Tag: Philippe Coutinho

  • Liverpool ច្រានចោលសំណើលើកទី2របស់ Barcelona សម្រាប់ Coutinho

    Liverpool ច្រានចោលសំណើលើកទី2របស់ Barcelona សម្រាប់ Coutinho

    ក្លិប Liverpool បានប្រាប់ក្លិប Barcelona ម្តងទៀតថា ខ្សែបម្រើដ៏ឆ្នើម Philippe Coutinho មិនសម្រាប់លក់ឡើយ ក្រោយពីបានច្រានចោលសំណើដេញថ្លៃក្នុងទឹកប្រាក់100លានអឺរ៉ូ (ស្មើនឹង117.5លានដុល្លារអាមេរិក) សម្រាប់តារាឆ្នើមអន្តរជាតិប្រេស៊ីលរូបនេះ។

    សំណើដេញថ្លៃជាលើកទី2របស់ក្លិប Barcelona ដែលមានតម្លៃខ្លួនជាគោល85លានអឺរ៉ូ បូកទាំងប្រាក់ឧបត្ថម្ភផ្សេងៗចំនួន 15លានអឺរ៉ូ ទៀតនោះ ត្រូវបានច្រានចោលភ្លាមៗ។

    Barelona បានព្យាយាមដាក់សំណើជាលើកទី2របស់ខ្លួនសម្រាប់តារាឆ្នើមវ័យ25ឆ្នាំរូបនេះកាលពីថ្ងៃពុធ ក្រោយពីសំណើជាលើកដំបូងរបស់ខ្លួនក្នុងទឹកប្រាក់80លានអឺរ៉ូ ក៏ត្រូវបានច្រានចោលកាលពីខែមុនផងដែរ។ សំណើថ្មីចុងក្រោយរបស់ពួកគេ បានជួបការឆ្លើយតបដូចកាលពីមុនដែរ។ ក្លិបហង្សក្រហម Liverpool បានច្រានចោលសំណើនេះ និងបានបញ្ជាក់ប្រាប់ក្លិប Barcelona ម្តងទៀតថា ពួកគេនឹងមិនពិចារណាទៅលើការលក់កីឡាករដ៏មានឥទ្ធិពលរបស់ពួកគេនៅរដូវក្តៅនេះឡើយ។

    ការច្រានចោលសំណើជាលើកទី2នេះ បានកើតឡើង ក្រោយពីបណ្តាញសារព័ត៌មានជាច្រើនរបស់អេស្ប៉ាញ បានចេញផ្សាយថា ការផ្ទេរនេះកំពុងតែស្ថិតយ៉ាងប្រកៀកក្នុងការឈានដល់ទីបញ្ចប់។ វាមិនទាន់ច្បាស់នៅឡើយទេថា ការបញ្ជាក់បែបនេះ នឹងរារាំងមិនឲ្យក្លិប Barcelona ដាក់សំណើដេញថ្លៃជាលើកទី3 ឬយ់ាងណានោះទេ ខណៈដែលការព្យាយាមរបស់ពួកគេកាលពេលថ្មីៗនេះនាំឲ្យមានការជឿជាក់ថា Coutinho ពិតជាចង់ផ្ទេរទៅកាន់កីឡដ្ឋាន Camp Nou។ ក្លិប Liverpool បានរក្សាជំហររបស់ខ្លួនថា Coutinho មិនមែនសម្រាប់លក់ឡើយ ខណៈដែលកាលពីសប្តាហ៍មុន លោក Jurgen Klopp បានបញ្ជាក់ថា ជំហររបស់ក្លិបនេះមិនមានការប្រែប្រួលឡើយ៕
    ប្រភពពី៖ The Guardian

  • Liverpool ប្តេជ្ញារក្សាទុក Coutinho ទោះបី Barcelona ផ្តល់តម្លៃខ្លួន100លានផោនក៏ដោយ

    Liverpool ប្តេជ្ញារក្សាទុក Coutinho ទោះបី Barcelona ផ្តល់តម្លៃខ្លួន100លានផោនក៏ដោយ

    ការប្តេជ្ញាចិត្តរបស់ក្រុមហង្សក្រហម Liverpool ក្នុងការរក្សាទុក Philippe Coutinho មិនបានផ្លាស់ប្តូរឡើយ បើទោះបីមានការបញ្ជាក់ថា ក្លិប Barcelona ត្រៀមចំណាយប្រាក់ដល់ទៅ100លានផោន (ស្មើនឹង130.3លានដុល្លារអាមេរិក) សម្រាប់ខ្សែបម្រើអន្តរជាតិប្រេស៊ីលដ៏មានឥទ្ធិពលរូបនេះក៏ដោយ។

    Barcelona បានរងនូវការច្រានចោលចំពោះការដាក់សំណើដេញថ្លៃក្នុងតម្លៃខ្លួន 72លានផោន សម្រាប់តារាឆ្នើមរបស់ក្លិប Liverpool រូបនេះ កាលពី2សប្តាហ៍មុន ហើយបច្ចុប្បន្ន ក្រោយពីទទួលបានប្រាក់រហូតដល់ទៅ 200លានផោន (ស្មើនឹង 264លានដុល្លារអាមេរិក) ពីការលក់ខ្សែប្រយុទ្ធ Neymar ទៅឲ្យក្លិប Paris Saint-Germain ហើយនោះ ពួកគេនៅតែរក្សាការចាប់អារម្មណ៍ទៅលើកីឡាករវ័យ 25ឆ្នាំរូបនេះដដែល។

    បើទោះបីប្រភពព័ត៌មានជាច្រើននៅអេស្ប៉ាញអះអាងថា Barcelona សង្ឃឹមថា អាចបំពេញការផ្ទេរនេះនៅថ្ងៃអង្គារក៏ដោយ ប៉ុន្តែ ក្លិប Liverpool មិនទាន់បានទទួលសំណើដេញថ្លៃជាលើកទី2 សម្រាប់ Coutinho នៅឡើយ។ ប៉ុន្តែ វានៅតែមានការទាក់ទងគ្នាបន្ថែមទៀត ចាប់តាំងពីសំណើជាលើកទី1របស់ពួកគេត្រូវបានច្រានចោល ខណៈដែលក្លិប Barcelona បញ្ជាក់ថា ពួកគេកំពុងតែមានបំណងធ្វើឲ្យ Coutinho ក្លាយជាកីឡាករមានតម្លៃខ្លួនខ្ពស់ជាងគេបំផុតលំដាប់ទី2 ក្នុងប្រវត្តិសាស្ត្របាល់ទាត់។

    ជំហរបស់ Liverpool មិនមានការផ្លាស់ប្តូរឡើយ ខណៈដែលលោក Jurgen Klopp និងក្រុមហ៊ុន Fenway Sports Group ដែលជាម្ចាស់កម្មសិទ្ធិក្លិប Liverpool បានបញ្ជាក់ថា Coutinho នឹងមិនត្រូវបានលក់ចេញនៅរដូវក្តៅនេះឡើយ។ ជំហរនោះត្រូវបានបង្ហាញដល់ក្លិប Barcelona ហើយ Liverpool នៅតែជឿជាក់ ក្រោយពី Coutinho បានបន្តកុងត្រាថ្មីរយៈពេល5ឆ្នាំកាលពីខែមករា ដោយគ្មានលក្ខខណ្ឌនៃការទិញរំលាយកិច្ចសន្យា។

    Liverpool បានចុះហត្ថលេខារួចជាស្រចហើយជាមួយនឹងខ្សែបម្រើ Mohamed Salah ក្នុងតម្លៃខ្លួន 36.9លានផោន ខ្សែប្រយុទ្ធ Dominic Solanke និងខ្សែការពារស្លាបឆ្វេង Andy Robertson ពីក្លិប Hull City នៅរដូវកាលនេះ៕
    ប្រភពពី៖ The Guardian

  • Coutinho និង Souza រំពឹងជួយឲ្យប្រេស៊ីលស្តារមុខមាត់វិញ ពេលប៉ះអូស្ត្រាលី ល្ងាចនេះ

    Coutinho និង Souza រំពឹងជួយឲ្យប្រេស៊ីលស្តារមុខមាត់វិញ ពេលប៉ះអូស្ត្រាលី ល្ងាចនេះ

    ខ្សែបម្រើប្រយុទ្ធដ៏មានឥទ្ធិពល Philippe Coutinho នឹងត្រូវដឹកនាំក្នុងតំបន់ប្រយុទ្ធរបស់ប្រេស៊ីល ក្នុងការប្រកួតមិត្តភាពអន្តរជាតិជាមួយនឹងក្រុមជម្រើសជាតិអូស្ត្រាលី ក្នុងទីក្រុង Melbourne នៅល្ងាចនេះ ខណៈដែលខ្សែប្រយុទ្ធ Diego Souza នឹងត្រូវចូលជំនួសកន្លែងរបស់ Gabriel Jesus ដែលកំពុងសម្រាកព្យាបាលរបួស។

    ការរកកីឡាករថ្មីម្នាក់មកជំនួសត្រូវធ្វើឡើងសម្រាប់ Jesus របស់ក្លិប Manchester City ខណៈដែលរូបគេបានវិលទៅផ្ទះវិញ ក្រោយពីរបួសឆ្អឹងរង្វង់ភ្នែក ក្នុងពេលក្រុមជម្រើសជាតិប្រេស៊ីល បានរងបរាជ័យក្នុងលទ្ធផល 1-០ ក្រោមស្នាដៃក្រុមជម្រើសជាតិអាហ្សង់ទីន ក្នុងការប្រកួតមិត្តភាពនៅកីឡដ្ឋាន MCG កាលពីថ្ងៃសុក្រ។ វានឹងផ្តល់ឱកាសដល់ Souza ក្នុងការធ្វើឲ្យលោកគ្រូបង្វឹក Tite ចាប់អារម្មណ៍នៅមុនពេលយុទ្ធនាការ World Cup នៅឆ្នាំក្រោយ ក្នុងប្រទេសរុស្ស៊ី ហើយនេះក៏ជាឱកាសលើកដំបូងរបស់គេផងដែរ ក្នុងការចូលលេងក្នុងជម្រើសទាំង11នាក់ដំបូងសម្រាប់ប្រេស៊ីល ក្រោយពីចូលលេងក្នុងនាមជាកីឡាករបម្រុងក្នុងការប្រកួតវគ្គជម្រុះជាមួយនឹងក្រុមជម្រើសជាតិអ៊ុយរូហ្គាយ និងប៉ារ៉ាហ្គាយ កាលពីដើមឆ្នាំនេះមក។

    Souza ដែលលេងក្នុងតួនាទីជាខ្សែបម្រើប្រយុទ្ធ សម្រាប់ក្លិប Sport Recife បានឲ្យដឹងថា៖ «សម្រាប់ខ្ញុំ វាពិតជាអស្ចារ្យណាស់ ក្នុងការទទួលបានការកោះហៅ និងមានឱកាសក្នុងការលេង។ វាពិតជាសំខាន់ណាស់ ក្នុងការបង្ហាញពីសមត្ថភាពដ៏ខ្លាំងបំផុតរបស់ខ្ញុំ»។ ក្រុមបាល់ទាត់ជម្រើសជាតិប្រេស៊ីល បានឈ្នះកៅអីទៅប្រកួតក្នុងព្រឹត្តិការណ៍ World Cup ជុំផ្តាច់ព្រ័ត្រ នៅឆ្នាំក្រោយរួចជាស្រេចហើយ ខណៈដែលអូស្ត្រាលី បានរក្សាក្តីសង្ឃឹមក្នុងការប្រជែងយកកៅអីជាស្វ័យប្រវត្តិរបស់ពួកគេ តាមរយៈការដណ្តើមយកជ័យជម្នះ 3-2 លើក្រុមជម្រើសជាតិអារ៉ាប៊ីសាអ៊ូឌីត ក្នុងទីក្រុង Adelaide កាលពីថ្ងៃព្រហស្បតិ៍កន្លងទៅ។

    ប៉ុន្តែ ក្រុមបាល់ទាត់ជម្រើសជាតិប្រេស៊ីល ដែលមានចំណាត់ថ្នាក់លេខ1ក្នុងពិភពលោក នឹងមិនមើលស្រាលទៅលើក្រុមជម្រើសជាតិអូស្ត្រាលីឡើយ ខណៈដែលពួកគេកំពុងសម្លឹងរកការស្តារមុខមាត់មួយក្រោយពីការចាញ់របស់ពួកគេក្រោមស្នាដៃក្រុមជម្រើសជាតិអាហ្សង់ទីនរួចមក។ ការប្រកួតនេះនឹងចាប់ផ្តើមនៅម៉ោង5:05ល្ងាចថ្ងៃនេះ៕
    ប្រភពពី៖ Sport24