Pep Guardiola - La Reine Media

UEFA ប្រកាសអំពីម្ចាស់ពានរង្វាន់ «កីឡាករឆ្នើមបំផុតនៅ Champions League»

ក្នុងនាមជាម្ចាស់ជើងឯកបាល់ទាត់ Champions League យើងងាយយល់បានថា ហេតុអ្វីកីឡាកររបស់ Man City ក្លាយជាម្ចាស់ពានរង្វាន់កីឡាឆ្នើមបំផុតប្រចាំព្រឹត្តិការណ៍នេះ។

Man City បានក្លាយជាម្ចាស់ជើងឯកពានរង្វាន់បាល់ទាត់ Champions League ជាលើកដំបូងក្នុងប្រវត្តិសាស្ត្រ បន្ទាប់ពីបានផ្ដួល Inter Milan ដោយលទ្ធផល 1-0 នៅវគ្គផ្ដាច់ព្រ័ត្រកាលពីវេលាទៀបភ្លឺថ្ងៃទី 11 មិថុនា 2023 (ម៉ោងនៅកម្ពុជា)។ នេះគឺជាសមិទ្ធផលដ៏សក្ដិសមសម្រាប់កូនសិស្ស និងគ្រូបង្វឹក Pep Guardiola ក្រោយពីអ្វីដែលពួកគេបានធ្វើនៅក្នុងរដូវកាលនេះ។

មិនយូរប៉ុន្មានបន្ទាប់ពីពានរង្វាន់ជើងឯកបាល់ទាត់ Champions League ត្រូវបានប្រគល់ សហព័ន្ធកីឡាបាល់ទាត់អឺរ៉ុប (UEFA) ក៏បានប្រកាសឈ្មោះម្ចាស់ជ័យលាភី «កីឡាករឆ្នើមបំផុតរបស់ Champions League 2022/2023»។ កំពូលកីឡាករ Erling Haaland ពុំមែនជាអ្នកបានទទួលពានរង្វាន់នេះ បើទោះរកបាន 12 គ្រាប់ឱ្យ Man City។ ពានរង្វាន់នេះបានទៅលើកីឡាករ Rodri (Rodrigo Hernández Cascante)។

Rodri គឺជាអ្នកបានជួយឱ្យ Man City ឈ្នះនៅវគ្គផ្ដាច់ព្រ័ត្រ Champions League។ នេះក៏ជាលើកទីមួយក្នុងប្រវត្តិសាស្ត្រដែល Man City បានក្លាយជាក្រុមបាល់ទាត់ទីពីរនៅអង់គ្លេស ដែលដណ្ដើមបានពានរង្វាន់ជើងឯកចំនួនបីក្នុងមួយរដូវកាល បន្ទាប់ពី Man Utd ដណ្ដើមបានកាលពីឆ្នាំ 1999៕

June 12, 2023

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

(អង់គ្លេស) – ខ្សែប្រយុទ្ធ Marcus Rashford ចាត់ទុកថា ការរារាំង Man City បង្កើតឡើងវិញទិដ្ឋភាពលើកពានជើងឯកទាំងបីនៃរដូវកាល 1998-1999 របស់ Manchester United គឺជារឿងសំខាន់បំផុត នៅមុនវគ្គផ្ដាច់ព្រ័ត្រ FA Cup។

«ការធានាថា Man Utd នៅតែជាក្លឹបអង់គ្លេសតែមួយគត់ដែលដណ្ដើមបានពានជើងឯកទាំងបីក្នុងមួយរដូវកាល (Treble) គឺជារឿងសំខាន់បំផុត» Rashford ថ្លែងដូច្នេះនៅពេលត្រូវបានសួរអំពីការជំរុញទឹកចិត្តរបស់គាត់នៅមុនវគ្គផ្ដាច់ព្រ័ត្រ FA Cup (Football Association Challenge Cup)។

ក្រោយពីដណ្ដើមបានពានរង្វាន់ជើងឯកលិគកំពូលអង់គ្លេសបន្តបន្ទាប់ជាលើកទីបី Man City នៅសល់ពីរប្រកួតទៀតដែលនឹងត្រូវប៉ះ Man Utd ក្នុងវគ្គផ្ដាច់ព្រ័ត្រ FA Cup នៅទីលាន Wembley របស់អង់គ្លេស ថ្ងៃទី 03 មិថុនា រួចប្រកួតជាមួយ Inter Milan ក្នុងវគ្គផ្ដាច់ព្រ័ត្រ Champions League នៅប្រទេសតួកគី ថ្ងៃទី 10 មិថុនា។ គ្រូបង្វឹក Pep Guardiola របស់ក្លឹប Man City ធ្លាប់បានសម្ដែងអំពីមហិច្ឆតាលើកពានទាំងបីនេះដើម្បីបង្កើតឡើងវិញទិដ្ឋភាពនៃជ័យជម្នះរបស់ Man Utd នៅរដូវកាល 1998-1999។

ខ្សែប្រយុទ្ធ Marcus Rashford របស់ Manchester United

សម្រាប់ Man Utd វិញ ការផ្ដួល Man City នៅលើទីលាន Wembley របស់ក្រុងឡុងដ៍នៅចុងសប្ដាហ៍នេះ មិនត្រឹមតែជួយឱ្យពួកគេលើកពានជើងឯកបានពីរបន្ទាប់ពី EFL Cup (League Cup) ក្នុងមួយរដូវកាលនោះទេ ប៉ុន្តែក៏រារាំងគូប្រកួតមកពីទីក្រុងជាមួយគ្នា បង្កើតឡើងជាថ្មីនូវជោគជ័យក្រោមការដឹកនាំរបស់ Sir Alex Ferguson កាលពី 24 ឆ្នាំមុនផងដែរ។

ក្នុងពិធីប្រគល់រង្វាន់ចុងរដូវកាលរបស់ Manchester United កាលពីព្រលប់ថ្ងៃទី 19 ឧសភា ខ្សែប្រយុទ្ធ Rashford ដណ្ដើមបានពានរង្វាន់ប្រចាំរដូវកាលចំនួនពីរសំខាន់ៗ គឺ ពានរង្វាន់កីឡាករឆ្នើមបំផុតដែលបោះឆ្នោតដោយអ្នកគាំទ្រ (Sir Matt Busby Player of the Year) និងពានរង្វាន់កីឡាករឆ្នើមបំផុតដែលបោះឆ្នោតដោយសមាជិកក្នុងក្រុម៕

May 31, 2023

Man City ដាក់គោលដៅឲ្យលោក Guardiola ត្រូវតែធ្វើការប្រជែងយកពាន ៣

លោក Pep Guardiola ត្រូវបានជំរុញឲ្យធ្វើការប្រជែងដណ្តើមពាន ៣ ដោយម្ចាស់កម្មសិទ្ធិដ៏មានមហិច្ឆតារបស់ Manchester City ខណៈដែលក្លិបស្ថិតក្នុងក្របខ័ណ្ឌ Premier League មួយនេះ មានបំណងធ្វើការស្តារមុខមាត់ឡើងវិញពីយុទ្ធនាការដ៏ខកចិត្តកន្លងទៅ។

រដូវកាលទី១របស់លោក Guardiola បានបញ្ចប់ទៅទាំងភាពខកចិត្ត ខណៈដែលពួកគេបានបញ្ចប់រដូវកាលដោយការមិនបានឈ្នះពានអ្វីសោះ ក្រោយពីមិនអាចធ្វើការប្រជែងពាន Premier League និងធ្លាក់ចេញពីក្របខ័ណ្ឌ Champions League ក្នុងវគ្គ១៦ក្រុមចុងក្រោយ។ Man City ក៏បានធ្លាក់ចេញពីយុទ្ធនាការពាន FA Cup និង League Cup ផងដែរ ក្នុងរដូវកាលដ៏កម្រនៃការមិនឈ្នះពានណាមួយសោះសម្រាប់លោក Guardiola ដែលធ្លាប់បានឈ្នះពានជាច្រើនអំឡុងពេលលោកដឹកនាំក្នុងក្លិប Barcelona និង Bayern Munich។ ប៉ុន្តែ ទោះបីជាយ៉ាងណា លោក Khaldoon Al Mubarak ដែលជាប្រធានក្លិប Man City ជឿជាក់ថា កំណត់ត្រារបស់លោក Guardiola នៃការឈ្នះពានសរុបចំនួន២១លើកក្នុងរយៈពេល៧ឆ្នាំរបស់លោកក្នុងនាមជាអ្នកចាត់ការទូទៅ បង្ហាញថា រដូវកាលខាងមុខនឹងក្លាយជាពេលវេលាដ៏ជោគជ័យ។

លោក Khaldoon បានប្រាប់គេហទំព័ររបស់ក្លិប Man City ថា៖ «យើងនឹងខិតខំព្យាយាមដណ្តើមពានក្របខ័ណ្ឌ Premier League និង Champions League ហើយទាំងអស់នោះនៅតែជាគោលដៅរបស់យើង។ យើងនៅតែមានមហិច្ឆតានៃការឈ្នះពាន Champions League ហើយក្តីសុបិននោះធ្វើឲ្យខ្ញុំមានការរំភើបជារៀងរាល់ថ្ងៃ និងដឹងថា យើងអាចធ្វើបាន»។ លោក Khaldoon បានបន្ថែមទៀតថា៖ «សុបិននៃការឈ្នះពានបីក្នុងរដូវកាលតែមួយមែនទេ? ពិតមែនហើយ។ ហេតុអ្វីមិនអាចទៅរួច?»៕

ប្រភពពី៖ Sport24

June 1, 2017

Tag: Pep Guardiola

UEFA ប្រកាស​អំពី​ម្ចាស់​ពានរង្វាន់ «កីឡាករ​ឆ្នើម​បំផុត​នៅ Champions League»

«លោតរំលង» Real ក្រុមបាល់ទាត់​មួយ​នេះ​ក្លាយជា​ក្លឹប​មានតម្លៃ​ខ្ពស់​ជាងគេ​លើ​ពិភពលោក

ខ្សែប្រយុទ្ធ​របស់ Man Utd ប្ដេជ្ញា​រារាំង Man City លើក​ពាន​ទាំងបី​ក្នុង​រដូវ​កាល​នេះ

Man City ដាក់​គោល​ដៅ​ឲ្យ​លោក Guardiola ត្រូវតែ​ធ្វើការ​ប្រជែង​យក​ពាន​ ៣

UEFA ប្រកាសអំពីម្ចាស់ពានរង្វាន់ «កីឡាករឆ្នើមបំផុតនៅ Champions League»

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

Man City ដាក់គោលដៅឲ្យលោក Guardiola ត្រូវតែធ្វើការប្រជែងយកពាន ៣