Tag: ADB

កម្ពុជានឹងទទួលបានកម្ចីជាង 30លានដុល្លា ពី ADB សម្រាប់ពង្រឹងគម្រោងម៉ាស៊ីនកិនស្រូវ
ក្នុងគោលដៅពង្រឹង និងពង្រីករោងម៉ាស៊ីនកិនស្រូវនៅកម្ពុជាឱ្យកាន់តែមានភាពទូលំទូលាយ សម្រាប់ផលិតអង្ករឱ្យបានកាន់តែច្រើន ធនាគារអភិវឌ្ឍន៍អាស៊ីហៅកាត់ថា ADB គ្រោងនឹងផ្តល់កម្ចីរហូតដល់ជាង 3លានដុល្លាទៅកាន់ម្ចាស់រោងម៉ាស៊ីនកិនស្រូវនីមួយៗក្នុងចំណោមរោងម៉ាស៊ីនកិនស្រូវធំៗទាំង10 នៅកម្ពុជា។
ប្រកាសផ្តល់ប្រាក់កម្ចីរបស់ធនាគារអភិវឌ្ឍន៍អាស៊ីទៅដល់ម្ចាស់រោងមាស៊ីនកិនស្រូវនៅកម្ពុជា បានធ្វើឡើងនៅក្នុងជំនួបជាមួយលោក មូលសារិទ្ធីអគ្គលេខាធិការសហព័ន្ធស្រូវអង្ករកម្ពុជា និងលោកUng Malar តំណាងស្ថាប័នស្រាវជ្រាវ និងអភិវឌ្ឍន៍(SBK)ដើម្បីពិភាក្សាគម្រោងស្តីពីការអភិវឌ្ឍវិស័យស្រូវអង្ករ (Rice Sector Development Program) ក្រោមប្រភពទុនពីធនាគារអភិវឌ្ឍន៍អាស៊ី។
លោក Ung Malar បានមានប្រសាសន៍ថា កន្លងមកគម្រោងនេះបានសិក្សាទៅលើខេត្តចំនួន3 រួមមានខេត្តព្រៃវែង ខេត្តកំពង់ធំ និងខេត្តបាត់ដំបង ហើយផ្តោតលើភូមិចំនួន 90(ក្នុងមួយខេត្ត30ភូមិ) និងមានប្រព័ន្ធស្រោចស្រពដែលអាចគ្របដណ្តប់លើផ្ទៃដីបានរហូតដល់ 10,300ហិកតា ដោយបានសហការជាមួយក្រសួងមួយចំនួនដើម្បីអនុវត្តគម្រោងជួយដល់វិស័យស្រូវអង្ករកម្ពុជា ក្នុងនោះទី1. ក្រសួងកសិកម្ម រុក្ខាប្រមាញ់ និងនេសាទត្រូវរៀបចំធ្វើផែនការក្សេត្របរិស្ថានដើម្បីកំណត់ថា តើតំបន់ណាត្រូវជាមួយដំណាំប្រភេទអ្វីជាដើម។
ទី2. ក្រសួងដែនដីនគរូបនីយកម្ម និងសំណង់ត្រូវរៀបចំធ្វើផែនការអភិវឌ្ឍឃុំដើម្បីកំណត់ថាតំបន់ណាសម្រាប់ធ្វើកសិកម្ម តំបន់ណាសម្រាប់ជាលំនៅឋានជាដើម។ ពិសេសគម្រោងខាងលើនេះ ខាង ADB គ្រោងនឹងផ្តល់កម្ចីរហូតដល់ជាង 3លានដុល្លារទៅកាន់រោងម៉ាស៊ីននីមួយៗ ក្នុងចំណោមរោងម៉ាស៊ីនធំៗទាំង 10 ដែលគាត់បានសិក្សាកន្លងមក។
កម្មករកំពុងចាក់ស្រូវ
សេចក្តីប្រកាសព័ត៌មានរបស់ ADB បានឱ្យដឹងថា គោលបំណងនៃជំនួបនេះ គឺដើម្បីទទួលបានព័ត៌មានអំពីបច្ចុប្បន្នភាពរបស់វិស័យស្រូវអង្ករកម្ពុជា ដោយក្នុងឱកាសនោះដែរលោក មូល សារិទ្ធី ក៏បានជម្រាបជូនអំពីការរីកចម្រើននៃវិស័យស្រូវអង្ករកម្ពុជា និងការងារមួយចំនួនទៀត ដែលទាមទារឱ្យគ្រប់ភាគីពាក់ព័ន្ធបន្តចូលរួមឱ្យកាន់តែច្រើន។ ពិសេសការជួយពិនិត្យលទ្ធភាពក្នុងការផ្តល់កម្ចីដែលមានអត្រាការប្រាក់ទាប ដល់រោងម៉ាស៊ីន និងដល់សហគមន៍កសិកម្ម ព្រោះកន្លងមកខាងសហគមន៍កសិកម្មនៅមានការខ្វះខាតដើមទុនច្រើនជាពិសេសដើមទុនសម្រាប់ការចាប់ផ្តើមធ្វើទំនើបកម្ម កសិកម្មបានដោយខ្លួនឯង។
គូរបញ្ជាក់ថា រយៈពេល 6ខែ គិតចាប់ពីខែមករា ដល់ខែមិថុនាក្នុងឆ្នាំ2018 នេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិមានចំនួន 271,537តោន។ ចំនួននេះបានថយចុះ 5.9% បើធៀបនឹងការនាំចេញអង្ករក្នុងរយៈពេលដូចគ្នានេះកាលពីឆ្នាំ2017 ដែលមានចំនួន 288,562តោន ដោយកត្តានេះបណ្តាលមកពីតម្រូវការអង្ករក្រៅប្រទេសបានធ្លាក់ចុះជាងឆ្នាំមុន៕
August 13, 2018
ADB ៖ សេដ្ឋកិច្ចកម្ពុជាអាចសម្រេចបាន6.9ភាគរយក្នុងឆ្នាំ2018
ភ្នំពេញៈ ធនាគារអភិវឌ្ឍន៍អាស៊ី(ADB)បានព្យាករថា សេដ្ឋកិច្ចកម្ពុជានឹងសម្រេចបានកំណើនត្រឹម6.9ភាគរយនៅឆ្នាំ2018ខាងមុខនេះជាការព្យាករមួយមានភាពស្រដៀងគ្នានឹងការព្យាកររបស់ធនាគារពិភពលោក និងមូលនិធិរូបិយប័ណ្ណអន្តរជាតិដែរ។
ថ្លែងនៅក្នុងជំនួបជាមួយឯកឧត្តមសភាចារ្យ អូន ព័ន្ធមុនីរ័ត្ន ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះ លោក ក្សាត្រាប៉ាទី ស៊ីវ៉ាជី (Kshratrapati Shivaji) នាយកប្រតិបត្តិនៃធនាគាADBបានថ្លែងលើកឡើងថា សេដ្ឋកិច្ចកម្ពុជាមានការអភិវឌ្ឍរីកចម្រើនយ៉ាងឆាប់រហ័ស ជាពិសេសស្ថានភាពការរីកចម្រើននៃសេដ្ឋកិច្ចដែលសម្រេចបានកំណើនក្នុងរង្វង់7ភាគរយក្នុងរយៈពេល2ទស្សវត្សរ៍មកនេះក្នុងនោះបើតាមការព្យាករកំណើនសេដ្ឋកិច្ចនៅកម្ពុជានឹងអាចសម្រេចបានប្រមាណ6.9ភាគរយនៅក្នុងឆ្នាំ2018ផងដែរ នេះគឺជាចក្ខុវិស័យចំពោះអនាគតកម្ពុជាដែលនៅតែសម្រេចបានមានលក្ខណៈវិជ្ជមាន។
លោកបានលើកឡើងទៀតថា សេដ្ឋកិច្ចកម្ពុជាត្រូវបានរំពឹងថានឹងរក្សាកំណើនសេដ្ឋកិច្ចរយៈពេលវែងប្រកបដោយចីរភាពក្នុងរង្វង់7ភាគរយក្នុងមួយឆ្នាំៗ និងបានកាត់បន្ថយភាពក្រីក្របានលើស1ភាគរយក្នុងមួយឆ្នាំផងដែរ។ ការបន្តសម្រេចបានកំណើនសេដ្ឋកិច្ចខ្ពស់បែបនេះនឹងធ្វើឲ្យចំណូលជាតិសរុបសម្រាប់ប្រជាជនម្នាក់ៗកើនឡើងដល់1,434ដុល្លារអាមេរិកនៅក្នុងឆ្នាំ2017 និងអាចរក្សាបានអតិផរណាជាមធ្យមប្រចាំឆ្នាំស្ថិតក្នុងរង្វង់3.5ភាគរយក្នុងមួយឆ្នាំ៕
August 26, 2017
ADB ជួយកម្ពុជាលើគម្រោងអភិវឌ្ឍន៍សមត្ថភាព និងបណ្តុះបណ្តាលវិជ្ជាជីវៈយុវជន
គម្រោងចំនួន2 គឺ គម្រោងអភិវឌ្ឍន៍សមត្ថភាព និងការបណ្តុះបណ្តាលជំនាញវិជ្ជាជីវៈឱ្យយុវជនមានជំនាញស្វែងរកការងារត្រូវបានធនាគារអភិវឌ្ឍន៍អាស៊ី (ADB) ប្រកាសផ្តល់ជំនួយ។
នាយកនៃនាយកដ្ឋានអាស៊ី-អាគ្នេយ៍ នៃធនាគារអភិវឌ្ឍន៍អាស៊ី លោក Kelly Bird បាននិយាយថា ធនាគារអភិវឌ្ឍន៍អាស៊ីបានជួយដល់កម្មវិធីលើគម្រោងចំនួន 2 គឺគម្រោងទី 1 ជាគម្រោងកាត់បន្ថយគម្លាតពីការរៀនចប់ទៅដល់ការរកការងារធ្វើនៅក្នុងទីផ្សារ តាមរយៈការគាំទ្របណ្តុះបណ្តាល ដោយអនុវត្តផ្ទាល់ដើម្បីឱ្យយុវជនមានការងារជាក់ស្តែង និងបទពិសោធការងារ និងគម្រោងទី2 គឺគម្រោង Training Grant Program ដែលបង្កើតលទ្ធភាពដល់និយោជកក្នុងការស្នើរៀបចំសុំថវិកាបដិភាគដើម្បីបណ្តុះបណ្តាលបុគ្គលិករបស់ខ្លួន។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានលើកឡើងថា គម្រោងទាំង2នេះជាកម្មវិធីដែលមានសក្ដានុពលខ្ពស់ក្នុងទីផ្សារការងារកម្ពុជា ដែលកំពុងតែខ្វះខាតពលកម្មជំនាញស្រាប់។ ក្នុងនោះក្រសួងពាណិជ្ជកម្មបានគាំទ្រគម្រោងមួយរួចមកហើយ គឺការបង្កើតសាលាវិជ្ជាជីវៈធ្វើម្ហូប ហៅថា Academy of Culinary Art of Cambodia ក្រោមក្របខ័ណ្ឌភាពជាដៃគូវិស័យសាធារណៈ និងវិស័យឯកជន ដែលជាការរួមចំណែកមួយក្នុងការបណ្ដុះបណ្ដាលជំនាញ៕
July 6, 2017
ធនាគារអភិវឌ្ឍន៍អាស៊ី សាកល្បងគម្រោងពីរនៅកម្ពុជា
ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានទទួលជួបលោក ឃែលលី បឺដ (Kelly Bird) នាយកនៃនាយកដ្ឋានអាស៊ី-អាគ្នេយ៍នៃធនាគារអភិវឌ្ឍន៍អាស៊ី និងសហការីដើម្បីស្វែងយល់ពីកិច្ចសហប្រតិបត្តិការបច្ចេកទេសរបស់ធនាគារអភិវឌ្ឍន៍អាស៊ី។
នៅក្នុងកិច្ចប្រជុំនេះលោក បឺដ បានលើកឡើងនូវគម្រោងសាកល្បងចំនួនពីរ ដែលធនាគារអភិវឌ្ឍន៍អាស៊ីបានរៀបចំ និងអនុវត្តនៅប្រទេសហ្វីលីពីនប្រកបដោយជោគជ័យ។ គម្រោងទាំងពីរនេះគឺទាក់ទងនឹងការអភិវឌ្ឍសមត្ថភាព និងការបណ្ដុះបណ្ដាលវិជ្ជាជីវៈ ដើម្បីឲ្យយុវជនមានជំនាញគ្រប់គ្រាន់ក្នុងការស្វែងរកការងារនៅក្នុងទីផ្សារ។
គម្រោងទីមួយមានគោលបំណងកាត់បន្ថយគម្លាតពីការរៀនចប់ទៅដល់ការរកបានការងារនៅលើទីផ្សារតាមរយៈការគាំទ្រលើការបណ្ដុះបណ្ដាល តាមរយៈការអនុវត្តផ្ទាល់ដើម្បីឲ្យយុវជនទទួលបាននូវជំនាញជាក់ស្ដែង និងបទពិសោធគ្រប់គ្រាន់ក្នុងការស្វែងរកការងារ។
លោក បឺដ បានឲ្យដឹងថា យោងលើលទ្ធផលជាវិជ្ជមាននៃគម្រោងនេះ ប្រទេសហ្វីលីពីនបានរៀបចំ និងអនុម័តច្បាប់មួយ ដើម្បីគាំទ្រសកម្មភាពនេះដោយខ្លួនឯង និងបង្កើតនូវកម្មវិធីមួយហៅថា Jobstart ដើម្បីពង្រីកសកម្មភាពអភិវឌ្ឍន៍សមត្ថភាព និងបណ្ដុះបណ្ដាលវិជ្ជាជីវៈឲ្យកាន់តែទូលំទូលាយថែមទៀត។ ចំពោះគម្រោងទីពីរ ហៅថា Training Grants Program បានបង្កើតលទ្ធភាពដល់និយោជក ក្នុងការរៀបចំស្នើសុំថវិកាបដិភាគ ដើម្បីយកមកបណ្ដុះបណ្ដាលដល់និយោជិតរបស់ខ្លួន។
គម្រោងនេះ ត្រូវបានយកមកសាកល្បងនៅក្នុងវិស័យទេសចរណ៍ ហើយជាលទ្ធផលឃើញថា និយោជិតជាច្រើនត្រូវបានបណ្ដុះបណ្ដាលលើជំនាញបដិសណ្ឋារកិច្ច អនាម័យម្ហូបអាហារ និងការងារដទៃទៀតផងដែរ។
ជាការឆ្លើយតប ឯកឧត្តមរដ្ឋមន្ត្រីយល់ថា គម្រោងទាំងនេះពិតជាមានសក្ដានុពលខ្ពស់មកលើទីផ្សារការងាររបស់កម្ពុជាដែលកំពុងតែខ្វះខាតពលករជំនាញ។ ឯកឧត្តមលើកឡើងថា ក្រសួងពាណិជ្ជកម្មបានគាំទ្រគម្រោងមួយរួចមកហើយ គឺការបង្កើតសាលាវិជ្ជាជីវៈធ្វើម្ហូប ហៅថា Academy of Culinary Art of Cambodia ក្រោមក្របខ័ណ្ឌភាពជាដៃគូវិស័យសាធារណៈ និងវិស័យឯកជន (PPP) ដែលជាការរួមចំណែកមួយក្នុងការបណ្ដុះបណ្ដាលជំនាញ។
ឯកឧត្តមស្វាគមន៍ចំពោះគំនិតផ្ដួចផ្ដើមរបស់ធនាគារអភិវឌ្ឍន៍អាស៊ី ហើយមានមតិថា ធនាគារអាចសាកល្បងលើវិស័យទេសចរណ៍ជាមុនសិន ដោយធនាគារមានបទពិសោធស្រាប់ក្នុងវិស័យនេះ មុនចាប់យកវិស័យដទៃទៀតដូចជា ការកែច្នៃផលិតផលកសិកម្ម ព័ត៌មានវិទ្យា ជំនាញផ្គុំឧបករណ៍អេឡិចត្រូនិក។ល។ ជាមួយនោះដែរ ឯកឧត្តមក៏បានលើកឡើងអំពីការបណ្ដុះបណ្ដាលភាពជាសហគ្រិនជាការគាំទ្រដល់យុវជនកម្ពុជាដែលមានបំណងក្លាយជាសហគ្រិន និងលើកកម្ពស់ការអភិវឌ្ឍសហគ្រាសធុនតូច និងមធ្យមរបស់កម្ពុជា៕
July 3, 2017
ចម ប្រសិទ្ធ៖ ADB កំពុងជួយទំនប់បម្រុងលើវិស័យទឹកស្អាតនៅតាមជនបទ
ធនាគារអភិវឌ្ឍន៍អាស៊ីប្រចាំកម្ពុជា (ADB) កំពុងផ្ដោតការយកចិត្តទុកដាក់លើវិស័យទឹកស្អាតនៅប្រទេសកម្ពុជា ដោយបានអនុវត្ត និងដាក់គម្រោងនានា ទាក់ទងនឹងវិស័យផ្គត់ផ្គង់ទឹកស្អាត។ ការឱ្យដឹងនេះ បន្ទាប់ពីរដ្ឋមន្ត្រីក្រសួងឧស្សាហកម្ម និងសិប្បកម្ម ជួបជាមួយប្រធានធនាគារអភិវឌ្ឍអាស៊ីប្រចាំកម្ពុជា កាលពីពេលថ្មីៗនេះ។
លោក Samiuela Tukuafu ប្រធានធនាគារអភិវឌ្ឍអាស៊ីប្រចាំកម្ពុជាបានឱ្យដឹងថា ADB បានដាក់ផែនការកម្មវិធីក្នុងប្រទេសកម្ពុជារួមមាន៖ ឆ្នាំ 2017 គ្រោងនឹងចុះកិច្ចព្រមព្រៀងឥណទានសម្បទានសម្រាប់គម្រោងទឹក ស្អាត និងអនាម័យខេត្ត ដែលមានទំហំថវិកាឥណទានរបស់ ADB ចំនួន 50លានដុល្លារអាមេរិក និងឆ្នាំ 2017 ធ្វើគម្រោងអភិវឌ្ឍដៃគូរវាងរដ្ឋ និងឯកជន (PPP)។
លោក Samiuela Tukuafu ប្រធានធនាគារអភិវឌ្ឍអាស៊ីប្រចាំកម្ពុជា
សម្រាប់ឆ្នាំ 2018 យើងនឹងដាក់គម្រោងជំនួយបច្ចេកទេស ដែលមានថវិកាជាជំនួយឥតសំណងប្រមាណ 1,5 លានដុល្លារអាមេរិក ដើម្បីសិក្សារៀបចំគម្រោងទឹកស្អាត និងអនាម័យដំណាក់កាលទី2។ ឆ្នាំ 2020 យើងគ្រោងនឹងអនុម័តគម្រោងទឹកស្អាត និងអនាម័យខេត្តជំហ៊ានទី2 ដែលមានថវិការបស់ ADB ចំនួន 50លានដុល្លារអាមេរិកទៀត។
ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មកម្ពុជា បានឱ្យដឹងដែរថា គម្រោងទាំងនេះ ក្រសួងឧស្សាហកម្ម និងសិប្បកម្ម កំពុងអនុវត្ត និងរៀបចំបណ្តាគម្រោងនានា ដែលគ្រោងស្នើសុំនាពេលអនាគត ទាក់ទងនឹងវិស័យផ្គត់ផ្គង់ទឹកស្អាតនៅកម្ពុជា។
ឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម
ឯកឧត្តមបានសាទរគម្រោងបេសកកម្មកម្មវិធីរបស់ធនាគារអភិវឌ្ឍន៍អាស៊ី ADB និងស្នើឱ្យ ADB ផ្តល់សារៈសំខាន់ ចំពោះគម្រោងអភិវឌ្ឃន៍ជាអាទិភាពមួយចំនួនរួមមាន៖ រោងចក្រទឹកស្អាតនៅខេត្តស្ទឹងត្រែង ដែលបច្ចុប្បន្ននៅប្រើបំពង់បណ្តាញចាស់តាំងពីជំនាន់បារាំង កំពុងមានបញ្ហាធ្លាយលេចជាច្រើនកន្លែង ដែលតម្រូវឱ្យមានការផ្លាស់ប្តូរថ្មី និងកែតម្រូវប្រព័ន្ធដទៃទៀត។
គម្រោងផ្គត់ផ្គង់ពង្រីកវិសាលភាពទឹកស្អាត នៅក្រុងបាវិត ខេត្តស្វាយរៀង ដែលជាទីប្រជុំជនជាប់ព្រំដែន មានសកម្មភាពពាណិជ្ជកម្មមមាញឹក ជាពិសេសជាតំបន់សេដ្ឋកិច្ចពិសេស ប្រមូលផ្តុំដោយរោងចក្រ សហគ្រាស និងកម្មករ និងគម្រោងពង្រីកសេវាគ្របដណ្តប់បណ្តាញផ្គត់ផ្គង់ទឹកស្អាត នៅខេត្តសៀមរាប ដែលជាខេត្តគោលដៅទេសចរណ៍ដ៏សំខាន់របស់ពិភពលោក៕
April 26, 2017