coronavirus - La Reine Media

ទូទាំងប្រទេសចិន ថ្ងៃនេះមានអ្នកឆ្លងវីរុស COVID-19ថ្មី ត្រឹមតែ19នាក់ប៉ុណ្ណោះ ចំណែកអ្នកស្លាប់មានចំនួន…

ប្រទេសចិនបានប្រកាសឱ្យដឹងថា បានរកឃើញអ្នកផ្ទុកវីរុសកូរ៉ូណា COVID-19 បន្ថែមត្រឹមតែ19នាក់ប៉ុណ្ណោះ ដែលនេះជាតួលេខទាបបំផុតចាប់ពីរោគរាតត្បាតនេះបានផ្ទុះឆ្លងរាលដាល ខណៈដែលអ្នកស្លាប់បន្ថែមមានចំនួន17នាក់ ពោលគឺតិចជាងម្សិលមិញ5ករណី។

គណៈកម្មការសុខាភិបាលចិន ព្រឹកនេះបានរាយការណ៍ថា បានរកឃើញអ្នកផ្ទុកវីរុស COVID-19 ចំនួន19ករណីបន្ថែមទៀត គឺថយចុះខ្លាំងបើធៀបនឹង40ករណីកាលពីថ្ងៃមុន។ នេះក៏ជាកំណើនទាបបំផុតនៅប្រទេសចិន រាប់ចាប់តាំងពីប្រទេសនេះចាប់ផ្ដើមប្រកាសអំពីតួលេខស្ដីអំពី COVID-19 ចាប់ពីថ្ងៃទី20មករា រហូតមកដល់ពេលនេះ។

17នាក់ ក្នុងចំណោមអ្នកដែលបានឆ្លងមេរោគទាំង19នាក់ខាងលើ គឺសុទ្ធតែជាអ្នករស់នៅក្នុងទីក្រុង Wuhan ដែលជាសម្បុកមេរោគ COVID-19 ធំបំផុតនៅប្រទេសចិន។ ក្រៅពីនេះ គឺមានម្នាក់នៅទីក្រុងប៉េកាំង និងម្នាក់ទៀតនៅខេត្តក្វាងតុង ពួកគេគឺជាអ្នកទេសចរមកពីប្រទេសអង់គ្លេស និងប្រទេសអេស្ប៉ាញ។

ប្រទេសចិនក៏បានប្រកាសឱ្យដឹងដែរថា មានអ្នកស្លាប់ដោយសាររោគរាតត្បាត COVID-19 ចំនួន17នាក់កាលពីម្សិលមិញ ដែលទាំងអស់សុទ្ធតែនៅក្នុងខេត្ត Hubei ធ្វើឱ្យចំនួនអ្នកស្លាប់នៅប្រទេសចិន ឡើងដល់ 3,136នាក់។

មកដល់បច្ចុប្បន្ន ប្រទេសចិន មានអ្នកឆ្លងវីរុស COVID-19 សរុបចំនួន 80,754នាក់។ នៅក្នុងសន្និសីទសារព័ត៌មានកាលពីម្សិលមិញ អង្គការសុខភាពពិភពលោក (WHO) បានឱ្យដឹងថា ក្នុងចំណោមអ្នកដែលបានឆ្លងមេរោគទាំងអស់ គឺមាន “ជាង70% បានជាសះស្បើយពីជំងឺ និងបានអនុញ្ញាតឱ្យចេញពីមន្ទីរពេទ្យ”៕

ប្រភព៖ សារព័ត៌មានបរទេស

March 10, 2020

រឿងពិត 3យ៉ាង ពាក់ព័ន្ធនឹង “ដើមកំណើត” វីរុសកូរ៉ូណាប្រភេទថ្មី

ក្រោមការស៊ើបអង្កេតតាមរកប្រភពកំណើតរបស់មេរោគវីរុសកូរ៉ូណាប្រភេទថ្មីដែលបង្កឱ្យកើតជំងឺឆ្លងពីមេរោគ COVID-19 នាពេលបច្ចុប្បន្ន បានកើតមានពាក្យចចាមអារ៉ាម និងការផ្ដល់ព័ត៌មានក្លែងក្លាយជាច្រើន រហូតក្លាយជាចរន្តក្ដៅគគគុកមួយឡើង…ទីភ្នាក់ងារព័ត៌មានស៊ីនហួ បានរួបរួមរឿងពិត 3ប្រការដូចខាងក្រោម៖

1. ជំងឺឆ្លងមេរោគវីរុស COVID-19 មានដើមកំណើតពីធម្មជាតិ

ព្រឹត្តិបត្រវេជ្ជសាស្ត្រល្បីល្បាញលំដាប់ពិភពលោក ឌឹ លែនសិត (The Lancet) បានផ្សព្វផ្សាយសេចក្ដីថ្លែងការណ៍កាលពីខែកុម្ភៈ ដោយបានបដិសេធអំណះអំណាងដែលថា ជំងឺឆ្លងមេរោគវីរុស COVID-19 មិនបានមានដើមកំណើតតាមធម្មជាតិ និងថ្កោលទោសទ្រឹស្ដីសមគំនិតពាក់ព័ន្ធនឹង “អាវុធជីវសាស្ត្រ”។

សេចក្ដីថ្លែងការណ៍បញ្ជាក់ថា គណៈអ្នកវិទ្យាសាស្ត្រមកពីប្រទេសជាច្រើន បានវិភាគអំពីពូជអម្បូររបស់មេរោគវីរុសកូរ៉ូណាប្រភេទថ្មីនេះ និង “បានសរុបយ៉ាងដាច់ខាតថា វីរុសកូរ៉ូណាប្រភេទថ្មីនេះ មានដើមកំណើតនៅក្នុងសត្វព្រៃ ដូចគ្នានឹងចុល្លជីវៈបង្កជំងឺថ្មីចំនួនច្រើនដទៃទៀតដែរ”។

ក្រុមអ្នកជំនាញការផ្នែកសុខភាពចំនួន 27នាក់ បានរៀបរាប់ថា “ក្រសែព័ត៌មានចចាមអារ៉ាម និងការផ្ដល់ព័ត៌មានបែបខុសឆ្គង ពាក់ព័ន្ធនឹងដើមកំណើតរបស់ជំងឺរាតត្បាតនេះ កំពុងធ្វើឱ្យខូចខាតការចែករំលែកព័ត៌មានដែលឆាប់រហ័ស ធំទូលាយ និងច្បាស់លាស់នាពេលបច្ចុប្បន្ន”។

2. ដើមកំណើតរបស់ជំងឺឆ្លងមេរោគវីរុស COVID-19 មិនទាន់បង្ហាញច្បាស់ និងមិនចាំបាច់ត្រូវតែនៅក្នុងប្រទេសចិននោះទេ

ចុង ណានសាន អ្នកជំនាញការខាងជំងឺប្រព័ន្ធដកដង្ហើមល្បីឈ្មោះរបស់ចិន បាននិយាយថា ជំងឺរាតត្បាតបានបង្ហាញខ្លួនឡើងលើកដំបូងនៅក្នុងប្រទេសចិន តែមិនចាំបាច់ត្រូវតែមានដើមកំណើតពីប្រទេសចិននោះទេ។

អង្គការសុខភាពពិភពលោក (WHO) បានចង្អុលបង្ហាញយ៉ាងច្បាស់លាស់ជាច្រើនដងថា ការប្រើពាក្យ COVID-19 ជាឈ្មោះសម្រាប់ហៅជំងឺឆ្លងពីមេរោគវីរុសកូរ៉ូណាប្រភេទថ្មី គឺដើម្បីការពារការប្រើឈ្មោះហៅផ្សេងៗទៀត ដែលអាចនឹងជាការបំពាន ឬជាការបំផ្លាញកេរ្តិ៍ឈ្មោះ ដូចជាការហៅទៅតាមទីតាំងខាងភូមិសាស្ត្រ ដូចជា “វីរុសវូហាន” ជាដើម។

ការថ្លែងព័ត៌មានប្រចាំថ្ងៃរបស់ស្ថាប័ននេះ កាលពីពេលថ្មីៗនេះ បានបញ្ជាក់ថា ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ជាប្រធានបទបញ្ហាលំដាប់ពិភពលោក និងព័ន្ធកិច្ចក្នុងការស៊ើបស្វែងរកប្រភពកំណើតរបស់មេរោគវីរុសប្រភេទនេះនៅតែកំពុងដំណើរការបន្តទៅទៀត។

3. មជ្ឈមណ្ឌលកណ្ដាលនៃការឆ្លងរាលដាល និងដើមកំណើតមេរោគវីរុស អាចមិនមែនកន្លែងតែមួយ

សៀវភៅ “ការឆ្លងរាតត្បាតទូទៅរបស់ជំងឺគ្រុនផ្ដាសាយអេស្បាញៈ1918(Spanish Flu Pandemic: 1918) របស់ កេលវីន ចេមស៍ បានបញ្ជាក់ថា ជំងឺគ្រុនផ្ដាសាយធំអេស្បាញ1918 ដែលបានសម្លាប់ជីវិតមនុស្សទូទាំងពិភភពលោកប្រមាណជា 50-100លាននាក់នោះ ត្រូវបានដាក់ឈ្មោះឱ្យបែបនេះ គឺ ដោយសារតែល្បែងនយោបាយក្នុងអំឡុងសង្គ្រាមលោកលើកទី1។

ប្រទេសអេស្បាញ ដែលដាក់ខ្លួនឯករាជ្យ(មិនលម្អៀងខាងណា)ក្នុងអំឡុងសង្គ្រាមនៅពេលនោះ បានរាយការណ៍ពីការឆ្លងរាតត្បាតរបស់ជំងឺគ្រុនផ្ដាសាយធំកើតថ្មី យ៉ាងបើកចំហ ដែលផ្ទុយនឹងបណ្ដាប្រទេសស្រេកឃ្លានសង្គ្រាមដទៃទៀតដែលខំព្យាយាមបិទបាំង ព្រោះត្រូវការរក្សាស្មារតី និងកម្លាំងចិត្តរបស់ទាហាន។

ខណៈដែលជំងឺគ្រុនផ្ដាសាយធំប្រភេទ អេចឆ៍1 អិន1 (H1N1) ឬគ្រុនផ្ដាសាយជ្រូក ដែលឆ្លងរាលដាលក្នុងអំឡុងដើមឆ្នាំ2009 រហូតចុងឆ្នាំ2010 ត្រូវបានស្គាល់តាមរយៈចំនួនអ្នកឆ្លងមេរោគនេះដ៏ច្រើននៅក្នុងសហរដ្ឋអាមេរិក។

ក៏ប៉ុន្តែ អត្ថបទ “From where did the 2009 ‘swine-origin’ influenza A virus(H1N1) emerge?” ដែលបានផ្សព្វផ្សាយតាមរយៈព្រឹត្តិបត្រ វីរុសវិទ្យា(Virology Journal) ឆ្នាំ2009 បានបញ្ជាក់ថា ការវិភាគខាងវិទ្យាសាស្ត្រ និងការតាមដានព័ត៌មាន បានរកឃើញថា មេរោគបង្កជំងឺផ្ដាសាយជ្រូក ចាប់ផ្ដើមពីមនុស្សនៅក្នុងប្រទេសមិកស៊ិក៕

ប្រភព ៖ សារព័ត៌មានបរទេស

March 10, 2020

មេបញ្ជាការកងទ័ពជើងគោកអ៊ីតាលី ឆ្លងវីរុស Covid-19 ខណៈអ៊ីតាលីបានក្លាយជាប្រទេសដែលមានអ្នកស្លាប់ដោយសារ Covd-19 ខ្ពស់បំផុតលំដាប់ទី2ក្នុងពិភពលោក

លោក Salvatore Farina ត្រូវបានក្រុមគ្រូពេទ្យរកឃើញថា មានផ្ទុកមេរោគកូរ៉ូណា Covid-19 និងកំពុងបង្ខាំងខ្លួននៅក្នុងផ្ទះ និងបានក្លាយជាមន្ត្រីយោធាជាន់ខ្ពស់បំផុត ដែលបានឆ្លងរោគរាតត្បាតនេះ។

“មេបញ្ជាការកងទ័ពជើងគោកអ៊ីតាលី លោក Salvatore Farina បានបង្ខាំងខ្លួនឯងនៅក្នុងផ្ទះ បន្ទាប់ពីគាត់មានអាការមិនស្រួលខ្លួន។ លោក Salvatore Farina ត្រូវបានក្រុមវេជ្ជបណ្ឌិតពិនិត្យសុខភាព និងបានធ្វើតេស្តរកឃើញថា លោកវិជ្ជមានជាមួយនឹងវីរុស Covid-19។ តួនាទីរបស់លោក នឹងត្រូវបានជំនួសបណ្ដោះអាសន្នដោយមេបញ្ជាការ Ferderco Bonato”។ នេះបើតាមទីភ្នាក់ងារសារព័ត៌មាន ANSA ដែលមានទីស្នាក់ការកណ្ដាលនៅទីក្រុង Rome របស់អ៊ីតាលី ចេញផ្សាយកាលពីម្សិលមិញ។

សារព័ត៌មានប្រទេសអ៊ីតាលីបានឱ្យដឹងថា លោក Farina នៅមានសុខភាពល្អនៅឡើយ ប៉ុន្តែ គេមិនទាន់ដឹងច្បាស់អំពីប្រភពចម្លងមេរោគនេះទៅគាត់នៅឡើយដែរ។ លោក Farina គឺជាអ្នកដឹកនាំកំពូលនៃកងទ័ពជើងគោកអ៊ីតាលី ហើយក៏ជាមន្ត្រីយោធាជាន់ខ្ពស់បំផុតក្នុងជួរកងទ័ពរបស់អ៊ីតាលី ដែលបានឆ្លងមេរោគ Covid-19។

តួលេខអ្នកឆ្លងមេរោគ Covid-19 នៅប្រទេសអ៊ីតាលី កើនឡើងខ្លាំងជាងគេក្នុងរយៈពេលតែ24ម៉ោងចុងក្រោយនេះ ខណៈដែលបានរកឃើញអ្នកជំងឺថ្មី 1,797នាក់បន្ថែមទៀត ធ្វើឱ្យចំនួនអ្នកដែលបានឆ្លងមេរោគនៅប្រទេសនេះ កើនដល់ 9,172នាក់ ហើយបានក្លាយជាសម្បុកមេរោគ Covid-19 ធំជាងគេលំដាប់ទីពីរក្នុងពិភពលោក បន្ទាប់ពីប្រទេសចិន។

អ៊ីតាលីក៏ជាប្រទេសដែលមានអ្នកស្លាប់ដោយសារ Covd-19 ខ្ពស់បំផុតលំដាប់ទីពីរក្នុងលោក បន្ទាប់ពីប្រទេសចិនផងដែរ ដោយមានអ្នកស្លាប់ 463នាក់ គឺកើន97ករណី បើធៀបនឹង1ថ្ងៃមុន។ នាយករដ្ឋមន្ត្រីអ៊ីតាលី Giuseppe Conte បានចេញបទបញ្ជាដាក់បម្រាមគោចរនៅទូទាំងប្រទេស ដើម្បីទប់ស្កាត់ការឆ្លងវីរុសដ៏កំណាចនេះ។

គិតមកដល់ពេលនេះ នៅទូទាំងពិភពលោក មានអ្នកឆ្លងវីរុស Covid-19 ចំនួន 113,605នាក់ ក្នុងនោះមាន 4,012នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 10, 2020

អ៊ីតាលីដាក់បម្រាមគោចរទូទាំងប្រទេស ខណៈអ្នកស្លាប់ដោយសារ Covid-19 កើនដល់ជាង4,000នាក់នៅទូទាំងពិភពលោក

Covid-19 បង្ហាញខ្លួននៅក្នុងប្រទេស និងដែនដីចំនួន113 បណ្ដាលឱ្យមនុស្សជាង 114,000នាក់បានឆ្លងមេរោគ ក្នុងនោះ មនុស្សជាង4,000បានស្លាប់។

តួលេខអ្នកឆ្លងមេរោគ Covid-19 នៅប្រទេសអ៊ីតាលី កើនឡើងខ្លាំងជាងគេក្នុងរយៈពេលតែ24ម៉ោងចុងក្រោយនេះ ខណៈដែលបានរកឃើញអ្នកជំងឺថ្មី 1,797នាក់បន្ថែមទៀត ធ្វើឱ្យចំនួនអ្នកដែលបានឆ្លងមេរោគនៅប្រទេសនេះ កើនដល់ 9,172នាក់ ហើយបានក្លាយជាសម្បុកមេរោគ Covid-19 ធំជាងគេលំដាប់ទីពីរក្នុងពិភពលោក បន្ទាប់ពីប្រទេសចិន។

អ៊ីតាលីក៏ជាប្រទេសដែលមានអ្នកស្លាប់ដោយសារ Covd-19 ខ្ពស់បំផុតលំដាប់ទីពីរក្នុងលោក បន្ទាប់ពីប្រទេសចិនផងដែរ ដោយមានអ្នកស្លាប់ 463នាក់ គឺកើន97ករណី បើធៀបនឹង1ថ្ងៃមុន។ នាយករដ្ឋមន្ត្រីអ៊ីតាលី Giuseppe Conte បានចេញបទបញ្ជាដាក់បម្រាមគោចរនៅទូទាំងប្រទេស ដើម្បីទប់ស្កាត់ការឆ្លងវីរុសដ៏កំណាចនេះ។

គិតមកដល់ពេលនេះ នៅទូទាំងពិភពលោក មានអ្នកឆ្លងវីរុស Covid-19 ចំនួន 113,605នាក់ ក្នុងនោះមាន 4,012នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 10, 2020

វៀតណាមមានអ្នកផ្ទុក Covid-19 ជាង30នាក់ ខណៈសាលារៀន22ខេត្តក្រុងត្រូវបានបិទ

ក្រសួងសុខាភិបាលវៀតណាម នៅល្ងាចនេះ (9មីនា) បានប្រកាសឱ្យដឹងថា បុរសជនជាតិអង់គ្លេសម្នាក់ អាយុ49ឆ្នាំ ធ្វើដំណើរតាមជើងយន្តហោះ VN0054 មានផ្ទុកមេរោគ Covid-19។

វត្ថុវិភាគដែលយកពីអ្នកដំណើរនេះ ត្រូវបានមជ្ឈមណ្ឌលគ្រប់គ្រងរោគ Quang Nam ផ្ញើទៅកាន់មន្ទីរពេទ្យ Pasteur Nha Trang ដើម្បីពិសោធរកមេរោគ។ អ្នកជំងឺនេះ កំពុងទទួលការព្យាបាលនៅមន្ទីរពេទ្យ Quang Nam ខាងជើង (Hospital northern mountainous Quang Nam)។ នេះបើតាមសារព័ត៌មាន VNexpress។

នៅក្នុងចំណោមអ្នកមានផ្ទុកមេរោគ Covid-19 ចំនួន 15នាក់ដែលទើបបានប្រកាសឱ្យដឹងថ្មីៗនេះ គឺមានម្នាក់មកពីប្រទេសកូរ៉េខាងត្បូង ចំណែក14នាក់ផ្សេងទៀត បានធ្វើដំណើរតាមជើងយន្តហោះ London-Hanoi ឬមានជាប់ទាក់ទិននឹងជើងហោះហើរនេះ។

អាជ្ញាធរវៀតណាម បានរកឃើញមនុស្សរាប់រយនាក់ ដែលជាប់ទាក់ទិនផ្ទាល់ និងប្រយោលជាមួយនឹងអ្នកជំងឺដែលធ្វើដំណើរតាមជើងយន្តហោះ VN0054ខាងលើ។

បច្ចុប្បន្ន ប្រទេសវៀតណាម មានអ្នកជំងឺកូរ៉ូណា Covid-19 ចំនួន 31នាក់ ក្នុងនោះមាន 16នាក់បានជាសះស្បើយ។ ក្រៅពីនេះ មនុស្សរាប់ពាន់នាក់ត្រូវបានដាក់ឱ្យនៅដាច់ដោយឡែក ក្រោមការតាមដានរបស់ក្រសួងសុខាភិបាលវៀតណាម។ ថ្នាក់ដឹកនាំជាច្រើនរូបនៃប្រទេសនេះ ក៏កំពុងបង្ខាំងខ្លួនឯងរយពេល 14ថ្ងៃ ព្រោះតែមានជាប់ទាក់ទិនផ្ទាល់ជាមួយនៃអ្នកជំងឺ Covid-19។

ទន្ទឹមនឹងនេះ សាលារៀននៅក្នុងបណ្ដាខេត្តក្រុងចំនួន22នៃប្រទេសនេះ ក៏ត្រូវបានបិទជាបណ្ដោះអាសន្ន ក្នុងនោះមានទីក្រុងហូជីមិញ ដែលមានជនជាតិខ្មែររាប់សែននាក់កំពុងធ្វើការនៅទីនេះ។ សាលារៀននៅក្នុងខេត្តត្រាវិញ (Travinh/ព្រះត្រពាំង) ដែលជាខេត្ត1មានជនជាតិខ្មែរជាង 30% និងជនជាតិចិន 1,65% ក៏ត្រូវបានបិទបណ្ដោះអាសន្នផងដែរ៕

March 9, 2020

វូហាន បិទ “មន្ទីរពេទ្យបណ្ដោះអាសន្ន” ខ្នាត 2,000គ្រែ ក្រោយទិដ្ឋភាពរួម COVID-19 ក្នុងតំបន់ល្អប្រសើរឡើង…

ស៊ីនហួ/វូហាន – ខណៈនេះអ្នកជំងឺឆ្លងមេរោគវីរុសកូរ៉ូណាប្រភេទថ្មី ឬ COVID-19 គ្រប់រូបដែលបានចូលទទួលការព្យាបាលក្នុងមន្ទីរពេទ្យបណ្ដោះអាសន្ន “បន្ទប់អង្គុយលេងវូហាន” ក្នុងទីក្រុងវូហាន មណ្ឌលហ៊ូពេយ ភាគកណ្ដាលប្រទេសចិន ត្រូវបានបញ្ជូនត្រឡប់ទៅផ្ទះ ឬទៅមន្ទីរពេទ្យដទៃទៀតរួចរាល់អស់ហើយ តាំងពីពេលរសៀលថ្ងៃសៅរ៍(ទី7មីនា) ក្រោយពីស្ថានការណ៍ជំងឺឆ្លងនៅក្នុងតំបន់នេះ មានសញ្ញាល្អប្រសើរឡើងជាលំដាប់។

ទាំងអស់នេះ មន្ទីរពេទ្យបណ្ដោះអាសន្នឈ្មោះ “បន្ទប់អង្គុយលេងវូហាន” គឺជាមន្ទីរពេទ្យគ្រាអាសន្នមួយក្នុងចំណោមមន្ទីរពេទ្យគ្រាអាសន្នជាច្រើនទៀត ដែលត្រូវបានកែច្នៃពីអគារសាធារណៈ ដើម្បីទទួលអ្នកឆ្លងមេរោគដែលមានអាការធ្ងន់ធ្ងរ ដោយបានកែច្នៃជាមន្ទីរពេទ្យដែលមានគ្រែសម្រាប់អ្នកជំងឺដល់ទៅ 2,000គ្រែ និងបានបើកទទួលអ្នកជំងឺក្រុមដំបូងកាលពីថ្ងៃទី5 កុម្ភៈ។

បណ្ដាអាជ្ញាធរសុខាភិបាល និងបុគ្គលិកពេទ្យនៅទីនេះ បានបំពេញការងារយ៉ាងខ្លាំងក្លាក្នុងការពិនិត្យលម្អិត និងព្យាបាលអ្នកជំងឺ ខណៈដែលអ្នកជំងឺក៏អាចធ្វើកិច្ចការងារផ្សេងៗបានដែរដូចជា រាំ ហាត់ប្រាណ ឬអានសៀវភៅ ជាដើម៕

បុគ្គលិកមន្ទីរពេទ្យ ចុងណាន់ មហាវិទ្យាល័យវូហាន ថតរូបជុំគ្នានៅក្នុងមន្ទីរពេទ្យបណ្ដោះអាសន្ន “បន្ទប់អង្គុយលេងវូហាន” ក្នុងថ្ងៃបិទទ្វារមន្ទីរពេទ្យ(ទី8មីនា)។

បុគ្គលិកមន្ទីរពេទ្យចុងណាន់ មហាវិទ្យាល័យវូហាន កំពុងដើរត្រួតត្រាក្នុងមន្ទីរពេទ្យបណ្ដោះអាសន្ន “បន្ទប់អង្គុយលេងវូហាន” ក្នុងទីក្រុងវូហាន មណ្ឌលហ៊ូពេយ។

បុគ្គលិកមន្ទីរពេទ្យ ចុងណាន់ មហាវិទ្យាល័យវូហាន ថតរូបនៅក្នុងមន្ទីរពេទ្យបណ្ដោះអាសន្ន “បន្ទប់អង្គុយលេងវូហាន” ទីក្រុងវូហាន មណ្ឌលហ៊ូពេយ នៅថ្ងៃបិទទ្វារមន្ទីរពេទ្យ(ទី8មីនា)។

ប្រភព៖ សារព័ត៌មានបរទេស

March 9, 2020

“ស្នាមត្រានៃមហាវីរកម្ម លើផ្ទៃមុខដ៏ស្រស់ស្អាត នៃវីរបុរស-វីរនារី អ្នកប្រយុទ្ធតតាំងនឹងមេរោគ…

ពួកគេប្រៀបដូចជាអ្នកប្រយុទ្ធក្នុង “សង្គ្រាមមេរោគ” ដែលតស៊ូពុះពារប្រតិបត្តិតួនាទីក្នុងខ្សែត្រៀមមុខ កណ្ដាលក្រុមអ្នកជំងឺដែលផ្ទុកមេរោគកំណាច និងសាកសព ដោយមានម៉ាស់អនាម័យ និងឈុតការពារមេរោគ ជាខែលការពារខ្លួន ពីពួកសត្រូវដែលបំបាំងកាយនៅក្នុងអាកាសធាតុ…ជាសត្រូវដែលមើលមិនឃើញ។

ព័ត៌មានចាប់ពីថ្ងៃទី4 មករា រហូតមក មានបុគ្គលិកពេទ្យនៅក្នុងប្រទេសចិន ឆ្លងមេរោគកូរ៉ូណាប្រភេទថ្មី មិនតិចជាង 3,000នាក់ និងមានវេជ្ជបណ្ឌិត ដែលបានស្លាប់ មិនតិចជាង 10នាក់ឡើយ។

ពួកគេទាំងនោះ…គឺជាឪពុក ជាម្ដាយ ជាស្វាមី ជាភរិយា ជាកូន ជាមិត្តសំឡាញ់…ពួកគេបានប្រាប់ថា “ពួកយើង មិនមែនជាវីរបុរស-វីរនារីទេ ព្រោះនេះជាភារកិច្ចរបស់ពួកយើង”។

សារព័ត៌មានចិន នាន់ ហ្វាង ទូ ស៊ឺ (南方都市报) បានផលិតសារព័ត៌មានច្បាប់ពិសេស 1ច្បាប់ ឈ្មោះថា “ស្នាមត្រា” ដោយបានបង្ហាញរូបភាពឈុតនៃផ្ទៃមុខរបស់បណ្ដាគ្រូពេទ្យ និងគិលានុបដ្ឋាកដែលបានដោះម៉ាស់ការពារចេញ បង្ហាញឱ្យឃើញ “ស្នាមត្រានៃមហាវីរកម្ម”…ជាផ្ទៃមុខដ៏ស្រស់ស្អាត និងភាពតស៊ូដ៏មោះមុត។

យើងនាំគ្នាមកស្ដាប់ពាក្យសម្ដីដ៏សែនរំជួលចិត្តរបស់ពួកគេ ដូចតទៅ…៖

1.ជឹង តុងអ៊ឺ គិលានុបដ្ឋាក នៃមន្ទីពេទ្យរបស់មហាវិទ្យាល័យ ជីណាន់

“ពួកយើងមិនអាចថយបានទេ! និងមិនដែលគិតថា នឹងថយទៀតផង…”

2. ចូ យៀនភឹង គិលានុដ្ឋាក នៃមន្ទីរពេទ្យ ណាន់ហ្វាង

“ខ្ញុំនឹកសង្ឃឹមត្រឹមតែបានសាងជាគំរូដ៏ល្អដល់មនុស្សជំនាន់ក្រោយប៉ុណ្ណោះ
ជាគំរូមួយដ៏មានគុណតម្លៃ
សង្ឃឹមថា នៅពេលពួកគេជួបឧបសគ្គ ពួកគេនឹងមិនរួញរា…”

3. ទឹង យ៉ា គិលានុបដ្ឋាក នៃមន្ទីរពេទ្យប្រជាជន មណ្ឌល ក្វាងទុង

“ជាធម្មតា ពួកយើងនិយាយគ្នាតាម វីឆាត
ម៉ែនៅតែគិតថា ខ្ញុំកំពុងធ្វើការនៅក្វាងទុង
ហើយពុកក៏មិនបានប្រាប់ម៉ែដែរ…”

4. ខុង ភើយវឹន គិលានុបដ្ឋាក នៃមន្ទីពេទ្យប្រជាជន មណ្ឌល ក្វាងទុង

“វាមិនល្អមើលសោះ!
ឃើញស្លាកស្នាមទាំងអស់នេះហើយ នឹកអាណិតខ្លួនឯងណាស់…
ចាំឱ្យអ្វីៗគ្រប់យ៉ាងល្អប្រសើរឡើងវិញ នោះមនុស្សខ្ញុំដូចពីមុន នឹងត្រឡប់មកស្អាតម្ដង
ទៀត…”

5. វេជ្ជបណ្ឌិត ស៊ឺ ស៊ាង ផ្នែកអ្នកជំងឺធ្ងន់ នៃមន្ទីពេទ្យរបស់មហាវិទ្យាល័យ ចុងសាន់

“រឿងដែលខ្ញុំចង់ធ្វើខ្លាំងបំផុតនៅពេលនេះ គឺផឹកកូកាកូឡា 1ដប…ហ្នឹងគឺមានសេចក្ដីសុខបំផុត…
មុនហ្នឹង ខ្ញុំផឹកទឹកផ្លែឈើម្ដងកន្លះលិត្រ 1ក្អឹកអស់រលីង”

6. អ៊ូ ជីនលីង គិលានុបដ្ឋាក ប្រចាំមន្ទីពេទ្យរបស់មហាវិទ្យាល័យ ជីណាន់

“ពីដំបូងដែលឃើញអ្នកជំងឺដែលមើលទៅរាងអស់សង្ឃឹម
ពួកយើងមានអារម្មណ៍សោកសៅ និងអាណោចអធមខ្លាំងណាស់…
កាលពីសប្ដាហ៍មុន ពួកយើងស្លៀកឈុតការពារមេរោគពណ៌លឿង
លោកគ្រូពេទ្យ ពាក់វាត្រឹមតែ 1ម៉ោងក៏ហួសនឹងទ្រាំទៅហើយ
តែខ្ញុំទ្រាំស្លៀកវាបានដល់ទៅ 3ម៉ោង”

7. អ៊ូ ចាងមិង គិលានុបដ្ឋាក នៃមន្ទីរពេទ្យប្រជាជន ប្រចាំមណ្ឌល ក្វាងទុង

“មុនចាប់ផ្ដើមធ្វើការ ខ្ញុំថតវីដេអូខ្លួនឯង
ដកដង្ហើមធំហើយ…ស្រែក “ស៊ូឡើង! ស៊ូឡើង!”
ខ្ញុំត្រូវតែមើលថែទាំខ្លួនឯងឱ្យបាន ហើយនឹងត្រឡប់មកវិញព្រមជាមួយជ័យជម្នះ!”

8. វេជ្ជបណ្ឌិត សៀវ កួនហួ ផ្នែកប្រព័ន្ធដកដង្ហើម មន្ទីរពេទ្យ ណាន់ហ្វាង

“ការពិតទៅ ពេលនោះ ខ្ញុំមានអារម្មណ៍កង្វល់ខ្លាំងណាស់
ទើបប្រពន្ធខ្ញុំនិយាយឡើងថា
“បើបងឯងមិនទៅ វាលែងជាបងឯងហើយ…”

9. វេជ្ជបណ្ឌិត អ៊ី ហ៊ុយ ប្រចាំផ្នែកជំងឺប្រព័ន្ធដកដង្ហើម មន្ទីរពេទ្យ ចុងសាន់

“ម្សិលមិញ ជាថ្ងៃខួបកំណើតកូនស្រី
ខ្ញុំមានអារម្មណ៍សោកស្ដាយ
ដែលធ្វើឱ្យកូនអស់សង្ឃឹម…
ឆ្នាំនេះនាងអាយុ 4ឆ្នាំហើយ
រាល់ឆ្នាំ ខ្ញុំតែងនៅជាមួយនាង
សង្ឃឹមថា ពួកគេនឹងស្ងប់ចិត្ត និងមានសុវត្ថិភាព”

10. ចាង ជឺពួ គិលានុបដ្ឋាក មន្ទីរពេទ្យ ណាន់ហ្វាង

“សង្ឃឹមថា ស្ថានការណ៍ នឹងល្អប្រសើរឡើងឆាប់ៗនេះ
ចង់ត្រឡប់ទៅផ្ទះវិញ…
ខ្ញុំនៅខាងក្រៅយូរហើយ
យូររហូតដល់ភ្លេចពីអារម្មណ៍ពេលនៅផ្ទះមានប៉ាម៉ាក់មើលថែទាំ”៕

ប្រភព៖ សារព័ត៌មានបរទេស

March 9, 2020

អភិបាលតំបន់2រូបរបស់ប្រទេសអ៊ីតាលី បានឆ្លង Covid-19! អ៊ីតាលីក្លាយជាប្រទេសមានអ្នកឆ្លងវីរុសនេះច្រើនជាងគេលំដាប់ទី2 នៅក្នុង…

អភិបាលតំបន់ Piedmont លោក Alberto Cirio ត្រូវបានគេធ្វើតេស្តឃើញថា មានផ្ទុកវីរុសកូរ៉ូណា Covid-19 ក្លាយជាអ្នកដឹកនាំតំបន់ទី2 របស់អ៊ីតាលី ដែលបានឆ្លងមេរោគនេះ ក្នុងរយៈពេលត្រឹមតែ 24ម៉ោងកន្លងប៉ុណ្ណោះ។

តំបន់ Piedmont ស្ថិតនៅក្នុងភាគពាយព្យនៃប្រទេសអ៊ីតាលី ដោយមានទីក្រុងធំឈ្មោះ Turin។ នេះគឺជាតំបន់ដែលរងផលប៉ះពាល់ធ្ងន់បំផុតលំដាប់ទី4 ដោយសារវីរុស Covid-19 នៃប្រទេសនេះ។

នៅមុនករណីឆ្លងរោគរបស់អភិបាលតំបន់ Piedmont អភិបាលតំបន់ Lazio លោក Nicola Zingaretti អាយុ54ឆ្នាំ កាលពីថ្ងៃទី7មីនា ក៏បានប្រកាសថា បានឆ្លងរោគរាតត្បាត Covid-19 នេះដែរ ប៉ុន្តែ លោកឱ្យដឹងថា លោកនៅមានសុខភាពល្អនៅឡើយ។ លោក Zingaretti ក៏ជាមេដឹកនាំបក្សប្រជាធិបតេយ្យនៃប្រទេសអ៊ីតាលី ហើយបក្សនេះ បានរួមដៃជាមួយចលនាផ្កាយ5 (Five Star Movement) បង្កើតបានជារដ្ឋាភិបាលចម្រុះ ដឹកនាំប្រទេសអ៊ីតាលីផងដែរ។

លោក Zingaretti មេដឹកនាំបក្សប្រជាធិបតេយ្យ និងជាអភិបាលតំបន់ Lazio

ប្រទេសអ៊ីតាលី បានរកឃើញអ្នកផ្ទុកមេរោគកូរ៉ូណាចំនួន 1,492នាក់បន្ថែមទៀត ធ្វើឱ្យចំនួនអ្នកបានឆ្លងវីរុសនេះ កើនដល់ 7,375នាក់។ បច្ចុប្បន្ន ប្រទេសនេះ បានក្លាយជាសម្បុកមេរោគកូរ៉ូណាធំបំផុតទី2 ជំនួស “តំណែង” របស់កូរ៉េខាងត្បូង៕

ប្រភព៖ សារព័ត៌មានបរទេស

March 9, 2020

មនុស្សជិត 110,000នាក់ បានឆ្លងវីរុស Covid-19 នៅទូទាំងពិភពលោក ក្នុងនោះចំនួនអ្នកស្លាប់បានកើនដល់…

វីរុស Covid-19 បានឆ្លងរាលដាលទៅដល់ប្រទេស និងដែនដីចំនួន 104 នៅទូទាំងពិភពលោក បណ្ដាលឱ្យមនុស្សចំនួន 109,840នាក់បានឆ្លងជំងឺនេះ ក្នុងនោះមានអ្នកជំងឺ 3,805នាក់ បានបាត់បង់ជីវិត។

ចំនួនអ្នកឆ្លងវីរុសកូរ៉ូណា Covid-19 នៅប្រទេសអ៊ីតាលី និងអ៊ីរ៉ង់ នៅតែបន្តកើនឡើងយ៉ាងឆាប់រហ័ស។ អ៊ីតាលី បានរកឃើញអ្នកផ្ទុកមេរោគកូរ៉ូណាចំនួន 1,492នាក់បន្ថែមទៀត ធ្វើឱ្យចំនួនអ្នកបានឆ្លងវីរុសនេះ កើនដល់ 7,375នាក់ ខណៈដែលអ្នកបានឆ្លងជំងឺនេះនៅអ៊ីរ៉ង់ គឺ 6,566នាក់ កើន 743នាក់ បើធៀបនឹងមុននេះ1ថ្ងៃ។ ដូច្នេះ អ៊ីតាលី បានក្លាយជាសម្បុកមេរោគកូរ៉ូណាធំបំផុតទី2 ជំនួស “តំណែង” របស់កូរ៉េខាងត្បូង។

អ៊ីតាលី នៅតែជាប្រទេសដែលមានអ្នកស្លាប់ដោយសារ Covid-19 ច្រើនជាងគេលំដាប់ទី2 បន្ទាប់ពីប្រទេសចិន ដោយមានអ្នកស្លាប់366នាក់ កើន133ករណី ធៀបនឹងមុននេះ1ថ្ងៃ។ ប្រទេសនេះបានដាក់បម្រាមគោចរចំពោះពលរដ្ឋនៅក្នុងតំបន់សម្បុកមេរោគ Lombardy និងខេត្តចំនួន11 នៅក្នុងតំបន់ Emilia-Rmagna តំបន់ Veneto តំបន់ Piedmont និងតំបន់ Marche ដើម្បីទប់ស្កាត់ការឆ្លងរាលដាលនៃរោគរាតត្បាត Covid-19។

ប្រទេសកូរ៉េខាងត្បូងវិញ មានអ្នកឆ្លងរោគកូរ៉ូណានេះ ចំនួន7,314នាក់ គឺកើន272ករណី ធៀបនឹងមុននេះ1ថ្ងៃ។ ចំណែកអ្នកស្លាប់ដោយសារជំងឺរលាកសួតដែលបង្កឡើងដោយវីរុស Covid-19នេះ បានឡើងដល់50នាក់។

ប្រទេសចិន មិនទាន់បានប្រកាសឱ្យដឹងអំពីតួលេខថ្មីសម្រាប់ព្រឹកនេះនៅឡើយ ប៉ុន្តែ ព័ត៌មានចុងក្រោយបានឱ្យដឹងថា ប្រទេសនេះ មានអ្នកផ្ទុកមេរោគរាតត្បាតកូរ៉ូណាចំនួន 80,699នាក់ ក្នុងនោះ អ្នកជំងឺចំនួន 3,803នាក់បានបាត់បង់ជីវិត។

ប្រទេសបារាំង មានអ្នកផ្ទុកវីរុសកូរ៉ូណាចំនួន 1,126នាក់ ក្នុងនោះមានករណីស្លាប់ចំនួន19នាក់ ខណៈប្រទេសអាល្លឺម៉ង់មានអ្នកឆ្លងមេរោគនេះ ចំនួន 1,040នាក់។

ក្រៅពីបណ្ដាប្រទេសខាងលើ ក៏នៅមានប្រទេសជាច្រើន មានអ្នកផ្ទុកមេរោគកូរ៉ូណាច្រើនផងដែរ មានដូចជា ប្រទេសអេស្ប៉ាញ មានអ្នកផ្ទុកមេរោគកូរ៉ូណាចំនួន 673នាក់ ក្នុងនោះមានអ្នកស្លាប់ចំនួន 17នាក់។ សហរដ្ឋអាមេរិក មានអ្នកផ្ទុកមេរោគ 531នាក់ កើនឡើង96នាក់ បើធៀបនឹងម្សិលមិញ ក្នុងនោះដែរ អ្នកស្លាប់មានចំនួន21នាក់។

មេរោគរាតត្បាត Covid-19 បានចាប់ផ្ដើមផ្ទុះឆ្លងនៅតំបន់ Wuhan ចាប់ពីខែធ្នូ ឆ្នាំ2019 ហើយវាបានឆ្លងរាលដាលទៅប្រទេស និងដែនដីចំនួន 104 ក្នុងពិភពលោក ធ្វើឱ្យមនុស្សជិត 110,000នាក់ បានឆ្លងរោគនេះ ក្នុងនោះមានមនុស្ស 3,805នាក់បានស្លាប់ និងជិត 61,000នាក់ បានជាសះស្បើយពីជំងឺ៕

ប្រភព៖ សារព័ត៌មានបរទេស

March 9, 2020

អ្នកផ្ទុកវីរុស Covid-19 ម្នាក់នៅអាមេរិក បានចូលរួមក្នុងកិច្ចប្រជុំមួយដែលមានលោកក Trump និងលោក Mike Pence

មនុស្សម្នាក់ដែលត្រូវបានគេរកឃើញថាមានផ្ទុកមេរោគ Covid-19 បានចូលរួមសន្និសីទនយោបាយមួយនៅក្បែររដ្ឋធានី Washington ដែលមានការចូលរួមរបស់លោក Trump និងមន្ត្រីរដ្ឋាភិបាលសហរដ្ឋអាមេរិកជាច្រើនរូបផងដែរ។

នៅក្នុងកិច្ចប្រជុំដែលមានឈ្មោះថា “សន្និសីទសកម្មភាពនយោបាយអភិរក្សនិយម” ហៅកាត់ថា CPAC(Conservative Political Action Conference) ដែលមានវត្តមានរបស់អ្នកជំងឺកូរ៉ូណាម្នាក់ខាងលើនេះ និងត្រូវបានធ្វើឡើងនៅក្នុងរដ្ឋ Maryland នៃសហរដ្ឋអាមេរិក កាលពីថ្ងៃទី26 ដល់ថ្ងៃទី29 ខែមីនា ឆ្នាំ2020នោះ គេឃើញថាមានការចូលរួមរបស់មន្ត្រីជាន់ខ្ពស់អាមេរិកជាច្រើនរូប ដូចជាប្រធានាធិបតីអាមេរិក Donald Trump អនុប្រធានាធិបតីអាមេរិក Mike Pence។ល។

សហភាពអភិរក្សអាមេរិកាំង ACU (American Conservative Union) ដែលជាអ្នករៀបចំកិច្ចប្រជុំនេះ បានឱ្យដឹងថា “ម្នាក់នេះបានឆ្លងមេរោគ មុនពេលមកចូលរួមកិច្ចប្រជុំ។ មន្ទីរពេទ្យនៅ New Jersey បានបង្ខាំងអ្នកជំងឺនេះ និងបានធ្វើតេស្តរកមេរោគ ហើយក្រោយមក មជ្ឈមណ្ឌលគ្រប់គ្រង និងទប់ស្កាត់រោគឆ្លងរបស់សហរដ្ឋអាមេរិក បានបញ្ជាក់ថា មនុស្សនេះមានផ្ទុកមេរោគកូរ៉ូណាពិតមែន”។

“អ្នកជំងឺនេះមិនបាននៅក្បែរប្រធានាធិបតី ឬអនុប្រធានាធិបតី និងមិនបានចូលរួមក្នុងព្រឹត្តិការសំខាន់នៃកិច្ចប្រជុំនេះទេ” នេះបើតាម ACU។

សហរដ្ឋអាមេរិក បច្ចុប្បន្ន មានអ្នកជំងឺ Covid-19 ចំនួន 433នាក់ ក្នុងនោះមាន 17នាក់បានស្លាប់ ខណៈនៅទូទាំងពិភពលោក មានប្រទេស និងដែនដីចំនួន102 បានរាយការណ៍ថា មានអ្នកឆ្លងមេរោគនេះ ក្នុងនោះដែរចំនួនអ្នកបានឆ្លងមេរោគកូរ៉ូណាសរុប 106,165នាក់ ដោយបូករួមទាំងអ្នកដែលបានស្លាប់ចំនួន 3,594នាក់៕

ប្រភព៖ សារព័ត៌មានបរទេស

March 8, 2020

Tag: coronavirus