Tag: Chelsea

ក្លិប Chelsea ប្រកាសពីការយល់ព្រមទិញ Morata ពីក្លិប Real Madrid
ក្លិបតោខៀវ Chelsea កំពុងតែស្ថិតយ៉ាងប្រកៀកក្នុងការពង្រឹងតំបន់ប្រយុទ្ធរបស់ខ្លួនសម្រាប់យុទ្ធនាការការពារពានក្របខ័ណ្ឌ Premier League របស់ពួកគេ ក្រោយពីបានយល់ព្រមលើតម្លៃខ្លួនជាកំណត់ត្រារបស់ក្លិបក្នុងទឹកប្រាក់58លានផោន (ស្មើនឹង75.5លានដុល្លារអាមេរិក) ជាមួយនឹងក្លិប Real Madrid ដើម្បីទិញខ្សែប្រយុទ្ធអន្តរជាតិអេស្ប៉ាញ Alvaro Morata។
ការពិភាក្សាផ្សេងៗកំពុងតែបន្តជាមួយនឹងក្លិប Real Madrid ចាប់តាំងពីក្លិប Chelsea បានចាញ់ក្រុម Manchester United ក្នុងការប្រជែងទិញខ្សែប្រយុទ្ធ Romelu Lukaku ប៉ុន្តែពួកគេបានទទួលជោគជ័យវិញលើគោលដៅទី2របស់ពួកគេកាលពីថ្ងៃពុធ។ Man United បានចំណាយប្រាក់ជាគោលចំនួន75លានផោនទៅឲ្យក្លិប Everton សម្រាប់ខ្សែប្រយុទ្ធអន្តរជាតិបែលហ្ស៊ិក(Romelu Lukaku )រូបនោះ។
តម្លៃខ្លួនរបស់ Chelsea សម្រាប់ខ្សែប្រយុទ្ធ Morata នឹងមានចំនួនច្រើនជាង50លានផោនដែលពួកគេបានចំណាយទៅឲ្យក្លិប Liverpool ដើម្បីទិញខ្សែប្រយុទ្ធ Fernando Torres កាលពីឆ្នាំ2011 ហើយអាចនឹងកើនដល់70លានផោន បើបូកទាំងប្រាក់ឧបត្ថម្ភផ្សេងៗទៀតផងនោះ។ ក្លិប Chelsea បានឲ្យដឹងក្នុងសេចក្តីថ្លែងការណ៍មួយថា ក្លិបទាំងពីរបានឈានដល់ការព្រមព្រៀងគ្នាមួយសម្រាប់ការផ្ទេរនេះ។ ក្រុមម្ចាស់ជើងឯកក្របខ័ណ្ឌ Premier League មួយនេះបានឲ្យដឹងថា៖ «បច្ចុប្បន្នការផ្ទេរនេះ នឹងត្រូវបំពេញក្រោយពីរូបគេ(Morata )យល់ព្រមលើលក្ខខណ្ឌផ្ទាល់ខ្លួនផ្សេងៗ និងត្រួតពិនិត្យសុខភាពរួចហើយ»។
ប្រាក់បៀវត្សរ៍ត្រូវបានរំពឹងទុកថា នឹងមិនក្លាយជាឧបសគ្គឡើយ ខណៈដែល Morata នឹងត្រូវទទួលបាន15ម៉ឺនផោនក្នុងមួយសប្តាហ៍សម្រាប់កុងត្រារយៈពេល5ឆ្នាំ។ រូបគេកំពុងតែស្ថិតនៅលើទឹកដីសហរដ្ឋអាមេរិកជាមួយនឹងសមាជិក្រុមផ្សេងទៀតរបស់លោក Zinedine Zidane រួចហើយនឹងត្រូវធ្វើដំណើរទៅកាន់ប្រទេសអង់គ្លេស ដើម្បីត្រួតពិនិត្យសុខភាព៕
ប្រភពពី៖ The Guardian
July 20, 2017
Chelsea ចុះហត្ថលេខាជាមួយខ្សែបម្រើ Bakayoko ហើយ
ក្លិប Chelsea បានចុះហត្ថលេខាជាមួយនឹងខ្សែបម្រើដ៏មានឥទ្ធិពល Tiemoue Bakayoko មកពីក្រុមម្ចាស់ជើងឯកបារាំង Monaco ហើយក្នុងតម្លៃខ្លួន 40លានផោន (ស្មើនឹង 52.4លានដុល្លារអាមេរិក)។ ខ្សែបម្រើអន្តរជាតិបារាំងវ័យ22ឆ្នាំរូបនេះ បានចុះហត្ថលេខាលើកិច្ចសន្យារយៈពេល5ឆ្នាំជាមួយនឹងក្រុម Chelsea ដែលជាម្ចាស់ជើងឯកក្របខ័ណ្ឌ Premier League។
រូបគេក្លាយជាកីឡាករចំណូលថ្មីទី2របស់ Chelsea ក្រោយពីពួកគេបានទិញខ្សែការពារ Antonio Rudiger ពីក្លិប Roma របស់អ៊ីតាលី។ Bakayoko បានចូលរួមជាមួយនឹងក្លិប Monaco ដោយចេញពីក្លិប Rennes ដែលស្ថិតក្នុងក្របខ័ណ្ឌ Ligue 1 ដូចគ្នាកាលពីឆ្នាំ2014 និងបានបង្ហាញខ្លួនជាលើកដំបូងឲ្យក្រុមជម្រើសជាតិបារាំងក្នុងការប្រកួតមិត្តភាពជាមួយនឹងក្រុមជម្រើសជាតិអេស្ប៉ាញ កាលពីខែមីនា ដើមឆ្នាំនេះ។
រូបគេបានក្លាយជាសមាជិកដ៏សំខាន់របស់ក្រុម Monaco ដែលបានឈានទៅប្រកួតវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីរដូវកាលមុន មុននឹងធ្លាក់ចេញក្រោមស្នាដៃក្រុម Juventus។ Bakayoko បានឲ្យដឹងក្នុងសេចក្តីថ្លែងការណ៍មួយនៅលើគេហទំព័ររបស់ Chelsea ថា៖ «ខ្ញុំពិតជារីករាយណាស់ក្នុងការមកទីនេះ និងចូលរួមជាមួយនឹងក្លិបដ៏អស្ចារ្យបែបនេះ។ ខ្ញុំបានចាប់អារម្មណ៍ទៅលើការប្រកួតរបស់ Chelsea យ៉ាងខ្លាំង។
ការចុះហត្ថលេខាគឺជារឿងធម្មជាតិសម្រាប់ខ្ញុំ ពីព្រោះវាជាក្លិបមួយដែលខ្ញុំស្រឡាញ់យ៉ាងខ្លាំងក្នុងពេលស្ថិតជាកុមារភាព»។ ខ្សែបម្រើរូបនេះបានបន្ថែមទៀតថា៖ «បច្ចុប្បន្ន ខ្ញុំកំពុងតែសម្លឹងឆ្ពោះទៅមុខក្នុងការធ្វើការក្រោមការដឹកនាំរបស់គ្រូបង្វឹកដ៏អស្ចារ្យ និងធ្វើការរួមជាមួយនឹងមិត្តភាពក្រុមដ៏ឆ្នើមរបស់ខ្ញុំ»៕
ប្រភពពី៖ BBC
July 17, 2017
Chelsea កំពុងចង់ដាក់សំណើដេញថ្លៃ 62លានផោនសម្រាប់ Morata ពីក្លិប Real
ក្លិបតោខៀវ Chelsea នឹងដាក់សំណើដេញថ្លៃក្នុងទឹកប្រាក់ 62លានផោន (ស្មើនឹង 80លានដុល្លារអាមេរិក) ដើម្បីទិញយកខ្សែប្រយុទ្ធ Alvaro Morata ពីក្លិប Real Madrid។
លោក Antonio Conte សង្ឃឹមថា នឹងឈានដល់ការព្រមព្រៀងគ្នាមួយសម្រាប់ Morata ស្របពេលដែលខ្សែប្រយុទ្ធ Diego Costa ត្រូវបានអនុញ្ញាតឲ្យបន្តសម្រាកថ្ងៃវិស្សមកាល មុននឹងផ្ទេរទៅកាន់ក្លិប Atletico Madrid។ Costa ធ្លាប់ចង់ធ្វើការសម្របសម្រួលជាមួយនឹងលោក Conte ប៉ុន្តែគ្រូបង្វឹកសញ្ជាតិអ៊ីតាលីរូបនេះមិនចាប់អារម្មណ៍ក្នុងការអនុញ្ញាតឲ្យរូបគេបន្តនៅជាមួយនឹងក្លិបតោខៀវឡើយ។ តារាឆ្នើមអន្តរជាតិអេស្ប៉ាញ Costa នឹងត្រូវបង្ហាញខ្លួនក្នុងការហ្វឹកហាត់កាលពីថ្ងៃម្សិលមិញនៅឯទីលាន Cobham ប៉ុន្តែត្រូវបានអនុញ្ញាតឲ្យសម្រាករយៈពេល1សប្តាហ៍ទៀត។
សញ្ញាផ្សេងៗទៀតបានបង្ហាញថា រូបគេនឹងត្រូវតែចាកចេញពី Chelsea នៅមុនពេលលោក Conte និងក្រុមរបស់លោកធ្វើដំណើរទៅកាន់សហរដ្ឋអាមេរិកនៅសប្តាហ៍ក្រោយ។ ក្រោយពីបាត់បង់ខ្សែប្រយុទ្ធ Romelu Lukaku វ័យ 24ឆ្នាំ ដោយសារតែរូបគេទៅចូលរួមជាមួយនឹងក្លិប Manchester United និង Chelsea កំពុងតែស្ថិតក្រោមសម្ពាធក្នុងការចុះហត្ថលេខាជាមួយ Morata។
ប៉ុន្តែ សំណើដេញថ្លៃរបស់គេអាចនឹងត្រូវច្រានចោលដោយក្លិប Real Madrid ដែលចង់បានតម្លៃខ្លួនខ្ពស់ជាងនេះ។ លោក Zinedine Zidane គ្រូបង្វឹករបស់ក្លិប Real Madrid ពិតជាចង់ឲ្យខ្សែប្រយុទ្ធវ័យ 24ឆ្នាំរូបនេះបន្តនៅកីឡដ្ឋាន Bernabeu បើទោះបីរូបគេចង់ផ្ទេរទៅកាន់ក្របខ័ណ្ឌ Premier League ក៏ដោយ៕
ប្រភពពី៖ The Sun
July 11, 2017
Chelsea យល់ព្រមលើតម្លៃខ្លួន38លានអឺរ៉ូដើម្បីទិញ Rudiger ពីក្លិប Roma
ក្លិបតោខៀវ Chelsea បានយល់ព្រមលើតម្លៃខ្លួនជាមួយនឹងក្លិប Roma ក្នុងទឹកប្រាក់38លានអឺរ៉ូ (ស្មើនឹង43.4លានដុល្លារអាមេរិក) ដើម្បីទិញយក Antonio Rudiger ខណៈដែលខ្សែការពារអន្តរជាតិអាល្លឺម៉ង់រូបនេះ ត្រូវបានគេរំពឹងទុកថា នឹងធ្វើដំណើរទៅកាន់ទីក្រុងឡុងដ៍នៅសប្តាហ៍ក្រោយ ដើម្បីបំពេញការពិនិត្យសុខភាព។
Roma បានរក្សាជំហរដោយចង់បានតម្លៃខ្លួន45លានអឺរ៉ូសម្រាប់កីឡាករ Rudiger ដែលពួកគេបានទិញពីក្លិប Stuttgart កាលពីរដូវក្តៅមុនក្រោយពីកីឡាកររូបនេះបានបង្ហាញពីទម្រង់លេងយ៉ាងល្អក្នុងពេលស្ថិតជាកីឡាករកម្ចីពេញមួយរដូវកាលរួចមក។
ក្រោយពីបានច្រានចោលសំណើជាបឋមរបស់ Chelsea ក្នុងទឹកប្រាក់35លានអឺរ៉ូម្តងរួចមក ក្លិប Roma បានយល់ព្រមទទួលយកកញ្ចប់តម្លៃខ្លួនមួយដែលមានន័យថា Chelsea នឹងត្រូវចំណាយប្រាក់33លានអឺរ៉ូ និងប្រាក់ឧបត្ថម្ភបន្ថែម5លានអឺរ៉ូផ្សេងទៀត។ Rudiger ដែលជាខ្សែការពារកណ្តាលប៉ុន្តែអាចលេងនៅតំបន់ការពារស្លាបស្តាំបានដែរនោះ ត្រូវបានរំពឹងទុកថានឹងទទួលបានចំណូលប្រមាណជា4លានអឺរ៉ូ ក្នុងមួយរដូវកាល។ រូបគេកំពុងតែលេងក្នុងព្រឹត្តិការណ៍Confederations Cup ដោយក្រុមជម្រើសជាតិអាល្លឺម៉ង់ត្រូវប៉ះជាមួយនឹងក្រុមជម្រើសជាតិស៊ីលីក្នុងវគ្គផ្តាច់ព្រ័ត្រ នាថ្ងៃអាទិត្យនេះ។ លោក Antonio Conte បានព្យាយាមធ្វើការពង្រឹងតំបន់ការពារបើទោះបីបានឈ្នះពាន Premier League កាលពីរដូវកាលមុនក៏ដោយ និងបានចាត់ទុកកីឡាករវ័យ24ឆ្នាំរូបនេះ ជាគោលដៅដ៏ចម្បងរបស់លោកក្រោយពីការពិភាក្សារឿងផ្សេងៗជាមួយនឹងបុគ្គលិកបច្ចេកទេសរបស់ Chelsea រួចមក៕
ប្រភពពី៖ The Guardian
July 1, 2017
Ake របស់ Chelsea ត្រៀមបំពេញការផ្ទេរទៅ Bournemouth
ខ្សែការពារ Nathan Ake កំពុងតែស្ថិតយ៉ាងប្រកៀកក្នុងការបំពេញការផ្ទេរទៅកាន់ក្លិប Bournemouth ក្នុងតម្លៃខ្លួនជាកំណត់ត្រារបស់ក្លិបនេះចំនួន20លានផោន (ស្មើនឹង25.88លានដុល្លារអាមេរិក) ពីក្លិបតោខៀវ Chelsea។
ការព្រមព្រៀងគ្នាមួយនេះត្រូវបានឈានដល់លក្ខខណ្ឌសំខាន់ផ្សេងៗរវាងក្លិបទាំងពីរដោយនៅសល់តែសេចក្តីលម្អិតបន្តិចបន្តួចប៉ុណ្ណោះក្នុងការដោះស្រាយ ខណៈដែល Ake ត្រូវបានគេរំពឹងទុកថា នឹងចុះហត្ថលេខារយៈពេល5ឆ្នាំក្នុងរយៈពេល48ម៉ោងទៀតហើយនិងត្រូវចូលរួមជាមួយនឹងមិត្តរួមក្រុមថ្មីរបស់គេនៅពេលហ្វឹកហាត់មុនបើករដូវកាលក្រោយចាប់ផ្តើម។ ការនាំយក Ake នេះ ត្រូវបានគេចាត់ទុកថា ជាការទទួលជោគជ័យមួយសម្រាប់ក្លិប Bournemouth ដែលបានយកឈ្នះក្នុងការប្រជែងពីសំណាក់ក្លិប West Bromwich Albion, Newcastle United, Southampton និង West Ham United ក៏ដូចជាក្លិបមកពីក្រៅប្រទេសជាច្រើនទៀតដែរ។ ខ្សែការពារវ័យ22ឆ្នាំរូបនេះ បានចំណាយពេលពាក់កណ្តាលរដូវកាលមុនក្នុងនាមជាកីឡាករកម្ចីនៅឯក្លិប Bournemouth និងបានបង្ហាញពីទម្រង់លេងដ៏គួរឲ្យចាប់អារម្មណ៍ក្រោមការដឹកនាំរបស់លោក Eddie Howe ដែលបានរងនូវការខកចិត្តយ៉ាងខ្លាំងនៅពេលដែល Chelsea បានធ្វើការកោះហៅ Ake ឱ្យចូលរួមជាថ្មីជាមួយនឹងក្រុមរបស់ខ្លួនវិញកាលពីខែមករា។
អ្នកចាត់ការទូទៅរបស់ក្លិប Bournemouth រូបនេះធ្លាប់បានទទួលបរាជ័យក្នុងការចុះហត្ថលេខាជាមួយនឹង Akeក្នុងកិច្ចសន្យាជាអចិន្ត្រៃយ៍រួចមកហើយនៅថ្ងៃចុងក្រោយនៃការបិទទីផ្សារដោះដូរកីឡាករកាលពីខែមករា ប៉ុន្តែឥឡូវបានបង្ហាញពីការចាប់អារម្មណ៍ជាថ្មីរបស់ខ្លួនភ្លាមៗនៅរដូវក្តៅនេះ៕
ប្រភពពី៖ The Guardian
June 29, 2017
Matic ត្រៀមពិនិត្យសុខភាពមុនពេលបំពេញការផ្ទេរពី Chelsea ទៅ Man Utd
ខ្សែបម្រើការពារ Nemanja Matic របស់ក្លិបតោខៀវ Chelsea នឹងត្រូវធ្វើការត្រួតពិនិត្យសុខភាពជាមួយនឹងក្លិបបិសាចក្រហម Manchester United ក្នុងរយៈពេល48ម៉ោងទៀត។
កាសែត The Sun បានចេញផ្សាយកាលពីថ្ងៃចន្ទថា ខ្សែបម្រើរូបនេះនឹងត្រូវចូលរួមជាមួយនឹង Man United ក្នុងតម្លៃខ្លួន40លានផោន (ស្មើនឹង50.88លានដុល្លារអាមេរិក) ជាតម្លៃខ្លួនដែលក្លិប Chelsea និង Man United បានព្រមព្រៀងគ្នា។ ដោយឡែកគេហទំព័រ The Guardian បានចេញផ្សាយថា ការផ្ទេរនេះនឹងត្រូវបំពេញនៅប៉ុន្មានថ្ងៃខាងមុខទៀត ខណៈដែល Matic បានយល់ព្រមលើលក្ខខណ្ឌផ្ទាល់ខ្លួនរបស់គេរួចស្រេចហើយទៅលើកុងត្រាមួយដែលផ្តល់ចំណូល155,000ផោនក្នុងមួយសប្តាហ៍ដល់រូបគេ បើទោះបីការស្លាប់របស់លោក Felix Mourinho ដែលជាឪពុករបស់លោកគ្រូបង្វឹក Jose Mourinho អាចនឹងពន្យារពេលដល់ដំណើរការនេះក៏ដោយ។

អ្នកចាត់ការទូទៅរូបនេះកំពុងតែស្ថិតក្នុងប្រទេសព័រទុយហ្គាល់ ដើម្បីរៀបចំពិធីបុណ្យសព ប៉ុន្តែ Matic ត្រូវបានរំពឹងទុកថា នឹងចុះហត្ថលេខានៅមុនពេលក្រុម Man United ធ្វើដំណើរទៅកាន់សហរដ្ឋអាមេរិកសម្រាប់ដំណើរប្រកួតមុនបើករដូវកាលនាថ្ងៃទី9 ខែកក្កដា ខាងមុខនេះ។ Matic បានចូលរួមជាថ្មីជាមួយនឹងក្លិប Chelsea កាលពីឆ្នាំ2014 ក្នុងតម្លៃខ្លួន21លានផោនពីក្លិប Benfica ក្នុងពេលដែលលោក Mourinho នៅដឹកនាំក្នុងក្លិបតោខៀវមួយនេះនៅឡើយ ខណៈដែលរូបគេបានក្លាយជាសមាជិកដ៏សំខាន់ក្នុងពេលដែល Chelsea បានឈ្នះពាន Premier League កាលពីរដូវកាលមុន។ ប៉ុន្តែដំបូងឡើយ ការចូលរួមរបស់ Matic ជាមួយនឹងក្រុមម្ចាស់ជើងឯកអង់គ្លេសមួយនេះ មិនបានទទួលជោគជ័យឡើយ ក្រោយពីរូបគេបានផ្ទេរមកពីក្លិបស្លូវ៉ាគី Kosice កាលពីឆ្នាំ2009 មុននឹងផ្ទេរទៅកាន់ព័រទុយហ្គាល់ក្នុងឆ្នាំ2011។ ជាមួយនឹងក្លិប Chelsea រូបគេបានបង្ហាញខ្លួន121លើក និងបានស៊ុតបាល់បញ្ចូលទី4គ្រាប់៕
ប្រភពពី៖ Independent
June 27, 2017
Costa ៖ លោក Conte លែងចង់បានខ្ញុំនៅក្លិប Chelsea ហើយ
ខ្សែប្រយុទ្ធ Diego Costa បានបញ្ជាក់ថា រូបគេនឹងសម្លឹងរកការចាកចេញពីក្លិបតោខៀវ Chelsea ក្រោយពីត្រូវបានប្រាប់ដោយលោកគ្រូបង្វឹក Antonio Conte ថា រូបគេនឹងមិនស្ថិតក្នុងផែនការរបស់អ្នកចាត់ការទូទៅសញ្ជាតិអ៊ីតាលីរូបនេះទេសម្រាប់រដូវកាលក្រោយនេះ។
Costa បានក្លាយជាសមាជិកដ៏សំខាន់ម្នាក់ក្នុងការជួយឲ្យ Chelsea ឈ្នះពានក្របខ័ណ្ឌ Premier League ក្នុងរដូវកាលនេះ តាមរយៈការស៊ុតបាល់បញ្ចូលទី២២គ្រាប់។ ប៉ុន្តែ ទោះបីជាយ៉ាងណា រូបគេបានបញ្ជាក់ថា គេគ្មានជម្រើសអ្វីក្រៅពីការចាកចេញពីកីឡដ្ឋាន Stamford Bridge ឡើយ ក្នុងរយៈពេលប៉ុន្មានខែខាងមុខទៀតនេះ ក្រោយពីត្រូវបានប្រាប់ដោយលោក Conte ថា រូបគេគ្មានអនាគតជាមួយនឹងក្រុមម្ចាស់ជើងឯកអង់គ្លេសមួយនេះឡើយ។
ក្រោយពីក្រុមបាល់ទាត់ជម្រើសជាតិអេស្ប៉ាញ បានបញ្ចប់ក្នុងលទ្ធផលស្មើ ២-២ ជាមួយនឹងក្រុមជម្រើសជាតិកូឡុំប៊ី ក្នុងការប្រកួតមិត្តភាពកាលពីថ្ងៃពុធ Costa បានប្រាប់អ្នកយកព័ត៌មានថា៖ «ខ្ញុំនឹងសម្តែងនូវភាពស្មោះត្រង់ កាលពីថ្ងៃមុន ខ្ញុំបានទទួលសារមួយពីសំណាក់លោកគ្រូបង្វឹក Conte ថា ខ្ញុំមិនស្ថិតក្នុងផ្នែកនៃគម្រោងរបស់គាត់ទេ ពេលនេះ ខ្ញុំជាកីឡាករ Chelsea ពីព្រោះខ្ញុំនៅជាប់កិច្ចសន្យា ប៉ុន្តែ ប្រសិនបើគ្រូបង្វឹកលែងចង់បានខ្ញុំហើយនោះ មានន័យថា ខ្ញុំត្រូវតែចាកចេញ»៕
ប្រភពពី៖ Sport.yahoo
June 8, 2017
Lukaku យល់ព្រមលើលក្ខខណ្ឌផ្សេងៗរួចស្រេចហើយដើម្បីចូលរួមជាមួយក្លិបថ្មី
ខ្សែប្រយុទ្ធ Romelu Lukaku របស់ក្រុមទូកក្តោង Everton បានយល់ព្រមលើលក្ខខណ្ឌផ្ទាល់ខ្លួនផ្សេងៗ ដើម្បីចូលរួមជាមួយនឹងក្លិបថ្មីមួយរួចជាស្រេចហើយ ដែលត្រូវបានគេជឿជាក់ថា ជាក្លិបតោខៀវ Chelsea ដែលជាម្ចាស់ជើងឯកក្របខ័ណ្ឌ Premier League។
ខ្សែប្រយុទ្ធអន្តរជាតិបែលហ្ស៊ិកវ័យ២៤ឆ្នាំរូបនេះ បានចាកចេញពីក្លិបតោខៀវ កាលពីឆ្នាំ២០១៤ ក្រោយពីបានចំណាយពេលអស់៣រដូវកាលនៅឯកីឡដ្ឋាន Stamford Bridge។ កាលព្រឹកថ្ងៃអង្គារ Lukaku បានប្រាប់ទូរទស្សន៍ Sky Sports ថា៖ «ភ្នាក់ងារតំណាងរបស់ខ្ញុំដឹងពីអ្វីដែលនឹងកើតឡើង ហើយខ្ញុំក៏ដឹងយ៉ាងច្បាស់ផងដែរ។ ខ្ញុំកំពុងតែស្ថិតក្នុងអារម្មណ៍ស្ងប់ចំពោះរាល់អ្វីៗទាំងអស់ ហើយយើងបានឈានដល់ការព្រមព្រៀងគ្នាមួយជាមួយនឹងក្លិបថ្មីមួយរួចជាស្រេច។ យើងបានរក្សានូវអារម្មណ៍ស្ងប់ ហើយយ៉ាងហោចណាស់ យើងមានគោលដៅមួយដែលយើងចង់ទៅ»។
ខ្សែប្រយុទ្ធរូបនេះបានបន្ថែមទៀតថា៖ «ខ្ញុំនឹងសម្រាករយៈពេលប៉ុន្មានថ្ងៃ ហើយបន្ទាប់មក ត្រៀមសម្រាប់ការប្រកួតនៅរដូវកាលក្រោយ។ ខ្ញុំចង់ចំណាយពេលវេលាក្នុងថ្ងៃវិស្សមកាលរបស់ខ្ញុំដើម្បីធ្វើឲ្យអ្វីៗឈានទៅកាន់កម្រិតមួយផ្សេងទៀត និងធ្វើឲ្យបានល្អប្រសើរជាងអ្វីដែលខ្ញុំបានធ្វើកាលពីឆ្នាំមុន»។ Lukaku ត្រូវបានខ្ចីជើងទៅកាន់ក្លិប West Brom បន្ទាប់មកត្រូវខ្ចីជើងទៅកាន់ក្លិប Everton ទៀត មុនពេលត្រឡប់មកចូលរួមជាមួយនឹងក្រុមទូកក្តោងមួយនេះវិញ ក្នុងកិច្ចសន្យាជាអចិន្ត្រៃយ៍ក្នុងតម្លៃខ្លួន២៨លានផោន កាលពីឆ្នាំ២០១៤។
Everton ត្រូវបានរំពឹងទុកថា នឹងទាមទារតម្លៃខ្លួនដល់ទៅ១០០លានផោន (ស្មើនឹង១២៩លានដុល្លារអាមេរិក) សម្រាប់ Lukaku ដែលបានរកគ្រាប់បាល់ស៊ុតបញ្ចូលទីសរុប២៦គ្រាប់ ក្នុងការបង្ហាញខ្លួន៣៩លើកក្នុងរដូវកាលឆ្នាំ២០១៦-២០១៧៕
ប្រភពពី៖ The Sun
June 7, 2017
លោក Klopp ជឿជាក់ថា Liverpool អាចនាំយក Van Dijk ក្នុងតម្លៃខ្លួនខ្ពស់កប់ពពក
លោក Jurgen Klopp ជឿជាក់ថា លោកនឹងផ្តួលក្លិប Manchester City និង Chelsea ក្នុងការប្រជែងទិញយកតារាឆ្នើម Virgil van Dijk ពីក្លិប Southampton ក្នុងតម្លៃខ្លួន 60លានផោន (ស្មើនឹង77លានដុល្លារអាមេរិក)។
លោក Klopp នឹងបញ្ចុះបញ្ចូលឲ្យម្ចាស់កម្មសិទ្ធិក្លិប Liverpool ធ្វើឲ្យ Van Dijk ក្លាយជាកីឡាករទទួលបានចំណូលខ្ពស់ជាងគេបំផុតក្នុងប្រវត្តិសាស្ត្ររបស់ពួកគេ ក្នុងកិច្ចព្រមព្រៀងគ្នាដែលអាចនឹងផ្តល់ចំណូលជិត 20ម៉ឺនផោនក្នុងមួយសប្តាហ៍ឱ្យកីឡាកររូបនេះ។ តម្លៃខ្លួន 60លានផោននេះ នឹងធ្វើឲ្យខ្សែការពារកណ្តាលអន្តរជាតិហូឡង់ Van Dijk ដែលបានធ្វើឲ្យក្លិប Southampton ចំណាយប្រាក់ 11,5លានផោនដើម្បីទិញយកកីឡាកររូបនេះពីក្លិប Celtic នោះ ក្លាយជាខ្សែការពារដែលមានតម្លៃខ្លួនខ្ពស់ជាងគេបំផុត។ Van Dijk វ័យ 25ឆ្នាំ ទើបតែបានចុះហត្ថលេខាលើកុងត្រារយៈពេល 6ឆ្នាំជាមួយនឹងក្លិប Southamtpon កាលពីរដូវក្តៅមុន ប៉ុន្តែ បច្ចុប្បន្នរូបគេចង់បានការប្រជែងដ៏ធំមួយ ហើយក្លិបរបស់គេក៏ចង់បានតម្លៃខ្លួនដ៏ខ្ពស់មួយពីតារាឆ្នើមរបស់ពួកគេដែរ។
ទាំងលោក Antonio Conte ដែលជាអ្នកចាត់ការទូទៅរបស់ក្លិប Chelsea និងលោក Pep Guardiola របស់ Man City សុទ្ធសឹងចាត់ទុកថា Van Dijk ជាកីឡាករសំខាន់ដែលត្រូវទិញចូលនៅរដូវក្តៅនេះ។ ប៉ុន្តែ អ្នកចាត់ការទូទៅទាំងពីរនឹងត្រូវជួបឧបសគ្គដ៏ធំមួយ ក្រោយពី Van Dijk បានបញ្ជាក់ប្រាប់ក្លិប Southampton កាលពីពេលថ្មីៗនេះ រូបគេចង់ចាកចេញដើម្បីចូលរួមជាមួយនឹងក្លិបហង្សក្រហម Liverpool៕
ប្រភពពី៖ The Sun
June 6, 2017
Hazard របស់ Chelsea បើកចំហឲ្យមានការផ្ទេរទៅកាន់ក្លិប Real Madrid
ខ្សែបម្រើស្លាបដ៏មានឥទ្ធិពល Eden Hazard កំពុងតែបើកចំហឲ្យមានការដាក់សំណើមួយពីក្លិប Real Madrid ពីព្រោះរូបគេចង់ឈ្នះពានក្របខ័ណ្ឌ Champions League។ តារាឆ្នើមរបស់ក្លិប Chelsea រូបនេះ នៅតែជាប់កិច្ចសន្យារយៈពេល៣ឆ្នាំទៀតក្នុងកុងត្រារបស់គេដែលផ្តល់ចំណូលជាទឹកប្រាក់២០ម៉ឺនផោន (ស្មើនឹង២៦ម៉ឺនដុល្លារអាមេរិក) ក្នុងមួយសប្តាហ៍ ប៉ុន្តែ មិនទាន់បានបន្តកិច្ចសន្យាថ្មីមួយនៅឡើយទេ។
ឮលោកគ្រូបង្វឹក Antonio Conte របស់ Chelsea បានទទួលស្គាល់ថា វានឹងក្លាយជារឿងដ៏លំបាកក្នុងការរក្សាទុកកីឡាករណាម្នាក់ដែលចង់ចាកចេញ។ នៅពេលដែលត្រូវបានគេចោទសួរថា តើរូបគេចាប់អាម្មណ៍ទៅលើការផ្ទេរទៅកាន់ក្រុមម្ចាស់ជើងឯកអឺរ៉ុប Real Madrid ឬយ៉ាងណា? Hazard បានឆ្លើយតបថា៖ «ពិតណាស់ ខ្ញុំចង់ផ្ទេរទៅ។ និយាយឲ្យត្រង់ទៅ ខ្ញុំមិនដឹងថា នឹងមានអ្វីកើតឡើងចំពោះខ្ញុំឡើយ»។ ខ្សែបម្រើស្លាបអន្តរជាតិបែលហ្ស៊ិករូបនេះបានប្រាប់បន្តថា៖ «ខ្ញុំគ្រាន់តែដឹងថា ខ្ញុំនៅជាប់កិច្ចសន្យារយៈពេល៣ឆ្នាំទៀតក្នុងកុងត្រារបស់ខ្ញុំជាមួយនឹង Chelsea ហើយខ្ញុំដឹងថា យើងមានរដូវកាលដ៏អស្ចារ្យមួយកាលពីឆ្នាំមុនជាមួយនឹងគ្រូបង្វឹក និងកីឡាករទាំងអស់។ យើងចង់បន្តស្វែងរកភាពជោគជ័យក្នុងក្របខ័ណ្ឌ Champions League នៅឆ្នាំក្រោយ»។ Harzard បានបន្ថែមទៀតថា៖ «យើងមានរដូវកាលដ៏អស្ចារ្យជាមួយនឹងលោក Antonio និងកីឡាករផ្សេងទៀត។ យើងចង់ធ្វើដំណើរឆ្ពោះទៅមុខទៀត ក្នុងនោះរាប់បញ្ចូលទាំងពានក្របខ័ណ្ឌ Champions League ផងដែរ។ ខ្ញុំមានអារម្មណ៍ល្អនៅ Chelsea ប៉ុន្តែ អ្នកមិនដឹងថា នឹងមានអ្វីកើតឡើងឡើយ»។
Hazard បានទស្សនាការការពារពានក្របខ័ណ្ឌ Champions League របស់ក្លិប Real Madrid ក្រោយពីពួកគេបានយកឈ្នះលើក្រុម Juventus ក្នុងលទ្ធផល ៤-១ ក្នុងវគ្គផ្តាច់ព្រ័ត្រ ក្នុងទីក្រុង Cardiff កាលពីថ្ងៃសៅរ៍ ស្របពេលដែលរូបគេកំពុងបំពេញកាតព្វអន្តរជាតិជាមួយនឹងក្រុមជម្រើសជាតិបែលហ្ស៊ិក៕
ប្រភពពី៖ Mirror
June 5, 2017