109 - La Reine Media

ណាសាធ្វើតេស្តដ្រូនអវកាសខ្នាតធំសម្រាប់ព្រះចន្ទរបស់ភពសៅរ៍

Dragonfly ដែលជាដ្រូនគំរូដើមខ្នាតធំ ប៉ុនកូនរថយន្ត ហើយគ្រោងនឹងត្រូវបានបញ្ជូនទៅកាន់ព្រះចន្ទធំបំផុតរបស់ភពសៅរ៍ ទើបតែត្រូវបានធ្វើតេស្តក្នុងបន្ទប់ខ្យល់។

កន្លងមក ណាសាទទួលបានជោគជ័យយ៉ាងត្រចះត្រចង់ ហួសពីគោលដៅនៃបេសកកម្មដំបូង នៅពេលឧទ្ធម្ភាគចក្រ Ingenuity ហោះហើរបាន 63 លើកនៅលើភពអង្គារ។ ណាសាយល់ដឹងបានច្រើនពីឧទ្ធម្ភាគចក្រដំបូងនេះ និងត្រៀមអនុវត្តចំពោះយានធំជាងនេះនៅលើទីតាន (Titan) ដែលជាព្រះចន្ទធំជាងគេរបស់ភពសៅរ៍។ នេះបើតាម Interesting Engineering ចុះផ្សាយកាលពីថ្ងៃទី 24 តុលា 2023។

ដ្រូន Dragonfly ប្រើប្រាស់ស្លាបកង្ហារចំនួន 8 និងមានទំហំប៉ុនកូនឡាន។ ក្រុមអ្នកស្រាវជ្រាវនៅសាកលវិទ្យាល័យ Johns Hopkins រដ្ឋ Maryland សហរដ្ឋអាម៉េរិក បានធ្វើតេស្តទៅលើដ្រូនគំរូដើមដែលមានទំហំស្មើនឹងពាក់កណ្ដាលទំហំផ្លូវការ និងបានចែករំលែកលើអ៊ីនធើណិត។

Dragonfly នឹងជាបេសកកម្មដំបូងរបស់ណាសា ដែលឆ្ពោះទៅកាន់ផ្ទៃរបស់ «ពិភពមហាសមុទ្រ» មួយផ្សេងទៀត ក្រៅពីផែនដី។ ដូចទៅនឹងផែនដី ព្រះចន្ទទីតានមានប្រព័ន្ធអាកាសធាតុ ទន្លេ និងសមុទ្រនៅលើផ្ទៃ ប៉ុន្តែខុសត្រង់ថា ធាតុរាវដែលហូរនៅលើទីតានមានផ្ទុកមេតានរាវ មិនមែនទឹកឡើយ។ ទោះយ៉ាងនេះក៏ដោយ ក្រុមអ្នកវិទ្យាសាស្ត្រនៅតែជឿថា ព្រះចន្ទមួយនេះអាចមានលាក់ភាវៈរស់។

ដ្រូនថ្មីនេះនឹងស្រាវជ្រាវផ្ទៃខាងលើរបស់ព្រះចន្ទទីតាន ជាទីដែលមនុស្សទើបបានដឹងតិចតួចបំផុតនៅឡើយ។

តាមគម្រោង Dragonfly នឹងត្រូវបានបាញ់បង្ហោះទៅកាន់ទីអវកាសនៅឆ្នាំ 2027។ បើសិនអ្វីៗដំណើរការរលូន វានឹងទៅដល់ព្រះចន្ទទីតាននៅឆ្នាំ 2034។

October 26, 2023

ជាលើកដំបូង ភេសជ្ជៈធ្វើពីទឹកផ្កាដូងស្រស់របស់ខ្មែរក្រោម ត្រូវបាននាំចេញទៅសហរដ្ឋអាម៉េរិក

(វៀតណាម) – កាលពីថ្ងៃទី 25 តុលា ភេសជ្ជៈទឹកផ្កាដូងស្រស់ចំនួន 20,000 ដប ដែលជាផលិតផលពិសេសរបស់ខេត្តត្រាវិញ (ព្រះត្រពាំង) ត្រូវបាននាំចេញជាផ្លូវការទៅកាន់ទីផ្សារសហរដ្ឋអាម៉េរិក។

ទឹកផ្កាដូងស្រស់គឺជាមួយក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលដែលជាប់ចំណាប់ថ្នាក់ OCOP ផ្កាយ 5 ដែលវៀតណាម ទទួលស្គាល់ក្នុងឆ្នាំ 2023។

តាមផែនការ ក្រោយពីទទួលបានជោគជ័យក្នុងការលក់ដំបូង ជាមធ្យមក្នុងមួយខែ ភេសជ្ជៈទឹកផ្កាដូងស្រស់ពី 20,000 ដល់ 40,000 ដប នឹងត្រូវបាននាំចេញពីកាន់ទីផ្សារសហរដ្ឋអាម៉េរិក។

ក្នុងចំណោមផលិតផលចំនួន 19 មុខ ដែលស្ថិតក្នុងក្រុមផលិតផលផ្កាយ 5 ដែលទទួលស្គាល់ដោយ OCOP ក្នុងឆ្នាំ 2023 ខេត្តព្រះត្រពាំង នៅដែនដីកម្ពុជាក្រោម (វៀតណាម) រួមចំណែករហូតដល់ 3 មុខ ហើយ 3 មុខនេះ ក៏សុទ្ធតែជាផលិតផលដែលធ្វើពីដូង រួមមាន ភេសជ្ជៈធ្វើពីទឹកផ្កាដូងស្រស់ ស្ករផ្កាដូង របស់ក្រុមហ៊ុន SOKFARM CO., LTD ដែលជាកម្មសិទ្ធិរបស់ពលរដ្ឋខ្មែរក្រោម អ្នកស្រី ថាច់ ធីចន្ធី និងក្រមួនដួងរបស់ក្រុមហ៊ុន VICOSAP។

October 26, 2023

ស្បែកជើង Crocs រូបរាងអាក្រក់ ប៉ុន្តែរកបានរាប់ពាន់លានដុល្លារអាម៉េរិក/ឆ្នាំ

បើទោះជាមានមនុស្សមិនតិចដែលរិះគន់ថាអាក្រក់ និងត្រូវបានទំព័រ Time ដាក់ចូលទៅក្នុង «របកគំហើញដែលអន់» ព្រោះតែគ្មានប្រយោជន៍ ប៉ុន្តែ Crocs នៅតែអាចរកប្រាក់បានរាប់ពាន់លានដុល្លារជារៀងរាល់ឆ្នាំ។

ក្នុងរយៈពេលជាង 20 ឆ្នាំ ស្បែកជើងដែលមានរូបរាងដូចទៅនឹងឈីសនេះ បានធ្វើឱ្យមានអ្នកចូលចិត្តខ្លាំង និងអ្នកស្អប់ខ្លាំងមិនតិចឡើយ។ ប៉ុន្តែ Crocs នៅតែជាបាតុភូមិមួយរបស់វិស័យម៉ូដែលទំនើប និងរកប្រាក់ចំណូលបាន 3.6 ពាន់លានដុល្លារអាម៉េរិក កាលពីឆ្នាំកន្លង។

ស្បែកជើងនេះធ្វើពី croslite ដែលជាជ័រប្រភេទទន់ ស្រាល និងមិនរក្សាក្លិន។ ដំបូងឡើយ វាត្រូវបានវាយតម្លៃថាអាក្រក់ ប៉ុន្តែនៅតែត្រូវបានលក់ ព្រោះតែងាយស្រួលពាក់ ទាំងនៅលើដីគោក ទាំងនៅក្នុងទឹក។

កាលពីឆ្នាំ 2010 ទស្សនាវដ្ដី Time បានដាក់បញ្ចូល Crocs ទៅក្នុងបញ្ជីឈ្មោះស្ដីអំពីរបកគំហើញដែលអន់បំផុតទាំង 50 របស់ពិភពលោក។ ក៏ប៉ុន្តែ បច្ចុប្បន្ន បុគ្គលល្បីឈ្មោះជាច្រើនរូបកំពុងប្រើប្រាស់ស្បែកជើងយីហោនេះ។

យោងតាម Lucy Thornley ដែលជាអនុប្រធានផ្នែកនិន្នាការ អតិថិជន រចនា និងផលិតផលរបស់ Crocs ឱ្យដឹងថា មានមូលហេតុពីរយ៉ាងដែលនាំឱ្យ Crocs ទទួលបានជោគជ័យ រួមមាន អ្នកប្រើប្រាស់វ័យក្មេងចូលចិត្តប្រើប្រាស់ស្បែកជើងនេះ និងរចនារូបរាងរបស់វាត្រូវបានបន្ទាន់សម័យ៕

October 25, 2023

រថភ្លើងដឹកជញ្ជូន Hyperloop ល្បឿនជាង 1,200 គីឡូម៉ែត្រ/ម៉ោង

(សហរដ្ឋអាម៉េរិក) – ប្រព័ន្ធ Hyperloop Express Freight អាចដឹកទំនិញដោយស្វ័យប្រវត្តក្នុងល្បឿន 1,223 គីឡូម៉ែត្រក្នុងមួយម៉ោង និងលើកដាក់ទំនិញក្នុងពេលតែមួយ។

ក្រុមហ៊ុន Hyperloop Transportation Technologies (HyperloopTT) កំពុងឆ្ពោះទៅរកការអភិវឌ្ឍប្រព័ន្ធទូរថភ្លើងល្បឿនលឿនដែលស្ទើរតែមិនមានកម្លាំងកកិត អាចជាបដិវត្តន៍ក្នុងវិស័យដឹកជញ្ជូន។ ប្រព័ន្ធថ្មីបំផុតដែលមានឈ្មោះថា Express Freight ប្រើប្រាស់បំពង់ផ្លូវទទេ ទូរថភ្លើងអណ្ដែត និងទ្វារអគ្គិសនីជាដើមដោយស្វ័យប្រវត្តទាំងស្រុង ដើម្បីលើកដាក់ទំនិញដំណាលគ្នានៅពេលចេញដំណើរ។ HyperloopTT ឱ្យដឹងថា ប្រព័ន្ធនេះនឹងអាចដឹកជញ្ជូនបានលឿន សន្សំសំចៃប្រាក់ និងមានស្ថិរភាពជាងបើធៀបនឹងការដឹកទំនិញតាមយន្តហោះ ឬរថយន្តដឹកទំនិញ។

ប្រព័ន្ធនេះត្រូវបាន HyperloopTT សហការអភិវឌ្ឍជាមួយនឹងក្រុមហ៊ុន Tangerine របស់ប្រទេសអង់គ្លេស។

ផែនការរបស់ HyperloopTT គឺការបំពាក់ប្រព័ន្ធ Express Freight ខាងក្នុងហេដ្ឋារចនាសម្ព័ន្ធដឹកអ្នកដំណើរ។ ប្រព័ន្ធដឹកអ្នកដំណើរគឺជាទូដែលមានរូបរាងដូចដងខ្លួនយន្តហោះ ធ្វើដំណើរក្នុងល្បឿន 1,223 គីឡូម៉ែត្រ/ម៉ោង តាមរយៈប្រព័ន្ធម៉ាញេទិចដំណើរការនៅក្នុងប្រព័ន្ធបំពង់សម្ពាធទាប។

October 25, 2023

Nissan Sakura ក្លាយជារថយន្តអគ្គិសនីលក់ដាច់ជាងគេនៅជប៉ុន

បណ្ដាក្រុមហ៊ុនផលិតរថយន្តរបស់ជប៉ុនកន្លងមកនេះត្រូវបានមើលឃើញថា មានភាពយឺតយ៉ាវក្នុងការងាកទៅរកយានជំនិះអគ្គិសនី ប៉ុន្តែ Nissan Sakura ដែលត្រូវបានសហការអភិវឌ្ឍជាមួយ Mitsubishi Motors Corp និងប្រើប្រាស់រូបរាងរបស់រថយន្តសាំង eK X គឺជាម៉ូដែលរថយន្តអគ្គិសនីដែលលក់ដាច់ជាងគេបង្អស់នៅប្រទេសជប៉ុនក្នុងឆ្នាំនេះ។

ទិន្នន័យរបស់ក្រុមអ្នកផលិតរថយន្តបង្ហាញថា Nissan Sakura ដែលធ្លាប់បានទទួលពានរង្វាន់រថយន្តប្រចាំឆ្នាំរបស់ជប៉ុនកាលពីឆ្នាំ 2022 រួមចំណែកជិតពាក់កណ្ដាល ដែលស្មើនឹង 35,009 គ្រឿង ក្នុងចំណោមរថយន្តអគ្គិសនីដែលត្រូវបានលក់ចេញនៅក្នុងប្រទេសនេះ រាប់ចាប់ពីដើមឆ្នាំ 2023 ដល់បច្ចុប្បន្ន។

Sakura និង eK X កំពុងនាំមុខគេនៅប្រទេសជប៉ុន ជាទីផ្សារដែលរថយន្តអគ្គិសនីរួមចំណែកត្រឹមតែ 1.5% ប៉ុណ្ណោះ ធៀបនឹងចំនួនរថយន្តថ្មីដែលត្រូវបានលក់នៅប្រទេសនេះកាលពីឆ្នាំកន្លង។

Sakura និង eK X អាចរត់ក្នុងល្បឿនប្រហែល 130 គីឡូម៉ែត្រក្នុងមួយម៉ោង ប៉ុន្តែមិនត្រូវបានដាក់លក់នៅទូទាំងពិភពលោក ដោយសារតែកត្តាជាច្រើន មានជាអាទិ៍ មិនអាចឆ្លើយតបទៅនឹងស្ដង់ដានៃការប៉ះទង្គិចនៅប្រទេសមួយចំនួនជាដើម។

October 24, 2023

អង់គ្លេសពិសោធការផលិតខ្លាញ់សិប្បនិម្មិតបណ្ដុះពីកោសិកាជ្រូក

សាច់សិប្បនិម្មិត មកដល់ពេលនេះនឹងត្រូវតែមានទាំងសាច់ ទាំងខ្លាញ់ លាយឡំគ្នា ដើម្បីឱ្យមានឱជារសជាងមុន។ នេះគឺជាគោលដៅនៃការពិសោធដែលកំពុងត្រូវបានក្រុមហ៊ុនបច្ចេកវិទ្យាជីវសាស្ត្រមួយនៅប្រទេសអង់គ្លេស ផ្ដោតការយកចិត្តទុកដាក់អនុវត្ត។

បន្ទប់ពិសោធន៍ Hoxton Farms កំពុងផ្ដោតការយកចិត្តទុកដាក់លើការផលិតខ្លាញ់សិប្បនិម្មិតដែលមានរចនាសម្ព័ន្ធ និងសមាសធាតុដូចទៅនឹងខ្លាញ់សត្វ។

កន្លងមកនេះ សាច់សិប្បនិម្មិតដែលត្រូវបានផលិតឡើងក្នុងបន្ទប់ពិសោធន៍ មានដូចជាសាច់មាន់ និងសាច់គោជាដើម គឺសុទ្ធតែជាសាច់សុទ្ធ។ ចំណែកលើកនេះ បន្ទប់ពិសោធន៍ Hoxton Farms កំពុងបណ្ដុះកោសិកាខ្លាញ់ពីសត្វជ្រូក។

ក្រុមអ្នកស្រាវជ្រាវក៏កំពុងរកវិធីដើម្បីបញ្ចុះតម្លៃរបស់ផលិតផលសាច់សិប្បនិម្មិតផងដែរ។ នំប៉័ងហែមបឺរហ្គើរកៀបសាច់គោសិប្បនិម្មិតដំបូងគេលើពិភពលោកកាលពីដប់ឆ្នាំមុន មានតម្លៃប្រហែល 330 ដុល្លារអាម៉េរិក។ ក៏ប៉ុន្តែ បច្ចុប្បន្ននំប៉័ងសាំងវិចសាច់មាន់សិប្បនិម្មិតដែលកំពុងត្រូវបានដាក់លក់នៅប្រទេសសិង្ហបុរី មានតម្លៃប្រហែលតែ 13 ដុល្លារប៉ុណ្ណោះ៕

October 23, 2023

ក្រុមហ៊ុន Changan សាងសង់រោងចក្រផលិតរថយន្តអគ្គិសនីនៅប្រទេសថៃ

ក្រុមហ៊ុនផលិតរថយន្តចិន Changan Automobile បានចុះកិច្ចព្រមព្រៀងជាមួយអាជ្ញាធរថៃ ដើម្បីជំរុញផែនការសាងសង់រោងចក្រមួយនៅក្នុងប្រទេសអាស៊ីអាគ្នេយ៍មួយនេះ។

Changan សម្រេចបានកិច្ចព្រមព្រៀងជាមួយគណៈកម្មការវិនិយោគថៃ (BOI) នៅក្នុងវេទិកាសហប្រតិបត្តិការអន្តរជាតិខ្សែក្រវាត់ និងផ្លូវលើកទីបី នៅទីក្រុងប៉េកាំង កាលពីថ្ងៃទី 17 តុលា 2023។ នេះបើតាមប្រកាសមួយកាលពីថ្ងៃទី 19 តុលា របស់ Changan។

ក្រុមហ៊ុនចិនខាងលើមានផែនការវិនិយោគ 240 លានដុល្លារអាម៉េរិកនៅប្រទេសថៃ ដើម្បីសាងសង់រោងចក្រផលិតរថយន្តអគ្គិសនីមួយដែលអាចផលិតបាន 100,000 គ្រឿងក្នុងដំណាក់កាលដំបូង។

អគ្គលេខាធិការរបស់ BOI ថៃ Narit Therdsteerasukdi ក៏បានប្រគល់វិញ្ញាបនបត្រចុះបញ្ជីវិនិយោគសម្រាប់គម្រោងទីតាំងផលិតរថយន្តនៅប្រទេសថៃ ជូនដល់ប្រធានក្រុមហ៊ុន Changan លោក Zhu Huarong។

Changan បានបង្កើតក្រុមហ៊ុនតំណាងរបស់ខ្លួននៅប្រទេសថៃកាលពីថ្ងៃទី 23 សីហា 2023។ ថ្ងៃទី 24 សីហា ក្រុមហ៊ុននេះក៏បានប្រកាសគម្រោងវិនិយោគ 8.8 ពាន់លានបាត ដើម្បីសាងសង់រោងចក្រផលិតរថយន្តអគ្គិសនីនៅប្រទេសនេះ។

កាលពីខែសីហា Changan ឱ្យដឹងថា ដំណាក់កាលដំបូងរបស់រោងចក្រនេះនឹងអាចផលិតរថយន្តបាន 100,000 គ្រឿងជារៀងរាល់ឆ្នាំ ចំណែកដំណាក់កាលទីពីរនឹងអាចផលិតបាន 200,000 គ្រឿង/ឆ្នាំ។

រថយន្តអគ្គិសនីរបស់ Changan នៅប្រទេសថៃ នឹងត្រូវបានលក់ក្នុងស្រុក និងនាំចេញទៅកាន់ទីផ្សារអូស្ត្រាលី នូវែលសេឡង់ អង់គ្លេស និងអាហ្វ្រិកខាងត្បូង។

ថៃគឺជាប្រទេសផលិត និងនាំចេញរថយន្តធំជាងគេបង្អស់នៅអាស៊ីអាគ្នេយ៍ និងជាទីផ្សាររថយន្តអគ្គិសនីលំដាប់កំពូលមួយផងដែរ។ អាជ្ញាធរថៃកំពុងតែប្រឹងប្រែងដើម្បីជំរុញឱ្យប្រទេសនេះក្លាយជាមជ្ឈមណ្ឌលផលិតរថយន្តអគ្គិសនីរបស់តំបន់អាស៊ាន ដោយបានដាក់ចេញនូវគោលនយោបាយទាក់ទាញជាច្រើន មានជាអាទិ៍ ការបន្ថយអត្រាពន្ធ ការផ្ដល់ជំនួយដល់អ្នកប្រើប្រាស់ និងជំនួយគាំទ្រដល់ការវិនិយោគជាដើម៕

October 23, 2023

ចិនអភិវឌ្ឍទួរប៊ីនខ្យល់ថ្មី ធំជាងគេបង្អស់លើពិភពលោក

ក្រុមហ៊ុនថាមពលឆ្លាតវៃ Ming Yang របស់ប្រទេសចិន នឹងអភិវឌ្ឍទួរប៊ីនខ្យល់សម្រាប់ដាំលើសមុទ្រធំបំផុតលើពិភពលោកថ្មីមួយទៀត ដែលមានស្លាបចក្រប្រវែងជិតស្មើនឹងកម្ពស់របស់តួ Eiffel នៅប្រទេសបារាំង។

ក្រុមហ៊ុន Ming Yang ឱ្យដឹងថា គោលដៅរបស់ខ្លួនគឺការអភិវឌ្ឍទួរប៊ីនខ្យល់កម្លាំង 22 មេហ្គាវ៉ាត់ (MW) ដែលមានរ៉ូទ័រមានអង្កត់ផ្ចិតប្រវែងជាង 310 ម៉ែត្រ និងអាចទទួលបានខ្យល់ច្រើនជាង និងផលិតអគ្គិសនីបានច្រើនជាងទួរប៊ីនដទៃនាបច្ចុប្បន្ន។ នេះបើតាមទំព័រ Interesting Engineering ចុះផ្សាយកាលពីថ្ងៃទី 20 តុលា។

យោងតាមអ្នកនាំពាក្យរបស់ក្រុមហ៊ុនខាងលើ ពួកគេសង្ឃឹមថា នឹងអាចផលិតគំរូដើមរបស់ទួរប៊ីនខ្យល់នេះនៅឆ្នាំ 2024 ឬ 2025។

ប្រកាសខាងលើត្រូវបានលើកឡើងក្រោយពី Ming Yang បានបង្ហាញទួរប៊ីនខ្យល់លើសមុទ្រធំជាងគេលើពិភពលោក កម្លាំង 18 MW ដែលមានអង្កត់ផ្ចិត 140 ម៉ែត្រ កាលពីខែមករា ឆ្នាំ 2023។ នៅក្នុងសប្ដាហ៍នេះដែរ ក្រុមហ៊ុន Ming Yang ក៏បានបង្ហើបឱ្យដឹងអំពីទួរប៊ីនខ្យល់សម្រាប់ដំឡើងលើដីគោក កម្លាំង 11 MW ដែលមានស្លាបចក្រមានផ្ទៃធំស្មើនឹងទីលានបាល់ទាត់ចំនួន 6 បូកចូលគ្នា។

កាលពីខែកុម្ភៈឆ្នាំនេះ ប្រទេសចិនបានដំឡើងទួរប៊ីនខ្យល់ 16 MW នៅលើសមុទ្រដែលមានចម្ងាយពីដីគោករបស់ខេត្ត Fujian ជិត 33 គីឡូម៉ែត្រ។ គម្រោងដែលមានតម្លៃ 885 លានដុល្លារអាម៉េរិកនេះឆ្ពោះទៅកាន់ការដំឡើងទួរប៊ីនខ្យល់ដែលមានកម្លាំង 400 MW ក្នុងដំណាក់កាលទីពីររបស់ស្ថានីយផលិតអគ្គិសនីពីកម្លាំងខ្យល់ Zhangpu Liuao។ ទួរប៊ីនខ្យល់ 16 MW មួយដើមៗនៅក្នុងគម្រោងនេះ មានប្រអប់គ្រឿងចក្រដែលស្ថិតនៅលើក្បាលបង្គោលទួរប៊ីន កម្ពស់ 146 ម៉ែត្រ ស្មើនឹងអគារ 50 ជាន់ ខណៈដែលស្លាបកង្ហារមានអង្កត់ផ្ចិតប្រវែង 252 ម៉ែត្រ និងទទួលខ្យល់ក្នុងផ្ទៃអាកាសទំហំ 50,000 ម៉ែត្រការ៉េ។ រៀងរាល់ពេលដែលស្លាបកង្ហារនេះវិលបានមួយជុំ ទួរប៊ីនខ្យល់នេះអាចផលិតអគ្គិសនីបាន 34.2 គីឡូវ៉ាត់ម៉ោង និង 66 ជីហ្គាវ៉ាត់ម៉ោង (GWh) ក្នុងមួយឆ្នាំ ដែលគ្រប់គ្រាន់សម្រាប់ផ្គត់ផ្គង់ដល់មនុស្សចំនួន 25,000 គ្រួសារ។ ជាសរុប គម្រោងមួយនេះនឹងផលិតអគ្គិសនីបាន 1.6 តេរ៉ាវ៉ាត់ម៉ោង (TWh) ជួយសំចៃធ្យូងថ្មបាន 500,000 តោន និងកាត់បន្ថយឧស្ម័នពុលបាន 1.36 លានតោនជារៀងរាល់ឆ្នាំ៕

October 21, 2023

អតិផរណារបស់ជប៉ុនថយចុះ ដោយសារជំនួយផ្នែកអគ្គិសនី និងឧស្ម័ន

យោងតាមស្ថិតិថ្មីបំផុត សន្ទស្សន៍អតិផរណារបស់ប្រទេសជប៉ុន បានថយចុះក្រោមកម្រិត 3% ជាលើកដំបូង រាប់ចាប់ពីខែសីហា ឆ្នាំ 2022។

វិធានការជំនួយផ្នែកអគ្គិសនី និងឧស្ម័នត្រូវបានគេជឿថាជាមូលហេតុចម្បងដែលជួយឱ្យអតិផរណានៅប្រទេសជប៉ុនថយចុះ។ ក៏ប៉ុន្តែ អ្នកប្រើប្រាស់នៅតែរងសម្ពាធធ្ងន់ គ្រាដែលសន្ទស្សន៍អតិផរណាត្រូវបានព្យាករថា អាចនឹងកើនឡើងជាថ្មីក្នុងប៉ុន្មានខែខាងមុខ។

ស្ថិតិរបស់ក្រសួងមហាផ្ទៃ និងទូរគមនាគមន៍ជប៉ុន បានបង្ហាញថា ក្នុងខែកញ្ញាកន្លងទៅ សន្ទស្សន៍ថ្លៃទំនិញប្រើប្រាស់ (Customer Price Index – CPI) មិនរាប់បញ្ចូលទាំងអាហារស្រស់របស់ប្រទេសនេះ បានកើន 2.8% ធៀបនឹងដំណាក់កាលដូចគ្នាក្នុងឆ្នាំ 2022។ នេះគឺជាលើកដំបូងក្នុងរង្វង់ 13 ខែ ដែលសន្ទស្សន៍ CPI បានថយចុះមកក្រោម 3%។

សន្ទស្សន៍សម្រាប់វាស់ស្ទង់អតិផរណារបស់ប្រទេសជប៉ុនដែលបានថយចុះនេះ ភាគច្រើនគឺដោយសារការចំណាយសម្រាប់ថ្លៃអគ្គិសនី និងឧស្ម័នរបស់អ្នកប្រើប្រាស់ថយចុះ នៅពេលមានជំនួយពីរដ្ឋាភិបាល។ បើពុំមានជំនួយនេះទេ សន្ទស្សន៍នេះនៅក្នុងខែកញ្ញារបស់ជប៉ុន នឹងឡើងដល់ 3.8%។

ថ្វីបើសន្ទស្សន៍ថ្លៃទំនិញប្រើប្រាស់របស់ជប៉ុននៅខ្ពស់ជាងឆ្ងាយ បើធៀបនឹងគោលដៅដែលបានកំណត់ ប៉ុន្តែ យោងតាមការវាយតម្លៃរបស់ក្រុមអ្នកជំនាញ ដោយមានការប្រឹងប្រែងស្ដារបរិស្ថានពាណិជ្ជកម្ម និងជំរុញការដំឡើងប្រាក់បៀវត្សរ៍របស់រដ្ឋាភិបាល សេដ្ឋកិច្ចរបស់ជប៉ុននឹងបន្តងើបឡើង ទាំងក្នុងវិស័យផលិត និងវិស័យមិនមែនផលិត៕

October 21, 2023

Hyundai ចាប់ផ្ដើមទិញ លក់រថយន្តប្រើប្រាស់រួច តាមអនឡាញ

ក្រុមហ៊ុន Hyundai រំពឹងថា ការទិញ លក់រថយន្តមួយទឹកតាមអនឡាញរបស់ខ្លួននឹងជួយកាត់បន្ថយការព្រួយបារម្ភចំពោះរថយន្តដែលត្រូវបានប្រើប្រាស់រួចនៅក្នុងសង្គមកូរ៉េខាងត្បូង។

យោងតាមសារព័ត៌មានក្នុងស្រុក ចាប់ពីថ្ងៃទី 24 តុលា ក្រុមហ៊ុន Hyundai Motor នឹងបើកដំណើរការអាជីវកម្មលក់រថយន្តចាស់តាមអ៊ីនធើណិត ក្នុងបំណងផ្គត់ផ្គង់រថយន្តតម្លៃសមស្របសម្រាប់អតិថិជន និងធ្វើពិពិធកម្មប្រភពចំណូលរបស់ខ្លួន។

ក្រុមហ៊ុន Hyundai រំពឹងថា ការ «ប៉ាវទីផ្សារ» ទាំងមូល តាំងពីដំណាក់កាលទិញរថយន្តចាស់ រហូតដល់ការលក់រថយន្តជូនអតិថិជន នឹងជួយកាត់បន្ថយការព្រួយបារម្ភចំពោះរថយន្តដែលត្រូវបានប្រើប្រាស់រួចនៅក្នុងសង្គមកូរ៉េខាងត្បូងនាបច្ចុប្បន្ន។

Hyundai នឹងដំណើរការគេហទំព័រមួយដើម្បីអនុញ្ញាតឱ្យអតិថិជនទិញ និងលក់រថយន្តដែលប្រើរួច។ ក្រុមហ៊ុននេះនឹងទិញតែរថយន្តដែលបានប្រើប្រាស់ក្រោម 100,000 គីឡូម៉ែត្រ ឬក្រោម 5 ឆ្នាំ និងមិនធ្លាប់ជួបគ្រោះថ្នាក់។ Hyundai ក៏នឹងផ្ដល់សេវាកម្មជួសជុលមិនគិតថ្លៃពីរឆ្នាំ ឬ 20,000 គីឡូម៉េត្រផងដែរ សម្រាប់អតិថិជន៕

October 20, 2023

Tag: 109