Tag: Everton

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?
(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។
លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។
ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។
ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។
បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។
តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស
យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕
May 30, 2023
លោក Koeman បញ្ជាក់ថា Barkley នឹងចាកចេញពីក្លិប Everton
លោក Ronald Koeman បានបង្កើតឲ្យមានការចាប់អារម្មណ៍ទៅលើការប្រមាញ់ទិញកីឡាករ Ross Barkley កាលពីថ្ងៃពុធ តាមរយៈការបញ្ជាក់ថា រូបគាត់មានភាពច្បាស់លាស់ 100ភាគរយថា ខ្សែបម្រើអន្តរជាតិអង់គ្លេសដ៏មានឥទ្ធិពលរូបនេះ នឹងចាកចេញពីកីឡដ្ឋាន Goodison Park។
Barkley កំពុងតែស្ថិតក្នុងឆ្នាំចុងក្រោយនៃកិច្ចសន្យារបស់គេជាមួយនឹងក្លិប Everton ហើយកាលពីរដូវកាលមុន រូបគេត្រូវបានប្រាប់ដោយលោក Koeman ថា រូបគេនឹងត្រូវលក់ចេញ ប្រសិនបើរូបគេមិនចុះហត្ថលេខាទៅលើកុងត្រាថ្មីរបស់ក្លិបស្ថិតក្នុងក្របខ័ណ្ឌ Premier League មួយនេះ។ លោក Koeman បានប្រាប់ថា Barkley បានបញ្ជាក់យ៉ាងច្បាស់ថា រូបគេចង់ចាកចេញ ហើយគ្រូបង្វឹកសញ្ជាតិហូឡង់រូបនេះ រំពឹងទុកថា រូបគេនឹងសម្រេចបំណងរបស់គេ ខណៈដែលក្លិប Arsenal និង Tottenham សុទ្ធសឹងចង់ចុះហត្ថលេខាជាមួយនឹងកីឡាករវ័យ 23ឆ្នាំរូបនេះ។
នៅពេលដែលត្រូវបានចោទសួរថា តើលោកមានភាពជឿជាក់ 100ភាគរយ ឬយ៉ាងណាថា Barkley នឹងចាកចេញ? លោក Koeman បានប្រាប់អ្នកយកព័ត៌មានថា៖ «ស្ថានភាពជាលក្ខណៈបុគ្គលរបស់គេពិតជាមិនលំបាកឡើយ។ យើងបានផ្តល់សំណើដ៏ល្អមួយសម្រាប់រូបគេ ក្នុងការចុះហត្ថលេខាលើកុងត្រាថ្មីមួយ ប៉ុន្តែ រូបគេបានបដិសេធ និងបានប្រាប់ខ្ញុំថា រូបគេំពុងតែសម្លឹងរកការប្រជែងថ្មីមួយ»។ គ្រូបង្វឹករូបនេះបានបន្ថែមទៀតថា៖ «វាជាការសម្រេចចិត្តរបស់គេ ខ្ញុំត្រូវគោរពការសម្រេចចិត្តនោះ ហើយបន្ទាប់មក យើងនឹងរង់ចាំមើលថា មានអ្វីកើតឡើង ប៉ុន្តែ អ្វីដែលខ្ញុំបានឮពីក្រុមប្រឹក្សាគឺថា វាមិនទាន់មានសំណើដ៏ជាក់លាក់ណាមួយសម្រាប់ក្លិប Ross នៅឡើយទេ»៕
ប្រភពពី៖ Sport24
July 27, 2017
Everton នឹងបង្កើនការដេញថ្លៃសម្រាប់ Sigurdsson ក្រោយ Swansea ច្រានចោលសំណើ40លានផោន
ក្លិបទូកក្តោង Everton កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែបម្រើដ៏ឆ្នើម Gylfi Sigurdsson ដែលបានវិលមកប្រទេសវែលស៍វិញ ក្រោយពីដកខ្លួនចេញពីដំណើរប្រកួតមិត្តភាពរបស់ក្លិប Swansea City នៅលើទឹកដីសហរដ្ឋអាមេរិក ក្នុងរយៈពេលតិចជាងមួយម៉ោងនៅមុនពេលកីឡាកររូបនេះ ត្រូវចាកចេញពីសណ្ឋាគាររបស់ពួកគេក្នុងទីក្រុងឡុងដ៍ កាលពីថ្ងៃព្រហស្បតិ៍។
ការសម្រេចចិត្តដកខ្លួនរបស់ Sigurdsson បានផ្តល់ការភ្ញាក់ផ្អើលយ៉ាងខ្លាំងដល់ Swansea និងបានធ្វើឲ្យមានបញ្ហាកាន់តែច្រើន ខណៈដែល Everton នឹងត្រូវធ្វើការពង្រឹងការបំពេញការផ្ទេរកីឡាកររូបនេះឲ្យទាន់ពេលដើម្បីអាចឲ្យ Sigurdsson ធ្វើដំណើរជាមួយនឹងពួកគេទៅកាន់ប្រទេសហូឡង់ នៅសប្តាហ៍ក្រោយ។ ក្លិប Swansea បានច្រានចោលសំណើដេញថ្លៃក្នុងទឹកប្រាក់40លានផោន (ស្មើនឹង51.7លានដុល្លារអាមេរិក) និងដាក់តម្លៃខ្លួនលើខ្សែបម្រើអន្តរជាតិអ៊ីស្លង់រូបនេះក្នុងទឹកប្រាក់50លានផោន ប៉ុន្តែ ការព្រមព្រៀងគ្នាមួយត្រូវបានរំពឹងទុកថា នឹងត្រូវឈានដល់ ដោយសារតែ Sigurdsson បានបញ្ជាក់យ៉ាងច្បាស់ថា រូបគេចង់ផ្ទេរទៅកាន់កីឡដ្ឋាន Goodison Park។
ក្លិប Swansea បានបញ្ជាក់កាលពីថ្ងៃព្រហស្បតិ៍នៅលើបណ្តាញសង្គម Twitter របស់ខ្លួនថា៖ «Gylfi មិនមានអារម្មណ៍ល្អឡើយក្នុងការធ្វើដំណើរក្រោមភាពមិនច្បាស់លាស់ជុំវិញអនាគតរបស់គេ»៕
ប្រភពពី៖ The Guardian

July 14, 2017
Rooney ចេញពីក្លិប Man Utd ទៅ Everton ដោយគ្មានតម្លៃខ្លួន
ខ្សែប្រយុទ្ធ Wayne Rooney របស់ក្លិបបិសាចក្រហម Manchester United នឹងត្រូវវិលទៅកាន់ក្លិបទូកក្តោង Everton វិញ នៅចុងសប្តាហ៍នេះដោយគ្មានតម្លៃខ្លួន។
បើយោងទៅតាមបណ្តាញសារព័ត៌មាន BBC ត្រូវបានគេយល់ឃើញថា ការផ្ទេរនេះកំពុងស្ថិតយ៉ាងប្រកៀកក្នុងការឈានទៅដល់ការបញ្ចប់ ហើយ Rooney វ័យ31ឆ្នាំ ពិតជាចង់ផ្ទេរទៅកាន់កីឡដ្ឋាន Goodison ពោលគឺរយៈពេល13ឆ្នាំ ក្រោយពីរូបគេបានចាកចេញដើម្បីទៅចូលរួមជាមួយនឹងក្លិប Man United បើទោះបីមានការចាប់អារម្មណ៍ពីក្លិបផ្សេងក៏ដោយ។ Man United នឹងលើកលែងចំពោះតម្លៃខ្លួន ខណៈដែលនេះអាចជាផ្នែកមួយនៃប្រាក់បៀវត្សរ៍13លានផោនក្នុងមួយឆ្នាំរបស់ Rooney។ រូបគេប្រហែលជាមិនចូលរួមក្នុងក្រុម Man United ដែលត្រូវចេញទៅធ្វើការប្រកួតមុនបើករដូវកាលរបស់ពួកគេនៅលើទឹកដីសហរដ្ឋអាមេរិក នៅថ្ងៃអាទិត្យនេះឡើយ។ ជាមួយគ្នានេះ ការផ្ទេរនេះ ក៏មិនជាប់ទាក់ទងនឹងការប្រមាញ់ទិញខ្សែប្រយុទ្ធ Romelu Lukaku ពីក្លិប Everton របស់ក្រុម Man United ដែរ។
Rooney បានចុះកុងត្រាថ្មីរយៈពេល4ឆ្នាំកន្លះ អំឡុងពេលនៃយុទ្ធនាការឆ្នាំ2013-2014 ដែលក៏រាប់បញ្ចូលទាំងជម្រើសនៃការបន្តរយៈពេល1ឆ្នាំទៀតផងដែរ ប៉ុន្តែ ក្លិប Man United មិនមានបំណងប្រើប្រាស់លក្ខខណ្ឌនេះឡើយ។ អនាគតរបស់ប្រធានក្រុមនៃក្រុមជម្រើសជាតិអង់គ្លេសរូបនេះ ដែលបានចូលលេងក្នុងជម្រើសដំបូងនៃក្របខ័ណ្ឌ Premier League ត្រឹមតែ15លើកគត់កាលពីរដូវកាលមុននោះ បានក្លាយជាប្រធានបទនៃពាក្យចរចាមអារ៉ាមផ្សេងៗអស់រយៈពេលជាច្រើនខែមកហើយ៕
ប្រភពព័ត៌មាន៖ BBC
July 8, 2017
Man Utd យល់ព្រមលើតម្លៃខ្លួនរបស់ Lukaku ដែលមកពី Everton
ក្លិបបិសាចក្រហម Manchester United បានយល់ព្រមលើតម្លៃខ្លួន 75លានផោន (ស្មើនឹង 97លានដុល្លារអាមេរិក) ជាមួយនឹងក្លិបទូកក្តោង Everton ដើម្បីទិញយកខ្សែប្រយុទ្ធ Romelu Lukaku។ Man United ជឿជាក់ថា នឹងបំពេញការផ្ទេរនេះឲ្យបានរួចរាល់នៅមុនចុងសប្តាហ៍នេះ ដើម្បីអាចឲ្យ Lukaku ធ្វើដំណើរជាមួយពួកគេទៅកាន់ទឹកដីសហរដ្ឋអាមេរិកនៅថ្ងៃអាទិត្យ។
បើទោះបីប្រភពពីក្លិប Everton បានបញ្ជាក់ថា វានៅសល់ចំណុចជាច្រើនទៀតដើម្បីធ្វើឲ្យការផ្ទេរនេះបំពេញរួចជាផ្លូវការក៏ដោយ ប៉ុន្តែ Man United ជឿជាក់ថា ពួកគេនឹងបំពេញរួចរាល់នូវការទិញចូលកីឡាករមានតម្លៃខ្លួនខ្ពស់ជាងគេបំផុតលំដាប់ទី2ក្នុងប្រវត្តិសាស្ត្ររបស់ពួកគេបន្ទាប់ពីខ្សែបម្រើដ៏មានឥទ្ធិពល Paul Pogba។ ខ្សែប្រយុទ្ធអន្តរជាតិបែលហ្ស៊ិក Lukaku នឹងក្លាយជាកីឡាករចំណូលថ្មីទី2នៅរដូវក្តៅនេះ ក្រោយពីការចូលរួមរបស់ខ្សែការពារអន្តរជាតិស៊ុយអែត Victor Lindelof ពីក្លិប Benfica ក្នុងតម្លៃខ្លួន31លានផោន។
លោក Jose Mourinho ដែលជាអ្នកចាត់ការទូទៅរបស់ Man United បានសម្តែងនូវការខកចិត្តចំពោះការខ្វះនូវដំណើរការនៃការទិញចូលកីឡាករថ្មីៗ ខណៈដែលគ្រូបង្វឹករូបនេះ បានបញ្ជាក់កាលពីដើមរដូវក្តៅនេះថា លោកចង់បានកីឡាករថ្មីៗឲ្យបានច្រើននាក់ នៅមុនពេលពួកគេធ្វើដំណើរទៅប្រកួតមិត្តភាពមុនបើករដូវកាល។ ប្រសិនបើបំពេញជាផ្លូវការរួចរាល់ ការផ្ទេរនេះនឹងផ្តល់ការខកចិត្តដ៏ធំមួយដល់ក្លិបតោខៀវ Chelsea ក្រោយពីអ្នកចាត់ការទូទៅរបស់ពួកគេគឺលោក Antonio Conte បានចាត់ទុក Lukaku ជាគោលដៅដ៏ចម្បងរបស់លោកក្នុងការពង្រឹងតំបន់ប្រយុទ្ធ៕
ប្រភពព័ត៌មាន៖ The Guardian
July 7, 2017
Everton បំពេញការផ្ទេរ Pickford និង Klaassen សម្រាប់រដូវក្តៅនេះ
ក្លិប Everton បានចាប់ផ្តើមជះទឹកប្រាក់ដ៏ច្រើនបំផុតក្នុងប្រវត្តិសាស្ត្ររបស់ពួកគេ តាមរយៈការបំពេញការចុះហត្ថលេខាជាមួយនឹងអ្នកចាំទី Jordan Pickford ពីក្លិប Sunderland និងខ្សែបម្រើ Davy Klaassen ដែលជាប្រធានក្រុមនៃក្លិប Ajax Amsterdam ក្នុងការផ្ទេរមួយដែលមានតម្លៃខ្លួនសរុប 54លានផោន (ស្មើនឹង 69លានដុល្លារអាមេរិក)។
កីឡាករទាំងពីរសុទ្ធសឹងបានចុះហត្ថលេខាលើកុងត្រារយៈពេល 5ឆ្នាំ ជាមួយនឹងក្លិបមានមូលដ្ឋាននៅ Goodison Park មួយនេះ កាលពីថ្ងៃព្រហស្បតិ៍ ខណៈដែលក្លិប Everton ដែលត្រូវបានផ្តល់មូលនិធិដោយម្ចាស់ភាគហ៊ុនធំគឺលោក Farhad Moshiri នោះ បានចាត់វិធានការយ៉ាងមានប្រសិទ្ធភាពក្នុងការនាំយកកីឡាករពីរនាក់ ដែលជាគោលដៅចម្បងនៅរដូវក្តៅនេះរបស់លោក Ronald Koeman។
Pickford នឹងមានតម្លៃខ្លួនជាបឋមចំនួន25លានផោន ប៉ុន្តែ បើបូកជាមួយនឹងប្រាក់ឧបត្ថម្ភបន្ថែមផ្សេងៗទៀត តម្លៃខ្លួនរបស់គេនឹងកើនដល់3០លានផោន (ស្មើនឹង 38.2លានដុល្លារអាមេរិក) ជាតម្លៃខ្លួនកំណត់ត្រារបស់ក្លិប Everton ខណៈដែលរូបគេក៏ជាអ្នកចាំទី ដែលមានតម្លៃខ្លួនខ្ពស់ជាងគេបំផុតក្នុងចក្រភពអង់គ្លេសផងដែរ។
ស្របពេលមួយគ្នានេះដែរ ខ្សែបម្រើអន្តរជាតិហូឡង់ Klaassen បានផ្ទេរមកក្នុងតម្លៃខ្លួន 24លានផោន (ស្មើនឹង 30.6លានដុល្លារអាមេរិក)។ Klaassen បានឲ្យដឹងថា៖ «ខ្ញុំបាននិយាយកាលពីប៉ុន្មានសប្តាហ៍មុនជាមួយនឹងលោក Ronald Koeman អំពីក្លិប Everton។ ខ្ញុំចង់មកទីនេះ និងត្រួតពិនិត្យមើលថា នេះជាក្លិបដែលត្រឹមត្រូវសម្រាប់ខ្ញុំ ឬយ៉ាងណា ហើយចាប់តាំងពីខ្ញុំបានមកទីនេះ ខ្ញុំពិតជាមានអារម្មណ៍រីករាយណាស់។ វាជាក្លិបដ៏អស្ចារ្យមួយ»។
ខ្សែបម្រើរូបនេះបានបន្ថែមទៀតថា៖ «ពេលវេលាដែលខ្ញុំនិយាយជាមួយនឹងលោកគ្រូបង្វឹកដោយផ្ទាល់ ខ្ញុំមានអារម្មណ៍ល្អណាស់។ គាត់ជាមនុស្សស្មោះត្រង់ ហើយយើងបានជជែកគ្នាអំពីក្លិបនេះ និងអំពីរបៀបដែលគាត់ចង់រៀបចំប្រព័ន្ធលេង ដែលចំណុចនោះបានផ្តល់អារម្មណ៍វិជ្ជមានដល់ខ្ញុំ»៕
ប្រភពព័ត៌មាន៖ The Guardian
June 16, 2017
Everton កំពុងពិភាក្សាជាមួយ Sunderland ជុំវិញការទិញយក Pickford
ក្លិប Everton កំពុងតែធ្វើការពិភាក្សាជាមួយនឹងក្លិប Sunderland ជុំវិញការផ្ទេរអ្នកចាំទី Jordan Pickford ហើយក្លិបទូកក្តោងមួយនេះកំពុងតែមានបំណងក្នុងការផ្តល់តម្លៃខ្លួនតាមការស្នើសុំក្នុងទឹកប្រាក់3០លានផោន (ស្មើនឹង38លានដុល្លារអាមេរិក) ដើម្បីទិញយកអ្នកចាំទីជម្រើសជាតិអង់គ្លេសអាយុក្រោម21ឆ្នាំរូបនេះ។
ក្លិប Everton បានបង្ហាញពីការចាប់អារម្មណ៍របស់ខ្លួនទៅលើអ្នកចាំទីវ័យក្មេងរូបនេះភ្លាមៗ ក្រោយពីក្លិប Sunderland ត្រូវបានកាត់ចេញពីក្របខ័ណ្ឌ Premier League ប៉ុន្តែការដាក់តម្លៃខ្លួនជាបឋមរបស់ពួកគេត្រូវបានច្រានចោល។ ទោះបីជាយ៉ាងណា ការចរចាផ្សេងៗត្រូវបានធ្វើបន្ត ហើយក្លិប Everton បានយល់ព្រមលើលក្ខខណ្ឌជាចម្បងផ្សេងៗដើម្បីផ្តល់តម្លៃខ្លួនតាមការស្នើសុំក្នុងទំហំទឹកប្រាក់3០លានផោន។
រចនាសម្ព័ន្ធនៃការផ្ទេរដែលទាក់ទងនឹងទំហំនៃទឹកប្រាក់ក្នុងដំណាក់កាលដំបូងនេះ និងប្រាក់ឧបត្ថម្ភផ្សេងៗនោះ មិនទាន់បានបំពេញជាផ្លូវការនៅឡើយទេ។ Pickford បានធ្វើការពន្យារពេលនៃការសម្រេចចិត្តលើអនាគតរបស់គេ រហូតទាល់តែបញ្ចប់យុទ្ធនាការ Euro អាយុក្រោម21ឆ្នាំក្នុងប្រទេសប៉ូឡូញ។ អ្នកចាំទីរូបនេះ បានធ្វើដំណើរទៅកាន់ប្រទេសប៉ូឡូញ ជាមួយនឹងក្រុមរបស់លោក Aidy Boothroyd កាលពីថ្ងៃចន្ទ និងត្រូវប្រកួតជាមួយនឹងក្រុមជម្រើសជាតិស៊ុយអែត ក្នុងការប្រកួតបើកឆាករបស់អង់គ្លេស នៅថ្ងៃសុក្រនេះ។
Pickford បាននិយាយកាលពីសប្តាហ៍មុនថា៖ «ខ្ញុំបាននិយាយទៅកាន់ភ្នាក់ងារតំណាងរបស់ខ្ញុំ និងបានប្រាប់គាត់ថា ខ្ញុំចង់ផ្តោតទៅលើយុទ្ធនាការ Euro និងបង្ហាញពីទម្រង់លេងដ៏ល្អបំផុតតាមដែលខ្ញុំអាច។ ខ្ញុំនឹងរង់ចាំមើលថា ខ្ញុំនឹងស្ថិតនៅទីណា។ ក្នុងនាមជាកីឡាកររបស់ Sunderland ដែលធ្លាក់ចេញក្របខ័ណ្ឌកំពូល វាពិតជាលំបាកក្នុងការទទួលយកណាស់»៕
ប្រភពពី៖ The Guardian
June 14, 2017
Lukaku យល់ព្រមលើលក្ខខណ្ឌផ្សេងៗរួចស្រេចហើយដើម្បីចូលរួមជាមួយក្លិបថ្មី
ខ្សែប្រយុទ្ធ Romelu Lukaku របស់ក្រុមទូកក្តោង Everton បានយល់ព្រមលើលក្ខខណ្ឌផ្ទាល់ខ្លួនផ្សេងៗ ដើម្បីចូលរួមជាមួយនឹងក្លិបថ្មីមួយរួចជាស្រេចហើយ ដែលត្រូវបានគេជឿជាក់ថា ជាក្លិបតោខៀវ Chelsea ដែលជាម្ចាស់ជើងឯកក្របខ័ណ្ឌ Premier League។
ខ្សែប្រយុទ្ធអន្តរជាតិបែលហ្ស៊ិកវ័យ២៤ឆ្នាំរូបនេះ បានចាកចេញពីក្លិបតោខៀវ កាលពីឆ្នាំ២០១៤ ក្រោយពីបានចំណាយពេលអស់៣រដូវកាលនៅឯកីឡដ្ឋាន Stamford Bridge។ កាលព្រឹកថ្ងៃអង្គារ Lukaku បានប្រាប់ទូរទស្សន៍ Sky Sports ថា៖ «ភ្នាក់ងារតំណាងរបស់ខ្ញុំដឹងពីអ្វីដែលនឹងកើតឡើង ហើយខ្ញុំក៏ដឹងយ៉ាងច្បាស់ផងដែរ។ ខ្ញុំកំពុងតែស្ថិតក្នុងអារម្មណ៍ស្ងប់ចំពោះរាល់អ្វីៗទាំងអស់ ហើយយើងបានឈានដល់ការព្រមព្រៀងគ្នាមួយជាមួយនឹងក្លិបថ្មីមួយរួចជាស្រេច។ យើងបានរក្សានូវអារម្មណ៍ស្ងប់ ហើយយ៉ាងហោចណាស់ យើងមានគោលដៅមួយដែលយើងចង់ទៅ»។
ខ្សែប្រយុទ្ធរូបនេះបានបន្ថែមទៀតថា៖ «ខ្ញុំនឹងសម្រាករយៈពេលប៉ុន្មានថ្ងៃ ហើយបន្ទាប់មក ត្រៀមសម្រាប់ការប្រកួតនៅរដូវកាលក្រោយ។ ខ្ញុំចង់ចំណាយពេលវេលាក្នុងថ្ងៃវិស្សមកាលរបស់ខ្ញុំដើម្បីធ្វើឲ្យអ្វីៗឈានទៅកាន់កម្រិតមួយផ្សេងទៀត និងធ្វើឲ្យបានល្អប្រសើរជាងអ្វីដែលខ្ញុំបានធ្វើកាលពីឆ្នាំមុន»។ Lukaku ត្រូវបានខ្ចីជើងទៅកាន់ក្លិប West Brom បន្ទាប់មកត្រូវខ្ចីជើងទៅកាន់ក្លិប Everton ទៀត មុនពេលត្រឡប់មកចូលរួមជាមួយនឹងក្រុមទូកក្តោងមួយនេះវិញ ក្នុងកិច្ចសន្យាជាអចិន្ត្រៃយ៍ក្នុងតម្លៃខ្លួន២៨លានផោន កាលពីឆ្នាំ២០១៤។
Everton ត្រូវបានរំពឹងទុកថា នឹងទាមទារតម្លៃខ្លួនដល់ទៅ១០០លានផោន (ស្មើនឹង១២៩លានដុល្លារអាមេរិក) សម្រាប់ Lukaku ដែលបានរកគ្រាប់បាល់ស៊ុតបញ្ចូលទីសរុប២៦គ្រាប់ ក្នុងការបង្ហាញខ្លួន៣៩លើកក្នុងរដូវកាលឆ្នាំ២០១៦-២០១៧៕
ប្រភពពី៖ The Sun
June 7, 2017
Everton យល់ព្រមលើតម្លៃខ្លួន ២៥លានផោនដើម្បីទិញ Sigurdsson ពី Swansea
Everton បានឈានដល់ការព្រមព្រៀងគ្នាមួយជាមួយនឹងក្លិប Swansea ដើម្បីនាំយក Gylfi Sigurdsson ប៉ុន្តែខ្សែបម្រើរូបនេះកំពុងតែរក្សាជំហរនៃការទាមទារប្រាក់បៀវត្សរ៍១២ម៉ឺនផោន (ស្មើនឹង១៥,៥៧ម៉ឺនដុល្លារអាមេរិក) ក្នុងមួយសប្តាហ៍។ ក្លិបទូកក្តោងមួយនេះ បានឈានជើងចូលទីផ្សារទិញ-លក់កីឡាករភ្លាមៗដើម្បីទិញយកខ្សែបម្រើឆ្នើមរបស់ Swansea គឺ Sigurdsson ស្របពេលដែលរូបគេក៏ស្ថិតក្នុងការចាប់អារម្មណ៍ពីសំណាក់ក្លិប Tottenham និង Southampton ផងដែរ។
ក្លិបទាំងពីរ (Swansea និង Everton)ត្រូវបានគេជឿជាក់ថា បានឈានដល់តម្លៃខ្លួនប្រមាណជា២៥លានផោន (ស្មើនឹង៣២,៤លានដុល្លារអាមេរិក) ដែលស្មើនឹងចំនួនទឹកប្រាក់ដែលក្លិប Everton បានចំណាយក្នុងការទិញខ្សែបម្រើស្លាប Yannick Bolasie ពីក្លិប Crystal Palace កាលពីរដូវក្តៅមុនដែរ។

បច្ចុប្បន្ន Everton សង្ឃឹមថា អាចឈានដល់កិច្ចព្រមពៀងផ្សេងៗជាមួយនឹង Sigurdsson ដែលទទួលបានចំណូល៨ម៉ឺនផោនក្នុងមួយសប្តាហ៍ក្នុងក្លិប Swansea ហើយរូបគេកំពុងតែទាមទារការដំឡើងប្រាក់បៀវត្សរ៍ ដើម្បីបំពេញការផ្ទេរទៅកាន់ Everton៕
ប្រភពពី៖ Mirror
May 23, 2017
Pedro ជួយឲ្យក្រុមតោខៀវ ខិតយ៉ាងប្រកៀកឆ្ពោះទៅកាន់ការឈ្នះពាន
គ្រាប់បាល់ស៊ុតបញ្ចូលទីយ៉ាងល្អរបស់ខ្សែបម្រើប្រយុទ្ធ Pedro បានជួយឲ្យក្រុម Chelsea បោះជំហានកាន់តែកៀកឆ្ពោះទៅកាន់ការឈ្នះពាន Premier League ខណៈដែលក្រុមតោខៀវមួយនេះ បានកត់ត្រាជ័យជម្នះយ៉ាងកក់ក្តៅក្នុងលទ្ធផល ៣-០ លើក្រុម Everton កាលពីថ្ងៃអាទិត្យ។
ក្រុមរបស់លោក Antonio Conte ត្រូវបានខិតខំព្យាយាមយ៉ាងខ្លាំងដើម្បីទម្លុះតំបន់ការពារដ៏រឹងមាំរបស់ក្រុម Everton ប៉ុន្តែ គ្រាប់បាល់ស៊ុតបញ្ចូលទីពីចម្ងាយយ៉ាងល្អក្នុងតង់ទី២របស់ Pedro បានជួយឲ្យក្រុម Chelsea ស្ថិតនៅលើផ្លូវឆ្ពោះទៅកាន់ការឈ្នះការប្រកួតជាលើកទី៤ក្នុងចំណោមការប្រកួតលីក៥លើកចុងក្រោយរបស់ពួកគេ។ គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ខ្សែការពារ Gary Cahill និងខ្សែបម្រើ Willian បានបំពេញការទទួលជ័យជម្នះនេះតែម្តង ខណៈដែលក្រុមតោខៀវ បានរក្សាការនាំមុខ៤ពិន្ទុដដែលនៅលើកំពូលតារាង។
លោក Antonio Conte បានប្រាប់ទូរទស្សន៍ Sky Sports ថា៖ «លទ្ធផលនេះ ផ្តល់ឲ្យយើងនូវការជឿជាក់យ៉ាងច្រើន។ ពេលនេះ វាពិតជាសំខាន់ណាស់ក្នុងការត្រៀមលក្ខណៈសម្រាប់ការប្រជែងនៅដំណាក់កាលចុងក្រោយ។ ប្រសិនបើក្នុងការប្រកួតបន្ទាប់ជាមួយនឹងក្រុម Middlesbrough យើងមិនឈ្នះ យើងនឹងបាត់បង់ជ័យជម្នះ។ យើងត្រូវតែមើលមួយជំហានទៅមួយជំហាន។ Chelsea ដែលបច្ចុប្បន្នកំពុងតែមាន៨១ពិន្ទុនោះ ត្រូវការឈ្នះត្រឹមតែ៣លើកទៀតប៉ុណ្ណោះពីការប្រកួត៤លើកចុងក្រោយ ខណៈដែលពួកគេនឹងត្រូវធ្វើជាម្ចាស់ផ្ទះទទួលក្រុម Middlesbrough មុននឹង West Brom, Watford និង Sunderland៕
ប្រភពព័ត៌មាន៖ Mirror
May 1, 2017