2023 - La Reine Media

ពិព័រណ៍បច្ចេកវិទ្យាយានយន្តសាំង និងយានយន្តអគ្គិសនី ឆ្នាំ 2023 នៅវៀតណាម ទាក់ទាញក្រុមហ៊ុនបានរាប់រយស្ថាប័ន

ក្រុមហ៊ុនជាង 200 ស្ថាប័ននៅវៀតណាម និងបរទេស បានចូលរួមព្រឹត្តិការណ៍តាំងបង្ហាញផលិតផលក្នុងបញ្ជរជិត 300 នៅក្នុងពិព័រណ៍បច្ចេកវិទ្យាយានយន្តសាំង និងយានយន្តអគ្គិសនី ឆ្នាំ 2023។

កាលពីថ្ងៃទី 18 ឧសភា ពិព័រណ៍អន្តរជាតិលើកទី 19 ស្ដីពីបច្ចេកវិទ្យារថយន្ត ម៉ូតូ រថយន្តអគ្គិសនី និងឧស្សាហកម្មគ្រឿងបន្លាស់ (Autotech & Accessories 2023) ឆ្នាំ 2023 ត្រូវបានធ្វើឡើងនៅឯសាលពិព័រណ៍សៃហ្គន (SECC) ក្នុងទីក្រុងហូជីមិញ ប្រទេសវៀតណាម។

ពិព័រណ៍ Autotech & Accessories 2023 ទាក់បានក្រុមហ៊ុនជាង 200 ស្ថាប័ននៅវៀតណាម និងបរទេសចូលរួមតាំងបង្ហាញផលិតផលនៅក្នុងបញ្ជរជិត 300 របស់ពួកគេ។ ពិព័រណ៍នេះផ្ដល់ឱកាសក្នុងការតភ្ជាប់ទំនាក់ទំនងផ្នែកធុរកិច្ចរវាងបណ្ដាក្រុមហ៊ុនក្នុងស្រុក និងបរទេស។

ក្នុងបញ្ជរតាំងបង្ហាញ គេឃើញមានតាំងពីរថយន្តគ្រូសារ រថយន្តដឹកទំនិញ រថយន្តអគ្គិសនី ម៉ូតូ រហូតដល់ផលិតផលគ្រឿងបន្លាស់សម្រាប់យានយន្ត និងដំណោះស្រាយបច្ចេកវិទ្យាទំនើបសម្រាប់យានយន្ត។ល។ ពិព័រណ៍នេះក៏មានវត្តមានរបស់យីហោល្បីៗ មានដូចជា Blueone, Jaan –E, Daichi, Minamoto ជាដើមផងដែរ។

ពិព័រណ៍ប្រចាំឆ្នាំ Autotech & Accessories ត្រូវបានធ្វើឡើងនៅវៀតណាម តាំងពីឆ្នាំ 2006 រហូតដល់បច្ចុប្បន្ន។ Autotech & Accessories 2023 ត្រូវបានរៀបចំ និងតាំងបង្ហាញចាប់ពីថ្ងៃទី 18 ដល់ 21 ឧសភា ឆ្នាំ 2023៕

May 20, 2023

ការរីកចម្រើនផ្នែកអវកាសរបស់សហរដ្ឋអាម៉េរិក ធៀបនឹងប្រទេសចិន

នៅក្នុងផ្នែកសំខាន់ៗ សហរដ្ឋអាម៉េរិកមិនត្រឹមតែមានប្រៀបលើសលុបលើប្រទេសចិននោះទេ ប៉ុន្តែក៏មានប្រៀបជាងបណ្ដាប្រទេសបូកចូលគ្នាផងដែរនៅក្នុងវិស័យអវកាស។

អំពីថវិកា៖ ឆ្នាំ 2021 ថវិកាសម្រាប់ផ្នែកអវកាសរបស់សហរដ្ឋអាម៉េរិកគឺប្រមាណ 59.8 ពាន់លានដុល្លារ ខណៈប្រទេសចិន មានប្រហែល 16.18 ពាន់លានដុល្លារប៉ុណ្ណោះ។ នេះបើតាម Svetla Ben-Itzhak សាស្ត្រាចារ្យរងផ្នែកអវកាស និងទំនាក់ទំនងអន្តរជាតិ ប្រចាំសាកលវិទ្យាល័យ Air (AU) របស់សហរដ្ឋអាម៉េរិក។

ផ្កាយរណប៖ គិតត្រឹមខែមេសា ឆ្នាំ 2023 នៅលើគន្លងតារាវិថីផែនដី មានផ្កាយរណបសរុប 5,465 គ្រឿងកំពុងដំណើរការ។ ក្នុងនោះ សហរដ្ឋអាម៉េរិកមាន 3,433 គ្រឿង ស្មើនឹង 63% ហើយឈរលំដាប់លេខមួយលើពិភពលោក។ ចំណែកប្រទេសចិនវិញ មានតែ 541 គ្រឿងប៉ុណ្ណោះ។

អវកាសយានដ្ឋាន៖ សហរដ្ឋអាម៉េរិកមានអវកាសយានដ្ឋានសម្រាប់បាញ់បង្ហោះយានអវកាសចំនួន 7 កំពុងដំណើរការក្នុង និងក្រៅប្រទេស គ្រាដែលយ៉ាងតិច 13 កន្លែងផ្សេងទៀតកំពុងស្ថាបនា។ ប្រទេសចិនមានអាកាសយានដ្ឋានកំពុងដំណើរការចំនួន 4 កន្លែង និង 2 កន្លែងទៀតកំពុងអភិវឌ្ឍទៅតាមផែនការ ហើយទាំងអស់សុទ្ធតែស្ថិតក្នុងទឹកដីប្រទេសនេះ។

ដៃគូសហការ៖ រដ្ឋាភិបាលអាម៉េរិកបានចុះហត្ថលេខាលើកិច្ចព្រមព្រៀងចំនួន 169 ជាមួយរដ្ឋ និងអង្គការអន្តររដ្ឋាភិបាលចំនួន នឹង 33, 129 ជាមួយនឹងដៃគូពាណិជ្ជកម្ម និង 7 ជាមួយនឹងស្ថាប័នស្រាវជ្រាវ។ ប្រទេសចិន មានកិច្ចសហការជាមួយប្រទេសរុស្ស៊ី អ៊ីរ៉ង់ ប៉ាគិស្ថាន ថៃ និងតួកគី។

បេសកកម្មឡើងទៅឋានព្រះចន្ទ៖ រុស្ស៊ី និងចិន សហការគ្នានៅក្នុងគម្រោងឡើងទៅកាន់ឋានព្រះចន្ទនៅឆ្នាំ 2028។ ស្ថានីយស្រាវជ្រាវព្រះចន្ទអន្តរជាតិរបស់ប្រទេសទាំងពីរនេះ បើកទ្វារទទួលយកដៃគូសហការអន្តរជាតិ ប៉ុន្តែមកដល់ពេលនេះមិនទាន់មានដៃគូថ្មីណាមួយឡើយ។ ចំណែកកម្មវិធីព្រះចន្ទ Artemis ដែលនឹងនាំអ្នកអវកាសឡើងទៅកាន់ឋានព្រះចន្ទនៅឆ្នាំ 2025 របស់សហរដ្ឋអាម៉េរិកវិញ គិតចាប់ពីឆ្នាំ 2020 មានប្រទេសចំនួន 24 បានចូលរួម។

ចំនួនលើកនៃការបាញ់បង្ហោះយានអវកាស៖ ឆ្នាំ 2021 ប្រទេសចិនបានបាញ់បង្ហោះយានអវកាសចំនួន 55 លើក ច្រើនជាងសហរដ្ឋអាម៉េរិកចំនួន 4 លើក។

ស្ថានីយអវកាស៖ ចាប់ពីឆ្នាំ 2022 ប្រទេសចិនមានស្ថានីយអវកាសពេញលេញផ្ទាល់ខ្លួន ឈ្មោះ ធានហ្គង់ (Tiangong) ដែលគ្រប់គ្រងតែឯង។ ចាប់ពីឆ្នាំ 1990 សហរដ្ឋអាម៉េរិកបានសហការជាមួយប្រទេសចំនួន 14 ក្នុងនោះមានរុស្ស៊ីផងដែរ ដើម្បីដំណើរការស្ថានីយអវកាសអន្តរជាតិ (ISS)។ ប្រទេសចិនអាចនឹងមានប្រៀបជាងសហរដ្ឋអាម៉េរិក យ៉ាងឆាប់ត្រឹមឆ្នាំ 2045 បើសិនវ៉ាស៊ីងតោនមិនធ្វើសកម្មភាព។ ប៉ុន្តែ យោងតាម Space លទ្ធភាពនេះប្រហែលជានឹងមិនអាចកើតឡើង ព្រោះថា សហរដ្ឋអាម៉េរិកកំពុងតែបង្កើនការវិនិយោគទៅលើវិស័យអវកាស៕

May 20, 2023

រដ្ឋមួយនៅប្រទេសឥណ្ឌា គំរាមបញ្ឈប់ការងារនគរបាលដែលមិនសម្រកជម្ងន់

មេប៉ូលិសនៅរដ្ឋ Assam បានតម្រូវឱ្យមន្ត្រីនគរបាលដែលធាត់ជ្រុល សម្រកជម្ងន់ក្នុងរង្វង់បីខែ បើមិនដូច្នេះទេនឹងត្រូវបណ្ដេញចេញពីការងារ។

GP Singh ស្នងការនគរបាលរដ្ឋ Assam ភាគឦសានប្រទេសឥណ្ឌា កាលពីថ្ងៃទី 15 ឧសភា បានប្រាប់ដល់មន្ត្រីនគរបាលដែលលើសទម្ងន់ថា រង្វាស់សុខភាព BMI របស់ពួកគេនឹងត្រូវបានកត់ត្រាប្រកបដោយជំនាញចាប់ពីពាក់កណ្ដាលខែសីហា។ ក្រុម «លើសទម្ងន់» ត្រូវតែកាត់បន្ថយតួលេខ BMI ឱ្យបានមុនខែវិច្ឆិកា ឆ្នាំ 2023 បើមិនដូច្នេះទេ នឹងត្រូវបណ្ដេញចេញពីការងារ។

«យើងគ្រោងនឹងទុកពេលបីខែឱ្យប៉ូលិសនៅ Assam មុនពេលចាប់ផ្ដើមពិនិត្យ។ គ្រប់គ្នាដែលស្ថិតក្នុងក្រុមធាត់ជ្រុល ដែលមាន BMI 30+ នឹងមានពេលបីខែទៀតដើម្បីសម្រកទម្ងន់» លោក GP Singh ឱ្យដឹងដូច្នេះ។

BMI ត្រូវបានគណនាតាមរូបមន្ត៖ BMI = (ទម្ងន់រាងកាយ) / (កម្ពស់ x កម្ពស់) ក្នុងនោះ ទម្ងន់គិតជាគីឡូក្រាម និងកម្ពស់គិតជាម៉ែត្រ។ រង្វាស់សុខភាព BMI បញ្ជាក់ថា ទម្ងន់ និងកម្ពស់របស់មនុស្សម្នាក់ មានរាងកាយសមសួន និងសុខភាពល្អ ឬអត់។

May 19, 2023

ក្រុមហ៊ុនវៀតណាមនាំចេញរថយន្តអគ្គិសនី VinFast VF8 ជើងដំបូងទៅកាន់កាណាដា

កាលពីថ្ងៃទី 18 ឧសភា (17 ឧសភានៅកាណាដា) ក្រុមហ៊ុន VinFast Canada បានប្រកាសថា កប៉ាល់ដឹករថយន្តអគ្គិសនី VinFast VF8 ចំនួន 781 គ្រឿង បានចូលចតនៅកំពង់ផែ Nanaimo ក្នុងតំបន់ British Columbia។

រថយន្តអគ្គិសនីម៉ូដែល VF8 របស់ VinFast ត្រូវបាន EPA ទទួលស្គាល់ថា អាចរត់បានចម្ងាយ 425 គីឡូម៉ែត្រសម្រាប់កំណែ Eco, 391 គីឡូម៉ែត្រសម្រាប់កំណែ Plus 300 kW និង 354 គីឡូម៉ែត្រសម្រាប់កំណែ Plus 260 kW បន្ទាប់ពីបញ្ចូលថាមពលអគ្គិសនីមួយពេញ។

នៅកាណាដា កំណែ VF8 Eco មានតម្លៃចាប់ពី 39,680 ដុល្លារអាម៉េរិក គ្រាដែលកំណែ VF8 Plus 260 kW មានតម្លៃចាប់ពី 43,820 ដុល្លារអាម៉េរិក។

រថយន្តអគ្គិសនី 781 គ្រឿងខាងលើនេះគឺជាការនាំចេញលើកទីពីរទៅកាន់ទីផ្សារអន្តរជាតិរបស់ក្រុមហ៊ុន VinFast ដែលបានចេញដំណើរពីវៀតណាមកាលពីថ្ងៃទី 16 មេសា ឆ្នាំ 2023។ មុននោះ VinFast VF8 ចំនួន 1,098 គ្រឿងក៏បានទៅដល់សហរដ្ឋអាម៉េរិកកាលពីថ្ងៃទី 12 ឧសភា។

VinFast VF8 ត្រូវបានបំពាក់មុខងារបច្ចេកវិទ្យាទំនើបៗ ក្នុងនោះមានទាំងប្រព័ន្ធជំនួយការបើកបរ (ADAS) ព្រមទាំងត្រូវបានធានា 10 ឆ្នាំ ឬ 200,000 គីឡូម៉ែត្រសម្រាប់រថយន្ត និង 10 ឆ្នាំ ឬមិនកំណត់ចំនួនគីឡូម៉ែត្រសម្រាប់ថ្មផ្ទុកថាមពល។ សេវាជួសជុលចល័ត និងសង្គ្រោះ 24/7 ក៏ស្ថិតនៅក្នុងការធានានេះ៕

May 19, 2023

FIFA ជិតចាប់ផ្ដើមចូលស៊ើបអង្កេត ខណៈ U22 ឥណ្ឌូណេស៊ីប្ដេជ្ញាប្ដឹងប្រឆាំង U22 ថៃ ក្នុងករណីនៅស៊ីហ្គេម 2023

ភាគីខាង U22 ឥណ្ឌូណេស៊ី កំពុងតែមានបំណងពឹង FIFA កាត់ក្ដីករណីអំពើហិង្សារវាងក្រុមបាល់ទាត់បុរសជម្រើសជាតិប្រទេសនេះ និងក្រុមបាល់ទាត់ថៃ នៅក្នុងការប្រកួតវគ្គផ្ដាច់ព្រ័ត្រនៅស៊ីហ្គេមលើកទី 32។

ហេតុការណ៍វាយតប់គ្នារវាង U22 ថៃ និង U22 ឥណ្ឌូណេស៊ី មិនទាន់ត្រូវបានដោះស្រាយរួចរាល់នៅឡើយ បើទោះវគ្គផ្ដាច់ព្រ័ត្រនៅស៊ីហ្គេមឆ្នាំ 2023 បានចប់សព្វគ្រប់។ បន្ទាប់ពីសហព័ន្ធកីឡាបាល់ទាត់អាស៊ី (AFC) ចាប់ផ្ដើមស៊ើបអង្កេត ហើយក្រុមទាំងពីរអាចត្រូវទទួលការពិន័យ ភាគីឥណ្ឌូណេស៊ីក៏បែរជាចង់អញ្ជើញទាំង FIFA មកចូលរួមដោះស្រាយ។

ភាគីឥណ្ឌូណេស៊ីចង់ឱ្យថៃទទួលខុសត្រូវនៅក្នុងករណីនេះ។ ប្រធានគណៈកម្មាធិការអូឡាំពិកឥណ្ឌូណេស៊ី (NOC) Raja Sapta Oktohari បានបើកកិច្ចប្រជុំមួយជាមួយសមាជិករបស់សហព័ន្ធបាល់ទាត់ឥណ្ឌូណេស៊ី (PSSI) ដើម្បីធ្វើការសម្រេចលើការស្នើសុំអន្តរាគមន៍របស់ FIFA ក្នុងករណីហិង្សានៅវគ្គផ្ដាច់ព្រ័ត្រផ្នែកបាល់ទាត់បុរសនៅស៊ីហ្គមលើកទី 32 និងកាត់ក្ដីចុងក្រោយ។

ប្រធាន NOC ឱ្យដឹងថា «ពេលនេះ យើងមិនទាន់បញ្ជូនរបាយការណ៍ឡើងទៅកាន់ FIFA ប៉ុន្តែរឿងនេះនឹងកើតឡើងឆាប់ៗខាងមុខ។ កិច្ចប្រជុំផ្ទៃក្នុងបានបញ្ចប់ ខ្ញុំ និងប្រធាន PSSI – Erick Thohir សុទ្ធតែមិនចង់នៅស្ងៀមក្នុងករណីនេះ។ បើសិនខាងឥណ្ឌូណេស៊ីខុស យើងនឹងទទួលខុសត្រូវ ប៉ុន្តែបើថៃខុស ពួកគេក៏នឹងត្រូវធ្វើដូច្នេះ»។

ភាគីឥណ្ឌូណេស៊ីទំនងជាកំពុងជឿជាក់ថា ខ្លួនមិនមានកំហុសនៅក្នុងការវាយតប់គ្នាជាមួយក្រុមថៃនៅវគ្គផ្ដាច់ព្រ័ត្រនៅស៊ីហ្គេមឆ្នាំ 2023។ ចំណែកថៃវិញ បច្ចុប្បន្នក៏កំពុងមានភាពតានតឹងខ្លាំង ទាក់ទងនឹងបញ្ហានេះ។ អនុប្រធានសហព័ន្ធកីឡាបាល់ទាត់ថៃ Yuttana Yimkarun ថ្មីៗនេះបានសរសេរលិខិតសុំលាលែងពីតំណែង។ ប្រធានសមាគមបាល់ទាត់ថៃ (FAT) យល់ថា ពួកគេត្រូវទទួលខុសត្រូវ បន្ទាប់ពីបានបណ្ដោយឱ្យកីឡាករ U22 ថៃ បាត់បង់ការគ្រប់គ្រងអារម្មណ៍ក្នុងវគ្គផ្ដាច់ព្រ័ត្រ ហើយបង្កើតឱ្យមានរូបភាពអាក្រក់នៅកម្ពុជា។

ការប្រកួតវគ្គផ្ដាច់ព្រ័ត្ររវាង U22 ឥណ្ឌូណេស៊ី និងថៃ ត្រូវបានគេចាត់ទុកថាមានភាពទាក់ទាញបំផុតក្នុងប្រវត្តិសាស្ត្រស៊ីហ្គេម។ ក្នុងការប្រកួតនេះ ឥណ្ឌូណេស៊ីបានឈ្នះថៃ 5-2 ខណៈអាជ្ញាកណ្ដាលបានពិន័យកាតលឿងជាង 10 និងកាតក្រហមចំនួន 7 ដោយសារតែមានការប៉ះទង្គិចគ្នាច្រើន និងការប្រើអំពើហិង្សា៕

May 19, 2023

CAMSOC បង្ហាញទិដ្ឋភាពខ្លះៗនៅមុនពិធីបិទព្រឹត្តិការណ៍ស៊ីហ្គេមលើកទី 32

ដូចទៅនឹងពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 ម្ចាស់ផ្ទះកម្ពុជាមិនបានប្រកាសព័ត៌មានលំអិតស្ដីពីកម្មវិធីដែលត្រូវប្រារព្ធឡើងនោះទេ ប៉ុន្តែ គេសង្ឃឹមថា ព្រឹត្តិការណ៍បិទក៏នឹងអស្ចារ្យមិនចាញ់ព្រឹត្តិការណ៍បើកប៉ុន្មានឡើយ។

នៅល្ងាចថ្ងៃទី 17 ឧសភា ទំព័រផ្លូវការរបស់ គណៈកម្មាធិការជាតិរៀបចំព្រឹត្តិការណ៍ស៊ីហ្គេម (CAMSOC) បានបញ្ចេញរូបភាពមួយចំនួនបង្ហាញអំពីការត្រៀមសម្រាប់ពិធីបិទស៊ីហ្គេមលើកនេះ។ «កាន់តែរួចរាល់ សម្រាប់ពិធីបិទផ្លូវការព្រឹត្តិការណ៍កីឡាអាស៊ីអាគ្នេយ៍ លើកទី 32 ឆ្នាំ 2023 នៅពហុកីឡដ្ឋានជាតិមរតកតេជោ» ទំព័របណ្ដាញសង្គមរបស់ CAMSOC សរសេរដូច្នេះ។

វិញ្ញាសាទាំងឡាយនៅស៊ីហ្គេមត្រូវបានបញ្ចប់កាលពីយប់ថ្ងៃទី 16 ឧសភា។ ថ្ងៃនេះពុំមានការប្រកួតទៀតនោះទេ គឺមានតែកម្មវិធីបិទជាផ្លូវការតែប៉ុណ្ណោះ។ ព្រះអគ្គិជ័យនៅទីលាននៃពហុកីឡដ្ឋានជាតិមរតកតេជោ ក៏នឹងត្រូវបានពន្លត់នៅចុងបញ្ចប់នៃពិធីបិទ បញ្ជាក់ថា រដូវស៊ីហ្គេមលើកទី 32 ត្រូវបានចប់ជាស្ថាពរ។

ពិធីសម្ពោធចាប់ផ្ដើមព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 កាលពីយប់ថ្ងៃទី 05 ឧសភា ត្រូវបានវាយតម្លៃខ្ពស់ចំពោះភាពសម្បូរបែប និងអស្ចារ្យ ប្រហាក់ប្រហែលនឹង Asiad ដែលជាមហាព្រឹត្តិការណ៍ប្រកួតកីឡានៅទ្វីបអាស៊ី។ ចំណែកពិធីបិទព្រឹត្តិការណ៍ស៊ីហ្គេមលើកនេះក៏ត្រូវបានអ្នកជំនាញយល់ថា នឹងអស្ចារ្យផងដែរ៕

May 17, 2023

រថយន្តអគ្គិសនី Cybertruck គំរូដើមថ្មីរបស់ Tesla នៅក្នុងកិច្ចប្រជុំប្រចាំឆ្នាំ

ក្រុមហ៊ុនផលិតរថយន្តអគ្គិសនីអាម៉េរិក Tesla កំពុងតាំងបង្ហាញរថយន្តអគ្គិសនីប្រភេទទ្រុង Cybertruck នៅក្នុងព្រឹត្តិការណ៍ជួបជុំម្ចាស់ភាគហ៊ុនប្រចាំឆ្នាំ ហើយវាកំពុងនាំមកនូវរូបភាពផ្ទាល់ស្ដីពីរថយន្តគំរូដើមថ្មីបំផុតរបស់ Cybertruck។

Cybertruck ទំនងជានឹងត្រូវបានផលិតចាប់ពីប៉ុន្មានសប្ដាហ៍ខាងមុខ ហើយ Tesla ក៏ត្រូវបានគេរកឃើញថា កំពុងសាកល្បងប្រព័ន្ធនានារបស់រថយន្តគំរូនេះ មុននឹងឈានដល់ដំណាក់កាលផលិតជាផ្លូវការ។

កាលពីថ្ងៃទី 16 ឧសភា Tesla ប្រារព្ធពិធីជួបជុំភាគហ៊ុនិកប្រចាំឆ្នាំនៅ Giga Texas និងបាននាំមកនូវរថយន្តគំរូដើម Cybertruck ដែលត្រូវបានបង្ហាញ និងដាក់ឱ្យបញ្ជាទិញកាលពីពេលកន្លង។

ព័ត៌មានថ្មីបំផុតដែលប្រកាសដោយ Tesla បង្ហាញថា ការចាប់ផ្ដើមផលិតរថយន្ត Cybertruck នៅរដូវក្ដៅឆ្នាំនេះ នឹងត្រូវប្រគល់ជូនអតិថិជនដំបូងៗនៅចុងត្រីមាសទីបីនៃឆ្នាំ 2023។

ខាងក្រោមនេះគឺជាវីដេអូ និងរូបភាព ស្ដីពីរថយន្តប្រភេទទ្រុងដើរដោយថាមពលអគ្គិសនី Cybertruck របស់ក្រុមហ៊ុន Tesla ដែលត្រូវបានចែករំលែកលើបណ្ដាញសង្គម៖

May 17, 2023

ក្រុមបាល់ទាត់ថៃ និងឥណ្ឌូណេស៊ី ប្រឈមនឹងទណ្ឌកម្មធ្ងន់ធ្ងរពីស្ថាប័ន AFC

គណៈកម្មការវិន័យរបស់សហព័ន្ធកីឡាបាល់ទាត់អាស៊ី (AFC) នឹងស៊ើបអង្កេតលើហេតុការណ៍នៃអំពើហិង្សា មុនពេលពិន័យជាប្រាក់ និង «ព្យួរជើង» ចំពោះសមាជិករបស់ក្រុម U22 ថៃ និងក្រុម U22 ឥណ្ឌូណេស៊ី ដែលបានចូលរួមប្រវាយប្រតប់គ្នានៅវគ្គផ្ដាច់ព្រ័ត្រនៃស៊ីហ្គេមលើកទី 32 កាលពីយប់ថ្ងៃទី 16 ឧសភា 2023។

ម្ចាស់ផ្ទះកម្ពុជាបានពឹង AFC ជួយចាត់ចែងវិញ្ញាសាបាល់ទាត់នៅស៊ីហ្គេមលើកទី 32។ ដូច្នេះ ហេតុការណ៍ហិង្សារវាងក្រុមថៃ និងឥណ្ឌូណេស៊ី នៅក្នុងវគ្គផ្ដាច់ព្រ័ត្រកាលពីយប់ថ្ងៃទី 16 ឧសភា នឹងត្រូវបានប្រមូលទិន្នន័យ បញ្ជូនទៅកាន់គណៈកម្មការវិន័យរបស់ AFC ដើម្បីធ្វើការពិន័យ។

«នឹងមិនមានការពិន័យដកហូតមេដាយចំពោះក្រុមទាំងពីរ ប៉ុន្តែកីឡាករ សមាជិកក្រុមគ្រូបង្វឹកដែលបានចូលរួមវាយតប់គ្នា ប្រាកដជានឹងត្រូវពិន័យជាប្រាក់ និងហាមចូលប្រកួត» មេដឹកនាំរបស់ AFC ថ្មីៗនេះបានប្រាប់អ្នកយកព័ត៌មានដូច្នេះ។ ក៏ប៉ុន្តែ AFC អាចនឹងត្រូវចំណាយពេលប្រហែលមួយខែសម្រាប់ធ្វើការ ទើបអាចឈានដល់ការដាក់ពិន័យ។

ហេតុការណ៍ស្រដៀងគ្នានេះក៏ធ្លាប់កើតឡើងម្ដងមកហើយក្នុងវគ្គផ្ដាច់ព្រ័ត្រនៅស៊ីហ្គេមកាលពីឆ្នាំ 2011 រវាងក្រុមបាល់ទាត់ម្ចាស់ផ្ទះឥណ្ឌូណេស៊ី និងម៉ាឡេស៊ី។ កាលណោះ អ្នកគាំទ្រនាំគ្នាសម្រុកចូល វាយតប់គ្នានៅលើវេទិកាទស្សនិកជន បណ្ដាលឱ្យមនុស្សពីរនាក់បាត់បង់ជីវិត។ ក្រុមម៉ាឡេស៊ីត្រូវបានគណៈកម្មការប្រើប្រាស់រថពាសដែក អមដំណើរទៅកាន់ព្រលានយន្តហោះត្រលប់ទៅមាតុភូមិ ក្រោយពីការប្រកួត 120 នាទីបានលទ្ធផល 1-1 និងឈ្នះឥណ្ឌូណេស៊ី 4-3 បានមេដាយមាស ពេលទាត់ប៉េណាំងទីម្ដងម្នាក់៕

May 17, 2023

កម្ពុជាមិនទាន់បិទព្រឹត្តិការណ៍ផង ថៃប្រញាប់ប្រកាសអំពីគម្រោងរៀបចំស៊ីហ្គេមលើកទី 33

ស្ថាប័នគ្រប់គ្រងវិស័យកីឡារបស់ប្រទេសថៃ (SAT) ថ្មីៗនេះបានប្រកាសអំពីផែនការរៀបចំមហាព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 33។

កាលពីថ្ងៃទី 16 ឧសភា ការប្រកួតដែលនៅសល់របស់ស៊ីហ្គេមលើកទី 32 បានបញ្ចប់ជាស្ថាពរ។ ក្រុមកីឡាម្ចាស់ផ្ទះកម្ពុជា ដណ្ដើមបានមេដាយសរុបចំនួន 282 គ្រឿង ក្នុងនោះមានមេដាយមាសចំនួន 81 គ្រឿង ត្រូវជាប់លេខបួន។ ចំណែកក្រុមជាប់លេខមួយគឺវៀតណាម ដោយដណ្ដើមមេដាយមាសបាន 136 គ្រឿង ខណៈថៃរកបានមេដាយមាស 108 គ្រឿង ត្រូវជាប់លេខពីរ និងឥណ្ឌូណេស៊ីជាប់លេខបី ដោយដណ្ដើមមេដាយមាសបាន 87 គ្រឿង។

កាលពីថ្ងៃទី 16 ឧសភា ស្ថាប័នគ្រប់គ្រងវិស័យកីឡារបស់ប្រទេសថៃ (SAT) បានធ្វើសន្និសីទសារព័ត៌មានមួយនៅមុនពិធីបិទស៊ីហ្គេមនៅកម្ពុជា ដើម្បីប្រកាសអំពីគម្រោងសម្រាប់ស៊ីហ្គេមបន្ទាប់នាពេលខាងមុខ។ ស៊ីហ្កេមលើកទី 33 នឹងធ្វើឡើងចាប់ពីថ្ងៃទី 09 ដល់ 20 ធ្នូ 2025 នៅបាងកក ឈុនបុរី (Chonburi) និង សុងក្លា (Songkhla)។ នៅក្នុងពិធីបិទព្រឹត្តិការណ៍ស៊ីហ្គេមនៅថ្ងៃទី 17 ឧសភានេះ ម្ចាស់ផ្ទះកម្ពុជានឹងប្រគល់ទង់ស៊ីហ្គេមដល់ម្ចាស់ផ្ទះបន្ទាប់។ ស៊ីហ្គេមលើកទី 33 នឹងជាព្រឹត្តិការណ៍ស៊ីហ្គេមដំបូងដែលថៃរៀបចំ រាប់ចាប់ពីឆ្នាំ 2007។

ពិធីបើកព្រឹត្តិការណ៍ស៊ីហ្គេមលើកទី 32 កាលពីថ្ងៃទី 05 ឧសភា 2023 នៅពហុកីឡដ្ឋានជាតិមរតកតេជោ

ស៊ីហ្គេមលើកទី 32 នៅកម្ពុជា ត្រូវបានវាយតម្លៃថា ជោគជ័យយ៉ាងត្រចះត្រចង់។ ម្ចាស់ផ្ទះកម្ពុជាបានត្រៀមយ៉ាងហ្មត់ចត់នៅគ្រប់បេសកកម្ម តាំងពីការរៀបចំ ការដឹកជញ្ជូន សន្តិសុខ និងការស្នាក់នៅ ហូបចុករបស់សមាជិកប្រតិភូកីឡានៃបណ្ដាប្រទេសដែលបានចូលរួម។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ នៃគណៈកម្មាធិការជាតិរៀបចំព្រឹត្តិការណ៍ស៊ីហ្គេមលើកទី 32 (CAMSOC)

ពិធីបិទព្រឹត្តិការណ៍ស៊ីហ្គេមលើកទី 32 ដែលនឹងត្រូវធ្វើឡើងនៅម៉ោង 19:00 ថ្ងៃទី 17 ឧសភា នៅឯពហុកីឡដ្ឋានជាតិមរតកតេជោ នឹងមានមនុស្សចូលរួមទស្សនាប្រហែល 2,000 នាក់។ យោងតាមប្រសាសន៍របស់ ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ នៃគណៈកម្មាធិការជាតិរៀបចំព្រឹត្តិការណ៍ស៊ីហ្គេមលើកទី 32 (CAMSOC) ពិធីបិទក៏នឹងមានសិល្បករ សិល្បការិនីប្រមាណ 2,000 នាក់ចូលរួមសំដែងផងដែរ។ ពិធីនេះក៏នឹងមានភាពអស្ចារ្យមិនចាញ់ពិធីបើកព្រឹត្តិការណ៍កាលពីថ្ងៃទី 05 ឧសភាប៉ុន្មានឡើយ៕

May 17, 2023

រថយន្តអ៊ីដ្រូសែនអាចធ្វើដំណើររាប់ពាន់គីឡូម៉ែត្រដោយមិនបាច់បញ្ចូលថាមពល

(ហូឡង់) – រថយន្ត Eco-Runner XIII ប្រើថាមពលអ៊ីដ្រូសែន កំពុងឆ្ពោះទៅកាន់កំណត់ត្រាពិភពលោកស្ដីពីការធ្វើដំណើរបានឆ្ងាយជាងគេដោយមិនបាច់បញ្ចូលឥន្ធនៈ នៅក្នុងខែមិថុនា 2023 ខាងមុខ។

គម្រោង Eco-Runner Team Delft របស់ក្រុមនិស្សិតនៅសាកលវិទ្យាល័យបច្ចេកវិទ្យា Delft អភិវឌ្ឍរថយន្តគំរូអ៊ីដ្រូសែនខ្នាតតូចសម្រាប់ការធ្វើដំណើរក្នុងទីក្រុង ប្រចាំឆ្នាំ ដោយការកែលំអរចនារូបរាង និងគ្រឿងម៉ាស៊ីនរបស់រថយន្តនេះ ដើម្បីធានាឱ្យបានប្រាកដថា រៀងរាល់ឆ្នាំ កំណែថ្មីបំផុតអាចបំបែកកំណត់ត្រារបស់ខ្លួនវាផ្ទាល់។ កាលពីឆ្នាំ 2022 ក្រុមនេះបានទទួលពានរង្វាន់លេខមួយនៅក្នុងការប្រកួត Hydrogen Efficiency Challenge ដោយបានបង្កើនសមត្ថភាពឡើងដល់ 5,047 គីឡូម៉ែត្រ/គីឡូក្រាមអ៊ីដ្រូសែន។ ឆ្នាំ 2023 ពួកគេចង់បញ្ជាក់ថា តើរចនារូបរាងចុងក្រោយបំផុតអាចធ្វើដំណើរបានចម្ងាយផ្លូវឆ្ងាយដោយមិនបាច់បញ្ចូលថាមពល ឬអត់។

រូបរាងរបស់ Eco-Runner XIII ក្នុងឆ្នាំ 2023 ស្រដៀងទៅនឹងថាសហោះ (UFO)។ ដំបូលរបស់វាមានរាងដូចមួកជ្រាលបន្តិចម្ដងទៅរកដងខ្លួន ប៉ុន្តែមានបង្អួចសម្រាប់មើលទៅក្រៅ។

រថយន្ត Eco-Runner XIII របស់ Eco-Runner Team Delft

Eco-Runner Team Delft ឱ្យដឹងថា ពួកគេកំពុងរកវិធីសម្រេចបានតុល្យភាពរវាងប្រសិទ្ធភាព កម្លាំង និងភាពរឹងមាំរបស់រថយន្ត មុននឹងឆ្លងកាត់ផ្លូវជាង 2,055 គីឡូម៉ែត្រ នៅក្នុងការធ្វើតេស្តដើម្បីបំបែកកំណត់ត្រាពិភពលោក។

យោងតាម Eco-Runner Team Delft ដំណើរការនៃការបំប្លែងអ៊ីដ្រូសែនទៅជាឥន្ធនៈសម្រាប់រថយន្តរបស់ពួកគេ បង្ហាញអំពីសក្ដានុពលក្លាយជាជម្រើសជំនួសប្រកបដោយប្រសិទ្ធភាពនៅក្នុងវិស័យគមនាគមន៍។ នៅក្នុងរថយន្ត Eco-Runner អ៊ីដ្រូសែនត្រូវបានបំប្លែងទៅជាថាមពលអគ្គិសនី ហើយវាបំភាយតែចំហាយទឹក និងកម្ដៅ។

យោងតាម Design Boom ក្រុមនិស្សិតកំពុងរកវិធីដើម្បីកែលំអ Eco-Runner XIII នៅឯបន្ទប់ពិសោធន៍ Dream Hall របស់សាកលវិទ្យាល័យបច្ចេកវិទ្យា Delft ។ រចនារូបរាងរថយន្តថ្មីដែលប្រកាសកាលពីថ្ងៃទី 02 ឧសភា និងត្រូវបានគូររំលេចចំណុចសំខាន់ៗដោយស្ទូឌីយោ Enshape Design នឹងជារូបរាងចុងក្រោយរបស់រថយន្ត Eco-Runner XIII ដែលត្រូវយកទៅចូលរួមបំបែកកំណត់ត្រានៅខែមិថុនាខាងមុខ៕

May 17, 2023

Tag: 2023