coronavirus - La Reine Media

ប្រធានាធិបតីប្រេស៊ីល ប្រកាសថា លោកអវិជ្ជមានជាមួយនឹង COVID-19 ដែលផ្ទុយទៅនឹងដំណឹងដែលសារព័ត៌មានមួយចំនួនធ្លាប់បានចុះផ្សាយ

ប្រធានាធិបតីប្រេស៊ីល លោក Jair Bolsonaro បានឱ្យដឹងថា លោកត្រូវបានធ្វើតេស្តរកមេរោគ COVID-19 ហើយលទ្ធផលទទួលបាននោះគឺ “អវិជ្ជមាន” ដែលនេះបានផ្ទុយទៅនឹងការចុះផ្សាយរបស់សារព័ត៌មានធំៗមួយចំនួន។

“មន្ទីរពេទ្យយោធា Sabin បានប្រគល់លទ្ធផលនៃការធ្វើតេស្ដដែលបង្ហាញថា អវិជ្ជមានជាមួយ COVID-19 មកលោកប្រធានាធិបតី Jair Bolsonaro” នេះបើតាមព័ត៌មានដែលបានបង្ហោះនៅលើគណនី Facebook របស់ប្រធានាធិបតីប្រេស៊ីល។

ប្រធានាធិបតី Bolsonaro ត្រូវបានធ្វើតេស្តរកមេរោគ បន្ទាប់ពីមានបុគ្គលិកម្នាក់របស់លោក មានផ្ទុកមេរោគ COVID-19។ លោក Bolsonaro ទើបតែបានត្រឡប់មកពីសហរដ្ឋអាមេរិក និងបានជួបពិភាក្សាជាមួយប្រធានាធិបតីអាមេរិក លោក Donald Trump កាលពីថ្ងៃទី7មីនាកន្លងទៅ។ នេះបើតាមសារព័ត៌មាន AFP/Fox News។

ប្រធានាធិបតីប្រេស៊ីល លោក Jair Bolsonaro (ស្ដាំ) ចាប់ដៃជាមួយប្រធានាធិបតីសហរដ្ឋអាមេរិក លោក Donald Trump

មុននោះ Fox News ដកស្រង់សម្ដីរបស់ Eduardo ដែលជាកូនប្រុសរបស់ប្រធានាធិបតីប្រេស៊ីល បានឱ្យដឹងថា ឪពុករបស់គាត់ “វិជ្ជមាន” ជាមួយនឹងវីរុស COVID-19 និងកំពុងរង់ចាំលទ្ធផលនៃការធ្វើតេស្តជាលើកទី2។ ប៉ុន្តែ Eduardo បែរជាបង្ហោះសារនៅលើ Twitter ថា “ការធ្វើតេស្តរកមេរោគទៅលើប្រតិភូដែលបានអមដំណើរប្រធានាធិបតី Jair Bolsonaro ទៅកាន់សហរដ្ឋអាមេរិក មិនទាន់បានបញ្ចប់នៅឡើយ” និងថែមទាំងបានសម្ដែងការមិនសប្បាយចិត្តចំពោះ “អ្នកដែលបានបញ្ចេញដំណឹងចចាមអារ៉ាម” និង “ព័ត៌មានមិនពិត” ដែលថា ឪពុករបស់ខ្លួនបានឆ្លងវីរុសCOVID-19 ទៀតផង៕

ប្រភព៖ សារព័ត៌មានបរទេស

March 14, 2020

អ្នកជំនាញផ្នែកវេជ្ជសាស្ត្រថា “អ្នកជក់បារី ងាយរងគ្រោះជាងគេ ពេលបានឆ្លងវីរុស COVID-19

វីរុសកូរ៉ូណា COVID-19 បានចាប់ផ្ដើមឆ្លងរាលដាលនៅឯទីក្រុង Wuhan ប្រទេសចិន កាលពីចុងឆ្នាំ2019 ហើយបានឆ្លងរាលដាលទៅប្រទេស និងដែនដីចំនួន138 នៅទូទាំងពិភពលោក និងបានធ្វើឱ្យមនុស្សចំនួនជាង 145,000នាក់កើតរោគ ក្នុងនោះ មានមនុស្ស5,401នាក់ បានបាត់បង់ជីវិត ហើយក្នុងចំណោមអ្នកដែលបានឆ្លងរោគនេះ មាន7ករណី ត្រូវបានរកឃើញនៅកម្ពុជា។

មេរោគ COVID-19 គឺជាវីរុសកូរ៉ូណាថ្មីមួយដែលបង្កឱ្យកើតជំងឺផ្លូវដង្ហើម និងអាចឆ្លងពីសត្វមកមនុស្ស និងពីមនុស្សម្នាក់ទៅមនុស្សម្នាក់ តាមរយៈកណ្ដាស់ ក្អក ឬប៉ះពាល់គ្នាជាដើម។ COVID-19 អាចសម្លាប់មនុស្ស បានយ៉ាងងាយ ដោយប្រើពេលតិចជាងជំងឺមហារីក ជំងឺអេដស៍។ល។ COVID-19 ត្រូវបានអ្នកខ្លះហៅថា “មេរោគស៊ីសួត” ព្រោះថា ពេលបានឆ្លងចូលទៅក្នុងរាងកាយមនុស្ស មេរោគនេះ តែងតែ “វាយប្រហារ” ទៅលើសួត ធ្វើឱ្យសួតត្រូវរងរបួស រលាក និងខូចខាត ហើយបើព្យាបាលមិនទាន់ពេលនោះទេ អ្នកជំងឺនឹងត្រូវប្រឈមនឹងការស្លាប់មិនខាន។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាលកម្ពុជា។

អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ចំពោះអ្នកដែលមានបញ្ហាសួតស្រាប់ បើសិនជាបានឆ្លងមេរោគ COVID-19នេះទៀត អ្នកជំងឺនឹងត្រូវប្រឈមនឹងគ្រោះថ្នាក់ខ្ពស់ជាងអ្នកដែលមិនមានបញ្ហាសួត។

បច្ចុប្បន្ន កម្ពុជាមានអ្នកជំងឺផ្លូវដង្ហើម ឬបញ្ហាផ្លូវសួត ចំនួនជាង 2លាននាក់ ដែលភាគច្រើនត្រូវបានរកឃើញថា បណ្ដាលមកពីការជក់បារី។ ផ្សែងបារី អាចបង្កជំងឺមួយចំនួនផ្សេងទៀត ដូចជា ជំងឺលើសឈាម ជំងឺទឹកនោមផ្អែម និងជំងឺរលាកសួត។ល។ នេះបើតាមប្រសាសន៍របស់ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាលកម្ពុជា។

រដ្ឋលេខាធិការក្រសួងសុខាភិបាល បន្តថា COVID-19 នឹងបង្កហានិភ័យខ្ពស់ចំពោះអ្នកដែលមានរោគប្រចាំកាយស្រាប់ បើសិនជាវាបានឆ្លងចូលដល់រាងកាយ ជាពិសេសបំផុតគឺចំពោះអ្នកដែលមានបញ្ហា ឬជំងឺផ្លូវដង្ហើម ពិសេសគឺជំងឺសួត។

លោកស្រីវេជ្ជណ្ឌិត ឱ វណ្ណឌីន សង្កាត់ធ្ងន់ថា “អ្នកជក់បារីទាំងអស់ ត្រូវតែមានការប្រុងប្រយ័ត្នឱ្យបានខ្ពស់បំផុត” ទាក់ទិននឹងវីរុស COVID-19 និងបញ្ហាសុខភាពផ្លូវដង្ហើម ដោយសារថា អ្នកជក់បារីភាគច្រើន មានបញ្ហាផ្លូវដង្ហើម ហើយ COVID-19 នឹងមាន “ឱកាសល្អ” កាន់តែច្រើនក្នុងការសម្លាប់អ្នកជំងឺ៕

March 14, 2020

ថ្ងៃនេះ COVID-19 បាន “វ៉ៃប្រហារ” លើអ្នកនយោបាយជាច្រើនរូប នៅជុំវិញពិភពលោក

ភរិយារបស់នាយករដ្ឋមន្ត្រីកាណាដា និងរដ្ឋមន្ត្រីក្រសួងមហាផ្ទៃអូស្ត្រាលី គឺជាជនរងគ្រោះថ្មីបំផុតនៅពេល COVID-19 រាលដាលកាន់តែខ្លាំង បណ្ដាលឱ្យមនុស្សជាង 135,000នាក់ ឆ្លងជំងឺ។

COVID-19 បានបង្ហាញវត្តមាននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺនេះ ឡើងដល់ជិត 140,000នាក់ និងជាង 5,000នាក់ បានបាត់បង់ជីវិត។ ខាងក្រោមនេះគឺជាអ្នកនយោបាយមួយចំនួនដែលបានឆ្លងមេរោគ COVID-19 ក្នុងថ្ងៃទី13មីនានេះ៖

រដ្ឋមន្រ្តីក្រសួងសមធម៌នៃប្រទេសអេស្ប៉ាញ

រដ្ឋមន្រ្តីក្រសួងសមធម៌នៃប្រទេសអេស្ប៉ាញ លោកស្រី Irene Montero ទទួលបានលទ្ធផលវិជ្ជមានជាមួយនឹងវីរុសកូរ៉ូណា COVID-19 បន្ទាប់ពីត្រូវបានធ្វើតេស្តរកមេរោគ ខណៈដែលស្វាមីរបស់លោកស្រី គឺឧបនាយករដ្ឋមន្ត្រី Pablo Iglesias ត្រូវបង្ខាំងខ្លួននៅដោយឡែក។

គ្រួសារនាយករដ្ឋមន្ត្រីកាណាដា

លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។

រដ្ឋមន្ត្រីក្រសួងមហាផ្ទៃអូស្ត្រលី

រដ្ឋមន្ត្រីក្រសួងមហាផ្ទៃអូស្ត្រាលី លោក Dutton ត្រូវបានពិនិត្យឃើញថា មានផ្ទុកមេរោគ COVID-19 និងបានបញ្ជូនទៅកាន់មន្ទីរពេទ្យមួយនៅក្នុងរដ្ឋ Queensland ដើម្បីនៅដាច់ដោយឡែក និងទទួលការព្យាបាល។ លោក Dutton គឺជាអ្នកនយោបាយអូស្ត្រាលីទី1ហើយ ដែលបានឆ្លងវីរុស COVID-19។

ទីប្រឹក្សាជាន់ខ្ពស់ និងជាអតីតរដ្ឋមន្ត្រីការក្រសួងការបរទេសអ៊ីរ៉ង់

លោក Ali Akbar Velayati អាយុ74ឆ្នាំ ជាទីប្រឹក្សាជាន់ខ្ពស់ផ្នែកកិច្ចការអន្តរជាតិ របស់មេដឹកនាំអ៊ីរ៉ង់ Ali Khamenei ត្រូវបានធ្វើតេស្តឃើញថា មានផ្ទុកមេរោគ COVID-19។ លោក Ali Akbar Velayati ធ្លាប់ធ្វើជារដ្ឋមន្ត្រីក្រសួងការបរទេសអ៊ីរ៉ង់ ចាប់ពីឆ្នាំ 1981-1997 មុនពេលលោកក្លាយជាទីប្រឹក្សាជាន់ខ្ពស់ផ្នែកកិច្ចការបរទេសរបស់មេដឹកនាំ Ali Khamenei។

អ្នកការទូតហ្វីលីពីន នៅអង្គការសហប្រជាជាតិ

យោងតាមសារព័ត៌មាន Reuters ស្ត្រីដែលជាមន្ត្រីការបរទេសហ្វីលីពីននេះ ត្រូវបានរកឃើញថា មានផ្ទុកមេរោគ COVID-19 កាលពីថ្ងៃទី12មីនា ដែលនេះជាករណីដំបូងបង្អស់នៅឯអង្គការសហប្រជាជាតិ នាទីក្រុង New York។ ឯកអគ្គរដ្ឋទូតស្តីទីហ្វីលីពីន ប្រចាំនៅអង្គការសហប្រជាជាតិ លោកស្រី Kira Christianne Azucena

ប្រធានាធិបតីប្រេស៊ីល

យោងតាមសារព័ត៌មាន Guardian កាសែតធំមួយដែលមានឈ្មោះថា Jornal O Dia របស់ប្រេស៊ីល ថ្ងៃនេះបានចេញផ្សាយថា ប្រធានាធិបតីប្រេស៊ីល លោក Jair Bolsonaro បានឆ្លងមេរោគ COVID-19 បន្ទាប់ពីបានធ្វើតេស្ត។ សារព័ត៌មាន Fox News ក៏បានចេញផ្សាយអំពីដំណឹងនេះ៕

March 13, 2020

ទីប្រឹក្សាជាន់ខ្ពស់របស់មេដឹកនាំអ៊ីរ៉ង់ ឆ្លងវីរុស COVID-19 ខណៈប្រទេសនេះ មានអ្នកឆ្លងរោគ សរុបជាង11,000នាក់ និងអ្នកស្លាប់កើនដល់…

លោក Ali Akbar Velayati អាយុ74ឆ្នាំ ជាទីប្រឹក្សាជាន់ខ្ពស់ផ្នែកកិច្ចការអន្តរជាតិ របស់មេដឹកនាំអ៊ីរ៉ង់ Ali Khamenei ត្រូវបានធ្វើតេស្តឃើញថា មានផ្ទុកមេរោគ COVID-19។

“Ali Akbar Velayati ដែលជាអ្នកគ្រប់គ្រងមន្ទីរពេទ្យ Masih Daneshvari នៅក្នុងទីក្រុង Tehran ផងដែរនោះ ធ្លាប់បានប៉ះពាល់ផ្ទាល់ជាមួយនឹងអ្នកជំងឺកូរ៉ូណា COVID-19 ក្នុងរយៈពេលប៉ុន្មានសប្ដាហ៍កន្លងទៅនេះ។ ពេលនេះ លោកក៏បានឆ្លងវីរុសកូរ៉ូណា ហើយកំពុងត្រូវបានដាក់ឱ្យនៅដាច់ដោយឡែកផងដែរ” នេះបើតាមការចេញផ្សាយរបស់សារព័ត៌មាន Tasnim របស់អ៊ីរ៉ង់ កាលពីថ្ងៃទី12កន្លងទៅ។

លោក Ali Akbar Velayati ធ្លាប់ធ្វើជារដ្ឋមន្ត្រីក្រសួងការបរទេសអ៊ីរ៉ង់ ចាប់ពីឆ្នាំ 1981-1997 មុនពេលលោកក្លាយជាទីប្រឹក្សាជាន់ខ្ពស់ផ្នែកកិច្ចការបរទេសរបស់មេដឹកនាំ Ali Khamenei។

ប្រទេសអ៊ីរ៉ង់ ថ្ងៃនេះ បានរកឃើញអ្នកផ្ទុក COVID-19 ចំនួន 1,289នាក់ ធ្វើឱ្យចំនួនសរុបនៃអ្នកផ្ទុកមេរោគនេះ កើនដល់ 11,364នាក់។ ថ្ងៃនេះ អ៊ីរ៉ង់ក៏បានបាត់បង់ពលរដ្ឋចំនួន85នាក់បន្ថែមទៀតដែរ ដោយសារតែមេរោគកូរ៉ូណា ធ្វើឱ្យចំនួនអ្នកស្លាប់សរុបឡើងដល់ 514នាក់។ នេះបើតាមអ្នកនាំពាក្យក្រសួងសុខាភិបាលអ៊ីរ៉ង់ Kianoush Jahanpour៕

ប្រភព៖ សារព័ត៌មានបរទេស

March 13, 2020

COVID-19! ការិយាល័យអង្គការសហប្រជាជាតិ មានករណីឆ្លងវីរុស COVID-19 ដំបូងគេបង្អស់ហើយ!

មន្ត្រីការបរទេសម្នាក់របស់ប្រទេសហ្វីលីពីន បានក្លាយជាអ្នកផ្ទុកវីរុស COVID-19 ដំបូងគេបង្អស់នៅទីស្នាក់ការនៃអង្គការសហប្រជាជាតិ នាទីក្រុង New York សហរដ្ឋអាមេរិក។

“មកដល់ពេលនេះ គណៈប្រតិភូហ្វីលីពីន (នៅឯការិយាល័យអង្គការសហប្រជាជាតិ) កំពុងត្រូវបានស្នើឱ្យនៅមួយកន្លែង ហើយសមាជិកទាំងអស់ក៏ត្រូវបានស្នើឱ្យនៅដាច់ដោយឡែក និងស្វែងរកជំនួយផ្នែកសុខាភិបាល បើសិនជាមានអាការនៃជំងឺ COVID-19។ យើងកំពុងកំណត់ថា យើងបានឆ្លងមេរោគ” Reuters ដកស្រង់សេចក្ដីប្រកាសរបស់ឯកអគ្គរដ្ឋទូតស្តីទីហ្វីលីពីន ប្រចាំនៅអង្គការសហប្រជាជាតិ លោកស្រី Kira Christianne Azucena។

យោងតាមសារព័ត៌មាន Reuters ស្ត្រីដែលជាមន្ត្រីការបរទេសហ្វីលីពីននេះ ត្រូវបានរកឃើញថា មានផ្ទុកមេរោគ COVID-19 កាលពីថ្ងៃទី12មីនា ដែលនេះជាករណីដំបូងបង្អស់នៅឯអង្គការសហប្រជាជាតិ នាទីក្រុង New York។

គណៈប្រតិភូហ្វីលីពីននៅឯទីស្នាក់ការនៃអង្គការសហប្រជាជាតិ មានមន្ត្រីការបរទេសចំនួន12នាក់។ មន្ត្រីការបរទេសដែលបានឆ្លងមេរោគនេះ គឺជាអ្នកតំណាងឱ្យប្រទេសហ្វីលីពីន នៅឯគណៈកម្មការផ្នែកច្បាប់នៃមហាសន្និបាតអង្គការសហប្រជាជាតិ។

ឯកអគ្គរដ្ឋទូតស្តីទីរបស់ប្រទេស ហ្វីលីពីនប្រចាំនៅអង្គការសហប្រជាជាតិ លោកស្រី Kira Christianne Azucena បានឱ្យដឹងថា អ្នកការទូតដែលបានឆ្លង COVID-19នេះ បានទៅដល់ទីស្នាក់ការអង្គការសហប្រជាជាតិ កាលពីថ្ងៃទី9មីនា និងនៅទីនោះរយៈពេលប្រហែល1ម៉ោង។ នៅក្នុងអំឡុងពេលនោះ លោកស្រីអ្នកការទូតរូបនោះ មិនមានរោគសញ្ញាអ្វីនោះទេ។

ទីស្នាក់ការរបស់អង្គការសហប្រជាជាតិ នៅទីក្រុង New York សហរដ្ឋអាមេរិក

អ្នកការទូតខាងលើចាប់ផ្ដើមមានរោគសញ្ញានៅថ្ងៃទី10មីនា និងបានទៅពិនិត្យសុខភាព និងធ្វើតេស្តរកមេរោគ។

អង្គការសហប្រជាជាតិកំពុងចាត់វិធានការមួយចំនួនដើម្បីទប់ស្កាត់ការឆ្លងមេរោគកូរ៉ូណា នៅទីស្នាក់ការក្នុងទីក្រុង New York រួមមានទាំងការកាត់បន្ថយពេលនៃមហាសន្និបាតស្ដីអំពីសិទ្ធិរបស់ស្ត្រី ដែលមានរយៈពេល2ថ្ងៃ មកនៅត្រឹម1ថ្ងៃ ព្រមទាំងកាត់ចោលនូវកិច្ចប្រជុំខ្លីៗទៀតផង។

ចំណែកប្រតិភូមកពីបណ្ដាប្រទេស ក៏ត្រូវបានអង្គការសហប្រជាជាតិស្នើឱ្យកាត់បន្ថយចំនួនសមាជិកដែលនឹងមកចូលរួមប្រជុំនៅអង្គការសហប្រជាជាតិផងដែរ៕

ប្រភព៖ សារព័ត៌មានបរទេស

March 13, 2020

រដ្ឋមន្ត្រីក្រសួងមហាផ្ទៃអូស្ត្រាលី ឆ្លង COVID-19 ខណៈប្រទេសនេះមានអ្នកស្លាប់ចំនួន3នាក់

រដ្ឋមន្ត្រីក្រសួងមហាផ្ទៃអូស្ត្រាលី លោក Dutton ត្រូវបានពិនិត្យឃើញថា មានផ្ទុកមេរោគ COVID-19 និងបានបញ្ជូនទៅកាន់មន្ទីរពេទ្យមួយនៅក្នុងរដ្ឋ Queensland ដើម្បីនៅដាច់ដោយឡែក និងទទួលការព្យាបាល។

“កាលពីព្រឹកនេះ ខ្ញុំបានក្រោកពីគេង ស្រាប់តែមានអារម្មណ៍ថាក្ដៅខ្លួន និងឈឺបំពង់ក។ ខ្ញុំក៏បានទាក់ទងទៅកាន់ក្រុមគ្រូពេទ្យ ហើយក៏បានធ្វើតេស្តរកមេរោគ។ ក្រោយមក ពួកគេឱ្យដឹងថា ខ្ញុំបានឆ្លងមេរោគ COVID-19” នេះជាការឱ្យដឹងរបស់រដ្ឋមន្ត្រីក្រសួងមហាផ្ទៃអូស្ត្រាលី លោក Dutton។

បច្ចុប្បន្ន លោករដ្ឋមន្ត្រី កំពុងសម្រាកព្យាបាលនៅឯមន្ទីរពេទ្យ។ លោកបានឱ្យដឹងដែរថា លោកមានសុខភាពល្អប្រសើរនៅឡើយ។

លោក Dutton គឺជាអ្នកនយោបាយអូស្ត្រាលីទី1ហើយ ដែលបានឆ្លងវីរុស COVID-19។

គិតមកដល់ពេលនេះ ប្រទេសអូស្ត្រាលី មានអ្នកឆ្លងវីរុសកូរ៉ូណាចំនួន 150នាក់ ក្នុងនោះមានអ្នកស្លាប់ចំនួន 3នាក់ ខណៈដែលនៅទូទាំងពិភពលោក ចំនួនអ្នកដែលបានឆ្លងមេរោគនេះ កើនឡើងដល់128,343នាក់ ក្នុងនោះមាន 4,720នាក់ បានបាត់បង់ជីវិត៕

ប្រភព៖ សារព័ត៌មានបរទេស

March 13, 2020

ភរិយារបស់នាយករដ្ឋមន្ត្រីកាណាដា ឆ្លងវីរុស COVID-19 បន្ទាប់ពីបានត្រឡប់មកពីប្រទេសអង់គ្លេស

លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។

“ដំបូង ខ្ញុំសូមអរគុណយ៉ាងជ្រាលជ្រៅចំពោះអ្នកទាំងអស់ដែលបានសួរសុខទុក្ខខ្ញុំ។ បើទោះជាត្រូវឆ្លងកាត់អាការរោគមិនស្រួលខ្លួនដោយសារវីរុស តែខ្ញុំនឹងមានសុខភាពល្អឡើងវិញមិនខាន” លោកស្រី Sophie Gregoire Trudeau ដែលកំពុងបង្ខាំងខ្លួននៅក្នុងផ្ទះ បានឱ្យដឹងបែបនេះនៅក្នុងសេចក្ដីប្រកាសកាលពីថ្ងៃទី12មីនាកន្លងទៅ។

ការិយាល័យនាយករដ្ឋមន្ត្រីកាណាដា ក៏បានទទួលស្គាល់ថា លោកស្រី Sophie បានឆ្លងមេរោគកូរ៉ូណានេះ។ ការិយាល័យនេះក៏បានឱ្យដឹងថា លោកនាយករដ្ឋមន្ត្រី Trudeau មិនទាន់បានធ្វើតេស្តរកមេរោគនៅឡើយ ដោយសារតែគាត់ពុំមានរោគសញ្ញាដែលគួរសង្ស័យ ប៉ុន្តែលោកនឹងចាប់ផ្ដើមបង្ខាំងខ្លួនឯងក្នុងរយៈពេល14ថ្ងៃ។

លោកស្រី Sophie Gregoire ទើបតែបានវិលត្រឡប់មកប្រទេសកាណាដាវិញ បន្ទាប់ពីបានទៅបំពេញបេសកកម្មនៅឯទីក្រុងឡុងដ៍ ប្រទេសអង់គ្លេស ហើយក៏ចាប់ផ្ដើមមានអាការមិនស្រួលខ្លួនកាលពីយប់ថ្ងៃទី11មីនា ប៉ុន្តែ ភ្លាមនោះ លោកស្រីក៏បានស្វែងរកជំនួយពីក្រុមគ្រូពេទ្យ។

គិតមកដល់ពេលនេះ ប្រទេសកាណាដា បានរកឃើញអ្នកផ្ទុកវីរុសកូរ៉ូណាចំនួន 117នាក់ ក្នុងនោះមានម្នាក់បានបាត់បង់ជីវិត។

COVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺជាង 128,343នាក់ ក្នុងនោះមាន 4,720នាក់បានស្លាប់ និង68,324នាក់បានជាសះស្បើយ៕

ប្រភព៖ សារព័ត៌មានបរទេស

March 13, 2020

សង្គ្រាមពាក្យសម្ដីចាប់ផ្ដើមហើយ…អ្នកនាំពាក្យក្រសួងការបរទេសចិនចោទថា ទាហានអាមេរិកជាអ្នកនាំវីរុសកូរ៉ូណាចូលទៅចិន!

អ្នកនាំពាក្យក្រសួងការបរទេសប្រទេសចិន បានធ្វីតធើរចោទប្រកាន់ ព្រមជាមួយឃ្លីបវីដេអូដែលលោក រ៉ូប៊ើត រេដហ្វ៊ីល អគ្គនាយកមជ្ឈមណ្ឌលគ្រប់គ្រង និងការពាររោគរបស់សហរដ្ឋអាមេរិកដែលបានចូលបកស្រាយចំពោះគណៈកម្មាធិការគ្រប់គ្រង និងកែសម្រួល នៃសភាតំណាងរាស្ត្រ ដោយបានទទួលស្គាល់ថា មានជនជាតិអាមេរិកាំងដែលស្លាប់ដោយសាររោគគ្រុនផ្ដាសាយធំ ត្រូវបានរកឃើញថាមានឆ្លងមេរោគវីរុសកូវីដ-19 មែន។

កងទ័ពសហរដ្ឋអាមេរិក អាចនៅពីក្រោយហេតុការណ៍នេះ។ ជាទ្រឹស្ដីផ្សំគំនិតដែលផ្សព្វផ្សាយនៅលើសារព័ត៌មានសង្គមអនឡាញរបស់ចិនកាលពីពេលថ្មីៗនេះថា ទាហានសហរដ្ឋអាមេរិកបាននាំមេរោគវីរុសកូរ៉ូណាប្រភេទថ្មីចូលទៅក្នុងវូហាន ក្នុងអំឡុងពេលចូលរួមព្រឹត្តិការណ៍ប្រកួតកីឡាទាហានពិភពលោក ឆ្នាំ2019(Military World Games) ដែលរៀបចំឡើងនៅមណ្ឌលហ៊ូពេយ អំឡុងថ្ងៃទី18 ដល់ 27 ខែតុលា ឆ្នាំ2019។

ការចោទប្រកាន់របស់អ្នកនាំពាក្យក្រសួងការបរទេសចិននេះ បានកើតឡើងបន្ទាប់ពីលោក រ៉ូប៊ើត អូប្រៃអាន់ ទីប្រឹក្សាសន្តិសុខជាតិសហរដ្ឋអាមេរិក បានរិះគន់ចិនថា បានឆ្លើយតបនឹងការឆ្លងរាតត្បាតរបស់វីរុសនៅក្នុងទីក្រុងវូហានកាលពីចុងឆ្នាំកន្លងទៅ យឺតយ៉ាវ និងមិនស្មោះត្រង់គ្រប់គ្រាន់ ធ្វើឱ្យពិភពលោកខាតពេលអស់ជិត 2ខែ សម្រាប់ការត្រៀមខ្លួនទប់ទល់ស្ថានការណ៍ឆ្លងរាតត្បាតនេះ តែលោក ចាវ លីចៀន បានធ្វើតធ្វើរតបថា គឺសហរដ្ឋអាមេរិកទៅវិញទេ ដែលខ្វះភាពស្មោះត្រង់ “អ្នកជំងឺដំបូងគេ(Patient zero) ក្នុងសហរដ្ឋអាមេរិកចាប់ផ្ដើមមកនៅពេលណា?! មានមនុស្សប៉ុន្មាននាក់ហើយដែលឆ្លងមេរោគ? ឯណាឈ្មោះមន្ទីរពេទ្យ? អាចជាទាហានសហរដ្ឋអាមេរិក ដែលនាំការឆ្លងរាលដាលដ៏ធំទៅក្នុងទីក្រុងវូហាន…ចូរបង្ហាញព័ត៌មានដល់សាធារណជនយ៉ាងស្មោះត្រង់!! សហរដ្ឋអាមេរិកត្រូវតែអធិប្បាយប្រាប់ចិនឱ្យបានចំពោះរឿងនេះ!”។

លោក ចាវ ទើបតែឡើងមកបំពេញតួនាទីជាអ្នកនាំពាក្យនៃក្រសួងការបរទេសចិនបានមិនយូរប៉ុន្មាន បន្ទាប់ពីធ្វើជាអនុប្រធានស្ថានទូតចិនប្រចាំនៅប្រទេសប៉ាគីស្ថាន និងតែងតែប្រើប្រាស់ប្រព័ន្ធធ្វីតធើរឆ្លើយតបបែបកាប់ឆៅៗ និងក្ឌុងក្ឌាំងបែបនេះជានិច្ច។ កាលពីអតីត លោកធ្លាប់មានជម្លោះពាក្យសម្ដីនៅលើធ្វីតធើរ ជាមួយអតីតទីប្រឹក្សាសន្តិសុខជាតិអាមេរិក លោកស្រី ស៊ូហ្សាន រ៉ៃស៍ ដែលធ្វើឱ្យលោកស្រី រ៉ៃស៍ ចោទលោក ចាវ ថា រើសអើងជាតិសាសន៍ពណ៌សម្បុរ។

នៅមុននេះ ក្នុងថ្ងៃជាមួយគ្នា លោក Geng Shuang អ្នកនាំពាក្យនៃកងទ័ពចិន ក៏បានរិះគន់បណ្ដាក្រុមមន្ត្រីសហរដ្ឋអាមេរិកដែរថា បានសម្ដែងការយល់ឃើញដោយគ្មានភាពទទួលខុសត្រូវ ក្រោយពីបានស្ដីបន្ទោសការទប់ទល់មេរោគវីរុសរបស់រដ្ឋាភិបាលក្រុងប៉េកាំង ធ្វើឱ្យពិភពលោកត្រូវប្រឈមនឹងស្ថានការណ៍ឆ្លងរាតត្បាតធ្ងន់ធ្ងរ…តែគឺជាចិនទៅវិញទេ ដែលខំព្យាយាមពន្យឺតការឆ្លងរាតត្បាត និងជួយពន្យារពេលឱ្យពិភពលោកបានត្រៀមខ្លួនជាស្រេចសម្រាប់ការទប់ទល់មេរោគវីរុស និងសង្ឃឹមថា អាជ្ញាធរសហរដ្ឋអាមេរិកនឹងលះបង់កម្លាំងថាមពលជាមួយការទប់ទល់មេរោគវីរុស បង្កើនការសហការ ជំនួសឱ្យការស្ដីបន្ទោសចិន៕

ប្រភព៖ សារព័ត៌មានបរទេស

March 13, 2020

រឿងពិតដែលកំពុងល្បីក្នុងបណ្ដាញសង្គមនៅប្រទេសចិន ក្រោយការឆ្លងរាលដាលវីរុសក្នុងប្រទេសនេះស្ងប់ស្ងាត់…

“បើដឹងថា នឹងមានថ្ងៃនេះ(ដែលមានអ្នកស្លាប់ច្រើនបែបនេះ) ខ្ញុំនឹងមិនខ្វល់អ្វីទាំងអស់ ទោះជាត្រូវទទួលទោសធ្ងន់ធ្ងរខាងវិន័យយ៉ាងណាក៏ដោយ ក៏ខ្ញុំនឹងនិយាយយ៉ាងចំហ…” លោកស្រីវេជ្ជបណ្ឌិត អៃ ហ្វឹន។

រឿងធំ រឿងក្ដៅប្រចាំសប្ដាហ៍ដែលត្រូវបានស៊ែរតៗគ្នានៅក្នុងបណ្ដាញសង្គមដ៏ធំមួយនៅក្នុងប្រទេសចិន វីឆាត(WeChat) គឺរឿងរ៉ាវរបស់ “អ្នកប្រកាសដំណឹង” លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់ នៃមន្ទីរពេទ្យកណ្ដាល ទីក្រុងវូហាន។ លោកស្រីជាមនុស្សដំបូងគេ ដែលចេញមកបង្ហើបរឿងរោគរាតត្បាតវីរុសកូរ៉ូណាប្រភេទថ្មីក្នុងរង្វង់គ្រូពេទ្យដូចគ្នានៅក្នុងវូហាន ដែលតមកលោកវេជ្ជបណ្ឌិត លី វឹនលៀង អ្នកពលីជីវិតក្នុងសមរភូមិវីរុសកូវីដ និងគ្រូពេទ្យដទៃទៀតបាននាំគ្នាចេញមកជួយគ្នា “ផ្សាយដំណឹង”។

“នៅថ្ងៃទី30 ធ្នូ ឆ្នាំ2019 លោកស្រីវេជ្ជបណ្ឌិត អៃ ហ្វឹន បានអានរបាយការណ៍ករណីអ្នកជំងឺឆ្លងមេរោគវីរុសរលាកសួតអាថ៌កំបាំងម្នាក់ លោកស្រីបានប្រើគំនូសរង្វង់មូលពណ៌ក្រហមបញ្ជាក់ដោយតួអក្សរថា “វីរុសកូរ៉ូណាSARS”។ នៅពេលនិស្សិតពេទ្យសួរពាក់ព័ន្ធនឹងករណីនេះ លោកស្រីបានថតរបាយការណ៍នោះ បញ្ជូនបន្តទៅឱ្យមិត្តភក្តិរបស់និស្សិតម្នាក់នោះ។ នៅរាត្រីនោះឯង របាយការណ៍នោះត្រូវបានបញ្ជូនបន្តទៅទូទាំងពិភពគ្រូពេទ្យក្នុងទីក្រុងវូហាន។ ក្រុមអ្នកដែលបញ្ជូនបន្តរបាយការណ៍ 1ច្បាប់នោះ មានទាំងគ្រូពេទ្យ 8នាក់ ដែលត្រូវប៉ូលិសចាប់ខ្លួនយកទៅសាកសួរ និងដាក់ទោសខាងវិន័យ។

លោកស្រីវេជ្ជបណ្ឌិត អៃ ហ្វឹន ត្រូវប្រឈមនឹងបញ្ហាលំបាក ពីបទជាដើមរឿងនៃការបញ្ជូនបន្តរបាយការណ៍នោះ។ គណៈកម្មាធិការត្រួតពិនិត្យវិន័យប្រចាំមន្ទីរពេទ្យ បានកោះហៅលោកស្រីទៅសាកសួរ និងបាន “ទិតៀន និងដាក់ទោសកម្រិតធ្ងន់ធ្ងរ ជាករណីដែលមិនធ្លាប់មានពីមុនមក”។ លោកស្រីត្រូវបានថ្កោលទោសថា ជាអ្នកជំនាញការដែលបង្កើតព័ត៌មានចចាមអារ៉ាម។

“អៃ ហ្វឹន គឺជាករណីគ្រូពេទ្យម្នាក់ទៀតដែលត្រូវបានសាកសួរ កោះហៅទៅទិតៀន ដាក់ទោស និងអប់រំវិន័យ” ដែលលេចឡើងច្បាស់។ កាលពីពេលមុនហ្នឹង មានរបាយការណ៍ទាំងក្នុងសារព័ត៌មានរបស់រដ្ឋចិនដូចជា ស៊ីនហួ និងសារព័ត៌មានប្រជាជន(People daily) គឺករណីលោកវេជ្ជបណ្ឌិត លី វឹនលៀង ដែលជាគ្រូពេទ្យតែម្នាក់គត់ដែលចេញមក “ប្រកាសដំណឹង”។ (លោកវេជ្ជបណ្ឌិត លី អាយុ 34ឆ្នាំ បានស្លាប់កាលពីថ្ងៃទី7 កុម្ភៈ ដោយសារមេរោគវីរុសកូរ៉ូណាប្រភេទថ្មី)។

មនុស្សម្នាដែលបានដឹងរឿងរ៉ាវទាំងនេះ បានដាក់រហស្សនាមឱ្យលោកស្រីវេជ្ជបណ្ឌិត អៃ ហ្វឹន ថាជា “អ្នកផ្លុំកញ្ចែ(ប្រកាសអាសន្ន)” តែលោកស្រីវេជ្ជបណ្ឌិត អៃ ហ្វឹន បានសុំកែរហស្សនាមរបស់ខ្លួនឯងថាជា “អ្នកចែកកញ្ចែ” វិញ។

រឿងរ៉ាវ “អ្នកចែកកញ្ចែ” ដែលអ្នកលេងអ៊ីនធើណិត ស៊ែរតៗគ្នាយ៉ាងភ្លូកទឹកភ្លូកដីនៅក្នុង WeChat នេះ ចេញមកពី “រឿងលើទំព័រទី1” របស់ព្រឹត្តិបត្រចិនឈ្មោះថា “បុគ្គល” ដែលបានបោះពុម្ពផ្សាយនៅថ្ងៃទី10 ខែមីនា ឆ្នាំ2020 គឺជាបទសម្ភាសរបស់លោកស្រីវេជ្ជបណ្ឌិត អៃ ហ្វឹន ប្រធានផ្នែកសង្គ្រោះបន្ទាន់នៃមន្ទីពេទ្យទីក្រុងវូហាន…តែនៅពេលព្រឹត្តិបត្រនេះ ចេញលក់នៅលើតូបកាសែតកាលពីថ្ងៃអង្គារ(ទី10មីនា) បានត្រឹមតែ 3ម៉ោងគត់ ក៏ត្រូវប្រកាសឱ្យដកចេញពីគ្រប់តូបកាសែតវិញភ្លាម។

អ្នកយកព័ត៌មាននៃព្រឹត្តិបត្រ “បុគ្គល” ដែលសម្ភាសលោកស្រីវេជ្ជបណ្ឌិត អៃ ហ្វឹន បានប្រាប់ថា គាត់បានសម្ភាសលោកស្រីវេជ្ជបណ្ឌិត អៃ ហ្វឹន នៅថ្ងៃទី1 មីនា នៅពេលព្រឹកព្រលឹម ម៉ោងប្រហែល5។ បន្ទាប់ពីនោះប្រមាណជាកន្លះម៉ោង មិត្តរួមការងាររបស់លោកស្រីវេជ្ជបណ្ឌិត អៃ ហ្វឹន គឺលោកវេជ្ជបណ្ឌិត ចៀង ស្វៀស៊ីង ប្រធានផ្នែកវះកាត់ថៃរ៉យដ៍ និងដើមទ្រូង នៃមន្ទីរពេទ្យកណ្ដាល ទីក្រុងវូហានក៏ស្លាប់ដោយសារមេរោគវីរុសកូវីដ-19 ហើយ 2ថ្ងៃតមកទៀត អនុប្រធានផ្នែកជំងឺចក្ខុ(ភ្នែក) នៃមន្ទីរពេទ្យកណ្ដាល ទីក្រុងវូហាន លោកវេជ្ជបណ្ឌិត មើយ ចុងមិង ក៏ស្លាប់ដោយសារវីរុសកូវីដ-19 ដូចគ្នា(គ្រូពេទ្យ មើយ ជាមិត្តសម្លាញ់នឹងលោកគ្រូពេទ្យ លី វឹនលៀង)។

រដ្ឋបាលចិនបានធ្វើពិធីកាន់ទុក្ខសពលោកវេជ្ជបណ្ឌិត លី វឹនលៀង អាយុ 34ឆ្នាំ ស្លាប់កាលពីថ្ងៃ7 កុម្ភៈ ដោយសារមេរោគវីរុសកូរ៉ូណាប្រភេទថ្មី។ លោកគ្រូពេទ្យ លី គឺជាមនុស្សម្នាក់ដែលចេញមកឱ្យដំណឹងពីការ “ឆ្លងរាលដាលនៃវីរុសប្រភេទថ្មី”

បន្ទាប់ពីមានដំណឹងពីការប្រមូលព្រឹត្តិបត្រ “បុគ្គល” នៅក្នុងប្រទេសចិនដែលបោះពុម្ពផ្សាយពីបទសម្ភាសរបស់លោកស្រីវេជ្ជបណ្ឌិត អៃ ហ្វឹន រួចមក ក៏មានការរៀបចំការសម្ដែង “សិល្បកម្មប្រជាជន” ជារឿងរ៉ាវរបស់ “អ្នកផ្លុំកញ្ចែ” ក្នុងវើហ្សឹន 33ភាសា និងលេខកូដ ទាំងភាសាបុរាណចិនដែលចារិកនៅលើស្នូកអណ្ដើក តួអក្សរប្រ៊េលល៍(សម្រាប់អ្នកពិការភ្នែក)មកមើលជាគំរូវើហ្សឹនភាសា និងលេខកូដផ្សេងៗដែលរៀបរាប់ពីរឿងរ៉ាវរបស់ “អ្នកចែកកញ្ចែ”៕

ប្រភព៖ សារព័ត៌មានបរទេស

March 13, 2020

គ្រូបង្វឹករបស់ Arsenal ឆ្លងវីរុស COVID-19 ៖ ការប្រកួតរវាងក្រុម Arsenal និង Brighton នៅថ្ងៃសៅរ៍នេះ អាចនឹងត្រូវពន្យាពេល

លោក Mikel Arteta ត្រូវបានក្រុមវេជ្ជបណ្ឌិតរកឃើញថា មានផ្ទុកវីរុស COVID-19 ហើយថាគ្រូបង្វឹករូបនេះ ប្រហែលជាបានចម្លងមេរោគទៅឱ្យសមាជិកផ្សេងៗក្នុងក្រុម ក៏ដូចជាក្រុមគ្រូបង្វឹកដទៃរបស់ Arsenal ផងដែរ។

ការប្រកាសរបស់ Arsenal ដែលបានធ្វើឡើងកាលពីយប់ម្សិលមិញ បានលើកឡើងថា “មជ្ឈមណ្ឌលហ្វឹកហាត់របស់យើង (London Colney) ត្រូវបានបិទបណ្ដោះអាសន្ន បន្ទាប់ពីប្រធានក្រុមគ្រូបង្វឹក លោក Mikel Arteta ត្រូវបានធ្វើតេស្ត និងរកឃើញថា មានផ្ទុកវីរុស COVID-19។ បុគ្គលិកទាំងអស់ក្នុងក្លឹប ដែលធ្លាប់បានប្រស្រ័យទាក់ទងផ្ទាល់ជាមួយ Mikel ក្នុងពេលកន្លង នឹងត្រូវបង្ខាំងខ្លួននៅដាច់ដោយឡែក ទៅតាមការណែនាំរបស់រដ្ឋាភិបាល”។

បច្ចុប្បន្ន គេមិនទាន់ដឹងថា គ្រូបង្វឹករូបនេះ បានឆ្លងមេរោគពីអ្នកណានៅឡើយ ប៉ុន្តែ គេសង្ស័យថា គ្រូបង្វឹករូបនេះ ប្រហែលជាបានឆ្លងពីលោក Evangelos Marinakis។ មុននេះ លោក Evangelos Marinakis ដែលជាម្ចាស់ក្លឹប Olympiacos ធ្លាប់បានជួបផ្ទាល់ជាមួយក្រុមមេដឹកនាំ ក៏ដូចជាកីឡាករមួយចំនួនរបស់ក្លឹប Arsenal នៅពេលដែលក្លឹបទាំង2នេះ បានប្រកួតជាមួយគ្នានៅ Europa League កាលពីខែកុម្ភៈ។ ក្រោយមកមិនយូរប៉ុន្មាន បន្ទាប់ពីការប្រកួតតង់ទី2 នៅ Emirates លោក Marinakis ប្រកាសថា លោកមានផ្ទុកវីរុស COVID-19។ បញ្ហានេះក៏បានធ្វើឱ្យការប្រកួតបន្ថែមម៉ោងរវាង Arsenal និង Man City កាលពីពាក់កណ្ដាលសប្ដាហ៍នេះ ត្រូវបានពន្យាពេលផងដែរ។

សារព័ត៌មាន Sky Sports បានឱ្យដឹងថា តាមគម្រោង ក្រុម Arsenal នឹងត្រូវប្រកួតជាមួយក្រុម Brighton នៅថ្ងៃសៅរ៍ខាងមុខនេះ នៅក្នុងក្របខណ្ឌ English Premier League។ ប៉ុន្តែ ដោយមានការប្រែប្រួលទាក់ទិននឹងរោគរាតត្បាត COVID-19 នៅក្នុងក្លឹប Arsenal ការប្រកួតនោះប្រាកដជាត្រូវបានលើកពេលមិនខាន។

នៅព្រឹកថ្ងៃសុក្រ(ម៉ោងក្នុងស្រុក) គណៈកម្មការនៃពានរង្វាន់បាល់ទាត់ English Premier League នឹងត្រូវបើកកិច្ចប្រជុំបន្ទាន់មួយដើម្បីកែសម្រួលកាលបរិច្ឆេទនៃការប្រកួត៕

March 13, 2020

Tag: coronavirus