Tag: BTS

Messi រកគ្រាប់បាល់បានលឿនបំផុតក្នុងអាជីព ពេលប៉ះអូស្ត្រាលីនៅប្រទេសចិន
(ប្រទេសចិន) – កំពូលតារាបាល់ទាត់ Lionel Mess បានបង្ហាញកំពូលថ្វីជើងរបស់ខ្លួននៅវិនាទីទី 79 ដែលបានជួយឱ្យក្រុមជម្រើសជាតិអាហ្សង់ទីនឈ្នះអូស្ត្រាលី 2-0 នៅក្នុងការប្រកួតមិត្តភាពនៅទីក្រុងប៉េកាំងប្រទេសចិន កាលពីព្រលប់ម្សិលមិញ។
គ្រាប់បាល់ឈ្នះរបស់ Messi កើតឡើងបន្ទាប់ពីខ្សែបម្រើ Enzo Fernadez ដណ្ដើមបានបាល់ពីកីឡាករអូស្ត្រាលី រួចបញ្ជូនទៅឱ្យប្រធានក្រុម។ Messi ទទួលបានបាល់នៅត្រង់ខ្សែកណ្ដាល អូសបាល់បញ្ច្រាសទិសរត់របស់គូប្រជែង នាំឱ្យកីឡាករអូស្ត្រាលីម្នាក់ដួល រួចទាត់ប្លោងសំដៅជ្រុងម្ខាង ផុតពីដៃអ្នកចាំទី Matthew Ryan។ គ្រាប់បាល់នេះពេញដោយស្ទីលរបស់ Messi ព្រោះកីឡាករនេះធ្លាប់រកបានគ្រាប់បាល់រាប់សិបគ្រាប់តាមរយៈវិធីទាត់បែបនេះនៅក្នុងអាជីព។
នេះគឺជាគ្រាប់បាល់ដែលរកបានឆាប់បំផុតក្នុងអាជីពរបស់ Messi ដោយសារកើតឡើងនៅក្នុងនាទីទីពីរ។ ក្នុង 90 នាទីនៃការប្រកួតមិត្តភាពរវាងអាហ្សង់ទីន និងអូស្ត្រាលី នៅប្រទេសចិន Messi គ្រាន់តែមិនអាចរកបានគ្រាប់បាល់នៅនាទីដំបូងប៉ុណ្ណោះ។ នៅក្នុង 807 គ្រាប់ដែល Messi រកបានក្នុងអាជីព មាន 45 គ្រាប់រកបានក្នុងពេលថែមម៉ោងតង់ទីពីរ និង 22 គ្រាប់ក្នុងពេលថែមម៉ោងតង់ទីមួយ។ ក្រៅពីនេះ ពេលវេលាដែល M10 រកបានគ្រាប់បាល់ច្រើនបំផុតក្នុង 90 នាទី គឺនៅនាទីទី 43 និង 55។
នៅពេល Messi ស៊ុតចូលទី ទស្សនិកជននៅឯកីឡដ្ឋានពលករក្នុងទីក្រុងប៉េកាំង នាំគ្នាស្រែកហ៊ោដូចទៅនឹងក្រុមជម្រើសជាតិចិនទើបតែបានទាត់ចូលទី។ ថ្វីបើទាត់នៅប្រទេសចិន ប៉ុន្តែការប្រកួតរវាងក្រុមជម្រើសជាតិអាហ្សង់ទីន និងអូស្ត្រាលី ទទួលបានការគាំទ្រពីទស្សនិកជនជិត 70,000 នាក់នៅឯកីឡដ្ឋាន។ ទស្សនិកជនភាគច្រើនពាក់អាវ M10 របស់ Messi ដើម្បីលើកទឹកចិត្តក្រុមអាហ្សង់ទីន។
ដោយសារតែកម្លាំង និងបច្ចេកទេសខ្លាំងក្លា អាហ្សង់ទីនក៏រកបានមួយគ្រាប់ទៀតនៅនាទីទី 68 ហើយនេះក៏ជាគ្រាប់បាល់ដែលកំណត់ឱ្យអាហ្សង់ទីនឈ្នះអូស្ត្រាលី 2-0។ គ្រាប់បាល់នេះក៏មានការរួមចំណែកពី Messi នៅពេលគាត់បញ្ជូនបាល់ឱ្យ Rodrigo de Paul ដើម្បីឱ្យខ្សែបម្រើនេះប្លោងបាល់បន្ត ជួយឱ្យ German Pezzella តែតបញ្ចូលទីបានសម្រេច។
បន្ទាប់ពីការប្រកួតនេះ អាហ្សង់ទីននឹងហោះទៅកាន់ហ្សាការតា ដើម្បីប្រកួតមិត្តភាពជាមួយក្រុមឥណ្ឌូណេស៊ី ប៉ុន្តែ Messi ទំនងជានឹងអវត្តមាន។ ព្រោះថា គាត់បានយល់ព្រមលេងបាល់ក្នុងការប្រកួតផ្ដល់កិត្តិយស និងសម្ដែងការដឹកគុណដល់អតីតខ្សែបម្រើ Juan Roman Riquelme នៅថ្ងៃទី 26 មិថុនា នៅអាហ្សង់ទីន៕
June 16, 2023
មហាសេដ្ឋី កូរ៉េខាងត្បូង ដែលនៅពីក្រោយក្រុមចម្រៀង BTS
ទ្រព្យសម្បត្តិរបស់ Bang Si-hyuk ដែលជាស្ថាបនិករបស់ក្រុមហ៊ុននៅពីក្រោយក្រុមចម្រៀង K-pop BTS កើនឡើងជាងទ្វេដង ដោយប្រើពេលត្រឹមតែប៉ុន្មានខែប៉ុណ្ណោះ។
យោងតាមទំព័រ Bloomberg Billionaires Index លោក Bang Si-hyuk មានទ្រព្យសុទ្ធប្រមាណ 3.2 ពាន់លានដុល្លារអាមេរិក បន្ទាប់ពីមូលបត្រក្រុមហ៊ុន Hybe របស់លោក កើនបន្ថែម 131% រាប់ចាប់ពីពេលត្រូវបានបោះផ្សាយមូលបត្រ (IPO) នៅប្រទេស កូរ៉េខាងត្បូង កាលពីខែតុលា។ ក្នុងអំឡុងធ្វើ IPO ទ្រព្យសម្បត្តិរបស់លោក Bang មានតម្លៃស្មើនឹង 1.5 ពាន់លានដុល្លារអាមេរិក។
មហាសេដ្ឋី Bang Si-hyuk
នោះគឺជាភ័ស្ដុតាងបង្ហាញអំពីភាពល្បីល្បាញរបស់ក្រុមចម្រៀង BTS ដែលមានកម្រងចម្រៀងមួយចំនួន ទទួលបានការគាំទ្របំផុតក្នុងពិភពលោក។ ទន្ទឹមនឹងនេះ ក្រុមអ្នកវិនិយោគក៏មានការជឿជាក់លើមហិច្ឆតាក្ដោបក្ដាប់ពិភពតន្ត្រីរបស់ក្រុមហ៊ុន Hybe ក្រោយពីទិញបានក្រុមហ៊ុនដែលនៅពីក្រោយតារាចម្រៀងអន្តរជាតិពីររូប គឺ Justin Bieber និង Ariana Grande។
លោក Bang កាន់កាប់ភាគហ៊ុនចំនួន 34% របស់ក្រុមហ៊ុន Hybe និងត្រូវបានគេហៅថា «Hitman» នៅ កូរ៉េខាងត្បូង ទៀតផង។
តារាចម្រៀង Bieber និង Grande
កាលពីខែមេសា ក្រុមហ៊ុន Hybe ប្រកាសថា បានចំណាយប្រាក់ 1.05 ពាន់លានដុល្លារ សម្រាប់ Ithaca Holding ជាក្រុមហ៊ុនប្រព័ន្ធផ្សព្វផ្សាយដែលនៅពីក្រោយតារាចម្រៀង Bieber និង Grande។ Scooter Braun ដែលជាអ្នកដឹកនាំក្រុមហ៊ុន Ithaca ក្លាយជាសហនាយកប្រតិបត្តិរបស់ក្រុមហ៊ុន Hybe America ក្រោយការទិញដូរនេះ។
លោក Braun កាន់កាប់ភាគហ៊ុនចំនួន 1% របស់ Hybe ដែលមានតម្លៃស្មើនឹង 124.8 លានដុល្លារអាមេរិក។ សមាជិករបស់ក្រុមហ៊ុន BTS ដែលសុទ្ធតែមានវ័យ 20 ឆ្នាំ កាន់កាប់ភាគហ៊ុនដែលមានតម្លៃ 18.5 លានដុល្លារស្មើៗគ្នា ខណៈដែល Bieber និង Grande ម្នាក់ៗកាន់កាប់ភាគហ៊ុនដែលមានតម្លៃ 14.5 លានដុល្លារ។
Bang Si-hyuk បានបង្កើត Big Hit Entertainment ដែលជាឈ្មោះដើមរបស់ Hybe កាលពីឆ្នាំ 2005។ ដំបូងឡើយ ក្រុមហ៊ុននេះ មិនសូវមានសកម្មភាពនោះទេ ហើយវាស្ទើរតែដួលរលំ នៅក្នុងដំណាក់កាលដំបូង មុនពេល BTS ចេញអាល់ប៊ុម ដំបូងកាលពីឆ្នាំ 2013។
បទចម្រៀងថ្មី ល្បីបំផុតរបស់ BTS គឺ Butter ធ្លាប់ស្ថិតនៅលើកំពូលតារាងចំណាត់ថ្នាក់ Billboard Hot 100 អស់ជាច្រើនសប្ដាហ៍។ ក្រុមហ៊ុន Hybe ឱ្យដឹងកាលពីឆ្នាំ 2020 ថា ប្រាក់ចំណូលជិត 88% នៅក្នុងពាក់កណ្ដាលដើមឆ្នាំ 2020 គឺបានមកពី BTS។
ក្រុមអ្នកវិភាគយល់ថា Hybe ត្រូវការស្វែងរក «BTS បន្ទាប់» ហើយមហាសេដ្ឋី Bang Si-hyuk ក៏យល់ឃើញបែបនេះដែរ។ «ពួកគេកំពុងកាន់បន្ថយការពឹងផ្អែកទៅលើក្រុមចម្រៀង BTS។ ក្រុមចម្រៀងប្រុសផ្សេងទៀតរបស់ Hybe បានប្រែជាល្បីឈ្មោះជាងមុន ហើយក្រុមហ៊ុនក៏មានតារាចម្រៀងអន្តរជាតិបន្ថែមទៀត» Gina An អ្នកវិភាគរបស់ក្រុមហ៊ុន eBest Investment & Securities វាយតម្លៃដូច្នេះ៕
ប្រភព៖ Bloomberg
ប្រែសម្រួល៖ បុត្រា
July 16, 2021
ម្ចាស់ក្រុមចម្រៀង BTS របស់កូរ៉េខាងត្បូង ក្លាយជាមហាសេដ្ឋីដូចការរំពឹងទុក
ស្ថាបនិក Bang Shi-hyuk បានក្លាយជាមហាសេដ្ឋី ចំណែកសមាជិក7រូបផ្សេងទៀតរបស់ក្រុមចម្រៀង BTS ក៏បានក្លាយជាសេដ្ឋី ដោយមានទ្រព្យរាប់លានដុល្លារអាមេរិក បន្ទាប់ពីក្រុមហ៊ុន Big Hit Entertainment បានចូលរួមធ្វើជំនួញក្នុងផ្សារហ៊ុន (IOP)។
Big Hit Entertainment ដែលជាក្រុមហ៊ុននៅពីក្រោយក្រុមចម្រៀងបុរស BTS ដ៏ល្បីឈ្មោះនៃចម្រៀង K-pop ប្រមូលបានទុនចំនួន963ពាន់លានវ៉ុន (840លានដុល្លារអាមេរិក) ពីការលក់មូលបត្រថ្មីចំនួន7.13លានហ៊ុនដែលទើបតែបានបោះផ្សាយកាលពីពេលថ្មីៗនេះ។ នេះគឺជាករណី IPO ធំបំផុតរបស់កូរ៉េខាងត្បូង រាប់ចាប់ពីឆ្នាំ2017។ មូលបត្រ Big Hit ត្រូវបានបោះផ្សាយលក់ចាប់ពីថ្ងៃទី15តុលា ដែលនេះបាននាំឱ្យស្ថាបនិក Bang Shi-hyuk ក្លាយជាមហាសេដ្ឋីថ្មីបំផុតនៅកូរ៉េខាងត្បូង។
មូលបត្រ Big Hit បើកទ្វារលក់ក្នុងតម្លៃ 270,000វ៉ុន/ហ៊ុន ខ្ពស់ជាងតម្លៃ IPO 135,000វ៉ុន/ហ៊ុន ដែលប្រការនេះ បានជួយឱ្យតម្លៃទុនរបស់ Big Hit ឡើងដល់ជាង9លានលានវ៉ុន។ លោក Bang វ័យ48ឆ្នាំ កំពុងកាន់កាប់ភាគហ៊ុនជិត35% នៅក្នុងក្រុមហ៊ុននេះ ហើយបច្ចុប្បន្ន ទ្រព្យរបស់លោកបានកើនឡើងដល់3.2ពាន់លានដុល្លារអាមេរិក នេះបើតាមសារព័ត៌មាន Forbes។ សមាជិកទាំង7រូបរបស់ BTS ដែលសុទ្ធតែមានវ័យ20ឆ្នាំ ក៏បានក្លាយជាសេដ្ឋី ដោយសារមុននោះ ពួកគេទទួលបានភាគហ៊ុនមួយចំនួនធំ។
សមាជិកក្រុមចម្រៀងប្រុស BTS
ព្រឹត្រិការណ៍ Big Hit IPO ត្រូវបានធ្វើឡើងក្នុងស្ថានភាពដែលកូរ៉េខាងត្បូងកំពុងស្ថិតក្នុងរលកនៃ COVID-19 ទីពីរ។ BTS ត្រូវបង្ខំចិត្តពន្យារពេលទៅលើគម្រោងសម្ដែងផ្ទាល់នានាចាប់ពីខែមីនា រួមទាំងព្រឹត្តិការណ៍តន្ត្រីដែលបានលក់សំបុត្រហើយផងដែរ។ ឆ្នាំ2019 ដំណើរសម្ដែងលក្ខណអន្តរជាតិដែលមានឈ្មោះថា Love Yourself របស់ក្រុមចម្រៀងនេះ រកបានប្រាក់ជាង196លានដុល្លារអាមេរិក។
Big Hit បច្ចុប្បន្នគឺជាក្រុមហ៊ុនកម្សាន្តដែលមានប្រាក់ចំណេញខ្ពស់ជាងគេបំផុតនៅប្រទេសកូរ៉េខាងត្បូង ដោយចំណេញ63លានដុល្លារនៅក្នុងចំណូលសរុប507លានដុល្លារកាលពីឆ្នាំ2019 ដែលតួលេខនេះខ្ពស់ជាងបណ្ដាក្រុមហ៊ុនតន្ត្រីកូរ៉េខាងត្បូង ដូចជា SM, YG និង JYP Entertainment (តែងត្រូវគេហៅថា “Big Three”) ទៅទៀត។ កាលពីឆ្នាំទៅ (2019) BTS ក៏មានវត្តមាននៅក្នុងបញ្ជីឈ្មោះ Forbes Celebrity 100 និងបានក្លាយជាក្រុមតន្រីដែលមានប្រាក់ចំណូលខ្ពស់ជាងគេបង្អស់នៅក្នុងទ្វីបអាស៊ីទាំងមូល។
បងប្អូនជីដូនមួយរបស់លោក Bang គឺលោក Bang Jun-hyuk ដែលជាស្ថាបនិកនៃក្រុមហ៊ុនហ្គេមអនឡាញ Netmarble ក៏ក្លាយជាមហាសេដ្ឋីមួយរូប ដោយទ្រព្យសរុបរបស់គាត់មានតម្លៃ2.8ពាន់លានដុល្លារ។ Netmarble គឺជាក្រុមហ៊ុនមួយក្នុងចំណោមក្រុមហ៊ុនដែលបានវិនិយោគទៅលើ Big Hit មុនគេ ហើយបច្ចុប្បន្ន Netmarble កាន់កាប់ភាគហ៊ុនចំនួន20% នៅក្នុងក្រុមហ៊ុន Big Hit៕
ប្រភព៖ Forbes
អត្ថបទទាក់ទង> អ្នកនៅពីក្រោយជោគជ័យរបស់ក្រុមចម្រៀងកូរ៉េ BTS នឹងក្លាយជាមហាសេដ្ឋីនាពេលដ៏ខ្លីខាងមុខ បន្ទាប់ពី Big Hit ចូលផ្សារហ៊ុន
October 16, 2020
អ្នកនៅពីក្រោយជោគជ័យរបស់ក្រុមចម្រៀងកូរ៉េ BTS នឹងក្លាយជាមហាសេដ្ឋីនាពេលដ៏ខ្លីខាងមុខ បន្ទាប់ពី Big Hit ចូលផ្សារហ៊ុន
ការស្វែងយល់អំពីអ្នកគាំទ្រ និងប្រើប្រាស់ “ខឿនសេដ្ឋកិច្ចបែប fandom” គឺជាអាថ៌កំបាំងដែលជួយឱ្យ Bang Si-Hyuk ដែលជាម្ចាស់នៃក្រុមចម្រៀង BTS ទទួលបានជោគជ័យ។
Bang Si-Hyuk ត្រូវបានគេស្គាល់ថា ជាអ្នកនៅពីក្រោយជោគជ័យនៃក្រុមចម្រៀង BTS ដ៏ល្បីឈ្មោះរបស់ប្រទេសកូរ៉េខាងត្បូង។ ថ្មីៗនេះ ក្រុមហ៊ុនគ្រប់គ្រងសិល្បកររបស់ Bang Si-Hyuk គឺ Big Hit Entertainment បានប្រកាសឱ្យដឹងថា ការ IPO របស់ពួកគេនឹងត្រូវលក់ក្នុង 135,000វ៉ុន ដែលស្មើនឹង115ដុល្លារអាមេរិកក្នុង1ហ៊ុន ហើយតម្លៃរបស់ក្រុមហ៊ុននេះក៏បានឡើងដល់ជាង4.1ពាន់លានដុល្លារផងដែរ។ ប្រការនេះមានន័យថា លោក Bang ដែលជា CEO និងជាភាគហ៊ុនិកធំជាងគេរបស់ Big Hit Entertainment នឹងក្លាយជាមហាសេដ្ឋីនាពេលដ៏ខ្លីខាងមុខ។ នេះបើតាម Bloomberg Billionaires Index។
មិនត្រឹមតែល្បីឈ្មោះនៅក្នុងប្រទេសកូរ៉េខាងត្បូងនោះទេ តែ BTS ថែមទាំងត្រូវបានយុវវ័យនៅក្នុងប្រទេសជាច្រើនចូលចិត្ត ក្នុងនោះមានសហរដ្ឋអាមេរិក ដែលមានអាល់ប៊ុមចំនួន4 ឈរលើកំពូលតារាង Billboard 200។ បទចម្រៀង “Dynamite” របស់ BTS ក៏បានកាន់កាប់តំណែងជើងឯកនៅលើ Billboard Hot 100 ផងដែរ។
ដូច្នេះ តើគន្លឹះអ្វីខ្លះ ដែលនាំឱ្យ Bang Si-Hyuk ទទួលបានជោគជ័យបែបនេះ?
លោក Bang Si-hyuk
ចម្លើយនោះគឺ ការស្ដាប់ និងស្វែងយល់អំពីអ្នកគាំទ្រ។ នេះក៏ជាទស្សនមួយត្រូវបាន Jeff Bezos ដែលជាអ្នកមានជាងគេបង្អស់ក្នុងពិភពលោក អនុវត្តនៅក្នុងការកសាង និងអភិវឌ្ឍក្រុមហ៊ុន Amazon ផងដែរ។
នៅក្នុងកិច្ចសម្ភាសមួយជាមួយនឹង Fast Company កាលពីឆ្នាំ2019 លោក Bang បានឱ្យដឹងថា៖ “ខ្ញុំមិនបានអានសៀវភៅច្រើនរបស់ក្រុមមេដឹកនាំជំនួញ ឬ CEO នោះទេ ប៉ុន្តែ ថ្មីៗនេះ ខ្ញុំបានអានអំពីគំនិតមួយចំនួនដែលបង្ហាញអំពី “ការសង្កេតទៅលើអតិថិជន” របស់លោក Jeff Bezos។ យើងខ្ញុំក៏ដូច្នេះដែរ គឺតែងតែផ្ដោតទៅលើខ្លឹមសារ រួមទាំងអ្នកគាំទ្រ”។
កន្លងមក កំពូលមហាសេដ្ឋី Jeff Bezos ធ្លាប់បានឱ្យដឹងថា មូលហេតុដែលនាំឱ្យក្រុមហ៊ុន Amazon ទទួលបានជោគជ័យយ៉ាងត្រចះត្រចង់ដូចបច្ចុប្បន្ន គឺដោយសារពួកគេតែងតែ “សង្កេតទៅលើអតិថិជន”។
គោលការណ៍ដ៏សំខាន់មួយរបស់ Amazon នោះគឺ ការដឹកនាំត្រូវតែយកអតិថិជនជាចំណុចចាប់ផ្ដើម ដើម្បីស្វែងរកការងារដែលត្រូវធ្វើ។ ពួកគេធ្វើការយ៉ាងពេញចិត្ត និងអស់ពីកម្លាំងកាយចិត្ត ដើម្បីបានទៅដល់គោលដៅ និងអាចរក្សាទំនុកចិត្តរបស់អតិថិជន។
លោក Bezos បាននិយាយនៅក្នុងព្រឹត្តិការណ៍មួយកាលពីឆ្នាំ2018 ថា៖ “នឹងជាការដែលមានប្រៀបយ៉ាងធំធេងសម្រាប់ក្រុមហ៊ុនណាដែលអាចផ្ដោតទៅលើអតិថិជន ច្រើនជាងការផ្ដោតទៅលើគូប្រជែង”។
នៅក្នុងករណីរបស់លោក Bang “អតិថិជន” គឺជាអ្នកគាំទ្រដ៏ខ្លាំងក្លារបស់ BTS ដែលត្រូវបានគេស្គាល់ថាជា fandom (ក្រុមអ្នកគាំទ្រ) នោះគឺ “ARMY”។
“Fandom K-pop មាន “ទឹកមាត់ប្រៃខ្លាំងណាស់”។ ពួកគេនឹងបញ្ចេញយោបល់របស់ខ្លួន សូម្បីតែនៅពេលអ្នកមិនបានប្រឹងប្រែងដើម្បីធ្វើតាមអ្វីដែលពួកគេចង់បាន។ យើងនឹងមិនអាចធ្វើកិច្ចការរបស់ខ្លួនបានល្អ បើសិនជាមិនចំណាយពេលស្ដាប់យោបល់របស់អ្នកគាំទ្រនោះទេ” លោក Bang បានថ្លែងបែបនេះជាមួយសារព័ត៌មាន Time កាលពីឆ្នាំទៅ។
លោក Bang បន្តថា៖ អ្នកគាំទ្រ K-pop ចង់មានភាពស្និទ្ធស្នាលជាមួយនឹង Idol របស់ពួកគេ។ ដូច្នេះ ការធ្វើការជាមួយ fandom របស់ BTS គឺជាសេវាកម្មដ៏ធំបំផុតមួយដែល Big Hit ផ្ដល់ជូន”។
ក្រុមហ៊ុន Big Hit Entertainment បានអភីវឌ្ឍថ្នាលទំនាក់ទំនងបែបបច្ចេកវិទ្យាមួយដែលមានឈ្មោះថា Weberse ដែលបង្កើតឡើងសម្រាប់តែអ្នកគាំទ្ររបស់ K-pop និង BTS ដែលនេះបាននិងកំពុងជួយឱ្យពួកគេតភ្ជាប់ទំនាក់ទំនង និងទិញដូរទំនិញពីគ្រប់ទីកន្លែងក្នុងពិភពលោក។
ក្រុមចម្រៀង BTS
Big Hit Entertainment បានបង្ហើបប្រាប់ Billboard ថា ពួកគេរកបាន 587.2ពាន់លានវ៉ុន (ប្រហែល507.9លានដុល្លារអាមេរិក)កាលពីឆ្នាំ2019។ ដោយឡែក BTS បានរួមចំណែកជាង87% នៃប្រាក់ចំណូលសរុបរបស់ Big Hit Entertainment នៅក្នុងពាក់កណ្ដលដើមឆ្នាំ2020នេះ និងជាង97% នៅក្នុងពាក់កណ្ដាលដើមឆ្នាំ2019។
ជាក់ស្ដែង បច្ចុប្បន្នមានក្រុមអ្នកគាំទ្រជាច្រើនរបស់ BTS កំពុងតែនាំគ្នាសម្រុកចុះឈ្មោះទិញមូលបត្ររបស់ Big Hit Entertainment ដើម្បីគាំទ្រដល់ Idol របស់ពួកគេ។ តាមផែនការ ក្រុមហ៊ុន Big Hit Entertainment នឹងឡើងផ្សារហ៊ុន (ធ្វើ IPO) នាខែតុលាខាងមុខ៕
ប្រភព៖ CNBC
September 30, 2020
ភ្ញាក់ផ្អើល !! ក្រុមចម្រៀង BTS ធ្វើឱ្យកក្រើកឆាកកម្មវិធី America’s Got Talent
តាមរយៈសារព័ត៌មាន Koreaboo នៅពេលថ្មីៗនេះ បានឱ្យដឹងថា ក្រុមចម្រៀងបុរសសង្ហារបស់កូរ៉េដែលកំពុងតែកាន់កាប់តំណែងជាក្រុមចម្រៀងកូរ៉េដែលមានប្រជាប្រិយភាពបំផុតនៅទឹកដីសហរដ្ឋអាមេរិក និងពិភពលោកមួយហើយ ក្រុមនេះបានធ្វើឱ្យអ្នកគាំទ្ររបស់ខ្លួន ក៏ដូចជាអ្នកគាំទ្រកម្មវិធី America’s Got Talent មានការភ្ញាក់ផ្អើលជាខ្លាំង ក្រោយពីពួកគេបានបង្ហាញវត្តមាននៅលើឆាកកម្មវិធីប្រកួតប្រជែងសមត្ថភាពដ៏ល្បីមួយរបស់អាមេរិក ជាមួយនឹងការច្រៀងផង រាំផង ឡើងផ្អើលឆាកតែម្ដង ។
វត្តមានរបស់ពួកគេបានធ្វើឱ្យប្រិយមិត្តដែលបានទៅទស្សនាកម្មវិធី AGT ជាពិសេសប្រិយមិត្តនារីៗដែលជាអ្នកគាំទ្រ BTS មានក្ដីរំភើបជាខ្លាំង រហូតដល់មានអ្នកខ្លះរំភើបស្ទើរតែស្រក់ទឹកភ្នែកទៀតផង ។សម្រាប់ការសម្ដែងនៅពេលនោះ BTS បានលើកយកបទចម្រៀងមួយបទដែលមានចំណងជើងថា «Idol» ដែលជាបទល្បីមួយរបស់ពួកគេ ហើយការសម្ដែងពេលនោះពិតជាអស្ចារ្យខ្លាំងណាស់ ពួកគេរាំផង ច្រៀងផង ធ្វើឱ្យឆាកកម្មវិធីទាំងមូលកក្រើក ស្រែកហូរកញ្ជ្រៀវយ៉ាងខ្លាំង ក្នុងនោះការចូលរួមរាំពីសំណាក់ក្រុមរាំចម្រុះជាតិសាស្ត្រដ៏ច្រើន នៅពីក្រោយខ្នងពួកគេ ហើយបានធ្វើឱ្យការសម្ដែងនោះក្លាយជាការសម្ដែងដ៏អស្ចារ្យមួយដែលគ្រប់គ្នាកម្របានឃើញ ។
គួរបញ្ជាក់ផងដែរថា Judges មួយរូបនៃកម្មវិធី America’s Got Talent គឺអ្នកនាង Heidi Klum ក៏រំភើបជាមួយនឹងវត្តមានរបស់ BTS នេះដែរ ដោយនាងបានបង្ហោះនូវវីដេអូមួយនៅលើគណនី Twitter ដែលអ្នកនាងបានថតជាមួយនឹង BTS មុនកម្មវិធី America’s Got Talent ចាប់ផ្ដើម ៕
https://youtu.be/9XZmUvIgCLc
September 16, 2018
ពណ៌សក់របស់ក្រុមចម្រៀងប្រុស BTS ធ្វើឱ្យកក្រើកកម្មវិធី American Music Awards
នៅព្រឹកថ្ងៃទី20 ខែវិច្ឆិកា ឆ្នាំ2017 នេះ តាមរយៈសារព័ត៌មាន Daily Mail បានចេញផ្សាយឱ្យដឹងថា ក្រុមតារាចម្រៀងប្រុសដ៏ល្បីរបស់ប្រទេសកូរ៉េខាងត្បូង BTS ត្រូវបានអញ្ជើញចូលរួមជាកិត្តិយសនៅក្នុងកម្មវិធី AMAs (American Music Awards) ដែលខណៈពេលបង្ហាញវត្តមានរបស់ពួកគេនៅក្នុងពិភពសិល្បៈហូលីវូដនោះ ពួកគេបានធ្វើឱ្យកម្មវិធីទាំងមូលមានភាពភ្ញាក់ផ្អើល និងកក្រើកជាខ្លាំងចំពោះការរចនាម៉ូដសម្លៀកបំពាក់ និងពណ៌សក់ចម្រុះគ្នាតែម្ដង។
ក្រុមតារាចម្រៀងប្រុសខាងលើនេះបានធ្វើឱ្យការចូលរួមជាលើកដំបូងរបស់ពួកគេ ក្លាយជាទំព័រប្រវត្តិសាស្ត្រថ្មីនៅលើទឹកដីសហរដ្ឋអាមេរិក ព្រមទាំងបានសម្ដែងនូវបទចម្រៀងល្បីរបស់ពួកគេគឺបទ DNA។ បើតាមរយៈទស្សនាវដ្តី Vogue ក៏បានឱ្យដឹងផងដែរថា ឈុតសម្លៀកបំពាក់ដែលក្រុមចម្រៀងប្រុសមួយនេះបានលើកយកមកបង្ហាញនៅក្នុងកម្មវិធីខាងលើនោះ ត្រូវបានរចនាម៉ូដដោយលោក Anthony Vaccarello ដែលជាអ្នកជំនាញរចនាម៉ូដសម្លៀកបំពាក់ឈុតខ្មៅ បែបរ៉ុក ប្រចាំប្រ៊េនដ៍ល្បី Saint Laurent។
សូមជម្រាបបន្ថែមថា ក្រុមចម្រៀង BTS បានចូលប្រឡូកនៅក្នុងសិល្បៈចម្រៀង Kpop នៅអំឡុងឆ្នាំ2013 ហើយទទួលបានប្រជាប្រិយភាព និងភាពជោគជ័យជាខ្លាំងរហូតមកដល់បច្ចុប្បន្ននេះផងដែរ៕
November 20, 2017