Tag: Crystal Palace

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?
(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។
លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។
ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។
ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។
បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។
តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស
យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕
May 30, 2023
Crystal Palace ដាក់គោលដៅនាំយកខ្សែការពារបន្ថែមទៀត ក្រោយពីបំពេញការផ្ទេរ Riedewald
ក្លិប Crystal Palace ចង់បានខ្សែការពារចំណូលថ្មីបន្ថែមទៀត ក្រោយពីបានបំពេញការចុះហត្ថលេខាជាមួយនឹងតារាឆ្នើមអន្តរជាតិហូឡង់ Jairo Riedewald កាលពីថ្ងៃចន្ទរួចមក ខណៈដែលពួកគេត្រៀមធ្វើការប្រកាសជាផ្លូវការនៅថ្ងៃអង្គារនេះ។
ខ្សែការពាររបស់ក្លិប Ajax រូបនេះ ត្រូវបានចាត់ទុកថា ជាកីឡាករម្នាក់ក្នុងចំណោមកីឡាករវ័យក្មេងដ៏មានទេពកោសល្យបំផុតក្នុងទ្វីបអឺរ៉ុប ប៉ុន្តែរូបគេបានជួបភាពត្រដាបត្រដួសក្នុងការបង្ហាញខ្លួនឲ្យបានទៀងទាត់ និងបានជួបបញ្ហារបួសអស់រយៈពេល18ខែ។
ស្របពេលដែលរូបគេក៏អាចលេងក្នុងតំបន់ការពារស្លាបឆ្វេង និងក្នុងតួនាទីខ្សែបម្រើការពារបានដែរសម្រាប់គ្រូបង្វឹកថ្មីរបស់គេគឺលោក Frank de Boer នោះ។ ខ្សែការពារវ័យ20ឆ្នាំរូបនេះ គឺជាអ្នកជំនាញខាងបញ្ជូនបាល់ និងគួរតែក្លាយជាកីឡាករដ៏សំខាន់ម្នាក់ ខណៈដែលលោក De Boer សម្លឹងរកការដឹកនាំឲ្យ Crystal Palace មានទម្រង់លេងរឹងមាំ និងលេងបែបវាយសម្រុកទៅលើដៃគូប្រកួត។ Riedewald បានធ្វើឲ្យក្លិប Everton ចំណាយប្រាក់9លានអឺរ៉ូ (ស្មើនឹង10.3លានដុល្លារអាមេរិក) ហើយរូបគេបានបង្ហាញខ្លួនជាអន្តរជាតិ3លើក ហើយនិងត្រូវចូលរួមជាមួយនឹងកីឡាករ Ruben Loftus-Cheek ដែលបានផ្ទេរពីក្លិប Chelsea ទៅកាន់ក្លិប Crystal Palace ក្នុងលក្ខខណ្ឌខ្ចីជើងពេញមួយរដូវកាលក្នុងនាមជាកីឡាករថ្មីនៅឯកីឡដ្ឋាន Selhurst Park នារដូវក្តៅនេះ។
ការទិញចូលកីឡាករថ្មីបន្ថែមទៀតនឹងត្រូវធ្វើឡើងខណៈដែល Crystal Palace និងក្រុមរបស់ពួកគេបានធ្វើដំណើរទៅដល់ទីក្រុងហុងកុងកាលពីថ្ងៃចន្ទដើម្បីធ្វើការប្រកួតមិត្តភាពមុនបើករដូវកាលថ្មីនោះបានចរចាជាមួយនឹងក្លិប Porto រួចជាស្រេចជុំវិញការផ្ទេរ Bruno Martins Indi៕
ប្រភពពី៖ The Independent
July 18, 2017
គ្រូបង្វឹកថ្មី ៖ Crystal Palace មានបំណេងលេងដូចក្រុម Ajax
លោក Frank de Boer ដែលជាអ្នកចាត់ការទូទៅថ្មីរបស់ក្លិប Crystal Palace បានបញ្ជាក់ថា លោកចង់ឲ្យក្រុមរបស់លោកធ្វើការគ្រប់គ្រងលើគូប្រកួតរបស់ខ្លួនក្នុងទម្រង់លេងដូចជាក្រុម Ajax ជាក្លិបដែលលោកបានកសាងកេរិ៍្តឈ្មោះរបស់លោក។
លោក De Boer បានចុះហត្ថលេខាលើកុងត្រារយៈពេល 3ឆ្នាំនៅឯកីឡដ្ឋាន Selhurst Park និងត្រូវបានផ្តល់ការងារដោយលោក Steve Parish ដែលជាប្រធានក្លិប ឲ្យធ្វើការផ្លាស់ប្តូរពីក្រុមមួយដែលបានត្រឹមតែអាចប្រជែងគេចផុតពីតំបន់កាត់ចោល ទៅជា «ក្រុមដ៏រឹងមាំមួយក្នុងក្របខ័ណ្ឌ Premier League»។
អតីតខ្សែការពារអន្តរជាតិហូឡង់រូបនេះ ដែលបានឈ្នះពានជាច្រើនទាំងក្នុងនាមជាកីឡាករ និងអ្នកចាត់ការទូទៅនៅឯក្លិប Ajax នោះ នឹងចូលជំនួសកន្លែងរបស់លោក Sam Allardyce ដែលបានលាលែងពីតំណែងរបស់លោកកាលពីខែមុន។ ក្នុងពេលបង្ហាញមុខទៅកាន់ក្លិបថ្មីរបស់ខ្លួន លោក De Boer បានឲ្យដឹងថា៖ «ខ្ញុំចង់បានក្រុមមួយដែលអ្នកគាំទ្ររំភើបក្នុងការមកទស្សនាការប្រកួតរបស់យើង ដើម្បីមើលក្រុមមួយដែលចង់ឈ្នះ និងចង់ប្រយុទ្ធរាល់នាទីទាំងអស់»។ លោក De Boer នឹងក្លាយជាអ្នកចាត់ការទូទៅទី 7របស់ក្លិប Crystal Palace បើគិតចាប់តាំងពីលោក Parish បានទិញក្លិបនេះកាលពីឆ្នាំ 2010 និងជាគ្រូបង្វឹកមិនជាប់សញ្ជាតិអង់គ្លេសដំបូងគេក្នុងការដឹកនាំក្រុមនេះក្នុងចំណោមគ្រូបង្វឹកទាំង7។
លោក De Boer បានបញ្ជាក់បន្ថែមថា៖ «គោលបំណងរបស់ខ្ញុំ គឺការធ្វើឲ្យយើងក្លាយជាក្រុមដ៏រឹងមាំមួយក្នុងក្របខ័ណ្ឌ Premier League មិនមែនត្រដាបត្រដួសក្នុងតំបន់កាត់ចោលឡើយ។ នោះគឺជាគោលដៅដ៏សំខាន់របស់យើង ហើយប្រសិនបើយើងសម្រេចបានសមិទ្ធផលកាន់តែច្រើន នោះវានឹងក្លាយជារឿងដ៏ល្អ»៕
ប្រភពពី៖ The Guardian

June 27, 2017
លោក Allardyce លាលែងពីតំណែងអ្នកចាត់ការទូទៅរបស់ Crystal Palace
លោក Sam Allardyce បានប្រកាសកាលពីថ្ងៃអង្គារថា លោកបានចុះចេញពីតំណែងអ្នកចាត់ការទូទៅរបស់ក្រុម Crystal Palace ហើយ ដោយសារតែហេតុផលគ្រួសារក្រោយពីកាន់តំណែងបានរយៈពេលត្រឹមតែ ៥ ខែប៉ុណ្ណោះក្នុងក្លិបរបស់ក្របខ័ណ្ឌ Premier League មួយនេះ។
គ្រូបង្វឹកវ័យ៦២ឆ្នាំដែលបានដឹកនាំក្រុមបាល់ទាត់ជម្រើសជាតិអង់គ្លេសត្រឹមតែ១ប្រកួតនោះ បាននិយាយថាលោកមិនមានមហិច្ឆតាក្នុងការទទួលការងារផ្សេងឡើយ ដោយបានទទួលស្គាល់ថា លោកពិតជាដឹងគុណដល់ក្លិប Crystal ដែលបានផ្តល់ឱកាសឲ្យលោកក្នុងការស្តារកេរិ៍្តឈ្មោះរបស់លោកត្រឡប់មកវិញ។ លោក Allardyce បានចូលកាន់តំណែងនេះក្នុងក្លិប Crystal Palace បន្ទាប់ពីការចាកចេញរបស់លោក Alan Pardew កាលពីខែធ្នូ ក្នុងកិច្ចសន្យារយៈពេល២ឆ្នាំកន្លះ និងបានជួយឲ្យក្រុមមានរហស្សនាមថា ឥន្ទ្រីកំណាចមួយនេះ ឈ្នះ៨លើក ក្នុងចំណោមការប្រកួត២១លើក និងពួកគេបានបញ្ចប់ក្នុងចំណាត់ថ្នាក់លេខ១៤ នៅលើតារាងនៃក្របខ័ណ្ឌ Premier League។
ក្រោយពីកិច្ចពិភាក្សាផ្សេងៗជាមួយនឹងលោក Steve Parish ដែលជាប្រធានក្លិបរួចមក លោក Allardyce បានឲ្យដឹងនៅក្នុងសេចក្តីថ្លែងការណ៍មួយថា៖ «ពេលខ្លះ នេះគឺជាការសម្រេចចិត្តដ៏លំបាកមួយ ប៉ុន្តែពេលខ្លះនេះគឺជាការសម្រេចចិត្តដ៏សាមញ្ញមួយ»។ គ្រូបង្វឹកចាស់វស្សារូបនេះបានបន្ថែមទៀតថា៖ «ខ្ញុំតែងតែដឹងគុណដល់ក្លិប Crystal Palace និងលោក Steve Parish ចំពោះការផ្តល់ឱកាសឲ្យខ្ញុំក្នុងការចាកចេញទាំងភាពរីករាយ ក្រោយពីបានជួយឲ្យក្លិបនេះរក្សាវត្តមានរបស់ពួកគេក្នុងក្របខ័ណ្ឌ Premier League»៕
ប្រភពពី៖ Reuters
May 24, 2017
លោក Pochettino៖ Spurs ត្រៀមលក្ខណៈរួចរាល់ក្នុងការប្រយុទ្ធជាមួយ Chelsea
លោក Mauricio Pochettino បានអះអាងថា ការដណ្តើមបានជ័យជម្នះដ៏សំខាន់របស់ក្រុម Tottenham ក្នុងលទ្ធផល ១-០ នៅលើទឹកដីក្រុម Crystal Palace បានបង្ហាញថា ពួកគេត្រៀមលក្ខណៈរួចរាល់ក្នុងការដណ្តើមយកឱកាសភ្លាមៗ ប្រសិនបើក្រុម Chelsea ភ្លាត់ស្នៀតក្នុងការប្រជែងពាន។
ក្រុមរបស់លោក Pochettino បានកាត់បន្ថយគំលាតដេញតាមពីក្រោយក្រុមតោខៀវ Chelsea ឲ្យនៅត្រឹម៤ពិន្ទុ ខណៈនៅសល់៥ប្រកួតទៀត ក្រោយពីគ្រាប់បាល់ស៊ុតបញ្ចូលទីយ៉ាងល្អនៅជិតបញ្ចប់ការប្រកួតរបស់ខ្សែបម្រើ Christian Eriksen បានជួយឲ្យពួកគេដណ្តើមបានជ័យជម្នះដ៏សំខាន់នៅកីឡដ្ឋាន Selhurst Park កាលពីថ្ងៃពុធ។ ក្រុមមាន់ខ្នាយមាស Spurs ហាក់បានជួបការលំបាកក្នុងការបំភ្លេចការខកចិត្តរបស់ពួកគេពីការធ្លាក់ចេញពីយុទ្ធនាការដណ្តើមពាន FA Cup វគ្គពាក់កណ្តាលផ្តាច់ព្រ័ត្រ កាលពីសប្តាហ៍មុន ក្រោមស្នាដៃក្រុម Chelsea ខណៈដែល Tottenham ស្ទើរតែបានខ្ជះខ្ជាយឱកាសក្នុងការរក្សាការដាក់សម្ពាធលើ Chelsea ទៅហើយ នៅមុនពេលធ្វើការស្រោចស្រង់វិញ។ ក្រុម Tottenham ហាក់ដូចជាស្ថិតក្រោមសម្ពាធដូចកាលពីរដូវកាលមុនដែរ ដែលនៅពេលនោះពួកគេបានអនុញ្ញាតឲ្យក្រុម Leicester ឈ្នះពាន ក្រោយពីផ្តល់ការប្រជែងដល់ពួកគេក្នុងរយៈពេលដ៏ខ្លី។
ប៉ុន្តែ លោក Pochettino ជឿជាក់ថា ស្មារតីប្រយុទ្ធដែលក្រុមរបស់លោកបានបង្ហាញដើម្បីផ្តួលក្រុមឡើងទម្រង់លេង Crystal កំពុងតែធ្វើឲ្យពួកគេមានឱកាសជាច្រើនក្នុងការឈ្នះពានជាលើកទី១ បើគិតចាប់តាំងពីឆ្នាំ១៩៦១។ លោក Pochettino បានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»៕
ទស្សនាវីដេអូ Highlights៖

ប្រភពពី: Worldsoccertalk
April 27, 2017
លោក Klopp អំពាវនាវឲ្យកីឡាករមិនឲ្យបោះបង់ក្តីសង្ឃឹមក្នុង Champions League ទោះចាញ់ Crystal
លោក Jurgen Klopp គ្រូបង្វឹករបស់ Liverpool បានសន្យាថា នឹងប្រយុទ្ធរហូតដល់ទីបញ្ចប់ បើទោះបីក្រុមហង្សក្រហមរបស់លោក បានរងបរាជ័យយ៉ាងអាម៉ាស់ក្នុងលទ្ធផល ២-១ ក្នុងផ្ទះខ្លួនឯងនៅពេលប្រកួតជាមួយនឹងក្រុម Crystal Palace ក្នុងក្របខ័ណ្ឌកាលពីថ្ងៃអាទិត្យក៏ដោយ។
ក្រុម Manchester United បានដាក់សម្ពាធទៅលើក្រុម Liverpool រួចជាស្រេច ខណៈដែល ប្រយុទ្ធ Anthony Martial បានឆ្លើយតបយ៉ាងវិជ្ជមានចំពោះការរិះគន់របស់លោក Jose Mourinho តាមរយៈការស៊ុតបាល់បញ្ចូលទី១គ្រាប់ និងជួយឲ្យខ្សែប្រយុទ្ធ Wayne Rooney រកបានគ្រាប់បាល់ទី២ដើម្បីផ្តួលក្រុម Burnley ២-០ និងដើម្បីជួយឲ្យក្រុមខ្លួនឡើងទៅឈរក្នុងចំណាត់ថ្នាក់លេខ៥ ដោយដេញតាមពីក្រោយក្រុម Manchester City មួយពិន្ទុ។ ហេតុនេះ ក្រុម Liverpool កំពុងតែមានការព្រួយបារម្ភយ៉ាងខ្លាំងអំពីការអវត្តមានក្នុងក្របខ័ណ្ឌ Champions League នារដូវកាលក្រោយ ខណៈដែលពួកគេនាំមុខត្រឹមតែ២ពិន្ទុប៉ុណ្ណោះពីលើក្រុម Man United ដែលនៅសល់២ប្រកួតនៅក្នុងដៃរបស់ពួកគេ។
ប៉ុន្តែ ទោះបីជាយ៉ាងណា លោក Klopp បានដាក់ចេញនូវការអំពាវនាវដល់អ្នកគាំទ្រ និងកីឡាកររបស់លោក មិនឲ្យបោះបង់ក្តីសង្ឃឹមទៅលើការប្រជែងយកកៅអីក្នុងក្របខ័ណ្ឌ Champions League។ លោក Klopp បានប្រាប់សារព័ត៌មាន BBC ថា៖ «វាពិតជាលទ្ធផលដ៏ខកចិត្ត។ គ្រប់គ្នាគិតថា Champions League បានធ្លាក់ចេញពីដៃរបស់ពួកគេ ប៉ុន្តែ យើងមានរយៈពេល១ខែទៀត ក្នុងការធ្វើឲ្យមានភាពវិជ្ជមានឡើងវិញ»៕
ប្រភពព័ត៌មាន៖ The Mirror
April 24, 2017