coronavirus - La Reine Media

Covid-19៖ អ្នកផ្ទុកមេរោគកូរ៉ូណាប៉ុន្តែមិនមានរោគសញ្ញា អាចធ្វើឱ្យតួលេខពិតនៃអ្នកជំងឺ កើនឡើងច្រើនជាងការរំពឹងទុក

ក្រុមអ្នកជំនាញបានព្រមានថា ចំនួនអ្នកកំពុងផ្ទុកមេរោគកូរ៉ូណា Covid-19 អាចនឹងមានច្រើនជាងតួលេខដែលបានកត់ត្រា ព្រោះថា មានករណីជាច្រើន អ្នកជំងឺពុំមានរោគសញ្ញានៃជំងឺកូរ៉ូណានោះទេ ហើយពួកគេក៏មិនបានទទួលការពិនិត្យ និងព្យាបាល ដូច្នេះ អ្នកជំងឺទាំងនេះមិនទាន់ត្រូវបានរាប់បញ្ចូលក្នុងបញ្ជីនៃអ្នកជំងឺកូរ៉ូណានៅឡើយ។

នៅឯតំបន់ Anyang ប្រទេសចិន សមាជិក5នាក់របស់គ្រួសារមួយ ត្រូវបានពិនិត្យឃើញថាមានផ្ទុកមេរោគកូរ៉ូណា Covid-19 ក្រោយពីបានទទួលភ្ញៀវម្នាក់មកពីទីក្រុង Wuhan កាលពីដើមខែមករា។ ប៉ុន្តែ ភ្ញៀវដែលមានអាយុ20ឆ្នាំរូបនោះ មិនមានរោគសញ្ញាអ្វីទាំងអស់ទាក់ទិននឹងជំងឺកូរ៉ូណា Covid-19។

ការសិក្សាស្រាវជ្រាវជាច្រើនបានបង្ហាញថា អ្នកផ្ទុកមេរោគ Covid-19 អាចចម្លងមេរោគនេះទៅកាន់អ្នកដទៃ សូម្បីតែនៅពេលពួកគេមិនមានរោគសញ្ញានៃជំងឺនេះ។

អ្នកផ្ទុកមេរោគក្នុងខ្លួន ប៉ុន្តែមិនមានរោគសញ្ញា គឺជាករណីដែលកើតមានច្រើន។ ប៉ុន្តែ Covid-19 គឺជាមេរោគឆ្លងប្រភេទថ្មី ហើយការដែលអ្នកជំងឺកូរ៉ូណាមិនមានរោគសញ្ញាអ្វីសោះបែបនេះ ធ្វើឱ្យការប្រឹងប្រែងក្នុងការស្វែងរកមេរោគកូរ៉ូណា កាន់តែមានភាពស្មុគស្មាញជាងមុន ហើយការគ្រប់គ្រងការឆ្លងរាលដាលក៏ជួបបញ្ហាច្រើនផងដែរ។

លោកវេជ្ជបណ្ឌិត Anthony Fauci នាយកវិទ្យាស្ថានជាតិនៃជំងឺឆ្លង និងជំងឺអាឡែរហ្សីសហរដ្ឋអាអាមេរិកថ្លែងថា៖ “ខ្ញុំគិតថា ពេលនេះ យើងលែងសង្ស័យអំពីការដែលអ្នកណាម្នាក់អាចចម្លងមេរោគកូរ៉ូណាទៅឱ្យអ្នកដទៃ បើទោះពួកគេគ្មានរោគសញ្ញា”។

លោកបណ្ឌិតបន្តថា នៅពេលដែលអ្នកមានផ្ទុកវីរុសប៉ុន្តែមិនមានរោគសញ្ញាក្លាយជាកត្តាសំខាន់ក្នុងការចម្លងមេរោគនោះការធ្វើតេស្តរកមេរោគក៏នឹងត្រូវទទួលបន្ទុកធ្ងន់ធ្ងរ ហើយត្រូវយកចិត្តទុកដាក់ជាងបច្ចុប្បន្ន។

បច្ចុប្បន្ន មជ្ឈមណ្ឌលទប់ស្កាត់ និងគ្រប់គ្រងរោគឆ្លងសហរដ្ឋអាមេរិក បានអនុញ្ញាតឱ្យមានការធ្វើតេស្តរកមេរោគទៅលើតែមនុស្សណាដែលមានរោគសញ្ញា និងធ្លាប់ទៅកាន់ប្រទេសចិនថ្មីៗនេះ ឬមួយអ្នកដែលធ្លាប់នៅក្បែរអ្នកផ្ទុកមេរោគកូរ៉ូណាប៉ុណ្ណោះ។ ក៏ប៉ុន្តែ ក្រុមមន្ត្រីសុខាភិបាលយល់ថា ការកំណត់ ឬលក្ខណនេះអាចនឹងត្រូវពិនិត្យឡើងវិញ។

វេជ្ជបណ្ឌិត Michael Osterholm អគ្គនាយកមជ្ឈមណ្ឌលគោលនយោបាយ និងសិក្សាស្រាវជ្រាវរោគឆ្លងនៃមហាវិទ្យាល័យ Minnesota បានឱ្យដឹងថា “យើងប្រហែលជាបានរំលងចោលអ្នកជំងឺជាច្រើនដែលមិនស្ថិតនៅក្នុងលក្ខណខាងលើ”។

អ្នកដែលមានផ្ទុកមេរោគ ប៉ុន្តែមិនមានរោគសញ្ញា ពិតជាមានឱកាសច្រើនក្នុងចម្លងមេរោគទៅអ្នកផ្សេង។ ពួកគេមានសុខភាពល្អក្នុងដំណាក់កាលដំបូង និងអាចធ្វើដំណើរទៅកាន់ទីកន្លែងផ្សេងៗ និងជួបមនុស្សជាច្រើន។ អ្នកជំងឺបែបនេះ មិនមានមូលហេតុណាដែលនាំឱ្យពួកគេមិនហ៊ាននៅក្បែរហ្វូងមនុស្ស ចាប់ដៃគ្នា ឬឱបថើបគ្នានោះទេ។ ពួកគេមិនដឹងថា ខ្លួនឯងមានជំងឺ ហើយក៏មិនមានអ្នកណាម្នាក់ដឹងថា គេនោះមានជំងឺកូរ៉ូណានោះដែរ។

អ្នកជំងឺដូចខាងលើ ពិតជាបង្កការលំបាកដល់ការស្វែងរកអ្នកជំងឺ ប្រការបានបង្ហាញថា លក្ខណ ឬគោលការណ៍នៃការគ្រប់គ្រងការឆ្លងរាលដាលនៃមេរោគនាបច្ចុប្បន្ន គឺមិនទាន់គ្រប់គ្រាន់។

នៅក្នុងខែនេះ អាល្លឺម៉ង់ បានជម្លៀសពលរដ្ឋ126នាក់មកពីទីក្រុង Wuhan ដែលជាសម្បុកមេរោគកូរ៉ណាដ៏ធំនៅប្រទេសចិន។ ក្នុងចំណោមមនុស្សចំនួន126នាក់ មាន10នាក់ត្រូវបានបង្ខាំងឱ្យនៅដាច់ដោយឡែក ព្រោះមានសុខភាពមិនល្អ និងសង្ស័យថាមានផ្ទុកមេរោគ។ ប៉ុន្តែ ពួកគេទាំងអស់ត្រូវបានធ្វើតេស្តរកមេរោគ។

លទ្ធផលនៃការពិនិត្យសុខភាពបានបង្ហាញថា មនុស្សទាំង10នាក់ដែលបានបង្ខាំងឱ្យនៅដាច់ដោយឡែក មិនមានមេរោគកូរូណានោះទេ ក្នុងពេលដែលមនុស្ស2នាក់ផ្សេងទៀតដែលមានសុខភាពល្អ បែរជាមានផ្ទុកមេរោគទៅវិញ។

គិតមកដល់ពេលនេះ(29កុម្ភៈ) នៅទូទាំងពិភពលោក មានអ្នកផ្ទុកមេរោគកូរ៉ូណា Covid-19 ចំនួនជាង85,176នាក់ ប៉ុន្តែ អ្នកដែលបានឆ្លងមេរោគនេះ អាចមានច្រើនជាងនេះ ដោយសារតែប្រទេសមួយចំនួនមិនបានធ្វើតេស្តផ្ទាល់ទៅលើមនុស្ស ដោយគ្រាន់តែវាស់កម្ដៅខ្លួន ឬមិនមានធនធានគ្រប់គ្រាន់ដើម្បីធ្វើតេស្ត។

អ្នកជំនាញផ្នែកសុខាភិបាលជាច្រើនមានការព្រួយបារម្ភថា ការឆ្លងមេរោគពីមនុស្សម្នាក់ដែលមិនមានរោគសញ្ញា ប្រហែលជាកំពុងកើតមាននៅតាមទីសាធារណៈនៅអាមេរិក។ ប្រការនេះក៏នឹងកើតឡើងនៅតាមបណ្ដាប្រទេសផងដែរផ្សេងៗទៀតផងដែរ។

យោងតាមវេជ្ជបណ្ឌិត Sandra Ciesek មកពីវិទ្យាស្ថានវីរុសសាស្ត្រនៃសកលវិទ្យាល័យ Frandfurt បញ្ហានៅទីនេះគឺ “ធម្មតា យើងមិនធ្វើតេស្តទៅលើអ្នកដែលមានសុខភាពល្អ មិនមានរោគសញ្ញា ព្រោះថាការធ្វើតេស្តគឺវាមានតម្លៃខ្ពស់ខ្លាំងណាស់”។ នេះបើតាម New York Times។

អ្នកស្រីវេជ្ជបណ្ឌិតបន្ថែមថា “ប្រការនេះបង្ហាញថា យើងអាចមានអ្នកជំងឺកូរ៉ូណានៅទូទាំងពិភពលោក ច្រើនជាងការរំពឹងទុក”៕

ប្រភព៖ សារព័ត៌មានបរទេស

February 29, 2020

WHO បង្កើនការព្រមានអំពីអាសន្នរោគ Covid-19 ឡើងដល់កម្រិតខ្ពស់បំផុត ខណៈមានអ្នកស្លាប់ជិត3,000នាក់

អង្គការសុខភាពពិភពលោក(WHO) បានបង្កើនការព្រមានអំពីការឆ្លងរាលដាលនៃមេរោគកូរ៉ូណា Covid-19 ពី “កម្រិតខ្ពស់ ទៅ “កម្រិតខ្ពស់ខ្លាំង” ដោយសារតែមានការកើនឡើងនៃករណីឆ្លង និងមានប្រទេសកាន់តែច្រើនឡើងៗ ត្រូវរងផលប៉ះពាល់។

ប្រធានអង្គការសុខភាពពិភពលោក WHO លោក Tedros Adhanom Ghebreyesus បានថ្លែងថា៖ “បច្ចុប្បន្ន យើងបានបង្កើនការវាយតម្លៃអំពីហានិភ័យនៃការឆ្លងរាលដាល និងផលប៉ះពាល់បង្កឡើងដោយអាសន្នរោគ Covid-19 ឡើងទៅកម្រិតខ្ពស់ខ្លាំងនៅទូទាំងពិភពលោក”។ លោកយល់ថា តួលេខនៃករណីឆ្លង និងចំនួនប្រទេសដែលមានករណីឆ្លងមេរោគកូរ៉ូណា បានកើនឡើងខ្លាំងក្នុងរយៈពេលប៉ុន្មានថ្ងៃចុងក្រោយនេះ “ជាក់ស្ដែងវាពិតជាគួរឱ្យព្រួយបារម្ភ”។

បណ្ឌិត Mike Ryan ប្រធានកម្មវិធីសុខភាពបន្ទាន់របស់ WHO បានឱ្យដឹងថា “ខ្ពស់ខ្លាំង” គឺជាកម្រិតនៃ “ការវាយតម្លៃខ្ពស់បំផុតអំពីហានិភ័យនៃការឆ្លង និងផលប៉ះពាល់” របស់អាសន្នរោគ។

ក៏ប៉ុន្តែ លោក Ryan បានថ្លែងថា WHO មិនមានបំណងបំភ័យអ្នករាល់គ្នានោះទេ។ នេះគឺជាការត្រួតពិនិត្យជាក់ស្ដែងរបស់រដ្ឋាភិបាលនៃប្រទេសនីមួយៗនៅលើពភពផែនដីនេះ៖ ចូរភ្ញាក់រឭក។ ចូរត្រៀមខ្លួនឱ្យហើយ។ វីរុសនេះអាចកំពុងធ្វើដំណើរឆ្ពោះទៅរកអ្នក ហើយអ្នកត្រូវតែត្រៀមខ្លួនឱ្យបានរួចរាល់។ អស់លោក លោកស្រី មានកាតព្វកិច្ចចំពោះពលរដ្ឋរបស់ខ្លួន និងពិភពលោកទាំងមូល”។

ចំណែកប្រធានអង្គការ WHO វិញក៏មានប្រសាសន៍ស្រដៀងគ្នានេះដែរ និងបានលើកទឹកចិត្តចំពោះរដ្ឋាភិបាលនានា៖ “យើងនៅតែមានឱកាសគ្រប់គ្រងអាសន្នរោគនេះ។ គន្លឹះដើម្បីគ្រប់គ្រងអាសន្នរោគនេះបាន នោះគឺបំបាត់ខ្សែសង្វាក់នៃការឆ្លងរាលដាល”។ លោកមានប្រសាសន៍បែបនេះ គឺសំដៅទៅលើការអនុវត្តវិធានការទប់ស្កាត់ការឆ្លងរាលដាលរបស់វីរុស។

លោក Michael Ryan យល់ថា “ពិតជាគ្មានន័យ” នៅពេលសួរថាតើអាសន្នរោគនេះអាចចាត់ទុកថាជា “មហាអាសន្នរោគ” ដែរ ឬទេ?។ បើសិន WHO ចាត់ទុកនេះជាមហាអាសន្នរោគ “ជាមូលដ្ឋាន យើងទាំងអស់គ្នានឹងទទួលស្គាល់ថា មនុស្សគ្រប់រូបនៅលើភពផែនដីនឹងនៅជាមួយវីរុសនោះ។ ទិន្នន័យមិនបានបង្ហាញអំពីប្រការនេះនោះទេ”។

Tedros ថ្លែងថា “សត្រូវធំបំផុតរបស់យើង មិនមែនជាវីរុសនោះទេ ប៉ុន្តែវាជាការភ័យខ្លាច ព័ត៌មានចចាមអារ៉ាមដែលបង្កឱ្យមានភាពវឹកវរ និងការរើសអើង។ ទ្រព្យធំបំផុតរបស់យើងនោះគឺការពិត ភាពសមហេតុសមផល រួមនឹងសាមគ្គីភាព”។

ប្រធានអង្គការសុខភាពពិភពលោកក៏បានឱ្យដឹងដែរថា វ៉ាក់សាំងចំនួនជាង20ប្រភេទ កំពុងត្រូវបានអភិវឌ្ឍនៅទូទាំងពិភពលោក ហើយវិធីព្យាបាលមួយចំនួនក៏ត្រូវបានសាកល្បងនៅលើមនុស្ស ដែលលទ្ធផលនៃការពិសោធនេះនឹងត្រូវប្រកាសឱ្យដឹងក្នុងរយៈពេលប៉ុន្មានសប្ដាហ៍ខាងមុខទៀត”។

អាសន្នរោគកូរ៉ូណា Covid-19 បានចាប់ផ្ដើមឆ្លងរាលដាលចេញពីតំបន់ Wuhan ខេត្ត Hubei នៃប្រទេសចិន កាលពីចុងឆ្នាំ2019។ មកពេលនេះ អាសន្នរោគកូរ៉ូណានេះ បានឆ្លងទៅមនុស្សចំនួនជាង 85,146នាក់ និងបានសម្លាប់មនុស្សសរុប2,923នាក់នៅទូទាំងពិភពលោក៕

ប្រភព៖ សារព័ត៌មានបរទេស

February 29, 2020

កូរ៉េខាងត្បូង៖ អ្នកជំងឺកូរ៉ូណា Covid-19 ត្រូវដេកស្លាប់នៅឯផ្ទះ ព្រោះមន្ទីរពេទ្យអស់គ្រែ

អាជ្ញាធរកូរ៉េខាងត្បូងកំពុងប្រឹងប្រែងដាក់គ្រែបន្ថែមឱ្យបានច្រើនជាអតិបរមានៅក្នុងបណ្ដាមន្ទីរពេទ្យនៃតំបន់ស្នូលរបស់មេរោគកូរ៉ូណា ខណៈដែលមន្ទីរពេទ្យនានានៅទីនេះ បានទទួលអ្នកជំងឺលើសចំណុះទៅហើយ។

ទីភ្នាក់ងារសារព័ត៌មាន Yonhap បានចេញផ្សាយថា អ្នកជំងឺទី13ដែលបានស្លាប់ដោយសារវីរុសកូរ៉ូណា Covid-19 នៅកូរ៉េខាងត្បូងគឺជាបុរសម្នាក់មានអាយុ75ឆ្នាំ រស់នៅក្នុងតំបន់ Daegu ដែលជាតំបន់ស្នូលនៃអាសន្នរោគ Covid-19។ បុរសវ័យចំណាស់នេះ មានអាការគ្រុនក្ដៅចាប់ពីថ្ងៃទី22កុម្ភៈ និងត្រូវបានពិនិត្យឃើញថាមានផ្ទុកមេរោគកូរ៉ូណា Covid-19។ ប៉ុន្តែ គាត់មិនអាចចូលសម្រាកព្យាបាលនៅឯមន្ទីរពេទ្យបាន ហើយត្រូវបង្ខំចិត្តបង្ខាំងខ្លួនឯងនៅផ្ទះរបស់គាត់ ព្រោះតែមន្ទីរពេទ្យទាំងអស់នៅក្នុងទីក្រុង Daegu សុទ្ធតែលើសចំណុះ មិនមានគ្រែសម្រាប់អ្នកជំងឺថ្មី។

បុរសខាងលើគឺជាអ្នកជំងឺម្នាក់ក្នុងចំណោមអ្នកជំងឺកូរ៉ូណា Covid-19 រាប់រយនាក់ ដែលមិនអាចចូលសម្រាកព្យាបាលក្នុងមន្ទីរពេទ្យបាន បើទោះមានរោគសញ្ញានៃជំងឺកូរ៉ូណា ឬត្រូវបានគេពិនិត្យឃើញថាមានផ្ទុកមេរោគនេះក៏ដោយ។ មូលហេតុចម្បងនៃករណីខាងលើនេះ គឺកើតឡើងដោយសារមន្ទីរពេទ្យទាំងអស់ បានទទួលអ្នកជំងឺ Covid-19 ច្រើនហួសកំណត់រួចហើយ។

ដោយសារមូលហេតុខាងលើនេះ ទើបមន្ត្រីសុខាភិបាលទីក្រុង Daegu សម្រេចឱ្យអ្នកជំងឺដែលមិនទាន់មានឱកាសចូលពេទ្យ ត្រូវត្រឡប់ទៅសម្រាកព្យាបាល និងនៅដាច់ដោយឡែកនៅឯផ្ទះ ដោយគ្រូពេទ្យនឹងទូរស័ព្ទទៅសួរសុខទុក្ខអ្នកជំងឺ2ដងក្នុង1ថ្ងៃ។ ដល់ព្រឹកថ្ងៃទី27កុម្ភៈ បុរសវ័យ75ឆ្នាំដែលជាអ្នកជំងឺកូរ៉ូណា Covid-19 ក៏ចាប់ផ្ដើមមានអាការពិបាកដកដង្ហើម ហើយក៏បានបាត់បង់ជីវិតមុនពេលត្រូវបានបញ្ជូញទៅកាន់មន្ទីរពេទ្យ។

“យើងពិតជាមានការសោកស្ដាយខ្លាំងណាស់ដែលអ្នកជំងឺនេះមិនមានឱកាសចូលសម្រាកព្យាបាលនៅឯមន្ទីរពេទ្យឱ្យទាន់ពេល” នេះគឺជាការថ្លែងរបស់អនុរដ្ឋមន្ត្រីក្រសួងសុខាភិបាលកូរ៉េខាត្បូង លោក Kim Gan-lip។

កូរ៉េខាងត្បូង បច្ចុប្បន្នគឺជាប្រទេសដែលមានអ្នកផ្ទុកមេរោគកូរ៉ូណា Covid-19 ចំនួន2,337នាក់ គឺច្រើនជាងគេលំដាប់ទី2ក្នុងពិភពលោក បន្ទាប់ពីប្រទេសចិន និងជាប្រទេសដែលមានអ្នកស្លាប់ចំនួន13នាក់ គឺច្រើនជាងគេលំដាប់ទី4 បន្ទាប់ពីចិន(2,788នាក់) អ៊ីរ៉ង់(34នាក់) និងអ៊ីតាលី(17នាក់)៕

ប្រភព៖ សារព័ត៌មានបរទេស

February 28, 2020

អ្នកស្លាប់ដោយសារអាសន្នរោគ Covid-19 នៅអ៊ីរ៉ង់ កើនដល់34នាក់ ខណៈអ្នកបានឆ្លងមេរោគថ្មីត្រូវបានរកឃើញជាបន្តបន្ទាប់

នៅប្រទេសអ៊ីរ៉ង់ អាសន្នរោគកូរ៉ូណា Covid-19 បានសម្លាប់មនុស្សបន្ថែម8នាក់ និងបានឆ្លងទៅមនុស្សចំនួន134នាក់បន្ថែមទៀត ធ្វើឱ្យចំនួនអ្នកផ្ទុកមេរោគនេះនៅអ៊ីរ៉ង់ កើនឡើងដល់388នាក់។

“388នាក់ត្រូវបានរកឃើញថាមានផ្ទុកមេរោគ Covid-19 និងមនុស្សចំនួន34នាក់បានបាត់បង់ជីវិត បើគិតមកដល់ថ្ងៃទី28កុម្ភៈនេះ។ អ្នកឆ្លងមេរោគថ្មីចំនួន64ករណី ត្រូវបានរកឃើញនៅក្នុងរដ្ឋធានី Tehran។ ខេត្តចំនួន64របស់អ៊ីរ៉ង់ ត្រូវបានរាយការណ៍ថាមានករណីឆ្លងមេរោគកូរ៉ូណា Covid-19” នេះបើតាមអ្នកនាំពាក្យរបស់ក្រសួងសុខាភិបាលអ៊ីរ៉ង់ Kianooush Jahanpour ដែលបានថ្លែងនៅលើកញ្ចក់ទូរទស្សន៍នៅក្នុងថ្ងៃនេះ។

បច្ចុប្បន្ន អ៊ីរ៉ង់គឺជាប្រទេសដែលមានអ្នកស្លាប់ដោយសារអាសន្នរោគកូរ៉ូណា Covid-19 ច្រើនជាងគេបំផុតក្នុងពិភពលោក បន្ទាប់ពីប្រទេសចិន។

មន្ត្រីជាន់ខ្ពស់របស់អ៊ីរ៉ង់ជាច្រើនរូបបានឆ្លងមេរោគដ៏កាចសាហាវ Covid-19 នេះ ក្នុងនោះមានអនុប្រធានាធិបតីអ៊ីរ៉ង់ លោកស្រី Masoumeh Ebtekar ប្រធានគណៈកម្មការទទួលបន្ទុកកិច្ចការបរទេស និងសន្តិសុខជាតិរបស់សភាអ៊ីរ៉ង់ លោក Mojtaba Zolnour អនុរដ្ឋមន្ត្រីក្រសួងសុខាភិបាល លោក Iraj Harirchi និងសមាជិកសភាអ៊ីរ៉ង់ លោក Mahmoud Sadeghi។

សូមរំឭកថា អាសន្នរោគកូរ៉ូណា Covid-19 បានចាប់ផ្ដើមឆ្លងរាលដាលដំបូងកាលពីចុងឆ្នាំ2019នៅប្រទេសចិន។ គិតមកដល់ពេលនេះ នៅទូទាំងពិភពលោក មានអ្នកជំងឺកូរ៉ូណា Covid-19 ចំនួន 83,774នាក់ និងមានអ្នកស្លាប់ចំនួន2,867នាក់ ដោយសារអាសន្នរោគកូរ៉ូណានេះ៕

ប្រភព៖ សារព័ត៌មានបរទេស

February 28, 2020

Covid-19៖ កូរ៉េខាងត្បូងរកឃើញអ្នកផ្ទុកមេរោគ Covid-19 ជិត600នាក់នៅក្នុងថ្ងៃនេះ ខណៈអ្នកជំងឺសរុបឡើងដល់…

អ្នកផ្ទុកមេរោគកូរ៉ូណា Covid-19 ចំនួន571នាក់ ត្រូវបានរកឃើញនៅកូរ៉េខាងត្បូងក្នុងថ្ងៃនេះ ធ្វើឱ្យចំនួនអ្នកឆ្លងមេរោគសរុបនៅក្នុងប្រទេសនេះឡើងដល់2,337នាក់។

មជ្ឈមណ្ឌលគ្រប់គ្រង និងទប់ស្កាត់អាសន្នរោគរបស់កូរ៉េខាងត្បូង នាល្ងាចនេះបានឱ្យដឹងថា ពួកគេបានរកឃើញអ្នកឆ្លងមេរោគថ្មីបន្ថែម315នាក់ទៀត ក្រោយពីបានប្រកាសកាលពីព្រឹកមិញថា បានរកឃើញអ្នកផ្ទុកមេរោគថ្មីបន្ថែមចំនួន256នាក់។ ដូច្នេះ ចំនួនករណីឆ្លងមេរោគ Covid-19 ថ្មីបន្ថែមនៅកូរ៉េខាងត្បូងកើនដល់571នៅក្នុងថ្ងៃនេះ ធ្វើឱ្យចំនួនអ្នកមានផ្ទុកមេរោគកូរ៉ូណាសរុបឡើងដល់2,337នាក់។

នេះគឺជាកំណើនខ្ពស់បំផុតនៅកូរ៉េខាងត្បូងសម្រាប់មួយថ្ងៃ រាប់ចាប់ពីអាសន្នរោគ Covid-19 បានឆ្លងរាលដាលនៅក្នុងប្រទេសនេះ។ តួលេខនៃការឆ្លងក្នុងថ្ងៃនេះរបស់កូរ៉េខាងត្បូង បាន “យកឈ្នះ” ទៅលើប្រទេសចិន ដែលថ្ងៃនេះ ចិនបានរកឃើញអ្នកផ្ទុកមេរោគកូរ៉ូណាថ្មីបន្ថែម327នាក់។ កាលពី2ថ្ងៃមុន ចំនួនអ្នកដែលមានផ្ទុកមេរោគកូរ៉ូណាសរុបនៅកូរ៉េខាងត្បូងមានត្រឹមតែជាង1,000នាក់ប៉ុណ្ណោះ។

គិតមកត្រឹមល្ងាចនេះ(28កុម្ភៈ) ចំនួនអ្នកស្លាប់ដោយសារមេរោគកូរ៉ូណានៅកូរ៉េខាងត្បូងសរុបចំនួន13នាក់ដដែល។ ចំណែកអ្នកដែលបានជាសះស្បើយពីជំងឺនេះ មានចំនួន27នាក់ ខណៈដែលអ្នកជំងឺ10នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ៕

ប្រភព៖ សារព័ត៌មានបរទេស

February 28, 2020

ហុងកុងរកឃើញសត្វឆ្កែ 1ក្បាលឆ្លងមេរោគវីរុស COVID-19 ក្រោយពីម្ចាស់បានឆ្លងមេរោគនេះ

សារព័ត៌មានក្នុងទីក្រុងហុងកុង បានរាយការណ៍ថា រកឃើញសត្វឆ្កែរបស់អ្នកឆ្លងមេរោគវីរុស COVID-19 ម្នាក់ មានលទ្ធផលពីការពិនិត្យ វិជ្ជមាន(+) តែនៅមិនទាន់មានភ័ស្តុតាងជាក់ច្បាស់នៅឡើយ និងកំពុងត្រៀមពិនិត្យម្ដងទៀតដើម្បីឱ្យច្បាស់ប្រាកដថា តើសត្វចិញ្ចឹមនេះ ឆ្លងពីមនុស្ស ឬជាប្រភពចម្លងមេរោគមកមនុស្ស?។

ថ្ងៃនេះ(ទី28កុម្ភៈ) វេបសាយ សៅ ឆាយណា ម៉នីង ផូស្ត បានរាយការណ៍ថា សុនខពូជ ផូមេរ៉ានៀន (Pomeranian)មួយក្បាលរបស់អ្នកឆ្លងមេរោគវីរុស COVID-19 ក្នុងទីក្រុងហុងកុង ត្រូវបានធ្វើការពិសោធថា តើមានឆ្លងមេរោគឬទេ? ហើយលទ្ធផលដែលចេញមកគឺ វិជ្ជមាន(+)បង្ហាញថា មានឆ្លងមេរោគ បន្ទាប់ពីបានប៉ះពាល់ជាមួយម្ចាស់វារួចមក។

ចំណែកក្រុមមន្ត្រីក្រសួងកសិកម្ម នេសាទ និងការអភិរក្សរបស់ទីក្រុងហុងកុង បានឱ្យដឹងថា សុនខ 1ក្បាលនោះមិនបានបង្ហាញអាការជំងឺអ្វីទាំងអស់ និងមិនមានភ័ស្ថុតាងបញ្ជាក់ថា សត្វចិញ្ចឹមអាចឆ្លងមេរោគពីមនុស្ស ឬជាប្រភពចម្លងមេរោគមកមនុស្សបានទេ។

ទាំងអស់នេះ ជាបឋម អាជ្ញាធរបានដំណើរការបង្ខាំងសត្វសុនខនោះទុកដោយឡែករយៈពេល 14ថ្ងៃ និងធ្វើការពិសោធបន្ថែមទៀត ដើម្បីបញ្ជាក់ឱ្យបានច្បាស់ថា តើសុនខ 1ក្បាលនេះបានឆ្លងមេរោគ COVID-19 មែន ឬជាផលប៉ះពាល់ពីសភាវបរិស្ថានផ្សេងៗដែលចូលទៅក្នុងច្រមុះ និងមាត់របស់វា?។

យ៉ាងណាក៏ដោយ អង្គការសុខភាពពិភពលោកបានបញ្ជាក់ថា គ្មានភ័ស្ថុតាងណាមួយបញ្ជាក់ថា សត្វចិញ្ចឹម ដូចជាឆ្កែ ឬឆ្មាអាចឆ្លងមេរោគ COVID-19 បានឡើយ តែម្ចាស់សត្វចិញ្ចឹម គួរតែលាងដៃឱ្យបានស្អាតគ្រប់ពេលដែលប៉ះពាល់ ឬលេងជាមួយសត្វចិញ្ចឹមរួចហើយ៕

ប្រភព ៖ សារព័ត៌មានបរទេស

February 28, 2020

Covid-19៖ ប្រធានាធិបតីម៉ុងហ្គោលី ចូលមន្ទីរពេទ្យ និងត្រូវនៅដាច់ដោយឡែក បន្ទាប់ពីបានក្លាយជាមេដឹកនាំទីពីរដែលធ្វើទស្សនកិច្ចនៅប្រទេសចិន ក្នុងអំឡុងអាសន្នរោគកូរ៉ូណាកំពុងរាតត្បាត

ប្រធានាធិបតី Battulga និងប្រតិភូម៉ុងហ្គោលី ត្រូវបានបង្ខាំងឱ្យនៅដាច់ដោយឡែកក្នុងរយៈពេល14ថ្ងៃ ដើម្បីបង្ការការឆ្លងមេរោគកូរ៉ូណា Covid-19 ក្រោយដំណើរទស្សនកិច្ចនៅប្រទេសចិន។

លោកប្រធានាធិបតី Khaltmaagiin Battulga នៃប្រទេសម៉ុងហ្គោលី និងមន្ត្រីជាន់ខ្ពស់របស់រដ្ឋាភិបាលជាច្រើនរូបទៀត នៅថ្ងៃនេះ បានចាប់ផ្ដើមទទួលការបង្ខាំងខ្លួននៅដាច់ដោយឡែក ក្នុងមន្ទីរពេទ្យមួយនារដ្ឋធានី Ulaanbaatar។ នេះបើតាមទីភ្នាក់ងារសារព័ត៌មានរដ្ឋ Montsame។

សារព័ត៌មាន Montsame បានឱ្យដឹងថា “នេះគ្រាន់តែជាវិធានការទប់ស្កាត់ប៉ុណ្ណោះ។ ពួកគាត់ត្រូវបាននាំទៅកាន់មន្ទីរពេទ្យដាច់ដោយឡែកមួយ បន្ទាប់ពីបានអញ្ជើញមកដល់ប្រទេសភ្លាម”។

ប្រធានាធិបតី Battulga កាលពីម្សិលមិញបានអញ្ជើញទៅធ្វើទស្សនកិច្ចនៅប្រទេសចិន និងបានជួបពិភាក្សាជាមួយលោក ស៊ី ជីនពីង នៅឯវិមានប្រជាជនចិនក្នុងទីក្រុងប៉េកាំង។ បន្ទាប់មក ក៏បានជួបពិភាក្សាជាមួយនាយករដ្ឋមន្ត្រីចិន លោក លី ឃឺជំាង(Li Keqiang) ផងដែរ។ លោក ប្រធានាធិបតីម៉ុងហ្គោលី គឺជាមេដឹកនាំទីពីរបន្ទាប់ពីសម្ដេច ហ៊ុន សែន ដែលបានធ្វើទស្សនកិច្ចទៅកាន់ប្រទេសចិន ក្នុងគ្រាដែលប្រទេសនេះកំពុងត្រូវបានរាតត្បាតដោយអាសន្នរោគកូរ៉ូណា Covid-19។

សារព័ត៌មានចិនបានចេញផ្សាយថា ប្រធានាធិបតី Battulga តាងនាមឱ្យប្រជាជនម៉ុងហ្គោលី ជូនលិខិតទទួលស្គាល់កម្មសិទ្ធិទៅលើសត្វចៀមចំនួន30,000ក្បាលទៅដល់ប្រធានាធិបតីចិន ដោយចាត់ទុកដូចជាជំនួយក្នុងការប្រយុទ្ធប្រឆាំងអាសន្នរោគកូរ៉ូណា។ នេះបើតាមសារព័ត៌មាន Reuters។

សូមបញ្ជាក់ថា មុងហ្គោលី គឺជាប្រទេសមួយដែលមិនទាន់មានករណីឆ្លងវីរុសកូរ៉ូណាណាមួយនៅឡើយ។ ប្រទេសនេះ បានបិទច្រកព្រំដែនជាមួយចិន និងបានផ្អាកការហោះហើរទៅ-មកប្រទេសនេះ រួមនឹងកូរ៉េខាងត្បូង និងជប៉ុនផងដែរ។ ទន្ទឺមនឹងនេះ ប្រទេសម៉ុងហ្គោលីក៏បានបិទសាលារៀនរហូតដល់ចុងខែមិនាទៀតផង។

រដ្ឋាភិបាលម៉ុងហ្គោលី កាលពីថ្ងៃទី26កុម្ភៈ ក៏បានចេញបទបញ្ជា ហាមមិនឱ្យរថយន្ត ឬមធ្យោបាយដឹកជញ្ជូនធ្វើដំណើរពីរដ្ឋធានី Ulaanbaatar ទៅកាន់បណ្ដាខេត្តក្រុងផ្សេងៗ ដើម្បីទប់ស្កាត់មិនឱ្យមានការឆ្លងរាលដាលនៃអាសន្នរោគកូរ៉ូណា Covid-19 ក្នុងប្រទេសនេះ។ បទបញ្ជានេះ ត្រូវបានធ្វើឡើង បន្ទាប់ពីមានមនុស្សម្នាក់មានអាការក្ដៅខ្លួន នៅពេលធ្វើដំណើរពីទីក្រុង Ulaanbaatar ទៅកាន់ខេត្ត Bayan-Ulgii។ ប្រទេសនេះ ក៏កំពុងបង្ខាំងមនុស្សចំនួន5នាក់ឱ្យនៅដាច់ដោយឡែក ប៉ុន្តែនេះគ្រាន់តែជាករណីសង្ស័យថាអាចមានផ្ទុកមេរោគកូរ៉ូណាតែប៉ុណ្ណោះ៕

ប្រភព៖ សារព័ត៌មានបរទេស

February 28, 2020

មហាសែនរំភើបចិត្ត!! ឱនគោរព1…2យុគសម័យ…សម្ព័ន្ធភាពគ្រូពេទ្យ-អ្នកជំងឺតូច

ក្មេងតូច អាយុ 3ឆ្នាំម្នាក់ អតីតអ្នកឆ្លងមេរោគវីរុសកូរ៉ូណាប្រភេទថ្មី ឬ COVID-19 បានលំឱនកាយសម្ដែងការគោរព និងអរគុណដល់អ៊ំស្រីគ្រូពេទ្យដែលបានមើលថែទាំ និងព្យាបាលរូបគេនៅក្នុងមន្ទីរពេទ្យក្នុងទីក្រុង សៅឈីង មណ្ឌលចឺចៀង ភាគខាងកើតប្រទេសចិនកាលពីថ្ងៃសៅរ៍ ទី22 កុម្ភៈកន្លងមក។

រូបភាពដ៏សែនរំភើបចិត្តបែបនេះ ធ្លាប់កើតមានម្ដងរួចមកហើយកាលពី 100ឆ្នាំមុន នៅពេលក្មេងប្រុសម្នាក់ក្នុងសម្លៀកបំពាក់ឈុតបុរាណ បានឱនសម្ដែងការគោរព និងអរគុណដល់អ៊ំប្រុសនាយកមន្ទិរពេទ្យចូក្វាងជឺ ក្នុងគ្រាដែលលោកអ៊ំនាយកមន្ទីពេទ្យកំពុងដើរពិនិត្យបណ្ដាអ្នកជំងឺ ដែលរួមទាំងកុមារម្នាក់នេះផង ដែរ។

អរគុណ អ៊ំស្រីគ្រូពេទ្យ!!

អ្នកលេងបណ្ដាញសង្គមចិន បាននាំគ្នានិយាយថា រូបភាពទាំង2នេះ ទោះជាស្ថិតក្នុងយុគសម័យខុសគ្នាក៏ ដោយ តែឆ្លុះបង្ហាញឱ្យឃើញពីការគោរព និងក្ដីអាណិតអាសូរ និងបារម្ភ រវាងគ្រូពេទ្យ និងអ្នកជំងឺដែលបានបញ្ជូនតៗគ្នាពីជំនាន់មួយមកដល់ជំនាន់មួយ រហូតមក៕

ប្រភព ៖សារព័ត៌មានបរទេស

February 28, 2020

ប្រទេស និងដែនដីជាង50 ចាប់ផ្ដើមហាម ឬកាត់បន្ថយការផ្ដល់ទិដ្ឋាការ ចំពោះអ្នកដំណើរដែលមកពីកូរ៉េខាងត្បូង

បណ្ដាប្រទេស និងដែនដីជាច្រើនក្នុងពិភពលោក បានចាប់ផ្ដើមហាម ឬរឹតបន្តឹងការផ្ដល់ទិដ្ឋាការចំពោះអ្នកដំណើរដែលមកពីកូរ៉េខាងត្បូង ក្នុងស្ថានភាពដែលអាសន្នរោគកូរ៉ូណា Covid-19 កំពុងរាតត្បាតប្រទេសនេះ។

ទីភ្នាក់ងារសារព័ត៌មាន Yonhap ដកស្រង់ព័ត៌មានពីក្រសួងការបរទេសរបស់កូរ៉េខាងត្បូងបានឱ្យដឹងថា ប្រទេស និងដែនដីចំនួន27នៅលើពិភពលោក បានហាមមិនឱ្យចូលទឹកដីរបស់ពួកគេ ចំពោះពលរដ្ឋកូរ៉េខាងត្បូង ឬជនបរទេសទាំងឡាយណាដែលធ្លាប់បានមកកាន់កូរ៉េខាងត្បូងក្នុងអំឡុងប៉ុន្មានសប្ដាហ៍ចុងក្រោយនេះ។

ប្រទេសមួយចំនួននៅអឺរ៉ុប ក៏ចាប់ផ្ដើមរឹតបន្តឹងការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីប្រទេសកូរ៉េខាងត្បូង ក្នុងនោះមានប្រទេស ស៊ែប៊ី (Serbia) ប្រទេសអ៊ីស្លង់(Iceland) និងប្រទេសក្រូអាត(Croatia)។ ប្រទេសមួយចំនួនផ្សេងទៀតក៏បានរឹតបន្តឹងទៅលើការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីតំបន់ដែលមានការរាតត្បាតពីអាសន្នរោគកូរ៉ូណា ដូចជាប្រទេស ជប៉ុន សិង្ហបុរី និងអ៊ីតាលីជាដើម។ គិតមកដល់ពេលនេះ ប្រទេស និងដែនដីសរុបចំនួន25 រួមនឹងប្រទេសចិនផងដែរ បានចាប់ផ្ដើមរឹតបន្តឹងការបង្ខាំងឱ្យនៅដាច់ដោយឡែកចំពោះអ្នកដំណើរដែលមកពីកូរ៉េខាងត្បូង។

ការរឹតបន្តឹងខាងលើនេះ ត្រូវបានគេធ្វើឡើងដោយសារតែមានការព្រួយបារម្ភអំពីការឆ្លងរាលដាលនៃមេរោគកូរ៉ូណាCovid-19 ដែលកំពុងរាតត្បាតនៅកូរ៉េខាងត្បូង។ យោងតាមមជ្ឈមណ្ឌលទប់ស្កាត់ និងគ្រប់គ្រងជំងឺរបស់កូរ៉េខាងត្បូង គិតមកត្រឹមព្រឹកថ្ងៃទី28កុម្ភៈនេះ កូរ៉េខាងត្បូងមានអ្នកឆ្លងមេរោគកូរ៉ូណាចំនួន 2,022នាក់ និងអ្នកស្លាប់ដោយសារមេរោគនេះចំនួន13នាក់។

វីរុសកូរ៉ូណា Covid-19 បានឆ្លងរាលដាលនៅប្រទេសចិនកាលពីចុងឆ្នាំ2019 មកដល់ពេលនេះ អាសន្នរោគនេះបានឆ្លងទៅប្រទេស និងដែនដីយ៉ាងតិច50នៅក្នុងពិភពលោក បណ្ដាលឱ្យមានអ្នកស្លាប់ជាង2,800នាក់ និងជាង82,000នាក់បានឆ្លងមេរោគ ក្នុងនោះភាគច្រើនគឺនៅប្រទេសចិន។ ក្នុងពេលដែលអាសន្នរោគនេះនៅប្រទេសចិន ហាក់ស្ថិតក្នុងការគ្រប់គ្រងបន្តិចម្ដងៗ ប្រទេសផ្សេងៗដូចជាកូរ៉េខាងត្បូង ជប៉ុន អ៊ីតាលី និងអ៊ីរ៉ង់ជាដើម បានលេចឡើង ក្លាយជាតំបន់សម្បុកមេរោគថ្មី។ អង្គការសុខភាពពិភពលោក WHO កាលពីថ្ងៃទី27កុម្ភៈបានព្រមានថា នេះគឺជា “ដំណាក់កាលផ្ដាច់ព្រ័ត្រ” ហើយប្រទេសទាំងអស់ត្រូវតែប្រញាប់ធ្វើសកម្មភាពដើម្បីទប់ស្កាត់ការឆ្លងរាលដាលខ្លាំងជាងនេះ៕

ប្រភព៖ សារព័ត៌មានបរទេស

February 28, 2020

កូរ៉េខាងត្បូង៖ មន្ត្រីសាធារណៈ5រូបបានឆ្លងមេរោគកូរ៉ូណា Covid-19 នាំឱ្យការិយាល័យមួយចំនួនធំ ត្រូវបិទទ្វារ

អាជ្ញាធរទីក្រុង Daegu បានបិទទ្វារការិយាល័យជាច្រើនកន្លែង ក្រោយពីមានមន្ត្រី5នាក់ ត្រូវបានពិនិត្យឃើញមានផ្ទុកវីរុសកូរ៉ូណា Covid-19 ខណៈចំនួនអ្នកបានឆ្លងមេរោគនេះ ក្នុងទីក្រុង Daegu ក៏បានកើនឡើងដល់ជាង1,000នាក់។

ក្រុមមន្ត្រីសុខាភិបាលនៃទីក្រុង Daegu ភាគអាគ្នេយ៍នៃប្រទេសកូរ៉េខាងត្បូង កាលពីម្សិលមិញ បានបញ្ជាក់ថា មានមន្ត្រីរដ្ឋការចំនួន5នាក់ បានឆ្លងមេរោគកូរ៉ូណា Covid-19 ក្រោយពីមន្ត្រី2រូបផ្សេងទៀតត្រូវបានរកឃើញថា មានផ្ទុកមេរោគនេះកាលពីដើមសប្ដាហ៍។

ម្នាក់ក្នុងចំណោមមន្ត្រី3រូបដែលបានក្លាយជាអ្នកជំងឺកូរ៉ូណាថ្មីនោះ គឺជាមន្ត្រីដែលបម្រើការក្នុងនាយកដ្ឋានសំណង់នៃរដ្ឋបាលទីក្រុង ហើយអគារដែលមន្ត្រីម្នាក់នេះកំពុងរស់នៅ ត្រូវបានអាជ្ញាធរបិទមិនឱ្យចេញចូល ដើម្បីធ្វើការសម្លាប់មេរោគ។ ចំណែកមន្ត្រី2រូបផ្សេងទៀត ធ្វើការនៅឯការិយាល័យគ្រប់គ្រងឧទ្យាន Palgongsan និងការិយាល័យគ្រប់គ្រងសំណង់ផ្លូវដែករបស់ទីក្រុង Daegu។ ការិយាល័យរបស់ពួកគេក៏ត្រូវបិទ និងផ្អាកដំណើរការបណ្ដោះអាសន្ន។

កាលពីថ្ងៃទី25កុម្ភៈ បុគ្គលិកម្នាក់នៅឯការិយាល័យអភិបាលរងនៃទីក្រុង Daegu ក៏ត្រូវបានក្រុមវេជ្ជបណ្ឌិតពិនិត្យឃើញថាមានផ្ទុកមេរោគកូរ៉ូណា ចំណែកបុគ្គលិកម្នាក់ទៀតដែលធ្លាប់អង្គុយហូបអាហារជាមួយបុគ្គលិកម្នាក់ខាងលើ ក៏មានផ្ទុកមេរោគកូរ៉ូណា បន្ទាប់ពីបានធ្វើតេស្ត។

ករណីមន្ត្រី បុគ្គលិករដ្ឋបានឆ្លងមេរោគនេះ ធ្វើឱ្យអាជ្ញាធរទីក្រុង Daegu បង្ខំចិត្តបិទទ្វារការិយាល័យជាច្រើនរបស់ខ្លួន ហើយអនុញ្ញាតឱ្យបុគ្គលិកធ្វើការនៅឯផ្ទះ ដើម្បីចៀសវាងការឆ្លងវីរុស។ អាជ្ញាធរកំពុងស្វែងរកអ្នកទាំងឡាយណាដែលធ្លាប់បាននៅក្បែរបុគ្គលិករដ្ឋខាងលើ។

ការិយាល័យពាក់ព័ន្ធនឹងករណីខាងលើ ក៏បាន និងកំពុងស្នើឱ្យបុគ្គលិកទាំងអស់ ត្រូវហូបអាហារដោយឡែកតែម្នាក់ឯង ហើយកិច្ចប្រជុំនានាត្រូវតែធ្វើឡើងទៅតាមមធ្យោបាយអនឡាញ ដូចជាតាមស្មាតហ្វូន ឬបណ្ដាញសង្គម។

មុននេះដែរ មជ្ឈមណ្ឌលសុខភាពសាធារណៈនៃសង្កាត់ Seo-gu ក្នុងទីក្រុង Daegu ក៏ត្រូវបានបិទទ្វារ ដោយសារតែថ្នាក់ដឹកនាំនៃការិយាល័យប្រយុទ្ធប្រឆាំងនឹងអាសន្នរោគ បានឆ្លងវីរុសកូរ៉ូណា ហើយគាត់ក៏បានទទួលស្គាល់ថាខ្លួនជាសមាជិកម្នាក់នៃក្រុមសាសនិកមកពីវិហារ Shincheonji ដែលវិហារនេះត្រូវបានគេចាត់ទុកថាជាសម្បុកមេរោគកូរ៉ូណា។ បុគ្គលិក4នាក់របស់គាត់ក៏បានឆ្លងមេរោគពីថ្នាក់លើ។ ចំណែកមនុស្សចំនួន34នាក់ដែលធ្លាប់បាននៅក្បែរគាត់ ក៏កំពុងបង្ខាំងខ្លួននៅដាច់ដោយឡែកពីគេឯងផងដែរ។

បុគ្គលិកម្នាក់នៃមជ្ឈមណ្ឌលសុខភាពសង្កាត់ Nam-gu នៃទីក្រុង Pohang ក្នុងខេត្ត Gyeongsang ខាងជើង ក៏បានឆ្លងមេរោគបង្កជំងឺរលាកសួត Covid-19 តែបានឈប់ធ្វើការតាំងពីថ្ងៃទី19កុម្ភៈ។

នៅព្រឹកនេះ(28កុម្ភៈ) កូរ៉េខាងត្បូងបានឱ្យដឹងថា ប្រទេសនេះបានរកឃើញអ្នកផ្ទុកមេរោគកូរ៉ូណាថ្មីបន្ថែម256នាក់ ធ្វើឱ្យចំនួនអ្នកផ្ទុកមេរោគនេះឡើងដល់ជាង2,000នាក់ គឺច្រើនជាងគេបង្អស់បើធៀបនឹងបណ្ដាប្រទេសដែលនៅខាងក្រៅប្រទេសចិន។ កូរ៉េខាងត្បូង បច្ចុប្បន្នមិនទាន់មានអ្នកស្លាប់ថ្មីនៅឡើយ ក្រៅតែពី13ករណីកន្លងមក៕

ប្រភព៖ សារព័ត៌មានបរទេស

February 28, 2020

Tag: coronavirus