Tag: Bournemouth

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?
(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។
លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។
ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។
ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។
បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។
តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស
យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕
May 30, 2023
Ake របស់ Chelsea ត្រៀមបំពេញការផ្ទេរទៅ Bournemouth
ខ្សែការពារ Nathan Ake កំពុងតែស្ថិតយ៉ាងប្រកៀកក្នុងការបំពេញការផ្ទេរទៅកាន់ក្លិប Bournemouth ក្នុងតម្លៃខ្លួនជាកំណត់ត្រារបស់ក្លិបនេះចំនួន20លានផោន (ស្មើនឹង25.88លានដុល្លារអាមេរិក) ពីក្លិបតោខៀវ Chelsea។
ការព្រមព្រៀងគ្នាមួយនេះត្រូវបានឈានដល់លក្ខខណ្ឌសំខាន់ផ្សេងៗរវាងក្លិបទាំងពីរដោយនៅសល់តែសេចក្តីលម្អិតបន្តិចបន្តួចប៉ុណ្ណោះក្នុងការដោះស្រាយ ខណៈដែល Ake ត្រូវបានគេរំពឹងទុកថា នឹងចុះហត្ថលេខារយៈពេល5ឆ្នាំក្នុងរយៈពេល48ម៉ោងទៀតហើយនិងត្រូវចូលរួមជាមួយនឹងមិត្តរួមក្រុមថ្មីរបស់គេនៅពេលហ្វឹកហាត់មុនបើករដូវកាលក្រោយចាប់ផ្តើម។ ការនាំយក Ake នេះ ត្រូវបានគេចាត់ទុកថា ជាការទទួលជោគជ័យមួយសម្រាប់ក្លិប Bournemouth ដែលបានយកឈ្នះក្នុងការប្រជែងពីសំណាក់ក្លិប West Bromwich Albion, Newcastle United, Southampton និង West Ham United ក៏ដូចជាក្លិបមកពីក្រៅប្រទេសជាច្រើនទៀតដែរ។ ខ្សែការពារវ័យ22ឆ្នាំរូបនេះ បានចំណាយពេលពាក់កណ្តាលរដូវកាលមុនក្នុងនាមជាកីឡាករកម្ចីនៅឯក្លិប Bournemouth និងបានបង្ហាញពីទម្រង់លេងដ៏គួរឲ្យចាប់អារម្មណ៍ក្រោមការដឹកនាំរបស់លោក Eddie Howe ដែលបានរងនូវការខកចិត្តយ៉ាងខ្លាំងនៅពេលដែល Chelsea បានធ្វើការកោះហៅ Ake ឱ្យចូលរួមជាថ្មីជាមួយនឹងក្រុមរបស់ខ្លួនវិញកាលពីខែមករា។
អ្នកចាត់ការទូទៅរបស់ក្លិប Bournemouth រូបនេះធ្លាប់បានទទួលបរាជ័យក្នុងការចុះហត្ថលេខាជាមួយនឹង Akeក្នុងកិច្ចសន្យាជាអចិន្ត្រៃយ៍រួចមកហើយនៅថ្ងៃចុងក្រោយនៃការបិទទីផ្សារដោះដូរកីឡាករកាលពីខែមករា ប៉ុន្តែឥឡូវបានបង្ហាញពីការចាប់អារម្មណ៍ជាថ្មីរបស់ខ្លួនភ្លាមៗនៅរដូវក្តៅនេះ៕
ប្រភពពី៖ The Guardian
June 29, 2017
អ្នកចាំទី Begovic បំពេញការផ្ទេរចេញពី Chelsea ទៅកាន់ក្លិប Bournemouth
ក្លិប Bournemouth បានបំពេញការចុះហត្ថលេខាជាមួយនឹងអ្នកចាំទី Asmir Begovic ពីក្លិប Chelsea ក្នុងតម្លៃខ្លួនបិទជិតមួយ ដែលត្រូវបានគេជឿជាក់ថា មានចំនួន១០លានផោន (ស្មើនឹង១២,៨លានដុល្លារអាមេរិក)។ ការផ្ទេរនេះនឹងត្រូវបំពេញជាផ្លូវការនៅថ្ងៃទី១ ខែកក្កដា ហើយអ្នកចាំទីអន្តរជាតិបូស្នីវ័យ២៩ឆ្នាំរូបនេះនឹងត្រូវចុះហត្ថលេខាលើកុងត្រារយៈពេលវែងមួយ។
Begovic នឹងវិលទៅកាន់កន្លែងដែលរូបគេធ្លាប់បានលេង ក្រោយពីបានចំណាយពេលក្នុងនាមជាកីឡាករកម្ចីនៅឯក្លិប Bournemouth ពីក្លិប Portsmouth កាលពីខែសីហា ឆ្នាំ២០០៧ ដោយបានធ្វើការបង្ហាញខ្លួន៨លើក។ Begovic បានចូលរួមជាមួយនឹង Chelsea ដែលក្រុមម្ចាស់ជើងឯកក្របខ័ណ្ឌ កាលពីឆ្នាំ២០១៥ ដោយចេញពីក្លិប Stoke ក្នុងកិច្ចសន្យារយៈពេល៤ឆ្នាំក្នុងតម្លៃខ្លួន៨លានផោន ប៉ុន្តែគេបានបង្ហាញខ្លួនត្រឹមតែ៣៣លើកប៉ុណ្ណោះសម្រាប់ក្លិបមួយនេះក្នុងរដូវកាលពីរលើកចុងក្រោយនេះ តាមរយៈការដើរតួជាអ្នកចាំទីជម្រើសទី២បន្ទាប់ពីអ្នកចាំទីជម្រើសទី១ Thibaut Courtois។
បច្ចុប្បន្ន រូបគេនឹងបំពេញការផ្ទេរទៅកាន់ក្លិប Bournemouth ដើម្បីប្រជែងតំណែងជាមួយនឹងអ្នកចាំទីជម្រើសទី១ Artur Boruc វ័យ៣៧ឆ្នាំ ដែលមានកុងត្រារហូតដល់ឆ្នាំ២០១៨ ក្រោយពីប្រើប្រាស់លក្ខខណ្ឌនៃការបង្ហាញខ្លួនក្នុងកុងត្រារបស់គេ។
Begovic បានប្រាប់គេហទំព័ររបស់ក្លិប Bournemouth ថា៖ «AFC Bournemouth គឺជាក្លិបដ៏អស្ចារ្យ
និងមានមហិច្ឆតាមួយដែលត្រៀមរាល់អ្វីៗទាំងអស់សម្រាប់អនាគតដ៏ត្រចះត្រចង់»។ កីឡាកររូបនេះបានបន្ថែមទៀតថា៖ «ក្នុងការស្ថិតជាផ្នែកមួយក្នុងក្រុមឈ្នះពាននៅឯ Chelsea គឺជារឿងដ៏អស្ចារ្យមួយ ប៉ុន្តែ ខ្ញុំមានអារម្មណ៍នៅពេលនេះថា វាជាពេលវេលាដ៏ត្រឹមត្រូវមួយក្នុងការធ្វើការផ្លាស់ប្តូរហើយ ពីព្រោះខ្ញុំចង់លេងកីឡាបាល់ទាត់ឲ្យបានទៀងទាត់»៕
ប្រភពពី៖ Sky Sport
May 31, 2017
Defoe ត្រៀមវិលទៅកាន់ក្លិប Bournemouth វិញ ក្នុងកិច្ចសន្យារយៈពេល៣ឆ្នាំ
ខ្សែប្រយុទ្ធ Jermain Defoe នឹងត្រូវចូលរួមជាមួយក្លិប Bournemouth ក្រោយពីចាកចេញពីក្លិបឆ្មាខ្មៅ Sunderland ដោយគ្មានតម្លៃខ្លួន ខណៈដែលរូបគេនឹងត្រូវចុះហត្ថលេខាលើកុងត្រារយៈពេល៣ឆ្នាំដែលនឹងធ្វើឲ្យរូបគេទទួលបានចំណូល២០លានផោន (ស្មើនឹង២៦លានដុល្លារអាមេរិក)។ ខ្សែប្រយុទ្ធវ័យ៣៤ឆ្នាំដែលបានបង្ហាញខ្លួនក្នុងក្រុមបាល់ទាត់ជម្រើសជាតិអង់គ្លេសចំនួន៥៦លើករូបនេះ បានប្រើប្រាស់លក្ខខណ្ឌរំលាយកិច្ចសន្យារបស់គេជាមួយនឹងក្លិប Sunderland ក្រោយពីក្លិបឆ្មាខ្មៅមួយនេះបានធ្លាក់ចេញពីក្របខ័ណ្ឌកំពូល។
Defoe នឹងត្រូវវិលទៅកាន់ក្លិបមួយដែលរូបគេធ្លាប់បានលេងឲ្យកាលពីពេលចាប់ផ្តើមអាជីពជាលើកដំបូងរបស់គេវិញ។ ខ្សែប្រយុទ្ធរូបនេះដែលកាលនោះស្ថិតក្នុងវ័យ១៨ឆ្នាំបានបង្ហាញខ្លួនជាលើកដំបូងឲ្យក្លិប Bournemouth ក្នុងរដូវកាលឆ្នាំ២០០០-២០០១ ក្នុងនាមជាកីឡាករកម្ចីពីក្លិប West Ham United ហើយរូបគេបានស៊ុតបាល់បញ្ចូលទី១៩គ្រាប់ក្នុងការបង្ហាញខ្លួន៣១លើកសម្រាប់ Bournemouth។ Defoe បានលេងរួមជាមួយនឹងលោក Eddie Howe និង Jason Tindall ដែលបច្ចុប្បន្នគឺជាអ្នកចាត់ការទូទៅ និងជាជំនួយការគ្រូបង្វឹករបស់ក្លិប Bournemouth រៀងៗខ្លួន ហើយរូបគេតែងតែរំឭកដល់ពេលវេលាដ៏រីករាយរបស់គេក្នុងក្លិបមានមូលដ្ឋាននៅលើកោះភាគខាងត្បូងមួយនេះ។
Defoe បានចូលរួមជាមួយនឹងក្លិប Sunderland កាលពីខែមករា ឆ្នាំ២០១៥ ក្រោយពីបានចំណាយពេលមួយរយៈជាមួយនឹងក្លិប Toronto FC ហើយរូបគេត្រូវបានបញ្ចុះបញ្ចូលឲ្យវិលមកអង់គ្លេសវិញកាលពីឆ្នាំមុនដោយលោក Sam Allardyce ដែលជាគ្រូបង្វឹករបស់ Sunderland នៅពេលនោះ។ រូបគេបានយល់ព្រមចូលរួម ដោយមានលក្ខខណ្ឌមួយថា រូបគេអាចចាកចេញពីក្លិបនេះដោយគ្មានតម្លៃខ្លួន ប្រសិនបើពួកគេធ្លាក់ចេញពីក្របខ័ណ្ឌកំពូល៕
ប្រភពព័ត៌មាន៖ The Guardian
May 24, 2017
Bournemouth នឹងដេញថ្លៃក្នុងទឹកប្រាក់ច្រើនជាង ៣០លានផោនដើម្បីទិញ Ake និង Begovic ពី Chelsea
ក្លិប Bournemouth កំពុងមានបំណងក្នុងការពង្រឹងទៅលើការបញ្ចប់ក្នុងចំណាត់ថ្នាក់ដ៏ខ្ពស់បំផុតរបស់ពួកគេក្នុងក្របខ័ណ្ឌ Premier League តាមរយៈការដាក់ការដេញថ្លៃក្នុងទឹកប្រាក់ច្រើនជាង៣០លានផោន (ស្មើនឹង៣៩លានដុល្លារអាមេរិក) ដើម្បីទិញយកកីឡាករពីររូបរបស់ក្លិប Chelsea ដែលរួមមាន ខ្សែការពារ Nathan Ake និងអ្នកចាំទី Asmir Begovic នៅពេលរដូវកាលនេះបញ្ចប់ជាស្ថាពរ។
ខ្សែការពារ Nathan Ake
កីឡាករទាំងពីរមិនបានបង្ហាញខ្លួនជាទៀងទាត់ឡើយនៅជាមួយ Chelsea ខណៈដែល Begovic វ័យ២៩ឆ្នាំ ទទួលតួនាទីជាអ្នកចាំទីជម្រើសទី២បន្ទាប់ពី Thibaut Courtois អស់រយៈពេល២ឆ្នាំមកហើយ ចាប់តាំងពីផ្ទេរមកពីក្លិប Stoke City ក្នុងតម្លៃខ្លួន៨លានផោន។ អ្នកចាំទីអន្តរជាតិបូស៊្នីរូបនេះ ស្ទើរតែបានផ្ទេរទៅកាន់ក្លិប Bournemouth កាលពីខែមករាម្តងទៅហើយ ក្រោយពីបានឈានដល់ការព្រមព្រៀងគ្នាលើចំណុចសំខាន់ៗរួច ប៉ុន្តែនៅជាប់លក្ខខណ្ឌថា លុះត្រាតែក្រុមតោខៀវរបស់លោក Antonio Conte រកអ្នកចាំទីដ៏មានបទពិសោធម្នាក់មកជំនួសបាន។
អ្នកចាំទី Asmir Begovic
ការមិនអាចរកអ្នកចាំទីដ៏គួរឲ្យទុកចិត្តម្នាក់មកជំនួស Begovic បាន មានន័យថា ការផ្ទេរនេះត្រូវបានលុបចោល។ Begovic ដែលបានធ្វើឲ្យមានការចាប់អារម្មណ៍ពីសំណាក់ក្លិបកំពូលៗជាច្រើននោះ នឹងធ្វើឲ្យក្លិប Bournemouth ចំណាយប្រាក់ប្រមាណជា១២លានផោន ហើយបើគ្មានគូប្រជែងទេនោះ ការផ្ទេរនេះនឹងដំណើរការទៅមុខ។ ប៉ុន្តែ ការផ្ទេររបស់ Ake នឹងផ្តល់នូវភាពស្មុគស្មាញច្រើនជាង។ ខ្សែការពារអន្តរជាតិហូឡង់រូបនេះ បានចំណាយពេលពាក់កណ្តាលរដូវកាលទៅលើលក្ខខណ្ឌខ្ចីជើងនៅឯក្លិប Bournemouth និងបានបង្ហាញពីទម្រង់លេងដ៏គួរឲ្យចាប់អារម្មណ៍ ក្រោយពីបានចូលលេងពេញលេញកាលពីខែវិច្ឆិកា ឆ្នាំទៅ នៅមុនពេល Chelsea បានសម្រេចចិត្តកោះហៅរូបគេឲ្យមកចូលរួមជាមួយនឹងក្រុមរបស់ខ្លួនវិញ៕
ប្រភពពី៖ The Guardian
May 18, 2017
ការស្ថិតក្នុង Premier League រយៈពេល១០ឆ្នាំរបស់ Sunderland បានបញ្ចប់
ការស្ថិតក្នុងក្របខ័ណ្ឌ Premier League រយៈពេល១០ឆ្នាំរបស់ក្លិប Sunderland បញ្ចប់ហើយ ក្រោយពីគ្រាប់បាល់ស៊ុតបញ្ចូលទីនៅជិតបញ្ចប់ការប្រកួតរបស់កីឡាករ Josh King បានជួយឲ្យក្រុម Bournemouth កត់ត្រាជ័យជម្នះ ១-០ ដែលបានធ្វើឲ្យក្រុមឆា្មខ្មៅមួយនេះ ត្រូវកាត់ចេញកាលពីថ្ងៃសៅរ៍។
ក្រុមរបស់លោក David Moyes បានធ្លាក់ចេញពីក្របខ័ណ្ឌកំពូលរបស់អង់គ្លេសទាំងការខកចិត្ត ខណៈដែលការបង្ហាញពីទម្រង់លេងមិនបានល្អនាពេលថ្មីៗនេះ បានកាត់សេចក្តីក្នុងយុទ្ធនាការដ៏ត្រដាបត្រដួសរបស់ពួកគេ ក្រោយពី King បានរកគ្រាប់បាល់ឈ្នះនៅនាទី ទី៨៨។ Moyes បានគិតថា ក្រុមរបស់លោកនៅតែមានឱកាសក្នុងការសង្គ្រោះ នៅពេលដែលគូប្រជែងស្ថិតក្បែរតំបន់កាត់ចោល Hull បានបណ្តោយឲ្យបាល់ប៉េណាល់ទីនៅលើទឹកដីក្រុម Southampton ប៉ុន្តែ ការស៊ុតរបស់កីឡាករ Dusan Tadic ត្រូវបានសង្គ្រោះដោយអ្នកចាំទី Eldin Jakupovic ដើម្បីធ្វើឲ្យក្រុមមានរហស្សនាមខ្លាធំមួយនេះ បញ្ចប់ក្នុងលទ្ធផលស្មើ ០-០ ដែលបញ្ចប់ក្តីសង្ឃឹមនៃការសង្គ្រោះការធ្លាក់ចេញរបស់ក្រុម Sunderland តែម្តង។
ជាមួយនឹងការស្ថិតនៅបាតតារាងចាប់តាំងពីថ្ងៃទី១០ ខែកញ្ញា ក្រុម Sunderland មិនស្គាល់ឈ្នះសោះពីការប្រកួត១០លើកចុងក្រោយរបស់ពួកគេ និងបានធ្លាក់ទៅកាន់ក្របខ័ណ្ឌលំដាប់ទី២ បើទោះបីនៅសល់៤ប្រកួតទៀតក៏ដោយ។ ការធ្លាក់ចេញរបស់ក្រុម Sunderland បំពេញនូវរដូវកាលដ៏វេទនាមួយផ្សេងទៀតសម្រាប់លោក Moyes ដែលបានជួបពេលវេលាដ៏ខកចិត្ត ចាប់តាំងពីចាកចេញពីក្លិប Everton ដើម្បីកាន់តំណែងនៅក្លិប Manchester United កាលពីឆ្នាំ២០១៣៕
ប្រភពព័ត៌មាន៖ BBC
April 30, 2017