ស្ថិតក្នុងបរិបទពិភពលោកដែលកំពុងតែប្រយុទ្ធប្រឆាំងនឹងជំងឺ Covid-19 នេះ ការអប់រំកូន និងផលប៉ះពាល់ផ្នែកអារម្មណ៍ចំពោះកុមារគឺជាចំណុចយ៉ាងសំខាន់ដែលអាណាព្យាបាលជាច្រើនលើពិភពលោកកំពុងចាប់អារម្មណ៍។
មួយរយៈពេលនេះ ដោយសារតែការបិទសាលារៀន និងគ្រឹះស្ថានសិក្សានានា កុមារជាច្រើនត្រូវបានគេមើលឃើញថាកំពុងស្ថិតក្នុងស្ថានភាពលំបាក និងអាចទទួលរងគ្រោះទាំងបញ្ហាអំពើហិង្សា ក៏ដូចជាវិបត្តិផ្លូវចិត្តជាដើម។ លើសពីនេះទៅទៀត ការអប់រំកុមារទាំងក្នុងប្រព័ន្ធ និងអប់រំនៅក្នុងគ្រួសារក៏មានលក្ខណៈលំបាកផងដែរសម្រាប់កុមារនៅកម្ពុជា។
ពាក់ព័ន្ធនឹងបញ្ហានេះ អង្គការទស្សនៈពិភពលោកបានបញ្ជាក់ថា 57% នៃអាណាព្យាបាលបានរាយការណ៍ថាការចិញ្ចឹមថែរក្សាកូនពួកគាត់ បានក្លាយជាបញ្ហាស្មុគស្មាញ ឬលំបាកជាងមុន ចាប់តាំងពីការផ្ទុះឡើងនៃជំងឺ Covid-19។ មានតែអាណាព្យាបាល 27%ប៉ុណ្ណោះដែលបានរាយការណ៍ថាពួកគាត់អាចគ្រប់គ្រងអាកប្បកិរិយារបស់កូនៗបានត្រឹមត្រូវ។ នេះបើយោងតាមស្ថិតិមួយដែលអង្គការខាងលើបានធ្វើការស្ទង់មតិលើគ្រួសារចំនួន 222នៅកម្ពុជា៕
