Tag: Champions League

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?
(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។
លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។
ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។
ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។
បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។
តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស
យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕
May 30, 2023
បណ្ដាក្លឹបបាល់ទាត់នៅអ៊ីតាលី ឡើងដល់វគ្គផ្ដាច់ព្រ័ត្រនៃពានរង្វាន់ធំៗទាំងបីនៅទ្វីបអឺរ៉ុប
ក្លឹបបាល់ទាត់នានាដែលជាតំណាងរបស់ប្រទេសអ៊ីតាលី បានឡើងដល់វគ្គផ្ដាច់ព្រ័ត្រនៃពានរង្វាន់ Champions League, Europa League និង Conference League នៅរដូវកាលនេះ។
នៅឯ Champions League ក្លឹប Inter Milan បានផ្ដួលក្លឹបរួមស្រុក A.C. Milan 3-0 នៅវគ្គពាក់កណ្ដាលផ្ដាច់ព្រ័ត្រ។ នៅថ្ងៃទី 10 មិថុនាខាងមុខ Inter Milan នឹងប៉ះជាមួយ Man City ក្នុងវគ្គផ្ដាច់ព្រ័ត្រ ដែលធ្វើឡើងនៅទីក្រុងអ៊ីស្តង់ប៊ុល ប្រទេសតួកគី។
នៅឯពានរង្វាន់ Europa League ក្លឹប Roma បានឈ្នះ Leverkusen ដោយលទ្ធផល 1-0 នៅវគ្គពាក់កណ្ដាលផ្ដាច់ព្រ័ត្រ។ ក្នុងវគ្គផ្ដាច់ព្រ័ត្រ កូនសិស្ស និងគ្រូបង្វឹក Jose Mourinho នឹងប៉ះក្លឹប Sevilla នៅថ្ងៃទី 31 ឧសភា នៅប៊ុយដាប៉ែស ប្រទេសហុងគ្រី។
តំណាងទីបីរបស់អ៊ីតាលី គឺ Fiorentina នឹងត្រូវប្រកួតជាមួយក្លឹប West Ham ក្នុងវគ្គផ្ដាច់ព្រ័ត្ររបស់ពានរង្វាន់ Conference League នាថ្ងៃទី 07 មិថុនា នៅរដ្ឋធានីប្រាក ប្រទេសឆែក។ នៅវគ្គពាក់កណ្ដាលផ្ដាច់ព្រ័ត្រ Fiorentina បានផ្ដួល Basel ដោយលទ្ធផល 4-3។
បើសិនជា Roma, Inter និង Fiorentina សុទ្ធតែដណ្ដើមបានជ័យជម្នះ នោះបាល់ទាត់អ៊ីតាលីនឹងមាន hat-trick ទីពីរ បន្ទាប់ពី hat-trick ដំបូងត្រូវបានបង្កើតឡើងចន្លោះពីឆ្នាំ 1989 ដល់ 1990 ដោយក្លឹប AC Milan ដណ្ដើមបានពាន Champions League, Sampdoria ដណ្ដើមបានពាន Europa League និង Juventus ដណ្ដើមបានពាន UEFA Cup។ នោះក៏ជារដូវកាលតែមួយគត់ដែលបណ្ដាក្លឹបរបស់ប្រទេសមួយដណ្ដើមបានពានរង្វាន់ទាំងបីនៅទ្វីបអឺរ៉ុប៕
May 19, 2023
Wolves ប្រកាសពីការនាំយក Neves ខណៈ Huddersfield បំពញការផ្ទេរ Mounie
ក្លិប Wolves នឹងត្រូវបំពេញការចុះហត្ថលេខាជាមួយនឹងខ្សែបម្រើអន្តរជាតិព័រទុយហ្គាល់ Ruben Neves ពីក្លិប Porto ក្នុងតម្លៃខ្លួនជាកំណត់ត្រារបស់ក្លិបគឺ15.8លានផោន (ស្មើនឹង20.5លានដុល្លារអាមេរិក)។ នេះបើយោងទៅតាមការប្រកាសរបស់លោក Nuno ដែលជាអ្នកចាត់ការទូទៅ។
Neves ដែលបានក្លាយជាប្រធានក្រុមដ៏វ័យក្មេងបំផុតក្នុងប្រវត្តិសាស្ត្រនៃក្របខ័ណ្ឌ Champions League នៅពេលដែលរូបគេស្ថិតក្នុងក្លិបរបស់គេក្នុងវ័យ18ឆ្នាំកាលពីខែតុលា ឆ្នាំ2015 ពេលដែលរូបគេបានលេងឲ្យលោក Nuno ក្នុងពេលគ្រូបង្វឹករូបនេះដឹកនាំនៅ Porto កាលពីរដូវកាលមុន។ Neves ត្រូវបានគេជឿជាក់ថា បានយល់ព្រមទៅលើលក្ខខណ្ឌផ្ទាល់ខ្លួនរួចជាស្រេចហើយ។ ស្ថិតក្នុងវ័យ20ឆ្នាំ Neves បានបង្ហាញខ្លួនជាអន្តរជាតិ20លើក និងជាសមាជិកនៃក្រុមបាល់ទាត់ជម្រើសជាតិព័រទុយហ្គាល់ដែលបានធ្លាក់ចេញត្រឹមវគ្គចែកពូលនៃយុទ្ធនាការ European Under-21 Championship ក្នុងប្រទេសប៉ូឡូញកាលខែមុន។
ក្លិប Wolves ក៏នឹងត្រូវចុះហត្ថលេខាមួយទៀតជាមួយនឹងខ្សែការពារកណ្តាលអន្តរជាតិបារាំង Willy Boly របស់ Porto ក្នុងលក្ខខណ្ឌខ្ចីជើងពេញមួយរដូវកាលផងដែរ ជាមួយនឹងជម្រើសក្នុងការទិញយកដាច់ ក្រោយពីពួកគេបានទិញកីឡាករថ្មី4នាក់ដែលរួមមាន Roderick Miranda, Barry Douglas, Ryan Bennett និង Phil Ofosu-Ayeh រួចមក និងក្រោយពីលោក Nuno ត្រូវបានតែងតាំងជាគ្រូបង្វឹកកាលពីចុងខែឧសភា។
ស្របពេលជាមួយគ្នានេះដែរ ក្លិប Huddersfield Town បានចុះហត្ថលេខាជាមួយនឹងខ្សែប្រយុទ្ធអន្តរជាតិបេនីន Steve Mounie ពីក្លិប Montpellier។ តម្លៃខ្លួននៃការផ្ទេរនេះមិនត្រូវបានប្រកាសឲ្យដឹងឡើយ ប៉ុន្តែវាត្រូវបានគេប៉ាន់ប្រមាណថា ការផ្ទេរនេះមានតម្លៃខ្លួនប្រហែលជា11.5លានផោន៕
ប្រភពពី៖ The Guardian
July 7, 2017
Real ទទួលការស្វាគមន៍ពីអ្នកគាំទ្រដ៏ច្រើនកុះករ ក្នុងក្បួនដង្ហែការឈ្នះពាន Champions League
អ្នកគាំទ្ររាប់ពាន់នាក់របស់ក្លិប Real Madrid បានប្រមូលផ្តុំគ្នានៅតាមដងវិថីនានានៃរដ្ឋធានីអេស្ប៉ាញ ដើម្បីរង់ចាំទទួលវីរបុរសរបស់ពួកគេគឺ Cristiano Ronaldo និងមិត្តរួមក្រុមរបស់គេកាលពីថ្ងៃអាទិត្យ ខណៈដែលពួកគេបានដង្ហែការឈ្នះពានក្របខ័ណ្ឌ Champions League ជាលើកទី១២។
Ronaldo បានលេងម៉ូតសក់ថ្មីរបស់ខ្លួន ហើយរូបគេ និងប្រធានក្រុម Sergio Ramos បានដឹកនាំកម្មវិធីហែក្បួនជាប្រពៃណីដើម្បីអបអរដល់ក្លិប Real ខណៈដែលកីឡាករទាំងអស់បានទទួលការស្វាគមន៍ពីសំណាក់ប្រធានប្រតិភូរបស់រដ្ឋាភិបាល នៅមុនពេលចាប់ផ្តើមធ្វើពិធីហែក្បួននៃការឈ្នះពានកំពូលអឺរ៉ុបនេះ នៅលើរថយន្តក្រុងដែលគ្មានដំបូលមួយគ្រឿងជុំវិញតំបន់ Cibeles នៃទីក្រុង Madrid។ រថយន្តក្រុងរបស់ Real បានធ្វើដំណើរឆ្ពោះទៅកាន់កីឡដ្ឋាន Santiago Bernabeu របស់ក្លិបនេះ ខណៈដែលអ្នកគាំទ្រប្រមាណជា៨១០០០នាក់កំពុងតែរង់ចាំទទួលពួកគេនៅកីឡដ្ឋាននោះ ដើម្បីធ្វើការអបអរ ក្នុងនោះរាប់បញ្ចូលទាំងការបង្ហាញពីភ្លើងពណ៌ និងការបាញ់កាំជ្រួចផងដែរ។ ការរឹតបន្តឹងផ្នែកសន្តិសុខត្រូវបានធ្វើឡើងក្នុងទីក្រុងនេះ ក្រោយពីមានការវាយប្រហារបែបភេរវកម្មកាលពីពេលថ្មីៗនេះក្នុងទីក្រុងឡុងដ៍ និងទីក្រុង Manchester។
Ronaldo បានស៊ុតបាល់បញ្ចូលទី២គ្រាប់ក្នុងពេលដែលក្រុម Real Madrid ដណ្តើមបានជ័យជម្នះក្នុងលទ្ធផល ៤-១ លើក្រុម Juventus ក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff កាលពីថ្ងៃសៅរ៍ ខណៈដែលក្រុមយក្សរបស់អេស្ប៉ាញមួយនេះ បានក្លាយជាក្រុមដំបូងគេក្នុងការការពារពាន Champions League យ៉ាងជោគជ័យ។ លោក Florentino Perez ប្រធានក្លិប Real Madrid ដែលបានផ្តល់ការកោតសរសើរយ៉ាងពិសេសដល់លោក Zinedine Zidane នោះបានឲ្យដឹងថា៖ «កីឡាករទាំងអស់បានចូលក្នុងដំណាក់កាលដ៏អស្ចារ្យបំផុតរបស់ Real Madrid និងកីឡាបាល់ទាត់ ហើយគ្រូបង្វឹករបស់យើងក៏មានភាពអស្ចារ្យផងដែរ»៕

ប្រភពពី៖ Daily Star
June 5, 2017
Zidane ៖ Ronaldo នឹងជួយឲ្យ Real លើកពាន Champions League ពេលប៉ះ Juventus រាត្រីនេះ
លោក Zinedine Zidane ជឿជាក់ថា ភាពជាអ្នកដឹកនាំរបស់ខ្សែប្រយុទ្ធដ៏មានឥទ្ធិពល Cristiano Ronaldo នឹងក្លាយជាកត្តាកាត់សេចក្តីដ៏សំខាន់ នៅពេលដែលក្រុម Real Madrid ចូលឆ្ពោះទៅរកការប្រកួតប្រវត្តិសាស្ត្រក្នុងវគ្គផ្តាច់ព្រ័ត្រនៃក្របខ័ណ្ឌ Champions League ជាមួយនឹងក្រុម Juventus នៅរាត្រីនេះ។
Ronaldo នឹងស្ថិតក្នុងការចាប់អារម្មណ៍ ខណៈដែលក្រុមរបស់លោក Zidane នឹងខិតខំព្យាយាមធ្វើឲ្យក្លិបរបស់លោកក្លាយជាក្លិបដំបូងគេក្នុងការឈ្នះពានក្របខ័ណ្ឌកំពូលអឺរ៉ុប២លើកជាប់ៗគ្នា ចាប់តាំងពីក្លិប AC Milan ធ្លាប់ធ្វើបានសម្រេចកាលពី២៧ឆ្នាំមុនម្តងរួចមកហើយ។ បើទោះបីមនុស្សជាច្រើនបានរិះគន់ទៅលើ Ronaldo សម្រាប់ការបង្ហាញពីទម្រង់លេងដែលគ្មានភាពរស់រវើក ក្នុងពេលដែល Real ឈ្នះលើការប្រកួតក្របខ័ណ្ឌ Champions League វគ្គផ្តាច់ព្រ័ត្រលើក្រុម Atletico Madrid ក៏ដោយ ប៉ុន្តែ រូបគេនៅតែបានស៊ុតបាល់ប៉េណាល់ទីចូលទីយ៉ាងល្អក្នុងការប្រកួតកាលពីឆ្នាំមុន ហើយក៏បានស៊ុតបាល់បញ្ចូលទីក្នុងការប្រកួតវគ្គផ្តាច់ព្រ័ត្រកាលពីឆ្នាំ២០១៤ផងដែរ។ Ronaldo បានស្ថិតក្នុងទម្រង់លេងយ៉ាងមុតស្រួចម្តងទៀតក្នុងរដូវកាលនេះ ដោយរូបគេបានបំពេញការរកបាន៤០០គ្រាប់សម្រាប់ក្រុម Real ខណៈដែលក្រុមរបស់គេបានឈ្នះពានក្របខ័ណ្ឌកំពូលរបស់អេស្ប៉ាញជាលើកទី១ក្នុងរយៈពេល៥ឆ្នាំ។ លោក Zidane ជឿជាក់ថា សុច្ឆន្ទៈនៃការស្រេកឃ្លានជ័យជម្នះរបស់ខ្សែប្រយុទ្ធអន្តរជាតិព័រទុយហ្គាល់វ័យ៣២ឆ្នាំរូបនេះ នឹងក្លាយជាកូនសោសំខាន់ក្នុងការជួយឲ្យក្រុម Real ទទួលជោគជ័យ ពីព្រោះរូបគេមានកម្រិតស្តង់ដារលេងដែលមិត្តរួមក្រុមរបស់គេជឿជាក់ថា នឹងក្លាយជាជំនួយដ៏ធំសម្រាប់ក្រុម។
លោក Zidane បានប្រាប់សន្និសីទសារព័ត៌មាននៅឯកីឡដ្ឋាន Principality ក្នុងទីក្រុង Cardiff កាលពីថ្ងៃសុក្រ ថា៖ « Ronaldo ជាមនុស្សល្អ រូបគេព្រួយបារម្ភពីអ្នកដទៃ ហើយអ្វីដែលសំខាន់នោះគឺថា រូបគេមានភាពជាកីឡាករអាជីព។ រូបគេកើតមកគឺដើម្បីធ្វើជាមេដឹកនាំ ជាពិសេសនៅលើទីលានតែម្តង។ អ្វីដែលសំខាន់បំផុតនោះគឺថា រូបគេចង់បានជ័យជម្នះ»។
ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺយប់នេះ៕

June 3, 2017
Juventus ជឿជាក់ខ្ពស់ មុនពេលប៉ះ Real ក្នុង Champions League វគ្គផ្តាច់ព្រ័ត្រ

លោក Massimiliano Allegri ជឿជាក់ថា ក្រុមសេះបង្កង់ Juventus គ្មានអ្វីត្រូវខ្លាចឡើយនៅពេលប្រកួតជាមួយនឹងក្រុម Real Madrid ក្នុងក្របខ័ណ្ឌ Champions League វគ្គផ្តាច់ព្រ័ត្រ នៅថ្ងៃសៅរ៍ខាងមុខនេះ ហើយថា វាមានចំណុចវិជ្ជមានជាច្រើនជុំវិញក្លិបនេះខ្លាំងជាងពេលដែលលោកបានមកចូលរួមជាមួយនឹងក្លិបនេះជាលើកដំបូងកាលពីឆ្នាំ២០១៤ទៅទៀត។ មិនមានក្រុមណាដែលរងបរាជ័យច្រើនជាងគេក្នុងការប្រកួតវគ្គផ្តាច់ព្រ័ត្រនៃយុទ្ធនាការកំពូលរបស់អឺរ៉ុប ដូចក្រុម Juventus ឡើយ ប៉ុន្តែប្រសិនបើអ្វីៗមានភាពវិជ្ជមានខ្លាំងដូចការលើករបស់អ្នកចាត់ការទូទៅរូបនេះថាមែន នោះលោកនឹងអាចបំពេញការងារយ៉ាងល្អឥតខ្ចោះក្នុងការប្រកួតវគ្គផ្តាច់ព្រ័ត្រ ក្នុងទីក្រុង Cardiff មិនខាន។
គ្រូបង្វឹករូបនេះបានឲ្យដឹងថា៖ «វាពិតជាការប្រកួតដ៏សំខាន់មួយ ប៉ុន្តែយើងចាំបាច់ត្រូវតែធ្វើឲ្យបានល្អដូចដែលយើងធ្លាប់បានធ្វើនាពេលកន្លងមក។ ភាពវិជ្ជមានបង្កើតឲ្យមានភាពវិជ្ជមាន អវិជ្ជមានបង្កើតឲ្យមានអវិជ្ជមាន។ នៅពេលដែលខ្ញុំបានមកដល់ក្លិបនេះ ការញៀននៃភាពអវិជ្ជមានស្ថិតនៅជុំវិញក្លិបនេះ»។ ដើម្បីបង្ហាញថា ការលើកឡើងនេះមានភាពពិតប្រាកដ លោក Allegri បានបង្ហាញពីប្រវត្តិរបស់ក្លិបនេះក្នុងក្របខ័ណ្ឌ European Cup ដែលកំពុងតែត្រូវបានគេលើកយកមកពិភាក្សាជាសាមញ្ញ។ គ្រូបង្វឹករូបនេះបានបញ្ជាក់ថា៖ «Juventus បានលេងការប្រកួតវគ្គផ្តាច់ព្រ័ត្រ ដល់ទៅ៨លើក ពួកគេមិនបានរងបរាជ័យ៦លើកក្នុងចំណោម៨លើកនោះដូចដែលមនុស្សជាច្រើនបាននិយាយឡើយ។ ការឈានទៅដល់វគ្គផ្តាច់ព្រ័ត្រ គឺជាសមិទ្ធផលដ៏សំខាន់ណាស់ទៅហើយ។ វាមានការប្រកួតក្របខ័ណ្ឌ Champions League វគ្គផ្តាច់ព្រ័ត្រ តែ១គត់ក្នុងពិភពលោក ហើយយើងកំពុងស្ថិតក្នុងវគ្គនោះ»។
ក្នុងដំណើរឆ្ពោះទៅកាន់វគ្គផ្តាច់ព្រ័ត្រនេះ Juventus បានទម្លាក់ក្រុម Barcelona ក្នុងវគ្គ៨ក្រុមចុងក្រោយ ដោយមិនបណ្តោយឲ្យមានគ្រាប់បាល់ចូលទីរបស់ខ្លួនសូម្បីតែមួយគ្រាប់ មុននឹងពួកគេផ្តួលក្រុម Monaco ក្នុងវគ្គពាក់កណ្តាលផ្តាច់ព្រ័ត្រ។ ដោយឡែក ក្រុម Real Madrid បានទម្លាក់ក្រុម Bayern Munich ក្នុងវគ្គ៨ក្រុមចុងក្រោយ មុននឹងយកឈ្នះលើក្រុម Atletico Madrid ក្នុងវគ្គ១/២ផ្តាច់ព្រ័ត្រ៕
ប្រភពពី៖ The Guardian
June 1, 2017
Ramsey ជួយឲ្យលោក Wenger លើកពាន FA Cup ជាលើកទី៧
ខ្សែបម្រើអន្តរជាតិវេលស៍ Aaron Ramsey បានរកគ្រាប់បាល់ឈ្នះនៅនាទីទី៧៩ ដើម្បីជួយឲ្យក្រុមកាំភ្លើងធំ Arsenal កត់ត្រាជ័យជម្នះដ៏មិននឹកស្មានដល់ក្នុងលទ្ធផល ២-១ លើក្រុម Chelsea កាលពីថ្ងៃសៅរ៍ និងបានជួយឲ្យគ្រូបង្វឹកកំពុងស្ថិតក្រោមការរិះគន់លោក Arsene Wenger ឈ្នះពាន FA Cup ជាលើកទី៧។
លោក Wenger បានរងនូវការស្រែកចំអកឲ្យខ្លាំងក្លាពីសំណាក់អ្នកគាំទ្ររបស់ខ្លួន និងបានខកខានក្នុងការឈ្នះកៅអីទៅប្រកួតក្នុងក្របខ័ណ្ឌ Champions League ជាលើកទី១ក្នុងរយៈពេល២០ឆ្នាំ ប៉ុន្តែ លោកបានបញ្ចប់រដូវកាលនេះ តាមរយៈការឡើងឈរពីលើលោកគ្រូបង្វឹក George Ramsey របស់ Aston Villa ក្នុងនាមជាអ្នកចាត់ការទូទៅជោគជ័យបំផុតក្នុងពាន FA Cup។
គ្រាប់បាល់បើកឆាករបស់ខ្សែប្រយុទ្ធ Alexis Sanchez សម្រាប់ក្រុម Arsenal ដែលត្រូវបានគេមើលឃើញថា ជាការធ្វើឲ្យបាល់ប៉ះដៃយ៉ាងពិតប្រាកដនោះ ត្រូវបានតាមស្មើដោយខ្សែប្រយុទ្ធ Diego Costa នៅមុនពេល Ramsey រកគ្រាប់បាល់វាយបកភ្លាមៗតាមរយៈការរកគ្រាប់បាល់ឈ្នះជាលើកទី២របស់គេក្នុងពាន FA Cup។ លោក Wenger បានឲ្យដឹងថា៖ «ក្រុមនេះបានជួបការខកចិត្ត តែពួកគេមានសាមគ្គីភាព និងបានឆ្លើយតបយ៉ាងល្អ។ ពួកគេបានបង្ហាញពីភាពខ្លាំង និងសាមគ្គីភាព និងបានលេងយ៉ាងល្អនៅថ្ងៃនេះ។ ខ្ញុំពិតជាមានមោទនភាពក្នុងការឈ្នះពាននេះ៧លើក»៕
ប្រភពពី៖ ESPN
May 28, 2017
Pogba និង Mkhitaryan ជួយឲ្យ Man United ផ្តួល Ajax ដើម្បីឈ្នះពាន Europa League
ក្រុមបិសាចក្រហម Manchester United នឹងវិលទៅកាន់ក្របខ័ណ្ឌកំពូលអឺរ៉ុបវិញនៅរដូវកាលក្រោយ បន្ទាប់ពីបានផ្តួលក្រុម Ajax Amsterdam របស់ហូឡង់ ក្នុងលទ្ធផល ២-០ ដើម្បីឈ្នះពាន Europa League កាលពីថ្ងៃពុធ។
ខ្សែបម្រើដ៏មានឥទ្ធិពល Paul Pogba បានរកគ្រាប់បាល់បើកឆាកយ៉ាងល្អ មុនពេលខ្សែបម្រើ Henrikh Mkhitaryan បានស៊ុតបាល់បកថយក្រោយដើម្បីជួយឲ្យក្រុមខ្លួនទទួលជ័យជម្នះក្នុងការប្រកួតវគ្គផ្តាច់ព្រ័ត្រ ក៏ដូចជាឈ្នះកៅអីទៅលេងក្នុងក្របខ័ណ្ឌ Champions League ដែរ។ ក្រោយពីបានបញ្ចប់ក្នុងចំណាត់ថ្នាក់លេខ៦ នៅលើតារាងនៃក្របខ័ណ្ឌ Premier League លោក Jose Mourinho បានឱ្យដឹងថា ការទទួលជ័យជម្នះនេះនឹងក្លាយជាមធ្យោបាយតែមួយគត់សម្រាប់ឱ្យក្រុមរបស់លោកឈានទៅប្រកួតក្នុងក្របខ័ណ្ឌកំពូលរបស់អឺរ៉ុប នារដូវកាលក្រោយ។
ក្រោយពីបានធ្វើការស្មឹងស្មាធិ៍រយៈពេល១នាទីនៅមុនពេលការប្រកួតចាប់ផ្តើមដើម្បីរំឭកដល់វិញ្ញាណក្ខន្ធរបស់ជនរងគ្រោះក្នុងការវាយប្រហារភេរវកម្មនៅទីក្រុង Manchester រួចមក ខ្សែបម្រើ Pogba បានតបស្នងចំពោះការផ្ទេរមកក្នុងតម្លៃខ្លួនជាកំណត់ត្រាពិភពលោករបស់គេ ដោយបានស៊ុតបាល់បំប៉ោងសំណាញ់ទីនៅនាទីទី១៨។ Man United បានរក្សាការនាំមុខរបស់ខ្លួនរហូតដល់បញ្ចប់ការប្រកួតតង់ទី១ មុនពេល Mkhitaryan បានបន្ថែមការនាំមុខរបស់ក្រុមខ្លួនភ្លាមៗ ក្រោយពីលេងបានត្រឹមតែប៉ុន្មាននាទីនៃតង់ទី២ ដើម្បីបំពេញការទទួលជ័យជម្នះយ៉ាងកក់ក្តៅសម្រាប់ក្រុមខ្លួនតែម្តង។ Pogba បានប្រាប់ទូរទស្សន៍ BT Sport ថា៖ «ទីបំផុត យើងធ្វើបានសម្រេចហើយ យើងពិតជាមានមោទនភាពណាស់ គ្មាននរណាអាចរិះគន់បានឡើយ។ ពួកគេបាននិយាយថា យើងបានជួបរដូវកាលដ៏អន់មួយ ប៉ុន្តែយើងបានឈ្នះពាន៣ ក្នុងនោះរាប់បញ្ចូលទាំងពាន Community Shield ផងដែរ»។
ខ្សែបម្រើអន្តរជាតិបារាំងរូបនេះបានបន្ថែមទៀតថា៖ «ការចាប់ផ្តើមពិតជាសំខាន់ណាស់ ហើយក្រោយពីគ្រាប់បាល់ជោគជ័យទាំង២គ្រាប់នោះ យើងបានគ្រប់គ្រងការប្រកួតនេះទាំងស្រុង។ គ្រប់គ្នាក្នុងក្រុមនេះបានបង្ហាញពីទម្រង់លេងយ៉ាងល្អ»៕
ប្រភពពី៖ The Sun
May 25, 2017
Juventus ស្រេកឃ្លានក្នុងការលើកពាន ៣ ក្រោយពីឈ្នះពាន Serie A
ក្រុមសេះបង្កង់ Juventus បានឈ្នះពានក្របខ័ណ្ឌអ៊ីតាលី Serie A ជាលើកទី៦ជាប់ៗគ្នារបស់ពួកគេ ក្រោយពីបានផ្តួលក្រុម Crotone ក្នុងលទ្ធផល ៣-០ កាលពីយប់ថ្ងៃអាទិត្យម្សិលមិញ ដើម្បីធ្វើឲ្យពួកគេស្ថិតនៅលើដំណើរផ្លូវឆ្ពោះទៅកាន់ការឈ្នះពាន ៣ ក្នុងរដូវកាលតែមួយ ក្រោយពីបានឈ្នះពាន ២ រួចជាស្រេចហើយនៅរដូវកាលនេះ។
គ្រាប់បាល់ស៊ុតបញ្ចូលទីពីសំណាក់ខ្សែប្រយុទ្ធ Mario Mandzukic, Paulo Dybala និង Alex Sandro បានជួយឲ្យក្រុមរបស់គេឈ្នះពានរង្វាន់លីកមួយផ្សេងទៀត ដើម្បីបន្ថែមទៅលើពាន Coppa Italia ឬ Italian Cup របស់ពួកគេ នៅមុនពេលឈានទៅកាន់ការប្រកួតក្របខ័ណ្ឌ Champions League វគ្គផ្តាច់ព្រ័ត្រជាមួយនឹងក្រុម Real Madrid ក្នុងទីក្រុង Cardiff នាថ្ងៃទី៣ ខែមិថុនា ខាងមុខនេះ។
លោក Massimiliano Allegri បានឲ្យដឹងថា៖ «នៅរដូវកាលនេះ វាមានភាពខុសគ្នាទៅនឹងរដូវកាលមុន។ ពេលនេះយើងមានក្តីសុបិនក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ដែលអ្នកមិនមានឱកាសបានលេងជារៀងរាល់ឆ្នាំឡើយ»។ គ្រូបង្វឹករូបនេះបានបន្ថែមទៀតថា៖ វាជាការបង្ហាញខ្លួនក្នុងវគ្គផ្តាច់ព្រ័ត្រជាលើកទី២របស់យើងក្នុងរយៈពេល៣ឆ្នាំ ហេតុនេះយើងត្រូវតែអបអរដល់គ្រប់គ្នាក្នុងក្លឹបនេះ។ ខ្ញុំពិតជារីករាយណាស់ក្នុងការធ្វើជាគ្រូបង្វឹកនៅទីនេះ ហើយក្នុងពេលឆាប់ៗនេះ យើងនឹងធ្វើការពិភាក្សាទៅលើផែនការផ្សេងៗទៀត ប៉ុន្តែនៅពេលនេះ រឿងដ៏សំខាន់បំផុតនោះគឺថា យើងត្រូវតែលេង និងយកឈ្នះក្នុងវគ្គផ្តាច់ព្រ័ត្រក្នុងទីក្រុង Cardiff ឱ្យបាន ពេលជួបជាមួយនឹងក្រុម Real Madrid៕
May 22, 2017
លោក Wenger រិះគន់ ខណៈ Liverpool និង Man City ឈ្នះកៅអី Champions League
លោក Arsene Wenger គ្រូបង្វឹកនៃក្រុម Arsenal បានធ្វើការរិះគន់ទៅលើភាពមិនច្បាស់លាស់អំពីអនាគតរបស់លោកដែលធ្វើឲ្យកីឡាកររបស់លោកមិនមានការរីករាយ ខណៈដែលក្រុម Manchester City និង Liverpool បានបន្ថែមភាពវេទនាដល់ក្រុមកាំភ្លើងធំមួយនេះ តាមរយៈការដណ្តើមយកកៅអីដែលនៅសល់ក្នុងក្របខ័ណ្ឌ Champions League រៀងៗខ្លួនកាលពីថ្ងៃអាទិត្យ។
គ្រូបង្វឹកនៃក្រុម Arsenal រូបនេះ បានផ្ទុះការរិះគន់ភ្លាមៗ ក្រោយពីក្រុមរបស់លោកបានខកខានក្នុងការឈ្នះកៅអីទៅប្រកួតក្នុងក្របខ័ណ្ឌ Champions League ជាលើកទី១ក្នុងរយៈពេល២០ឆ្នាំ បើទោះបីដណ្តើមបានជ័យជម្នះ ៣-១ លើក្រុម Everton ក៏ដោយ។ លោក Wenger បានជួបការខកចិត្តដ៏ធំ នៅមុនពេលត្រូវដឹកនាំក្រុមរបស់លោកទៅប្រកួតជាមួយនឹងក្រុម Chelsea ក្នុងការប្រកួតពាន FA Cup វគ្គផ្តាច់ព្រ័ត្រ នៅថ្ងៃសៅរ៍ សប្តាហ៍ក្រោយ។ លោក Wenger បានឲ្យដឹងថា៖ «វាពិតជារឿងដ៏គួរឱ្យខកចិត្តណាស់ ពីព្រោះរយៈពេល២០ឆ្នាំចុងក្រោយនេះ យើងបានលេងក្នុង Champions League រាល់លើក ហើយនេះជាឆ្នាំទីមួយហើយដែលយើងមិនបានស្ថិតក្នុងក្របខ័ណ្ឌនេះ»។
គ្រូបង្វឹកសញ្ជាតិបារាំងរូបនេះបានបន្ថែមទៀតថា៖ «ចាប់តាំងពីខែមករាមក យើងបានលេងក្នុងស្ថានភាពដ៏លំបាកមួយ។ វាពិតជាលំបាកណាស់សម្រាប់ក្រុមកីឡាករក្នុងការដោះស្រាយជាមួយនឹងបញ្ហាចិត្តវិទ្យា ហេតុនេះស្ថានភាពសម្រាប់កីឡាករគឺថា ពួកគេមិនមានភាពរីករាយឡើយ»។ ការទទួលជ័យជម្នះ ៣-០ របស់ក្រុមហង្សក្រហម Liverpool លើក្រុម Middlesbrough និងការទទួលជ័យជម្នះ ៥-០ របស់ក្រុម Manchester City លើក្រុម Watford បានរុញឲ្យក្រុម Arsenal ត្រូវធ្លាក់ទៅលេងក្នុងក្របខ័ណ្ឌលំដាប់ទី២របស់អឺរ៉ុប Europa League តែម្តង៕
ប្រភពពី៖ The Sun
May 22, 2017