Premier League - La Reine Media

Tottenham ជួបការខកចិត្តធំក្នុងការប្រជែងពាន ក្រោយចាញ់ West Ham

ក្តីសង្ឃឹមនៃការប្រជែងពានក្រខ័ណ្ឌ Premier League របស់ក្រុម Tottenham Hotspur បានរងនូវការខកចិត្តដ៏ធំមួយ ខណៈដែលការទទួលជ័យជម្នះជាប់ៗគ្នារបស់ពួកគេបានបញ្ចប់ត្រឹម៩ប្រកួត ក្នុងពេលរងបរាជ័យ ១-០ នៅលើទឹកដីក្រុម West Ham United កាលពីថ្ងៃសុក្រ។

គ្រាប់បាល់ស៊ុតបញ្ចូលទីនៅនាទី ទី៦៥ របស់ខ្សែបម្រើ Manuel Lanzini បានកាត់សេចក្តីក្នុងការប្រកួតរវាងក្រុមស្ថិតក្នុងទីក្រុងតែមួយនេះ ខណៈដែលក្រុម Tottenham បានធ្វើការគ្រប់គ្រងទាំងស្រុង ប៉ុន្តែ មិនបានបង្ហាញពីទម្រង់លេងក្នុងកម្រិតដែលបានជួយបង្កើនក្តីសង្ឃឹមនៃការឈ្នះពានជាលើកទី១បើគិតចាប់តាំងពីឆ្នាំ១៩៦១ឡើយ។ ក្រុមមាន់ខ្នាយមាស Tottenham អាចកាត់បន្ថយពិន្ទុនាំមុខរបស់ក្រុម Chelsea មកនៅត្រឹម១ពិន្ទុ ប្រសិនបើពួកគេដណ្តើមបានជ័យជម្នះ ប៉ុន្តែ ផ្ទុយទៅវិញគម្លាតនៃការដេញតាមពីក្រោយអាចនឹងកើនដល់៧ពិន្ទុ ខណៈនៅសល់តែ៣ប្រកួតទៀត បើក្រុមតោខៀវមួយនេះ ផ្តួលក្រុម Middlesbrough ក្នុងផ្ទះខ្លួនឯងនៅថ្ងៃចន្ទ ខាងមុខនេះ។

West Ham ដែលជាក្រុមដំបូងគេក្នុងការការពារមិនឲ្យក្រុម Tottenham រកគ្រាប់បាល់បញ្ចូលទី បើគិតចាប់តាំងពី Liverpool ធ្វើបានបែបនេះកាលពីខែកុម្ភៈនោះ បានឡើងទៅឈរក្នុងចំណាត់ថ្នាក់លេខ៩ ដោយមាន៤២ពិន្ទុ និងបច្ចុប្បន្ន មានសុវត្ថិភាពពីតំបន់គ្រោះថ្នាក់រួចជាស្រេច។ អ្នកចាំទីនៃក្រុមម្ចាស់ផ្ទះ Adrian បានធ្វើឲ្យក្រុម Tottenham ជួបការខកចិត្តជាមួយនឹងការសង្គ្រោះបាល់ជាបន្តបន្ទាប់ក្នុងតង់ទី១ ពីការស៊ុតរបស់កីឡាករ Dele Alli និង Harry Kane ហើយរូបគេក៏បានបំពេញតួនាទីយ៉ាងល្អផងដែរ ក្នុងការរារាំងការស៊ុតរបស់ Son Heung-Min ក្នុងតង់ទី២ ខណៈដែលក្រុមភ្ញៀវបានដាក់សម្ពាធយ៉ាងល្អខ្លាំងដើម្បីរកគ្រា់បបាល់បើកឆាក។ លទ្ធផលនេះមានន័យថា Chelsea បច្ចុប្បន្នត្រូវការត្រឹមតែ១ពិន្ទុប៉ុណ្ណោះពីការប្រកួត៤លើកទៀត ដើម្បីឈ្នះពាន Premier League ក្នុងរដូវកាលទី១របស់លោក Antonio Conte ក្នុងនាមជាគ្រូបង្វឹក៕

ប្រភពព័ត៌មាន៖ Reuters

May 6, 2017

លោក Pochettino ផ្តោតលើការដាក់សម្ពាធលើ Chelsea ពេល Spurs ទៅជួប West Ham រាត្រីនេះ

លោក Mauricio Pochettino ជឿជាក់ថា ក្រុម Tottenham Hotspur កំពុងតែត្រៀមលក្ខណៈរួចរាល់ក្នុងការស្ថិតក្រោមពាក្យចរចាមអារ៉ាមនៃការលក់ចេញកីឡាករឆ្នើមៗ ប៉ុន្តែ គ្រូបង្វឹកសញ្ជាតិរូបនេះបានបញ្ជាក់ថា គ្មានអ្វីរារាំងក្រុមរបស់លោកក្នុងការរក្សាការប្រជែងដណ្តើមពាន Premier League ឡើយ។

ខ្សែការពារស្លាបស្តាំ Kyle Walker គឺជាសមាជិកចុងក្រោយគេនៃក្រុមប្រជុំដោយកីឡាករឆ្នើមរបស់ Spurs ដែលត្រូវបានគេទាក់ទងឲ្យផ្ទេរចេញកីឡដ្ឋាន White Hart Lane ក្រោយពីមានការលេចឮថា មានជម្លោះជាមួយនឹងអ្នកការចាត់ការទូទៅលោក Pochettino។ ក្រុមមាន់ខ្នាយមាស Spurs អាចនឹងកាត់បន្ថយពិន្ទុនាំមុខរបស់ក្រុម Chelsea មកនៅត្រឹម១ពិន្ទុ ប្រសិនបើពួកគេដណ្តើមបានជ័យជម្នះនៅលើទឹកដីក្រុម West Ham United នៅរាត្រីនេះ ហើយលោក Pochettino បានបញ្ជាក់ថា ទាំង Walker និងមិត្តរួមរបស់គេ នឹងមិនខ្វះនូវការផ្តោតអារម្មណ៍ដោយសារតែពាក្យចរចាមអារ៉ាមទៅលើការចាកចេញពីក្លិបនេះឡើយ។

ក្នុងសន្និសីទសារព័ត៌មានកាលពីថ្ងៃម្សិលមិញនៅឯទីលានហ្វឹកហាត់ Enfield របស់ Spurs នៅភាគខាងជើងទីក្រុងឡុងដ៍ លោក Pochettino បានប្រាប់អ្នកយកព័ត៌មានថា៖ «រាល់កីឡាករទាំង២១នាក់កំពុងតែផ្តោតអារម្មណ៍ទៅលើការជួយឲ្យសម្រេចបាននូវសមិទ្ធផលដែលយើងចង់ធ្វើឲ្យសម្រេច។ ខ្ញុំពិតជាស្ថិតក្នុងអារម្មណ៍ស្ងប់។ កីឡាករក៏មានអារម្មណ៍ស្ងប់ផងដែរ។ ពួកគេដឹងពីអ្វីដែលកើតឡើងនៅក្នុងខ្លួនរបស់ពួកគេ»។ លោក Pochettino បានបន្ថែមទៀត៖ «វាពិតជាសំខាន់ណាស់ដែលអ្នកគាំទ្រដឹដងថា កីឡាករមានអារម្មណ៍ស្ងប់ ហើយយើងនឹងរង់ចាំមើលនៅចុងរដូវកាលនេះថា ពាក្យចរចាមអារ៉ាមនេះ ពិត ឬក៏អត់»។ Spurs នឹងសម្លឹងរកការដណ្តើមបានជ័យជម្នះជាលើកទី១០ជាប់ៗក្នា នៅពេលដែលពួកគេធ្វើដំណើរទៅកាន់ទឹកដីក្រុម West Ham ដើម្បីដាក់សម្ពាធលើក្រុម Chelsea នៅមុនពេលការប្រកួតក្នុងផ្ទះរបស់ក្រុមតោខៀវជាមួយនឹងក្រុម Middlesbrough នៅថ្ងៃចន្ទ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕

ប្រភពពី៖ The Sun

May 5, 2017

Can រកគ្រាប់បាល់បញ្ចូលដ៏អស្ចារ្យ ខណៈ Liverpool ផ្តួល Watford ដើម្បីពង្រឹងទីតាំងលេខ៣

ខ្សែបម្រើ Emre Can បានរកគ្រាប់បាល់បញ្ចូលទីយ៉ាងល្អ ខណៈដែលក្រុមហង្សក្រហម Liverpool ដណ្តើមបានជ័យជម្នះក្នុងលទ្ធផល ១-០ លើក្រុម Watford កាលពីថ្ងៃចន្ទ នាកីឡដ្ឋាន Vicarage Road ដើម្បីរក្សាក្តីសង្ឃឹមនៃការប្រជែងយកកៅអីក្នុងក្របខ័ណ្ឌ Champions League។

ខ្សែបម្រើអន្តរជាតិអាល្លឺម៉ង់វ័យ២៣ឆ្នាំរូបនេះ បានស៊ុតបាល់បកថយក្រោយចូលក្នុងជ្រុងម្ខាងនៃសំណាញ់ទីយ៉ាងល្អ នៅជិតបញ្ចប់តង់ទីមួយ។ ជ័យជម្នះនេះ បានជួយឲ្យក្រុម Liverpool នាំមុខ៤ពិន្ទុដាច់លើក្រុមឈរលេខ៤ Manchester City និង៥ពិន្ទុពីលើក្រុមឈរលេខ៥ Manchester Unite បើទោះបីលេងការប្រកួតច្រើនជាងក្រុមទាំងពីរ១ប្រកួតក៏ដោយ។ ក្រុមស្ថិតក្នុងទីក្រុង Manchester ទាំងពីរហាក់ដូចជាត្រូវឡើងទៅឈរពីលើក្រុមហង្សក្រហមរបស់លោក Jurgen Klopp ទៅហើយ ក្រោយពី Liverpool បានរងបរាជ័យនៅកីឡដ្ឋាន Anfield ក្រោមស្នាដៃក្រុម Crystal Palace កាលពីចុងសប្តាហ៍មុន។

ប៉ុន្តែ ក្រុម Man City បានបញ្ចប់ក្នុងលទ្ធផលស្មើ ២-២ ពេលជួបក្រុម Middlesbrough កាលពីថ្ងៃអាទិត្យ ខណៈដែលក្រុម Man United មិនអាចយកឈ្នះលើក្រុម Swansea ដូចគ្នា។ Liverpool មិនបានជួបការរីករាយខ្លាំងឡើយ ខណៈដែល Coutinho បានរងរបួស ក្រោយពីលេងបានរយៈពេល១២នាទី។ លោក Klopp អ្នកចាត់ការទូទៅរបស់ក្រុម Liverpool បានប្រាប់ទូរទស្សន៍ Sky Sports ថា៖ «ពិតណាស់ គ្រាប់បាល់នេះពិតជាអស្ចារ្យ។ វាច្បាស់ណាស់ថា យើងត្រូវតែធ្វើការ ហើយនោះគឺជាអ្វីដែលយើងបានធ្វើ។ វាមិនងាយស្រួលនោះឡើយសម្រាប់ក្រុមទាំងអស់ក្នុងការឈ្នះនៅទីនេះ។ យើងត្រូវការសំណាងខ្លះ ប៉ុន្តែ យើងបានធ្វើការយ៉ាងលំបាកដើម្បីដណ្តើមយកជ័យជម្នះនោះ»៕

ប្រភពពី៖ Mirror

May 2, 2017

Klopp ស្រេកឃ្លានឲ្យ Liverpool ផ្តួល Watford នៅរាត្រីនេះ

លោក Jurgen Klopp អ្នកចាត់ការទូទៅនៃក្រុមហង្ស Liverpool បានលើកទឹកចិត្តឲ្យក្រុមរបស់លោកធ្វើការប្រជែងយកកៅអីក្នុងក្របខ័ណ្ឌ Champions League ខណៈដែលពួកគេសម្លឹងរកការរក្សាចំណាត់ថ្នាក់កំពូលទាំងបួនរបស់ពួកគេនៅលើទឹកដីក្រុម Watford នៅរាត្រីនេះ។

Liverpool បានឡើងទៅឈរនៅលើកំពូលតារាងនៃក្របខ័ណ្ឌ Premier League ក្នុងរយៈពេលដ៏ខ្លីកាលពីខែវិច្ឆិកា និងហាក់បានបានត្រៀមលក្ខណៈរួចរាល់ក្នុងការប្រជែងពាន ប៉ុន្តែ បច្ចុប្បន្ន ការបញ្ចប់ក្នុងចំណាត់ថ្នាក់លេខ៤ គឺជារឿងដែលមួយគត់ដែលពួកអាចធ្វើបានដើម្បីសង្គ្រោះរដូវកាលរបស់ពួកគេ។ ក្រោយពីទទួលបានការជឿជាក់ ដោយសារតែទាំងក្រុម Manchester City និង Man United បានបញ្ចប់ក្នុងលទ្ធផលស្មើដូចគ្នា កាលពីថ្ងៃ អាទិត្យ ក្រុម Liverpool នឹងមានឱកាសក្នុងការពង្រឹងទីតាំងរបស់ខ្លួនពេលធ្វើដំណើរទៅកាន់កីឡដ្ឋាន Vicarage Road នារាត្រីនេះ។ លោក Klopp ពិតជាស្រេកឃ្លានក្នុងការធ្វើឲ្យកីឡាកររបស់លោកស្ថិតក្នុងការប្រជែងដើម្បីការពារទីតាំងរបស់ពួកគេ។

គ្រូបង្វឹករូបនេះបានឲ្យដឹងថា៖ «រឿងដែលមួយគត់ដែលយើងអាចធ្វើបានគឺការប្រជែងដណ្តើមយកចំណាត់ថ្នាក់ដ៏គួរឲ្យចាប់អារម្មណ៍នៅរដូវកាលនេះ។ ពេលនេះ ជិតនបញ្ចប់រដូវកាលហើយ។ វាជាខែចុងក្រោយនៃដូវកាលនេះ ហើយយើងកំពុងតែស្ថិតក្នុងការប្រជែង។ តើអ្នកចង់បានអីទៀត?»។ ក្រុម Watford នឹងឈានទៅកាន់ការប្រកួតនេះជាមួយនឹងជ័យជម្នះ៣លើក និងចាញ់២លើកពីការប្រកួត៥លើកចុងក្រោយរបស់ពួកគេ ខណៈ Liverpool ចាញ់តែ១លើកគត់ ប៉ុន្តែ ឈ្នះដល់ទៅ៣លើក និងស្មើ១លើកពីការប្រកួត៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕

ប្រភពព័ត៌មាន៖ Reuters

May 1, 2017

Alli និង Kane ជួយឲ្យ Spurs បំបាក់មុខកាំភ្លើងធំ និងរក្សាសម្ពាធលើតោខៀវ

ខ្សែបម្រើ Dele Alli និងខ្សែប្រយុទ្ធ Harry Kane បានជួយឲ្យក្រុមមាន់ខ្នាយមាស Tottenham Hotspur ស្ថិតក្នុងការប្រជែងដណ្តើមពាន Premier League ខណៈដែលក្រុមរបស់ពួកគេបាក់ក្រុមកាំភ្លើងធំ Arsenal ក្នុងលទ្ធផល ២-០ នាកីឡដ្ឋាន White Hart Lane ក្នុងការប្រកួតរវាងក្រុមស្ថិតក្នុងទីក្រុងឡុងដ៍តែមួយកាលពីថ្ងៃអាទិត្យ។

ក្រុមកំពុងនាំមុខ Chelsea បានបន្ថែមការនាំមុខរបស់ពួកគេរហូតដល់ទៅ៧ពិន្ទុតាមរយៈការផ្តួលក្រុម Everton ៣-០ ក្នុងការប្រកួតមួយគូមុននេះនៅថ្ងៃដដែលនោះ ប៉ុន្តែ ក្រុម Spurs របស់លោក Mauricio Pochettino បានកាត់បន្ថយគម្លាតនោះឲ្យនៅត្រឹម៤ពិន្ទុវិញ ជាមួយនឹងការបង្ហាញពីទម្រង់លេងយ៉ាងល្អ។ គ្រាប់បាល់បញ្ចូលទីទាំង២គ្រាប់នោះបានកើតឡើងនៅក្នុងចន្លោះពេល១៤៦វិនាទីក្នុងតង់ទី២ ខណៈដែល Alli បានស៊ុតបាល់បំប៉ោងសំណាញ់ទីពីបាល់ក្រឡក ហើយ Kane បានស៊ុតបាល់ប៉េណាល់ទីដើម្បីធ្វើឲ្យគ្រាប់បាល់សរុបរបស់ពួកគេកើនដល់១៧គ្រាប់ និង២១គ្រាប់រៀងៗខ្លួនក្នុងយុទ្ធនាការនារូវកាលនេះ។

Spurs នឹងបញ្ចប់ដោយស្ថិតក្នុងចំណាត់ថ្នាក់ពីលើក្រុម Arsenal ជាលើកទី១បើគិតចាប់តាំងពីឆ្នាំ១៩៩៥ ដើម្បីបញ្ចប់ការរង់ចាំអស់រយៈពេល២២ឆ្នាំ។ Spurs នឹងត្រូវលេងនៅកីឡដ្ឋាន Wembley នៅរដូវកាលក្រោយ នៅមុនពេលប្តូរទៅកាន់កីឡដ្ឋានថ្មីរបស់ពួកគេ ដែលនឹងត្រូវសាងសង់នៅលើទីតាំងនៃកីឡដ្ឋានរបស់ពួកគេនាពេលបច្ចុប្បន្ន។ ។ លោក Mauricio Pochettino អ្នកចាត់ការទូទៅរបស់ក្រុម Tottenham បានប្រាប់សារព័ត៌មាមន BBC ថា៖ «ខ្ញុំពិតជារីករាយណាស់។ វាជាការប្រកួតដ៏សំខាន់មួយ ហើយវាជាការបង្ហាញពីទម្រង់លេងគួរជាទីពេញចិត្តមួយ»៕

ប្រភពព័ត៌មាន៖ The Guardian

May 1, 2017

Pedro ជួយឲ្យក្រុមតោខៀវ ខិតយ៉ាងប្រកៀកឆ្ពោះទៅកាន់ការឈ្នះពាន

គ្រាប់បាល់ស៊ុតបញ្ចូលទីយ៉ាងល្អរបស់ខ្សែបម្រើប្រយុទ្ធ Pedro បានជួយឲ្យក្រុម Chelsea បោះជំហានកាន់តែកៀកឆ្ពោះទៅកាន់ការឈ្នះពាន Premier League ខណៈដែលក្រុមតោខៀវមួយនេះ បានកត់ត្រាជ័យជម្នះយ៉ាងកក់ក្តៅក្នុងលទ្ធផល ៣-០ លើក្រុម Everton កាលពីថ្ងៃអាទិត្យ។

ក្រុមរបស់លោក Antonio Conte ត្រូវបានខិតខំព្យាយាមយ៉ាងខ្លាំងដើម្បីទម្លុះតំបន់ការពារដ៏រឹងមាំរបស់ក្រុម Everton ប៉ុន្តែ គ្រាប់បាល់ស៊ុតបញ្ចូលទីពីចម្ងាយយ៉ាងល្អក្នុងតង់ទី២របស់ Pedro បានជួយឲ្យក្រុម Chelsea ស្ថិតនៅលើផ្លូវឆ្ពោះទៅកាន់ការឈ្នះការប្រកួតជាលើកទី៤ក្នុងចំណោមការប្រកួតលីក៥លើកចុងក្រោយរបស់ពួកគេ។ គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ខ្សែការពារ Gary Cahill និងខ្សែបម្រើ Willian បានបំពេញការទទួលជ័យជម្នះនេះតែម្តង ខណៈដែលក្រុមតោខៀវ បានរក្សាការនាំមុខ៤ពិន្ទុដដែលនៅលើកំពូលតារាង។

លោក Antonio Conte បានប្រាប់ទូរទស្សន៍ Sky Sports ថា៖ «លទ្ធផលនេះ ផ្តល់ឲ្យយើងនូវការជឿជាក់យ៉ាងច្រើន។ ពេលនេះ វាពិតជាសំខាន់ណាស់ក្នុងការត្រៀមលក្ខណៈសម្រាប់ការប្រជែងនៅដំណាក់កាលចុងក្រោយ។ ប្រសិនបើក្នុងការប្រកួតបន្ទាប់ជាមួយនឹងក្រុម Middlesbrough យើងមិនឈ្នះ យើងនឹងបាត់បង់ជ័យជម្នះ។ យើងត្រូវតែមើលមួយជំហានទៅមួយជំហាន។ Chelsea ដែលបច្ចុប្បន្នកំពុងតែមាន៨១ពិន្ទុនោះ ត្រូវការឈ្នះត្រឹមតែ៣លើកទៀតប៉ុណ្ណោះពីការប្រកួត៤លើកចុងក្រោយ ខណៈដែលពួកគេនឹងត្រូវធ្វើជាម្ចាស់ផ្ទះទទួលក្រុម Middlesbrough មុននឹង West Brom, Watford និង Sunderland៕

ប្រភពព័ត៌មាន៖ Mirror

May 1, 2017

ការស្ថិតក្នុង Premier League រយៈពេល១០ឆ្នាំរបស់ Sunderland បានបញ្ចប់

ការស្ថិតក្នុងក្របខ័ណ្ឌ Premier League រយៈពេល១០ឆ្នាំរបស់ក្លិប Sunderland បញ្ចប់ហើយ ក្រោយពីគ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់កីឡាករ Josh King បានជួយឲ្យក្រុម Bournemouth កត់ត្រាជ័យជម្នះ ១-០ ដែលបានធ្វើឲ្យក្រុមឆា្មខ្មៅមួយនេះ ត្រូវកាត់ចេញកាលពីថ្ងៃសៅរ៍។

ក្រុមរបស់លោក David Moyes បានធ្លាក់ចេញពីក្របខ័ណ្ឌកំពូលរបស់អង់គ្លេសទាំងការខកចិត្ត ខណៈដែលការបង្ហាញពីទម្រង់លេងមិនបានល្អនាពេលថ្មីៗនេះ បានកាត់សេចក្តីក្នុងយុទ្ធនាការដ៏ត្រដាបត្រដួសរបស់ពួកគេ ក្រោយពី King បានរកគ្រាប់បាល់ឈ្នះនៅនាទី ទី៨៨។ Moyes បានគិតថា ក្រុមរបស់លោកនៅតែមានឱកាសក្នុងការសង្គ្រោះ នៅពេលដែលគូប្រជែងស្ថិតក្បែរតំបន់កាត់ចោល Hull បានបណ្តោយឲ្យបាល់ប៉េណាល់ទីនៅលើទឹកដីក្រុម Southampton ប៉ុន្តែ ការស៊ុតរបស់កីឡាករ Dusan Tadic ត្រូវបានសង្គ្រោះដោយអ្នកចាំទី Eldin Jakupovic ដើម្បីធ្វើឲ្យក្រុមមានរហស្សនាមខ្លាធំមួយនេះ បញ្ចប់ក្នុងលទ្ធផលស្មើ ០-០ ដែលបញ្ចប់ក្តីសង្ឃឹមនៃការសង្គ្រោះការធ្លាក់ចេញរបស់ក្រុម Sunderland តែម្តង។

ជាមួយនឹងការស្ថិតនៅបាតតារាងចាប់តាំងពីថ្ងៃទី១០ ខែកញ្ញា ក្រុម Sunderland មិនស្គាល់ឈ្នះសោះពីការប្រកួត១០លើកចុងក្រោយរបស់ពួកគេ និងបានធ្លាក់ទៅកាន់ក្របខ័ណ្ឌលំដាប់ទី២ បើទោះបីនៅសល់៤ប្រកួតទៀតក៏ដោយ។ ការធ្លាក់ចេញរបស់ក្រុម Sunderland បំពេញនូវរដូវកាលដ៏វេទនាមួយផ្សេងទៀតសម្រាប់លោក Moyes ដែលបានជួបពេលវេលាដ៏ខកចិត្ត ចាប់តាំងពីចាកចេញពីក្លិប Everton ដើម្បីកាន់តំណែងនៅក្លិប Manchester United កាលពីឆ្នាំ២០១៣៕
ប្រភពព័ត៌មាន៖ BBC

April 30, 2017

លោក Conte ត្រៀមរារាំងអតីតខ្សែប្រយុទ្ធក្រុមតោខៀវ Lukaku ពេលប៉ះ Everton ថ្ងៃអាទិត្យនេះ

លោក Antonio Conte អ្នកចាត់ការទូទៅរបស់ក្រុម Chelsea បានអះអាងថា លោកកំពុងតែយកចិត្តទុកដាក់យ៉ាងខ្លាំងទៅលើខ្សែប្រយុទ្ធ Romelu Lukaku របស់ក្រុម Everton នៅសប្តាហ៍នេះ ប៉ុន្តែ ក្នុងទស្សនៈក្នុងការបញ្ឈប់រូបគេមិនឲ្យរកគ្រាប់បាល់បញ្ចូលទីនៅពេលប្រកួតជាមួយនឹងក្រុមតោខៀវរបស់លោក ជាជាងការទិញរូបគេនៅរដូវក្តៅខាងមុខនេះ។

ក្រុម Chelsea ដែលកំពុងនាំមុខលើតារាងក្របខ័ណ្ឌ Premier League បានទាក់ទងចង់ចុះហត្ថលេខាខ្សែប្រយុទ្ធ អន្តរជាតិបែលហ្ស៊ិករូបនេះ ដែលពួកគេបានលក់ទៅឲ្យក្លិប Everton ក្នុងតម្លៃខ្លួន២៨លានផោន ដើម្បីជំនួសកន្លែងរបស់ខ្សែប្រយុទ្ធ Diego Costa ដែលចង់ផ្ទេរទៅកាន់ក្របខ័ណ្ឌរបស់ចិន។ Lukaku គឺជាអ្នកគ្រាប់ បាល់រកគ្រាប់បាល់ច្រើនជាងគេក្នុងការប្រកួតលីក តាមរយៈការរកបាន២៤គ្រាប់ ខណៈដែល Costa រកបាន១៩គ្រាប់ និងក្លាយជាអាវុធដ៏មុតស្រួចរបស់ក្រុម Everton ខណៈដែលក្រុម Chelsea សម្លឹងរកការបន្ថែមពិន្ទុនាំមុខរបស់ពួកគេលើក្រុមឈរលេខ២ Tottenham Hotspur នាកីឡដ្ឋាន Goodison Park។

លោក Conte បានប្រាប់អ្នកយកព័ត៌មានកាលពីថ្ងៃសុក្រថា៖ «ខ្ញុំគិតថា រូបគេជាកីឡាករដ៏ឆ្នើមម្នាក់ និងកំពុងតែរកគ្រាប់បាល់បញ្ចូលទីជាច្រើននៅដូវកាលនេះ ដោយមិនត្រឹមតែក្នុងរដូវកាលនេះឡើយ ហេតុនេះ យើងត្រូវតែយកចិត្តទុកដាក់លើរូបគេយ៉ាងខ្លាំង»។ គ្រូបង្វឹកសញ្ជាតិអ៊ីតាលីរូបនេះបានប្រាប់បន្តថា៖ «ប៉ុន្តែ វាពិតណាស់ យើងត្រូវតែស្វែងរកដំណោះស្រាយដ៏ត្រឹមត្រូវដើម្បីរារាំងពួកគេ។ យើងត្រូវតែស្វែងរកដំណោះស្រាយដ៏ត្រឹមត្រូវដើម្បីបញ្ចប់ Lukaku និងរាល់កីឡាករផ្សេងៗទៀត»។ នៅពេលត្រូវបានចោទសួរថា តើខ្សែប្រយុទ្ធរូបណាដែលលោកចូលចិត្តជាងគេក្នុងក្រុមរបស់លោក លោក Conte បានឲ្យដឹងថា៖ «សម្រាប់ខ្ញុំ កីឡាកររបស់ខ្ញុំគឺជាកីឡាករឆ្នើមបំផុតក្នុងពិភពលោក។ ខ្ញុំមិនផ្លាស់ប្តូរពួកគេជាមួយនឹងកីឡាករផ្សេងឡើយ»។ ក្រុម Everton នឹងឈានទៅកាន់ការប្រកួតនេះ ក្រោយពីបានបញ្ចប់ក្នុងលទ្ធផលស្មើ ០-០ ជាមួយនឹងក្រុមធ្លាក់ទម្រង់លេង West Ham ខណៈដែល Chelsea ទើបតែបានផ្តួលក្រុម Southampton ក្នុងលទ្ធផល ៤-២។ ការប្រកួតនេះនឹងចាប់ផ្តើមនៅម៉ោង៨:០៥យប់៕

ប្រភពពី៖ Reuters

April 29, 2017

មាន់ខ្នាយមាស Spurs សម្លឹងរកការផ្តល់ការខកចិត្តដល់កាំភ្លើងធំ ថ្ងៃអាទិត្យនេះ

ក្រុម Tottenham Hotspur នឹងសម្លឹងរកការបន្ថែមការខកចិត្តដល់ក្រុម Arsenal នៅពេលដែលក្រុមទាំងពីរជួបគ្នាក្នុងការប្រកួតរវាងក្រុមស្ថិតក្នុងទីក្រុងឡុងដ៍តែមួយ នាកីឡដ្ឋាន While Hart Lane នៅរាត្រីថ្ងៃអាទិត្យនេះ។

។ ក្រុមមាន់ខ្នាយមាសមួយនេះ នឹងឈានទៅកាន់ការប្រកួតនេះទាំងការជឿជាក់ ក្រោយពីបានកត់ត្រាជ័យជម្នះដល់ទៅ៤លើកពីការប្រកួត៥លើកចុងក្រោយរបស់ពួកគេ ហើយអ្វីដែលគួរឲ្យកត់សម្គាល់នោះគឺថា ពួកគេក៏ដណ្តើមបានជ័យជម្នះ៥លើកពីការប្រកួតក្នុងផ្ទះខ្លួនឯងទាំង៥លើកចុងក្រោយរបស់ពួកគេងផងដែរ។ ក្រោយពីបានយកឈ្នះលើក្រុមឡើងទម្រង់លេង Crystal Palace ទាំងប្រផិតប្រផើយក្នុងលទ្ធផល ១-០ កាលពីពាក់កណ្តាលសប្តាហ៍នេះ លោក Mauricio Pochettino អ្នកចាត់ការទូទៅរបស់ Spurs បានសន្យាថា នឹងមិនបោះបង់ការប្រជែងដណ្តើមពាន Premier League ហើយនិងប្រយុទ្ធរហូតដល់ដំណាក់កាលចុងក្រោយ។

គ្រូបង្វឹករូបនេះបានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»។ ដោយឡែក ក្រុម Arsenal នឹងឈានទៅកាន់ការប្រកួតនេះជាមួយនឹងជ័យជម្នះ៣លើ ស្មើ១លើក និងចាញ់១លើកពីការប្រកួត៥លើកចុងក្រោយរបស់ពួកគេ ប៉ុន្តែ ក្រុមកាំភ្លើងធំមួយនេះ ដណ្តើមបានជ័យជម្នះតែពីរលើកគត់ពីការប្រកួតកៅដី៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង១០:៣០ទៀបភ្លឺ៕

ការជួបគ្នា៣លើកចុងក្រោយរវាងក្រុមទាំងពីរ

06.11.16 Arsenal 1-1 Tottenham

05.03.16 Tottenham 2-2 Arsenal

08.11.15 Arsenal 1-1 Tottenham

April 28, 2017

លោក Mourinho ចោទប្រកាន់ Aguero ថា បានសម្តែង ក្រោយ Fellaini រងកាតក្រហម

លោក Jose Mourinho បានចោទប្រកាន់ខ្សែប្រយុទ្ធ Sergio Aguero ពីបទសម្តែងធ្វើជាដួល ដើម្បីធ្វើឲ្យខ្សែបម្រើ Marouane Fellaini រងពិន័យកាតក្រហមក្នុងពេលក្រុមរបស់លោកបានបញ្ចប់ក្នុងលទ្ធផលស្មើ ០-០ នៅលើទឹកដីក្រុម Manchester City ក្នុងការប្រកួតរវាងក្រុមស្ថិតក្នុងទីក្រុងតែមួយកាលពីថ្ងៃព្រហស្បតិ៍។

ខ្សែបម្រើអន្តរជាតិបែលហ្ស៊ិក Fellaini របស់ក្រុម Man United បានរងពិន័យកាតក្រហមភ្លាមៗនៅនាទី ទី៨៤ សម្រាប់ការប្រើក្បាលអុកទៅលើខ្សែប្រយុទ្ធ Aguero របស់ Man City ដែលបានធ្វើជាដួលទៅលើទីលាន។ លោក Mourinho បានអះអាងថា លោកមិនបានឃើញហេតុការណ៍នោះឡើយ ប៉ុន្តែ បានបញ្ជាក់ថា ការបញ្ទេញប្រតិកម្មរបស់ Aguero បានធ្វើឲ្យលោកអាជ្ញាកណ្តាល Martin Atkinson ផ្តល់កាតក្រហមដល់ Fellaini សម្រាប់ការប្រព្រឹត្តអំពើហិង្សា។ លោក Mourinho បានឲ្យដឹងថា៖ «Marouane Fellaini បាននិយាយថា វាជាការរងពិន័យក្រហមពីព្រោះរូបគេធ្វើឲ្យមានកំហុស។ លោក Martin Atkinson បានប្រាប់ខ្ញុំថា លោកគិតថា វាពិតជាការផ្តល់ការពិន័យកាតក្រហមដ៏ស័ក្តិសម»។

គ្រូបង្វឹកសញ្ជាតិព័រទុយហ្គាល់រូបនេះបានប្រាប់បន្តថា៖ «ប៉ុន្តែ ខ្ញុំបានឃើញ Aguero នៅតាមផ្លូវចូលទៅកាន់បន្ទប់ផ្លាស់ប្តូរសម្លៀកបំពាក់ និងមិនបានរងរបួសច្រមុះ និងរបួសក្បាល ឡើយ ហើយទឹកមុខរបស់គេតែងស្ថិតក្នុងភាពស្រស់ស្អាត ហេតុនេះខ្ញុំមិនប្រាកដចិត្តឡើយ»។ លោក Mourinho បានបន្ថែមទៀតថា៖ «ប្រសិនបើ Sergio មិនធ្វើជាដួលទៅលើទីលានទេនោះ ពិតណាស់ វាមិនមែនជាការពិន័យក្រហមឡើយ ប៉ុន្តែ ប្រសិនបើ Marouane ធ្វើឲ្យរូបគេធ្វើបែបនោះ ខ្ញុំមិនដឹងឡើយ»។ លោក Pep Guardiola គ្រូបង្វឹករបស់ Man City បានបដិសេធក្នុងការបញ្ចេញមតិទៅលើការផ្តល់កាតក្រហមនោះ និងបាននិយាយថា៖ «ខ្ញុំមិនមែនមកទីនេះដើម្បីកាត់សេចក្តីលើអ្វីដែលគូប្រកួតរបស់ខ្ញុំសម្រេចចិត្តនឹងធ្វើឡើយ»៕

https://www.youtube.com/watch?v=IUCgVVOcjVM

ប្រភពពី៖ Mirror

April 28, 2017

Tag: Premier League