Ramos - La Reine Media

កីឡាការិនីខ្សែប្រយុទ្ធព័រទុយហ្កាល់បំបែកកំណត់ត្រារបស់ Ronaldo

គ្រាប់បាល់ដែលរកបាននៅពេលជួយឱ្យព័រទុយហ្កាល់នាំមុខគូប្រកួត 2-0 ក្នុងការប្រកួតកាលពីថ្ងៃទី 27 កក្កដា ក្នុងក្របខណ្ឌ World Cup បានជួយឱ្យកីឡាការិនី Kika Nazareth បំបែកកំណត់ត្រាមួយរបស់ Cristiano Ronaldo។

Kika Nazareth ដែលមានអាយុ 20 ឆ្នាំ និង 8 ខែ ត្រូវបានគ្រូបង្វឹក Francisco Neto ដាក់ឱ្យទាត់ជាកីឡាការិនីជម្រើសដំបូង នៅក្នុងការប្រកួតជាមួយនឹងវៀតណាម កាលពីថ្ងៃទី 27 កក្កដា។ Kika Nazareth បានជួយឱ្យព័រទុយហ្កាល់នាំមុខវៀតណាម 2-0 ចាប់ពីនាទីទី 21។ ដោយរកបានគ្រាប់បាល់នេះ Kika Nazareth បានក្លាយជាអ្នកលេងបាល់ក្មេងបំផុតដែលស៊ុតចូលទីឱ្យក្រុមជម្រើសជាតិព័រទុយហ្កាល់នៅ World Cup។

មុននោះ កំណត់ត្រានេះ ត្រូវបានបង្កើតឡើងដោយ Cristiano Ronaldo ពេលទាត់នៅ World Cup ផ្នែកបុរស ឆ្នាំ 2006។ កាលនោះ កំពូលតារាបាល់ទាត់កើតឆ្នាំ 1985 បានស៊ុតចូលទីនៅនាទីទី 80 ជួយឱ្យព័រទុយហ្កាល់ឈ្មោះអ៊ីរ៉ង់ 2-0 នៅវគ្គចែកពូល។ Ronaldo មានអាយុ 21 ឆ្នាំ និង 132 ថ្ងៃ ក្នុងគ្រាដែលគាត់ទាត់ចូលទីនៅក្នុងការប្រកួតដំបូងរបស់ខ្លួននៅ World Cup។

Nazareth ដែលមានឈ្មោះពេញថា Francisca Ramos Ribeiro Nazareth Sousa កំពុងទាត់ឱ្យក្លឹប Benfica។ នាងបានបង្ហាញខ្លួនក្នុងក្លឹបនេះតាំងពីអាយុ 16 ឆ្នាំ និងចុះកិច្ចសន្យាដំបូងកាលពីឆ្នាំ 2020 ក្នុងវ័យ 17 ឆ្នាំ។ ខែមីនា ឆ្នាំ 2020 Nazareth បានទាត់ក្នុងការប្រកួតដំបូងសម្រាប់ក្រុមជម្រើសជាតិព័រទុយហ្កាល់។ នាងរកបានគ្រាប់បាល់ដំបូងឱ្យក្រុមជម្រើសជាតិនៅថ្ងៃទី 22 មិថុនា 2022 ក្នុងការប្រកួតមិត្តភាពជាមួយនឹងក្រុមក្រិក៕

July 29, 2023

ក្លឹបបាល់ទាត់ PSG ប្រកាសអំពីតម្លៃខ្លួនរបស់កំពូលកីឡាករ Mbappe

ម្ចាស់ជើងឯកពានរង្វាន់ Ligue 1 ទំនងជានឹងទទួលយកការលក់ Kylian Mbappe ក្នុងតម្លៃ 160 លានដុល្លារអាម៉េរិក ក្នុងពេលឆាប់ៗ ព្រោះមិនចង់ប្រឈមនឹងហានិភ័យត្រូវបាត់បង់កីឡាករនេះទទេៗ នៅរដូវក្ដៅឆ្នាំ 2024។

យោងតាម ESPN ប្រធាន Nasser Al Khelaifi យល់ព្រមឱ្យ Mbappe ចាកចេញនៅក្នុងរដូវក្ដៅឆ្នាំ 2023 បើសិនជាទទួលបានប្រាក់ដោះដូរ 150 លានអឺរ៉ូ (ប្រហែល 160 លានដុល្លារអាម៉េរិក) ព្រោះថា សុពលភាពកិច្ចព្រមព្រៀងរបស់ Mbappe នៅក្លឹប PSG នេះ នៅសល់តែមួយឆ្នាំទៀតប៉ុណ្ណោះ។

សារព័ត៌មានខាងលើក៏បានឱ្យដឹងថា ក្លឹបថ្មីរបស់ Mbappe អាចជា Real បើសិនចាកចេញពី PSG។ ចំណែកសារព័ត៌មានបារាំង L’Équipe ក៏បានផ្សាយថា ក្លឹប Real បានត្រៀមខ្លួនរួចរាល់ដើម្បីដោះដូរយក Mbappe ដោយមិនរង់ចាំទិញក្នុងក្រមខណ្ឌកីឡាករសេរីនៅរដូវក្ដៅឆ្នាំក្រោយ។

PSG កំពុងស្ថិតក្នុងការប្រែប្រួលខ្លាំងនៅរដូវកាលនេះ។ Sergio Ramos, Lionel Messi បានចាកចេញទៅតាមទម្រង់សេរី ខណៈដែល Neymar ទទួលបានសំណើទិញក្នុងតម្លៃ 300 លានដុល្លារអាម៉េរិក/ឆ្នាំ ពីក្លឹប Al Hilal នៅអារ៉ាប៊ីសាអូឌីត។ ចំណែក Mbappe វិញក៏បានជូនដំណឹងអំពីការមិនពន្យារកិច្ចព្រមព្រៀងជាមួយក្លឹបនេះផងដែរ។

ទំព័រ ESPN យល់ថា ការចាកចេញរបស់ Mbappe នឹងបង្កការខាតបង់ធំសម្រាប់ PSG ព្រោះថា បច្ចុប្បន្នកីឡាកររូបនេះត្រូវបានចាត់ទុកថា ជានិមិត្តរូបរបស់ប្រទេសបារាំង ដោយត្រូវបានវាយតម្លៃថាជាតារាធំបំផុតបន្ទាប់ពី Messi និង Ronaldo៕

June 14, 2023

កីឡាករបាល់ទាត់ពិភពលោក 13 រូប ដែលអាចទៅទាត់នៅ Saudi Pro League

ប្រទេសអារ៉ាប៊ីសាអូឌីត បានត្រៀមខ្លួនរួចហើយដើម្បីបញ្ចេញទឹកប្រាក់ក្នុងរដូវទិញដូរកីឡាករនារដូវក្ដៅ នៅក្នុងការប្រឹងប្រែងនាំយកកំពូលតារាបាល់ទាត់នានារបស់ពិភពលោក និងលើកពានរង្វាន់ Pro League របស់ខ្លួនឡើងទៅកាន់ផែនទីពិភពបាល់ ក្នុងគ្រាដែលប្រទេសនេះកំពុងខិតខំសម្រាប់ការទទួលធ្វើជាម្ចាស់ផ្ទះ World Cup 2030។

ថ្វីបើរដូវកាលដោះដូរកីឡាករឆ្នាំ 2023 មិនទាន់មកដល់ ប៉ុន្តែមួយក្នុងចំណោមប្រធានបទដែលត្រូវបានគេលើកឡើងញឹកញាប់ជាងគេក្នុងមួយរយៈពេលខ្លីចុងក្រោយនេះ គឺពានរង្វាន់ Saudi Pro League។

ប្រទេសអារ៉ាប៊ីសាអូឌីត មិនធ្លាប់ជាទីសំចតសំខាន់របស់កីឡាករបាល់ទាត់ពិភពលោក ប៉ុន្តែអារ៉ាប៊ីសាអូឌីតកំពុងតែប្ដេជ្ញាចិត្តកែប្រែប្រការនេះ។ ព្រឹត្តិការណ៍ប្រកួតបាល់ទាត់ដណ្ដើមពានរង្វាន់ Saudi Pro League កំពុងតែដើរតួនាទីជាអ្នកទាក់ទាញកីឡាករល្បីៗរបស់ពិភពលោក ក្នុងនោះ ពានរង្វាន់នេះក៏ធ្លាប់ទាក់ទាញបាន Cristiano Ronaldo ដែលចូលរួមប្រកួតតាំងពីខែធ្នូ 2022 ហើយថ្មីៗនេះ Karim Benzema ក៏បានសម្រេចចិត្តមកចូលរួម បន្ទាប់ពីចាកចេញពី Real Madrid។

អារ៉ាប៊ីសាអូឌីត កំពុងតែធ្វើសកម្មភាពសម្រាប់ការរៀបចំ World Cup 2023 ក្នុងនោះ ប្រទេសនេះក៏បានត្រៀមរួចរាល់សម្រាប់ការចំណាយប្រាក់ដ៏ច្រើនដើម្បីអាចក្លាយជាប្រទេសបាល់ទាត់។ Ronaldo កំពុងទទួលបាន 177 លានផោន/ឆ្នាំ ពីក្លឹបបាល់ទាត់ Al-Nassr ហើយនេះគឺជាប្រាក់បៀវត្សរ៍ដែលកំពុងទាក់ទាញចំណាប់អារម្មណ៍របស់កីឡាករល្បីៗរបស់ពិភពលោក ក្នុងនោះមានទាំង Lionel Messi ព្រោះថា M10 បច្ចុប្បន្នគឺជាទូតទេសចរណ៍របស់អារ៉ាប៊ីសាអូឌីតស្រាប់ ខណៈទំនាក់ទំនងរវាងកីឡាកររូបនេះជាមួយនឹងក្លឹប PSG ក៏ជិតដាច់ជាផ្លូវការហើយដែរ។ ពេលនេះ Messi អាចយកតម្រាប់តាម Ronaldo។

ក៏ប៉ុន្តែ Messi មិនមែនជាកីឡាករតែម្នាក់គត់ដែលកំពុងពិចារណាលើការមកទាត់ឱ្យបណ្ដាក្លឹបនៅអារ៉ាប៊ីសាអូឌីត។ ប្រភពព័ត៌មាននៅប្រទេសបារាំងឱ្យដឹងថា ក្លឹប Al-Hilal ក៏បានលើកសំណើជាកិច្ចព្រមព្រៀងជាមួយនឹង Sergio Busquets, Jordi Alba និង Marco Verratti នៅក្នុងការប្រឹងប្រែងដើម្បីបញ្ចុះបញ្ចូល Messi ឱ្យមកចូលរួមគម្រោងរបស់ក្លឹបនេះ។

M10 បច្ចុប្បន្នគឺជាទូតទេសចរណ៍របស់អារ៉ាប៊ីសាអូឌីត

ក្រៅពីនេះនៅមានកីឡាករជាច្រើនទៀត រួមមានដូចជា Hugo Lloris, Roberto Firmino, Luka Modric, Sergio Ramos, N’Golo Kante, Pierre-Emerick Aubameyang, Wilfried Zaha, Iago Aspas ជាដើម ក៏ទទួលបានការស្នើ ឬការបញ្ចុះបញ្ចូលឱ្យមកទាត់នៅអារ៉ាប៊ីសាអូឌីតផងដែរ។

ចលនាខាងលើនេះ មួយផ្នែកត្រូវបានចាប់ផ្ដើមពីករណី មូលនិធិវិនិយោគសាធារណៈ (PIF) របស់អារ៉ាប៊ីសាអូឌីត ទិញក្លឹបបាល់ទាត់ចំនួនបួននៅប្រទេសនេះ ដែលរួមមាន ក្លឹប Al-Ittihad, Al-Ahli, Al-Nassr និង Al-Hilal។ PIF ដែលជាម្ចាស់កម្មសិទ្ធិរបស់ Newcastle ដែរនោះ ហាក់កំពុងប្ដេជ្ញាចិត្តខ្ពស់ដើម្បីបង្កការភ្ញាក់ផ្អើលក្នុងវិស័យបាល់ទាត់ ដោយការចំណាយប្រាក់យ៉ាងច្រើនសន្ធឹកសម្រាប់ទាក់ទាញកីឡាករ។

ទោះជាយ៉ាងណាក៏ដោយ គេនៅតែត្រូវរង់ចាំមើលថា តើមានកីឡាករប៉ុន្មាននាក់ក្នុងចំណោមកីឡាករដែលបានរៀបរាប់ខាងលើ ព្រមទទួលយកសំណើរបស់បណ្ដាក្លឹបនៅអារ៉ាប៊ីសាអូឌីត៕

June 7, 2023

Ramos ថា រូបគេនឹងស្វាគមន៍ Mbappe មកកាន់ក្លិប Real Madrid

ខ្សែការពារ Sergio Ramos ដែលជាប្រធានក្រុម Real Madrid បាននិយាយថា ខ្សែប្រយុទ្ធវ័យក្មេងអន្តរជាតិ Kylian Mbappe នឹងក្លាយជាកីឡាករចំណូលថ្មីប្រកបដោយការស្វាគមន៍សម្រាប់ក្រុមម្ចាស់ជើងឯកក្របខ័ណ្ឌ Champions League និង La Liga មួយនេះ ប្រសិនបើរូបគេសម្រេចចិត្តចាកចេញពីក្លិប Monaco។ ខ្សែប្រយុទ្ធវ័យ18ឆ្នាំរូបនេះ កំពុងតែស្ថិតក្នុងរ៉ាដារបស់លោក Zinedine Zidane អ្នកចាត់ការទូទៅរបស់ក្លិប Real Madrid ខណៈដែលក្លិបយក្សរបស់អេស្ប៉ាញមួយនេះ ត្រៀមលក្ខខណៈរួចរាល់ធ្វើឲ្យរូបគេក្លាយជាកីឡាករម្នាក់ក្នុងចំណោមកីឡាករដែលមានតម្លៃខ្លួនខ្ពស់ជាងគេបំផុត ក្នុងការផ្ទេរមួយដែលអាចមានតម្លៃខ្លួន211លានដុល្លារអាមេរិក ឬស្មើនឹង180លានអឺរ៉ូ។

Ramos បានបញ្ជាក់ថា Mbappe ពិតជាមានសមត្ថភាពក្នុងការក្លាយជាកីឡាករដ៏ឆ្នើមបំផុតក្នុងពិភពលោក។ នៅមុនពេលក្រុម Real Madrid របស់គេប្រកួតជាមួយនឹងក្រុម Barcelona ក្នុងទីក្រុង Miami Ramos បាននិយាយថា៖ «វាមិនមែនជាការសម្រេចចិត្តមួយសម្រាប់ខ្ញុំទេ ប៉ុន្តែ Mbappe ជាកីឡាករដ៏អស្ចារ្យម្នាក់។ មិនមានកីឡាករវ័យក្មេងច្រើនឡើយដែលមានលក្ខណៈដូចរូបគេ។ យើងមានឆ្នាំដ៏សំខាន់មួយនៅពីមុខយើង និងមានតារាឆ្នើមៗរួចជាស្រេច»។ កីឡាកររូបនេះបានបន្ថែមទៀតថា៖ «ប៉ុន្តែ ទឹកប្រាក់ពិតជាអាចធ្វើឲ្យបាល់ទាត់មានចលនា ហើយមនុស្សជាច្រើនអាចលេងលើសពីអ្វីដែលពួកគេចង់។ ប្រសិនបើរូបគេចង់ចូលរួមជាមួយនឹងក្លិប Real Madrid ទ្វារពិតជាកំពុងតែបើកចំហ»៕

ប្រភពពី៖ Sports.yahoo

July 31, 2017

Tag: Ramos

កីឡាការិនី​ខ្សែប្រយុទ្ធ​ព័រទុយហ្កាល់​បំបែក​កំណត់ត្រា​របស់ Ronaldo

ក្លឹប​បាល់​ទាត់ PSG ប្រកាស​អំពី​តម្លៃ​ខ្លួន​របស់​កំពូល​​កីឡាករ​ Mbappe

កីឡាករ​បាល់ទាត់​ពិភពលោក​ 13 រូប ​ដែល​អាច​ទៅ​ទាត់​នៅ Saudi Pro League

Ramos ថា រូបគេ​នឹង​ស្វាគមន៍ Mbappe មកកាន់​ក្លិប Real Madrid

កីឡាការិនីខ្សែប្រយុទ្ធព័រទុយហ្កាល់បំបែកកំណត់ត្រារបស់ Ronaldo

ក្លឹបបាល់ទាត់ PSG ប្រកាសអំពីតម្លៃខ្លួនរបស់កំពូលកីឡាករ Mbappe

កីឡាករបាល់ទាត់ពិភពលោក 13 រូប ដែលអាចទៅទាត់នៅ Saudi Pro League

Ramos ថា រូបគេនឹងស្វាគមន៍ Mbappe មកកាន់ក្លិប Real Madrid