Tag: Monaco

PSG ត្រូវផ្ដល់ប្រាក់រង្វាន់នៃភាពស្មោះត្រង់ជាង 40 លានដុល្លារដល់ Mbappe
(បារាំង) – កិច្ចសន្យាបច្ចុប្បន្នរវាងក្លឹបបាល់ទាត់ PSG និង Kylian Mbappe មានលក្ខខណ្ឌមួយចែងថា PSG ត្រូវផ្ដល់ប្រាក់រង្វាន់ពាក់កណ្ដាលក្នុងចំណោម 88 លានដុល្លារអាម៉េរិកសម្រាប់ភាពស្មោះត្រង់របស់ Mbappe បន្ទាប់ពីថ្ងៃទី 31 កក្កដា 2023។
លក្ខខណ្ឌនេះស្ថិតក្នុងកិច្ចព្រមព្រៀងដែលត្រូវបានចុះហត្ថលេខាកាលពីខែឧសភាឆ្នាំ 2022។ កិច្ចព្រមព្រៀងរវាងក្លឹង PSG និង Kylian Mbappe មានសុពលភាពរហូតដល់ខែមិថុនាឆ្នាំ 2024 ហើយប្រាក់ចំណូលសរុបរបស់ Mbappe ឡើងដល់ 220 លានដុល្លារអាម៉េរិក ក្នុងនោះមានជិត 90 លានដុល្លារជាប្រាក់រង្វាន់សម្រាប់ភាពស្មោះត្រង់ និងប្រាក់រង្វាន់ដទៃទៀត។
ប៉ុន្តែ ដើមខែមិថុនា Mbappe បានផ្ញើលិខិតបញ្ជាក់ថា មិនពន្យារសុពលភាពនៃកិច្ចសន្យាឱ្យដល់ខែមិថុនាឆ្នាំ 2024 ដូចគម្រោងដំបូង។ ប្រការនេះធ្វើឱ្យប្រធានក្លឹប លោក Al Khelaifi ខឹង និងសម្រេចចិត្តលក់ Mbappe ក្នុងរដូវក្ដៅនេះ មិនដូច្នោះទេនឹងត្រូវបាត់បង់កីឡាកររូបនេះទទេនៅឆ្នាំក្រោយ។
PSG ក៏បានចាប់ផ្ដើមដាក់សម្ពាធលើ Mbappe ដើម្បីឱ្យកីឡាករបារាំងរូបនេះប្រកាសចាកចេញដោយខ្លួនឯង ក្នុងបំណងរកលេសដើម្បីចៀសវាងកាតព្វកិច្ចត្រូវផ្ដល់ប្រាក់រង្វាន់ទៅតាមកិច្ចព្រមព្រៀង។ ប៉ុន្តែ Mbappe នៅតែបញ្ចេញស្នាមញញឹម និងហាត់ជាមួយក្រុមវ័យក្មេងនៅបារីសដោយការរីករាយ និងមិនបញ្ចេញសញ្ញាណាមួយទាក់ទងនឹងអនាគត។
ការប្រឹងប្រែងលក់ Mbappe របស់ PSG កំពុងប្រឈមនឹងបញ្ហាធំ ដោយសារតែការកំណត់តម្លៃទាបបំផុតត្រឹម 200 លានដុល្លារអាម៉េរិក ខណៈក្លឹប Real មិនចង់ចំណាយប្រាក់ច្រើន។
ក្លឹប Al Hilal សុខចិត្តចំណាយ 330 លានដុល្លារដើម្បីទិញ Mbappe ពី PSG និងប្រាក់បៀវត្សរ៍ 775 លានដុល្លារសម្រាប់ Mbappe ក្នុងរដូវកាល 2023-2024 ព្រមទាំងអនុញ្ញាតឱ្យកីឡាកររូបនេះទៅទាត់ឱ្យ Real នៅរដូវក្ដៅឆ្នាំ 2024។ ក៏ប៉ុន្តែ Mbappe មិនចង់ទៅរស់នៅអារ៉ាប៊ីសាអូឌីត។ Liverpool គឺជាជម្រើសទីបីរបស់ PSG។ PSG ត្រៀមខ្លួនរួចហើយសម្រាប់ការលក់ Mbappe ទៅឱ្យ Liverpool ក្នុងតម្លៃទាបជាងការទាមទារដំបូង។ ប៉ុន្តែ Mbappe នៅតែមិនព្រម ដោយសារតែមិនចង់ទាត់ឱ្យក្លឹបដែលមិនមានសំបុត្រចូលរួមប្រកួតនៅ Champions League នៅរដូវកាលក្រោយ។
បើមិនព្រមចាកចេញនៅរដូវក្ដៅនេះទេ Mbappe អាចនឹងត្រូវ PSG បង្ខំឱ្យធ្វើជាកីឡាករបម្រុងពេញមួយរដូវកាល 2023-2024។ បើសិនជារឿងនេះកើតឡើងមែន វាអាចជារឿងអាក្រក់សម្រាប់ Mbappe។ Mbappe ត្រូវការការប្រកួតបន្តដើម្បីរក្សាឥទ្ធិពលសម្រាប់ទាត់នៅ Euro 2024។ កីឡាករខ្សែប្រយុទ្ធរូបនេះកំពុងកាន់កាប់គ្រាប់បាល់ឈ្នះចំនួន 40 ក្រោយពីបានចូលរួមទាត់ 70 ប្រកួត សម្រាប់ក្រុមជម្រើសជាតិបារាំង ទន្ទឹមនឹងកំណត់ត្រា 212 គ្រាប់ក្នុង 260 ប្រកួត សម្រាប់ក្លឹប PSG។
Mbappe ចូលរួមជាមួយ PSG កាលពីឆ្នាំ 2017 ទៅតាមកិច្ចព្រមព្រៀងខ្ចីពីក្លឹប AS Monaco នៅប្រទេសម៉ូណាកូ៕
August 1, 2023
មហាក្សត្រនៃប្រទេសម៉ូណាកូ បានឆ្លងវីរុស COVID-19
ព្រះអង្គម្ចាស់ Albert II នៃប្រទេសម៉ូណាកូ (Monaco) ព្រះជន្ម 62វស្សា បានឆ្លងមេរោគ COVID-19 ក្លាយជាអ្នកដឹកនាំកំពូលដំបូងរបស់ពិភពលោក ផ្ទុកមេរោគកូរ៉ូណានេះ។
រាជវាំងម៉ូណាកូ ថ្ងៃនេះបានប្រកាសថា ព្រះអង្គម្ចាស់ Albert II ត្រូវបានធ្វើតេស្តកាលពីដើមសប្ដាហ៍នេះ ហើយលទ្ធផលថ្មីៗនេះ បានបង្ហាញថា ទ្រង់មានផ្ទុកមេរោគ COVID-19។ ព្រះអង្គម្ចាស់ព្រះជន្ម 62វស្សានេះ គឺជាមេដឹកនាំប្រទេសដំបូងគេក្នុងលោក ដែលបានឆ្លងវីរុស COVID-19។
យោងតាមសេចក្ដីប្រកាសរបស់ព្រះមរមរាជវាំងម៉ូណាកូ ទ្រង់ Albert II បច្ចុប្បន្ន នៅមានសុខភាពធម្មតា ហើយទ្រង់ក៏នៅតែធ្វើការក្នុងបន្ទប់ដោយឡែកក្នុងរាជវាំង។ ប៉ុន្តែ ទ្រង់ក៏កំពុងទទួលការព្យាបាល និងតាមដានពីក្រុមវេជ្ជបណ្ឌិតផងដែរ។
ព្រះអង្គម្ចាស់ Albert បានឡើងគ្រងរាជ្យ ចាប់ពីឆ្នាំ2005 បន្ទាប់ពីបិតាទ្រង់បានសោយទិវង្គត។ ទ្រង់ក៏បានអំពាវនាវឱ្យពលរដ្ឋ 39.000នាក់របស់ទ្រង់ គោរពតាមវិធានការនានារបស់រដ្ឋ ដើម្បីទប់ស្កាត់ការឆ្លងវីរុសកូរ៉ូណា។ បច្ចុប្បន្ន គេមិនទាន់ដឹងថា មហេសីរបស់ទ្រង់ ឆ្លងវីរុសនេះដែរ ឬទេនៅឡើយ។ នាយករដ្ឋមន្ត្រីម៉ូណាកូ លោក Serge Telle កាលពី3ថ្ងៃមុនក៏ត្រូវបានប្រកាសថា បានឆ្លងមេរោគ COVID-19 នេះដែរ។
COVID-19 បានបង្ហាញខ្លួននៅក្នុងប្រទេស និងដែនដីចំនួន 176 នៅទូទាំងពិភពលោក ធ្វើឱ្យមនុស្សជាង 227,000នាក់បានឆ្លងរោគ និងជាង 9,300នាក់បានស្លាប់។
គិតត្រឹមថ្ងៃនេះ ប្រទេសម៉ូណាកូ មានអ្នកឆ្លងរោគ COVID-19 ចំនួន9នាក់។ មេដឹកនាំប្រទេសនេះ បានស្នើឱ្យបិទទីតាំងសាធារណៈនានា ចាប់ពីថ្ងៃទី21មីនាខាងមុខ ដើម្បីបញ្ចៀសការឆ្លងរាលដាលបន្ត៕
ប្រភព៖ សារព័ត៌មានបរទេស
March 20, 2020
ក្លិប Monaco បញ្ជាក់ថា មិនមានការព្រមព្រៀងគ្នាជាមួយ Real សម្រាប់ Mbappe ឡើយ
ក្លិប Monaco បានបញ្ជាក់កាលពីថ្ងៃពុធថា មិនមានការព្រមព្រៀងគ្នាណាមួយជាមួយនឹងក្លិប Real Madrid ត្រូវបានឈានដល់ទីបញ្ចប់ សម្រាប់ការលក់ខ្សែប្រយុទ្ធអន្តរជាតិបារាំង Kylian Mbappe ឡើយ។
លោក Vadim Vasilyev អនុប្រធានក្លិប Monaco បានបញ្ជាក់ក្នុងសន្និសីទសារព័ត៌មានមួយថា ក្លិបនេះ កំពុងតែធ្វើការពិភាក្សាជាមួយនឹង Mbappe ជុំវិញការបន្តកុងត្រាថ្មីមួយ។
ខ្សែប្រយុទ្ធដ៏ឆ្នើមវ័យ18ឆ្នាំរូបនេះកំពុងតែក្លាយជាប្រធានបទនៃពាក្យចចាមអារ៉ាមផ្សេងៗទាក់ទងនឹងរូបគេចំពោះការផ្ទេរក្នុងតម្លៃខ្លួន180លានអឺរ៉ូ (ស្មើនឹង211.4លានដុល្លារអាមេរិក) ខណៈដែលកាសែតកីឡាប្រចាំថ្ងៃរបស់អេស្ប៉ាញ Marca បានចេញផ្សាយកាលពីថ្ងៃអង្គារថា តម្លៃខ្លួនមួយត្រូវបានព្រមព្រៀងរវាងក្លិប Real និង Monaco ដែលជាម្ចាស់ជើងឯកក្របខ័ណ្ឌ Ligue 1។ លោក Vasilyev បានឲ្យដឹងថា៖ «ខ្ញុំបានអានព័ត៌មានជាច្រើននៅលើកាសែត។ មកទល់ពេលនេះ យើងមិនទាន់បានចុះកិច្ចព្រមព្រៀងគ្នាណាមួយជាមួយនឹងក្លិប Real ឬក៏ក្លិបផ្សេងឡើយ។
រាល់ក្លិបធំៗទាំងអស់ ចង់បានរូបគេ ព្រោះរូបគេជាកីឡាករដ៏អស្ចារ្យម្នាក់ក្នុងកីឡាបាល់ទាត់អឺរ៉ុប»។ លោក Vasilyev បានបន្ថែមទៀតថា៖ «យើងកំពុងតែស្ថិតក្នុងការពិភាក្សាផ្សេងៗជុំវិញការបន្តកុងត្រាជាមួយនឹង Kylian ហើយយើងសង្ឃឹមថា នឹងឈានដល់ការព្រមព្រៀងគ្នាមួយ»។ Mbappe បានបង្កើតឲ្យមានការចាប់អារម្មណ៍ផ្សេងៗកាលពីរដូវកាលមុន ខណៈដែលរូបគេបានជួយឲ្យក្រុមរបស់លោក Leonardo Jardim ឈ្នះពានក្របខ័ណ្ឌលីករបស់បារាំងជាលើកទី1 បើគិតចាប់តាំងពីឆ្នាំ2000មក និងបានឈានទៅប្រកួតក្របខ័ណ្ឌ Champions League ដល់វគ្គពាក់កណ្តាលផ្តាច់ព្រ័ត្រទៀត។ ខ្សែប្រយុទ្ធរូបនេះបានស៊ុតបាល់បញ្ចូលទី15គ្រាប់ក្នុងក្របខ័ណ្ឌ Ligue 1 និងបានរកគ្រាប់បាល់បញ្ចូលទី6គ្រាប់ក្នុងក្របខ័ណ្ឌ Champions League៕
ប្រភពពី៖ Sport24
July 27, 2017
Mendy បំពេញការផ្ទេរជាផ្លូវការពី Monaco ទៅកាន់ Man City
ខ្សែការពារ Benjamin Mendy កាលពីថ្ងៃចន្ទ បានចុះហត្ថលេខារយៈពេល5ឆ្នាំជាមួយនឹងក្លិប Manchester City ក្រោយពីបំពេញការផ្ទេរជាផ្លូវការពីក្លិប Monaco ដើម្បីធ្វើឲ្យរូបគេក្លាយជាខ្សែការពារមានតម្លៃខ្លួនខ្ពស់ជាងគេបំផុតក្នុងពិភពលោក។
កីឡាករវ័យ 23ឆ្នាំរូបនេះ ដែលបានចូលរួមជាមួយនឹងក្រុមម្ចាស់ជើងឯករបស់បារាំងដោយចេញពីក្លិប Marseille ក្នុងតម្លៃខ្លួន11លានផោនពីរដូវក្តៅមុននោះ បានយល់ព្រមទៅលើការផ្ទេរមួយដែលមានតម្លៃខ្លួន 52លានផោន (ស្មើនឹង 67លានដុល្លារអាមេរិក)។ ខ្សែការពារអន្តរជាតិបារាំងរូបនេះ នឹងចូលរួមជាមួយនឹងមិត្តរួមក្រុមថ្មីរបស់គេនៅលើទឹកដីសហរដ្ឋអាមេរិក ខណៈដែលក្រុម Man City របស់លោក Pep Guardiola កំពុងតែរៀបចំសម្រាប់ការប្រកួតមិត្តភាពជាលើកទី2 របស់ពួកគេ នៅពេលជួបក្រុម Real Madrid ក្នុងទីក្រុង Los Angeles។
Mendy បានឲ្យដឹងថា៖ «ខ្ញុំពិតជារីករាយណាស់ក្នុងការបានចូលរួមជាមួយនឹងក្លិប Manchester City។ ពួកគេជាក្លិបមួយក្នុងចំណោមក្លិបកំពុងនាំមុខនៅតំបន់អឺរ៉ុប ហើយជាមួយនឹងការមានលោក Pep Guardiola ពួកគេមានអ្នកចាត់ការទូទៅម្នាក់ដែលមានការប្តេជ្ញាចិត្តក្នុងការលេងកីឡាបាល់ទាត់បែបវាយសម្រុក។ ខ្ញុំជឿជាក់ថា នៅរយៈពេលប៉ុន្មានឆ្នាំបន្ទាប់ទៅទៀតនេះ យើងនឹងទទួលជោគជ័យ»។
ការផ្ទេរនេះមានន័យថា Man City បានចំណាយប្រាក់ច្រើនជាង200លានផោនសម្រាប់កីឡាករថ្មីៗនៅរដូវក្តៅនេះ ក្រោយពីបាននាំយកខ្សែការពារស្លាបឆ្វេង Danilo ពីក្លិប Real Madrid ក្នុងតម្លៃខ្លួន26.5លានផោន ខ្សែការពារ Kyle Walker ក្នុងតម្លៃខ្លួន45លានផោន ខ្សែបម្រើ Bernardo Silva ក្នុងតម្លៃខ្លួន43.6លានផោន និងអ្នកចាំទី Ederson ក្នុងតម្លៃខ្លួន34.9លានផោន៕
ប្រភពពី៖ Sports.yahoo
July 25, 2017
Silva ចេញពីក្លិប Monaco ទៅចូលរួមជាមួយ Man City ក្នុងតម្លៃខ្លួន៤៣,៦លានផោន
ក្លិប Manchester City បានចុះហត្ថលេខាជាមួយនឹងកីឡាករ Bernardo Silva ពីក្លិប Monaco របស់បារាំងក្នុងតម្លៃខ្លួន៤៣,៦លានផោន (ស្មើនឹង៥៥,៨លានដុល្លារអាមេរិក)។ ខ្សែបម្រើដ៏មានឥទ្ធិពលរូបនេះបានយល់ព្រមចុះកិច្ចសន្យារយៈពេល៥ឆ្នាំជាមួយនឹងក្លិប Man City របស់ក្របខ័ណ្ឌ Premier League ខណៈដែលក្រុមរបស់លោក Pep Guardiola ចាប់ផ្តើមជះទឹកប្រាក់ ក្រោយពីពួកគេមិនបានឈ្នះពានអ្វីសោះក្នុងរដូវកាលទើបតែបញ្ចប់នាពេលថ្មីៗនេះ។ គ្រូបង្វឹកសញ្ជាតិអេស្ប៉ាញរូបនេះ បានចាប់ផ្តើមឈានជើងចូលទៅក្នុងទីផ្សារទិញលក់កីឡាករភ្លាមៗនៅរដូវក្តៅនេះ ក្រោយពីក្រុមរបស់លោកបានបញ្ចប់ត្រឹមចំណាត់ថ្នាក់លេខ៣ នៅលើតារាង Premier League និងមិនអាចធ្វើការប្រជែងដណ្តើមពានក្នុងស្រុកពីរផ្សេងទៀត និងក្នុងក្របខ័ណ្ឌ Champions Leagueបាន។
លោក Guardiola បានចាត់ទុកខ្សែបម្រើរបស់ក្លិប Monaco វ័យ២២ឆ្នាំរូបនេះ ជាគោលដៅមួយក្នុងចំណោមគោលដៅអាទិភាពរបស់លោក ហើយក្លិបទាំងពីរបានឈានដល់ការព្រមព្រៀងគ្នាកាលពីថ្ងៃសុក្រ ខណៈដែល Silva បានធ្វើដំណើរទៅកាន់ទីក្រុង Manchester ដើម្បីពិនិត្យសុខភាព។ Silva ដែលនឹងបានពាក់អាវលេខ២០រូបនេះ បានប្រាប់គេហទំព័ររបស់ Man City ថា៖ «ខ្ញុំមានអារម្មណ៍ថាពិតជាអស្ចារ្យណាស់។ និយាយឲ្យត្រង់ទៅ ខ្ញុំបច្ចុប្បន្នកំពុងតែស្ថិតក្នុងក្រុមមួយក្នុងចំណោមក្រុមដ៏ខ្លាំងបំផុតក្នុងពិភពលោក។ ក្នុងការចូលរួមជាមួយនឹងក្រុមនេះ និងក្នុងការមានឱកាសនេះ វាពិតជាអស្ចារ្យណាស់»។ ខ្សែបម្រើរូបនេះបានបន្ថែមទៀតថា៖ «ខ្ញុំពិតជារីករាយណាស់ក្នុងការក្លាយជាសមាជិករបស់ក្រុម Man City ហើយខ្ញុំកំពុងតែស្រេកឃ្លានក្នុងការប្រឹងឲ្យអស់ពីសមត្ថភាពរបស់ខ្ញុំក្នុងការជួយឲ្យក្រុមនេះឈានដល់គោលដៅរបស់ពួកគេ។ ពិតណាស់ នៅពេលដែលអ្នកមានឱកាសក្នុងការហ្វឹកហាត់ក្រោមការដឹកនាំរបស់លោក Guardiola អ្នកមិនអាចនិយាយថា ទេបានឡើយ។ គាត់គឺជាគ្រូបង្វឹកម្នាក់ក្នុងចំណោមគ្រូបង្វឹកដ៏ឆ្នើមបំផុត»៕
ប្រភពពី៖ The Guardian

May 27, 2017
Monaco ផ្តួល Man Utd ក្នុងការដណ្តើមចុះហត្ថលេខាជាមួយ Tielemans ក្នុងតម្លៃខ្លួន ២៥លានអឺរ៉ូ
ក្លិបយក្សរបស់បារាំង Monaco បានទទួលជ័យជម្នះក្នុងការប្រជែងជាមួយនឹងក្លិបធំៗនៅអឺរ៉ុប ដើម្បីបានចុះហត្ថលេខាជាមួយនឹងខ្សែបម្រើដ៏មានទេពកោសល្យ Youri Tielemans ពីក្លិប Anderlecht របស់បែលហ្ស៊ិក ក្នុងតម្លៃខ្លួន២៥លានអឺរ៉ូ (ស្មើនឹង ២៨លានដុល្លារអាមេរិក)។
ខ្សែបម្រើវ័យ២០ឆ្នាំរូបនេះ ដែលបានបង្ហាញខ្លួនឲ្យក្រុមជម្រើសជាតិបែលហ្ស៊ិករួចជាស្រេចហើយនោះ បានបង្កើតឲ្យមានការចាប់អារម្មណ៍ផ្សេងៗពីសំណាក់ក្លិបធំៗជាច្រើន ក្នុងនោះមានទាំងក្លិប Manchester City និង Manchester United របស់ក្របខ័ណ្ឌ Premier League ផងដែរ។ ប៉ុន្តែរូបគេបានជ្រើសរើសយកក្រុម Monaco ដែលបានឈានទៅប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរដូវកាលនេះ និងបានចុះហត្ថលេខាលើកុងត្រាមួយដែលមានសុពលភាពរយៈពេល៥ឆ្នាំជាមួយនឹងក្រុមម្ចាស់ជើងឯករបស់បារាំងមួយនេះ។
Tielemans បានប្រាប់គេហទំព័ររបស់ក្លិបថ្មីរបស់គេថា៖ «Monaco គឺជាក្លិបមួយដែលមានគម្រោងដ៏ធំមួយ មានការរៀបចំល្អក្នុងក្របខ័ណ្ឌអឺរ៉ុប និងពឹងផ្អែកទៅលើកីឡាករវ័យក្មេងជាច្រើន»។ ខ្សែបម្រើរូបនេះបានបន្ថែមទៀតថា៖ «ខ្ញុំពិតជារីករាយណាស់ក្នុងការមកទីនេះ ពេលនេះខ្ញុំនឹងប្រឹងឲ្យអស់ពីសមត្ថភាពក្នុងការវិវឌ្ឍនៅទីនេះ និងតបស្នងនូវការជឿជាក់ដែលក្លិបនេះបានប្រគល់មកឱ្យខ្ញុំ»។
Tielemans បានស៊ុតបាល់បញ្ចូលទី១៣គ្រាប់ក្នុងការប្រកួតលីកក្នុងប្រទេសបែលហ្ស៊ិកសម្រាប់ក្រុម Anderlecht នារដូវកាលនេះ និងបានក្លាយជាកីឡាករដ៏សំខាន់ម្នាក់ ខណៈដែល Anderlecht បានឈានទៅប្រកួតវគ្គ៨ក្រុមចុងក្រោយនៃក្របខ័ណ្ឌ Europa League មុននឹងចាញ់ក្រុម Manchester United៕
ប្រភពពី៖ The Independent
May 25, 2017
Mbappe ជួយឲ្យ Monaco លើកពាន Ligue 1 ជាលើកទី១ក្នុងរយៈពេល១៧ឆ្នាំ
ខ្សែប្រយុទ្ធអន្តរជាតិបារាំងដ៏ឆ្នើម Kylian Mbappe បានរកគ្រាប់បាល់បញ្ចូលទីយ៉ាងល្អម្តងទៀត ដែលបានធ្វើឱ្យក្រុម Monaco បានលើកពានក្របខ័ណ្ឌបារាំង Ligue 1 ជាលើកទី១របស់ពួកគេក្នុងរយៈពេល១៧ឆ្នាំ ក្រោយពីបានយកឈ្នះលើក្រុម St-Etienne ក្នុងលទ្ធផល ២-០ កាលពីថ្ងៃពុធម្សិលមិញ។

តារាបាល់ទាត់ឆ្នើមវ័យក្មេងរូបនេះ បានអូសបាល់ផុតខ្សែការពារយ៉ាងច្រើន មុននឹងស៊ុតបាល់ផុតដៃអ្នកចាំទី Stephane Ruffier នៃក្រុម St Etienne បំប៉ោងសំណាញ់ ដើម្បីទទួលបានគ្រាប់បាល់បើកឆាក។ ខ្សែបម្រើ Valere Germain បានបន្ថែមគ្រាប់បាល់ទី២ នៅនាទីទី៩៣ ដែលធ្វើឲ្យកីឡដ្ឋាន Stade Louis II ទាំងមូលស្ថិតក្នុងការអបអរយ៉ាងខ្លាំងក្លា។
ជ័យជម្នះនេះមានន័យថា ក្រុម Monaco អាចធ្វើការអបអរការឈ្នះពាន Ligue 1 ជាលើកទី១របស់ពួកគេបានតែម្តង បើគិតចាប់តាំងពីរដូវកាលឆ្នាំ១៩៩៩-២០០០មក ហើយអ្នកគាំទ្រជាច្រើននឹកឆ្ងល់ថា តើនោះជាគ្រាប់បាល់លើកចុងក្រោយរបស់ Mbappe វ័យ១៨ឆ្នាំសម្រាប់ក្លិបនេះឬយ៉ាងណា? ។
ខណៈដែលនៅសល់មួយប្រកួតទៀតដែលត្រូវលេងនៅចុងសប្តាហ៍នេះ ក្រុម Monaco បាននាំមុខរហូតដល់ទៅ៦ពិន្ទុដាច់លើក្រុមឈរលើលេខរៀងទី២ Paris Saint-Germain ដែលជាក្រុមការពារតំណែងជើងឯក។
ជាមួយនឹងការមិនស្គាល់ចាញ់សោះ ក្នុងការប្រកួតក្របខ័ណ្ឌលីកក្នុងឆ្នាំ២០១៧ Monaco ថែមទាំងបានរកគ្រាប់បាល់បញ្ចូលទីបានរាល់ការប្រកួតលីកទាំង ៣១លើកចុងក្រោយរបស់ពួកគេទៀតផង ដែលនេះជាកំណត់ត្រាថ្មីមួយអំឡុងរដូវកាលមួយ។ ខ្សែប្រយុទ្ធ Radamel Falcao របស់ក្លិប Monaco បានប្រាប់ទូរទស្សន៍ Canal+ ថា៖ «ទីបំផុតយើងអាចនិយាយបានថា យើងគឺជាម្ចាស់ជើងឯកហើយ ខ្ញុំពិតជាមានមោទនភាពចំពោះក្រុមនេះ និងកីឡាករទាំងអស់នេះខ្លាំងណាស់។ វាជាសុបិនមួយសម្រាប់ខ្ញុំ ខ្ញុំពិតជារីករាយមែនទែន»៕
https://www.youtube.com/watch?v=83ZRvZErW5g
ប្រភពពី៖ The Sun
May 18, 2017
Monaco ស្រេកឃ្លានលើកពាន Ligue 1 ពេលប៉ះ St Etienne នៅរាត្រីនេះ
លោក Leonardo Jardim គ្រូបង្វឹករបស់ Monaco បានធ្វើការព្រមានដល់ក្រុមរបស់លោកប្រឆាំងនឹងការខ្វះនូវការផ្តោតអារម្មណ៍ផ្សេងៗ នៅពេលដែលពួកគេត្រូវធ្វើជាម្ចាស់ផ្ទះទទួលក្រុម St Etienne នៅរាត្រីនេះខណៈដែលពួកគេកំពុងសម្លឹងរកការលើកពាន Ligue 1 នៅរដូវកាលនេះ។
ក្រុម Monaco ត្រូវការត្រឹមតែ១ពិន្ទុប៉ុណ្ណោះពីការប្រកួត២លើកចុងក្រោយរបស់ពួកគេដើម្បីឈ្នះពានក្របខ័ណ្ឌកំពូលរបស់បារាំងជាលើកទី១ បើគិតចាប់តាំងពីឆ្នាំ២០០០មក ស្របពេលដែលពួកគេកំពុងតែនាំមុខ៣ពិន្ទុដាច់លើក្រុមឈរលេខ២ Paris Saint-Germain ដែលនៅសល់ត្រឹមតែ១ប្រកួតទៀតប៉ុណ្ណោះ។ វាបានក្លាយជាសប្តាហ៍ដ៏ជោគជ័យមួយសម្រាប់ក្លិបមួយនេះ នៅពេលដែលលោក Jardim បានឈ្នះពានអ្នកចាត់ការទូទៅឆ្នើមប្រចាំឆ្នាំក្នុងក្របខ័ណ្ឌ Ligue 1 ស្របពេលដែល Danijel Subasic និងខ្សែប្រយុទ្ធ Kylian Mbappe ក៏បានឈ្នះពានអ្នកចាំទីឆ្នើម និងកីឡាករវ័យក្មេងឆ្នើមបំផុតប្រចាំឆ្នាំរៀងៗខ្លួនដែរនៅក្នុងកម្មវិធីប្រគល់រង្វាន់កាលពីល្ងាចថ្ងៃអាទិត្យ។ ស្របពេលជាមួយគ្នានេះដែរ ក្រុម Monaco ក៏កំពុងតែស្ថិតយ៉ាងប្រកៀកក្នុងការឈ្នះពាន Ligue 1 ផងដែរ។ ប៉ុន្តែ ទោះបីជាយ៉ាងណា លោក Jardim ចង់ឲ្យកីឡាកររបស់លោកបំភ្លេចចោលនូវបរិយាកាសរីករាយជុំវិញខ្លួន និងផ្តោតអារម្មណ៍ទៅលើការប្រកួតនៅរាត្រីនេះឱ្យដូចការប្រកួតផ្សេងៗទៀតដែរ។
គ្រូបង្វឹករូបនេះបានប្រាប់អ្នកយកព័ត៌មានក្នុងសន្និសីទសារព័ត៌មានមុនការប្រកួតថា៖ «យើងត្រូវតែលេងដូចធម្មតាជាមួយនឹងមហិច្ឆតា និងឥរិយាបថដូចពេលមុន។ យើងនឹងមិនលេងដោយចង់បញ្ចប់ក្នុងលទ្ធផលស្មើឡើយ។ គោលបំណងរបស់យើងគឺការធ្វើឲ្យក្រុមនេះទទួលបានលទ្ធផលដ៏ល្អបំផុត និងស្ថិតនៅឲ្យឆ្ងាយពីឥរិយាបថរីករាយផ្សេងៗសិន»។
ក្រុម Monaco នឹងឈានទៅកាន់ការប្រកួតនេះប្រកបដោយការជឿជាក់ ខណៈដែលពួកគេបានឈ្នះ៥លើកពីការប្រកួតក្នុងលីកលើទឹកដីខ្លួនឯងទាំង៥លើកចុងក្រោយរបស់ពួកគេ ខណៈ St Etienne ឈ្នះតែ២លើកគត់ពីការប្រកួតក្រៅទឹកដី៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺរាត្រីថ្ងៃនេះ៕
ប្រភពពី៖ ESPN

May 17, 2017
Monaco ជឿជាក់ខ្ពស់ មុនពេលប៉ះ Juventusនៅរាត្រីនេះ
លោក Leonardo Jardimដែលជាគ្រូបង្វឹក កំពុងតែលើកទឹកចិត្តឲ្យក្រុម Monaco មានការជឿជាក់ នៅមុនពេលពួកគេត្រូវប្រឈមមុខនឹងការងារដ៏លំបាកមួយក្នុងទីក្រុង Turin ជាកន្លែងដែលពួកគេត្រូវប៉ះជាមួយនឹងក្រុមសេះបង្កង់ Juventus។
បើទោះបីជាដេញតាមពីក្រោយក្នុងលទ្ធផល ២-០ ពីការប្រកួតជើងទី១កាលពីសប្តាហ៍មុនក៏ដោយ ប៉ុន្តែ ក្រុមកំពុងនាំមុខលើតារាងក្របខ័ណ្ឌ Ligue 1 មួយនេះ នៅតែមានការជឿជាក់ ខណៈដែលពួកគេកំពុងតែផ្តោតទៅលើការប្រកួតរបស់ពួកគេក្នុងក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី២ នៅរាត្រីនេះ។ លោក Jardimគ្រូបង្វឹករបស់ Monaco បានឲ្យដឹងថា៖ «យើងត្រូវតែរក្សានូវការជឿជាក់ ត្រូវខិតខំលេងក្នុងការប្រកួតរបស់យើង និងបង្ហាញទម្រង់លេងឲ្យបានល្អ។ ប្រសិនបើយើងអាចរកគ្រាប់បាល់បញ្ចូលទីក្នុងពេលចាប់ផ្តើមប្រកួត អ្វីៗអាចនឹងមានការផ្លាស់ប្តូរ»។ គ្រូបង្វឹករូបនេះបានប្រាប់បន្តថា៖ «យើងនឹងត្រូវតែវាយសម្រុកជាមួយនឹងស្មារតីដោយគ្មានសម្ពាធ។ ក្នុងជើងទី១ យើងមានចំនួននៃការស៊ុតបាល់សំដៅទីដូចក្រុម Juventusដែរ ប៉ុន្តែ ពួកគេមានភាពមុតស្រួចជាង។ ពិតណាស់ ពួកគេមានភាពចាស់ទុំជាងយើង ហើយយើងបានទទួលបរាជ័យ ដោយសារតែយើងមិនទទួលបានប្រយោជន៍ពីឱកាសក្នុងការស៊ុតបញ្ចូលទីរបស់យើង»។
លោក Jardimបានបន្ថែមទៀតថា៖ «យើងត្រូវតែរក្សាការធ្វើឲ្យមានក្តីសង្ឃឹម ហើយគោលបំណងរបស់យើងគឺការឈានទៅដល់វគ្គផ្តាច់ព្រ័ត្រ។ ខ្ញុំពិតជាមានមោទនភាពចំពោះកីឡាកររបស់ខ្ញុំ និងអ្វីដែលពួកគេបានធ្វើនៅពេលនេះខ្លាំងណាស់ ទោះបីជាលទ្ធផលនៅយប់ថ្ងៃអង្គារនេះចេញមកបែបណាក៏ដោយ»។ ក្រុម Juventusបានបង្ហាញពីភាពរឹងមាំក្នុងតំបន់ការពារដ៏គួរឲ្យកត់សម្គាល់ ខណៈដែលពួកគេបានធ្វើការរាំងខ្ទប់ទាំងស្រុងទៅលើតំបន់ប្រយុទ្ធរបស់ Monaco ពិសេសពួកគេបានទម្លាក់ក្រុម Barcelona កាលពីជុំមុនរួចស្រេចទៅហើយ តាមរយៈការមិនបណ្តោយឲ្យ Lionel Messiនិងមិត្តរួមក្រុមរបស់គេ រកគ្រាប់បាល់បញ្ចូលទីបានសូម្បីតែមួយគ្រាប់។ Juventusបានបណ្តោយឲ្យមានគ្រាប់បាល់ចូលទីចំនួន២គ្រាប់ប៉ុណ្ណោះ ក្នុងការប្រកួត៥លើកក្នុងចំណោមការប្រកួត១៥លើកចុងក្រោយក្នុងយុទ្ធនាការនេះ។ ក្រុមសេះបង្កង់មួយនេះ ក៏មិនទាន់ស្គាល់ចាញ់ផងដែរក្នុងការប្រកួតលើទឹកដីខ្លួនឯងក្នុងរយៈពេល ២០ខែកន្លងមកនេះ ខណៈដែលពួកគេរបូតគ្រាប់បាល់ត្រឹមតែ២គ្រាប់គត់ក្នុងការប្រកួតក្របខ័ណ្ឌ Champions League ចំនួន១១លើក។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺយប់នេះ៕
ប្រភពពី៖ The Guardian
May 9, 2017
Higuain រកបាន២គ្រាប់ ខណៈ Juventus បោះជំហានដ៏ធំឆ្ពោះទៅវគ្គផ្តាច់ព្រ័ត្រ
ក្រុមសេះបង្កង់ Juventus បានបោះជំហានដ៏ធំមួយឆ្ពោះទៅកាន់វគ្គផ្តាច់ព្រ័ត្រនៃក្របខ័ណ្ឌ Champions League ខណៈដែលខ្សែប្រយុទ្ធ Gonzalo Higuain បានស៊ុតបាល់បញ្ចូលទី២គ្រាប់ដើម្បីជួយឲ្យពួកគេកត់ត្រាជ័យជម្នះក្នុងលទ្ធផល ២-០ លើក្រុម Monaco កាលពីថ្ងៃពុធ។
ក្រុមម្ចាស់ជើងឯករបស់អ៊ីតាលីមួយនេះ បានផ្តួលក្រុម Barcelona ក្នុងវគ្គ៨ក្រុមចុងក្រោយ និងបានបង្ហាញពីទម្រង់លេងយ៉ាងល្អដើម្បីផ្តួលគូប្រជែងដ៏ខ្លាំងរបស់ពួកគេ នៅមុនពេលការប្រកួតជើងទី២ ក្នុងទីក្រុង Turin នាថ្ងៃអង្គារ សប្តាហ៍ក្រោយ។ Higuain បានក្លាយជាវីរបុរសសម្រាប់ក្រុមរបស់លោក Massimiliano Allegri តាមរយៈការស៊ុតបាល់បញ្ចូលទីក្នុងតង់ទីនីមួយៗ។ គ្រាប់បាល់ទីមួយរបស់គេបានកើតឡើង ក្រោយពីការបញ្ជូនបាល់យ៉ាងល្អ ខណៈដែលខ្សែបម្រើ Dani Alves បានបោះបាល់ទៅឲ្យខ្សែប្រយុទ្ធអន្តរជាតិអាហ្សង់ទីនរូបនេះជាមួយនឹងការឆ្កិះដោយកែងជើងរបស់គេ។ បន្ទាប់មកខ្សែបម្រើអន្តរជាតិប្រេស៊ីលរូបនេះ បានបញ្ជូនបាល់ទៅឲ្យ Higuain យ៉ាងល្អម្តងទៀត ដើម្បីរកគ្រាប់បាល់ទី២ ក្រោយពី Higuain បានស៊ុតបាល់បំប៉ោងសំណាញ់ទី។
ក្រុម Monaco បានធ្វើការវាយបកយ៉ាងខ្លាំងដើម្បីរកគ្រាប់បាល់បញ្ចូលទីវិញ ប៉ុន្តែ មិនអាចទម្លុះតំបន់ការពារយ៉ាងរឹងមាំរបស់ក្រុម Juventus និងអ្នកចាំទីជើងចាស់ Gianluigi Buffon បានឡើយ។ ក្រោយពីមិនបញ្ចប់ការមិនអាចរកគ្រាប់បាល់បញ្ចូលទីសោះត្រឹម៧ប្រកួតក្នុងក្របខ័ណ្ឌ Champions League ខ្សែប្រយុទ្ធ Higuain បានឲ្យដឹងថា៖ «គ្រាប់បាល់មិនបានកើតឡើងសម្រាប់ខ្ញុំក្នុងយុទ្ធនាការនេះឡើយ ប៉ុន្តែ ខ្ញុំបានដឹងថា ខ្ញុំត្រូវតែរក្សាការស្ងប់អារម្មណ៍ និងរក្សាការធ្វើការយ៉ាងលំបាក»។ ខ្សែប្រយុទ្ធរូបនេះបានបន្ថែមទៀតថា៖ «យើងក៏ចង់ការពារមិនឲ្យមានគ្រាប់ចូលទីរបស់យើងមួយផ្សេងទៀតផងដែរ ហើយយើងពិតជាពេញចិត្តជាមួយនឹងលទ្ធផលនេះ»៕
https://www.youtube.com/watch?v=RjyWtkUUU2U
ប្រភពពី៖ Mirror
May 4, 2017