Tag: Manny Pacquiao

  • Manny Pacquiao ចាប់ដៃជាមួយ Jack Ma ចែកឈុតពិនិត្យរកវីរុសកូវីដ-19 ដល់ប្រជាជនហ្វីលីពីន

    Manny Pacquiao ចាប់ដៃជាមួយ Jack Ma ចែកឈុតពិនិត្យរកវីរុសកូវីដ-19 ដល់ប្រជាជនហ្វីលីពីន

    មែននី ប៉ាកគីអាវ កំពូលអ្នកប្រដាល់ វីរបុរសជនជាតិហ្វីលីពីន បានសហការជាមួយអ្នកជំនួញល្បីឈ្មោះលំដាប់ពិភពលោក ជែក ម៉ា ចែកឈុតពិនិត្យរកមេរោគវីរុសកូវីដ-19 ដល់ប្រជាជននៅក្នុងប្រទេសកំណើតរបស់ខ្លួន ក្រោយកើតការឆ្លងរាលដាលយ៉ាងធ្ងន់ធ្ងរនៅក្នុងប្រទេស។

    ហ្វីលីពីន ក៏ជាប្រទេសមួយ ដែលគេចមិនផុតពីការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 មកពីប្រទេសចិនដែរ និងយ៉ាងណាក្ដី ក្នុងនាមជាវីរបុរសនៃប្រទេសហ្វីលីពីន មែននី ប៉ាកគីអាវ ដែលមានមុខតំណែងជាតំណាងរាស្ត្រនៅក្នុងសភា ក៏មិនអាចបោះបង់ចោលប្រជាជនបានដែរ។

    កំពូលអ្នកប្រដាល់ជនជាតិតាកាឡុក បានថ្លែងប្រាប់តាមរយៈសារព័ត៌មានថា ខ្លួនបានប្រើថវិកាក្នុងមូលនិធិផ្ទាល់ខ្លួន មែននី ប៉ាកគីអាវ ហ្វោនដេស្សិន និងអាស្រ័យភាពជិតស្និទ្ធស្អិតល្មួតជាមួយ ជែក ម៉ា បានរួមគ្នាចែកឈុតពិនិត្យរកមេរោគកូវីដ-19 ហ្វ្រ៊ី ជូនប្រជាជនហ្វីលីពីន ដើម្បីពិនិត្យរកមេរោគរយៈដំបូង មុននឹងទៅជួបគ្រូពេទ្យ។

    “យើងមានអារម្មណ៍រំភើបចិត្តខ្លាំងណាស់ ដែលបានប្រកាសថា មូលនិធិរបស់ ជែក ម៉ា បានសហការជាមួយមូលនិធិរបស់ មែននី ប៉ាកគីអាវ ចែកឈុតពិនិត្យមេរោគវីរុសកូវីដ-19 នៅក្នុងប្រទេសហ្វីលីពីន ចំនួន 50,000ឈុត ដោយរឿងរ៉ាវដែលកើតឡើងនៅលើពិភពលោកថ្ងៃនេះ គ្មានអ្វីប្រសើរជាងការជួយសង្គ្រោះរវាងគ្នានឹងគ្នាឡើយ”

    សម្រាប់ ប៉ាកគីអាវ អាយុ 41ឆ្នាំ ម្ចាស់ខ្សែក្រវាត់ជើងឯកពិភពលោកទម្ងន់ វែលធើរវេធ របស់សមាគមប្រដាល់ពិភពលោក(WBA) កាលពីពេលមុននេះ មានប្រូក្រាមវិលត្រឡប់ទៅកាន់សង្វៀនវិញនៅក្នុងឆ្នាំនេះ តែក៏ត្រូវបត់គម្រោងការនេះទុកបណ្ដោះអាសន្នសិន ក្រោយកើតការឆ្លងរាលដាលរបស់មេរោគវីរុសដ៏កំណាចនេះ។

    ប្រភព៖ ព័ត៌មានបរទេស

  • Horn ស្នើឲ្យមានការប្រកួតសងសឹកជាមួយ Pacquiao ដើម្បីបញ្ចប់ជម្លោះ

    Horn ស្នើឲ្យមានការប្រកួតសងសឹកជាមួយ Pacquiao ដើម្បីបញ្ចប់ជម្លោះ

    កីឡាករប្រដាល់ Jeff Horn របស់អូស្ត្រាលី ជឿជាក់ថា រូបគេពិតជាបានទទួលជ័យជម្នះលើកីឡាករជើងចាស់ Manny Pacquiao យ៉ាងស័ក្តិសមប្រាកដមែន ខណៈដែលរូបគេក៏បានស្វាគមន៍ទៅលើលទ្ធផលនៃការត្រួតពិនិត្យឡើងវិញនៃការផ្តល់ពិន្ទុពីការប្រកួតរបស់គេកាលពីដើមខែនេះពីសំណាក់ WBO ផងដែរ។

    ប៉ុន្តែ ទោះបីជាយ៉ាងណា កីឡាករមិនស្គាល់ចាញ់រូបនេះនៅតែជឿជាក់ថា មានតែការប្រកួតសងសឹកជាមួយនឹងតារាប្រដាល់របស់ហ្វីលីពីនរូបនេះប៉ុណ្ណោះ ទើបអាចដោះស្រាយភាពចម្រូងចម្រាសផ្សេងៗបាន។ Horn បានកត់ត្រាជ័យជម្នះដោយពិន្ទុជាឯកច្ឆន្ទក្នុងការប្រកួត12ទឹកដ៏មិននឹកស្មានដល់លើកីឡាករ Pacquiao ក្នុងទីក្រុង Brisbane កាលពីថ្ងៃទី2 ខែកក្កដា ប៉ុន្តែលទ្ធផលនេះបានធ្វើឲ្យមានការតវ៉ា និងការរិះគន់យ៉ាងខ្លាំងក្លាក្នុងប្រទេសហ្វីលីពីន។

    ស្ថាប័ន WBO បានបង្កើតក្រុមប្រឹក្សាឯករាជ្យមួយ និងចៅក្រមអនាមិកដើម្បីទស្សនាការប្រកួតនេះដោយគ្មានសំឡេង និងដើម្បីកាត់សេចក្តីថា តើកីឡាកររូបណាឈ្នះក្នុងទឹកនីមួយៗ?។ កាលពីថ្ងៃអង្គារ ស្ថាប័ននេះបានបញ្ជាក់ថា ចៅក្រមបានរកឃើញថា Horn បានទទួលជ័យជម្នះ7ទឹក ហើយ Pacquiao ឈ្នះត្រឹមតែ5ទឹកប៉ុណ្ណោះ។ Horn វ័យ29ឆ្នាំ បានប្រាប់អ្នកយកព័ត៌មានក្នុងទីក្រុង Los Angeles ថា រូបគេបានស្វាគមន៍ចំពោះការត្រួតពិនិត្យឡើងវិញរបស់ស្ថាប័ន WBO បើទោះបីរូបគេមានភាពច្បាស់លាស់ក្នុងចិត្តរបស់គេថា គេពិតជាបានទទួលជ័យជម្នះក៏ដោយ។

    ទោះបីជាយ៉ាងណា អតីតគ្រូបង្រៀនរូបនេះជឿជាក់ថា មានតែការប្រកួតសងសឹកប៉ុណ្ណោះទើបអាចដោះស្រាយបញ្ហាចម្រូងចម្រាស់ផ្សេងៗបាន។ កីឡាកររូបនេះបានបន្ថែមទៀតថា៖ «ខ្ញុំជឿថា មធ្យោបាយដ៏ល្អក្នុងការដោះស្រាយបញ្ហានេះបាន គឺការប្រកួតសងសឹក។ ខ្ញុំគិតថា ខ្ញុំនឹងធ្វើបានកាន់តែល្អឡើងទៀតក្នុងការប្រកួតលើកទី2»។ ប៉ុន្តែ ក្រុមការងាររបស់ Pacquiao បានចោទប្រកាន់ថា អាជ្ញាកណ្តាល បានអនុញ្ញាតឲ្យ Horn ប្រើប្រាស់ស្នៀតប្រយុទ្ធដែលខុសពីច្បាប់កីឡា។

    ក្រោយពីការត្រួតពិនិត្យឡើងវិញរបស់ WBO កីឡាករ Pacquiao បានឲ្យដឹងក្នុងសេចក្តីថ្លែងការណ៍មួយកាលពីល្ងាចថ្ងៃអង្គារថា៖ «យើងបានឃើញការកាត់សេចក្តីដ៏អន់បំផុត កាលពីមុនដោយចៅក្រមជាអ្នកគ្រប់គ្រងលើលទ្ធផលផ្សេងៗ។ គ្មានអ្វីដែលធ្វើឲ្យខ្ញុំភ្ញាក់ផ្អើលឡើយ។ សូមឲ្យអ្នកគាំទ្រកាត់សេចក្តីដោយខ្លួនឯងចុះ។ មនុស្សជាច្រើនបានឃើញអ្វីដែលបានកើតឡើង»៕
    ប្រភពពី៖ ESPN

  • បណ្តាញសារព័ត៌មាន និងសង្គម រិះគន់ចៅក្រម ក្រោយ Horn ឈ្នះ Pacquiao

    បណ្តាញសារព័ត៌មាន និងសង្គម រិះគន់ចៅក្រម ក្រោយ Horn ឈ្នះ Pacquiao

    ក្រុមការងារ និងកីឡាករ Manny Pacquiao ផ្ទាល់ នៅថ្ងៃអាទិត្យបានធ្វើការរិះគន់ទៅលើមន្ត្រីចៅក្រម ក្រោយពីតារាប្រដាល់ដ៏ឆ្នើមរបស់ហ្វីលីពីនរូបនេះ បានរបូតខ្សែក្រវាត់ WBO ក្នុងទម្ងន់ 66.7គីឡូក្រាមរបស់គេ ក្រោយពីចាញ់ពិន្ទុទាំងចម្រូងចម្រាសពេលប្រកួតជាមួយនឹងកីឡាករអូស្ត្រាលី Jeff Horn កាលពីថ្ងៃអាទិត្យ។

    លោក Justin Fortune គ្រូបង្វឹកផ្នែកកម្លាំងរបស់ Pacquiao និងជាអតីតម្ចាស់ខ្សែក្រវាត់ទម្ងន់មធ្យមរបស់អូស្ត្រាលីដែរនោះ បាននិយាយទាំងខឹងសម្បាថា៖ «អាជ្ញាកណ្តាលពិតជាខ្ជះខ្ជាយ ហើយចៅក្រមវិញកាន់តែឆ្កួតទៅទៀត» ហើយទាក់ទងនឹងកីឡាករ Horn ដែលបានបញ្ចប់ការប្រកួតនេះដោយមានមុខហើមយ៉ាងខ្លាំង និងត្រូវតែទទួលការដេរស្នាមរយះនៅលើចិញ្ចើមស្តាំរបស់ខ្លួននោះ គ្រូបង្វឹករូបនោះបានបន្ថែមទៀតថា៖ «Manny ចាញ់ការប្រកួតនេះ ប៉ុន្តែមុខរបស់ Jeff Horn ហើមប៉ោងដូចជាផ្លែល្ពៅអ៊ីចឹង»។ ចៅក្រមទាំងបីបានផ្តល់ពិន្ទុឈ្នះ 117-111, 115-113 និង115-113 ទៅឲ្យកីឡាករ Horn។ លទ្ធផលនេះបានធ្វើឲ្យមានការរិះគន់យ៉ាងខ្លាំងនៅលើបណ្តាញសង្គម ពីសំណាក់កីឡាករប្រដាល់ឆ្នើមៗ និងបណ្តាញសារព័ត៌មានកីឡា។

    អតីតម្ចាស់ខ្សែក្រវាត់ទម្ងន់ធ្ងន់ពិភពលោក Lennox Lewis បានសរសេរនៅលើបណ្តាញសង្គម Twitter ថា៖ «នេះគឺជាអ្វីដែលមានកំហុសក្នុងកីឡាប្រដាល់។ Horn បានប្រើប្រាស់ស្នៀតការពារច្រើន ប៉ុន្តែ ខ្ញុំចង់បញ្ជាក់ថា វាជារឿងដែលមិនគួរឲ្យជឿដែលរូបគេអាចឈ្នះការប្រកួតនេះ តាមរយៈការចាញ់ប្រៀបបែបនេះ»។

    ស្របពេលជាមួយគ្នានេះ ស្ថិតិនៃការប្រកួត ហាក់ដូចបង្ហាញថា Pacquiao បានទទួលពិន្ទុគ្រប់គ្រងក្នុងការឈ្នះផងដែរ។ ទូរទស្សន៍ ESPN បានបញ្ជាក់ថា Pacquiao បានវាយចេញ 182កណ្តាប់ដៃ ខណៈដែល Horn បានវាយចេញត្រឹមតែ82កណ្តាប់ដៃប៉ុណ្ណោះក្នុងការប្រកួតទាំង 12ទឹក ចំពោះមុខអ្នកគាំទ្រច្រើនជាង 51,000នៅទីក្រុង Brisbane។

    Pacquiao ម្ចាស់ខ្សែក្រវាត់ពិភពលោក8ប្រភេទទម្ងន់រូបនេះ បាននិយាយនៅលើកញ្ចក់ទូរទស្សន៍ Filipino TV ថា៖ «យើងបានគិតថា យើងបានឈ្នះការប្រកួតនេះ តែវាគ្មានបញ្ហានោះឡើយសម្រាប់ខ្ញុំ ប្រសិនបើមានការប្រកួតសងសឹក ហើយវានឹងក្លាយជារឿងល្អ ប្រសិនបើការប្រកួតសងសឹក នឹងត្រូវរៀបចំឡើងនៅប្រទេសហ្វីលីពីននោះ»៕
    ប្រភពពី៖ Reuters

  • Pacquiao ស្រេកឃ្លានសងសឹក Mayweather ក្រោយប៉ះ Horn ចុងសប្តាហ៍នេះ

    Pacquiao ស្រេកឃ្លានសងសឹក Mayweather ក្រោយប៉ះ Horn ចុងសប្តាហ៍នេះ

    គ្រូបង្វឹករបស់កីឡាករ Manny Pacquiao បានបញ្ជាក់ថា តារាប្រដាល់ដ៏ឆ្នើមរបស់ហ្វីលីពីនរូបនេះ កំពុងតែស្ថិតក្នុងស្ថានភាពត្រូវការឈ្នះជាដាច់ខាតនៅពេលរូបគេត្រូវការពារខ្សែក្រវាត់ពិភពលោករបស់គេជាមួយនឹងកីឡាករអូស្ត្រាលី Jeff Horn នៅចុងសប្តាហ៍នេះ ដើម្បីទទួលបានឱកាសក្នុងការប្រកួតសងសឹកជាមួយនឹងកីឡាករអាមេរិក Floyd Mayweather។ នៅមុនពេលការប្រកួតរវាង Pacquiao (ឈ្នះ 59លើក ចាញ់ 6លើក និងស្មើ 2លើក) និង Horn ដែលជាអតីតគ្រូបង្រៀន (ឈ្នះ 16លើក មិនដែលចាញ់ និងស្មើ1លើក) លោក Freddie Roach គ្រូបង្វឹករបស់ Pacquiao បានបញ្ជាក់ថា ការប្រកួតនាពេលខាងមុខនេះពិតជាសំខាន់ណាស់ ដោយសារតែវាអាចនឹងកំណត់ថា តើម្ចាស់ខ្សែក្រវាត់ពិភពលោក11សម័យកាលរូបនេះ នឹងទទួលបានឱកាសក្នុងការប្រកួតសងសឹកជាមួយនឹង Mayweather ឬយ៉ាងណា?។

    លោក Roach បានប្រាប់ទូរទស្សន៍ ESPN កាលពីថ្ងៃអង្គារថា៖ «Manny ស្ថិតក្នុងស្ថានភាពដែលត្រូវការឈ្នះជាដាច់ខាត។ រូបគេចង់បានការប្រកួតសងសឹកជាមួយនឹង Mayweather តែដើម្បីជួបជាមួយនឹង Mayweather អ្នកត្រូវតែធ្វើឲ្យបានល្អពេលប្រកួតជាមួយនឹងគូប្រកួតម្នាក់នេះជាមុនសិន ហើយអ្នកត្រូវតែផ្តល់នូវការប្រកួតមួយដ៏គួរឲ្យទាក់ទាញទៀតផង។ ប្រសិនបើរូបគេត្រដាបត្រដួសក្នុងការប្រកួតនេះ វាអាចនឹងបញ្ចប់ក្តីសុបិននោះទាំងស្រុង»។
    បើទោះបីជា Pacquiao ពិតជាស្រេកឃ្លានក្នុងការទទួលបានការប្រកួតសងសឹក ក្រោយពីចាញ់ក្នុងការប្រកួតដ៏ល្បីល្បាញដែលមានឈ្មោះថា ការប្រកួតប្រចាំសតវត្សរ៍ កាលពីខែឧសភា ឆ្នាំ2015 ក៏ដោយ ក៏រូបគេមិនអនុញ្ញាតឲ្យការរំពឹងទុកពីការបានប្រកួតសងសឹកនោះមករំខានដល់ការត្រៀមលក្ខណៈរបស់គេសម្រាប់ការប្រកួតនៅចុងសប្តាហ៍នេះឡើយ។ Pacquiao បានឲ្យដឹងថា៖ «ប្រសិនបើមានឱកាស ហេតុអ្វីបានមិនអាចទៅរួច? ខ្ញុំពិតជាចង់ប្រកួតសងសឹកណាស់។ ប៉ុន្តែខ្ញុំត្រូវផ្តោតទៅលើការប្រកួតមួយនេះជាមុនសិន។ យើងមិនអាចមើលស្រាលទៅលើ Horn ដោយគិតពីការប្រកួតផ្សេងបានឡើយ។ ការប្រកួតនេះមិនទាន់បានបញ្ចប់នៅឡើយទេ»។

    ការប្រកួតដណ្តើមខ្សែក្រវាត់ WBO ទម្ងន់66.9គីឡូក្រាមនេះ នឹងចាប់ផ្តើមនៅម៉ោង11:30 (ម៉ោងក្នុងស្រុក) នាថ្ងៃសៅរ៍នេះ នៅលើសង្វៀន Suncorp Stadium ប្រទេសអូស្ត្រាលី៕
    ប្រភពពី៖ ESPN

  • Pacquiao សន្យាចាកចេញពីអូស្ត្រាលី ក្នុងនាមជាម្ចាស់ខ្សែក្រវាត់ពិភពលោក

    Pacquiao សន្យាចាកចេញពីអូស្ត្រាលី ក្នុងនាមជាម្ចាស់ខ្សែក្រវាត់ពិភពលោក

    តារាប្រដាល់ដ៏ល្បីល្បាញរបស់ហ្វីលីពីន Manny Pacquiao បានធ្វើដំណើរទៅដល់ប្រទេសអូស្ត្រាលីហើយ នៅមុនពេលការប្រកួតដណ្តើមខ្សែក្រវាត់របស់គេជាមួយនឹងកីឡាករ Jeff Horn និងបានប្រកាសថា៖ «ខ្ញុំនឹងវិលត្រឡប់ទៅផ្ទះវិញក្នុងនាមជាម្ចាស់ខ្សែក្រវាត់ពិភពលោកដដែល»។

    កីឡាករដែលមានរហស្សនាមថា Pac Man រូបនេះ បានធ្វើដំណើរពីទីក្រុងម៉ានីលទៅដល់ទីក្រុង Brisbane កាលពីល្ងាចថ្ងៃសៅរ៍ ក្រោមការទទួលស្វាគមន៍ពីសំណាក់អ្នកគាំទ្រដ៏ច្រើនកុះករ ដើម្បីធ្វើការប្រកួតដណ្តើមខ្សែក្រវាត់ពិភពលោកក្នុងទម្ងន់66.7គីឡូក្រាមនៅឯសង្វៀន Suncorp Stadium នៅចុងសប្តាហ៍ក្រោយនេះ។ Pacquiao បានប្រាប់អ្នកយកព័ត៌មាននៅឯអាកាសយានដ្ឋានថា៖ «ក្នុងចំណោមការប្រកួតប្រដាល់រយៈពេលជាច្រើនឆ្នាំមកនេះ ខ្ញុំមិនធ្លាប់ទទួលបានការលើកទឹកចិត្តដ៏ខ្ពស់សម្រាប់ការប្រកួតដូចលើកនេះឡើយ»។

    Pacquiao ដែលមានកំណត់ត្រាឈ្នះ59លើក ចាញ់6លើក ស្មើ2លើក ក្នុងនោះផ្តួលដៃគូឲ្យសន្លប់38លើក ត្រូវបានគេរំពឹងទុកថា ជាកីឡាករមានក្តីសង្ឃឹមច្រើនក្នុងការយកឈ្នះលើ Horn ដែលមានកំណត់ត្រាឈ្នះ11លើក មិនដែលចាញ់ និងស្មើ1លើក៕
    ប្រភពពី៖ Sport24

  • Pacquiao ប្រាប់ឱ្យ Horn ត្រៀមលក្ខណៈឱ្យរួចរាល់ ដើម្បីប៉ះជាមួយរូបគេ

    Pacquiao ប្រាប់ឱ្យ Horn ត្រៀមលក្ខណៈឱ្យរួចរាល់ ដើម្បីប៉ះជាមួយរូបគេ

    ម្ចាស់​ខ្សែក្រវាត់​ពិភព​លោក​ ៨​ប្រភេទ ​ទម្ងន់​ផ្សេង​​គ្នា Manny Pacquiao ទទួល​ស្គាល់​ថា គូ​ប្រកួត​នា​ពេល​ខាង​មុខ​នេះ​​​​​គឺ Jeff Horn ស្ថិត​ក្នុង​​សមត្ថ​ភាព​ដែល​មិន​អាច​ដឹង​បាន ប៉ុន្តែ បាន​ប្រាប់​​​កីឡាករ​ប្រដាល់​សញ្ជាតិ​អូ​ស្ត្រាលី​រូប​នេះ​​ថា រូប​គេ​ត្រូវ​តែ​ស្ថិត​ក្នុង​សមត្ថ​ភាព​ខ្ពស់​បំផុត​របស់​គេ​ដើម្បី​ធ្វើ​ឱ្យ​ប្រាកដ​​ថា ការ​ប្រកួត​ដណ្តើម​ខ្សែ​ក្រវាត់​ពិភព​លោក  WBO ក្នុង​ទម្ងន់​ ​៦៦,៧​គីឡូ​ក្រាម​របស់​ពួក​គេ នឹង​ផ្តល់​ការ​រីក​រាយ​​ដល់​អ្នក​គាំ​ទ្រ​។

    Pacquiao បាន​ធ្វើ​ដំណើរ​​ទស្ស​ន​កិច្ច​ទៅ​កាន់​ប្រទេស​អូ​ស្ត្រាលី​កាល​ពី​ថ្ងៃ​ចន្ទ ដើម្បី​​ផ្សព្វ​ផ្សាយ​ការ​ប្រកួត​របស់​ពួក​គេ​នៅ​ថ្ងៃ​ទី​២ ខែ​កក្ក​ដា ខាង​មុខ​នេះ នៅ​សង្វៀន Lang Park និង​បាន​និយាយ​ជា​មួយ​នឹង​អ្នក​យក​ព័ត៌​មាន នៅ​មុន​ពេល​ត្រូវ​បាន​​ស្វាគមន៍​ដោយ​អ្នក​គាំ​ទ្រ​។ Pacquiao បាន​ប្រាប់​​បណ្តាញ​សារ​ព័ត៌​មានក្នុង​ស្រុក​ថា៖ «​ខ្ញុំ​មិន​​ដឹង​ពី​សមត្ថ​ភាព​របស់​​គេ​ឡើយ ប៉ុន្តែ ខ្ញុំ​ដឹង​ថា រូប​គេ​ជា​អ្នក​ប្រយុទ្ធ​ម្នាក់​។ ខ្ញុំ​​មិន​ទាន់​បាន​ទស្ស​នា​ការ​ប្រកួត​របស់​គេ​នៅ​ឡើយ​ទេ ប៉ុន្តែ ខ្ញុំ​នឹង​​​ត្រួត​ពិនិត្យ​ទៅ​លើ​ការ​ប្រកួត​៣​លើក​ចុង​ក្រោយ​របស់​គេ​​»​។ កីឡាករ​ប្រដាល់​របស់​​ហ្វី​លី​ពីន​រូបនេះ​បាន​បន្ថែម​ទៀត​ថា៖ «សារ​របស់​ខ្ញុំ​សម្រាប់​រូប​គេ​គឺ​ត្រូវ​តែ​ខិត​ខំ​​​ហ្វឹក​ហាត់​ឱ្យ​បាន​​រឹង​មាំ និ​ង​ត្រូវ​​តែ​ធ្វើ​ឱ្យ​ប្រាកដ​ថា អ្នក​ស្ថិតក្នុង​កម្រិត​រឹង​មាំ​១០០​ភាគ​រយ​សម្រាប់​ការ​ប្រកួត​នៅ​ថ្ងៃ​ទី២ ខែ​កក្ក​ដា ហេតុ​នេះ យើង​អាច​ផ្តល់​ការ​ប្រកួត​ដ៏​​ជក់​ចិត្តមួយ ហើយ​យើង​អាច​ផ្តល់​ការ​រំភើប​ដល់​អ្នក​គាំ​ទ្រ​»​។

    ការ​ប្រកួត​​ជា​មួយ​នឹង​ Horn ដែ​មិន​កំណត់​ត្រា​ឈ្នះ​១៦​លើក និង​ស្មើ​១លើក​នោះ នឹង​ក្លាយ​ជា​ការ​ប្រកួត​ជា​លើក​ទី​១​របស់ Pacquiao ចាប់​តាំង​ពី​រូប​គេ​បាន​ឈ្នះ​ពិន្ទុ​ជា​​ឯក​ច្ឆន្ទ​លើ​កីឡាករ​អាមេរិក Jessie Vargas ក្នុង​ទីក្រុង Las Vegas កាល​ពី​ខែ​វិច្ឆិកា​។ Pacquiao មាន​កំណត់​ត្រា​ឈ្នះ​៥៩​លើក ចាញ់​៦​លើក និង​ស្មើ​២លើក ក្នុង​នោះ​ផ្តួល​ដៃ​គូ​ឲ្យ​សន្លប់​ចំនួន​៣៨​លើក​៕

    ប្រភព​ព័ត៌​មាន៖ Reuters