Tag: Elon Musk

មហាសេដ្ឋី Elon Musk ទាក់ទងមិត្តស្រីថ្មី ជានារីដែលមានវ័យក្មេងជាង ២៣ ឆ្នាំ
«ពួកគេបានទាក់ទងគ្នាអស់ជាច្រើនខែមកហើយ និងកំពុងពិចារណាអំពីទំនាក់ទំនងប្រាកដប្រជា» នេះបើតាមប្រភពព័ត៌មានច្បាស់ការណ៍មួយ។
លោក Elon Musk បច្ចុប្បន្នគឺជាមហាសេដ្ឋីលំដាប់ទីមួយក្នុងពិភពលោក ដោយមានទ្រព្យ ២២០ ពាន់លានដុល្លារអាម៉េរិក។ ជាការពិតណាស់ គ្រប់យ៉ាងដែលទាក់ទងនឹងលោក គឺសុទ្ធតែត្រូវបានសាធារណជនចាប់អារម្មណ៍។
ថ្មីៗនេះ សារព័ត៌មាននៅ សហរដ្ឋអាម៉េរិក មួយចំនួនបានរាយការណ៍អំពីមិត្តស្រីថ្មីរបស់ Elon Musk។ ជាក់ស្ដែង កាលពីថ្ងៃទី ១៧ កុម្ភៈ ម្ចាស់ក្រុមហ៊ុន Tesla ត្រូវបានគេមើលឃើញថា បានរួមដំណើរជាមួយនារីស្រស់ស្អាតម្នាក់ នៅពេលលោកឈានជើងចុះពីយន្តហោះ នៅ Los Angeles។ ក្រោយមក ពួកគេក៏បានចាកចេញទៅដោយជិះរថយន្ត Tesla។
មិនយូរប៉ុន្មាន អត្តសញ្ញាណរបស់ស្រីស្អាតរូបនេះក៏ត្រូវបានគេរកឃើញ។ ប្រភពព័ត៌មានមួយបានបញ្ជាក់ប្រាប់សារព័ត៌មាន Hollywood Life ថា មិត្តស្រីថ្មីរបស់លោក Elon Musk គឺជាតារាសម្ដែង Natasha Bassett អាយុ ២៧ ឆ្នាំ។
ប្រភពព័ត៌មានបានប្រាប់ថា «ពួកគេបានទាក់ទងគ្នាច្រើនខែមកហើយ។ អ្នកទាំងពីរកំពុងតែនៅទំនេរ មិនទាន់មានទំនាក់ទំនងមនោសញ្ចេតនាជាមួយអ្នកដទៃ និងកំពុងពិចារណាអំពីទំនាក់ទំនងប្រាកដប្រជានឹងគ្នា»។
ស្រីស្អាត Natasha Bassett
បន្ទាប់ពីព័ត៌មានខាងលើ ឈ្មោះ Natasha Bassett ក៏បានក្លាយជាទីចាប់អារម្មណ៍របស់សាធារណជន ព្រោះថា នាងគឺជា «រាជិនី» ដែលកំពុងក្លាយជាម្ចាស់បេះដូងរបស់មហាសេដ្ឋីលំដាប់លេខ ១ ក្នុងពិភពលោក។
ស្រីស្អាត Natasha Bassett កើត និងធំឡើងនៅ ទីក្រុងស៊ីដនី ប្រទេសអូស្ត្រាលី។ ឆ្នាំ ២០១៩ នាងបានទៅរស់នៅ សហរដ្ឋអាម៉េរិក ដើម្បីស្វែងរកឱកាសពង្រីកអាជីពនៅ Hollywood។
នៅឯប្រទេសកំណើត នាងមានបទពិសោធន៍ក្នុងការសម្ដែងតាំងពីអាយុ ១៤ ឆ្នាំ និងបានល្បីឈ្មោះបន្ទាប់ពីសម្ដែងជាតួអង្គក្នុងល្ខោននិយាយ រឿង «Romeo និង Jiluet»។ ចាប់ពីពេលនោះ នាងក៏មានវត្តមាននៅក្នុងខ្សែភាពយន្តជាច្រើន ដូចជា រឿង Hail, Caesar! ។ល។
ការទាក់ទងគ្នានេះ បានកើតឡើងបន្ទាប់ពីលោក Elon Musk បានចែកផ្លូវគ្នាពីតារាសិល្បៈ Grimes កាលពីខែកញ្ញា ២០២១ ក្រោយពីបានរួមរស់ជាមួយគ្នាអស់រយៈពេល ៣ ឆ្នាំ និងមានកូនប្រុសម្នាក់ជាមួយគ្នាគឺ X Æ A-Xii។
លោក Elon Musk បង្ហើបឱ្យដឹងអំពីមូលហេតុនៃការចែកផ្លូវគ្នានេះថា៖ «ដោយសារតែការងារនៅ SpaceX និង Tesla ខ្ញុំចំណាយពេលវេលាច្រើននៅ Texas និងបរទេស។ ចំណែកនាងវិញ ធ្វើការនៅ Los Angeles។ ថ្វីបើបានចែកផ្លូវគ្នា ប៉ុន្តែយើងនៅតែធ្វើជាមិត្តនឹងគ្នា ព្រមទាំងចែករំលែកការទទួលខុសត្រូវលើការចិញ្ចឹមកូន»។
ស្រីស្អាត Natasha Bassett
មុនពេលបានជួប Grimes លោក Musk ធ្លាប់ឆ្លងកាត់ទំនាក់ទំនងអាពាហ៍ពិពាហ៍ជាច្រើនលើកជាមួយនឹងស្រីស្អាតច្រើននាក់។ ចាប់ពីឆ្នាំ ២០០០-២០០៨ លោក Musk បានរៀបការ និងរួមរស់ជាមួយអ្នកពិពន្ធ Justine Musk ព្រមទាំងមានកូន ៦ នាក់ ដែលសុទ្ធតែជាកូនប្រុស។
ក្រោយពីបានលែងលះ លោក Musk ក៏បានរៀបការជាមួយតារាសម្ដែង Talulah Riley។ ពួកគេធ្លាប់បានចែកផ្លូវគ្នា និងជួបគ្នាវិញ ប៉ុន្តែ ចុងក្រោយក៏បានលែងលះកាលពីឆ្នាំ ២០១៦។ ចាប់ពីឆ្នាំ ២០១៧-២០១៨ Musk បានទាក់ទងជាមួយតារាសម្ដែង Amber Heard។ ប៉ុន្តែ ពួកគេក៏មិនអាចនៅជាមួយគ្នាបានយូរ ព្រោះសុទ្ធតែរវល់ការងាររៀងៗខ្លួន។
ចាប់ពីឆ្នាំ ២០១៨ មហាសេដ្ឋី Elon Musk បានរួមរស់ជាមួយ Grimes។ កាលពីឆ្នាំ ២០២១ ពួកគេបានផ្ដល់កំណើតដល់កូនប្រុសម្នាក់។ មុនពេលបែកគ្នា ពួកគេបានបង្ហាញខ្លួនជាមួយគ្នាជាលើកចុងក្រោយ នៅក្នុងព្រឹត្តិការណ៍មួយកាលពីខែកញ្ញា ២០២១៕
February 21, 2022
អ៊ីឡុន ម៉ាស (Elon Musk) បានលក់ភាគហ៊ុន Tesla តម្លៃជាង ១៦ ពាន់លានដុល្លារ ក្នុងរយៈពេល ២ ខែមកនេះ
មហាសេដ្ឋីលំដាប់លេខ ១ ក្នុងពិភពលោក ជិតបានសម្រេចកិច្ចការលក់ភាគហ៊ុនចំនួន ១០% ក្នុងចំណោមភាគហ៊ុនរបស់លោក នៅក្នុងក្រុមហ៊ុន Tesla ទៅតាមការសន្យានៅក្នុងការស្ទង់មតិលើ Twitter កាលពីខែមុន។
យោងតាមឯកសារដែលបានដាក់ទៅកាន់គណៈកម្មការមូលបត្រអាម៉េរិក (SEC) នាយកប្រតិបត្តិរបស់ Tesla លោក អ៊ីឡុន ម៉ាស ទើបតែបានលក់ភាគហ៊ុន Tesla ចំនួន ៩៣៤,០០០ ហ៊ុនថែមទៀត ធ្វើឱ្យភាគហ៊ុនសរុបដែលលោកបានលក់ចាប់តាំងពីខែវិច្ឆិកា មកដល់បច្ចុប្បន្ន ឡើងដល់ ១៥.៦ លានហ៊ុន។ តួលេខភាគហ៊ុននេះប្រហាក់ប្រហែលនឹងទឹកប្រាក់ ១៦.៤ ពាន់លានដុល្លារ។ មហាសេដ្ឋីរូបនេះត្រូវការលក់ភាគហ៊ុន Tesla ប្រហែល ១៧ លានហ៊ុន ទើបត្រូវទៅតាមការសន្យាលក់ភាគហ៊ុន ១០% ដែលលោកបានធ្វើឡើងកាលពីខែវិច្ឆិកា។
នៅក្នុងការស្ទង់មតិមួយនៅលើបណ្ដាញសង្គម Twitter កាលពីខែវិច្ឆិកា ២០២១ ពាក់ព័ន្ធនឹង កម្មវិធីស្បៀងអាហារពិភពលោក (World Food Programme) មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស បានសួរអ្នកលេងបណ្ដាញសង្គមថា គួរតែលក់ភាគហ៊ុន Tesla ១០% ឬទេ។ ភាគហ៊ុន Tesla បានកើនឡើងជាង ២,៣០០% ក្នុងរយៈពេល ៥ ឆ្នាំមកនេះ។ កាលពីសប្ដាហ៍កន្លងទៅ លោក Musk បានប្រកាសថា លោកជិតសម្រេចបានគោលដៅនៃការលក់ភាគហ៊ុននេះហើយ។
កាលពីសប្ដាហ៍កន្លង CEO របស់ Tesla បានអះអាងថា លោកនឹងបង់ពន្ធជាង ១១ ពាន់លានដុល្លារសម្រាប់ឆ្នាំនេះ។
បច្ចុប្បន្ន មហាសេដ្ឋី អ៊ីឡុន ម៉ាស គឺជាអ្នកមានជាងគេបំផុតក្នុងពិភពលោក ដោយមានទ្រព្យសរុប ២៧៩ ពាន់លានដុល្លារ នេះបើតាម Bloomberg Billionaires Index។ ទ្រព្យសម្បត្តិរបស់លោក បានកើនជិត ៨០% នៅក្នុងឆ្នាំ ២០២១៕
December 29, 2021
មហាសេដ្ឋីលំដាប់ទីមួយ Elon Musk ចំអកឱ្យ មហាសេដ្ឋីលំដាប់ទីពីរ Jeff Bezos ជុំវិញរឿងក្ដីជាមួយ NASA
មហាសេដ្ឋី Elon Musk បានបង្ហោះរូបត្លុកដើម្បីចំអកឱ្យ Jeff Bezos បន្ទាប់ពីក្រុមហ៊ុនអវកាស Blue Origin របស់ម្ចាស់ Amazon បានចាញ់ក្ដីជាមួយ NASA។
តុលាការសហរដ្ឋអាម៉េរិក កាលពីម្សិលមិញ (4 វិច្ឆិកា) បានចេញសាលក្រមជំទាស់នឹងបណ្ដឹងរបស់ក្រុមហ៊ុនអវកាសឯកជន Blue Origin របស់មហាសេដ្ឋី Jeff Bezos ដែលបានប្ដឹងទីភ្នាក់ងារអវកាសអាម៉េរិក NASA ថា បានផ្ដល់កិច្ចសន្យាទាក់ទិននឹងយានចុះចតលើឋានព្រះចន្ទដែលមានតម្លៃ 2.9 ពាន់លានដុល្លារ ឱ្យទៅក្រុមហ៊ុន SpaceX របស់មហាសេដ្ឋី Elon Musk ដោយវិធី «មិនសមហេតុផល»។
ក្រោយការសម្រេចរបស់ចៅក្រមតុលាការសហព័ន្ធសហរដ្ឋអាម៉េរិក Richard Hertling ទីភ្នាក់ងារអវកាស NASA ប្រកាសថា កិច្ចសហការជាមួយ SpaceX នឹងត្រូវបានភ្ជាប់ឡើងវិញ «កាន់តែឆាប់ កាន់តែល្អ»។
ភ្លាមនោះ លោក Elon Musk បានបង្ហោះសារនៅលើ Twitter ចំអកឱ្យលោក Jeff Bezos ដោយប្រើប្រាស់រូបត្លុកដែលមានប្រភពពីខ្សែភាពយន្ត Judge Dredd ឆ្នាំ 1995 អមជាមួយនឹងឃ្លា៖ «អ្នកត្រូវទទួលសាលក្រម»។
«ទំនាស់អវកាស» របស់បណ្ដាមហាសេដ្ឋីអាម៉េរិក បានចាប់ផ្ដើមឡើងកាលពីរដូវផ្ការីក នៅពេល NASA បានចុះកិច្ចសន្យាលើគម្រោងយានចុះចតលើឋានព្រះចន្ទជាមួយ SpaceX ក្នុងគ្រាដែល Blue Origin និង Dynetics ក៏បានចូលរួមដេញថ្លៃដើម្បីបានក្លាយជាដៃគូសហការជាមួយ NASA ប៉ុន្តែ មិនបានសម្រេច ដោយសារតែតម្លៃខុសគ្នាឆ្ងាយ។
កាលពីខែតុលា នៅពេល Musk យកឈ្នះ Bezos ដោយបានក្លាយជាមហាសេដ្ឋីលំដាប់ទីមួយក្នុងពិភពលោក CEO របស់ក្រុមហ៊ុន Tesla លោក Elon Musk ក៏បានផ្ញើរូបភាពតំណាងមេដាយប្រាក់ឱ្យទៅលោក Bezos ផងដែរ ដែលនេះមានន័យថា ចំណាត់ថ្នាក់លេខពីរគឺសម្រាប់ម្ចាស់ Amazon៕
November 5, 2021
ទ្រព្យរបស់ Elon Musk បន្តកើនឡើងលើសពី 200 ពាន់លានដុល្លារ
មហាសេដ្ឋី Elon Musk បន្តបង្កើតកំណត់ត្រាថ្មីអំពីទំហំទ្រព្យសម្បត្តិដែលលោកកំពុងកាន់កាប់ ក្រោយពីបានដណ្ដើមបានតំណែងជាអ្នកមានជាងគេលំដាប់ទីមួយក្នុងពិភពលោក ពីមហាសេដ្ឋី Jeff Bezos។
បញ្ចប់ការជួញដូរកាលពីថ្ងៃទី 8 មករា មូលបត្រ Tesla បានកើនឡើងខ្ពស់ ជួយឱ្យទ្រព្យរបស់លោក Elon Musk កើនលើសពី 200 ពាន់លាន (200,000,000,000) ដុល្លារអាមេមេរិកជាលើកដំបូង។
យោងតាម Bloomberg Billionaires Index បច្ចុប្បន្ន មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះ កាន់កាប់ទ្រព្យសម្បត្តិដែលមានតម្លៃសរុបចំនួន 209 ពាន់លានដុល្លារអាមេរិក ច្រើនជាង 23 ពាន់លានដុល្លារបើធៀបនឹងមហាសេដ្ឋី Jeff Bezos។ រាប់ចាប់ពីដើមឆ្នាំ 2021 មកដល់បច្ចុប្បន្ន CEO របស់ Tesla រកបានប្រាក់បន្ថែមចំនួន 39.6 ពាន់លានដុល្លារ។
កាលពីខែសីហា ឆ្នាំ 2020 អគ្គនាយកប្រតិបត្តិរបស់ក្រុមហ៊ុន Amazon លោក Jeff Bezos បានក្លាយជាមនុស្សដំបូងគេក្នុងពិភពលោកដែលមានទ្រព្យចំនួន 200 ពាន់លានដុល្លារ។ ប៉ុន្តែ មិនយូរប៉ុន្មាន តួលេខនេះបានធ្លាក់ចុះ ដោយសារមូលបត្រ Amazon ធ្លាក់ថ្លៃ។ ក្រោយមក ទ្រព្យរបស់លោក Bezos ជាថ្មីម្ដងទៀត បានកើនឡើងលើសពី 200 ពាន់លានដុល្លារកាលពីខែតុលា ឆ្នាំ 2020។
បច្ចុប្បន្ន ពិភពលោកទាំងមូល មានមហាសេដ្ឋីចំនួន 5 រូប ដែលមានទ្រព្យចាប់ពី 100 ពាន់លានដុល្លារអាមេរិកឡើងទៅ។ ក្រៅពី Elon Musk និង Jeff Bezos ក៏មានលោក Bill Gates សហស្ថាបនិករបស់ Microsoft (134 ពាន់លានដុល្លារ) លោក Bernard Arnault ប្រធានក្រុមហ៊ុន LVMH (117 ពាន់លានដុល្លារ) និងលោក Mark Zuckerberg CEO របស់ Facebook (101 ពាន់លានដុល្លារ)។
មហាសេដ្ឋីដែលមានទ្រព្យច្រើនជាងគេបង្អស់នៅអាស៊ី Zhong Shanshan (អ្នកជំនួញចិន) និងកំពុងកាន់កាប់ទ្រព្យដែលមានតម្លៃសរុប 95.1 ពាន់លានដុល្លារអាមេរិក នឹងអាចមានឈ្មោះក្នុងក្រុមមហាសេដ្ឋីដែលមានទ្រព្យលើសពី 100 ពាន់លានដុល្លារនាពេលដ៏ខ្លីខាងមុខ៕
ប្រភព៖ Bloomberg
January 9, 2021
ក្លាយជាសេដ្ឋី ដោយសារគាំទ្រមហាសេដ្ឋី Elon Musk និងក្រុមហ៊ុន Tesla
មនុស្សជាច្រើនបានក្លាយជា Teslanaires (សេដ្ឋី Tesla) ព្រោះតែការគាំទ្រលោក Elon Musk និងបានចូលរួមទិញមូលបត្ររបស់ក្រុមហ៊ុន Tesla តែងតែពីដំណាក់កាលដំបូង។
Brandon Smith ដែលឆ្នាំ 2020 នេះ មានអាយុ 32ឆ្នាំ ជាអ្នកផលិតវីដេអូ និងមិនមានរថយន្តអគ្គិសនី Tesla ទេ បើទោះលោកអ្នកគាំទ្រក្រុមហ៊ុននេះក៏ដោយ។ ជាងនេះ នៅក្នុងទីរួមស្រុកមួយក្នុងទីក្រុង Milwaukee នៃរដ្ឋ Wisconsin ដែលលោកកំពុងរស់នៅ ការដែលគេមើលឃើញរថយន្ត Tesla ក៏ជារឿងកម្រ។
ក៏ប៉ុន្តែ កាលពីចុងខែមិថុនា ឆ្នាំ 2017 លោក Smith បានសម្រេចចិត្តយកប្រាក់សន្សំរបស់ខ្លួនចំនួន 10,000 ដុល្លារអាមេរិក ទៅទិញមូលបត្រ Tesla។ Smith បានឱ្យដឹងថា នេះគឺជាលើកទីមួយហើយដែលលោកបានវិនិយោគទៅក្នុងក្រុមហ៊ុនមួយ ហើយនេះគឺជាការចាប់ផ្ដើមដំបូងរបស់លោក។ រៀងរាល់លើកបន្ទាប់ពីបានបើកប្រាក់ខែ Smith ទូទាត់វិក្កយបត្រនានា និងនៅសល់ប៉ុន្មាន ក៏តែងតែយកទៅទិញមូលបត្រ Tesla។ ជាសរុប លោក Smith បានចំណាយប្រាក់ប្រហែល 90,000 ដុល្លារនៅក្នុងការទិញមូលបត្រក្រុមហ៊ុននេះ។
«ប្រាក់បៀវត្សរបស់ខ្ញុំមិនដល់6ខ្ទង់ទេ ហើយខ្ញុំក៏មិនយល់អ្វីអំពីកិច្ចព្រមព្រៀងលើសិទ្ធិជ្រើសរើសនោះដែរ។ ខ្ញុំគ្រាន់តែទិញ និងកាន់កាប់វា (មូលបត្រ) រហូតមកដល់បច្ចុប្បន្ន។ ខ្ញុំមិនធ្លាប់បានលក់មូលបត្រនេះមួយហ៊ុនណាឡើយ» លោក Smith បានប្រាប់ Bloomberg តាមទូរស័ព្ទបែបនេះ។
បច្ចុប្បន្ន លោក Smith បានក្លាយជាមនុស្សម្នាក់នៅក្នុងបញ្ជីឈ្មោះ «សេដ្ឋី Tesla» (Teslanaires) ជាឈ្មោះរបស់ក្រុមមនុស្សដែលបានក្លាយជាសេដ្ឋី ដោយសារការវិនិយោគទៅក្នុងក្រុមហ៊ុនផលិតរថយន្តអគ្គិសនី Tesla របស់មហាសេដ្ឋី Elon Musk។ មូលបត្រ Tesla សរុប ដែល Smith កំពុងកាន់កាប់បច្ចុប្បន្ន មានតម្លៃជាង 1 លានដុល្លារអាមេរិក បន្ទាប់ពីមូលបត្រនេះបានកើនឡើងជិត 731% នៅក្នុងឆ្នាំ 2020។
លោក Brandon Smith អាយុ 32ឆ្នាំ ជាអ្នកគាំទ្ររបស់មហាសេដ្ឋី Elon Musk
យោងតាម Bloomberg អ្នកវិនិយោគមិនចាំបាច់ធ្វើការនៅឯ Wall Street ដើម្បីស្វែងយល់លម្អិតអំពីសកម្មភាព និងស្ថានភាពហិរញ្ញវត្ថុរបស់ក្រុមហ៊ុន Tesla ឡើយ។ ប្រព័ន្ធចម្រុះដែលរួមមានដូចជា podcast ឬគណនី Youtube ជាច្រើនដែលពិពណ៌នាស្ទើរតែទាំងអស់នូវទិដ្ឋភាពទាំងមូលរបស់ Tesla អាចជួយឱ្យអ្នកស្វែងយល់អំពីក្រុមហ៊ុននេះដោយមិនចាំបាច់អានរបាយការណ៍វិភាគនានា មុនពេលសម្រេចចិត្តទិញមូលបត្រនេះ។
ក្រៅពី «ស្ថាប័ន» ខាងលើ ក៏នៅមានវេទិកា និងក្លឹបរបស់អ្នកមានរថយន្ត Tesla រាប់មិនអស់ផ្សេងទៀតដែលអាចពិភាក្សាគ្នាតាមរយៈកម្មវិធី Zoom ឬជួបគ្នាដើម្បីពិនិត្យមើលស្ថានីយបញ្ចូលអគ្គិសនី Supercharger ថ្មីបំផុតរបស់ Tesla ជាដើម។ Smith និយាយថា លោកចំណាយពេលចន្លោះពី 2-3 ម៉ោងក្នុងមួយថ្ងៃដើម្បីស្វែងយល់អំពី Tesla។ លោកក៏តែងតែចូលរួមក្នុងវេទិកាអនឡាញនានានៅម៉ោងហូបបាយថ្ងៃត្រង់។
មកដល់ពេលនេះ លោក Smith មិនទាន់មានគម្រោងលក់ ឬផ្អាកការវិនិយោគទៅលើមូលបត្រ Tesla នៅឡើយ បើទោះជាបានចាប់ផ្ដើមគិតអំពីការសាងសង់ផ្ទះ ឬទិញផ្ទះផ្ទាល់ខ្លួន។ បច្ចុប្បន្ន Smith និងបងប្រុសកំពុងរស់នៅក្នុងផ្ទះមួយខ្នងដែលជីតារបស់ពួកគេបានសង់ឡើងនៅក្នុងតំបន់ Cudahy នៃរដ្ឋ Wisconsin សហរដ្ឋអាមេរិក។ Smith នៅតែជឿជាក់លើអនាគតរបស់ Tesla ដោយគិតថា ក្រុមហ៊ុននេះនឹងបន្តរីកចម្រើនទៅមុខទៀត។
សូមបញ្ជាក់ថា ចំពោះអ្នកវិនិយោគលក្ខណបុគ្គលនៃក្រុមហ៊ុន Tesla មិនមែនមានតែ Smith ម្នាក់ដែលក្លាយជាសេដ្ឋី Tesla នោះទេ ពោលគឺនៅមានបុគ្គលជាច្រើនទៀតដែលមិនបានលើកយកមកនិយាយនៅក្នុងអត្ថបទនេះ៕
ប្រភព៖ Bloomberg
December 24, 2020
អនុសាសន៍របស់មហាសេដ្ឋីលំដាប់ទីពីរក្នុងលោក៖ CEO គួរតែកាត់បន្ថយកិច្ចប្រជុំដែលស៊ីពេលច្រើន
មហាសេដ្ឋីលំដាប់ទីពីរក្នុងពិភពលោក យល់ថា CEO គួរតែចំណាយពេលវេលាឱ្យបានច្រើនជាងមុនទៅលើការកែលម្អផលិតផល និងស្វែងរកមតិអវិជ្ជមាន ពី ខាងក្រៅ ទន្ទឹមនឹងការកាត់បន្ថយពេលវេលាទៅលើកិច្ចប្រជុំផ្ទៃក្នុង។
នៅក្នុងព្រឹត្តិការណ៍ CEO Summit ដែលត្រូវបានធ្វើឡើងដោយ Wall Street Journal កាលពីថ្ងៃទី 8ធ្នូ លោក Elon Musk បានឱ្យដឹងថា ការលើកកម្ពស់គុណភាពផលិតផលគឺជាបញ្ហាស្លាប់រស់ ដូច្នេះ CEO គួរតែកាត់បន្ថយពេលវេលាសម្រាប់បញ្ហាផ្សេងៗពីនេះ។ ពួកគេគួរចំណាយពេលឱ្យបានច្រើនបន្ថែមទៀតដើម្បីធ្វើឱ្យផលិតផលរបស់ក្រុមហ៊ុនមានភាពអស្ចារ្យតាមដែលអាចធ្វើទៅបាន។
មហាសេដ្ឋីអាមេរិកាំងដើមកំណើតអាហ្វ្រិកខាងត្បូងរូបនេះបានជូនជាអនុសាសន៍ថា បណ្ដា CEO គួរផ្ដោតទៅលើការបង្កើតផលិតផលឱ្យបានកាន់តែល្អជាងមុន ដោយការចំណាយពេលត្រួតពិនិត្យការងារនៅឯរោងចក្រ និងទាក់ទំនងជាមួយអតិថិជន រួមនឹងការកាត់បន្ថយពេលវេលាសម្រាប់កិច្ចប្រជុំ ឬបទបង្ហាញនានាដែលស៊ីពេលច្រើន។
ស្ថាបនិកក្រុមហ៊ុន SpaceX បានអះអាងថា៖ «តើក្រុម CEO នៃបណ្ដាក្រុមហ៊ុនអាមេរិក បានយកចិត្តទុកដាក់ដល់កម្រិតហើយឬនៅ ទៅលើការកែលម្អផលិត? ខ្ញុំគិតថា ចម្លើយគឺ នៅ»។
CEO របស់ Tesla និង SpaceX រូបនេះ យល់ថា សូម្បីតែមេដឹកនាំក្រុមហ៊ុនម្នាក់ដែលមិនមានជំនាញខាងច្នៃប្រឌិតលើផលិតផល ពួកគេនៅតែអាចរៀនបាន ព្រោះថា នេះគឺជាជំនាញ និងស្ថិតក្នុងលទ្ធភាពរបស់មនុស្សម្នាក់។ ជំហានដំបូងបង្អស់ដែលប្រកបដោយភាពសាមញ្ញ នោះគឺ មិនបោះបង់ការតស៊ូ។
លោក Elon Musk ថា CEO គួរតែកាត់បន្ថយការប្រជុំដែលស៊ីពេលច្រើន
លោក Musk ថ្លែងថា៖ «បើសិនជាអ្នកប្រឹងប្រែងមិនទាន់ដល់កម្រិត ចូរខំព្យាយាមបន្ថែមទៀត។ រូបមន្តនៃភាពជោគជ័យគឺ មិនមានអ្វីជាអាថ៌កំបាំងឡើយ»។
គោលដៅចុងក្រោយរបស់ CEO នោះគឺ ការក្លាយទៅជាមនុស្សម្នាក់ «ដែលយល់ច្បាស់ជាទីបំផុតអំពីផលិត ឬសេវាកម្មដែលពួកគេកំពុងមាន ក៏ដូជាការស្វែងរកមតិអវិជ្ជមានឱ្យបានគ្រប់ជ្រុងជ្រោយពីអតិថិជន និងពីក្រុមមនុស្សដែលមិនមែនជាអតិថិជន» នេះបើតាមលោក Elon Musk។
មហាសេដ្ឋីវ័យ 49 ឆ្នាំ ក៏បានជំរុញឱ្យ CEO ថយក្រោយមួយជំហានដើម្បីអាចមើលឃើញ «ទិដ្ឋភាព» ទាំងមូល និងសួរខ្លួនឯងថា «តើផលិតផលដែលខ្លួនបានបង្កើតឡើង ពិតជាល្អឥតខ្ជោះហើយ ឬនៅ? ប្រហែលជានៅឡើយទេ។ ដូច្នេះ តើយើងត្រូវធ្វើអ្វីខ្លះដើម្បីឱ្យផលិតផលរបស់យើងអស្ចារ្យជាងមុន?»។
បច្ចុប្បន្ន មានក្រុមហ៊ុនមិនតិចនោះទេដែលយល់ថា បើទោះជាពួកគេមិនចូលចិត្តផលិតផលដែលខ្លួនបានបង្កើតឡើង ប៉ុន្តែអ្នកផ្សេងអាចនឹងយល់ផ្ទុយពីនេះ អតិថិជនប្រហែលជាចូលចិត្ត។ មហាសេដ្ឋី Elon Musk បញ្ជាក់ថា៖ «គ្រប់យ៉ាងនឹងមិនកើតឡើងយ៉ាងដូច្នេះឡើយ។ បើសិនជាអ្នកមិនស្រលាញ់ផលិតផលដែលខ្លួនអ្នកបានបង្កើតឡើងទេ ចូរកុំស្រមៃថា អ្នកផ្សេងនឹងចាប់អារម្មណ៍លើផលិតផលនេះឱ្យសោះ»។
Elon Musk ជាមួយនឹងយានអវកាសរបស់លោក
និយាយអំពីបទពិសោធន៍ ក្រៅពីជា CEO របស់ក្រុមហ៊ុនអវកាស SpaceX និងក្រុមហ៊ុនផលិតរថយន្តអគ្គិសនី Tesla លោក Elon Musk ក៏បានបង្កើតក្រុមហ៊ុន Boring Company និងជាសហស្ថាបនិករបស់ក្រុមហ៊ុន OpenAI និង Neuralink ផងដែរ។ លោកបានឆ្លងកាត់ឧបសគ្គជាច្រើននៅក្នុងការរកស៊ី។ ក្នុងកិច្ចសម្ភាសនៅលើទូរទស្សន៍ CBS លោក Musk បានថ្លែងថា៖ «ឆ្នាំ 2008 គឺជាឆ្នាំអាក្រក់បំផុតក្នុងជីវិតរបស់ខ្ញុំ ដោយសារតែពេលនោះ Tesla បានជួបនឹងការខាតបង់ច្រើន ចំណែក SpaceX ក៏បរាជ័យក្នុងការបាញ់បង្ហោះរ៉ុកកែត Falcon 1 ហើយខ្ញុំក៏ត្រៀមលែងលះជាមួយប្រពន្ធ»។
ក៏ប៉ុន្តែ 12 ឆ្នាំក្រោយ ក្រុមហ៊ុនទាំងឡាយរបស់លោក Elon Musk សុទ្ធតែបានបោះជំហានដល់គោលដៅសំខាន់ៗជាបន្តបន្ទាប់ ក្នុងនោះមានដូចជា ការសហការរវាង SpaceX នឹង NASA ក្នុងការបាញ់បង្ហោះយានអវកាសដែលដឹកអ្នកអវកាសចរដំបូងឡើងទៅកាន់ទីអវកាសទទួលបានជោគជ័យ ឬតម្លៃទីផ្សាររបស់ក្រុមហ៊ុន Tesla កើនឡើងដល់ 500ពាន់លានដុល្លារអាមេរិកជាដើម៕
ប្រភព៖ Business Insider
December 14, 2020
ម្ចាស់ក្រុមហ៊ុនរថយន្តអគ្គិសនីជាច្រើនរូបបានក្លាយជាអ្នកមានយ៉ាងឆាប់រហ័ស! ដោយឡែក Elon Musk រកបានជាង 100ពាន់លានដុល្លារនៅក្នុងឆ្នាំនេះ
សារព័ត៌មាន Bloomberg បានស្រាវជ្រាវឃើញថា ទ្រព្យសរុបរបស់បណ្ដាមហាសេដ្ឋីក្នុងវិស័យរថយន្តអគ្គិសនី បានកើនឡើងជាង 140ពាន់លានដុល្លារអាមេរិក ក្នុងនោះ ម្ចាស់ក្រុមហ៊ុន Tesla រកបានចំណូល 111ពាន់លានដុល្លារនៅក្នុងឆ្នាំ 2020។
2020 គឺជាឆ្នាំដែលមហាសេដ្ឋី Elon Musk ទទួលបានដំណឹងល្អជាបន្តបន្ទាប់។ ប៉ុន្មានថ្ងៃបន្ទាប់ពីបានក្លាយជាអ្នកមានជាងគេលំដាប់ទីពីរក្នុងពិភពលោក ជាមួយនឹងទ្រព្យសរុប 139ពាន់លានដុល្លារអាមរិក លោក Musk ក៏បានក្លាយជាម្ចាស់ក្រុមហ៊ុនមួយដែលស្ថិតក្នុងសន្ទស្សន៍ S&P 500 (សន្ទស្សន៍ដែលស្ដីអំពីក្រុមហ៊ុនដែលមានតម្លៃទុនច្រើនជាងគេទាំង 500 នៅក្នុងពិភពលោក) នៅពេលដែល Tesla ត្រូវបានបញ្ចូលឈ្មោះទៅក្នុងសន្ទស្សន៍នេះ។
ប៉ុន្តែ CEO របស់ Tesla មិនមែនជាអ្នកជំនួញតែម្នាក់គត់ក្នុងវិស័យផលិតរថយន្តអគ្គិសនីដែលទទួលបានជោគជ័យត្រចះត្រចង់ក្នុងឆ្នាំ 2020នេះទេ។ យោងតាមស្ថិតិរបស់ Bloomberg មានគូប្រជែងមួយចំនួនរបស់ Tesla ថែមទាំងរកបានចំណូលលឿនជាងលោក Elon Musk ទៀតផង។
William Li ស្ថាបនិករបស់ក្រុមហ៊ុន Nio
William Li ស្ថាបនិករបស់ក្រុមហ៊ុន Nio រកបានទ្រព្យច្រើនជាងមុន 12ដង ដោយសារតម្លៃមូលបត្រដែលលោកកំពុងកាន់កាប់នៅក្នុងក្រុមហ៊ុនផលិតរថយន្តអគ្គិសនីនេះ (កំពុងបោះផ្សាយមូលបត្រនៅសហរដ្ឋអាមេរិក) កំពុងបន្តកើនឡើងយ៉ាងឆាប់រហ័ស។ នេះគឺជាមហាសេដ្ឋីដែលមានទ្រព្យកើនឡើងលឿនជាងគេបង្អស់នៅក្នុងចំណោមក្រុមអ្នកមានជាងគេទាំង 500នាក់ក្នុងពិភពលោក។
ទ្រព្យសុទ្ធរបស់ He Xiaopeng ដែលជាប្រធានក្រុមហ៊ុន Xpeng Inc ក៏កើនឡើងជាង 600% ផងដែរ។ ទ្រព្យសម្បត្តិសរុបរបស់បណ្ដាមហាសេដ្ឋីផ្នែកផលិតរថយន្តអគ្គិសនី ត្រូវបាន Bloomberg រកឃើញថា បានកើនឡើងជាង 140ពាន់លានដុល្លារអាមេរិក ក្នុងនោះ ទ្រព្យសម្បត្តិរបស់មហាសេដ្ឋីជនជាតិអាមេរិកាំងដើមកំណើតអាហ្វ្រិកខាងត្បូង លោក Elon Musk បានកើនឡើង 111ពាន់លានដុល្លារ។
General Motors គឺជាក្រុមហ៊ុនផលិតរថយន្តដែលមានផែនការបញ្ចេញរថយន្តអគ្គិសនីថ្មីចំនួន 30ម៉ូដែល នៅក្នុងឆ្នាំ 2025 ហើយប្រការនេះក៏បានជួយឱ្យមូលបត្ររបស់ក្រុមហ៊ុននេះ លោតឡើងដល់ចំណុចកំពូលបំផុតក្នុងអំឡុង 3ឆ្នាំកន្លងមកនេះ។
Wang Chuan-Fu ដែលជាស្ថាបនិករបស់ BYD
បណ្ដាគូប្រជែងរបស់លោក Musk រកបានប្រាក់ចំណេញកើនឡើងលឿនជាង ប៉ុន្តែ លោក Musk នៅតែជាអ្នកដែលរកបានប្រាក់ច្រើនជាងគេបង្អស់ក្នុងឆ្នាំនេះ ដោយសារអត្រាកើនឡើង 580% នៃមូលបត្រ Tesla រាប់ចាប់ពីដើមឆ្នាំរហូតមកដល់បច្ចុប្បន្ន។ តាមពីក្រោយ Elon Musk គឺជាអ្នកមានជាងគេលំដាប់ទីពីរក្នុងវិស័យផលិតរថយន្តអគ្គិសនី នោះគឺ Wang Chuan-Fu ដែលជាស្ថាបនិករបស់ BYD។ ទ្រព្យរបស់លោក Wang បានកើនឡើងច្រើនជាងមុនបីដង ដែលនាំឱ្យទ្រព្យសរុបរបស់លោក បានឡើងដល់ 14ពាន់លានដុល្លារអាមេរិក៕
ប្រភព៖ Bloomberg
December 4, 2020
Neuralink របស់ Elon Musk បង្ហើបឱ្យដឹងអំពីប្រព័ន្ធម៉ាស៊ីនបញ្ចូល chip កុំព្យូទ័រ ទៅក្នុងខួរក្បាលមនុស្ស
Neuralink ទើបតែបានប្រារព្ធពិធីឧទ្ទេសនាមផ្ទាល់នូវប្រព័ន្ធម៉ាស៊ីនវះកាត់របស់ខ្លួន នៅក្នុងគម្រោងបញ្ចូល chip កុំព្យូទ័រទៅក្នុងខួរក្បាលមនុស្សដែលនឹងត្រូវអនុវត្តដោយក្រុមហ៊ុន Neuralink របស់មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk។
ក្រុមហ៊ុន Neuralink ថ្មីៗនេះបានធ្វើបទបង្ហាញអំពី demo មួយនៃ chip ដ៏តូចរបស់ខ្លួនដែលមានទំហំប្រហាក់ប្រហែលនឹងកាក់ ដែលក្រុមហ៊ុនកំពុងតែអភិវឌ្ឍ។ Chip នេះនឹងត្រូវបានប្រើសម្រាប់បំពាក់ទៅក្នុងលលាដ៍ក្បាល ហើយអាចអាន និងថតយកសកម្មភាពរបស់ខួរក្បាល។
Chip ដ៏តូចនេះ មានទំហំប្រហាក់ប្រហែលនឹងកាក់
ប្រព័ន្ធម៉ាស៊ីន និង chip ដែលជារ៉ូបូតនេះទំនើបនេះ ត្រូវបានរចនាឡើងដោយក្រុមវិស្វកររបស់ Neuralink និងផលិតដោយ Woke Studios ដែលជាក្រុមហ៊ុនថ្មីមួយមានជំនាញខាងផលិតដៃយន្តសិប្បនិម្មិត មានទីស្នាក់ការនៅសហរដ្ឋអាម៉េរិក។
ខាងក្រោមនេះគឺជាព័ត៌មានខ្លះៗដែលត្រូវបានបង្ហើបឱ្យដឹងដោយក្រុមហ៊ុន Woke Studios អំពីរ៉ូបូតរបស់ ក្រុមហ៊ុន Neuralink៖
រ៉ូបូតវះកាត់របស់ Neuralink មានកម្ពស់ប្រហែល2.4ម៉ែត្រ និងអាចផ្លាស់ទីបានយ៉ាងល្អ។
ទំហំ ឬប្រវែងរបស់រ៉ូបូត និងសមត្ថភាពនៃការផ្លាស់ទី អនុញ្ញាតឱ្យវាបញ្ជាទៅលើម្ជុលដែលប្រើក្នុងការវះកាត់បានត្រឹមត្រូវបំផុត។
ក្បាលដែលមានតួនាទីរក្សា និងនាំផ្លូវសម្រាប់ឱ្យម្ជុលបញ្ចូល chip ទៅក្នុងលលាដ៍ក្បាល។
នៅលើក្បាលនៃប្រព័ន្ធម៉ាស៊ីនវះកាត់ មានបំពាក់កាមេរ៉ា និងអង្គវិញ្ញាណជាច្រើន។
លោក Elon Musk បាននិយាយថា រ៉ូបូតនេះអាចតភ្ជាប់ chip បានចំចំណុចបំផុត និងមិនបង្ករបួសស្នាមដល់ខួរក្បាល ឬសរសៃឈាមខួរក្បាលនោះឡើយ។
ក្រុមហ៊ុនបច្ចេកវិទ្យាផ្នែកសរសៃវិញ្ញាណ Neuralink ត្រូវបានលោក Musk បង្កើតឡើងកាលពីឆ្នាំ2016 និងត្រូវបានឧទ្ទេសនាមជាផ្លូវការកាលពីឆ្នាំ2017។
Neuralink មានគោលដៅអភិវឌ្ឍប្រព័ន្ធខួរក្បាល-កុំព្យូទ័រ (brain-machine interfaces) ដែលមានវិសាលភាពធំធេងដើម្បីតភ្ជាប់មនុស្សជាមួយនឹងកុំព្យូទ័រ។ ផលិតផលជាក់ស្ដែងដែលពួកគេកំពុងអភិវឌ្ឍ នោះគឺ chip សម្រាប់បំពាក់ទៅក្នុងលលាដ៍ក្បាល និងភ្ជាប់ទៅនឹងខួរក្បាលដោយផ្ទាល់។
ថ្មីៗនេះ Neuralink បានធ្វើការបំពាក់ chip របស់ពួកគេទៅក្នុងខួរក្បាលសត្វជ្រូក។ លោក Musk ថ្លែងថា សត្វជ្រូកទាំងឡាយដែលត្រូវបានបំពាក់ chip នេះ មានសុខភាពល្អ រីករាយ ហើយមនុស្សមិនអាចដឹងបានថា ជ្រូកមួយណាជាជ្រូកធម្មតា ឬជ្រូកបំពាក់ chip របស់កុំព្យូទ័រនោះទេ៕
ប្រភព៖ CBS News
September 11, 2020
ទ្រព្យរបស់ Elon Musk បានកើនឡើងលើសពី100ពាន់លានដុល្លារជាលើកដំបូង ខណៈ Jeff Bezos កើនលើស200ពាន់លានដុល្លារ
ទ្រព្យសម្បត្តិសរុបរបស់ស្ថាបនិក Amazon គឺលោក Jeff Bezos បានកើនដល់ជាង200ពាន់លានដុល្លារកាលពីថ្ងៃពុធកន្លងទៅ ក្រោយពីមូលបត្ររបស់ Amazon បានកើនឡើងដល់ចំណុចខ្ពស់មិនធ្លាប់មានពីមុនមក។ ប្រការនេះក៏បានជួយឱ្យអ្នកស្រី MacKenzie ដែលជាអតីតភរិយារបស់លោក Bezos ក្លាយជាស្ត្រីដែលមានទ្រព្យច្រើនជាងគេលំដាប់ទី2ក្នុងពិភពលោក បន្ទាប់ពីម្ចាស់ក្រុមហ៊ុន L’Oreal។
ក្នុងគ្រានោះដែរ ទ្រព្យសម្បត្តិរបស់លោក Elon Musk ក៏បានកើនឡើងថែមមួយកម្រិតទៀត នាំឱ្យលោកមានឈ្មោះនៅក្នុងក្រុម “centibillionaire” ជាក្រុមមនុស្សដែលមានទ្រព្យលើសពី100ពាន់លានដុល្លារ។ មូលបត្រ Tesla ដែលបានកើនឡើងខ្ពស់កាលពីថ្ងៃពុធ ក៏បាននាំឱ្យទ្រព្យរបស់លោក Musk កើនដល់101ពាន់លានដុល្លារ ដែលនេះជាស្ថិតិរបស់ Bloomberg។
អ្នកមានជាងគេទាំង500នាក់នៅទូទាំងពិភពលោក រកបានប្រាក់809ពាន់លានដុល្លារក្នុងឆ្នាំនេះ កើន14% រាប់ចាប់ពីខែមករា បើទោះជា COVID-19 បានធ្វើឱ្យ GDP នៃប្រទេសជាច្រើនត្រូវធ្លាក់ចុះ និងមនុស្សរាប់លាននាក់បានបាត់បង់ការងារ។
លោក Jeff Bezos និងអតីតភរិយារបស់លោក គឺអ្នកស្រី MacKenzie Scott
លោក Elon Musk អាយុ49ឆ្នាំ បច្ចុប្បន្នគឺជាកំពូលមហាសេដ្ឋីម្នាក់ក្នុងចំណោម “centibilianaires” 4រូបនៅទូទាំងពិភពលោក។ ទ្រព្យរបស់លោក Musk បានកើនបន្ថែម73.6ពាន់លានដុល្លារក្នុងឆ្នាំ2020នេះ ខណៈលោក Jeff Bezos កើនបន្ថែម87.1ពាន់លានដុល្លារ។ ទ្រព្យសម្បត្តិសរុបរបស់ម្ចាស់ Facebook គឺលោក Mark Zuckerberg ក៏បានកើនឡើងដល់100ពាន់លានដុល្លារកាលពីដើមខែនេះ។ ដោយឡែកក្នុងថ្ងៃពុធកន្លងទៅ លោក Mark ក៏រកបាន8.5ពាន់លានដុល្លារអាមេរិក។
ទ្រព្យរបស់ Elon Musk បានកើនឡើងលើសពី100ពាន់លានដុល្លារជាលើកដំបូង
មហាសេដ្ឋីផ្នែកបច្ចេកវិទ្យានៅសហរដ្ឋអាមេរិក មិនមែនជាក្រុមមនុស្សតែមួយគត់ដែលទទួលបានផលប្រយោជន៍ច្រើននៅដើមឆ្នាំនេះនោះទេ មហាសេដ្ឋីឥណ្ឌា លោក Mukesh Ambani ក៏បានក្លាយជាជនជាតិអាស៊ីដំបូងគេដែលមានឈ្មោះនៅក្នុងបញ្ជីចំណាត់ថ្នាក់ស្ដីអំពីអ្នកមានជាងគេទាំង5រូបនៅទូទាំងពិភពលោកកាលពីខែមុនផងដែរ។ លោក Mukesh រកបាន22.5ពាន់លានដុល្លារបន្ថែមទៀតនៅក្នុងឆ្នាំនេះ ដោយសារតែតម្លៃមូលបត្រនៃក្រុមហ៊ុន Reliance Industries របស់លោក បានកើនឡើងខ្ពស់៕
ប្រភព៖ Bloomberg
August 27, 2020
មហាសេដ្ឋី7រូបដែលមានទ្រព្យច្រើនជាងមុនជាងពាក់កណ្ដាលនៅក្នុងសម័យCOVID-19
CEO របស់ Tesla លោក Elon Musk រកបានជាង13ពាន់លានដុល្លារបន្ថែមទៀតរាប់ចាប់ពីពាក់កណ្ដាលខែមីនា2020 ខណៈដែលស្ថាបនិករបស់ Facebook លោក Mark Zuckerberg រកចំណូលបានជិត29ពាន់លានដុល្លារ។
COVID-19 បានបណ្ដាលឱ្យមហាសេដ្ឋីជាច្រើនបាត់បង់ទ្រព្យសម្បត្តិដ៏ច្រើនសន្ធឹកនៅពេលផ្សារហ៊ុនអាមេរិកដាំក្បាលចុះកាលពីខែមីនាកន្លងទៅ ប៉ុន្តែល្បឿននៃការងើបឡើងវិញនៃផ្សារហ៊ុនបានជួយឱ្យអ្នកមានជាច្រើនស្រង់ដើមទុនបានមកវិញ ហើយក៏មានអ្នកជំនួញខ្លះថែមទាំងចំណេញយ៉ាងច្រើនផងដែរ។
ដោយប្រើប្រាស់ទិន្នន័យតាមពេលវេលាជាក់ស្ដែងរបស់ Forbes ក្រុមហ៊ុន GoBankingRates បានរកឃើញថា មហាសេដ្ឋី7រូបដែលស្ថិតក្នុងចំណោមអ្នកមានជាងគេទាំង50នាក់របស់ពិភពលោក មានទ្រព្យច្រើនជាងមុនជាងពាក់កណ្ដាលក្នុងដំណាក់កាលចាប់ពីថ្ងៃទី18មីនា ដល់ថ្ងៃទី4មិថុនា2020។ ថ្ងៃទី18 ខែមីនា គឺជារយៈពេលមួយសប្ដាហ៍បន្ទាប់ពី COVID-19 ត្រូវបានប្រកាសថាជារោគរាតត្បាតទូទាំងពិភពលោក ហើយ2ថ្ងៃក្រោយមក សន្ទស្សន៍ DJIA (Dow Jones Industrial Average) ត្រូវបានកត់សម្គាល់ឃើញថាជាថ្ងៃជួញដូរមូលបត្រមួយក្នុងចំណោមថ្ងៃជួញដូរដែលអាក្រក់ជាទីបំផុតក្នុងប្រវត្តិសាស្ត្រ។ ចំណែកថ្ងៃទី4មិថុនាវិញគឺជាថ្ងៃដែលរដ្ឋនានានៅសហរដ្ឋអាមេរិកចាប់ផ្ដើមដកបម្រាមគោចរ។
CEO របស់ក្រុមហ៊ុន Tesla និង SpaceX គឺលោក Elon Musk បានជាប់ឈ្មោះនៅក្នុងបញ្ជីនៃក្រុមមនុស្សដែលរកបានប្រាក់ចំណូលច្រើនជាងពាក់កណ្ដាលនៃទ្រព្យសរុបរបស់ខ្លួននៅក្នុងដំណាក់ចាប់ពីថ្ងៃទី18មីនា ដល់ថ្ងៃទី4មិថុនា2020។ ទ្រព្យរបស់លោក Elon Musk បានកើន55% ដែលជួយឱ្យលោកមានទ្រព្យជាង38ពាន់លានដុល្លារ។ ប្រការនេះបានកើតឡើងដោយសារតម្លៃមូលបត្ររបស់ក្រុមហ៊ុន Tesla ឡើងថ្លៃខ្ពស់។ បច្ចុប្បន្ន លោក Elon Musk កាន់កាប់មូលបត្រជិត39លានហ៊ុននៅក្នុងក្រុមហ៊ុនផលិតរថយន្តអគ្គិសនី ហើយលោកក៏ទើបតែទទួលបានប្រាក់រង្វាន់ដែលមានតម្លៃជាង700លានដុល្លារកាលពីខែឧសភាផងដែរ។
មហាសេដ្ឋីម្នាក់ផ្សេងទៀតដែលទទួលបានចំណេញច្រើនកប់ក្ដោងដែរនោះគឺម្ចាស់ Facebook លោក Mark Zuckerberg។ គិតត្រឹមដើមខែមិថុនានេះ លោក Zuckerberg មានទ្រព្យជាង83ពាន់លានដុល្លារ កើនជិត29ពាន់លានដុល្លារបើធៀបនឹងថ្ងៃទី18មីនា2020។ បច្ចុប្បន្ន ស្ថាបនិករបស់ Facebook មានភាគហ៊ុនប្រមាណជា400លានហ៊ុននៅក្នុងក្រុមហ៊ុន Facebook។
ខាងក្រោមនេះគឺជាបញ្ជីឈ្មោះមហាសេដ្ឋី7រូបដែលមានទ្រព្យកើនឡើងជាង50%នៅក្នុងសម័យ COVID-19៖
1. លោក Dieter Schwarz ម្ចាស់ក្រុមហ៊ុន Schwarz Group (អាល្លឺម៉ង់)
លោក Dieter Schwarz
>ទ្រព្យសម្បត្តិនាថ្ងៃទី18/3/2020 ៖ 19.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 33.1ពាន់លានដុល្លារ
>កំណើននៃទ្រព្យ ៖ 67%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានរបាយការណ៍
>ទ្រព្យសម្បត្តិគិតត្រឹមថ្ងៃទី16/6/2020 ៖ 30.8ពាន់លានដុល្លារ
2. Mukesh Ambani – ប្រធានក្រុមហ៊ុន Reliance Industries (ឥណ្ឌា)
លោក Mukesh Ambani
>ទ្រព្យសម្បត្តិនាថ្ងៃទី18/3/2020 ៖ 36.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 58ពាន់លានដុល្លារ
>កំណើននៃទ្រព្យ៖ 57.6%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ 68.3លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 59.4ពាន់លានដុល្លារ
3. លោក Elon Musk – CEO របស់ក្រុមហ៊ុនTelsa/SpaceX/The Boring Company (អាមេរិក)
CEO របស់ Tesla លោក Elon Musk
>ទ្រព្យសម្បត្តិនាថ្ងៃទី18/3/2020 ៖ 24.6ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 38.2ពាន់លានដុល្លារ
>កំណើននៃទ្រព្យ៖ 55%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 42ពាន់លានដុល្លារ
4. លោក Alain Wertheimer – ម្ចាស់ក្រុមហ៊ុន Chanel (បារាំង)
លោក Alain Wertheimer
>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ
5. លោក Gerard Wertheimer – ម្ចាស់ក្រុមហ៊ុន Chanel (បារាំង)
លោក Gerard Wertheimer
>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ
6. លោក Mark Zuckerberg – CEO របស់Facebook (អាមេរិក)
Mark Zuckerberg និងភរិយា Prisilla Chan
>ទ្រព្យសម្បត្តិនាថ្ងៃទី18/3/2020 ៖ 54.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 83.4ពាន់លានដុល្លារ
>កំណើននៃទ្រព្យ៖ 52.47%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ ជាង150លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 87.4ពាន់លានដុល្លារ
7. លោក Tadashi Yanai – ម្ចាស់ក្រុមហ៊ុន Fast Retailing (ជប៉ុន)
លោក Tadashi Yanai ស្ថាបនិក និងជា CEO របស់ក្រុមហ៊ុន Fast Retailing
>ទ្រព្យសម្បត្តិនាថ្ងៃទី18/3/2020 ៖ 19.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 29.6ពាន់លានដុល្លារ
>កំណើននៃទ្រព្យ៖ 50.2%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 29.7ពាន់លានដុល្លារ
ប្រភព៖ CNBC
June 19, 2020