covid-19 - La Reine Media

កុមារអច្ឆរិយពិភពលោកនៅឥណ្ឌា ដែលធ្លាប់បានព្យាករយ៉ាងឆុតអំពី COVID-19 តាំងពីខែសីហា2019 យល់ដឹងច្បាស់ពីគម្ពីរត្រៃវេទ សំស្រ្កឹត និងប្រព័ន្ធវេជ្ជសាស្ត្រហិណ្ឌូបុរាណ…

ថ្ងៃទី22សីហាឆ្នាំ2019 កុមារាជាអ្នកជំនាញខាងហោរាសាស្ត្រម្នាក់ឈ្មោះ Abhigya Anand អាយុ14ឆ្នាំ នៅប្រទេសឥណ្ឌា បានបង្ហោះឃ្លីបវីដេអូមួយនៅលើ Youtube ដោយបានធ្វើការព្យាករយ៉ាងឆុតអំពីសោកនាដកម្មបង្កឡើងដោយវីរុស COVID-19 នាបច្ចុប្បន្ន។

នៅក្នុងវីដេអូដែលបានបង្ហោះនៅថ្ងៃទី22សីហាឆ្នាំ2019នោះ Abhigya Anand បានធ្វើការព្យាករថានឹងមានសោកនាដកម្មមួយកើតឡើងនៅលើផែនដីចាប់ពីដើមខែវិច្ឆិកា ឆ្នាំ2019 ដល់ចុងខែមេសាឆ្នាំ2020។ កុមារាដែលធ្លាប់ទទយលបានពានរង្វាន់ “អច្ឆរិយកុមារពិភពលោក” រូបនេះបានឱ្យដឹងថា ពិភពលោកនឹងបានឃើញសង្គ្រាមជីវសាស្ត្រមួយនៅឆ្នាំ2020 ដែលប្រការនេះត្រូវបានគេជឿថាជារោគរាតត្បាតCOVID-19។

Abhigya Anand ព្យាករថា សោកនាដកម្មបែបរោគរាតត្បាតនឹងកើតឡើង និងគ្របដណ្ដប់ទូទាំងសកលលោក ចាប់ពីអាស៊ីដល់អឺរ៉ុប រហូតដល់ទ្វីបអាមេរិក ឥណ្ឌា រួមនឹងបណ្ដាប្រទេសនៅភាគពាយព្យប្រទេសឥណ្ឌា។ល។

កុមារារូបនេះក៏បានព្យាករថា ប្រទេសចិនគឺជាប្រទេសមួយក្នុងចំណោមប្រទេសដែលរងគ្រោះធ្ងន់ធ្ងរបំផុតដោយសារសោកនាដកម្មនេះ។ ទន្ទឹមនឹងនេះ បណ្ដាប្រទេសអ្នកមាន ឬក៏ប្រទេសដែលមានអណ្ដូងប្រេងច្រើនដូចជា សហរដ្ឋអាមេរិក អង់គ្លេស ប៉ាគីស្ថាន អ៊ីស្រាអែលជាដើម ក៏នឹងត្រូវរងឥទ្ធិពលយ៉ាងធ្ងន់ធ្ងរដោយសារសោកនាដកម្មនេះផងដែរ។

គ្រោះមហន្តរាយនេះក៏នឹងបង្កឱ្យមានវិបត្តិសេដ្ឋកិច្ចទ្រង់ទ្រាយធំទូទាំងពិភពលោកដោយសារតែរោគរាតត្បាតឆ្លងរាលដាល។ ក្នុងនោះ វិស័យសេដ្ឋកិច្ច ដឹកជញ្ជូន និងទេសចរណ៍ក៏ទទួលរងផលប៉ះពាល់ធ្ងន់ធ្ងរបំផុត។ នេះបើតាមសម្ដីកុមារាអច្ឆរិយ Abhigya។

អ្នកជំនាញខាងហោរាសាស្ត្រនេះក៏បាននិយាយបន្ថែមថា សង្គ្រាមជីវសាស្ត្រ ដែលតាមការយល់ឃើញរបស់កុមារនេះនោះគឺសង្គ្រាមរបស់មនុស្ស ប្រឆាំងទៅនឹងវីរុសដ៏គ្រោះថ្នាក់។ កុមារានេះក៏បានស្នើឱ្យអ្នករាល់គ្នានៅក្នុងផ្ទះក្នុងអំឡុងពេលសង្គ្រាមជីវសាស្ត្រនេះកំពុងកើតឡើង ព្រោះថាការចេញក្រៅផ្ទះនឹងធ្វើឱ្យមានហានិភ័យខ្ពស់ក្នុងការផ្ទុះជារោគរាតត្បាត។

កុមារ Abhigya Anand មានបញ្ញាខ្ពស់គួរឱ្យកោតសរសើរ

Abhigya Anand ទទួលបានសមត្ថិផលយ៉ាងច្រើនគួរឱ្យគោរពកោតសរសើរ។ កុមារនេះបច្ចុប្បន្នមានអាយុ14ឆ្នាំ ប៉ុន្តែបានក្លាយជាអ្នកព្យាករវ័យក្មេងបំផុតក្នុងពិភពលោក ដែលមានការយល់ដឹងច្រើនអំពីគម្ពីរត្រៃវេទ(The Vedas) និងប្រព័ន្ធវេជ្ជសាស្ត្រហិណ្ឌូបុរាណ(Ayurveda)។

Abhigya ទទួលបានសញ្ញាប័ត្របញ្ចប់ការសិក្សាផ្នែកមីក្រូជីវសាស្រ្ត Ayurveda (Post Graduate Diploma in Ayurvedic Microbiology(PGDAM) ហើយក៏ជាសិស្សក្មេងបំផុតដែលបានទទួលសញ្ញាបត្រកម្រិតនេះនៅក្នុងប្រទេសឥណ្ឌា។ បច្ចុប្បន្ន កុមាររូបនេះកំពុងតែសិក្សាលើមុខវិជ្ជាព្យាករផ្នែកហិរញ្ញវត្ថុជាន់ខ្ពស់នៅសាកលវិទ្យាល័យ Divya Jyothi ប្រទេសឥណ្ឌា។

Abhigya Anand ក៏បានស្រាវជ្រាវ និងយល់ដឹងស៊ីជម្រៅអំពីភាសាសំស្ក្រឹត រហូតដល់ថ្នាក់ដែលអាចបង្រៀនសិស្សដូចទៅនឹងសាស្ត្រាយ៉ាងដូច្នោះដែរ។ កុមាររូបនេះ រួមនឹងប្អូនស្រីរបស់គាត់ មានប៉ុស្តិ៍ Youtube មួយដែលមានវីដេអូជាង700ឃ្លីប ក្នុងនោះមាន300ឃ្លីបនិយាយអំពីការព្យាករនានា។

ដោយសារតែសមិទ្ធិផលដ៏ល្អបំផុតរបស់ខ្លួន Abhigya Anand ក៏ទទួលបានពានរង្វាន់ “អច្ឆរិយកុមារពិភពលោក” (Global Child Prodigy) ដែលពានរង្វាន់ប្រភេទនេះបានប្រគល់ជូនកុមារតែប៉ុន្មានរយនាក់ប៉ុណ្ណោះនៅក្នុងពិភពលោកនាបច្ចុប្បន្ន៕

ប្រភព៖ សារព័ត៌មានបរទេស

April 29, 2020

អ្នកវិទ្យាសាស្ត្រអាមេរិកាំងថតបានរូបភាព COVID-19 កំពុងជ្រែកចេញពីកោសិកាជិតងាប់

ក្រុមអ្នកវេជ្ជសាស្ត្រថតបានទិដ្ឋភាពហ្វូងវីរុសCOVID-19ថ្មីដែលទើបត្រូវបានបង្កើតឡើងពីកោសិកាមនុស្ស ដើម្បីត្រៀមវាយលុកចូលគ្រប់គ្រងកោសិកាថ្មីផ្សេងទៀតនៅក្នុងរាងកាយមនុស្ស ដោយប្រើប្រាស់កែវពង្រីកមីក្រូទស្សន៍ទំនើប។

អ្នកស្រី Elizabeth Fischer ប្រធានក្រុមអ្នកគ្រប់គ្រងផ្នែកកែវពង្រីកមីក្រូទស្សន៍អេឡិចត្រុងនៅឯមន្ទីរពិសោធន៍ Rocky Mountain(RML) ក្នុងតំបន់ Montana នៃសហរដ្ឋអាមេរិក ថតបានរូបភាពយ៉ាងច្បាស់នៃកោសិការាងកាយមនុស្សដែលបានផ្ទុក COVID-19 ដោយប្រើកែវពង្រីកមីក្រូទស្សន៍អេឡិចត្រុងប្រភេទស្កេន(Scanning electron microscope)។ ក្រៅពីរូបថតថ្មីនេះ អ្នកស្រីក៏ធ្លាប់ថតបានវីរុសកូរ៉ូណាប្រភេទផ្សេងផងដែរ ដូចជាវីរុសMERS ជាដើម។

បណ្ដាផ្នត់ និងបន្ទាត់កោងពណ៌ប្រផេះ ឬទឹកក្រូច គឺជាផ្ទៃខាងលើនៃកោសិកាដែលត្រូវបានលុកលុយដោយវីរុសCOVID-19។ បណ្ដាគ្រាប់ល្អិតពណ៌ខៀវដែលជ្រែកចេញពីកោសិកា គឺជាវីរុសCOVID-19។ យោងតាមវិទ្យាស្ថានជាតិផ្នែកសុខភាពសហរដ្ឋអាមេរិក NIH (National Institutes of Health) រូបភាពនេះបង្ហាញអំពីដំណើរការដែលមានឈ្មោះថា “ដោះលែងវីរុស” ដែលក្នុងនោះ កោសិកាជិតងាប់បានបញ្ចេញកូនវីរុសCOVID-19ថ្មី។

Francis Collins ដែលជាអ្នកវេជ្ជសាស្ត្រប្រចាំ NIH បកស្រាយថា “រូបភាពនេះ បង្ហាញអំពីកម្រិតនៃរបួសស្នាមដែលវីរុស COVID-19 បានបង្កឡើង នៅពេលវាគ្រប់គ្រងកោសិកាមនុស្ស។ កោសិកាមួយដែលបានឆ្លងវីរុសCOVID-19 គឺអាចបង្កើតបានវីរុសCOVID-19ថ្មីរាប់ពាន់ក្បាល និងឆ្លងទៅកាន់កោសិកាថ្មីមួយផ្សេងទៀត”។

រូបថតលម្អិតបែបនេះ ជួយឱ្យក្រុមអ្នកវិទ្យាសាស្ត្រយល់ដឹងកាន់តែស៊ីជម្រៅអំពីវីរុសដ៏គ្រោះថ្នាក់ដែលបានធ្វើឱ្យមនុស្សជាង3លាននាក់នៅជុំវិញពិភពលោក ត្រូវកើតជំងឺ ក្នុងនោះមានជាង1លាននាក់នៅសហរដ្ឋអាមេរិក៕

ប្រភព៖ សារព័ត៌មានបរទេស

April 29, 2020

អាមេរិកទប់ស្កាត់ផលអាក្រក់ពីអនុសាសន៍របស់ Trump ដែលថា “កម្ចាត់ COVID-19 ដោយចាក់សារធាតុជម្រះមេរោគចូលក្នុងរាងកាយ”

ក្រុមមន្ត្រីអាមេរិកាំង បានចាប់ផ្ដើមធ្វើសកម្មភាពជាបន្ទាន់ដើម្បីទប់ស្កាត់ផលប៉ះពាល់ដែលអាចកើតឡើងពីអនុសាសន៍របស់លោក Trump ដែលបានថ្លែងថា៖ គួរតែពិសោធលើកការចាក់សារធាតុសម្អាតមេរោគចូលក្នុងរាងកាយអ្នកជំងឺដើម្បីកម្ចាត់ COVID-19។

ប៉ុន្មានម៉ោងក្រោយពីសន្និសីទសារព័ត៌មានកាលពីថ្ងៃទី23មេសា ដែលកាលណោះលោក Trump បានផ្ដល់អនុសាសន៍ដូចខាងលើ គេឃើញថាមានសេចក្ដីប្រកាសបន្ទាន់ជាច្រើនត្រូវបានធ្វើឡើងជាបន្តបន្ទាប់ ដោយព្រមានដល់សាធារណជនអំពីហានិភ័យដែលអាចនាំឱ្យបាត់បង់ជីវិតទាក់ទិននឹងវិធីសាស្ត្រដែលប្រធានាធិបតីអាមេរិកាំងបានលើកឡើងកាលពីថ្ងៃទី23មេសាកន្លងទៅនោះ។

រដ្ឋបាលគ្រប់គ្រងចំណីអាហារ និងឱសថ(FDA/Food and Drug Administration) របស់សហរដ្ឋអាមេរិក កាលពីថ្ងៃទី24មេសា ក៏បានព្រមានអំពីការប្រើប្រាស់ hydroxychloroquine ជាថ្នាំប្រឆាំងជំងឺគ្រុនចាញ់ដែលលោក Trump បានសរសើរជាច្រើនដងថា ជាកត្តា “ផ្លាស់ប្ដូរល្បែងលេង” ក្នុងសង្គ្រាមប្រឆាំងនឹង COVID-19 ព្រោះថាថ្នាំនេះមានបង្កប់ហានិភ័យដែលគ្រោះថ្នាក់ដល់ចង្វាក់បេះដូង។

Stephen Hahn សមាជិកម្នាក់របស់ FDA បានថ្លែងថា “ខ្ញុំប្រាកដក្នុងចិត្តហើយថា នឹងមិនផ្ដល់អនុសាសន៍ស្ដីអំពីការចាក់បញ្ចូលសារធាតុសម្អាតមេរោគទៅក្នុងរាងកាយនោះឡើយ”។ ទីភ្នាក់ងារការពារបរិស្ថានសហរដ្ឋអាមេរិកក៏បានណែនាំពលរដ្ឋមិនឱ្យធ្វើតាមគំនិតរបស់លោក Trump ផងដែរ។ បណ្ឌិត Jerome Adams បានអំពាវនាវឱ្យអ្នកដែលកំពុងតាមដានលោកនៅលើបណ្ដាញសង្គម Twitter ថា “សូមមេត្តាសួរយោបល់ពីគ្រូពេទ្យ មុននឹងអនុវត្តវិធីព្យាបាលណាមួយ ឬថ្នាំណាមួយសម្រាប់ក្រុមគ្រួសារ”។ ចំណែកក្រុមហ៊ុនផលិតសារធាតុសម្លាប់មេរោគ Lysol បានអះអាងថា មិនត្រូវបញ្ចូលសារធាតុកម្ចាត់មេរោគ ចូលទៅក្នុងរាងកាយមនុស្ស “បើទោះជាក្នុងករណីណាក៏ដោយ”។

វិធីសាសន៍ដែលត្រូវបានលោក Trump ណែនាំឱ្យធ្វើការពិសោធនោះ បានធ្វើឱ្យមានការព្រួយបារម្ភកាន់តែច្រើនឡើងៗ ក្នុងអំឡុងសង្គ្រាមប្រឆាំង COVID-19។ នៅរដ្ឋ Maryland ខ្សែទូរស័ព្ទបន្ទាន់របស់អាជ្ញាធរ បានទទួលការហៅចូលជាង100លើកពីពលរដ្ឋ ដែលបានសួរថា “តើការចាក់ថ្នាំសម្អាតមេរោគចូលក្នុងរាងកាយគឺពិតជាវិធីព្យាបាលជំងឺមែន ឬយ៉ាងណា?”។

នៅសេតវិមាន Kayleigh McEnany ដែលជាជំនួយការផ្នែកសារព័ត៌មានរបស់លោក Trump បានចោទក្រុមអ្នកសារព័ត៌មានថា “គ្មានការទទួលខុសត្រូវ” ដោយបាននាំយកមតិចាកឆ្ងាយពីស្ថានភាពជាក់ស្ដែង។ ប៉ុន្តែ ប៉ុន្មានម៉ោងក្រោយមក លោក Trump ក៏បានឱ្យដឹងថា យោបល់របស់លោក ដែលត្រូវបានចុះផ្សាយនោះគឺជាការពិត ប៉ុន្តែលោក Trump បានអះអាងថា លោកគ្រាន់តែនិយាយបែប “បញ្ឆិតបញ្ឆៀង” តែប៉ុណ្ណោះ។

វេជ្ជបណ្ឌិត Deborah Birx អ្នកគ្រប់គ្រងផ្នែកប្រតិកម្មរហ័សរបស់សេតវិមានចំពោះ COVID-19 បានការពារប្រធានាធិបតី ដោយលោកយល់ថា មតិយោបល់ដែលលោក Trump បានលើកឡើងគឺជាផ្នែកមួយក្នុងការយល់ឃើញ បើទោះមិនបានទទួលស្គាល់ជាផ្លូវការ។ Deborah Birx ថ្លែងប្រាប់ Fox News ថា “នៅពេលប្រធានាធិបតីទទួលបានព័ត៌មានថ្មី គាត់ក៏ចង់និយាយចេញ និងចង់ពិភាក្សាជាមួយគ្នា”។

ក៏ប៉ុន្តែ ក្រុមអ្នកជំនាញខាងវេជ្ជសាស្ត្រយល់ថា អនុសាសន៍គ្មានមូលដ្ឋានពីប្រធានាធិបតី Trump ដែលជាអ្នកមិនមានការបណ្ដុះបណ្ដាលផ្នែកវេជ្ជសាស្ត្រ ប៉ុន្តែសម្ដីមានឥទ្ធិពល គឺពិតជា “គ្រោះថ្នាក់ខ្លាំងណាស់”។

Jack Chow ដែលជាឯកអគ្គរដ្ឋទូតសកលអំពី HIV/AIDS របស់សហរដ្ឋអាមេរិកក្នុងសម័យប្រធានាធិបតី George W. Bush មានយោបល់ថា “គំនិតរបស់ប្រធានាធិបតី Trump បើសិនជាមានអ្នកសាកល្បង នោះអាចនឹងបង្កឱ្យមានផលវិបាកធ្ងន់ធ្ងរចំពោះសុខភាព ឬនាំឱ្យមានការពិសោធប្រកបដោយការខាតបង់ និងមិនអាចបង្កើតបានជាវិធីព្យាបាលណាមួយ”។

កាលពីខែមុន បន្ទាប់ពីលោក Trump បានប្រកាសថា hydroxychloroquine គឺជាសន្លឹកបៀរដែលជួយ “ផ្លាស់ប្ដូរស្ថានការណ៍” ក្នុងសង្គ្រាមប្រឆាំងនឹង COVID-19 មានប្ដីប្រពន្ធមួយគូធ្វើតាមការលើកឡើងនេះ ដោយផឹកទឹកថ្នាំដែលមានសារធាតុគីមី chloroquine phosphate ដែលមានសារធាតុផ្សំដូចទៅនឹងការលើកឡើងរបស់លោក Trump ដោយសង្ឃឹមថានឹងអាចជួយសម្លាប់មេរោគក្នុងខ្លួន។ ប៉ុន្តែ ពួកគេបានធ្លាក់ខ្លួនឈឺ និងត្រូវបញ្ជូនទៅសង្គ្រោះបន្ទាន់ ដែលក្រោយមកបុរសជាប្ដីបានបាត់បង់ជីវិត ខណៈប្រពន្ធបានរួចផុតពីការស្លាប់។

ករណីខាងលើនេះ ធ្វើឱ្យមជ្ឈមណ្ឌលគ្រប់គ្រងនិងបង្ការជំងឺ CDC (Centers for Disease Control and Prevention) របស់សហរដ្ឋអាមេរិក កាលពីថ្ងៃទី28មេសា ត្រូវចេញសេចក្ដីព្រមានដល់បណ្ដាគ្លីនិកទូទាំងប្រទេស ស្ដីអំពីគ្រោះថ្នាក់របស់សារធាតុ chloroquine phosphate ដែល “អាចបង្កផលវិបាកយ៉ាងធ្ងន់ធ្ងរដល់សុខភាព និងអាយុជីវិត”៕

ប្រភព៖ សារព័ត៌មានបរទេស

>Trump ផ្ដល់អនុសាសន៍៖ ចាក់ថ្នាំសម្អាតមេរោគ ឬពន្លឺចូលទៅក្នុងរាងកាយ ដើម្បីព្យាបាលCOVID-19

April 29, 2020

WHO ថា “ប្រទេសនីមួយៗត្រូវទទួលសុខត្រូវលើបញ្ហា COVID-19 ដោយខ្លួនឯង”

ប្រធានអង្គការសុខភាពពិភពលោក(WHO) លោក Tedros បានឱ្យដឹងថា អង្គការនេះបានត្រឹមតែលើកឡើងនូវអនុសាសន៍តែប៉ុណ្ណោះ ចំណែកប្រទេសនីមួយៗត្រូវតែទទួលខុសត្រូវដោយខ្លួនឯងចំពោះវិធានការទប់ស្កាត់ COVID-19។

លោក Tedros Adhanom Ghebreyesus ប្រធានអង្គការសុខភាពពិភពលោក(WHO) បានថ្លែងនៅក្នុងសន្និសីទសារព័ត៌មានកាលពីថ្ងៃទី27មេសា នៅទីក្រុង Geneva ប្រទេសស្វីសថា “យើងខ្ញុំបានត្រឹមតែផ្ដល់អនុសាសន៍តែប៉ុណ្ណោះ ប៉ុន្តែត្រូវតែដឹងច្បាស់ថា យើងខ្ញុំមិនមានកាតព្វកិច្ចក្នុងការបង្ខំប្រទេសណាមួយឱ្យធ្វើតាមយើងខ្ញុំនោះឡើយ។ ប្រការនេះគឺអាស្រ័យទៅលើប្រទេសនីមួយៗ ដែលពួកគេអាចទទួលយក ឬបដិសេធអនុសាសន៍របស់យើងខ្ញុំ”។

លោក Tedros បន្តថា WHO តែងតែលើកឡើងនូវអនុសាសន៍ដែលយោងទៅលើកត្តាវិទ្យាសាស្ត្រ និងភ័ស្ដុតាងប្រកបដោយទំនុកចិត្ត។ កាលពីថ្ងៃទី30មករា WHO បានប្រកាសអាសន្នទូទាំងពិភពលោកអំពីវីរុស COVID-19។ មេដឹកនាំ WHO ថ្លែងថា “បើសិនជាអ្នកនៅចាំបាន ពេលនោះគឺមានករណីឆ្លងវីរុសត្រឹមតែ82នាក់ប៉ុណ្ណោះនៅខាងក្នុងប្រទេសចិន”។

ប្រធានអង្គការសុខភាពពិភពលោកសង្កត់ធ្ងន់ថា “ពិភពលោកគួរណាស់តែស្ដាប់តាម WHO ដោយប្រុងប្រយ័ត្ន។ ប្រទេសទាំងអស់ពេលនោះអាចបញ្ចេញវិធានការផ្នែកសុខាភិបាលប្រកបដោយប្រសិទ្ធភាព”។

លោក Tedros បញ្ជាក់ថា “អ្នកគួរតែពិនិត្យឡើងវិញ បណ្ដាប្រទេសដែលបានស្ដាប់តាមអនុសាសន៍ ពួកគេកំពុងតែមានស្ថានភាពល្អប្រសើរជាងបណ្ដាប្រទេសដទៃ។ នោះគឺជាការពិត។ និយាយរួម ប្រទេសនីមួយៗ ត្រូវតែទទួលខុសត្រូវរៀងៗខ្លួន”។

បើទោះជាមានការខិតខំប្រឹងប្រែង ប៉ុន្តែអង្គការ WHO ក៏ត្រូវបានគេវាយតម្លៃថា មិនមានសមត្ថភាពគ្រប់គ្រាន់ក្នុងការដឹកនាំពិភពលោក ឆ្លងកាត់វិបត្តិសុខភាពនេះនោះឡើយ។ ប្រធានាធិបតីសហរដ្ឋអាមេរិក លោក Donald Trump ជាច្រើនលើក បានចោទប្រកាន់ WHO ថា “បានធ្វើឱ្យពិភពលោកបង្កកំហុសឆ្គងយ៉ាងធ្ងន់ធ្ងរនៅពេលប្រយុទ្ធប្រឆាំងនឹង COVID-19 ព្រមទាំងបានបិទបាំងអំពីការឆ្លងរាលដាលរបស់វីរុសនេះទៀតផង”៕

ប្រភព៖ សារព័ត៌មានបរទេស

April 28, 2020

COVID-19! ក្រុមវេជ្ជបណ្ឌិតអាល្លឺម៉ង់បង្ខំចិត្តថតអាក្រាតកាយដើម្បីទាមទារឈុតការពារវីរុស

វេជ្ជបណ្ឌិតអាល្លឺម៉ង់មួយក្រុមបានថតរូបអាក្រាតកាយដើម្បីទាក់ទាញចំណាប់អារម្មណ៍របស់សាធារណជន និងក្រុមអ្នកនយោបាយ ដើម្បីឱ្យគិតគូរអំពីស្ថានភាពខ្វះឈុតការពារមេរោគ និងសម្ភារវេជ្ជសាស្ត្រ ក្នុងអំឡុងពេលវីរុស COVID-19 កំពុងរាតត្បាត។

យោងតាមសារព័ត៌មាន Guardian ចលនានេះមានឈ្មោះថា “Blanke Bedenken”។ សមាជិកដែលចូលរួមក្នុងចលនានេះថ្លែងថា ពួកគេមានអារម្មណ៍ថា កំពុងត្រូវគំរាមកំហែងដល់អាយុជីវិត ដោយសារវីរុស COVID-19 ហើយការអំពាវនាវសុំជំនួយរបស់ពួកគេក្នុងរយៈពេលច្រើនខែមកនេះ មិនត្រូវបានឆ្លើយតបនោះដែរ។

Ruben Bernau ថ្លែងប្រាប់ Arztezeitung ថា លោកនឹងក្រុមការងារមិនមានឈុតការពារសុវត្ថិភាពសុខភាព និងសម្ភារវេជ្ជសាស្ត្រគ្រប់គ្រាន់សម្រាប់ប្រើប្រាស់ដើម្បីការពារពីវីរុសCOVID-19 នោះឡើយ។ លោកថ្លែងថា “ការអាក្រាតកាយគឺជារូបភាពបង្ហាញថា ពួកយើងស្ថិតក្នុងសភាពងាយរងគ្រោះពីវីរុសដែលយើងកំពុងប្រឈម នៅពេលខ្វះសម្ភារការពារខ្លួន”។

វេជ្ជបណ្ឌិតពហុឯកទេស Christian Rechtenwald បានឱ្យដឹងថា ពួកគេយកគំរូតាមវេជ្ជបណ្ឌិតជនជាតិបារាំងម្នាក់ដែលមានឈ្មោះថា Alain Colombie ដែលធ្លាប់បានថតរូបអាក្រាតកាយដើម្បីបង្ហាញអំពីការខ្វះខាតសម្ភារវេជ្ជសាស្ត្រដែលគាត់ និងមិត្តរួមការងារបានជួបប្រទះ។

វេជ្ជបណ្ឌិត Husemann អះអាងថា ពួកគាត់ចង់ជួយសង្គ្រោះអ្នកជំងឺខ្លាំងណាស់ ប៉ុន្តែពួកគាត់ក៏ត្រូវការសម្ភារវេជ្ជសាស្ត្រដែលសមស្របផងដែរ។ វេជ្ជបណ្ឌិតមួយរូបផ្សេងទៀតថ្លែងថា “ខ្ញុំបានទទួលការបណ្ដុះដើម្បីដេរមុខរបួស។ ហេតុអ្វីឱ្យខ្ញុំដេរម៉ាស់ដោយខ្លួនឯងទៀត?”។

ក្រុមវេជ្ជបណ្ឌិតអាល្លឺម៉ង់ បានអំពាវនាវជាបន្តបន្ទាប់ឱ្យមានការបន្ថែមសម្ភារវេជ្ជសាស្ត្រចាប់តាំងពី COVID-19 បានបង្ហាញខ្លួនក្នុងប្រទេសនេះកាលពីចុងខែមករា។ មកដល់បច្ចុប្បន្នអាល្លឺម៉ង់ បានរកឃើញអ្នកជំងឺ 158,758នាក់ និងជាង6,200នាក់បានបាត់បង់ជីវិតដោយសារវីរុសកូរ៉ូណានេះ។

បណ្ដាក្រុមហ៊ុន និងរោងចក្រនៅអាល្លឺម៉ង់ បានបង្កើនចង្វាក់ផលិតកម្មរបស់ខ្លួនដើម្បីផ្គត់ផ្គង់ឈុតការពារមេរោគ ក៏ដូចជាសម្ភារវេជ្ជសាស្ត្រ ប៉ុន្តែនៅតែមិនអាចសមតាមតម្រូវការជាក់ស្ដែង។

ក្រៅពីការខ្វះខាតសម្ភារវេជ្ជសាស្ត្រក៏ដូចជាឈុតការពារមេរោគ បុគ្គលិកសុខាភិបាលនៃប្រទេសនេះក៏បានរាយការណ៍ថា មានករណីលួចទឹកថ្នាំសម្លាប់មេរោគ និងម៉ាស់ពីមន្ទីរពេទ្យរបស់ពួកគេទៀតផង។ ភាគីខាងប៉ូលីសអាល្លឺម៉ង់ បានអះអាងថា ក្រុមចោរដែលមានរចនាសម្ព័ន្ធគឺជាអ្នកនៅពីក្រោយបញ្ហានេះ។ មន្ទីរពេទ្យជាច្រើនបានបង្កើនការប្រុងប្រយ័ត្នផ្នែកសន្តិសុខដើម្បីការពារសម្ភារដូចដែលបានរៀបរាប់ខាងលើ។

ការសិក្សាស្រាវជ្រាវថ្មីកន្លងមកនេះរបស់សមាគមនៃក្រុមហ៊ុនធានារ៉ាប់រងសុខភាពអាល្លឺម៉ង់ បានឱ្យដឹងថា ក្រុមគ្រូពេទ្យកំពុងតែខ្វះម៉ាស់ប្រភេទប្រើ1ដងចោល ប្រមាណជា100លានបន្ទះ និងម៉ាស់ប្រភេទមានតម្រងច្រោះខ្យល់ជិត50លានបន្ទះ រួមនឹងស្រោមដៃប្រើម្ដងចោលជាង60លានស្រោម៕

ប្រភព៖ សារព័ត៌មានបរទេស

April 28, 2020

ដំណឹងល្អសម្រាប់ពិភពលោក!!…អាចរកឃើញវ៉ាក់សាំងបង្អាក់មេរោគកូវីដ-19 លឿនជាងការរំពឹងទុក គឺនៅក្នុងឆ្នាំនេះតែម្ដង…

អាចនឹងមានវ៉ាក់សាំងរម្ងាប់ការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 យ៉ាងលឿនបំផុតនៅក្នុងឆ្នាំនេះតែម្ដង ដោយជាបឋម គេរំពឹងថា នឹងអាចប្រើបានសម្រាប់ក្រុមមនុស្សដែលមានសុខភាពទន់ខ្សោយ និងក្រុមមនុស្សដែលប្រថុយប្រថាននឹងជំងឺផ្សេងៗ ដោយក្នុងនោះរួមទាំងបណ្ដាក្រុមមន្ត្រីផ្នែកសាធារណៈសុខាភិបាល លឿនជាងការរំពឹងទុកកាលពីពេលដំបូងៗ។ នេះបើតាមសេចក្ដីរាយការណ៍របស់ទីភ្នាក់ងារព័ត៌មាន ប្ល៊ូមប៊ើក។

កាលពីពេលមុននេះ ក្រុមសម្ព័ន្ធមិត្តរួមសហការផ្នែកនវានុវត្តន៍ដើម្បីទប់ទល់នឹងរោគរាតត្បាត ឬ Coalition for Epidemic Preparedness Innovations ឬ CEPI ដែលផ្ដល់ការគាំទ្រថវិកាលើគ្រោងការវ៉ាក់សាំងប្រឆាំងវីរុសកូរ៉ូណាប្រភេទថ្មី 9គ្រោងការ បានធ្លាប់ចង្អុលបង្ហាញថា វ៉ាក់សាំង ប្រហែលជានឹងត្រៀមរួចរាល់ក្នុងអំឡុងពេល 12 ដល់ 18ខែទៀត តែយ៉ាងណាក៏ដោយ ចុងក្រោយបំផុតនេះ ពួកគេបានកំណត់គោលដៅដោយនឹងបង្កើនល្បឿនឱ្យលឿនជាងនេះ។

លោក រិឆាត ហេចឆេតត៍ ប្រធានក្រុម CEPI ដែលជាស្ថាប័នល្បីល្បាញស្ថិតនៅក្នុងទីក្រុងអូស្លូ បានប្រាប់ថា ការវាយតម្លៃចុងក្រោយបំផុត មិនទាន់រាប់បញ្ជូលភាពអាចទៅរួចក្នុងករណីដែលក្រុមហ៊ុនទាំងឡាយកំពុងរួមដៃគ្នាយ៉ាងជិតស្និទ្ធក្នុងការបង្រួញដំណាក់កាលផ្សេងៗ និងបើកទទួលអ្នកស្ម័គ្រចិត្តក្នុងការសាកល្បងនៅលើមនុស្សឱ្យបានកាន់តែលឿនឡើង រួមទាំងបច្ច័យផ្សេងៗទៀតផង។

លោកបានថ្លែងកាលពីថ្ងៃចន្ទ(ទី27មេសា) ថា “ទាំងអស់ និងទាំងមូលដែលយើងកំពុងសម្លឹងមើលនៅក្នុងពេលនេះ ប្រៀបដូចជាឱកាសនៃភាពអាចទៅរួច ដែលជួនកាលអាចបង្ហាញខ្លួនវ៉ាក់សាំងបានឆាប់ជាងរយៈពេល 12 ឬ 18ខែ ដូចដែលយើងធ្លាប់បាននិយាយគ្នា”

ក្នុងខណៈដែលចំនួនអ្នកឆ្លងមេរោគកូវីដ-19 ទូទាំងពិភពលោកហក់ឡើងលើស 3លាននាក់ បានចាប់ផ្ដើមមានកម្លាំងសម្ពាធកាន់តែធ្ងន់ធ្ងរឡើងៗជារឿយៗចំពោះអ្នកជំនាញការ ឱ្យប្រញាប់រិះរកវិធីព្យាបាល ឬវ៉ាក់សាំងប្រឆាំងនឹងជំងឺរាតត្បាតដ៏ធំនេះ ដោយក្នុងពេលនេះ មានរាប់សិបក្រុមហ៊ុនទូទាំងពិភពលោក កំពុងស្រាវជ្រាវរកវ៉ាក់សាំងព្យាបាលកូវីដ-19 ដែលក្នុងនោះមានក្រុមហ៊ុនសារ៉ូហ្វ៊ិ, ចនសុន អ៊ែនដ៍ ចនសុន និងម៉ូឌើណា អ៊ិងក៍ ជាដើម។

គណៈអ្នកជំនាញការមកពីមហាវិទ្យល័យ អុកស្វ៊ើដ ដែលដឹកនាំដោយលោក សារ៉ាហ្វ ហ្គីលប៊ើក សាស្ត្រាចារ្យផ្នែកវ៉ាក់សាំងវិទ្យា បានចាប់ផ្ដើមសាកល្បងវ៉ាក់សាំងដែលមាននៅក្នុងបណ្ដាញហើយ និងមានគោលដៅទទួលបានលទ្ធផលដែលមានប្រសិទ្ធផលយ៉ាងលឿនបំផុតក្នុងខែកញ្ញា។

អ្នកជំនាញការខ្លះ បានទាមទារឱ្យមានការប្រុងប្រយ័ត្ន ដែលទោះបីជាថា វ៉ាក់សាំងភាគច្រើនត្រូវប្រើពេលវេលាសាកល្បងរយៈពេលរាប់ឆ្នាំ(12-18ខែ) មុននឹងបានដាក់លក់នៅលើទីផ្សារ ដែលរយៈពេលនេះអាចរាប់ថា លឿនបំផុតហើយក៏ដោយ និងថែមទាំងបានដាស់តឿនទៀតថា ការប្រញាប់ប្រញាល់អភិវឌ្ឍវ៉ាក់សាំងប្រឆាំងវីរុសកូរ៉ូណាប្រភេទថ្មី ក្រោមតិចណូឡូជីថ្មីនេះ នៅមិនដែលធ្លាប់បានទទួលការពិសោធថា ប្រើបានលទ្ធផលល្អជាមួយមនុស្សនៅឡើយ។

ក្នុងរឿងនេះ លោកហេចឆេតត៍ បានប្រាប់ថា លោកក៏មិនអាចផ្ដល់ការសន្យាខ្លាំងហួសប្រមាណដែរ តែបានប្រាប់ថា វ៉ាក់សាំងជាច្រើនដែលបានទទួលការគាំទ្រពី CEPI អាចចូលដល់ដំណាក់កាលទី2 នៃការសាកល្បង យ៉ាងលឿនបំផុតក្នុងអំឡុងចុងរដូវស្លឹកឈើលាស់ ឬក្នុងអំឡុងរដូវក្ដៅនេះតែម្ដង។ នោះគឺមានន័យថា វ៉ាក់សាំងដំបូងអាចនឹងកើតមានឡើងក្នុងឆ្នាំ2020នេះ បើសិនជាវាឆ្លងផុតការពិសោធផ្នែកសុវត្ថិភាព និងប្រសិទ្ធផល ដោយជួនកាលក្នុងរយៈដំបូង វាអាចនឹងរួចរាល់សម្រាប់ក្រុមមនុស្សប្រថុយប្រថានមួយចំនួន មុននឹងអាចចូលទៅដល់ក្នុងកម្រិតដែលធំទូលាយជាបន្ត។

លោកថ្លែងថា៖ “អ្នកអភិវឌ្ឍន៍បានផ្ដល់ចំណាប់អារម្មណ៍ទៅលើគំរូផ្សេងៗកន្លងមក ដោយមានការប្រញាប់ប្រញាល់អភិវឌ្ឍយ៉ាងឆាប់រហ័ស តែអកុសល វាបាននាំឆ្ពោះទៅរកលទ្ធផលដែលយ៉ាប់ៗ ដូច្នេះទើបយើងត្រូវធ្វើវាដោយភាពពិតប្រាកដជាទីបំផុត។ យើងមិនអាចធ្វើអ្វី ឱ្យតែរួចៗនោះទេ វាជារឿងសំខាន់បំផុតដែលយើងត្រូវប្រញាប់ធានាពីសុវត្ថិភាព និងប្រសិទ្ធផលរបស់វា”៕

ប្រភព៖ សារព័ត៌មានបរទេស

April 28, 2020

រុស្ស៊ីចាប់ផ្ដើមធ្ងន់ធ្ងរហើយ!! ឆ្លងមេរោគកូវីដ-19 មួយថ្ងៃ 6ពាន់នាក់ ចំនួនអ្នកឆ្លងសរុប វ៉ាដាច់ចិនហើយ

ប្រទេសរុស្ស៊ី មានតួលេខអ្នកឆ្លងមេរោគវីរុសកូវីដ-19 ដែលបានអះអាងហើយ បានវ៉ាដាច់ប្រទេសចិនរួចរាល់ហើយកាលពីថ្ងៃចន្ទ(ទី27មេសា) ក្រោយពីចំនួនអ្នកឆ្លងមេរោគសរុបបានកើនឡើងលើស 87,000នាក់ ខណៈដែលរដ្ឋបាលកំពុងប្រឈមនឹងសម្ពាធយ៉ាងធ្ងន់ធ្ងរឡើងៗ ឱ្យពិចារណាបន្ធូរបន្ថយវិធានការបិទទីក្រុង ដើម្បីស្ដារសេដ្ឋកិច្ចដែលកំពុងទទួលរងការខូចខាតយ៉ាងធ្ងន់ធ្ងរដោយសារតែរោគរាតត្បាតដ៏ធំមួយនេះ។

រុស្ស៊ី ប្រទេសដែលមានអាណាខេត្តធំទូលាយបំផុតក្នុងពិភពលោក កំពុងស្ថិតក្នុងវិធានការបិទទីក្រុង តាំងតែពីលោកប្រធានាធិបតី វ្ល៉ាឌីមៀរ ពូទីន ថ្លែងដាក់បញ្ជាបិទទីកន្លែងសាធារណៈភាគច្រើនកាលពីថ្ងៃទី25 ខែមីនា ដោយវិធានការទាំងអស់នេះ មានកំណត់ផុតសុពលភាពនៅថ្ងៃទី30 ខែមេសា ហើយលោកពូទីន នៅមិនទាន់បាននិយាយយ៉ាងច្បាស់លាស់ថា តើលោកមានផែនការពន្យារបញ្ជាបិទទីក្រុងជាបន្តទៀត ឬយ៉ាងណានៅឡើយ។

យ៉ាងណាក៏ដោយ លោកស្រី អ៊ែនណា ប៉ូប៉ូវ៉ា អគ្គនាយិកាស្ថាប័ន Rospotrebnadzor ដែលជាអង្គភាពតាមដានផ្នែកសុខភាព និងអនាម័យរបស់ប្រទេសរុស្ស៊ី បានប្រាប់តាមរយៈស្ថានីយទូរទស្សន៍របស់រដ្ឋកាលពីថ្ងៃចន្ទ(ទី27មេសា)ថា ក្នុងការយល់ឃើញរបស់លោកស្រី រុស្ស៊ី គួរតែតម្កល់វិធានការនេះរហូតទៅដល់ថ្ងៃទី12 ឧសភា។

កាលពីពេលមុនហ្នឹង លោក មីខាអ៊ីល មីជូស្ទីន ជានាយករដ្ឋមន្ត្រីរុស្ស៊ី បានសំណូមពរឱ្យរដ្ឋបាលរបស់លោក លើកសំណើផ្សេងៗនៅក្នុងថ្ងៃព្រហស្បតិ៍(ទី30មេសា) ដើម្បីពិចារណាបន្ធូរបន្ថយការកំណត់មួយចំនួនដល់ផ្នែកឯកជន បន្ទាប់ពីក្រុមហ៊ុនជាច្រើនបានព្រមានថា ពួកគេកំពុងប្រថុយប្រថានក្នុងការដួលរលំ បើសិនជាវិធានការបិទទីក្រុងនៅតែបន្ត ខណៈដែលបុគ្គលិកជាច្រើនម៉ឺននាក់ត្រូវបញ្ឈប់ពីការងារហើយ។

លោក មីជូស្ទីន បានថ្លែងនៅក្នុងកិច្ចប្រជុំគណៈរដ្ឋមន្ត្រីតាមប្រព័ន្ធអនឡាញថា៖ “នៅពេលដែលស្ថានការណ៍ មានសញ្ញាថា មានការប្រែប្រួលទៅក្នុងផ្លូវល្អភ្លាម យើងចាំបាច់ត្រូវតែពិចារណាបញ្ឈប់ការកំណត់មួយចំនួនដែលបានកម្រិតទៅលើក្រុមហ៊ុនខ្លះ និងប្រតិបត្តិករខ្លះ ជាដំណាក់ៗ”

ការទាមទារឱ្យបន្ធូរបន្ថយវិធានការបិទទីក្រុងបានកើតមានឡើង បើទោះជាស្ថានការណ៍ការឆ្លងរាលដាលរបស់កូវីដ-19 នៅក្នុងប្រទេសរុស្ស៊ីចាបផ្ដើមរាលដាលរីកធំឡើងជារឿយៗក្ដី ដោយថ្មីៗបំផុតនេះ កាលពីថ្ងៃចន្ទ(ទី27មេសា) ប្រទេសរុស្ស៊ីបានរកឃើញអ្នកឆ្លងមេរោគថ្មីច្រើនដល់ទៅ 6,198នាក់ ធ្វើឱ្យចំនួនអ្នកឆ្លងមេរោគសរុបកើនឡើង 87,147នាក់ ក្លាយជាប្រទេសក្រោយគេបង្អស់បន្តពីប្រទេសទួរគី ដែលមានចំនួនអ្នកឆ្លងមេរោគ វ៉ាដាច់ប្រទេសចិន ដែលជាប្រភពដែលមេរោគកូរ៉ូណាប្រភេទថ្មីបង្ហាញខ្លួនឡើងមុនគេ។

ទាំងអស់នេះ ប្រទេសចិនមានចំនួនអ្នកឆ្លងមេរោគសរុប 82,830នាក់ ហើយពេលនេះពួកគេកំពុងបង្វែរមុខសញ្ញាទៅប្រយុទ្ធជាមួយអ្នកឆ្លងមេរោគនាំចូលដែលកំពុងកើនឡើងជារឿយៗ ជាពិសេសជាមួយបុគ្គលដែលធ្វើដំណើរមកពីប្រទេសរុស្ស៊ី៕

ប្រភព ៖ សារព័ត៌មានបរទេស

April 28, 2020

Trump ថា “ទំហំទឹកប្រាក់ដែលទាមទារឱ្យចិនសងការខូចខាតដោយសារ COVID-19 នឹងច្រើនខ្លាំងណាស់”

លោក Donald Trump បានថ្លែងថា នឹងទាមទារឱ្យចិនសងការខូចខាតដោយសារ COVID-19 ហើយទំហំទឹកប្រាក់ដែលកំពុងលើកយកមកពិភាក្សា គឺពិតជាធំខ្លាំងណាស់។

“យើងមិនសប្បាយចិត្តជាមួយប្រទេសចិននោះទេ។ យើងមិនសប្បាយចិត្តជាមួយនឹងស្ថានភាពរួម ព្រោះថាយើងជឿជាក់ថា ស្ថានភាពនេះអាចទប់ស្កាត់នៅនឹងប្រភពនៃវីរុសនេះ។ វាអាចត្រូវបានទប់ស្កាត់យ៉ាងឆាប់រហ័ស និងមិនរាលដាល់ទូទាំងពិភពលោក” ប្រធានាធិបតីអាមេរិកាំង លោក Donald Trump មានប្រសាសន៍បែបនៅក្នុងសន្និសីទសារព័ត៌មានមួយនៅឯសេតវិមាន កាលពីថ្ងៃទី27មេសា (ត្រូវនឹងថ្ងៃទី28នៅកម្ពុជា)។

លោក Trump បន្តថា “មានវិធីជាច្រើនដែលធ្វើឱ្យពួកគេត្រូវទទួលខុសត្រូវ។ យើងកំពុងធ្វើការស៊ើបអង្កេតដោយម៉ឺងម៉ាត់ដូចអ្នករាល់គ្នាអាចដឹង”។

បទវិចារណថាថ្មីមួយដែលត្រូវបានចុះផ្សាយនៅប្រទេសអាល្លឺម៉ង់ បានទាមទារឱ្យប្រទេសចិនសងការខូចខាតផ្នែកសេដ្ឋកិច្ចដល់ទៅ165ពាន់លានដុល្លារដែលបង្កឡើងដោយវីរុស COVID-19។ នៅពេលត្រូវបានសួរថា សហរដ្ឋអាមេរិកនឹងធ្វើបែបនេះដែរទេ លោក Trump ឆ្លើយថា “យើងអាចធ្វើអ្វីមួយដែលងាយស្រួលជាងនេះ”។

លោក Trump បន្តថា “អាល្លឺម៉ង់ កំពុងតែយកចិត្តទុកដាក់រាល់បញ្ហា យើងក៏ដូច្នេះដែរ។ យើងកំពុងពិភាក្សាអំពីទំហំទឹកប្រាក់ដែលច្រើនជាងប្រទេសអាល្លឺម៉ង់កំពុងតែធ្វើ។ យើងមិនទាន់បានកំណត់តួលេខ(ទំហំទឹកប្រាក់)ចុងក្រោយនៅឡើយ តែវាច្រើនណាស់។ នេះគឺជាការខាតបង់ទូទាំងសកលលោក។ នេះគឺជាការខូចខាតរបស់សហរដ្ឋអាមេរិក ប៉ុន្តែក៏ជាការខូចខាតរបស់ពិភពលោកទាំងមូលផងដែរ”។

សហរដ្ឋអាមេរិកគឺជាសម្បុកមេរោគ COVID-19 ធំជាងគេក្នុងពិភពលោក ដោយមានអ្នកជំងឺជាង985,000នាក់ ក្នុងនោះមានអ្នកជំងឺជិត56,000នាក់បានស្លាប់។

COVID-19 បានចាប់ផ្ដើមឆ្លងរាលដាលនៅប្រទេសចិនកាលពីខែធ្នូ ឆ្នាំ2019 ហើយបច្ចុប្បន្ន វីរុសនេះបានរាលដាល់ដល់ប្រទេស និងដែនដីជាង200 នៅជុំវិញពិភពលោក បណ្ដាលឱ្យមនុស្សជាង3លាននាក់បានឆ្លងមេរោគ ក្នុងនោះមានជាង210,000នាក់បានបាត់បង់ជីវិត និងជិត892,000នាក់បានជាសះស្បើយ៕

ប្រភព៖ សារព័ត៌មានបរទេស

April 28, 2020

COVID-19! ជាង3លាននាក់បានឆ្លងមេរោគនៅទូទាំងពិភពលោក ក្នុងនោះអាស៊ីអាគ្នេយ៍មានជាង40,700នាក់

ពិភពលោកទាំងមូល មានអ្នកឆ្លងវីរុស COVID-19 ដល់ទៅជាង3លាននាក់ ក្នុងនោះមានជាង210,000នាក់បានបាត់បង់ជីវិត។

យោងតាមស្ថិតិពីសាកលវិទ្យាល័យ Johns Hopkins មនុស្ស3,040,709នាក់បានឆ្លងជំងឺ និង211,099នាក់បានស្លាប់ដោយសារ COVID-19 នៅក្នុងប្រទេស និងដែនដី210ក្នុងពិភពលោក។ អ្នកស្លាប់ថ្មីមានចំនួន4,286នាក់ និងអ្នកជំងឺថ្មីមានចំនួន69,814នាក់។ ចំណែកអ្នកជំងឺដែលបានជាសះស្បើយ មានចំនួន891,804នាក់។

សហរដ្ឋអាមេរិក បច្ចុប្បន្នបានរកឃើញអ្នកជំងឺCOVID-19 សរុប985,443នាក់ កើន22,064នាក់ធៀបនឹងម្សិលមិញ។ ចំនួនអ្នកស្លាប់ដោយសារវីរុសនេះក៏បានកើនដល់55,952នាក់ ក្នុងនោះមានករណីស្លាប់ថ្មីចំនួន1,142នាក់។

អេស្ប៉ាញ៖ អ្នកជំងឺថ្មី1,831នាក់ និងអ្នកស្លាប់ថ្មី331នាក់។ អ្នកជំងឺសរុប209,465នាក់ និងអ្នកស្លាប់សរុប23,521នាក់។

អ៊ីតាលី៖ អ្នកជំងឺថ្មី1,739នាក់ និងអ្នកស្លាប់ថ្មី333នាក់។ អ្នកជំងឺសរុប199,414នាក់ និងអ្នកស្លាប់សរុប26,977នាក់។

បារាំង៖ អ្នកជំងឺថ្មី3,742នាក់ និងអ្នកស្លាប់ថ្មី437នាក់។ អ្នកជំងឺសរុប165,842នាក់ និងអ្នកស្លាប់សរុប23,393នាក់។

អាល្លឺម៉ង់៖ អ្នកជំងឺថ្មី664នាក់ និងអ្នកស្លាប់ថ្មី85នាក់។ អ្នកជំងឺសរុប158,434នាក់ និងអ្នកស្លាប់សរុប6,061នាក់។

អង់គ្លេស៖ អ្នកជំងឺថ្មី4,309នាក់ និងអ្នកស្លាប់ថ្មី360នាក់។ អ្នកជំងឺសរុប157,144នាក់ និងអ្នកស្លាប់សរុប21,092នាក់។

រុស្ស៊ី៖ អ្នកជំងឺថ្មី6,198នាក់ និងអ្នកស្លាប់ថ្មី47នាក់។ អ្នកជំងឺសរុប87,147នាក់(អ្នកជំងឺសរុបនៅចិន 82,836នាក់) និងអ្នកស្លាប់សរុប794នាក់។

អ៊ីរ៉ង់៖ អ្នកស្លាប់ថ្មី96នាក់ និងងអ្នកស្លាប់សរុប5,806នាក់ ខណៈអ្នកជំងឺសរុប91,472នាក់។

អាស៊ីអាគ្នេយ៍៖ អ្នកជំងឺសរុប40,766នាក់ ក្នុងនោះមានអ្នកស្លាប់សរុប1,445នាក់។ សិង្ហបុរីគឺជាសម្បុកមេរោគធំជាងគេបង្អស់ដោយមានអ្នកជំងឺសរុប14,423នាក់ និងអ្នកស្លាប់12នាក់។ ឥណ្ឌូនេស៊ីជាប់លេខ2 ជាមួយនឹងអ្នកជំងឺសរុប9,096នាក់ និងអ្នកស្លាប់765នាក់ ខណៈហ្វីលីពីនគឺជាសម្បុកមេរោគធំជាងគេទី3ក្នុងតំបន់នេះ។

ទីម័រខាងកើត និងឡាវ បន្តជាទឹកដីដែលទទួលរងផលប៉ះពាល់តិចជាងគេនៅអាស៊ីអាគ្នេយ៍។ កម្ពុជា វៀតណាម ទីម័រខាងកើត និងឡាវ មិនទាន់មានករណីស្លាប់ដោយសារ COVID-19 នៅឡើយ៕

ប្រភព៖ សារព័ត៌មានបរទេស

April 28, 2020

COVID-19! ប្រទេសថៃពន្យារសុពលភាពនៃការប្រកាសអាសន្នទូទាំងប្រទេស ដើម្បីបន្តទប់ស្កាត់វីរុសកូរ៉ូណា

រាជាណាចក្រថៃ នឹងអូសបន្លាយសុពលភាពនៃបទបញ្ជាដាក់ប្រទេសឱ្យស្ថិតក្នុងស្ថានភាពប្រកាសអាសន្នដើម្បីទប់ទល់នឹងវីរុសCOVID-19 រហូតដល់ចុងខែឧសភា បើទោះជាស្ថានភាពនៃរោគរាតត្បាតនេះបង្ហាញភាពវិជ្ជមានយ៉ាងណាក៏ដោយ។

អ្នកនាំពាក្យរបស់រាជរដ្ឋាភិបាលថៃ ថ្ងៃនេះប្រកាសថា ការប្រកាសអំពីស្ថានភាពអាសន្នដើម្បីប្រឆាំងនឹង COVID-19 ដែលត្រូវបានដាក់ចេញចាប់ពីថ្ងៃទី26មីនានោះ នឹងត្រូវបានពន្យារសុពលភាពដល់ចុងខែឧសភា។ ក៏ប៉ុន្តែ អ្នកនាំពាក្យរូបនេះបានឱ្យដឹងថា នឹងមានការបន្ធូរបន្ថយការរឹតត្បិតខ្លះចំពោះអាជីវកម្ម និងសកម្មភាពសាធារណៈមួយចំនួន ខណៈដែលករណីឆ្លងវីរុសថ្មីមានសញ្ញាថយចុះច្រើន។

ប្រទេសថៃ ក្នុងថ្ងៃនេះក៏បានរាយការណ៍ថា មានករណីឆ្លងវីរុស COVID-19ថ្មីចំនួន9នាក់បន្ថែមទៀត។ បច្ចុប្បន្ន ចំនួនអ្នកជំងឺសរុបនៅក្នុងប្រទេសនេះគឺ2,931នាក់ ក្នុងនោះមាន52នាក់បានស្លាប់ និង2,609នាក់បានជាសះស្បើយ៕

ប្រភព៖ សារព័ត៌មានបរទេស

April 27, 2020

Tag: covid-19