Arsenal - La Reine Media

«លោតរំលង» Real ក្រុមបាល់ទាត់មួយនេះក្លាយជាក្លឹបមានតម្លៃខ្ពស់ជាងគេលើពិភពលោក

ដោយបានជោគជ័យច្រើនឆ្នាំបន្តបន្ទាប់ ពិសេសគឺនៅរដូវកាល 2022/2023 នេះ តម្លៃរបស់ក្រុមបាល់ទាត់អង់គ្លេសមួយនេះបានកើន 15% និងក្លាយជាក្លឹបបាល់ទាត់ដែលមានតម្លៃខ្ពស់ជាងគេលើពិភពលោកនាបច្ចុប្បន្ន។

បន្ទាប់ពីដណ្ដើមបានពានរង្វាន់ជើងឯក English Premier League និងជ័យជម្នះក្នុងវគ្គផ្ដាច់ព្រ័ត្រនៅ FA Cup 2023 ក្លឹប Manchester City កំពុងស្ថិតនៅចំពោះមុខឱកាសធំដែលអាចនាំទៅរកការលើកពានទាំងបីក្នុងប្រវត្តិសាស្ត្រនារដូវកាលនេះ។ ការប្រកួតផ្ដាច់ព្រ័ត្រជាមួយនឹង Inter Milan នៅពានរង្វាន់ Champions League នាថ្ងៃទី 11 មិថុនាខាងមុខ នឹងជារនាំងចុងក្រោយដែលកូនសិស្ស និងគ្រូបង្វឹក Pep Guardiola របស់ Man City ត្រូវឆ្លងឱ្យផុត ដើម្បីក្លាយជាម្ចាស់ជើងឯកបីពាន់រង្វាន់ក្នុងមួយរដូវកាល។

ថ្មីៗនេះ អង្គការ Brand Finance បានប្រកាសបញ្ជីឈ្មោះស្ដីពីបណ្ដាក្លឹបបាល់ទាត់ដែលមានតម្លៃខ្ពស់ជាងគេលើពិភពលោក ក្នុងនោះ Man City ស្ថិតនៅលើកំពូលតារាងចំណាត់ថ្នាក់ ដោយសារប្រាក់ចំណូលកើន នាំឱ្យតម្លៃយីហោក៏កើនបន្ថែម 13% ជួយឱ្យតម្លៃសរុបរបស់ក្លឹបនេះលោតឡើងដល់ 1.51 ពាន់លានអឺរ៉ូក្នុងឆ្នាំ 2023។

តារាងចំណាត់ថ្នាក់របស់ Brand Finance

ចំណែកក្លឹបដែលមានតម្លៃខ្ពស់ជាងគេលំដាប់ទីពីរលើពិភពលោក បានទៅលើ Real Madrid ព្រោះតែតម្លៃយីហោបានធ្លាក់អស់ 4% មកនៅត្រឹម 1.46 ពាន់លានអឺរ៉ូ។

បណ្ដាក្លឹបរបស់អេស្ប៉ាញ បន្តរីកចម្រើនខ្លាំងក្នុងឆ្នាំនេះ ក្នុងនោះ Barcelona ជាប់លេខបី, Atletico Madrid លេខ 12, Sevilla លេខ 25, Real Betis លេខ 34, Villareal លេខ 36 និង Real Sociedad លេខ 37។

Man United ជាប់លេខបួន ដោយមានតម្លៃ 1.4 ពាន់លានអឺរ៉ូ និងនៅពីលើ Liverpool ដែលមានតម្លៃ 1.4 ពាន់លានអឺរ៉ូដូច ប៉ុន្តែ Man United កើន 9% ខណៈ Liverpool កើនតែ 7%។ Arsenal ជាប់ចំណាត់ថ្នាក់លេខដប់ ខណៈ PSG ក៏មានឈ្មោះក្នុង Top 50៕

June 6, 2023

គ្រូបង្វឹកក្រុមបាល់ទាត់ Roma របស់អ៊ីតាលី បោះមេដាយចោល ក្រោយចាញ់អេស្ប៉ាញនៅវគ្គផ្ដាច់ព្រ័ត្រ Europa League

(ហុងគ្រី) – គ្រូបង្វឹក Jose Mourinho បោះមេដាយប្រាក់ទៅឱ្យអ្នកគាំទ្ររបស់ Roma បន្ទាប់ពីចាញ់ Sevilla ក្នុងការទាត់ប៉េណាំងទីម្ដងម្នាក់នៅវគ្គផ្ដាច់ព្រ័ត្រ Europa League។

គ្រូបង្វឹករបស់ក្រុមបាល់ទាត់ Roma របស់ប្រទេសអ៊ីតាលី បោះមេដាយរបស់ខ្លួនទៅកាន់អ្នកគាំទ្រនៅលើវិទិកាទស្សនិកជ ក្នុងទីលាន Puskas Arena របស់ប្រទេសហុងគ្រី ក្រោយពីការប្រកួតវគ្គផ្ដាច់ព្រ័ត្រកាលពីព្រលប់ថ្ងៃទី 31 ឧសភា 2023។ ក្រុម Roma បានចាញ់ក្រុម Sevilla របស់អេស្ប៉ាញ់ 1-4 ក្នុងការទាត់ប៉េណាំងទីម្ដងម្នាក់ បន្ទាប់ពីមានលទ្ធផលស្មើគ្នា 1-1 ក្នុង 120 នាទីកន្លង។

នេះគឺជាលើកដំបូងហើយដែលលោក Mourinho បានចាញ់នៅវគ្គផ្ដាច់ព្រ័ត្រក្នុងការប្រកួតនៅទ្វីបអឺរ៉ុប ក្រោយពីដណ្ដើមបានតំណែងជើងឯក Champions League ពីរលើក, Europa League ឬ UEFA Cup ពីរលើក និង Conference League មួយលើក។

នេះក៏ជាលើកទីពីរផងដែរ ដែលគ្រូបង្វឹក Mourinho បោះមេដាយចោល។ ក្នុងនោះ លើកទីមួយគឺពេលដែល Chelsea ចាញ់ Arsenal នៅ FA Community Shield ឆ្នាំ 2015 និង Man Utd ចាញ់ Real Madrid នៅ UEFA Super Cup ឆ្នាំ 2017៕

ក្រុម Sevilla របស់អេស្ប៉ាញ់ អបអរជ័យជម្នះ

គ្រូបង្វឹក Jose (Jose Luis Mendilibar) របស់ក្លឹបអេស្ប៉ាញ Sevilla លើកពាន គ្រាដែលគ្រូបង្វឹក Jose (Jose Mourinho) របស់ក្លឹបអ៊ីតាលី Roma កំពុងខឹងខ្លាំង

អ្នកគាំទ្រម្នាក់ទទួលបានមេដាយដែលគ្រូបង្វឹករបស់ Roma បោះឱ្យ

June 1, 2023

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?

(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។

លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។

ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។

ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។

បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។

តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស

យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕

May 30, 2023

ទិដ្ឋភាពអ្នកគាំទ្រអបអរសាទរ Man City ដែលដណ្ដើមបានពានរង្វាន់ជើងឯកលិគកំពូលអង់គ្លេស

(អង់គ្លេស) – អ្នកគាំទ្ររាប់ពាន់នាក់របស់ Man City នាំគ្នាចុះទៅកាន់ទីលានបាល់ទាត់ Etihad ដើម្បីអបអរ បន្ទាប់ពី Chelsea ដណ្ដើមបានពានរង្វាន់ជើងឯកលិគកំពូលអង់គ្លេស (English Premier League)។

បរាជ័យរបស់ Arsenal នៅចំពោះមុខ Nottingham Forest កាលពីថ្ងៃទី 20 ឧសភា បានជួយឱ្យ Man City មានលក្ខខណ្ឌគ្រប់គ្រាន់ដើម្បីលើកពានលិគកំពូលអង់គ្លេសរដូវកាលទីបីជាបន្តបន្ទាប់។ ដូច្នេះ ការប្រកួតជាមួយ Chelsea កាលពីថ្ងៃទី 21 ឧសភា គ្រាន់តែជាការបំពេញបែបបទផ្នែកលទ្ធផលប៉ុណ្ណោះ។ ក៏ប៉ុន្តែ នេះក៏ជាឱកាសសម្រាប់ក្រុមអ្នកគាំទ្ររបស់ Man City ជប់លៀងសម្រាប់ក្រុមរបស់ពួកគេ។

នៅមុនពេលចូលប្រកួត ក្រុមកីឡាករម្ចាស់ផ្ទះទទួលបានការអបអរដោយការទះដៃពីគូប្រកួត។ យោងតាមពិធីផ្លូវការ ក្រុមកីឡាកររបស់ Chelsea ឈរជាពីរជួរដើម្បីទះដៃអបអរសាទរម្ចាស់ជើងឯក។

ក្នុងកាប្រកួត Man City រកបានមួយគ្រាប់មុន Chelsea។ គ្រាប់បាល់នេះក៏កំណត់ការឈ្នះចាញ់រវាង Man City និង Chelsea ផងដែរ។

ពេលអាជ្ញាកណ្ដាលផ្លុំកញ្ចែបញ្ចប់ការប្រកួត ក៏ជាពេលដែលអ្នកគាំទ្ររាប់ពាន់នាក់របស់ Man City នាំចូលចុះទៅកាន់ទីលានប្រកួត Etihad។ ពួកគេអបអរសាទរដល់ក្រុម Man City ខណៈកូនកាំជ្រូចបញ្ចេញពន្លឺក៏ត្រូវបានគេដុតដើម្បីចូលរួមអបអរ។

ក្រោយពីចូលក្នុងទីលានប្រកួតបានមួយរយៈពេល អ្នកគាំទ្រក៏ត្រូវបានស្នើឱ្យត្រលប់ទៅកាន់កន្លែងអង្គុយវិញដើម្បីទុកកន្លែងសម្រាប់ការរៀបចំពិធីប្រគល់ពានរង្វាន់។ នេះគឺជាតំណែងជើងឯកលិគកំពូលអង់គ្លេសលើកទីប្រាំរបស់ Man City នៅក្នុង 6 រដូវកាលចុងក្រោយបង្អស់។

ខាងក្រោមនេះគឺជាទិដ្ឋភាពមួយចំនួននៅក្នុងការលើកពានរបស់ Man City ៖

May 22, 2023

ដើម្បីជំនួស Messi ក្លឹប PSG ត្រៀមទិញយកកីឡាករឆ្នើមរបស់ Arsenal ?

Paris Saint-Germain ត្រូវបានគេជឿថា បានបញ្ចូលឈ្មោះប្រធានក្រុមរបស់ Arsenal ទៅក្នុងបញ្ជីសម្រាំងចុងក្រោយរបស់ខ្លួនដើម្បីជំនួស Lionel Messi។

យោងតាមការចុះផ្សាយរបស់ទំព័រ Mirror Football តារាបាល់ទាត់អាហ្សង់ទីន លោក Messi ត្រូវគេជឿថា នឹងចាកចេញពី PSG នៅពេលកិច្ចព្រមព្រៀងបានផុតកំណត់នៅចុងរដូវកាលនេះ។ បើទោះជា Barcelona នៅតែចង់ចុះកិច្ចព្រមព្រៀងជាមួយ Messi ប៉ុន្តែ «ផ្ទះថ្មី» របស់តារាបាល់ទាត់អាហ្សង់ទីនរូបនេះ ក៏នៅមិនទាន់ច្បាស់លាស់។

PSG កំពុងធ្វើការដើម្បីចុះកិច្ចព្រមព្រៀងជាមួយកីឡាករម្នាក់ក្នុងបំណងជំនួស Messi នៅរដូវក្ដៅឆ្នាំនេះ។ ព័ត៌មានចចាមអារ៉ាមនាពេលថ្មីៗនេះ យល់ថា Bernardo Silva របស់ Manchester City កំពុងក្លាយជាគោលដៅរបស់ក្លឹបនៅប៉ារីស តែមិនទាន់សម្រេចចិត្តចុងក្រោយ។

ចំណែកទំព័រ El Nacional វិញ យល់ថា PSG បានដាក់គោលដៅលើកីឡាករន័រវែស Martin Odegaard ដែលជាប្រធានក្រុមរបស់ Arsenal។ Martin Odegaard បានក្លាយជាកីឡាករឆ្នើមបំផុតនៅ Premier League កាលពីខែមីនាកន្លងទៅ។

ទោះជាយ៉ាងនេះក៏ដោយ គ្រូបង្វឹក Mikel Arteta របស់ Arsenal បានច្រានចោលព័ត៌មានខាងលើ និងបានធានាថា កិច្ចព្រមព្រៀងជាមួយ Martin Odegaard ដែលនៅសល់ពីរឆ្នាំទៀត នឹងនៅតែរឹងមាំ៕

May 18, 2023

គ្រូបង្វឹករបស់ Arsenal ឆ្លងវីរុស COVID-19 ៖ ការប្រកួតរវាងក្រុម Arsenal និង Brighton នៅថ្ងៃសៅរ៍នេះ អាចនឹងត្រូវពន្យាពេល

លោក Mikel Arteta ត្រូវបានក្រុមវេជ្ជបណ្ឌិតរកឃើញថា មានផ្ទុកវីរុស COVID-19 ហើយថាគ្រូបង្វឹករូបនេះ ប្រហែលជាបានចម្លងមេរោគទៅឱ្យសមាជិកផ្សេងៗក្នុងក្រុម ក៏ដូចជាក្រុមគ្រូបង្វឹកដទៃរបស់ Arsenal ផងដែរ។

ការប្រកាសរបស់ Arsenal ដែលបានធ្វើឡើងកាលពីយប់ម្សិលមិញ បានលើកឡើងថា “មជ្ឈមណ្ឌលហ្វឹកហាត់របស់យើង (London Colney) ត្រូវបានបិទបណ្ដោះអាសន្ន បន្ទាប់ពីប្រធានក្រុមគ្រូបង្វឹក លោក Mikel Arteta ត្រូវបានធ្វើតេស្ត និងរកឃើញថា មានផ្ទុកវីរុស COVID-19។ បុគ្គលិកទាំងអស់ក្នុងក្លឹប ដែលធ្លាប់បានប្រស្រ័យទាក់ទងផ្ទាល់ជាមួយ Mikel ក្នុងពេលកន្លង នឹងត្រូវបង្ខាំងខ្លួននៅដាច់ដោយឡែក ទៅតាមការណែនាំរបស់រដ្ឋាភិបាល”។

បច្ចុប្បន្ន គេមិនទាន់ដឹងថា គ្រូបង្វឹករូបនេះ បានឆ្លងមេរោគពីអ្នកណានៅឡើយ ប៉ុន្តែ គេសង្ស័យថា គ្រូបង្វឹករូបនេះ ប្រហែលជាបានឆ្លងពីលោក Evangelos Marinakis។ មុននេះ លោក Evangelos Marinakis ដែលជាម្ចាស់ក្លឹប Olympiacos ធ្លាប់បានជួបផ្ទាល់ជាមួយក្រុមមេដឹកនាំ ក៏ដូចជាកីឡាករមួយចំនួនរបស់ក្លឹប Arsenal នៅពេលដែលក្លឹបទាំង2នេះ បានប្រកួតជាមួយគ្នានៅ Europa League កាលពីខែកុម្ភៈ។ ក្រោយមកមិនយូរប៉ុន្មាន បន្ទាប់ពីការប្រកួតតង់ទី2 នៅ Emirates លោក Marinakis ប្រកាសថា លោកមានផ្ទុកវីរុស COVID-19។ បញ្ហានេះក៏បានធ្វើឱ្យការប្រកួតបន្ថែមម៉ោងរវាង Arsenal និង Man City កាលពីពាក់កណ្ដាលសប្ដាហ៍នេះ ត្រូវបានពន្យាពេលផងដែរ។

សារព័ត៌មាន Sky Sports បានឱ្យដឹងថា តាមគម្រោង ក្រុម Arsenal នឹងត្រូវប្រកួតជាមួយក្រុម Brighton នៅថ្ងៃសៅរ៍ខាងមុខនេះ នៅក្នុងក្របខណ្ឌ English Premier League។ ប៉ុន្តែ ដោយមានការប្រែប្រួលទាក់ទិននឹងរោគរាតត្បាត COVID-19 នៅក្នុងក្លឹប Arsenal ការប្រកួតនោះប្រាកដជាត្រូវបានលើកពេលមិនខាន។

នៅព្រឹកថ្ងៃសុក្រ(ម៉ោងក្នុងស្រុក) គណៈកម្មការនៃពានរង្វាន់បាល់ទាត់ English Premier League នឹងត្រូវបើកកិច្ចប្រជុំបន្ទាន់មួយដើម្បីកែសម្រួលកាលបរិច្ឆេទនៃការប្រកួត៕

March 13, 2020

Aubameyang សង្គ្រោះ Arsenal ខណៈ Chelsea លត់ Dynamo Kiev យ៉ាងដំណំ

Arsenal បានឈានទៅវគ្គ 1/4 ផ្តាច់ព្រ័ត្រនៃក្របខ័ណ្ឌអឺរ៉ុប តាមរយៈការស្រោចស្រង់ពីការចាញ់ឡើងវិញក្នុងការប្រកួតជើងទី1 3-1 ដើម្បីផ្តួលក្រុម Rennes ក្នុងលទ្ធផល 3-0 និងឈានទៅវគ្គ 8ក្រុមចុងក្រោយនៃក្របខ័ណ្ឌ Europa League នាកីឡដ្ឋាន Emirates កាលពីថ្ងៃព្រហស្បតិ៍។

ខ្សែប្រយុទ្ធ Pierre-Emerick Aubameyang បានស៊ុតបាល់បញ្ចូលទី 2គ្រាប់ ហើយក៏បានជួយឱ្យ Ainsley Maitland-Niles រកបានគ្រាប់បាល់ផងដែរ ខណៈដែលក្រុម Arsenal បានចូលរួមជាមួយនឹងក្រុម Chelsea ក្នុងការចាប់ឆ្នោតនៅថ្ងៃសុក្រនេះ សម្រាប់ការប្រកួតវគ្គ 8ក្រុមចុងក្រោយនៃក្របខ័ណ្ឌ Europa League។

ជ័យជម្នះនេះ បានកើតឡើង ក្រោយពីក្រុម Liverpool, Manchester City, Manchester United និងTottenham សុទ្ធសឹងបានឈានទៅដល់វគ្គ 8ក្រុមចុងក្រោយនៃក្របខ័ណ្ឌ Champions League។

ការឈ្នះពានក្របខ័ណ្ឌ Europa League នឹងជួយឱ្យក្រុម Arsenal មានសុវត្ថិភាពក្នុងការឈ្នះកៅអីទៅលេងក្នុងក្របខ័ណ្ឌ Champions League ប្រសិនបើពួកគេខកខានក្នុងការប្រជែងដណ្តើមលេខ4 នៅលើតារាង Premier League។

ប៉ុន្តែ លោកគ្រូបង្វឹកនៃក្រុមកាំភ្លើងធំ Unai Emery ដែលបានឈ្នះពាន Europa League 3លើកក្នុងនាមជាគ្រូបង្វឹក Sevillaនោះ ក៏ចង់បានពានមួយក្នុងរដូវកាលទី1 របស់លោកក្នុងនាមជាគ្រូបង្វឹកផងដែរ។

គ្រូបង្វឹកសញ្ជាតិអេស្ប៉ាញរូបនេះបានឱ្យដឹងថា៖ «វាមិនមែនត្រឹមតែអាចជួយឱ្យឈ្នះសិទ្ធិទៅប្រកួត Champions League ប៉ុណ្ណោះទេ ប៉ុន្តែវាក៏ជាពានមួយផងដែរ ហើយយើងអាចមានអារម្មណ៍ថា អាចនឹងឈ្នះបានពាន 1ទៀត»។

ស្របពេលជាមួយគ្នានេះ ខ្សែប្រយុទ្ធ Olivier Giroud បានស៊ុតបាល់បញ្ចូលទី 3គ្រាប់ ខណៈដែលក្រុម Chelsea បានឈានទៅវគ្គ 8ក្រុមចុងក្រោយនៃក្របខ័ណ្ឌ Europa League តាមរយៈការដណ្តើមបានជ័យជម្នះទាំង 2ជើងលើក្រុម Dynamo Kiev ក្នុងលទ្ធផល 8-០៕

March 15, 2019

Arsenal លត់ BATE Borisov ចាស់ដៃ ខណៈ Marseille ទៅវគ្គបន្ត

ខ្សែបម្រើ Jack Wilshere បានក្លាយជាតារាឆ្នើម ខណៈដែលក្រុម Arsenal បានលត់ក្រុម BATE Borisov យ៉ាងចាស់ដៃក្នុងលទ្ធផល 6-០ នាកីឡដ្ឋាន Emirates ក្នុងការប្រកួតជុំចុងក្រោយនៃពូលក្នុងក្របខ័ណ្ឌ Europa League របស់ពួកគេកាលពីថ្ងៃព្រហស្បតិ៍ ស្របពេលដែលក្រុម Marseille បានកក់កៅអីរបស់ពួកគេ ក្នុងវគ្គ32ក្រុមចុងក្រោយ។

លោក Arsene Wenger បានធ្វើការផ្លាស់ប្តូរកីឡាករទាំង11នាក់ចំពោះក្រុមដែលបានចាញ់ក្រុម Manchester United កាលពីចុងសប្តាហ៍មុន ប៉ុន្តែក្នុងជម្រើសទី2របស់គ្រូបង្វឹកសញ្ជាតិបារាំងរូបនេះ បានបង្ហាញពីទម្រង់លេងយ៉ាងល្អ ដើម្បីជួយឲ្យលោកកត់ត្រាជ័យជម្នះជាលើកទី700របស់លោកក្នុងនាមជាអ្នកចាត់ការទូទៅ Arsenal។ ក្រោយពីខ្សែការពារដែលរងការរំខានដោយបញ្ហារបួស Mathieu Debuchy បានរកគ្រាប់បាល់បើកឆាកនៅនាទីទី11 តាមរយៈការស៊ុតបាល់បញ្ចូលទីជាលើកទី1របស់គេក្នុងរយៈពេល1082ថ្ងៃ ហើយខ្សែប្រយុទ្ធ Theo Walcott បានបន្ថែម1គ្រាប់ទៀតនៅនាទីទី37។

បន្ទាប់មក នៅរយៈពេល 2នាទីចុងក្រោយនៃតង់ទី1 Wilshere បានបញ្ចប់ការមិនអាចរកគ្រាប់បាល់បញ្ចូលទីរបស់គេសម្រាប់ក្រុម Arsenal ចាប់តាំងពីថ្ងៃចុងក្រោយនៃក្របខ័ណ្ឌ Premier League រដូវកាលឆ្នាំ2014-2015 តែម្តង។ ការធ្វើឲ្យបាល់ចូលទីខ្លួនឯង1គ្រាប់ពីសំណាក់ខ្សែការពារ Denis Polyakov បានជួយឲ្យក្រុម Arsenal នាំមុខ4-០ នៅដើមតង់ទី2 មុនពេលខ្សែប្រយុទ្ធ Olivier Giroud បានរកគ្រាប់បាល់ទី6របស់គេនៅរដូវកាលនេះ ពីការស៊ុតបាល់ប៉េណាល់ទី ហើយ Mohamed Elneny បានបំពេញជ័យជម្នះដ៏ធំសម្រាប់ក្រុមខ្លួននៅរយៈពេល16នាទីចុងក្រោយតែម្តង។

Wilshere បានប្រាប់ទូរទស្សន៍ BT Sport ថា៖ «វាជារឿងដែលធូរស្រាលបន្តិចដែលខ្ញុំបានរកគ្រាប់បាល់បញ្ចូលទី។ វាជាគ្រាប់បាល់1គ្រាប់ក្នុងចំណោមការប្រកួតទាំងនោះ ប៉ុន្តែ វាមិនមានន័យអ្វីឡើយ ពីព្រោះយើងបានឈរលេខ1ក្នុងពូលស្រេចទៅហើយ»៕

ប្រភពពី៖ Sport24

December 8, 2017

លោក Wenger ទាមទារឲ្យ Arsenal កសាងការជឿជាក់ ក្រោយឈ្នះពាន Community Shield

លោក Arsene Wenger បានអំពាវនាវឲ្យក្រុម Arsenal កសាងការជឿជាក់របស់ពួកគេ ក្រោយពីបានយកឈ្នះលើក្រុមតោខៀវ Chelsea ក្នុងការប្រកួតដណ្តើមពានបើករដូវកាល Community Shield តាមរយៈការចាប់ផ្តើមឲ្យបានល្អ និងរឹងមាំប្រកបដោយស្មារតីប្រយុទ្ធក្នុងរដូវកាលថ្មីនៃក្របខ័ណ្ឌ Premier League។

គ្រូបង្វឹកសញ្ជាតិបារាំងរូបនេះ នឹងឈានទៅកាន់យុទ្ធនាការថ្មី ក្រោមការត្រួតពិនិត្យយ៉ាងខ្លាំងក្លា ក្រោយពីបានបន្តកុងត្រារយៈពេល2ឆ្នាំជាមួយនឹងក្លិប Arsenal កាលពីខែឧសភា ឆ្នាំមុន ពោលគឺបន្ទាប់ពីជួបភាពត្រដាបត្រដួសកាលពីរដូវកាលមុន ដែលក្នុងពេលនោះក្រុមរបស់លោក បានខកខានក្នុងការឈ្នះកៅអីទៅកាន់ក្របខ័ណ្ឌ Champions League ជាលើកទី1ចាប់តាំងពីឆ្នាំ1997មក។ ប៉ុន្តែ រូបលោកហាក់ដូចជាមានអារម្មណ៍ធូរស្រាល ក្រោយពីក្រុមរបស់លោកបានធ្វើការវាយបកដើម្បីផ្តួលក្រុមម្ចាស់ជើងឯក Chelsea នៅកីឡដ្ឋាន Wembley កាលពីថ្ងៃអាទិត្យ ក្រោយពីកត់ត្រាជ័យជម្នះដោយបាល់ប៉េណាល់ទី ក្នុងលទ្ធផល 4-1 បន្ទាប់ពីការប្រកួតនេះបានបញ្ចប់ក្នុងលទ្ធផលស្មើ 1-1 នៅម៉ោងធម្មតា។

លោក Wenger បានចាត់ទុកថា ការឈ្នះពាន Community Shield ដែលជាការឈ្នះជាលើកទី15ក្នុងប្រវត្តិសាស្ត្ររបស់ Arsenal «គឺជាការលើកទឹកចិត្តដ៏ធំមួយ»។ បច្ចុប្បន្ន គ្រូបង្វឹករូបនេះ ចង់ឲ្យក្រុមកាំភ្លើងធំរបស់លោកគេចឲ្យផុតពីការចាប់ផ្តើមមិនបានល្អដូចក្នុងក្របខ័ណ្ឌ Premier League កាលពី2រដូវកាលមុន ដែលនៅពេលនោះ ពួកគេបានរងបរាជ័យក្នុងការប្រកួតបើកឆាកទាំង2លើក ដើម្បីក្លាយជាគូប្រជែងដ៏ខ្លាំងក្នុងការប្រជែងដណ្តើមពាន។

គ្រូបង្វឹករូបនេះបានឲ្យដឹងថា៖ «យើងចង់ស្វែងរកតុល្យភាពរវាងការជឿជាក់ដែលយើងមានពីការប្រកួតនេះ និងការជឿជាក់ដ៏ចាំបាច់ដែលតម្រូវឲ្យមានរាល់ការប្រកួតក្របខ័ណ្ឌ Premier League ទាំងអស់»។ លោក Wenger បានបន្ថែមទៀតថា៖ «យើងចង់ឲ្យមានសាមគ្គីភាព និងរក្សាការស្ថិតនៅជាមួយគ្នាពេលមួយរដូវកាលនេះ»៕
ប្រភពពី៖ The Guardian

August 7, 2017

Sanchez ជួបជាមួយប្រធានកីឡារបស់ PSG មុននឹងផ្ទេរចេញពី Arsenal

Alexis Sanchez បានរៀបចំការពិភាក្សាផ្សេងៗជាមួយនឹងក្លិប PSG នៅឯសណ្ឋាគារមួយក្នុងទីក្រុងប៉ារីសខណៈដែលតារាឆ្នើមរបស់ក្លិប Arsenal រូបនេះបានស្នាក់នៅសណ្ឋាគារ Royal Monceau Raffles ដើម្បីជួបជាមួយនឹងលោក Antero Henrique ប្រធានផ្នែកកីឡារបស់ក្លិប PSG។ នេះបើយោងតាមការចេញផ្សាយរបស់កាសែត The Sun។ ប្រភពជាក់លាក់ជាច្រើននៅទីក្រុងប៉ារីសបានអះអាងថា Sanchez វ័យ28ឆ្នាំបានទៅដល់សណ្ឋាគារ Royal Monceau Raffles កាលពីរសៀលថ្ងៃព្រហស្បតិ៍ បន្ទាប់មក លោក Henrique ត្រូវបានគេឃើញចាកចេញពីសណ្ឋាគារនោះកាលពីថ្ងៃសុក្រ។ ប្រភពនោះបានបញ្ជាក់ថា៖ «ការងាររបស់Sanchez នៅទីនេះពិតជាមានមែនប៉ុន្តែយើងស៊ាំទៅនឹងការដែលមានតារាបាល់ទាត់ឆ្នើមៗមកស្នាក់នៅទីនេះទៅហើយ»។ PSG ពិតជាចង់បានខ្សែប្រយុទ្ធ Sanchez និង Neymar ដើម្បីធ្វើឲ្យពួកគេក្លាយជាក្រុមខ្លាំងមួយក្នុងក្របខ័ណ្ឌ Champions League។ Arsenal បានសង្ឃឹមថាអាចបញ្ចុះបញ្ចូលឲ្យរូបគេបន្តនៅតាមរយៈការផ្តល់ប្រាក់បៀវត្សរ៍275,000ផោនក្នុងមួយសប្តាហ៍ស្របពេលដែល PSG អាចនឹងដាក់សំណើដេញថ្លៃក្នុងទឹកប្រាក់45លានផោន(ស្មើនឹង58.5លានដុល្លារអាមេរិក) សម្រាប់ Sanchez ដែលចង់លេងក្នុងក្របខ័ណ្ឌ Champions League៕

ប្រភពពី៖ The Sun

July 22, 2017

Tag: Arsenal