Chelsea - La Reine Media

កំពូលកីឡាការិនីបាល់ទាត់ 10 រូបនៅ World Cup នារី 2023

ទីភ្នាក់ងារសារព័ត៌មាន AP បានបង្ហាញបញ្ជីឈ្មោះកំពូលកីឡាការិនីបាល់ទាត់ចំនួន 10 រូបដែលត្រូវបានគេរំពឹងច្រើនជាងគេនៅ World Cup នារី 2023 ក្នុងនោះមានទាំង Alex Morgan និង Marta ផងដែរ។

Alex Morgan បានជួយឱ្យសហរដ្ឋអាម៉េរិកដណ្ដើមបានតំណែងជើងឯក World Cup នារីចំនួនពីរលើក ហើយឆ្នាំនេះគឺជាលើកទីបួនដែលនាងចូលរួមប្រកួត។ Alex Morgan ដណ្ដើមបានមេដាយមាសនៅអូឡាំពិកចំនួនមួយគ្រឿង និងជាកីឡាការិនីបាល់ទាត់ដែលឆ្នើមជាងគេគ្រប់សម័យកាល។ ការប្រកួតនៅអូស្ត្រាលី និងនូវែលសេឡង់នាពេលខាងមុខនឹងអាចជួយឱ្យកីឡាការិនីរូបនេះមានឱកាសបង្កើតកំណត់ត្រាដណ្ដើមបានជើងឯក World Cup ចំនួនបីជាបន្តបន្ទាប់ ដែលនេះមិនទាន់មានកីឡាកររូបណាអាចធ្វើបាន។ ខ្សែប្រយុទ្ធវ័យ 34 ឆ្នាំរូបនេះ ដណ្ដើមបានពានរង្វាន់អន្តរជាតិចំនួន 11 និងពានរង្វាន់ជើងឯក Champions League ជាមួយនឹងក្លឹប Lyon។

កំពូលកីឡាការិនីមួយរូបផ្សេងទៀតដែលនឹងត្រូវប្រកួតនៅ World Cup 2023 គឺខ្សែប្រយុទ្ធ Christine Sinclair តំណាងរបស់កាណាដា។ ពុំទាន់មានកីឡាករ កីឡាការិនីណាម្នាក់ដែលរកបានគ្រាប់បាល់ច្រើនដូច Sinclair សម្រាប់ក្រុមជម្រើសជាតិ។ Sinclair រកបាន 190 គ្រាប់ក្នុងចំណោម 319 ប្រកួត ជូនប្រទេសកាណាដា។ Sinclair នឹងចូលរួមទាត់នៅ World Cup លើកទី 6 ក្នុងអាជីព។ Sinclair ដណ្ដើមបានពានរង្វាន់អន្តរជាតិចំនួន 8 ជាមួយនឹងក្រុមជម្រើសជាតិកាណាដា ក្នុងនោះមានទាំងមេដាយមាសអូឡាពិក 2021 ផងដែរ។

នៅព្រឹត្តិការណ៍ប្រកួតកីឡាបាល់ទាត់ពិភពលោកផ្នែកនារីឆ្នាំ 2023 មានខ្សែប្រយុទ្ធខ្លាំងៗជាច្រើន ប៉ុន្តែ Sam Kerr ត្រូវបានសង្ឃឹមច្រើនថានឹងក្លាយជាម្ចាស់ពានរង្វាន់កីឡាការិនីដែលរកបានគ្រាប់បាល់ច្រើនជាងគេ។ ខ្សែប្រយុទ្ធវ័យ 30 រូបនេះគឺជាកីឡាការិនីអូស្ត្រាលីដំបូងគេដែលបង្កើតបាន hat-trick នៅ World Cup មិនថាកីឡាករ ឬកីឡាការិនី។ នាងគឺជាស្ដេចកម្ទេចសំណាញ់ទីនៅពានរង្វាន់បាល់ទាត់ទ្វីបអាស៊ីឆ្នាំ 2022 ដោយរកបាន 7 គ្រាប់ ក្លាយជាកីឡាការិនីដែលរកបានគ្រាប់បាល់ច្រើនជាងគេនៅអូស្ត្រាលី។ Sam Kerr គឺជាកីឡាការិនីរបស់ Chelsea ដែលឆ្នើមជាងគេនៅអង់គ្លេស ក្នុងពីររដូវកាលកន្លង ដោយធ្លាប់បានស៊ុតបញ្ចូលទីជួយឱ្យក្រុមនេះឈ្នះ Man Utd នៅវគ្គផ្ដាច់ព្រ័ត្រ FA Cup។ ដោយបានលេងលើទីលានរបស់ប្រទេសខ្លួន Sam Kerr នឹងមានឱកាសច្រើនដែលអាចជួយឱ្យអូស្ត្រាលីឡើងដល់វគ្គខ្ពស់។

ក្រៅពីកីឡាការិនីខាងលើ World Cup នារី 2023 ក៏នៅមានកំពូលជើងខ្លាំងជាច្រើនផ្សេងទៀត រួមមាន Wendie Renard របស់បារាំង, Ada Hegerberg របស់ន័រវែស, Alexia Putellas របស់អេស្ប៉ាញ, Marta Vieira da Silva របស់ប្រេស៊ីល, Debinha Miri របស់ប្រេស៊ីល, Alexandra Poppp របស់អាល្លឺម៉ង់ និង Lucy Bronze របស់អង់គ្លេស៕

July 6, 2023

ទិដ្ឋភាព Man City ដង្ហែពានបីដំណាលគ្នា អមដោយអ្នកគាំទ្ររាប់សែននាក់

(អង់គ្លេស) – អ្នកគាំទ្រប្រហែល 200,000 នាក់របស់ក្លឹបបាល់ទាត់ Man City បានចូលរួមព្រឹត្តិការណ៍ដង្ហែពានជើងឯកចំនួនបីគ្រឿង ដែលពួកគេទើបតែដណ្ដើមបាន ក្នុងនោះរួមមាន ពាន English Premier League, FA Cup និង Champions League រដូវកាល 2022-2023 នៅ Manchester កាលពីថ្ងៃទី 12 មិថុនា។

ភ្លៀងធំធ្វើឱ្យពិធីដង្ហែពានរង្វាន់របស់ Man City ត្រូវពន្យារពេល 30 នាទីធៀបនឹងការកំណត់មុននោះដែលថានឹងធ្វើនៅម៉ោង 17 ថ្ងៃទី 12 មិថុនា (ម៉ោងនៅក្រុងឡុងដ៍)។ ក៏ប៉ុន្តែ អ្នកគាំទ្រស្ទើរតែទាំងអស់នៅតែចេញដើរក្រោមទឹកភ្លៀង ដើម្បីអបអរសាទរជ័យជម្នះនេះ។

មនុស្សប្រហែល 200,000 នាក់បាននាំគ្នាដង្ហែក្បួនតាមដងផ្លូវនៅក្បែរទីលាន St Peter, Manchester។ ក្រុមបាល់ទាត់អង់គ្លេស Man City ទើបតែបានទទួលជោគជ័យយ៉ាងធំធេង ដោយដណ្ដើមបានពានជើងឯកចំនួនបីក្នុងមួយរដូវកាល (Treble) រួមមានពាន English Premiere League, FA Cup និង Champions League។ Man City គឺជាក្រុមបាល់ទាត់អង់គ្លេសទីពីរដែលធ្វើបានដូច្នេះ បន្ទាប់ពី Man Utd ដែលធ្វើបានដំបូងគេកាលពីរដូវកាល 1998-1999។

Man City មិនត្រឹមតែដណ្ដើមបានងារ Treble នោះទេ តែក៏ជាអ្នកដណ្ដើមបានពានរង្វាន់ជើងឯក Champions League លើកដំបូងផងដែរ។ ក្លឹបនេះគឺជាម្ចាស់ជើងឯកបាល់ទាត់អឺរ៉ុបទី 6 របស់អង់គ្លេស បន្ទាប់ពីក្លឹប Liverpool, Man Utd, Chelsea, Nottingham Forest និង Aston Villa។

ក្លឹប Man City ក៏ជាម្ចាស់ជើងឯកទី 8 នៅអឺរ៉ុបដែលដណ្ដើមបានពានជើងឯកទាំងបី ក្រោយពីក្លឹប Celtic, Ajax, PSV, Man Utd, Barca, Inter និង Bayern។

…

June 13, 2023

គ្រូបង្វឹកក្រុមបាល់ទាត់ Roma របស់អ៊ីតាលី បោះមេដាយចោល ក្រោយចាញ់អេស្ប៉ាញនៅវគ្គផ្ដាច់ព្រ័ត្រ Europa League

(ហុងគ្រី) – គ្រូបង្វឹក Jose Mourinho បោះមេដាយប្រាក់ទៅឱ្យអ្នកគាំទ្ររបស់ Roma បន្ទាប់ពីចាញ់ Sevilla ក្នុងការទាត់ប៉េណាំងទីម្ដងម្នាក់នៅវគ្គផ្ដាច់ព្រ័ត្រ Europa League។

គ្រូបង្វឹករបស់ក្រុមបាល់ទាត់ Roma របស់ប្រទេសអ៊ីតាលី បោះមេដាយរបស់ខ្លួនទៅកាន់អ្នកគាំទ្រនៅលើវិទិកាទស្សនិកជ ក្នុងទីលាន Puskas Arena របស់ប្រទេសហុងគ្រី ក្រោយពីការប្រកួតវគ្គផ្ដាច់ព្រ័ត្រកាលពីព្រលប់ថ្ងៃទី 31 ឧសភា 2023។ ក្រុម Roma បានចាញ់ក្រុម Sevilla របស់អេស្ប៉ាញ់ 1-4 ក្នុងការទាត់ប៉េណាំងទីម្ដងម្នាក់ បន្ទាប់ពីមានលទ្ធផលស្មើគ្នា 1-1 ក្នុង 120 នាទីកន្លង។

នេះគឺជាលើកដំបូងហើយដែលលោក Mourinho បានចាញ់នៅវគ្គផ្ដាច់ព្រ័ត្រក្នុងការប្រកួតនៅទ្វីបអឺរ៉ុប ក្រោយពីដណ្ដើមបានតំណែងជើងឯក Champions League ពីរលើក, Europa League ឬ UEFA Cup ពីរលើក និង Conference League មួយលើក។

នេះក៏ជាលើកទីពីរផងដែរ ដែលគ្រូបង្វឹក Mourinho បោះមេដាយចោល។ ក្នុងនោះ លើកទីមួយគឺពេលដែល Chelsea ចាញ់ Arsenal នៅ FA Community Shield ឆ្នាំ 2015 និង Man Utd ចាញ់ Real Madrid នៅ UEFA Super Cup ឆ្នាំ 2017៕

ក្រុម Sevilla របស់អេស្ប៉ាញ់ អបអរជ័យជម្នះ

គ្រូបង្វឹក Jose (Jose Luis Mendilibar) របស់ក្លឹបអេស្ប៉ាញ Sevilla លើកពាន គ្រាដែលគ្រូបង្វឹក Jose (Jose Mourinho) របស់ក្លឹបអ៊ីតាលី Roma កំពុងខឹងខ្លាំង

អ្នកគាំទ្រម្នាក់ទទួលបានមេដាយដែលគ្រូបង្វឹករបស់ Roma បោះឱ្យ

June 1, 2023

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?

(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។

លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។

ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។

ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។

បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។

តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស

យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕

May 30, 2023

ទិដ្ឋភាពអ្នកគាំទ្រអបអរសាទរ Man City ដែលដណ្ដើមបានពានរង្វាន់ជើងឯកលិគកំពូលអង់គ្លេស

(អង់គ្លេស) – អ្នកគាំទ្ររាប់ពាន់នាក់របស់ Man City នាំគ្នាចុះទៅកាន់ទីលានបាល់ទាត់ Etihad ដើម្បីអបអរ បន្ទាប់ពី Chelsea ដណ្ដើមបានពានរង្វាន់ជើងឯកលិគកំពូលអង់គ្លេស (English Premier League)។

បរាជ័យរបស់ Arsenal នៅចំពោះមុខ Nottingham Forest កាលពីថ្ងៃទី 20 ឧសភា បានជួយឱ្យ Man City មានលក្ខខណ្ឌគ្រប់គ្រាន់ដើម្បីលើកពានលិគកំពូលអង់គ្លេសរដូវកាលទីបីជាបន្តបន្ទាប់។ ដូច្នេះ ការប្រកួតជាមួយ Chelsea កាលពីថ្ងៃទី 21 ឧសភា គ្រាន់តែជាការបំពេញបែបបទផ្នែកលទ្ធផលប៉ុណ្ណោះ។ ក៏ប៉ុន្តែ នេះក៏ជាឱកាសសម្រាប់ក្រុមអ្នកគាំទ្ររបស់ Man City ជប់លៀងសម្រាប់ក្រុមរបស់ពួកគេ។

នៅមុនពេលចូលប្រកួត ក្រុមកីឡាករម្ចាស់ផ្ទះទទួលបានការអបអរដោយការទះដៃពីគូប្រកួត។ យោងតាមពិធីផ្លូវការ ក្រុមកីឡាកររបស់ Chelsea ឈរជាពីរជួរដើម្បីទះដៃអបអរសាទរម្ចាស់ជើងឯក។

ក្នុងកាប្រកួត Man City រកបានមួយគ្រាប់មុន Chelsea។ គ្រាប់បាល់នេះក៏កំណត់ការឈ្នះចាញ់រវាង Man City និង Chelsea ផងដែរ។

ពេលអាជ្ញាកណ្ដាលផ្លុំកញ្ចែបញ្ចប់ការប្រកួត ក៏ជាពេលដែលអ្នកគាំទ្ររាប់ពាន់នាក់របស់ Man City នាំចូលចុះទៅកាន់ទីលានប្រកួត Etihad។ ពួកគេអបអរសាទរដល់ក្រុម Man City ខណៈកូនកាំជ្រូចបញ្ចេញពន្លឺក៏ត្រូវបានគេដុតដើម្បីចូលរួមអបអរ។

ក្រោយពីចូលក្នុងទីលានប្រកួតបានមួយរយៈពេល អ្នកគាំទ្រក៏ត្រូវបានស្នើឱ្យត្រលប់ទៅកាន់កន្លែងអង្គុយវិញដើម្បីទុកកន្លែងសម្រាប់ការរៀបចំពិធីប្រគល់ពានរង្វាន់។ នេះគឺជាតំណែងជើងឯកលិគកំពូលអង់គ្លេសលើកទីប្រាំរបស់ Man City នៅក្នុង 6 រដូវកាលចុងក្រោយបង្អស់។

ខាងក្រោមនេះគឺជាទិដ្ឋភាពមួយចំនួននៅក្នុងការលើកពានរបស់ Man City ៖

May 22, 2023

Aubameyang សង្គ្រោះ Arsenal ខណៈ Chelsea លត់ Dynamo Kiev យ៉ាងដំណំ

Arsenal បានឈានទៅវគ្គ 1/4 ផ្តាច់ព្រ័ត្រនៃក្របខ័ណ្ឌអឺរ៉ុប តាមរយៈការស្រោចស្រង់ពីការចាញ់ឡើងវិញក្នុងការប្រកួតជើងទី1 3-1 ដើម្បីផ្តួលក្រុម Rennes ក្នុងលទ្ធផល 3-0 និងឈានទៅវគ្គ 8ក្រុមចុងក្រោយនៃក្របខ័ណ្ឌ Europa League នាកីឡដ្ឋាន Emirates កាលពីថ្ងៃព្រហស្បតិ៍។

ខ្សែប្រយុទ្ធ Pierre-Emerick Aubameyang បានស៊ុតបាល់បញ្ចូលទី 2គ្រាប់ ហើយក៏បានជួយឱ្យ Ainsley Maitland-Niles រកបានគ្រាប់បាល់ផងដែរ ខណៈដែលក្រុម Arsenal បានចូលរួមជាមួយនឹងក្រុម Chelsea ក្នុងការចាប់ឆ្នោតនៅថ្ងៃសុក្រនេះ សម្រាប់ការប្រកួតវគ្គ 8ក្រុមចុងក្រោយនៃក្របខ័ណ្ឌ Europa League។

ជ័យជម្នះនេះ បានកើតឡើង ក្រោយពីក្រុម Liverpool, Manchester City, Manchester United និងTottenham សុទ្ធសឹងបានឈានទៅដល់វគ្គ 8ក្រុមចុងក្រោយនៃក្របខ័ណ្ឌ Champions League។

ការឈ្នះពានក្របខ័ណ្ឌ Europa League នឹងជួយឱ្យក្រុម Arsenal មានសុវត្ថិភាពក្នុងការឈ្នះកៅអីទៅលេងក្នុងក្របខ័ណ្ឌ Champions League ប្រសិនបើពួកគេខកខានក្នុងការប្រជែងដណ្តើមលេខ4 នៅលើតារាង Premier League។

ប៉ុន្តែ លោកគ្រូបង្វឹកនៃក្រុមកាំភ្លើងធំ Unai Emery ដែលបានឈ្នះពាន Europa League 3លើកក្នុងនាមជាគ្រូបង្វឹក Sevillaនោះ ក៏ចង់បានពានមួយក្នុងរដូវកាលទី1 របស់លោកក្នុងនាមជាគ្រូបង្វឹកផងដែរ។

គ្រូបង្វឹកសញ្ជាតិអេស្ប៉ាញរូបនេះបានឱ្យដឹងថា៖ «វាមិនមែនត្រឹមតែអាចជួយឱ្យឈ្នះសិទ្ធិទៅប្រកួត Champions League ប៉ុណ្ណោះទេ ប៉ុន្តែវាក៏ជាពានមួយផងដែរ ហើយយើងអាចមានអារម្មណ៍ថា អាចនឹងឈ្នះបានពាន 1ទៀត»។

ស្របពេលជាមួយគ្នានេះ ខ្សែប្រយុទ្ធ Olivier Giroud បានស៊ុតបាល់បញ្ចូលទី 3គ្រាប់ ខណៈដែលក្រុម Chelsea បានឈានទៅវគ្គ 8ក្រុមចុងក្រោយនៃក្របខ័ណ្ឌ Europa League តាមរយៈការដណ្តើមបានជ័យជម្នះទាំង 2ជើងលើក្រុម Dynamo Kiev ក្នុងលទ្ធផល 8-០៕

March 15, 2019

Chelsea ចុះហត្ថលេខាជាមួយ Higuain ក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ

កាលពីថ្ងៃពុធ ក្លិបតោខៀវ Chelsea បានចុះហត្ថលេខាជាមួយនឹងខ្សែប្រយុទ្ធអន្តរជាតិអាហ្សង់ទីនក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ ខណៈដែលលោក Maurizio Sarri សម្លឹងរកការបន្ថែមភាពមុតស្រួចលើតំបន់ប្រយុទ្ធរបស់លោក។

Higuain នឹងចូលរួមម្តងទៀតជាមួយនឹងលោក Sarri ដែលធ្លាប់បានធ្វើជាគ្រូបង្វឹករបស់កីឡាករវ័យ31ឆ្នាំរូបនេះនៅឯក្លិប Napoli និងបានជ្រើសរើសយករូបគេជាគោលដៅទី1ក្នុងការទិញចូលនៅលើទីផ្សារដោះដូរកីឡាករនាខែមករានេះ។

ក្រោយពីបានចំណាយពេលពាក់កណ្តាលរដូវកាលនេះ ក្នុងលក្ខខណ្ឌខ្ចីជើងនៅឯក្លិប AC Milan តារាឆ្នើម Higuain បានទទួលស្គាល់ថា រូបគេចង់ផ្ទេរទៅកាន់កីឡដ្ឋាន Stamford Bridge។

ក្រោយពីបំពេញការផ្ទេរក្នុងលក្ខខណ្ឌខ្ចីជើងពីក្លិប Juventus ខ្សែប្រយុទ្ធ Higuain ដែលនឹងពាក់អាវលេខ9នៅកីឡដ្ឋាន Stamford Bridge បានឱ្យដឹងថា៖ «នៅពេលដែលឱកាសក្នុងការចូលរួមជាមួយនឹង Chelsea បានបង្ហាញឡើងដោយខ្លួនឯង ខ្ញុំត្រូវតែទទួលយកវា។ វាជាក្រុមមួយដែលខ្ញុំតែងតែចូលចិត្ត និងមានប្រវត្តិសាស្ត្រជាច្រើន មានកីឡដ្ឋានដ៏អស្ចារ្យ ហើយពួកគេលេងក្នុងក្របខ័ណ្ឌ Premier League ជាលីកមួយដែលខ្ញុំតែងតែចង់លេង»។

កីឡាកររូបនេះបានបន្ថែមទៀតថា៖ «ខ្ញុំសង្ឃឹមថា ខ្ញុំអាចផ្តល់ការជឿជាក់ដែល Chelsea បានបង្ហាញដល់ខ្ញុំនៅលើទីលានវិញ។ ខ្ញុំពិតជាចង់ចាប់ផ្តើម ហើយខ្ញុំសង្ឃឹមថានឹងសម្របខ្លួនបានយ៉ាងឆាប់រហ័សតាមដែលអាចធ្វើបាន»។

លោកស្រី Marina Granovskaia ប្រធានក្លិប Chelsea បានឱ្យដឹងថា៖ « Higuain គឺជាគោលដៅទី1របស់យើងក្នុងការដោះដូរកីឡាករហើយរូបគេមកដល់រួមជាមួយនឹងកំណត់ត្រាយ៉ាងច្បាស់មួយក្នុងកម្រិតដ៏ខ្ពស់បំផុត»៕

January 24, 2019

Moses ជួយឱ្យ Chelsea ផ្តួល Burnleyដើម្បីរក្សាក្តីសង្ឃឹមក្នុង Champions League

ខ្សែបម្រើ Victor Moses បានរកគ្រាប់បាល់ឈ្នះនៅពេលជិតបញ្ចប់ការប្រកួត ខណៈដែលក្រុម Chelsea បានយកឈ្នះលើក្រុម Burnleyក្នុងលទ្ធផល 2-1 កាលពីថ្ងៃព្រហស្បតិ៍ ដើម្បីកត់ត្រាជ័យជម្នះក្នុងការប្រកួតក្របខ័ណ្ឌ Premier League 2លើកជាប់ៗគ្នាជាលើកទី1 នៅឆ្នាំនេះ ដើម្បីរក្សាក្តីសង្ឃឹមនៃការប្រជែងយកកៅអីរបស់ពួកគេក្នុងក្របខ័ណ្ឌ Champions League នៅរដូវកាលក្រោយ។

អតីតក្រុមម្ចាស់ជើងឯករបស់លោក Antonio Conte បានកាត់បន្ថយពិន្ទុដេញតាមពីក្រោយក្រុមឈរលេខ4 Tottenham មកនៅត្រឹម 5ពិន្ទុ ខណៈដែលនៅសល់ការប្រកួត 4លើកទៀតនៅរដូវកាលនេះ។ គ្រាប់បាល់របស់ Moses បានជួយឱ្យក្រុម Chelsea កត់ត្រាជ័យជម្នះក្នុងការប្រកួតក្របខ័ណ្ឌលីក 2លើកជាប់ៗគ្នាជាលើកទី1 ចាប់តាំងពីចុងខែធ្នូ និងបានធ្វើឱ្យពួកគេមានការជឿជាក់ដ៏ធំមួយ នៅមុនពេលការប្រកួត FA Cup វគ្គពាក់កណ្តាលផ្តាច់ព្រ័ត្រជាមួយនឹងក្រុម Southampton នៅថ្ងៃអាទិត្យនេះ។ Chelsea បានរកគ្រាប់បាល់នាំមុខមុនតាមរយៈការធ្វើឱ្យបាល់ចូលទីខ្លួនឯងរបស់ខ្សែការពារ Kevin Long មុននឹងកីឡាករ Ashley Barnes រកគ្រាប់បាល់តាមស្មើបានវិញ ខណៈដែលលោក Conte បាននិយាយទាំងខឹងសម្បាថា Moses បានរងនូវការប្រព្រឹត្តកំហុសថែមពីលើក្នុងពេលរកគ្រាប់បាល់នោះ។

ខ្សែប្រយុទ្ធ Alvaro Morata បានខ្ជះខ្ជាយឱកាសដ៏ល្អមួយក្នុងការរកគ្រាប់បាល់បញ្ចូលទី ហើយខ្សែប្រយុទ្ធអន្តរជាតិអេស្ប៉ាញរូបនេះ បានបញ្ចេញប្រតិកម្មយ៉ាងខឹងសម្បានៅពេលដែលរូបគេត្រូវបានដកចេញបន្ទាប់ពីនោះ។ លោក Conte បានផ្លាស់ប្តូរកីឡាករដល់ទៅ 7នាក់ ដើម្បីទុកជើងល្អៗសម្រាប់ប្រកួតជាមួយក្រុម Southampton ហើយ Eden Hazard, Andreas Christensen, Cesc Fabregas និង Willian សុទ្ធសឹងស្ថិតជាកីឡាករបម្រុង៕

ប្រភពពី៖ Mirror

April 20, 2018

តោខៀវ Chelsea ប្រកាសពីការបំពេញការផ្ទេរ Morata ក្នុងកិច្ចសន្យា 5ឆ្នាំ

ក្លិបតោខៀវ Chelsea បានប្រកាសពីការចុះហត្ថលេខាជាមួយនឹងខ្សែប្រយុទ្ធ Alvaro Morata ពីក្លិប Real Madrid ក្នុងកិច្ចសន្យារយៈពេល5ឆ្នាំ។ ខ្សែប្រយុទ្ធអន្តរជាតិអេស្ប៉ាញរូបនេះ គឺជាកីឡាករចំណូលថ្មីទី3របស់ Chelsea នៅរដូវក្តៅនេះ ក្រោយពីការផ្ទេររបស់ខ្សែការពារ Antonio Rudiger មកពីក្លិប Roma និងខ្សែបម្រើ Tiemoue Bakayoko មកពីក្លិប Monaco ហើយ Morata ត្រូវបានគេជឿជាក់ថា មានតម្លៃខ្លួន58លានផោន (ស្មើនឹង 75លានដុល្លារអាមេរិក)។ Morata វ័យ24ឆ្នាំ បានឲ្យដឹងថា៖ «ខ្ញុំពិតជារីករាយណាស់ក្នុងការមកទីនេះ។ វាជាការរំជួលចិត្តដ៏មិនគួរឲ្យជឿ ក្នុងការក្លាយជាសមាជិករបស់ក្លិបដ៏ធំមួយនេះ។

ខ្ញុំកំពុងតែសម្លឹងឆ្ពោះទៅកាន់ការធ្វើការងារដ៏លំបាក និងស៊ុតបាល់បញ្ចូលទីឲ្យបានច្រើនតាមដែលខ្ញុំអាច និងឈ្នះពានឲ្យបានច្រើនតាមដែលអាចធ្វើបាន។ Morata ត្រូវបានរំពឹងទុកថា នឹងត្រូវចូលជំនួសកន្លែងមិត្តរួមជាតិរបស់គេគឺ Diego Costa ដែលត្រូវបានប្រាប់ដោយលោកគ្រូបង្វឹក Antonio Conte ថា អនាគត រូបគេមិនមានវត្តមាននៅក្លិប Chelsea ឡើយ។ Costa ត្រូវបានរំពឹងទុកថា នឹងទៅចូលរួមជាមួយនឹងក្លិប Atletico Madrid វិញ ក្រោយពីបានផ្ទេរទៅកាន់ក្លិប Chelsea កាលពីខែកក្កដា ឆ្នាំ2014 ក្នុងតម្លៃខ្លួន32លានផោន។

លោក Michael Emenalo ប្រធានក្លិប Chelsea បាននិយាយថា Morata អាចបង្កើតឲ្យមានឥទ្ធិពលដ៏ធំទាំងក្នុងការប្រកួតលីកក្នុងស្រុក និងក្របខ័ណ្ឌ Champions League។ លោក Emenalo បានឲ្យដឹងថា៖ «យើងពិតជារីករាយណាស់ក្នុងការបំពេញការចុះហត្ថលេខា Alvaro និងសូមស្វាគមន៍រូបគេមកកាន់ក្លិបនេះ។ យើងជឿជាក់ថា រូបគេនឹងបង្កើតភាពអស្ចារ្យសម្រាប់ Chelsea»៕
ប្រភពពី៖ The Guardian

July 22, 2017

Man City និង Chelsea កំពុងប្រជែងគ្នាទិញ Danilo ពី Real

ក្លិបយក្សអង់គ្លេស Manchester City និង Chelsea កំពុងតែប្រជែងគ្នាទិញយកខ្សែការពារអន្តរជាតិស្លាបស្តាំ Danilo ពីក្លិប Real Madrid ក្នុងតម្លៃខ្លួន26លានផោន (ស្មើនឹង34លានដុល្លារអាមេរិក)។ លោក Pep Guardiola អ្នកចាត់ការទូទៅរបស់ Man City ចាត់ទុក Danilo ជាកីឡាករដែលអាចលេងបានទាំងក្នុងតំបន់ការពារស្លាប និងតំបន់បម្រើ ស្របពេលដែលគ្រូបង្វឹករបស់ក្លិបតោខៀវ Chelsea លោក Antonio Conte ចង់ពង្រឹងតំបន់ការពារក្នុងក្រុមរបស់លោក។ ប៉ុន្តែ លោក Conte នឹងមិនចុះហត្ថលេខាជាមួយនឹងខ្សែប្រយុទ្ធ Sergio Aguero របស់ក្លិប Man City ឡើយ។ នេះបើយោងទៅតាមការបញ្ជាក់របស់លោក Guardiola។ គ្រូបង្វឹកសញ្ជាតិអេស្ប៉ាញរូបនេះបានឲ្យដឹងថា៖ «រូបគេជាកីឡាកររបស់យើង ហើយរូបគេនឹងនៅតែបន្តនៅទីនេះ»។

លោក Conte ពិតជាចង់ចុះហត្ថលេខាជាមួយនឹងខ្សែប្រយុទ្ធរូបនេះ ដើម្បីជំនួសខ្សែប្រយុទ្ធអេស្ប៉ាញ ដែលធ្លាក់ចេញពីការចាប់អារម្មណ៍គឺ Diego Costa។ Danilo វ័យ26ឆ្នាំ បានចូលរួមជាមួយនឹងក្លិប Real Madrid ក្រោយពីចាកចេញពីក្លិប Porto កាលពីឆ្នាំ2015 ប៉ុន្តែ រូបគេបានក្លាយជាខ្សែការពារស្លាបស្តាំជម្រើសទី2របស់ក្លិបអេស្ប៉ាញមួយនេះ ក្នុងការប្រកួតភាគច្រើនកាលពីរដូវកាលមុន។
រូបគេបានចូលលេងក្នុងជម្រើសទាំង11នាក់ដំបូងនៃក្របខ័ណ្ឌ La Liga ចំនួន17ប្រកួតសម្រាប់ក្រុម Real Madrid ខណៈដែលកីឡាករ Dani Carvajal ត្រូវបានប្រើប្រាស់ច្រើនជាងសម្រាប់ការប្រកួតធំៗភាគច្រើន ក្នុងនោះរាប់បញ្ចូលទាំងការប្រកួតក្របខ័ណ្ឌ Champions League វគ្គផ្តាច់ព្រ័ត្រទៀតផង។

Man City ដែលបានបញ្ចប់ក្នុងចំណាត់ថ្នាក់លេខ3នៃក្របខ័ណ្ឌ Premier League កាលពីរដូវកាលមុននោះ បានចុះហត្ថលេខាជាមួយនឹងកីឡាករថ្មី4នាក់រួចជាស្រេច ដែលរួមមានអ្នកចាំទី Ederson Moraes ខ្សែការពារស្លាបស្តាំ Kyle Walker ខ្សែបម្រើស្លាប Bernardo Silva និងខ្សែបម្រើ Douglas Luiz៕
ប្រភពពី៖ BBC

July 20, 2017

Tag: Chelsea