Tag: baby and mom

ក្មេងតូចៗខ្លះបៅទឹកដោះហើយមិនញ៉ាំទឹក ក្មេងខ្លះញ៉ាំទឹកតែបន្តិចបន្តួច មួយថ្ងៃមិនទាំងដល់មួយកែវផង រហូតអ្នកម្តាយអាចនឹកកង្វល់ថា បើបែបហ្នឹង តើកូននឹងបានទទួលជាតិទឹកគ្រប់គ្រាន់ដែរឬទេ?

ទឹក នៅក្នុងទីនេះមានន័យអំពីវត្ថុរាវដែលរាងកាយត្រូវការ ដែលក៏រួមទាំងទឹកដោះ និងទឹកផ្លែឈើផងដែរ។ ក្នុងមួយថ្ងៃៗកូនត្រូវការវត្ថុរាវប្រមាណជា 15 ភាគរយនៃទម្ងន់ខ្លួន ដូចជា កូនតូចមានទម្ងន់ខ្លួន 10 គីឡូក្រាម ដូច្នេះកូននឹងត្រូវការវត្ថុរាវ ៎៎= 0 . 15 X 10 = 1 លិត្រកន្លះ ដូច្នេះស្មើនឹងក្នុង 1 ថ្ងៃកូនគួរបានទទួលទឹកដោះ 960 មីល្លីលិត្រ ទឹកផ្លែឈើ 60 – 120 មីល្លីលិត្រ និងទឹកបរិសុទ្ធ 60 មីល្លីលិត្រ និងចំណែកដែលនៅសល់ កូននឹងបានទទួលអំពីអាហារបន្ថែមក្នុងពេលនីមួយទៀតផង។

ដូច្នេះបើរាប់ទឹកដោះជាចំណែកមួយរបស់ជាតិទឹកដែលរាងកាយកូនត្រូវការហើយនោះ ក៏មិនចាំបាច់ទៅបារម្ភថា កូននឹងបានទទួលជាតិទឹកមិនគ្រប់គ្រាន់នោះទេ តែមូលហេតុដែលពេលឱ្យកូនមឹមទឹកដោះហើយ គួរឱ្យកូនមឹមទឹកផងនោះ គឺជាការបង្ហាត់ឱ្យកូនចេះញ៉ាំទឹកស្អាតបរិសុទ្ធ និងដែលសំខាន់នោះ ជាការលាងសម្អាតកំណកទឹកដោះដែលប្រឡាក់ជាប់នៅក្នុងប្រអប់មាត់ហ្នឹងឯង។

ទឹកស្អាត…ចាប់ផ្តើមនៅពេលណាល្អ?

គួរចាប់ផ្តើមតាំងពីពេលកើតដំបូង ចូរឱ្យមឹមក្រោយពេលបៅទឹកដោះរួច ឬក្នុងអំឡុងពេលបៅទឹកដោះក៏បាន ជាពិសេសក្នុងអំឡុងពេលចាប់ផ្តើមឱ្យអាហារបន្ថែម គួរបញ្ចុកទឹកស្អាតឱ្យកូនញ៉ាំក្នុងអំឡុងពេលបញ្ចុកអាហារផង ដោយចាប់ផ្តើមឱ្យញ៉ាំប្រមាណជា 1 ស្លាបព្រាកាហ្វេជាមុនសិន និងបន្ទាប់ពីញ៉ាំអាហាររួច (និងមុនឱ្យបៅទឹកដោះ) រួចហើយសឹមបង្កើនជាបណ្តើរៗឱ្យបានបរិមាណ 120 – 180 មីល្លីលិត្រក្នុងមួយថ្ងៃ។ អ្វីដែលសំខាន់នោះ គួរឱ្យកូនតូចញ៉ាំទឹកដែលដាំឆ្អិនល្អបំផុត និងគួរប្តូរទឹកញឹកញាប់មុននឹងឱ្យកូនបៅ។ ទឹកដាំឆ្អិនដែលឱ្យកូនបៅគួររក្សាទុកក្នុងទូទឹកកក ព្រោះនឹងជួយបញ្ឈប់ការរីកធំធាត់របស់មេរោគបាក់តេរីបាន តែមិនគួររក្សាទុកលើសពី 1 – 2 ថ្ងៃទេ។

ទឹកផ្លែឈើ…ក៏សំខាន់ប៉ុនៗគ្នាដែរ

ទឹកផ្លែឈើជាចំណែកមួយរបស់ជាតិទឹកដែលចាំបាច់ដល់រាងកាយរបស់កូន គួរចាប់ផ្តើមឱ្យកូនតូចញ៉ាំទឹកផ្លែឈើនៅពេលមានអាយុ 6 – 7 ខែឡើងទៅ។ គួរជ្រើសរើសផ្លែឈើដែលមានរសជាតិស្រាលៗជាមុនសិន ដូចជា ផ្លែប៉ោម ទំពាំងបាយជូរ ល្ហុងទុំ ជាដើម ហើយរឿងភាពស្អាតមានអនាម័យគឺជារឿងសំខាន់ ចូរប្រយ័ត្នថ្នាំសម្លាប់សត្វល្អិតដែលនៅជាប់សេសសល់លើផ្លែឈើនោះឱ្យបានខ្លាំងផង (គួរយកទៅត្រាំទឹកទុកចោលប្រមាណជា 15 – 20 នាទី មុននឹងយកទៅច្របាច់ ឬក្រឡុកឱ្យកូនញ៉ាំ) និងនៅពេលច្របាច់ ឬក្រឡុកហើយភ្លាមៗថ្មីៗ គួរឱ្យកូនញ៉ាំតែម្តង បន្ទាប់ពីនោះចូរឱ្យញ៉ាំទឹកស្អាតតាមក្រោយគ្រប់ពេល ដើម្បីលាងកំណកជាតិស្ករដែលនៅជាប់តាមជើងធ្មេញ និងក្នុងប្រអប់មាត់។

សូមកុំភ្លេចថា បរិមាណរបស់ទឹកផ្លែឈើដែលឱ្យកូនតូចញ៉ាំក្នុងមួយថ្ងៃៗនោះ មិនគួរលើសពី 90 – 120 មីល្លីលិត្រ បើសិនជាច្រើនជាងនោះ នឹងមានផលមិនល្អតាមមក គឺនឹងធ្វើឱ្យកូនតូចបៅទឹកដោះបានតិច ព្រោះទឹកដោះមានគុណប្រយោជន៍ចំពោះរាងកាយរបស់កូនតូចខ្លាំងជាងទឹកផ្លែឈើច្រើនណាស់ និងមិនអាចជំនួសគ្នាបានឡើយ។ មានលោកឪពុកអ្នកម្តាយខ្លះប្រើវិធីដាក់ស្ករ-សទៅក្នុងទឹកសម្រាប់ឱ្យកូនតូចញ៉ាំ ដើម្បីជួយឱ្យកូនញ៉ាំទឹកស្អាតឱ្យបានច្រើនឡើង តែវិធីនេះត្រូវបានហាមដាច់ខាត ព្រោះក្រៅពីនឹងធ្វើឱ្យកូនញៀនជាតិផ្អែមហើយ មេរោគក៏ចូលចិត្តស្ករដូចគ្នាដែរ ធ្វើឱ្យវាមានឱកាសបង្កើនចំនួនច្រើនឡើងយ៉ាងឆាប់រហ័សក្នុងពេលដ៏ខ្លី ។

ពេលឱ្យកូនញ៉ាំទឹកផ្លែឈើ គួរឱ្យញ៉ាំពីកែវ ព្រោះការឱ្យកូនបឺតជញ្ជក់ពីដបទឹកដោះគោនឹងធ្វើឱ្យភាពផ្អែមនៅសេសសល់ក្នុងប្រអប់មាត់ និងជាប់តាមកន្លុកកន្លៀតធ្មេញរបស់កូនរយៈពេលយូរ ធ្វើឱ្យមានឱកាសធ្មេញពុកបានដោយងាយ៕

អ្នកម្តាយត្រូវតែហ្វឹកហាត់រៀនយល់ដឹង និងស្គាល់អំពីតម្រូវការរបស់កូនតូច តែរឿងដែលអ្នកម្តាយមិនអាចដឹងនោះគឺ ទារកនោះមានសមត្ថភាពក្នុងការទទួលដឹង ទង្វើ និងការឆ្លើយតបមកវិញចំពោះរឿងមួយចំនួនបាន ដោយមិនចាំបាច់មានការរៀនយល់ដឹង ឬឆ្លងកាត់បទពិសោធន៍ពីមុនមកឡើយ ដែលយើងហៅរឿងទាំងអស់នោះថា “សញ្ជាតិញាណ (ការដឹងដោយខ្លួនឯង)” ជាប្រតិកម្មឆ្លើយតបតាមសញ្ជាតិញាណ នឹងជួយឱ្យកូនតូចមានសុវត្ថិភាពបានដោយខ្លួនឯងនៅពេលកើតមានសភាវអាសន្នណាមួយកើតឡើង។

សញ្ជាតិញាណរបស់ទារកទើបកើតដំបូង

1 . ការមើលឃើញ

បន្ទាប់ពីប្រសូត ទារកនៅមិនទាន់បើកភ្នែកភ្លាមៗឡើយ ព្រោះកែវភ្នែកនៅសម្រួលសភាពជាមួយពន្លឺខាងក្រៅមិនទាន់បាន ដោយសារការស្ថិតនៅគភ៌ម្តាយមិនកើតមានប្រតិកម្មចំពោះការមើលឃើញ តែក្នុងអំឡុងពេលមិនលើស 3 ថ្ងៃ កូនតូចនឹងចាប់ផ្តើមបើកភ្នែក អាចនឹងព្រិចភ្នែកញឹកញាប់ ព្រោះកែវភ្នែកនៅសម្រួលជាមួយសភាពពន្លឺមិនទាន់ល្អប៉ុន្មាន។ ការធ្វើចលនាកែវភ្នែកគឺជាប្រតិកម្មឆ្លើយតបដើម្បីការពារកែវភ្នែកដែលសែនផុយស្រួយរបស់ខ្លួនពីពិភពខាងក្រៅហ្នឹងឯង។

2 . ប្រព័ន្ធដកដង្ហើម

នៅពេលទារកប្រសូតហើយ គ្មានថង់ទឹកភ្លោះនៅជុំវិញខ្លួន រាងកាយរបស់ទារកនឹងបញ្ជាឱ្យប្រព័ន្ធការដកដង្ហើមធ្វើការភ្លាមតែម្តង ចំណែកអត្រាការដកដង្ហើមរបស់ទារកម្នាក់ៗក៏ខុសប្លែកពីគ្នាទៅតាមតម្រូវការរបស់ទារកខ្លួនឯងដែរ លើកលែងតែទារកដែលមានបញ្ហាក្រោយពេលប្រសូតភ្លាមតែប៉ុណ្ណោះ។

3 . ការបឺតជញ្ជក់លេបវត្ថុផ្សេងៗ

នៅពេលដែលអ្នកបំបៅទឹកដោះពីដោះម្តាយ រឿងដែលទារកធ្វើ គឺបឺត និងលេបទឹកដោះដោយស្វ័យប្រវត្តិ អំឡុងពេលនេះសូមអ្នកម្តាយប្រុងប្រយ័ត្នវត្ថុ ឬរបស់របរដែលបង្កគ្រោះថ្នាក់ បើសិនជាកូនតូចភ្លាត់ភ្លាំងលេបចូលទៅក្នុងរាងកាយ អាចនឹងមានគ្រោះថ្នាក់ភ្លាមៗតែម្តង។

4 . ការស្រវាចាប់ដោយដៃ

នៅពេលអ្នកម្តាយយកម្រាមដៃទៅដាក់ប៉ះលើបាតដៃរបស់ទារក គេនឹងស្រវាចាប់ម្រាមដៃរបស់អ្នកភ្លាម តែបើសិនមានអ្វីដែលធ្វើឱ្យភ្ញាក់ ទារកនឹងបង្ហាញសញ្ជាតិញាណដោយការភ្ញាក់ព្រើត ដោយបាតដៃនឹងលាចេញ លែងម្រាមដៃអ្នកម្តាយចេញភ្លាមដែរ

5 . ការបែរមុខរកក្បាលដោះ

ការបង្ហាត់ទារកឱ្យងាកបែររកក្បាលដោះ អ្នកម្តាយសាកល្បងយកម្រាមដៃប៉ះថ្ពាល់កូនថ្នមៗ សញ្ជាតិញាណរបស់ទារកនឹងងាកបែរមករកភ្លាមតែម្តង អ្នកម្តាយមិនចាំបាច់ចាប់បង្វិលក្បាលកូនតូចឡើយ គ្រាន់តែប៉ះថ្ពាល់គេថ្នមៗ ទារកនឹងកើតមានក្តីចង់ដឹងចង់ឃើញ ហើយនិងបែរក្បាលចូលមករកបានយ៉ាងងាយ។

រឿងទាំងអស់នេះគឺជារឿងធម្មជាតិរបស់ទារកទើបកើតដំបូង ដែលអ្នកម្តាយអាចមិនដឹងថាវាគឺជា សញ្ជាតិញាណដើម្បីការមានជីវិតរស់នៅក្នុងអំឡុងវ័យនេះ និងអ្នកម្តាយក៏គួរយកចិត្តទុកដាក់មើលថែទាំកូនតូចយ៉ាងល្អ ព្រោះត្រូវមិនភ្លេចថា ការដែលកូនតូចចេញឆ្ពោះមកពិភពខាងក្រៅនេះ វាខុសប្លែកពីការនៅក្នុងផ្ទៃរបស់អ្នកច្រើនណាស់៕

អ្នកម្តាយភាគច្រើន តែងតែប្រាថ្នាឱ្យទារកទើបនឹងកើតដំបូងគេងសម្រាកក្នុងពេលថ្ងៃឱ្យបានយូរៗ ច្រើនម៉ោង ដើម្បីឱ្យគេបានសម្រាកយ៉ាងពេញទំហឹង និងគ្រប់គ្រាន់ តែបើសិនជាគេងលក់យូរជ្រុលពេក ក៏នឹងនឹកបារម្ភថា តើទារកខុសប្រក្រតីដែរឬទេ?

ដែលនៅក្នុងការពិតវិញ ការគេងច្រើនពេក ឬតិចពេក សុទ្ធតែមានបញ្ហាទាំងអស់ ដូច្នេះលេខនេះយើងនឹងនិយាយអំពីបញ្ហាដែលលោកឪពុកអ្នកម្តាយគ្រប់គ្នាច្រើនតែមើលរំលង នោះគឺ បញ្ហាការគេងច្រើន និងញ៉ាំតិចរបស់ទារកហ្នឹងឯង។

រៀនយល់ដឹងពីការគេងរបស់ទារក

ជាប្រក្រតីទារកមានការគេងជាមធ្យមក្នុងមួយថ្ងៃប្រមាណជា 20 – 22 ម៉ោង ដោយនឹងភ្ញាក់ប្រមាណជា 3 ដងក្នុងមួយយប់ និងនៅក្នុងការគេងម្តងៗនឹងប្រើពេលវេលាប្រមាណជា 4 ម៉ោង ទារកតែងតែភ្ញាក់ពីគេងនៅពេលឃ្លានបៅ សូម្បីតែនៅពេលកណ្តាលយប់ក៏ដោយ ទារកនឹងភ្ញាក់មកបៅទឹកដោះស្ទើរតែរៀងរាល់ 4 ម៉ោងម្តង រហូតទាល់តែគេមានអាយុ 2 – 3 ឆ្នាំ ទើបអាចគ្រប់គ្រងការគេងយូរជាប់ៗគ្នាបាន។

បៅទឹកដោះប៉ុន្មានល្អ?

ជាទូទៅ ទារកភាគច្រើនៗតែភ្ញាក់ឡើងមកបៅទឹកដោះប្រមាណជា 8 ពេលក្នុងមួយថ្ងៃ បើកូនតូចបៅទឹកដោះម្តាយ ចូរឱ្យកូនបៅរហូតទាល់តែឆ្អែត ដោយអាចសង្កេតដឹងថា នៅពេលឆ្អែតហើយ ទារកនឹងព្រលែងមាត់ចេញពីដោះម្តាយដោយខ្លួនឯង ឬបើឃើញគេគេងលក់ហើយ នោះក៏បង្ហាញថាគេមឹមឆ្អែតហើយដែរ។

សង្កេតមើលការគេង ការញ៉ាំរបស់កូន

បើសង្កេតឃើញថា ទារកមានទង្វើការបៅទឹកដោះ ឬការគេងដែលខុសប្រក្រតី ដូចជា គេងច្រើនជ្រុលពេក គឺគ្រប់ 4 – ម៉ោងហើយនៅមិនព្រមភ្ញាក់មកបៅទឹកដោះ ឬបៅទឹកដោះតិចជាងប្រក្រតី ខុសពីទម្លាប់ដែលធ្លាប់តែបៅបានច្រើន និងជាក្មេងដែលមិនដែលយំ ឬយំតិចនោះ ឪពុកម្តាយកុំព្រងើយកន្តើយឱ្យសោះ គួរនាំកូនទៅប្រឹក្សាជាមួយគ្រូពេទ្យ ព្រោះអាចកើតភាពខុសប្រក្រតីបាន និងដើម្បីជាការជួយការពារសភាវមិនគ្រប់ទឹកដែលអាចកើតឡើង។

ភាពខុសប្រក្រតីដែលជួប និងជាមូលហេតុធ្វើឱ្យទារកមានអាការទាំងនោះ កើតឡើងបានដោយសារសភាវអ័រម៉ូន ថៃរ៉យនៅក្នុងឈាមចុះទាប ខ្លួនលឿង ឬកើតការឆ្លងមេរោគ សភាវខ្លួនត្រជាក់តែងជួបនៅក្នុងរដូវរងា ឬនៅក្នុងបន្ទប់ដែលមានធាតុអាកាសត្រជាក់ ឬគេងនៅក្នុងបន្ទប់ដែលមានបំពាក់ម៉ាស៊ីនត្រជាក់ សភាវសីតុណ្ហភាពក្នុងរាងកាយឡើងខ្ពស់ តែងជួបនៅក្នុងរដូវក្តៅ ជាដើម​។

ទារកដែលគេងច្រើន បៅតិច ស្ងាត់ស្ងៀមជ្រុលពេក សុទ្ធតែបង្ហាញឱ្យឃើញពីភាពខុសប្រក្រតីដែលកើតឡើង ដែលត្រូវតែបានទទួលការកែខៃ រឿងវិវឌ្ឍនាការអាចនឹងយឺតយ៉ាងជាងប្រក្រតី ខួរក្បាល ឬប្រព័ន្ធប្រសាទអាចនឹងមានភាពខុសប្រក្រតី។

រៀនយល់ដឹងពីការគេងរបស់ទារកវ័យ 1 ខួប

អ្នកម្តាយដែលយកកូនចូលគេងដោយការដាក់កូននៅលើពូកទាំងដែលកូននៅភ្ញាក់នៅឡើយនោះ នៅពេលភ្ញាក់ឡើងកណ្តាលយប់ កូនតូចនឹងរៀនយល់ដឹងក្នុងការបំពេរខ្លួនឯងឱ្យគេងលក់ទៅវិញដោយខ្លួនឯងបាន ដោយមិនរំខានឪពុកម្តាយឡើយ។

ក្នុងខណៈដែលទារកមួយក្រុមទៀតដែលឪពុកម្តាយបំពេរឱ្យគេងលក់នៅនឹងដើមទ្រូង មុននឹងនាំកូនទៅដាក់ឱ្យគេងនៅលើពូកនោះ ពេលភ្ញាក់ឡើងកណ្តាលយប់នឹងមិនដឹងពីវិធីក្នុងការជួយឱ្យខ្លួនឯងគេងលក់តទៅទៀតបានទេ ព្រោះគ្មានអ្នកជួយបំពេរ ទារកទាំងនោះនឹងស្រែករំខានឪពុកម្តាយឱ្យមកជួយបំពេរ ដូច្នេះបើឪពុកម្តាយណាត្រូវការបង្ហាត់ឱ្យកូនគេងលក់ ដោយឪពុកម្តាយមិនចាំបាច់ត្រូវភ្ញាក់នោះ ត្រូវតែបង្ហាត់កូនឱ្យចេះគេងលក់ដោយខ្លួនឯង៕

ការតាំងគភ៌គឺជាបទពិសោធន៍ដ៏គួរឱ្យអស្ចារ្យម្យ៉ាងសម្រាប់អ្នកម្តាយគ្រប់រូប ទំរាំតែពរពោះ ថែទាំបំប៉នគភ៌មកយ៉ាងល្អដល់ទៅ 9 ខែ និងលុះដល់ពេលប្រសូត តើនឹងមានរឿងអ្វីកើតឡើងខ្លះនោះ ស្រ្តីមានគភ៌គួរតែសិក្សា និងត្រៀមខ្លួនទប់ទល់នឹងរឿងការប្រសូត 3 ដំណាក់កាលនេះឱ្យជាប់ក្នុងចិត្ត។

3 ដំណាក់កាលក្នុងការប្រសូតបុត្រ មានដូចខាងក្រោមនេះ ៖

1 . ការពង្រីកខ្លួនរបស់មាត់ស្បូន និងរង់ចាំមាត់ស្បូនបើកឱ្យពេញទំហឹងសឹន

អំឡុងពេលនេះអ្នកត្រូវរង់ចាំសឹន ពេលវេលាអាចនឹងកន្លងទៅយឺតខ្លាំងណាស់សម្រាប់អ្នក តែអ្នកក៏ត្រូវតែរង់ចាំឱ្យមាត់ស្បូនបើកឱ្យដល់ 10 សង្ទីម៉ែត្រសឹនដែរ។ ការបើករបស់មាត់ស្បូននឹងបែងចែកជា 3 រយៈពេលដូចតទៅនេះ ៖

. ចាប់ផ្តើមដំបូងមាត់ស្បូននឹងបើកត្រឹមតែ 0 – 4 សង្ទីម៉ែត្រប៉ុណ្ណោះ ហើយមាត់ស្បូននឹងបើកជារឿយៗទៅទៀតប្រមាណជា 1 សង្ទីម៉ែត្រក្នុង 1 ម៉ោង។ ស្រ្តីមានគភ៌ខ្លះអាចត្រូវរង់ចាំឱ្យមាត់ស្បូនបើកពេញទំហឹងប្រមាណជា 6 – 10 ម៉ោង ទំរាំនឹងប្រសូតបាន អ្នកខ្លះត្រូវរង់ចាំយូរជាងនោះទៅទៀត អាស្រ័យលើបទពិសោធន៍ និងសភាពរាងកាយ ហើយពេលនោះក៏នឹងមានអាការឈឺពោះខ្លាំងឡើងៗជារឿយៗ អ្នកម្តាយខ្លះទឹកភ្លោះអាចនឹងបែកតាំងពីពេលនេះបាត់ទៅហើយ។

. អំឡុងពេលបន្ទាប់មកទៀត មាត់ស្បូនរបស់អ្នកនឹងបើកចេញប្រមាណជា 3 – 7 សង្ទីម៉ែត្រហើយ ការរង់ចាំប្រសូតបុត្រនឹងនៅសល់ប្រមាណជា 3 – 6 ទៀតប៉ុណ្ណោះ អាស្រ័យលើបទពិសោធន៍របស់ស្រ្តីមានគភ៌ម្នាក់ៗ តែអ្វីដែលប្រាកដច្បាស់នោះគឺ ស្បូនកំពុងតែច្របាច់ខ្លួនយ៉ាងខ្លាំងឡើង អាចនឹងរៀងរាល់ 3 – 5 នាទីហើយ ស្រ្តីមានគភ៌ខ្លះអាចនឹងមានទឹករំអឹលលាយឈាមពណ៌ផ្កាឈូកៗហូរចេញមកទៀតផង។

. អំឡុងពេលចុងក្រោយ មាត់ស្បូនបានបើកដល់ 10 សង្ទីម៉ែត្រហើយ ពេលវេលាប្រសូតបុត្រនៅសល់ត្រឹមតែ 20 នាទី – 2 ម៉ោងទៀតប៉ុណ្ណោះ។ សម្រាប់ការប្រឹងប្រសូតបុត្រ កូននឹងចេញមកលឿន ឬយឺតនោះអាស្រ័យស្ថិតលើការប្រឹងរបស់អ្នកម្តាយ និងចង្វាក់នៃការប្រឹង។ អំឡុងពេលនេះស្បូននឹងច្របាច់ខ្លួនខ្លាំងឡើង និងញាប់ឡើងខ្លាំងណាស់ អ្នកម្តាយខ្លះអាចនឹងនឿយហត់ និងមានអាការក្អួតចង្អោរ ឈឺផ្សារនៅលើមាត់ស្បូន។

2 . ខ្យល់ប្រឹងក្នុងរាងកាយ និងការប្រសូតបុត្រ

ដំណាក់កាលនេះនឹងត្រៀមជាស្រេចក៏នៅពេលដែលមាត់ស្បូនបើកចេញយ៉ាងពេញទំហឹងហើយ អ្នកនឹងមានអារម្មណ៍ដឹងពីការជំរុញយ៉ាងខ្លាំងក្លាពីខាងក្នុង មានអារម្មណ៍ដឹងពីកម្លាំងរុញច្រាន និងដឹងពីស្បូនច្របាច់ខ្លួនខ្លាំងក្លា និងញាប់ឡើង។ ជាអំឡុងពេលដែលឈឺចាប់បំផុត ពេលនេះគ្រូពេទ្យអាចនឹងកាត់ត្រង់ប្រឡោះមាត់ស្បូនបន្តិចដើម្បីឱ្យប្រឡោះស្បូនបើកធំខ្លាំងឡើង។ អំឡុងពេលដែលត្រូវប្រើកម្លាំងប្រឹងប្រសូតនេះ ពេលមានអារម្មណ៍ដឹងពីកម្លាំងរុញច្រាន ឬខ្យល់ប្រឹងក្នុងរាងកាយហើយនោះ ចូរអ្នកប្រមូលកម្លាំង និងប្រឹងឱ្យពេញទំហឹងតម្រង់ចំណុចកណ្តាលនៃការប្រឹងឆ្ពោះទៅរកទ្វាធំ(រន្ធគូទ)។ នៅពេលមានចង្វាក់ហើយក៏ប្រឹងចេញមកឱ្យខ្លាំងអស់ពីកម្លាំងកាយ កុំហារមាត់ ឬបញ្ចេញសំឡេងស្រែក ព្រោះកម្លាំងប្រឹងនឹងរុញទៅខាងលើធ្វើឱ្យពិបាកប្រសូត និងប្រើពេលវេលាយូរ។ ពេលអ្នកប្រឹងដើម្បីប្រសូត នឹងមានអារម្មណ៍ថា ផ្នែកក្បាលរបស់កូនចេញមកហើយ អ្នកនឹងមានអារម្មណ៍ថា ធូរស្រាលឡើងបន្តិច ដូច្នេះចូររង់ចាំគ្រូពេទ្យឱ្យសញ្ញាម្តងទៀតដើម្បីចាប់ផ្តើមប្រឹងប្រសូតខ្លួនកូនចេញមកម្តងទៀត ពេលនោះខ្លួនរបស់កូននឹងរអឹលចេញមកដោយស្រួល និងមានសុវត្ថិភាព។

3 . នៅពេលអ្នកប្រសូតបុត្រចេញមកដល់ដៃគ្រូពេទ្យហើយ

គ្រូពេទ្យនឹងធ្វើការកាត់ខ្សែទងផ្ជឹតចេញ និងធ្វើកាសម្អាតខ្លួនប្រាណឱ្យកូន អ្នកនឹងមានអារម្មណ៍ដឹងពីកម្លាំងប្រឹងម្តងទៀត មិនមែនព្រោះអ្នកប្រសូតកូនភ្លោះនោះទេ តែអ្នកត្រូវប្រសូតដុំសុកចេញមកផងដែរ ជាវិធីខាងធម្មជាតិនៅពេលប្រសូតបុត្រហើយ ក៏ត្រូវតែប្រសូតដុំសុកចេញមកដែរ។ នៅពេលប្រសូតដុំសុកចេញមកហើយ អ្នកអាចនឹងមានអារម្មណ៍ថា មានអាការរងារញ័រដែលវាជារឿងប្រក្រតី និងបើអ្នកគ្មានអារម្មណ៍ថានឿយហត់ជ្រុលពេកទេនោះ អ្នកគួរតែសុំឱ្យគ្រូពេទ្យយកកូនមកដាក់នៅលើដើមទ្រូងរបស់អ្នក និងឱ្យកូនចាប់ផ្តើមបៅដោះដើម្បីជំរុញទឹកដោះបានភ្លាមតែម្តង។

អ្នកម្តាយខ្លះនឹងមានបទពិសោធន៍ក្នុងការប្រសូតមិនដូចគ្នាទេ អ្នកខ្លះក៏ជួបនឹងសភាវជ្រៀតជ្រែកផ្សេងៗក្នុងអំឡុងពេលរង់ចាំប្រសូតជាច្រើនយ៉ាង រហូតមិនអាចប្រសូតដោយខ្លួនឯងបាន ត្រូវតែធ្វើការវះប្រសូតដើម្បីសុវត្ថិភាពរបស់ខ្លួនអ្នកម្តាយ និងទារក ដែលគ្រប់យ៉ាងស្ថិតនៅលើការពិចារណារបស់គ្រូពេទ្យដោយត្រង់តែម្តង៕

អំឡុងពេលគ្រប់ខែជិតប្រសូត គឺជាពេលវេលាដែលគួរឱ្យរំភើបត្រេកអររបស់ស្ត្រីដែលជាម្តាយ និងសមាជិកក្នុងក្រុមគ្រួសារខ្លាំងណាស់ តែនៅក្នុងក្តីរំភើបត្រេកអរនោះ ប្រហែលជាលាយឡំទៅដោយក្តីព្រួយបារម្ភមិនតិចឡើយ ព្រោះ ឡារ៉ែនជឿថាស្រ្តីមានគភ៌ទាំងឡាយប្រហែលជាធ្លាប់បានឮរឿងរ៉ាវនៃការប្រសូតអំពីអ្នកដែលមានបទពិសោធន៍ខ្លះៗមកហើយមិនខាន ទាំងរឿងរបស់ភាពឈឺចាប់ក្នុងពេលប្រសូត ថែមទាំងនៅមានភាពរារែកស្ទាក់ស្ទើរ ព្រោះមិនដឹងថា នឹងជ្រើសរើសយកការប្រសូតដោយវិធីណាល្អ រវាងការប្រសូតតាមធម្មជាតិ ឬក៏ប្រសូតដោយការវះកាត់ ដូច្នេះបើកំពុងតែរារែកស្ទាក់ស្តើរបែបនេះ ឡារ៉ែនសូមណែនាំស្រ្តីមានគភ៌គ្រប់ខែទាំងអស់មកមើលពី ចំណុចល្អ 7 យ៉ាងរបស់ការប្រសូតតាមធម្មជាតិវិញម្តង។

1. ធ្វើចលនាបានយ៉ាងសេរី

ហេតុផលលំដាប់មុនៗគេដែលស្រ្តីមានគភ៌គ្រប់ខែគួរតែជ្រើសរើសយកការប្រសូតតាមធម្មជាតិនោះគឺ ការប្រសូតបុត្រតាមវិធីធម្មជាតិនេះនឹងបើកឱកាសឱ្យរាងកាយអ្នកម្តាយធ្វើចលនាបានយ៉ាងសេរីច្រើនជាងការប្រសូតដោយការវះកាត់ និងថែមទាំងអាចកំណត់ទិសដៅការធ្វើចលនារបស់ទារកបានខ្លាំងជាងទៀតផង។

2. មានសុវត្ថិភាពចំពោះទារក

ជាប្រក្រតីហើយ បើអ្នកម្តាយ និងកូនតូចគ្មានបញ្ហាអ្វីដែលត្រូវកង្វល់ទេនោះ គ្រូពេទ្យភាគច្រើននឹងណែនាំឱ្យប្រសូតដោយវិធីធម្មជាតិច្រើនជាងការប្រសូតដោយការវះកាត់ ដោយសារតែរាងកាយរបស់អ្នកម្តាយខ្លួនឯងអាចប្រឹងប្រសូតបានតាមធម្មជាតិដោយមិនចាំបាច់ត្រូវពឹងលើថ្នាំ ឬសារធាតុគ្រោះថ្នាក់អ្វីដែលនាំឱ្យប្រថុយប្រថានដល់កូនតូចឡើយសូម្បីតែបន្តិច។

3. រាងកាយឆាប់វឹលទៅរកសភាពដើមលឿនជាង

អាចមើលទៅដូចជាការប្រសូតតាមធម្មជាតិនឹងសាងនូវការឈឺចាប់ដល់អ្នកម្តាយខ្លាំងជាងការវះប្រសូត តែការពិតទៅ ការប្រសូតតាមវិធីធម្មជាតិនឹងធ្វើឱ្យអ្នកម្តាយឈឺចាប់តែក្នុងអំឡុងពេលដែលបញ្ចេញកម្លាំងប្រឹងបញ្ចេញទារកមក និងបន្ទាប់ពីនោះតែបន្តិចទៀតប៉ុណ្ណោះ តែបន្ទាប់ពីនោះមក ក្រោយពេលប្រសូតរួច អ្នកម្តាយនឹងបានទទួលថ្នាំបំបាត់ការឈឺចាប់ និងវិធីការស្តាសភាពរាងកាយផ្សេងៗដែលលោកគ្រូពេទ្យបានណែនាំ ថែមទាំងស្នាមរបួសនៅតូចជាងការវះពោះប្រសូតទៀតផង។

4. ប្រសូតលឿនជាង

ការវះប្រសូត គ្រូពេទ្យនឹងត្រូវចាក់ថ្នាំស្ពឹក និងត្រៀមឧបករណ៍សម្រាប់ធ្វើការវះប្រសូតទៀតជាច្រើន ដើម្បីឱ្យទារកបានបើកភ្នែកចេញមកពីផ្ទៃម្តាយបានយ៉ាងល្អឥតខ្ចោះមួយរយភាគរយ ដែលវាក៏ជាការពន្យារពេលកម្មវិធីការប្រសូតឱ្យកាន់តែយឺតយូរតទៅទៀត តែបើអ្នកសម្រេចចិត្តប្រសូតតាមវិធីធម្មជាតិវិញនោះ រាងកាយរបស់អ្នកម្តាយនឹងបានរៀនយល់ដឹងពីវិធីការផ្តល់កំណើតកូនតូចដោយសញ្ជាតិញាណស្រាប់ហើយនោះ ក៏នឹងជួយសម្រួលឱ្យអ្នកប្រសូតបុត្រយ៉ាងសុវត្ថិភាព និងប្រើពេលវេលាមិនយូរទៀតផង។

5. មានឱកាសបានសិក្សាអំពីរាងកាយរបស់ខ្លួនឯងច្រើនឡើងទៀតផង

តាំងពីពេលដែលស្រ្តីមានគភ៌សម្រេចចិត្តរួចហើយថា នឹងប្រសូតតាមវិធីធម្មជាតិនោះ ស្រ្តីមានគភ៌ និងស្វាមីនឹងចាប់ផ្តើមសិក្សាពីព័ត៌មាន និងមើលថែទាំខ្លួនយ៉ាងពិតប្រាកដ ហើយការស្វែងរកព័ត៌មានច្រើនៗបែបនេះនឹងធ្វើឱ្យស្រ្តីមានគភ៌ខ្លួនឯងបានទទួលនូវចំណេះដឹងល្អៗ និងវិធីមើលថែទាំខ្លួនឯងទាំងមុនពេលប្រសូត និងក្រោយពេលប្រសូតបានច្រើនឡើងទៀតផង។

6. មានមោទនភាពលើភាពជាម្តាយរបស់ខ្លួនឯង

អ្នកណាៗក៏ដឹងដែរថា ការប្រសូតតាមវិធីធម្មជាតិនឹងត្រូវប្រើភាពក្លាហាន និងភាពអំណត់អត់ធន់របស់ស្រ្តីជាម្តាយខ្លាំងប៉ុនណានោះ ដូច្នេះបើអ្នកអាចឆ្លងកាត់អំឡុងពេលនៃការឈឺចាប់ខ្លាំងក្លាដ៏សែនមានតម្លៃបែបនោះមកបាន វាគឺជារឿងធម្មតាមួយដែលអ្នកនឹងកើតមានអារម្មណ៍មោទនភាពលើខ្លួនឯងយ៉ាងខ្លាំងបំផុត ក្រៅពីនេះ គេនាំគ្នានិយាយថា ការប្រសូតតាមវិធីធម្មជាតិនឹងបង្កើនអារម្មណ៍អាណិតស្រឡាញ់រវាងស្រ្តីជាម្តាយ និងកូនបានខ្លាំងជាងការវះកាត់ប្រសូតទៅទៀត។

ការបានក្លាយជាម្តាយមនុស្ស គឺជារឿងមួយដែលគួរឱ្យអស្ចារ្យ និងគួរឱ្យលើកតម្កើងស្រាប់ទៅហើយ មិនថាដោយហេតុផលអ្វីទាំងអស់ ដូច្នេះមិនថាអ្នកនឹងជ្រើសរើសឱ្យកូនជាទីស្រឡាញ់ចាប់កំណើតឡើងដោយវិធីណាក៏ដោយ សុទ្ធតែគួរឱ្យសរសើរតម្កើងដូចគ្នាទាំងអស់ តែបើសិនជាអាចទៅរួច ការប្រសូតតាមវិធីធម្មជាតិ ជាវិធីដែលល្អបំផុត ដោយសារមានចំណុចល្អដល់ទៅ 6 ចំណុចនេះឯង៕

ខាងក្រោមនេះគឺជារឿងរ៉ាវដែលអ្នកម្តាយម្នាក់ចង់ផ្ញើជូនអ្នកម្តាយថ្មោងថ្មីទាំងឡាយ ក្នុងរឿងការទៅសួរសុខទុក្ខ និងមើលទារកទើបនឹងកើតថ្មីៗថា មិនគួរបណ្តោយឱ្យទារកត្រូវបានគេមកមើល ឬប៉ះពាល់ពីសំណាក់បុគ្គលដែលមកសួរសុខទុក្ខនោះឡើយ គួរតែរង់ចាំឱ្យគ្រប់ 1 សប្តាហ៍បន្ទាប់ពីប្រសូតរួចសិន។

ឡូរ៉ា ហ្គ្រេស វេលដន អ្នកម្តាយម្នាក់បានលះបង់ពេលវេលាពាក់ព័ន្ធនឹងរឿងនេះ នាងតែងតែដាស់តឿនមនុស្សនៅក្នុងក្រុមគ្រួសារ និងសាច់ញាតិបងប្អូនថា មិនគួរទៅសួរសុខទុក្ខ ឬធ្វើរបស់របរទៅផ្ញើទារកដែលមានអាយុមិនទាន់លើស 1 សប្តាហ៍ឡើយ ព្រោះអាចធ្វើឱ្យទារកកើតមានគ្រោះថ្នាក់ ឬឈឺបាន តែក៏មិនសូវមានអ្នកណាយកចិត្តទុកដាក់ស្តាប់ប៉ុន្មានឡើយ ជាពិសេសលោកយាយរបស់ស្វាមីនាង។

អ្នកម្តាយម្នាក់នេះបានរៀបរាប់ថា ពេលដែលខ្ញុំឆ្លងទន្លេកូនដំបូងហើយថ្មីៗ ក៏មានអ្នកមកសួរសុខទុក្ខ និងមានលោកយាយរបស់ស្វាមីផងដែរ។ គាត់មកដល់ ក៏ចូលមកចាប់ឱប និងថើបថ្ពាល់ទារក ហើយលើកពយកចេញពីដើមទ្រូងខ្ញុំភ្លាមតែម្តង គាត់យកទារកទៅឱបរឹត និងបលេងយ៉ាងគ្មានក្រែងចិត្តខ្ញុំបន្តិចណាឡើយ។

“ខ្ញុំខឹងខ្លាំងណាស់ ព្រោះកើតចេញពីអារម្មណ៍ និងទើបតែឆ្លងផុតអំឡុងពេលក្រោយប្រសូតដ៏សែននឿយល្វើយ ខ្ញុំមិនចង់ឱ្យទារកទើបនឹងកើតប៉ះបាល់ជាមួយសារធាតុគីមីផ្សេងៗ ដូចជា ទឹកអប់ គ្រឿងសម្អាង សម្លៀកបំពាក់ដែលមានក្បាច់ក្បូរផ្សេងៗនោះទេ ព្រោះអាចធ្វើឱ្យស្បែកទារករលាកក្រហាយបាន ដូច្នេះពេលខ្ញុំឃើញលោកយាយរបស់ស្វាមីពកូនខ្ញុំយកទៅបែបនោះ ខ្ញុំចង់តែទៅកញ្ឆក់យកកូនមកវិញ តែក៏មិនអាចធ្វើបានឡើយ ពេលនោះខ្ញុំមានអារម្មណ៍ចង់តែលោតទៅខាំដៃលោកយាយឱ្យព្រលែងដៃចេញពីកូនរបស់ខ្ញុំមែនទែន” ឡូរ៉ា ហ្រ្គេស វេលដន និយាយ។

បន្ទាប់ពីនាងបានកូនមកវិញ កូនរបស់នាងក៏មានស្លាកស្នាមនៅលើផ្ទៃមុខបាត់ទៅហើយ នាងប្រញាប់បីកូនចូលទៅក្នុងបន្ទប់គេងផ្ទាល់ខ្លួនភ្លាមតែម្តង។ ប្តីរបស់នាង និងអ្នកជំនួយការគ្រូពេទ្យបើកទ្វាបន្ទប់ឡើងយឺតៗ ចូលទៅមើលនាង ព្រោះយល់ពីអារម្មណ៍របស់នាងថា នាងមានអារម្មណ៍យ៉ាងណា គេជួយលួងលោមនាងថា គួរតែទប់ទល់នឹងស្ថានការណ៍បែបនេះយ៉ាងណា។

ឡូរ៉ា ហ្រ្គេស វេលដន អ្នកម្តាយកូន 3 ម្នាក់នេះនៅបានប្រាប់ទៀតថា មិនមែនត្រឹមតែរឿងសុវត្ថិភាពរបស់ទារកដែលអាចកើតការឆ្លងមេរោគនោះទេ តែវាជារឿងអារម្មណ៍របស់អ្នកម្តាយក្រោយពេលប្រសូតទៀតផងដែលមានផលប៉ះពាល់។ អ្នកម្តាយក្រោយពេលប្រសូតមួយចំនួនមានអាការនឿយល្វើយ និងមានអារម្មណ៍សោកសៅបន្ទាប់ពីប្រសូតរួច ហើយនៅពេលជួបនឹងហេតុការណ៍បែបនេះរឹតតែហុចផលប៉ះពាល់ដល់ផ្លូវចិត្តធ្វើឱ្យកាន់តែយ៉ាប់យ៉ឺនជាងមុនទៅទៀត។

ដូច្នេះហើយទើបឡូរ៉ាចង់មនុស្សម្នាទាំងឡាយបានដឹងពីអារម្មណ៍ និងសុជីវធម៌ក្នុងការទៅសួរសុខទុក្ខទារកក្រោយពេលប្រសូតដែលនៅមិនទាន់បាន 1 សប្តាហ៍នោះថា តើអ្នកម្តាយមានអារម្មណ៍ដូចម្តេច និងបាននាំគ្នាប្រយ័ត្នប្រយែងខ្លាំងជាងនេះហ្នឹងឯង៕

បើអ្នកម្តាយធ្លាប់នឹកឆ្ងល់នៅក្នុងចិត្តថា តើហេតុអីបានកូនតូចជាទីស្រឡាញ់ក្តៅខ្លួន ក្រោយពេលចាក់វ៉ាក់សាំងហើយនោះ ខាងក្រោមនេះគឺជាចម្លើយ សូមតាមដានទាំងអស់គ្នា។

– វ៉ាក់សាំងគឺអ្វី?

វ៉ាក់សាំង គឺ ជីវវត្ថុដែលផលិតចេញមកពីមេរោគ ឬពិសរបស់មេរោគដែលត្រូវបានធ្វើឱ្យមិនអាចបង្កជាជំងឺបាន ដោយចាក់ចូលទៅក្នុងរាងកាយមនុស្សដើម្បីជំរុញប្រព័ន្ធការពារជំងឺចំពោះមេរោគ ដែលវាមានផលការពារការកើតជំងឺ ឬធ្វើឱ្យកម្រឹតភាពធ្ងន់ធ្ងររបស់ជំងឺនោះថយចុះ។

– ហើយចុះហេតុអីបានក្រោយពេលចាក់វ៉ាក់សាំងហើយ កូនតូចក្តៅខ្លួន?

នៅពេលវ៉ាក់សាំងចូលទៅក្នុងរាងកាយ ប្រព័ន្ធការពារជំងឺរបស់យើងនឹងបញ្ជូន ” Antibody ” ដែលមានតួនាទីចាត់ការពួកមេរោគ(វ៉ាក់សាំង)ដែលចូលមកខាងក្នុងរាងកាយ ហើយក្នុងអំឡុងពេលដែលប្រព័ន្ធរាងកាយកំពុងចាត់ការជាមួយអ្វីដែលប្លែកនេះឯងដែលវាជាមូលហេតុធ្វើឱ្យកើតអាការក្តៅខ្លួន។ នៅពេល antibody ចាត់ការជាមួយវ៉ាក់សាំងរួចរាល់ហើយ រាងកាយក៏នឹងវឹលត្រឡប់ទៅរកភាពប្រក្រតីវិញ និងបន្ទាប់ពីនោះទៅ បើមានមេរោគដូចគ្នានោះចូលមកទៀត រាងកាយនឹងចាត់ការភ្លាមតែម្តង ព្រោះរាងកាយរបស់យើងស្គាល់មេរោគនោះមុនរួចមកហើយតាមរយៈការចាក់វ៉ាក់សាំងហ្នឹងឯង តែ…តែប្រតិកម្មដែលរាងកាយរបស់កូនតូចម្នាក់ៗមានចំពោះវ៉ាក់សាំងនោះ មានច្រើនតិចមិនដូចគ្នាទេ ៖

– វ៉ាក់សាំងដែលគ្រូពេទ្យប្រាប់ថា “ចាក់ហើយ កូនអាចនឹងក្តៅខ្លួនណា៎” ក៏មិនចាំបាច់ត្រូវតែក្តៅខ្លួនគ្រប់គ្នានោះទេ ព្រោះវ៉ាក់សាំងតែមួយដូចគ្នានោះ ក្មេងខ្លះក្រោយពីចាក់ហើយ ក្តៅខ្លួន តែក្មេងខ្លះនៅប្រក្រតីធម្មតា។

– “មិនមែនទេ!” ដែលថា វ៉ាក់សាំងគ្រប់ប្រភេទ ពេលចាក់ហើយត្រូវតែក្តៅខ្លួននោះ។

– ក្មេងដែលមានអាការក្តៅខ្លួន មិនបានមានន័យថា កើតប្រតិកម្មចាញ់វ៉ាក់សាំងនោះទេ។

ចុងក្រោយបំផុតដែល ឡារ៉ែនចង់ផ្តាំផ្ញើនោះគឺ ប្រហែលជាគ្មានឪពុកម្តាយម្នាក់ណាចង់ឃើញកូនឈឺថ្កាត់ ឬមិនស្រួលខ្លួនសូម្បីតែបន្តិចណាឡើយ ដូច្នេះហើយទើបការសាងប្រព័ន្ធការពារជំងឺដល់រាងកាយតូចមួយរបស់កូនដោយវិធីការចាក់វ៉ាក់សាំងនេះ គឺជាវិធីការមួយដែលល្អបំផុតក្នុងការការពារជំងឺ ជាពិសេសបំផុតនៅលើក្មេងតូចដែលប្រព័ន្ធការពារជំងឺនៅមិនទាន់ល្អឥតខ្ចោះ។

បានដឹងបែបនេះហើយ កុំភ្លេចនាំកូនតូចទៅទទួលយកវ៉ាក់សាំងតាមដែលក្រសួងសុខាភិបាលបានកំណត់ទុកតាមពេល​​វេលាដែលត្រឹមត្រូវស័ក្តសមផង៕

ស្រ្តីដែលកំពុងតាំងគភ៌មានឱកាសងាយនឹងឈឺថ្កាត់ខ្លាំងណាស់ បើមិនស្រួលខ្លួន ឬកើតរោគគ្រុនផ្តាសាយនោះ អាចនឹងមានក្តីកង្វល់ថា តើគួរតែត្រូវមើលថែទាំខ្លួនឯងយ៉ាងណា? ញ៉ាំថ្នាំអ្វីបានខ្លះ? តើវានឹងហុចផលប៉ះពាល់ដល់កូនក្នុងផ្ទៃដែរឬទេ?។ ថ្ងៃនេះ ឡារ៉ែន មានចម្លើយមកជម្រាបជូន។

ស្រ្តីជាច្រើននាក់ដែលកំពុងស្ថិតក្នុងអំឡុងការតាំងគភ៌ អាចនឹងឈឺថ្កាត់ ឬកើតជំងឺគ្រុនផ្តាសាយដោយមិនបានដឹងខ្លួនមុនបាន ដោយសារតែខណៈពេលដែលស្រ្តីមានគភ៌មានប្រព័ន្ធប្រឆាំងជំងឺថយចុះនោះ នៅពេលកើតជំងឺហើយ ក៏ច្រើនតែក្រជាជាងប្រក្រតី។ ការកើតជំងឺគ្រុនផ្តាសាយបែបប្រក្រតី នឹងគ្មានផលប៉ះពាល់ដល់កូនក្នុងគភ៌ឡើយ ដោយស្រ្តីមានគភ៌អាចញ៉ាំថ្នាំបាន តែត្រូវតែជាថ្នាំដែលគ្រូពេទ្យរៀបចំឱ្យប៉ុណ្ណោះ មិនអាចរកទិញតាមឱសថស្ថានទូទៅយកមកញ៉ាំដោយខ្លួនឯងបានទេ ព្រោះថ្នាំបញ្ចុះកម្តៅប្រភេទខ្លះអាចនឹងហុចផលប៉ះពាល់ដល់ទាំងម្តាយ និងកូនក្នុងគភ៌បាន ដូច្នេះបើសិនជាត្រូវញ៉ាំថ្នាំ គួរប្រឹក្សាជាមួយគ្រូពេទ្យជាមុនសិន។

អាការនៃជំងឺគ្រុនផ្តាសាយក្នុងអំឡុងពេលមានគភ៌

– ហៀរសំបោរ

– ឈឺក្បាល ក្តៅខ្លួន

– តឹងច្រមុះ ក្អក កណ្តាស់

– អ្នកខ្លះអាចនឹងមានអារម្មណ៍ថា ក្តៅរងា ក្តៅរងា

បើមានអាការធ្ងន់ធ្ងរ ដូចជា ក្អកកាន់តែខ្លាំងឡើង ស្លេស្ម៍ឡើងពណ៌បៃតង ហត់ដង្ហក់ ឬមានគ្រុនក្តៅខ្លាំង ញ៉ាំថ្នាំហើយអាការនៅតែមិនធូស្រាលនោះ គួរប្រញាប់ទៅជួបគ្រូពេទ្យ មិនគួរទិញថ្នាំថ្នាំមកញ៉ាំដោយខ្លួនឯងឡើយ។ បើមានអាការធ្ងន់ធ្ងរជ្រៀតជ្រែក ឬគ្រុនក្តៅខ្លួនលើស 1 សប្តាហ៍ ស្រ្តីមានគភ៌ប្រញាប់ទៅប្រឹក្សាជាមួយគ្រូពេទ្យកុំបង្អង់យូរ។

វិធីមើលទាំខ្លួន និងព្យាបាលអាការគ្រុនផ្តាសាយក្នុងអំឡុងពេលមានគភ៌

– ពេលស្រ្តីមានគភ៌ចាប់ផ្តើមមានអាការគ្រុនផ្តាសាយ គួរមើលថែទាំរាងកាយដោយការស្លៀកសម្លៀកបំពាក់ឱ្យកក់ក្តៅជាប់ជានិច្ច។

– បើមានគ្រុនក្តៅ គួរជូតខ្លួនដោយក្រណាត់សើម ឬងូតទឹកក្តៅឧណ្ហៗ នឹងជួយឱ្យបំភាយកម្តៅចេញពីរាងកាយបានល្អ។

– គួរគេងសម្រាករាងកាយឱ្យបានគ្រប់គ្រាន់ ញ៉ាំទឹកក្តៅឧណ្ហៗឱ្យបានច្រើន។

– ពេលគេងគួរដាក់ក្បាលឱ្យខ្ពស់ឡើងបន្តិច ដើម្បីជួយឱ្យដកដង្ហើមបានស្រួល

– គួរស្ថិតនៅក្នុងស្ថានភាពជុំវិញខ្លួនដែលមានខ្យល់អាកាសចេញចូលល្អ និងទីកន្លែងដែលទូលាយស្រឡះ។

– ញ៉ាំអាហារឱ្យគ្រប់ 5 ប្រភេទក្រុម និងផ្លែឈើស្រស់ឱ្យបានច្រើន ព្រោះផ្លែឈើមានវីតាមីនប្រឆាំងនឹងអនុមូលឥស្សរៈ។

ទាំងអស់នេះ បើស្រ្តីមានគភ៌ញ៉ាំអាហារមិនចូល ឬគ្មានអារម្មណ៍ចង់ញ៉ាំអាហារនោះ សាកល្បងជ្រើសរើសញ៉ាំអាហារទន់ៗ ដូចជា បបរសាមចូក បបរត្រី ទឹកផ្លែឈើ ឬទឹកដោះពពែបន្ថែមក៏បាន ដើម្បីឱ្យបានសារធាតុអាហារគ្រប់ចំនួនក្នុងអំឡុងពេលមានគភ៌នេះ ព្រោះរាងកាយអ្នកម្តាយត្រូវការសារធាតុអាហារទៅចិញ្ចឹមកូនតូចនៅក្នុងគភ៌៕

ស្រ្តីជាច្រើននាក់ញៀនកាហ្វេ ឬភេសជ្ជៈដែលមានជាតិកាហ្វេអ៊ីនជាប្រចាំនោះ ត្រូវតែញ៉ាំរាល់ថ្ងៃ ថ្ងៃណាមិនបានញ៉ាំនឹងមានអាការមួម៉ៅ ឈឺក្បាល មិនស្រួលខ្លួនជានិច្ច តែនៅពេលមានផ្ទៃពោះ តើគួរធ្វើយ៉ាងម៉េចស្រួលទៅ?

ទោះជាស្រ្តីមានគភ៌ជាច្រើននាក់អាចញ៉ាំអាហារបានដូចប្រក្រតីមែន តែនៅក្នុងអាហារមួយចំនួន វាចាំបាច់ណាស់ដែលត្រូវចៀសវាងដើម្បីវិវឌ្ឍនាការ និងសុខភាពរបស់កូនតូចនៅក្នុងផ្ទៃ ព្រោះអាហារដែលអ្នកម្តាយញ៉ាំចូលទៅនោះនឹងត្រូវបានបញ្ជូនទៅដល់កូនតូចក្នុងគភ៌ផងដែរ។

ទោះជានៅមិនទាន់មានលទ្ធផលសរុបពីការស្រាវជ្រាវដែលអះអាងច្បាស់លាស់ថា ជាតិកាហ្វេអ៊ីននៅក្នុងភេសជ្ជៈ ឬកាហ្វេមានផលប៉ះពាល់ដល់កូនជីវិតនៅក្នុងគភ៌ ឬក៏អត់មែនក៏ដោយ តែបរិមាណដែលច្រើនជ្រុលពេក អាចបង្កើនភាពប្រថុយប្រថានដល់បញ្ហាសុខភាពរបស់កូនតូចក្នុងគភ៌អ្នកម្តាយបាន ដូចជា ផលប៉ះពាល់ដល់សរសៃឈាម និងប្រព័ន្ធបេះដូង ជាដើម។ លោកគ្រូពេទ្យតែងណែនាំឱ្យចៀសវាង ឬកំណត់បរិមាណឱ្យតិចបំផុត។

ស្រ្តីមានគភ៌អាចនឹងកំណត់បរិមាណកាហ្វេអ៊ីនក្នុងភេសជ្ជៈមិនឱ្យលើស 200 មីល្លីក្រាមក្នុងមួយថ្ងៃ ដែលបើសិនជាស្រ្តីមានគភ៌ចង់ញ៉ាំ ក៏អាចញ៉ាំបានបន្តិចបន្តួចដែរ និងមិនគួរញ៉ាំជាប្រចាំរាល់ថ្ងៃឡើយ តែដើម្បីក្តីសប្បាយចិត្តរបស់ម្តាយ និងវិវឌ្ឍនាការរបស់កូននៅក្នុងផ្ទៃ ស្រ្តីមានគភ៌ទាំងឡាយគួរតែតមភេសជ្ជៈដែលមានជាតិកាហ្វេអ៊ីន ឬកាហ្វេក្នុងអំឡុងពេលមានគភ៌ និងបំបៅដោះកូន។

ស្រ្តីមានផ្ទៃពោះដែលញៀនកាហ្វេ តើត្រូវជ្រើសរើសញ៉ាំភេសជ្ជៈបែបណាល្អ?

– ញ៉ាំទឹកផ្លែឈើ 100% គ្មានជាតិស្ករ ជាទឹកផ្លែឈើដែលច្របាច់ស្រស់ៗថ្មីៗ ព្រោះនឹងបានទទួលសារធាតុអាហារពីផ្លែឈើដោយត្រង់ តែគួរជ្រើសរើសផ្លែឈើដែលស្រស់ ស្អាត និងមិនចាំបាច់ប្រើស្ករឡើយ។

– ទឹកពិសាបរិសុទ្ធជាភេសជ្ជៈដែលមានប្រយោជន៍បំផុត គួរញ៉ាំទឹកស្អាតឱ្យបានគ្រប់គ្រាន់ ដើម្បីឱ្យរាងកាយបានទទួលភាពស្រស់បស់ និងអារម្មណ៍ស្រស់ថ្លា។

– ជ្រើសរើសញ៉ាំទឹកដោះដែលមានសារធាតុអាហារពីធម្មជាតិ ដូចជា ទឹកដោះពពែ ដែលមាន Omega 3, 6, 9 DHA និងAHA ដែលក្រៅពីគ្មានជាតិកាហ្វេអ៊ីនហើយ នៅជួយបង្កើនកាល់ស្យូម និងផ្តល់នូវសារធាតុអាហារ បំប៉នខួរក្បាល ប្រព័ន្ធប្រសាទ និងអភិវឌ្ឍការរីកចម្រើនធំធាត់ដល់កូនតូចនៅក្នុងគភ៌ទៀតផង។

បើស្រ្តីមានគភ៌ចង់ផ្តាច់កាហ្វេ អាចនឹងបន្ថយបរិមាណចុះម្តងបន្តិចៗ រហូតដល់ផ្តាច់បាននៅទីបំផុត ព្រោះបើតម ឬផ្តាច់ឈប់ញ៉ាំភ្លាមតែម្តងនោះ អាចនឹងធ្វើឱ្យមានអាការឆាប់មួម៉ៅ មានផលមិនល្អដល់អារម្មណ៍របស់ខ្លួនឯង និងសុខភាពផ្លូវចិត្តរបស់កូននៅក្នុងផ្ទៃបាន៕