Chelsea - La Reine Media

Middlesbrough ត្រូវកាត់ចេញពីក្របខ័ណ្ឌ Premier League ខណៈ Chelsea ឆ្ពោះទៅកាន់ការលើកពាន

ក្រុម Middlesbrough ត្រូវបានកាត់ចេញពីក្របខ័ណ្ឌ Premier League នៅរដូវកាលក្រោយ ក្រោយពីពួកគេបានជួបបរាជ័យក្នុងលទ្ធផល ៣-០ ក្រោមស្នាដៃក្រុមកំពុងនាំមុខលើតារាងលីក Chelsea កាលពីថ្ងៃចន្ទ។

លទ្ធផលនេះមានន័យថា Middlesbrough ដេញតាមពីក្រោយក្រុមស្ថិតក្នុងតំបន់សវុត្ថិភាពដល់ទៅ ៧ពិន្ទុ ខណៈដែលនៅសល់ការប្រកួតត្រឹមតែ ២លើកទៀតប៉ុណ្ណោះ ហើយនិឹងវិលទៅកាន់ក្របខ័ណ្ឌ Championship វិញ ក្រោយពីបានចំណាយពេលត្រឹមតែ១ឆ្នាំក្នុងក្របខ័ណ្ឌកំពូល។ ពួកគេនឹងត្រូវចូលរួមជាមួយនឹងក្រុមឆ្មាខ្មៅ Sunderland នៅរដូវកាលក្រោយ បន្ទាប់ពីក្រុមមានមូលដ្ឋាននៅភាគឦសានមួយនេះ ត្រូវបានកាត់ចេញកាលពីខែមុន។ ប៉ុន្តែ ការទទួលជ័យជម្នះនេះ បានធ្វើឲ្យក្រុមតោខៀវ Chelsea ត្រូវការជ័យជម្នះត្រឹមតែ ១លើកទៀតប៉ុណ្ណោះ ពីការប្រកួតដែលនៅសល់ ៣ប្រកួតទៀតដើម្បីលើកពានក្របខ័ណ្ឌ Premier League ជាលើកទី២ក្នុងរយៈពេល៣ឆ្នាំ។

Chelsea នឹងត្រូវធ្វើដំណើរទៅកាន់ទឹកដីក្រុម West Brom ក្នុងការប្រកួតបន្ទាប់របស់គេនៅថ្ងៃសុក្រ ខាងមុខនេះ។ លោក Antonio Conte គ្រូបង្វឹករបស់ក្រុម Chelsea បានឲ្យដឹងថា៖ «យើងប្រាកដជារីករាយ។ វាជាការបង្ហាញពីទម្រង់លេងដ៏អស្ចារ្យមួយ ហើយកីឡាកររបស់ខ្ញុំបានបង្ហាញពីការប្តេជ្ញាចិត្ត និងការខិតខំដើម្បីប្រជែងយកបីពិន្ទុ»។ គ្រូបង្វឹកសញ្ជាតិអ៊ីតាលីរូបនេះបានបន្ថែមទៀតថា៖ «ក្នុងដំណាក់កាលនេះ វាពិតជាសំខាន់ណាស់ក្នុងការឈ្នះ និងដណ្តើមយកប្រៀបលើការបរាជ័យរបស់ Tottenham។ បច្ចុប្បន្ន វាសល់តែមួយជំហានទៀតប៉ុណ្ណោះក្នុងការឈ្នះពាន។ យើងត្រូវតែសម្រាកឲ្យបានល្អ និងត្រៀមលក្ខណៈឲ្យរួចរាល់ដើម្បីជួបជាមួយនឹងក្រុម West Brom»។ ដោយឡែក លោក Steve Agnew គ្រូបង្វឹករបស់ក្រុម Middlesbrough បានឲ្យដឹងថា៖ «ខ្ញុំពិតជាសោកស្តាយ និងខកចិត្តណាស់ជាមួយនឹងលទ្ធផលនេះ ហើយបច្ចុប្បន្នយើងបានបាត់បង់ទីតាំងរបស់យើងក្នុង Premier League»៕

ប្រភពព័ត៌មាន៖ Reuters

May 9, 2017

លោក Conte ជឿជាក់ខ្ពស់ក្នុងការឈ្នះពាន Premier League មុនពេលប៉ះ Middlesbrough រាត្រីនេះ

លោក Antonio Conte បានបញ្ជាក់ថា លោកទើបតែចាប់ផ្តើមប៉ុណ្ណោះ ខណៈដែលក្រុម Chelsea កំពុងតែខិតយ៉ាងប្រកៀកក្នុងការឈ្នះពានក្របខ័ណ្ឌ Premier League។ គ្រូបង្វឹកសញ្ជាតិអ៊ីតាលីរូបនេះ នឹងនាំយកយកពានកំពូលរបស់អង់គ្លេសទៅកាន់កីឡដ្ឋាន Stamford Bridge ប្រសិនបើក្រុមរបស់លោកផ្តួលក្រុម Middlesbrough នៅរាត្រីនេះ និងយកឈ្នះលើក្រុម West Brom នៅថ្ងៃសុក្រ ខាងមុខ។ បន្ទាប់មក លោកនឹងត្រូវសម្រាកនៅរដូវក្តៅ ដើម្បីចាប់ផ្តើមធ្វើការជួសជុលក្រុម Chelsea ដើម្បីធ្វើឲ្យពួកគេកាន់តែមានភាពខ្លាំងក្លា។

លោក Conte បានឲ្យដឹងថា៖ «ពិតណាស់ យើងកំពុងតែស្ថិតក្នុងដំណាក់កាលនៃការផ្លាស់ប្តូរ។ យើងបាត់បង់កីឡាករជាច្រើនដែលបានបង្កើតប្រវត្តិសាស្ត្ររបស់ក្លិបនេះ»។ ខ្សែប្រយុទ្ធ Diego Costa នឹងត្រូវចាកចេញដើម្បីចូលរួមជាមួយនឹងក្លិបនៅចិននារដូវក្តៅនេះ ហើយលោក Conte បានបញ្ជាក់ថា៖ «នៅរដូវកាលនេះ យើងបានបាត់បង់ខ្សែការពារ Ivanovic យើងបានបាត់បង់ Mikel ហើយនៅរដូវកាលក្រោយ យើងនឹងបាត់បង់ John Terry ពោលគឺកីឡាករបីនាក់។ កុំភ្លេចថា Oscar បានចាកចេញកាលពីខែមករា ដែលនៅពេលនោះយើងបានលក់រូបគេចេញ»។

គ្រូបង្វឹករូបបានបន្ថែមទៀតថា៖ «បច្ចុប្បន្ន វាពិតជាលំបាកណាស់ក្នុងការប្រឈមមុខនឹងបញ្ហាទាក់ទងនឹង Costa ហើយខ្ញុំមិនចង់គិតពីបញ្ហានេះឡើយ។ ខ្ញុំចង់ផ្តោតទៅលើការប្រកួតបច្ចុប្ប និងត្រៀមលក្ខណៈឲ្យរួចរាល់ក្នុងការប្រឈមមុខនឹងរាល់ស្ថានភាពទាំងអស់ និងស្វែងរកដំណោះស្រាយដ៏ត្រឹមត្រូវ»។ Chelsea អាចនឹងទិញចូលកីឡាករថ្មី៦នាក់ក្នុងពេលបើកទីផ្សារដោះដូរកីឡាករ ដើម្បីពង្រឹងក្រុមរបស់ខ្លួន។ ក្រុម Chelsea នឹងឈានទៅកាន់ការប្រកួតនេះ ដោយការជឿជាក់ ក្រោយពីចាញ់តែមួយលើកគត់ពីការប្រកួតក្នុងផ្ទះខ្លួនឯង៥លើកចុងក្រោយរបស់ពួកគេ ប៉ុន្តែ ឈ្នះដល់ទៅ៤លើក។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕

ប្រភពពី៖ Mirror

May 8, 2017

ក្លិបចិន Tianjin ច្រានចោលថា ខ្លួនឈានដល់ការព្រមព្រៀងក្នុងការទិញ Costa

ក្លិប Tianjin Quanjian បានច្រានចោលថា Diego Costa របស់ក្លិប Chelsea បានយល់ព្រមលើកិច្ចសន្យាមួយក្នុងការផ្ទេរទៅកាន់ក្របខ័ណ្ឌចិន Super League ក្រោយពីបណ្តាញសារព័ត៌មាននៅអេស្ប៉ាញ បានចេញផ្សាយថា ខ្សែប្រយុទ្ធដើមកំណើតប្រេស៊ីលរូបនេះ នឹងផ្ទេរទៅចិនក្នុងតម្លៃខ្លួន៧៧លានផោន (ស្មើនឹង៩៩,៧លានដុល្លារអាមេរិក) ក្នុងពេលបិទរដូវកាល។

ក្លិប Tianjin ដែលដឹកនាំដោយអតីតកីឡាករឈ្នះពាន World Cup ជាមួយនឹងអ៊ីតាលីគឺលោក Fabio Cannavaro និងជាម្ចាស់ជើងឯកក្របខ័ណ្ឌលំដាប់ទី២របស់ចិនកាលពីរដូវកាលមុននោះ បានច្រានចោលថា ពួកគេបានធ្វើការចរចាជាមួយនឹងខ្សែប្រយុទ្ធដែលលេងក្នុងក្របខ័ណ្ឌ Premier League រូបនេះ។ ក្លិប Tianjin បានឲ្យដឹងក្នុងសេចក្តីថ្លែងការណ៍មួយតាមរយៈគេណនីសង្គម Weibo ថា៖ «ទាក់ទងនឹងពាក្យចរចាមអារ៉ាមផ្សេងៗទៅលើការផ្ទេរខ្សែប្រយុទ្ធ Diego Costa របស់ Chelsea ទៅកាន់ក្លិប Tianjin យើងសូមប្រកាសថា មកទល់ពេលនេះ យើងមិនបានទាក់ទងជាមួយនឹង Costa អំពីការផ្ទេរមួយឡើយ»។

កាសែតអេស្ប៉ាញ Cadena Ser បានចេញផ្សាយកាលពីថ្ងៃព្រហស្បតិ៍ថា Costa បានជួបជាមួយនឹងមន្ត្រីរបស់ក្លិប Tianjin រួមជាមួយនឹងភ្នាក់ងាររបស់គេគឺលោក Jorge Mendes ហើយការព្រមព្រៀងគ្នាមួយត្រូវបានឈានដល់។ កាសែតនេះបានចេញផ្សាយថា Costa នឹងចូលរួមជាមួយនឹង Tianjin ពីក្លិប Chelsea សម្រាប់តម្លៃខ្លួន៩០លានអឺរ៉ូ (ស្មើនឹង៧៦,៤៣លានផោន) ខណៈដែលខ្សែប្រយុទ្ធរូបនេះ នឹងទទួលបានចំណូលដល់ទៅ៣០លានអឺរ៉ូ (ស្មើនឹង៣៣លានដុល្លារអាមេរិក) ក្នុងមួយឆ្នាំ៕

ប្រភពពី៖ The Independent

May 5, 2017

ទាំង Man United និង Liverpool កំពុងតែប្រទាញប្រទង់គ្នាដើម្បីទិញយក Fabregas ពី Chelsea

Cesc Fabregas កំពុងតែស្ថិតនៅចំកណ្តាលនៃការប្រជែងគ្នាទិញក្នុងតម្លៃខ្លួន២៥លានផោន (ស្មើនឹង៣២លានដុល្លារអាមេរិក) រវាងក្លិបបិសាចក្រហម Manchester United និងក្រុមហង្សក្រហម Liverpool។

លោក Jurgen Klopp គ្រូបង្វឹករបស់ក្រុម Liverpool បានធ្វើឲ្យមានការប្រទាញប្រទង់គ្នានេះ តាមរយៈការឈានចូលក្នុងការប្រជែងទិញខ្សែបម្រើរបស់ក្លិប Chelsea វ័យ២៩ឆ្នាំរូបនេះ នារដូវក្តៅខាងមុខនេះ។ ស្របពេលជាមួយគ្នានេះ លោក Jose Mourinho ដែលជាអតីតអ្នកចាត់ការទូទៅរបស់ Fabregas ក៏កំពុងតែកោតសរសើរទៅលើកីឡាករដ៏មានបទពិសោធរូបនេះផងដែរ និងពិតជាចង់នាំយករូបគេនៅកីឡដ្ឋាន Old Trafford ក្នុងនាមជាផ្នែកមួយនៃគម្រោងចំណាយក្នុងពេលបិទរដូវកាលនេះ។

លោក Klopp ក៏ចង់ពង្រឹងតំបន់ការពាររបស់លោកផងដែរ ជាពិសេសស្របពេលដែលក្លិប Barcelona ហាក់បង្ហាញយ៉ាងច្បាស់ពីការចាប់អារម្មណ៍របស់ខ្លួនទៅលើ Philippe Coutinho។ ក្លិប AC Milan, Bayern Munich, Atletico Madrid និងក្លិបស្ថិតក្នុងក្របខ័ណ្ឌ Super League របស់ចិន ក៏កំពុងតែចាប់អារម្មណ៍ទៅលើ Fabregas ផងដែរ ប៉ុន្តែ រូបគេចង់បន្តលេងនៅប្រទេសអង់គ្លេស។ ខ្សែបម្រើអន្តរជាតិអេស្ប៉ាញរូបនេះ បានជួបការលំបាកក្នុងការប្រជែងយកកៅអីក្នុងជម្រើសទាំង១១នាក់ដំបូងនៅកីឡដ្ឋាន Stamford Bridge នារដូវកាលនេះ ក្រោយពីការផ្ទេរចូលរបស់ N’Golo Kante ក្នុងតម្លៃខ្លួន២៩លានផោន កាលពីឆ្នាំមុន៕

ប្រភពពី៖ The Sun

May 3, 2017

Pedro ជួយឲ្យក្រុមតោខៀវ ខិតយ៉ាងប្រកៀកឆ្ពោះទៅកាន់ការឈ្នះពាន

គ្រាប់បាល់ស៊ុតបញ្ចូលទីយ៉ាងល្អរបស់ខ្សែបម្រើប្រយុទ្ធ Pedro បានជួយឲ្យក្រុម Chelsea បោះជំហានកាន់តែកៀកឆ្ពោះទៅកាន់ការឈ្នះពាន Premier League ខណៈដែលក្រុមតោខៀវមួយនេះ បានកត់ត្រាជ័យជម្នះយ៉ាងកក់ក្តៅក្នុងលទ្ធផល ៣-០ លើក្រុម Everton កាលពីថ្ងៃអាទិត្យ។

ក្រុមរបស់លោក Antonio Conte ត្រូវបានខិតខំព្យាយាមយ៉ាងខ្លាំងដើម្បីទម្លុះតំបន់ការពារដ៏រឹងមាំរបស់ក្រុម Everton ប៉ុន្តែ គ្រាប់បាល់ស៊ុតបញ្ចូលទីពីចម្ងាយយ៉ាងល្អក្នុងតង់ទី២របស់ Pedro បានជួយឲ្យក្រុម Chelsea ស្ថិតនៅលើផ្លូវឆ្ពោះទៅកាន់ការឈ្នះការប្រកួតជាលើកទី៤ក្នុងចំណោមការប្រកួតលីក៥លើកចុងក្រោយរបស់ពួកគេ។ គ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់ខ្សែការពារ Gary Cahill និងខ្សែបម្រើ Willian បានបំពេញការទទួលជ័យជម្នះនេះតែម្តង ខណៈដែលក្រុមតោខៀវ បានរក្សាការនាំមុខ៤ពិន្ទុដដែលនៅលើកំពូលតារាង។

លោក Antonio Conte បានប្រាប់ទូរទស្សន៍ Sky Sports ថា៖ «លទ្ធផលនេះ ផ្តល់ឲ្យយើងនូវការជឿជាក់យ៉ាងច្រើន។ ពេលនេះ វាពិតជាសំខាន់ណាស់ក្នុងការត្រៀមលក្ខណៈសម្រាប់ការប្រជែងនៅដំណាក់កាលចុងក្រោយ។ ប្រសិនបើក្នុងការប្រកួតបន្ទាប់ជាមួយនឹងក្រុម Middlesbrough យើងមិនឈ្នះ យើងនឹងបាត់បង់ជ័យជម្នះ។ យើងត្រូវតែមើលមួយជំហានទៅមួយជំហាន។ Chelsea ដែលបច្ចុប្បន្នកំពុងតែមាន៨១ពិន្ទុនោះ ត្រូវការឈ្នះត្រឹមតែ៣លើកទៀតប៉ុណ្ណោះពីការប្រកួត៤លើកចុងក្រោយ ខណៈដែលពួកគេនឹងត្រូវធ្វើជាម្ចាស់ផ្ទះទទួលក្រុម Middlesbrough មុននឹង West Brom, Watford និង Sunderland៕

ប្រភពព័ត៌មាន៖ Mirror

May 1, 2017

លោក Conte ត្រៀមរារាំងអតីតខ្សែប្រយុទ្ធក្រុមតោខៀវ Lukaku ពេលប៉ះ Everton ថ្ងៃអាទិត្យនេះ

លោក Antonio Conte អ្នកចាត់ការទូទៅរបស់ក្រុម Chelsea បានអះអាងថា លោកកំពុងតែយកចិត្តទុកដាក់យ៉ាងខ្លាំងទៅលើខ្សែប្រយុទ្ធ Romelu Lukaku របស់ក្រុម Everton នៅសប្តាហ៍នេះ ប៉ុន្តែ ក្នុងទស្សនៈក្នុងការបញ្ឈប់រូបគេមិនឲ្យរកគ្រាប់បាល់បញ្ចូលទីនៅពេលប្រកួតជាមួយនឹងក្រុមតោខៀវរបស់លោក ជាជាងការទិញរូបគេនៅរដូវក្តៅខាងមុខនេះ។

ក្រុម Chelsea ដែលកំពុងនាំមុខលើតារាងក្របខ័ណ្ឌ Premier League បានទាក់ទងចង់ចុះហត្ថលេខាខ្សែប្រយុទ្ធ អន្តរជាតិបែលហ្ស៊ិករូបនេះ ដែលពួកគេបានលក់ទៅឲ្យក្លិប Everton ក្នុងតម្លៃខ្លួន២៨លានផោន ដើម្បីជំនួសកន្លែងរបស់ខ្សែប្រយុទ្ធ Diego Costa ដែលចង់ផ្ទេរទៅកាន់ក្របខ័ណ្ឌរបស់ចិន។ Lukaku គឺជាអ្នកគ្រាប់ បាល់រកគ្រាប់បាល់ច្រើនជាងគេក្នុងការប្រកួតលីក តាមរយៈការរកបាន២៤គ្រាប់ ខណៈដែល Costa រកបាន១៩គ្រាប់ និងក្លាយជាអាវុធដ៏មុតស្រួចរបស់ក្រុម Everton ខណៈដែលក្រុម Chelsea សម្លឹងរកការបន្ថែមពិន្ទុនាំមុខរបស់ពួកគេលើក្រុមឈរលេខ២ Tottenham Hotspur នាកីឡដ្ឋាន Goodison Park។

លោក Conte បានប្រាប់អ្នកយកព័ត៌មានកាលពីថ្ងៃសុក្រថា៖ «ខ្ញុំគិតថា រូបគេជាកីឡាករដ៏ឆ្នើមម្នាក់ និងកំពុងតែរកគ្រាប់បាល់បញ្ចូលទីជាច្រើននៅដូវកាលនេះ ដោយមិនត្រឹមតែក្នុងរដូវកាលនេះឡើយ ហេតុនេះ យើងត្រូវតែយកចិត្តទុកដាក់លើរូបគេយ៉ាងខ្លាំង»។ គ្រូបង្វឹកសញ្ជាតិអ៊ីតាលីរូបនេះបានប្រាប់បន្តថា៖ «ប៉ុន្តែ វាពិតណាស់ យើងត្រូវតែស្វែងរកដំណោះស្រាយដ៏ត្រឹមត្រូវដើម្បីរារាំងពួកគេ។ យើងត្រូវតែស្វែងរកដំណោះស្រាយដ៏ត្រឹមត្រូវដើម្បីបញ្ចប់ Lukaku និងរាល់កីឡាករផ្សេងៗទៀត»។ នៅពេលត្រូវបានចោទសួរថា តើខ្សែប្រយុទ្ធរូបណាដែលលោកចូលចិត្តជាងគេក្នុងក្រុមរបស់លោក លោក Conte បានឲ្យដឹងថា៖ «សម្រាប់ខ្ញុំ កីឡាកររបស់ខ្ញុំគឺជាកីឡាករឆ្នើមបំផុតក្នុងពិភពលោក។ ខ្ញុំមិនផ្លាស់ប្តូរពួកគេជាមួយនឹងកីឡាករផ្សេងឡើយ»។ ក្រុម Everton នឹងឈានទៅកាន់ការប្រកួតនេះ ក្រោយពីបានបញ្ចប់ក្នុងលទ្ធផលស្មើ ០-០ ជាមួយនឹងក្រុមធ្លាក់ទម្រង់លេង West Ham ខណៈដែល Chelsea ទើបតែបានផ្តួលក្រុម Southampton ក្នុងលទ្ធផល ៤-២។ ការប្រកួតនេះនឹងចាប់ផ្តើមនៅម៉ោង៨:០៥យប់៕

ប្រភពពី៖ Reuters

April 29, 2017

អាជ្ញាកណ្តាលឈ្លោះជាមួយលោក Wenger នឹងត្រូវកាត់សេចក្តីក្នុង FA Cup រវាង Arsenal និង Chelsea

លោកអាជ្ញាកណ្តាលដែលត្រូវបានរងនូវការរុញ និងត្រូវបានចាត់ទុកថា គ្មានភាពស្មោះត្រង់ដោយលោក Arsene Wenger នោះ នឹងត្រូវកាត់សេចក្តីក្នុងការប្រកួតពាន FA Cup វគ្គផ្តាច់ព្រ័ត្រនៅខែក្រោយ រវាងក្រុម Arsenal របស់គ្រូបង្វឹកជើងចាស់សញ្ជាតិបារាំងរូបនេះ និងក្រុម Chelsea។ នេះបើយោងទៅតាមការប្រកាសរបស់សហព័ន្ធកីឡាបាល់ទាត់អង់គ្លេសហៅកាត់ថា FA។

លោក Wenger បានរងពិន័យជាទឹកប្រាក់ ២៥០០០ផោន (ស្មើនឹង៣២០០០ដុល្លារអាមេរិក) សម្រាប់ការរុញទៅលើលោក Anthony Taylor ដែលជាមន្ត្រីអាជ្ញាកណ្តាលទី៤ អំឡុងពេលក្រុម Arsenal ទទួលជ័យជម្នះក្នុងការប្រកួតក្របខ័ណ្ឌ Premier League លើក្រុម Burnley កាលពីថ្ងៃទី២២ ខែមករា។ លោកអាជ្ញាកណ្តាល Jon Moss បានឃើញថា លោក Wenger បានចោទប្រកាន់លោក Taylor ពីបទគ្មានភាពស្មោះត្រង់ទៅនឹង FA នៅមុនពេលប្រើប្រាស់ពាក្យសម្តីមិនសមរម្យទៅកាន់មន្ត្រីទីបួនរូបនេះ។

លោក Moss បានពិន័យកាតក្រហមដល់លោក Wenger ក្រោយពីក្រុម Burnley បានរកគ្រាប់បាល់ដោយការស៊ុតបាល់ប៉េណាល់ទី ហើយគ្រូបង្វឹករបស់ក្រុម Arsenal រូបនេះបានឈរឈ្លោះប្រកែកគ្នាក្នុងផ្លូវចូលទៅកាន់បន្ទប់ផ្លាស់ប្តូរសម្លៀកបំបែកនាកីឡដ្ឋាន Emirates។ បើយោងទៅតាម FA ក្រោយមក លោក Wenger បានរុញលោក Taylor ពីរលើក ប៉ុន្តែ ក្រោយមកគ្រូបង្វឹកសញ្ជាតិបារាំងរូបនេះបាននិយាយថា៖ «ខ្ញុំពិតជាសោកស្តាយណាស់ ខ្ញុំគួរតែបិទមាត់ និងទៅផ្ទះជាធម្មតា។ ខ្ញុំសូមអភ័យទោសចំពោះបញ្ហានោះ»៕

ប្រភពពី៖ The Guardian

April 28, 2017

លោក Pochettino៖ Spurs ត្រៀមលក្ខណៈរួចរាល់ក្នុងការប្រយុទ្ធជាមួយ Chelsea

លោក Mauricio Pochettino បានអះអាងថា ការដណ្តើមបានជ័យជម្នះដ៏សំខាន់របស់ក្រុម Tottenham ក្នុងលទ្ធផល ១-០ នៅលើទឹកដីក្រុម Crystal Palace បានបង្ហាញថា ពួកគេត្រៀមលក្ខណៈរួចរាល់ក្នុងការដណ្តើមយកឱកាសភ្លាមៗ ប្រសិនបើក្រុម Chelsea ភ្លាត់ស្នៀតក្នុងការប្រជែងពាន។

ក្រុមរបស់លោក Pochettino បានកាត់បន្ថយគំលាតដេញតាមពីក្រោយក្រុមតោខៀវ Chelsea ឲ្យនៅត្រឹម៤ពិន្ទុ ខណៈនៅសល់៥ប្រកួតទៀត ក្រោយពីគ្រាប់បាល់ស៊ុតបញ្ចូលទីយ៉ាងល្អនៅជិតបញ្ចប់ការប្រកួតរបស់ខ្សែបម្រើ Christian Eriksen បានជួយឲ្យពួកគេដណ្តើមបានជ័យជម្នះដ៏សំខាន់នៅកីឡដ្ឋាន Selhurst Park កាលពីថ្ងៃពុធ។ ក្រុមមាន់ខ្នាយមាស Spurs ហាក់បានជួបការលំបាកក្នុងការបំភ្លេចការខកចិត្តរបស់ពួកគេពីការធ្លាក់ចេញពីយុទ្ធនាការដណ្តើមពាន FA Cup វគ្គពាក់កណ្តាលផ្តាច់ព្រ័ត្រ កាលពីសប្តាហ៍មុន ក្រោមស្នាដៃក្រុម Chelsea ខណៈដែល Tottenham ស្ទើរតែបានខ្ជះខ្ជាយឱកាសក្នុងការរក្សាការដាក់សម្ពាធលើ Chelsea ទៅហើយ នៅមុនពេលធ្វើការស្រោចស្រង់វិញ។ ក្រុម Tottenham ហាក់ដូចជាស្ថិតក្រោមសម្ពាធដូចកាលពីរដូវកាលមុនដែរ ដែលនៅពេលនោះពួកគេបានអនុញ្ញាតឲ្យក្រុម Leicester ឈ្នះពាន ក្រោយពីផ្តល់ការប្រជែងដល់ពួកគេក្នុងរយៈពេលដ៏ខ្លី។

ប៉ុន្តែ លោក Pochettino ជឿជាក់ថា ស្មារតីប្រយុទ្ធដែលក្រុមរបស់លោកបានបង្ហាញដើម្បីផ្តួលក្រុមឡើងទម្រង់លេង Crystal កំពុងតែធ្វើឲ្យពួកគេមានឱកាសជាច្រើនក្នុងការឈ្នះពានជាលើកទី១ បើគិតចាប់តាំងពីឆ្នាំ១៩៦១។ លោក Pochettino បានឲ្យដឹងថា៖ «យើងបានបង្ហាញពីស្មារតីអស្ចារ្យ ក្រោយពីការជួបសប្តាហ៍ដ៏ខកចិត្ត។ វាពិតជាសំខាន់ណាស់ក្នុងការបង្ហាញថា យើងមានការផ្តោតអារម្មណ៍ និងព្យាយាមដើម្បីប្រយុទ្ធ»។ គ្រូបង្វឹករូបនេះបានបន្ថែមទៀតថា៖ «យើងបានបង្ហាញថា យើងបានរៀនជាច្រើនពីការប្រកួតកាលពីរដូវកាលមុន។ នោះពិតជារឿងសំខាន់ណាស់»៕

ទស្សនាវីដេអូ Highlights៖

ប្រភពពី: Worldsoccertalk

April 27, 2017

Costa រកបាន២គ្រាប់ ដើម្បីជួយឲ្យ Chelsea ពង្រឹងការនាំមុខលើកំពូលតារាង

ខ្សែប្រយុទ្ធ Diego Costa បានបញ្ចប់ការមិនអាចរកគ្រាប់បាល់បញ្ចូលទីរបស់គេត្រឹម៦ប្រកួតដើម្បីជួយឲ្យក្រុមតោខៀវ Chelsea បោះជំហានដ៏ធំមួយឆ្ពោះទៅកាន់ការឈ្នះពានក្របខ័ណ្ឌ Premier League ក្រោយពីពួកគេបានកត់ត្រាជ័យជម្នះយ៉ាងកក់ក្តៅក្នុងលទ្ធផល ៤-២ លើក្រុម Southampton កាលពីថ្ងៃអង្គារ។

Costa បានប្រើក្បាលរកគ្រាប់បាល់បំប៉ោងសំណាញ់ទីនៅនាទី ទី៥៣ ដើម្បីជួយឲ្យក្រុម Chelsea នាំមុខ៧ពិន្ទុដាច់ជាបណ្តោះអាសន្នលើក្រុមឈរលេខ២ Tottenham ខណៈដែលក្រុមមាន់ខ្នាយមាសរបស់លោក Mauricio Pochettino ចាំបាច់ត្រូវតែដណ្តើមយកជ័យជម្នះនៅលើទឹកដីក្រុម Crystal Palace នៅរាត្រីថ្ងៃពុធនេះ។ ខ្សែប្រយុទ្ធអន្តរជាតិអេស្ប៉ាញរូបនេះ បានរកគ្រាប់បាល់ទី២របស់គេនៅរយៈពេលប៉ុន្មាននាទីចុងក្រោយ ក្រោយពីបានស៊ុតបាល់បំប៉ោងសំណាញ់ទីយ៉ាងល្អរបស់អ្នកចាំទី Fraser Forster។ ប៉ុន្តែទោះបីជាយ៉ាងណា ក្រុមម្ចាស់ផ្ទះក៏បានជួបនូវការភិតភ័យផងដែរ ក្រោយពីខ្សែបម្រើ Oriol Romeu បានរកគ្រាប់បាល់តាមស្មើគ្រាប់បាល់របស់ Eden Hazard ហើយក្រុមតោខៀវ ហាក់ដូចជាធ្លាក់ចូលក្នុងបញ្ហា។

ប៉ុន្តែ ការរកគ្រាប់បាល់បញ្ចូលទីរបស់ Costa និងខ្សែការពារ Gary Cahill នៅជិតបញ្ចប់តង់ទី១ បានជួយឲ្យក្រុម Chelsea វិលទៅកាន់ទីតាំងយ៉ាងកក់ក្តៅ ដើម្បីរក្សាធ្វើឲ្យលោក Antonio Conte ស្ថិតនៅលើផ្លូវឆ្ពោះទៅកាន់ការឈ្នះពាន២ក្នុងរដូវកាលតែមួយ។ ខ្សែការពារ Ryan Bertrand បានវាយបកបានមួយគ្រាប់វិញសម្រាប់ក្រុមភ្ញៀវ Southampton នៅជិតបញ្ចប់ការប្រកួត។ លោក Conte ដែលជាអ្នកចាត់ការទូទៅរបស់ក្រុម Chelsea បានឲ្យដឹងថា៖ «នៅថ្ងៃនេះ ខ្ញុំត្រូវតែពេញចិត្តជាមួយនឹងការខិតខំប្រឹងប្រែងរបស់កីឡាកររបស់ខ្ញុំ។ វាមិនងាយស្រួលឡើយ ក្រោយពីការប្រកួតដ៏ស្វិតស្វាញជាមួយនឹងក្រុម Tottenham។ យើងត្រូវតែមានការជឿជាក់សម្រាប់អនាគត។ វាពិតជាសំខាន់ណាស់ក្នុងការមើលទៅលើខ្លួនឯង និងមិនមើលទៅលើក្រុមផ្សេងៗដូចជា Spurs»៕

ប្រភព៖ Mirror

April 26, 2017

Kante របស់តោខៀវ ជាប់ឈ្មោះជាកីឡាករឆ្នើមប្រចាំឆ្នាំ

ការបង្ហាញទម្រង់លេងយ៉ាងល្អរបស់ខ្សែបម្រើដ៏មានឥទ្ធិពល N’Golo Kante សម្រាប់ក្រុមតោខៀវ Chelsea បានទទួលផលតបស្នងវិញសម្រាប់ការខិតខំរបស់គេកាលពីថ្ងៃអាទិត្យ ក្រោយពីបានឈ្នះពានកីឡាករបាល់ទាត់អាជីពឆ្នើមប្រចាំឆ្នាំរបស់អង់គ្លេស (PFA)។

ខ្សែបម្រើអន្តរជាតិបារាំងវ័យ២៦ឆ្នាំរូបនេះ បានយកឈ្នះលើខ្សែប្រយុទ្ធ Harry Kane របស់ក្លិប Tottenham និងខ្សែប្រយុទ្ធ Romelu Lukaku របស់ក្លិប Everton ដើម្បីលើកពានកិត្តិយសមួយនេះ។ វាអាចប្រហែលជាមិនមែនជាពានតែមួយដែលរូបគេនឹងត្រូវលើកនៅរដូវកាលនេះឡើយ ខណៈដែលរូបគេស្ថិតយ៉ាងប្រៀកក្នុងការក្លាយជាកីឡាករដំបូងគេក្នុងការឈ្នះពានលីកពីរឆ្នាំជាប់ៗគ្នាជាមួយនឹងក្លិបផ្សេងគ្នា។

Kante បានឲ្យដឹងថា៖ «ក្នុងការត្រូវបានគេជ្រើសរើសឲ្យជាប់ជាកីឡាករឆ្នើមប្រចាំឆ្នាំ ពិតជាមានន័យណាស់សម្រាប់ខ្ញុំ។ វាមានន័យថា ពិភពលោកត្រូវបានជ្រើសរើស ហើយវាគឺជារយៈពេលពីររដូវកាលដ៏អស្ចារ្យ ដោយរដូវកាលទីមួយជាមួយនឹងក្លិប Leicester ហើយយើងកំពុងតែស្ថិតក្នុងទម្រង់លេងយ៉ាងល្អជាមួយនឹង Chelsea។ ក្នុងការក្លាយជាកីឡាករឆ្នើមប្រចាំឆ្នាំ វាគឺជាកិត្តិយសមួយ»៕

ប្រភពព័ត៌មាន៖ The Mirror

April 24, 2017

Tag: Chelsea