពីរ មុនពេលទំនាក់ទំនងរវៀង CR7 និង Man United ត្រូវបញ្ចប់ក្នុងភាពចម្រូងចម្រាស។
ការសម្រេចចិត្តរបស់ម្ចាស់ថ្មី ជំរុញឱ្យបីសាចក្រហមអាចទាក់ទាញបណ្ដាកីឡាករលំដាប់ពិភពលោក មកចូលរួមជាមួយគ្រួសារ Old Trafford ក្នុងនោះមាន Neymar របស់ក្លឹប PSG ជាដើម។ ការលុបចោល «គោលការណ៍ Ronaldo» ក៏អាចជួយឱ្យ Man United រក្សាកំពូលកីឡាករដែលមានបច្ចុប្បន្ន មានដូចជា Marcus Rashford ជាដើម ដែលកំពុងរារែកក្នុងការចុះកិច្ចព្រមព្រៀងថ្មី ព្រោះតែប្រាក់បៀវត្សដែលត្រូវបានលើកឡើងដោយភាគីក្លឹប។
Sheikh Jassim អ្នកវិនិយោគមកពីកាតា បានធ្វើការប្រឹងប្រែងដើម្បីដណ្ដើមបានសិទ្ធិធ្វើជាម្ចាស់របស់ Man United ពីគ្រួសារ Glazer។ មុនពេលម្ចាស់ថ្មីមកកាន់ Old Trafford ក្រុម Man United នឹងត្រូវបញ្ចប់រដូវកាល Premier League 2022/2023 ដោយការប្រកួតនៅលើទីលានរបស់ខ្លួន ជាមួយនឹង Fulham និងប៉ះ Manchester City ក្នុងវគ្គផ្ដាច់ព្រ័ត្រ FA Cup នៅសប្ដាហ៍ក្រោយ៕
May 27, 2023
ក្រុមបាល់ទាត់ជម្រើសជាតិអាហ្សង់ទីនត្រូវជប៉ុនលុបចោលការប្រកួតមិត្តភាពសម្រាប់រដូវ FIFA Days
ទំព័រ Siam Sport ដកស្រង់ប្រភពព័ត៌មានពីជប៉ុន បានឱ្យដឹងថា សហព័ន្ធកីឡាបាល់ទាត់ជប៉ុន (JFA) បានលុបចោលគម្រោងប្រកួតមិត្តភាពជាមួយអាហ្សង់ទីន ព្រោះតែការចំណាយខ្ពស់ពេក។
យោងតាមប្រភពព័ត៌មាន JFA ត្រូវបង្ខំចិត្តបោះបង់គម្រោងអញ្ជើញក្រុមបាល់ទាត់ជម្រើសជាតិអាហ្សង់ទីន មកប្រកួតមិត្តភាពនៅក្នុងឱកាស FIFA Days ក្នុងខែមិថុនា 2023 ព្រោះតែត្រូវចំណាយប្រាក់ច្រើនហួស។ JFA ត្រូវចំណាយប្រាក់ 600 លានយេន (ជាង 4.3 លានដុល្លារអាម៉េរិក) ដើម្បីអញ្ជើញ Messi និងមិត្តរួមក្រុមមកប្រកួតនៅប្រទេសជប៉ុន។
ក្រុមជម្រើសជាតិអាហ្សង់ទីន កំពុងគ្រប់គ្រងតំណែងជើងឯក World Cup និងជាប់ចំណាក់ថ្នាក់លេខមួយលើពិភពលោក ដោយមានកំពូលតារាបាល់ទាត់ Lionel Messi នៅក្នុងក្រុម។ ដូច្នេះ តម្លៃយីហោរបស់ពួកគេពិតជាខ្ពស់។ ក្រុមជម្រើសជាតិដែលចង់អញ្ជើញក្រុមអាហ្សង់ទីនមកទាត់មិត្តភាពនឹងត្រូវចំណាយប្រាក់ច្រើន។
កាលពីឆ្នាំមុន JFA ត្រូវបានគេជឿថា បានចំណាយ 300 លានយេន (ជាង 2.1 លានដុល្លារអាម៉េរិក) ដើម្បីអញ្ជើញក្រុមជម្រើសជាតិប្រេស៊ីលមកទាត់មិត្តភាពជាមួយក្រុមជប៉ុននៅថ្ងៃទី 6 មិថុនា។ ក៏ប៉ុន្តែ ឆ្នាំនេះ JFA មិនអាច «ដៃទូលាយ» ដូចមុននៅក្នុងការអញ្ជើញក្រុមអាហ្សង់ទីន។
ក្រុមបាល់ទាត់ជម្រើសជាតិជប៉ុន
ជំនួសឱ្យការប្រកួតជាមួយអាហ្សង់ទីន ឆ្នាំនេះក្រុមជម្រើសជាតិជប៉ុននឹងប្រកួតជាមួយក្រុមជម្រើសជាតិចំនួនពីរមកពីទ្វីបអាម៉េរិក នៅក្នុងខែមិថុនាឆ្នាំនេះ រួមមាន អែលសាល់វ៉ាឌ័រ (15 មិថុនា) និង ប៉េរូ (20 មិថុនា)។ គ្រូបង្វឹក Hajime Moriyasu ក៏បានប្រកាសបង្ហាញបញ្ជីឈ្មោះក្រុមកីឡាករដែលត្រៀមសម្រាប់ការប្រកួតទាំងនេះរួចហើយ។
ចំពោះអាហ្សង់ទីនវិញ ពួកគេនឹងទាត់មិត្តភាពជាមួយអូស្ត្រាលីនៅប្រទេសចិន នៅថ្ងៃទី 15 មិថុនា 2023។ បួនថ្ងៃក្រោយមក ក្រុមអាហ្សង់ទីននឹងប្រកួតជាមួយក្រុមម្ចាស់ផ្ទះឥណ្ឌូណេស៊ី។ យោងតាម New York Times ឥណ្ឌូណេស៊ីត្រូវចំណាយប្រាំលានដុល្លារអាម៉េរិក ដើម្បីអញ្ជើញក្រុមជម្រើសជាតិអាហ្សង់ទីនមកប្រកួតជាលើកដំបូង៕
May 26, 2023
ទិញរថយន្តក្នុងក្តីស្រមៃដោយមិនចាំបាច់មានប្រាក់កក់ និងបង់រំលស់គ្មានការប្រាក់ដល់ទៅមួយឆ្នាំ
[ភ្នំពេញ – ថ្ងៃទី ០១ ខែឧសភា ឆ្នាំ២០២៣] ផ្នែករថយន្ត Ford នៃ ក្រុមហ៊ុន អ អិម អេ (ខេមបូឌា) ម.ក បានរៀបចំកម្មវិធី ពិធីចុះអនុស្សរណៈយោគយល់គ្នារវាង ក្រុមហ៊ុន អ អិម អេ (ខេមបូឌា) ម.កដែលជាក្រុមហ៊ុននាំចូល និងចែកចាយផ្តាច់មុខរថយន្ត ហ្វដ ប្រចាំប្រទេសកម្ពុជា និងធនាគារ វីង (ខេមបូឌា) ម.ក ដែលជាធនាគារឈានមុខគេនៅកម្ពុជា។
លោក ហាន ប៉េង ក្វាង អគ្គនាយក ធនាគារ វីង បានមានប្រសាសន៍ថា៖ “យើងពិតជាមានសេចក្តីសោមន្សរីករាយ ដែលបានក្លាយជាដៃគូសហការជាមួយ ក្រុមហ៊ុន អ អិម អេ (ខេមបូឌា) ដើម្បីរួមគ្នាផ្តល់ដំណោះស្រាយដ៏មានសារៈសំខាន់មួយសម្រាប់អតិថិជន” ។
“យើងជឿជាក់ថាគ្រប់គ្នាស័ក្កិសមនឹងទទួលបានឱកាសក្លាយជាម្ចាស់រថយន្តក្នុងក្តីស្រមៃរបស់ពួកគេ។ ហើយយើងចង់ធ្វើឲ្យក្តីស្រមៃនោះក្លាយជាការពិត សម្រាប់អតិថិជនមិនថាជាប្រជាជនកម្ពុជា ឬជនជាតិបរទេសកំពុងរស់នៅប្រទេសកម្ពុជា នោះគឺអតិថិជនមិនបារម្មណ៍លើការចំណាយប្រាក់កក់ ហើយថែមទាំងមិនចំណាយបង់ការប្រាក់រហូតដល់ ១២ ខែ”។
លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ សម្រាប់អតិថិជនដែលមានបំណងចង់ក្លាយជាម្ចាស់រថយន្ត ឥឡូវនេះយើងមានការផ្តល់ជូនពិសេសគឺ ការទិញរថយន្តដោយមិនតម្រូវមានប្រាក់កក់ និងការបង់រំលស់ដោយមិនចំណាយការប្រាក់ពេញមួយឆ្នាំពេញសម្រាប់រថយន្តម៉ូដែល Ford Ranger Wildtrak, Everest, EcoSport, Territory ស៊េរីឆ្នាំ ២០២២ ដែលនេះជាលើកទី១ ដែលមានការសហការបែបនេះកើតឡើងរវាង អ អិម អេ (ខេមបូឌា) ជាមួយធនាគារ វីង ហើយនេះគ្រាន់តែជាការចាប់ផ្តើមតែប៉ុណ្ណោះ ៕
ឆ្លៀតក្នុងឱកាសនេះដែរ លោក លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានបន្ថែមថា “ បច្ចុប្បន្នក្រុមហ៊ុន ហ្វដ បានពង្រីកនូវវិសាលភាពនៃគ្រឿងបន្លាស់ និងសេវាកម្មជួសជុលរថយន្តនៅតាមបណ្តាខេត្តផ្សេងៗដូចជា ខេត្តកំពង់ចាម និងខេត្តសៀមរាប ហើយយើងក៏មានយានដ្ឋានដៃគូសហការជាច្រើននៅទូទាំង២៥ខេត្តក្រុងក្នុងប្រទេសកម្ពុជាផងដែរ។ ជាពិសេស ថ្មីៗនេះយើងក៏បានបង្កើតនូវ ការិយាល័យផ្នែកទំនាក់ទំនងអតិថិជន (Call Center) ដើម្បីផ្តល់នូវសេវាកម្មឆាប់រហ័ស និងផ្តល់ភាពងាយស្រួលដល់អតិថិជនក្នុងការសាកសួរព័ត៌មាន ក៏ដូចជាធ្វើការទំនាក់ទំនងដោយផ្ទាល់ជាមួយអ្នកជំនាញរបស់យើង ។ ”
សម្រាប់អតិថិជនដែលចង់សាកសួរព័ត៌មាន ឬមានបំណងចង់ទិញរថយន្ត Ford អាចធ្វើការទំនាក់ទំនងតាមលេខទូរស័ព្ទ 012 333 975 ឬ 077 666 357 ឬ 078 999 883
សម្រាប់លោកអ្នកដែលមានតម្រូវការកម្ចីឥណទានតាមរយៈធនាគារ វីង សូមធ្វើការទំនាក់ទំនងតាមលេខទូរស័ព្ទ 078 989 767/078 989 511 ឬអញ្ជើញមកកាន់សាខាណាមួយដែលនៅជិតលោកអ្នកបំផុត៕

May 1, 2023
Chanathip Songkrasin កំពុងចរចាទៅលេងនៅ Premier League
កីឡាករខ្សែបម្រើប្រយុទ្ធមាឌល្អិត Chanathip Songkrasin របស់ក្លិប Hokkaido Consadole Sapporo នៃលីកកំពូលជប៉ុន កំពុងតែទាក់ភ្នែកក្លិបមួយនៅក្នុងលីកកំពូលអង់គ្លេស Leicester City ក្រោយពេលបង្ហាញខ្លួនបានយ៉ាងល្អឱ្យក្លិបក្នុងលីកកំពូលជប៉ុនមួយនេះ។
កីឡាករសញ្ជាតិថៃរូបនេះ កំពុងតែពិចារណាលើសំណើរបស់ក្លិបនេះ ដោយសារតែក្លិបនេះ ក៏ដូចជាក្លិបនៅ Premier League ទាំងអស់ដែរ ដែលតែងតែដាក់កំហិតថា កីឡាករដែលមកពីប្រទេសដែលមានចំណាត់ថ្នាក់បាល់ទាត់ខ្ពស់ ទើបអាចចូលលេងជម្រើសដំបូងបាន ខណៈដែលថៃកំពុងឈរនៅលេខរៀងទី104 ក្នុងចំណាត់ថ្នាក់ពិភពលោក។
Chanathip Songkrasin ត្រូវបានគេចាត់ទុកថាជា Messi អាស៊ាន ដែលទោះជាមានរូបរាង និងមាឌតូចល្អិតក៏ពិតមែន ក៏ប៉ុន្តែល្បឿន បច្ចេកទេស និងភាពវៃឆ្លាត បានធ្វើឱ្យគេលេងបានយ៉ាងល្អ នៅលើទីលានបាល់ទាត់៕
June 3, 2020
Rivaldinho បដិសេធវៀតណាម តែចង់មកលេងនៅថៃ
Rivaldinho ដែលជាកូនប្រុសរបស់អតីតកីឡាករជម្រើសជាតិប្រេស៊ីល Rivaldo បានបង្ហើបឱ្យដឹងថា ខ្លួនចង់មកលេងនៅលីកកំពូលរបស់ប្រទេសក្នុងតំបន់អាស៊ី ដែលមានដូចជាថៃ កូរ៉េខាងត្បូង ឬជប៉ុនជាដើម។
Rivaldinho បានចាប់យកអាជីពបាល់ទាត់តាំងពីឆ្នាំ2014 នៅលីកទី3 របស់ប្រទេសប្រេស៊ីល មុននឹងឡើងមកលេងនៅលីកទី2 ហើយផ្លាស់ទៅលេងនៅតំបន់អឺរ៉ុប ដោយបច្ចុប្បន្នកំពុងលេងឱ្យក្លិប FC Viitorul Constanța ក្នុងលីកកំពូលរបស់ប្រទេសរ៉ូម៉ានី។
ទោះបីជា រូបគេជាកូនរបស់អតីតកីឡាកររបស់ក្លិប Becelona ក៏ពិតមែន ក៏ប៉ុន្តែកីឡាកររូបនេះហាក់មិនសូវជាលេចធ្លោដូចឪពុករបស់គេឡើយ ដោយភាគច្រើនបានត្រឹមជាប់ជាកីឡាករបម្រុងតែប៉ុណ្ណោះ៕
June 3, 2020
Premier League និងចាក់សំឡេងអ្នកគាំទ្រក្នុងហ្គេម FIFA 2020 នៅក្នុងការប្រកួតផ្ទាល់
ការប្រកួត Premier League គ្រោងនឹងចាប់ផ្តើមឡើងវិញនៅថ្ងៃទី17 ខែមិថុនា ឆ្នាំ2020 ខាងមុខនេះហើយ។ ក្នុងនោះដែរ EFL បានដាក់គម្រោងចាក់សំឡេងអ្នកគាំទ្រនៅក្នុងកីឡដ្ឋាន ដើម្បីបង្កើនភាពរស់រវើកក្នុងការប្រកួតឱ្យកីឡាករ ហើយការស្នើសុំនេះក៏ធ្វើទៅតាមស្ថាប័នទូរទស្សន៍ភាគច្រើន ដែលចង់បន្ថែមទស្សនីយភាពពិតៗទៅដល់អ្នកទស្សនាការប្រកួតផ្សាយផ្ទាល់ទាំងអស់ផងដែរ។
គម្រោងនេះត្រូវបាន Premier League កំពុងតែរៀបចំដាក់ចូលទៅក្នុងការប្រជុំនាចុងសប្តាហ៍នេះ ដោយសំឡេងនេះអាចនឹងត្រូវបានស្នើសុំក្នុងការប្រើប្រាស់ពី Game FIFA 2020 ជាមុនសិន៕
June 3, 2020
ការពិត ពីមុន Ronaldo ព្រមទៅ AC Milan តែដោយសារក្លិបមួយនេះមានបញ្ហាហិរញ្ញវត្ថុ ទើបត្រូវប្តូរទៅ Juventus វិញ
បើតាមការបញ្ជាក់ពីអនុប្រធានក្លិប AC Milan លោក Massimiliano Mirabelli បានបញ្ជាក់ថា ពិភពលោកប្រហែលជានឹងភ្ញាក់ផ្អើលខ្លាំងជាងកាលនោះទៅទៀត ព្រោះតែកីឡាកររូបនេះ ហៀបនឹងបានមកកាន់ទឹកដី AC Milan ទៅហើយ ព្រោះកីឡាករ ហើយនិងក្លិប Real Madrid បានយល់ព្រមនឹងគ្នាហើយ តែទាស់ត្រង់ថា ប្រធានក្លិបមួយនេះជាជនជាតិចិន មិនព្រមចំណាយលុយទិញកីឡាកររូបនេះ ដោយសារតែគិតថា ក្លិបអាចនឹងជួបវិបត្តិហិរញ្ញវត្ថុ ប្រសិនបើទិញកីឡាករូបនេះចូល។
ដោយសារតែរឿងនេះ វាបានក្លាយជាឱកាសល្អសម្រាប់ Juventus ក្នុងការឆក់យក Ronaldo បាន សម្រេច បើមិនដូច្នោះទេ ពេលនេះ Ronaldo អាចនឹងពាក់អាវក្រហមឆ្នូតខ្មៅបាត់ទៅហើយ ប្រសិនបើប្រធានក្លិប AC Milan ជាអ្នកផ្សេងវិញនោះ៕
June 3, 2020
Sarach បដិសេធក្លិបជប៉ុន ស៊ូលេងនៅលីកកំពូលថៃ
កាលពីសប្តាហ៍មុន បើតាមការបញ្ជាក់ពីនាយកគ្រប់គ្រងក្លិប SCG Muang Thong United លោក Ronan Ritsuwaja បានបញ្ជាក់ថា អតីតខ្សែបម្រើក្រុមជម្រើសជាតិថៃ Sarach Yooyen របស់ក្លិប Muangthong United កំពុងស្ថិតក្នុងការពិចារណាជាមួយក្លិបលីកកំពូលរបស់ជប៉ុនចំនួន 3ក្លិប។
អ្វីដែលគួរឱ្យភ្ញាក់ផ្អើលខ្លាំងនោះគឺ កាលពីថ្ងៃទី28 ខែឧសភា កន្លងទៅនេះ កីឡាកររូបនេះ ត្រូវបានក្លិប BG Pathum ប្រកាសថា បានផ្លាស់មកលេងនៅក្លិបមួយនេះហើយ កាលពីយប់ថ្ងៃទី27 ឧសភា ឆ្នាំ2020 កន្លងទៅនេះ។
គួរបញ្ជាក់ដែរថា កីឡាកររូបនេះ បានជាប់ជាជម្រើសជាតិថៃ ចាប់តាំងពីឈុត U17, U19, U23 និង ឈុតធំផងដែរ ចាប់តាំងពីឆ្នាំ2007 រហូតមកដល់បច្ចុប្បន្ន ដោយរកគ្រាប់បាល់បានដល់ទៅ 9គ្រាប់ក្នុងនាមជាខ្សែការពារ ដោយធ្លាប់បានបង្ហាញខ្លួនឱ្យក្រុមជម្រើសជាតិថៃបានចំនួន 93ប្រកួត៕
June 2, 2020
Sancho រកបានហ៊ែតទ្រីកហើយ ប្រកាសស្វែងរកយុត្តិធម៌ឱ្យជនជាតិស្បែកខ្មៅ
ខ្សែប្រយុទ្ធរបស់អង់គ្លេស កីឡាករ Jadon Sancho ស្ថិតក្នុងចំណោមតារាបាល់ទាត់ដែលបានបញ្ចេញសារទៅកាន់ពិភពលោក ប្រឆាំងតវ៉ានឹងការរើសអើងពូជសាសន៍កាលពីថ្ងៃអាទិត្យកន្លងទៅនេះ។
កីឡាករ Achraf Hakimi និង Jadon Sancho បានបង្ហាញពាក្យថា ‘Justice For George Floyd’ នៅលើអាវយឺតក្នុងរបស់ខ្លួន ក្រោយពេលដែលជួយឱ្យក្រុម BVB ខ្លួនទទួលជ័យជម្នះ ដោយលទ្ធផល 6ទល់នឹង1 លើក្រុមបាតតារាង Paderborn។
កីឡាករទាំង 2រូបនេះ ត្រូវបានគេដឹងថា ក៏មានជីដូន-ជីតាជាជនជាតិស្បែកខ្មៅដែរ ហើយពាក្យខាងលើនេះ កំពុងតែត្រូវបានប្រើប្រាស់យ៉ាងខ្លាំងក្លានៅសហរដ្ឋអាមេរិក ដើម្បីរើបម្រះពីការរើសអើងជាតិសាសន៍ទៅលើជនជាតិស្បែកខ្មៅ ក្រោយពេលមានករណីជនជាតិស្បែកខ្មៅម្នាក់ បានស្លាប់ ក្រោយពីការបង្ក្រាបពីសំណាក់មន្ត្រីប៉ូលិសស្បែកស ទាំងដែលបុរសនោះមិនមានកំហុសអ្វីសោះឡើយ៕
June 2, 2020
ពហុកីឡដ្ឋាន សម្តេចតេជោ ហ៊ុន សែន ថ្មីសន្លាងមួយទៀត នឹងលេចមុខឡើង នៅក្នុងស្រុកក្រគរ ខេត្តពោធិ៍សាត់
គម្រោងសាងសង់ពហុកីឡដ្ឋានសម្តេចតេជោ ហ៊ុន សែន «SAMDACH HUN SEN SPORT CENTER» ដែលមានតម្លៃខ្ទង់លានដុល្លារ ត្រូវបានឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងារថ្នាក់ជាតិ ចុះមូលដ្ឋានស្រុកក្រគរ និងស្រុកកណ្តៀង និងឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ ពិភាក្សាអនុម័តលើគម្រោងសាងសង់ ដើម្បីជាការឆ្លើយតបទៅនឹងភាពរីកចម្រើន នៃវិស័យកីឡា និងដើម្បីជំរុញវិស័យកីឡាបាល់ទាត់កម្ពុជា ឱ្យកាន់តែរីកចម្រើនឡើងថែមទៀត។
ពហុកីឡដ្ឋានថ្មីនេះ គ្រោងនឹងសាងសង់ឡើងនៅក្នុងស្រុកក្រគរ ខេត្តពោធិ៍សាត់ លើផ្ទៃដីទំហំ 25ហិកតា ក្នុងគោលបំណងលើកស្ទួយវិស័យកីឡា និងដើម្បីជំរុញការធ្វើជាម្ចាស់ផ្ទះស៊ីហ្គេមរបស់កម្ពុជា នៅឆ្នាំ2023 ខាងមុខនេះ។
គួរបញ្ជាក់ដែរថា គម្រោងពហុកីឡដ្ឋាននេះ អាចនឹងសាងសង់នៅលើផ្ទៃដីដែលមានទំហំប្រមាណជា 25ហិកតា ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់ (វាលសម្តេចយស)។ ពហុកីឡដ្ឋាននេះ រួមមានទីលានបាល់ទាត់ខ្នាតអន្តរជាតិ, ទីលានមហោស្រព, ទីលានបាល់ទះ, ទីលានបាល់បោះ, ទីលានរត់ប្រណាំង, ទីលានវាយសី, កន្លែងអង្គុយទស្សនា, កន្លែងហាត់ប្រាណ, ប្រព័ន្ធផ្លូវខ្វាត់ខ្វែង (8ទៅ 10ម៉ែត្រ), វាលស្មៅ, កន្លែងក្មេងលេង, កន្លែងអង្គុយលេង, ស្រះទឹក និងកន្លែងចតរថយន្ត។ល៕
June 2, 2020