Donald Trump - La Reine Media

ទ្រព្យរបស់លោក Trump កើនឡើងទ្វេដងក្នុងមួយថ្ងៃ

ករណី Trump Media សម្រេចបានកិច្ចព្រមព្រៀងច្របាច់បញ្ចូលគ្នាជាមួយនឹងក្រុមហ៊ុនដទៃមួយផ្សេងទៀត ដើម្បីឡើងផ្សារហ៊ុន បានជួយឱ្យអតីតប្រធានាធិបតីអាម៉េរិក ជាលើកដំបូង មានឈ្មោះក្នុង top 500 នៃអ្នកមានជាងគេលើពិភពលោក។

កាលពីថ្ងៃទី 25 មីនា Trump Media ដែលជាក្រុមហ៊ុនប្រព័ន្ធផ្សព្វផ្សាយរបស់លោក Donald Trump បានប្រកាសថា សម្រេចបានកិច្ចព្រមព្រៀងច្របាច់បញ្ចូលគ្នាជាមួយនឹង Digital World Acquisition Corp។ ក្រុមហ៊ុនថ្មីនឹងមានឈ្មោះថា Trump Media & Technology Group នឹងគ្រប់គ្រងបណ្ដាញសង្គម Truth Social ដែលបង្កើតឡើងដោយលោក Trump កាលពីប៉ុន្មានឆ្នាំមុន។ ភាគហ៊ុនរបស់ពួកគេចាប់ផ្ដើមដាក់ឱ្យជួញដូរចាប់ពីថ្ងៃទី 26 មីនា 2024។

ព័ត៌មានខាងលើបានជួយឱ្យភាគហ៊ុន Digital World កើន 35% កាលពីថ្ងៃទី 25 មីនា។ បើគិតទៅតាមតម្លៃបច្ចុប្បន្ន ភាគហ៊ុនរបស់លោក Trump នៅក្នុងក្រុមហ៊ុនថ្មី នឹងមានតម្លៃ 4 ពាន់លានដុល្លារអាម៉េរិក។

ប្រការនេះ ជួយឱ្យលោក Trump មានឈ្មោះក្នុងបញ្ជីស្ដីពីអ្នកមានជាងគេទាំង 500 នាក់ នៅលើពិភពលោក របស់ Bloomberg។ Bloomberg គណនាឃើញថា ទ្រព្យរបស់លោក Trump បានកើនឡើង 4 ពាន់លានដុល្លារបន្ថែមទៀតនៅក្នុងថ្ងៃទី 25 មីនា។ បច្ចុប្បន្ន អតីតប្រធានាធិបតីអាម៉េរិករូបនេះ មានទ្រព្យចំនួន 6.5 ពាន់លានដុល្លារ។

March 26, 2024

ប្រធានាធិបតី Donald Trump ផ្ញើសារលាសេតវិមាន

នៅក្នុងសារលាសេតវិមាន លោក Trump បានអំពាវនាវឱ្យពលរដ្ឋអាមេរិកាំង «ចាកចេញផុតពីការចងគំនុំរវាងបក្សនឹងបក្ស» រួមនឹងការកោតសរសើរចំពោះសមិទ្ធផលក្រោមការដឹកនាំរបស់លោក ក៏ដូចជាជូនពរដល់រដ្ឋាភិបាលថ្មីជួបសំណាងល្អ។

«បានបម្រើការងារក្នុងនាមជាប្រធានាធិបតីរបស់គ្រប់គ្នាគឺជាកិត្តិយសដែលមិនអាចអធិប្បាយបាន។ សូមអរគុណគ្រប់គ្នាចំពោះឧបការគុណដ៏ពិសេសនេះ» ប្រធានាធិបតី Donald Trump បានថ្លែងនៅក្នុងវីដេអូមួយមានថេរវេលាជិត 20 នាទី ដែលត្រូវបានសេតវិមានចេញផ្សាយកាលពីថ្ងៃទី 19 មករា។

លោក Trump ក៏មិនភ្លេចកោតសរសើរចំពោះកិច្ចខិតខំក្នុងការកាត់បន្ថយពន្ធ កិច្ចព្រមព្រៀងពាណិជ្ជកម្ម និងគោលនយោបាយសេដ្ឋកិច្ចក្រៅប្រទេសរបស់រដ្ឋាភិបាលលោក ជាមួយនឹងការលើកកម្ពស់សេដ្ឋកិច្ចក្នុងស្រុក ស្ថានភាពទីផ្សារមូលបត្រ និងការដែលវ៉ាក់សាំង Covid-19 ត្រូវបានអភិវឌ្ឍយ៉ាងឆាប់រហ័ស។

«ពួកគេបានហៅប្រការនេះថាជាមន្តអាគមផ្នែកវេជ្ជសាស្ត្រ។ រដ្ឋាភិបាលដទៃនឹងត្រូវចំណាយពេល 3 ឆ្នាំ, 4 ឆ្នាំ, 5 ឆ្នាំ ឬ 10 ឆ្នាំ ដើម្បីអភិវឌ្ឍវ៉ាក់សាំងមួយប្រភេទ ប៉ុន្តែយើងបានធ្វើវាក្នុងរយៈពេលត្រឹមតែ 9 ខែប៉ុណ្ណោះ» លោក Trump បានឱ្យដឹងដូច្នេះ និងថែមទាំងបានវាយតម្លៃខ្ពស់ទៅលើការប្រឹងប្រែងរបស់រដ្ឋាភិបាលក្នុងការស្ដារសេដ្ឋកិច្ចនៅក្នុងវិបត្តិសុខភាព និងធានាសន្តិសុខនៅតាមបន្ទាត់ព្រំដែនភាគខាងត្បូងផងដែរ។

លោក Trump បន្តថា៖ «នៅពេលខ្ញុំត្រៀមប្រគល់អំណាចជូនដល់រដ្ឋាភិបាលថ្មីនៅថ្ងៃត្រង់ ទី 20 មករា ខ្ញុំចង់ប្រាប់គ្រប់គ្នាថា ចលនារបស់យើងទើបតែបានចាប់ផ្ដើមដំណើរការប៉ុណ្ណោះ»។

«ខ្ញុំមានមោទកភាពជាខ្លាំងដោយសារជាប្រធានាធិបតីដំបូងក្នុងអំឡុងជាច្រើនទសវត្សរ៍ដែលមិនបានបញ្ឆេះសង្គ្រាមណាមួយ។ យើងបានបញ្ជាក់ជាថ្មីថា នៅសហរដ្ឋអាមេរិក រដ្ឋាភិបាលបានឆ្លើយតបនឹងការចង់បានរបស់ពលរដ្ឋ» លោក Trump បន្ថែម។

ប្រធានាធិបតី Trump ឱ្យដឹងថា៖ «សប្ដាហ៍នេះ រដ្ឋាភិបាលថ្មីមួយនឹងចូលកាន់អំណាច ហើយយើងបួងសួងឱ្យពួកគេទទួលបានជោគជ័យក្នុងការរក្សាទឹកដីអាមេរិកឱ្យនៅមានសុវត្ថិភាព និងរីកចម្រើន។ យើងសូមផ្ញើពាក្យជូនពរបវរប្រសើរបំផុត និងប្រាថ្នាឱ្យពួកគេជួបសំណាងល្អ ដែលជាប្រការមួយដ៏មានសារសំខាន់»។

លោក Trump កន្លងមកបានប្រកាសថា នឹងមិនចូលរួមពិធីស្បថចូលកាន់តំណែងរបស់លោក Biden នៅថ្ងៃទី 20 មករានេះ។ លោក Trump មានគម្រោងចូលរួមពិធីលាគ្នាជាមួយនឹងកងកម្លាំងប្រដាប់អាវុធនៅមូលដ្ឋានទ័ពអាកាស Andrews នាព្រឹកថ្ងៃទី 20 មករា មុនពេលឡើងយន្តហោះត្រលប់ទៅកាន់ Florida ក្នុងគ្រាប្រធានាធិបតីជាប់ឆ្នោត Joe Biden ស្បថចូលកាន់តំណែង។

នៅក្នុងព្រឹត្តិការណ៍ចុងក្រោយនៃអាណត្តិរបស់លោក Trump លោកស្រី Melania Trump ក៏បានថ្លែងសារលាសេតវិមានផងដែរ។

ពិធីស្បថចូលកាន់តំណែងរបស់លោក Biden នឹងមានការចូលរួមពីក្រុមមន្ត្រីក្នុងចំនួនតិចបំផុត រាប់ចាប់ពីឆ្នាំ 1945 ពោលគឺប្រមាណជា 1,000 នាក់ប៉ុណ្ណោះ។ ប្រការនេះគឺដោយសារអាជ្ញាធរកាត់បន្ថយទំហំនៃព្រឹត្តិការណ៍ ដោយសារឥទ្ធិពលរបស់ Covid-19។

ប្រភព៖ Fox News, Reuters

January 20, 2021

សេតវិមានបញ្ចេញសៀវភៅសមិទ្ធផលជាង 600 ប្រការ របស់លោកប្រធានាធិបតី Donald Trump

នៅក្នុងសៀវភៅនិយាយអំពីសមិទ្ធផលនេះ ក៏មានការសង្កត់ធ្ងន់ទៅលើការរីកចម្រើនផ្នែកសេដ្ឋកិច្ចយ៉ាងខ្លាំងក្លាដែលត្រូវបានគេចាត់ទុកថាមិនធ្លាប់មាននៅសហរដ្ឋអាមេរិក មុន Covid-19 មកដល់ នៅក្រោមការដឹកនាំរបស់លោក Donald Trump។

ថ្មីៗនេះ សេតវិមានបានឧទ្ទេសនាមសៀវភៅមួយក្បាលដែលជាបញ្ជីកត់ត្រានូវសមិទ្ធផលសំខាន់ៗចំនួន 603 ប្រការដែលប្រធានាធិបតីអាមេរិក Donald Trump សម្រេចបាននៅក្នុងអាណត្តិរបស់ខ្លួន ខណៈដែលពិភពលោកកំពុងផ្ដោតការយកចិត្តទុកដាក់ទៅលើពិធីស្បថចូលកាន់តំណែងរបស់លោក Joe Biden។

ភាគច្រើននៃសមិទ្ធផលនេះមានជាប់ទាក់ទងនឹងការសន្យារបស់លោក Trump ដែលត្រូវបានធ្វើឡើងកាលពីពេលកំពុងឃោសនារកសំឡេងឆ្នោតនាំឆ្នាំ 2016។ ក្រុមមន្ត្រីសេតវិមានអះអាងថា បញ្ជីឈ្មោះនៃសមិទ្ធផលនេះគឺជាកេរដំណែលចម្បងដែលប្រធានាធិបតី Trump បានបន្សល់ទុក។

ក្នុងសៀវភៅនេះក៏មានការរាប់បញ្ចូលទាំងបញ្ហាអន្តោប្រវេសន៍ ពន្ធដារ សន្តិភាពនៅមជ្ឈឹមបូព៌ា រួមនឹងបញ្ហាសេដ្ឋកិច្ចជាដើម។ សម្រាប់បញ្ហាសេដ្ឋកិច្ច ត្រូវបានគេលើកឡើងថា មានការរីកចម្រើនខ្លាំងនៅក្នុងអាណត្តិរបស់លោក Trump មុនពេលវីរុស Covid-19 រាតត្បាតសហរដ្ឋអាមេរិក ក្នុងនោះ មានការងារថ្មីចំនួន 7 លានតំណែងត្រូវបង្កើតឡើង ខ្ពស់ជាងបីដងបើធៀបនឹងការព្យាករ ព្រមទាំងបានជួយឱ្យអត្រាគ្មានការងារធ្វើថយចុះមកទាបបំផុតក្នុងអំឡុងកន្លះសតវត្សរ៍មកនេះ។

ស្ថិតិខាងលើក៏បានលើកសរសើរចំពោះការដែលប្រធានាធិបតី Trump បានជួយជំរុញឱ្យទីផ្សារមូលបត្រនៅសហរដ្ឋអាមេរិក ហក់ឡើងដល់កម្រិតកំពូលថ្មីជាបន្តបន្ទាប់។

សៀវភៅខាងលើត្រូវបានសេតវិមានប្រកាសជាផ្លូវការ នៅមុនពេលប្រធានាធិបតី Donald Trump ត្រូវចាកចេញពីតំណែងនាប៉ុន្មានថ្ងៃទៀតប៉ុណ្ណោះ។ នេះគឺជាកាលៈទេសៈដែលប្រកបដោយភាពរសើប នៅពេលលោក Trump កំពុងត្រូវបានសភាជាន់ទាបចោទប្រកាន់ទោសជាលើកទីពីរ ក្រោយពីមានព្រឹត្តិការណ៍ហិង្សានៅវិមានសភាកាលពីថ្ងៃទី 6 ខែមករា ខណៈដែលប្រធានាធិបតីជាប់ឆ្នោតបន្ទាប់ Joe Biden នឹងស្បថចូលកាន់អំណាចនៅថ្ងៃទី 20 មករាស្អែកនេះ៕

ប្រភព៖ MSN

January 19, 2021

អនុប្រធានាធិបតីអាមេរិកាំងនឹង “នៅឆ្ងាយ” ពីលោក Trump មួយរយៈ

អនុប្រធានាធិបតីសហរដ្ឋអាមេរិក លោក Mike Pence បានសម្រេចចិត្តថា “នៅឱ្យឆ្ងាយ” ពីប្រធានាធិបតី Donald Trump ក្នុងមួយរយៈពេល បន្ទាប់ពីអ្នកនាំពាក្យរបស់ប្រធានាធិបតីបានឆ្លងវីរុសCOVID-19។ នេះបើតាមការឱ្យដឹងពីសេតវិមាន។

“ខ្ញុំសូមបញ្ជាក់ថា នោះគឺជាការសម្រេចចិត្តផ្ទាល់ខ្លួនរបស់គាត់។ ការរក្សាគម្លាតប៉ុន្មានថ្ងៃគឺអាស្រ័យទៅលើអនុប្រធានាធិបតី”។ លេខាផ្នែកសារព័ត៌មានរបស់សេតវិមាន លោកស្រី Kayleigh McEnany បានឱ្យដឹងបែបនេះ ទាក់ទិននឹងការរក្សាគម្លាតរបស់អនុប្រធានាធិបតីអាមេរិកាំង លោក Mike Pence ជាមួយនឹងលោក Trump។

ឥរិយាបថរបស់អនុប្រធានាធិបតីអាមេរិកាំងរូបនេះ ត្រូវបានធ្វើឡើងក្រោយពី Kate Miller ដែលជាអ្នកនាំពាក្យរបស់លោក និងជាភរិយារបស់លោក Stephen Miller ដែលជាទីប្រឹក្សាជាន់ខ្ពស់របស់ប្រធានាធិបតី Trump បានឆ្លងវីរុសCOVID-19។ លោក Trump កាលពីថ្ងៃទី8ឧសភា បានអះអាងថា លោកមិនបានទាក់ទងផ្ទាល់ជាមួយនឹង Miller នោះទេក្នុងមួយរយៈពេលចុងក្រោយនេះ ប៉ុន្តែលោកស្រី Kate Miller មានទំនាក់ទំនងផ្ទាល់ជាមួយអនុប្រធានាធិបតី Mike Pence។

លោក Trump បាននិយាយបន្ថែមអំពីអនុប្រធានាធិបតីអាមេរិកាំងថា “Mike បានធ្វើតេស្តរកមេរោគ ដោយទទួលបានលទ្ធផលអវិជ្ជមាន”។ មេដឹកនាំកំពូលរបស់សហរដ្ឋអាមេរិកទាំងពីររូបនេះ សុទ្ធតែត្រូវធ្វើតេស្តរកវីរុសCOVID-19 ជារៀងរាល់ថ្ងៃ។

អនុប្រធានាធិបតីសហរដ្ឋអាមេរិក លោក Mike Pence

សូមរំឭកថា មុននេះមានទាហានពិសេសម្នាក់មកពីទ័ពជើងទឹក ដែលមានភារកិច្ចបម្រើលោក Trump ក៏បានឆ្លងវីរុសCOVID-19 ធ្វើឱ្យសេតវិមានព្រួយបារម្ភយ៉ាងខ្លាំងអំពីការឆ្លងរាលដាលក្នុងជួរស្ថាប័នកំពូលនេះ។ សមាជិកជាន់ខ្ពស់3រូបដែលស្ថិតក្នុងក្រុមអ្នកជំនាញការប្រឆាំងនឹងCOVID-19 របស់សេតវិមាន ក្នុងនោះមានមន្ត្រីជាន់ខ្ពស់ផ្នែកសុខាភិបាលនៅសេតវិមាន និងជាទីប្រឹក្សាផ្ទាល់របស់ប្រធានាធិបតីអាមេរិកាំង គឺលោក Anthony Fauci ក៏បានបង្ខាំងខ្លួនឯងផងដែរដើម្បីការពារការឆ្លងមេរោគ។

ការិយាល័យគ្រប់គ្រងសេតវិមាន កាលពីថ្ងៃទី11ឧសភាបានចេញសេចក្ដីប្រកាសណែនាំឱ្យបុគ្គលិកនៅទីនេះពាក់ម៉ាស់ជាប់ជានិច្ចក្នុងតំបន់ករិយាល័យប្រធានាធិបតី ទន្ទឹមនឹងនេះសេតវិមានក៏ស្នើឱ្យគោរពវិធានការរក្សាគម្លាតក្នុងទីសាធារណៈផងដែរ។ ក៏ប៉ុន្តែ លោក Trump ទទួលបានសិទ្ធិលើកលែងក្នុងករណីនេះ បន្ទាប់ពីជំនួយការនានានៅសេតវិមានបានឱ្យដឹងថា លោក Trump ទំនងជាមិនព្រមពាក់ម៉ាស់នោះទេ។

នៅសហរដ្ឋអាមេរិក គិតមកដល់បច្ចុប្បន្ន មានអ្នកជំងឺCOVID-19 សរុប 1,407,928នាក់ និងអ្នកស្លាប់សរុបមានចំនួន83,357នាក់ ក្នុងនោះមានអ្នកជំងឺថ្មី23,895នាក់ និងអ្នកស្លាប់ថ្មី1,654នាក់ដែលទើបបានរកឃើញក្នុងថ្ងៃនេះ។ អ្នកជំងឺដែលបានជាសះស្បើយនៅសហរដ្ឋអាមេរិកក៏បានកើនឡើងដល់293,074នាក់៕

ប្រភព៖ សារព័ត៌មានបរទេស

May 13, 2020

លោក Trump “ជឿជាក់” ថា ចុងឆ្នាំនឹងមានវ៉ាក់សាំង COVID-19

ប្រធានាធិបតីអាមេរិកាំង លោក Donald Trump កាលពីថ្ងៃទី3ឧសភា បានឱ្យដឹងថា លោក “ជឿជាក់” ថា សហរដ្ឋអាមេរិកនឹងមានវ៉ាក់សាំងទប់ស្កាត់វីរុសCOVID-19 នៅមុនដំណាច់ឆ្នាំនេះ។

លោក Trump សង្កត់ធ្ងន់ថា ក្រុមហ៊ុនជាច្រើនកំពុងប្រឹងប្រែងស្រាវជ្រាវ និងពិសោធវ៉ាក់សាំង ហើយពួកគេជិតទទួលបានជោគជ័យក្នុងការអភិវឌ្ឍវ៉ាក់សាំងនេះហើយ។ “ខ្ញុំគិតថា យើងនឹងមានវ៉ាក់សាំងក្នុងពេលឆាប់ៗនេះ” ប្រធានាធិបតីអាមេរិកាំងមានប្រសាសន៍បែបនេះជាមួយអ្នកយកព័ត៌មានរបស់ Fox News។

សហរដ្ឋអាមរិក និងបណ្ដាប្រទេសក្នុងពិភពលោក កំពុងតែប្រជែងគ្នាដើម្បីក្លាយជាអ្នកដំបូងគេដែលមានវ៉ាក់សាំងប្រឆាំងវីរុសCOVID-19។ ម្ចាស់សេតវិមានបានប្រកាសថា លោកនៅតែត្រេកអរជាទីបំផុតបើសិនក្រុមអ្នកស្រាវជ្រាវអាមេរិកាំង ត្រូវបានគេធ្វើឱ្យបរាជ័យក្នុងការប្រជែងលើការអភិវឌ្ឍថ្នាំសម្រាប់វីរុសCOVID-19។

លោក Trump ឱ្យដឹងថា “បើសិនប្រទេសណាមួយទទួលបានជោគជ័យមុនគេ ខ្ញុំនឹងដោះមួកគោរពកោតសរសើរ។ ខ្ញុំមិនខ្វល់អ្វីទាំងអស់ ខ្ញុំគ្រាន់តែចង់បានវ៉ាក់សាំងមួយដែលមានប្រសិទ្ធភាព”។

នៅពេលត្រូវបានសួរអំពីហានិភ័យដែលកើតឡើងចំពោះមនុស្សក្នុងការអភិវឌ្ឍវ៉ាក់សាំងតាមបែបប្រញាប់ប្រញាល់ខុសធម្មតាដូចបច្ចុប្បន្ន លោក Trump អះអាងថា អ្នកដែលបានចូលរួមក្នុងការពិសោធ គឺសុទ្ធតែជាអ្នកស្ម័គ្រចិត្ត។ លោកថា “ពួកគេដឹងនូវអ្វីដែលពួកគេកំពុងតែធ្វើ”។

សហរដ្ឋអាមេរិកបច្ចុប្បន្នគឺជាសម្បុកមេរោគធំជាងគេក្នុងពិភពលោក ដោយមានអ្នកជំងឺកូរ៉ូណាសរុបជិត1.2លាននាក់ ក្នុងនោះមានអ្នកជំងឺជិត69,000នាក់បានបាត់បង់ជីវិត ខណៈរដ្ឋប្រហែលពាក់កណ្ដាលនៃប្រទេសនេះ បានបន្ធូរបន្ថយការរឹតត្បិតលើការដើរហើរ។ ប៉ុន្តែ រដ្ឋមួយចំនួនក៏នៅតែមានការប្រុងប្រយ័ត្នខ្ពស់ចំពោះវីរុសនេះនៅឡើយ។

COVID-19 បានបង្ហាញខ្លួននៅប្រទេសចិនកាលពីចុងឆ្នាំ2019 ហើយមកដល់បច្ចុប្បន្ន វាមានវត្តមាននៅក្នុងប្រទេស និងដែនដីជាង200ក្នុងពិភពលោក បណ្ដាលឱ្យមានមនុស្សជិត3.6លាននាក់ត្រូវឆ្លងមេរោគ ក្នុងនោះមានជិត250,000នាក់បានបាត់បង់ជីវិត និងជាង1.1លាននាក់បានរួចផុតពីការស្លាប់៕

ប្រភព៖ សារព័ត៌មានបរទេស

May 4, 2020

ប្រធានាធិបតី Trump ជំពាក់បំណុលធនាគារចិន រាប់សិបលានដុល្លារ

សារព័ត៌មាន Daily Mail បានរាយការណ៍ថា ប្រធានាធិបតីសហរដ្ឋអាមេរិក បច្ចុប្បន្នជំពាក់បំណុលធនាគារប្រទេសចិនរាប់សិបលានដុល្លារ ហើយថា នឹងពន្យារពេលបង់ប្រាក់សងធនាគារនេះនៅឆ្នាំ2022 (ពាក់កណ្ដាលអាណត្តិទី2របស់លោក Trump បើសិនលោកជាប់ឆ្នោតម្ដងទៀត)។

សិទ្ធិកាន់កាប់របស់លោក Trump ចំពោះអគារ Manhattan ដែលមាន43ជាន់ ត្រូវបានគេដឹងជាទូទៅអស់រយៈពេលច្រើនឆ្នាំមកហើយ ព្រមទាំងត្រូវបានលើកឡើងនៅក្នុងយុទ្ធនាការឃោសនារកសំឡេងឆ្នោតរបស់លោកTrump កាលពីឆ្នាំ2015ទៀតផង។

សារព័ត៌មាន Daily Mail បានឱ្យដឹងថា ប្រធានាធិបតីសហរដ្ឋអាមេរិក លោក Donald Trump កាន់កាប់ភាគហ៊ុនចំនួន30% នៅក្នុងអគារ 1290 Avenue of the Americas នៅឯទីក្រុងនីវយ៉ក សហរដ្ឋអាមេរិក។ អគារនេះ ត្រូវបានគេដឹងថា មានតម្លៃសរុបឡើងដល់ជាង1ពាន់លានដុល្លារ។

អគារ Trump Tower ដែលស្ថិតនៅតាមបណ្ដោយផ្លូវ 1290 នេះ គឺជាផ្នែកមួយនៃមោទកភាពរបស់លោក Trump នៅពេលលោកធ្វើយុទ្ធនាយការរកសំឡេងឆ្លោតសម្រាប់តំណែងប្រធានាធិបតីក្នុងឆ្នាំ2015។

លោក Trump បានថ្លែងកាលពីឆ្នាំ2015 នៅក្នុងអគារ Trump Tower ថា “ខ្ញុំបានយកឈ្នះលើប្រទេសចិនជាច្រើនជាបន្តបន្ទាប់។ ខ្ញុំបានកាន់កាប់មួយផ្នែកធំនៃអគារ Bank of America នៅ San Francisco និងអគារ 1290 Avenue ដែលខ្ញុំយកបានពីចិននៅក្នុងការប្រកួតប្រជែងមួយ។ ពិតជាមានតម្លៃខ្លាំងណាស់។ ខ្ញុំស្រឡាញ់ប្រទេសចិន”។

បើយោងតាមទំព័រ Politico បានឱ្យដឹងថា ដៃគូរបស់លោក Trump គឺក្រុមហ៊ុន Vornado Realty Trust កំពុងកាន់កាប់70%នៃអគារខាងលើ ចាប់តាំងពីឆ្នាំ2012 នៅពេលខ្ចីប្រាក់950លានដុល្លារដើម្បីសងបំណុលលើខ្ទង់វិនិយោគទៅលើអគារនេះ។ ក្នុងនោះ ទឹកប្រាក់ប្រមាណជា 211លានដុល្លារ បានមកពីកម្ចីពីធនាគារចិន (BOC)។

លោក Trump ធ្លាប់បានប្រកាសថានឹងដកខ្លួនចេញពីតួនាទីជាអ្នកគ្រប់គ្រងអាជីវកម្មក្នុងអំឡុងរដូវបោះឆ្នោតប្រធានាធិបតីឆ្នាំ2016 បើសិនជាលោកជាប់ឆ្នោត។

ក៏ប៉ុន្តែ មនុស្សជាច្រើនយល់ថា លោក Trump នៅតែមិនព្រមបោះបង់អាណាចក្រជំនួញរបស់ខ្លួន ដែលមានក្រុមហ៊ុនបុត្រសម្ព័ន្ធជាង500 និងអចលនទ្រព្យនៅក្នុងប្រទេសជាង20 នៅក្នុងពិភពលោក ខណៈបានក្លាយជាម្ចាស់សេតវិមានទៅហើយ។ លោកនៅតែគ្រប់គ្រង Trump Organization បើទោះជាបានប្រគល់សិទ្ធិចាត់ចែងទៅឱ្យកូនប្រុស2រូបរបស់ខ្លួនរួចហើយក្ដី។

កាលពីខែមករា2019 លោក Trump ធ្លាប់បានអំពាវនាវឱ្យមានការស៊ើបអង្កេតលើទំនាក់ទំនងរបស់អតីតអនុប្រធានាធិបតីសហរដ្ឋអាមេរិក លោក Joe Biden ដែលជាបេក្ខភាពលំដាប់កំពូលរបស់បក្សប្រជាធិបតេយ្យសម្រាប់ការបោះឆ្នោតប្រធានាធិបតីអាមេរិកាំងឆ្នាំ2020 ដែលសំដៅទៅលើទំនាក់ទំនងរបស់កូនប្រុសលោក Biden ជាមួយនឹងមូលនិធិមួយដែលបានស្វែងរកវិធីប្រមូលទុនពីប្រទេសចិន។

លោក Trump យល់ថា លោក Hunter Biden បានកេងចំណេញលើឥទ្ធិពលរបស់ឪពុកខ្លួន (លោក Joe Biden) ពេលដែលកំពុងកាន់កាប់តំណែងអនុប្រធានាធិបតី ដើម្បីទទួលបានប្រាក់ 1.5ពាន់លានដុល្លារពីរដ្ឋាភិបាលចិនសម្រាប់មូលនិធិភាគហ៊ុនរបស់ខ្លួន ហើយរកបានប្រាក់ចំណេញរាប់លានដុល្លារពីអំពើកេងខាងលើនេះ។

កាលពីដើមខែមេសា ឆ្នាំ2020 ក្រុមអ្នកធ្វើយុទ្ធនាការឃោសនារកសំឡេងឆ្នោតរបស់លោក Trump បានបង្ហោះសារមួយនៅលើបណ្ដាញសង្គមដែលមានខ្លឹមសារថា “ហេតុអ្វីបានជាធនាគារជាតិចិន បែរជាសហការជាមួយ Hunter Biden ពេលដែលឪពុករបស់គាត់កំពុងកាន់តំណែងជាអនុប្រធានាធិបតី?”។

ថ្មីៗនេះ នៅក្នុងសន្និសីទសារព័ត៌មានមួយនៅឯសេតវិមាន ប្រធានាធិបតីសហរដ្ឋអាមេរិក លោក Donald Trump យល់ថា “ប្រទេសចិននឹងគ្រប់គ្រង Joe Biden” នេះមានន័យថា បើសិនជាលោក Biden ជាប់ឆ្នោតជាប្រធានាធិបតី នៅក្នុងការបោះឆ្នោតនាខែវិច្ឆិកា ឆ្នាំ2020ខាងមុខ នោះប្រទេសចិននឹងអាចគ្រប់គ្រប់សហរដ្ឋអាមេរិក។

ប្រធានាធិបតី Donald Trump នៅតែរិះគន់ជាហូរហែអំពីទំនាក់ទំនងរវាងគូប្រកួតរបស់គាត់ គឺលោក Joe Biden ជាមួយនឹងប្រទេសចិន ក៏ប៉ុន្តែ លោក Trump បានភ្លេចថា ខ្លួននៅជំពាក់លុយយ៉ាងច្រើននៅធនាគាររបស់ប្រទេសចិន ហើយប្រការនេះអាចនឹងធ្វើឱ្យមានការលំបាកធំធេងសម្រាប់លោក ក្នុងយុទ្ធនាការរកសំឡេងឆ្នោតនៅចុងឆ្នាំ2020នេះ។

អ្នកជំនាញការ Robert Maguire មកពីអង្គការពលរដ្ឋដើម្បីការទទួលខុសត្រូវនិងក្រមសីលធម៌ ប្រចាំទីក្រុងវ៉ាស៊ីងតោន បានអះអាងថា “លោក Trump រិះគន់ទៅលើការរកស៊ីរបស់ Hunter ប៉ុន្តែ លោក Trump កំពុងតែកាន់កាប់ក្រុមហ៊នដែលរកបានប្រាក់ចំណេញពីបណ្ដាទំនាក់ទំនងហិរញ្ញវត្ថុជាមួយនឹងបណ្ដាប្រទេសដែលលោកកំពុងតែជំនួសមុខឱ្យប្រជាជនអាមេរិាំងក្នុងការចរចានានា”។

មិនត្រឹមតែប៉ុណ្ណោះ គម្រោងអចលនទ្រព្យជាន់ខ្ពស់2ផ្សេងទៀតដែលមានឈ្មោះ Trump នៅឯ អារ៉ាប់រួម (UAE) និងឥណ្ឌូនេស៊ី បែរជាកំពុងត្រូវបានសាងសង់ដោយក្រុមហ៊ុនជាតិរបស់ចិនទៅវិញ។ លោកប្រធានាធិបតី Trump និងកូនស្រីរបស់គាត់ គឺលោកស្រី Ivanka ទទួលបានកម្មសិទ្ធិលើពាណិជ្ជសញ្ញារាប់រយពីរដ្ឋាភិបាលចិនផងដែរ៕

ប្រភព៖ Daily Mail, Politico

April 27, 2020

ខឹងខ្លាំងណាស់! លោកត្រាំ ប្រកាសផ្អាកលុយគាំទ្រWHO កណ្ដាលស្ថានការណ៍វិបត្តិកូវីដ-19

លោកប្រធានាធិបតីនៃសហរដ្ឋអាមេរិក ដូណាល់ ត្រាំ កាលពីថ្ងៃអង្គារ(ទី14 មេសា)ម្សិលមិញ បានប្រកាសផ្អាកលុយឧបត្ថម្ភរបស់សហរដ្ឋអាមេរិក ដែលបានផ្ដល់ទៅឱ្យអង្គការសុខភាពពិភពលោក(WHO) ដោយបានឱ្យហេតុផលថា អង្គការមួយនេះ បានលាក់បាំងភាពធ្ងន់ធ្ងរក្នុងការឆ្លងរាលដាលរបស់មេរោគកូវីដ-19 នៅក្នុងប្រទេសចិន មុនពេលវាឆ្លងសាយភាយពាសពេញពិភពលោក។

លោក ត្រាំ បានថ្លែងនៅក្នុងសេចក្ដីថ្លែងការណ៍ថា លោកបានបញ្ជាឱ្យគណៈគ្រប់គ្រងរបស់លោក ធ្វើការផ្អាកលុយគាំទ្រអង្គការនោះ ខណៈពេលជាមួយគ្នា ក៏នឹងមានពិនិត្យវាយតម្លៃពីតួនាទីរបស់អង្គការសុខភាពពិភពលោក លើផ្នែកគ្រប់គ្រងចាត់ការ ដែលខុសឆ្គងយ៉ាងធ្ងន់ធ្ងរ និងលាក់បាំងការឆ្លងរាលដាលរបស់វីរុសកូរ៉ូណាប្រភេទថ្មី។

នៅក្នុងសេចក្ដីថ្លែងការណ៍របស់លោកត្រាំ បានបញ្ជាក់ថា អង្គការសុខភាពពិភពលោក បានរារាំងភាពច្បាស់លាស់របស់ព័ត៌មាន នៃការឆ្លងរាលដាល ហើយសហរដ្ឋអាមេរិក ដែលអ្នកឧបត្ថម្ភធំជាងគេរបស់អង្គភាពផ្នែកសុខាភិបាល របស់អង្គការសហប្រជាជាតិមួយនេះ ដោយចំនួនទឹកប្រាក់ 400លានដុល្លារអាមេរិកកាលពីឆ្នាំកន្លងទៅ ពេលនេះនឹងពិចារណាថា តើនឹងត្រូវធ្វើយ៉ាងណាតទៅទៀត ជាមួយប្រាក់ទាំងអស់ដែលបានប្រគល់ទៅឱ្យអង្គការសុខភាពពិភពលោក។

លោកត្រាំថ្លែងថា “ដោយការឆ្លងរាលដាលរបស់ជំងឺឆ្លងដ៏ធំកូវីដ-19 យើងមានក្ដីកង្វល់យ៉ាងធំសម្បើមថា ភាពអនុគ្រោះរបស់សហរដ្ឋអាមេរិក ត្រូវបានប្រើប្រាស់យ៉ាងល្អបំផុត តាមដែលអាចទៅរួចហើយ ឬទេ?”។

កាលពីសប្ដាហ៍មុន លោកត្រាំ បានគំរាមកាត់ប្រាក់ឧបត្ថម្ភគាំទ្រអង្គការសុខភាពពិភពលោក ពីបទលម្អៀង ដោយបានផ្ដល់ភាពសំខាន់ទៅលើប្រទេសចិនខ្លាំងជ្រុលពេក និងថែមទាំងផ្ដល់ការណែនាំដែលគ្មានប្រសិទ្ធភាព រហូតធ្វើឱ្យមេរោគកូរ៉ូណាប្រភេទថ្មី ឆ្លងរាលដាលទូទាំងពិភពលោក។

“ពួកគេចេញសេចក្ដីប្រកាសដាស់តឿនខុសឆ្គង” លោកត្រាំ បានបញ្ជាក់ដោយបានចោទថា WHO សម្រេចចិត្តយឺតយ៉ាវ ទម្រាំតែចេញការប្រកាសដាស់តឿនឱ្យប្រយ័ត្នលើការធ្វើដំណើរទៅប្រទេសចិន។ លោកថា “ពួកគេគួរតែប្រកាស តាំងតែពីចុងខែមុននោះ”

តមកទៀត លោក ថេដ្រូស អ៊ែដហាណូម កេប្រេយេស៊ុស ប្រធានអង្គការសុខភាពពិភពលោក បានអំពាវនាវឱ្យបណ្ដាមេដឹកនាំទូទាំងពិភពលោក បញ្ឈប់ការលេងល្បែងនយោបាយកណ្ដាលវិបត្តិជំងឺរាតត្បាតដ៏ធំ នៃវីរុសកូរ៉ូណាប្រភេទថ្មី(កូវីដ-19) ក្រោយពីអង្គការមួយនេះត្រូវរងការរិះគន់យ៉ាងខ្លាំងក្លាពីលោកប្រធាធិបតី ដូណាល់ ត្រាំ។

តែយ៉ាងណាក៏ដោយ សង្គ្រាមពាក្យសម្ដីរវាងទាំង 2ខាងនេះ មិនបញ្ចប់ត្រឹមតែប៉ុនហ្នឹងទេ ព្រោះកាលពី 1ថ្ងៃបន្ទាប់ពីនោះមក សហរដ្ឋអាមេរិក បានចេញសេចក្ដីប្រកាសចោទថា ជារឿងរបស់អង្គការសុខភាពពិភពលោកទៀត ដែលផ្ដល់ភាពសំខាន់ទៅលើប្រធានបទខាងនយោបាយមុនគេបង្អស់ ដោយធ្វើព្រងើយកន្តើយចំពោះការព្រមានរបស់ប្រទេសតៃវ៉ាន់ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 នៅក្នុងប្រទេសចិន រហូតដល់ស្ថានការណ៍រាលដាលទូទាំងពិភពលោក។

ការចោទប្រកាន់ទាំងនោះ បានជំរុញឱ្យអង្គការសុខភាពពិភពលោក ប្រញាប់ឆ្លើយតប 1ដងទៀត ដោយបានបដិសេធការចោទប្រកាន់របស់សហរដ្ឋអាមេរិក និងបានអះអាងថា ព័ត៌មានដែលបានទទួលតាមរយៈអ៊ីមែលពីតៃវ៉ាន់នៅថ្ងៃនោះ មិនធ្លាប់យោងទៅលើករណីការឆ្លងពីមនុស្សទៅមនុស្សនោះឡើយ ដែលការឆ្លើយតបនេះហើយ ជាប្រភពនៃការគំរាមកាត់ប្រាក់ឧបត្ថម្ភគាំទ្ររបស់លោកត្រាំ៕

ប្រភព៖ សារព័ត៌មានបរទេស

April 15, 2020

មហាសេដ្ឋី Bloomberg៖ “ខ្ញុំនឹងចំណាយទ្រព្យទាំងអស់ដើម្បីផ្ដួលលោក Trump”

បេក្ខភាពប្រធានាធិបតីអាមេរិក Michael Bloomberg ថ្មីៗនេះ បានឱ្យដឹងថា លោកត្រៀមជាស្រេចក្នុងការចំណាយទ្រព្យធនផ្ទាល់ខ្លួនទាំងអស់ដើម្បីផ្ដួលប្រធានាធិបតីកំពុងកាន់អំណាច នោះគឺលោក Donald Trump នៅក្នុងការប្រជែងគ្នាចូលទៅកាន់សេតវិមានក្នុងឆ្នាំ2020 នេះ។

កំពូលមហាសេដ្ឋីរូបនេះក៏បានទាត់ចោលនូវការរិះគន់ពីគូប្រជែងនានាដែលចោទថា លោកបានប្រើប្រាស់អំណាចទឹកប្រាក់ដើម្បី “ទិញ” ការបោះឆ្នោត។ នេះបើយោងតាមសារព័ត៌មាន Reuters។

មួយរយៈពេលចុងក្រោយនេះ កំពូលមហាសេដ្ឋីលំដាប់ទី8 ក្នុងពិភពលោក(តាមចំណាត់ថ្នាក់របស់ទទស្សនាវដ្តី Forbes) លោក Bloomberg បានបង្ហាញមុខនៅស្ទើរគ្រប់ទំព័រសារព័ត៌មាន និងបណ្ដាញសង្គម ជាមួយនឹងសារដែលថា លោកមាន “ឱកាសល្អបំផុត” ដើម្បីអាច “បណ្ដេញ” លោក Trump ចេញពីសេតវិមាន។ លោក Bloomberg គឺជាបេក្ខជនប្រធានាធិបតីមកពីគណបក្សប្រជាធិបតេយ្យ ដែលចំណាយប្រាក់ច្រើនបំផុតទៅលើការឃោសនារកសំឡេងឆ្នោត ចាប់តាំងពីខែវិច្ឆិកា ឆ្នាំមុនមក។

កាលពីចុងសប្ដាហ៍កន្លងទៅ លោក Bloomberg បានថ្លែងនៅលើរថយន្តក្រុងដែលកំពុងធ្វើយុទ្ធនាការរកសំឡេងឆ្នោតថា៖ “អាទិភាពទី1 របស់ខ្ញុំ គឺការផ្ដួលលោក Donald Trump ខ្ញុំនឹងចំណាយទ្រព្យសម្បត្តិទាំងអស់របស់ខ្ញុំ ដើម្បីផ្ដួលគាត់ឱ្យបាន”។

ចំណែកតំណាងរាស្ដ្រ Elizabeth Warren ដែលជាបេក្ខនារីលំដាប់កំពូលរបស់បក្សប្រជាធិបតេយ្យដែរនោះ ធ្លាប់បានប្រកាសថា លោកស្រីនឹងលុបបំបាត់ឥទ្ធិពលនៃប្រាក់កាសចេញពីឆាកនយោបាយ។ លោកស្រីបានរិះគន់យុទ្ធនាការឃោសនាដែលមានតម្លៃ 37លានដុល្លារនៅលើទូរទស្សន៍របស់លោក Bloomberg ថា អតីតអភិបាលក្រុង New York រូបនេះ កំពុងព្យាយាមប្រើលុយទិញប្រជាធិបតេយ្យអាមេរិក។

យចូលរួមក្នុងការប្រកួតប្រជែងយឺតជាងគេ និងបានខកខានក្នុងការប្រជែង 6លើកដំបូងៗរបស់គណបក្សប្រជាធិបតេយ្យ លោក Bloomberg បច្ចុប្បន្នឈរលើលំដាប់លេខរៀងទី5 ក្នុងការស្ទង់មតិជាតិ បន្ទាប់ពីបេក្ខភាពប្រធានាធិបតី Joe Biden, Bernie Sanders, Elizabeth Warren និង Pete Buttigieg។

នៅក្នុងយុទ្ធនាការឃោសនារកសំឡេងឆ្នោត ក្រៅពីសារខាងលើ លោក Bloomberg ក៏មានសារសំខាន់មួយទៀតដែរ នោះគឹ៖ “ខ្ញុំចេញមុខប្រជែងយកតំណែងប្រធានាធិបតី គឺដើម្បីផ្ដួលលោក Trump និងដើម្បីកសាងទឹកដីអាមេរិកឡើងវិញ។ យើងនឹងមិនទុកឱ្យលោក Trump មានឱកាសកាន់អំណាចរបៀបជិះសេះលែងដៃរយៈពេល 4ឆ្នាំទៀតនោះទេ”៕

ប្រភព៖ សារព័ត៌មានបរទេស

January 15, 2020

លោក Donald Trump រំឭកដល់ការសន្យារបស់នាយក Apple

លោកប្រធានាធិបតីសហរដ្ឋអាមេរិក Donald Trump បានថ្លែងរំឭកម្ដងទៀតអំពីការសន្យារបស់នាយកប្រតិបតិ្តក្រុមហ៊ុន Apple គឺលោក Tim Cook ដែលថា នឹងសាងសង់ “រោងចក្រធំៗចំនួន 3” នៅសហរដ្ឋអាមេរិកនៅក្នុងបទសម្ភាសជាមួយកាសែត The Wall Street Journal។

លោក Trump បានប្រាប់ថា៖ «ខ្ញុំបាននិយាយទៅកាន់លោក Cook ហើយគាត់បានសន្យាថា នឹងធ្វើឱ្យខ្ញុំនូវគម្រោងធំៗ 3»។ នេះមិនមែនជាលើកទីមួយទេដែលលោក Trump បាននិយាយថា គាត់បាននិយាយជាមួយ Cook អំពីការបង្កើតរោងចក្រផលិតកម្មធំមួយក្នុងទឹកដីសហរដ្ឋអាមេរិក។ ខណៈកាលពីក្នុងអំឡុងយុទ្ធនាការរកសំឡេងឆ្នោតរបស់លោក លោក Trump បានហៅ CEO របស់ក្រុមហ៊ុន Apple ជាច្រើនដងដើម្បីឱ្យមកបង្កើតរោងចក្រនៅលើទឹកដីកំណើតវិញ។

គិតមកដល់ពេលនេះក្រុមហ៊ុន Apple បានបដិសេធមិនធ្វើអត្ថាធិប្បាយអ្វីទាំងអស់ចំពោះដំណើរនៃការបង្កើតរោងចក្រក្នុងទឹកដីសហរដ្ឋអាមេរិកនេះ បើទោះបីជាលោកនាយកប្រតិបត្តិ Tim Cook ធ្លាប់បានឆ្លើយប្រាប់ទៅពិធីករលោក Jim Cramer នៅក្នុងបទសម្ភាស Mad Money របស់ប៉ុស្តិ៍ CNBC កាលពីថ្ងៃទី03 ខែឧសភា ឆ្នាំ2017 កន្លងទៅថា ក្រុមហ៊ុនលោកបានត្រៀមខ្លួននឹងធ្វើការវិនិយោគមួយដ៏ធំសម្រាប់ពលរដ្ឋអាមេរិកដើម្បីឆ្លើយតបនឹងការស្នើសុំរបស់លោកប្រធានាធិបតី។ ទឹកប្រាក់ 1 ពាន់លានដុល្លារ នឹងត្រូវបានត្រៀមសម្រាប់ការសាងសង់រោងចក្រ និងសម្ភារជាច្រើនទៀត ដើម្បីបម្រើដល់ចង្វាក់ផលិតកម្មទូរស័ព្ទ iPhone៕

July 26, 2017

សម្ដី Donald Trump ចាប់ផ្ដើមមានឥទ្ធិពលលើ Apple

សម្ដីរបស់លោកប្រធានាធិបតី Donald Trump ចាប់ផ្ដើមមានឥទ្ធិពលទៅលើក្រុមហ៊ុន Apple ហើយ បន្ទាប់ពីបានស្នើឱ្យក្រុមហ៊ុនមួយនេះផ្លាស់ប្ដូររោងចក្រផលិតទូរស័ព្ទ iPhone មកទឹកដីអាមេរិកវិញ តាំងពីពេលមុនឡើងកាន់តំណែង។

ឆ្លើយតបនឹងសំណើមួយនេះ នាយកប្រតិបត្តិ Apple លោក Tim Cook បានឆ្លើយប្រាប់ទៅពិធីករលោក Jim Cramer នៅក្នុងបទសម្ភាស Mad Money របស់ប៉ុស្តិ៍ CNBC កាលពីថ្ងៃទី 03 ខែឧសភា ឆ្នាំ 2017 នេះថា ក្រុមហ៊ុនលោកបានត្រៀមខ្លួននឹងធ្វើការវិនិយោគដ៏ធំមួយសម្រាប់ពលរដ្ឋអាមេរិក ដើម្បីតបនឹងការស្នើសុំរបស់លោកប្រធានាធិបតី។ ទឹកប្រាក់ មួយពាន់លានដុល្លារ នឹងត្រូវបានត្រៀមសម្រាប់ការសាងសង់រោងចក្រ និងសម្ភារជាច្រើនទៀត ដើម្បីបម្រើដល់ចង្វាក់ផលិតកម្មទូរស័ព្ទ iPhone។

នាយកប្រតិបត្តិរូបនេះថ្លែងថា «ការផ្លាស់ប្ដូរនេះ វាប្រៀបដូចទឹករលកក្នុងបឹង ដែលមិនដែលបោកបក់ ប៉ុន្តែពេលវាចាប់ផ្ដើម គឺខ្លាំងតែម្ដង។ លោកបន្តថា ក្រោយការសាងសង់បានបញ្ចប់ នៅតំបន់នោះអាចនឹងបង្កើតការងារផ្សេងទៀត ពិសេសបណ្តុំសេវាឧស្សាហកម្ម ដែលបង្កើតឡើងជុំវិញកន្លែងការងារនេះតែម្តង និងវាជាវិធីដែល Apple ចង់សងគុណត្រឡប់ទៅសង្គមវិញ តាមរយៈការបង្កើតការងារ និងការប្រើប្រាស់ថាមពលកកើតឡើងវិញ»។

យ៉ាងណាមិញ ការឆ្លើយតបខាងលើ វាហាក់ផ្ទុយពីអ្វីដែល Apple ធ្លាប់បានបង្ហើបកាលពីពេលកន្លងទៅទាក់ទងនឹងរឿងផ្លាស់ប្ដូរទីតាំងរោងចក្រមួយនេះ។ លោក Luca Maestri ប្រធានផ្នែកហិរញ្ញវត្ថុរបស់ Apple ធ្លាប់បានឱ្យដឹងក្នុងសន្និសីទកាសែត Goldmans Sachs កាលពីដើមឆ្នាំ 2017 ថា ក្រុមហ៊ុនគ្មានបំណងនឹងធ្វើការផ្លាស់ប្ដូរអ្វីមកទឹកដីអាមេរិកទេ ព្រោះក្រុមហ៊ុនបានធ្វើការវិនិយោគធំ និងជួយសេដ្ឋកិច្ចរបស់អាមេរិកជាច្រើនឆ្នាំមកហើយ លើទឹកប្រាក់រាប់ពាន់លានដុល្លារនៅអាមេរិក ដែលបើគិតសរុបមកដល់ពេលនេះ និងរយៈពេល 10 ឆ្នាំនេះ៕

ប្រភព៖ YouTube
អត្តបទដោយ Chhaihor

May 9, 2017

Tag: Donald Trump