Tag: Mohamed Salah

  • Liverpool បំពេញការផ្ទេរ Salah ពីក្លិប Roma

    Liverpool បំពេញការផ្ទេរ Salah ពីក្លិប Roma

    ក្លិបហង្សក្រហម Liverpool បានបំពេញការផ្ទេរខ្សែបម្រើស្លាបអន្តរជាតិអេហ្ស៊ីប Mohamed Salah ពីក្លិប Roma ក្នុងតម្លៃខ្លួន 36.9លានផោន (ស្មើនឹង47លានដុល្លារអាមេរិក)។

    កីឡាករវ័យ 25ឆ្នាំរូបនេះ បានក្លាយជាគោលដៅទិញចូលជាយូរមកហើយ ខណៈដែល Liverpool បានបរាជ័យក្នុងការចុះហត្ថលេខាជាមួយនឹងរូបគេកាលពី 3ឆ្នាំមុន ដែលនៅពេលនោះ Salah បានចូលរួមជាមួយនឹងក្លិប Chelsea នៅមុនពេលជួបពេលវេលាដ៏ខកចិត្តមួយក្នុងក្របខ័ណ្ឌ Premier League។ ប៉ុន្តែទោះបីជាយ៉ាងណា ក្រោយពីបានបង្ហាញទម្រង់លេងដ៏គួរឲ្យចាប់អារម្មណ៍ក្នុងក្របខ័ណ្ឌ Serie A តាមរយៈការរកបាន 29គ្រាប់ ក្នុងការបង្ហាញខ្លួន 65លើក សម្រាប់ Roma លោក Jurgen Klopp អ្នកចាត់ការទូទៅរបស់ Liverpool ជឿជាក់ថា ខ្សែបម្រើស្លាបរូបនេះ បានធ្វើការអភិវឌ្ឍកាន់តែខ្លាំងជាងមុន ហើយល្បឿនដ៏អស្ចារ្យរបស់គេ នឹងជួយពង្រឹងក្នុងតំបន់ប្រយុទ្ធរបស់ក្រុមហង្សក្រហម។

    ក្នុងពេលនិយាយទៅកាន់គេហទំព័រ Liverpoolfc.com ខ្សែបម្រើស្លាប Salah បានឲ្យដឹងថា៖ «ខ្ញុំពិតជារំភើបណាស់ក្នុងការមកទីនេះ ខ្ញុំរីករាយណាស់»។ ខ្សែបម្រើស្លាបរូបនេះបានបន្ថែមទៀតថា៖ «ខ្ញុំនឹងខំប្រឹង 100ភាគរយ និងផ្តល់ឲ្យនូវរាល់អ្វីៗទាំងអស់សម្រាប់ក្លិបនេះ។ ខ្ញុំពិតជាចង់ឈ្នះពានសម្រាប់ក្លិបនេះខ្លាំងណាស់»។

    Salah បានបន្ថែមទៀតថា៖ «យើងមានក្រុមដ៏អស្ចារ្យមួយ និងកីឡាករឆ្នើមៗជាច្រើន។ ខ្ញុំបានទស្សនាការប្រកួតរបស់ពួកគេជាច្រើនកាលពីឆ្នាំមុន ហើយគ្រប់គ្នាពិតជាលេងបាន 100ភាគរយដើម្បីយកឈ្នះឱ្យខាងតែបាន។ គ្រប់គ្នាអាចមើលឃើញថា គ្រូបង្វឹកពិតជាខិតខំព្យាយាមយ៉ាងខ្លាំង។ ខ្ញុំសង្ឃឹមថា យើងអាចរួមគ្នាប្រឹងឲ្យអស់ពីសមត្ថភាពដើម្បីឈ្នះពានសម្រាប់ក្លិបនេះ សម្រាប់អ្នកគាំទ្រ និងសម្រាប់ខ្លួនយើងផ្ទាល់»៕
    ប្រភពព័ត៌មាន៖ The Guardian

  • Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    ខ្សែបម្រើស្លាបអន្តរជាតិអេហ្ស៊ីប Mohamed Salah នឹងក្លាយជាកីឡាករចំណូលថ្មីដំបូងគេរបស់លោក Jurgen Klopp ក្នុងរដូវក្តៅនេះ ខណៈដែលខ្សែបម្រើដ៏មានឥទ្ធិពលរូបនេះ បានធ្វើដំណើរទៅដល់ប្រទេសអង់គ្លេស ដើម្បីត្រួតពិនិត្យសុខភាពកាលពីថ្ងៃអង្គារ។

    Salah របស់ក្លិបអ៊ីតាលី Roma អាចនឹងក្លាយជាកីឡាករទីមួយក្នុងចំណោមកីឡាករចំណូលថ្មីទាំង 7នាក់ ដែលនឹងត្រូវទៅចូលរួមនៅកីឡដ្ឋាន Anfield ក្នុងការព្រមព្រៀងគ្នាមួយដែលមានតម្លៃខ្លួនជាបឋមចំនួន 35លានផោន (ស្មើនឹង 44.2លានដុល្លារអាមេរិក) បើទោះបីតម្លៃខ្លួននោះអាចនឹងកើនឡើង បើបូកទាំងប្រាក់ឧបត្ថម្ភផ្សេងៗក៏ដោយ។ ខ្សែបម្រើអន្តរជាតិអេហ្ស៊ីបវ័យ 24ឆ្នាំរូបនេះបានស៊ុតបាល់បញ្ចូលទី15គ្រាប់ និងបានជួយឲ្យមិត្តរួមក្រុមរកបាន 11គ្រាប់ផ្សេងទៀត ខណៈដែលក្រុម Roma បានបញ្ចប់ក្នុងចំណាត់ថ្នាក់លេខ 2ក្នុងក្របខ័ណ្ឌ Serie A នៅរដូវកាលនេះ ហើយការផ្ទេរនេះ នឹងធ្វើឲ្យរូបគេវិលទៅកាន់អង់គ្លេសវិញ ក្រោយពីបានចំណាយពេលមួយរយៈខ្លីក្នុងក្លិប Chelsea នៅចន្លោះឆ្នាំ2014 និងឆ្នាំ2016 ដោយកាលនោះរូបគេបានបង្ហាញខ្លួនត្រឹមតែ 19ប្រកួតប៉ុណ្ណោះ។

    Salah បានយល់ព្រមទៅលើការព្រមព្រៀងគ្នាមួយ ដែលនឹងធ្វើឲ្យរូបគេទទួលបានប្រាក់ចំណូលគុណនឹង 2ដងពោលគឺប្រមាណជា9ម៉ឺនផោន (ស្មើនឹង11.4ម៉ឺនដុល្លារអាមេរិក) ក្នុងមួយសប្តាហ៍។

    ខ្សែការពារ Virgil van Dijk របស់ក្លិប Southampton គឺជាគោលដៅទីមួយរបស់លោក Klopp ប៉ុន្តែ ក្រុមហង្សក្រហមបានបង្ខំចិត្តបោះបង់ការចាប់អារម្មណ៍របស់ពួកគេចោល ក្រោយពីក្លិប Southampton បានប្តឹងតវ៉ាប្រឆាំងនឹង Liverpool ទាក់ទងនឹងការដាក់សំណើមិនស្របច្បាប់៕
    ប្រភពពី៖ Independent

     

  • Liverpool បានយល់ព្រមលើលក្ខខណ្ឌផ្ទាល់ខ្លួនជាមួយ Salah ក្នុងតម្លៃខ្លួន 35លានផោន

    Liverpool បានយល់ព្រមលើលក្ខខណ្ឌផ្ទាល់ខ្លួនជាមួយ Salah ក្នុងតម្លៃខ្លួន 35លានផោន

    ក្លិបហង្សក្រហម Liverpool កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែបម្រើស្លាបអន្តរជាតិអេហ្ស៊ីប Mohamed Salah ក្រោយពីពួកគេបានយល់ព្រមលើលក្ខខណ្ឌផ្ទាល់ខ្លួនផ្សេងៗ ខណៈដែលពួកគេបានយល់ព្រមលើតម្លៃខ្លួន 35លានផោន (ស្មើនឹង 45លានដុល្លារអាមេរិក) ជាមួយនឹងក្លិប Roma ហើយ។

    វាត្រូវបានគេមើលឃើញថា Salah បានជួបជាមួយនឹងលោក Jurgen Klopp ក្នុងទីក្រុង Liverpool ក្នុងរយៈពេលប៉ុន្មានថ្ងៃចុងក្រោយនេះ ហើយការព្រមព្រៀងគ្នាមួយត្រូវបានឈានដល់ជាមួយនឹងកីឡាកររូបនេះ និងភ្នាក់ងារតំណាងរបស់គេ។ ទោះបីជាយ៉ាងណា ការពិភាក្សាផ្សេងៗកំពុងតែបន្តធ្វើឡើងជាមួយនឹងក្លិប Roma ក្រោយពីការដេញថ្លៃជាបឋមក្នុងទឹកប្រាក់ 28លានផោនរបស់ក្លិប Liverpool ត្រូវបានច្រានចោល កាលពីប៉ុន្មានថ្ងៃមុន។ ប៉ុន្តែ លោក Klopp ដែលជាគ្រូបង្វឹករបស់ Liverpool បានប្តេជ្ញាថា នឹងទិញយក Salah ឲ្យបាន ហើយស្របពេលដែលកីឡាកររូបនេះត្រូវបានគេជឿជាក់ថា ចង់ចាកចេញពី Roma ដែរនោះ វាបង្ហាញថា ការព្រមព្រៀងគ្នាមួយកំពុងតែស្ថិតយ៉ាងប្រកៀកក្នុងការឈានដល់ការសម្រេច ក្រោយពីការបង្កើនសំណើដេញថ្លៃពីសំណាក់ក្លិប Liverpool ។

    ប្រសិនបើការផ្ទេរនេះត្រូវបានបំពេញជាផ្លូវការ វានឹងក្លាយជារឿងដ៏មានសំណាងមួយសម្រាប់ក្លិប Liverpool ដែលចង់បាន Salah កាលពីឆ្នាំ2014 នៅមុនពេលរូបគេបានសម្រេចចិត្តចូលរួមជាមួយនឹងក្លិប Chelsea ជំនួសវិញ ក្រោយពីផ្ទេរពីក្លិបរបស់ស្វ៊ីស Basel។  Salah ដែលជាអតីតខ្សែបម្រើស្លាបរបស់ Chelsea បានចូលរួមជាមួយនឹងក្លិប Roma ក្នុងតម្លៃខ្លួន 13លានផោន កាលពីរដូវក្តៅមុន ក្រោយពីបានចំណាយពេលខ្ចីជើងពេញមួយរដូវកាលរួចមក៕
    ប្រភពពី៖ Sky Sports

  • Roma ប្រាប់ Liverpool ថា ២៨លានផោនមិនគ្រប់គ្រាន់សម្រាប់ការទិញយក Salah ទេ

    Roma ប្រាប់ Liverpool ថា ២៨លានផោនមិនគ្រប់គ្រាន់សម្រាប់ការទិញយក Salah ទេ

    ក្លិប Roma បានប្រាប់ក្លិបហង្សក្រហម Liverpool ថា ២៨លានផោន (ស្មើនឹង៣៦លានដុល្លារអាមេរិក) នឹងមិនគ្រប់គ្រាន់ក្នុងការទិញយកខ្សែបម្រើស្លាបអន្តរជាតិអេហ្ស៊ីប Mohamed Salah ទេ។

    ក្លិបទាំងពីរបានរៀបចំកិច្ចពិភាក្សាជាច្រើនលើកជុំវិញកិច្ចព្រមព្រៀងដែលអាចទៅរួចមួយ ខណៈដែល Liverpool បានបញ្ជាក់ប្រាប់ថា ពួកគេត្រៀមលក្ខណៈរួចរាល់ក្នុងការដាក់សំណើជាទឹកប្រាក់២៨លានផោន ដើម្បីទិញយកកីឡាកររូបនេះ ប៉ុន្តែទោះបីជាយ៉ាងណា ក្លិបស្ថិតក្នុងក្របខ័ណ្ឌ Serie A មួយនេះ នឹងមិនលក់កីឡាករ Salah វ័យ២៤ឆ្នាំម្នាក់នេះក្នុងតម្លៃខ្លួនប៉ុននោះឡើយ ហើយបច្ចុប្បន្ន វាអាស្រ័យទៅលើ Liverpool ក្នុងការសម្រេចថា តើពួកគេចង់បង្កើនសំណើនៃការដេញថ្លៃរបស់ខ្លួន ឬយ៉ាងណា?។

    លោក Jurgen Klopp នៃក្លិប Liverpool បានចាត់ទុកខ្សែបម្រើស្លាបរូបនេះ គឺជាកីឡាករអាទិភាពរបស់លោកក្នុងការទិញចូល ខណៈដែលក្លិបនេះត្រៀមសម្រាប់រដូវកាលថ្មីក្នុងក្របខ័ណ្ឌ Premier League និងការប្រកួតក្នុងក្របខ័ណ្ឌ Champions League វគ្គ Playoff។ Liverpool បានជួបនឹងភាពត្រដាបត្រដួសខ្លាំងកាលពីរដូវកាលមុន នៅពេលដែលពួកគេលេងដោយគ្មានខ្សែបម្រើដ៏ឆ្នើម Sadio Mane ជាពិសេសនៅកីឡដ្ឋាន Anfield ជាកន្លែងដែលពួកគេបានជួបការលំបាកក្នុងការផ្តួលក្រុមជាច្រើន ហើយលោក Klopp ជឿជាក់ថា Salah នឹងជួយបន្ថែមល្បឿនក្នុងក្រុមរបស់លោក។ Salah ទើបតែបានបំពេញរដូវកាលទី២របស់គេនៅឯក្លិប Roma ក្រោយពីរូបគេបានលេងក្នុងនាមជាកីឡាករកម្ចីពីក្លិប Fiorentina ក្នុងរដូវកាលឆ្នាំ២០១៥-២០១៦ និងបានក្លាយជាកីឡាករដ៏មានគ្រោះថ្នាក់បំផុតរបស់ក្របខ័ណ្ឌ Serie A។

    ក្នុងអំឡុងការចំណាយពេល២រដូវកាលរបស់គេក្នុងក្រុម Roma រូបគេបានស៊ុតបាល់បញ្ចូលទី២៩គ្រាប់ ក្នុងការប្រកួតលីក៦៥លើក៕
    ប្រភពពី៖ The Guardian