Neymar - La Reine Media

Messi មានកំណត់ត្រា Guinness ច្រើនជាង Ronaldo

ស្ថាប័ន Guinness កាលពីថ្ងៃទី 01 សីហា ប្រកាសថា Lionel Messi កំពុងកាន់កាប់កំណត់ត្រាពិភពលោកចំនួន 41 ច្រើនជាង Cristiano Ronaldo ចំនួនមួយកំណត់ត្រា។

ក្នុងចំណោមកំពូលតារាបាល់ទាត់ពិភពលោក Messi និង Ronaldo មានកំណត់ត្រាពិភពលោកច្រើនជាងគេ ដោយមាន 81 កំណត់ត្រា ដែលត្រូវបាន Guinness ទទួលស្គាល់។ ក្រៅពីនេះ ពុំមានកីឡាករដទៃរូបណាដែលមានកំណត់ត្រាលើសពី 10។ ខ្សែប្រយុទ្ធ Robert Lewandowski ដែលឈរលំដាប់ទីបីដោយមាន 9 កំណត់ត្រា ខណៈ Kylian Mbappe មាន 5 និង Neymar មាន 4។

កំណត់ត្រាថ្មីបំផុតរបស់ Messi ដែលត្រូវបានទទួលស្គាល់ដោយ Guinness គឺ «កីឡាករដែលលេងបានច្រើនប្រកួតបំផុតនៅ World Cup» ដោយចូលរួមលេងបាន 26 ប្រកួត និង «កីឡាករដែលរកបានគ្រាប់បាល់ឈ្នះនៅ World Cup ច្រើនជាងគេក្នុងតួនាទីជាប្រធានក្រុម» ដោយរកបាន 7 គ្រាប់។ កំណត់ត្រាទាំងពីរនេះសុទ្ធតែត្រូវបានសាងឡើងនៅក្នុងវគ្គផ្ដាច់ព្រ័ត្រ World Cup កាលពីថ្ងៃទី 18 ធ្នូ 2022 ពេលដែល Messi រកបានពីរគ្រាប់ ជួយឱ្យអាហ្សង់ទីនក្លាយជាជើងឯក។

នៅ World Cup 2022 Messi ក៏ទទួលបានកំណត់ត្រាមួយផ្សេងទៀតពី Guinness នោះគឺ «កីឡាករដំបូងគេដែលបង្កឱកាសរកបានគ្រាប់បាល់នៅ World Cup ចំនួន 5 រដូវកាល។

ចំណែក Ronaldo វិញ កំណត់ត្រាថ្មីបំផុតដែលបានទទួលពី Guinness គឺ «បុគ្គលដែលមានអ្នកតាមដានច្រើនជាងគេនៅលើ Instagram» ដោយមានអ្នកតាមដានជាង 565 លាននាក់ គិតត្រឹមថ្ងៃទី 24 មីនា 2023។ នៅថ្ងៃនោះ Ronaldo ក៏ទទួលបានកំណត់ត្រាមួយផ្សេងទៀត គឺ «បុរសដែលមានអ្នកតាមដានច្រើនជាងគេលើ Instagram»។ បច្ចុប្បន្ន ចំនួនគណនីដែលតាមដាន Ronaldo នៅលើ Instagram បានកើនឡើងដល់ជាង 598 លាននាក់។

Ronaldo ក៏ធ្លាប់បង្ហោះរូបថតស្ដីពីកំណត់ត្រា Guinness មួយរបស់ខ្លួននៅលើបណ្ដាញសង្គម ពេល CR7 យកឈ្នះលើ Ali Daei ដោយបានក្លាយជាកីឡាករដែលទាត់ចូលទីបានច្រើនគ្រាប់បំផុតសម្រាប់ក្រុមជម្រើសជាតិ។ Ronaldo រកបាន 123 គ្រាប់ នៅក្នុង 200 ប្រកួតដែលបានទាត់ឱ្យព័រទុយហ្កាល់៕

August 2, 2023

ក្លឹបបាល់ទាត់ PSG ប្រកាសអំពីតម្លៃខ្លួនរបស់កំពូលកីឡាករ Mbappe

ម្ចាស់ជើងឯកពានរង្វាន់ Ligue 1 ទំនងជានឹងទទួលយកការលក់ Kylian Mbappe ក្នុងតម្លៃ 160 លានដុល្លារអាម៉េរិក ក្នុងពេលឆាប់ៗ ព្រោះមិនចង់ប្រឈមនឹងហានិភ័យត្រូវបាត់បង់កីឡាករនេះទទេៗ នៅរដូវក្ដៅឆ្នាំ 2024។

យោងតាម ESPN ប្រធាន Nasser Al Khelaifi យល់ព្រមឱ្យ Mbappe ចាកចេញនៅក្នុងរដូវក្ដៅឆ្នាំ 2023 បើសិនជាទទួលបានប្រាក់ដោះដូរ 150 លានអឺរ៉ូ (ប្រហែល 160 លានដុល្លារអាម៉េរិក) ព្រោះថា សុពលភាពកិច្ចព្រមព្រៀងរបស់ Mbappe នៅក្លឹប PSG នេះ នៅសល់តែមួយឆ្នាំទៀតប៉ុណ្ណោះ។

សារព័ត៌មានខាងលើក៏បានឱ្យដឹងថា ក្លឹបថ្មីរបស់ Mbappe អាចជា Real បើសិនចាកចេញពី PSG។ ចំណែកសារព័ត៌មានបារាំង L’Équipe ក៏បានផ្សាយថា ក្លឹប Real បានត្រៀមខ្លួនរួចរាល់ដើម្បីដោះដូរយក Mbappe ដោយមិនរង់ចាំទិញក្នុងក្រមខណ្ឌកីឡាករសេរីនៅរដូវក្ដៅឆ្នាំក្រោយ។

PSG កំពុងស្ថិតក្នុងការប្រែប្រួលខ្លាំងនៅរដូវកាលនេះ។ Sergio Ramos, Lionel Messi បានចាកចេញទៅតាមទម្រង់សេរី ខណៈដែល Neymar ទទួលបានសំណើទិញក្នុងតម្លៃ 300 លានដុល្លារអាម៉េរិក/ឆ្នាំ ពីក្លឹប Al Hilal នៅអារ៉ាប៊ីសាអូឌីត។ ចំណែក Mbappe វិញក៏បានជូនដំណឹងអំពីការមិនពន្យារកិច្ចព្រមព្រៀងជាមួយក្លឹបនេះផងដែរ។

ទំព័រ ESPN យល់ថា ការចាកចេញរបស់ Mbappe នឹងបង្កការខាតបង់ធំសម្រាប់ PSG ព្រោះថា បច្ចុប្បន្នកីឡាកររូបនេះត្រូវបានចាត់ទុកថា ជានិមិត្តរូបរបស់ប្រទេសបារាំង ដោយត្រូវបានវាយតម្លៃថាជាតារាធំបំផុតបន្ទាប់ពី Messi និង Ronaldo៕

June 14, 2023

ធ្វើជាម្ចាស់ថ្មីរបស់ MU អ្នកវិនិយោគមកពីកាតាសម្រេចចិត្តលុបបំបាត់ «គោលការណ៍ Ronaldo»

Sheikh Jassim bin Hamad al-Thani ចង់លុបបំបាត់គោលការណ៍ដែលរារាំងកីឡាករទទួលបានប្រាក់បៀវត្សខ្ពស់ជាង បើធៀបនឹងមិត្តរួមក្រុមដទៃដែល Manchester United កំពុងអនុវត្ត។

ទំព័រ Sun Sport ថ្មីៗនេះបានរាយការណ៍ថា ម្ចាស់ថ្មីដ៏មានសក្ដានុពលរបស់ Man United នឹងលុបចោលការកំណត់ស្ដីពីប្រាក់បៀវត្សក្នុងសម័យរបស់គ្រូបង្វឹក Erik ten Hag ដែលបង្កើតឡើងដើម្បីកាត់បន្ថយការចំណាយរបស់ក្លឹប បន្ទាប់ពីការចាក់ចេញរបស់ Cristiano Ronaldo កាលពីចុងឆ្នាំមុន។

យោងតាមអ្វីដែលគេហៅថា «គោលការណ៍ Ronaldo» ក្លឹប Man United បានកំណត់ប្រាក់បៀវត្សអតិបរមាប្រចាំសប្ដាហ៍ត្រឹម 200,000 ផោនអង់គ្លេស ហើយនឹងមិនផ្ដល់ប្រាក់បៀវត្សលើសពីនេះដល់កីឡាករណាទាំងអស់។ គោលការណ៍នេះត្រូវបានដាក់ឈ្មោះមិនផ្លូវការទៅតាមឈ្មោះរបស់ Ronaldo ព្រោះតែកំពូលតារាបាល់ទាត់ព័រទុយហ្កាល់រូបនេះ ធ្លាប់ទទួលបានប្រាក់បៀវត្ស 385,000 ផោន/សប្ដាហ៍ នៅក្នុងការធ្វើការឱ្យក្លឹបនេះលើកទីពីរ មុនពេលទំនាក់ទំនងរវៀង CR7 និង Man United ត្រូវបញ្ចប់ក្នុងភាពចម្រូងចម្រាស។

ការសម្រេចចិត្តរបស់ម្ចាស់ថ្មី ជំរុញឱ្យបីសាចក្រហមអាចទាក់ទាញបណ្ដាកីឡាករលំដាប់ពិភពលោក មកចូលរួមជាមួយគ្រួសារ Old Trafford ក្នុងនោះមាន Neymar របស់ក្លឹប PSG ជាដើម។ ការលុបចោល «គោលការណ៍ Ronaldo» ក៏អាចជួយឱ្យ Man United រក្សាកំពូលកីឡាករដែលមានបច្ចុប្បន្ន មានដូចជា Marcus Rashford ជាដើម ដែលកំពុងរារែកក្នុងការចុះកិច្ចព្រមព្រៀងថ្មី ព្រោះតែប្រាក់បៀវត្សដែលត្រូវបានលើកឡើងដោយភាគីក្លឹប។

Sheikh Jassim អ្នកវិនិយោគមកពីកាតា បានធ្វើការប្រឹងប្រែងដើម្បីដណ្ដើមបានសិទ្ធិធ្វើជាម្ចាស់របស់ Man United ពីគ្រួសារ Glazer។ មុនពេលម្ចាស់ថ្មីមកកាន់ Old Trafford ក្រុម Man United នឹងត្រូវបញ្ចប់រដូវកាល Premier League 2022/2023 ដោយការប្រកួតនៅលើទីលានរបស់ខ្លួន ជាមួយនឹង Fulham និងប៉ះ Manchester City ក្នុងវគ្គផ្ដាច់ព្រ័ត្រ FA Cup នៅសប្ដាហ៍ក្រោយ៕

May 27, 2023

ក្រុមខ្លាំងៗ ត្រៀមរួចរាល់សម្រាប់ការប្រកួតវគ្គ 1/4 ផ្តាច់ព្រ័ត្រនៃ World Cup

ព្រឹត្តិការណ៍ World Cup បានផ្អាកការប្រកួតកាលពីថ្ងៃពុធ ខណៈដែលក្រុមដែលនៅតែមានវត្តមានចំនួន 8ក្រុម ត្រៀមសម្រាប់ការប្រកួតវគ្គ1/4ផ្តាច់ព្រ័ត្រ ក្រោយពីអង់គ្លេស បានក្លាយជាក្រុមចុងក្រោយគេ ក្នុងការឈ្នះសិទ្ធិទៅវគ្គបន្ត ក្រោយពីការយកឈ្នះដោយការស៊ុតបាល់ប៉េណាល់ទី លើក្រុមជម្រើសជាតិកូឡុំប៊ី។

ក្រុមជម្រើសជាតិប្រេស៊ីល របស់តារាឆ្នើម Neymar គឺជាក្រុមមានក្តីសង្ឃឹមច្រើនជាងគេក្នុងការលើកពាន World Cup ជាលើកទី6 របស់ពួកគេនាកីឡដ្ឋាន Luzhniki ក្នុងទីក្រុងម៉ូស្គូ នាថ្ងៃទី15 ខែកក្កដា ប៉ុន្តែ ក្រុមបាល់ទាត់ជម្រើសជាតិបារាំង បែលហ្ស៊ិក និងអ៊ុយរូហ្គាយ នឹងក្លាយជាឧបសគ្គរបស់ពួកគេ ក្នុងការប្រជែងយកកៅអីទៅវគ្គផ្តាច់ព្រ័ត្រ។

ក្រុមជម្រើសជាតិអង់គ្លេសរបស់លោក Gareth Southgate គឺជាអតីតម្ចាស់ជើងឯកតែមួយដែលស្ថិតក្នុងបណ្តុំនៃការចាប់ឆ្នោតមួយទៀត រួមជាមួយនឹងក្រុមម្ចាស់ផ្ទះរុស្ស៊ី ក្រូអាស៊ី និងស៊ុយអែត។ ការដណ្តើមបានជ័យជម្នះរបស់អង់គ្លេស លើក្រុមជម្រើសជាតិកូឡុំប៊ី កាលពីថ្ងៃអង្គារ បានធ្វើឱ្យក្រុមរបស់លោក Southgate ត្រូវប៉ះជាមួយនឹងក្រុមជម្រើសជាតិស៊ុយអែត ដែលបានទម្លាក់ក្រុមជម្រើសជាតិស្វ៊ីស ក្នុងលទ្ធផល 1-០ ក្នុងវគ្គ 16ក្រុមចុងក្រោយ។

លោក Southgate បានបញ្ជាក់ថា លោកបានផ្តោតអារម្មណ៍រួចជាស្រេចចំពោះការប្រកួតវគ្គ 8ក្រុមចុងក្រោយនៅថ្ងៃសៅរ៍នេះ ជាមួយនឹងក្រុមជម្រើសជាតិស្វ៊ីស ក្នុងទីក្រុង Samara ដើម្បីប្រជែងយកកៅអីទៅកាន់វគ្គពាក់កណ្តាលផ្តាច់ព្រ័ត្រ ពោលគឺដើម្បីជួបជាមួយនឹងក្រុមជម្រើសជាតិក្រូអាស៊ី ឬរុស្ស៊ី។

លោក Southgate ដែលការស៊ុតបាល់ប៉េណាល់មិនចូលទីផ្ទាល់របស់លោក បានធ្វើឱ្យអង់គ្លេស ចាញ់ក្រុមអាល្លឺម៉ង់ ក្នុងវគ្គ1/2ផ្តាច់ព្រ័ត្រ ក្នុង Euro ឆ្នាំ1996 នាកីឡដ្ឋាន Wembley នោះ បានឱ្យដឹងថា៖ «នេះពិតជាពិសេសណាស់ ប៉ុន្តែ ខ្ញុំចង់ឱ្យយើងបន្តដំណើរទៅមុខ»៕

ប្រភពពី៖ Channel News Asia

July 5, 2018

Neymar នឹងត្រូវអវត្តមានរហូតដល់ថ្ងៃទី17 ខែឧសភា និងកំពុងផ្តោតលើ World Cup

តារាឆ្នើមអន្តរជាតិប្រេស៊ីល Neymar បាននិយាយកាលពីថ្ងៃអង្គារថា រូបគេនឹងមិនចូលលេងវិញឡើយរហូតដល់ពាក់កណ្តាលខែឧសភា ដែលនៅពេលនោះរូបគេត្រូវបានគ្រោងទទួលការពិនិត្យជាលើកចុងក្រោយ បន្ទាប់ពីការវះកាត់ប្រអប់ជើងរួច។

ខ្សែប្រយុទ្ធអន្តរជាតិប្រេស៊ីលរបស់ក្លិប Paris Saint-Germain រូបនេះបានប្រាប់សន្និសីទសារព័ត៌មានមួយក្នុងទីក្រុង Sao Paulo ថា៖ «វាមិនទាន់មានកាលបរិច្ឆេទជាក់លាក់នៅឡើយទេ។ ខ្ញុំត្រូវពិនិត្យជាលើកចុងក្រោយទៀត ប្រសិនបើខ្ញុំគិតមិនខុសទេនោះ។ ខ្ញុំមិនប្រាកដឡើយ តែការពិនិត្យនោះ គឺនៅថ្ងៃទី17 ខែឧសភា»។ Neymar បានបន្ថែមទៀតថា៖ «ខ្ញុំនឹងត្រូវទទួលការពិនិត្យយ៉ាងច្បាស់លាស់ម្ដងទៀតមុននឹងចូលលេង។ បន្ទាប់មក ខ្ញុំនឹងរង់ចាំមើលតទៅទៀត វាអាស្រ័យទៅលើការអភិវឌ្ឍផ្សេងៗ វាអាស្រ័យទៅលើការពិនិត្យជាលើកចុងក្រោយរបស់ខ្ញុំ។ វាមិនទាន់សម្រេចនៅឡើយទេ»។

ពេលវេលានេះ នឹងធ្វើឱ្យកីឡាករបាល់ទាត់មានតម្លៃខ្លួនខ្ពស់ជាងគេបំផុតរបស់ពិភពលោករូបនេះ ស្ថិតក្នុងការព្យាយាមដើម្បីអាចចូលលេងម្តងទៀតសម្រាប់ក្រុម PSG ខណៈដែលក្រុមទើបតែឈ្នះពានរបស់បារាំងមួយនេះ នឹងត្រូវបញ្ចប់រដូវកាលរបស់ខ្លួននាថ្ងៃទី19 ខែឧសភា ក្នុងពេលប្រកួតជាមួយនឹងក្រុម Caen។ ទោះបីជាយ៉ាងណា ក្តីរំពឹងរបស់គេក្នុងការចូលលេងឱ្យក្រុមជម្រើសជាតិប្រេស៊ីល ក្នុងយុទ្ធនាការ World Cup នៅប្រទេសរុស្ស៊ី ដែលនឹងដំណើរការចាប់ពីថ្ងៃទី14 ខែមិថុនា ដល់ថ្ងៃទី15 ខែកក្កដា ហាក់មានកម្រិតខ្ពស់ជាង។

ប្រេស៊ីលនឹងបើកយុទ្ធនាការរបស់ខ្លួននៅថ្ងៃទី17 ខែមិថុនា ដែលនៅពេលនោះពួកគេត្រូវប៉ះជាមួយនឹងក្រុមជម្រើសជាតិស្វ៊ីស ក្នុងទីក្រុង Rostov៕

ប្រភពពី៖ Channel News Asia

April 18, 2018

Neymar បង្កើតភាពអស្ចារ្យនៅថ្ងៃបង្ហាញខ្លួនលើកដំបូងឲ្យ PSG

ខ្សែប្រយុទ្ធ Neymar មិនបានខ្ជះខ្ជាយពេលវេលាក្នុងការបង្កើតភាពអស្ចារ្យភ្លាមៗនៅលើទីលានសម្រាប់ក្រុម Paris Saint-Germain ឡើយ ក្រោយពីរូបគេបានរកគ្រាប់បាល់បញ្ចូលទីក្នុងពេលក្រុមខ្លួនទទួលជ័យជម្នះ 3-0 នៅលើទឹកដីក្រុម Guingamp កាលពីថ្ងៃអាទិត្យ និងបានបញ្ជាក់ថា រូបគេមានអារម្មណ៍ថា ហាក់មានភាពរស់រវើកជាងមុន។

ខ្សែប្រយុទ្ធអន្តរជាតិប្រេស៊ីលរូបនេះ ត្រូវបានដាក់ឲ្យចូលលេងក្នុងជម្រើសទាំង11នាក់ដំបូង ដោយលោកគ្រូបង្វឹក Unai Emery សម្រាប់ការប្រកួតនៅទីក្រុង Brittany ក្នុងរយៈពេល2ថ្ងៃ ក្រោយពីបានទទួលលិខិតឲ្យធ្វើការងារសម្រាប់ការផ្ទេរក្នុងតម្លៃខ្លួនជាកំណត់ត្រាពិភពលោករបស់គេក្នុងទឹកប្រាក់ចំនួន 222លានអឺរ៉ូ (ស្មើនឹង261លានដុល្លារអាមេរិក) ពីក្លិប Barcelona រួចមក។ តារាឆ្នើមវ័យ 25ឆ្នាំរូបនេះដែលស្ថិតក្នុងសម្លៀកបំពាក់ពណ៌លឿងរបស់ក្រុម PSG នោះបានលេងក្នុងតួនាទីដ៏សំខាន់ក្នុងពេលកីឡាករ Jordan Ikoko បានធ្វើឲ្យបាល់ចូលទីខ្លួនឯងនៅដើមតង់ទី2។

បន្ទាប់មក រូបគេបានជួយឲ្យខ្សែប្រយុទ្ធ Edinson Cavani រកបានគ្រាប់បាល់ទី2សម្រាប់ក្រុមខ្លួន តាមរយៈការអូសបាល់ផុតខ្សែការពាររបស់ក្រុម Guingamp រួចបញ្ជូនបាល់បញ្ចូលទីយ៉ាងល្អមុនពេលបំពេញជ័យជម្នះដ៏កក់ក្តៅមួយសម្រាប់ក្រុមថ្មីរបស់ខ្លួនជាមួយនឹងគ្រាប់បាល់ទី3នៃក្រុមរបស់គេនៅជិតបញ្ចប់ការប្រកួត ខណៈដែល PSG បានកត់ត្រាជ័យជម្នះ2លើកពីការប្រកួតទាំង2លើកដំបូងរបស់ពួកគេក្នុងក្របខ័ណ្ឌរបស់បារាំង។ Neymar បានប្រាប់អ្នកយកព័ត៌មានថា៖ «មនុស្សជាច្រើនគិតថា ការចាកចេញពីក្លិប Barca នឹងធ្វើឲ្យស្លាប់ ប៉ុន្តែមិនមែនទេ វាផ្ទុយស្រឡះពីការគិតបែបនោះ។ ខ្ញុំមានភាពរស់រវើកជាងមុន។ ខ្ញុំអាចលេង ហើយខ្ញុំពិតជារីករាយណាស់។ កីឡាបាល់ទាត់មានលក្ខណៈដូចគ្នា ប៉ុន្តែមានតែប្រទេស ទីក្រុង និងក្រុមនេះប៉ុណ្ណោះដែលអាចផ្លាស់ប្តូរ»៕

ប្រភពពី៖ Sky Sport

August 14, 2017

Neymar នឹងត្រូវអង្គុយមើល ខណៈPSG បើករដូវកាល Ligue 1 នៅរាត្រីនេះ

ខ្សែប្រយុទ្ធ Neymar បានត្រឹមតែអាចអង្គុយទស្សនាការប្រកួតពីលើកៅអីប៉ុណ្ណោះ ខណៈដែលក្រុម Paris Saint Germain នឹងត្រូវបើករដូវកាលរបស់ខ្លួននៅថ្ងៃសៅរ៍នេះ ប៉ុន្តែក្លិបយក្សរបស់បារាំងមួយនេះបានប្រមូលប្រាក់បានប្រមាណជា1លានអឺរ៉ូរួចជាទៅស្រេចពីការចំណាយប្រាក់ក្នុងតម្លៃខ្លួនជាកំណត់ត្រាពិភពលោករបស់ពួកគេ ក្រោយពីបានលក់អាវដែលឈ្មោះថា Neymar បានចំនួន 10,000អាវក្នុងរយៈពេលត្រឹមតែ1ថ្ងៃប៉ុណ្ណោះ។

តារាឆ្នើមអន្តរជាតិប្រេស៊ីលវ័យ 25ឆ្នាំរូបនេះ ដែលបានផ្ទេរមកពីក្លិប Barcelona សម្រាប់តម្លៃខ្លួន 222លានអឺរ៉ូ (ស្មើនឹង264លានដុល្លារអាមេរិក) នឹងត្រូវបង្ហាញខ្លួននៅមុខអ្នកគាំទ្រ PSG របស់ខ្លួននៅមុនពេលការប្រកួតបើកឆាកនៃក្របខ័ណ្ឌ Ligue 1 របស់ពួកគេ ជាមួយនឹងក្រុមទើបតែឡើងថ្មី Amiens។ កម្មវិធីជួបជុំនេះនឹងចាប់ផ្តើមនៅម៉ោង3:45រសៀល (ម៉ោងក្នុងស្រុក) ខណៈដែលការប្រកួតនឹងចាប់ផ្តើមនៅម៉ោង5:15ល្ងាច ដើម្បីអាចឲ្យរូបគេបង្ហាញខ្លួនឲ្យបានយូរបន្តិចនៅពីមុខអ្នកគាំទ្រច្រើនជាង 45,000នាក់ នៅកីឡដ្ឋាន Parc des Princes។

ប៉ុន្តែ ទោះបីជាយ៉ាងណា ក្តីសង្ឃឹមរបស់ Neymar ក្នុងការលេងក្នុងការប្រកួតនេះត្រូវបានបញ្ចប់ នៅពេលដែលលិខិតបញ្ជាក់ពីការផ្ទេរជាអន្តរជាតិរបស់គេ មិនទាន់ត្រូវបានដាក់ទៅឲ្យក្របខ័ណ្ឌលីករបស់បារាំងឲ្យទាន់ពេលកាលពីយប់ថ្ងៃសុក្រ។ នៅមុនពេលជួបបញ្ហាទាក់ទងនឹងលិខិតបញ្ជាក់ឲ្យធ្វើការ Neymar បាននិយាយថា៖ «ខ្ញុំត្រៀមលក្ខណៈរួចរាល់ក្នុងការចាប់ផ្តើមនៅថ្ងៃសៅរ៍ ប្រសិនបើខ្ញុំអាច»។

ទោះបីជាយ៉ាងណា ក្រោយពីការផ្ទេរក្នុងតម្លៃខ្លួនជាកំណត់ត្រាពិភពលោក Neymar ដែលនឹងត្រូវទទួលបានប្រមាណជា30លានអឺរ៉ូ (ស្មើនឹង35លានដុល្លារអាមេរិក) ក្នុងមួយឆ្នាំនោះ បានបញ្ជាក់ថា ការទទួលបានប្រាក់ដ៏ច្រើនសន្ធឹកសន្ធាប់ មិនមែនជាកត្តាដែលនាំឲ្យមានការផ្ទេរនេះឡើយ។ Neymar ដែលបានចុះហត្ថលេខារយៈពេល5ឆ្នាំជាមួយនឹងក្លិប PSG បានឲ្យដឹងថា៖ «ខ្ញុំចង់បានការប្រជែងកាន់តែធំ និងកាន់តែអស្ចារ្យ។ ខ្ញុំមកទីនេះដើម្បីផ្តល់ជំនួយឲ្យអស់ពីសមត្ថភាពរបស់ខ្ញុំ និងជួយឲ្យក្លិបនេះឈ្នះពាននានា»។ ការប្រកួតនេះនឹងចាប់ផ្តើមនៅម៉ោង10:15យប់៕

August 5, 2017

Neymar សន្យាបំពេញបំណង PSG ក្រោយពីបំពេញការផ្ទេរជាផ្លូវការ

ការផ្ទេរក្នុងតម្លៃខ្លួនជាកំណត់ត្រាពិភពលោករបស់ Neymar ទៅកាន់ក្លិប Paris Saint-Germain ត្រូវបានបំពេញកាលពីល្ងាចថ្ងៃព្រហស្បតិ៍ម្សិលមិញដែលនៅពេលនោះក្លិបយក្សរបស់បារាំងមួយនេះ បានប្រកាសថា តារាឆ្នើមអន្តរជាតិប្រេស៊ីល Neymar បានចុះហត្ថលេខារយៈពេល5ឆ្នាំ ដើម្បីធ្វើ ឲ្យរូបគេទទួលបានចំណូលប្រមាណជា30លានអឺរ៉ូ (ស្មើនឹង35.5លានដុល្លារអាមេរិក) ក្នុងមួយឆ្នាំបន្ទាប់ពីកាត់ពន្ធរួច។ ការផ្ទេរនេះត្រូវបានចុះហត្ថលេខាត្រឹមរយៈពេលតែប៉ុន្មានម៉ោងប៉ុណ្ណោះក្រោយពី PSG បានចំណាយប្រាក់ទិញរំលាយកិច្ចសន្យារបស់ Neymar ចំនួន222លានអឺរ៉ូ (ស្មើនឹង260លានដុល្លារអាមេរិក) ទៅឲ្យក្លិប Barcelona។

ក្រោយពីបំពេញការផ្ទេរនេះភ្លាមៗ Neymar បានសន្យាថា នឹងធ្វើរាល់អ្វីទាំងអស់ដើម្បីជួយឲ្យក្លិប PSG សម្រេចបំណងរបស់ខ្លួន។ តារាឆ្នើមរូបនេះបានឲ្យដឹងថា៖ «ខ្ញុំពិតជារីករាយណាស់ក្នុងការចូលរួមជាមួយនឹង Paris Saint-Germain ចាប់តាំងពីខ្ញុំបានទៅដល់ទ្វីបអឺរ៉ុប ក្លិបនេះតែងតែជាក្លិបមួយដែលមានការប្រកួតប្រជែងខ្លាំងបំផុត ជាក្លិបមួយមានមហិច្ឆតាធំបំផុត និងមានការប្រជែងដ៏ធំបំផុត។ អ្វីដែលបានលើកទឹកចិត្តខ្ញុំខ្លាំងបំផុតក្នុងការចូលរួមជាមួយនឹងមិត្តរួមក្រុមថ្មីរបស់ខ្ញុំ គឺការជួយក្លិបនេះឲ្យដណ្តើមបានពានដែលអ្នកគាំទ្ររបស់ពួកយើងចង់បាន»។

ខ្សែប្រយុទ្ធរូបនេះបានបន្ថែមទៀតថា៖ «មហិច្ឆតារបស់ PSG បានទាក់ទាញឲ្យខ្ញុំត្រូវតែមកកាន់ក្លិបនេះ រួមជាមួយនឹងការស្រេកឃ្លានជ័យជម្នះ និងថាមពល។ ខ្ញុំបានលេងអស់រយៈពេល4រដូវកាលនៅទ្វីបអឺរ៉ុប ហើយខ្ញុំមានអារម្មណ៍ថា ខ្ញុំបានត្រៀមលក្ខណៈរួចរាល់ហើយក្នុងការទទួលយកការប្រជែងមួយនេះ។ ចាប់ពីថ្ងៃនេះតទៅ ខ្ញុំនឹងធ្វើរាល់អ្វីៗទាំងអស់ដែលខ្ញុំអាចធ្វើបានដើម្បីជួយមិត្តរួមក្រុមថ្មីរបស់ខ្ញុំ ដើម្បីបើកជើងមេឃថ្មីសម្រាប់ក្លិបរបស់ខ្ញុំ និងដើម្បីនាំយកការរីករាយទៅកាន់អ្នកគាំទ្ររាប់លាននាក់ទូទាំងពិភពលោក»។

PSG បានបញ្ជាក់ថា Neymar នឹងបង្ហាញមុខជាផ្លូវការក្នុងសន្និសីទសារព័ត៌មានមួយនៅល្ងាចថ្ងៃសុក្រនេះឯង៕

ប្រភពពី៖ Sky Sports

August 4, 2017

ទីបំផុត Neymar ត្រូវត្រៀមបំពេញការផ្ទេរទៅ PSG មែន!

ខ្សែប្រយុទ្ធ Neymar នឹងត្រូវបំពេញការផ្ទេរក្នុងតម្លៃខ្លួនជាកំណត់ត្រាពិភពលោកទៅកាន់ក្លិប Paris Saint-Germain ក្នុងទឹកប្រាក់ប្រមាណជា502លានអឺរ៉ូ (ស្មើនឹង595លានដុល្លារអាមេរិក) បើបូកទាំងតម្លៃខ្លួន និងប្រាក់បៀវត្សរ៍ ក្រោយពីរូបគេបានប្រាប់ក្លិប Barcelona ថា រូបគេនឹងចាកចេញ។

PSG បានយល់ព្រមទៅលើក្នុងការចំណាយប្រាក់ទិញរំលាយកិច្ចសន្យាចំនួន222លានអឺរ៉ូ (ស្មើនឹង260លានដុល្លារអាមេរិក) ដែលនឹងត្រូវប្រគល់ឲ្យការិយាល័យសហព័ន្ធកីឡាបាល់ទាត់អេស្ប៉ាញ ខណៈដែលនេះគឺជាបែបបទដែលតម្រូវឲ្យធ្វើក្នុងការជម្រះការផ្ទេរ។ Neymar ដែលបានធ្វើដំណើរទៅកាន់ទីក្រុង Porto កាលពីថ្ងៃពុធ ដើម្បីទទួលការត្រួតពិនិត្យសុខភាពនោះត្រូវបានរំពឹងទុកថា នឹងបង្ហាញខ្លួនជាផ្លូវក្នុងទីក្រុងប៉ារីសនៅសប្តាហ៍នេះ។ កាលពីថ្ងៃពុធដដែលនោះ Neymar ដែលរួមដំណើរដោយឪពុករបស់គេផងនោះបានធ្វើការបញ្ជាក់ប្រាប់ក្លិប Barcelona នៅឯទីលានហ្វឹកហាត់របស់ពួកគេ អំពីគោលបំណងរបស់គេក្នុងការចាកចេញ។ ក្លិបយក្សរបស់អេស្ប៉ាញមួយនេះបានឆ្លើយតបតាមរយៈការនិយាយថា ទឹកប្រាក់ទិញរំលាយកិច្ចសន្យានឹងត្រូវតែបង់ក្នុងចំនួនពេញលេញ។

ស្របពេលជាមួយគ្នានេះ ខ្សែប្រយុទ្ធ Lionel Messi ដែលជាមិត្តរួមក្រុមរបស់ក្លិប Neymar បានបង្ហោះសារលាគ្នា នៅលើបណ្តាញសង្គមទៅកាន់ខ្សែប្រយុទ្ធអន្តរជាតិប្រេស៊ីលរូបនេះ ខណៈដែលលោក Wagner Ribeiro ដែលជាភ្នាក់ងារតំណាងរបស់គេត្រូវបានដកស្រង់សម្តីខណៈនិយាយថា PSG នឹងចំណាយប្រាក់ស្របតាមតម្លៃខ្លួនដែល Barcelona បានស្នើសុំ។ លោក Ribeiro បានបញ្ជាក់បន្ថែមទៀតថា Neymar កំពុងស្ថិតនៅលើផ្លូវឆ្ពោះទៅកាន់ការផ្ទេរមួយនេះហើយ។ Ribeiro បានប្រាប់ស្ថានីយវិទ្យុរបស់អេស្ប៉ាញ Cadena COPE ថា៖ «PSG នឹងចំណាយប្រាក់រំលាយកិច្ចសន្យាចំនួន222លានអឺរ៉ូ របស់ Neymar នៅថ្ងៃនេះ ហេតុនេះ រូបគេអាចបង្ហាញខ្លួនជាផ្លូវការនៅចុងសប្តាហ៍នេះ»។ Neymar បានផ្ទេរមកពីក្លិប Santos កាលពីឆ្នាំ2013 ក្នុងតម្លៃខ្លួនជិត100លានអឺរ៉ូ ហើយរូបគេត្រូវបានរំពឹងទុកថា នឹងទទួលបានចំណូលជាង1លានដុល្លារក្នុងមួយសប្តាហ៍ នៅ PSG មុនពេលកាត់ពន្ធ៕

ប្រភពពី៖ The Guardian

August 3, 2017

Neymar ស្ថិតក្នុងភាពស្ងប់ស្ងាត់ ពេលវិលទៅកាន់ក្លិប Barcelona វិញ

តារាឆ្នើមអន្តរជាតិប្រេស៊ីល Neymar បានធ្វើដំណើរវិលទៅកាន់ក្លិប Barcelona វិញកាលពីល្ងាចថ្ងៃអង្គារ ខណៈដែលរូបគេបានគេចវេះមិនធ្វើការបកស្រាយណាមួយទៅលើការលើកឡើងផ្សេងៗពីការផ្ទេរក្នុងតម្លៃខ្លួនជាកំណត់ត្រាពិភពលោកទៅកាន់ក្លិប Paris Saint-Germain ឡើយ។

ខ្សែប្រយុទ្ធរបស់ក្លិប Barcelona វ័យ25ឆ្នាំរូបនេះបានធ្វើដំណើរចេញពីប្រទេសចិនវិញហើយនៅមុននេះបន្តិច រូបគេបានបង្ហោះរូបភាពវីដេអូនៅលើបណ្តាញសង្គម ដែលហាក់ចង់បង្ហាញថា រូបគេកំពុងតែចេញដំណើរពីអាកាសយានដ្ឋាននៃទីក្រុងដូហា ស្របពេលដែលមានការលើកឡើងផ្សេងៗថា រូបគេអាចនឹងចាកចេញទៅកាន់ក្លិប PSG។ រូបគេនៅតែស្ថិតក្នុងភាពស្ងប់ស្ងាត់ ស្របពេលដែលមានពាក្យចចាមអារ៉ាមជាច្រើនថា រូបគេនឹងចូលរួមជាមួយនឹងក្លិបយក្សរបស់បារាំងដែលកំពុងតែត្រៀមលក្ខណៈរួចរាល់ក្នុងការចំណាយប្រាក់222លានអឺរ៉ូ (ស្មើនឹង260លានដុល្លារអាមេរិក) ដែលជាចំនួនទឹកប្រាក់ដ៏សម្បើមមួយក្នុងការរំលាយកិច្ចសន្យារបស់គេនៅឯកីឡដ្ឋាន Camp Nou។

Neymar ដែលបានស្ថិតក្នុងប្រទសចិនកាលពីថ្ងៃចន្ទ ដើម្បីបំពេញកាតព្វកិច្ចសម្រាប់ម្ចាស់ឧបត្ថម្ភរបស់គេនោះ ក៏បានបង្ហោះរូបថតមួយសន្លឹកនៅលើបណ្តាញសង្គម Instagram ផងដែរ ដោយសរសេរជាភាសាព័រទុយហ្គាល់ថា៖ «ញ៉ាំអាហាថ្ងៃត្រង់នៅពាក់កណ្តាលផ្លូវ»។ ក្នុងរូបភាពវីដេអូមួយផ្សេងទៀតពីក្នុងយន្តហោះដែលNeymar ហាក់បានបង្ហាញថា រូបគេពិតជាបានទៅដល់ទីក្រុង Barcelona ពិតប្រាកដមែន។ ប្រភពព័ត៌មានជាច្រើនបានចេញផ្សាយនៅមុននេះថា រូបគេបានចាកចេញពីប្រទេសចិនទៅកាន់ទីក្រុងដូហា ដើម្បីជួបជាមួយនឹងម្ចាស់កម្មសិទ្ធិរបស់ក្លិប PSG និងទទួលការត្រួតពិនិត្យសុខភាព នៅមុនពេលផ្ទេរក្នុងតម្លៃខ្លួនជាកំណត់ត្រាពិភពលោក៕
ប្រភពពី៖ Sport24

August 2, 2017

Tag: Neymar