covid-19 - La Reine Media

លោក Trump ថា អាមេរិកកំពុងគ្រប់គ្រងអាសន្នរោគកូរ៉ូណាបានល្អ ខណៈអ្នកជំងឺថ្មីកើនឡើង55%

ប្រធានាធិបតីអាមេរិក លោក Donald Trump បានអះអាងថា ទីក្រុង Washington កំពុងគ្រប់គ្រងលើអាសន្នរោគកូរ៉ូណា COVID-19 បានយ៉ាងល្អ ខណៈដែលតួលេខនៃការឆ្លងមេរោគនេះនៅទូទាំងសហរដ្ឋអាមេរិក នៅតែបន្តកើនឡើង។

“វីរុសកូរ៉ូណា កំពុងត្រូវបានគ្រប់គ្រងយ៉ាងល្អនៅអាមេរិក។ យើងកំពុងរក្សាទំនាក់ទំនងជាមួយបណ្ដាប្រទេស និងភាគីពាក់ព័ន្ធ។ មជ្ឈមណ្ឌលទប់ស្កាត់ និងគ្រប់គ្រងរោគអាមេរិក (CDC) រួមជាមួយនឹងអង្គការសុខភាពពិភពលោក ធ្វើការយ៉ាងយកចិត្តទុកដាក់ និងមានភាពឆ្លាតវៃ។ ទីផ្សារមូលបត្រចាប់ផ្ដើមមានសញ្ញាល្អវិញហើយ” នេះបើតាមការរៀបរាប់របស់លោក Donald Trump នៅលើទំព័រ Twitter កាលពីម្សិលមិញ។

ការអះអាងខាងលើរបស់ប្រធានាធិបតីអាមេរិក ត្រូវបានធ្វើឡើងក្នុងពេលទីផ្សារមូលបត្រពិភពលោក កំពុងបាត់បង់ស្ថេរភាព ដោយសារមានការព្រួយបារម្ភអំពីអាសន្នរោគកូរ៉ូណា COVID-19 ខណៈដែលមេរោគបង្កជំងឺរលាកសួតប្រភេទថ្មីនេះ បានឆ្លងរាលដាលទៅដល់ប្រទេស និងដែនដីចំនួន37ក្នុងពិភពលោក។

សារព័ត៌មាន Washington Post របស់អាមេរិក កាលពីម្សិលមិញបានដកស្រង់ប្រភពព័ត៌មានសុំមិនបញ្ចេញឈ្មោះ បានឱ្យដឹងថា ក្នុងពេលដ៏ខ្លីខាងមុខ សេតវិមានអាចនឹងស្នើសុំសភាដើម្បីចំណាយប្រាក់ជិត1ពាន់លានដុល្លារ សម្រាប់បង្កើនសមត្ថភាពទប់ស្កាត់អាសន្នរោគ COVID-19 ដែលមកដល់ពេលនេះ វាបានសម្លាប់មនុស្ស2,699នាក់និង 80,146នាក់ បានផ្ទុកមេរោគនេះ។

Hogan Gedley ដែលជាអ្នកនាំពាក្យរបស់សេតវិមានបានអះអាងថា រដ្ឋាភិបាលត្រូវការថវិកាដើម្បី “ការពារពលរដ្ឋអាមេរិកាំងទាំងមូល” ប៉ុន្តែ អ្នកនាំពាក្យរូបនេះមិនបានបញ្ជាក់អំពីចំនួនទឹកប្រាក់1ពាន់លានដុល្លារដែលសារព័ត៌មានបានលើកឡើងនោះទេ។ លោកស្រី Hogan Gedley បានបន្តថា “ខ្ញុំមិនទាន់ទទួលបានឯកសារទាក់ទិននឹងចំនួនទឹកប្រាក់នៅឡើយ ប៉ុន្តែ យើងត្រូវការប្រយុទ្ធប្រឆាំងនឹងអាសន្នរោគ”។

កាលពីម្សិលមិញ(25កុម្ភៈ) ស្ថាប័ន CDC បានឱ្យដឹងថា សហរដ្ឋអាមេរិក មានអ្នកផ្ទុកមេរោគកូរ៉ូណា COVID-19 ចំនួន53នាក់ ដោយបូករួមទាំងអ្នកជំងឺថ្មីក្នុងប្រទេសនេះ និងពលរដ្ឋដែលបានត្រឡប់មកពីទីក្រុង Wuhan និងនាវាទេសចរណ៍ Diamond Princess។ តួលេខស្ដីអំពីអ្នកផ្ទុកមេរោគកូរ៉ូណានេះ កើនឡើង55% បើធៀបនឹងតួលេខកាលពីថ្ងៃទី22កុម្ភៈ៕

ប្រភព៖ សារព័ត៌មានបរទេស

February 25, 2020

អ៊ីតាលី៖ ចំនួនអ្នកឆ្លងមេរោគកូរ៉ូណា COVID-19 កើនឡើងដល់229នាក់ ខណៈអ្នកស្លាប់នៅទូទាំងពិភពលោកកើនដល់2.699នាក់

អ៊ីតាលីបានរកឃើញអ្នកឆ្លងវីរុសកូរ៉ូណាបន្ថែម72នាក់ ធ្វើឱ្យចំនួនអ្នកមានផ្ទុកមេរោគនេះឡើងដល់229នាក់ ប៉ុន្តែក្រុមមន្ត្រីសុខាភិបាលមិនទាន់រកឃើញប្រភពចម្លងដំបូងនៃមេរោគ COVID-19 នេះនៅឡើយ។

មន្ត្រីសុខាភិបាលអ៊ីតាលី កាលពីម្សិលមិញបានឱ្យដឹងថា ប្រទេសនេះមានអ្នកផ្ទុកមេរោគកូរូណាចំនួន229នាក់ ក្នុងនោះមាន7នាក់បានបាត់បង់ជីវិត។ អ្នកជំងឺ101នាក់ផ្សេងទៀតកំពុងទទួលការព្យាបាលក្នុងមន្ទីរពេទ្យ និង27នាក់ទទួលបានការព្យាបាលពិសេស។

តំបន់ Lombardy នៅភាគខាងជើងនៃប្រទេសអ៊ីតាលី មានអ្នកផ្ទុកមេរោគចំនួនដល់ទៅ172នាក់ ក្នុងនោះមាន5នាក់បានស្លាប់។ យ៉ាងហោចណាមានទីរួមស្រុកចំនួន10នៅភាគខាងជើងអ៊ីតាលី ដែលមានប្រជាជនសរុបប្រហែល50,000នាក់ ត្រូវបានអាជ្ញាធរដាក់បម្រាមគោចរចាប់ពីថ្ងៃទី23កុម្ភៈ ដើម្បីទប់ស្កាត់ការឆ្លងរាលដាលនៃមេរោគបង្កជំងឺរលាកសួត COVID-19។

អ៊ីតាលី បច្ចុប្បន្នត្រូវបានគេចាត់ទុកថាជាសម្បុកមេរោគកូរ៉ូណាធំបំផុតលំដាប់ទី4ក្នុងពិភពលោក បន្ទាប់ពីចិន កូរ៉េខាងត្បូង និងនាវាទេសចរណ៍ Diamond Princess។ អាជ្ញាធរតំបន់ Lombardy និង Veneto ដែលជាចំណុចកណ្ដាលនៃមេរោគកូរ៉ូណានៅប្រទេសអ៊ីតាលី បានស្នើឱ្យសាលារៀន ផ្អាកដំណើរការ1សប្ដាហ៍ និងបានបិទទ្វារសារមន្ទីរ រោងភាពយន្ត ព្រមទាំងបានលុបចោលពិធីបុណ្យ Venice ចំនួន2ថ្ងៃចុងក្រោយផងដែរ។

មន្ត្រីអ៊ីតាលី2រូប កាលពីម្សិលមិញបានឱ្យដឹងថា ប្រទេសនេះ មិនទាន់រកឃើញ “អ្នកជំងឺលេខ 0” (ប្រភពចម្លងដំបូងគេដំបូងក្នុងប្រទេសនេះ) នៅឡើយ។ Nott Angelo Borrelli ដែលជាប្រធាននៃគណៈកម្មការការពារពលរដ្ឋរបស់អ៊ីតាលី បានឱ្យដឹងថា “ប្រការដែលសំខាន់គឺត្រូវរកឱ្យឃើញថា តើអ្នកនោះមកពីទីណា ដើម្បីអាចទប់ស្កាត់ការបន្តចម្លងវីរុសពីប្រភពមេរោគនេះ”។

អាសន្នរោគកូរ៉ូណា COVID-19 បានកើនឡើងនៅតំបន់ Wuhan នៃប្រទេសចិន កាលពីខែធ្នូ ឆ្នាំ2019 ហើយបានរាលដាលទៅដល់ប្រទេសចំនួន37ក្នុងពិភពលោក។ គិតមកដល់ពេលនេះ នៅទូទាំងពិភពលោក មានអ្នកស្លាប់ដោយសារអាសន្នរោគនេះ កើនឡើងដល់ 2,630នាក់ និងអ្នកមានផ្ទុកមេរោគនេះកើនដល់ជិត80.000នាក់ ចំណែកអ្នកដែលបានជាសះស្បើយមានចំនួន25,282នាក់៕

ប្រភព៖ សារព័ត៌មានបរទេស

February 25, 2020

សែនរន្ធត់! វីរុស COVID-19 ប្រហារជីវិត “គ្រូពេទ្យចិន” អស់ 2នាក់ទៀតហើយ…

អ្នកស្រីវេជ្ជបណ្ឌិត សៀ ស៊ឺស៊ឺ អាយុ 29ឆ្នាំ ជំនាញផ្នែកប្រព័ន្ធរំលាយអាហារប្រចាំមន្ទីរពេទ្យក្នុងទីក្រុងវូហាន ដែលទទួលព្យាបាលអ្នកឆ្លងមេរោគ COVID-19 បានស្លាប់បាត់បង់ជីវិតដោយសារការឆ្លងមេរោគដ៏សាហាវនេះ កាលពីថ្ងៃអាទិត្យម្សិលមិញ។

អ្នកស្រីវេជ្ជបណ្ឌិត សៀ បានឆ្លងមេរោគ COVID-19 ខណៈធ្វើការនៅក្នុងមន្ទីរពេទ្យ យូនៀន ចៀងពេយ ដោយអ្នកស្រីចាប់ផ្ដើមទទួលការព្យាបាលតាំងពីថ្ងៃទី19 មករា និងត្រូវបានបញ្ជូនទៅព្យាបាលបន្តនៅមន្ទីពេទ្យ ចុងណាន របស់មហាវិទ្យាល័យវូហាននៅថ្ងៃទី7 ខែកុម្ភៈ។

ប៉ុន្តែអាការជំងឺរបស់អ្នកស្រី សៀ បានធ្លាក់ដុនដាបខ្លាំង រហូតដល់បាត់បង់ជីវិតនៅព្រឹកថ្ងៃអាទិត្យទី23 កុម្ភៈម្សិលមិញ ទោះជាក្រុមគ្រូពេទ្យខំព្យាយាមជួយជីវិតអ្នកស្រីយ៉ាងអស់ពីសមត្ថភាពយ៉ាងណាក្ដី។ មន្ទីរពេទ្យ យូនៀន ចៀងពេយ បានសម្ដែងក្ដីអាឡោះអាល័យចំពោះការលាចាកពិភពលោក និងបានសម្ដែងការសោកស្ដាយចំពោះគ្រួសាររបស់អ្នកស្រី សៀ ផងដែរ។

នៅក្នុងថ្ងៃជាមួយគ្នា របាយការណ៍របស់សារព័ត៌មានស៊ីនហួ ក៏បានរាយការណ៍បន្ថែមដែរថា លោកវេជ្ជបណ្ឌិត ទូ សៀនស៊ឹង វ័យ 55ឆ្នាំ បានស្លាប់ដោយសារមេរោគ COVID-19 ដូចគ្នា នៅក្នុងមន្ទីរពេទ្យប្រជាជន ក្នុងទីក្រុង ហៃខូ ទីក្រុងចម្បងរបស់មណ្ឌល ហៃណាន។

លោក ទូ ជាវេជ្ជបណ្ឌិតប្រចាំមន្ទីរពេទ្យ យ៉ាងចៀង ក្នុងស្រុកឆៀងចុង លោកបានទទួលការវិនិច្ឆ័យរោគថា បានឆ្លងមេរោគវីរុស នៅខែមករា ខណៈប្រតិបត្តិភារកិច្ចក្នុងមន្ទីរពេទ្យ មុននឹងត្រូវបញ្ជូនទៅមន្ទីពេទ្យប្រជាជន នៅទីក្រុងហៃខូ ដើម្បីព្យាបាលបន្ត។ តែយ៉ាងណាក្ដី អាការរបស់លោក ទូ បានធ្លាក់ចុះទ្រុឌទ្រោមខ្លាំងនៅថ្ងៃទី26 ខែមករា និងបានស្លាប់នៅថ្ងៃទី23 កុម្ភៈ(ថ្ងៃអាទិត្យមិ្សលមិញ) ទោះបីជាក្រុមវេជ្ជបណ្ឌិតខំព្យាយាមជួយស្រោចស្រង់ជីវិតរបស់លោកយ៉ាងអស់ពីសមត្ថភាពហើយក៏ដោយ។

ទាំងអស់នេះ អង្គភាពសាធារណៈសុខាភិបាលរបស់ចិន បានកំណត់ឱ្យអង្គភាពសាធារណៈសុខាភិបាលក្នុងតំបន់សហការជាមួយអង្គភាពកិច្ចការអតីតយោធា ដើម្បីធ្វើការប្រកាសគុណបំណាច់កិត្តិយសរបស់ធនធានបុគ្គលិកសុខាភិបាលដែលបានពលីជីវិត លើកទឹកចិត្ត និងជួយដល់ក្រុមគ្រួសាររបស់អ្នកស្លាប់៕

ប្រភព៖ សារព័ត៌មានស៊ីនហួ

February 24, 2020

កូរ៉ូណា! វៀតណាមស្នើឱ្យឈប់ចាប់ដៃគ្នានៅពេលស្វាគមន៍ ខណៈអនុសាសន៍ជាច្រើនផ្សេងទៀតត្រូវបានលើកឡើងដើម្បី…

ក្រសួងសុខាភិបាលវៀតណាម កាលពីថ្ងៃទី23កុម្ភៈ បានស្នើឱ្យអ្នករកស៊ី និងអ្នកធ្វើការជាដើម កាត់បន្ថយការចាប់ដៃគ្នាជាមួយអតិថិជននៅពេលស្វាមគន៍ ឬលាគ្នា ហើយពេលជួបភ្ញៀវក៏ត្រូវតែឈរឱ្យឆ្ងាយពីគ្នាប្រហែល1ម៉ែត្រ។

អនុសាសន៍ខាងលើនេះ ត្រូវបានក្រសួងសុខាភិបាលវៀតណាមធ្វើឡើងដើម្បីទប់ស្កាត់ និងប្រឆាំងការរីករាលដាលនៃមេរោគបង្កជំងឺរលាកសួតប្រភេទថ្មី COVID-19។ អនុសាសន៍នេះ សំដៅទៅលើអ្នកធ្វើការ អ្នករកស៊ីទាំងអស់ ពិសេសគឺបុគ្គលិកនៅសណ្ឋាគារ ភោជនីយដ្ឋាន មជ្ឈមណ្ឌលពាណិជ្ជកម្ម និងតំបន់ទេសចរណ៍ជាដើម។

ក្រសួងក៏បានណែនាំឱ្យអ្នកធ្វើការ និងអ្នករកស៊ីទាំងអស់ ត្រូវវាស់កម្ដៅខ្លួន មុនពេលចេញទៅបំពេញភារកិច្ច។ បើសិនក្ដៅខ្លួនខ្លាំង ឬក្អក ថប់ដង្ហើម ត្រូវតែប្រញាប់រាយការណ៍ទៅអ្នកគ្រប់គ្រងបុគ្គលិក និងមន្ត្រីសុខាភិបាល ហើយត្រូវនៅដាច់ដោយឡែកក្នុងផ្ទះ ដើម្បីតាមដានសុខភាព។ ពេលចាំបាច់ អ្នកដែលមានអាការដូចខាងលើនេះ ត្រូវតែប្រញាប់ទៅកាន់មន្ទីរពេទ្យដែលនៅក្បែរបំផុត ដើម្បីពិនិត្យពិគ្រោះយោបល់ និងព្យាបាលឱ្យទាន់ពេលវេលា។ អ្នកដែលត្រូវបានសង្ស័យថាមានផ្ទុកមេរោគ ត្រូវតែនៅក្នុងផ្ទះ និងនៅដាច់ដោយឡែកទៅតាមការស្នើរបស់មន្ត្រីសុខាភិបាល។

អ្នកដែលធ្វើការនៅកន្លែងដែលមានមនុស្សច្រើន ឬត្រូវជួបអតិថិជន ពួកគេត្រូវតែពាក់ម៉ាស់ឱ្យបានត្រឹមត្រូវ និងកាត់បន្ថយការចាប់ដៃឱ្យបានជាអតិបរមា និងឈរ ឬអង្គុយឆ្ងាយពីអតិថិជនឱ្យបាន1ម៉ែត្រ ហើយត្រូវលាងដៃនឹងសាប៊ូ និងទឹកស្អាតឱ្យបានញាប់ញាប់នៅមុនពេលធ្វើការ ក្រោយម៉ោងសម្រាក និងមុន និងក្រោយការទទួលទានអាហារ មុននិងក្រោយការចម្អិនអាហារ ក្រោយពីចូលបន្ទប់ទឹក ក្រោយពីក្អក កណ្ដាស់ ពេលដៃបែកញើស ឬប្រឡាក់អ្វីមួយ និងក្រោយពីនៅក្បែរ ឬចាប់ដៃអ្នកណាម្នាក់។

ពេលកណ្ដាស់ ឬក្អក ត្រូវបិទមាត់ និងច្រមុះដោយប្រើដៃអាវត្រង់សន្លាក់កែងដៃខាងក្នុង ក្រដាស់ជូតមាត់ ឬកន្សែងដៃជាដើម ដើម្បីកាត់បន្ថយការជះកម្ទេចជាតិរាវចេញពីផ្លូវដង្ហើម ហើយត្រូវបោះក្រដាស់នោះចោលទៅក្នុងធុងសម្រាមភ្លាមៗ ឬបោកសម្អាតកន្សែងដៃដែលបានប្រើហើយនោះ និងលាងសម្អាតដៃដើម្បីកម្ចាត់មេរោគ។ ត្រូវចៀសវាងការយកដៃទៅប៉ះមាត់ ច្រមុះ និងភ្នែកដើម្បីកុំឱ្យឆ្លងមេរោគ។ មិនត្រូវប្រើប្រាស់របស់រួមមួយចំនួនដូចជា កែវទឹក ដបទឹក កន្សែងជូតដៃ។ល។ និងមិនត្រូវខាកស្ដោះគ្មានរបៀប។

នៅពេលខ្លួនឯង ឬអ្នករួមការងារ ឬមួយអតិថិជន មានអាការក្ដៅខ្លួន ក្អក ពិបាកដកដង្ហើម អ្នកត្រូវតែរាយការណ៍ទៅកាន់អ្នកគ្រប់គ្រងដើម្បីបានទទួលយោបល់ និងព្យាបាលទាន់ពេលវេលាន។

នៅឯប្រទេសវៀតណាម ក្រុមហ៊ុន និងរោងចក្រជាដើម ក៏ត្រូវបានអាជ្ញាធរស្នើឱ្យផ្ដល់ម៉ាស់ដល់បុគ្គលិកឱ្យបានគ្រប់ៗគ្នាផងដែរ។

គិតមកដល់ពេលនេះ ប្រទេសវៀតណាម មានអ្នកឆ្លងមេរោគសរុបចំនួន16នាក់ ក្នុងនោះមាន14នាក់បានជាសះស្បើយ។ ចំណែកនៅទូទាំងពិភពលោកវិញ មានអ្នកផ្ទុកមេរោគ COVID-19 ចំនួន79,360នាក់ អ្នកស្លាប់មានចំនួន2,619នាក់ និងអ្នកបានជាសះស្បើយមានចំនួន24,963នាក់៕

ប្រភព៖ សារព័ត៌មានបរទេស

February 24, 2020

កូរ៉េខាងត្បូងបង្ខាំងទាហានជិត8,000នាក់ឱ្យនៅដាច់ដោយឡែក ខណៈសមាជិកអង្គការសាសនាជាង9,000នាក់ ត្រូវបានស្នើឱ្យនៅតែក្នុងផ្ទះ

ក្រសួងការពារជាតិកូរ៉េខាងត្បូង កំពុងបង្ខាំងទាហាន7,700នាក់ ក្នុងបន្ទាយ ក្រោយពីបានរកឃើញទាហាន11នាក់មានផ្ទុកមេរោគកូរ៉ូណា COVID-19។

ក្រសួងការពារជាតិកូរ៉េខាងត្បូងព្រឹកនេះ បានបញ្ជាក់ថា ខ្លួនបានរកឃើញទាហាន11នាក់ បានឆ្លងមេរោគកូរ៉ូណា ក្នុងនោះ មាន8នាក់នៅក្នុងជួរកងទ័ពជើងគោក និង3នាក់ទៀតនៅក្នុងជួរកងទ័ពប្រភេទផ្សេង។ តួលេខនេះបានកើនឡើងបន្ថែម4ករណី បើធៀបនឹងថ្ងៃមុនៗ។

ទាហានទាំង4រូបដែលជាអ្នកជំងឺថ្មីនេះ ត្រូវបានគេសង្ស័យថា បានឆ្លងវីរុសដោយសារនៅក្បែរអ្នកជំងឺកូរ៉ូណាក្នុងមន្ទាយ។ កូរ៉េខាងត្បូង បានប្រកាសឱ្យដឹងអំពីទាហានដែលបានឆ្លងមេរោគនេះដំបូងគេកាលពីថ្ងៃទី21កុម្ភៈ។

នៅមុនពេលរកឃើញមានករណីឆ្លងជាបន្តបន្ទាប់ដែលទាក់ទិននឹងក្រុមអ្នកកាន់សាសនាមួយនៅទីក្រុង Daegu និងនៅតាមមន្ទីរពេទ្យនានាក្នុងតំបន់ Cheongdo ដែលនៅក្បែរនោះ ក្រុមមន្ត្រីយោធាកូរ៉េខាងត្បូង បាននិងកំពុងស្រាវជ្រាវស្វែងរកទាហានទាំងឡាយណាដែលធ្លាប់បានទៅកាន់តំបន់មួយចំនួនខាងលើ ឬធ្លាប់បាននៅក្បែរអ្នកជំងឺកូរ៉ូណា។ កងទ័ពកូរ៉េខាងត្បូង បច្ចុប្បន្ន កំពុងបង្ខាំងទាហានប្រមាណជា7,700នាក់ ឱ្យនៅដាច់ដោយឡែកនៅក្នុងបន្ទាយនានារបស់ពួកគេ។

មកដល់ព្រឹកនេះ(24កុម្ភៈ) កូរ៉េខាងត្បូង មានអ្នកផ្ទុកមេរោគកូរ៉ូណា COVID-19 ចំនួន608នាក់ ក្នុងនោះមាន6នាក់បានបាត់បង់ជីវិត។ ក្រុមអ្នកកាន់សាសនានៅវិហារ Shincheonji ក្នុងតំបន់ Daegu ដែលជាទីក្រុងធំបំផុតលំដាប់ទី4របស់កូរ៉េខាងត្បូង បានក្លាយជាទីចាប់អារម្មណ៍ជាងគេក្នុងការរាលដាលនៃជំងឺរលាក សួតប្រភេទថ្មី COVID-19 បន្ទាប់ពីស្ត្រីវ័យ61ឆ្នាំដែលជាសមាជិកនៃវិហារ Shincheonji បានចម្លងមេរោគទៅឱ្យសមាជិករាប់សិបនាក់ផ្សេងទៀត។ សមាជិកប្រមាណជា9,300នាក់នៃក្រុមសាសនាខាងលើនេះ ត្រូវបានអាជ្ញាធរស្នើឱ្យនៅដាច់ដោយឡែកពីគេឯង ឬក៏មិនត្រូវចេញក្រៅផ្ទះ។

ប្រធានាធិបតីកូរ៉េខាងត្បូង លោក Moon Jae-in កាលពីម្សិលមិញ បានប្រកាសអាសន្នកម្រិតខ្ពស់បំផុតចំពោះអាសន្នរោគកូរ៉ូណា COVID-19 ដោយយោងទៅតាមយោបល់របស់ក្រុមអ្នកជំនាញ។ លោកក៏បានស្នើឱ្យមន្ត្រីគ្រប់លំដាប់ថ្នាក់ ប្រើប្រាស់វិធានការខ្លាំងក្លាដែលមិនធ្លាប់មានពីមុនមក ដើម្បីទប់ស្កាត់ការឆ្លងរាលដាលនៃមេរោគដ៏កាចសាហាវនេះ៕

ប្រភព៖ សារព័ត៌មានបរទេស

February 24, 2020

ពលរដ្ឋកូរ៉េខាងត្បូងជាង556នាក់បានឆ្លងមេរោគកូរ៉ូណា COVID-19 គិតមកដល់ល្ងាចនេះ

កូរ៉េខាងត្បូងថ្ងៃនេះបានឱ្យដឹងថា ប្រទេសនេះមានអ្នកឆ្លងមេរោគកូរ៉ូណា COVID-19 បន្ថែម123នាក់ ធ្វើឱ្យអ្នកមានផ្ទុកមេរោគសរុបឡើងដល់556នាក់ ក្នុងនោះមាន4នាក់បានបាត់បង់ជីវិត។

ចំនួនអ្នកឆ្លងវីរុសបានកើនឡើងជាងទ្វេដង គិតត្រឹមតែក្នុងថ្ងៃទី22កុម្ភៈប៉ុណ្ណោះ បើធៀបនឹងប៉ុន្មានថ្ងៃមុន។ អ្នកបានឆ្លងមេរោគនេះ ស្ទើរតែទាំងអស់ មានជាប់ទាក់ទិននឹងវិហារសាសនាមួយដែលមានឈ្មោះថា Shincheonji មានទីតាំងនៅក្នុងតំបន់ Daegu ដែលជាទីក្រុងទំបំផុតលំដាប់ទី4នៅកូរ៉េខាងត្បូង។

កាលពីថ្ងៃទី21កុម្ភៈ រដ្ឋាភិបាលកូរ៉េខាងត្បូងបានប្រកាសថា ទីក្រុង Daegu និងស្រុក Cheongdo គឺជា “តំបន់ដែលត្រូវតាមដានជាពិសេស”។

បច្ចុប្បន្ន អាសន្នរោគកូរ៉ូណា COVID-19 បានបង្ហាញវត្តមាននៅក្នុងប្រទេស និងដែនដីចំនួន33 នៅក្នុងពិភពលោក បន្ទាប់ពីបានផ្ទុះឆ្លងរាលដាលចេញពីទីក្រុង Wuhan ខេត្ត Hubei ប្រទេសចិនកាលពីខែធ្នូ ឆ្នាំ2019។ មកដល់ល្ងាចថ្ងៃទី23កុម្ភៈនេះ មេរោគកូរ៉ូណា បានសម្លាប់មនុស្សសរុបជាង 2,459នាក់ និងបានឆ្លងទៅមនុស្សជាង 78.000នាក់នៅទូទាំងពិភពលោក។ ចំនួនអ្នកស្លាប់នៅខាងក្រៅប្រទេសចិន(ចិនដីគោក) សរុបចំនួន20នាក់ រួមមានប្រទេសជប៉ុន កូរ៉េខាងត្បូង បារាំង ហ្វីលីពីន តៃវ៉ាន់ ហុងកុង អ៊ីរ៉ង់ និងអ៊ីតាលី៕

ប្រភព៖ សារព័ត៌មានបរទេស

February 23, 2020

ល្ងាចនេះកូរ៉េខាងត្បូងរកឃើញអ្នកផ្ទុកមេរោគកូរ៉ូណាថ្មី87នាក់ទៀតហើយ

កូរ៉េខាងត្បូង បានរកឃើញអ្នកមានផ្ទុកមេរោគកូរ៉ូណាថ្មីចំនួន87នាក់ទៀតនៅល្ងាចនេះ នាំឱ្យចំនួនអ្នកផ្ទុកមេរោគរលាកសួតថ្មីនេះឡើងដល់433នាក់។

មជ្ឈមណ្ឌលគ្រប់គ្រង និងទប់ស្កាត់អាសន្នរោគនៃប្រទេសកូរ៉េខាងត្បូង (KCDC) បានប្រកាសកាលពីព្រឹកនេះថា ប្រទេសនេះ មានអ្នកឆ្លងមេរោគកូរ៉ូណា COVID-19 ចំនួន142នាក់។ ការរកឃើញអ្នកមានផ្ទុកមេរោគថ្មីចំនួន87នាក់នៅល្ងាចនេះ បានធ្វើឱ្យចំនួនអ្នកផ្ទុកមេរោគថ្មីសរុបក្នុងថ្ងៃនេះ ឡើងដល់229នាក់។

នៅក្នុងចំណោមករណីឆ្លងថ្មីចំនួន229នាក់ក្នុងថ្ងៃនេះ មាន95ករណី មានជាប់ពាក់ព័ន្ធនឹងមន្ទីរពេទ្យ Daenam នៅក្នុងតំបន់ Cheongdo ខេត្ត Gyeongsang ខាងជើង ដែលជាកន្លែងមានករណីស្លាប់ដំបូងគេបង្អស់ដោយសារវីរុសកូរ៉ូណានៅកូរ៉េខាងត្បូង។ កាលពីម្សិលមិញ អ្នកជំងឺម្នាក់ក៏បានបាត់បង់ជីវិតនៅក្នុងមន្ទីរពេទ្យមួយនៅតំបន់ Busan ក្រោយពីបានបញ្ជូនមកពីមន្ទីរពេទ្យ Daenam។

ក្នុងចំណោមករណីឆ្លងមេរោគថ្មី មានអ្នកជំងឺចំនួន62នាក់ មានជាប់ទាក់ទិននឹងវិហារ Shincheonji។ ស្ត្រីអាយុ61ឆ្នាំម្នាក់ជាសមាជិកនៃវិហារនេះ ត្រូវបានគេជឿថា បានចម្លងមេរោគកូរ៉ូណាទៅអ្នកឯទៀតដែលបានចូលរួមក្នុងពិធីបួងសួងមួយនៅក្នុងវិហារមួយនៅឯ Daegu។

នៅឯមន្ទីរពេទ្យ Daenam មានអ្នកផ្ទុកមេរោគកូរ៉ូណាសរុបចំនួន111នាក់ ដោយរួមមានទាំងបុគ្គលិកសុខាភិបាលចំនួន9នាក់ផងដែរ ក្រៅពីនេះគឺជាអ្នកជំងឺ។ មន្ទីរពេទ្យនេះ ត្រូវបានបិទដើម្បីទប់ស្កាត់ការឆ្លងរាលដាលបន្ត។ ចំនួនអ្នកឆ្លងមេរោគកូរ៉ូណាទាំង231នាក់ សុទ្ធតែជាប់ទាក់ទិននឹងពិធីបួងសួងនៅវិហារ Shincheonji ក្នុងតំបន់ Daegu។ KCDC បានឱ្យដឹងថា ខ្លួនបានស្នើឱ្យសមាជិកចំនួន9,336នាក់នៃវិហារ Shincheonji នេះ ត្រូវតែបង្ខាំងខ្លួននៅដាច់ដោយឡែកពីគេ។ ក្នុងចំណោមនោះ មាន544នាក់ត្រូវបានគេសង្ស័យថាមានផ្ទុកមេរោគកូរ៉ូណា និងកំពុងត្រូវបានធ្វើតេស្តរកមេរោគ។

ក្រុមមន្ត្រីសុខាភិបាលកូរ៉េខាងត្បូង កំពុងស្រាវជ្រាវទៅលើទំនាក់ទំនងរវាងមន្ទីរពេទ្យ Daenam និងវិហារសាសនា Shincheonji ។ កាលពីដើមខែនេះ ពិធីបុណ្យសពបងប្រុសរបស់អ្នកបង្កើនវិហារ Shincheonji ត្រូវបានប្រារព្ធឡើងនៅឯមន្ទីរពេទ្យ Daenam។

កូរ៉េខាងត្បូង បានរកឃើញអ្នកផ្ទុកមេរោគជាច្រើននៅក្នុងខេត្តផ្សេងៗ ដូចជាខេត្ត Jeju ខេត្ត Chungcheong ខេត្ត Jeolla ខាងជើង និងខេត្ត Gyeonggi។ អ្នកផ្ទុកមេរោគ4នាក់ ត្រូវបានរកឃើញនៅក្នុងតំបន់ Busan ជាទីក្រុងធំទី2នៅកូរ៉េខាងត្បូង ដែលមានប្រជាជន3,4លាននាក់កំពុងរស់នៅ។ ក្នុងថ្ងៃនេះ ក្រុមហ៊ុន Samsung Electronics បានឱ្យដឹងថា ខ្លួនបានរកឃើញបុគ្គលិកម្នាក់មានផ្ទុកមេរោគកូរ៉ូណានៅក្នុងរោងចក្រផលិតឧបករណ៍អេឡិចត្រូនិកនៅក្នុងទីក្រុង Gumi ភាគអាគ្នេយ៍កូរ៉េខាងត្បូង។ Samsung គ្រោងនឹងផ្អាកដំណើរការរោងចក្ររបស់ខ្លួនរហូតដល់ព្រឹកថ្ងៃទី24កុម្ភៈ។

អ្នកជំងឺកូរ៉ូណា COVID-19 នៅកូរ៉េខាងត្បូងស្ទើរតែទាំងអស់ នៅមានសុខភាពល្អនៅឡើយ ប៉ុន្តែ អ្នកជំងឺប្រហែល9នាក់ ហាក់មានសភាពធ្ងន់ធ្ងរគួរឱ្យព្រួយបារម្ភ។ ចំណែកអ្នកជំងឺ 18នាក់ បានជាសះស្បើយពីជំងឺ។

គិតមកដល់ម៉ោង10យប់នេះ នៅទូទាំងពិភពលោក មានអ្នកស្លាប់ដោយសារមេរោគកូរ៉ូណា ឡើងដល់ 2,361នាក់ និងអ្នកមានផ្ទុកមេរោគនេះ ឡើងដល់ 77,918នាក់៕

ប្រភព៖ សារព័ត៌មានបរទេស

February 22, 2020

រដ្ឋមន្ត្រីអ៊ុយក្រែន ស្ម័គ្រចិត្តចូលរស់នៅជាមួយជនភៀសខ្លួនមកពីអ៊ូហាន ខណៈមានការតវ៉ាពីពលរដ្ឋក្នុងតំបន់

រដ្ឋមន្ត្រីក្រសួងសុខាភិបាលអ៊ុយក្រែន Zoryana Skaletska បានប្រកាសថា លោកស្រីនឹងចំណាយពេល2សប្ដាហ៍ ចូលទៅរស់នៅក្នុងតំបន់ដាក់ឱ្យនៅដាច់ដោយឡែក ជាមួយនឹងអ្នកដែលបានជម្លៀសមកពី “សម្បុកមេរោគកូរ៉ូណា” អ៊ូហាន នៃខេត្តហ៊ូប៉ី ប្រទេសចិន។

ទីភ្នាក់ងារសារព័ត៌មាន AFP បានរាយការណ៍ថា លោកស្រី Zoryana Skaletska បានចេញសេចក្ដីប្រកាសខាងលើ បន្ទាប់ពីបាតុករអ៊ុយក្រែនបានប៉ះទង្គិចជាមួយក្រុមនគរបាល ដោយក្រុមបាតុករបានគប់ដុំថ្មទៅលើរថយន្តដឹកពលរដ្ឋដែលត្រូវបានជម្លៀសចេញពីទីក្រុងអ៊ូហាន ត្រឡប់មកប្រទេសវិញ។

ប្រទេសអ៊ុយក្រែន កាលពីថ្ងៃទី 20កុម្ភៈកន្លងទៅ បាននាំពលរដ្ឋចំនួន45នាក់នៃប្រទេសនេះ និងជនបរទេស37នាក់ ដែលភាគច្រើនគឺជាជនជាតិអាមេរិកខាងត្បូង មកពីទីក្រុងអ៊ូហាន ទៅស្រុក Novi Sanzhary ក្នុងតំបន់ Poltava ដើម្បីធ្វើការដាក់ឱ្យនៅដាច់ដោយឡែកក្នុងរយៈពេល14ថ្ងៃ។ ក៏ប៉ុន្តែ ប្រជាពលរដ្ឋក្នុងតំបន់នេះ មិនយល់ស្របជាមួយនឹងវិធានការរបស់រដ្ឋាភិបាល ហើយពួកគេក៏បានស្កាត់ផ្លូវ និងគប់ដុំថ្មទៅលើរថយន្តដឹកជនភៀសខ្លួនទាំងនោះ។ ក្នុងហេតុការណ៍នោះ យ៉ាងហោចណាស់មានរថយន្ត3គ្រឿងត្រូវរងការខួចខាត ដោយសារតែបាតុករ។

នៅក្នុងសេចក្ដីប្រកាសមួយដែលបានផ្ញើទៅកាន់ពលរដ្ឋ លោកស្រី Skaletska បាននិយាយថា “ខ្ញុំនឹងចំណាយពេល14ថ្ងៃ ដើម្បីទៅរស់នៅជាមួយពួកគេ នៅក្នុងតំបន់តែមួយ និងក្នុងស្ថានភាពតែមួយ”។

លោកស្រីសរសេរនៅលើ Facebook ថា “ពួកគេទាំងនោះគឺជាអ្នកស្រុករបស់យើង។ យើងរស់នៅក្នុងប្រទេសតែមួយ និងត្រូវតែថែរក្សាសុខភាព និងសុវត្ថិភាពរបស់ពួកគេ”។

ក្រុមមន្ត្រី៊អ៊ុយក្រែន រួមទាំងប្រធានាធិបតី Volodymyr Zelensky បានអំពាវនាវឱ្យពលរដ្ឋបន្ធូរបន្ថយភាពតានតឹង ប៉ុន្តែ អ្នកស្រុកបាននិយាយថា ពួកគេមានការព្រួយបារម្ភអំពីការឆ្លងរាលដាលនៃវីរុសកូរ៉ូណា។

រដ្ឋមន្ត្រីក្រសួងមហាផ្ទៃអ៊ុយក្រែន Arsen Avakov ក៏បានទៅកាន់កន្លែងកើតហេតុ។ ចំណែកនាយករដ្ឋមន្ត្រី Oleksiy Goncharuk កាលពីថ្ងៃទី20 ក៏បានទៅកាន់តំបន់ Novi Sanzhary ផងដែរ។

លោកប្រធានាធិបតីអ៊ុយក្រែន Zelensky បានអំពាវនាវឱ្យពលរដ្ឋបង្ហាញអំពីសាមគ្គីភាព និងត្រូវចងចាំថា “យើងគឺសុទ្ធតែជាមនុស្ស”។

អាជ្ញាធរអ៊ុយក្រែន បានបង្កើនការការពារសន្តិសុខនៅក្នុងតំបន់ដែលមានពលរដ្ឋ10,000នាក់កំពុងរស់នៅនេះ ដោយការដាក់ពង្រាយរថយន្តពាសដែកជាច្រើនគ្រឿង រួមនឹងកងកម្លាំងប្រដាប់អាវុធរាប់រយនាក់។

បច្ចុប្បន្ន ប្រទេសអ៊ុយក្រែន មិនទាន់មានករណីឆ្លងវីរុសកូរ៉ូណា COVID-19 ណាមួយនៅឡើយ។ អាសន្នរោគនេះ បានសម្លាប់មនុស្សយ៉ាងតិច2,252 និងអ្នកបានឆ្លងមេរោគនេះកើនឡើងដល់ 76,844នាក់ នៅទូទាំងពិភពលោក៕

ប្រភព៖ សារព័ត៌មានបរទេស

February 22, 2020

រកឃើញ “សម្បុកមេរោគ” កូរ៉ូណាទី2 នៅឯមន្ទីរពេទ្យមួយ ក្នុងប្រទេសកូរ៉េខាងត្បូង

មន្ទីរពេទ្យមួយនៅក្នុងតំបន់ Cheongdo នៃប្រទេសកូរ៉េខាងត្បូង អាចជាសម្បុកមេរោគកូរ៉ូណាទី2 នៅកូរ៉េខាងត្បូង ក្រោយពីបានរកឃើញអ្នកជំងឺសរុប15នាក់ មានផ្ទុកមេរោគបង្ករលាកសួតប្រភេទថ្មី COVID-19 នៅទីនេះ ក្នុងនោះមានអ្នកជំងឺម្នាក់បានបាត់បង់ជីវិត។

ទីភ្នាក់ងារសារព័ត៌មាន AFP បានរាយការណ៍ថា អ្នកជំងឺដែលបានស្លាប់នោះ មានអាយុប្រហែល60ឆ្នាំ ធ្លាប់បានទទួលការព្យាបាលនៅឯមន្ទីរពេទ្យ Cheongdo Daenam ខេត្ត Gyeongsang ខាងជើង អស់រយៈពេលយ៉ាងយូរ។ អ្នកជំងឺនេះ ទើបតែបានស្លាប់កាលពីថ្ងៃទី19កុម្ភៈកន្លងទៅ។

“យើងស្នើឱ្យអ្នកជំងឺដែលធ្លាប់បានមកព្យាបាលនៅឯមន្ទីរពេទ្យ (Cheongdo Daenam)នេះ នាពេលថ្មីៗនេះ ត្រូវតែនៅដាច់ដោយឡែកពីគេឯង” នេះជាការណែនាំរបស់ Jung Eun-kyeong ដែលជាប្រធានមជ្ឈមណ្ឌលទប់ស្កាត់ និងគ្រប់គ្រងអាសន្នរោគរបស់កូរ៉េខាងត្បូង (KCDC)។

ក្នុងថ្ងៃទី20កុម្ភៈ ចំនួនអ្នកបានឆ្លងមេរោគកូរ៉ូណា COVID-19 នៅកូរ៉េខាងត្បូង បានកើន53ករណី ដែលតួលេខនេះកើនឡើងខ្ពស់មិនធ្លាប់មានពីមុនមក ធ្វើឱ្យចំនួនអ្នកឆ្លងមេរោគកូរ៉ូណាសរុបនៅប្រទេសនេះឡើងដល់104នាក់ ក្នុងនោះ នៅឯមន្ទីរពេទ្យ Cheongdo មានអ្នកឆ្លងមេរោគ13នាក់បន្ថែមទៀត បន្ទាប់ពីរកឃើញអ្នកផ្ទុកមេរោគ2នាក់មុននោះមួយថ្ងៃ។

អ្នកជំងឺដំបូង2នាក់ដែលមានផ្ទុកវីរុសកូរ៉ូណានៅឯមន្ទីរពេទ្យ Cheongdo Daenam ដំបូងឡើយត្រូវបានឱ្យសម្រាកព្យាបាលនៅឯមន្ទីរឯកទេសផ្នែកសរសៃប្រសាទរយៈពេល1ខែពេញ។ បញ្ហានេះបានធ្វើឱ្យមានការសង្ស័យថា អ្នកជំងឺនេះប្រហែលជាបានចម្លងមេរោគទៅកាន់អ្នកជំងឺដទៃជាច្រើននាក់ទៀត នៅក្នុងមន្ទីរពេទ្យខាងលើនេះដែរ។

ក្រុមមន្ត្រីសុខាភិបាលកូរ៉េខាងត្បូង កំពុងស្វែងយល់អំពីទំនាក់ទំនងរវាងអ្នកដែលបានឆ្លងមេរោគនៅឯមន្ទីរពេទ្យ Cheongdo Daenam ជាមួយនឹងករណីឆ្លងវីរុសនៅឯទីក្រុង Daegu ។

នៅក្នុងទីក្រុង Daegu ស្ត្រីមានអាយុ61ឆ្នាំម្នាក់ដែលត្រូវបានគេជឿថាបានចម្លងមេរោគ COVID-19 ទៅឱ្យមនុស្សយ៉ាងតិច37នាក់ នៅក្នុងពិធីបួងសួងមួយក្នុងវិហារ Shincheonji។ ស្ត្រីរូបនេះ ទៅកាន់មន្ទីរពេទ្យ Cheongdo Daenam កាលពីដើមខែនេះ។ ប្រភពព័ត៌មានក្នុងស្រុក បានឱ្យដឹងថា ក្រុមមនុស្សដែលបានចូលរួមក្នុងពិធីបួងសួងខាងលើ ក៏ធ្លាប់បានទៅកាន់មន្ទីរពេទ្យ Cheongdo Daenam ជាញឹកញាប់ផងដែរដើម្បីធ្វើជាអ្នកស្ម័គ្រចិត្តសម្រាប់កិច្ចការមនុស្សធម៌មួយចំនួន។

តួលេខនៃករណីឆ្លងមេរោគកូរ៉ូណា COVID-19 នៅកូរ៉េខាងត្បូង បានកើនឡើងខ្លាំងនៅក្នុងរយៈពេលប៉ុន្មានថ្ងៃចុងក្រោយនេះ ក្នុងនោះភាគច្រើនគឺនៅក្នុងទីក្រុង Daegu។ បច្ចុប្បន្ន កូរ៉េខាងត្បូង បានក្លាយជាប្រទេសដែលមានអ្នកជំងឺកូរ៉ូណា COVID-19 ច្រើនជាងគេបង្អស់លំដាប់ទី3នៅក្នុងពិភពលោក បន្ទាប់ពីប្រទេសចិន និងប្រទេសជប៉ុន៕

ប្រភព៖ សារព័ត៌មានបរទេស

February 21, 2020

ពលរដ្ឋ2,5លាននាក់នៅកូរ៉េខាងត្បូង បង្ខំចិត្តបង្ខាំងខ្លួនក្នុងផ្ទះ ព្រោះមេរោគកូរ៉ូណា

ចំនួនអ្នកបានឆ្លងវីរុសកូរ៉ូណា COVID-19 បានកើនឡើងខ្លាំង ធ្វើឱ្យប្រជាជននៅក្នុងទីក្រុង Daegu របស់ប្រទេសកូរ៉េខាងត្បូងមានការភ័យខ្លាចចំពោះការចាប់ផ្ដើមរាតត្បាតនៃអាសន្នរោគនេះ។ ពលរដ្ឋប្រមាណជា2,5លាននាក់នៅក្នុងទីក្រុងនេះ ត្រូវបានស្នើឱ្យនៅតែក្នុងផ្ទះ។

ប៉ុន្មានថ្ងៃកន្លងមកនេះ តួលេខនៃករណីឆ្លងមេរោគកូរ៉ូណា នៅកូរ៉េខាងត្បូង បានចាប់ផ្ដើមកើនឡើងយ៉ាងលឿន ក្នុងនោះកាលពីម្សិលមិញ(20កុម្ភៈ) វាបានកើនឡើងទ្វេដង បើធៀបនឹងប៉ុន្មានថ្ងៃមុន ដោយពេលនេះអ្នកផ្ទុកមេរោគដែលត្រូវបានគេរកឃើញ មានចំនួន104ករណី ក្នុងនោះភាគច្រើនគឺនៅក្នុងទីក្រុង Daegu ដែលជាទីក្រុងធំបំផុតទី4របស់កូរ៉េខាងត្បូង ដោយមានប្រជាជនសរុប2,5លាននាក់។ កាលពីម្សិលមិញនេះដែរ ប្រទេសនេះក៏មានអ្នកស្លាប់ដំបូងដោយសារវីរុសកូរ៉ូណា។ ករណីនេះកាន់តែធ្វើឱ្យមានការព្រួយបារម្ភខ្លាំងក្នុងស្រទាប់ប្រជាជន ខណៈដែលនៅទូទាំងពិភពលោក អាសន្នរោគកូរ៉ូណា COVID-19 បានសម្លាប់មនុស្ស 2,247នាក់់់់់ និងបានឆ្លងទៅមនុស្ស76,295នាក់។

អភិបាលក្រុង Daegu លោក Kwon Young-jin បានស្នើពលរដ្ឋទាំងអស់ឱ្យនៅតែក្នុងផ្ទះ បន្ទាប់ពីអ្នកដែលធ្លាប់បានចូលរួមក្នុងពិធីបុណ្យនៅឯវិហារ Shincheonji មានរោគសញ្ញានៃជំងឺរលាកសួតថ្មី COVID-19 ខណៈមនុស្សរាប់សិបនាក់ផ្សេងទៀត ត្រូវបានគេពិនិត្យឃើញថា មានផ្ទុកមេរោគនេះ។

ប៉ុន្មានថ្ងៃមុននេះ ស្ត្រីអាយុ61ឆ្នាំម្នាក់ ដែលត្រូវបានគេរកឃើញថា មានផ្ទុកមេរោគកូរ៉ូណា COVID-19 ធ្លាប់បានចូលរួមក្នុងពិធីបុណ្យនៅឯវិហារ Shincheonji នោះដែរ ហើយត្រូវគេអះអាងថា បានចម្លងទៅមនុស្សយ៉ាងតិច37នាក់។

“យើងកំពុងប្រឈមនឹងវិបត្តិមួយដែលមិនធ្លាប់មានពីមុនមក។ យើងមានគម្រោងនឹងធ្វើតេស្តរកមេរោគចំពោះអ្នកទាំងឡាយណាដែលបានចូលរួមក្នុងពិធីបួងសួងនៅឯវិហារ Shincheonji។ យើងបានស្នើឱ្យពួកគេនៅក្នុងផ្ទះ និងមិនត្រូវនៅក្បែរសមាជិកផ្សេងៗក្នុងគ្រួសារ” នេះជាសម្ដីរបស់អភិបាលក្រុង Daegu លោក Kwon Young-jin។

ទីក្រុង “ស្ងាត់ជ្រងំ”

ដងផ្លូវនានាក្នុងទីក្រុង Daegu ស្ទើរតែក្លាយទៅជាទីក្រុងខ្មោច ព្រោះមិនមានមនុស្សធ្វើដំណើរដូចមុន បន្ទាប់ពីមនុស្សរាប់សិបនាក់នៅក្នុងទីក្រុងនេះ បានឆ្លងមេរោគកូរ៉ូណា។ មជ្ឈមណ្ឌលពាណិជ្ជកម្ម រោងភាពយន្ត ភោជនីយដ្ឋានជាដើម ក៏ស្រាប់តែលែងមានមនុស្សដូចសព្វមួយដង។ នេះបើតាមការចេញផ្សាយរបស់ Reuters។

បុរសវ័យ28ឆ្នាំម្នាក់ មានឈ្មោះថា Kim Geun-woo បានប្រាប់អ្នកយកព័ត៌មាន Reuters ថា៖ “មានអារម្មណ៍ថា ដូចជាមានអ្នកណាម្នាក់ទម្លាក់គ្រាប់បែបចំកណ្ដាលទីក្រុង។ ស្ថានភាពដូចជាកំពុងស្ថិតនៅក្នុងថ្ងៃភ្លើងឆេះកាល្បដូច្នោះដែរ”។

អាជ្ញាធរទីក្រុង Daegu បានស្នើឱ្យបិទទ្វារមជ្ឈមណ្ឌលថែរក្សាកុមារទាំងអស់ ខណៈដែលសាលារៀន ត្រូវលើកពេលចូលរៀនទៅអាទិត្យក្រោយ ដែលនេះជាប្រការមិនធ្លាប់មានពីមុនមក។ ក្រសួងការពារជាតិកូរ៉េខាងត្បូងក៏បានហាមមិនឱ្យទាហាននៅក្នុងតំបន់ Daegu ចាកចេញពីបន្ទាយ ឬទទួលភ្ញៀវ ក្រោយពីមានទាហានម្នាក់ ថ្មីៗនេះ បានទៅលេងផ្ទះនៅឯទីក្រុង Daegu ហើយបានឆ្លងមេរោគកូរ៉ូណា។ មូលដ្ឋានទ័ពសហរដ្ឋអាមេរិកនៅក្នុងតំបន់នេះក៏បានអនុវត្តវិធានការដូចគ្នានេះដែរ។

អនុរដ្ឋមន្ត្រីក្រសួងសុខាភិបាលកូរ៉េខាងត្បូង Kim Kang-lip ក្នុងសន្និសីទកាសែតមួយកាលពីម្សិលមិញបាននិយាយថា ស្ថានការណ៍អាសន្នរោគនៅប្រទេសនេះ “ពិតជាគួរឱ្យព្រួយបារម្ភមែន”៕

ប្រភព៖ សារព័ត៌មានបរទេស

February 21, 2020

Tag: covid-19