Tag: Roma

បណ្ដាក្លឹបបាល់ទាត់នៅអ៊ីតាលី ឡើងដល់វគ្គផ្ដាច់ព្រ័ត្រនៃពានរង្វាន់ធំៗទាំងបីនៅទ្វីបអឺរ៉ុប
ក្លឹបបាល់ទាត់នានាដែលជាតំណាងរបស់ប្រទេសអ៊ីតាលី បានឡើងដល់វគ្គផ្ដាច់ព្រ័ត្រនៃពានរង្វាន់ Champions League, Europa League និង Conference League នៅរដូវកាលនេះ។
នៅឯ Champions League ក្លឹប Inter Milan បានផ្ដួលក្លឹបរួមស្រុក A.C. Milan 3-0 នៅវគ្គពាក់កណ្ដាលផ្ដាច់ព្រ័ត្រ។ នៅថ្ងៃទី 10 មិថុនាខាងមុខ Inter Milan នឹងប៉ះជាមួយ Man City ក្នុងវគ្គផ្ដាច់ព្រ័ត្រ ដែលធ្វើឡើងនៅទីក្រុងអ៊ីស្តង់ប៊ុល ប្រទេសតួកគី។
នៅឯពានរង្វាន់ Europa League ក្លឹប Roma បានឈ្នះ Leverkusen ដោយលទ្ធផល 1-0 នៅវគ្គពាក់កណ្ដាលផ្ដាច់ព្រ័ត្រ។ ក្នុងវគ្គផ្ដាច់ព្រ័ត្រ កូនសិស្ស និងគ្រូបង្វឹក Jose Mourinho នឹងប៉ះក្លឹប Sevilla នៅថ្ងៃទី 31 ឧសភា នៅប៊ុយដាប៉ែស ប្រទេសហុងគ្រី។
តំណាងទីបីរបស់អ៊ីតាលី គឺ Fiorentina នឹងត្រូវប្រកួតជាមួយក្លឹប West Ham ក្នុងវគ្គផ្ដាច់ព្រ័ត្ររបស់ពានរង្វាន់ Conference League នាថ្ងៃទី 07 មិថុនា នៅរដ្ឋធានីប្រាក ប្រទេសឆែក។ នៅវគ្គពាក់កណ្ដាលផ្ដាច់ព្រ័ត្រ Fiorentina បានផ្ដួល Basel ដោយលទ្ធផល 4-3។
បើសិនជា Roma, Inter និង Fiorentina សុទ្ធតែដណ្ដើមបានជ័យជម្នះ នោះបាល់ទាត់អ៊ីតាលីនឹងមាន hat-trick ទីពីរ បន្ទាប់ពី hat-trick ដំបូងត្រូវបានបង្កើតឡើងចន្លោះពីឆ្នាំ 1989 ដល់ 1990 ដោយក្លឹប AC Milan ដណ្ដើមបានពាន Champions League, Sampdoria ដណ្ដើមបានពាន Europa League និង Juventus ដណ្ដើមបានពាន UEFA Cup។ នោះក៏ជារដូវកាលតែមួយគត់ដែលបណ្ដាក្លឹបរបស់ប្រទេសមួយដណ្ដើមបានពានរង្វាន់ទាំងបីនៅទ្វីបអឺរ៉ុប៕
May 19, 2023
ទឹកជំនន់ធំ 100 ឆ្នាំមានម្ដង កំពុងវាយប្រហារលើប្រទេសអ៊ីតាលី
ទឹកជំនន់កំពុងតែបំផ្លាញតំបន់ភាគឦសាននៃប្រទេសអ៊ីតាលី បណ្ដាលឱ្យមនុស្ស 13 នាក់បាត់បង់ជីវិត និងរាប់ម៉ឺននាក់ត្រូវជម្លៀសខ្លួន ក្រោយពីភ្លៀងធំធ្វើឱ្យបាក់ដី នាំឱ្យទឹកទន្លេហូរចូលទីប្រជុំជន។
តំបន់ Emilia Romagna នៃប្រទេសអ៊ីតាលី នៅសប្ដាហ៍នេះត្រូវរងគ្រោះដោយសារជំនន់ដែលបានធ្វើឱ្យទឹកទន្លេចំនួន 23 ឡើងលិចច្រាំង បង្កឱ្យមានហេតុការណ៍បាក់ដីចំនួន 300 ករណី ប៉ះពាក់ដល់ទីក្រុង និងទីប្រជុំជន 42 តំបន់ ខណៈផ្លូវជាង 400 កំណាត់ក៏ត្រូវខូចខាត។
ទឹកជំនន់នេះក៏បានធ្វើឱ្យមនុស្សប្រហែល 20,000 នាក់ត្រូវជម្លៀសទៅកាន់កន្លែងមានសុវត្ថិភាព គ្រាដែលមនុស្សយ៉ាងតិច 13 នាក់បានបាត់បង់ជីវិត។
ជនចាស់ជរា និងជនពិការជាច្រើននាក់ត្រូវជាប់ក្នុងផ្ទះ នៅពេលកងកម្លាំងជួយសង្គ្រោះធ្វើការក្រោមទឹកភ្លៀងទាំងយប់ទាំងថ្ងៃ ដោយសារតែទឹកជំនន់ធំបំផុតមិនធ្លាប់នៅប្រទេសអ៊ីតាលី ក្នុងរង្វង់ 100 ឆ្នាំមកនេះ៕

May 19, 2023
U-22 ឡាវដែលមានកីឡាករដើមកំណើតវៀតណាមពីររូប ថា អាច «យកស្មើ» នឹងក្រុមផ្កាយលឿងនៅស៊ីហ្គេម
ខ្សែបម្រើ Damoth Thongkhamsavath របស់ក្រុមបាល់ទាត់ជម្រើសជាតិអាយុក្រោម 22 ឆ្នាំ (U-22) របស់ប្រទេសឡាវ ប្រកាសយ៉ាងជឿជាក់ថា នឹងយកស្មើជាមួយនឹងក្រុម U-22 វៀតណាមនៅក្នុងការប្រកួតបើកឆាកនៅស៊ីហ្គេមលើកទី 32។
កាលពីល្ងាចថ្ងៃទី 28 មេសា U-22 ឡាវ ក្រោមការដឹកនាំរបស់ប្រធានក្រុមគ្រូបង្វឹក Michael Weiss បានហ្វឹកហាត់ក្នុងថ្ងៃសំខាន់ដើម្បីត្រៀមសម្រាប់ការប្រកួតជាមួយវៀតណាមនៅស៊ីហ្គេម។ នៅក្នុងពេលហ្វឹកហាត់នោះ ខ្សែបម្រើដើមកំណើតវៀតណាមរបស់ U-22 ឡាវ Damoth Thongkhamsavath បានលើកឡើងអំពីការប៉ះគ្នារវាង ឡាវ និងវៀតណាមនៅថ្ងៃទី 30 មេសាខាងមុខ។
Damoth Thongkhamsavath បានប្រាប់អ្នកសារព័ត៌មានដោយភាពជឿជាក់ថា «វៀតណាមឆ្នាំនៅតែខ្លាំងនៅស៊ីហ្គេម ពួកគេជាបេក្ខភាពទីមួយ។ ក៏ប៉ុន្តែ ខ្ញុំគិតថា U-22 ឡាវ នៅតែអាចយកស្មើនៅក្នុងការប្រកួតដំបូង។ លទ្ធផលនៃការប្រកួតនឹងជា 0-0»។
Damoth Thongkhamsavath មានជីដូ ជីតាកើតនៅប្រទេសវៀតណាម និងចេះភាសានេះយ៉ាងស្ទាត់ ដោយសារឪពុកម្ដាយតែងនិយាយភាសាវៀតណាមជាមួយគ្នា។ កីឡាកររូបនេះក៏ធ្លាប់បានចូលរួមប្រកួតនៅស៊ីហ្គេមលើកទី 31 ផងដែរ។
Damoth Thongkhamsavath
ទន្ទឺមនឹង Damoth Thongkhamsavath នៅស៊ីហ្គេមលើកនេះ U-22 ឡាវ ក៏មានតារាបាល់ទាត់បីរូបទៀតដែលកំពុងទាត់ឱ្យបរទេស រួមមាន Theo Klein (Omaha Mavericks នៅសហរដ្ឋអាម៉េរិក), Roman Angot (Bahlinger អាល្លឺម៉ង់) និង Victor Yovinasak (Montceau បារាំង)។
ទោះជាយ៉ាងណាក៏ដោយ គ្រូបង្វឹកជនជាតិបារាំងរបស់វៀតណាម លោក Troussier បានសង្កត់ធ្ងន់ថា «ក្រុមកីឡាករវៀតណាមក្មេងបំផុតដែលចូលរួមប្រកួតនៅស៊ីហ្គេម..។ ខ្ញុំពេញចិត្ត។ ក្រុមមានសង្ឃឹម ហើយយើងនឹងប្រឹងប្រែងដើម្បីបានលទ្ធផលល្អបំផុត»។
Nalongsit Chanthalangsy ក៏ជាកីឡាកររបស់ក្រុម U-22 ឡាវ ដែលមានដើមកំណើតវៀតណាម
នៅស៊ីហ្គេមលើកនេះ U-22 ឡាវស្ថិតក្នុងពូល B ជាមួយម្ចាស់មេដាយមាសពីរលើកចុងក្រោយគឺ វៀតណាម រួមនឹង ថៃ ម៉ាឡេស៊ី និងសិង្ហបុរី។ U-22 ឡាវនឹងត្រូវប៉ះវៀតណាមនៅក្នុងការប្រកួតបើកឆាកនៅថ្ងៃទី 30 មេសា 2023 នៅឯកីឡដ្ឋានព្រីនស៍៕
April 29, 2023
Chelsea យល់ព្រមលើតម្លៃខ្លួន38លានអឺរ៉ូដើម្បីទិញ Rudiger ពីក្លិប Roma
ក្លិបតោខៀវ Chelsea បានយល់ព្រមលើតម្លៃខ្លួនជាមួយនឹងក្លិប Roma ក្នុងទឹកប្រាក់38លានអឺរ៉ូ (ស្មើនឹង43.4លានដុល្លារអាមេរិក) ដើម្បីទិញយក Antonio Rudiger ខណៈដែលខ្សែការពារអន្តរជាតិអាល្លឺម៉ង់រូបនេះ ត្រូវបានគេរំពឹងទុកថា នឹងធ្វើដំណើរទៅកាន់ទីក្រុងឡុងដ៍នៅសប្តាហ៍ក្រោយ ដើម្បីបំពេញការពិនិត្យសុខភាព។
Roma បានរក្សាជំហរដោយចង់បានតម្លៃខ្លួន45លានអឺរ៉ូសម្រាប់កីឡាករ Rudiger ដែលពួកគេបានទិញពីក្លិប Stuttgart កាលពីរដូវក្តៅមុនក្រោយពីកីឡាកររូបនេះបានបង្ហាញពីទម្រង់លេងយ៉ាងល្អក្នុងពេលស្ថិតជាកីឡាករកម្ចីពេញមួយរដូវកាលរួចមក។
ក្រោយពីបានច្រានចោលសំណើជាបឋមរបស់ Chelsea ក្នុងទឹកប្រាក់35លានអឺរ៉ូម្តងរួចមក ក្លិប Roma បានយល់ព្រមទទួលយកកញ្ចប់តម្លៃខ្លួនមួយដែលមានន័យថា Chelsea នឹងត្រូវចំណាយប្រាក់33លានអឺរ៉ូ និងប្រាក់ឧបត្ថម្ភបន្ថែម5លានអឺរ៉ូផ្សេងទៀត។ Rudiger ដែលជាខ្សែការពារកណ្តាលប៉ុន្តែអាចលេងនៅតំបន់ការពារស្លាបស្តាំបានដែរនោះ ត្រូវបានរំពឹងទុកថានឹងទទួលបានចំណូលប្រមាណជា4លានអឺរ៉ូ ក្នុងមួយរដូវកាល។ រូបគេកំពុងតែលេងក្នុងព្រឹត្តិការណ៍Confederations Cup ដោយក្រុមជម្រើសជាតិអាល្លឺម៉ង់ត្រូវប៉ះជាមួយនឹងក្រុមជម្រើសជាតិស៊ីលីក្នុងវគ្គផ្តាច់ព្រ័ត្រ នាថ្ងៃអាទិត្យនេះ។ លោក Antonio Conte បានព្យាយាមធ្វើការពង្រឹងតំបន់ការពារបើទោះបីបានឈ្នះពាន Premier League កាលពីរដូវកាលមុនក៏ដោយ និងបានចាត់ទុកកីឡាករវ័យ24ឆ្នាំរូបនេះ ជាគោលដៅដ៏ចម្បងរបស់លោកក្រោយពីការពិភាក្សារឿងផ្សេងៗជាមួយនឹងបុគ្គលិកបច្ចេកទេសរបស់ Chelsea រួចមក៕
ប្រភពពី៖ The Guardian
July 1, 2017
Liverpool បានយល់ព្រមលើលក្ខខណ្ឌផ្ទាល់ខ្លួនជាមួយ Salah ក្នុងតម្លៃខ្លួន 35លានផោន
ក្លិបហង្សក្រហម Liverpool កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែបម្រើស្លាបអន្តរជាតិអេហ្ស៊ីប Mohamed Salah ក្រោយពីពួកគេបានយល់ព្រមលើលក្ខខណ្ឌផ្ទាល់ខ្លួនផ្សេងៗ ខណៈដែលពួកគេបានយល់ព្រមលើតម្លៃខ្លួន 35លានផោន (ស្មើនឹង 45លានដុល្លារអាមេរិក) ជាមួយនឹងក្លិប Roma ហើយ។
វាត្រូវបានគេមើលឃើញថា Salah បានជួបជាមួយនឹងលោក Jurgen Klopp ក្នុងទីក្រុង Liverpool ក្នុងរយៈពេលប៉ុន្មានថ្ងៃចុងក្រោយនេះ ហើយការព្រមព្រៀងគ្នាមួយត្រូវបានឈានដល់ជាមួយនឹងកីឡាកររូបនេះ និងភ្នាក់ងារតំណាងរបស់គេ។ ទោះបីជាយ៉ាងណា ការពិភាក្សាផ្សេងៗកំពុងតែបន្តធ្វើឡើងជាមួយនឹងក្លិប Roma ក្រោយពីការដេញថ្លៃជាបឋមក្នុងទឹកប្រាក់ 28លានផោនរបស់ក្លិប Liverpool ត្រូវបានច្រានចោល កាលពីប៉ុន្មានថ្ងៃមុន។ ប៉ុន្តែ លោក Klopp ដែលជាគ្រូបង្វឹករបស់ Liverpool បានប្តេជ្ញាថា នឹងទិញយក Salah ឲ្យបាន ហើយស្របពេលដែលកីឡាកររូបនេះត្រូវបានគេជឿជាក់ថា ចង់ចាកចេញពី Roma ដែរនោះ វាបង្ហាញថា ការព្រមព្រៀងគ្នាមួយកំពុងតែស្ថិតយ៉ាងប្រកៀកក្នុងការឈានដល់ការសម្រេច ក្រោយពីការបង្កើនសំណើដេញថ្លៃពីសំណាក់ក្លិប Liverpool ។
ប្រសិនបើការផ្ទេរនេះត្រូវបានបំពេញជាផ្លូវការ វានឹងក្លាយជារឿងដ៏មានសំណាងមួយសម្រាប់ក្លិប Liverpool ដែលចង់បាន Salah កាលពីឆ្នាំ2014 នៅមុនពេលរូបគេបានសម្រេចចិត្តចូលរួមជាមួយនឹងក្លិប Chelsea ជំនួសវិញ ក្រោយពីផ្ទេរពីក្លិបរបស់ស្វ៊ីស Basel។ Salah ដែលជាអតីតខ្សែបម្រើស្លាបរបស់ Chelsea បានចូលរួមជាមួយនឹងក្លិប Roma ក្នុងតម្លៃខ្លួន 13លានផោន កាលពីរដូវក្តៅមុន ក្រោយពីបានចំណាយពេលខ្ចីជើងពេញមួយរដូវកាលរួចមក៕
ប្រភពពី៖ Sky Sports
June 6, 2017
Roma ប្រាប់ Liverpool ថា ២៨លានផោនមិនគ្រប់គ្រាន់សម្រាប់ការទិញយក Salah ទេ
ក្លិប Roma បានប្រាប់ក្លិបហង្សក្រហម Liverpool ថា ២៨លានផោន (ស្មើនឹង៣៦លានដុល្លារអាមេរិក) នឹងមិនគ្រប់គ្រាន់ក្នុងការទិញយកខ្សែបម្រើស្លាបអន្តរជាតិអេហ្ស៊ីប Mohamed Salah ទេ។
ក្លិបទាំងពីរបានរៀបចំកិច្ចពិភាក្សាជាច្រើនលើកជុំវិញកិច្ចព្រមព្រៀងដែលអាចទៅរួចមួយ ខណៈដែល Liverpool បានបញ្ជាក់ប្រាប់ថា ពួកគេត្រៀមលក្ខណៈរួចរាល់ក្នុងការដាក់សំណើជាទឹកប្រាក់២៨លានផោន ដើម្បីទិញយកកីឡាកររូបនេះ ប៉ុន្តែទោះបីជាយ៉ាងណា ក្លិបស្ថិតក្នុងក្របខ័ណ្ឌ Serie A មួយនេះ នឹងមិនលក់កីឡាករ Salah វ័យ២៤ឆ្នាំម្នាក់នេះក្នុងតម្លៃខ្លួនប៉ុននោះឡើយ ហើយបច្ចុប្បន្ន វាអាស្រ័យទៅលើ Liverpool ក្នុងការសម្រេចថា តើពួកគេចង់បង្កើនសំណើនៃការដេញថ្លៃរបស់ខ្លួន ឬយ៉ាងណា?។
លោក Jurgen Klopp នៃក្លិប Liverpool បានចាត់ទុកខ្សែបម្រើស្លាបរូបនេះ គឺជាកីឡាករអាទិភាពរបស់លោកក្នុងការទិញចូល ខណៈដែលក្លិបនេះត្រៀមសម្រាប់រដូវកាលថ្មីក្នុងក្របខ័ណ្ឌ Premier League និងការប្រកួតក្នុងក្របខ័ណ្ឌ Champions League វគ្គ Playoff។ Liverpool បានជួបនឹងភាពត្រដាបត្រដួសខ្លាំងកាលពីរដូវកាលមុន នៅពេលដែលពួកគេលេងដោយគ្មានខ្សែបម្រើដ៏ឆ្នើម Sadio Mane ជាពិសេសនៅកីឡដ្ឋាន Anfield ជាកន្លែងដែលពួកគេបានជួបការលំបាកក្នុងការផ្តួលក្រុមជាច្រើន ហើយលោក Klopp ជឿជាក់ថា Salah នឹងជួយបន្ថែមល្បឿនក្នុងក្រុមរបស់លោក។ Salah ទើបតែបានបំពេញរដូវកាលទី២របស់គេនៅឯក្លិប Roma ក្រោយពីរូបគេបានលេងក្នុងនាមជាកីឡាករកម្ចីពីក្លិប Fiorentina ក្នុងរដូវកាលឆ្នាំ២០១៥-២០១៦ និងបានក្លាយជាកីឡាករដ៏មានគ្រោះថ្នាក់បំផុតរបស់ក្របខ័ណ្ឌ Serie A។
ក្នុងអំឡុងការចំណាយពេល២រដូវកាលរបស់គេក្នុងក្រុម Roma រូបគេបានស៊ុតបាល់បញ្ចូលទី២៩គ្រាប់ ក្នុងការប្រកួតលីក៦៥លើក៕
ប្រភពពី៖ The Guardian
June 3, 2017
Perotti សង្គ្រោះ Roma នៅថ្ងៃជប់លៀងលាគ្នារបស់ Totti
ខ្សែបម្រើ Diego Perotti បានស៊ុតបាល់បញ្ចូលទីនៅជិតបញ្ចប់ការប្រកួត ខណៈដែលក្រុម Roma បានផ្តល់ថ្ងៃនៃការលាគ្នារបស់ខ្សែប្រយុទ្ធជើងចាស់ Francesco Totti នូវការចងចាំមួយ ក្រោយពីបានកត់ត្រាជ័យជម្នះដ៏រំភើបក្នុងលទ្ធផល ៣-២ ក្នុងផ្ទះខ្លួនឯងលើក្រុម Genoa នាកីឡដ្ឋាន Stadio Olimpico កាលពីថ្ងៃអាទិត្យ។
Totti ដែលបានលេងការប្រកួតចុងក្រោយរបស់គេជាមួយនឹងក្រុម Roma ក្រោយពីបានចំណាយពេលលេងឲ្យក្លិបនេះអស់រយៈពេល២៥ឆ្នាំ ប៉ុន្តែ ឈ្នះពានលីកតែមួយលើកនោះ ត្រូវបានគេផ្តល់ឲ្យនូវកាដូមួយនៅថ្ងៃចុងក្រោយ នៅពេលដែលរូបគេត្រូវបានដាក់ឲ្យលេងជំនួសខ្សែបម្រើប្រយុទ្ធអន្តរជាតិអេហ្ស៊ីប Mohamed Salah នៅនាទីទី៥៤។ Totti មិនបានរកគ្រាប់បាល់បញ្ចូលទីឡើយក្នុងការបង្ហាញខ្លួនក្នុងការប្រកួតក្របខ័ណ្ឌ Serie A ជាលើកទី៦១៩ និងជាលើកទី៧៨៥បើសរុបទាំងអស់។
ស្របពេលដែលការទទួលជ័យជម្នះនេះ បានធ្វើឲ្យក្រុម Roma ឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ Totti បានជួបថ្ងៃលាគ្នាដ៏រំជួលចិត្ត ខណៈដែលអ្នកគាំទ្រជាច្រើនបានបង្ហូរទឹកភ្នែក ក្រោយពីពួកគេបាននិយាយលាហើយទៅកាន់កីឡាករដ៏អស្ចារ្យបំផុតក្នុងប្រទេសអ៊ីតាលី ក្នុងរយៈពេល២០ឆ្នាំមកនេះ។ Totti បានឲ្យដឹងថា៖ «ពេលវេលានេះបានមកដល់។ ខ្ញុំបានយំពេញមួយយប់ ហើយនេះគឺជាតែអាវមួយរបស់ខ្ញុំ»៕
ប្រភពពី៖ Channel News Asia
May 29, 2017