Tag: Manchester United

ក្លិប Real Sociedad ចុះហត្ថលេខាជាមួយខ្សែបម្រើ Januzaj មកពីក្លិប Man United
ក្លិប Real Sociedad បានចុះហត្ថលេខាជាមួយនឹងខ្សែបម្រើស្លាប Adnan Januzaj របស់ក្លិប Manchester United សម្រាប់តម្លៃខ្លួន9.8លានផោន (ស្មើនឹង12.6លានដុល្លារអាមេរិក)។ នេះបើយោងតាមការប្រកាសរបស់ក្លិបស្ថិតក្នុងក្របខ័ណ្ឌ La Liga កាលពីថ្ងៃពុធ។
បណ្តាញសារព័ត៌មានរបស់អេស្ប៉ាញបានចេញផ្សាយថា ក្លិប Man United បានបញ្ចូលលក្ខខណ្ឌនៃការរំលាយកិច្ចសន្យាក្នុងការធ្វើកុងត្រាសម្រាប់ខ្សែបម្រើអន្តរជាតិបែលហ្ស៊ិកវ័យ 22ឆ្នាំរូបនេះ។
Januzaj បានយល់ព្រមចុះកុងត្រារយៈពេល5ឆ្នាំជាមួយនឹងក្លិប Sociedad ហើយនឹងបង្ហាញខ្លួនជាផ្លូវការនៅថ្ងៃព្រហស្បតិ៍នេះ ក្រោយពីបានចូលរួមវគ្គហ្វឹកហាត់ជាលើកទី1របស់ខ្លួនរួចមក។ Januzaj បានសរសេរនៅលើបណ្តាញសង្គម Instagram ថា៖ «សូមថ្លែងអំណរគុណដល់គ្រូបង្វឹក និងបុគ្គលិកដែលធ្វើការនៅក្លិប Manchester United ដើម្បីធ្វើឲ្យវាក្លាយជាក្លិបដ៏អស្ចារ្យមួយ»។
Januzaj បានបន្ថែមទៀតថា៖ «ប៉ុន្តែជាអកុសល ពេលវេលារបស់ខ្ញុំនៅក្នុងក្លិបនេះបានឈានដល់ទីបញ្ចប់ហើយ និងវាមិនមែនមានន័យថា ខ្ញុំចង់ចាកចេញឡើយ ប៉ុន្តែខ្ញុំនឹងនៅតែរក្សាការផ្តល់ក្តីស្រឡាញ់ដល់ក្លិប Manchester United ជានិច្ច»។ Januzaj បានចូលលេងក្នុងក្រុមធំរបស់ក្លិប Man United កាលពីឆ្នាំ2013 ក្រោមការដឹកនាំរបស់លោក David Moyes និងបានស៊ុតបាល់បញ្ចូលទី2គ្រាប់ក្នុងពេលចូលលេងក្នុងការប្រកួតជាលើកទី1របស់គេក្នុងក្របខ័ណ្ឌ Premier League ពេលជួបក្រុម Sunderland។ ប៉ុន្តែ រូបគេមិនបានបន្តនូវទម្រង់លេងដ៏ល្អរបស់គេឡើយ និងបានស៊ុតបាល់បញ្ចូលទីបានត្រឹមតែ5គ្រាប់ប៉ុណ្ណោះក្នុងការបង្ហាញខ្លួន66លើកសម្រាប់ Man United មុនពេលខ្ចីជើងទៅកាន់ក្លិប Borussia Dortmund និង Sunderland៕
ប្រភពពី៖ Reuters
July 13, 2017
Man Uted ស្ថិតកាន់តែកៀកក្នុងការផ្ទេរ Perisic ចេញពីក្លិប Inter
ក្លិបបិសាចក្រហម Manchester United កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែប្រយុទ្ធ Ivan Perisic។ នេះបើយោងទៅតាមកាសែត The Independent។
ក្លិបបិសាចក្រហមមួយនេះបានធ្វើការងារទាក់ទងនឹងការផ្ទេរ Perisic ពីក្លិប Inter Milan អស់រយៈពេលជាច្រើនខែមកហើយ ហើយបច្ចុប្បន្ន អ្វីៗហាក់កំពុងតែមានភាពច្បាស់លាស់ និងមានដំណើរការទៅមុខហើយ។ ក្លិប Inter របស់ក្របខ័ណ្ឌ Serie A បានដាក់តម្លៃខ្លួន 50លានផោន (ស្មើនឹង 64លានដុល្លារអាមេរិក) សម្រាប់ខ្សែប្រយុទ្ធដ៏ឆ្នើមរូបនេះ ប៉ុន្តែក្រុម Man United ដែលជាម្ចាស់ជើងឯកក្របខ័ណ្ឌ Europa League នៅតែជឿជាក់ថា ពួកគេអាចនាំយក Perisic វ័យ28ឆ្នាំក្នុងតម្លៃខ្លួនតិចជាងនេះបាន ពោលគឺច្រើនជាង 45លានផោន។
វាត្រូវបានគេផ្សព្វផ្សាយថា ខ្សែប្រយុទ្ធអន្តរជាតិក្រូអាស៊ីរូបនេះ បានយល់ព្រមទៅលើលក្ខខណ្ឌផ្ទាល់ខ្លួនរួចជាស្រេចហើយ ជាមួយក្លិប Man United។ Man United បានបញ្ជាក់ថា ពួកគេជឿជាក់ថា ការផ្ទេរនេះអាចនឹងត្រូវបំពេញជាផ្លូវការ និងថា ក្លិបរបស់អង់គ្លេសមួយនេះកំពុងតែសម្លឹងរកការឆ្លើយតបទៅនឹងការទាមទាររបស់ក្លិប Inter ក្នុងរយៈពេលខាងមុខនេះ ដើម្បីធានាថា Perisic នឹងបានផ្ទេរទៅកាន់កីឡដ្ឋាន Old Trafford នៅរដូវកាលក្រោយ។ លោក Luciano Spalletti ដែលជាអ្នកចាត់ការទូទៅរបស់ក្លិប Inter ចង់ឲ្យកីឡាកររូបនេះបន្តនៅ ប៉ុន្តែ Perisic ពិតជាចង់ផ្ទេរទៅកាន់កីឡដ្ឋាន Old Trafford។
លោក Jose Mourinho ចង់ធ្វើការពង្រឹងតំបន់ប្រយុទ្ធរបស់លោកជាមួយនឹងខ្សែប្រយុទ្ធវ័យ 28ឆ្នាំរូបនេះ ដែលនឹងត្រូវរ៉ាប់រងក្នុងតំបន់ប្រយុទ្ធយ៉ាងល្អ។ អ្នកចាត់ការទូទៅរបស់ក្លិប Man United រូបនេះ នៅតែមិនមានភាពច្បាស់លាស់ទៅលើសមត្ថភាពរបស់កីឡាករ Anthony Martial, Henrikh Mkhitaryan និង Jesse Lingard៕
ប្រភពពី៖ Daily Mail
July 12, 2017
Rooney ចេញពីក្លិប Man Utd ទៅ Everton ដោយគ្មានតម្លៃខ្លួន
ខ្សែប្រយុទ្ធ Wayne Rooney របស់ក្លិបបិសាចក្រហម Manchester United នឹងត្រូវវិលទៅកាន់ក្លិបទូកក្តោង Everton វិញ នៅចុងសប្តាហ៍នេះដោយគ្មានតម្លៃខ្លួន។
បើយោងទៅតាមបណ្តាញសារព័ត៌មាន BBC ត្រូវបានគេយល់ឃើញថា ការផ្ទេរនេះកំពុងស្ថិតយ៉ាងប្រកៀកក្នុងការឈានទៅដល់ការបញ្ចប់ ហើយ Rooney វ័យ31ឆ្នាំ ពិតជាចង់ផ្ទេរទៅកាន់កីឡដ្ឋាន Goodison ពោលគឺរយៈពេល13ឆ្នាំ ក្រោយពីរូបគេបានចាកចេញដើម្បីទៅចូលរួមជាមួយនឹងក្លិប Man United បើទោះបីមានការចាប់អារម្មណ៍ពីក្លិបផ្សេងក៏ដោយ។ Man United នឹងលើកលែងចំពោះតម្លៃខ្លួន ខណៈដែលនេះអាចជាផ្នែកមួយនៃប្រាក់បៀវត្សរ៍13លានផោនក្នុងមួយឆ្នាំរបស់ Rooney។ រូបគេប្រហែលជាមិនចូលរួមក្នុងក្រុម Man United ដែលត្រូវចេញទៅធ្វើការប្រកួតមុនបើករដូវកាលរបស់ពួកគេនៅលើទឹកដីសហរដ្ឋអាមេរិក នៅថ្ងៃអាទិត្យនេះឡើយ។ ជាមួយគ្នានេះ ការផ្ទេរនេះ ក៏មិនជាប់ទាក់ទងនឹងការប្រមាញ់ទិញខ្សែប្រយុទ្ធ Romelu Lukaku ពីក្លិប Everton របស់ក្រុម Man United ដែរ។
Rooney បានចុះកុងត្រាថ្មីរយៈពេល4ឆ្នាំកន្លះ អំឡុងពេលនៃយុទ្ធនាការឆ្នាំ2013-2014 ដែលក៏រាប់បញ្ចូលទាំងជម្រើសនៃការបន្តរយៈពេល1ឆ្នាំទៀតផងដែរ ប៉ុន្តែ ក្លិប Man United មិនមានបំណងប្រើប្រាស់លក្ខខណ្ឌនេះឡើយ។ អនាគតរបស់ប្រធានក្រុមនៃក្រុមជម្រើសជាតិអង់គ្លេសរូបនេះ ដែលបានចូលលេងក្នុងជម្រើសដំបូងនៃក្របខ័ណ្ឌ Premier League ត្រឹមតែ15លើកគត់កាលពីរដូវកាលមុននោះ បានក្លាយជាប្រធានបទនៃពាក្យចរចាមអារ៉ាមផ្សេងៗអស់រយៈពេលជាច្រើនខែមកហើយ៕
ប្រភពព័ត៌មាន៖ BBC
July 8, 2017
Man Utd យល់ព្រមលើតម្លៃខ្លួនរបស់ Lukaku ដែលមកពី Everton
ក្លិបបិសាចក្រហម Manchester United បានយល់ព្រមលើតម្លៃខ្លួន 75លានផោន (ស្មើនឹង 97លានដុល្លារអាមេរិក) ជាមួយនឹងក្លិបទូកក្តោង Everton ដើម្បីទិញយកខ្សែប្រយុទ្ធ Romelu Lukaku។ Man United ជឿជាក់ថា នឹងបំពេញការផ្ទេរនេះឲ្យបានរួចរាល់នៅមុនចុងសប្តាហ៍នេះ ដើម្បីអាចឲ្យ Lukaku ធ្វើដំណើរជាមួយពួកគេទៅកាន់ទឹកដីសហរដ្ឋអាមេរិកនៅថ្ងៃអាទិត្យ។
បើទោះបីប្រភពពីក្លិប Everton បានបញ្ជាក់ថា វានៅសល់ចំណុចជាច្រើនទៀតដើម្បីធ្វើឲ្យការផ្ទេរនេះបំពេញរួចជាផ្លូវការក៏ដោយ ប៉ុន្តែ Man United ជឿជាក់ថា ពួកគេនឹងបំពេញរួចរាល់នូវការទិញចូលកីឡាករមានតម្លៃខ្លួនខ្ពស់ជាងគេបំផុតលំដាប់ទី2ក្នុងប្រវត្តិសាស្ត្ររបស់ពួកគេបន្ទាប់ពីខ្សែបម្រើដ៏មានឥទ្ធិពល Paul Pogba។ ខ្សែប្រយុទ្ធអន្តរជាតិបែលហ្ស៊ិក Lukaku នឹងក្លាយជាកីឡាករចំណូលថ្មីទី2នៅរដូវក្តៅនេះ ក្រោយពីការចូលរួមរបស់ខ្សែការពារអន្តរជាតិស៊ុយអែត Victor Lindelof ពីក្លិប Benfica ក្នុងតម្លៃខ្លួន31លានផោន។
លោក Jose Mourinho ដែលជាអ្នកចាត់ការទូទៅរបស់ Man United បានសម្តែងនូវការខកចិត្តចំពោះការខ្វះនូវដំណើរការនៃការទិញចូលកីឡាករថ្មីៗ ខណៈដែលគ្រូបង្វឹករូបនេះ បានបញ្ជាក់កាលពីដើមរដូវក្តៅនេះថា លោកចង់បានកីឡាករថ្មីៗឲ្យបានច្រើននាក់ នៅមុនពេលពួកគេធ្វើដំណើរទៅប្រកួតមិត្តភាពមុនបើករដូវកាល។ ប្រសិនបើបំពេញជាផ្លូវការរួចរាល់ ការផ្ទេរនេះនឹងផ្តល់ការខកចិត្តដ៏ធំមួយដល់ក្លិបតោខៀវ Chelsea ក្រោយពីអ្នកចាត់ការទូទៅរបស់ពួកគេគឺលោក Antonio Conte បានចាត់ទុក Lukaku ជាគោលដៅដ៏ចម្បងរបស់លោកក្នុងការពង្រឹងតំបន់ប្រយុទ្ធ៕
ប្រភពព័ត៌មាន៖ The Guardian
July 7, 2017
បិសាចក្រហម Man Utd បំពេញការផ្ទេរ Lindelof ពី Benfica ជាផ្លូវការ
ក្លិប Manchester United បានបំពេញការចុះហត្ថលេខាជាមួយនឹងខ្សែការពារអន្តរជាតិស៊ុយអែត Victor Lindelof ជាផ្លូវការពីក្លិបម្ចាស់ជើងឯកព័រទុយហ្គាល់ Benfica ហើយ ក្នុងកិច្ចសន្យារយៈពេល 4ឆ្នាំ ជាមួយនឹងជម្រើសក្នុងការបន្តកិច្ចសន្យារយៈពេល1ឆ្នាំទៀត។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃពុធ។
ក្រុមម្ចាស់ជើងឯករបស់អង់គ្លេស 2០សម័យកាលមួយនេះ បានឲ្យដឹងនៅលើគេហទំព័រផ្លូវការរបស់ខ្លួនថា៖ «ក្លិប Manchester United ពិតជារីករាយណាស់ក្នុងការប្រកាសពីការចុះហត្ថលេខាជាមួយនឹង Victor Lindelof មកពីក្លិប Benfica ចាប់ពីថ្ងៃទី1 ខែកក្កដា ឆ្នាំ2017 តទៅ»។ Man United បានបន្ថែមទៀតថា៖ «ខ្សែការពារកណ្តាលអន្តរជាតិស៊ុយអែតរូបនេះ គឺជាខ្សែការពារដ៏រឹងមាំម្នាក់ ហើយនឹងធ្វើការបង្ហាញខ្លួនជាលើកទី1របស់គេក្នុងដំណើរទៅប្រកួតមិត្តភាពលើទឹកដីសហរដ្ឋអាមេរិក នៅខែកក្កដាខាងមុខ»។
Lindelof ដែលក្លិប Benfica បានបញ្ជាក់ថា នឹងមានតម្លៃខ្លួន35លានអឺរ៉ូ (ស្មើនឹង39លានដុល្លារអាមេរិក) នោះ គឺជាកីឡាករចំណូលថ្មីដំបូងគេរបស់លោក Jose Mourinho នារដូវក្តៅនេះ ក្រោយពីក្រុមរបស់លោកបានឈ្នះពាន Europa League កាលពីខែមុន ដើម្បីឈ្នះសិទ្ធិទៅប្រកួតក្របខ័ណ្ឌ Champions League នារដូវកាលក្រោយ។ លោក Mourinho អ្នកចាត់ការទូទៅរបស់ Man United បានប្រាប់គេហទំព័ររបស់ក្លិបនេះថា៖ «Victor ពិតជាកីឡាករវ័យក្មេងដ៏មានទេពកោសល្យម្នាក់ ដែលមានអនាគតដ៏អស្ចារ្យសម្រាប់រូបគេនៅក្នុងក្លិប Man United»។
គ្រូបង្វឹកសញ្ជាតិព័រទុយហ្គាល់រូបនេះបានបន្ថែមទៀតថា៖ «រដូវកាលរបស់យើងកាលពីឆ្នាំមុន បានបង្ហាញឲ្យយើងឃើញហើយថា យើងត្រូវការជម្រើស និងគុណភាពជាច្រើនទៀតសម្រាប់បន្ថែមឱ្យក្រុមយើងនេះ ហើយ Victor គឺកីឡាករដំបូងគេក្នុងការចូលរួមជាមួយយើងនៅរដូវក្តៅនេះ។ ខ្ញុំដឹងថា ក្រុមកីឡាករដ៏អស្ចារ្យរបស់យើង នឹងស្វាគមន៍រូបគេក្នុងនាមជាសមាជិកម្នាក់របស់យើង»៕
ប្រភពពី៖ Sports.yahoo

June 15, 2017
Man United ចុះហត្ថលេខាជាមួយ Lindelof មកពី Benfica
ក្លិបបិសាចក្រហម Manchester United បានឈានដល់ការព្រមព្រៀងគ្នាមួយដើម្បីចុះហត្ថលេខាជាមួយនឹងខ្សែការពារអន្តរជាតិស៊ុយអែត Victor Lindelof ពីក្លិប Benfica ក្នុងតម្លៃខ្លួន 30.7លានផោន (ស្មើនឹង 39លានដុល្លារអាមេរិក)។
ក្រោយពីបានឈ្នះកៅអីទៅលេងក្នុងក្របខ័ណ្ឌ Champions League តាមរយៈការឈ្នះពាន Europa League ដើម្បីបន្ថែមទៅលើពាន EFL Cup និង Community Shield របស់ពួកគេ ទើបការផ្តោតអារម្មណ៍ផ្សេងៗរបស់ក្រុម Man United បានធ្លាក់ទៅលើការពង្រឹងក្រុមរបស់ខ្លួនភ្លាមៗ។ ខ្សែការពារកណ្តាលរូបនេះបច្ចុប្បន្ននឹងក្លាយជាកីឡាករចំណូលថ្មីដំបូងគេរបស់លោក Jose Mourinho នៅរដូវក្តៅនេះ ក្រោយពី Man United បានឈានដល់ការព្រមព្រៀងគ្នាមួយជាមួយនឹងក្រុមម្ចាស់ជើងឯកព័រទុយហ្គាល់ Benfica។
ក្លិប Man United របស់ក្របខ័ណ្ឌ Premier League បានចេញសេចក្តីថ្លែងការណ៍មួយលើគេហទំព័រផ្លូវការរបស់ខ្លួនថា៖ «ក្លិប Manchester United ពិតជារីករាយណាស់ក្នុងការប្រកាសថា យើងបានឈានដល់ការព្រមព្រៀងគ្នាមួយជាមួយនឹងក្លិប Benfica ដើម្បីនាំយក Victor Lindelof ខណៈដែលការផ្ទេរនេះនឹងត្រូវបំពេញក្រោយពីការត្រួតពិនិត្យសុខភាព ការជម្រះបញ្ហាអន្តរជាតិ និងការព្រមព្រៀងលើលក្ខខណ្ឌផ្ទាល់ខ្លួនផ្សេងៗរួច»។ ក្លិបបិសាចក្រហមមួយនេះ បានបន្ថែមទៀតថា៖ «សេចក្តីប្រកាសបន្ថែមទៀតនឹងត្រូវធ្វើឡើងនៅពេលដែលការផ្ទេរនេះបំពេញជាផ្លូវការ»។ Lindelof បានអភិវឌ្ឍខ្លួនចេញពីក្រុមយុវជនរបស់ Benfica មុននឹងចូលលេងក្នុងក្រុមឈុតធំចាប់ពីឆ្នាំ 2013 ដោយបានបង្ហាញខ្លួនសរុប 48លើក និងបានស៊ុតបាល់បញ្ចូលទី 2គ្រាប់៕
ប្រភពពី៖ The Guardian
June 12, 2017
Zlatan នឹងត្រូវចាកចេញក្រោយពី Man United មិនបន្តកុងត្រាថ្មី
ក្លិប Manchester United ប្រហែលជាមិនអាចផ្តល់កុងត្រាថ្មីមួយដល់ខ្សែប្រយុទ្ធ Zlatan Ibrahimovic ឡើយ។ នេះបើយោងទៅតាមប្រភពផ្សេងៗរបស់ទូរទស្សន៍ Sky Sports។
Man United មានជម្រើសមួយក្នុងការបន្តកិច្ចសន្យារយៈពេល 12ខែទៀតទៅលើកុងត្រារយៈពេល 1ឆ្នាំរបស់ Ibrahimovic ខណៈដែលកុងត្រាចាស់របស់គេនឹងត្រូវផុតកំណត់នៅចុងខែនេះ។ ប៉ុន្តែ បើទោះបីខ្សែប្រយុទ្ធវ័យ 35ឆ្នាំរូបនេះ ចង់បន្តនៅកីឡដ្ឋាន Old Trafford ក៏ដោយ ក៏ប្រភពជាច្រើន បាននិយាយថា ឈ្មោះរបស់គេស្ថិតក្នុងបញ្ជីកីឡាករដែលត្រូវចាកចេញពីក្លិប Man United ដែលនឹងត្រូវចេញផ្សាយដោយក្របខ័ណ្ឌ Premier League នៅថ្ងៃសុក្រនេះ។
Ibrahimovic បានទទួលការវះកាត់យ៉ាងជោគជ័យទៅលើបញ្ហារបួសជង្គង់របស់គេ កាលពីដើមខែឧសភា ហើយក្រុមវេជ្ជបណ្ឌិតបានកោតសរសើរចំពោះការវិវឌ្ឍយ៉ាងឆាប់រហ័សរបស់គេ ប៉ុន្តែ វាត្រូវបានគេរំពឹងទុកថា នៅដើមឆ្នាំ2018 ទើបរូបគេអាចចូលលេងវិញបាន។
ការអនុញ្ញាតឲ្យខ្សែប្រយុទ្ធដែលរកបានគ្រាប់បាល់បានច្រើនជាងគេរូបនេះចាកចេញ នឹងធ្វើឲ្យ Man United ចំណេញប្រាក់ខែជាច្រើន ពោលគឺច្រើនជាង 19លានផោន (ស្មើនឹង 24,3លានដុល្លារអាមេរិក) ក្នុងមួយឆ្នាំ នៅមុនពេលបើកទីផ្សារដោះដូរកីឡាករ។ នេះបើយោងតាមតួលេខដែលត្រូវបានចេញផ្សាយកាលពីពេលថ្មីៗនេះ។
Man United ពោរពេញដោយការជឿជាក់ក្នុងការបំពេញការផ្ទេរយកខ្សែប្រយុទ្ធ Alvaro Morata របស់ក្លិប Real Madrid ក្នុងតម្លៃខ្លួន 6០លានផោន (ស្មើនឹង 77លានដុល្លារអាមេរិក) ស្របពេលដែលកីឡាករ Raphael Varane ក៏ស្ថិតក្នុងចំណោមខ្សែការពារដែលត្រូវទិញចូលផងដែរ៕
ប្រភពពី៖ Sky Sports
June 9, 2017
Man United លុបចោលការចាប់អារម្មណ៍ទៅលើការផ្ទេរ Griezmann ពី Atletico
ក្លិប Manchester United បានដកការចាប់អារម្មណ៍របស់ពួកគេពីការចុះហត្ថលេខាជាមួយនឹងខ្សែប្រយុទ្ធអន្តរជាតិបារាំង Antoine Griezmann របស់ក្លិប Atletico Madrid។ នេះបើយោងទៅតាមប្រភពជិតដិតមួយរបស់ក្លិបនេះកាលពីថ្ងៃព្រហស្បតិ៍។ Man United ដែលជាម្ចាស់ជើងឯកក្របខ័ណ្ឌ Europa League ត្រូវបានបណ្តាញសារព័ត៌មានចេញផ្សាយថា កំពុងតែរៀបចំផែនការក្នុងការទិញយក Griezmann វ័យ២៦ឆ្នាំ។ ប៉ុន្តែ ប្រភពមួយ និងបណ្តាញសារព័ត៌មានជាច្រើនរបស់ចក្រភពអង់គ្លេសអះអាងថា ក្លិបបិសាចក្រហម Man United បានផ្លាស់ប្តូរការចាប់អារម្មណ៍របស់ពួកគេ។ ក្លិបនេះត្រូវបានគេយល់ឃើញថា បានដាក់អាទិភាពរបស់ខ្លួនទៅលើការនាំយកខ្សែប្រយុទ្ធកណ្តាលដ៏មានសក្តានុពលជំនួសវិញ។
ខ្សែប្រយុទ្ធ Zlatan Ibrahimovic របស់ Man United នៅតែស្ថិតក្នុងបញ្ហារបួសជង្គង់រយៈពេលវែង ហើយនឹងត្រូវផុតកិច្ចសន្យារបស់គេនៅចុងខែនេះ។ តុលាការអាជ្ញាកណ្តាលកីឡា កាលពីថ្ងៃព្រហស្បតិ៍បានចេញសេចក្តីសម្រេចដាក់ពិន័យព្យួរលើការដោះដូរកីឡាករប្រឆាំងនឹង Atletico ជុំវិញការប្រព្រឹត្តល្មើសនឹងការចុះហត្ថលេខាកីឡាករបរទេសមានអាយុក្រោម១៨ឆ្នាំ។ វាមានន័យថា ក្លិបស្ថិតក្នុងទីក្រុង Madrid មួយនេះ នឹងមិនអាចទិញចូលកីឡាករថ្មីរហូតដល់ខែមករា ឆ្នាំ២០១៨។ Atletico កំពុងតែមានបំណងក្នុងការលក់ Griezmann និងទិញយកខ្សែប្រយុទ្ធអន្តរជាតិបារាំងម្នាក់ទៀត Alexandre Lacazette ពីក្លិប Lyon ដើម្បីជំនួសកន្លែងរបស់គេ។ Griezmann គឺជាមិត្តជិតស្និទ្ធរបស់ខ្សែបម្រើ Paul Pogba ដែលកំពុងលេងឲ្យ Man United និងបានបង្ហើបពីការចង់ផ្ទេរទៅកាន់កីឡដ្ឋាន Old Trafford នាពេលថ្មីៗនេះ៕
ប្រភពពី៖ Daily Star

June 2, 2017
Griezmann ប្រកាសថា គេចង់បន្តនៅ Atletico ក្នុងពេលមានការចាប់អារម្មណ៍ពី Man Utd
តារាឆ្នើម Antoine Griezmann បានប្រកាសថា រូបគេចង់បន្តនៅជាមួយនឹងក្លិប Atletico Madrid និងចង់ប្រជែងដណ្តើមយកពានផ្សេងៗជាច្រើនទៀត ស្របពេលកំពុងតែមានការអារម្មណ៍យ៉ាងខ្លាំងពីសំណាក់ក្លិប Manchester United។
ក្រុមបិសាចក្រហមមួយនេះ កំពុងតែត្រៀមដាក់សំណើដេញថ្លៃក្នុងទឹកប្រាក់៨៥លានផោន (ស្មើនឹង១១០លានដុល្លារអាមេរិក) សម្រាប់ Griezmann វ័យ២៦ឆ្នាំ ដែលទើបតែបានប្រកាសកាលពីពេលថ្មីៗថា រូបគេត្រៀមលក្ខណៈរួចរាល់ហើយក្នុងការចាកចេញពីក្លិបយក្សរបស់ក្របខ័ណ្ឌ La Liga មួយនេះ។ ប៉ុន្តែ ទោបីជាយ៉ាងណា ក្នុងពេលនិយាយទៅកាន់គេហទំព័ររបស់ Atletico ខ្សែប្រយុទ្ធអន្តរជាតិបារាំងរូបនេះ បានបញ្ជាក់ថា រូបគេពិតជាស្រេកឃ្លានក្នុងការបន្តនៅជាមួយនឹងក្រុមរបស់លោក Diego Simeone ដោយសន្យាថា នឹងប្រជែងដណ្តើមយកពានរង្វាន់ផ្សេងៗទៀត។
Griezmann បានឲ្យដឹងថា៖ «វាបានក្លាយជាឆ្នាំដ៏អស្ចារ្យមួយ ហើយជាការរំពឹងទុក ខ្ញុំអាចអភិវឌ្ឍជារៀងរាល់ឆ្នាំ និងឈ្នះពានជាច្រើនទៀតជាមួយនឹងក្រុមនេះ។ ខ្ញុំនឹងធ្វើរាល់អ្វីៗទាំងអស់ដែលអាចទៅរួច»។ រូបគេបាននិយាយរួចជាស្រេចអំពីការប្រជែងនៅរដូវកាលក្រោយ និងរបៀបដែល Atletico ត្រូវតែពង្រឹងក្រុមរបស់ខ្លួនជាមួយនឹងមិត្តរួមជាតិបារាំងរបស់គេគឺ Alexandre Lacazette ដែលស្ថិតយ៉ាងប្រកៀកក្នុងការផ្ទេរមកនៅអេស្ប៉ាញដែរ។
អតីតតារាឆ្នើមរបស់ក្លិប Real Sociedad រូបនេះបានឲ្យដឹងថា៖ «យើងពិតជារីករាយណាស់ ពីព្រោះយើងបានសម្រេចគោលដៅរបស់យើង ហើយយើងប្រហែលជាអាចសម្រេចបាននូវគោលដៅជាច្រើនទៀត។ នៅឆ្នាំក្រោយនេះ យើងនឹងមានគោលដៅ និងការប្រជែងថ្មីៗ»៕
ប្រភពពី៖ The Sun
May 26, 2017
Pogba និង Mkhitaryan ជួយឲ្យ Man United ផ្តួល Ajax ដើម្បីឈ្នះពាន Europa League
ក្រុមបិសាចក្រហម Manchester United នឹងវិលទៅកាន់ក្របខ័ណ្ឌកំពូលអឺរ៉ុបវិញនៅរដូវកាលក្រោយ បន្ទាប់ពីបានផ្តួលក្រុម Ajax Amsterdam របស់ហូឡង់ ក្នុងលទ្ធផល ២-០ ដើម្បីឈ្នះពាន Europa League កាលពីថ្ងៃពុធ។
ខ្សែបម្រើដ៏មានឥទ្ធិពល Paul Pogba បានរកគ្រាប់បាល់បើកឆាកយ៉ាងល្អ មុនពេលខ្សែបម្រើ Henrikh Mkhitaryan បានស៊ុតបាល់បកថយក្រោយដើម្បីជួយឲ្យក្រុមខ្លួនទទួលជ័យជម្នះក្នុងការប្រកួតវគ្គផ្តាច់ព្រ័ត្រ ក៏ដូចជាឈ្នះកៅអីទៅលេងក្នុងក្របខ័ណ្ឌ Champions League ដែរ។ ក្រោយពីបានបញ្ចប់ក្នុងចំណាត់ថ្នាក់លេខ៦ នៅលើតារាងនៃក្របខ័ណ្ឌ Premier League លោក Jose Mourinho បានឱ្យដឹងថា ការទទួលជ័យជម្នះនេះនឹងក្លាយជាមធ្យោបាយតែមួយគត់សម្រាប់ឱ្យក្រុមរបស់លោកឈានទៅប្រកួតក្នុងក្របខ័ណ្ឌកំពូលរបស់អឺរ៉ុប នារដូវកាលក្រោយ។
ក្រោយពីបានធ្វើការស្មឹងស្មាធិ៍រយៈពេល១នាទីនៅមុនពេលការប្រកួតចាប់ផ្តើមដើម្បីរំឭកដល់វិញ្ញាណក្ខន្ធរបស់ជនរងគ្រោះក្នុងការវាយប្រហារភេរវកម្មនៅទីក្រុង Manchester រួចមក ខ្សែបម្រើ Pogba បានតបស្នងចំពោះការផ្ទេរមកក្នុងតម្លៃខ្លួនជាកំណត់ត្រាពិភពលោករបស់គេ ដោយបានស៊ុតបាល់បំប៉ោងសំណាញ់ទីនៅនាទីទី១៨។ Man United បានរក្សាការនាំមុខរបស់ខ្លួនរហូតដល់បញ្ចប់ការប្រកួតតង់ទី១ មុនពេល Mkhitaryan បានបន្ថែមការនាំមុខរបស់ក្រុមខ្លួនភ្លាមៗ ក្រោយពីលេងបានត្រឹមតែប៉ុន្មាននាទីនៃតង់ទី២ ដើម្បីបំពេញការទទួលជ័យជម្នះយ៉ាងកក់ក្តៅសម្រាប់ក្រុមខ្លួនតែម្តង។ Pogba បានប្រាប់ទូរទស្សន៍ BT Sport ថា៖ «ទីបំផុត យើងធ្វើបានសម្រេចហើយ យើងពិតជាមានមោទនភាពណាស់ គ្មាននរណាអាចរិះគន់បានឡើយ។ ពួកគេបាននិយាយថា យើងបានជួបរដូវកាលដ៏អន់មួយ ប៉ុន្តែយើងបានឈ្នះពាន៣ ក្នុងនោះរាប់បញ្ចូលទាំងពាន Community Shield ផងដែរ»។
ខ្សែបម្រើអន្តរជាតិបារាំងរូបនេះបានបន្ថែមទៀតថា៖ «ការចាប់ផ្តើមពិតជាសំខាន់ណាស់ ហើយក្រោយពីគ្រាប់បាល់ជោគជ័យទាំង២គ្រាប់នោះ យើងបានគ្រប់គ្រងការប្រកួតនេះទាំងស្រុង។ គ្រប់គ្នាក្នុងក្រុមនេះបានបង្ហាញពីទម្រង់លេងយ៉ាងល្អ»៕
ប្រភពពី៖ The Sun
May 25, 2017