Tag: Manchester City

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក
ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។
បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។
ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។
តារាងចំណាត់ថ្នាក់របស់ Brand Finance
ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។
បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។
Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕
June 6, 2023
ធ្វើជាម្ចាស់ថ្មីរបស់ MU អ្នកវិនិយោគមកពីកាតាសម្រេចចិត្តលុបបំបាត់ «គោលការណ៍ Ronaldo»
Sheikh Jassim bin Hamad al-Thani ចង់លុបបំបាត់គោលការណ៍ដែលរារាំងកីឡាករទទួលបានប្រាក់បៀវត្សខ្ពស់ជាង បើធៀបនឹងមិត្តរួមក្រុមដទៃដែល Manchester United កំពុងអនុវត្ត។
ទំព័រ Sun Sport ថ្មីៗនេះបានរាយការណ៍ថា ម្ចាស់ថ្មីដ៏មានសក្ដានុពលរបស់ Man United នឹងលុបចោលការកំណត់ស្ដីពីប្រាក់បៀវត្សក្នុងសម័យរបស់គ្រូបង្វឹក Erik ten Hag ដែលបង្កើតឡើងដើម្បីកាត់បន្ថយការចំណាយរបស់ក្លឹប បន្ទាប់ពីការចាក់ចេញរបស់ Cristiano Ronaldo កាលពីចុងឆ្នាំមុន។
យោងតាមអ្វីដែលគេហៅថា «គោលការណ៍ Ronaldo» ក្លឹប Man United បានកំណត់ប្រាក់បៀវត្សអតិបរមាប្រចាំសប្ដាហ៍ត្រឹម 200,000 ផោនអង់គ្លេស ហើយនឹងមិនផ្ដល់ប្រាក់បៀវត្សលើសពីនេះដល់កីឡាករណាទាំងអស់។ គោលការណ៍នេះត្រូវបានដាក់ឈ្មោះមិនផ្លូវការទៅតាមឈ្មោះរបស់ Ronaldo ព្រោះតែកំពូលតារាបាល់ទាត់ព័រទុយហ្កាល់រូបនេះ ធ្លាប់ទទួលបានប្រាក់បៀវត្ស 385,000 ផោន/សប្ដាហ៍ នៅក្នុងការធ្វើការឱ្យក្លឹបនេះលើកទីពីរ មុនពេលទំនាក់ទំនងរវៀង CR7 និង Man United ត្រូវបញ្ចប់ក្នុងភាពចម្រូងចម្រាស។
ការសម្រេចចិត្តរបស់ម្ចាស់ថ្មី ជំរុញឱ្យបីសាចក្រហមអាចទាក់ទាញបណ្ដាកីឡាករលំដាប់ពិភពលោក មកចូលរួមជាមួយគ្រួសារ Old Trafford ក្នុងនោះមាន Neymar របស់ក្លឹប PSG ជាដើម។ ការលុបចោល «គោលការណ៍ Ronaldo» ក៏អាចជួយឱ្យ Man United រក្សាកំពូលកីឡាករដែលមានបច្ចុប្បន្ន មានដូចជា Marcus Rashford ជាដើម ដែលកំពុងរារែកក្នុងការចុះកិច្ចព្រមព្រៀងថ្មី ព្រោះតែប្រាក់បៀវត្សដែលត្រូវបានលើកឡើងដោយភាគីក្លឹប។
Sheikh Jassim អ្នកវិនិយោគមកពីកាតា បានធ្វើការប្រឹងប្រែងដើម្បីដណ្ដើមបានសិទ្ធិធ្វើជាម្ចាស់របស់ Man United ពីគ្រួសារ Glazer។ មុនពេលម្ចាស់ថ្មីមកកាន់ Old Trafford ក្រុម Man United នឹងត្រូវបញ្ចប់រដូវកាល Premier League 2022/2023 ដោយការប្រកួតនៅលើទីលានរបស់ខ្លួន ជាមួយនឹង Fulham និងប៉ះ Manchester City ក្នុងវគ្គផ្ដាច់ព្រ័ត្រ FA Cup នៅសប្ដាហ៍ក្រោយ៕
May 27, 2023
ដើម្បីជំនួស Messi ក្លឹប PSG ត្រៀមទិញយកកីឡាករឆ្នើមរបស់ Arsenal ?
Paris Saint-Germain ត្រូវបានគេជឿថា បានបញ្ចូលឈ្មោះប្រធានក្រុមរបស់ Arsenal ទៅក្នុងបញ្ជីសម្រាំងចុងក្រោយរបស់ខ្លួនដើម្បីជំនួស Lionel Messi។
យោងតាមការចុះផ្សាយរបស់ទំព័រ Mirror Football តារាបាល់ទាត់អាហ្សង់ទីន លោក Messi ត្រូវគេជឿថា នឹងចាកចេញពី PSG នៅពេលកិច្ចព្រមព្រៀងបានផុតកំណត់នៅចុងរដូវកាលនេះ។ បើទោះជា Barcelona នៅតែចង់ចុះកិច្ចព្រមព្រៀងជាមួយ Messi ប៉ុន្តែ «ផ្ទះថ្មី» របស់តារាបាល់ទាត់អាហ្សង់ទីនរូបនេះ ក៏នៅមិនទាន់ច្បាស់លាស់។
PSG កំពុងធ្វើការដើម្បីចុះកិច្ចព្រមព្រៀងជាមួយកីឡាករម្នាក់ក្នុងបំណងជំនួស Messi នៅរដូវក្ដៅឆ្នាំនេះ។ ព័ត៌មានចចាមអារ៉ាមនាពេលថ្មីៗនេះ យល់ថា Bernardo Silva របស់ Manchester City កំពុងក្លាយជាគោលដៅរបស់ក្លឹបនៅប៉ារីស តែមិនទាន់សម្រេចចិត្តចុងក្រោយ។
ចំណែកទំព័រ El Nacional វិញ យល់ថា PSG បានដាក់គោលដៅលើកីឡាករន័រវែស Martin Odegaard ដែលជាប្រធានក្រុមរបស់ Arsenal។ Martin Odegaard បានក្លាយជាកីឡាករឆ្នើមបំផុតនៅ Premier League កាលពីខែមីនាកន្លងទៅ។
ទោះជាយ៉ាងនេះក៏ដោយ គ្រូបង្វឹក Mikel Arteta របស់ Arsenal បានច្រានចោលព័ត៌មានខាងលើ និងបានធានាថា កិច្ចព្រមព្រៀងជាមួយ Martin Odegaard ដែលនៅសល់ពីរឆ្នាំទៀត នឹងនៅតែរឹងមាំ៕
May 18, 2023
Iheanacho បំពេញការផ្ទេរពី Man City ទៅ Leicester ក្នុងតម្លៃខ្លួន25លានផោន
ក្លិប Leicester City កាលពីថ្ងៃព្រហស្បតិ៍ បានប្រកាសពីការចុះហត្ថលេខាជាមួយនឹងខ្សែប្រយុទ្ធអន្តរជាតិនីហ្សេរីយ៉ា Kelechi Iheanacho ពីក្លិបស្ថិតក្នុងក្របខ័ណ្ឌ Premier League ដូចគ្នា គឺ Manchester City។
Iheanacho វ័យ20ឆ្នាំ បានចុះហត្ថលេខារយៈពេល5ឆ្នាំនៅឯកីឡដ្ឋាន King Power ខណៈដែលតម្លៃខ្លួននៃការផ្ទេរនេះមិនត្រូវបានប្រកាសឲ្យដឹងឡើយ ប៉ុន្តែទោះបីជាយ៉ាងណាក៏បណ្តាញសារព័ត៌មាន BBC បានចេញផ្សាយថា តម្លៃខ្លួននៃការផ្ទេរនេះមានចំនួន25លានផោន (ស្មើនឹង33លានដុល្លារអាមេរិក)។ លោក Craig Shakespeare អ្នកចាត់ការទូទៅរបស់ក្រុម Leicester បានឲ្យដឹងថា៖ «វាជាការចុះហត្ថលេខាដ៏អស្ចារ្យមួយសម្រាប់យើង។
Kelechi គឺជាកីឡាករប្រកបដោយទេពកោសល្យម្នាក់ដែលបានបង្ហាញពីទម្រង់ការលេងដ៏គួរឲ្យរំភើបក្នុងរាល់កម្រិតទាំងអស់ដែលរូបគេបានលេង»។ Iheanacho នឹងក្លាយជាកីឡាករចំណូលថ្មីទី4 របស់ក្លិប Leicester អំឡុងពេលរដូវកាលក្តៅនេះ ក្រោយពីការនាំយកខ្សែបម្រើ Vicente Iborra ពីក្លិប Sevilla អ្នកចាំទី Eldin Jakupovic និងខ្សែការពារ Harry Maguire ពីក្លិប Hull City។ Iheanacho នឹងពាក់អាវលេខ8 ហើយនិងចូលរួមជាមួយនឹងមិត្តរួមជាតិនីហ្សេរីយ៉ាដូចគ្នា Wilfred Ndidi និង Ahmed Musa ជាមួយនឹងក្រុមម្ចាស់ជើងឯកក្របខ័ណ្ឌ Premier League ឆ្នាំ2016មួយនេះ។
Iheanacho បានឲ្យដឹងថា៖ «ខ្ញុំពិតជារីករាយណាស់ក្នុងការចូលរួមក្នុងក្រុមនេះ។ ខ្ញុំដឹងពីមហិច្ឆតារបស់ក្រុមនេះ ហើយក្រោយពីការពិភាក្សាជាមួយនឹងអ្នកចាត់ការទូទៅ គាត់បានអនុញ្ញាតឲ្យខ្ញុំបានដឹងពីអ្វីដែលខ្ញុំត្រូវធ្វើ ដើម្បីជួយក្រុមនេះឲ្យសម្រេចបាននូវអ្វីដែលពួកគេចង់បាន។ ខ្ញុំពិតជាជឿជាក់ ហើយខ្ញុំរីករាយណាស់ក្នុងការបានមកនៅទីនេះ»៕
ប្រភពពី៖ Sport24
August 4, 2017
Mendy ពិនិត្យសុខភាព មុនពេលបំពេញការផ្ទេរពីទៅ Man City
Benjamin Mendy បានធ្វើដំណើរទៅកាន់ទីក្រុង Los Angeles ដើម្បីពិនិត្យសុខភាពនៅមុនពេលបំពេញការផ្ទេរទៅកាន់ក្លិប Manchester City ក្នុងតម្លៃខ្លួន52លានផោន (ស្មើនឹង67.6លានដុល្លារអាមេរិក) ពីក្លិប Monaco ដែលជាម្ចាស់ជើងឯករបស់បារាំង។
លោក Pep Guardiola បានចាត់ទុកខ្សែការពារអន្តរជាតិបារាំងវ័យ23ឆ្នាំរូបនេះ ជាកីឡាករម្នាក់ក្នុងចំណោមកីឡាករជាសក្តានុពលក្នុងការទិញចូលកាលពីចុងរដូវកាលមុន ក្រោយពីការចាកចេញរបស់ខ្សែការពារ Gael Clichy ប៉ុន្តែ Man City បានរងនូវការច្រានចោលចំពោះសំណើ3លើកដំបូងរបស់ខ្លួនសម្រាប់ Mendy នេះ។ ការផ្ទេរនេះមានន័យថា Monaco នឹងចំណេញប្រាក់ដ៏ច្រើនសន្ធឹកសន្ធាប់ ក្រោយពីពួកគេបានទិញ Mendy ពីក្លិប Marseille ក្នុងតម្លៃខ្លួនតែ11លានផោន កាលពីឆ្នាំ2016។ រូបគេបានបង្ហាញខ្លួនច្រើនជាង100លើកសម្រាប់ Marseille ក្នុងរយៈពេល3រដូវកាល នៅមុនពេលចុះហត្ថលេខារយៈពេល5ឆ្នាំនៅឯក្លិប Monaco កាលពីរដូវក្តៅមុន។
តម្លៃខ្លួនរបស់គេនឹងខ្ពស់ជាងទឹកប្រាក់45លានផោន ដែលក្លិប Man City ធ្លាប់បានចំណាយទិញខ្សែការពារស្លាបស្តាំ Kyle Walker កាលពីដើមខែនេះ និងទឹកប្រាក់47.5លានផោន សម្រាប់ខ្សែការពារ John Stones កាលពីរដូវក្តៅមុន។
Monaco បានឈ្នះពានក្របខ័ណ្ឌ Ligue 1 ជាលើកទី1បើគិតចាប់តាំងពីឆ្នាំ2000មក និងបានឈានទៅប្រកួតក្របខ័ណ្ឌ Champions League ដល់វគ្គពាក់កណ្តាលផ្តាច់ព្រ័ត្រ។ ប៉ុន្តែ បច្ចុប្បន្ន Mendy ក្លាយជាកីឡាករចុងក្រោយគេបំផុតក្នុងការចាកចេញពីក្លិបមួយនេះ ក្រោយពីការចាកចេញរបស់ខ្សែបម្រើអន្តរជាតិព័រទុយហ្គាល់ Bernardo Silva ទៅកាន់ Man City ក្នុងតម្លៃខ្លួន42លានផោន ហើយខ្សែបម្រើ Tiemoue Bakayoko ចូលរួមជាមួយនឹងក្លិប Chelsea ក្នុងតម្លៃខ្លួន34លានផោន៕
ប្រភពពី៖ The Guardian
July 24, 2017
Man City និង Chelsea កំពុងប្រជែងគ្នាទិញ Danilo ពី Real
ក្លិបយក្សអង់គ្លេស Manchester City និង Chelsea កំពុងតែប្រជែងគ្នាទិញយកខ្សែការពារអន្តរជាតិស្លាបស្តាំ Danilo ពីក្លិប Real Madrid ក្នុងតម្លៃខ្លួន26លានផោន (ស្មើនឹង34លានដុល្លារអាមេរិក)។ លោក Pep Guardiola អ្នកចាត់ការទូទៅរបស់ Man City ចាត់ទុក Danilo ជាកីឡាករដែលអាចលេងបានទាំងក្នុងតំបន់ការពារស្លាប និងតំបន់បម្រើ ស្របពេលដែលគ្រូបង្វឹករបស់ក្លិបតោខៀវ Chelsea លោក Antonio Conte ចង់ពង្រឹងតំបន់ការពារក្នុងក្រុមរបស់លោក។ ប៉ុន្តែ លោក Conte នឹងមិនចុះហត្ថលេខាជាមួយនឹងខ្សែប្រយុទ្ធ Sergio Aguero របស់ក្លិប Man City ឡើយ។ នេះបើយោងទៅតាមការបញ្ជាក់របស់លោក Guardiola។ គ្រូបង្វឹកសញ្ជាតិអេស្ប៉ាញរូបនេះបានឲ្យដឹងថា៖ «រូបគេជាកីឡាកររបស់យើង ហើយរូបគេនឹងនៅតែបន្តនៅទីនេះ»។
លោក Conte ពិតជាចង់ចុះហត្ថលេខាជាមួយនឹងខ្សែប្រយុទ្ធរូបនេះ ដើម្បីជំនួសខ្សែប្រយុទ្ធអេស្ប៉ាញ ដែលធ្លាក់ចេញពីការចាប់អារម្មណ៍គឺ Diego Costa។ Danilo វ័យ26ឆ្នាំ បានចូលរួមជាមួយនឹងក្លិប Real Madrid ក្រោយពីចាកចេញពីក្លិប Porto កាលពីឆ្នាំ2015 ប៉ុន្តែ រូបគេបានក្លាយជាខ្សែការពារស្លាបស្តាំជម្រើសទី2របស់ក្លិបអេស្ប៉ាញមួយនេះ ក្នុងការប្រកួតភាគច្រើនកាលពីរដូវកាលមុន។
រូបគេបានចូលលេងក្នុងជម្រើសទាំង11នាក់ដំបូងនៃក្របខ័ណ្ឌ La Liga ចំនួន17ប្រកួតសម្រាប់ក្រុម Real Madrid ខណៈដែលកីឡាករ Dani Carvajal ត្រូវបានប្រើប្រាស់ច្រើនជាងសម្រាប់ការប្រកួតធំៗភាគច្រើន ក្នុងនោះរាប់បញ្ចូលទាំងការប្រកួតក្របខ័ណ្ឌ Champions League វគ្គផ្តាច់ព្រ័ត្រទៀតផង។
Man City ដែលបានបញ្ចប់ក្នុងចំណាត់ថ្នាក់លេខ3នៃក្របខ័ណ្ឌ Premier League កាលពីរដូវកាលមុននោះ បានចុះហត្ថលេខាជាមួយនឹងកីឡាករថ្មី4នាក់រួចជាស្រេច ដែលរួមមានអ្នកចាំទី Ederson Moraes ខ្សែការពារស្លាបស្តាំ Kyle Walker ខ្សែបម្រើស្លាប Bernardo Silva និងខ្សែបម្រើ Douglas Luiz៕
ប្រភពពី៖ BBC
July 20, 2017
Man City ដាក់សំណើដេញថ្លៃទិញ Pepe Reina ពីក្លិប Napoli
ក្លិប Manchester City ចង់ទិញអ្នកចាំទី Pepe Reina របស់ក្លិប Napoli ក្នុងការដោះដូរកីឡាករនៅរដូវក្តៅនេះ ហើយប្រសិនបើទទួលជោគជ័យ ការផ្ទេរនេះនឹងបញ្ចប់ពេលវេលាដ៏ចម្រូងចម្រាសរបស់អ្នកចាំទី Claudio Bravo ក្នុងក្លិបនេះ។
Man City ត្រូវបានគេមើលឃើញថា បានដាក់សំណើជាបឋមក្នុងតម្លៃខ្លួន 2.5លានផោន (ស្មើនឹង3.3លានដុល្លារអាមេរិក) សម្រាប់អ្នកចាំទីវ័យ 34ឆ្នាំរូបនេះដែលបានចំណាយពេល 9ឆ្នាំនៅឯក្លិប Liverpool ហើយក៏បានលេងឲ្យក្លិប Barcelona, Villlarreal និង Bayern Munich ផងដែរ។
រូបគេនឹងផ្តល់ឲ្យលោក Pep Guardiola ដែលជាអ្នកចាត់ការទូទៅរបស់ Man City នូវបទពិសោធដ៏ទូលំទូលាយ។ ប្រសិនបើ Reina ពិតជាចូលរួមមែននោះ មានន័យថា អាជីពដ៏ចម្រូងចម្រាសរបស់ Bravo នៅឯក្លិប Man City នឹងត្រូវបញ្ចប់ក្រោយពីបានលេងត្រឹមតែរយៈពេល1រដូវកាលមកនោះ។ វាក៏នឹងបង្កើតឲ្យមានសំណួរបន្ថែមទៀតជុំវិញការកាត់សេចក្តីរបស់លោក Guardiola ទាក់ទងនឹងអ្នកចាំទីផងដែរ។ នៅពេលដែលកាន់តំណែងក្នុងនាមជាគ្រូបង្វឹកបង្គោលកាលពីរដូវក្តៅមុន គ្រូបង្វឹកសញ្ជាតិអេស្ប៉ាញរូបនេះបានសម្រេចចិត្តថា Joe Hart ដែលជាអ្នកចាំទីជម្រើសទី1 មិនល្អគ្រប់គ្រាន់ឡើយ។
បញ្ហានេះបាននាំឲ្យមានការទិញចូល Bravo ហើយ Hart បានទៅលេងក្នុងនាមជាកីឡាករកម្ចីនៅឯក្លិប Torino។ អ្នកចាំទីអន្តរជាតិស៊ីលីរូបនេះ បានធ្វើឲ្យមានកំហុសជាបន្តបន្ទាប់ដែលនាំឲ្យ Man City បាត់បង់ពិន្ទុដ៏សំខាន់។ កាលពីខែមុន លោក Guardiola បានដឹងពីកំហុសរបស់លោកតាមរយៈការទិញអ្នកចាំទី Ederson ពីក្លិប Benfica ក្នុងតម្លៃខ្លួន34.69លានផោនដើម្បីធ្វើជាអ្នកចាំទីជម្រើសទី1៕
ប្រភពពី៖ The Guardian
July 18, 2017
Dani Alves របស់ Juventus ត្រៀមចូលរួមជាមួយ Man City
ក្លិប Manchester City បានដាក់សំណើទៅកាន់ក្លិប Juventus ជុំវិញការផ្ទេររបស់កីឡាករ Dani Alves ក្នុងតម្លៃខ្លួន 5លានផោន (ស្មើនឹង 6.4លានដុល្លារអាមេរិក) ហើយលោក Pep Guardiola បានត្រៀមផ្តល់កុងត្រាដល់ខ្សែការពារអន្តរជាតិប្រេស៊ីលរូបនេះ រយៈពេល 2ឆ្នាំ ខណៈដែលគ្រូបង្វឹករូបនេះបន្តនាំចូលកីឡាករថ្មីសម្រាប់រដូវកាលក្រោយ។
Man City កំពុងតែស្វែងរកខ្សែការពារ ក្រោយពីបានអនុញ្ញាតឲ្យ Bacary Sagna និង Gael Clichy ចាកចេញ នៅពេលដែលកិច្ចសន្យារបស់ពួកគេផុតកំណត់នៅចុងខែនេះ។ ជាមួយគ្នានេះដែរ ការផ្ទេរ Kyle Walker របស់ក្លិប Tottenham បានទទួលបរាជ័យ ដោយសារតែ Spurs កំពុងទាមទារតម្លៃខ្លួនច្រើនជាង 40លានផោនសម្រាប់ខ្សែការពារអន្តរជាតិអង់គ្លេសរូបនេះ។ បញ្ហានេះបានជំរុញឲ្យលោក Guardiola ដាក់ការចាប់អារម្មណ៍លើ Alves ជាកីឡាករដែលលោកធ្លាប់បានធ្វើការជាមួយនៅឯក្លិប Barcelona។
ក្លិប Juventus បានប្រកាសថា ពួកគេអាចនឹងបើកចំហឲ្យមានការលក់កីឡាករម្នាក់ដែលបានបង្ហាញពីទម្រង់លេងដ៏គួរឲ្យចាប់អារម្មណ៍ អំឡុងពេលក្រុមម្ចាស់ជើងឯកក្របខ័ណ្ឌ Serie A មួយនេះ បានឈានទៅប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ជាពិសេសក្នុងពេលពួកគេបានយកឈ្នះលើក្រុម Monaco ក្នុងវគ្គពាក់កណ្តាលផ្តាច់ព្រ័ត្រ។ Alves នៅជាប់កិច្ចសន្យារយៈពេល1ឆ្នាំទៀត ហើយ Man City ត្រូវបានបញ្ជាក់ប្រាប់ថា ការដាក់សំណើដេញថ្លៃក្នុងទឹកប្រាក់5លានផោន នឹងគ្រប់គ្រាន់ហើយក្នុងការបញ្ចុះបញ្ចូលឲ្យ Juventus លក់ខ្សែការពារវ័យ34ឆ្នាំរូបនេះ៕
ប្រភពពី៖ The Guardian
June 19, 2017
លោក Klopp ជឿជាក់ថា Liverpool អាចនាំយក Van Dijk ក្នុងតម្លៃខ្លួនខ្ពស់កប់ពពក
លោក Jurgen Klopp ជឿជាក់ថា លោកនឹងផ្តួលក្លិប Manchester City និង Chelsea ក្នុងការប្រជែងទិញយកតារាឆ្នើម Virgil van Dijk ពីក្លិប Southampton ក្នុងតម្លៃខ្លួន 60លានផោន (ស្មើនឹង77លានដុល្លារអាមេរិក)។
លោក Klopp នឹងបញ្ចុះបញ្ចូលឲ្យម្ចាស់កម្មសិទ្ធិក្លិប Liverpool ធ្វើឲ្យ Van Dijk ក្លាយជាកីឡាករទទួលបានចំណូលខ្ពស់ជាងគេបំផុតក្នុងប្រវត្តិសាស្ត្ររបស់ពួកគេ ក្នុងកិច្ចព្រមព្រៀងគ្នាដែលអាចនឹងផ្តល់ចំណូលជិត 20ម៉ឺនផោនក្នុងមួយសប្តាហ៍ឱ្យកីឡាកររូបនេះ។ តម្លៃខ្លួន 60លានផោននេះ នឹងធ្វើឲ្យខ្សែការពារកណ្តាលអន្តរជាតិហូឡង់ Van Dijk ដែលបានធ្វើឲ្យក្លិប Southampton ចំណាយប្រាក់ 11,5លានផោនដើម្បីទិញយកកីឡាកររូបនេះពីក្លិប Celtic នោះ ក្លាយជាខ្សែការពារដែលមានតម្លៃខ្លួនខ្ពស់ជាងគេបំផុត។ Van Dijk វ័យ 25ឆ្នាំ ទើបតែបានចុះហត្ថលេខាលើកុងត្រារយៈពេល 6ឆ្នាំជាមួយនឹងក្លិប Southamtpon កាលពីរដូវក្តៅមុន ប៉ុន្តែ បច្ចុប្បន្នរូបគេចង់បានការប្រជែងដ៏ធំមួយ ហើយក្លិបរបស់គេក៏ចង់បានតម្លៃខ្លួនដ៏ខ្ពស់មួយពីតារាឆ្នើមរបស់ពួកគេដែរ។
ទាំងលោក Antonio Conte ដែលជាអ្នកចាត់ការទូទៅរបស់ក្លិប Chelsea និងលោក Pep Guardiola របស់ Man City សុទ្ធសឹងចាត់ទុកថា Van Dijk ជាកីឡាករសំខាន់ដែលត្រូវទិញចូលនៅរដូវក្តៅនេះ។ ប៉ុន្តែ អ្នកចាត់ការទូទៅទាំងពីរនឹងត្រូវជួបឧបសគ្គដ៏ធំមួយ ក្រោយពី Van Dijk បានបញ្ជាក់ប្រាប់ក្លិប Southampton កាលពីពេលថ្មីៗនេះ រូបគេចង់ចាកចេញដើម្បីចូលរួមជាមួយនឹងក្លិបហង្សក្រហម Liverpool៕
ប្រភពពី៖ The Sun
June 6, 2017
Villareal ចុះហត្ថលេខាជាមួយខ្សែប្រយុទ្ធវ័យក្មេង Unal មកពីក្លិប Man City
ក្លិប Villareal បានចុះហត្ថលេខាជាមួយនឹងខ្សែប្រយុទ្ធ Enes Unal វ័យ២០ឆ្នាំមកពីក្លិប Manchester City របស់ក្របខ័ណ្ឌ Premier League ក្នុងកិច្ចសន្យារយៈពេល៥ឆ្នាំ។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ La Liga មួយនេះ កាលពីថ្ងៃពុធ។
ខ្សែប្រយុទ្ធអន្តរជាតិតួកគី Unal បានចូលរួមជាមួយនឹងក្លិប Man City កាលឆ្នាំ២០១៥ និងត្រូវបានខ្ចីជើងទៅកាន់ក្លិប Genk របស់បែលហ្ស៊ិក និង NAC Breda របស់ហូឡង់ នៅមុនការចំណាយពេលខ្ចីជើងពេញមួយរដូវកាល នៅឯក្លិប FC Twente សម្រាប់យុទ្ធនាការឆ្នាំ២០១៦-២០១៧ ដោយរូបគេបានស៊ុតបាល់បញ្ចូលទី១៩គ្រាប់ក្នុងការបង្ហាញខ្លួន៣៣លើក។ Unal បានបង្ហាញខ្លួនជាលើកដំបូងនៅក្នុងក្រុមបាល់ទាត់ជម្រើសជាតិតួកគី កាលពីឆ្នាំ២០១៥ ក្នុងវ័យត្រឹមតែ១៧ឆ្នាំ និងបានស៊ុតបាល់បញ្ចូលទីសម្រាប់ក្រុមជម្រើសជាតិរបស់ខ្លួនចំនួន៥គ្រាប់មកទល់ពេលនេះ។ ការផ្ទេរនេះគឺមានតមៃ្លខ្លួន១២លានផោន (ស្មើនឹង១៥,៥លានដុល្លារអាមេរិក) ក្នុងនោះរាប់បញ្ចូលទាំងលក្ខខណ្ឌទិញរំលាយកិច្ចសន្យាទៅលើកុងត្រារបស់កីឡាករវ័យក្មេងរូបនេះដែលមានតម្លៃ១៧,៥លានផោនផងដែរ។ នេះបើយោងទៅតាមការចេញផ្សាយរបស់បណ្តាញសារព័ត៌មាននានា។
Unal ត្រូវបានរំពឹងទុកថា នឹងឈានដល់ទម្រង់លេងកម្រិតកំពូលរបស់ខ្លួន ចាប់តាំងពីទទួលបានជោគជ័យដ៏ធំធេងនៅឯក្លិប Bursaspor ក្រោយពីរូបគេបានស៊ុតបាល់បញ្ចូលទីសរុប១៨២គ្រាប់ ក្នុងការបង្ហាញខ្លួន១១០លើកក្នុងកម្រិតយុវជន និងក្រុមឈុតធំ។ រូបគេក៏បានបានស៊ុតបាល់បញ្ចូលទី២៤គ្រាប់ ក្នុងការប្រកួត២៥លើកសម្រាប់ក្រុមជម្រើសជាតិតួកគីអាយុក្រោម១៦ឆ្នាំផងដែរ៕
ប្រភពពី៖ Reuters

June 2, 2017