Huawei - La Reine Media

Huawei និង BAIC ជិតបង្ហាញវត្តមានរថយន្តសេដានអគ្គិសនី Stelato S9

រថយន្តគំរូដំបូងដែលត្រូវបានសហការផលិតដោយក្រុមហ៊ុន Huawei និង BAIC BluePark (SHA: 600733) ដែលជាសាខាក្រុមហ៊ុនរថយន្តអគ្គិសនីរបស់សាជីវកម្មរថយន្តប៉េកាំង (BAIC Group) គ្រោងនឹងបង្ហាញវត្តមាននៅក្នុងពិព័រណ៍រថយន្តប៉េកាំង នៅថ្ងៃទី 20 តុលាឆ្នាំនេះ។

ក្រសួងឧស្សាហកម្ម និងបច្ចេកវិទ្យាព័ត៌មានចិន (MIIT) កាលពីថ្ងៃទី 12 មីនា បានបង្ហាញបញ្ជីឈ្មោះបណ្ដារថយន្តគំរូថ្មីបំផុតដែលនឹងត្រូវបានអនុញ្ញាតឱ្យលក់ដើម្បីប្រមូលមតិពីអ្នកប្រើប្រាស់ ក្នុងនោះក៏មាន Stelato S9 ផងដែរ។

រថយន្តនេះត្រូវបានផលិតដោយក្រុមហ៊ុន BAIC BluePark និងត្រូវបានហៅថា Xiangjei S9 ហើយមានស្លាកសញ្ញាពាណិជ្ជកម្ម Stelato នៅផ្នែកខាងក្រោយ។

BAIC BluePark ឱ្យដឹងថា ខ្លួនកំពុងសហការជាមួយ Huawei ដើម្បីអភិវឌ្ឍយីហោថ្មីមួយដែលមានឈ្មោះថា Xiangjei (នៅក្នុងភាសាចិន)។ ព័ត៌មាននៅលើឯកសារដែលបានបញ្ជូនទៅកាន់ស្ថាប័នមានសមត្ថកិច្ចបង្ហាញថា ឈ្មោះផ្លូវការជាភាសាអង់គ្លេសរបស់ Xiangjie គឺ Stelato។

Stelato S9 គឺជារថយន្តប្រភេទសេដាន ដំណើរការដោយអគ្គិសនី។ រថយន្តនេះនឹងមាន 3 កំណែសម្រាប់ជ្រើសរើស រួមមាន 2 កំណែមានម៉ាស៊ីន 1 គ្រឿង និងមួយកំណែមានម៉ាស៊ីនពីរគ្រឿង។

March 14, 2024

Volkswagen ចរចាជាមួយក្រុមហ៊ុនចិន ដើម្បីទិញសបវ៉ែរសម្រាប់រថយន្តអគ្គិសនី

Volkswagen បានចរចាដើម្បីទិញសបវ៉ែរផ្នែករថយន្តអគ្គិសនីពីក្រុមហ៊ុន Huawei ដោយសង្ឃឹមថា នឹងដណ្ដើមបានចំណែកទីផ្សារធំជាងមុន ក្នុងវិស័យរថយន្តអគ្គិសនីនៅប្រទេសចិន។

យោងតាមរបាយការណ៍របស់ Financial Times ដែលបានចុះផ្សាយនាថ្ងៃនេះ ក្រុមហ៊ុនអន្តរជាតិអាល្លឺម៉ង់ Volkswagen បានចរចាជាមួយក្រុមហ៊ុនចិន Huawei ដើម្បីអាចប្រើប្រាស់បច្ចេកវិទ្យារបស់ក្រុមនេះនៅក្នុងរថយន្តរបស់ខ្លួន។ ប្រភពព័ត៌មានខ្លះថា VW ក៏បាន និងកំពុងចរចាជាមួយក្រុមហ៊ុនចិនដទៃ ទាក់ទងនឹងរឿងទិញដូរនេះដែរ។

Volkswagen គឺជាមួយក្នុងចំណោមក្រុមហ៊ុនផលិតរថយន្តដែលលក់ដាច់ជាងគេនៅប្រទេសចិន ប៉ុន្តែបែរជាអន់ថយនៅក្នុងទីផ្សាររថយន្តអគ្គិសនី បើធៀបនឹងបណ្ដាក្រុមហ៊ុនក្នុងស្រុករបស់ចិន ពិសេសគឺ BYD។ ប៉ុន្តែ បច្ចុប្បន្ន VW ត្រូវបានគេមើលឃើញ កំពុងសកម្មខ្លាំងនៅក្នុងការងាកទៅរកទីផ្សាររថយន្តអគ្គិសនី៕

May 18, 2023

កូនស្រីរបស់ស្ថាបនិកក្រុមហ៊ុនចិន Huawei អាចត្រូវបានដោះលែងនៅសប្ដាហ៍ក្រោយ

តុលាការកាណាដានឹងចេញសាលក្រមនៅសប្ដាហ៍ក្រោយទាក់ទងនឹងបញ្ហាដែលថា គួរតែបញ្ជូនខ្លួននាយិកាផ្នែកហិរញ្ញវត្ថុរបស់ក្រុមហ៊ុន Huawei គឺអ្នកស្រី Meng Wanzhou ទៅកាន់ទឹកដីអាមេរិកតាមសំណើពីអាមេរិកាំងដែរ ឬយ៉ាងណា។

យោងតាមសារព័ត៌មាន South China Morning Post អ្នកស្រី Heather Holmes ដែលជាអនុប្រធានតុលាការកំពូលនៃខេត្ត British Columbia របស់ប្រទេសកាដាណា នៅថ្ងៃទី22នេះ បានឱ្យដឹងថា តុលាការនេះនឹងសម្រេចប្រកាសសាលក្រមលើរឿងក្ដីរបស់អ្នកស្រី Meng Wanzhou ដែលជានាយិកាហិរញ្ញវត្ថុរបស់ក្រុមហ៊ុនចិន Huawei នៅថ្ងៃទី27ឧសភាខាងមុខ ហើយអ្នកស្រី Meng Wanzhou ប្រហែលជាអាចត្រូវបានដោះលែងឱ្យមានសេរីភាព។

សាលក្រមតុលាការខេត្ត British Columbia របស់កាដាណានឹងសម្រេចថា តើអ្នកស្រី Meng Wanzhou បានប្រព្រឹត្តបទល្មើសចំនួនពីរដែរ ឬយ៉ាងណា ពោលគឺមានន័យថា អ្នកស្រីនឹងត្រូវបានបញ្ជូនទៅកាន់សហរដ្ឋអាមេរិក បើសិនជាត្រូវបានថ្កោលទោសទាំងនៅកាណាដា ទាំងនៅសហរដ្ឋអាមេរិក។ បើសិនជាអនុប្រធានតុលាការកំពូលនៃខេត្ត British Columbia សម្រចចិត្តចេញសាលក្រមបញ្ជាក់ថា អ្នកស្រី Meng Wanzhou មិនបានប្រព្រឹត្តខុសច្បាប់សហរដ្ឋអាមេរិកនោះទេ អ្នកស្រី Wanzhou អាចនឹងត្រូវបានដោះលែង ប៉ុន្តែ ប្រការនេះក៏នៅតែអាស្រ័យទៅលើក្រុមមេធាវីរបស់សហរដ្ឋអាមេរិកប្រចាំប្រទេសកាណាដា ដែលថាតើពួកគេបន្តប្ដឹងឧទ្ធរណ៍ទៀតឬអត់។ ផ្ទុយទៅវិញ បើសិនជាពិនិត្យឃើញថា អ្នកស្រី Wanzhou បានប្រព្រឹត្តខុសច្បាប់សហរដ្ឋអាមេរិកដែរនោះ រឿងក្ដីបញ្ជូនខ្លួនអ្នកស្រីទៅកាន់សហរដ្ឋអាមេរិកនឹងនៅតែបន្តទៅមុខជាមួយនឹងការការពារកូនក្ដីរបស់ក្រុមមេធាវីដែលតំណាងឱ្យអ្នកស្រី Wanzhou។

កូនស្រីរបស់ស្ថាបនិកក្រុមហ៊ុន Huawei អាចត្រូវបានដោះលែងនៅសប្ដាហ៍ក្រោយ — អ្នកស្រី Meng Wanzhou ចាកចេញពីតុលារមួយនៅកាណាដាកាលពីខែមករា ឆ្នាំ2020

ដើម្បីទទួលបានសេរីភាព អ្នកស្រី Wanzhou និងក្រុមមេធាវីរបស់អ្នកស្រី ត្រូវតែធ្វើយ៉ាងដើម្បីបញ្ចុះបញ្ចូលចៅក្រមតុលាការឱ្យជឿជាក់ថា ការចោទប្រកាន់របស់សហរដ្ឋអាមេរិកគឺមិនសមស្រាបជាមួយនឹងច្បាប់របស់កាដាណា និងជារឿងនយោបាយ។

រឿងក្ដីធ្វើបត្យាប័ននាយិកាហិរញ្ញវត្ថុរបស់ Huawei អាចបន្តរហូតដល់ខែតុលា ឬខែវិច្ឆិកាឆ្នាំនេះ អាស្រ័យទៅលើការវិនិច្ឆ័យរបស់ចៅក្រម។ ក៏ប៉ុន្តែ ដោយសារតែមានភាពស្មុគស្មាញខ្លាំង រឿងក្ដីនេះអាចអូសបន្លាយជាច្រើនឆ្នាំទៅមុខទៀត។

អ្នកស្រី Wanzou ត្រូវបានសមត្ថកិច្ចប្រទេសកាណាដាចាប់ឃាត់ខ្លួននៅឯព្រលានយន្តហោះ Vancouver កាលពីថ្ងៃទី1ធ្នូ ឆ្នាំ2018 ទៅតាមសំណើរបស់សហរដ្ឋអាមេរិក។ អ្នកស្រី Meng Wanzhou ត្រូវបានសហរដ្ឋអាមេរិកចោទថាបានកុហកធនាគារធំៗនៅសហរដ្ឋអាមេរិកអំពីការគ្រប់គ្រងរបស់ក្រុមហ៊ុន Huawei ទៅលើក្រុមហ៊ុន Skycom នៅទីក្រុងហុងកុង។ Skycom គឺជាក្រុមហ៊ុនមួយដែលត្រូវគេចោទប្រកាន់ថាបានលក់ទំនិញទៅឱ្យប្រទេសអ៊ីរ៉ង់ ដែលនេះគឺជាការរំលោភលើការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិកទៅលើរដ្ឋាភិបាលអ៊ីរ៉ង់។ បើសិនជាត្រូវបានកាត់ទោសនៅសហរដ្ឋអាមេរិក អ្នកស្រី Meng Wanzhou អាចប្រឈមនឹងការជាប់ពន្ធនាគាររយៈពេល30ឆ្នាំ។

រឿងក្ដីខាងលើនេះ បានធ្វើឱ្យទំនាក់ទំនងរវាងប្រទេសចិនជាមួយកាដាណា និងចិនជាមួយអាមេរិកាំងមានភាពតានតឹង។ បន្ទាប់ពីអ្នកស្រី Meng Wanzhou ត្រូវបានចាប់ឃាត់ខ្លួនបាន9ថ្ងៃ អាជ្ញាធរចិនក៏បានចាប់ខ្លួន Michael Kovrig ដែលជាអតីតអ្នកការទូត និង Michael Spavor ជាអ្នកជំនួញរបស់សហរដ្ឋអាមេរិកផងដែរ៕

ប្រភព៖ សារព័ត៌មានបរទេស

May 22, 2020

សហរដ្ឋអាមេរិក ចេញច្បាប់ហាមក្រុមហ៊ុនអ៊ីនធើណិត មិនឱ្យប្រើប្រាស់ឧបករណ៍បច្ចេកវិទ្យារបស់ក្រុមហ៊ុនចិន Huawei

ប្រធានាធិបតីសហរដ្ឋអាមេរិក លោក Donald Trump កាលពីម្សិលមិញ បានចេញច្បាប់ហាមក្រុមហ៊ុនអ៊ីនធើណិតក្នុងប្រទេសនេះ មិនឱ្យយកប្រាក់ជំនួយរបស់រដ្ឋាភិបាល ទៅទិញឧបករណ៍បច្ចេកវិទ្យាពីក្រុមហ៊ុនចិន Huawei។

ទន្ទឹមនឹង Huawei ច្បាប់នេះក៏ហាមក្រុមហ៊ុនទូរគមនាគមន៍នៅសហរដ្ឋអាមេរិក ទិញឧបករណ៍ពីបណ្ដាក្រុមហ៊ុនផ្សេងដែលត្រូវបានសហរដ្ឋអាមេរិក ចាត់ទុកថាជា “ការគំរាមកំហែងដល់សន្តិសុខជាតិ”។

ច្បាប់នេះក៏បានស្នើឱ្យគណៈកម្មការទូរគមនាគមន៍សហរដ្ឋ FCC (Federal Communications Commission) បង្កើតកម្មវិធីជំនួយដល់បណ្ដាក្រុមហ៊ុនអ៊ីនធើណិតតូចៗផងដែរ។ ក្រុមហ៊ុនតូចទាំងនោះ នឹងទទួលបានប្រាក់ជំនួយពីរដ្ឋាភិបាល បើសិនពួកគេយល់ព្រមបោះបង់ឧបករណ៍ ឬសេវាកម្មរបស់ចិន ដែលត្រូវបានហាមដោយអាមេរិក ចេញពីប្រព័ន្ធទូរគមនាគមន៍។

កាលពីថ្ងៃទី27មីនា សភាជាន់ខ្ពស់សហរដ្ឋអាមេរិក បានបោះឆ្នោតយល់ព្រមទម្លាក់កញ្ចប់ថវិកាជំនួយ ចំនួន1ពាន់លានដុល្លារ សម្រាប់ក្រុមហ៊ុនទូរគមនាគមន៍ណាដែលមិនប្រើប្រាស់ឧបករណ៍ដែលផលិតឡើងដោយក្រុមហ៊ុន ចិន Huawei និង ZTE។ កញ្ចប់ជំនួយនេះ នឹងប្រើប្រាស់ដើម្បីជួយដល់ក្រុមហ៊ុនអ៊ីនធើណិតតូចៗ ដែលកំពុងធ្វើសកម្មភាពនៅតាមតំបន់ជនបទ នៅទូទាំងសហរដ្ឋអាមេរិក។ នេះបើតាមការចុះផ្សាយរបស់សារព័ត៌មាន SCMP។

សមាគមទូរគមនាគមន៍មិនប្រើខ្សែនៅជនបទរបស់សហរដ្ឋអាមេរិក RWA (Rural Wireless Association) បានសរសើរអំពីកាយវិការនេះរបស់សភាជាន់ខ្ពស់ ប៉ុន្តែ សមាគមនេះយល់ថា 1ពាន់លានដុល្លារ គឺវា “មិនសមស្រប” នោះទេ។ នេះបើតាមសារព័ត៌មាន Reuters។

បច្ចុប្បន្ន ក្រុមហ៊ុនទូរគមនាគមន៍ជាច្រើននៅសហរដ្ឋអាមេរិក បានបំពាក់ឧបករណ៍ផ្សេងៗដែលផលិតដោយក្រុមហ៊ុនចិន Huawei និង ZTE ដោយសារតែវាមានតម្លៃទាប។ ប៉ុន្តែ ឧបករណ៍ទាំងនោះ ភាគច្រើន ត្រូវបានបំពាក់តាំងពីប៉ុន្មានឆ្នាំមុនមកហើយ។

សេតវិមាន ធ្លាប់បានលើកឡើង និងសង្ស័យថា Huawei បានប្រើប្រាស់បណ្ដាញទូរគមនាគមន៍ដើម្បីបើកដៃឱ្យរដ្ឋាភិបាលចិន ធ្វើសកម្មភាពចារកិច្ច។ រដ្ឋាភិបាលសហរដ្ឋអាមេរិក ក៏មានការព្រួយបារម្ភ ខ្លាចក្រុមហ៊ុនចិននឹង “បង្កការគំរាមកំហែងដល់សន្តិសុខជាតិ” បើសិនជាទទួលបានការអនុញ្ញាតឱ្យដំឡើងប្រព័ន្ធ 5G នៅលើទឹកដីសហរដ្ឋអាមេរិក។ ប៉ុន្តែ ក្រុមហ៊ុន Huawei តែងតែបដិសេធរាល់ការចោទប្រកាន់នេះ៕

ប្រភព៖ សារព័ត៌មានបរទេស

March 13, 2020

ទស្សនាទិដ្ឋភាពនៃទីក្រុងឌូបៃ ថតដោយជើងឯកឆ្នើមនៃកម្មវិធីប្រកួតថតរូប Huawei

ភ្នំពេញ៖ ទីបំផុតក្រុមហ៊ុន Huawei ស្មាតហ្វូនធំជាងគេលំដាប់ពិភពលោកលេខ 2 និងជាម្ចាស់តំណែងលេខ 1 លើប្រាក់ចំណេញ ពីប្រព័ន្ធប្រតិបត្តិការ Android ស្មាតហ្វូន បានផ្តល់ដំណើរកម្សាន្តពិសេសទៅឌួបៃ ដល់ម្ចាស់ជ័យលាភី នៃកម្មវិធីប្រកួតថតរូប Huawei វគ្គ 3 ដូចការសន្យា។

លោក សេង លូន (Lun Ramio) ជាបេក្ខជនដែលទទួលបានចំណាត់ថ្នាក់លេខ១ ពីកម្មវិធីប្រកួតថតរូប Huawei រដូវកាលទី 3 បានឱ្យដឹងថា៖ “វាការចងចាំ 1 ដែលខ្ញុំមិនអាចបំភ្លេចបានឡើយ អរគុណដល់ក្រុមហ៊ុន Huawei Mobile KH ដែលបានផ្តល់រង្វាន់ធំដែលមិនធ្លាប់មានពីមុនមកគឺដំណើរកម្សាន្ត ទៅលេងប្រទេសឌូប៉ៃ”។ ក្រៅពីនេះ លោក លូន ក៏បានសម្តែង ចំណាប់អារម្មណ៍ផ្ទាល់ខ្លួនទាក់ទងទៅនឹងកំពូលស្មាតហ្វូន Huawei P10 & P10Plus ថា៖

១). ប្រើបច្ចេកទេស កាម៉េរា ភ្លោះមុនគេបង្អស់ ដែលបានបំពាក់ដោយកែវឡេន Leica ធ្វើអោយរូបថត ច្បាស់ដិតល្អ មិនថាថតនៅ កន្លែងបែបណា ក៏Huawei P10 P10Plus នៅតែធ្វើបានល្អជាង Brand ដទៃ។

(២).ទាក់ទងទៅនឹងកម្មវិធី ងាយស្រួលប្រើប្រាស់ ហើយមុខងារកាមេរ៉ា ពិសេសៗលើសគេ Pro mode ងាយស្រួលប្រើ ដូចកាមេរ៉ា អាជីព ជាពិសេសគឺមុខងារ Monochrome, Wide Aperture or Portrait mode ធ្វើបានល្អដូចកាម៉េរាអាជីពផងដែរ។ ថែមពីនេះទៀតក៏មានថតជា File Raw ផងដែរ ដែលធ្វើឲ្យរូបភាពទូលំទូលាយក្នុងការយកមកកែប្រែបន្ថែមទៀតផង។

(៣). រចនាបទទាន់សម័យ កំលាំងម៉ាស៊ីនខ្លាំង ថ្មកាន់បានយូរ ជាពិសេស Huawei P10 & P10 Plus បានប្រើប្រាស់មុខងារ សាកថ្មបានលឿន ហើយមានតម្លៃសមរម្យជាងគេ។ មូលហេតុដែលខ្ញុំប្រើ Huawei P10 Plus ព្រោះ វាងាយស្រួលប្រើ មានមុខងារកាមេរ៉ាដូចកាមេរ៉ាអាជីព ដែល មាន Huawei ក្នុងហោប៉ៅដូចជាមានម៉ាស៊ីនថតអាជីព តាមខ្លួនអញ្ចឹង។

តោះកុំឲ្យខាតពេលយូរ អញ្ជើញទៅទស្សនា ទិដ្ឋភាពនៃទីក្រុងឌូបៃ ដែលផ្តិតចេញពីកំពូលស្មាតហ្វូន Huawei P10 Plus ដោយ ជើងឯក ថតរូបឆ្នើម លោក សេង លូន (Lun Ramio) ទាំងអស់គ្នា៖

គួររំលឹកថា ក្រោយការជម្រុះដ៏ស្វិតស្វាញអស់រយៈពេលជាង 11 សបា្តហ៍ ក្នុងចំណោមអ្នកចូលរួមចុះឈ្មោះប្រកួតថតរូប ប្រមាណជាង 600 នាក់ដំបូង ទូទាំងប្រទេស ពេលនេះ ក្រុមហ៊ុន Huawei បានរកឃើញម្ចាស់ជ័យលាភី ៣រូប ចុងក្រោយ ដែលពោរពេញដោយសមត្ថភាព និងភាពច្នៃប្រឌិតតាមរយៈ ការថតរូបចេញពីស្មាតហ្វូន Huawei ក្រោមប្រធានបទ “ប្រជាជនកម្ពុជា (People of Cambodia)”។

លោក អែម យុទ្ធូ នាយកជាន់ខ្ពស់ផ្នែកទីផ្សារ Huawei ប្រចាំប្រទេសកម្ពុជាបានបញ្ជាក់ថា កម្មវិធី ថតរូប HuaweiProContestIII មានរយៈពេល 11 សប្តាហ៍ ធ្វើឡើងជាពិសេសសម្រាប់អតិថិជន និងអ្នកគាំទ្រ ដែលតែងតែជឿជាក់ទៅលើស្មាតហ្វូនរបស់ Huawei គ្រប់ម៉ូដែល ។ ក្រុមហ៊ុនតែងតែ បង្កើតកម្មវិធីប្លែកៗ ដើម្បី ផ្តល់ការសប្បាយ និងរង្វាន់ពិតៗជូនដល់អ្នកប្រើប្រាស់ជានិច្ច។

“Huawei សូមចូលរួមអបអរសាទរ និងអរគុណយ៉ាងជ្រាលជ្រៅចំពោះបេក្ខជនទាំងអស់ ដែលបានចូលរួមក្នុងការប្រកួតរបស់យើងតាំងពីដើមរហូតដល់វគ្គផ្តាច់ព្រាត់ ហើយអ្វីដែលពិសេសនោះគឺ ការជឿជាក់របស់លោកអ្នក ក្នុងការជ្រើសរើស យកស្មាតហ្វូន Huawei ធ្វើជាដៃគូក្នុងការប្រើប្រាស់ប្រចាំថ្ងៃ”។

ដូចធ្លាប់បានសន្យា ក្រុមហ៊ុនHuawei បានផ្តល់រង្វាន់ ដំណើរកម្សាន្ត ដ៏អស្ចារ្យ មិនធ្លាប់មានពីមុន ទៅកាន់ប្រទេសឌូបៃ សម្រាប់ម្ចាស់ជ័យលេខ១, Huawei P10 សម្រាប់ជ័យលាភីលេខ២, Huawei GR5 2017 សម្រាប់ជ័យលាភីលេខ 3 ហើយសម្រាប់បេក្ខជនជើងខ្លាំង ទំាង៧រូបដែលពុំទទួលបានជ័យជំនះ ក៏ទទួលបាន រង្វាន់រួមមាន Power Bank (5,000mAh), Selfie Stick, Connector (Type B/Type C with wire) ម្នាក់មួយឈុត ហើយជាពិសេស អ្នកទាំង១០រួប ក៏នឹងទទួលបានលិខិតសរសើរ (Certificate Award) ពីក្រុមហ៊ុន Huawei ចំនួនម្នាក់មួយ”។

កម្មវិធីប្រកួតថតរូប HuaweiProContestIII នេះ ក្រុមហ៊ុន Huawei បានសហការជាមួយក្រុមហ៊ុន ដូចជា Sabay, Khmer Note, Electronic World, AEON Major Cineplex Cinema Powered by Cellcard, Kingtel (Mobile Wifi) និង TOUS les JOURS ដើម្បីញ៉ាំងអោយការប្រកួត នេះកាន់តែគគ្រឹកគគ្រេងជាងមុន៕

September 26, 2017

Huawei ថា បន្ទះឈីបថ្មីរបស់ខ្លួននឹងផ្ដួល Apple និង Samsung (មានវីដេអូ)

ក្នុងព្រឹត្តិការណ៍បង្ហាញផលិតផលបច្ចេកវិទ្យា IFA ឆ្នាំ2017 នៅទីក្រុងប៊ែរឡាំង កាលពីថ្ងៃទី2 ខែកញ្ញាកន្លងទៅ ក្រុមហ៊ុន Huawei បានបញ្ចេញនូវបន្ទះឈីបថ្មីមួយដោយអះអាងថា អាចផ្ដួលគូប្រជែងធំៗទាំង 2 របស់ខ្លួនបាននៅឆ្នាំ 2018 ខាងមុននេះ។

លោក Richard Chu នាយកជាន់ខ្ពស់ផ្នែកទូរស័ព្ទចល័តនៃក្រុមហ៊ុន Huawei បានឱ្យដឹងថា Huawei Kirin 970 ជាបន្ទះឈីបមានទំហំតូច 10nm ដំបូងរបស់ Huawei ដូចទៅនឹង Exynos 8895 និងមានសមត្ថភាពខ្លាំងជាងបន្ទះឈីបត្រកូល Kirin ណាៗទាំងអស់ ដោយវាមាន CPU ចំនួន 8 គ្រាប់ អង្គក្រាហ្វិកទៅដល់ 12 គ្រាប់ មាន 4 គ្រាប់ល្បឿន 2.4GHz ប្រភេទ Cortex-A73 និង 4 គ្រាប់ទៀតល្បឿន 1.8GHz ប្រភេទ Cortex-A53 ជាមួយនឹង Dual-ISP ដែលធ្វើឱ្យអ៊ីនធើណិតមានល្បឿនលឿន Cat 18. LTE ។

លោកថា៖ បើប្រៀបធៀបនឹង Apple និង Samsung យើងនាំមុខជាងហើយ និងអ្វីដែលគួរឱ្យចាប់អារម្មណ៍ទៀតនោះ គឺបន្ទះឈីបនេះអាចប្រើបានជាមួយនឹងបច្ចេកវិទ្យា AI ដោយប្រើប្រាស់ NPU (Neural Processing Unit) ទៀតផង។

Kirin 970 ប្រើប្រាស់ថាមពលតិចជាងមុន 50 % និងមានល្បឿនលឿនជាងបន្ទះឈីប Kirin 960 ចំនួន 20%។ ក្នុងនោះស្មាតហ្វូនដែលបំពាក់បន្ទះឈីបនេះមុនគេ គឺទូរស័ព្ទ Huawei Mate 10 ដែលក្រុមហ៊ុនគ្រោងដាក់បង្ហាញនៅថ្ងៃទី16 ខែតុលា ឆ្នាំ2017 ខាងមុខនេះឯង។

Mate 10 នឹងមានអេក្រង់ទំហំ 6 អ៊ីញ លាតគ្មានគែមអេក្រង់ និងមានបំពាក់ដោយកាមេរ៉ាភ្លោះពីក្រុមហ៊ុន Leica ដដែល៕

សូមទស្សនាវីដេអូខាងក្រោមនេះ ៖

https://www.youtube.com/watch?v=T915ObAYPP0

September 5, 2017

Honor 9 ស្មាតហ្វូនកាមេរ៉ាភ្លោះថ្មីរបស់ Huawei តម្លៃអាចទទួលយកបាន

កាលពីថ្ងៃម្សិលមិញ ក្រុមហ៊ុន Huawei បានដាក់ចេញនូវស្រឡាយស្មាតហ្វូនត្រកូល Honor មួយទៀតហើយ ដែលមានបំពាក់នូវកាមេរ៉ាភ្លោះមានសមត្ថភាពខ្លាំង រូបរាងស្រោបដោយកញ្ចក់ទាំងខាងមុខ និងខាងក្រោយស្រដៀងទៅនឹង Honor 8 ជំនាន់មុន និង Mi 6 ដែរ។

លក្ខណសម្បត្តិរបស់ Honor 9 ចេញមកដូចនឹងព័ត៌មានដែលបានបែកធ្លាយកាលពីពេលកន្លងទៅមែន ដោយវាត្រូវបានបំពាក់នូវអេក្រង់ Full HD ទំហំ 5.15 អ៊ីញ ប្រើបច្ចេកវិទ្យាពណ៌ DCI-P3 ដូចនឹងទូរស័ព្ទ iPhone 7 និង Galaxy S8 ដែរ។ ក្នុងនោះ វាក៏ប្រើនូវបន្ទះឈីបផ្ទាល់ពីក្រុមហ៊ុន HiSilicon Kirin 960 ដូចនឹងទូរស័ព្ទ Mate 9 និង P10 និងដំណើរការដោយប្រព័ន្ធ Android 7.0 Nougat ស្រោបដោយផ្ទាំងប្រើប្រាស់ EMUI 5.1។

ទូរស័ព្ទនេះ បានបំពាក់ដោយប្រព័ន្ធកាមេរ៉ាភ្លោះនៅខាងក្រោយទំហំ 20MP/12MP និងមានទ្រនាប់ស្គែនក្រយៅម្រាមដៃនៅលើHome Button ដូច Honor Magic, P10 Series និង Mate 9 Pro ។ មួយវិញទៀត វាក៏មាន Ram ទំហំ 6GB និងមាន Memory ម៉ាស៊ីន 64GB/128GB បន្ថែមក្រៅបានដល់ 256GB អាចប្រើបានស៊ីម 2 ប្រភេទ hybrid SIM និងមានថាមពលថ្ម 3200mAh ប្រើរន្ធសាកបញ្ចូលថ្ម USB Type-C។

ចំពោះតម្លៃខុសគ្នាអាស្រ័យលើជម្រើស ដោយទំហំផ្ទុកទិន្នន័យ 64GB/Ram4GB តម្លៃស្ថិតក្នុងខ្ទង់ 323 ដុល្លារ, ទំហំផ្ទុក 64GB/Ram6GB តម្លៃខ្ទង់ 398 ដុល្លារ និងទំហំផ្ទុក128GB/ Ram 6GB មានតម្លៃខ្ទង់ 441 ដុល្លារ ដោយតម្លៃទាំងអស់នេះអាចនឹងប្រែប្រួលតាមប្រទេសនីមួយៗ៕

June 13, 2017

Nova ស្មាតហ្វូនកាមេរ៉ាភ្លោះរបស់ Huawei មានរូបរាងសឹងតែចាប់ច្រឡំនឹង iPhone 7 Plus

កាលពីប៉ុន្មានថ្ងៃមុននេះ ក្រុមហ៊ុនបច្ចេកវិទ្យាយក្សរបស់ចិន Huawei បានបញ្ចេញស្មាតហ្វូន 2 ស៊េរីទៀតបំពាក់កាមេរ៉ាភ្លោះ មានរូបរាងស្ទើរតែចាប់ច្រឡំនឹងទូរស័ព្ទ iPhone 7 Plus របស់ក្រុមហ៊ុន Apple ។ វាទាំង 2 មានរូបរាងដូចគ្នា ខុសតែទំហំអេក្រង់ ដោយមួយមានទំហំអេក្រង់ 5អ៊ីញ និងមួយទៀតទំហំអេក្រង់ 5.5អ៊ីញ។

Huawei Nova 2 និង Nova 2 Plus មានតួម៉ាស៊ីនទាំងមូលស្រោបការពារដោយលោហធាតុ មើលទៅស្អាតប្រណីត ដោយផ្នែកខាងមុខមិនមានប៊ូតុងចុចបញ្ជាអ្វីទាំងអស់ ខណៈប៊ូតុង Power និងសំឡេងស្ថិតនៅផ្នែកខាងស្ដាំ ហើយសេនស័រស្គែនក្រយៅដៃមាននៅផ្នែកខាងក្រោយ។ ទូរស័ព្ទទាំង 2 នេះ ប្រើ CPU ដែលក្រុមហ៊ុនបង្កើតផ្ទាល់ដូចគ្នាគឺ HiSilicon Kirin 659 ជាប្រភេទ Octa-Core មានល្បឿន 2.36GHz និងមាន RAM ទំហំ 4GB មាន GPU ជាប្រភេទ Mali-T830 MP2 ។

ចំណុចលេចធ្លោសម្រាប់ស្មាតហ្វូនមួយនេះ គឺកាមេរ៉ាមុខទំហំ 20MP និងក្រោយភ្លោះ ដោយមួយមានទំហំ 12MP ហើយមួយទៀតទំហំ 8MP ដែលក្រុមហ៊ុនបញ្ជាក់ថា វាអាចថតរូបបានយ៉ាងច្បាស់ និងស្អាតល្អ ទោះជាធ្វើការពង្រីក (Zoom) ក៏នៅតែច្បាស់ដែរ ហើយវាមានកម្រិត Aperture f/1.8 ដែលអាចថតរូបនៅក្នុងកន្លែងស្ទើរពន្លឺបានច្បាស់ល្អគួរសមទៀតផង។ វាទាំង 2 ដំណើរការដោយប្រព័ន្ធ Android Nougat ជំនាន់ 7.0 ចេញពីប្រអប់ និងស្រោបផ្ទាំងប្រើប្រាស់ EMUI 5.1 របស់ Huawei ហើយកម្លាំងថ្ម 2950mAh សម្រាប់ Nova 2 និងដល់ទៅ 3340mAh សម្រាប់ Nova 2 Plus៕

May 29, 2017

Tag: Huawei