Tag: Juventus

បណ្ដាក្លឹបបាល់ទាត់នៅអ៊ីតាលី ឡើងដល់វគ្គផ្ដាច់ព្រ័ត្រនៃពានរង្វាន់ធំៗទាំងបីនៅទ្វីបអឺរ៉ុប
ក្លឹបបាល់ទាត់នានាដែលជាតំណាងរបស់ប្រទេសអ៊ីតាលី បានឡើងដល់វគ្គផ្ដាច់ព្រ័ត្រនៃពានរង្វាន់ Champions League, Europa League និង Conference League នៅរដូវកាលនេះ។
នៅឯ Champions League ក្លឹប Inter Milan បានផ្ដួលក្លឹបរួមស្រុក A.C. Milan 3-0 នៅវគ្គពាក់កណ្ដាលផ្ដាច់ព្រ័ត្រ។ នៅថ្ងៃទី 10 មិថុនាខាងមុខ Inter Milan នឹងប៉ះជាមួយ Man City ក្នុងវគ្គផ្ដាច់ព្រ័ត្រ ដែលធ្វើឡើងនៅទីក្រុងអ៊ីស្តង់ប៊ុល ប្រទេសតួកគី។
នៅឯពានរង្វាន់ Europa League ក្លឹប Roma បានឈ្នះ Leverkusen ដោយលទ្ធផល 1-0 នៅវគ្គពាក់កណ្ដាលផ្ដាច់ព្រ័ត្រ។ ក្នុងវគ្គផ្ដាច់ព្រ័ត្រ កូនសិស្ស និងគ្រូបង្វឹក Jose Mourinho នឹងប៉ះក្លឹប Sevilla នៅថ្ងៃទី 31 ឧសភា នៅប៊ុយដាប៉ែស ប្រទេសហុងគ្រី។
តំណាងទីបីរបស់អ៊ីតាលី គឺ Fiorentina នឹងត្រូវប្រកួតជាមួយក្លឹប West Ham ក្នុងវគ្គផ្ដាច់ព្រ័ត្ររបស់ពានរង្វាន់ Conference League នាថ្ងៃទី 07 មិថុនា នៅរដ្ឋធានីប្រាក ប្រទេសឆែក។ នៅវគ្គពាក់កណ្ដាលផ្ដាច់ព្រ័ត្រ Fiorentina បានផ្ដួល Basel ដោយលទ្ធផល 4-3។
បើសិនជា Roma, Inter និង Fiorentina សុទ្ធតែដណ្ដើមបានជ័យជម្នះ នោះបាល់ទាត់អ៊ីតាលីនឹងមាន hat-trick ទីពីរ បន្ទាប់ពី hat-trick ដំបូងត្រូវបានបង្កើតឡើងចន្លោះពីឆ្នាំ 1989 ដល់ 1990 ដោយក្លឹប AC Milan ដណ្ដើមបានពាន Champions League, Sampdoria ដណ្ដើមបានពាន Europa League និង Juventus ដណ្ដើមបានពាន UEFA Cup។ នោះក៏ជារដូវកាលតែមួយគត់ដែលបណ្ដាក្លឹបរបស់ប្រទេសមួយដណ្ដើមបានពានរង្វាន់ទាំងបីនៅទ្វីបអឺរ៉ុប៕
May 19, 2023
Atletico ផ្តួល Juventus ខណៈ Man City វាយបកផ្តួល Schalke
ក្រុម Atletico Madrid និង Manchester City សុទ្ធសឹងបានជួបភាពរីករាយដូចគ្នាក្នុងការប្រកួតក្របខ័ណ្ឌ Champions League វគ្គ 16ក្រុមចុងក្រោយ ជើងទី1 កាលពីថ្ងៃពុធ ក្រោយពីដណ្តើមបានជ័យជម្នះរៀងៗខ្លួន។
ខ្សែប្រយុទ្ធ Cristiano Ronaldo បានខកខានក្នុងការរកគ្រាប់បាល់បញ្ចូលទី ខណៈដែលក្រុម Atletico បានយកឈ្នះក្នុងលទ្ធផល 2-០។
ដោយឡែក ក្នុងប្រទេសអាល្លឺម៉ង់វិញ ក្រុម Schalke បានស៊ុតបាល់បញ្ចូលទី 2គ្រាប់ ដើម្បីនាំមុខ 2-1 ប៉ុន្តែគ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Leroy Sane និង Raheem Sterling បានជួយឱ្យក្រុមនៅសល់សមាជិកត្រឹមតែ 10នាក់ Man City ដណ្តើមបានជ័យជម្នះក្នុងលទ្ធផល 3-2។
ក្រោយពីការរកបានគ្រាប់បាល់តាមស្មើរបស់គេ Sane បានប្រាប់ទូរទស្សន៍ DAZN ទាំងរីករាយថា៖ «ខ្ញុំបានរង់ចាំឱកាសរបស់ខ្ញុំ និងចង់ស៊ុតបាល់ពីទីនោះ ដោយសារតែខ្ញុំធ្លាប់បានស៊ុតបាល់បញ្ចូលទីពីទីតាំងនោះ ហើយវាបានរក្សាការជឿជាក់របស់យើង»។
លោក Pep Guardiola អ្នកចាត់ការទូទៅរបស់ក្រុម Man City បានឱ្យដឹងថា៖ «យើងនឹងមិនបានឈានទៅវគ្គបន្តក្នុងយុទ្ធនាការនេះឡើយ ប្រសិនបើយើងមិនកែសម្រួលការលេងឱ្យបានល្អប្រសើរឡើងទេនោះ។ ទីបំផុត Sane និង Sterling បានបង្កើតឱ្យមានការប្រែប្រួល»។
លោក Diego Simeone គ្រូបង្វឹករបស់ក្រុម Atletico បានឱ្យដឹងថា៖ «យើងមិនទាន់បានឈានទៅវគ្គបន្តនៅឡើយទេ។ នៅមានការប្រកួត 1លើកទៀតដែលត្រូវលេង ហើយយើងដឹងថា យើងនឹងត្រូវតែជួបបញ្ហា»។
Ronaldo បានវិលទៅកាន់រដ្ឋធានីអេស្ប៉ាញវិញ ក្រោយពីរូបគេបានទទួលភាពជោគជ័យមិនធ្លាប់មានពីមុនមកក្នុងយុទ្ធនាការនេះ ជាមួយនឹងក្រុម Real ប៉ុន្តែគូប្រកួតរបស់ពួកគេគឺជាក្រុមដែលត្រូវអបអរនៅពេលបញ្ចប់ការប្រកួត ខណៈដែលគ្រាប់បាល់ស៊ុតបញ្ចូលទីពីសំណាក់កីឡាករ Jose Gimenez និង Diego Godin បានជួយឱ្យក្រុម Atletico ស្ថិតលើផ្លូវឆ្ពោះទៅកាន់វគ្គបន្ត។
លោក Massimiliano Allegri គ្រូបង្វឹករបស់ក្រុម Juventus បានឱ្យដឹងថា៖ «ជាកុសល យើងមិនបានរបូតគ្រាប់បាល់ទី3 ឡើយ ព្រោះការចាញ់ 2-០ គឺជាលទ្ធផលមួយដែលអាចស្រោចស្រង់បាន។ យើងមិនទាន់ធ្លាក់ចេញនៅឡើយទេ»៕
February 21, 2019
Juventus ចុះហត្ថលេខាជាមួយ Bernardeschi ក្នុងតម្លៃខ្លួន40លានអឺរ៉ូ
ក្លិបសេះបង្កង់ Juventus បានចុះហត្ថលេខាជាមួយនឹងខ្សែប្រយុទ្ធ Federico Bernardeschi ពីក្លិប Fiorentina ក្នុងកិច្ចសន្យារយៈពេល5ឆ្នាំ ក្នុងការផ្ទេរមួយនេះដែលមានតម្លៃខ្លួន40លានអឺរ៉ូ (ស្មើនឹង46.5លានដុល្លារអាមេរិក)។ កីឡាករវ័យ23ឆ្នាំរូបនេះ ដែលបានស៊ុតបាល់បញ្ចូលទីក្នុងការប្រកួតលីកកាលពីរដូវកាលមុននោះ បានចំណាយពេល3រដូវកាលជាមួយនឹងក្លិប Fiorentina។
Bernardeschi ដែលបានបង្ហាញខ្លួនជាអន្តរជាតិចំនួន9លើកសម្រាប់ក្រុមជម្រើសជាតិអ៊ីតាលីនោះ បានបង្ហាញពីទម្រង់លេងដ៏គួរឲ្យចាប់អារម្មណ៍ អំឡុងពេលនៃយុទ្ធនាការ European Under-21 Championship នៅរដូវក្តៅនេះ ហើយ Juventus បានចាត់ទុករូបគេជាខ្សែប្រយុទ្ធម្នាក់ក្នុងចំណោមខ្សែប្រយុទ្ធដ៏មានទេពកោសល្យបំផុតប្រចាំទ្វីបអឺរ៉ុប។ Juventus កំពុងតែសម្លឹងរកការឈ្នះពានក្របខ័ណ្ឌ Serie A ជាលើកទី7ជាប់ៗគ្នារបស់ពួកគេ។
នៅមុនពេលចុះហត្ថលេខាជាមួយនឹង Bernardeschi ពួកគេបាននាំយកអ្នកចាំទី Wojciech Szczesny ខ្សែបម្រើប្រយុទ្ធ Juan Cuadrado ខ្សែការពារ Medhi Benatia និងខ្សែបម្រើ Medhi Benatia រួចជាស្រេចហើយនៅរដូវក្តៅនេះ។ Bernardeschi បច្ចុប្បន្នត្រូវបានរំពឹងទុកថា នឹងធ្វើដំណើរទៅកាន់ទឹកដីសហរដ្ឋអាមេរិក ដើម្បីចូលរួមក្នុងដំណើរប្រកួតមុនបើករដូវកាលជាមួយនឹងក្លិប Juventus។
Juventus បានឲ្យដឹងក្នុងសេចក្តីថ្លែងការណ៍មួយនៅលើគេហទំព័ររបស់ខ្លួនថា៖ «ក្លិបកីឡាបាល់ទាត់ Juventus សូមប្រកាសថា យើងបានបំពេញការព្រមព្រៀងគ្នាជាមួយនឹងក្លិប ACF Fiorentina សម្រាប់ការបំពេញការផ្ទេរជាផ្លូវការរបស់កីឡាករ Federico Bernardeschi ហើយ»៕
ប្រភពពី៖ BBC
July 25, 2017
AC Milan បំពេញការចុះហត្ថលេខាជាមួយ Bonucci ពីក្លិប Juventus
ក្លិប AC Milan បានចុះហត្ថលេខាជាមួយនឹងខ្សែការពារអន្តរជាតិអ៊ីតាលី Leonardo Bonucci ពីក្លិប Juventus ក្នុងតម្លៃខ្លួន40លានអឺរ៉ូ (ស្មើនឹង46.5លានដុល្លារអាមេរិក)។
Bonucci វ័យ 30ឆ្នាំបានចុះហត្ថលេខាលើកុងត្រារយៈពេល 5ឆ្នាំជាមួយនឹងក្រុមម្ចាស់ជើងឯក18សម័យកាលមួយនេះ ដែលបានចំណាយប្រាក់អស់ប្រមាណជា178លានអឺរ៉ូហើយក្នុងរដូវកាលនេះទៅលើការទិញចូលកីឡាករថ្មីៗ។ លោក Vincenzo Montella គ្រូបង្វឹករបស់ក្លិប AC Milan បានឲ្យដឹងថា៖ «ជាបច្ចេកទេស ខ្ញុំគិតថា រូបគេ និង Sergio Ramos ជាខ្សែការពារដ៏រឹងមាំបំផុតក្នុងពិភពលោក»។ ស្របពេលជាមួយគ្នានេះដែរ Juventus បានបំពេញមកវិញនូវការចុះហត្ថលេខាជាមួយខ្សែការពារ Mattia de Sciglio វ័យ24ឆ្នាំមកពីក្លិប AC Milan វិញក្នុងតម្លៃខ្លួន12លានអឺរ៉ូ។
Juventus បានឲ្យដឹងក្នុងសេចក្តីថ្លែងការណ៍របស់ខ្លួនថា៖ «ក្លិប Juventus កំពុងតែបន្ថែមកីឡាករម្នាក់ដែលមានទេពកោសល្យដ៏អស្ចារ្យ និងពោរពេញដោយបទពិសោធអន្តរជាតិ»។ ការផ្ទេររបស់ Bonucci មានន័យថា រូបគេនឹងក្លាយជាកីឡាករមានតម្លៃខ្លួនខ្ពស់ជាងគេបំផុតក្នុងវ័យ30ឆ្នាំ ឬច្រើនជាងនេះ ដោយច្រើនជាងតម្លៃខ្លួន25លានអឺរ៉ូ ដែលក្លិប Roma ធ្លាប់បានចំណាយទិញខ្សែប្រយុទ្ធ Gabriel Batistuta ពីក្លិប Fiorentina កាលពីឆ្នាំ2000ទៅទៀត។
Bonucci វ័យ30ឆ្នាំបានចំណាយពេល7ឆ្នាំនៅឯក្លិប Juventus ដោយបានធ្វើការបង្ហាញខ្លួន319លើក និងឈ្នះពានរបស់ក្របខ័ណ្ឌ Serie A ចំនួន6លើក។ ក្លិប AC Milan បានឲ្យដឹងថា៖ «ក្រោយពីការផ្ទេរចេញគូប្រជែងដ៏គួរឲ្យគោរព ទៅកាន់ក្លិប AC Milan យើងសូមស្វាគមន៍ចំពោះ Leonardo»៕
ប្រភពព័ត៌មាន៖ BBC
July 21, 2017
ខ្សែបម្រើដ៏មានឥទ្ធិពល Douglas Costa របស់ Bayern បំពេញការផ្ទេរទៅ Juventus
ខ្សែបម្រើដ៏មានឥទ្ធិពល Douglas Costa បានបំពេញការផ្ទេររបស់គេទៅកាន់ក្លិបយក្សអ៊ីតាលី Juventus របស់ក្របខ័ណ្ឌ Serie A ក្រោយពីធ្វើដំណើរទៅដល់ទីក្រុង Turin នៅថ្ងៃពុធនេះ។
រូបភាពវីដេអូនៃការទៅដល់របស់ខ្សែបម្រើស្លាប Costa ក្នុងទីក្រុង Turin ត្រូវបានចាក់បង្ហាញនៅលើគណនី Twitter របស់ក្លិប Juventus។ នេះបើយោងទៅតាមកាសែត MailOnline ដែលបាននិយាយថា ខ្សែបម្រើអន្តរជាតិប្រេស៊ីល Costa នឹងចុះហត្ថលេខាជាមួយនឹងក្លិប Juventus ដោយមកពីក្លិប Bayern Munich ក្នុងកិច្ចព្រមព្រៀងខ្ចីជើងជាមុនសិនក្នុងតម្លៃជាទឹកប្រាក់5លានផោន ប៉ុន្តែ តម្លៃខ្លួននេះអាចនឹងកើនដល់35លានផោន (ស្មើនឹង45លានដុល្លារអាមេរិក) ប្រសិនបើការផ្ទេរនេះ ក្លាយជាការផ្ទេរជាអចិន្ត្រៃយ៍។
ការផ្ទេរនេះនឹងបញ្ចប់រយៈពេល2ឆ្នាំនៅឯកីឡដ្ឋាន Allianz Arena សម្រាប់ Costa ក្រោយពីផ្ទេរមកពីក្លិប Shakhtar Donetsk ទៅកាន់ក្លិប Bayern ក្នុងតម្លៃខ្លួន21លានផោន កាលពីខែកក្កដា ឆ្នាំ2015កន្លងមក។ មុននេះបន្តិច លោក Karl-Heinz Rummenigge ដែលជាប្រធានក្លិប Bayern បានបញ្ជាក់ថា ក្លិបទាំងពីរកំពុងតែស្ថិតក្នុងការពិភាក្សាគ្នាជាផ្លូវការអំពីការផ្ទេររបស់ Costa។
លោក Rummenigge បានឲ្យដឹងថា៖ «យើងកំពុងតែស្ថិតក្នុងដំណាក់កាលនៃការចរចាគ្នា ហើយខ្ញុំអាចនិយាយថា វាមានចំណុចវិជ្ជមានជាច្រើន និងជាក់លាក់ ប៉ុន្តែ ខ្ញុំមិនអាចនិយាយថា ការផ្ទេរនេះត្រូវបានបំពេញនៅថ្ងៃនេះឡើយ»។
Costa ត្រូវបានចាត់ទុកថាជាកីឡាករលើសពីតម្រូវការនៅឯក្លិប Bayern ក្រោយពីក្លិបយក្សអាល្លឺម៉ង់មួយនេះបានយល់ព្រមចុះហត្ថលេខាជាមួយនឹងខ្សែបម្រើប្រយុទ្ធ James Rodriguez របស់ក្លិប Real Madrid ក្នុងលក្ខខណ្ឌខ្ចីជើង2ឆ្នាំ៕
ប្រភពពី៖ ESPN
July 12, 2017
Dani Alves របស់ Juventus ត្រៀមចូលរួមជាមួយ Man City
ក្លិប Manchester City បានដាក់សំណើទៅកាន់ក្លិប Juventus ជុំវិញការផ្ទេររបស់កីឡាករ Dani Alves ក្នុងតម្លៃខ្លួន 5លានផោន (ស្មើនឹង 6.4លានដុល្លារអាមេរិក) ហើយលោក Pep Guardiola បានត្រៀមផ្តល់កុងត្រាដល់ខ្សែការពារអន្តរជាតិប្រេស៊ីលរូបនេះ រយៈពេល 2ឆ្នាំ ខណៈដែលគ្រូបង្វឹករូបនេះបន្តនាំចូលកីឡាករថ្មីសម្រាប់រដូវកាលក្រោយ។
Man City កំពុងតែស្វែងរកខ្សែការពារ ក្រោយពីបានអនុញ្ញាតឲ្យ Bacary Sagna និង Gael Clichy ចាកចេញ នៅពេលដែលកិច្ចសន្យារបស់ពួកគេផុតកំណត់នៅចុងខែនេះ។ ជាមួយគ្នានេះដែរ ការផ្ទេរ Kyle Walker របស់ក្លិប Tottenham បានទទួលបរាជ័យ ដោយសារតែ Spurs កំពុងទាមទារតម្លៃខ្លួនច្រើនជាង 40លានផោនសម្រាប់ខ្សែការពារអន្តរជាតិអង់គ្លេសរូបនេះ។ បញ្ហានេះបានជំរុញឲ្យលោក Guardiola ដាក់ការចាប់អារម្មណ៍លើ Alves ជាកីឡាករដែលលោកធ្លាប់បានធ្វើការជាមួយនៅឯក្លិប Barcelona។
ក្លិប Juventus បានប្រកាសថា ពួកគេអាចនឹងបើកចំហឲ្យមានការលក់កីឡាករម្នាក់ដែលបានបង្ហាញពីទម្រង់លេងដ៏គួរឲ្យចាប់អារម្មណ៍ អំឡុងពេលក្រុមម្ចាស់ជើងឯកក្របខ័ណ្ឌ Serie A មួយនេះ បានឈានទៅប្រកួតវគ្គផ្តាច់ព្រ័ត្រនៃក្របខ័ណ្ឌ Champions League ជាពិសេសក្នុងពេលពួកគេបានយកឈ្នះលើក្រុម Monaco ក្នុងវគ្គពាក់កណ្តាលផ្តាច់ព្រ័ត្រ។ Alves នៅជាប់កិច្ចសន្យារយៈពេល1ឆ្នាំទៀត ហើយ Man City ត្រូវបានបញ្ជាក់ប្រាប់ថា ការដាក់សំណើដេញថ្លៃក្នុងទឹកប្រាក់5លានផោន នឹងគ្រប់គ្រាន់ហើយក្នុងការបញ្ចុះបញ្ចូលឲ្យ Juventus លក់ខ្សែការពារវ័យ34ឆ្នាំរូបនេះ៕
ប្រភពពី៖ The Guardian
June 19, 2017
Zidane ៖ Ronaldo នឹងជួយឲ្យ Real លើកពាន Champions League ពេលប៉ះ Juventus រាត្រីនេះ
លោក Zinedine Zidane ជឿជាក់ថា ភាពជាអ្នកដឹកនាំរបស់ខ្សែប្រយុទ្ធដ៏មានឥទ្ធិពល Cristiano Ronaldo នឹងក្លាយជាកត្តាកាត់សេចក្តីដ៏សំខាន់ នៅពេលដែលក្រុម Real Madrid ចូលឆ្ពោះទៅរកការប្រកួតប្រវត្តិសាស្ត្រក្នុងវគ្គផ្តាច់ព្រ័ត្រនៃក្របខ័ណ្ឌ Champions League ជាមួយនឹងក្រុម Juventus នៅរាត្រីនេះ។
Ronaldo នឹងស្ថិតក្នុងការចាប់អារម្មណ៍ ខណៈដែលក្រុមរបស់លោក Zidane នឹងខិតខំព្យាយាមធ្វើឲ្យក្លិបរបស់លោកក្លាយជាក្លិបដំបូងគេក្នុងការឈ្នះពានក្របខ័ណ្ឌកំពូលអឺរ៉ុប២លើកជាប់ៗគ្នា ចាប់តាំងពីក្លិប AC Milan ធ្លាប់ធ្វើបានសម្រេចកាលពី២៧ឆ្នាំមុនម្តងរួចមកហើយ។ បើទោះបីមនុស្សជាច្រើនបានរិះគន់ទៅលើ Ronaldo សម្រាប់ការបង្ហាញពីទម្រង់លេងដែលគ្មានភាពរស់រវើក ក្នុងពេលដែល Real ឈ្នះលើការប្រកួតក្របខ័ណ្ឌ Champions League វគ្គផ្តាច់ព្រ័ត្រលើក្រុម Atletico Madrid ក៏ដោយ ប៉ុន្តែ រូបគេនៅតែបានស៊ុតបាល់ប៉េណាល់ទីចូលទីយ៉ាងល្អក្នុងការប្រកួតកាលពីឆ្នាំមុន ហើយក៏បានស៊ុតបាល់បញ្ចូលទីក្នុងការប្រកួតវគ្គផ្តាច់ព្រ័ត្រកាលពីឆ្នាំ២០១៤ផងដែរ។ Ronaldo បានស្ថិតក្នុងទម្រង់លេងយ៉ាងមុតស្រួចម្តងទៀតក្នុងរដូវកាលនេះ ដោយរូបគេបានបំពេញការរកបាន៤០០គ្រាប់សម្រាប់ក្រុម Real ខណៈដែលក្រុមរបស់គេបានឈ្នះពានក្របខ័ណ្ឌកំពូលរបស់អេស្ប៉ាញជាលើកទី១ក្នុងរយៈពេល៥ឆ្នាំ។ លោក Zidane ជឿជាក់ថា សុច្ឆន្ទៈនៃការស្រេកឃ្លានជ័យជម្នះរបស់ខ្សែប្រយុទ្ធអន្តរជាតិព័រទុយហ្គាល់វ័យ៣២ឆ្នាំរូបនេះ នឹងក្លាយជាកូនសោសំខាន់ក្នុងការជួយឲ្យក្រុម Real ទទួលជោគជ័យ ពីព្រោះរូបគេមានកម្រិតស្តង់ដារលេងដែលមិត្តរួមក្រុមរបស់គេជឿជាក់ថា នឹងក្លាយជាជំនួយដ៏ធំសម្រាប់ក្រុម។
លោក Zidane បានប្រាប់សន្និសីទសារព័ត៌មាននៅឯកីឡដ្ឋាន Principality ក្នុងទីក្រុង Cardiff កាលពីថ្ងៃសុក្រ ថា៖ « Ronaldo ជាមនុស្សល្អ រូបគេព្រួយបារម្ភពីអ្នកដទៃ ហើយអ្វីដែលសំខាន់នោះគឺថា រូបគេមានភាពជាកីឡាករអាជីព។ រូបគេកើតមកគឺដើម្បីធ្វើជាមេដឹកនាំ ជាពិសេសនៅលើទីលានតែម្តង។ អ្វីដែលសំខាន់បំផុតនោះគឺថា រូបគេចង់បានជ័យជម្នះ»។
ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺយប់នេះ៕

June 3, 2017
Juventus ជឿជាក់ខ្ពស់ មុនពេលប៉ះ Real ក្នុង Champions League វគ្គផ្តាច់ព្រ័ត្រ

លោក Massimiliano Allegri ជឿជាក់ថា ក្រុមសេះបង្កង់ Juventus គ្មានអ្វីត្រូវខ្លាចឡើយនៅពេលប្រកួតជាមួយនឹងក្រុម Real Madrid ក្នុងក្របខ័ណ្ឌ Champions League វគ្គផ្តាច់ព្រ័ត្រ នៅថ្ងៃសៅរ៍ខាងមុខនេះ ហើយថា វាមានចំណុចវិជ្ជមានជាច្រើនជុំវិញក្លិបនេះខ្លាំងជាងពេលដែលលោកបានមកចូលរួមជាមួយនឹងក្លិបនេះជាលើកដំបូងកាលពីឆ្នាំ២០១៤ទៅទៀត។ មិនមានក្រុមណាដែលរងបរាជ័យច្រើនជាងគេក្នុងការប្រកួតវគ្គផ្តាច់ព្រ័ត្រនៃយុទ្ធនាការកំពូលរបស់អឺរ៉ុប ដូចក្រុម Juventus ឡើយ ប៉ុន្តែប្រសិនបើអ្វីៗមានភាពវិជ្ជមានខ្លាំងដូចការលើករបស់អ្នកចាត់ការទូទៅរូបនេះថាមែន នោះលោកនឹងអាចបំពេញការងារយ៉ាងល្អឥតខ្ចោះក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff មិនខាន។
គ្រូបង្វឹករូបនេះបានឲ្យដឹងថា៖ «វាពិតជាការប្រកួតដ៏សំខាន់មួយ ប៉ុន្តែយើងចាំបាច់ត្រូវតែធ្វើឲ្យបានល្អដូចដែលយើងធ្លាប់បានធ្វើនាពេលកន្លងមក។ ភាពវិជ្ជមានបង្កើតឲ្យមានភាពវិជ្ជមាន អវិជ្ជមានបង្កើតឲ្យមានអវិជ្ជមាន។ នៅពេលដែលខ្ញុំបានមកដល់ក្លិបនេះ ការញៀននៃភាពអវិជ្ជមានស្ថិតនៅជុំវិញក្លិបនេះ»។ ដើម្បីបង្ហាញថា ការលើកឡើងនេះមានភាពពិតប្រាកដ លោក Allegri បានបង្ហាញពីប្រវត្តិរបស់ក្លិបនេះក្នុងក្របខ័ណ្ឌ European Cup ដែលកំពុងតែត្រូវបានគេលើកយកមកពិភាក្សាជាសាមញ្ញ។ គ្រូបង្វឹករូបនេះបានបញ្ជាក់ថា៖ «Juventus បានលេងការប្រកួតវគ្គផ្តាច់ព្រ័ត្រ ដល់ទៅ៨លើក ពួកគេមិនបានរងបរាជ័យ៦លើកក្នុងចំណោម៨លើកនោះដូចដែលមនុស្សជាច្រើនបាននិយាយឡើយ។ ការឈានទៅដល់វគ្គផ្តាច់ព្រ័ត្រ គឺជាសមិទ្ធផលដ៏សំខាន់ណាស់ទៅហើយ។ វាមានការប្រកួតក្របខ័ណ្ឌ Champions League វគ្គផ្តាច់ព្រ័ត្រ តែ១គត់ក្នុងពិភពលោក ហើយយើងកំពុងស្ថិតក្នុងវគ្គនោះ»។
ក្នុងដំណើរឆ្ពោះទៅកាន់វគ្គផ្តាច់ព្រ័ត្រនេះ Juventus បានទម្លាក់ក្រុម Barcelona ក្នុងវគ្គ៨ក្រុមចុងក្រោយ ដោយមិនបណ្តោយឲ្យមានគ្រាប់បាល់ចូលទីរបស់ខ្លួនសូម្បីតែមួយគ្រាប់ មុននឹងពួកគេផ្តួលក្រុម Monaco ក្នុងវគ្គពាក់កណ្តាលផ្តាច់ព្រ័ត្រ។ ដោយឡែក ក្រុម Real Madrid បានទម្លាក់ក្រុម Bayern Munich ក្នុងវគ្គ៨ក្រុមចុងក្រោយ មុននឹងយកឈ្នះលើក្រុម Atletico Madrid ក្នុងវគ្គ១/២ផ្តាច់ព្រ័ត្រ៕
ប្រភពពី៖ The Guardian
June 1, 2017
Juventus ទិញយក Cuadrado ពីក្លិប Chelsea ក្នុងកិច្ចសន្យាជាអចិន្ត្រៃយ៍
ក្លិបសេះបង្កង់ Juventus បានចុះហត្ថលេខាជាមួយនឹងខ្សែបម្រើស្លាបអន្តរជាតិកូឡុំប៊ី Juan Cuadrado ក្នុងកិច្ចសន្យាជាអចិន្ត្រៃយ៍ពីក្លិប Chelsea។ នេះបើយោងទៅតាមការប្រកាសរបស់ក្លិបម្ចាស់ជើងឯករបស់អ៊ីតាលីមួយនេះកាលពីថ្ងៃចន្ទ។
Juventus ដែលនឹងត្រូវប្រកួតជាមួយនឹងក្រុម Real Madrid ក្នុងក្របខ័ណ្ឌ Champions League វគ្គផ្តាច់ព្រ័ត្រនៅថ្ងៃទី៣ ខែមិថុនាខាងមុខនេះបានឲ្យដឹងថា៖ «ក្រោយពីកិច្ចប្រជុំទៅលើលក្ខខណ្ឌផ្សេងៗដែលត្រូវបានផ្តល់ឲ្យក្នុងកិច្ចសន្យានេះ កាតព្វកិច្ចរបស់ក្លិបដែលតម្រូវឲ្យមានការនាំយក Juan Cuadrado ពីក្លិប Chelsea ត្រូវបានបំពេញ»។ ការផ្ទេរជាអចិន្ត្រៃយ៍នេះ មានតម្លៃខ្លួន២០លានអឺរ៉ូ (ស្មើនឹង២២,៥លានដុល្លារអាមេរិក) ដែលនឹងត្រូវបង់ជាប្រចាំឆ្នាំរយៈពេល៣ឆ្នាំ ដោយចាប់ផ្តើមពីរដូវកាលឆ្នាំ២០១៧-២០១៨នេះតទៅ។
គួររំឭកដែរថា Cuadrado បានផ្ទេរទៅកាន់ក្របខ័ណ្ឌ Premier League (ក្នុងក្លិប Chelsea) ក្រោយពីបានបង្ហាញពីទម្រង់លេងយ៉ាងល្អក្នុងយុទ្ធនាការ World Cup ឆ្នាំ២០១៤ នៅប្រទេសប្រេស៊ីល ខណៈដែលក្រុមជម្រើសជាតិកូឡុំប៊ីរបស់គេ បានឈានទៅកាន់វគ្គ៨ក្រុមចុងក្រោយ មុននឹងចាញ់ក្រោមស្នាដៃក្រុមម្ចាស់ផ្ទះ។
ខ្សែបម្រើប្រយុទ្ធវ័យ ២៨ឆ្នាំរូបនេះ ដែលការផ្ទេរកាលពីលើកមុនក្នុងតម្លៃខ្លួនដ៏ខ្ពស់របស់គេទៅកាន់ Chelsea ចេញពីក្លិប Fiorentina នាដើមឆ្នាំ២០១៥ ដែលមិនបានផ្តល់សមិទ្ធផលតាមសេចក្តីត្រូវការនោះ បានចូលរួមជាមួយនឹងក្លិប Juventus ក្នុងលក្ខខណ្ឌខ្ចីជើងម្តងរួចហើយ កាលពីខែកញ្ញានៅឆ្នាំដដែលនោះ តែឥឡូវនេះរូបគេបានចុះហត្ថលេខាលើកុងត្រាមួយដែលនឹងធ្វើឲ្យរូបគេស្ថិតនៅជាមួយនឹង Juventus រហូតដល់ថ្ងៃទី៣០ ខែមិថុនា ឆ្នាំ២០២០៕
ប្រភពពី៖ Reuters
May 23, 2017
Juventus ស្រេកឃ្លានក្នុងការលើកពាន ៣ ក្រោយពីឈ្នះពាន Serie A
ក្រុមសេះបង្កង់ Juventus បានឈ្នះពានក្របខ័ណ្ឌអ៊ីតាលី Serie A ជាលើកទី៦ជាប់ៗគ្នារបស់ពួកគេ ក្រោយពីបានផ្តួលក្រុម Crotone ក្នុងលទ្ធផល ៣-០ កាលពីយប់ថ្ងៃអាទិត្យម្សិលមិញ ដើម្បីធ្វើឲ្យពួកគេស្ថិតនៅលើដំណើរផ្លូវឆ្ពោះទៅកាន់ការឈ្នះពាន ៣ ក្នុងរដូវកាលតែមួយ ក្រោយពីបានឈ្នះពាន ២ រួចជាស្រេចហើយនៅរដូវកាលនេះ។
គ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Mario Mandzukic, Paulo Dybala និង Alex Sandro បានជួយឲ្យក្រុមរបស់គេឈ្នះពានរង្វាន់លីកមួយផ្សេងទៀត ដើម្បីបន្ថែមទៅលើពាន Coppa Italia ឬ Italian Cup របស់ពួកគេ នៅមុនពេលឈានទៅកាន់ការប្រកួតក្របខ័ណ្ឌ Champions League វគ្គផ្តាច់ព្រ័ត្រជាមួយនឹងក្រុម Real Madrid ក្នុងទីក្រុង Cardiff នាថ្ងៃទី៣ ខែមិថុនា ខាងមុខនេះ។
លោក Massimiliano Allegri បានឲ្យដឹងថា៖ «នៅរដូវកាលនេះ វាមានភាពខុសគ្នាទៅនឹងរដូវកាលមុន។ ពេលនេះយើងមានក្តីសុបិនក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ដែលអ្នកមិនមានឱកាសបានលេងជារៀងរាល់ឆ្នាំឡើយ»។ គ្រូបង្វឹករូបនេះបានបន្ថែមទៀតថា៖ វាជាការបង្ហាញខ្លួនក្នុងវគ្គផ្តាច់ព្រ័ត្រជាលើកទី២របស់យើងក្នុងរយៈពេល៣ឆ្នាំ ហេតុនេះយើងត្រូវតែអបអរដល់គ្រប់គ្នាក្នុងក្លឹបនេះ។ ខ្ញុំពិតជារីករាយណាស់ក្នុងការធ្វើជាគ្រូបង្វឹកនៅទីនេះ ហើយក្នុងពេលឆាប់ៗនេះ យើងនឹងធ្វើការពិភាក្សាទៅលើផែនការផ្សេងៗទៀត ប៉ុន្តែនៅពេលនេះ រឿងដ៏សំខាន់បំផុតនោះគឺថា យើងត្រូវតែលេង និងយកឈ្នះក្នុងវគ្គផ្តាច់ព្រ័ត្រក្នុងទីក្រុង Cardiff ឱ្យបាន ពេលជួបជាមួយនឹងក្រុម Real Madrid៕
May 22, 2017