Tag: Cristiano Ronaldo

  • Cristiano Ronaldo ប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក

    Cristiano Ronaldo ប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក

    តាមរយៈសារព័ត៌មាន Sanook ដែលចេញផ្សាយនៅពេលមុននេះបន្ដិច បានឱ្យដឹងថា បន្ទាប់ពីសម្រេចចិត្តចុះកិច្ចកុងត្រារយៈពេល 4 ឆ្នាំជាមួយ Juventus ជាក្រុមលំដាប់ប្រចាំ កាល់សូ Serie A ប្រទេសអ៊ីតាលី និងជាការបិទទំព័រ 9 ឆ្នាំក្នុងព័ណ៌អាវ Real Madrid នោះ នៅទីបំផុតកីឡាករ Cristiano Ronaldo ដែលជាអាយដលក្រុមជម្រើសជាតិព័រទុយហ្គាល់ បានប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក ។

    នៅក្នុងភូមិគ្រិះមួយនេះ មានបន្ទប់គេងចំនួន 7 បន្ទប់ទឹកចំនួន 8 ដូចដែលកីឡាកររូបនេះបានបង្ហោះនៅលើបណ្ដាញសង្គមអ៊ីនស្ដាក្រាម ដែលមានអ្នកតាមដានលោកដល់ទៅ 136 លាននាក់។ គួរបញ្ជាក់ដែរថា នៅផ្នែកខាងក្រៅមានកន្លែងហាត់ប្រាណផ្ទាល់ខ្លួនដ៏ធំដូចវិមានមួយ មានតារាងបាល់ទាត់ធំមួយ អាងហែលទឹកដ៏ប្រណីត និងមានកន្លែងងូតទឹកយ៉ាងមានផាសុខភាពតែម្ដង។ ក្រៅពីនោះ ក៏មានការរចនាម៉ូដបន្ទប់ និងទីតាំងផ្សេងៗទៀត ស្របតាមចំណង់ចំណូលចិត្តអ្នកស្រឡាញ់កីឡាបាល់ទាត់ផងដែរ។

    ដើម្បីឱ្យកាន់តែជាក់ច្បាស់ សូមទស្សនារូបភាពនៅក្នុងភូមិគ្រិះដ៏ធំស្កឹមស្កៃរបស់លោក Cristiano Ronaldo ខាងក្រោមនេះ៖

  • លោក Zidane បង្ហើបថា Ronaldo នឹងចូលលេងពេលប៉ះ Man Utd យប់នេះ

    លោក Zidane បង្ហើបថា Ronaldo នឹងចូលលេងពេលប៉ះ Man Utd យប់នេះ

    លោក Zinedine Zidane គ្រូបង្វឹករបស់ក្រុម Real Madrid បានបញ្ជាក់ថា ខ្សែប្រយុទ្ធ Cristiano Ronaldo នឹងចូលលេងក្នុងការប្រកួតដណ្តើមពាន UEFA Super Cup ជាមួយនឹងក្រុម Manchester United ក្រោយពីបានធ្វើដំណើររួមជាមួយនឹងក្រុមរបស់លោកទៅកាន់ទីក្រុង Skopje កាលពីថ្ងៃចន្ទ។

    Ronaldo ត្រូវបានបញ្ចូលឈ្មោះទៅក្នុងក្រុមរបស់ម្ចាស់ជើងឯកក្របខ័ណ្ឌកំពូលអឺរ៉ុបមួយនេះបែបមិននឹកស្មានដល់សម្រាប់ការប្រកួតនៅរាត្រីនេះ ក្នុងរដ្ឋធានីរបស់ប្រទេសម៉ាសេដ្វាន ក្រោយពីទើបតែបានវិលទៅធ្វើការហ្វឹកហាត់វិញជាមួយនឹងក្លិបរបស់គេកាលពីចុងសប្តាហ៍មុននេះ។


    រដូវក្តៅរបស់គេបានស្ថិតក្នុងរឿងអាស្រូវដោយសារតែការចោទប្រកាន់ទាក់ទងនឹងការបន្លំការបង់ពន្ធក្នុងប្រទេសអេស្ប៉ាញដែលនាំឲ្យរូបគេត្រូវធ្វើការបង្ហាញខ្លួនក្នុងតុលាការកាលពីសប្តាហ៍មុន និងបង្កើតឲ្យមានពាក្យចចាមអារ៉ាមផ្សេងៗ ជុំវិញអនាគតរបស់គេ។ បើយោងតាមរបាយការណ៍មួយពីស្ថានីយវិទ្យុរបស់អេស្ប៉ាញ Cadena Ser កីឡាករ Ronaldo បានប្រាប់តុលាការថា រូបគេចង់វិលទៅកាន់ប្រទេសអង់គ្លេសវិញ ដោយសារតែបញ្ហានៃការបង់ពន្ធក្នុងប្រទេសអេស្ប៉ាញ។


    កីឡាករឆ្នើមប្រចាំឆ្នាំរបស់ពិភពលោករូបនេះ ត្រូវបានអនុញ្ញាតឲ្យបន្តសម្រាកវិស្សមកាលនៅរដូវក្តៅនេះ ក្រោយពីលេងឲ្យក្រុមបាល់ទាត់ជម្រើសជាតិព័រទុយហ្គាល់ក្នុងយុទ្ធនាការ Confederations Cup ក្នុងប្រទេសរុស្ស៊ីរួចមក។ ប៉ុន្តែ បើទោះបីជាបែបនោះក៏ដោយ ក៏លោក Zidane បានឲ្យដឹងថា៖ «មានរឿងជាច្រើនដែលកំពុងតែកើតឡើង និងមានសំឡេងរំខានជាច្រើនកើតឡើងជុំវិញរូបគេ ប៉ុន្តែរូបគេមិនមានបញ្ហាអ្វីឡើយ»។

    ការបង្ហាញខ្លួនជាលើកចុងក្រោយរបស់ Ronaldo សម្រាប់ក្លិបនេះ បានកើតឡើងកាលពីដើមខែមិថុនានៅពេលដែលរូបគេបានស៊ុតបាល់បញ្ចូលទី2គ្រាប់ធ្វើឱ្យក្រុមរបស់ខ្លួនទទួលជ័យជម្នះ 4-1 លើក្រុម Juventus ក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ កាលពីដើមខែមិថុនា ខណៈដែល Real Madrid បានការពារពានរបស់ខ្លួនយ៉ាងជោគជ័យ។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕
    ប្រភពពី៖ The Daily Star

  • ញាក់សាច់! Ronaldo សម្ញែងយន្តហោះឯកជន ក្រោយពីប្រកាសថា មិត្តស្រីរបស់ខ្លួនមានផ្ទៃពោះ

    ញាក់សាច់! Ronaldo សម្ញែងយន្តហោះឯកជន ក្រោយពីប្រកាសថា មិត្តស្រីរបស់ខ្លួនមានផ្ទៃពោះ

    ខ្សែប្រយុទ្ធ Cristiano Ronaldo បន្តរស់នៅក្នុងជីវិតបែបទំនើបរបស់គេ ខណៈដែលវាគ្មានអ្វីត្រូវភ្ញាក់ផ្អើលឡើយនៅពេលឃើញរូបគេឈរក្បែរយន្តហោះឯកជនរបស់ក្រុមហ៊ុន Nike នោះ។ ខ្សែប្រយុទ្ធដ៏ឆ្នើមវ័យ32ឆ្នាំរូបនេះកំពុងតែសម្រាកលំហែពីដំណើរប្រកួតរបស់ក្លិប Real Madrid ទៅកាន់ទីក្រុង Los Angeles ក្រោយពីបានជួយឲ្យក្រុមបាល់ទាត់ជម្រើសជាតិព័រទុយហ្គាល់របស់គេឈានទៅដល់វគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍ Confederations Cup នៅប្រទេសរុស្ស៊ី។

    ក្រុមហ៊ុន Nike មានយន្តហោះឯកជនផ្ទាល់ខ្លួនរបស់ពួកគេដែលមានមូលដ្ឋានទៅរដ្ឋ Oregon និងត្រូវបានប្រើប្រាស់ដើម្បីដឹកជញ្ជូនមនុស្សសំខាន់ៗទូទាំងពិភពលោក។ ហេតុនេះ Ronaldo ក៏ជាសមាជិកម្នាក់របស់ពួកគេផងដែរ។ រូបគេនៅសល់រយៈពេលជាច្រើនសប្តាហ៍ទៀតដើម្បីសម្រាកលំហែ ខណៈដែល Ronaldo មិនតម្រូវឲ្យធ្វើការបង្ហាញខ្លួននៅឯក្លិប Real Madrid ឡើយរហូតដល់ចុងខែនេះ។ ក្រោយពីបានក្លាយជាឪពុករបស់កូនប្រុសវ័យ7ឆ្នាំឈ្មោះថា Cristiano Ronaldo Jr កីឡាករ Ronaldo កាលពីពេលថ្មីៗនេះ បានស្វាគមន៍កូនភ្លោះដែលមានឈ្មោះថា Eva និង Mateo ក្រោយពីម្តាយពពោះជំនួសបានផ្តល់កំណើតដល់ពួកគេនៅក្នុងប្រទេសសហរដ្ឋអាមេរិក។ Ronaldo បានទទួលស្គាល់ថា កូនៗដែលទើបតែកើតរបស់គេ ពិតជាមានតម្លៃណាស់ ហើយថា រូបគេមានរឿងជាច្រើនដែលត្រូវរៀនសូត្រ ដូចជាពេលផ្លាស់ប្តូរខោទឹកនោមឱ្យកូនៗជាដើម៕
    ប្រភពព័ត៌មាន៖ The Sun

  • ព័រទុយហ្គាល់ ត្រៀមផ្តល់ការខកចិត្តដល់ស៊ីលី ក្នុង Confed Cup រាត្រីនេះ

    ព័រទុយហ្គាល់ ត្រៀមផ្តល់ការខកចិត្តដល់ស៊ីលី ក្នុង Confed Cup រាត្រីនេះ

    ក្រុមបាល់ទាត់ជម្រើសជាតិព័រទុយហ្គាល់របស់តារាឆ្នើម Cristiano Ronaldo នឹងសម្លឹងរកការផ្តល់នូវការខកចិត្តមួយដល់ក្រុមជម្រើសជាតិស៊ីលី នៅពេលដែលក្រុមទាំងពីរជួបគ្នាក្នុងការប្រកួតវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Confederations Cup នៅរាត្រីនេះ។

    ក្រុមជម្រើសជាតិព័រទុយហ្គាល់ ដែលជាម្ចាស់ជើងឯក Euro ឆ្នាំ2016 បានបញ្ចប់ក្នុងចំណាត់ថ្នាក់លេខ1ក្នុងពូល A ដើម្បីឈានទៅជួបក្រុមម្ចាស់ជើងឯក Copa America ស៊ីលី ដែលបានបញ្ចប់ក្នុងចំណាត់ថ្នាក់លេខ2 ក្នុងពូល B ក្រោយពីបានបញ្ចប់ក្នុងលទ្ធផលស្មើ 1-1 នៅពេលប្រកួតជាមួយនឹងក្រុមជម្រើសជាតិអូស្ត្រាលី និងអាល្លឺម៉ង់។ ក្រុមព័រទុយហ្គាល់របស់លោក Fernando Santos បានដណ្តើមចំណាត់ថ្នាក់លេខ1ក្នុងពូល ក្រោយពីបានបំបាក់ក្រុមនូវែលសេឡង់យ៉ាងចាស់ដៃក្នុងលទ្ធផល 4-0 ក្នុងការប្រកួតចុងក្រោយក្នុងពូលរបស់ពួកគេ។

    ក្នុងការប្រកួតវគ្គចែកពូល ស៊ីលី ដណ្តើមបានជ័យជម្នះតែ1លើកគត់ ពោលគឺនៅពេលប្រកួតជាមួយនឹងក្រុមជម្រើសជាតិកាមេរូន ដោយបានយកឈ្នះក្នុងលទ្ធផល 1-0 ខណៈដែលព័រទុយហ្គាល់ បានកត់ត្រាជ័យជម្នះ2លើក និងស្មើ1លើក។ ជាមួយគ្នានេះដែរ Ronaldo បានបញ្ជាក់ថា រូបគេ និងមិត្តរួមក្រុមនៃក្រុមបាល់ទាត់ជម្រើសជាតិរបស់គេ ត្រៀមលក្ខណៈរួចរាល់ហើយសម្រាប់ការប្រកួតព្រឹត្តិការណ៍ Confederations Cup វគ្គពាក់កណ្តាលផ្តាច់ព្រ័ត្រនេះ។ តារាឆ្នើមរបស់ក្លិប Real Madrid រូបនេះកំពុងតែស្ថិតក្នុងទម្រង់លេងយ៉ាងល្អឥតខ្ចោះក្នុងប្រទេសរុស្ស៊ី ដោយរូបគេបានជាប់ជាកីឡាករឆ្នើមប្រចាំរៀងរាល់ការប្រកួតក្នុងវគ្គចែកពូលទាំង3លើក ក្រោយពីបានស៊ុតបាល់បញ្ចូលទី2គ្រាប់ និងជួយឲ្យមិត្តរួមក្រុមរកបាន1គ្រាប់ផ្សេងទៀត។

    ទោះបីជាយ៉ាងណា ក្រុមជម្រើសជាតិស៊ីលីក៏មានផែនការក្នុងការរារាំង Ronaldo និងក្រុមព័រទុយហ្គាល់ក្នុងការប្រកួតវគ្គពាក់កណ្តាលផ្តាច់ព្រ័ត្រនៅថ្ងៃពុធនេះដែរ។ ខ្សែបម្រើអន្តរជាតិស៊ីលី Marcelo Diaz ដែលធ្លាប់បានប្រកួតជាមួយនឹង Ronaldo នៅក្នុងក្រុមអេស្ប៉ាញរបស់គេគឺ Celta Vigo បានប្រាប់អ្នកយកព័ត៌មានក្នុងសន្និសីទសារព័ត៌មានកាលពីថ្ងៃអង្គារថា៖ «យើងទាំងអស់គ្នាដឹងហើយថា រូបគេជាកីឡាករដ៏អស្ចារ្យម្នាក់។ ហេតុនេះរឿងដែលសំខាន់បំផុតគឺការរារាំងតារាឆ្នើមរូបនោះកុំឲ្យគ្រប់គ្រងបាល់ និងស៊ុតបាល់បញ្ចូលទីបាន»។  ការប្រកួតនេះនឹងចាប់ផ្តើមនៅម៉ោង1រំលងអធ្រាត្រ៕
    ប្រភពពី៖ The Guardian

  • Ronaldo ជួយព័រទុយហ្គាល់ ផ្តួលរុស្ស៊ី ឯម៉ិកស៊ិកទម្លាក់នូវែលសេឡង់

    Ronaldo ជួយព័រទុយហ្គាល់ ផ្តួលរុស្ស៊ី ឯម៉ិកស៊ិកទម្លាក់នូវែលសេឡង់

    ខ្សែប្រយុទ្ធ Cristiano Ronaldo បានបញ្ជាក់ថា ក្រុមបាល់ទាត់ជម្រើសជាតិព័រទុយហ្គាល់ ពិតជាស័ក្តិសមក្នុងការទទួលបានជ័យជម្នះ ក្រោយពីបានរកគ្រាប់បាល់បញ្ចូលទីជាលើកដំបូងរបស់គេក្នុងព្រឹត្តិការណ៍ Confederations Cup ដើម្បីជួយឲ្យប្រទេសរបស់គេទទួលបានជ័យជម្នះក្នុងលទ្ធផល 1-0 លើក្រុមម្ចាស់ផ្ទះរុស្ស៊ី កាលពីថ្ងៃពុធ។

    តារាឆ្នើមរបស់ក្លិប Real Madrid រូបនេះបានជម្នះលើរឿងអាស្រូវទាក់ទងនឹងបញ្ហាបន្លំបង់ពន្ធ ដែលកំពុងក្លាយជាដុំពពកខ្មៅជុំវិញអនាគតរបស់គេ តាមរយៈការរកគ្រាប់បាល់បញ្ចូលទីតែមួយគ្រាប់គត់ក្នុងការប្រកួតនៅទីក្រុងម៉ូស្គូនៅនាទីទី8 ដើម្បីជួយឲ្យក្រុមម្ចាស់ជើងឯក Euro ឆ្នាំ2016 របស់គេ ឡើងទៅឈរពីលើរុស្ស៊ីក្នុងពូល A។

    Ronaldo បាននិយាយថា៖ «យើងពិតជារីករាយណាស់។ វាជាលើកទីមួយហើយដែលក្រុមជម្រើសជាតិព័រទុយហ្គាល់បានទទួលជ័យជម្នះនៅរុស្ស៊ី។ ក្រុមយើងលេងបានយ៉ាងល្អនៅពេលដែលត្រូវប្រកួតជាមួយនឹងក្រុមមួយដែលលេងដោយមានការគាំទ្រយ៉ាងកងរំពងពីអ្នកគាំទ្រក្រុមម្ចាស់ផ្ទះ។ ប៉ុន្តែ យើងលេងបានល្អជាង ហើយយើងមានឱកាសច្រើនជាង»។

    ខ្សែប្រយុទ្ធវ័យ 32ឆ្នាំ ដែលជាប់ឈ្មោះជាកីឡាករឆ្នើមប្រចាំការប្រកួតជាលើកទី2ក្នុងយុទ្ធនាការនេះរូបនេះ បានបន្ថែមទៀតថា៖ «យើងបានទទួលជ័យជម្នះ។ យើងទទួលបាន4ពិន្ទុ ហើយយើងត្រូវតែអបអរដល់ក្រុមរបស់យើង»។ ស្របពេលជាមួយគ្នានេះដែរ ក្រុមជម្រើសជាតិម៉ិកស៊ិក បានផ្តួលក្រុមជម្រើសជាតិនូវែលសេឡង់ ទាំងប្រផិតប្រផើយក្នុងលទ្ធផល 2-1 ក្នុងការប្រកួតមួយគូផ្សេងទៀតក្នុងពូល A ដូចគ្នា កាលពីយប់ថ្ងៃដដែល។ លទ្ធផលចាញ់នេះ បានធ្វើឲ្យនូវែលសេឡង់ ក្លាយជាក្រុមដំបូងគេដែលត្រូវធ្លាក់ចេញពីយុទ្ធនាការ Confederations Cup ឆ្នាំ2017នេះ។

    ក្រុមជម្រើសជាតិព័រទុយហ្គាល់ បានបញ្ជាក់នៅមុនពេលការប្រកួតនេះថា ប្រធានក្រុម (Ronaldo )របស់ពួកគេកំពុងតែផ្តោតអារម្មណ៍តែទៅលើការប្រកួតលើទីលានក្នុងប្រទេសរុស្ស៊ីប៉ុណ្ណោះ បើទោះបីមានការលើកឡើងផ្សេងៗជុំវិញអនាគតរបស់គាត់នៅឯក្លិប Real Madrid យ៉ាងណាក្តី។ Ronaldo ត្រូវបានចោទប្រកាន់ដោយក្រុមអាជ្ញាធរអេស្ប៉ាញពីបទបន្លំមិនបង់ពន្ធក្នុងទឹកប្រាក់ 14.7លានអឺរ៉ូ (ស្មើនឹង16.5លានដុល្លារអាមេរិក) និងត្រូវបានកោះហៅឲ្យធ្វើការបង្ហាញខ្លួនក្នុងតុលាការនៅចុងខែក្រោយនេះនៅទីក្រុងម៉ាឌ្រីដ៕
    ប្រភពពី៖ Sky Sport24

     

  • ប្រធានក្លិប Real ថា Ronaldo អាចទៅបាន បើ Man Utd ហ៊ានឲ្យ 880លានផោន

    ប្រធានក្លិប Real ថា Ronaldo អាចទៅបាន បើ Man Utd ហ៊ានឲ្យ 880លានផោន

    លោក Florentino Perez បានបញ្ជាក់ថា ខ្សែប្រយុទ្ធ Cristiano Ronaldo មានសេរីភាពក្នុងការចាកចេញពីក្លិប Real Madrid ប្រសិនបើក្លិបមួយណាហ៊ានចំណាយប្រាក់សម្រាប់ការរំលាយកិច្ចសន្យារបស់គេក្នុងទឹកប្រាក់ 880លានផោន (ស្មើនឹង1,120លានដុល្លារអាមេរិក)។

    ម្ចាស់ពានរង្វាន់បាល់មាស Ballon d’Or 4សម័យកាល Cristiano Ronaldo ត្រូវបានគេជឿជាក់ថា ចង់ចាកចេញពីកីឡដ្ឋាន Bernabeu ក្រោយពីជួបរឿងរ៉ាវដ៏ខកចិត្តក្នុងប្រទេសអេស្ប៉ាញ។

    ក្នុងពេលផ្តល់សម្ភាសជាលើកទី1 បើគិតចាប់តាំងពីពេលផ្ទុះព័ត៌មានថា Ronaldo ចង់ចាកចេញពី Real មក លោក Perez បានប្រាប់វិទ្យុអេស្ប៉ាញ Onda Cero ថា៖ «ខ្ញុំមិនបាននិយាយជាមួយ Cristiano ចាប់តាំងពីការប្រកួតក្របខ័ណ្ឌ Champions League វគ្គផ្តាច់ព្រ័ត្រមកម្ល៉េះ ហើយខ្ញុំបានឮពាក្យចចាមអារ៉ាមជាច្រើនតាមរយៈបណ្តាញសារព័ត៌មាននានា ប៉ុន្តែកិច្ចសន្យារបស់គេគឺមានទឹកប្រាក់ 880លានផោន ហេតុនេះ ប្រសិនបើមិនមានក្លិបណា ត្រៀមដើម្បីចំណាយក្នុងចំនួននេះទេនោះ រូបគេនឹងមិនចាកចេញឡើយ»។

    លោក Perez ដែលត្រូវបានបោះឆ្នោតឲ្យជាប់ជាប្រធានក្លិប Real Madrid ក្នុងអាណត្តិថ្មីនេះ បានបញ្ជាក់ថា លោកមានបំណងដោះស្រាយស្ថានការណ៍ជាមួយនឹង Ronaldo។

    ខ្សែប្រយុទ្ធវ័យ 32ឆ្នាំរូបនេះ ត្រូវបានចោទប្រកាន់ពីបទបន្លំការបង់ពន្ធរបស់រដ្ឋាភិបាលអេស្ប៉ាញ ក្នុងទឹកប្រាក់ 13លានផោន ហើយរូបគេបានបង្ហាញនូវការមិនពេញចិត្តចំពោះការខ្វះនូវការការពារពីសំណាក់ក្លិបរបស់គេ៕
    ប្រភពពី៖ The Sun

     

  • Ronaldo ជួយឲ្យព័រទុយហ្គាល់ឈ្នះ ខណៈបារាំង ចាញ់ស៊ុយអែតយ៉ាងនឹកស្មានមិនដល់

    Ronaldo ជួយឲ្យព័រទុយហ្គាល់ឈ្នះ ខណៈបារាំង ចាញ់ស៊ុយអែតយ៉ាងនឹកស្មានមិនដល់

    ក្រុមបាល់ទាត់ជម្រើសជាតិបារាំង បានធ្វើឲ្យយុទ្ធនាការនៃការប្រជែងយកសិទ្ធិជាស្វ័យប្រវត្តិទៅប្រកួតក្នុងព្រឹត្តិការណ៍ World Cup នាឆ្នាំក្រោយក្នុងប្រទេសរុស្ស៊ី របស់ពួកគេមានភាពស្មុគស្មាញ ក្រោយពីបានរងបរាជ័យដ៏មិននឹកស្មានដល់ក្នុងលទ្ធផល 2-1 នៅលើទឹកដីក្រុមជម្រើសជាតិស៊ុយអែត កាលពីថ្ងៃសុក្រ។

    ក្រុមជម្រើសជាតិស៊ុយអែត ដណ្តើមបានជ័យជម្នះដ៏មិននឹកស្មានដល់នេះ តាមរយៈគ្រាប់បាល់ស៊ុតបញ្ចូលទីរបស់កីឡាករ Ola Toivonen នៅនាទីបន្ថែម ក្រោយពីការទាត់បាល់ចេញមិនបានល្អរបស់អ្នកចាំទីអន្តរជាតិបារាំង Hugo Lloris។ គ្រាប់បាល់ឈ្នះនេះ បានធ្វើឲ្យអ្នកគាំទ្រនៃក្រុមម្ចាស់ផ្ទះក្នុងទីក្រុង Stockholm ធ្វើការអបអរសាទរយ៉ាងខ្លាំងក្លា ហើយកាន់តែសំខាន់ទៅទៀតនោះគឺថា គ្រាប់បាល់នេះបានជួយឲ្យក្រុមជម្រើសជាតិស៊ុយអែត មាន 13ពិន្ទុស្មើជាមួយនឹងក្រុមជម្រើសជាតិបារាំង ខណៈដែលនៅសល់ការប្រកួតតែ4លើកទៀតប៉ុណ្ណោះ។

    មានតែក្រុមឈរលេខ1នៅលើតារាងពូលប៉ុណ្ណោះ ដែលមានសិទ្ធិឈ្នះកៅអីទៅប្រកួតក្នុងព្រឹត្តិការណ៍ World Cup នៅឆ្នាំក្រោយ ក្នុងប្រទេសរុស្ស៊ី ខណៈក្រុមលេខ2 ដែលមានពិន្ទុល្អជាងគេបំផុតចំនួន8 ក្រុម នឹងត្រូវធ្វើការប្រកួតវគ្គ Playoff។ ក្រុមបាល់ទាត់ជម្រើសជាតិបារាំង បច្ចុប្បន្ននឹងត្រូវលេងការប្រកួតដ៏សំខាន់នាថ្ងៃទី31 ខែសីហា ជាមួយនឹងក្រុមជម្រើសជាតិហូឡង់ ដែលកំពុងតែដេញតាមពីក្រោយ ក្រោយពីពួកគេបានយកឈ្នះលើក្រុមជម្រើសជាតិលុចសំបួ ក្នុងលទ្ធផល 5-0។

    ស្របពេលជាមួយគ្នានេះ ខ្សែប្រយុទ្ធ Cristiano Ronaldo បានជួយឲ្យក្រុមជម្រើសជាតិព័រទុយហ្គាល់ ដណ្តើមបានជ័យជម្នះក្នុងលទ្ធផល 3-0 លើក្រុមជម្រើសជាតិឡេតូនី កាលពីថ្ងៃសុក្រ៕
    ប្រភពព័ត៌មាន៖ Sports.yahoo

  • Real ទទួលការស្វាគមន៍ពីអ្នកគាំទ្រដ៏ច្រើនកុះករ ក្នុងក្បួនដង្ហែការឈ្នះពាន Champions League

    Real ទទួលការស្វាគមន៍ពីអ្នកគាំទ្រដ៏ច្រើនកុះករ ក្នុងក្បួនដង្ហែការឈ្នះពាន Champions League

    អ្នកគាំទ្ររាប់ពាន់នាក់របស់ក្លិប Real Madrid បានប្រមូលផ្តុំគ្នានៅតាមដងវិថីនានានៃរដ្ឋធានីអេស្ប៉ាញ ដើម្បីរង់ចាំទទួលវីរបុរសរបស់ពួកគេគឺ Cristiano Ronaldo និងមិត្តរួមក្រុមរបស់គេកាលពីថ្ងៃអាទិត្យ ខណៈដែលពួកគេបានដង្ហែការឈ្នះពានក្របខ័ណ្ឌ Champions League ជាលើកទី១២។

    Ronaldo បានលេងម៉ូតសក់ថ្មីរបស់ខ្លួន ហើយរូបគេ និងប្រធានក្រុម Sergio Ramos បានដឹកនាំកម្មវិធីហែក្បួនជាប្រពៃណីដើម្បីអបអរដល់ក្លិប Real ខណៈដែលកីឡាករទាំងអស់បានទទួលការស្វាគមន៍ពីសំណាក់ប្រធានប្រតិភូរបស់រដ្ឋាភិបាល នៅមុនពេលចាប់ផ្តើមធ្វើពិធីហែក្បួននៃការឈ្នះពានកំពូលអឺរ៉ុបនេះ នៅលើរថយន្តក្រុងដែលគ្មានដំបូលមួយគ្រឿងជុំវិញតំបន់ Cibeles នៃទីក្រុង Madrid។ រថយន្តក្រុងរបស់ Real បានធ្វើដំណើរឆ្ពោះទៅកាន់កីឡដ្ឋាន Santiago Bernabeu របស់ក្លិបនេះ ខណៈដែលអ្នកគាំទ្រប្រមាណជា៨១០០០នាក់កំពុងតែរង់ចាំទទួលពួកគេនៅកីឡដ្ឋាននោះ ដើម្បីធ្វើការអបអរ ក្នុងនោះរាប់បញ្ចូលទាំងការបង្ហាញពីភ្លើងពណ៌ និងការបាញ់កាំជ្រួចផងដែរ។ ការរឹតបន្តឹងផ្នែកសន្តិសុខត្រូវបានធ្វើឡើងក្នុងទីក្រុងនេះ ក្រោយពីមានការវាយប្រហារបែបភេរវកម្មកាលពីពេលថ្មីៗនេះក្នុងទីក្រុងឡុងដ៍ និងទីក្រុង Manchester។

    Ronaldo បានស៊ុតបាល់បញ្ចូលទី២គ្រាប់ក្នុងពេលដែលក្រុម Real Madrid ដណ្តើមបានជ័យជម្នះក្នុងលទ្ធផល ៤-១ លើក្រុម Juventus ក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff កាលពីថ្ងៃសៅរ៍ ខណៈដែលក្រុមយក្សរបស់អេស្ប៉ាញមួយនេះ បានក្លាយជាក្រុមដំបូងគេក្នុងការការពារពាន Champions League យ៉ាងជោគជ័យ។ លោក Florentino Perez ប្រធានក្លិប Real Madrid ដែលបានផ្តល់ការកោតសរសើរយ៉ាងពិសេសដល់លោក Zinedine Zidane នោះបានឲ្យដឹងថា៖ «កីឡាករទាំងអស់បានចូលក្នុងដំណាក់កាលដ៏អស្ចារ្យបំផុតរបស់ Real Madrid និងកីឡាបាល់ទាត់ ហើយគ្រូបង្វឹករបស់យើងក៏មានភាពអស្ចារ្យផងដែរ»៕


    ប្រភពពី៖ Daily Star

  •  Zidane ៖ Ronaldo នឹង​ជួយ​ឲ្យ Real លើក​ពាន Champions League ពេល​ប៉ះ Juventus រាត្រី​នេះ

     Zidane ៖ Ronaldo នឹង​ជួយ​ឲ្យ Real លើក​ពាន Champions League ពេល​ប៉ះ Juventus រាត្រី​នេះ

    លោក Zinedine Zidane ជឿ​ជាក់​ថា ភាព​ជា​អ្នក​ដឹក​នាំ​របស់​ខ្សែ​ប្រយុទ្ធ​ដ៏​​មាន​ឥទ្ធិ​ពល Cristiano Ronaldo នឹង​ក្លាយ​ជា​កត្តា​​កាត់​សេចក្តី​ដ៏សំខាន់ នៅពេល​ដែល​ក្រុម Real Madrid ចូលឆ្ពោះទៅរក​ការ​ប្រកួត​ប្រវត្តិ​សាស្ត្រ​ក្នុងវគ្គ​ផ្តាច់​ព្រ័ត្រ​នៃ​ក្រប​ខ័ណ្ឌ Champions League ជា​មួយ​នឹង​ក្រុម Juventus នៅ​រាត្រី​នេះ​។

    Ronaldo នឹង​ស្ថិតក្នុង​ការ​ចាប់​អារម្មណ៍​ ខណៈដែល​ក្រុម​របស់​លោក Zidane នឹង​ខិត​ខំព្យា​យាម​​​ធ្វើ​ឲ្យ​ក្លិបរបស់លោកក្លាយ​ជា​ក្លិប​ដំបូង​គេ​ក្នុង​​ការ​ឈ្នះ​ពាន​ក្រប​ខ័ណ្ឌ​កំពូល​អឺ​រ៉ុប​​២​លើក​ជាប់​ៗ​គ្នា ចាប់​តាំង​ពី​ក្លិប AC Milan ធ្លាប់ធ្វើ​បាន​សម្រេច​កាល​ពី​២៧​ឆ្នាំ​មុនម្តងរួចមកហើយ​។ បើ​ទោះ​បី​មនុស្ស​ជាច្រើន​បាន​រិះ​គន់​ទៅ​លើ​ Ronaldo សម្រាប់​ការ​បង្ហាញ​ពី​ទម្រង់​លេង​ដែល​គ្មានភាព​រស់​រវើក ក្នុង​ពេលដែល Real ឈ្នះ​លើការប្រកួត​ក្រប​ខ័ណ្ឌ Champions League វគ្គ​ផ្តាច់​ព្រ័ត្រ​លើ​ក្រុម Atletico Madrid ក៏​ដោយ ប៉ុន្តែ រូប​គេ​នៅ​តែ​បាន​ស៊ុត​បាល់​ប៉េ​ណាល់​ទី​​ចូល​ទី​យ៉ាង​​ល្អ​ក្នុង​ការ​ប្រកួត​កាល​ពី​​ឆ្នាំ​មុន ហើយ​ក៏​បាន​ស៊ុត​បាល់​បញ្ចូល​ទី​ក្នុង​ការ​ប្រកួត​វគ្គ​ផ្តាច់​ព្រ័ត្រ​កាល​ពីឆ្នាំ​២០១៤​ផងដែរ​។ Ronaldo បាន​ស្ថិត​ក្នុង​ទម្រង់​លេង​យ៉ាង​មុត​ស្រួច​ម្តង​ទៀត​ក្នុង​រដូវ​កាល​នេះ ដោយ​​រូប​គេ​បាន​បំពេញ​​ការរក​បាន​៤០០​គ្រាប់​សម្រាប់​ក្រុម Real ខណៈ​ដែលក្រុម​​របស់​គេ​បាន​ឈ្នះ​ពាន​ក្រប​ខ័ណ្ឌ​កំពូល​របស់អេ​ស្ប៉ាញជា​លើក​ទី​១​ក្នុង​រយៈ​ពេល​​៥​ឆ្នាំ​។ លោក Zidane ជឿ​ជាក់​ថា សុច្ឆន្ទៈ​នៃ​ការ​ស្រេក​ឃ្លាន​ជ័យ​ជម្នះ​របស់​ខ្សែ​ប្រយុទ្ធ​អន្តរ​ជាតិ​ព័រ​ទុយ​ហ្គាល់​​វ័យ​៣២​ឆ្នាំ​រូប​នេះ នឹង​ក្លាយ​ជា​កូន​សោ​សំខាន់ក្នុង​​ការ​ជួយ​ឲ្យ​​ក្រុម Real ទទួល​ជោគ​ជ័យ ពីព្រោះ​រូប​គេ​​មាន​កម្រិត​ស្តង់​ដារ​លេង​ដែល​មិត្ត​រួម​ក្រុម​របស់​គេ​ជឿ​ជាក់​ថា នឹង​​ក្លាយ​ជា​ជំនួយ​ដ៏ធំ​សម្រាប់​ក្រុម​​។

    លោក Zidane បាន​​ប្រាប់​សន្និ​សីទ​សារ​ព័ត៌​មាន​នៅ​​ឯ​កីឡដ្ឋាន Principality ក្នុង​ទីក្រុង Cardiff កាល​ពី​ថ្ងៃ​សុក្រ ថា៖ « Ronaldo ជា​មនុស្ស​ល្អ រូប​គេ​ព្រួយ​បារម្ភ​ពី​អ្នក​ដទៃ ហើយ​អ្វី​ដែល​​សំខាន់​នោះ​​គឺ​ថា រូប​គេ​មាន​ភាព​​ជាកីឡាករ​អាជីព​។ រូប​គេ​​កើត​មកគឺ​ដើម្បី​ធ្វើ​ជា​មេ​ដឹក​នាំ ជា​ពិសេស​នៅ​លើ​ទីលាន​តែម្តង។ អ្វី​ដែល​សំខាន់​បំផុត​នោះ​គឺ​ថា រូប​​គេ​ចង់​បាន​ជ័យ​ជម្នះ​»​។

    ការ​ប្រកួត​នេះ​នឹង​ចាប់​ផ្តើម​នៅម៉ោង​១:៤៥​ទៀប​ភ្លឺយប់នេះ​៕

     

     

  • Real រំពឹងអាចលើកពាន La Liga នៅថ្ងៃអាទិត្យនេះបើឈ្នះ Malaga

    Real រំពឹងអាចលើកពាន La Liga នៅថ្ងៃអាទិត្យនេះបើឈ្នះ Malaga

    ក្រុមយក្ស Real Madrid កំពុងតែត្រៀមលក្ខណៈរួចរាល់ក្នុងការលើកពានក្របខ័ណ្ឌ La Liga ជាលើកទី១របស់ពួកគេក្នុងរយៈពេល៥ឆ្នាំ នៅថ្ងៃអាទិត្យស្អែកនេះ ខណៈដែលក្រុមរបស់លោក Zinedine Zidane នេះកំពុងនាំមុខ៣ពិន្ទុដាច់លើក្រុម Barcelona នៅមុនពេលឈានដល់ថ្ងៃប្រកួតចុងក្រោយនៃរដូវកាលនេះ តែទាំងអស់នេះ Barca ត្រូវតែផ្តួលក្រុម Eibar ក្នុងផ្ទះខ្លួនឯងឱ្យបានជាមុនសិនដើម្បីទទួលបានឱកាសមួយ ក្នុងការលើកពានក្របខ័ណ្ឌកំពូលអេស្ប៉ាញជាលើកទី៣ជាប់ៗគ្នា មុននឹងលោក Luis Enrique ចាកចេញនៅកីឡដ្ឋាន Camp Nou នៅចុងរដូវកាលនេះ។

    ឯ Real វិញកំពុងស្ថិតក្នុងទម្រង់លេងយ៉ាងរឹងមាំ ខណៈកំពុងបោះជំហានឆ្ពោះទៅកាន់ការលើកពាន តាមរយៈការផ្តួលក្រុម Sevilla និង Celta Vigo ក្នុងលទ្ធផល ៤-១ ដូចគ្នា កាលពីសប្តាហ៍មុន ស្របពេលដែលខ្សែប្រយុទ្ធ Cristiano Ronaldo បានស៊ុតបាល់បញ្ចូលទី២គ្រាប់។ ក្រោយពីដណ្តើមបានជ័យជម្នះលើក្រុម Celta លោក Zidane បានធ្វើការព្រមានថា៖ «យើងត្រូវតែបន្តនូវអ្វីដែលយើងកំពុងតែធ្វើ ពីព្រោះការប្រកួតលីកនេះមិនទាន់បញ្ចប់នៅឡើយទេ»។ ប៉ុន្តែ ទោះបីជាយ៉ាងណា ក្រោយពីចាញ់ក្នុងការប្រកួតលីកត្រឹមតែ៣លើកនៅរដូវកាលនេះ វានឹងក្លាយជារឿងដ៏គួរឲ្យភ្ញាក់ផ្អើលមួយប្រសិនបើក្រុមស្ថិតក្នុងចំណាត់ថ្នាក់លេខ១១ Malaga បានផ្តល់ការខកចិត្តមួយទៀតដល់ក្រុម Real នៅដំណាក់កាលចុងក្រោយនោះ។

    ក្រុម Malaga ក៏កំពុងតែស្ថិតក្នុងទម្រង់លេងយ៉ាងល្អក្នុងក្របខ័ណ្ឌ La Liga នេះផងដែរ ក្រោយពីដណ្តើមបាន១៣ពិន្ទុពីការប្រកួត៥លើកចុងក្រោយរបស់ពួកគេ។ Malaga ក៏បានធ្វើឲ្យក្រុម Real ព្រួយបារម្ភផងដែរ ក្រោយពីបានផ្តួលក្រុម Barcelona ក្នុងលទ្ធផល ២-០ កាលពីខែមុន។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕
    ប្រភពពី៖ Daily Star