Tag: Bill Gates

ការ​លាងចាន​ក្រោយពេល​បរិភោគ​អាហារ និង​ការអាន​សៀវភៅ​មុនពេល​ចូល​ទទួលទានដំណេក បាន​ជួយ​ឱ្យ​មហាសេដ្ឋី​អាម៉េរិក លោក ប៊ី​ល ហ្គេ​ត កាត់បន្ថយ​ភាព​តានតឹង​ក្រោយពី​បាន​បំពេញការងារ​ពេញ​មួយថ្ងៃ ព្រមទាំង​ជួយ​បង្កើន​ចំណេះដឹង​ផងដែរ។

គ្រប់គ្នា​ទំនងជា​ចាប់អារម្មណ៍​ទៅលើ​តែ​ទម្លាប់​ពេលព្រឹក ដោយសារតែ​វា​ជា​កិច្ច​ការដែល​ជួយ​ឱ្យ​យើង​មាន​ថាមពល​គ្រប់គ្រាន់​សម្រាប់ធ្វើ​ការ​ពេញ​មួយថ្ងៃ។

ក៏ប៉ុន្តែ ទម្លាប់​ពេល​ព្រលប់​ក៏​សំខាន់​ណាស់ដែរ។ បើសិន​ជាមាន​ទម្លាប់​ល្អ អ្នកនឹង​អាច​កាត់បន្ថយ​បញ្ហា​ថប់​អារម្មណ៍ និង​បាន​គេង​លក់​ស្រួល។ ប្រការនេះ​ពិតជា​សំខាន់​ខ្លាំងណាស់​ចំពោះ​សុខភាព​ផ្លូវកាយ និង​ផ្លូវចិត្ត។

ជា​អ្នកជំនួញ និង​ជា​សប្បុរសជន​ដែល​ទទួលបាន​ជោគជ័យ លោក ប៊ី​ល ហ្គេ​ត ក៏មាន​ទម្លាប់​ល្អ​មួយចំនួន​នៅពេល​ព្រលប់​ដែល​គួរឱ្យ​យើង​យក​ជា​គំរូ។ កាលពី​ឆ្នាំ ២០១៤ នៅលើ​បណ្ដាញ​សង្គម Reddit នៅពេល​ត្រូវបាន​សួរថា «សូម​រៀបរាប់​អំពី​ការងារ​ដែល​លោក​ចូលចិត្ត​ធ្វើ​បំផុត និង​ពុំមាន​អ្នកណា​នឹកស្មាន​ដល់» មហាសេដ្ឋី ប៊ី​ល ហ្គេ​ត ឆ្លើយថា «ខ្ញុំ​លាងចាន​រាល់ពេល​ព្រលប់។ អ្នកដទៃ​ស្ម័គ្រចិត្ត​ធ្វើ​កិច្ចការ​នេះ។ ប៉ុន្តែ​ខ្ញុំ​ចូលចិត្ត​ធ្វើទៅ​តាមរបៀប​របស់ខ្ញុំ»។

ការលាង​ចាន​នឹង​ជួយ​ឱ្យ​អ្នកជំនួញ​ទាំងឡាយ​បាន​សម្រាក​ខួរក្បាល​បន្ទាប់ពី​បាន​បំពេញការងារ​ពេញ​មួយថ្ងៃ។ ខួរក្បាល​នឹង​បាន​សម្រាក ដោយ​ចាក​ផុតពី​ការងារ​ដែល​ប្រើ​ខួរក្បាល។ ជំនួស​មកវិញ ការងារ​លាងចាន​គ្រាន់តែ​ផ្ដោតទៅលើ​ការធ្វើដដែលៗ ដូចជា លាង​ឱ្យ​ស្អាត ជូត​ឱ្យ​ស្ងួត និង​ដាក់​ចូលក្នុង​រាវ។

ទម្លាប់​ទី​ពីរ​របស់លោក ប៊ី​ល ហ្គេ​ត គឺ​ការអាន​សៀវភៅ។ រៀងរាល់​ព្រលប់​មុនពេល​ចូលសម្រាន្ត គាត់​តែ​ចំណាយពេល​មួយ​ម៉ោង​ដើម្បី​អាន​សៀវភៅ។ គាត់​ចូលចិត្ត​អាន​ស្ទើ​ប​គ្រប់​ប្រធានបទ តាំងពី​នយោបាយ រហូតដល់​ព្រឹត្តិការណ៍​សង្គម។

មាន​មូលហេតុ​ជាច្រើន​ដែលនាំឱ្យ​គេ​ចាត់ទុក​ការអាន​សៀវភៅ​ថា​ជា​ទម្លាប់​ល្អ។ ការអាន​សៀវភៅ​ជួយ​ឱ្យ​យើង​បង្កើន​ចំណេះដឹង មើលឃើញ​ហេតុការណ៍​ពី​គ្រប់​ជ្រុងជ្រោយ និង​បង្កើន​ភាព​ច្នៃប្រឌិត។ល។

តើអ្នកនឹងធ្វើអ្វីខ្លះជាមួយនឹងប្រាក់កាសរបស់ខ្លួន នៅពេលក្លាយជាអ្នកមានលំដាប់ទី2ក្នុងពិភពលោក?

ក្នុងពេលបច្ចុប្បន្ន លោក Bill Gates មានទ្រព្យសរុបចំនួន125ពាន់លានដុល្លារអាមេរិក ដែលប្រភពចំណូលរបស់គាត់ ភាគច្រើនបានមកពីក្រុមហ៊ុន Microsoft។ ឆ្នាំ2014 លោក Gates បានលាលែងពីតំណែងប្រធានក្រុមហ៊ុននេះ ប៉ុន្តែ នៅតែកាន់កាប់ភាគហ៊ុនចំនួន1.34% នៅក្នុងក្រុមហ៊ុនដែលខ្លួនបានបង្កើតឡើង។

មានមនុស្សជាច្រើន ឆ្ងល់ថា មានទ្រព្យច្រើនយ៉ាងនេះ តើលោកទុកវានៅទីណា? ចម្លើយគឺថា លោករក្សាទុកនៅក្នុងខ្ទង់វិនិយោគ និងសកម្មភាពជំនួញ។ល។ ខាងក្រោមនេះគឺជា “ទីកន្លែង” មួយចំនួនដែលលោក Bill Gates កំពុងរក្សាទ្រព្យរបស់ខ្លួន៖

1.វិនិយោគទៅលើក្រុមហ៊ុនផ្សេងៗ

ទ្រព្យសម្បត្តិភាគច្រើនរបស់លោក Gates ត្រូវបានកាន់កាប់ដោយ Cascade Investment LLC ដែលជាក្រុមហ៊ុនមួយត្រូវបានគ្រប់គ្រងដោយលោក Bill Gates ដើម្បីចាត់ចែងខ្ទង់វិនិយោគនានាលោក។ ថ្វីបើមិនមែនជាក្រុមហ៊ុនសាធារណៈ (Publicly listed company) ប៉ុន្តែសកម្មភាពជំនួញមួយចំនួនរបស់ Cascade នៅតែត្រូវបានតម្រូវឱ្យរាយការណ៍ទៅកាន់គណៈកម្មការមូលបត្រ និងផ្សារហ៊ុនអាមេរិក (SEC)។

ខ្ទង់វិនិយោគមួយចំនួនដែលគ្រប់គ្រងដោយក្រុមហ៊ុន Casade៖

– Arcos Dorados Holdings៖ ភាគហ៊ុនដែលកំពុងកាន់កាប់៖ 8.5លានហ៊ុន។ តម្លៃ៖ 26.2លានដុល្លារ
– AutoNation: ភាគហ៊ុនដែលកំពុងកាន់កាប់៖ 18.4លានហ៊ុន។ តម្លៃ៖ 436.6លានដុល្លារ។
– Berkshire Hathaway៖ ភាគហ៊ុនដែលកំពុងកាន់កាប់៖ 6លានហ៊ុន។ តម្លៃ៖ 1.07លានដុល្លារ។
– Canadian National Railway: ភាគហ៊ុនដែលកំពុងកាន់កាប់៖ 101លានហ៊ុន។ តម្លៃ៖ 7.6ពាន់លានដុល្លារ។
– Coca-Cola ភាគហ៊ុនដែលកំពុងកាន់កាប់៖ 25លានហ៊ុន។ តម្លៃ៖ 977លានដុល្លារ។
– Deere & Co៖ ភាគហ៊ុនដែលកំពុងកាន់កាប់៖ 31.5លានហ៊ុន។ តម្លៃ៖ 4.2ពាន់លានដុល្លារ។
– Ecolab៖ ភាគហ៊ុនដែលកំពុងកាន់កាប់៖ 30លានហ៊ុន។ តម្លៃ៖ 4.5ពាន់លានដុល្លារ។
– Otter Tail៖ ភាគហ៊ុនដែលកំពុងកាន់កាប់៖ 3.4លានហ៊ុន។ តម្លៃ៖ 142លានដុល្លារ។
– Republic Services៖ ភាគហ៊ុនដែលកំពុងកាន់កាប់៖ 108លានហ៊ុន។ តម្លៃ៖ 7.8ពាន់លានដុល្លារ។
– Waste Management៖ ភាគហ៊ុនដែលកំពុងកាន់កាប់៖ 614លានហ៊ុន។ តម្លៃ៖ 1.3ពាន់លានដុល្លារ។
– Legg Mason fund៖ ភាគហ៊ុនដែលកំពុងកាន់កាប់៖ 13លានហ៊ុន។ តម្លៃ៖ 131លានដុល្លារ។

ក្រៅពីនេះ លោក Gates ក៏ជាប្រធានក្រុមហ៊ុន TerraPower ដែលជាអ្នករចនារោងចក្រថាមពលនុយក្លេអែរផងដែរ។ តាមរយៈការិយាល័យ Gates Venture របស់ខ្លួន លោក Gates ក៏បាននិងកំពុងឧបត្ថម្ភប្រាក់យ៉ាងច្រើនទៅលើគម្រោងថាមពលស្អាត អប់រំ សុខាភិបាល និងកម្មវិធីកាត់បន្ថយភាពក្រីក្រនៅទូទាំងពិភពលោកទៀតផង។

2.អចលនទ្រព្យ

ទន្ទឹមនឹងការវិនិយោគទៅលើក្រុមហ៊ុនផ្សេងៗ លោក Bill Gates ថែមទាំងទិញទ្រព្យជាក់ស្ដែងផងដែរ មានដូចជាអចលនទ្រព្យដែលមានផ្ទៃដៃដ៏ធំសម្បើមមួយ និងកោះឯកជនមួយទៀត។

Xanadu 2.0 ដែលជាភូមិគ្រឹះមួយរបស់លោក Gates នៅតំបន់ Seattle គឺជាជុំរុំផ្ទះដ៏ធំមួយនៅក្បែរសមុទ្រ ជិតបឹងវ៉ាស៊ីងតោន។ Xanadu 2.0 ត្រូវបានគេគណនាឃើញថា មានតម្លៃ131.1លានដុល្លារ។

ឆ្នាំ2013 លោក Gates ចាប់ផ្ដើមទិញអចលនទ្រព្យនៅ Florida។ លោកបានទិញភូមិគ្រឹះមួយដែលមានបន្ទប់គេងចំនួន4 និងកសិដ្ឋានចិញ្ចឹមសេះ ដែលមានតម្លៃ 8.7លានដុល្លារ។ ឆ្នាំ2016 លោកក៏បានទិញដីដែលនៅក្បែរនោះ ធ្វើឱ្យតម្លៃសរុបឡើងដល់35.87លានដុល្លារ។ ឆ្នាំ2019 លោកបានចំណាយ21លានដុល្លារសម្រាប់ទិញកសិដ្ឋានចិញ្ចឹមសេះមួយផ្សេងទៀតផងដែរ។

លោក Bill Gates ក៏ជាម្ចាស់របស់ Grand Bogue Caye ដែលជាកោះធំជាងគេបង្អស់របស់ប្រទេសបេលីហ្ស (Belize) នៅអាមេរិកកណ្ដាល។ លោក Gates បានទិញកោះ Grand Bogue Caye នេះ ក្នុងតម្លៃ25លានដុល្លារ។

3.យន្តហោះ និងរថយន្ត

គិតមកដល់ឆ្នាំ2018 លោក Gates មានយន្តហោះប្រតិកម្ម Bombardier BD 700 Global Express ចំនួន2គ្រឿង ដែលមានតម្លៃឡើងដល់45លានដុល្លារ/គ្រឿង។ លោកក៏ជាអ្នកគាំទ្ររបស់ Porsche ផងដែរ ប៉ុន្តែ ពេលបើកបរនៅក្នុងតំបន់ដែលខ្លួនរស់នៅ លោក Gates ជិះតែរថយន្ត Mercedes ធម្មតាប៉ុណ្ណោះ។

4.ប្រមូលទិញវត្ថុមានតម្លៃ

លោក Bill Gates កំពុងកាន់កាប់វត្ថុមានតម្លៃជាច្រើន មានដូចជាលិខិតព្រាងសរសេរដោយដៃមួយច្បាប់ដ៏ល្បីល្បាញដែលមានឈ្មោះថា Leonardo Da Vinci តម្លៃ30.8លានដុល្លារ និងស្នាដៃនិពន្ធជាច្រើន ដូចជា រឿង Distant Thunder មានតម្លៃ7លានដុល្លារ រឿង The Nursery តម្លៃ10លានដុល្លារ រឿង Room of Flowers តម្លៃ20លានដុល្លារ រឿង Lost on The Grand Banks តម្លៃ36លានដុល្លារ និងរឿង Polo Crowd តម្លៃ28លានដុល្លារ។

5.សកម្មភាពមនុស្សធម៌

ចាប់តាំងពីត្រូវបានបង្កើតឡើងកាលពីឆ្នាំ1994 មូលនិធិមនុស្សធម៌ Bill & Melinda Gates បានបរិច្ចាគប្រាក់រាប់សិបពាន់លានដុល្លារ ក្នុងគោលដៅដ៏ល្អប្រពៃសម្រាប់មនុស្សជាតិ។ ជាងនេះ ក៏នៅមានមូលនិធិមនុស្សធម៌ផ្សេងទៀតដែលលោក Bill Gates និងលោក Warren Buffett ជាអ្នកបង្កើតឡើង ក្នុងបំណងទទួលការរួមចំណែកវិភាគទានផ្នែកមនុស្សធម៌ពីក្រុមអ្នកមានដទៃទៀតផងដែរ៕

ប្រភព៖ សារព័ត៌មានបរទេស