Tag: Arsenal

Arsenal ប្រកាសពីការចុះហត្ថលេខាជាមួយ Lacazette ជាផ្លូវការ
ក្លិបកាំភ្លើងធំ Arsenal បានប្រកាសពីការចុះហត្ថលេខាជាមួយនឹងខ្សែប្រយុទ្ធ Alexandre Lazazette ដែលមកពីក្លិប Lyon ក្នុងកិច្ចសន្យារយៈពេល 5ឆ្នាំ។ ខ្សែប្រយុទ្ធវ័យ 26ឆ្នាំរូបនេះចូលរួមជាមួយនឹងក្លិប Arsenal ក្នុងតម្លៃខ្លួន 52លានផោន (ស្មើនឹង 68លានដុល្លារអាមេរិក) ក្រោយពីបានឆ្លងផុតការពិនិត្យសុខភាពរបស់គេកាលពីថ្ងៃអង្គាររួចមក។
តម្លៃខ្លួនរបស់គេនឹងបំបែកកំណត់ត្រាលើតម្លៃខ្លួន 42.4លានផោនដែលក្លិប Arsenal ធ្លាប់បានចំណាយទិញខ្សែបម្រើ Mesut Ozil ពីក្លិប Real Madrid កាលពីឆ្នាំ 2013។ ក្រោយពីការផ្ទេរទៅកាន់ក្លិប Atletico Madrid បានទទួលបរាជ័យ ដោយសារតែក្រុមរបស់លោក Diego Simeone បានរងពិន័យព្យួរមិនឲ្យទិញចូលកីឡាករថ្មី ពេលនោះក្លិប Arsenal ក៏ដណ្តើមយកប្រៀបបានភ្លាមៗទៅលើស្ថានភាពបែបនេះ។ Lazazette បានជួបរដូវកាលប្រកបដោយផ្លែផ្កាល្អបំផុតរបស់គេកាលពីយុទ្ធនាការមុន តាមរយៈការស៊ុតបាល់បញ្ចូលទីដល់ទៅ 37គ្រាប់ក្នុងការប្រកួត 45លើកសម្រាប់ក្លិប Lyon។ ការរកបានគ្រាប់បាល់សរុបរបស់គេចំនួន 28គ្រាប់ក្នុងក្របខ័ណ្ឌ Ligue 1 បានជួយឲ្យគេស្ថិតក្នុងចំណាត់ថ្នាក់លេខ 2បន្ទាប់ពីខ្សែប្រយុទ្ធ Edinson Cavani របស់ក្លិប Paris Saint-Germain ដែលបានស៊ុតបាល់បញ្ចូលទី 35គ្រាប់ក្នុងក្របខ័ណ្ឌកំពូលរបស់បារាំង។ ខ្សែប្រយុទ្ធ Lacazette មិនធ្លាប់លេងក្នុងលីកនៅក្រៅប្រទេសបារាំងឡើយ ក្រោយពីបានបង្ហាញខ្លួនជាលើកដំបូងរបស់គេសម្រាប់ Lyon កាលពីចុងរដូវកាលឆ្នាំ 2009-2010 មក។
លោក Arsene Wenger អ្នកចាត់ការទូទៅរបស់ Arsenal បានឲ្យដឹងថា៖ «យើងពិតជារីករាយណាស់ក្នុងការមាន Alexandre ចូលរួមជាមួយនឹងក្រុមរបស់យើង។ រូបគេបានបង្ហាញអស់រយៈពេលជាច្រើនឆ្នាំមកហើយថា រូបគេអាចស៊ុតបាល់បញ្ចូលទី និងបង្ហាញថា គេគឺជាខ្សែប្រយុទ្ធដ៏មានប្រសិទ្ធភាពម្នាក់»៕
ប្រភពពី៖ The Sun
July 6, 2017
Lacazette ទៅទីក្រុងឡុងដ៍ ដើម្បីបំពេញការផ្ទេរទៅកាន់ Arsenal
Alexandre Lacazette នឹងត្រូវធ្វើដំណើរទៅកាន់ទីក្រុងឡុងដ៍ ដើម្បីបំពេញការផ្ទេរក្នុងតម្លៃខ្លួនជាកំណត់ត្រារបស់ក្លិបនៅ Arsenal ក្រោយពីក្លិបកាំភ្លើងធំមួយនេះ បានយល់ព្រមលើតម្លៃខ្លួន52លានផោន (ស្មើនឹង67.6លានដុល្លារអាមេរិក) សម្រាប់ខ្សែប្រយុទ្ធរូបនេះ។
Arsenal បានយល់ព្រមបង់ប្រាក់ជាបឋមចំនួន46លានផោន ទៅឲ្យក្លិប Lyon ដើម្បីទិញយក Lacazette ដែលនឹងបំបែកកំណត់ត្រាផ្ទេរកាលពីមុនក្នុងតម្លៃខ្លួន42.5លានផោនដែលកាំភ្លើងធំបានចំណាយទិញខ្សែបម្រើ Mesut Ozil ពីក្លិប Real Madrid កាលពីឆ្នាំ2013។ Lyon អាចនឹងទទួលបានប្រាក់ឧបត្ថម្ភចំនួន6លានផោនផ្សេងទៀត សម្រាប់ការផ្ទេរមួយនេះ។ ស្របពេលលក្ខខណ្ឌផ្ទាល់ខ្លួនផ្សេងៗត្រូវបានឈានដល់រួចជាស្រេច Lacazette បច្ចុប្បន្ននឹងត្រូវធ្វើដំណើរទៅកាន់ទីក្រុងឡុងដ៍ ដើម្បីបំពេញការពិនិត្យសុខភាព និងដើម្បីចុះហត្ថលេខាជាផ្លូវការជាមួយនឹងក្លិប Asenal។
លោក Jean-Michel Aulas ដែលជាម្ចាស់ក្លិប Lyon បានប្រកាសពីការចាកចេញរបស់ Lacazette តាមរយៈការបញ្ជាក់ថា៖ «ការផ្ទេររបស់ Alexandre Lacazette ទៅកាន់ Arsenal អាចនឹងដំណើរការក្នុងរយៈពេលមួយថ្ងៃឬពីរថ្ងៃទៀត។ ពិតណាស់ វាជាការផ្ទេរក្នុងតម្លៃខ្លួនជាកំណត់ត្រារបស់ Arsenal ហើយក៏សម្រាប់ក្លិប Lyon ផងដែរ»។ Lacazette បានស៊ុតបាល់បញ្ចូលទីច្រើនជាង20គ្រាប់ក្នុងក្របខ័ណ្ឌ Ligue 1 រាល់រដូវកាលទាំង3លើកចុងក្រោយរបស់គេសម្រាប់ Lyon និងបានស៊ុតបាល់បញ្ចូលទីសរុប129គ្រាប់ក្នុងការបង្ហាញខ្លួន 275លើកសម្រាប់ក្លិបរបស់បារាំងមួយនេះ៕
ប្រភពពី៖ The Telegraph

July 3, 2017
Arsenal ជឿជាក់ខ្ពស់ក្នុងការនាំយក Lacazette ពី Lyon
ក្លិបកាំភ្លើងធំ Arsenal ពោរពេញដោយការជឿជាក់ក្នុងការចុះហត្ថលេខាជាមួយនឹងខ្សែប្រយុទ្ធអន្តរជាតិបារាំងដ៏ឆ្នើម Alexandre Lacazette ក្រោយពីពួកគេបានដាក់សំណើដេញថ្លៃជាកំណត់ត្រារបស់ក្លិបក្នុងទឹកប្រាក់ 44លានផោន (ស្មើនឹង 56លានដុល្លារអាមេរិក)។ តម្លៃខ្លួនដ៏ខ្ពស់នេះគេរំពឹងទុកថា នឹងត្រូវបានទទួលយកដោយក្លិប Lyon និងបង្ហាញពីការចាប់ផ្តើមនៃចលនាក្នុងទីផ្សារដោះដូរកីឡាកររបស់ Arsenal។
ក្លិបធំៗជាច្រើនសុទ្ធសឹងបានបង្ហាញពីការចាប់អារម្មណ៍ទៅលើ Lacazette ដែលបានបង្ហាញខ្លួនជាអន្តរជាតិ11លើក និងជាប់កុងត្រាជាមួយនឹង Lyon រហូតដល់ឆ្នាំ2019 ក្រោយពីបានធ្វើការអភិវឌ្ឍតាមរយៈប្រព័ន្ធយុវជនរបស់ពួកគេ។ កីឡាកររូបនេះ ដំបូងឡើងធ្លាប់បានសម្តែងបំណងរបស់គេក្នុងការផ្ទេរទៅកាន់ក្លិប Atletico Madrid ក្រោយពីបានគិតថា វាជាពេលវេលាដ៏ត្រឹមត្រូវសម្រាប់អនាគតរបស់គេតាមរយៈការចាកចេញពីក្របខ័ណ្ឌ Ligue 1 ប៉ុន្តែការជាប់ពិន័យព្យួរលើការដោះដូរកីឡាកររបស់ក្លិបអេស្ប៉ាញមួយនេះបានបង្កភាពស្មុគស្មាញដល់ការប្រមាញ់ទិញរបស់ពួកគេ និងបានអនុញ្ញាតឲ្យក្លិប Arsenal មានឱកាសឆក់យកខ្សែប្រយុទ្ធវ័យ26ឆ្នាំរូបនេះពីក្លិបផ្សេងតែម្តង។
Lacazette ត្រូវបានគេជឿជាក់ថា បានបើកចំហចិត្តឲ្យមានការផ្ទេរនេះ ក្រោយពីកិច្ចពិភាក្សារវាងមន្ត្រីមកពីក្លិប Arsenal និងប្រធានក្លិប Lyon លោក Jean-Michel Aulas នៅសប្តាហ៍នេះ ហើយការព្រមព្រៀងគ្នាមួយកំពុងតែស្ថិតយ៉ាងប្រកៀកក្នុងការឈានដល់ទៅលើតម្លៃខ្លួននេះ។ តម្លៃខ្លួននេះ នឹងបំបែកកំណត់ត្រាទៅលើតម្លៃខ្លួន 42.5លានផោន ដែលក្លិប Arsenal បានចំណាយទៅឲ្យ Real Madrid ដើម្បីទិញយកខ្សែបម្រើ Mesut Ozil កាលពីឆ្នាំ 2013។ ការពិភាក្សាបន្ថែមទៀតត្រូវបានគ្រោងបន្តធ្វើឡើងនៅដើមសប្តាហ៍ក្រោយ ខណៈដែល Lacazette ដែលកំពុងតែសម្រាកវិស្សមកាលនោះត្រូវបានរំពឹងទុកថា នឹងចង់ទទួលបានឱកាសក្នុងការលេងក្នុងក្របខ័ណ្ឌ Premier League៕
ប្រភពពី៖ The Guardian

June 24, 2017
AC Milan ផ្តួល Arsenal ដើម្បីចុះហត្ថលេខាជាមួយ Andre Silva
ក្លិប AC Milan បានប្រកាសពីការចុះហត្ថលេខាជាមួយនឹងខ្សែប្រយុទ្ធ Andre Silva មកពីក្លិប Portoរបស់ព័រទុយហ្គាល់ ក្នុងតម្លៃខ្លួន38លានអឺរ៉ូ (ស្មើនឹង42.5លានដុល្លារអាមេរិក)។
ខ្សែប្រយុទ្ធអន្តរជាតិព័រទុយហ្គាល់វ័យ21ឆ្នាំរូបនេះ បានទទួលការត្រួតពិនិត្យសុខភាពរបស់គេជាមួយនឹង AC Milan កាលពីថ្ងៃចន្ទរួចរាល់ហើយ មុនពេលបំពេញការផ្ទេររបស់គេជាផ្លូវការ។ តម្លៃខ្លួនសម្រាប់ Silva ដែលក៏ស្ថិតក្នុងការចាប់អារម្មណ៍ពីសំណាក់ក្លិប Arsenal និងបានស៊ុតបាល់បញ្ចូលទី21គ្រាប់សម្រាប់ Porto កាលពីរដូវកាលមុនផងដែរនោះ អាចនឹងកើនឡើងដល់4០លានអឺរ៉ូ។ នេះបើយោងតាមការប្រកាសរបស់ក្លិបព័រទុយហ្គាល់មួយនេះ នៅលើគេហទំព័ររបស់ពួកគេ។ Porto បានឲ្យដឹងក្នុងសេចក្តីថ្លែងការណ៍មួយថា៖ «Porto សូមជូនពរឲ្យ Andre Silva ជួបការរីករាយបំផុត និងទទួលជោគជ័យក្នុងកម្រិតអាជីព និងក្នុងកីឡាបាល់ទាត់ដោយមិនបំភ្លេចពីរបៀបដែលរូបគេតែងតែលះបង់រាល់អ្វីៗទាំងអស់សម្រាប់ក្លិបនេះឡើយ»។ Silva គឺជាកីឡាករចំណូលថ្មីទី4នៅរដូវក្តៅនេះ ខណៈដែល AC Milan បានបន្តធ្វើការជួសជុលក្រុមរបស់ខ្លួនក្រោមការកាន់កាប់របស់ម្ចាស់កម្មសិទ្ធិថ្មីជាជនជាតិចិន។
ក្លិប AC Milan ដែលបានបញ្ចប់ក្នុងចំណាត់ថ្នាក់លេខ6នៅលើតារាងក្របខ័ណ្ឌ Serie A កាលពីរដូវកាលមុននោះ បានទិញខ្សែការពារពីរនាក់រួចស្រេចហើយគឺ Ricardo Rodriguez និង Mateo Musacchio ពីក្លិប Wolfsburg និង Villarreal តាមលេខរៀង ស្របពេលដែលខ្សែបម្រើអន្តរជាតិកូតឌីវ័រក៏បានចូលរួមដែរ ក្រោយផ្ទេរមកពីក្លិប Atalanta៕
ប្រភពពី៖ Eurosport.com
June 13, 2017
Arsenal ប្រកាសពីការចុះហត្ថលេខាជាមួយ Kolasinac មកពីក្លិប Schalke ដោយគ្មានតម្លៃខ្លួន
ក្លិបកាំភ្លើងធំ Arsenal បានប្រកាសពីការចុះហត្ថលេខាជាមួយនឹងខ្សែការពារ Sead Kolasinac ពីក្លិប Schalke របស់អាល្លឺម៉ង់ ដោយគ្មានតម្លៃខ្លួន ខណៈដែលតារាឆ្នើមរូបនេះ ត្រូវបានរំពឹងទុកថា នឹងទទួលបានចំណូល១៥ម៉ឺនផោន (ស្មើនឹង១៩ម៉ឺនដុល្លារអាមេរិក) ក្នុងមួយសប្តាហ៍។ ក្រុមកាំភ្លើងធំមួយនេះ បានប្រើប្រាស់បណ្តាញសង្គមដើម្បីប្រកាសពីព័ត៌មាននៃការចុះហត្ថលេខាជាមួយនឹងកីឡាករ Kolasinac។
Arsenal បានឲ្យដឹងក្នុងសេចក្តីថ្លែងការណ៍មួយថា៖ «នៅពេលដែលការផ្ទេរនេះត្រូវបានបំពេញជាផ្លូវការ ខ្សែការពាររូបនេះនឹងចាប់ផ្តើមធ្វើការហ្វឹកហាត់មុនបើករដូវកាលនៅខែកក្កដា»។ ក្លិប Schalke បានអះអាងថា ខ្សែការពាររូបនេះ បានចុះហត្ថលេខាលើកុងត្រាមួយដែលនឹងបន្តរហូតដល់ឆ្នាំ២០២២។ Kolasinac បានលេងឲ្យក្លិប Schalke ចាប់តាំងពីចូលរួមជាមួយនឹងក្រុមយុវជន ក្រោយពីផ្ទេរមកពីក្លិប Stuttgart កាលពីឆ្នាំ២០១១។ ខ្សែការពារអន្តរជាតិបូស្នីរូបនេះ ដែលបានបង្ហាញខ្លួនជាអន្តរជាតិ១៧លើក បានបង្ហាញខ្លួនដល់ទៅ១២២លើកសម្រាប់ក្លិប Schalke របស់ក្របខ័ណ្ឌ Bundesliga។ បើទោះបីកើតក្នុងប្រទេសអាល្លឺម៉ង់ក៏ដោយ ប៉ុន្តែ Kolasinac ត្រូវបានផ្តល់លិខិតឆ្លងដែនជាជនបូស្នី កាលពីឆ្នាំ២០១៣ ខណៈដែលឪពុកម្តាយរបស់គេមានដើមកំណើតនៅទីនោះ។
កីឡាកររូបនេះបានប្រាប់គេហទំព័ររបស់ Arsenal ថា៖ «Arsenal មានប្រពៃណីដ៏ធំមួយ ហើយខ្ញុំបានតាមដានក្លិបនេះ ក្នុងពេលស្ថិតជាកុមារម្នាក់ ពោលគឺស្ថិតក្នុងជំនាន់របស់កីឡាករ Jens Lehmann និង Thierry Henry។ Arsenal តែងតែជាក្លិបមួយដែលត្រូវបានគេស្គាល់យ៉ាងច្បាស់នៅអឺរ៉ុប ហើយខ្ញុំពិតជារីករាយណាស់ក្នុងការស្ថិតនៅជាមួយពួកគេ»៕
ប្រភពពី៖ The Sun
June 7, 2017
Giroud ប្រកាសថា រូបគេចង់បន្តនៅជាមួយ Arsenal
ខ្សែប្រយុទ្ធ បានប្រកាសថា រូបគេចង់បន្តនៅជាមួយនឹងក្លិប Arsenal និងឈ្នះពានក្របខ័ណ្ឌ Premier League ក្រោមការដឹកនាំរបស់លោក Arsene Wenger។ ប៉ុន្តែ ខ្សែប្រយុទ្ធអន្តរជាតិបារាំងរូបនេះបានទទួលស្គាល់Olivier Giroudថា ក្លិបមួយដែលកំពុងតែលួងលោមរូបគេឲ្យចូលរួមជាមួយគឺ Marseille។
Giroud បានរកគ្រាប់បាល់បញ្ចូលទីសំខាន់ៗជាច្រើនសម្រាប់ក្រុមកាំភ្លើងធំកាលពីរដូវកាលមុន ប៉ុន្តែ ពួកគេបានខកខានក្នុងការប្រជែងយកចំណាត់ថ្នាក់កំពូលទាំងបួននៃក្របខ័ណ្ឌ Premier League និងឈ្នះកៅអីទៅលេងក្នុងក្របខ័ណ្ឌ Champions League។ ខ្សែប្រយុទ្ធវ័យ៣០ឆ្នាំរូបនេះ បានបង្កើតឲ្យមានការចាប់អារម្មណ៍ផ្សេងៗក្នុងប្រទេសបារាំង ក្រោយពីបានស៊ុតបាល់បញ្ចូលទី៣គ្រាប់ក្នុងពេលប្រកួតជាមួយនឹងក្រុមជម្រើសជាតិប៉ារ៉ាហ្គាយ ក្នុងពេលក្រុមបារាំងរបស់លោក Didier Deschamps ទទួលជ័យជម្នះ ៥-០។ លោក Wenger បានចុះហត្ថលេខាលើកុងត្រាថ្មីរយៈពេល២ឆ្នាំនៅឯក្លិប Arsenal កាលពីសប្តាហ៍មុន ហើយ Giroud ពិតជាចង់បញ្ចប់ពាក្យចចាមអារ៉ាមផ្សេងៗជុំវិញអនាគតរបស់គេ ស្របពេលដែលភាពស្រពេចស្រពិលផ្សេងៗក៏បានកើតឡើងទៅលើកីឡាករ lexis Sanchez និង Mesut Ozil ផងដែរ។
Giroud បាននិយាយថា៖ «ខ្ញុំមិនមានការខ្វល់ខ្វាយពីការដាក់សំណើផ្សេងៗពីក្លិបបារាំងឡើយ ជាពិសេស Marseille។ ប៉ុន្តែ អនាគតរបស់ខ្ញុំគឺស្ថិតក្នុងក្របខ័ណ្ឌ Premier League។ ខ្ញុំនៅមានពានជាច្រើនទៀតដែលត្រូវឈ្នះ។ ក្រោយពីឈ្នះពាន FA Cup យើងនឹងប្រជែងដណ្តើមពានលីក។ នោះគឺជាគោលបំណងរបស់ខ្ញុំ»៕
ប្រភពពី៖ The Sun

June 5, 2017
ក្រុមប្រឹក្សាក្លិប Arsenal ត្រៀមផ្តល់កុងត្រាថ្មីរយៈពេល២ឆ្នាំដល់លោក Wenger
ក្រុមប្រឹក្សាក្លិប Arsenal នឹងផ្តល់កុងត្រាថ្មីរយៈពេល២ឆ្នាំដល់លោក Arsene Wenger នៅពេលដែលពួកគេជួបប្រជុំគ្នានៅថ្ងៃអង្គារនេះ ដែលជាផ្នែកមួយនៃការពិភាក្សាលើសេចក្តីលម្អិតផ្សេងៗអំពីទិសដៅរបស់ក្លិបកាំភ្លើងធំមួយនេះ។ អនាគតរបស់លោក Wenger ត្រូវបានគេរំពឹងទុកថា នឹងក្លាយជាប្រធានបទក្តៅនៃរបៀបវារៈ ចាប់តាំងពីតំណែងរបស់លោកស្ថិតក្នុងស្ថានភាពរង្គោះរង្គើនៅរដូវកាលនេះមក។
កិច្ចប្រជុំនេះក៏ផ្តោតទៅលើគម្រោងថវិកាដែលអ្នកចាត់ការទូទៅត្រូវចំណាយក្នុងពេលបើកទីផ្សារដោះដូរកីឡាករផងដែរ។ លោក Wenger នឹងបង្ហាញវត្តមាន រួមជាមួយនឹងម្ចាស់ភាគហ៊ុនធំលោក Stan Kroenke និងកូនប្រុសរបស់លោកគឺលោក Chips Keswick ដែលជាប្រធានក្លិប លោក Ivan Gazidis ប្រធានប្រតិបត្តិ និងលោក David Miles ដែលជាអគ្គលេខាធិការក្លិប។ ពួកគេនឹងធ្វើការត្រួតពិនិត្យរួមគ្នាទៅលើរដូវកាលដែលទើបតែបញ្ចប់ថ្មីៗនេះ ក្រោយពីពួកគេបានផ្តួលក្រុម Chelsea ដើម្បីឈ្នះពាន FA Cup កាលពីថ្ងៃសៅរ៍ ប៉ុន្តែ អាចបញ្ចប់ត្រឹមតែក្នុងចំណាត់ថ្នាក់លេខ៥ នៅលើតារាងក្របខ័ណ្ឌ Premier League ប៉ុណ្ណោះ។
គ្មាននរណាម្នាក់ក្នុងក្លិបកាំភ្លើងធំរីករាយនឹងចំណាត់ថ្នាក់នៅលើតារាងលីកនេះឡើយ ព្រោះវាមានន័យថា ពួកគេនឹងត្រូវអវត្តមានក្នុងក្របខ័ណ្ឌ Champions League ជាលើកទី១បើគិតចាប់តាំងពីឆ្នាំ១៩៩៨៕
ប្រភពពី៖ The Guardian
May 30, 2017
Ramsey ជួយឲ្យលោក Wenger លើកពាន FA Cup ជាលើកទី៧
ខ្សែបម្រើអន្តរជាតិវេលស៍ Aaron Ramsey បានរកគ្រាប់បាល់ឈ្នះនៅនាទីទី៧៩ ដើម្បីជួយឲ្យក្រុមកាំភ្លើងធំ Arsenal កត់ត្រាជ័យជម្នះដ៏មិននឹកស្មានដល់ក្នុងលទ្ធផល ២-១ លើក្រុម Chelsea កាលពីថ្ងៃសៅរ៍ និងបានជួយឲ្យគ្រូបង្វឹកកំពុងស្ថិតក្រោមការរិះគន់លោក Arsene Wenger ឈ្នះពាន FA Cup ជាលើកទី៧។
លោក Wenger បានរងនូវការស្រែកចំអកឲ្យខ្លាំងក្លាពីសំណាក់អ្នកគាំទ្ររបស់ខ្លួន និងបានខកខានក្នុងការឈ្នះកៅអីទៅប្រកួតក្នុងក្របខ័ណ្ឌ Champions League ជាលើកទី១ក្នុងរយៈពេល២០ឆ្នាំ ប៉ុន្តែ លោកបានបញ្ចប់រដូវកាលនេះ តាមរយៈការឡើងឈរពីលើលោកគ្រូបង្វឹក George Ramsey របស់ Aston Villa ក្នុងនាមជាអ្នកចាត់ការទូទៅជោគជ័យបំផុតក្នុងពាន FA Cup។
គ្រាប់បាល់បើកឆាករបស់ខ្សែប្រយុទ្ធ Alexis Sanchez សម្រាប់ក្រុម Arsenal ដែលត្រូវបានគេមើលឃើញថា ជាការធ្វើឲ្យបាល់ប៉ះដៃយ៉ាងពិតប្រាកដនោះ ត្រូវបានតាមស្មើដោយខ្សែប្រយុទ្ធ Diego Costa នៅមុនពេល Ramsey រកគ្រាប់បាល់វាយបកភ្លាមៗតាមរយៈការរកគ្រាប់បាល់ឈ្នះជាលើកទី២របស់គេក្នុងពាន FA Cup។ លោក Wenger បានឲ្យដឹងថា៖ «ក្រុមនេះបានជួបការខកចិត្ត តែពួកគេមានសាមគ្គីភាព និងបានឆ្លើយតបយ៉ាងល្អ។ ពួកគេបានបង្ហាញពីភាពខ្លាំង និងសាមគ្គីភាព និងបានលេងយ៉ាងល្អនៅថ្ងៃនេះ។ ខ្ញុំពិតជាមានមោទនភាពក្នុងការឈ្នះពាននេះ៧លើក»៕
ប្រភពពី៖ ESPN
May 28, 2017
Costa ស្រេកឃ្លានក្នុងការលើកពាន FA Cup ពេល Chelsea ប៉ះ Arsenal ថ្ងៃសៅរ៍នេះ
ខ្សែប្រយុទ្ធ Diego Costa នឹងសម្លឹងរកការធ្វើឲ្យរដូវកាលដ៏រង្គោះរង្គើរបស់គេបញ្ចប់ដោយការឈ្នះពានពីរ នៅពេលដែលក្រុមតោខៀវ Chelsea ជួបជាមួយនឹងក្រុម Arsenal ក្នុងការប្រកួតពាន FA Cup វគ្គផ្តាច់ព្រ័ត្រ នាកីឡដ្ឋាន Wembley នៅថ្ងៃសៅរ៍នេះ។
ខ្សែប្រយុទ្ធអន្តរជាតិអេស្ប៉ាញរូបនេះ ធ្លាប់បានស្ថិតយ៉ាងប្រកៀកក្នុងការចាកចេញពីក្លិប Chelsea ដើម្បីទៅចូលរួមជាមួយនឹងក្រុមក្របខ័ណ្ឌរបស់ចិន Super League កាលពីខែមករា ប៉ុន្តែទីបំផុតបានសម្រេចចិត្តបន្តនៅ និងបានស៊ុតបាល់បញ្ចូលទី២០គ្រាប់ដើម្បីជួយឲ្យក្រុមរបស់ខ្លួនឈ្នះពានក្របខ័ណ្ឌ Premier League។ ការប្រកួតនៅថ្ងៃសៅរ៍នេះ ត្រូវបានគេរំពឹងទុកថា នឹងក្លាយជាការប្រកួតលើកចុងក្រោយរបស់គេក្នុងនាមជាកីឡាកររបស់ Chelsea ហេតុនេះ Costa នឹងស្រេកឃ្លានក្នុងការបង្ហាញពីថ្វីជើងរបស់គេ។
លោក Gary Neville អតីតប្រធានក្រុមនៃក្លិប Manchester United បាននិយាយថា៖ «Costa គឺជាសត្វមួយក្បាល នៅពេលដែលរូបគេមិនបានរកគ្រាប់បាល់បញ្ចូលទី រូបគេនឹងជួយឲ្យមិត្តរួមក្រុមរបស់គេរកឱ្យបាន។ ក្នុងការលេងជាមួយនឹងខ្សែប្រយុទ្ធតែម្នាក់ វានឹងក្លាយជារឿងដ៏លំបាកមួយក្នុងការបំពេញចន្លោះ ប្រសិនបើរូបគេចាកចេញពីក្លិបនេះ»។ លោក Neville បានបន្ថែមទៀតថា៖ «ការយកកីឡាករម្នាក់មកបំពេញកន្លែងរបស់គេ នឹងក្លាយជារឿងដ៏លំបាកមួយ។ រូបគេជាខ្សែប្រយុទ្ធកំពូលម្នាក់ និងមានភាពមុតស្រួចក្នុងតំបន់ប្រយុទ្ធ»។
Costa វ័យ២៨ឆ្នាំ បានបង្កើតឲ្យមានការចាប់អារម្មណ៍ភ្លាមៗក្នុងកីឡាបាល់ទាត់អង់គ្លេស ក្រោយពីបានផ្ទេរមកពីក្លិប Atletico Madrid កាលពីឆ្នាំ២០១៤។ រូបគេបានស៊ុតបាល់បញ្ចូលទី២០គ្រាប់ក្នុងយុទ្ធនាការលីកជាលើកទី១របស់គេដើម្បីជួយឲ្យក្រុម Chelsea លើកពាន និងបានស៊ុតបាល់បញ្ចូលទី១គ្រាប់ដ៏សំខាន់ ខណៈដែលក្រុមតោខៀវ បានផ្តួលក្រុម Tottenham Hotspur ក្នុងការប្រកួតពាន League Cup វគ្គផ្តាច់ព្រ័ត្រ។
Arsenal បានទម្លាក់ក្រុម Man City តាមរយៈការដណ្តើមបានជ័យជម្នះក្នុងលទ្ធផល ២-១ ក្នុងវគ្គពាក់កណ្តាលផ្តាច់ព្រ័ត្រ ស្របពេលដែលក្រុម Chelsea បានយកឈ្នះលើជើងខ្លាំង Tottenham ក្នុងលទ្ធផល ៤-២។ ការប្រកួតរវាងក្រុមឈ្នះទាំងពីរនេះនឹងចាប់ផ្តើមនៅម៉ោង១១:៣០ យប់នេះ៕
ប្រភពពី៖ The Sun
May 26, 2017
លោក Wenger រិះគន់ ខណៈ Liverpool និង Man City ឈ្នះកៅអី Champions League
លោក Arsene Wenger គ្រូបង្វឹកនៃក្រុម Arsenal បានធ្វើការរិះគន់ទៅលើភាពមិនច្បាស់លាស់អំពីអនាគតរបស់លោកដែលធ្វើឲ្យកីឡាកររបស់លោកមិនមានការរីករាយ ខណៈដែលក្រុម Manchester City និង Liverpool បានបន្ថែមភាពវេទនាដល់ក្រុមកាំភ្លើងធំមួយនេះ តាមរយៈការដណ្តើមយកកៅអីដែលនៅសល់ក្នុងក្របខ័ណ្ឌ Champions League រៀងៗខ្លួនកាលពីថ្ងៃអាទិត្យ។
គ្រូបង្វឹកនៃក្រុម Arsenal រូបនេះ បានផ្ទុះការរិះគន់ភ្លាមៗ ក្រោយពីក្រុមរបស់លោកបានខកខានក្នុងការឈ្នះកៅអីទៅប្រកួតក្នុងក្របខ័ណ្ឌ Champions League ជាលើកទី១ក្នុងរយៈពេល២០ឆ្នាំ បើទោះបីដណ្តើមបានជ័យជម្នះ ៣-១ លើក្រុម Everton ក៏ដោយ។ លោក Wenger បានជួបការខកចិត្តដ៏ធំ នៅមុនពេលត្រូវដឹកនាំក្រុមរបស់លោកទៅប្រកួតជាមួយនឹងក្រុម Chelsea ក្នុងការប្រកួតពាន FA Cup វគ្គផ្តាច់ព្រ័ត្រ នៅថ្ងៃសៅរ៍ សប្តាហ៍ក្រោយ។ លោក Wenger បានឲ្យដឹងថា៖ «វាពិតជារឿងដ៏គួរឱ្យខកចិត្តណាស់ ពីព្រោះរយៈពេល២០ឆ្នាំចុងក្រោយនេះ យើងបានលេងក្នុង Champions League រាល់លើក ហើយនេះជាឆ្នាំទីមួយហើយដែលយើងមិនបានស្ថិតក្នុងក្របខ័ណ្ឌនេះ»។
គ្រូបង្វឹកសញ្ជាតិបារាំងរូបនេះបានបន្ថែមទៀតថា៖ «ចាប់តាំងពីខែមករាមក យើងបានលេងក្នុងស្ថានភាពដ៏លំបាកមួយ។ វាពិតជាលំបាកណាស់សម្រាប់ក្រុមកីឡាករក្នុងការដោះស្រាយជាមួយនឹងបញ្ហាចិត្តវិទ្យា ហេតុនេះស្ថានភាពសម្រាប់កីឡាករគឺថា ពួកគេមិនមានភាពរីករាយឡើយ»។ ការទទួលជ័យជម្នះ ៣-០ របស់ក្រុមហង្សក្រហម Liverpool លើក្រុម Middlesbrough និងការទទួលជ័យជម្នះ ៥-០ របស់ក្រុម Manchester City លើក្រុម Watford បានរុញឲ្យក្រុម Arsenal ត្រូវធ្លាក់ទៅលេងក្នុងក្របខ័ណ្ឌលំដាប់ទី២របស់អឺរ៉ុប Europa League តែម្តង៕
ប្រភពពី៖ The Sun
May 22, 2017