Tag: 5G

លោក Nguyen Manh Hung បានស្នើឱ្យសហរដ្ឋអាមេរិក បញ្ជូនអ្នកជំនាញមកវៀតណាម ដើម្បីពិនិត្យមើលថា តើឧបករណ៍ 5G (Made in Vietnam) ដែលផលិតនៅវៀតណាម មានលក្ខណសម្បត្តិគ្រប់គ្រាន់ដែលអាចចូលក្នុងទីផ្សារអាមេរិកដែរ ឬអត់?។

កាលពីថ្ងៃទី20 មករាកន្លងទៅ លោក Nguyen Manh Hung រដ្ឋមន្ត្រីក្រសួងព័ត៌មាន និងទូរគមនាគមន៍វៀតណាម បានទទួលជួបប្រតិភូតំណាងរាស្ត្រអាមេរិក។ នៅក្នុងជំនួបនោះ លោក Nguyen Manh Hung បានស្នើឱ្យភាគីអាមេរិក បញ្ជូនឈ្មួញ និងអ្នកជំនាញការមកពិភាក្សាជាមួយភាគីវៀតណាម អំពីស្ដង់ដារនៃបច្ចេក​ទេស 5G និងត្រួតពិនិត្យមើលឱ្យដឹងថា តើឧបករណ៍ 5G ដែលផលិតដោយវៀតណាម មានសមត្ថភាពគ្រប់គ្រាន់ដើម្បីអាចចូលទៅទីផ្សារអាមេរិកដែរ ឬយ៉ាងណា?។

ឆ្លើយតបនឹងសំណើរបស់វៀតណាម អនុប្រធានគណៈកម្មាធិការថវិកាជាតិ និងជាសមាជិកគណៈកម្មការកិច្ចការយោធានៃសភាជាន់ទាបអាមេរិក លោក Seth Moulton បានឱ្យដឹងថា ភាគីអាមេរិកទទួលពិចារណាសំណើនេះ ហើយនឹងឆ្លើយតបជាក់លាក់តាមរយៈស្ថានទូតរបស់ខ្លួន។

លោក Nguyen Manh Hung ក៏បានបញ្ជាក់ដែរថា ឆ្នាំ2020 នេះ វៀតណាមនឹងធ្វើឧស្សាហូបនីយកម្មប្រព័ន្ធ 5G និងដាក់ចេញនូវស្ដង់ដាស្ដីពីសន្តិសុខ ឬសុវត្ថិភាពសម្រាប់ប្រព័ន្ធនេះ។

ក្នុងតំបន់អាស៊ីអាគ្នេយ៍បច្ចុប្បន្ន គេកត់សម្គាល់ឃើញថា វៀតណាមគឺជាអ្នកនាំមុខគេក្នុងការអភិវឌ្ឍបច្ចេកវិទ្យា 5G។

កាលពីប៉ុន្មានថ្ងៃមុននេះ លោក Nguyen Manh Hung រួមជាមួយនឹងរដ្ឋមន្ត្រីក្រសួងវិទ្យាសាស្ដ្រ និងបច្ចេក​វិទ្យា​វៀតណាម Chu Ngoc Anh បានធ្វើតេស្តសាកល្បងប្រព័ន្ធ 5G ដែលផលិតដោយក្រុមហ៊ុន Viettel ដែលជាក្រុមហ៊ុនរដ្ឋដ៏ធំមួយរបស់វៀតណាម។

សូមបញ្ជាក់ថា បច្ចុប្បន្នក្នុងពិភពលោក មានតែក្រុមហ៊ុនចំនួន5 ប៉ុណ្ណោះ ដែលផលិតបានដោយជោគជ័យនូវប្រព័ន្ធ 5Gនេះ ក្នុងនោះរួមមានក្រុមហ៊ុន Ericsson, Nokia, Huawei, Samsung និង ZTE។ Viettel នឹងក្លាយជាក្រុមហ៊ុនទី6 ក្នុងពិភពលោកដែលផលិត និងផ្ដល់សេវាបច្ចេកវិទ្យា5G៕

ប្រភព៖សារព័ត៌មានបរទេស

យោងតាមការចេញផ្សាយរបស់សារព័ត៌មាន Reuters នាថ្មីៗនេះបានឱ្យដឹងថា រដ្ឋាភិបាល​អូស្ត្រាលី​បានហាមឃាត់​ក្រុមហ៊ុនផលិតស្មាតហ្វូនលំដាប់កំពូលរបស់ចិន Huawei ​ក្នុងការដាក់ឱ្យប្រើប្រាស់ប្រព័ន្ធអីុនធើណិត 5G នៅក្នុងប្រទេសរបស់ខ្លួន ដោយសារតែរដ្ឋាភិបាល​មានក្ដីព្រួយបារម្ភ​ទៅលើ​សន្ដិសុខជាតិ។

Huawei ជាក្រុមហ៊ុនបច្ចេកវិទ្យាដ៏ធំមួយដែលបានវាយលុកទៅលើទីផ្សារបច្ចេកវិទ្យា Wirelessនៅលើពិភពលោកអស់រយៈពេលជាច្រើនឆ្នាំ ជា-ពិសេសគឺនៅលើទឹកដី​នៃ​ប្រទេស​អូស្ត្រាលី គឺមានរយៈពេល 15ឆ្នាំមកហើយ ប៉ុន្តែនៅពេលនេះបែរជាត្រូវបានរដ្ឋាភិបាលអូស្ត្រាលីហាមឃាត់ទៅវិញ​ ដែលបណ្ដាលឱ្យ Huawei ត្រូវជួបនឹងវិបត្តិមួយ​ដ៏ធ្ងន់ធ្ងរ។

ជាមួយគ្នានោះផងដែរ សារព័ត៌មាន Reuters ក៏បានបញ្ជាក់បន្ថែមទៀតថា ក្រុមហ៊ុន ZTE ក៏​ត្រូវ​រដ្ឋាភិបាល​អូស្រ្តាលី​ព្រួយ​បារម្ភ​ពី​ផ្នែក​សន្តិសុខ​ជាតិ​ដូច​គ្នា។

បន្ទាប់ពីមានសេចក្ដីប្រកាសហាមឃាត់ការដាក់ដំណើរការប្រព័ន្ធអីុនធើណិត 5G នៅក្នុងប្រទេសអូស្ត្រាលី ក្រុមហ៊ុន Huawei បានចេញសារខកចិត្តមួយនៅលើ​បណ្ដាញសង្គម Twitter ដោយបានបញ្ជាក់ថា៖ “វាគឺជា​ការ​ខក​ចិត្ត​ដ៏​ធំ​បំផុត​មួយ​សម្រាប់​អតិថិជន​របស់​យើង​ (អ្នកប្រើប្រាស់ Huawei នៅក្នុងប្រទេសអូស្ត្រាលី)”។ ស្របពេលដែល 5G ជា​ប្រព័ន្ធ​អីុនធើណិត​ចល័ត​ជំនាន់​ថ្មី និងចុងក្រោយ ដែលអាច​ផ្តល់​ល្បឿន Download និង Upload ​កាន់​តែអស្ចារ្យ និង​ប្រសើរ​ជាង​មុន។

គួរបញ្ជាក់ផងដែរថា ប្រទេស​ជា​ច្រើន​នៅក្នុង​សកលលោក​ កំពុង​ត្រៀមខ្លួន​ដាក់​ដំណើរការ​ 5G​ នៅមុន​ឆ្នាំ2020 ខណៈដែល Huawei ក្រុមហ៊ុនផលិតបានត្រៀមខ្លួន​រួច​ជាស្រេច​ក្នុងការផ្ដល់សេវាកម្មនេះ ជាពិសេសគឺនៅពេលនេះ Huawei គឺជាក្រុមហ៊ុនផលិតស្មាតហ្វូនលំដាប់ទី2 នៅលើពិភពលោកបន្ទាប់ពី Samsung៕