Atletico Madrid - La Reine Media

Top 3 កីឡាករដណ្ដើមបានងារ «ឆ្នើមបំផុត» ច្រើនជាងគេក្នុងរដូវកាល 2022-2023

កីឡាករឆ្នើមបំផុតប្រចាំការប្រកួតគឺជាភស្ដុតាងបង្ហាញអំពីការចូលរួមប្រកួតដ៏អស្ចារ្យរបស់កីឡាករម្នាក់។ ខាងក្រោមនេះគឺជាកីឡាករ 3 រូបដែលទទួលបានពានរង្វាន់កីឡាករឆ្នើមបំផុតច្រើនជាងគេក្នុងរដូវកាល 2022-2023។

ទីបី ៖ Randal Kolo Muani (Eintracht Frankfurt)

Randal Kolo Muani គឺជាកីឡាករខ្សែប្រយុទ្ធដែលមានកម្លាំងស្វាហាប់ រត់លឿន និងមានបច្ចេកទេសទាត់ផ្ដាច់ល្អ។ កីឡាកររូបនេះទទួលបានពានរង្វាន់កីឡាករឆ្នើមជាងគេចំនួន 10 ប្រកួត។

ទីពីរ៖ Antoine Griezmann (Atletico Madrid)

ក្នុង 9 ប្រកួតចុងក្រោយបំផុតដែលបានចូលរួម Antoine Griezmann រកបាន 6 គ្រាប់ និងបង្កឱកាសបាន 6 គ្រាប់។ ជាសរុប កីឡាករនេះដណ្ដើមបានពានរង្វាន់កីឡាករឆ្នើមបំផុតចំនួន 13 លើក ក្នុងរដូវកាល 2022-2023។

ទីមួយ៖ Lionel Messi (Paris Saint-Germain)

រដូវកាល 2022-2023 ប្រាកដជាពេលវេលាដ៏ល្អរបស់ Messi។ M10 បានជួយឱ្យអាហ្សង់ទីនលើកពាន World Cup។ ក្នុង 31 លើកដែលបានចូលប្រកួតនៅ Ligue 1 Messi ទាត់ចូលទីបាន 16 គ្រាប់ និងបង្កើតឱកាសបាន 16 គ្រាប់ជូនមិត្តរួមក្រុម។ M10 ទទួលបានពានរង្វាន់កីឡាករឆ្នើមជាងគេចំនួន 14 លើក នៅ Ligue 1 រដូវកាលនេះ៕

June 7, 2023

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

Griezmann ប្រកាសថា គេចង់បន្តនៅ Atletico ក្នុងពេលមានការចាប់អារម្មណ៍ពី Man Utd

តារាឆ្នើម Antoine Griezmann បានប្រកាសថា រូបគេចង់បន្តនៅជាមួយនឹងក្លិប Atletico Madrid និងចង់ប្រជែងដណ្តើមយកពានផ្សេងៗជាច្រើនទៀត ស្របពេលកំពុងតែមានការអារម្មណ៍យ៉ាងខ្លាំងពីសំណាក់ក្លិប Manchester United។

ក្រុមបិសាចក្រហមមួយនេះ កំពុងតែត្រៀមដាក់សំណើដេញថ្លៃក្នុងទឹកប្រាក់៨៥លានផោន (ស្មើនឹង១១០លានដុល្លារអាមេរិក) សម្រាប់ Griezmann វ័យ២៦ឆ្នាំ ដែលទើបតែបានប្រកាសកាលពីពេលថ្មីៗថា រូបគេត្រៀមលក្ខណៈរួចរាល់ហើយក្នុងការចាកចេញពីក្លិបយក្សរបស់ក្របខ័ណ្ឌ La Liga មួយនេះ។ ប៉ុន្តែ ទោបីជាយ៉ាងណា ក្នុងពេលនិយាយទៅកាន់គេហទំព័ររបស់ Atletico ខ្សែប្រយុទ្ធអន្តរជាតិបារាំងរូបនេះ បានបញ្ជាក់ថា រូបគេពិតជាស្រេកឃ្លានក្នុងការបន្តនៅជាមួយនឹងក្រុមរបស់លោក Diego Simeone ដោយសន្យាថា នឹងប្រជែងដណ្តើមយកពានរង្វាន់ផ្សេងៗទៀត។

Griezmann បានឲ្យដឹងថា៖ «វាបានក្លាយជាឆ្នាំដ៏អស្ចារ្យមួយ ហើយជាការរំពឹងទុក ខ្ញុំអាចអភិវឌ្ឍជារៀងរាល់ឆ្នាំ និងឈ្នះពានជាច្រើនទៀតជាមួយនឹងក្រុមនេះ។ ខ្ញុំនឹងធ្វើរាល់អ្វីៗទាំងអស់ដែលអាចទៅរួច»។ រូបគេបាននិយាយរួចជាស្រេចអំពីការប្រជែងនៅរដូវកាលក្រោយ និងរបៀបដែល Atletico ត្រូវតែពង្រឹងក្រុមរបស់ខ្លួនជាមួយនឹងមិត្តរួមជាតិបារាំងរបស់គេគឺ Alexandre Lacazette ដែលស្ថិតយ៉ាងប្រកៀកក្នុងការផ្ទេរមកនៅអេស្ប៉ាញដែរ។

អតីតតារាឆ្នើមរបស់ក្លិប Real Sociedad រូបនេះបានឲ្យដឹងថា៖ «យើងពិតជារីករាយណាស់ ពីព្រោះយើងបានសម្រេចគោលដៅរបស់យើង ហើយយើងប្រហែលជាអាចសម្រេចបាននូវគោលដៅជាច្រើនទៀត។ នៅឆ្នាំក្រោយនេះ យើងនឹងមានគោលដៅ និងការប្រជែងថ្មីៗ»៕
ប្រភពពី៖ The Sun

May 26, 2017

Isco ជួយឲ្យ Real ទម្លាក់ Atletico ជាលើកទី៤ ដើម្បីទៅវគ្គផ្តាច់ព្រ័ត្រនៃ Champions League

ក្រុម Real Madrid របស់លោក Zinedine Zidance បានសង្គ្រោះការប្រកួតរបស់ខ្លួនយ៉ាងល្អដោយធ្វើឲ្យទាំងក្រុម Atletico Madrid និងលោក Diego Simeone ជួបនឹងការខកចិត្តដ៏ធំមួយ ក្រោយពីក្រុម Real បានរងបរាជ័យក្នុងលទ្ធផល ២-១ ក្នុងការប្រកួតជើងទី២នៃវគ្គពាក់កណ្តាលផ្តាច់ព្រ័ត្រ កាលពីថ្ងៃពុធម្សិលមិញនេះ ប៉ុន្តែ ទោះជាក្រុមរបស់លោក Zinedine Zidance ចាញ់ក្នុងការប្រកួតជើងទីពីរនេះក៏ដោយ ក៏នៅតែបានឈានទៅវគ្គផ្តាច់ព្រ័ត្រដដែល ជាមួយនឹងលទ្ធផលរួមទាំងពីរជើងគឺ ៤-២។

កីឡាករ Saul Niguez និង Antoine Griezmann របស់ Atletico បានធ្វើឲ្យក្រុម Real ស្ថិតក្នុងការភិតភ័យ តាមរយៈការស៊ុតបាល់បញ្ចូលទី២គ្រាប់នៅត្រឹមតែនាទី ទី១៦។ ប៉ុន្តែ សុបិនអាក្រក់របស់ Real បានបញ្ចប់ត្រឹមតែនាទី ទី៤២ ប៉ុណ្ណោះ ដោយនៅពេលនោះខ្សែប្រយុទ្ធ Karim Benzema បានអូសបាល់ផុតខ្សែការពារ៣នាក់របស់ក្រុម Atletico ដើម្បីបញ្ជូនបាល់យ៉ាងល្អទៅឲ្យ Toni Kroos ដែលបានបង្ខំឲ្យអ្នកចាំទី Jan Oblak ត្រូវធ្វើការសង្គ្រោះបាល់ទាំងលំបាកមួយ ប៉ុន្តែ Isco បានបន្ថែមបាល់ផ្លាតចេញពីដៃអ្នកចាំទីចូលទីតែម្តង។

ក្រុមរបស់លោក Simeone ស្ទើរតែធ្វើការស្រោចស្រង់ជ័យជម្នះដ៏អស្ចារ្យមួយបានទៅហើយ ប៉ុន្តែការរងបរាជ័យដ៏ធ្ងន់ធ្ងររបស់ពួកគេក្នុងលទ្ធផល ៣-០ កាលពីការប្រកួតជើងទី១ នាសប្តាហ៍មុន បានបង្ហាញថា ជាការរងបរាជ័យដ៏ធំមួយ ខណៈដែលពួកគេបានធ្លាក់ចេញក្រោមស្នាដៃក្រុម Real ក្នុងការប្រកួតក្របខ័ណ្ឌ Champions League នេះជាលើកទី៤ជាប់ៗគ្នាហើយ។

ក្រុម Real ដែលជាម្ចាស់ការពារតំណែងជើងឯកក្របខ័ណ្ឌ Champions League នឹងធ្វើដំណើរទៅកាន់ទីក្រុង Cardiff នាថ្ងៃទី ៣ ខែមិថុនា ដើម្បីជួបជាមួយនឹងក្រុម Juventus ដោយសម្លឹងរកការក្លាយជាក្រុមដំបូងគេក្នុងការការពារពានរង្វាន់នេះយ៉ាងជោគជ័យក្នុងរយៈពេល២៥ឆ្នាំ ក្រោមរូបមន្តថ្មីនៃយុទ្ធនាការរបស់ UEFA។

លោក Zidane គ្រូបង្វឹករបស់ក្រុម Real បានឲ្យដឹងថា៖ «ខ្ញុំពិតជារីករាយណាស់ក្នុងការឈានទៅវគ្គផ្តាច់ព្រ័ត្រនេះ។ វាគឺជាដំណើរផ្លូវដ៏វែងឆ្ងាយមួយក្នុងការទៅកាន់ទីនោះ ហើយវាក៏ជាផ្លូវដ៏វែងឆ្ងាយផងដែរក្នុងការឈានទៅដល់វគ្គនោះក្នុងរយៈពេល២ឆ្នាំជាប់ៗគ្នា។ ខ្ញុំត្រូវតែអបអរចំពោះក្រុមមួយនេះ»៕

https://www.youtube.com/watch?v=zoVKLQ-VSd0
ប្រភពពី៖ The Sun

May 11, 2017

លោក Simeone ជំរុញឲ្យ Atletico ផ្តល់ការខកចិត្តដល់ Real ម្តង នៅរាត្រីនេះ

លោក Diego Simeone បានលើកទឹកចិត្តឲ្យក្រុម Atletico Madrid ជម្នះលើឧបស័គ្គ ក៏ដូចជាសំណាងអាក្រក់ផ្សេងៗឱ្យបាន នៅពេលធ្វើជាម្ចាស់ផ្ទះទទួលក្រុមដែលស្ថិតក្នុងទីក្រុងតែមួយជាមួយគ្នាគឺ Real Madrid នៅក្នុងការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី២ នាកីឡដ្ឋាន Vicente Calderon នារាត្រីនេះ។

Atletico នឹងត្រូវជួបការងារដ៏ធំមួយក្នុងការស្រោចស្រង់ពីការរងបរាជ័យ ៣-០ ក្នុងការប្រកួតជើងទី១កាលពីសប្តាហ៍មុន ប្រសិនបើពួកគេចង់គេចឲ្យផុតពីការធ្លាក់ចេញពីយុទ្ធនាការនេះជាលើកទី៤ជាប់ៗគ្នា ក្រោមស្នាដៃក្រុម Real។ ក្រុមយក្សអេស្ប៉ាញ Real បានទម្លាក់ក្រុម Atletico បីរដូវកាលជាប់ៗគ្នាក្នុងក្របខ័ណ្ឌកំពូលអឺរ៉ុប ក្រោយពីបានយកឈ្នះលើគូប្រកួតរបស់ពួកគេ ៤-១ នៅនាទីបន្ថែម១៥នាទីពីរដងនៃវគ្គផ្តាច់ព្រ័ត្រ កាលពីឆ្នាំ២០១៤ មុននឹងយកឈ្នះលើក្រុម Atletico ម្តងទៀត ក្នុងលទ្ធផលទាំងពីរជើង ១-០ វគ្គ៨ក្រុមចុងក្រោយ ឆ្នាំ២០០១៥។ Atletico បានបន្តជួបការខកចិត្តពេលប៉ះ Real ក្នុងវគ្គផ្តាច់ព្រ័ត្រនៃក្របខ័ណ្ដ Champions League កាលពីឆ្នាំ២០១៦ ដែលកាលនោះ ពួកគេបានរងបរាជ័យដោយការស៊ុតបាល់ប៉េណាល់ទី ក្រោយពីបញ្ចប់ត្រឹមលទ្ធផលស្មើ ១-១ បន្ទាប់ពីរយៈពេល១៥នាទីពីរដង។

នៅមុនពេលឈានទៅកាន់ការប្រកួតនៅថ្ងៃនេះ លោក Simeone បានប្រាប់ក្នុងសន្និសីទសារព័ត៌មានថា៖ «វាពិតជាលំបាកណាស់ វាលំបាកក្នុងការលើកទឹកចិត្តដល់កីឡាករក្នុងការប្រកួតមួយបែបនេះ។ យើងបានរងបរាជ័យក្នុងលទ្ធផល ៣-០ ក្នុងការប្រកួតលីក និងក្នុងការប្រកួតជើងទី១។ យើងក៏ធ្លាប់រងបរាជ័យក្នុងការប្រកួតវគ្គផ្តាច់ព្រ័ត្រ២លើកផងដែរ ហេតុនេះ វានឹងក្លាយជាការប្រកួតដ៏ស្វិតស្វាញមួយ»។

គ្រូបង្វឹករូបនេះបានបន្ថែមទៀតថា៖ «យើងត្រូវតែការពារឲ្យបានល្អនៅថ្ងៃនេះ។ ភាពរឹងមាំក្នុងតំបន់ការពារ នឹងរក្សាក្តីសង្ឃឹមរបស់យើងបានក្នុងការប្រកួតនេះ»។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពពី៖ Daily Star

May 10, 2017

Griezmann យល់ព្រមលើប្រាក់បៀរវត្សរ៍ជាមួយ Man Utd ក្រោយ Atletico ធ្លាក់ពី Champions League

ក្លិបបិសាចក្រហម Manchester United បានយល់ព្រមលើលក្ខខណ្ឌផ្ទាល់ជាមួយនឹងខ្សែប្រយុទ្ធ Antoine Griezmann ដើម្បីត្រួសត្រាយផ្លូវឲ្យរូបគេផ្ទេរទៅកាន់កីឡដ្ឋាន Old Trafford។ បើយោងទៅតាមគេហទំព័រ The Sun កិច្ចសន្យារយៈពេល៥ឆ្នាំដែលផ្តល់ចំណូល២៨ម៉ឺនផោន (ស្មើនឹង៣៦ម៉ឺនដុល្លារអាមេរិក) ក្នុងមួយសប្តាហ៍ ត្រូវបានទទួលយកដោយខ្សែប្រយុទ្ធរបស់ក្លិប Atletico Madrid រូបនេះ។

Man United នឹងត្រូវចំណាយប្រាក់៨៩លានផោន (ស្មើនឹង១១៥លានដុល្លារអាមេរិក) ដើម្បីទិញរំលាយកិច្ចសន្យារបស់ Griezmann ក្នុងក្លិប Atletico ហើយបើកបូកទាំងប្រាក់បៀរវត្សរ៍ និងប្រាក់ឧបត្ថម្ភផ្សេងៗ ក្រុមបិសាចក្រហមមួយនេះអាចនឹងចំណាយប្រាក់ក្នុងការផ្ទេរនេះដល់ទៅ១៧០លានផោន។ ខ្សែប្រយុទ្ធអន្តរជាតិបារាំងវ័យ២៦ឆ្នាំរូបនេះ គឺជាគោលដៅទិញចូលទី១របស់លោក Jose Mourinho សម្រាប់រដូវកាលក្រោយ ខណៈដែលលោកនឹងត្រូវពង្រឹងក្រុមរបស់លោកដើម្បីប្រជែងដណ្តើមពានក្របខ័ណ្ឌ Premier League។

Griezmann ធ្លាប់បានសម្តែងនូវការស្ទាក់ស្ទើរ ដោយសារតែក្រុម Man United កំពុងតែស្ថិតក្នុងការប្រជែងយកកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ។ ស្របពេលជាមួយគ្នានេះ ក្រុម Atletico ដឹងពីការអភិវឌ្ឍក្រុមរបស់ខ្លួន និងបានចាប់អារម្មណ៍ទៅលើខ្សែប្រយុទ្ធ Alexis Sanchez របស់ក្លិប Arsenal និងខ្សែប្រយុទ្ធ Alexandre Lacazette របស់ក្លិប Lyon ដើម្បីជំនួសកន្លែងរបស់ Griezmann៕

ប្រភពព័ត៌មាន៖ The Sun

May 4, 2017

Ronaldo ធ្វើឲ្យ Atletico ត្រូវការអព្ភូតហេតុ ដើម្បីសង្គ្រោះការធ្លាក់ចេញ

កំណត់ត្រានៃការរកគ្រាប់បាល់បញ្ចូលទីរបស់ខ្សែប្រយុទ្ធ Cristiano Ronaldo ត្រូវបានចាត់ទុកថា ជាកំណត់ត្រាពិសេសតែមួយ ដោយលោកគ្រូបង្វឹក Zinedine Zidane ខណៈដែលការរកគ្រាប់បាល់បញ្ចូលទី៣គ្រាប់របស់គេ បានជួយឲ្យក្រុម Real Madrid ស្ថិតយ៉ាងប្រកៀកក្នុងការឈានទៅវគ្គផ្តាច់ព្រ័ត្រមួយផ្សេងទៀតនៃក្របខ័ណ្ឌ Champions League តាមរយៈការផ្តួលក្រុម Atletico Madrid ៣-០ កាលពីថ្ងៃអង្គារ។

ការស៊ុតបាល់បញ្ចូលទី៣គ្រាប់របស់ Ronaldo គឺជាការរកបានជាលើកទី២នៅពេលប្រកួតជាមួយនឹងក្រុម Atletico នៅរដូវកាលនេះ និងជាលើកទី២ជាប់ៗគ្នាក្នុងក្របខ័ណ្ឌ Champions League ក្រោយពីក៏បានស៊ុតបាល់បញ្ចូលទី៣គ្រាប់ផងដែរដើម្បីផ្តួលក្រុម Bayern Munich ក្នុងការប្រកួតវគ្គ៨ក្រុមចុងក្រោយ។ លោក Zidane បានឲ្យដឹងថា៖ «ការរកគ្រាប់បាល់បញ្ចូលទីគឺជាសមត្ថភាពដែលរូបគេមានខ្លាំងជាងកីឡាករផ្សេងៗ ដែលធ្វើឲ្យរូបគេមានលក្ខណៈយ៉ាងពិសេសតែមួយ»។ ការទទួលជ័យជម្នះនេះបានធ្វើឲ្យក្រុម Real បន្តធ្វើការគ្រប់គ្រងលើក្រុម Atletico ក្នុងក្របខ័ណ្ឌ Champions League ក្នុងរយៈពេលបួនរដូវកាលចុងក្រោយនេះ។

Real បានទម្លាក់ក្រុមរបស់លោក Diego Simeone រាល់ការជួបគ្នាទាំង៣លើកក្នុងក្របខ័ណ្ឌកំពូលអឺរ៉ុបរយៈពេល៣រដូវកាលចុងក្រោយនេះ ក្នុងនោះរាប់បញ្ចូលទាំងក្នុងវគ្គផ្តាច់ព្រ័ត្រកាលពីឆ្នាំ២០១៤ និងឆ្នាំ២០១៥ ផងដែរ។ Ronaldo បានធ្វើឲ្យក្រុម Real Madrid ចាប់ផ្តើមយ៉ាងល្អតាមរយៈការរកគ្រាប់បាល់បើកឆាកនៅទីនាទី ទី១០ មុននឹងស៊ុតបាល់បញ្ចូលទី២គ្រាប់ទៀតនៅរយៈពេល២០នាទីចុងក្រោយ។ Ronaldo បានឲ្យដឹងថា៖ «ក្រុមនេះពិតជាអស្ចារ្យណាស់។ ខ្ញុំបានរកគ្រាប់បាល់បញ្ចូលទី ប៉ុន្តែ ក្រុមនេះ លេងបានយ៉ាងអស្ចារ្យតាំងពីចាប់ផ្តើមប្រកួត»។ ការទទួលជ័យជម្នះក៏បានជួយឲ្យ Real ស្ថិតនៅផ្លូវក្នុងការក្លាយជាក្រុមដំបូងគេក្នុងការការពារពាន Champions League យ៉ាងជោគជ័យក្នុងរយៈពេល២៧ឆ្នាំ៕

ប្រភពពី៖ worldsoccertalk

May 3, 2017

ការជួបគ្នា៤លើកកាលពីមុនរវាងក្រុម Real និង Atletico ក្នុងក្របខ័ណ្ឌអឺរ៉ុប

Real Madrid និង Atletico Madrid នឹងត្រូវជួបគ្នាជាលើកទី៥ក្នុងការប្រកួតក្របខ័ណ្ឌកំពូលអឺរ៉ុប នៅពេលដែលក្រុម Atletico ធ្វើដំណើរទៅកាន់កីឡដ្ឋាន Santiago Bernabeu ដើម្បីធ្វើការប្រកួតជើងទី១ នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរាត្រីនេះ។ រាល់ការជួបគ្នា៤លើកកាលពីមុន បានបញ្ចប់ទាំងការខកចិត្តសម្រាប់ក្រុម Atletico ខណៈដែលក្រុម Real នឹងសម្លឹងរកការឈ្នះពានជាលើកទី៣ក្នុងរយៈពេល៤ឆ្នាំតាមរយៈការផ្តួលគូប្រជែងស្ថិតក្នុងទីក្រុងតែមួយរបស់ពួគគេ។ ខាងក្រោមនេះគឺការជួបគ្នា៤លើកកាលពីមុននៃក្របខ័ណ្ឌកំពូលអឺរ៉ុប។

ការប្រកួត European Cup វគ្គពាក់កណ្តាលផ្តាច់ព្រ័ត្រកាលពីឆ្នាំ១៩៥៩

ក្រុម Atletico បានជួបសំណាងអាក្រក់ បើទោះបីបានទទួលលទ្ធផលស្មើទាំងពីរជើងក៏ដោយ ក្នុងការប្រកួតកាលពីឆ្នាំ១៩៥៩។ ក្រុម Real បានទទួលជ័យជម្នះក្នុងការប្រកួតជើងទី១ក្នុងលទ្ធផល ២-០ នៅមុនពេលក្រុម Atletico បានតាមស្មើវិញក្នុងរយៈពេល២សប្តាហ៍ក្រោយមក បន្ទាប់ពីឈ្នះ ១-០។ ប៉ុន្តែ កាលនោះ ច្បាប់គ្រាប់បាល់ក្រៅដីមិនទាន់ត្រូវបានអនុវត្តឡើយ ហេតុនេះ ក្រុមទាំងពីរត្រូវធ្វើការប្រកួតវគ្គ Playoff។ Real បានទទួលជ័យជម្នះ ២-១ ក្នុងការប្រកួតវគ្គ Playoff នោះដែលត្រូវបានរៀបចំឡើងនៅទីក្រុង Zaragoza។

ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៤

Atletico បានជួបការខកចិត្តដ៏ធំ ក្រោយពីពួកគេមានគ្រាប់បាល់នាំមុខរហូតដល់ទៅនាទី ទី៩៣ នៅមុនពេលក្រុម Real បានវាយបកតាមស្មើវិញ ហើយក្រុម Real បានបន្តលើកពាន Champions League ក្រោយពីបានផ្តួលក្រុម Atletico ក្នុងលទ្ធផល ៤-១ នៅនាទីបន្ថែម១៥នាទីពីរដង។

ការប្រកួត Champions League វគ្គ៨ក្រុមចុងក្រោយ កាលពីឆ្នាំ២០១៥

ក្រោយពីបានបញ្ចប់ក្នុងលទ្ធផលស្មើ ០-០ ក្នុងផ្ទះខ្លួនឯងពីការប្រកួតជើងទី១ Atletico បានជួបសំណាងអាក្រក់ក្នុងជើងទី២ ក្រោយពីខ្សែប្រយុទ្ធ Javier Hernandez បានរកគ្រាប់បាល់ឈ្នះនៅចុងម៉ោងដើម្បីជួយឲ្យ Real ដណ្តើមបានជ័យជម្នះទាំងពីរជើង ១-០។

ការប្រកួត Champions League វគ្គផ្តាច់ព្រ័ត្រ កាលពីឆ្នាំ២០១៦

ការប្រកួតនេះ បានស្ថិតក្នុងភាពស្វិតស្វាញយ៉ាងខ្លាំង ខណៈដែល Real បានរកគ្រាប់បាល់នាំមុខមុន មុននឹងក្រុម Atletico បានធ្វើការវាយបកតាមស្មើវិញនៅរយៈពេល១១នាទីចុងក្រោយ ដើម្បីបញ្ចប់ក្នុងលទ្ធផលស្មើ ១-១។ ក្រោយពីលទ្ធផលនៅតែរក្សា ១-១ បន្ទាប់ពីនាទីបន្ថែម១៥នាទីពីរដង ក្រុម Real នៅតែជួបសំណាងល្អ ដោយពួកគេបានយកឈ្នះក្នុងការស៊ុតបាល់ប៉េណាល់ទី ៥-៣ ដើម្បីលើកពានជាលើកទី១១របស់ពួកគេ៕

May 2, 2017

Atletico សម្លឹងរកការសងសឹក Real នៅរាត្រីនេះ

Atletico Madrid និងលោក Diego Simeone ដែលជាគ្រូបង្វឹករបស់ពួកគេ នឹងស្រេកឃ្លានក្នុងការសងសឹកនៅកីឡដ្ឋាន Santiago Bernabeu ពេលជួបក្រុម Real Madrid ក្នុងការប្រកួតវគ្គ១/២ផ្តាច់ព្រ័ត្រ ជើងទី១ នៃក្របខ័ណ្ឌ Champions League នៅរាត្រីនេះ ស្របពេលដែលក្រុមភ្ញៀវមានខ្សែប្រយុទ្ធដ៏មុតស្រួចបំផុតគឺខ្សែប្រយុទ្ធ Antoine Griezmann។

ក្រុម Atletico សង្ឃឹមថា នឹងលុបចោលនូវការខកចិត្តផ្សេងៗទាក់ទងនឹងការរងបរាជ័យក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ កាលពីឆ្នាំ២០១៤ និងឆ្នាំ២០១៦ ក្រោមស្នាដៃ Real។ ក្រុម Atletico បានបាត់បង់ Jose Maria Gimenez ដោយសារតែបញ្ហារបួសក្រលៀន ដែលមានន័យថា ក្រុមភ្ញៀវ នឹងត្រូវអវត្តមានខ្សែការពារដ៏សំខាន់បីនាក់របស់ពួកគេ។ ស្របពេលដែលក្រុមរបស់លោក Simeone មានកេរិ៍្តឈ្មោះទៅលើការមានតំបន់ការពារយ៉ាងរឹងមាំ ពួកគេក៏មានតំបន់ប្រយុទ្ធយ៉ាងមុតស្រួចផងដែរ ខណៈដែលពួកគេទើបតែបានផ្តួលក្រុម Las Palmas ក្នុងលទ្ធផល ៥-០ កាលពីចុងសប្តាហ៍មុននេះ ដោយខ្សែប្រយុទ្ធ Kevin Gameiro បានស៊ុតបាល់បញ្ចូលទី២គ្រាប់។

ទោះបីជាយ៉ាងណា ក្រុម Real របស់លោក Zinedine Zidane កំពុងតែសម្លឹងរកការធ្វើឲ្យពួកគេក្លាយជាក្រុមដំបូងគេក្នុងការការពារពាន Champions League យ៉ាងជោគជ័យ ក៏ដូចជាបញ្ចប់ការគ្រប់គ្រងរបស់ក្រុម Barcelona ក្នុងការប្រកួតក្របខ័ណ្ឌ La Liga។ លោក Zidane បានបង្ហាញឲ្យឃើញពីបំណងរបស់លោកក្នុងការប្រជែងដណ្តើមពានពីរក្នុងរដូវកាលតែមួយរួចជាស្រេច។ កីឡាករសំខាន់ៗជាច្រើនដូចជា Ronaldo, Gareth Bale, Karim Benzema, Luka Modric ឬ Toni Kroos សុទ្ធសឹងបានអវត្តមានក្នុងការប្រកួតលីក៣លើកចុងក្រោយរបស់ក្រុម Real។ ក្នុងពេលអវត្តមានកីឡាករឆ្នើមៗទាំងនេះ កីឡាករមួយចំនួនដូចជា Isco, Alvaro Morata និង Marco Asensio បានបង្ហាញពីទម្រង់លេងយ៉ាងល្អ ហើយ Real បានឈ្នះរាល់ការប្រកួតទាំង៣លើកនោះ តាមរយៈការស៊ុតបាល់បញ្ចូលទីសរុបដល់ទៅ១៣គ្រាប់។ ក្រុម Real បានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម Valencia ក្នុងលទ្ធផល ២-១ កាលពីចុងសប្តាហ៍ថ្មីៗនេះ។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕

ប្រភពពី៖ sports.yahoo

May 2, 2017

ភ្នាក់ងារ៖ Man United និង Griezmann បានព្រមព្រៀងលើហិរញ្ញវត្ថុរួចជាស្រេច

ក្រុមបិសាចក្រហម Manchester United និងខ្សែប្រយុទ្ធស្ថិតក្នុងរ៉ាដារបស់ពួកគេគឺ Antoine Griezmann បានឈានដល់ការព្រមព្រៀងគ្នាលើហិរញ្ញវត្ថុរួចជាស្រេច។ នេះបើយោងទៅតាមការអះអាងរបស់ភ្នាក់ងារម្នាក់។

តម្លៃខ្លួនទិញរំលាយកិច្ចសន្យាក្នុងទឹកប្រាក់៨៤លានផោន (ស្មើនឹង១០៧,៤លានដុល្លារអាមេរិក) ត្រូវបានកំណត់ទៅលើតារាឆ្នើមអន្តរជាតិបារាំងរូបនេះ ដែលជាគោលដៅរបស់ក្លិបធំៗភាគច្រើននៅអឺរ៉ុប ជាពិសេសក្លិប Paris Saint-Germain និងក្លិប Real Madrid។ កីឡាកររូបនេះបានបញ្ជាក់ថា រូបគេមិនចង់ចាកចេញពីក្លិប Atletico Madrid ឡើយ ប៉ុន្តែ លោក Vincent Rodriguez ដែលជាភ្នាក់ងារត្រូវបានទទួលស្គាល់ដោយ FIFA បានអះអាងថា កិច្ចព្រមព្រៀងរវាងក្រុមបិសាចក្រហម និង Griezmann ស្ទើរតែបំពេញរួចជាស្រេច។ លោក Rodriguez បានបញ្ជាក់នៅលើបណ្តាញសង្គម Twitter ថា៖ «កិច្ចព្រមព្រៀងផ្នែកហិរញ្ញវត្ថុរវាងក្លិប Atletico Madrid និង Manchester United អំពីការចុះហត្ថលេខាជាមួយនឹង Griezmann បានឈានដល់រួចជាស្រេច»។

ស្របពេលជាមួយគ្នានេះ លោក Eric Olhats ដែលជាទីព្រឹក្សារបស់លោក Griezmann ក៏ត្រូវបានគេដកស្រង់សម្តីផងដែរ ខណៈដែលលោកបានអះអាងថា Man United គឺជាក្លិបទី១មួយដែលបានដាក់សំណើជាផ្លូវការ ក្រោមការចាប់អារម្មណ៍ដ៏រឹងមាំបំផុត។ លោក Olhats បាននិយាយថា ការអះអាងថា Griezmann មិនចង់ចាកចេញពីក្លិប Atletico នោះ គឺជារឿងមិនពិតឡើយ។ ការឈ្នះកៅអីទៅប្រកួតក្នុងក្របខ័ណ្ឌ Champions League របស់ក្រុម Manchester United នារដូវកាលក្រោយ តាមរយៈការឈ្នះពាបន Europa League ឬ តាមរយៈការបញ្ចប់ក្នុងចំណាត់ថ្នាក់កំពូលទាំង៤ នឹងក្លាយជាចំណុចដ៏សំខាន់ក្នុងការនាំយក Griezmann៕

ប្រភពពី៖ The Mirror

April 25, 2017

Tag: Atletico Madrid