Arsene Wenger - La Reine Media

លោក Wenger សរសើរ Giroud ខណៈ Arsenal ផ្តួល Leicester ទាំងប្រផិតប្រផើយ

លោក Arsene Wenger អ្នកចាត់ការទូទៅរបស់ក្រុមកាំភ្លើងធំ Arsenal បានសម្តែងនូវការធូរស្រាលចិត្តជុំវិញការសម្រេចចិត្តរបស់ Olivier Giroud ក្នុងការបន្តនៅជាមួយក្លិប ក្រោយពីខ្សែប្រយុទ្ធអន្តរជាតិបារាំងរូបនេះបានជួយឲ្យក្រុមរបស់គេដណ្តើមបានជ័យជម្នះទាំងប្រផិតប្រផើយក្នុងលទ្ធផល 4-3 លើក្រុម Leicester City។

Giroud បានចូលលេងក្នុងនាមជាកីឡាករបម្រុងក្នុងពេលដែលក្រុម Arsenal កំពុងតែដេញតាមពីក្រោយ 3-2 ក្នុងការប្រកួតបើករដូវកាលនៅកីឡដ្ឋាន Emirates កាលពីថ្ងៃសុក្រ ហើយក្រោយពីមិត្តរួមក្រុមរបស់គេ Aaron Ramsey បានរកគ្រាប់បាល់តាមស្មើ រូបគេក៏បានរកគ្រាប់បាល់ឈ្នះនៅនាទីទី85តែម្តង។ ការចូលរួមរបស់ខ្សែប្រយុទ្ធ Alexandre Lacazette បានធ្វើឲ្យ Giroud កាន់តែបាត់បង់ឱកាសក្នុងជម្រើសទាំង11នាក់ដំបូងរបស់ក្រុម Arsenal ប៉ុន្តែក្រោយពីបានផ្តល់ឱកាសឲ្យខ្សែប្រយុទ្ធវ័យ30ឆ្នាំរូបនេះក្នុងការចាកចេញ លោក Wenger បានសម្តែងនូវការរំភើបយ៉ាងខ្លាំងដែលរូបគេបានសម្រេចចិត្តក្នុងការបន្តនៅជាមួយនឹងក្លិប។

លោក Wenger បានប្រាប់អ្នកយកព័ត៌មានថា៖ «វាពិតជាអស្ចារ្យណាស់។ ខ្ញុំបានបើកចំហទ្វារឲ្យរូបគេក្នុងដំណាក់កាលជាច្រើន ពីព្រោះខ្ញុំដឹងថា វាពិតជាសំខាន់ណាស់សម្រាប់រូបគេក្នុងការលេង ប៉ុន្តែខ្ញុំមិនចង់ឲ្យគេចាកចេញឡើយ»។ អ្នកចាត់ការទូទៅរូបនេះបានបន្ថែមទៀតថា៖ «រូបគេបានសម្រេចចិត្តក្នុងការបន្តនៅ ហើយវាជាថ្ងៃមួយក្នុងចំណោមថ្ងៃដ៏អស្ចារ្យបំផុតក្នុងរយៈពេលប៉ុន្មានសប្តាហ៍ចុងក្រោយនេះសម្រាប់ខ្ញុំ។ រូបគេពិតជាកីឡាករដ៏អស្ចារ្យ ប៉ុន្តែរូបគេមានបន្ទុកដ៏ធំមួយក្នុងក្រុមនេះ។ វាពិតជាធូរស្រាលសម្រាប់ខ្ញុំដែលរូបគេបានសម្រេចចិត្តក្នុងការបន្តនៅ»។

Lacazette ដែលបានផ្ទេរក្នុងតម្លៃខ្លួន46.5លានផោន (ស្មើនឹង60.3លានដុល្លារអាមេរិក) ពីក្លិប Lyon មកនោះ បានចាប់ផ្តើមយ៉ាងល្អនៅថ្ងៃនៃការបង្ហាញខ្លួនលើទឹកដីខ្លួនឯងជាលើកទី1របស់គេ តាមរយៈការជួយឲ្យក្រុម Arsenal មានគ្រាប់បាល់នាំមុខភ្លាមៗក្រោយពីលេងបានត្រឹមតែ85វិនាទី៕

ប្រភពពី៖ Sky Sport

August 12, 2017

Wenger ត្រៀមជួបរដូវកាលដ៏តានតឹងបំផុត ចាប់ពី Arsenal ជួប Leicester នាយប់នេះទៅ

លោក Arsene Wenger បានរំពឹងទុកថា ក្របខ័ណ្ឌ Premier League នៅរដូវកាលនេះនឹងក្លាយជាយុទ្ធនាការដ៏លំបាកបំផុតដែលលោកត្រូវជួបប្រទះក្នុងអំឡុងពេលនៃការដឹកនាំរបស់លោកក្នុងក្រុម Arsenal តាមរយៈការបញ្ជាក់ថា ការចំណាយប្រាក់ដ៏ច្រើនសន្ធឹកសន្ធាប់ពីសំណាក់គូប្រកួតដូចជា Manchester City បានធ្វើឲ្យការប្រជែងដណ្តើមពានកាន់តែមានភាពស្វិតស្វាញ និងតឹងតែងជាងមុន។

ក្រុម Arsenal នឹងចាប់ផ្តើមយុទ្ធនាការជាលើកទី21 របស់លោក Wenger តាមរយៈការចាប់ផ្តើមការប្រកួតនៅក្នុងផ្ទះខ្លួនឯងជាមួយនឹងក្រុម Leicester City នៅរាត្រីនេះ ហើយការដណ្តើមឲ្យបានលទ្ធផលដ៏ល្អមួយ ពិតជារឿងមួយសំខាន់ណាស់ ក្រោយពីពួកគេបានខកខានក្នុងការឈ្នះកៅអីទៅលេងក្នុងក្របខ័ណ្ឌ Champions League កាលពីរដូវកាលមុន។

ក្រុម Manchester City បានឈានមុខគេចំពោះការចំណាយប្រាក់ទិញចូលកីឡាករថ្មីនៅរដូវក្តៅនេះ ក្រោយពីបានចំណាយអស់ដល់ទៅ217លានផោន (ស្មើនឹង281លានដុល្លារអាមេរិក) លើកីឡាករថ្មីៗ ហើយលោក Wenger ជឿជាក់ថា មានក្រុមរហូតដល់ទៅ7ក្រុមដែលអាចមានសមត្ថភាពក្នុងការប្រជែងដណ្តើមពាន។ ប៉ុន្តែ គ្រូបង្វឹកសញ្ជាតិបារាំងរូបនេះបានកត់សម្គាល់ថា គូប្រជែងរបស់ក្រុម Arsenal ជាពិសេស Chelsea និង Tottenham Hotspurs ក៏នឹងផ្តល់នូវបញ្ហាផងដែរ។ នៅពេលដែលត្រូវបានចោទសួរថា តើទាំងអស់នេះនឹងក្លាយជារដូវកាលដ៏លំបាកបំផុតឬយ៉ាងណា?

លោក Wenger បានឆ្លើយថា៖ «ពិតមែនហើយ! ពីព្រោះបើយើងក្រឡេកមើលពីអ្វីដែលក្រុម Man City បានធ្វើ។ ពួកគេមានសកម្មភាពយ៉ាងពិសេសនៅក្នុងទីផ្សារដោះដូរកីឡាករ ខណៈដែល Manchester United ក៏មមាញឹកផងដែរ។ វាមិនទាន់បញ្ចប់នៅឡើយទេ ខណៈដែល Chelsea បានទិញ Alvaro Morata និងមិនទាន់បាត់បង់ Diego Costa នៅឡើយនោះ ហើយពួកគេនឹងទិញចូលកីឡាករថ្មីបន្ថែមទៀត។ នៅពេលនេះ ក្រុមដែលមានភាពមមាញឹកបំផុតលើទីផ្សារដោះដូរកីឡាករគឺក្រុម Man United, Man City និង Liverpool»។ ការប្រកួតនៅរាត្រីនេះនឹងចាប់ផ្តើមនៅម៉ោង1:45ទៀបភ្លឺ៕

ប្រភពពី៖ The Guardian

August 11, 2017

លោក Wenger ទាមទារឲ្យ Arsenal កសាងការជឿជាក់ ក្រោយឈ្នះពាន Community Shield

លោក Arsene Wenger បានអំពាវនាវឲ្យក្រុម Arsenal កសាងការជឿជាក់របស់ពួកគេ ក្រោយពីបានយកឈ្នះលើក្រុមតោខៀវ Chelsea ក្នុងការប្រកួតដណ្តើមពានបើករដូវកាល Community Shield តាមរយៈការចាប់ផ្តើមឲ្យបានល្អ និងរឹងមាំប្រកបដោយស្មារតីប្រយុទ្ធក្នុងរដូវកាលថ្មីនៃក្របខ័ណ្ឌ Premier League។

គ្រូបង្វឹកសញ្ជាតិបារាំងរូបនេះ នឹងឈានទៅកាន់យុទ្ធនាការថ្មី ក្រោមការត្រួតពិនិត្យយ៉ាងខ្លាំងក្លា ក្រោយពីបានបន្តកុងត្រារយៈពេល2ឆ្នាំជាមួយនឹងក្លិប Arsenal កាលពីខែឧសភា ឆ្នាំមុន ពោលគឺបន្ទាប់ពីជួបភាពត្រដាបត្រដួសកាលពីរដូវកាលមុន ដែលក្នុងពេលនោះក្រុមរបស់លោក បានខកខានក្នុងការឈ្នះកៅអីទៅកាន់ក្របខ័ណ្ឌ Champions League ជាលើកទី1ចាប់តាំងពីឆ្នាំ1997មក។ ប៉ុន្តែ រូបលោកហាក់ដូចជាមានអារម្មណ៍ធូរស្រាល ក្រោយពីក្រុមរបស់លោកបានធ្វើការវាយបកដើម្បីផ្តួលក្រុមម្ចាស់ជើងឯក Chelsea នៅកីឡដ្ឋាន Wembley កាលពីថ្ងៃអាទិត្យ ក្រោយពីកត់ត្រាជ័យជម្នះដោយបាល់ប៉េណាល់ទី ក្នុងលទ្ធផល 4-1 បន្ទាប់ពីការប្រកួតនេះបានបញ្ចប់ក្នុងលទ្ធផលស្មើ 1-1 នៅម៉ោងធម្មតា។

លោក Wenger បានចាត់ទុកថា ការឈ្នះពាន Community Shield ដែលជាការឈ្នះជាលើកទី15ក្នុងប្រវត្តិសាស្ត្ររបស់ Arsenal «គឺជាការលើកទឹកចិត្តដ៏ធំមួយ»។ បច្ចុប្បន្ន គ្រូបង្វឹករូបនេះ ចង់ឲ្យក្រុមកាំភ្លើងធំរបស់លោកគេចឲ្យផុតពីការចាប់ផ្តើមមិនបានល្អដូចក្នុងក្របខ័ណ្ឌ Premier League កាលពី2រដូវកាលមុន ដែលនៅពេលនោះ ពួកគេបានរងបរាជ័យក្នុងការប្រកួតបើកឆាកទាំង2លើក ដើម្បីក្លាយជាគូប្រជែងដ៏ខ្លាំងក្នុងការប្រជែងដណ្តើមពាន។

គ្រូបង្វឹករូបនេះបានឲ្យដឹងថា៖ «យើងចង់ស្វែងរកតុល្យភាពរវាងការជឿជាក់ដែលយើងមានពីការប្រកួតនេះ និងការជឿជាក់ដ៏ចាំបាច់ដែលតម្រូវឲ្យមានរាល់ការប្រកួតក្របខ័ណ្ឌ Premier League ទាំងអស់»។ លោក Wenger បានបន្ថែមទៀតថា៖ «យើងចង់ឲ្យមានសាមគ្គីភាព និងរក្សាការស្ថិតនៅជាមួយគ្នាពេលមួយរដូវកាលនេះ»៕
ប្រភពពី៖ The Guardian

August 7, 2017

ក្រុមប្រឹក្សាក្លិប Arsenal ត្រៀមផ្តល់កុងត្រាថ្មីរយៈពេល២ឆ្នាំដល់លោក Wenger

ក្រុមប្រឹក្សាក្លិប Arsenal នឹងផ្តល់កុងត្រាថ្មីរយៈពេល២ឆ្នាំដល់លោក Arsene Wenger នៅពេលដែលពួកគេជួបប្រជុំគ្នានៅថ្ងៃអង្គារនេះ ដែលជាផ្នែកមួយនៃការពិភាក្សាលើសេចក្តីលម្អិតផ្សេងៗអំពីទិសដៅរបស់ក្លិបកាំភ្លើងធំមួយនេះ។ អនាគតរបស់លោក Wenger ត្រូវបានគេរំពឹងទុកថា នឹងក្លាយជាប្រធានបទក្តៅនៃរបៀបវារៈ ចាប់តាំងពីតំណែងរបស់លោកស្ថិតក្នុងស្ថានភាពរង្គោះរង្គើនៅរដូវកាលនេះមក។

កិច្ចប្រជុំនេះក៏ផ្តោតទៅលើគម្រោងថវិកាដែលអ្នកចាត់ការទូទៅត្រូវចំណាយក្នុងពេលបើកទីផ្សារដោះដូរកីឡាករផងដែរ។ លោក Wenger នឹងបង្ហាញវត្តមាន រួមជាមួយនឹងម្ចាស់ភាគហ៊ុនធំលោក Stan Kroenke និងកូនប្រុសរបស់លោកគឺលោក Chips Keswick ដែលជាប្រធានក្លិប លោក Ivan Gazidis ប្រធានប្រតិបត្តិ និងលោក David Miles ដែលជាអគ្គលេខាធិការក្លិប។ ពួកគេនឹងធ្វើការត្រួតពិនិត្យរួមគ្នាទៅលើរដូវកាលដែលទើបតែបញ្ចប់ថ្មីៗនេះ ក្រោយពីពួកគេបានផ្តួលក្រុម Chelsea ដើម្បីឈ្នះពាន FA Cup កាលពីថ្ងៃសៅរ៍ ប៉ុន្តែ អាចបញ្ចប់ត្រឹមតែក្នុងចំណាត់ថ្នាក់លេខ៥ នៅលើតារាងក្របខ័ណ្ឌ Premier League ប៉ុណ្ណោះ។

គ្មាននរណាម្នាក់ក្នុងក្លិបកាំភ្លើងធំរីករាយនឹងចំណាត់ថ្នាក់នៅលើតារាងលីកនេះឡើយ ព្រោះវាមានន័យថា ពួកគេនឹងត្រូវអវត្តមានក្នុងក្របខ័ណ្ឌ Champions League ជាលើកទី១បើគិតចាប់តាំងពីឆ្នាំ១៩៩៨៕
ប្រភពពី៖ The Guardian

May 30, 2017

លោក Wenger រិះគន់ ខណៈ Liverpool និង Man City ឈ្នះកៅអី Champions League

លោក Arsene Wenger គ្រូបង្វឹកនៃក្រុម Arsenal បានធ្វើការរិះគន់ទៅលើភាពមិនច្បាស់លាស់អំពីអនាគតរបស់លោកដែលធ្វើឲ្យកីឡាកររបស់លោកមិនមានការរីករាយ ខណៈដែលក្រុម Manchester City និង Liverpool បានបន្ថែមភាពវេទនាដល់ក្រុមកាំភ្លើងធំមួយនេះ តាមរយៈការដណ្តើមយកកៅអីដែលនៅសល់ក្នុងក្របខ័ណ្ឌ Champions League រៀងៗខ្លួនកាលពីថ្ងៃអាទិត្យ។

គ្រូបង្វឹកនៃក្រុម Arsenal រូបនេះ បានផ្ទុះការរិះគន់ភ្លាមៗ ក្រោយពីក្រុមរបស់លោកបានខកខានក្នុងការឈ្នះកៅអីទៅប្រកួតក្នុងក្របខ័ណ្ឌ Champions League ជាលើកទី១ក្នុងរយៈពេល២០ឆ្នាំ បើទោះបីដណ្តើមបានជ័យជម្នះ ៣-១ លើក្រុម Everton ក៏ដោយ។ លោក Wenger បានជួបការខកចិត្តដ៏ធំ នៅមុនពេលត្រូវដឹកនាំក្រុមរបស់លោកទៅប្រកួតជាមួយនឹងក្រុម Chelsea ក្នុងការប្រកួតពាន FA Cup វគ្គផ្តាច់ព្រ័ត្រ នៅថ្ងៃសៅរ៍ សប្តាហ៍ក្រោយ។ លោក Wenger បានឲ្យដឹងថា៖ «វាពិតជារឿងដ៏គួរឱ្យខកចិត្តណាស់ ពីព្រោះរយៈពេល២០ឆ្នាំចុងក្រោយនេះ យើងបានលេងក្នុង Champions League រាល់លើក ហើយនេះជាឆ្នាំទីមួយហើយដែលយើងមិនបានស្ថិតក្នុងក្របខ័ណ្ឌនេះ»។

គ្រូបង្វឹកសញ្ជាតិបារាំងរូបនេះបានបន្ថែមទៀតថា៖ «ចាប់តាំងពីខែមករាមក យើងបានលេងក្នុងស្ថានភាពដ៏លំបាកមួយ។ វាពិតជាលំបាកណាស់សម្រាប់ក្រុមកីឡាករក្នុងការដោះស្រាយជាមួយនឹងបញ្ហាចិត្តវិទ្យា ហេតុនេះស្ថានភាពសម្រាប់កីឡាករគឺថា ពួកគេមិនមានភាពរីករាយឡើយ»។ ការទទួលជ័យជម្នះ ៣-០ របស់ក្រុមហង្សក្រហម Liverpool លើក្រុម Middlesbrough និងការទទួលជ័យជម្នះ ៥-០ របស់ក្រុម Manchester City លើក្រុម Watford បានរុញឲ្យក្រុម Arsenal ត្រូវធ្លាក់ទៅលេងក្នុងក្របខ័ណ្ឌលំដាប់ទី២របស់អឺរ៉ុប Europa League តែម្តង៕
ប្រភពពី៖ The Sun

May 22, 2017

លោក Mourinho មិនខកចិត្ត ទោះការមិនស្គាល់ចាញ់របស់ Man Utd បញ្ចប់ក្រោមដៃ Arsenal

កំណត់ត្រានៃការមិនស្គាល់ចាញ់ក្នុងការប្រកួតលីករបស់ក្រុមបិសាចក្រហម Manchester United បានឈានដល់ទីបញ្ចប់ទាំងការខកចិត្ត ពេលប្រកួតជាមួយនឹងក្រុមរបស់លោក Arsene Wenger នាកីឡដ្ឋាន Emirates ក្រោយពីក្រុមរបស់លោកបានរងបរាជ័យក្នុងលទ្ធផល ២-០ ក្រោមស្នាដៃក្រុម Arsenal កាលពីថ្ងៃអាទិត្យ។

គ្រាប់បាល់ស៊ុតបញ្ចូលទីក្នុងចន្លោះពេលដ៏រហ័សពីសំណាក់ខ្សែបម្រើ Granit Xhaka និងខ្សែប្រយុទ្ធ Danny Welbeck បានជួយឲ្យក្រុមកាំភ្លើងធំ Arsenal ដណ្តើមបានជ័យជម្នះដ៏សំខាន់មួយ និងបានបំបែកបច្ចេកទេសការពារនៃក្រុមរបស់លោក Jose Mourinho ដើម្បីបង្កើនឱកាសរបស់ពួកគេក្នុងការប្រជែងយកចំណាត់ថ្នាក់កំពូលទាំងបួន។ Man United មិនធ្លាប់ចាញ់សោះពីការប្រកួតទាំង២៥លើកចុងក្រោយរបស់ពួកគេ ក្រោយពីចាញ់ក្រោមស្នាដៃក្រុម Chelsea ក្នុងលទ្ធផល ៤-០ នៅកីឡដ្ឋាន Stamford Bridge បើទោះបីពាក់កណ្តាលនៃលទ្ធផលទាំងនោះ បានបញ្ចប់ក្នុងលទ្ធផលស្មើក៏ដោយ។ ទោះបីជាយ៉ាងណា ពួកគេបានជួបលទ្ធផលដ៏ខកចិត្តពេលបញ្ចប់ការប្រកួត ខណៈដែលលោក Mourinho បានធ្វើការផ្លាស់ប្តូរកីឡាករដល់ទៅ៨នាក់ទៅលើសមាជិកក្រុមដែលបានផ្តួលក្រុម Celta Vigo ក្នុងលទ្ធផល ១-០ ក្នុងការប្រកួតក្របខ័ណ្ឌ Europa League វគ្គពាក់កណ្តាលផ្តាច់ព្រ័ត្រ ជើងទី១ កាលពីថ្ងៃព្រហស្បតិ៍។

លោក Mourinho អ្នកចាត់ការទូទៅរបស់ក្រុម Man United បានឲ្យដឹងថា៖ «យើងបានផ្លាស់ប្តូរកីឡាករ៨នាក់។ ពិតណាស់ យើងបានដឹងថា យើងនឹងមិនមានភាពខ្លាំងក្លាពេញលេញឡើយ។ នោះគឺជាការសម្រេចចិត្តមួយ។ យើងចង់ដណ្តើមពាន Europa League ពីព្រោះវាសំខាន់ជាងការបញ្ចប់ក្នុងចំណាត់ថ្នាក់កំពូលទាំង៤ទៅទៀត»។ គ្រូបង្វឹកសញ្ជាតិព័រទុយហ្គាល់រូបនេះ បានបន្ថែមទៀតថា៖ «ពានចុងក្រោយដែលខ្ញុំបានឈ្នះគឺមានរយៈពេល៣ខែមកហើយ។ ខ្ញុំមិនខ្វល់ពីបញ្ហានោះឡើយ។ ថ្ងៃព្រហស្បតិ៍ គឺជាការប្រកួតដ៏សំខាន់ប្រចាំរដូវកាលនេះ។ ខ្ញុំសង្ឃឹមថា Old Trafford មានអារម្មណ៍បែបនេះ ពីព្រោះយើងត្រូវការ Old Trafford»៕

ប្រភពពី៖ The Sun

May 8, 2017

អាជ្ញាកណ្តាលឈ្លោះជាមួយលោក Wenger នឹងត្រូវកាត់សេចក្តីក្នុង FA Cup រវាង Arsenal និង Chelsea

លោកអាជ្ញាកណ្តាលដែលត្រូវបានរងនូវការរុញ និងត្រូវបានចាត់ទុកថា គ្មានភាពស្មោះត្រង់ដោយលោក Arsene Wenger នោះ នឹងត្រូវកាត់សេចក្តីក្នុងការប្រកួតពាន FA Cup វគ្គផ្តាច់ព្រ័ត្រនៅខែក្រោយ រវាងក្រុម Arsenal របស់គ្រូបង្វឹកជើងចាស់សញ្ជាតិបារាំងរូបនេះ និងក្រុម Chelsea។ នេះបើយោងទៅតាមការប្រកាសរបស់សហព័ន្ធកីឡាបាល់ទាត់អង់គ្លេសហៅកាត់ថា FA។

លោក Wenger បានរងពិន័យជាទឹកប្រាក់ ២៥០០០ផោន (ស្មើនឹង៣២០០០ដុល្លារអាមេរិក) សម្រាប់ការរុញទៅលើលោក Anthony Taylor ដែលជាមន្ត្រីអាជ្ញាកណ្តាលទី៤ អំឡុងពេលក្រុម Arsenal ទទួលជ័យជម្នះក្នុងការប្រកួតក្របខ័ណ្ឌ Premier League លើក្រុម Burnley កាលពីថ្ងៃទី២២ ខែមករា។ លោកអាជ្ញាកណ្តាល Jon Moss បានឃើញថា លោក Wenger បានចោទប្រកាន់លោក Taylor ពីបទគ្មានភាពស្មោះត្រង់ទៅនឹង FA នៅមុនពេលប្រើប្រាស់ពាក្យសម្តីមិនសមរម្យទៅកាន់មន្ត្រីទីបួនរូបនេះ។

លោក Moss បានពិន័យកាតក្រហមដល់លោក Wenger ក្រោយពីក្រុម Burnley បានរកគ្រាប់បាល់ដោយការស៊ុតបាល់ប៉េណាល់ទី ហើយគ្រូបង្វឹករបស់ក្រុម Arsenal រូបនេះបានឈរឈ្លោះប្រកែកគ្នាក្នុងផ្លូវចូលទៅកាន់បន្ទប់ផ្លាស់ប្តូរសម្លៀកបំបែកនាកីឡដ្ឋាន Emirates។ បើយោងទៅតាម FA ក្រោយមក លោក Wenger បានរុញលោក Taylor ពីរលើក ប៉ុន្តែ ក្រោយមកគ្រូបង្វឹកសញ្ជាតិបារាំងរូបនេះបាននិយាយថា៖ «ខ្ញុំពិតជាសោកស្តាយណាស់ ខ្ញុំគួរតែបិទមាត់ និងទៅផ្ទះជាធម្មតា។ ខ្ញុំសូមអភ័យទោសចំពោះបញ្ហានោះ»៕

ប្រភពពី៖ The Guardian

April 28, 2017

លោក Wenger៖ Arsenal ត្រូវតែបង្ហាញភាពខ្លាំងពេលប៉ះ Leicester រាត្រីនេះ

លោក Arsene Wenger បានបញ្ជាក់ថា ក្រុម Arsenal របស់លោក នឹងត្រូវតែប្រយុទ្ធដូចមនុស្សឆ្កួតអ៊ីចឹង ដើម្បីបញ្ចប់ក្នុងចំណាត់ថ្នាក់កំពូលទាំងបួននៅលើតារាងនៃក្របខ័ណ្ឌ Premier League។

ក្រុមកាំភ្លើងធំមួយនេះ នឹងត្រូវធ្វើជាម្ចាស់ផ្ទះទទួលក្រុម Leicester នាកីឡដ្ឋាន Emirates នារាត្រីថ្ងៃពុធនេះ ដែលជាការប្រកួតមួយក្នុងចំណោមការប្រកួតដែលពួកគេនៅសល់ច្រើនជាងគូប្រកួតរបស់ពួកគេសម្រាប់ការប្រជែងយកកៅអីក្នុងក្របខ័ណ្ឌ Champions League នារដូវកាលក្រោយ។ លោក Wenger គ្រូបង្វឹករបស់ក្រុម Arsenal បានទទួលស្គាល់ថា ការដណ្តើមបានជ័យជម្នះក្នុងការប្រកួតពាន FA Cup វគ្គពាក់កណ្តាលផ្តាច់ព្រ័ត្រ និងការផ្លាស់ប្តូរដោយការដាក់កីឡាករបីនាក់ឲ្យលេងក្នុងតំបន់ការពារ បានផ្លាស់ប្តូរស្មារតីរបស់ក្រុម ធ្វើឲ្យពួកគេការពារកាន់តែរឹងមាំ និងបានផ្តល់ឲ្យពួកគេនូវការជឿជាក់ជាថ្មី ក្រោយពីទទួលបានលទ្ធ ផលមិនល្អជាបន្តបន្ទាប់។

លោក Wenger បានឲ្យដឹងថា៖ «អ្វីដែលត្រូវធ្វើគឺការផ្តោតទៅលើកីឡាករ ខណៈដែលពួកគេត្រូវតែរឹងមាំ និងបំភ្លេចការហេវអត់របស់ខ្លួន»។ គ្រូបង្វឹករូបនេះបានប្រាប់បន្តថា៖ «ពេលខ្លះនៅពេលដែលក្រុមមួយធ្វើមិនបានល្អ គ្រាន់តែផ្តោតទៅលើអ្វីដែលផ្សេងគ្នាក៏ជួយធ្វើឲ្យមានភាពល្អប្រសើរឡើងផងដែរ។ យើងបានដឹងថា យើងត្រូវតែប្រយុទ្ធដូចមនុស្សឆ្កួតអ៊ីចឹង ដើម្បីវិលទៅរកភាពខ្លាំង និងឈ្នះការប្រកួតរបស់យើង»។ Arsenal នឹងឈានទៅកាន់ការប្រកួតនៅរាត្រីនេះជាមួយនឹងជ័យជម្នះ២លើក ស្មើ២លើក និងចាញ់១លើក ហើយពួកគេចាញ់តែ១លើកគត់ពីការប្រកួតក្នុងផ្ទះខ្លួនឯង៥លើកចុងក្រោយរបស់ពួកគេ។ ដោយឡែក ក្រុម Leicester បានកត់ត្រាជ័យជម្នះតែ១លើកគត់ពីការប្រកួត៥លើកចុងក្រោយរបស់ពួកគេ ដោយស្មើ២លើក និងចាញ់២លើក។ ក្រុមម្ចាស់ជើងឯករបស់អង់គ្លេសមួយនេះ ក៏ដណ្តើមបានជ័យជម្នះតែមួយលើកផងដែរ ពីការប្រកួតក្រៅដី៥លើកចុងក្រោយរបស់ពួកគេ»។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕

ប្រភពពី៖ Mirror

April 26, 2017

លោក Wenger កោតសរសើរ Sanchez ខណៈ Arsenal ទៅជួប Chelsea ក្នុងវគ្គផ្តាច់ព្រ័ត្រ

លោក Arsene Wenger ជឿជាក់ថា ស្មារតីប្រយុទ្ធដែលស្ថិតនៅពីក្រោយក្រុម Arsenal ក្នុងពេលពួកគេទទួលជ័យជម្នះក្នុងលទ្ធផល ២-១ លើក្រុម Manchester City ក្នុងការប្រកួតពាន FA Cup វគ្គពាក់កណ្តាលផ្តាច់ព្រ័ត្រ បានកើតឡើងក្រោមជំនួយនៃការបង្ហាញពីទម្រង់លេងយ៉ាងមុតស្រួចរបស់ខ្សែបម្រើប្រយុទ្ធ Alexis Sanchez។

គ្រូបង្វឹករបស់ក្រុមកាំភ្លើងធំរូបនេះ បានដឹកនាំឲ្យក្រុមរបស់លោកបង្ហាញខ្លួនក្នុងការប្រកួតពាន FA Cup វគ្គផ្តាច់ព្រ័ត្រ ជាលើកទី២០ ក្រោយពីការបង្ហាញពីទម្រង់លេងយ៉ាងល្អមួយសំណាក់ក្រុមមួយ ដែលរងនូវការរិះគន់ជារឿយៗសម្រាប់ការធ្លាក់ចូលក្នុងសម្ពាធ។ ក្នុងពេលដេញតាមពីក្រោយគ្រាប់បាល់ក្នុងតង់ទី២របស់ខ្សែប្រយុទ្ធ Sergio Aguero ក្រុមកាំភ្លើងធំ Arsenal ហាក់ស្ថិតនៅផ្លូវឆ្ពោះទៅកាន់ការរងបរាជ័យដ៏ខកចិត្តមួយផ្សេងទៀតទៅហើយ ក្នុងរដូវកាលដ៏ត្រដាបត្រដួសរបស់ពួកគេ ក្រោយពីស្ថិតក្រោមការគ្រប់គ្រងរបស់គូប្រកួតខ្លួនស្ទើរតែទាំងស្រុង។ ប៉ុន្តែ ក្រុមមានមូលដ្ឋាននៅទីក្រុងឡុងដ៍មួយនេះ បានបង្ហាញពីស្មារតីប្រយុទ្ធដ៏មិននឹកស្មានដល់ ខណៈដែលកីឡាករ Nacho Monreal បានរកគ្រាប់បាល់តាមស្មើដើម្បីបង្ខំឲ្យឈានដល់ការប្រកួតនៅនាទីបន្ថែម១៥នាទីពីរដង នៅមុនពេលខ្សែប្រយុទ្ធអន្តរជាតិស៊ីលី Sanchez បានរកគ្រាប់បាល់ឈ្នះជាមួយនឹងការស៊ុតបាល់បញ្ចូលទីយ៉ាងល្អ។ (more…)

April 24, 2017

Tag: Arsene Wenger