Tag: IU

ការប្រៀបធៀបទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ
ទីភ្នាក់ងារអវកាសអាម៉េរិក (ណាសា-NASA) កាលពីថ្ងៃទី 02 ឧសភា បានចែករំលែកវីដេអូមួយស្ដីពីបណ្ដាប្រហោងខ្មៅខ្នាតយក្សដែលមានម៉ាសធំជាងព្រះអាទិត្យចាប់ពី 100,000 ដងដល់ 66 ពាន់លានដង។
ព្រះអាទិត្យគឺជាវត្ថុតែមួយគត់នៅក្នុងទិដ្ឋភាពដំបូង ហើយវាតូចទៅៗនៅពេលកាមេរ៉ាថយក្រោយឆ្ងាយទៅៗ។ ប្រហោងខ្មៅធំជាងម៉ាសព្រះអាទិត្យ 100,000 ដង ស្ថិតក្នុងកាឡាក់ស៊ី J1601 មានស្រមោលកណ្ដាលតូចជាងព្រះអាទិត្យ។
ស៊ុមទិដ្ឋភាពបន្តគឺជាគន្លងគោចររបស់ភពពុធ (Mercury)។ ប្រហោងខ្មៅនៅកណ្ដាលកាឡាក់ស៊ី Circinus មានម៉ាសធំជាងព្រះអាទិត្យមួយលានដង។
បន្ទាប់មកគឺជាគន្លងគោចររបស់ផែនដី។ ប្រហោងខ្មៅនៅកណ្ដាលកាឡាក់ស៊ី M32 ដែលជាកាឡាក់ស៊ីរណបរបស់កាឡាក់ស៊ី Andromeda មានម៉ាសធំជាងព្រះអាទិត្យពីរលានដង។
ប្រហោងខ្មៅ Sagittarius A* នៅកណ្ដាលកាឡាក់ស៊ីមីលគីវ៉េ មានម៉ាសធំជាងបួនលានដង ធៀបនឹងម៉ាសព្រះអាទិត្យ។
កាឡាក់ស៊ី NGC 7727 មានប្រហោងខ្មៅធំៗចំនួនពីរ ក្នុងនោះ ប្រហោងខ្មៅតូចជាងគេមានម៉ាសធំជាងព្រះអាទិត្យ 6 លានដង។
https://www.youtube.com/watch?v=jU1DsipURcM
វីដេអូបង្ហាញពីទំហំរបស់ប្រហោងខ្មៅ (Black Hole) ខ្នាតយក្សនៅក្នុងចក្រវាលដែលមនុស្សបានរកឃើញ
តមកទៀត យើងហោះឆ្លងកាត់គន្លងគោចររបស់ភពព្រហស្បតិ៍ (Jupiter), ភពណេបទូន (Neptune) និងខ្សែក្រវាត់អាចម៍ផ្កាយ (Kuiper)។ បន្ទាប់មកគឺជាប្រហោងខ្មៅដែលធំជាងគេរបស់ NGC 7727 ដែលធំជាង 150 លានដងធៀបនឹងម៉ាសព្រះអាទិត្យ។
ចំណែកប្រហោងខ្មៅរបស់កាឡាក់ស៊ី Andromeda អាចមានម៉ាសធ្ងន់ជាងព្រះអាទិត្យ 140 លានដង។ កាឡាក់ស៊ី Cygnus A មានប្រហោងខ្មៅដែលធំជាង 2.5 ពាន់លានដងធៀបនឹងម៉ាសព្រះអាទិត្យ។
ពេលនេះយើងនឹងហោះឆ្លងកាត់ពពកផ្កាយដុះកន្ទុយដែលព័ទ្ធជុំវិញប្រព័ន្ធព្រះអាទិត្យ (Oort cloud)។ ប្រហោងខ្មៅ M87 ដែលធ្ងន់ជាងម៉ាសព្រះអាទិត្យ 5.4 ពាន់លានដងគឺជាប្រហោងខ្មៅដំបូងគេដែលត្រូវបានថតដោយផ្ទាល់។
ប្រហោងខ្មៅ TON 618 ស្ថិតក្នុងកាឡាក់ស៊ីមួយដែលនៅឆ្ងាយសែនឆ្ងាយ រហូតដល់ពន្លឺរបស់វាត្រូវការពេល 10 ពាន់លានឆ្នាំទើបមកដល់ផែនដី។ ដោយមានម៉ាសធំជាង 66 ពាន់លានដងនៃម៉ាសព្រះអាទិត្យ TON 618 គឺជាប្រហោងខ្មៅធំបំផុតដែលមនុស្សធ្លាប់បានរកឃើញនៅក្នុងចក្រវាលដែលអ្នកវិទ្យាសាស្ត្រអាចសង្កេតឃើញ។
May 3, 2023
រកឃើញរូបចម្លាក់ព្រះពុទ្ធអាយុកាល 1,900 ឆ្នាំនៅប្រទេសអេហ្ស៊ីបបុរាណ
រូបចម្លាក់ព្រះពុទ្ធសក្យមុនីដែលមានសំណាកឆព្វណ្ណរង្សីនៅពីក្រោយ អាចត្រូវបានជនជាតិឥណ្ឌាដែលរស់នៅក្នុងទីក្រុង Berenike ឆ្លាក់ឡើងកាលពីសតវត្សរ៍ទីមួយ។
រូបចម្លាក់ដែលមានអាយុកាល 1,900 ឆ្នាំ និងត្រូវបានរកឃើញនៅក្នុងទីក្រុងផែរបស់អេហ្ស៊ីបបុរាណ Berenike ក្បែរសមុទ្រក្រហមនេះ អាចជាកម្មសិទ្ធិរបស់ជនចំណាកស្រុកម្នាក់មកពីអាស៊ីខាងត្បូង។ នេះបើតាម Live Science ដែលបានចុះផ្សាយកាលពីថ្ងៃទី 02 ឧសភា។ រូបចម្លាក់ព្រះពុទ្ធនេះបរិយាយអំពីព្រះពុទ្ធសក្យមុនីដែលគង់នៅក្នុងតំបន់អាស៊ីខាងត្បូងកាលពី 2,550 ឆ្នាំមុន។ ព្រះពុទ្ធដើមឡើយគឺជារាជបុត្រាមួយអង្គ ប៉ុន្តែក្រោយមកបានបោះបង់គ្រប់យ៉ាងដើម្បីសាងព្រះផ្នួស។
យោងតាម Steven Sidebotham សាស្ត្រាចារ្យផ្នែកប្រវត្តិសាស្ត្រនៅសាកលវិទ្យាល័យ Delaware និងជាសហប្រធានរបស់គម្រោង Berenike រូបចម្លាក់ខាងលើត្រូវបានបង្កើតឡើងចន្លោះពីឆ្នាំ 90 ដល់ឆ្នាំ 140 ក្នុងសម័យចក្រភពរ៉ូមដែលគ្រប់គ្រងប្រទេសអេហ្ស៊ីប។ អេហ្ស៊ីប និងឥណ្ឌាមានទំនាក់ទំនងពាណិជ្ជកម្មជាច្រើនក្នុងសម័យនោះ។
ក្រៅពីរូបចម្លាក់នេះ ក្រុមបុរាណវិទូក៏បានរកឃើញចម្លាក់ជាអក្សរសំស្ក្រឹតនៅ Berenike ផងដែរ។ បើទោះអក្សរចម្លាក់នេះត្រូវបានបំផ្លាញ ប៉ុន្តែអ្នកស្រាវជ្រាវដឹងថា វាត្រូវបានបង្កើតឡើងក្នុងសម័យកាលដែលត្រួតត្រាដោយព្រះចៅអធិរាជរ៉ូម៉ាំង Marcus Julius Philippus ដែលគ្រងរាជពីឆ្នាំ 244 ដល់ឆ្នាំ 249។ សាស្ត្រាចារ្យ Sidebotham និងសហការីកំពុងរៀបចំ ត្រៀមសម្រាប់ការប្រកាសអំពីរបកគំហើញនេះនៅលើទស្សនាវដ្ដី។
យោងតាមអ្នកស្រាវជ្រាវ អក្សរចម្លាក់ជាភាសាសំស្ក្រឹតបង្ហាញថា មានសហគមន៍អ្នកជំនួញអេហ្ស៊ីបមួយរស់នៅក្នុងដែនដីអេហ្ស៊ីបបុរាណ ពោលគឺពួកគេមិនមែនគ្រាន់តែឆ្លងកាត់ទីនោះដើម្បីធ្វើជំនួញឡើយ។ ការកត់ត្រាក្នុងប្រវត្តិសាស្ត្រក៏បានបង្ហាញថា មានជនជាតិឥណ្ឌារស់នៅក្នុងតំបន់ Alexandria ផងដែរ៕
May 3, 2023
រកឃើញដីកម្រនៅលើភពក្រៅប្រព័ន្ធព្រះអាទិត្យ ដែលមានកម្ដៅបួនពាន់អង្សាសេ
ក្រុមអ្នកវិទ្យាសាស្ត្របានរកឃើញសារធាតុ terbium ជាលើកដំបូងនៅក្នុងបរិយាកាសរបស់ KELT-9b ដែលជាភពមួយក្នុងចំណោមភពក្រៅប្រព័ន្ធព្រះអាទិត្យដែលក្ដៅបំផុតធ្លាប់ត្រូវបានកត់ត្រានាពេលកន្លង។
KELT-9b មានសីតុណ្ហភាពជាមធ្យម 4,000 អង្សាសេ វិលជុំវិញផ្កាយមេ KELT-9 ដែលមានចម្ងាយពីផែនដីប្រហែល 670 ឆ្នាំពន្លឺ (មួយឆ្នាំពន្លឺស្មើនឹង 9.46 ទ្រីលានគីឡូម៉ែត្រ)។ ភពនេះតែងតែជាទីចាប់អារម្មណ៍របស់អ្នកតារាសាស្ត្រចាប់តាំងពីត្រូវបានរកឃើញកាលពីឆ្នាំ 2016។
លទ្ធផលនៃការស្រាវជ្រាវថ្មីដែលបានប្រកាសលើទស្សនាវដ្ដី Astronomy and Astrophysics បានឱ្យដឹងថា ក្រុមអ្នកវិទ្យាសាស្ត្របានរកឃើញលោហធាតុ terbium ដែលជាដីកម្រ នៅក្នុងបរិយាកាសរបស់ KELT-9b។
Terbium ត្រូវបានអ្នកវិទ្យាសាស្ត្រស៊ុយអែត Carl Gustaf Mosander រកឃើញជាលើកដំបូងក្នុងអណ្ដូងរ៉ែ Ytterby នៅប្រជុំកោះ Stockholm កាលពីឆ្នាំ 1843។ សារធាតុ terbium គឺជាដីដ៏កម្រ ក្នុងនោះ 99% នៃការផលិត terbium របស់ពិភពលោក គឺធ្វើឡើងនៅ Bayan Obo ដែលជាតំបន់ទាញយករ៉ែក្នុងដែនដីម៉ុងហ្កោលីខាងក្នុងរបស់ប្រទេសចិន។
ភព KELT-9b វិលជុំវិញផ្កាយមេ KELT-9
ការរកឃើញខាងលើនេះពិតជាមានសារសំខាន់ក្នុងការស្វែងយល់អំពីបណ្ដាភពនៅក្រៅប្រព័ន្ធព្រះអាទិត្យ។ «កាន់តែយល់ច្បាស់អំពីលក្ខណៈសម្បត្តិរបស់បណ្ដាភព យើងក៏កាន់តែមានឱកាសច្រើនក្នុងការស្វែងរកឃើញផែនដី 2.0 ក្នុងអនាគត» Nicholas Borsato មកពីសាកលវិទ្យាល័យ Lund ដែលជាសមាជិករបស់ក្រុមស្រាវជ្រាវអំពីភព KELT-9b បញ្ជាក់ដូច្នេះ៕
April 29, 2023
សារធាតុអាហារដែលចាំបាច់បំផុតសម្រាប់ស្ត្រីក្នុងអំឡុងពេលមានគភ៌
ស្រ្តីមានគភ៌ត្រូវការកម្លាំងថាមពលបន្ថែមឡើងពី 150 – 350កាឡូរីក្នុង 1ថ្ងៃ ដើម្បីការចម្រើនធំធាត់របស់ទារកក្នុងផ្ទៃ និងមេតាបូលីហ្ស៊ឹមដែលកើនឡើងរបស់មាតា។ ជាទូទៅគ្រូពេទ្យតែងណែនាំឱ្យទទួលទានប្រូតេអុីនបន្ថែមឡើងយ៉ាងតិច 30ក្រាមក្នុង 1ថ្ងៃ។ ដូច្នេះខាងក្រោមនេះ គឺជាសារធាតុអាហារសំខាន់ៗដែលស្រ្តីមានគភ៌ចាំបាច់ត្រូវតែបានទទួល។
ហ្វូលេត ៈ ស្រ្តីមានគភ៌មួយចំនួនមានភាពប្រថុយប្រថានចំពោះការខ្វះសារធាតុហ្វូលេតខ្លាំងណាស់ ដូចជា ការមានគភ៌កូនភ្លោះ ការទទួលទានថ្នាំការពារប្រកាច់ ជាដើម ដូច្នេះហើយទើបស្ត្រីមានគភ៌ គួរបានទទួលសារធាតុហ្វូលេតបន្ថែមយ៉ាងតិច 200 – 400មីក្រូក្រាម ហើយហ្វូលេតថែមទាំងជួយកាត់បន្ថយភាពប្រថុយចំពោះភាពពិការរបស់បំពង់ប្រសាទទារកដែលមិនបិទ( Neural Tube Defect)ទៀតផង។
សារធាតុដែក ៈ ស្រ្តីមានគភ៌ត្រូវការសារធាតុដែកច្រើនឡើងដើម្បីផលិតគ្រាប់ឈាម។ ឡារ៉ែនសូមណែនាំឱ្យទទួលយកសារធាតុដែកពីអាហារឱ្យបាន 30 – 60មីល្លីក្រាមក្នុង 1ថ្ងៃ តែបើទទួលទានសារធាតុដែកបន្ថែមក្នុងរូបបែប FeSO4 វិញនោះ ត្រូវឱ្យបានពី 300 – 600មីល្លីក្រាមក្នុង 1ថ្ងៃ។ មានឯកសារមួយបានឱ្យដឹងថា បើកម្រិតសារធាតុដែកខ្ពស់ជ្រុលពេក នឹងនាំឆ្ពោះទៅរកសភាវទឹកនោមផ្អែមខណៈមានគភ៌ ដូច្នេះហើយទើបក្រុមវេជ្ជបណ្ឌិតក្នុងប្រទេសអង់គ្លេស និងកាណាដា តែងពិចារណាក្នុងការផ្តល់សារធាតុដែកបន្ថែមចំពោះតែស្រ្តីណាដែលរកឃើញថា មានជំងឺឈាមស្លេក ដែលបណ្តាលមកពីការខ្វះសារធាតុដែកតែប៉ុណ្ណោះ។ សម្រាប់ប្រទេសដែលកំពុងអភិវឌ្ឍន៍ ភាគច្រើនគ្រូពេទ្យនឹងឱ្យសារធាតុដែកបន្ថែមជាប្រចាំ ដោយសារតែតែងមានការខ្វះសារធាតុដែកច្រើន ទើបកន្លែងខ្លះមានកម្មវិធីបន្ថែមសារធាតុដែក និងហ្វូលេតដល់ស្រ្តីវ័យជំទង់ ដើម្បីកាត់បន្ថយការកើនឡើងនៃរោគឈាមស្លេកតាំងពីពេលមុនតាំងគភ៌។
វីតាមីនB12 ៈ បើមានវីតាមីនក្នុងកម្រិតទាប រួមជាមួយកម្រិតហ្វូលេតដែលខ្ពស់នៅលើស្រ្តីមានគភ៌នោះ នឹងក្លាយជាបច្ច័យប្រថុយប្រថាន ដែលអាចនឹងធ្វើឱ្យទារកមានសភាវឌឺនឹងសារធាតុអុីនស៊ូលីននាពេលអនាគតបាន។
កាល់ស្យូម ៈ កាល់ស្យូម មានភាពសំខាន់សម្រាប់ការអភិវឌ្ឍឆ្អឹងរបស់ទារក នៅពេលតាំងគភ៌ ស្ត្រីនឹងមានតម្រូវការកាល់ស្យូមកើនឡើង 122 – 167ភាគរយ ឬគួរបានទទួលជាតិកាល់ស្យូមយ៉ាងតិចបំផុត 1ក្រាមក្នុង 1ថ្ងៃ។ តាមរយៈការសិក្សាស្រាវជ្រាវមួយ បានឱ្យដឹងថា កាល់ស្យូមនឹងជួយកាត់បន្ថយសម្ពាធឈាមឡើងខ្ពស់នៅលើស្រ្តីមានគភ៌ កាត់បន្ថយភាពប្រថុយប្រថានចំពោះសភាវគភ៌មានជាតិពុលបានទៀតផង។
វីតាមីន A ៈ មានសម្ព័ន្ធភាពជាមួយកម្រិតសារធាតុដែក បើទទួលបានមិនគ្រប់គ្រាន់ក្នុងខណៈមានគភ៌ នឹងក្លាយជាមូលហេតុបណ្តាលឱ្យកើតរោគលោហិតស្លេកបាន។ បរិមាណដែលលោកគ្រូពេទ្យណែនាំឱ្យទទួលទាននោះគឺ 1ថ្ងៃ 5,000IU បើទទួលបានច្រើនជាង 10,000 IU ទារកនៅក្នុងផ្ទៃនឹងប្រថុយប្រថានក្នុងការកើតសភាវពិការ ជាពិសេសនៅលើប្រព័ន្ធបញ្ចេញទឹកមូត្រ។
ដូច្នេះហើយទើបការជ្រើសរើសប្រើអាហារបំប៉នក្នុងអំឡុងពេលមានគភ៌គួរស្ថិតនៅក្រោមការមើលថែរបស់គ្រូពេទ្យដើម្បីទទួលបានពាក្យណែនាំដែលត្រឹមត្រូវ និងការប្រើថ្នាំដែលស័ក្តិសម និងដើម្បីឱ្យទាំងម្តាយ និងទារកក្នុងផ្ទៃមានសុវត្ថិភាព រឹងប៉ឹង និងមានវិវឌ្ឍនាការដ៏ល្អប្រសើរ៕
January 5, 2021
អាហារសម្រាប់ស្ត្រីមានគភ៌ ៈ វីតាមីន A & D ត្រូវញ៉ាំឱ្យមានតុល្យភាព
វីតាមីនផ្សេងៗសុទ្ធតែមានភាពចាំបាច់ចំពោះរាងកាយទាំងអស់ តែបើបានទទួលច្រើន ឬតិចជ្រុលពេក ក៏អាចធ្វើឱ្យមានផលអាក្រក់បានដូចគ្នា ជាពិសេស វីតាមីន A និងវីតាមីន D បើបានទទួលច្រើនជ្រុលពេក នឹងពិបាកក្នុងការកម្ចាត់ចេញពីរាងកាយវិញ និងអាចធ្វើឱ្យមានគ្រោះថ្នាក់ដល់ស្ត្រីមានគភ៌ និងទារកក្នុងផ្ទៃបាន។
វីតាមីន A
ក្រៅពីមានផលដល់ការរីកចម្រើនធំធាត់ ការកសាងឆ្អឹង និងប្រព័ន្ធបន្តពូជហើយ នៅអាចការពារការឆ្លងមេរោគក្នុងប្រព័ន្ធរំលាយអាហារ ប្រព័ន្ធដកដង្ហើម និងប្រព័ន្ធបន្ទោរបង់ទឹកមូត្រ និងចាំបាច់ចំពោះរាងកាយក្នុងការបំបែកខ្លួនរបស់កោសិកាទៀតផង។
តែបើទទួលបានវីតាមីន A ច្រើនជ្រុលពេកក្នុងត្រីមាសដំបូងនៃការមានគភ៌ នឹងធ្វើឱ្យកើតសភាវរលូតបុត្រ ឬទារកពិការពីកំណើត ហើយថ្លើមរបស់ស្ត្រីមានគភ៌នឹងធ្វើការខុសប្រក្រតី ដោយសាតែមានការប្រមូលសន្សំវីតាមីន A ច្រើននៅក្នុងថ្លើម។ កើតសភាវឆ្អឹងពុក មានអាការក្អួតចង្អោ ឈឺក្បាល វិលមុខ និងស្រវាំងភ្នែក ជាដើម។
ស្ត្រីមានគភ៌គួរទទួលវីតាមីន A ក្នុងបរិមាណ 770ម៉ៃក្រូក្រាម ឬស្មើនឹងការញ៉ាំបន្លែផ្លែឈើយ៉ាងតិចបំផុតក្នុង 1ថ្ងៃ 5 ចំណែក(5 ក្តាប់ ឬប្រមាណ 1/2 គីឡូក្រាម)នឹងបានវីតាមីន សារធាតុរ៉ែគ្រប់គ្រាន់ចំពោះតម្រូវការរបស់រាងកាយ។
អាហារដែលមានវីតាមីន A មានដូចជា មើមការ៉ុត ម្ទេសបុក ដំឡូងជ្វា ថ្លើម ស៊ុត ទឹកដោះ បន្លែផ្លែឈើដែលមានពណ៌បៃតងចាស់ ពណ៌ក្រហម លឿងទុំ និងលឿង ដូចជា ផ្លែក្រូច ផ្លែខេនតាលូប(ត្រសក់ស្រូវបារាំង) ផ្លែទន្លាប់ ម៉ាក់ប្រាង។ល។ វីតាមីន A នៅក្នុងអាហារ និងបន្លែផ្លែឈើនឹងមិនធ្វើឱ្យរាងកាយបានទទួលវីតាមីនលើសពីតម្រូវការដូចវីតាមីនកែច្នៃនោះទេ។ វីតាមីន A ភាគច្រើនមានច្រើននៅក្នុងបន្លែផ្លែឈើដែលនឹងស្ថិតក្នុងរូបភាពជា បេតាឃែរ៉ូធីន ដែលត្រូវបានប្តូរទៅជាវីតាមីន A នៅក្នុងរាងកាយមួយសាទៀត។
វីតាមីន D
ជួយក្នុងការបឺតជ្រាបកាល់ស្យូមចូលទៅក្នុងរាងកាយ ជួយដល់ការធ្វើការងាររបស់បេះដូង និងប្រព័ន្ធការពាររោគ និងរក្សាកម្រិតសម្ពាធឈាម។
តែបើទទួលបានវីតាមីន D ច្រើនជ្រុលពេក នឹងធ្វើឱ្យកើតសភាវជាតិពុល ដូចជា ធុញទ្រាន់ ឬមិននឹកចង់ញ៉ាំអាហារ ប្រព័ន្ធរំលាយអាហារធ្វើការមិនបានល្អ មិនស្រួលក្នុងពោះ ឈឺក្បាល ឈឺសន្លាក់ឆ្អឹង កាល់ស្យូមនៅក្នុងឈាមខ្ពស់ កាល់ស្យូមតោងនៅក្នុងបេះដូង ក្រលៀន សរសៃឈាម និងប្រព័ន្ធដកដង្ហើម ធ្វើឱ្យអវយវៈទាំងនោះធ្វើការងារខុសប្រក្រតីដោយសារតែរាងកាយបឺតជ្រាបកាល់ស្យូមច្រើនជាងប្រក្រតី និងបង្ខំការរំលាយកាលស្យូមចេញពីឆ្អឹង ធ្វើឱ្យមានកាល់ស្យូមក្នុងឈាមខ្ពស់ និងបាត់បង់តុល្យភាព។
គួរបានទទួលវីតាមីន D ក្នុងបរិមាណ 600 IU ក្នុង 1ថ្ងៃ ឬឱ្យស្បែកដែលគ្មានឡេការពារពន្លឺថ្ងៃ បានប៉ះពន្លឺថ្ងៃក្នុងអំឡុងពេលមុនម៉ោង 10ព្រឹក ឬក្រោយម៉ោង 3រសៀល ប្រមាណជា 10 – 15នាទី ក្នុង 1អាទិត្យ 2ដង ដោយសារតែវីតាមីន D មាននៅក្នុងពន្លឺថ្ងៃ តែបច្ច័យដែលរារាំងការសាងវីតាមីន D នៅក្នុងស្រទាប់ស្បែកនោះគឺ សម្លៀកបំពាក់ ឡេការពារពន្លឺថ្ងៃ កញ្ចក់រថយន្ត ការធ្វើការនៅក្នុងបន្ទប់ ជាដើម។
អាហារដែលមានវីតាមីន D មានដូចជា សាច់ត្រីដែលមានអូមេហ្កា3 ដូចជាត្រីសាឌីន សាល់ម៉ុន មែកឃើរេល(សាបាក់) ធូណា ទឹកដោះ ខ្លាញ់ថ្លើមត្រី និងការប៉ះពន្លឺថ្ងៃខ្លះៗ នឹងទទួលបានវីតាមីន D គ្រប់គ្រាន់ល្មមជាមិនខាន។
Menu for mom
- ពេលព្រឹក ៈ ស៊ែនវិចឆ៍សាច់ត្រីធូណា-យ៉ាអួ ប្រើយ៉ាអួរសជាតិធម្មជាតិជំនួស ម៉ាយ៉ង់នេស ស្ករបន្តិច និងជួយរឿងប្រព័ន្ធបន្ទោបង់។ សារធាតុអាហារចម្បងដែលស្ត្រីមានគភ៌នឹងបានទទួលក្នុងពេលអាហារព្រឹកនេះគឺ ប្រូតេអុីន កាលស្យូម ខ្លាញ់ត្រី វីតាមីន A – B និងD។
- ពេលថ្ងៃត្រង់ ៈ ត្រីផ្លាធូចៀន បែបមិនឱ្យស្រួយពេក ព្រោះបើប្រើពេលចៀនយូរពេក ជាតិខ្លាញ់នៅក្នុងសាច់ត្រីនឹងរលាយចេញមកអស់ ធ្វើឱ្យមិនបានទទួលសារធាតុអាហារល្អៗ។
- ពេលល្ងាច ៈ ស្ងោជ្រក់ផ្សិត ផ្សិតដែលដុះឡើងតាមធម្មជាតិនឹងសម្បូរទៅដោយវីតាមីន D គ្រឿងស្ងោរជ្រក់រសជាតិស្រទន់បន្តិចនឹងជួយបំបាត់អាការក្អួតចង្អោ និងជួយឱ្យទទួលទានអាហារបានច្រើនឡើងទៀតផង។
យើងឃើញហើយថា សារធាតុរ៉ែ និងសារធាតុអាហារដែលល្អ ច្រើនតែចេញមកពីប្រភពអាហារតាមធម្មជាតិ ដូចជាបន្លែផ្លែឈើ សាច់សត្វ និងគ្រាប់ធញ្ញជាតិផ្សេងៗ ដូច្នេះដើម្បីសុខភាពដ៏ល្អរបស់ខ្លួនឯង និងកូនតូចនៅក្នុងផ្ទៃ ស្ត្រីមានគភ៌ត្រូវបរិភោគឱ្យបានគ្រប់គ្រាន់ និងសមរម្យ៕
December 7, 2020
សិល្បករកូរ៉េទាំងអស់ រំសាយការងារដើម្បីចូលរួមគោរពវិញ្ញាណក្ខន្ធ Kim Jong-hyun
តាមរយៈសារព័ត៌មាន koreaboo ចេញផ្សាយនៅថ្ងៃទី20 ខែធ្នូ ឆ្នាំ2017 បានឱ្យដឹងថា ចេញពីករណី Kim Jong-hyunតារាចម្រៀងប្រុសជាសមាជិកនៅក្នុងក្រុម SHINEE មានវ័យ 27 ឆ្នាំ បានធ្វើអត្តឃាតបញ្ចប់ជីវិតដោយខ្ទប់ដង្ហើមខ្លួនឯងជាមួយនឹងផ្សែងពុលមានសារធាតុ Carbon monoxide ហើយស្លាប់បាត់បង់ជីវិតនៅក្នុងផ្ទះសំណាក់មួយនៅក្នុងតំបន់ Cheongdam-dong នាទីក្រុងសេអ៊ូល ប្រទេសកូរ៉េខាងត្បូង ដែលបណ្ដាលឱ្យមានអ្នកគាំទ្រកូរ៉េ និងទូទាំងពិភពលោកមានការតក់ស្លុត និងសោកសៅដែលបានបាត់បង់មនុស្សជាទីស្រឡាញ់របស់ពួកគេ។
នៅទីបំផុត ក្រុមគ្រួសាររបស់តារាប្រុសរូបនេះ និងខាងផលិតកម្ម SM Entertainment បានរៀបចំពិធីបុណ្យសពនៅក្នុងអគារ Asan Medical Center Funeral Hall ដើម្បីឱ្យតារាកូរ៉េទាំងអស់ទូទាំងប្រទេស បានចូលទៅគោរពវិញ្ញាណក្ខន្ធសម្ដែងក្ដីអាឡោះអាល័យដល់រូប Jong-hyun នាវិនាទីចុងក្រោយ។ នៅក្នុងនោះគេសង្កេតឃើញមានក្រុមចម្រៀងជាច្រើនដូចជា តារានៅក្នុងផលិតកម្ម SM Entertainment , BoA ,Kangta, Super Junior, Girls’ Generation, f(x), EXO, Red Velvet, NCT, BTS, IU, F.T Island, Epik High, Block B, VIXX ដែលបានចំណាយពេលកំដរពិធីបុណ្យទាំងមូលទៀតផង។
សូមជម្រាបបន្ថែមថា ខាងផលិតកម្ម SM Entertainment ក៏បានរៀបចំកន្លែងថ្មីមួយទៀតសម្រាប់ទទួលអ្នកគាំទ្ររបស់តារាប្រុសខាងលើនេះដើម្បីចូលទៅគោរពសពនៅក្នុងថ្ងៃទី19-20 ខែធ្នូ ឆ្នាំ2017 ចាប់ពីវេលាម៉ោង 12.00-18.00 តាមពេលវេលានៅក្នុងប្រទេសកូរ៉េខាងត្បូង។ គួរបញ្ជាក់ផងដែរថា ចំពោះការបើកគម្របមឈូសគឺតម្រូវឱ្យសមាជិកនៅក្នុងក្រុម SHINEE មានចំនួន 4 រូបផ្សេងទៀតដូចជា Lee Tae-min, Choi Min-ho, Onew, Key ជាអ្នកបើក នៅថ្ងៃទី21 ខែធ្នូ ឆ្នាំ 2017 វេលាម៉ោង 09.00 ព្រឹក តាមម៉ោងនៅប្រទេសកូរ៉េ។
គួរកត់សម្គាល់ផងដែរថា នាវិនាទីចុងក្រោយនេះ សិល្បករកូរ៉េទាំងអស់បានប្រកាសរំសាយការងាររបស់ខ្លួនទាំងអស់ ដើម្បីចូលរួមគោរពវិញ្ញាណក្ខន្ធ Kim Jong-hyun ដែលដូចជាការរំលែកទុក្ខដល់ក្រុមគ្រួសារតារាប្រុសរូបនេះផងដែរ។ សូមទស្សនាទិដ្ឋភាពនៅក្នុងពិធីបុណ្យសពតាមរយៈវីដេអូខាងក្រោមនេះ៕
December 20, 2017
ទម្លាយរូបភាពកាលពីកុមារីរបស់តារាចម្រៀង IU ដ៏គួរឱ្យក្នាញ់
តាមរយៈសារព័ត៌មាន koreaboo នៅថ្ងៃទី7 ខែធ្នូ ឆ្នាំ2017 មុននេះបន្ដិចបានឱ្យដឹងថា មានអ្នកគាំទ្រជាច្រើននាក់បានទទូចទាមទារចង់ឃើញរូបថតកាលពីវ័យកុមាររបស់កំពូលតារាចម្រៀង Kpop នាង IU ទើបនៅពេលថ្មីៗនេះតារាចម្រៀងស្រីរូបនេះបានទម្លាយរូបថតរបស់ខ្លួនចេញមកជាច្រើនសន្លឹកនៅលើបណ្ដាញទំនាក់ទំនងសង្គម អ៊ីនស្តាក្រាម របស់ខ្លួន។ នាងបានបង្ហោះរូបនាងកាលពីទើបតែចេះតោងឈរ និងរៀនដើរតិចៗ ដែលមើលទៅគួរឱ្យឃ្នាន់ក្នាញ់ និងគួរឱ្យស្រឡាញ់ខ្លាំងបំផុត។
គួរបញ្ជាក់ផងដែរថា នៅពេលដែលអ្នកគាំទ្របានទស្សនារូបថតកាលពីក្មេងរបស់នាងហើយនោះ គ្រប់គ្នាមានភាពភ្ញាក់ផ្អើល ហើយលាន់មាត់សរសើរនាងមិនដាច់ពីមាត់ថា «នៅពេលបានមើលឃើញរូបកាលពីក្មេងរបស់នាងហើយ យើងគិតថា នាងមានរូបសម្ផស្សស្រស់ស្អាត ហើយមានលក្ខណៈធម្មជាតិ 100% មិនកែសម្ផស្សក៏ស្អាតដែរ» ។ ដូចដែលបានដឹងហើយថា ប្រទេសកូរ៉េ គឺជាប្រទេសមួយដែលល្បីខាងផ្នែកកែសម្ផស្សស្រស់ស្អាតជាងគេនៅលើពិភពលោកនេះ។
ដើម្បីឱ្យកាន់តែច្បាស់បន្ថែមទៀត សូមទស្សនារូបភាពកាលពីកុមារភាពរបស់តារាចម្រៀងស្រី IU ខាងក្រោមនេះ ៖
December 7, 2017
Lee Hyori បកស្រាយ ហេតុអ្វីបាននាងគ្មានមិត្តភ័ក្ដិស្រីល្បីៗ
ថ្មីៗនេះ តារាចម្រៀងស្រី Lee Hyori និង IU បានបង្ហោះរូបភាពមួយចំនួននៅលើបណ្ដាញទំនាក់ទំនងសង្គម ដែលបង្ហាញអំពីការចាប់ផ្ដើមបង្កើតសម្ព័ន្ធភាពមិត្តភ័ក្តិស្រីនឹងគ្នានៅក្នុងឧស្សាហកម្មសិល្បៈចម្រៀង ក៏ប៉ុន្តែវាពិតជាពេលវេលាដ៏ពិបាកមួយដើម្បីបង្កើតមិត្តភ័ក្តិដែលយល់ចិត្តយល់ថ្លើមគ្នា។ យ៉ាងណាមិញអ្នកទាំងពីរមើលទៅទំនងជា មិត្តដែលស្និទ្ធស្នាលនឹងគ្នា ខណៈពេលសម្ដែងរឿង និងក្នុងកម្មវីធី Home Stay។
ដោយឡែកតារាស្រី Lee Hyori បានសារភាព និងប្រកាសថា ខ្លួននាងគ្មានមិត្តភ័ក្ដិស្រីល្បីៗនៅក្នុងពិភពសិល្បៈដូចគ្នាឡើយទោះជាក្នុងអំឡុងពេលដែលនាងកំពុងល្បីក៏ដោយ។ នាងបានពន្យល់ថា ការច្រណែន និងឈ្នានីស វារមែងតែងតែជារឿងពិបាកមួយសម្រាប់នាងក្នុងការបង្កើតមិត្តភ័ក្ដិ “នាងខ្ញុំពិតជាគ្មានមិត្តភ័ក្ដិស្រីល្បីៗទេ ហើយក្នុងអំឡុងពេលនៃការសម្ដែងរបស់នាងខ្ញុំពិតជាមានកម្មវិធីជាច្រើនដែលមានឱកាសបានជួបជាមួយតារាល្បីៗ និងមិត្តភ័ក្តិរបស់គេច្រើនណាស់ ប៉ុន្ដែនាងខ្ញុំគិតថា តើយើងគួរគិតថាខ្លួនឯងត្រូវតែបានគេអញ្ជើញ និងរាប់រកដែរឬទេ?” នេះបើតាមសម្ដីរបស់នាងដែលបានផ្ដល់បទសម្ភាស។
ទន្ទឹមគ្នានោះដែរ នាងក៏បានបញ្ជាក់បន្ថែមទៀតថា “ប្រសិនបើតារាល្បីៗ ធ្វើការនៅក្នុងវិស័យដូចគ្នានោះ វារាងលំបាកបន្ដិចក្នុងការបង្កើតសម្ព័ន្ធភាពល្អៗ និងស៊ីជម្រៅ យល់ចិត្តយល់ថ្លើមគ្នា តែវាហាក់បីដូចជាមានអារម្មណ៍ថា ការច្រណែន និងឈ្នានីស មានច្រើននៅក្នុងវិស័យមួយនេះ”៕
July 18, 2017