China - La Reine Media

ក្រសួងការបរទេសចិន បដិសេធការចោទប្រកាន់ខុសរឿង 24ចំណុចរឿងមេរោគកូវីដ-19 របស់អ្នកនយោបាយអាមេរិក

ក្រសួងការបរទេសចិនបានចេញមកបដិសេធការចោទប្រកាន់ 24ចំណុច របស់អ្នកនយោបាយអាមេរិក ដែលចិនបានបញ្ជាក់ថា គឺជារឿងកុហកបោកប្រាស់ដែលគ្មានខ្លឹមសារ ពាក់ព័ន្ធនឹងការទប់ទល់របស់ចិនចំពោះការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីថ-19 ដែលកំពុងធ្វើឱ្យមានផលប៉ះពាល់យ៉ាងធ្ងន់ធ្ងរទូទាំងពិភពលោកក្នុងខណៈពេលនេះ។

វេបសាយរបស់ក្រសួងការបរទេសចិន បានផ្សព្វផ្សាយអត្ថបទមួយដែលមានប្រវែងដល់ទៅ 30ទំព័រកាលពីចុងសប្ដាហ៍កន្លងទៅ ដែលជាការរួបរួម និងរៀបរាប់ពីការបដិសេធគ្រប់ចំណុចចោទប្រកាន់ផ្សេងៗ ដែលបានធ្វើឡើងក្នុងអំឡុងការថ្លែងការណ៍របស់ក្រសួងការបរទេសចិនកាលពីអំឡុងសប្ដាហ៍កន្លងទៅ។

ចំណុចបកស្រាយទាំងអស់ គឺជារឿងដែលពាក់ព័ន្ធនឹងការចោទប្រកាន់របស់អ្នកនយោបាយសហរដ្ឋអាមេរិក ជាពិសេសបំផុត គឺលោក ម៉ៃក៍ ប៉ុមប៉េអូ រដ្ឋមន្ត្រីការបរទេសសហរដ្ឋអាមេរិក ដែលបាននិយាយថា ចិនបានបិទបាំងព័ត៌មានពាក់ព័ន្ធនឹងមេរោគកូវីដ-19 រួមទាំងការបញ្ជាក់ថា មេរោគវីរុសនោះ មានដើមកំណើតចេញពីបន្ទប់ពិសោធន៍ក្នុងទីក្រុងវូហាន។

របាយការណ៍បដិសេធមួយនេះ បានលើកយកពាក្យសម្ដីរបស់លោក អាប្រាហាំ លិនខុន អតីតប្រធានាធិបតីសហរដ្ឋអាមេរិកដ៏ល្បីល្បាញ មកចាប់ផ្ដើមក្នុងកថាខណ្ឌដំបូងថា “លីនខុន ធ្លាប់បាននិយាយថា អ្នកអាចបោកប្រាស់មនុស្សមួយចំនួនបានគ្រប់ពេលវេលា ឬបោកប្រាស់មនុស្សគ្រប់គ្នាបាននៅក្នុងពេលខ្លះ តែអ្នកមិនអាចកុហកបោកប្រាស់មនុស្សគ្រប់គ្នាបានគ្រប់ពេលវេលានោះឡើយ”

រដ្ឋបាលចិន អះអាងថា ភ័ស្តុតាងគ្រប់យ៉ាងបង្ហាញឱ្យឃើញថា មេរោគវីរុសកូរ៉ូណា មិនបានចេញមកពីការផលិតរបស់មនុស្សទេ ខណៈដែលមន្ទីរពិសោធន៍ក្នុងទីក្រុងវូហានដែលត្រូវសហរដ្ឋអាមេរិកបញ្ជាក់ថា ជាកន្លែងផលិតមេរោគវីរុស រហូតដល់បែកធ្លាយចេញមកនោះ ក៏គ្មានសមត្ថភាពក្នុងការច្នៃប្រឌិតមេរោគវីរុសកូរ៉ូណាប្រភេទថ្មីចេញមកបាន ដូចដែលសហរដ្ឋអាមេរិកចោទប្រកាន់នោះដែរ។

ឯកសារដែលត្រូវបានផ្សព្វផ្សាយចេញមកនេះ នៅបានបង្ហាញអំពីពេលវេលាក្នុងការដំណើរការរបស់ប្រទេសចិន ដែលមានការផ្ដល់ព័ត៌មានទៅប្រជាសហគមន៍អន្តរជាតិថា វាបានដំណើរការឡើងយ៉ាងស័ក្តិសម បើកចំហ និងគ្មានលាក់លៀម ដើម្បីលាងជម្រះចំណុចចោទប្រកាន់របស់សហរដ្ឋអាមេរិកដែលថា ចិនយឺតយ៉ាវក្នុងការដាស់តឿនសហគមន៍អន្តរជាតិ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មីនេះ។

អត្ថបទរបស់ក្រសួងការបរទេសចិន ថែមទាំងបានបដិសេធចំណុចរិះគន់របស់ប្រទេសលោកខាងលិច ពាក់ព័ន្ធនឹងការដំណើរការរបស់រដ្ឋបាលចិនចំពោះលោកវេជ្ជបណ្ឌិត លី វឹនលៀង ដែលជាមនុស្សដំបូងគេ ដែលចេញមកដាស់តឿនអំពីការឆ្លងរាលដាលរបស់មេរោគវីរុសប្រភេទថ្មីនេះក្នុងទីក្រុងវូហាន មុននឹងសាមីខ្លួនបានស្លាប់នៅពេលក្រោយមកដោយសារតែមេរោគវីរុសដដែលនោះ ដោយអត្ថបទនោះបានសង្កត់ធ្ងន់ថា វេជ្ជបណ្ឌិតរូបនេះ មិនមែនជាអ្នកបង្ហាញពីតម្រុយរបស់មេរោគទេ ហើយគាត់ក៏មិនដែលត្រូវចាប់ខ្លួនឡើងតុលាការដែរ ដែលទាំងអស់នេះ វាផ្ទុយគ្នានឹងព័ត៌មានដែលបានផ្សព្វផ្សាយនៅក្នុងបណ្ដាប្រទេសលោកខាងលិច៕

ប្រភព៖ សារព័ត៌មានបរទេស

May 11, 2020

សហរដ្ឋអាមេរិក “ទាមទារ” ឱ្យចិនលុបចោលបំណុលដើម្បីជាសំណងសម្រាប់ការខាតបង់ដោយសារ COVID-19

ក្រុមមន្ត្រីសេតវិមានបានពិនិត្យទៅលើគំនិតមួយដែលថា នឹងទាមទារឱ្យមានការលុបចោលទាំងស្រុង ឬមួយផ្នែកនៃបំណុលដែលមានទំហំ1.1លានលានដុល្លារដែលអាមេរិកាំងបានខ្ចីពីចិន។

ក្រុមអ្នកវិភាគបានឱ្យដឹងថា ប្រទេសចិនអាចនឹងកាត់បន្ថយបរិមាណនៃការក្ដោបក្ដាប់ភាគហ៊ុននៅក្នុងរតនាគារជាតិនៃសហរដ្ឋអាមេរិកក្នុងអំឡុងប៉ុន្មានខែខាងមុខ ដើម្បីទប់ទល់នឹងភាពតានតឹងនៃសង្គ្រាមពាណិជ្ជកម្មដែលកំពុងកើនកម្ដៅ និងសង្គ្រាមពាក្យសម្ដីរវាងប្រទេសទាំងពីរទាក់ទិននឹងប្រភពរបស់វីរុសCOVID-19។

របាយករណ៍សារព័ត៌មានរបស់សហរដ្ឋអាមេរិកបានឱ្យដឹងថា ក្រុមមន្ត្រីនៅសេតវិមាន កំពុងតែពិភាក្សាគ្នាអំពីវិធានការសំខាន់មួយចំនួន ដើម្បីប៉ះប៉ូវទៅលើប្រាក់ចំណាយសម្រាប់ទប់ទល់នឹងវិបត្តិសុខភាព ក្នុងនោះមានវិធានការលុបចោលទាំងស្រុង ឬមួយផ្នែកនៃបំណុលសរុបប្រមាណជាជិត1.1លានលានដុល្លារ ដែលរដ្ឋាភិបាលអាមេរិកាំងកំពុងជំពាក់ប្រទេសចិន។

ក្រុមអ្នកវិភាគយល់ថា សហរដ្ឋអាមេរិកពិបាកក្នុងការលើកឡើង “ជម្រើសធ្ងន់ធ្ងរ” បែបនេះ ព្រោះថា ជាក់ស្ដែងគំនិតនេះអាចជំរុញឱ្យទីក្រុងប៉េកាំងស្វែងរកវិធីការពារខ្លួនពីហានិភ័យ ដោយធ្វើការកាត់បន្ថយប្រាក់កម្ចីសម្រាប់រដ្ឋាភិបាលអាមេរិកាំង។

ប្រការខាងលើអាចបង្កបញ្ហាធំដល់ទីផ្សារមូលបត្ររបស់រដ្ឋាភិបាលអាមេរិកាំងនៅក្នុងអំឡុងពេលបច្ចុប្បន្ន ខណៈដែលទីក្រុងវ៉ាស៊ីងតោនកំពុងបង្កើនការបោះពុម្ភផ្សាយមូលបត្រថ្មីដើម្បីយកប្រាក់មកប្រើប្រាស់ក្នុងសកម្មភាពទប់ទល់នឹងវីរុសកូរ៉ូណា និងប៉ះប៉ូវការខូចខាតផ្នែកសេដ្ឋកិច្ចដែលបង្កឡើងដោយមេរោគរាតត្បាតនេះ។

កិច្ចពិភាក្សាទាក់ទិននឹងបញ្ហាហិរញ្ញវត្ថុរវាងប្រទេសចិន និងសហរដ្ឋអាមេរិក ត្រូវបានក្រុមមន្ត្រីអាមេរិកាំងធ្វើឡើងស្របពេលដែលប្រធានាធិបតី Donald Trump និងក្រុមមន្ត្រីរដ្ឋាភិបាលជាច្រើនរូបផ្សេងទៀត បានរិះគន់ទីក្រុងប៉េកាំងដែលបានបណ្ដោយឱ្យវីរុសCOVID-19 ផ្ទុះឆ្លងរាលដាល និងព្រមានថានឹងយកពន្ធនាំចូលថ្មី ដើម្បីដាក់ទណ្ឌកម្មប្រទេសចិន។

ក្រុមអ្នកវិភាគបានព្រមានថា “រាល់សកម្មភាពដែលធ្វើឡើងដើម្បីលុបបំណុលរបស់ចិន នឹងធ្វើឱ្យមានប្រតិកម្មផ្ទុយពីការចង់បានរបស់សហរដ្ឋអាមេរិក។ ព្រោះថា ប្រការនោះអាចបំផ្លាញទំនុកចិត្តរបស់អ្នកវិនិយោគទៅលើសមត្ថភាពផ្នែកហិរញ្ញវត្ថុរបស់សហរដ្ឋអាមេរិក ហើយពួកគេនឹងយល់ថា ប្រទេសនេះមិនអាចទូទាត់ការចំណាយរបស់ខ្លួនបាន ដោយត្រូវពឹងផ្អែកទៅលើការលុបបំណុលរបស់ចិន”។

ក្រសួងរតនាគារជាតិសហរដ្ឋអាមេរិក(United States Department of the Treasury)

បញ្ហាខាងលើក៏នឹងរុញច្រានអត្រាការប្រាក់ឱ្យឡើងខ្ពស់ បណ្ដាលឱ្យមានការខាតបង់ច្រើននៅពេលរដ្ឋាភិបាល ក៏ដូចជាក្រុមហ៊ុន និងអ្នកប្រើប្រាស់នៅសហរដ្ឋអាមេរិកត្រូវការប្រាក់កម្ចី ហើយពេលនោះ បញ្ហាទាក់ទិនទាំងឡាយក៏នឹងកើតឡើង ក្លាយជាបន្ទុកដ៏ធ្ងន់ធ្ងរទៅលើខឿនសេដ្ឋកិច្ចសហរដ្ឋអាមេរិកថែមមួយកម្រិតទៀត ខណៈដែលវាកំពុងតែខ្សោយស្រាប់។

ដំណឹងខាងលើនេះ ប្រហែលជាធ្វើឱ្យថ្នាក់ដឹកនាំប្រទេសចិន មានការព្រួយបារម្ភអំពីហានិភ័យកាន់តែមានច្រើនឡើងទាក់ទិននឹងការដែលប្រទេសចិនកំពុងកាន់កាប់ខ្ទង់បំណុលដ៏ធំរបស់រដ្ឋាភិបាលអាមេរិកាំងក្នុងអំឡុងទំនាក់ទំនងរបស់ប្រទេសទាំងពីរ ហាក់កំពុងល្អក់កករយ៉ាងឆាប់រហ័ស នេះបើតាមមតិរបស់ក្រុមអ្នកវិភាគ។

នៅក្នុងទសវត្សរ៍កន្លងទៅ មានការអំពាវនាវជាច្រើនដែលស្នើឱ្យប្រទេសចិនលុបខ្ទង់បំណុលដ៏ធំដែលចិនបាន និងកំពុងកាន់កាប់នៅក្នុងរតនាគារជាតិអាមេរិកាំង។

ប្រទេសចិនអាចសងសឹកចំពោះការគំរាមរបស់សហរដ្ឋអាមេរិក ដោយការបង្កឱ្យមានវិបត្តិទាក់ទិននឹងតម្លៃរូបិយប័ណ្ណដុល្លារអាមេរិក និងទីផ្សារហិរញ្ញវត្ថុ ដោយការបញ្ចេញលក់មូលបត្ររបស់ខ្លួននៅក្នុងរតនាគារជាតិអាមេរិកាំង។ កត្តានេះនឹងរុញច្រានតម្លៃមូលបត្ររបស់រដ្ឋាភិបាលអាមេរិកាំងឱ្យធ្លាក់ចុះ និងបង្កើតបានជាមហន្តរាយហិរញ្ញវត្ថុជាសកល។

កន្លងមក ធ្លាប់មានការអំពាវនាវដល់ប្រទេសចិន ឱ្យធ្វើពិពិធកម្មទៅលើទុនបម្រុងនៅបរទេសរបស់ខ្លួនដើម្បីចៀសវាងហានិភ័យអាក្រក់កើតឡើង។ បច្ចុប្បន្ន ក្នុងចំណោមទុនបម្រុងអន្តរជាតិចំនួន3លានលានដុល្លាររបស់ចិន នៅបរទេស គឺមានដល់ទៅ1ភាគ3ឯណោះដែលនៅក្នុងរតនាគារជាតិនៃសហរដ្ឋអាមេរិក។

របាយការណ៍ថ្មីបំផុតរបស់ក្រសួងហិរញ្ញវត្ថុសហរដ្ឋអាមេរិកបានឱ្យដឹងថា ចំនួនមូលបត្រនៃរដ្ឋាភិបាលអាមេរិកាំងដែលកំពុងត្រូវបានកាន់កាប់ដោយប្រទេសចិន បានថយចុះមកនៅត្រឹម1.09លានលានដុល្លារក្នុងខែកុម្ភៈ គឺតិចជាងបើធៀបនឹង1.32លានលានដុល្លារកាលពីខែវិច្ឆិកា ឆ្នាំ2013។ ប្រទេសចិន ធ្លាប់ត្រូវបានប្រទេសជប៉ុននាំមុខកាលពីឆ្នាំមុន ក្នុងនាមជាម្ចាស់បរទេសធំបំផុតរបស់រតនាគារជាតិនៃសហរដ្ឋអាមេរិក៕

ប្រភព៖ សារព័ត៌មានបរទេស

May 9, 2020

អ្នកវិទ្យាសាស្ត្រចិនវាស់វែងកម្ពស់នៃកំពូលភ្នំអេវឺរ៉េសឡើងវិញ

ក្រុមអ្នកវិទ្យាសាស្ត្រដែលមានសមាជិកចំនួន53នាក់នឹងប្រើប្រាស់ប្រព័ន្ធកំណត់ទីតាំង(GPS)នៃផ្កាយរណប់ Beidou រួមនឹងឧបករណ៍សិក្សាស្រាវជ្រាវផ្សេងទៀតរបស់ចិន សម្រាប់បេសកកម្មវាស់វែងកំពូលភ្នំនេះឡើងវិញ។

ក្រុមអ្នកវិទ្យាសាស្ត្រចិនបានទៅដល់ជើងភ្នំនៅតំបន់ស្វយ័តទីបេត៍តាំងពីថ្ងៃទី2មីនាដើម្បីត្រៀមសម្រាប់បេសកកម្មវាស់វែងកម្ពស់របស់កំពូលភ្នំ អេវឺរ៉េស(Everest) នេះបើតាមសារព័ត៌មាន SCMP ចុះផ្សាយកាលពីថ្ងៃទី1ឧសភា។ កំពូលភ្នំអេវឺរ៉េសនៃជួរភ្នំហ៊ីម៉ាឡាយ៉ា ស្ថិតនៅចន្លោះព្រំដែនរបស់ប្រទេសនេប៉ាល់ និងប្រទេសចិន។ ប្រទេសទាំង2នេះ តាំងពីយូរយារណាស់មកហើយ តែងតែនិយាយមិនត្រូវគ្នាអំពីកម្ពស់នៃកំពូលភ្នំអេវ៉ឺរ៉េសនេះ ដែលប្រទេស1គិតទាំងស្រទាប់ទឹកកកនិងព្រិលដែលនៅពីលើកំពូលភ្នំ ចំណែកប្រទេស1ទៀតគិតត្រឹមតែថ្មដែលនៅខ្ពស់ជាងគេបង្អស់។

កាលពីឆ្នាំ2005 អ្នកវិទ្យាសាស្ត្រចិន1ក្រុមបានធ្វើការវាស់វែងកម្ពស់របស់កំពូលភ្នំនេះ ទាំងកម្ពស់ត្រឹមថ្ម និងកម្ពស់ត្រឹមព្រិលនៅពីខាងលើ។ ប្រទេសចិនបានប្រកាសថាកម្ពស់របស់កំពូលភ្នំអេវឺរ៉េសរាប់ត្រឹមថ្មដែលមានកម្ពស់8,844.43ម៉ែត្រគឺជាតួលេខត្រឹមត្រូវបំផុត គិតត្រឹមពេលនោះ។

ចំណែកប្រទេសនេប៉ាល់វិញ គិតថា គួរតែរាប់បញ្ចូលទាំងទឹកកកនៅពីខាងលើ ដែលនេះមានន័យថា វាមានកម្ពស់8,848ម៉ែត្រ។ នេះក៏ជាតួលេខដែលត្រូវបានប្រើប្រាស់ជាទូទៅនៅក្នុងពិភពលោក។ ក៏ប៉ុន្តែ ក្រុមអ្នកវិទ្យាសាស្ត្រយល់ថាទឹកកក និងព្រិលនៅលើកំពូលភ្នំប្រហែលជាបានថយចុះជាច្រើនសង់ទីម៉ែត្រ ក្រោយគ្រោះរញ្ជួយដីកម្លាំង7.8រិចទ័រកាលពីឆ្នាំ2015។ បម្រែបម្រួលនៃល្បឿនខ្យល់ក៏ប៉ះពាល់ដល់កម្ពស់របស់កំពូលភ្នំនេះដែរ។

កាលពីខែតុលាឆ្នាំមុន នៅក្នុងដំណើរទស្សនកិច្ចរបស់លោកស៊ី ជីនភីងទៅកាន់ប្រទេសនេប៉ាល់ ប្រទេសទាំង2បានយល់ព្រមសហការគ្នាលើបញ្ហាមួយចំនួន ក្នុងនោះក៏មានបញ្ហាទាក់ទិននឹងកំពូលភ្នំអេវឺរ៉េសផងដែរ។ ប្រទេសទាំង2ក៏បានចាត់ទុកថា កំពូលភ្នំនេះគឺជានិមិត្តរូបសម្រាប់មិត្តភាពរវាងប្រទេសចិន និងនេប៉ាល់ទៀតផង។

លទ្ធផលនៃការសិក្សាស្រាវជ្រាវថ្មីខាងលើនេះនឹងត្រូវបានប្រើប្រាស់សម្រាប់ការសិក្សាអំពីធរណីមាត្រ។ ទិន្នន័យស្ដីអំពីកម្រាស់ពិតប្រាកដរបស់ព្រិលលើកំពូលភ្នំ ល្បឿនខ្យល់ និងឧតុនិយមដែលប្រមូលបានពីការសិក្សាស្រាវជ្រាវនៅលើកំពូលភ្នំអេវឺរ៉េសនេះក៏នឹងជួយឱ្យអ្នកវិទ្យាសាស្ត្រតាមដានទន្លេទឹកកក ព្រមទាំងអាចការពារបរិស្ថានជីវសាស្ត្រផងដែរ៕

ប្រភព៖ សារព័ត៌មានបរទេស

May 8, 2020

ប្រទេសចិន “បញ្ចេញលក្ខខណ្ឌ” បើសិនជាចង់ស៊ើបអង្កេតរកប្រភពCOVID-19

ឯកអគ្គរដ្ឋទូតចិនប្រចាំអង្គការសហប្រជាជាតិបានឱ្យដឹងថា ប្រទេសចិននឹងមិនអញ្ជើញអ្នកជំនាញអន្តរជាតិណាមួយមកស៊ើបអង្កេតបញ្ហាប្រភពរបស់វីរុសកូរ៉ូណានោះទេ រហូតដល់ប្រទេសនេះទទួលបាន “ជ័យជំនះចុងក្រោយ”។

WHO កាលពីចុងសប្ដាហ៍កន្លងបានឱ្យដឹងថា អង្គការនេះសង្ឃឹមថានឹងត្រូវបានអញ្ជើញឱ្យចូលរួមក្នុងការស្រាវជ្រាវលើប្រភពរបស់ COVID-19។ នៅពេលត្រូវបានសួរអំពីបញ្ហានេះ ឯកអគ្គរដ្ឋទូតចិន Chen Xu ថ្ងៃនេះបានឆ្លើយនៅក្នុងសន្និសីទសារព័ត៌មានតាមអនឡាញពីទីក្រុងហ្សឺណែវថា “អាទិភាពបច្ចុប្បន្នគឺផ្ដោតទៅលើការប្រយុទ្ធប្រឆាំងនឹងវីរុស រហូតដល់យើងបានទទួលជោគជ័យចុងក្រោយ”។

លោក Chen Xu បន្តថា “យើងត្រូវការផ្ដោតចំបញ្ហា និងបែងចែកកម្លាំងសមស្រប។ យើងមិនខ្លាចនឹងការស៊ើបអង្កេត និងវាយតម្លៃណាមួយនោះទេ ព្រោះថាវាអាចជួយដល់ការប្រឹងប្រែងរបស់ពិភពលោកដើម្បីត្រៀមសម្រាប់ទប់ទល់នឹងករណីបន្ទាន់អំពីសុខភាពសាធារណៈក្នុងពេលអនាគត”។

ក្រុមអ្នកវិទ្យាសាស្ត្រមួយចំនួនយល់ថា វីរុសCOVID-19 មានប្រភពពីសត្វប្រចៀវ និងបានឆ្លងពីសត្វមកមនុស្សនៅឯផ្សារលក់សត្វព្រៃរស់នៅក្នុងទីក្រុង Wuhan កាលពីចុងឆ្នាំ2019។ ប៉ុន្តែលោក Trump និងរដ្ឋមន្ត្រីការបរទេសសហរដ្ឋអាមេរិក លោក Mike Pompeo រួមនឹងមន្ត្រីអាមេរិកាំងជាច្រើនផ្សេងទៀត កំពុងតែជំរុញឱ្យស៊ើបអង្កេតលើសម្មតិកម្មដែលថា COVID-19 បានរួចចេញពីបន្ទប់ពិសោធន៍នៅទីក្រុង Wuhan ប្រទេសចិន។ អង្គភាពស៊ើបការណ៍សម្ងាត់អាមេរិកាំងកំពុងស្រាវជ្រាវលើបញ្ហានេះ បើទោះជាមានការអះអាងថា វីរុសនេះ “មិនមែនបង្កើតឡើងដោយមនុស្ស”។

ប្រទេសចិនបានអះអាងថា រដ្ឋមន្ត្រីការបរទេសអាមេរិកាំងមិនអាចបញ្ជាក់អំពីបញ្ហាដែលថា វីរុសCOVID-19 បានរួចចេញពីបន្ទប់ពិសោធន៍នៅ Wuhan នោះឡើយ ព្រោះថា លោក “មិនមានភ័ស្ដុតាំងណាមួយបញ្ជាក់អំពីរឿងនេះ”។

COVID-19 បានបង្ហាញខ្លួនក្នុងប្រទេសនិងដែនដីចំនួន210ក្នុងពិភពលោក បណ្ដាលឱ្យមនុស្សជិត3.8លាននាក់បានឆ្លងមេរោគ ក្នុងនោះមានជាង259,000នាក់បានបាត់បង់ជីវិត៕

ប្រភព៖ សារព័ត៌មានបរទេស

May 6, 2020

អ្នកវីរុសវិទ្យាចិនម្នាក់ ដែលត្រូវគេចោទថា ដឹងរឿង “កូវីដ-19 បែកធ្លាយចេញពីបន្ទប់ពិសោធន៍វូហាន” បានបដិសេធរឿង “ក្បត់ឧត្ដមគតិ” នាំក្រុមគ្រួសារភៀសខ្លួនចេញពីចិន

របាយការណ៍ព័ត៌មានរបស់ចិន កាលពីថ្ងៃចុងសប្ដាហ៍មុន(ថ្ងៃទី2ឧសភា) បានឱ្យដឹងថា អ្នកវីរុសវិទ្យាល្បីឈ្មោះម្នាក់ នៃស្ថាប័នវីរុសវិទ្យាក្នុងទីក្រុងវូហាន លោកស្រី ស៊ឺ ជឹងលី ដែលបានធ្លាក់ខ្លួនក្លាយជាជនសង្ស័យពាក់ព័ន្ធនឹងប្រភពកំណើតនៃការឆ្លងរាលដាលរបស់វីរុសកូរ៉ូណាប្រភេទថ្មី ឬកូវីដ-19 ទូទាំងពិភពលោកនាពេលបច្ចុប្បន្ន បានចេញមកបដិសេធចំពោះព័ត៌មានចចាមអារ៉ាមដ៏ច្រើនសន្ធឹកដែលថា “លោកស្រីបានក្បត់ឧត្ដមគតិខ្លួនឯង និងបានរត់ភៀសខ្លួនចេញពីប្រទេសចិន”។

លោកស្រី ស៊ឺ អ្នកស្រាវជ្រាវវីរុសសត្វប្រចៀវល្បីឈ្មោះលំដាប់ពិភពលោក បានផូស្តសំណេរមួយផ្ញើទៅក្រុមមិត្តភក្តិក្នុងបណ្ដាញសង្គមចិន វីឆាត កាលពីថ្ងៃសៅរ៍(ទី2មេសា) ថា “មិនថាត្រូវប្រឈមនឹងបញ្ហាធ្ងន់ធ្ងរប៉ុនណាឡើយ គ្មានថ្ងៃដែលនឹងកើតហេតុការណ៍ក្បត់ឧត្ដមគតិខ្លួនឯង ដូចដែលពាក្យចចាមអារ៉ាមលេចឮនោះឡើយ”។

ដោយសារតែមានចរន្តព័ត៌មានចចាមអារ៉ាមកាលពីពេលថ្មីៗនេះ បញ្ជាក់ថា លោកស្រី ស៊ឺ ជឹងលី បាន “ក្បត់ឧត្ដមគតិ” នាំក្រុមគ្រួសារ និងប្រមូល “ឯកសារសម្ងាត់ប្រមាណជា 1ពាន់ឈុត” រត់ភៀសខ្លួនគេចទៅអឺរ៉ុប និងបានដាក់ពាក្យស្នើសុំការគាំពារពីស្ថានទូតសហរដ្ឋអាមេរិកនៅក្នុងប្រទេសបារាំង។

រហូតទាល់តែទីភ្នាក់ងារព័ត៌មានរបស់ចិន ដែលមានដូចជា វេបសាយព័ត៌មាននៅក្នុងប្រទេស Global Times និងទីភ្នាក់ងារព័ត៌មាននៅទីក្រុងហុងកុង សៅថ៍ ឆាយណា ម៉រនីង ផូស្ត បានចេញមករាយការណ៍ព័ត៌មាន(កាលពីថ្ងៃទី2 ឧសភា) បដិសេធរាល់ព័ត៌មានចចាមអារ៉ាមទាំងនោះ ដោយបានផ្សព្វផ្សាយសំណេររបស់លោកស្រី ស៊ឺ នៅក្នុងបណ្ដាញសង្គម WeChat ទៀតផង។

សារព័ត៌មាន គ្លោបល ថាមស៍ របស់បក្សកុម្មុយនីស្តចិន បានអះអាងថា លោកស្រីស៊ឺ ជឹងលី ជាអ្នកសរសេរសំណេរ ផូស្តនៅលើបណ្ដាញសង្គម WeChat ពិតប្រាកដមែន ដោយសំណេរនោះបានសរសេរថា “មិត្តភក្តិជាទីស្រឡាញ់…ខ្ញុំ និងក្រុមគ្រួសារសុខសប្បាយជាទេ មិនថាត្រូវប្រឈមនឹងបញ្ហាធ្ងន់ធ្ងរប៉ុនណាក៏ដោយ គ្មានថ្ងៃដែលខ្ញុំនឹង “ក្បត់ឧត្ដមគតិខ្លួនឯង” ដូចដែលព័ត៌មានចចាមអារ៉ាមបានលេចឮនោះទេ។ ពួកយើងមិនបានធ្វើអ្វីខុសទេ ពួកយើងមានជំនឿដ៏គង់វង្សចំពោះវិទ្យាសាស្ត្រ នឹងត្រូវតែមានថ្ងៃដែលដុំមេឃខ្មៅរលាយបាត់អស់ និងដួងព្រះអាទិត្យចាំងចែងពន្លឺចេញមកមិនខាន”

លោកស្រី ស៊ឺ ជឹងលី អ្នកស្រាវជ្រាវប្រចាំស្ថាប័នវីរុសវិទ្យាទីក្រុងវូហាន បានធ្លាក់ខ្លួនក្លាយជាមុខសញ្ញាក្នុងការរិះគន់ និងក្លាយជាជនសង្ស័យថាបានដឹង បានឮរឿងការឆ្លងរាលដាលរបស់វីរុសកូរ៉ូណាប្រភេទថ្មី ដែលចាប់ផ្ដើមឆ្លងរាលដាលក្នុងវូហានកាលពីចុងឆ្នាំកន្លងទៅ។

លោកស្រី ស៊ឺ បានបំពេញការងារសិក្សាស្រាវជ្រាវជាមួយមេរោគវីរុសកូរ៉ូណាយូរជាង 10ឆ្នាំមកហើយ និងជាអ្នករកឃើញវីរុសកូរ៉ូណានៅក្នុងសត្វប្រចៀវ ដែលបង្កជាជំងឺ SARS (ជំងឺផ្លូវដង្ហើមធ្ងន់ធ្ងរ និងទាន់ហន់) នៅឆ្នាំ2002 ដល់ 2003។

ក្រុមអ្នកវិទ្យាសាស្ត្រនាំគ្នាជឿថា វីរុសកូរ៉ូណាប្រភេទថ្មី បានចម្លងមេរោគពីសត្វ មកមនុស្ស និងអាចជាសត្វប្រចៀវ ហើយនិងមើលទៅហាក់ដូចជាមិនអាចទៅរួចសោះឡើយ ដែលវាអាចរបូតធ្លាយចេញមកពីស្ថាប័នវីរុសវិទ្យានៅទីក្រុងវូហានដោយឧប្បត្តិហេតុ ឬដោយទង្វើដែលកើតចេញពីស្នាដៃមនុស្ស។

តែយ៉ាងណាក៏ដោយ នៅមិនទាន់មានអ្នកណាបានដឹងពីប្រភពកំណើតពិតប្រាកដនៃវីរុសមរណៈនេះនៅឡើយ ចំណែកប្រទេសចិន បានថ្លែងថា ខ្លួនកំពុងតែដំណើរការស៊ើបអង្កេតអំពីរឿងនេះ៕

ប្រភព៖ សារព័ត៌មានបរទេស

May 6, 2020

ពលរដ្ឋចិនជាង100លាននាក់ដើរទេសចរណ៍ពេញផ្ទៃប្រទេស! វិស័យទេសចរណ៍ចិន “មានទឹកមាត់លេប” ខ្លះៗហើយ

មនុស្សប្រមាណជា104លាននាក់នៅប្រទេសចិន បានសម្រុកទៅកាន់តំបន់ទេសចរណ៍នានា នៅក្នុងឱកាសថ្ងៃឈប់សម្រាកចំនួន5ថ្ងៃនៅដើមខែឧសភា បន្ទាប់ពីប្រទេសនេះប្រកាសថា បានគ្រប់គ្រង COVID-19។

យោងតាមទិន្នន័យនៅក្នុងស្ថិតិរបស់ក្រសួងវប្បធម៌និងទេសចរណ៍ប្រទេសចិន ក្នុងរយៈពេល4ថ្ងៃដំបូងនៃថ្ងៃឈប់សម្រាក5ថ្ងៃដែលចាប់ផ្ដើមពីទិវាពលកម្មអន្តរជាតិ1ឧសភា និងបញ្ចប់នៅថ្ងៃនេះ(5ឧសភា) ត្រូវបានគេចាត់ទុកជា “សប្ដាហ៍មាស” នៅប្រទេសចិន។

ក្រសួងវប្បធម៌និងទេសចរណ៍ចិន បានឱ្យដឹងថា ភ្ញៀវទេសចរណ៍ដែលមានចំនួនច្រើន នៅក្នុងថ្ងៃឈប់សម្រាករយៈពេលវែងបែបនេះ នឹងនាំមកចំណូលប្រមាណជា6ពាន់លានដុល្លារអាមេរិក។

គិតដោយឡែកក្នុងថ្ងៃទី1ឧសភា តំបន់ទេសចរណ៍ក្នុងស្រុកនានា បានទទួលភ្ញៀវជាង23លាននាក់ ក្នុងនោះទីក្រុង Wuhan ដែលជាសម្បុកមេរោគកូរ៉ូណាដំបូងគេ មានពលរដ្ឋច្រើនជាងគេបង្អស់ក្នុងចំណោមទីក្រុងនានាក្នុងប្រទេសចិនដែលបានចេញទៅទេសចរណ៍នៅតំបន់ផ្សេងៗ។ យោងតាមក្រុមហ៊ុនអ៊ីនធើណិត Baidu Inc ចំនួនមនុស្សដែលបានចាកចេញពីទីក្រុង Wuhan ដើម្បីទៅទេសចរណ៍ក្រៅតំបន់ បានកើនឡើងជិត50% ក្នុងថ្ងៃទី1ឧសភា បើធៀបនឹងថ្ងៃធម្មតា។

ទីក្រុងប៉េកាំង ទីក្រុងតាលាន(Dalian) ទីក្រុងធៀនជីន(Tianjin) និងទីក្រុងជីណាន(Jinan) ជាដើម ក៏មានពលរដ្ឋជាច្រើនចេញទៅទេសចរណ៍ផងដែរ នៅក្នុងកាលៈទេសៈដែលប្រទេសចិនកំពុងតែបន្ធូរបន្ថយការរឹតត្បិតលើការដើរហើរ។

ក្រសួងដឹកជញ្ជូនរបស់ចិន មុននេះបានព្យាករថា មនុស្សប្រមាណជា23.36លាននាក់នឹងចេញទៅទេសចរណ៍ក្នុងថ្ងៃឈប់សម្រាកនេះ ដែលតួលេខនេះ ខ្ពស់ជាង19.9លាននាក់បើធៀបនឹងរដូវឆេងមេង(QingMing Festival) កាលពីខែមុនទៅទៀត។

ការកើនឡើងនៃចំនួនទេសចរក្នុងថ្ងៃឈប់សម្រាកនេះ អាចជួយលើកស្ទួយវិស័យទេសចរណ៍ និងសណ្ឋាគារនៅប្រទេសចិនបានមួយកម្រិត បន្ទាប់ពីត្រូវលិចលង់ដោយសារ COVID-19 ដែលបានធ្វើឱ្យប្រជាជនចិនជាង83,000នាក់បានឆ្លងមេរោគ ក្នុងនោះមាន4,637នាក់បានបាត់បង់ជីវិត៕

ប្រភព៖ សារព័ត៌មានបរទេស

May 5, 2020

ចិនសាកល្បងប្រើប្រាស់ប្រាក់យន់អេឡិចត្រូនិក! អនាគតដ៏ខ្លីខាងមុខ ក្រដាសប្រាក់យន់អាចនឹងលែងមានក្នុងពិភពលោក

ចាប់ពីដើមសប្ដាហ៍នេះ រដ្ឋាភិបាលចិននឹងចាប់ផ្ដើមដំណើរការសាកល្បងទូទាត់ដោយលុយយន់អេឡិកត្រូនិកនៅក្នុងទីក្រុងចំនួន4នៃប្រទេសនេះ។

ក្នុងរយៈពេលជាច្រើនខែចុងក្រោយនេះ ធនាគារប្រជាជនចិន បានដុតដៃដុតជើងជំរុញការអភិវឌ្ឍប្រាក់យន់អេឡិកត្រូនិក ដែលនេះនឹងក្លាយជាខឿនសេដ្ឋកិច្ចធំជាងគេបង្អស់ក្នុងពិភពលោកដែលដំណើរការប្រាក់អេឡិកត្រូនិកមានអធិបតេយ្យភាពដំបូង ខុសពី bitcoin ដែលមិនមានព្រំដែន។

ចាប់ពីខែឧសភា បុគ្គលិករដ្ឋនៅក្នុងទីក្រុង Shenzhen, Chengdu, Suzhou និងទីក្រុង Baoding នឹងទទួលបៀវត្សជាប្រាក់អេឡិកត្រូនិក។ នៅចំពោះមុខ ប្រាក់អេឡិកត្រូនិកនេះ ត្រូវបានប្រើដើម្បីទូទាត់ទៅលើមធ្យោបាយធ្វើដំណើរសាធារណៈ ផ្សារទំនើប ហាងទំនិញផាសុកភាព(ហាងលក់ទំនិញគ្រប់មុខដែលចាំបាច់សម្រាប់ប្រើរាល់ថ្ងៃ) ក្រុមហ៊ុនដែលស្ថិតក្នុងវិស័យទេសចរណ៍ និងសណ្ឋាគារ ហើយក្រោយមកនឹងត្រូវបានពង្រីកទៅក្នុងវិស័យផ្សេងៗទៀត។

ប្រាក់យន់អេឡិកត្រូនិក ដំណើរការដូចទៅនឹងក្រដាសប្រាក់ធម្មតា ប៉ុន្តែវាជាទម្រង់កូដក្នុងកាបូបលុយអេឡិកត្រូនិកដែលត្រូវបានទទួលស្គាល់ដោយធនាគារកណ្ដាលរបស់ចិន។ ប្រាក់អេឡិកត្រូនិក អនុញ្ញាតឱ្យអ្នកប្រើប្រាស់ ទូទាត់ ទទួល និងផ្ទេរប្រាក់ដូចទៅនឹងកម្មវិធីទូទាត់ប្រាក់តាមអនឡាញដែល Alipay និង WeChat Pay កំពុងធ្វើយ៉ាងដូច្នោះដែរ។ ដើម្បីទូទាត់ ឬទទួលប្រាក់ អ្នកប្រើប្រាស់គ្រាន់តែយកទូរស័ព្ទប៉ះគ្នាគឺជាការស្រេច។

តាមការសន្និដ្ឋាន វត្តមានរបស់លុយអេឡិកត្រូនិករបស់ប្រទេសចិននេះ អាចនឹងធ្វើឱ្យក្រដាសប្រាក់យន់បាត់ខ្លួនពីទីផ្សារពិភពលោកនាពេលខាងមុខមិនខាន។

ជារៀងរាល់ឆ្នាំ កម្មវិធី Ailpay និង WechatPay ត្រូវបានរាយការណ៍ថា ទំហំនៃការទូទាត់មិនប្រើក្រដាសប្រាក់ បានឡើងដល់ 15លានលានដុល្លារអាមេរិក។ ប្រទេសចិនសង្ឃឹមថា ប្រភេទប្រាក់ថ្មីនេះនឹងរួមចំណែកក្នុងការកាត់បន្ថយការទូទាត់នៃប្រភេទប្រាក់ដទៃដែលគំរាមកំហែងដល់ស្ថិរភាពនៃប្រព័ន្ធហិរញ្ញវត្ថុ៕

ប្រភព៖ សារព័ត៌មានបរទេស

May 4, 2020

ប្រធានាធិបតី Trump ជំពាក់បំណុលធនាគារចិន រាប់សិបលានដុល្លារ

សារព័ត៌មាន Daily Mail បានរាយការណ៍ថា ប្រធានាធិបតីសហរដ្ឋអាមេរិក បច្ចុប្បន្នជំពាក់បំណុលធនាគារប្រទេសចិនរាប់សិបលានដុល្លារ ហើយថា នឹងពន្យារពេលបង់ប្រាក់សងធនាគារនេះនៅឆ្នាំ2022 (ពាក់កណ្ដាលអាណត្តិទី2របស់លោក Trump បើសិនលោកជាប់ឆ្នោតម្ដងទៀត)។

សិទ្ធិកាន់កាប់របស់លោក Trump ចំពោះអគារ Manhattan ដែលមាន43ជាន់ ត្រូវបានគេដឹងជាទូទៅអស់រយៈពេលច្រើនឆ្នាំមកហើយ ព្រមទាំងត្រូវបានលើកឡើងនៅក្នុងយុទ្ធនាការឃោសនារកសំឡេងឆ្នោតរបស់លោកTrump កាលពីឆ្នាំ2015ទៀតផង។

សារព័ត៌មាន Daily Mail បានឱ្យដឹងថា ប្រធានាធិបតីសហរដ្ឋអាមេរិក លោក Donald Trump កាន់កាប់ភាគហ៊ុនចំនួន30% នៅក្នុងអគារ 1290 Avenue of the Americas នៅឯទីក្រុងនីវយ៉ក សហរដ្ឋអាមេរិក។ អគារនេះ ត្រូវបានគេដឹងថា មានតម្លៃសរុបឡើងដល់ជាង1ពាន់លានដុល្លារ។

អគារ Trump Tower ដែលស្ថិតនៅតាមបណ្ដោយផ្លូវ 1290 នេះ គឺជាផ្នែកមួយនៃមោទកភាពរបស់លោក Trump នៅពេលលោកធ្វើយុទ្ធនាយការរកសំឡេងឆ្លោតសម្រាប់តំណែងប្រធានាធិបតីក្នុងឆ្នាំ2015។

លោក Trump បានថ្លែងកាលពីឆ្នាំ2015 នៅក្នុងអគារ Trump Tower ថា “ខ្ញុំបានយកឈ្នះលើប្រទេសចិនជាច្រើនជាបន្តបន្ទាប់។ ខ្ញុំបានកាន់កាប់មួយផ្នែកធំនៃអគារ Bank of America នៅ San Francisco និងអគារ 1290 Avenue ដែលខ្ញុំយកបានពីចិននៅក្នុងការប្រកួតប្រជែងមួយ។ ពិតជាមានតម្លៃខ្លាំងណាស់។ ខ្ញុំស្រឡាញ់ប្រទេសចិន”។

បើយោងតាមទំព័រ Politico បានឱ្យដឹងថា ដៃគូរបស់លោក Trump គឺក្រុមហ៊ុន Vornado Realty Trust កំពុងកាន់កាប់70%នៃអគារខាងលើ ចាប់តាំងពីឆ្នាំ2012 នៅពេលខ្ចីប្រាក់950លានដុល្លារដើម្បីសងបំណុលលើខ្ទង់វិនិយោគទៅលើអគារនេះ។ ក្នុងនោះ ទឹកប្រាក់ប្រមាណជា 211លានដុល្លារ បានមកពីកម្ចីពីធនាគារចិន (BOC)។

លោក Trump ធ្លាប់បានប្រកាសថានឹងដកខ្លួនចេញពីតួនាទីជាអ្នកគ្រប់គ្រងអាជីវកម្មក្នុងអំឡុងរដូវបោះឆ្នោតប្រធានាធិបតីឆ្នាំ2016 បើសិនជាលោកជាប់ឆ្នោត។

ក៏ប៉ុន្តែ មនុស្សជាច្រើនយល់ថា លោក Trump នៅតែមិនព្រមបោះបង់អាណាចក្រជំនួញរបស់ខ្លួន ដែលមានក្រុមហ៊ុនបុត្រសម្ព័ន្ធជាង500 និងអចលនទ្រព្យនៅក្នុងប្រទេសជាង20 នៅក្នុងពិភពលោក ខណៈបានក្លាយជាម្ចាស់សេតវិមានទៅហើយ។ លោកនៅតែគ្រប់គ្រង Trump Organization បើទោះជាបានប្រគល់សិទ្ធិចាត់ចែងទៅឱ្យកូនប្រុស2រូបរបស់ខ្លួនរួចហើយក្ដី។

កាលពីខែមករា2019 លោក Trump ធ្លាប់បានអំពាវនាវឱ្យមានការស៊ើបអង្កេតលើទំនាក់ទំនងរបស់អតីតអនុប្រធានាធិបតីសហរដ្ឋអាមេរិក លោក Joe Biden ដែលជាបេក្ខភាពលំដាប់កំពូលរបស់បក្សប្រជាធិបតេយ្យសម្រាប់ការបោះឆ្នោតប្រធានាធិបតីអាមេរិកាំងឆ្នាំ2020 ដែលសំដៅទៅលើទំនាក់ទំនងរបស់កូនប្រុសលោក Biden ជាមួយនឹងមូលនិធិមួយដែលបានស្វែងរកវិធីប្រមូលទុនពីប្រទេសចិន។

លោក Trump យល់ថា លោក Hunter Biden បានកេងចំណេញលើឥទ្ធិពលរបស់ឪពុកខ្លួន (លោក Joe Biden) ពេលដែលកំពុងកាន់កាប់តំណែងអនុប្រធានាធិបតី ដើម្បីទទួលបានប្រាក់ 1.5ពាន់លានដុល្លារពីរដ្ឋាភិបាលចិនសម្រាប់មូលនិធិភាគហ៊ុនរបស់ខ្លួន ហើយរកបានប្រាក់ចំណេញរាប់លានដុល្លារពីអំពើកេងខាងលើនេះ។

កាលពីដើមខែមេសា ឆ្នាំ2020 ក្រុមអ្នកធ្វើយុទ្ធនាការឃោសនារកសំឡេងឆ្នោតរបស់លោក Trump បានបង្ហោះសារមួយនៅលើបណ្ដាញសង្គមដែលមានខ្លឹមសារថា “ហេតុអ្វីបានជាធនាគារជាតិចិន បែរជាសហការជាមួយ Hunter Biden ពេលដែលឪពុករបស់គាត់កំពុងកាន់តំណែងជាអនុប្រធានាធិបតី?”។

ថ្មីៗនេះ នៅក្នុងសន្និសីទសារព័ត៌មានមួយនៅឯសេតវិមាន ប្រធានាធិបតីសហរដ្ឋអាមេរិក លោក Donald Trump យល់ថា “ប្រទេសចិននឹងគ្រប់គ្រង Joe Biden” នេះមានន័យថា បើសិនជាលោក Biden ជាប់ឆ្នោតជាប្រធានាធិបតី នៅក្នុងការបោះឆ្នោតនាខែវិច្ឆិកា ឆ្នាំ2020ខាងមុខ នោះប្រទេសចិននឹងអាចគ្រប់គ្រប់សហរដ្ឋអាមេរិក។

ប្រធានាធិបតី Donald Trump នៅតែរិះគន់ជាហូរហែអំពីទំនាក់ទំនងរវាងគូប្រកួតរបស់គាត់ គឺលោក Joe Biden ជាមួយនឹងប្រទេសចិន ក៏ប៉ុន្តែ លោក Trump បានភ្លេចថា ខ្លួននៅជំពាក់លុយយ៉ាងច្រើននៅធនាគាររបស់ប្រទេសចិន ហើយប្រការនេះអាចនឹងធ្វើឱ្យមានការលំបាកធំធេងសម្រាប់លោក ក្នុងយុទ្ធនាការរកសំឡេងឆ្នោតនៅចុងឆ្នាំ2020នេះ។

អ្នកជំនាញការ Robert Maguire មកពីអង្គការពលរដ្ឋដើម្បីការទទួលខុសត្រូវនិងក្រមសីលធម៌ ប្រចាំទីក្រុងវ៉ាស៊ីងតោន បានអះអាងថា “លោក Trump រិះគន់ទៅលើការរកស៊ីរបស់ Hunter ប៉ុន្តែ លោក Trump កំពុងតែកាន់កាប់ក្រុមហ៊នដែលរកបានប្រាក់ចំណេញពីបណ្ដាទំនាក់ទំនងហិរញ្ញវត្ថុជាមួយនឹងបណ្ដាប្រទេសដែលលោកកំពុងតែជំនួសមុខឱ្យប្រជាជនអាមេរិាំងក្នុងការចរចានានា”។

មិនត្រឹមតែប៉ុណ្ណោះ គម្រោងអចលនទ្រព្យជាន់ខ្ពស់2ផ្សេងទៀតដែលមានឈ្មោះ Trump នៅឯ អារ៉ាប់រួម (UAE) និងឥណ្ឌូនេស៊ី បែរជាកំពុងត្រូវបានសាងសង់ដោយក្រុមហ៊ុនជាតិរបស់ចិនទៅវិញ។ លោកប្រធានាធិបតី Trump និងកូនស្រីរបស់គាត់ គឺលោកស្រី Ivanka ទទួលបានកម្មសិទ្ធិលើពាណិជ្ជសញ្ញារាប់រយពីរដ្ឋាភិបាលចិនផងដែរ៕

ប្រភព៖ Daily Mail, Politico

April 27, 2020

មន្ត្រីយោធាអាមេរិកាំង៖ “មិនទាន់មានសេចក្តីសន្និដ្ឋានស្ថាពរថា COVID-19 មានប្រភពពីបន្ទប់ពិសោធន៍នៅទីក្រុង Wuhan

លោក Mark Alexander Milley ដែលជាឧត្តមសេនីយនៃកងទ័ពសហរដ្ឋអាមេរិក និងជាប្រធានអគ្គសេនាធិការកងទ័ពចំរុះរបស់ប្រទេសនេះ ថ្លែងថា ភ័ស្តុតាងដែលបង្ហាញថា COVID-19 មានប្រភពមកពីបន្ទប់ពិសោធន៍របស់ប្រទេសចិន នៅក្នុងទីក្រុង Wuhan គឺ “មិនទាន់មានសេចក្ដីសន្និដ្ឋានស្ថាពរ” នៅឡើយ បន្ទាប់ពីមន្ត្រីអាមេរិកាំងព្រមានអំពីបញ្ហាសុវត្ថិភាពនៅទីនេះ។

“យើងមានទិន្នន័យសម្ងាត់ជាច្រើនដើម្បីពិនិត្យឱ្យបានហ្មត់ចត់បំផុតលើបញ្ហានេះ” នេះបើតាមសម្ដីរបស់អគ្គសេនាធិការចម្រុះរនៃកងទ័ពសហរដ្ឋអាមេរិក(JCS/Joint Chiefs of Staff) លោក Mark Milley ដែលបានថ្លែងប្រាប់អ្នកយកព័ត៌មានកាលពីថ្ងៃទី14មេសាកន្លងទៅ។ លោកបន្តថា “ប្រការនេះមិនទាន់អាចសន្និដ្ឋានជាចុងក្រោយបាននៅឡើយ បើទោះទម្ងន់នៃភ័ស្ដុតាងនានា ហាក់ដូចបានឱ្យដឹងថា វីរុសនេះមានប្រភពពីធម្មជាតិ។ ក៏ប៉ុន្តែ យើងមិនទាន់ដឹងច្បាស់នៅឡើយ”។

យោបល់ខាងលើត្រូវបានលើកឡើង បន្ទាប់ពី Washington Post បានរាយការណ៍ថា ក្រុមមន្ត្រីសហរដ្ឋអាមេរិក មានការព្រួយបារម្ភអំពីកម្រិតសុវត្ថិភាពនៃបន្ទប់ពិសោធន៍របស់ចិននៅទីក្រុង Wuhan ជាកន្លែងដែលមានការពិសោធទៅលើវីរុសកូរ៉ូណាដែលមានប្រភពពីសត្វប្រចៀវ។ សារព័ត៌មានខាងលើបានឱ្យដឹងថា មន្ត្រីសហរដ្ឋអាមេរិកដែលបានធ្វើទស្សនកិច្ចនៅមន្ទីរពិសោធន៍នេះកាលពីខែមករា ឆ្នាំ2018 បានព្រមានអំពីកត្តាសុវត្ថិភាពអន់ខ្សោយ និងការគ្រប់គ្រងនៅឯបន្ទប់ពិសោធន៍នេះ។ ក្រុមមន្ត្រីខាងលើយល់ថា កិច្ចការសិក្សាស្រាវជ្រាវអំពីវីរុសកូរ៉ូណាដែលមានប្រភពពីប្រចៀវនៅក្នុងបន្ទប់ពិសោធន៍នេះ មានហានិភ័យនាំឱ្យកើតមានរោគរាតត្បាតថ្មីដែលស្រដៀងទៅនឹងជំងឺ SARS។

ឧត្តមសេនីយ៍ត្រី Paul Friedrichs ក៏ជាវេជ្ជបណ្ឌិតផ្នែកវះកាត់នៃអគ្គសេនាធិការចម្រុះកងទ័ពសហរដ្ឋអាមេរិក(JSC)

ការវាយតម្លៃរបស់ឧត្តមសេនីយ៍ Milley គឺផ្ទុយទៅនឹងឧត្តមសេនីយ៍ត្រី Paul Friedrichs ដែលធ្លាប់បានបដិសេធយោបល់ដែលថាវីរុសCOVID-19 មានប្រភពពីបន្ទប់ពិសោធន៍ដែលជាផ្នែកមួយនៃការពិសោធទាក់ទិននឹងអាវុធជីវសាស្ត្រ។

លោក Friedrichs ដែលជាវេជ្ជបណ្ឌិតផ្នែកវះកាត់របស់ JSC ដែរនោះ បាននិយាយកាលពីថ្ងៃទី6មេសាថា “ខ្ញុំគិតថា ប្រការដែលខ្ញុំត្រូវព្រួយបារម្ភនៅពេលនេះ នោះគឺការព្យាបាលអ្នកជំងឺ និងធ្វើបែបណាដើម្បីទប់ស្កាត់ការឆ្លងរាលដាលនៃវីរុសCOVID-19។ ប៉ុន្តែ ខ្ញុំមិនព្រួយបារម្ភថា នេះជាអាវុធជីវសាស្ត្រនោះទេ”។

អ្នកនាំពាក្យរបស់ក្រសួងការបរទេសចិន លោក Zhao Lijian

វីរុសCOVID-19 បានចាប់ផ្ដើមឆ្លងរាលដាលនៅប្រទេសចិនកាលពីខែធ្នូ2019 ហើយមកដល់បច្ចុប្បន្ន វីរុសនេះបានសម្លាប់មនុស្សយ៉ាងតិច126,720នាក់ក្នុងចំណោមអ្នកជំងឺជិត2លាននាក់។ សហរដ្ឋអាមេរិក និងប្រទេសចិន បានផ្លោងសម្ដីដាក់គ្នាជាច្រើនលើកទាក់ទិននឹងប្រភពរបស់វីរុសនេះ។ មន្ត្រីអាមេរិកាំងសង្ស័យថា វីរុសនេះមានប្រភពពីបន្ទប់ពិសោធន៍នៅទីក្រុងWuhan នៃប្រទេសចិន ខណៈអ្នកនាំពាក្យរបស់ក្រសួងការបរទេសចិន លោក Zhao Lijian បានចោទថា “កងទ័ពអាមេរិកាំងប្រហែលជាបាននាំយក COVID-19 ទៅកាន់ទីក្រុង Wuhan”៕

ប្រភព៖ សារព័ត៌មានបរទេស

April 15, 2020

អូយ បារម្ភជំនួស! ជនជាតិចិនជាច្រើនម៉ឺននាក់ប្រជ្រៀតគ្នាទៅកម្សាន្ត “ភ្នំហួងសាន” ក្រោយទើបរួចផុតវិបត្តិកូវីដ-19

ទិដ្ឋភាពដ៏គួរឱ្យភ្ញាក់ផ្អើល…មនុស្សម្នាចំនួនដ៏ច្រើននាំគ្នាសម្រុកទៅភ្នំហួងសាន ក្នុងមណ្ឌលអានហ៊ុយ ប្រទេសចិន បានបង្ហាញឱ្យឃើញពីភាពស្មុគស្មាញដែលប្រទេសនេះអាចនឹងប្រឈមនាពេលអនាគត ក្នុងខណៈដែលប្រទេសមួយនេះកំពុងព្យាយាមវិលត្រឡប់មករកសភាវប្រក្រតី និងព្យាយាមទប់ស្កាត់ការរស់ឡើងវិញរបស់វីរុសកូរ៉ូណាប្រភេទថ្មី ឬកូវីដ-19 ឱ្យបាននោះ។

ជ្រលងភ្នំទេសចរណ៍ដ៏ពេញនិយមដែលស្ថិតនៅភាគខាងកើតឆៀងខាងត្បូងរបស់ប្រទេសចិន ត្រូវបិទការបម្រើសេវាកម្មជាថ្មីម្ដងទៀត ក្រោយពីមនុស្សម្នាជាច្រើនម៉ឺននាក់ បានប្រជ្រៀតគ្នាដើរ ក្លាយជាខ្សែផ្លូវវែងមួយបន្តកន្ទុយគ្នា បំណងឡើងទៅកម្សាន្តលើភ្នំ ក្នុងអំឡុងថ្ងៃចុងសប្ដាហ៍កន្លងទៅ ក្រោមក្ដីបារម្ភកង្វល់យ៉ាងខ្លាំងថា វាអាចនឹងក្លាយជាគំនរភ្លើងដែលនឹងធ្វើឱ្យផ្ទុះវិបត្តិការឆ្លងរាលដាលរបស់មេរោគកូវីដ-19 ឡើងជាថ្មីម្ដងទៀត។

ប្រជាជនជាច្រើនម៉ឺននាក់នាំគ្នាចេញមកដើរលេងកម្សាន្ត ក្រោយពីរដ្ឋបាលមណ្ឌលអានហ៊ុយ មានប្រូម៉ូសិនដើរកម្សាន្តហ្វ្រ៊ី 29កន្លែង សង្ឃឹមបង្កើនចំនួនអ្នកទេសចរ ដែលបានចាប់ផ្ដើមតាំងពីថ្ងៃសៅរ៍(ទី4មេសា)ចុងសប្ដាហ៍កន្លងទៅ។

ក្នុងផែនការជំរុញវិស័យទេសចរណ៍នេះ អ្នកទេសចរត្រូវបានសំណូមពរឱ្យបង្ហាញពីស្ថានភាពខាងសុខភាពតាមរយៈអ៊ែបភ្លីខេសិនមួយ ពាក់ម៉ាស់អនាម័យការពារ និងមានមន្ត្រីចាំត្រួតពិនិត្យសីតុណ្ហភាពរាងកាយ មុននឹងអនុញ្ញាតឱ្យឡើងទៅ…។

តែយ៉ាងណាក៏ដោយ កាលពីថ្ងៃអាទិត្យ(ទី5មេសា) មន្ត្រីនៅឯឧទ្យាននោះ បានប្រាប់ថា ចាំបាច់ត្រូវបិទមណ្ឌលទេសចរណ៍មួយនេះជាថ្មីម្ដងទៀត ដោយសារតែចំនួនអ្នកទេសចរបានកើនលើសចំនួនដែលបានកំណត់ទុក 20,000នាក់ក្នុង 1ថ្ងៃ និងសំណូមពរឱ្យទៅដើរលេងកម្សាន្តនៅទីកន្លែងផ្សេងទៀត ឬរង់ចាំមកកម្សាន្តនៅភ្នំមួយនេះ នាឱកាសក្រោយទៀតក៏បាន។

រូបថត និងវីដេអូ ដែលបានផ្សព្វផ្សាយនៅលើ វើយប៉ ផ្លាតហ្វ៉មព័ត៌មានបណ្ដាញសង្គមអនឡាញរបស់ចិន បានបង្ហាញឱ្យឃើញពីហ្វូងមនុស្សដ៏ច្រើនកុះករ ប្រជ្រៀតគ្នាដើរឡើងទៅលើភ្នំ ក្នុងអំឡុងថ្ងៃឈប់សម្រាក 3ថ្ងៃ នៃថ្ងៃឆេងម៉េង។ មានអ្នកលេងបណ្ដាញសង្គមជាច្រើនបានបញ្ចេញការយល់ឃើញ ដូចជា “វិស័យទេសចរណ៍បានរងផលប៉ះពាល់យ៉ាងធ្ងន់ធ្ងរ ដូចគ្នានឹងវិស័យឧស្សាហកម្មដទៃទៀតដែរ តែមេរោគឆ្លងរាតត្បាត នៅមិនទាន់ចប់ទេ បើអ្នកត្រូវការបើកកន្លែងទេសចរណ៍ឡើងវិញ អ្នកចាំបាច់ត្រូវតែកំណត់ចំនួនអ្នកទេសចរ”។

ប្រទេសចិនបានរាយការណ៍ថា បានរកឃើញអ្នកឆ្លងមេរោគកូវីដ-19 ថ្មីនៅក្នុងថ្ងៃចន្ទ(ទី6មេសា) ម្សិលមិញ ត្រឹមតែ 39នាក់ប៉ុណ្ណោះ និងមានអ្នកស្លាប់បន្ថែម 2នាក់នៅក្នុងប្រទេស៕

ប្រភព៖ សារព័ត៌មានបរទេស

April 7, 2020

Tag: China