EBA - La Reine Media

ក្រុមហ៊ុនទាំងដប់ដែលជួយឱ្យលោក Elon Musk ក្លាយជាមហាសេដ្ឋីពិភពលោក

លោក Elon Musk បានចូលរួមបង្កើត ឬគ្រប់គ្រងក្រុមហ៊ុនសរុបចំនួនដប់ ដែលភាគច្រើនស្ថិតក្នុងវិស័យបច្ចេកវិទ្យា និងមានភាពច្នៃប្រឌិតខ្ពស់។

យោងតាម Forbes គិតចាប់តាំងពីលោកចាប់ផ្ដើមចេញរកស៊ីកាលពីអាយុ 24 ឆ្នាំរហូតដល់បច្ចុប្បន្ន មហាសេដ្ឋីវ័យ 51 ឆ្នាំរូបនេះមានទ្រព្យសរុបប្រហែល 243 ពាន់លានដុល្លារអាម៉េរិក និងជាអ្នកមានទ្រព្យច្រើនជាងគេលំដាប់ទីមួយក្នុងពិភពលោក។

ក្រុមហ៊ុន Zip2

ឆ្នាំ 1995 បន្ទាប់ពីខ្ចីបានប្រាក់ 28,000 ដុល្លារពីឪពុក លោក Elon Musk និងប្អូនបង្កើត Kimbal បើកក្រុមហ៊ុន Zip2 ដែលជាគម្រោងផ្ដល់សេវាកម្មផែនទី និងសៀវភៅលេខទូរស័ព្ទដល់គេហទំព័រព័ត៌មាននានា។ បួនឆ្នាំក្រោយមក ពួកគេក៏លក់ Zip2 ទៅឱ្យក្រុមហ៊ុន Compaq ក្នុងតម្លៃ 307 លានដុល្លារ។ លោក Elon Musk ទទួលបាន 22 លានដុល្លារ និងបន្តការវិនិយោគលើគម្រោងដទៃ។

ក្រុមហ៊ុន PayPal

ឆ្នាំ 1999 បន្ទាប់ពីបានលក់ Zip2 លោក Elon Musk ក៏បានចំណាយ 12 លានដុល្លារដើម្បីបង្កើតក្រុមហ៊ុនផ្ដល់សេវាកម្មហិរញ្ញវត្ថុតាមអនឡាញ X.com។ ឆ្នាំ 2000 លោកក៏យល់ព្រមច្របាច់បញ្ចូលគ្នារវាង X.com និងគូប្រជែង Confinity ហើយប្ដូរឈ្មោះទៅជា PayPal។ ប៉ុន្តែ ក្រោយមក លោកក៏ត្រូវបង្ខំឱ្យចាកចេញពីកៅអីប្រធាន។

PayPal ត្រូវបាន eBay ទិញក្នុងតម្លៃ 1.5 ពាន់លានដុល្លារកាលពិឆ្នាំ 2002។ លោក Elon Musk គឺជាភាគហ៊ុនិកធំជាងគេ និងទទួលបានពី 160 ទៅ 180 លានដុល្លារ។ លោកក៏ប្រើប្រាស់ប្រាក់នេះវិនិយោគទៅលើ SpaceX និង Tesla ដែលក្រុមហ៊ុននាំឱ្យលោកក្លាយជាមហាសេដ្ឋី។

SpaceX

SpaceX គឺជាក្រុមហ៊ុនអវកាសដែលលោក Musk និង Tom Mueller បង្កើតឡើងកាលពីឆ្នាំ 2002។ គោលដៅរបស់ពួកគេគឺការកាត់បន្ថយការចំណាយក្នុងការដឹកជញ្ជូនមនុស្ស និងទំនិញឡើងទៅកាន់ទីអវកាស។ បច្ចុប្បន្ន SpaceX ត្រូវបានកំណត់តម្លៃឡើងដល់ប្រហែល 150 ពាន់លានដុល្លារ។

ក្រុមហ៊ុន Tesla

Tesla ត្រូវបានបង្កើតឡើងកាលពីឆ្នាំ 2003។ បច្ចុប្បន្ន Tesla គឺជាក្រុមហ៊ុនផលិតរថយន្តអគ្គិសនីធំជាងគេលើពិភពលោក។

SolarCity

ឆ្នាំ 2006 ដោយយោងទៅតាមគំនិតរបស់លោក Musk បងប្អូនជីដូនមួយរបស់លោក គឺ Peter និង Lyndon Rive បានបង្កើត SolarCity ដែលផលិតផ្ទាំងសូឡា។ ក្រោយមក លោក Musk ក៏ធ្វើជាប្រធាន និងជាភាគហ៊ុនិកធំជាងគេក្នុងក្រុមហ៊ុននេះ។

ឆ្នាំ 2016 Tesla ទិញយក SolarCity ក្នុងតម្លៃ 2.6 ពាន់លានដុល្លារដើម្បីជួយដល់សកម្មភាពរបស់ Tesla Energy ក្នុងវិស័យរក្សាថាមពលព្រះអាទិត្យសម្រាប់ផ្គត់ផ្គង់ដល់ស្ថានីយបញ្ចូលអគ្គិសនីដោយមិនគិតថ្លៃសម្រាប់រថយន្តអគ្គិសនី។

OpenAI

ឆ្នាំ 2015 លោក Musk ចូលរួមបង្កើតក្រុមហ៊ុនមិនស្វែងរកប្រាក់កម្រៃ OpenAI ដែលសិក្សាស្រាវជ្រាវអំពីបញ្ញាសិប្បនិម្មិត។ ប៉ុន្តែ លោក Musk បានចាកចេញពីក្រុមហ៊ុននេះកាលពីឆ្នាំ 2018។

ឆ្នាំ 2019 OpenAI ទទួលបានប្រាក់វិនិយោគមួយពាន់លានដុល្លារពី Microsoft។ បច្ចុប្បន្ន OpenAI បានងាកទៅស្វែងរកប្រាក់កម្រៃដោយមានផលិតផលសំខាន់គឺ ChatGPT។

Neuralink

នេះគឺជាក្រុមហ៊ុនបច្ចេកវិទ្យាទាក់ទងនឹងប្រព័ន្ធប្រសាទដែលលោក Musk បង្កើតឡើងកាលពីឆ្នាំ 2016។ គោលដៅរបស់ក្រុមហ៊ុននេះគឺការអភិវឌ្ឍវិធីសាស្ត្រព្យាបាលជំងឺដែលទាក់ទងនឹងខួរក្បាល និងតភ្ជាប់ខួរក្បាលមនុស្សជាមួយនឹងកុំព្យូទ័រតាមរយៈឧបករណ៍តូចដែលភ្ជាប់ក្នុងក្បាលមនុស្ស។

The Boring Company

ឆ្នាំ 2017 លោក Musk បង្កើតក្រុមហ៊ុននេះដើម្បីជួយផ្លាស់ប្ដូរបណ្ដាញគមនាគមន៍នៅសហរដ្ឋអាម៉េរិក។ ក្រុមហ៊ុននេះមានគម្រោងសាងសង់ផ្លូវរូងក្រោមដីសម្រាប់រថយន្តល្បឿនលឿនបើកបរដោយស្វ័យប្រវត្ត។

ក្រុមហ៊ុន X

X ដើមឡើយគឺជាបណ្ដាញសង្គម Twitter ប៉ុន្តែត្រូវលោក Musk ទិញកាលពីខែតុលា 2022 ក្នុងតម្លៃ 44 ពាន់លានដុល្លារ។ ខែកក្កដា 2023 លោកក៏បានប្ដូរឈ្មោះ និងឡូហ្គោ Twitter ទៅជា X។

ក្រុមហ៊ុន xAI

ខែកក្កដា 2023 xAI ត្រូវបានលោក Musk បង្កើតឡើងដើម្បីស្វែងយល់អំពីចក្រវាល និងអភិវឌ្ឍដំណោះស្រាយដើម្បីជំនួស ChatGPT៕

September 2, 2023

មុនផុត EBA តើកម្ពុជាត្រូវត្រៀមខ្លួនជាមុនដូចម្តេចខ្លះ?

សភាពអឺរ៉ុបបានផ្តល់ការអនុគ្រោះពន្ធ EBA (Everything But Arm) អ្វីៗគ្រប់យ៉ាងលើកលែងតែអាវុធដល់ប្រទេសកម្ពុជាចាប់តាំងពីឆ្នាំ2001មកដែលអនុញ្ញាតឱ្យប្រទេសកម្ពុជានាំទំនិញគ្រប់ប្រភេទ លើកលែងតែអាវុធចូលទៅលក់នៅលើទីផ្សារក្នុងប្រទេសអឺរ៉ុបដោយអនុគ្រោះមិនយកពន្ធ ក្នុងគោលដៅជួយដល់ប្រទេសកម្ពុជាឱ្យងើបរួចផុតពីភាពក្រីក្រ។

ក្រោយពីទទួលបានការអនុគ្រោះពន្ធនេះពីសហគមន៍អឺរ៉ុប បណ្តាអ្នកវិនិយោគទុនក្រៅស្រុកជាច្រើនបាននាំគ្នាចូលមកបោះទុនវិនិយោគលើវិស័យផ្សេងៗ ជាពិសេសរោងចក្រឧស្សាហកម្មកាត់ដេរនៅក្នុងប្រទេសកម្ពុជាជាច្រើនជាចំណែកដ៏សំខាន់បំផុតក្នុងការផ្តល់ការងារដល់ប្រជាពលរដ្ឋខ្មែរបានប្រមាណជិត 1លាននាក់មកទល់បច្ចុប្បន្ន និងជាកត្តាសំខាន់ជួយឱ្យប្រទេសកម្ពុជាឆ្លងផុតពីបន្ទាត់ប្រទេសក្រីក្រមកជាប្រទេសមានចំណូលមធ្យកម្រិតទាបនាពេលបច្ចុប្បន្ន ហើយនឹងគ្មានអ្វីប្រែប្រួលនោះទេ នៅពេលកម្ពុជាមានកំណើនសេដ្ឋកិច្ចខ្លាំងទៅមុខជាលំដាប់បែបនេះ នឹងជំរុញឱ្យកម្ពុជាឆ្លងផុតពីប្រទេសដែលមានចំណូលមធ្យមកម្រិតទាបទៅជាប្រទេសមានចំណូលមធ្យមកម្រិតខ្ពស់នាពេលខាងមុខ តែនាពេលអនាគតដូចគ្នាដែរ សហគមន៍អឺរ៉ុបនឹងផ្តាច់ប្រព័ន្ធ EBA នៅពេលដែលប្រទេសកម្ពុជាអាចជួយខ្លួនឯងបាន។ ដូច្នេះ មុននឹងប្រព័ន្ធ EBA ត្រូវបញ្ចប់ តើកម្ពុជាត្រូវត្រៀមខ្លួនដូចម្តេចខ្លះ?

លោកស្រី Sunniya Durrani-Jamal នាយិកាធនាគារអភិវឌ្ឍន៍អាស៊ី(ADB) ប្រចាំប្រទេសកម្ពុជាមានប្រសាសន៍ថា ប្រការដែលសំខាន់ កម្ពុជាត្រូវអភិវឌ្ឍសហគ្រិនភាពឱ្យកាន់តែរីកចម្រើនខ្លាំងឡើង ព្រោះថា សហគ្រិនវ័យក្មេងគឺជាសសរស្តម្ភដ៏សំខាន់បំផុតក្នុងការចូលរួមលើកកំណើនសេដ្ឋកិច្ចក្នុងប្រទេស។ លោកស្រីអះអាងថា អ្វីដែលជាចំណុចសំខាន់ គឺជួយសហគ្រិននៅកម្ពុជាឱ្យកាន់-តែមានភាពរឹងមាំខ្លាំងឡើងៗ ក្នុងនោះតម្រូវការចាំបាច់គឺប្រភពទុន និងជំនួយផ្នែកបច្ចេកទេស ឬធនធានមនុស្សជាដើម។

បច្ចុប្បន្នសហគ្រិននៅកម្ពុជា បង្កើតឡើងដោយពឹងផ្អែកទៅលើតែប្រភពទុនផ្ទាល់ខ្លួន និងការកៀងគរពីក្រុមគ្រួសារ ឬមិត្តភក្តិជិតស្និទ្ធរបស់ពួកគេ ប៉ុន្តែអ្វីដែលសំខាន់នោះគឺរដ្ឋាភិបាលមានតួនាទីជួយឱ្យពួកគេអាចស្វែងរកកម្ចីក្នុងអត្រាការប្រាក់ទាបបំផុតដើម្បីអភិវឌ្ឍអាជីវកម្មរបស់ពួកគេ ខណៈដែលបច្ចុប្បន្នប្រភពទុនធំដែលពួកគេទទួលបាន គឺផ្អែកទៅលើតែកម្ចីពីធនាគារ ឬគ្រឹះស្ថានមីក្រូហិរញ្ញវត្ថុដែលមានអត្រាការប្រាក់ខ្ពស់ជាងប្រទេសជិតខាង។

ជាមួយគ្នានេះលោកស្រី Yong Sarah Zhou មន្ត្រីជាន់ខ្ពស់នៃវិទ្យាស្ថានរូបិយវត្ថុអន្តរជាតិមានប្រសាសន៍ថា អត្រាប្តូរប្រាក់នៅក្នុងប្រទេសកម្ពុជាមានស្ថិរភាពល្អប្រសើរនៅរយៈពេលប៉ុន្មានឆ្នាំចុងក្រោយដោយសារដុល្លារូបនីយកម្ម មានន័យថា សេដ្ឋកិច្ចកម្ពុជាពឹងផ្អែកលើប្រាក់ដុល្លារជាជាងរូបិយវត្ថុរបស់ខ្លួន ដែលស្ថិរភាពនេះមិនអាចមានទំនុកចិត្តពេញលេញបានឡើយ ដូច្នេះសម្រាប់អនាគតអ្វីដែលសំខាន់ គឺត្រូវពង្រឹងរូបិយវត្ថុរបស់ខ្លួន(ប្រាក់រៀល) ឱ្យកាន់តែមានភាពរឹងមាំឡើង តាមរយៈការចរាចរដាក់ឱ្យចាយវាយ ឬដោះដូរកាន់តែច្រើនឡើងៗនៅលើទីផ្សាររបស់ខ្លួនឱ្យកាន់តែទូលំទូលាយ។

លោកជំទាវ ជា សិរី អគ្គនាយិកាបច្ចេកទេសធនាគារជាតិនៃកម្ពុជាមានប្រសាសន៍ថា ក្នុងគោលដៅលើកកម្ពស់ប្រាក់រៀល ធនាគារជាតិនៃកម្ពុជាបានលើកទឹកចិត្តឱ្យធនាគារឯកជន ឬគ្រឹះស្ថានមីក្រូហិរញ្ញវត្ថុនានានៅក្នុងប្រទេសកម្ពុជា គួរតែផ្តល់កម្ចីប្រាក់ដល់ពលរដ្ឋជាប្រាក់រៀលជាជាងប្រាក់ដុល្លារ ហើយបច្ចុប្បន្ន ធនាគារ ឬគ្រឹះស្ថានមីក្រូហិរញ្ញវត្ថុមួយចំនួនបានអនុវត្តបណ្តើរៗហើយ ជាមួយគ្នានេះកម្ពុជាក៏បានសហការជាមួយប្រទេសនានាដើម្បីទូទាត់ទំនិញឆ្លងព្រំដែន ជារូបិយវត្ថុជាតិរៀងៗខ្លួន ជាជាងទូទាត់ជាប្រាក់ដុល្លារអាមេរិកដែរ។

ឆ្លងតាមបទពិសោធ ប្រទេសដែលមានកំណើនសេដ្ឋកិច្ចល្អប្រសើរ នៅក្នុងតំបន់អាស៊ី មិនអាចខ្វះបានវិស័យឧស្សាហកម្មជាដាច់ខាត ហើយក្រៅតែវិស័យកាត់ដេរសម្លៀកបំពាក់ ស្បែកជើង និងកាបូបប្រើប្រាស់ហើយនោះ កម្ពុជាគួរតែពង្រីកចង្វាក់ផលិតកម្មឱ្យកាន់តែខ្លាំងឡើង ពិសេសផ្តោតទៅលើវិស័យកសិកម្ម ដូចជាការកែច្នៃជ័រកៅស៊ូ ដំឡូងមី ស្វាយចន្ទី ផលិតផលម្រេច ការកែច្នៃស្វាយកែវរមៀត ស្រូវ អង្ករ ពោត សណ្តែកជាដើម ឱ្យក្លាយជាផលិតផលសម្រេច ដែលមានគុណភាព រសជាតិ អនាម័យ និងសម្បកវេចខ្ចប់ស្អាតទាក់ទាញក្នុងការដាក់លក់នៅលើទីផ្សារ ឬសម្រាប់នាំចេញទៅលក់នៅលើទីផ្សារក្រៅប្រទេស ដែលអាចប្រកួតប្រជែងជាមួយប្រទេសផ្សេងៗទៀត ដែលប្រសើរជាងការនាំចេញវត្ថុធាតុដើម៕

January 5, 2019

អ្នកជំនាញ៖ កម្មវិធីអនុគ្រោះពន្ធ EBA នៅតែចាំបាច់ក្នុងការអភិវឌ្ឍសេដ្ឋកិច្ចជាតិ

សហគមន៍អឺរ៉ុបជាទីផ្សារធំ និងសំខាន់ជាងគេបំផុតសម្រាប់ទទួលយកទំនិញគ្រប់ប្រភេទ លើកលែងតែអាវុធ(EBA)ពីកម្ពុជាដែលជួយឱ្យសេដ្ឋកិច្ចកម្ពុជាមានការកើនឡើងជាបន្តបន្ទាប់ពីមួយឆ្នាំទៅមួយឆ្នាំ ជាពិសេសបានចូលរួមចំណែកផ្តល់ការងារដល់ពលរដ្ឋខ្មែរជិត 1លាននាក់ និងជួយឱ្យកម្រិតជីវភាពពលរដ្ឋខ្មែរមានភាពល្អប្រសើរឡើងជាលំដាប់ផងដែរ។

ឯកឧត្តម ពេជ ឫទ្ធី អនុរដ្ឋលេខាធិការក្រសួងពាណិជ្ជកម្មបានគូសបញ្ជាក់ពីសារៈសំខាន់នៃកម្មវិធីអនុគ្រោះពន្ធ “អ្វីៗទាំងអស់លើកលែងអាវុធ (EBA)” ដែលផ្តល់ដោយសហភាពអឺរ៉ុប តាំងពីឆ្នាំ2001មកនោះ គឺបានរួមចំណែកអភិវឌ្ឍកំណើនសេដ្ឋកិច្ច និងធ្វើពិពិធកម្មឱកាសការងារជូនប្រជាជនជាង 7សែននាក់ដែលភាគច្រើនជាស្ត្រីមកពីតំបន់ជនបទ។

ករណីនេះ ឯកឧត្តមបានស្នើដល់អ្នកវិនិយោគ ផលិតករ ពាណិជ្ជករ និងអ្នកនាំចេញទំនិញទៅទីផ្សារអឺរ៉ុបទាំងអស់ឱ្យខិតខំប្រឹងប្រែងសិក្សាស្វែងយល់ពីចំណេះដឹងថ្មីៗទាក់ទងនឹងនីតិវិធីចុះឈ្មោះតាមប្រព័ន្ធចុះបញ្ជីអ្នកនាំចេញ (Registered Exporter REX) សម្រាប់ទីផ្សារសហភាពអឺរ៉ុប ដោយហេតុថា ចាប់ពីថ្ងៃទី1 ខែមករា ឆ្នាំ2019ទៅ អ្នកនាំចេញទាំងអស់នឹងតម្រូវឱ្យធ្វើការចុះឈ្មោះជាមួយប្រព័ន្ធថ្មីនេះទើបមានសិទ្ធិនាំចេញទំនិញទៅកាន់សហភាពអឺរ៉ុប។

ឯកឧត្តមបញ្ជាក់ថា ការនាំចេញរបស់កម្ពុជាទៅសហភាពអឺរ៉ុបកាលពីឆ្នាំ2017 មានទឹកប្រាក់សរុប 4.343លានដុល្លារអាមេរិក គឺបានកើនឡើង 10.22% បើធៀបនឹងឆ្នាំ2016 ដែលមានទឹកប្រាក់សរុបត្រឹមតែ 3.941លានដុល្លារអាមេរិកប៉ុណ្ណោះ។

លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជា ហៅកាត់ថា អានសា (ANSA) បានមានប្រសាសន៍គាំទ្រចំពោះការបើកចំហទទួលយកទំនិញគ្រប់ប្រភេទលើកលែងតែអាវុធ (EBA) ពីកម្ពុជារបស់សហគមន៍អឺរ៉ុប។ លោកថា ការទទួលយកទំនិញពីកម្ពុជានេះ បានចូលរួមចំណែកសំខាន់ក្នុងការជួយដល់កំណើនសេដ្ឋកិច្ចកម្ពុជាឱ្យក្លាយជាប្រទេសមានការរីកចម្រើនលើគ្រប់វិស័យ មិនមែនតែលើវិស័យកាត់ដេរ វិស័យមីក្រូហិរញ្ញវត្ថុ ឬវិស័យដឹកជញ្ជូនប៉ុណ្ណោះទេ ហើយក៏មិនមែនផ្តល់ប្រយោជន៍ផ្ទាល់ចំពោះតែកម្មករ-កម្មការិនីនោះដែរ តែវាបានរួមចំណែកដោយប្រយោលជាប្រព័ន្ធ ដូចជាជួយដល់អ្នកផ្គត់ផ្គង់បន្ទប់ស្នាក់នៅ ជួយដល់អ្នកលក់ដូរទំនិញគ្រប់ប្រភេទនៅលើទីផ្សារ ជួយដល់អ្នកប្រកបរបរដឹកកម្មករ និងជួយឱ្យដីធ្លីឡើងថ្លៃ មានន័យថា រោងចក្រទៅដល់ទីណាដីធ្លីនៅទីនោះឡើងខ្លាំងភ្លាម។

ដើម្បីទទួលបានអត្ថប្រយោជន៍ទៅថ្ងៃអនាគត លោកស្នើដល់រដ្ឋាភិបាលកម្ពុជាធ្វើយ៉ាងណាបន្ទន់ឥរិយាបថក្នុងការដោះស្រាយជាមួយគណៈកម្មការសហគមន៍អឺរ៉ុបបន្តទៀត ព្រោះថា មកទល់ដំណាក់កាលនេះ ការបន្ត ឬព្យួរ(EBA) គឺស្ថិតនៅក្នុងកណ្តាប់ដៃរដ្ឋាភិបាលកម្ពុជា ហើយបើនៅបន្ត មានន័យថាកម្ពុជានៅតែរីកចម្រើនទៅមុខជាលំដាប់ ប៉ុន្តែបើសិនជាមានការព្យួរ (EBA) សេដ្ឋកិច្ចកម្ពុជាអាចនឹងមានការប្រែប្រួល។

លោក ង៉ែត ជូ អ្នកវិភាគសេដ្ឋកិច្ចមានប្រសាសន៍ថា កម្ពុជាគួររកវិធីសាស្ត្រដោះស្រាយដោយឈរលើគោលនយោបាយឈ្នះៗ ឈ្នះទាំងពាណិជ្ជករអ្នកនាំចេញ ឈ្នះទាំងភាគីរដ្ឋាភិបាលក្នុងទទួលបានការអនុគ្រោះពន្ធបន្តពីសហគមន៍អឺរ៉ុបបន្តទៅឆ្នាំក្រោយៗទៀត។ ជាមួយគ្នានេះលោកចង់ឱ្យរដ្ឋាភិបាលត្រៀមខ្លួនមុនពេលមានការផ្តាច់(EBA) តាមរយៈការធ្វើពិពិធកម្មបង្វែទិសក្នុងការអភិវឌ្ឍលើវិស័យមួយចំនួនទៀតដែលមានសក្តានុពលនៅកម្ពុជា ពិសេសកែលម្អវិស័យទេសចរណ៍ កែច្នៃតំបន់ទេសចរណ៍ដែលមានស្រាប់ដើម្បីទាក់ទាញអ្នកទេសចរចូលមកទស្សនាឱ្យកាន់តែច្រើនឡើង ចំណែកវិស័យកសិកម្មក៏ត្រូវការការកែលម្អជាចាំបាច់ដែរ ជាពិសេសរៀបចំប្រព័ន្ធធារាសាស្ត្រដែលអនុគ្រោះដល់ការធ្វើដំណាំរបស់ប្រជាពលរដ្ឋបានច្រើនរដូវ ហើយគួរមានការផ្លាស់ប្តូរពីការនាំចេញផលិតផលសម្រេចមកធ្វើការកែច្នៃផលិតផលកសិកម្មទៅជាទំនិញសម្រាប់ដាក់លក់នៅលើទីផ្សារក្នុងប្រទេស ក៏ដូចជាក្រៅប្រទេស និងជាពិសេស អភិវឌ្ឍធនធានមនុស្សឱ្យកាន់តែខ្លាំងឡើងដើម្បីចូលរួមអភិវឌ្ឍប្រទេសឱ្យរីកចម្រើនបានឆាប់រហ័ស។

គួរតែបញ្ជាក់ដែរថា សហភាពអឺរ៉ុប តែងតែធ្វើបច្ចុប្បន្នភាពកម្មវិធីប្រព័ន្ធអនុគ្រោះពន្ធទូទៅជារៀងរាល់ 2ឆ្នាំម្តង ដើម្បីពង្រឹងតួនាទីរបស់សភាអឺរ៉ុបលើកិច្ចការនយោបាយ និងពាណិជ្ជកម្ម ដោយជំរុញបន្ថែមនូវគោលការណ៍គន្លឹះសំខាន់ៗសំដៅធានានិរន្តរភាពនៃការអភិវឌ្ឍ និងអភិបាលកិច្ចល្អ។ ក្នុងន័យនេះប្រព័ន្ធចុះបញ្ជីអ្នកនាំចេញ (REX) ត្រូវបានកំណត់នៅក្នុងបញ្ញត្តិប្រព័ន្ធអនុគ្រោះពន្ធទូទៅរបស់សហភាពអឺរ៉ុបលេខ244/2015 ចុះថ្ងៃទី24 ខែវិច្ឆិកា ឆ្នាំ2015 ដើម្បីសម្រួលពាណិជ្ជកម្ម និងកាត់បន្ថយនីតិវិធីស្មុគស្មាញសម្រាប់ការនាំចេញទំនិញទៅសហភាពអឺរ៉ុប៕

December 28, 2018

តើប្រព័ន្ធអនុគ្រោះពន្ធ EBA មានភាពចាំបាច់យ៉ាងណាចំពោះកម្ពុជា?

ប្រព័ន្ធអនុគ្រោះពន្ធ EBA ឬ Everything But Arms (ប្រែថាអ្វីៗគ្រប់យ៉ាងលើកលែងតែអាវុធ) គឺជាកម្មវីធីផ្តល់ភាពអនុគ្រោះផ្នែកពន្ធគយលើទំនិញនាំចូលពីប្រទេសនានាដែលត្រូវបានចាត់លំដាប់ថ្នាក់ថាជា “ប្រទេសអភិវឌ្ឍន៍តិចតួច” ឬហៅថា “ប្រទេសក្រីក្រ”។ ប្រព័ន្ធនេះត្រូវបានសហគមន៍អឺរ៉ុបដាក់ឱ្យអនុវត្តកាលពីឆ្នាំ2011 ដល់ប្រទេសក្រីក្រចំនួន49 នៅទូទាំងពិភពលោកដែលក្នុងនោះមានប្រទេសកម្ពុជាមួយផងដែរ។

ចាប់តាំងពីកម្ពុជាទទួលបានប្រព័ន្ធអនុគ្រោះពន្ធនេះមក គេសង្កេតឃើញថា អ្នកវិនិយោគបរទេសបានចូលមកបណ្តាក់ទុនរកស៊ីនៅកម្ពុជាលើវិស័យផ្សេងៗជាច្រើន ជាពិសេសវិស័យវាយនភណ្ឌកាត់ដេរសម្លៀកបំពាក់ និងស្បែកជើង ដែលបានជួយផ្តល់ការងារដល់ពលរដ្ឋខ្មែរយ៉ាងច្រើន និងបានជួយជំរុញឱ្យសេដ្ឋកិច្ចប្រទេសកម្ពុជាឆ្លងផុតពីប្រទេសក្រីក្រមានចំណូលទាប មកជាប្រទេសមានចំណូលមធ្យមកម្រិតទាប។

ទិន្នន័យរបស់ធនាគារពិភពលោកបានបង្ហាញថា បើនិយាយចំពោះតែទីផ្សារអឺរ៉ុបវិញ មានចំនួនដល់ទៅ 4,126ពាន់លានដុល្លារ ដែលភាគច្រើនលើសលប់(94,84%)គឺជាផលិតផលសម្រេចមានតម្លៃស្មើនឹង 4,079ពាន់លានដុល្លារ។ ចំពោះផលិតផលដែលកម្ពុជានាំចេញទៅកាន់ទីផ្សារអឺរ៉ុប គឺជាផលិតផលសម្លៀកបំពាក់ និងស្បែកជើងដែលមានតម្លៃដល់ទៅជាង 3.531ពាន់លានដុល្លារ ឬស្មើនឹង85.58ភាគរយនៃតម្លៃទំនិញសរុបដែលកម្ពុជាបាននាំចូលទៅកាន់ទីផ្សារអឺរ៉ុប។ ចំពោះប្រទេសនៅក្នុងទីផ្សារអឺរ៉ុបដែលកម្ពុជាបាននាំចេញទំនិញចូលទៅនោះ រួមមានកាណាដា សហរដ្ឋអាមេរិក ចក្រភពអង់គ្លេស អាល្លឺម៉ង់ ជាដើម ជាទីផ្សារធំបំផុតដែលទទួលលក់ទំនិញពីកម្ពុជា ជាពិសេសផលិតផលសម្លៀកបំពាក់ និងស្បែកជើងដែលផ្តល់ផលវិជ្ជមានសម្រាប់ជញ្ជីងពាណិជ្ជកម្មកម្ពុជា(ចំណេញកម្ពុជា)។

ចំណែកប្រទេសចិនវិញបាននាំចូលទំនិញមានតម្លៃដល់ទៅជាង 4,550លានដុល្លារមកកម្ពុជា បន្ទាប់មកគឺប្រទេសថៃមានតម្លៃ 1,910លានដុល្លារ និងប្រទេសវៀតណាមមានតម្លៃជាង 141លានដុល្លារក្នុងឆ្នាំ2016 ខណៈដែលកម្ពុជានាំចូលទៅវិញមានចំនួនតិចតួចបំផុតដែលធ្វើឱ្យមានផលអវិជ្ជមានសម្រាប់ជញ្ជីងពាណិជ្ជកម្មកម្ពុជា(កម្ពុជាមិនសូវចំណេញ)។

ធនាគារពិភពលោក(WB)បានប្រកាសថា សេដ្ឋកិច្ចកម្ពុជានៅតែរក្សាកំណើនរឹងមាំដដែលនៅរយៈពេល 6ខែដំបូងនៃឆ្នាំ2018 ដោយសារសេដ្ឋកិច្ចមួយផ្នែកធំបានមកពីការរួមចំណែកយ៉ាងធំធេងនៃកំណើននាំចេញផលិតផលកាត់ដេរសម្លៀកបំពាក់ ស្បែកជើង និងផលិតផលសម្រាប់ការធ្វើដំណើរ ដូចជាកាបូប វ៉ាលីស ដែលត្រូវបាននាំចេញទៅទីផ្សារសហគមន៍អឺរ៉ុប និងអាមេរិកខាងជើង ហើយ WB បានបង្ហាញពីការព្រួយបារម្ភនៅក្នុងរបាយការណ៍បច្ចុប្បន្នភាពអំពីកម្ពុជា កាលពីពេលថ្មីៗថា ការសើរើប្រព័ន្ធអនុគ្រោះពន្ធនេះមកលើប្រទេសកម្ពុជា គឺជាហានិភ័យចម្បងសម្រាប់សេដ្ឋកិច្ចរបស់ប្រទេសនេះទាំងមូល។

លោកបណ្ឌិត ចាប សុថារិទ្ធ សមាជិកក្រុមប្រឹក្សាភិបាលវិទ្យាស្ថានខ្មែរសម្រាប់សហប្រតិបត្តិការ (CICP) បានមានប្រសាសន៍ថា ប្រសិនបើកម្ពុជាបាត់បង់ការអនុគ្រោះពន្ធនេះលើរាល់ទំនិញនាំចូលទៅកាន់សហគមន៍អឺរ៉ុប កម្ពុជានឹងត្រូវបំពេញកាតព្វកិច្ចបង់ពន្ធរហូតដល់ទៅ 11ភាគរយសម្រាប់ផលិតផលសម្លៀកបំពាក់ និងអត្រាផ្សេងពីនេះទៀតទៅតាមប្រភេទទំនិញនីមួយ។ ហើយប្រសិនបើសហគមន៍អឺរ៉ុបតម្រូវឱ្យកម្ពុជាបង់ពន្ធមែននោះនឹងធ្វើឱ្យទំនិញនាំចូលពីកម្ពុជាជួបការលំបាកក្នុងការប្រកួតប្រជែងតម្លៃជាមួយទំនិញនាំចូលពីប្រទេសផ្សេងទៀត ដែលនឹងនាំឱ្យប៉ះពាល់ដោយផ្ទាល់ដល់ប្រជាពលរដ្ឋខ្មែរដែលកំពុងបម្រើការងារក្នុងវិស័យកាត់ដេរ និងវិស័យជាច្រើនទៀត ដោយសារវិនិយោគិនបរទេសនឹងឈប់ប្រកបធុរកិច្ចក្នុងប្រទេសកម្ពុជា ហើយនឹងងាកទៅរកប្រទេសផ្សេងណាមួយទៀតដែលនៅទទួលបានប្រព័ន្ធអនុគ្រោះពន្ធ EBA សម្រាប់នាំចេញទំនិញគ្រប់ប្រភេទទៅកាន់អឺរ៉ុបលើកលែងតែអាវុធនេះវិញម្ដង។ ទោះជាយ៉ាងនេះក្តី ក៏កម្ពុជានៅមានទីផ្សារច្រើនទៀត ដូចជាប្រទេសចិន ជប៉ុន អង់គ្លេស និងប្រទេសអឺរ៉ុបមួយចំនួនទៀតដែលមិនមែនជាសមាជិកសហគមន៍អឺរ៉ុប។

លោក Jean-Gaetan GUILLEMAUD ប្រធានគណៈកម្មាធិការសុខុមាលភាពនៃសភាពាណិជ្ជកម្មអឺរ៉ុប និងជានាយកក្រុមហ៊ុន Zuelling Pharma បានមានប្រសាសន៍ខ្លីៗថា អ្នកធុរកិច្ចអឺរ៉ុប មានការទទួលខុសត្រូវខ្លាំងផ្នែកសង្គម ដោយសារតែវិនិយោគិនអឺរ៉ុបបានចូលរួមចំណែកសំខាន់ក្នុងការផ្តល់ការងារផ្តល់សុខុមាលភាពការងារ និងសង្គម និងជួយលើកកម្ពស់សិទ្ធិ ជីវភាពកម្មករ និងសេដ្ឋកិច្ចខ្មែរផងដែរ។ ហើយថា វិនិយោគិនអឺរ៉ុបមិនត្រឹមតែផ្តល់ការងាររយៈពេលវែងប៉ុណ្ណោះទេ ប៉ុន្តែថែមទាំងផ្តល់ការងារប្រកបដោយចីរភាព តាមរយៈការបញ្ជូនពលរដ្ឋទៅសិក្សាជំនាញនៅក្រៅប្រទេស ដូចជាប្រទេសថៃសិង្ហបុរីជាដើមទៀតផង។ លោកថា ក្រុមហ៊ុនមកពីបណ្តាប្រទេសសហគមន៍អឺរ៉ុបមានចំនួនជាង 500 កំពុងវិនិយោគនៅកម្ពុជា។

ចំណែកលោក គីលីយ៉ង់ ប្លេស នាយកប្រតិបត្តិសភាពាណិជ្ជកម្មអឺរ៉ុបប្រចាំនៅកម្ពុជាក៏បានមានប្រសាសន៍ដែរថា ការដកប្រព័ន្ធអនុគ្រោះពន្ធ EBA ពីកម្ពុជាមិនមែនជានីតិវិធីមួយដែលអាចប្រញាប់ប្រញាល់ធ្វើបានទេ លុះត្រាតែមានការជជែកគ្នាឱ្យបានច្រើន មុនមានការសម្រេចដក ឬផ្អាកបណ្តោះអាសន្នលើប្រព័ន្ធអនុគ្រោះពន្ធមួយនេះ។

ជាមួយគ្នានេះ សភាពាណិជ្ជកម្មអន្តរជាតិធំៗចំនួន 5ស្ថាប័ននៅអឺរ៉ុប ដែលក្នុងនោះមានសភាពាណិជ្ជកម្មអឺរ៉ុបនៅកម្ពុជា សភាពាណិជ្ជកម្ម និងឧស្សាហកម្មបារាំងប្រចាំនៅកម្ពុជា (CCFIC) ក្រុមអ្នកធុរកិច្ចអាល្លឺម៉ង់ប្រចាំនៅកម្ពុជា (ADW) សភាពាណិជ្ជកម្មអឺរ៉ុបខាងជើងប្រចាំនៅកម្ពុជា (Nordcham) សមាគមអ្នកធុរកិច្ចអុីតាលីនៅកម្ពុជាដែលជាតំណាងប្រទេសចំនួន9 នៅអឺរ៉ុប កាលពីពេលថ្មីៗនេះបានសរសេរលិខិតរួមគ្នាមួយច្បាប់ជូនលោកស្រី Cecila Malmstrom ស្នងការទទួលបន្ទុកពាណិជ្ជកម្មគណៈកម្មការអឺរ៉ុបក្នុងខ្លឹមសារមិនឯកភាពទៅនឹងបំណងចង់ដកប្រព័ន្ធអនុគ្រោះពន្ធ EBA ចេញពីប្រទេសកម្ពុជា។

លិខិតរួមរបស់ស្ថាប័នធុរកិច្ចអន្តរជាតិដែលជាតំណាងក្រុមហ៊ុនចំនួន 335 និងមាននិយោជិតជាង 5ម៉ឺននាក់បានសម្តែងនូវក្តីកង្វល់យ៉ាងខ្លាំង-ក្លាអំពីដំណើរការឆ្ពោះទៅរកការដកហូតការអនុគ្រោះពន្ធផ្នែកពាណិជ្ជកម្មក្រោមរបប EBA ដែលប្រែថាអ្វីៗគ្រប់យ៉ាងលើកលែងតែអាវុធចេញពីប្រទេសកម្ពុជា និងបារម្ភពីផលវិបាកដែលការដកហូតនេះដែលនឹងបង្កផលប៉ះពាល់យ៉ាងខ្លាំងក្លាដល់ប្រយោជន៍ពាណិជ្ជកម្មយូរអង្វែងទាំងរបស់សហភាពអឺរ៉ុប និងរបស់ប្រទេសកម្ពុជា៕

October 22, 2018

Tag: EBA

ក្រុម​ហ៊ុន​ទាំង​ដប់​ដែល​ជួយ​ឱ្យ​លោក Elon Musk ក្លាយ​ជា​មហា​សេដ្ឋីពិភពលោក

មុន​ផុត EBA តើ​កម្ពុជា​ត្រូវ​ត្រៀមខ្លួន​ជាមុន​ដូចម្តេចខ្លះ?

អ្នកជំនាញ៖ កម្មវិធី​អនុគ្រោះ​ពន្ធ​ EBA នៅតែ​ចាំបាច់​ក្នុងការ​អភិវឌ្ឍ​សេដ្ឋកិច្ចជាតិ

តើ​ប្រព័ន្ធ​អនុគ្រោះ​ពន្ធ EBA មាន​ភាពចាំបាច់​យ៉ាងណា​ចំពោះ​កម្ពុជា?

ក្រុមហ៊ុនទាំងដប់ដែលជួយឱ្យលោក Elon Musk ក្លាយជាមហាសេដ្ឋីពិភពលោក

មុនផុត EBA តើកម្ពុជាត្រូវត្រៀមខ្លួនជាមុនដូចម្តេចខ្លះ?

អ្នកជំនាញ៖ កម្មវិធីអនុគ្រោះពន្ធ EBA នៅតែចាំបាច់ក្នុងការអភិវឌ្ឍសេដ្ឋកិច្ចជាតិ

តើប្រព័ន្ធអនុគ្រោះពន្ធ EBA មានភាពចាំបាច់យ៉ាងណាចំពោះកម្ពុជា?