CP - La Reine Media

Ford Ranger ជាប់ជាជម្រើសរថយន្ត Pick-Up ដែលទទួលបានចំណាត់ថ្នាក់លេខ១ ប្រចាំឆ្នាំ២០២៣!

រថយន្ត Next-Generation Ford Ranger បានទទួលការផ្លាស់ប្តូររូបរាងថ្មីទាំងស្រុង និងរួមបញ្ចូលនូវបច្ចេកវិទ្យាចុងក្រោយដ៏ទំនើប និងឈានមុខគេរបស់ Ford ។មិនតែប៉ុណ្ណោះ រថយន្ត Next-Generation Ford Ranger ក៏មានជម្រើសជាច្រើនដូចជា Ford Ranger XL, Ford Ranger XLT, Ford Ranger Wildtrak, និងកំពូលរថយន្តFord Ranger Raptor សម្រាប់អតិថិជនជ្រើសរើស ដែលសមស្របទៅនឹងតម្រូវការរបស់អតិថិជនទាំងអស់ ដែលមានគោលបំណងចង់បានរថយន្ត Pick-UP ដែលរឹងមាំ មានផាសុកភាព និងសន្សំសំចៃខ្ពស់។ ដោយសារតែកត្តាទាំងនេះ ទើបនាំអោយរថយន្ត Next-Generation Ford Ranger ក្លាយជារថយន្ត Pick-Up លក់ដាច់បំផុត ប្រចាំឆ្នាំ២០២៣ នៅក្នុងទីផ្សារប្រទេសអូស្រ្តាលី ដោយយោងទៅតាមអត្រាការលក់ប្រចាំឆ្នាំរបស់ទីផ្សាររថយន្ត Pick-Up ទាំងមូល កាលពីថ្ងៃទី០៤ ខែមករា ឆ្នាំ២០២៤។

ចំណែកឯនៅប្រទេសកម្ពុជាវិញ រថយន្ត Next Generation Ford Ranger គឺជារថយន្តដែលជាប់ចំណាត់ថ្នាក់លេខ១ រយៈពេល ៥ ឆ្នាំជាប់គ្នាចាប់តាំងពីឆ្នាំ ២០១៩ មក រហូតមកដល់បច្ចុប្បន្ន គឺនៅតែជារថយន្តដែលកំពុងពេញនិយមបំផុត ដោយសារមានការផ្តល់នូវទំនុកចិត្តដល់អតិថិជន និងបច្ចេកវិទ្យាទំនើបលើសគេនៅក្នុងទីផ្សារព្រះរាជាណាចក្រកម្ពុជា។ លើសពីនេះទៅទៀត រថយន្ត Next Generation Ford Ranger ក៏បានគ្របដណ្តប់ទីផ្សាររថយន្ត Pick-Up ជាច្រើនប្រទេសនៅជុំវិញពិភពលោក ជាពិសេសទីផ្សារព្រះរាជាណាចក្រកម្ពុជា។ នេះក៏ដោយសារតែការគាំទ្រពីអតិថិជន និងទំនុកចិត្តទៅលើសមត្ថភាព និងប្រព័ន្ធសុវត្ថិភាពដ៏ទំនើបរបស់រថយន្ត ដោយហេតុនេះហើយទើបធ្វើអោយរថយន្ត Next Generation Ford Ranger ទទួលបាននូវការផ្តល់ចំណាត់ថ្នាក់ផ្កាយ៥ ពីកម្មវិធីវាយតំលៃរថយន្តថ្មីរបស់អូស្រ្តាលី និងនូវែលសេឡង់ (Australasian New Car Assessment Programme) ដែលក្រោមការរចនានៃគំនិតឆ្នៃប្រឌិត «Built Ford Tough» របស់សហរដ្ឋអាមេរិច ដើម្បីផ្តល់នូវទំនុកចិត្តដល់អតិថិជនប្រទេសអូស្រ្តាលី ក៏ដូចជាអតិថិជនជុំវិញពិភពលោកផងដែរ។

សម្រាប់ការទំនាក់ទំនងផ្នែកលក់ និង បើកបរសាកល្បងរថយន្ត Next Generation Ford Ranger សូមទំនាក់ទំនងទៅកាន់លេខទូរស័ព្ទ 078 333 748 និង 016 333 785។

ចង់ជ្រាបច្បាស់ ពីមូលហេតុដែលធ្វើអោយរថយន្ត Ford Ranger ទទួលបានការគាំទ្រ និងពេញនិយមនៅទីផ្សារប្រទេសកម្ពុជា សូមទស្សនាវីឌីអូនេះទាំងអស់គ្នា៖

April 2, 2024

ចិន ចាកផុតពីបញ្ហាបរិត្តផរណា ដែលជួយបន្ធូរបន្ថយសម្ពាធលើសេដ្ឋកិច្ច

ជាលើកដំបូងក្រោយរយៈពេលជិតកន្លះឆ្នាំ តម្លៃទំនំនិញប្រើប្រាស់នៅប្រទេសចិន បានកើនឡើងជាថ្មី ជួយឱ្យសេដ្ឋកិច្ចប្រទេសនេះចាកផុតពីបរិត្តផរណា។

កាលពីថ្ងៃទី 09 មីនា វិទ្យាស្ថានជាតិស្ថិតិចិន ប្រកាសទិន្នន័យឱ្យដឹងថា សន្ទស្សន៍ថ្លៃទំនិញ (CPI) ប្រទេសនេះ កើន 0.7% ក្នុងខែកុម្ភៈ។ នេះគឺជាលើកដំបូងក្នុងអំឡុងជិតកន្លះឆ្នាំ ដែល CPI ចិន កើនឡើង។

មុននោះ ប្រទេសចិនបានឃើញបរិត្តផរណាក្នុងរយៈពេល 4 ខែបន្តបន្ទាប់។ ខែមករា ឆ្នាំ 2024 CPI ចិន ធ្លាក់ចុះ 0.8% ដែលនេះគឺជាជាតួលេខធ្លាក់ចុះជ្រៅបំផុតក្នុងរង្វង់ 15 ឆ្នាំកន្លង។

បរិត្តផរណា (ពាក្យអង់គ្លេសថា Deflation) គឺជាពាក្យសំដៅទៅលើការធ្លាក់ថ្លៃជារួមរបស់ទំនិញ និងសេវាកម្ម។ បរិត្តផរណា គឺជាការដកចំនួនរូបិយវត្ថុមួយភាគ ចេញពីទីផ្សារដែលលើសចំនួនត្រូវការចរាចរណ៍របស់សាច់ប្រាក់ ដើម្បីធ្វើឲ្យចំនួនរូបិយវត្ថុសមាមាត្រនឹងតម្រូវការចាំបាច់សម្រាប់ចរាចរណ៍។ នេះមិនមែនជាប្រការល្អសម្រាប់សេដ្ឋកិច្ចឡើយ ព្រោះថា នៅពេលអ្នកប្រើប្រាស់ និងក្រុមហ៊ុននានាពន្យារពេលលើការផ្អាកការចំណាយដើម្បីរង់ចាំទំនិញ ឬសេវាកម្មធ្លាក់ថ្លៃបន្ថែមទៀត សកម្មភាពសេដ្ឋកិច្ចនឹងត្រូវរឹតត្បិត។

ធៀបនឹងខែមុន CPI ចិន ក្នុងខែកុម្ភៈបានកើន 1%។ ល្បឿននេះខ្ពស់ជាងការព្យាកររបស់ក្រុមអ្នកសេដ្ឋកិច្ចដែលត្រូវបានចុះផ្សាយដោយ Reuters។

តួលេខថ្មីបំផុតនេះបានបន្ថយសម្ពាធមួយផ្នែកសម្រាប់សេដ្ឋកិច្ចចិន នៅក្នុងស្ថានភាពតម្រូវការក្នុងស្រុកធ្លាក់ចុះ អចលនទ្រព្យមិនទាន់ចាកផុតពីវិបត្តិ និងបំណុលរបស់រដ្ឋនៅតែស្ថិតក្នុងកម្រិតខ្ពស់៕

March 10, 2024

នាវាទេសចរណ៍ខ្នាតធំដែលធ្លាប់ទទួលបានជំនួយពីកម្ពុជាក្នុងសម័យកូវីដ បានត្រឡប់មកជាថ្មី

(ខេត្តព្រះសីហនុ) – នាវាទេសចរណ៍ខ្នាតធំ Westerdam នាថ្ងៃទី 28 ធ្នូ 2023 នេះ ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុ ដើម្បីឱ្យភ្ញៀវនៅលើនាវានេះឡើងមកកម្សាន្តនៅក្នុងខេត្តព្រះសីហនុ និងខេត្តកែប។ នេះបើតាមទំព័រ CPP។

នេះគឺជាការចូលចតជាលើកទីពីររបស់នាវាទេសចរណ៍ Westerdam នៅកំពង់ផែរបស់កម្ពុជា បន្ទាប់ពីការចូលចតលើកទីមួយកាលពីឆ្នាំ 2020 ជាពេលដែលពិភពលោកកំពុងប្រឈមនឹងវិបត្តិសុខភាព និងជាពេលដែលនាវានេះត្រូវបានប្រទេសជាច្រើនបដិសេធការស្នើសូមចូលចត។

ការចូលចតជាលើកទីពីរដែលធ្វើឡើងនៅថ្ងៃទី 28 ខែធ្នូ ឆ្នាំ 2023 របស់ Westerdam គឺមានភ្ញៀវទេសចរណ៍ជាងពីរពាន់នាក់។ ដំណើរចូលចតជាថ្មីនេះ ត្រូវបានក្រសួងទេសចរណ៍ សហការជាមួយរដ្ឋបាលខេត្តព្រះសីហនុ រៀបចំពិធីទទួល ក៏ដូចជារំលឹកខួបបីឆ្នាំនៃការស្នើសូមចូលចតរបស់នាវា Westerdam នៅកម្ពុជា។

យោងតាមឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងចំណោមភ្ញៀវជាងពីរពាន់នាក់នៅលើនាវានេះ មានភ្ញៀវប្រមាណ 500 នាក់បានឡើងមកទស្សនានៅរមណីយដ្ឋាននានាក្នុងខេត្តព្រះសីហនុ និងខេត្តកែប។

«តាមរយៈការចូលចតជាលើកទីពីររបស់នាវាទេសចរណ៍ Westerdam នេះ នឹងជួយទាក់ទាញនាវាទេសចរណ៍ខ្នាតធំមកកាន់កម្ពុជា នាឆ្នាំក្រោយបន្តបន្ទាប់ទៀត» រដ្ឋមន្ត្រីក្រសួងទេសចរណ៍សង្ឃឹមដូច្នេះ។

យោងតាមឯកឧត្ដមរដ្ឋមន្ត្រី នាវាទេសចរណ៍នេះនឹងចតនៅកម្ពុជាក្នុងរយៈពេលមួយថ្ងៃ ហើយគ្រោងនឹងចាកចេញពីកម្ពុជានៅវេលាម៉ោង 9 យប់នេះ។

នៅក្នុង 11 ខែដំបូងនៃឆ្នាំ 2023 កម្ពុជាទទួលបានភ្ញៀវទេសចរណ៍អន្តរជាតិជាង 4.91 លាននាក់ ក្នុងនោះភ្ញៀវពីប្រទេសថៃមានចំនួនច្រើនជាងគេ ពោលគឺ 1.65 លាននាក់ ខណៈភ្ញៀវពីវៀតណាមច្រើនជាងគេលំដាប់ទីពីរ និងចិនលំដាប់ទីបី៕

December 28, 2023

ម្ចាស់ក្រុមហ៊ុនរថយន្តអគ្គិសនី Tesla បង្ហាញរ៉ូតបូតរាងមនុស្ស អាចចាប់កាន់គ្រាប់ស៊ុត និងហាត់យ៉ូហ្គា

Optimus ដែលជារ៉ូបូតរាងមនុស្សផលិតដោយ Tesla របស់មហាសេដ្ឋី Elon Musk បច្ចុប្បន្នអាចផ្លាស់ទីបានយ៉ាងស្ទាត់ជំនាញ ខណៈបាតដៃ និងម្រាមដៃអាចចាប់កាន់វត្ថុដែលមានទំហំតូច។

វីដេអូដែលមហាសេដ្ឋីអាម៉េរិកដើមកំណើតអាហ្វ្រិកខាងត្បូង បានចែករំលែកលើបណ្ដាញសង្គម X កាលពីថ្ងៃទី 13 ធ្នូ បង្ហាញថា មនុស្សយន្ត Optimus បន្ត «វិវតន៍» ឡើងទៅកាន់កំណែជំនាន់ទីពីរ ដោយមានបាតដៃដ៏រស់រវើក អាចធ្វើកិច្ចការលំបាកៗ។ Optimus អាចប្រើម្រាមដៃចាប់កាន់គ្រាប់ស៊ុត ដែលជាកាយវិការលំបាកមួយដែលរ៉ូបូតមុនៗសុទ្ធតែមិនអាចធ្វើបាន។

ក្រៅពីនេះ Optimus ក៏អាចបង្ហាញកាយវិការហាត់យ៉ូហ្គាផងដែរ។ ក្រុមហ៊ុន Tesla ឱ្យដឹងថា រ៉ូបូងនេះអាចបំពេញភារកិច្ចទាំងឡាយណាដែល «មិនមានសុវត្ថិភាព ត្រូវធ្វើដដែលៗ ឬគួរឱ្យធុញ»៕

December 20, 2023

អតិផរណារបស់ជប៉ុនថយចុះ ដោយសារជំនួយផ្នែកអគ្គិសនី និងឧស្ម័ន

យោងតាមស្ថិតិថ្មីបំផុត សន្ទស្សន៍អតិផរណារបស់ប្រទេសជប៉ុន បានថយចុះក្រោមកម្រិត 3% ជាលើកដំបូង រាប់ចាប់ពីខែសីហា ឆ្នាំ 2022។

វិធានការជំនួយផ្នែកអគ្គិសនី និងឧស្ម័នត្រូវបានគេជឿថាជាមូលហេតុចម្បងដែលជួយឱ្យអតិផរណានៅប្រទេសជប៉ុនថយចុះ។ ក៏ប៉ុន្តែ អ្នកប្រើប្រាស់នៅតែរងសម្ពាធធ្ងន់ គ្រាដែលសន្ទស្សន៍អតិផរណាត្រូវបានព្យាករថា អាចនឹងកើនឡើងជាថ្មីក្នុងប៉ុន្មានខែខាងមុខ។

ស្ថិតិរបស់ក្រសួងមហាផ្ទៃ និងទូរគមនាគមន៍ជប៉ុន បានបង្ហាញថា ក្នុងខែកញ្ញាកន្លងទៅ សន្ទស្សន៍ថ្លៃទំនិញប្រើប្រាស់ (Customer Price Index – CPI) មិនរាប់បញ្ចូលទាំងអាហារស្រស់របស់ប្រទេសនេះ បានកើន 2.8% ធៀបនឹងដំណាក់កាលដូចគ្នាក្នុងឆ្នាំ 2022។ នេះគឺជាលើកដំបូងក្នុងរង្វង់ 13 ខែ ដែលសន្ទស្សន៍ CPI បានថយចុះមកក្រោម 3%។

សន្ទស្សន៍សម្រាប់វាស់ស្ទង់អតិផរណារបស់ប្រទេសជប៉ុនដែលបានថយចុះនេះ ភាគច្រើនគឺដោយសារការចំណាយសម្រាប់ថ្លៃអគ្គិសនី និងឧស្ម័នរបស់អ្នកប្រើប្រាស់ថយចុះ នៅពេលមានជំនួយពីរដ្ឋាភិបាល។ បើពុំមានជំនួយនេះទេ សន្ទស្សន៍នេះនៅក្នុងខែកញ្ញារបស់ជប៉ុន នឹងឡើងដល់ 3.8%។

ថ្វីបើសន្ទស្សន៍ថ្លៃទំនិញប្រើប្រាស់របស់ជប៉ុននៅខ្ពស់ជាងឆ្ងាយ បើធៀបនឹងគោលដៅដែលបានកំណត់ ប៉ុន្តែ យោងតាមការវាយតម្លៃរបស់ក្រុមអ្នកជំនាញ ដោយមានការប្រឹងប្រែងស្ដារបរិស្ថានពាណិជ្ជកម្ម និងជំរុញការដំឡើងប្រាក់បៀវត្សរ៍របស់រដ្ឋាភិបាល សេដ្ឋកិច្ចរបស់ជប៉ុននឹងបន្តងើបឡើង ទាំងក្នុងវិស័យផលិត និងវិស័យមិនមែនផលិត៕

October 21, 2023

ក្រុមហ៊ុនផលិតរថយន្តអគ្គិសនីចិន Aion ចាប់ផ្ដើមវាយលុកទីផ្សារអាស៊ីអាគ្នេយ៍

ក្រុមហ៊ុនផលិតរថយន្តអគ្គិសនីចិន Aion ដែលជាយីហោមួយរបស់ GAC (Guangzhou Automobile Corporation) បានចូលមកកាន់ទីផ្សារប្រទេសថៃ និងក្លាយជាអ្នកផលិតរថយន្តអគ្គិសនីថ្មីបំផុតរបស់ចិនដែលធ្វើដូច្នេះ។

កាលពីថ្ងៃទី 28 មិថុនា GAC Aion បានចុះអនុស្សរណៈនៃការយោគយល់ស្ដីពីកិច្ចសហការជាមួយតំណាងចែកចាយនៅប្រទេសថៃ ដើម្បីនាំរថយន្តអគ្គិសនីចូលមកទីផ្សារនេះជាផ្លូវការ បើកផ្លូវឱ្យ Aion ចាប់ផ្ដើមធ្វើអន្តរជាតូបនីយកម្មយីហោរបស់ខ្លួន។ ក្រុមហ៊ុននេះនឹងបើកទីស្នាក់ការកណ្ដាលនៅអាស៊ីអាគ្នេយ៍លើទឹកដីថៃក្នុងឆ្នាំនេះ។

GAC Aion ឱ្យដឹងថា ការផលិតបណ្ដាម៉ូដែលរថយន្តអគ្គិសនីដែលផ្គត់ផ្គង់សម្រាប់ទីផ្សារថៃ កំពុងតែស្ថិតក្នុងដំណាក់កាលមមាញឹក។ ក្នុងអនាគត ក្រុមហ៊ុននេះក៏នឹងពង្រីកវត្តមានរបស់ខ្លួននៅក្នុងតំបន់អាស៊ីអាគ្នេយ៍ផងដែរ។

អំពីការលក់រថយន្តអគ្គិសនី នៅប្រទេសចិន GAC Aion ឈរលំដាប់ទីពីរបន្ទាប់ពី BYD។ នេះបើតាមបញ្ជីចំណាត់ថ្នាក់របស់សមាគមរថយន្តដឹកអ្នកដំណើរចិន (CPCA)។

June 29, 2023

ក្រុមហ៊ុនអាម៉េរិក-ចិន បង្ហាញរថយន្តអគ្គិសនីខ្នាតតូចម៉ូដែលថ្មី

ក្រុមហ៊ុនបណ្ដាក់ទុនរួមគ្នារបស់អាម៉េរិក-ចិន SAIC-GM-Wuling នឹងបញ្ចេញរថយន្តអគ្គិសនីខ្នាតតូចម៉ូដែលថ្មីនៅក្នុងខែឧសភានេះ។

កាលពីថ្ងៃទី 09 ឧសភា Baojun ដែលជាក្រុមហ៊ុនបុត្រសម្ព័ន្ធរបស់ SAIC-GM-Wuling បានប្រកាសថា ពួកគេនឹងបង្ហាញរថយន្តអគ្គិសនីខ្នាតតូចមួយម៉ូដែលដែលមានឈ្មោះថា Baojun Yep នៅថ្ងៃទី 25 ឧសភាខាងមុខ។

Baojun បានបង្ហើបឱ្យដឹងអំពីពាណិជ្ជសញ្ញាថ្មីរបស់ខ្លួនកាលពីថ្ងៃទី 09 ឧសភា ហើយថា Yep នឹងជាម៉ូដែលរថយន្តដំបូងដែលប្រើប្រាស់ពាណិជ្ជសញ្ញាថ្មីនេះ។

នៅក្នុងរូបថតមួយចំនួនដែល Baojun បានបញ្ចេញ បង្ហាញថា រថយន្តអគ្គិសនី Baojun Yep មានរូបរាងស្រដៀងនឹងរថយន្ត Jimny របស់ Suzuki។ Baojun Yep មានបណ្ដោយ ទទឹង និងកម្ពស់ជាបន្តបន្ទាប់គឺ 3,381, 1,685 និង 1,721 មិល្លីម៉ែត្រ ខណៈប្រវែងបណ្ដោយមូលដ្ឋានគឺ 2,110 មិល្លីម៉ែត្រ។

Baojun Yep នឹងត្រូវបានបំពាក់ម៉ូទ័រអគ្គិសនីកម្លាំង 50 kW និងកម្លាំងរមួលកង់ 140 Nm។ រថយន្តនេះមានថ្មផ្ទុកអគ្គិសនីកម្លាំង 28.1 kWh និងអាចផ្លាស់ទីបាន 303 គីឡូម៉ែត្រ។

ក្រៅពីកំណែធម្មតា Baojun ក៏បានបង្ហាញរូបថតស្ដីពីកំណែភីកអាប់ (រថយន្តទ្រុង) ដែលមានទ្វារពីររបស់ Yep ផងដែរ។

SAIC-GM-Wuling គឺជាក្រុមហ៊ុនបណ្ដាក់ទុនរួមគ្នារវាងក្រុមហ៊ុនរដ្ឋចិន SAIC, ក្រុមហ៊ុនអាម៉េរិក General Motors និងក្រុមហ៊ុនចិន Wuling Automobile។ SAIC-GM-Wuling មានទីស្នាក់ការកណ្ដាលនៅទីក្រុង Liuzhou ក្នុងតំបន់ស្វយ័ត Guangxi Zhuang ភាគនិរតីនៃប្រទេសចិន។

នៅក្នុងប្រភេទរថយន្តអគ្គិសនីខ្នាតតូច ក្រៅពី Mini EV ក្រុមហ៊ុន SAIC-GM-Wuling ក៏បានបង្ហាញវត្តមាន Air EV នៅប្រទេសចិនកាលពីខែធ្នូឆ្នាំកន្លង និង Bingo EV កាលពីចុងខែមីនាឆ្នាំនេះផងដែរ។

SAIC-GM-Wuling លក់រថយន្តអគ្គិសនីបានចំនួន 77,701 គ្រឿងនៅក្នុងត្រីមាសទីមួយនៃឆ្នាំនេះ ក្នុងនោះមាន 69,842 គ្រឿងគឺជារថយន្តអគ្គិសនី Mini EV។ នេះបើតាម សមាគមរថយន្តដឹកអ្នកដំណើរចិន (CPCA)៕

May 10, 2023

ការដាំដុះសម្រាប់ការនាំចេញកាហ្វេកម្ពុជា នឹងកាន់តែមានសក្ដានុពល ក្រោយក្រុមហ៊ុន CP ប្រកាសវិនិយោគ

ក្រុមហ៊ុនស៊ីភី (CP) របស់ថៃ បានចាប់អារម្មណ៍លើការផលិតគ្រាប់កាហ្វេនៅកម្ពុជា ដើម្បីនាំចូលទៅប្រទេសថៃ ខណៈបច្ចុប្បន្នតម្រូវការគ្រាប់កាហ្វេ កំពុងមានកម្រិតខ្ពស់នៅក្នុងប្រទេសថៃ ដែលទំហំនៃការផលិតមិនទាន់អាចផ្គត់ផ្គង់គ្រប់ក្នុងប្រទេស។

ការលើកឡើងនេះ ត្រូវបានតំណាងភាគីរបស់ក្រុមហ៊ុន CP បញ្ជាក់នៅក្នុងជំនួបប្រជុំរវាងធុរជនថៃរបស់ក្រុមហ៊ុននេះ ជាមួយឯកឧត្ដម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មដើម្បីពិភាក្សាការងារ នៅទីស្ដីការក្រសួងពាណិជ្ជកម្ម កាលពីចុងសប្ដាហ៍កន្លងទៅ។

នៅក្នុងកិច្ចប្រជុំនោះ តំណាងរបស់ក្រុមហ៊ុនស៊ីភី បានជម្រាបជូនឯកឧត្ដមរដ្ឋមន្ត្រី អំពីគោលបំណងក្នុងការពិនិត្យលើការផលិតគ្រាប់កាហ្វេនៅកម្ពុជា ដើម្បីនាំចូលទៅប្រទេសថៃ ដែល បច្ចុប្បន្នតម្រូវការគ្រាប់កាហ្វេ គឺមានកម្រិតខ្ពស់ ដែលទំហំនៃការផលិតនៅប្រទេសថៃ មិនអាចផ្គត់ផ្គង់គ្រប់ចំនួននោះទេ។

ជាការឆ្លើយតបនឹងបំណងនេះ ឯកឧត្ដម ប៉ានសូរស័ក្ដិ រដ្ឋមន្ត្រីក្រសួងពាណិជ្ជកម្ម បានលើកឡើងថាការដាំដុះដំណាំកាហ្វេ គឺមានច្រើននៅខេត្តមណ្ឌលគិរីនិងរតនគិរីរបស់កម្ពុជា ហើយឯកឧត្ដមបានលើកទឹកចិត្តឱ្យក្រុមហ៊ុនស៊ីភី ចុះទៅពិនិត្យដោយផ្ទាល់ និងសហការជាមួយសហគមន៍ផលិតគ្រាប់កាហ្វេនៅទីនោះ ដើម្បីពិនិត្យលើលទ្ធភាពជាក់ស្ដែង។បន្ថែមពីនេះ ឯកឧត្ដមរដ្ឋមន្ត្រី ក៏បានលើកទឹកចិត្តឱ្យក្រុមហ៊ុនស៊ីភី បង្កើនប្រតិបត្តិការរបស់ក្រុមហ៊ុននៅកម្ពុជាឱ្យបានច្រើន លើសពីការវិនិយោគបច្ចុប្បន្នបន្ថែមទៀត ជាពិសេសការកែច្នៃអង្ករ ដំឡូងមីពោត និងផលិតផលដទៃទៀត ដែលសុទ្ធសឹងតែជាផលិតផលមានសក្ដានុពលសម្រាប់នាំចេញ។

ក្រោយទទួលបានដំណឹងថា ក្រុមហ៊ុន CP ប្រកាសវិនិយោគលើការដាំដុះដំណាំកាហ្វេ នេះដែរ លោកចាន់ សុណាត ដែលកសិករដាំកាហ្វេនៅក្នុងខេត្តមណ្ឌលគិរី បានលើកឡើងថា ដំណាំកាហ្វេនៅខេត្តមណ្ឌលគិរី បច្ចុប្បន្នគឺមានទីផ្សារល្អធម្មតា។ លោកបន្តថា ដីក្នុងខេត្តមណ្ឌលគិរី មានជីវជាតិល្អ និងអំណោយផលយ៉ាងខ្លាំងចំពោះដំណាំកាហ្វេ ធ្វើឱ្យដំណាំប្រភេទនេះ លូតលាស់បានល្អ មិនចាំបាច់ថែទាំដិតដល់ខ្លាំង ក៏អាចទទួលបានទិន្នផលល្អសមរម្យដែរ។ជាមួយគ្នានោះ កសិករដាំកាហ្វេនៅក្នុងខេត្តមណ្ឌលគិរីរូបនេះ ក៏បានសម្តែងការស្វាគមន៍ចំពោះគម្រោងវិនិយោគរបស់ក្រុមហ៊ុន CP របស់ថៃ ដែលបានចាប់អារម្មណ៍លើផលិតកម្មគ្រាប់កាហ្វេនៅកម្ពុជា ដើម្បីនាំចូលទៅប្រទេសថៃ ជាពិសេសនៅក្នុងខេត្តលោកតែម្ដង។

គួររំឭកឱ្យបានជ្រាបដែរ កាលពីឆ្នាំ2015 កម្ពុជាបាននាំចូលកាហ្វេដែលមានតម្លៃសរុបជាង 8លានដុល្លារ ដែលធ្លាក់ចុះពីជាង 10លានដុល្លារកាលពីឆ្នាំ2014 ខណៈដែលការនាំចេញមានតម្លៃតែជាង 70,000 ដុល្លារប៉ុណ្ណោះកាលពីឆ្នាំ2015 ដែលកើនឡើងពីជាង 2,000ដុល្លារកាលពីឆ្នាំ2014។ នេះបើតាមតួលេខបានពីក្រសួងពាណិជ្ជកម្ម ហើយនៅក្នុងរយៈពេល 6ខែឆ្នាំកន្លងទៅ កម្ពុជានាំចូលកាហ្វេមានតម្លៃត្រឹមតែជាង 3លានដុល្លារប៉ុណ្ណោះ។

យ៉ាងណា ក្នុងជំនួបប្រជុំរវាងធុរជនថៃរបស់ក្រុមហ៊ុនស៊ីភី (CP) នឹងក្រសួងពាណិជ្ជកម្ម ក៏បានបង្ហាញពីការរំពឹងទុកដែរថា ទំហំពាណិជ្ជកម្មនាំចេញកាហ្វេកម្ពុជា នឹងកាន់តែមានសក្ដានុពលទៅកាន់ទីផ្សាអន្តរជាតិ ជាពិសេសប្រទេសថៃ ក្រោយមានការវិយោគលើដំណាំនេះ។ ដើម្បីសម្រេចនៅគោលដៅនេះ ភាគីទាំង2 ក៏បានប្តេជ្ញា បន្តកិច្ចសហការ និងខិតខំប្រឹងប្រែងសម្រួលពាណិជ្ជកម្ម ដើម្បីលើកស្ទួយបរិយាកាសធុរកិច្ច និងការវិនិយោគរបស់វិនិយោគគិនថៃនិងកម្ពុជា និងដើម្បីឱ្យការនាំចេញ-នាំចូលផលិតផលរបស់ប្រទេសទាំង2 កាន់តែមានការកើនឡើង។

គួរបញ្ជាក់ថា បើគិតត្រឹមតែឆមាសទី1 ក្នុងឆ្នាំ2019 កន្លងទៅនេះ ទំហំពាណិជ្ជកម្ម កម្ពុជា-ថៃ មានប្រមាណជាង 4ពាន់លានដុល្លារអាមេរិក ដែលចំនួននេះ បានធ្វើឱ្យកម្ពុជា ឈរនៅលំដាប់ទី4 ក្នុងចំណោមបណ្តាប្រទេសជាដៃគូពាណិជ្ជកម្មតាមព្រំដែនរបស់ថៃ ដោយក្នុងនោះ ផលិតផលដែលកម្ពុជានាំចេញទៅថៃ ភាគច្រើនគឺ ពោត និងដំឡូងមី ជាដើម ខណៈដែលប្រទេសថៃ នាំចូលមកកម្ពុជាវិញ រួមមានឧបករណ៍អេឡិចត្រូនិក ប្រេងឥន្ធនៈ គ្រឿងសម្អាង និងសម្ភារសំណង់ជាដើម៕

February 6, 2020

Tag: CP