covid-19 - La Reine Media

បណ្ដាប្រទេស និងតំបន់ដែលបានប្រកាសបិទច្រកព្រំដែន និងហាមជនបរទេសចូលទឹកដីខ្លួន

កាណាដា បារាំង រុស្ស៊ី រួមនឹងប្រទេសជាច្រើនទៀត បានចេញបញ្ជា ហាមមិនឱ្យជនបរទេសចូលមកកាន់ទឹកដីរបស់ខ្លួន ដើម្បីទប់ទល់នឹងការឆ្លងរាលដាលនៃវីរុស COVID-19។

“យើងនឹងមិនអនុញ្ញាឱ្យជនបរទេសទាំងឡាយណាដែលមិនមែនជាពលរដ្ឋកាណាដា ឬពលរដ្ឋអាមេរិកាំង” នេះជាការប្រកាសរបស់នាយករដ្ឋមន្រីកាណាដា លោក Justin Trudeau ដែលត្រូវបានធ្វើឡើងកាលពីថ្ងៃទី16មីនា។

នាយករដ្ឋមន្ត្រីកាណដា ក៏បានអំពាវនាវឱ្យពលរដ្ឋទាំងអស់ នៅតែក្នុងផ្ទះ និងកាត់បន្ថយទំនាក់ទំនងផ្ទាល់ជាមួយមនុស្សនៅជុំវិញខ្លួន។ លោកថ្លែងថា “នៅក្នុងផ្ទះ គឺជាវិធានការសំខាន់បំផុតដើម្បីការពារមនុស្សនៅជុំវិញ និងខ្លួនយើងផ្ទាល់។ យើងទាំងអស់គ្នា ត្រូវតែធ្វើដូច្នេះ”។ បច្ចុប្បន្ន នាយករដ្ឋមន្ត្រីកាណដា លោក Trudeau កំពុងបង្ខាំងខ្លួនឯងនៅឯផ្ទះ បន្ទាប់ពីភរិយារបស់លោក ត្រូវបានរកឃើញថា មានផ្ទុកមេរោគ COVID-19។

ហេតុអ្វីបានជាកាណាដា មិនហាមពលរដ្ឋអាមេរិកាំង ចូលមកទឹកដីកាណដា? លោកនាយករដ្ឋមន្ត្រី Trudeau អះអាងថា នេះគឺដោយសារទំនាក់ទំនងទ្វេភាគីរវាងប្រទេសទាំង2 មានភាពល្អប្រសើរ។ ប៉ុន្តែ លោក Trudeau ក៏បានទុកលទ្ធភាពផ្សេងទៀតក្នុងការចាត់វិធានការបន្ថែម ដើម្បីគ្រប់គ្រងព្រំដែន នាពេលខាងមុខ។

ប្រធានាធិបតី Emmanuel Macron កាលពីម្សិលមិញ បានប្រកាសថា បារាំងនឹងបិទច្រកព្រំដែនចាប់ពីថ្ងៃទី17មីនា ដើម្បីគ្រប់គ្រងស្ថានការណ៍ COVID-19។ លោក Emmanuel Macron ក៏បានចេញបញ្ជា ហាមមិនឱ្យមានការជួបជុំនានា នៅទូទាំងប្រទេសផងដែរ ដោយរួមទាំងការជួបជុំលក្ខណគ្រួសារ។

នាយករដ្ឋមន្ត្រីរុស្ស៊ី លោក Mikhail Mishustin ក៏បានចេញបញ្ជា ហាមមិនឱ្យជនបរទេសចូលមកក្នុងទឹកដីប្រទេសនេះ ចាប់ពីថ្ងៃទី17មីនា ដល់ថ្ងៃទី1ឧសភា ឆ្នាំ2020។ វិធានការនេះ មិនអនុវត្តទៅលើបុគ្គលិកការទូតនៃប្រទេសនានាប្រចាំនៅរុស្ស៊ី អ្នកធ្វើការក្នុងវិស័យដឹកជញ្ជូន អាកាសចរណ៍ និងប្រតិភូបរទេសដែលមកធ្វើទស្សនកិច្ចនៅប្រទេសរុស្ស៊ីនោះទេ។

ពលរដ្ឋវេណេស៊ុយអេឡា ព្យាយាមចូលក្នុងប្រទេសកូឡុំប៊ី ខណៈដែលមេរោគ COVID-19 កំពុងឆ្លងរាលដាលខ្លាំង

រដ្ឋមន្ត្រីក្រសួងមហាផ្ទៃរបស់ប្រទេសអេស្ប៉ាញ លោក Fernando Grande-Marlaska បានប្រកាសថា ប្រទេសនេះនឹងរឹតបន្តឹងការគ្រប់គ្រងព្រំដែន ចាប់ពីថ្ងៃទី17មីនា លើកលែងតែពលរដ្ឋរបស់ខ្លួន អ្នកធ្វើការតាមបណ្ដោយព្រំដែន អ្នកការទូត និងអ្នកដែលមានមូលហេតុចាំបាច់បំផុតតែប៉ុណ្ណោះ។

ក្នុងតំបន់អាស៊ីអាគ្នេយ៍វិញ ប្រទេសម៉ាឡេស៊ី បានបិទព្រំដែនទាំងស្រុង ដោយមិនឱ្យពលរដ្ឋធ្វើដំណើរទៅក្រៅប្រទេស និងហាមជនបរទេសមិនឱ្យចូលស្រុក បន្ទាប់ពីបានរកឃើញអ្នកផ្ទុកមេរោគចំនួន 566នាក់។ ប្រទេសនេះ បានក្លាយជាសម្បុកមេរោគ COVID-19 ធំជាងគេនៅក្នុងតំបន់។

ក្រៅពីនេះ បណ្ដាប្រទេស ដូចជា អាហ្សង់ទីន កូឡុំប៊ី ឈីលី ហ្គាតេម៉ាឡា ទុយនីស៊ី និងស៊ូដង់ ក៏បាននាំគ្នាបិទព្រំដែនគោកផងដែរ។ នេះបើតាមសារព័ត៌មាន Reuters។

សហភាពអឺរ៉ុប ថ្មីៗនេះ ក៏បានចាត់វិធានការដូចខាងលើផងដែរ។ ប្រធានសហភាពអឺរ៉ុប បានចេញសេចក្តីប្រកាសមួយ ដោយស្នើឱ្យបិទការចូលប្រទេសជាសមាជិកសហភាពអឺរ៉ុបរយៈពេល30ថ្ងៃ ដើម្បីទប់ស្កាត់មេរោគ COVID-19។ ការស្នើនេះនឹងត្រូវពិនិត្យ និងអនុម័តដោយក្រុមមេដឹកនាំសហភាពអឺរ៉ុប៕

ប្រភព៖ សារព័ត៌មានបរទេស

March 17, 2020

សហរដ្ឋអាមេរិក ផ្ដើមពិសោធវ៉ាក់សាំង COVID-19 នៅលើមនុស្ស ចាប់ពីថ្ងៃនេះហើយ

ការពិសោធថ្នាំវ៉ាក់សាំងនៅលើមនុស្ស ដែលត្រូវធ្វើឡើងចាប់ពីថ្ងៃទី16មីនា នៅឯសហរដ្ឋអាមេរិក គឺដើម្បីវាយតម្លៃទៅលើប្រភេទវ៉ាក់សាំងសម្រាប់ការពារមនុស្សពីការឆ្លងមេរោគកូរ៉ូណា COVID-19 មុននឹងសម្រេចឱ្យប្រើជាទូទៅ។

ការពិសោធដែលទទួលបានជំនួយពីវិទ្យាស្ថានសុខាភិបាលជាតិ National Institutes of Health ដែលហៅកាត់ថា NIH នឹងត្រូវធ្វើឡើងក្នុងវិទ្យាស្ថានស្រាវជ្រាវសុខាភិបាល Kaiser Permanente Washington នៅក្នុងទីក្រុង Seattle។ អ្នកដែលបានស្ម័គ្រចិត្តចូលរួមក្នុងការពិសោធនេះ នឹងត្រូវបានចាក់វ៉ាក់សាំងនៅក្នុងថ្ងៃទី16មីនានេះហើយ។

សារព័ត៌មាន AP ដកស្រង់សម្ដីរបស់មន្ត្រីសុខាភិបាលអាមេរិកាំងម្នាក់ ឱ្យដឹងថា អ្នកវិទ្យាសាស្ត្រនឹងត្រូវចំណាយពេល18ខែ ទើបអាចវាយតម្លៃជាស្ថាពរទៅលើឥទ្ធិពលរបស់វ៉ាក់សាំងនេះ។ អ្នកស្ម័គ្រចិត្តចំនួន45នាក់ ដែលជាមនុស្សមានសុខភាពល្អ រាងកាយមាំមួន និងនៅក្មេង នឹងត្រូវបានចាក់វ៉ាក់សាំងក្នុងបរិមាណខុសៗគ្នា។ វ៉ាក់សាំងដែលត្រូវបានយកមកពិសោធនេះ ត្រូវបានបង្កើតឡើងដោយ NIH និងក្រុមហ៊ុនជីវបច្ចេកវិទ្យា Monderna Inc ដែលមានទីស្នាក់ការកណ្ដាលនៅក្នុងរដ្ឋ Massachusetts។ ក្រុមអ្នកជំនាញនឹងវាយតម្លៃទៅលើឥទ្ធិពលរបស់វ៉ាក់សាំង ក្នុងការការពារមនុស្សពីវីរុស COVID-19 ព្រមទាំងស្វែងយល់ឱ្យដឹងច្បាស់ថា តើវាបង្កផលប៉ះពាល់អាក្រក់ដែរ ឬអត់ ទៅលើសុខភាពមនុស្ស។

បន្ទាប់ពីវីរុសកូរ៉ូណា COVID-19 បានឆ្លងរាលដាល នៅលើពិភពលោក មានក្រុមហ៊ុនផលិតឱសថរាប់សិបក្រុមហ៊ុន បានចាប់ផ្ដើមស្រាវជ្រាវផលិតវ៉ាក់សាំងប្រឆាំងមេរោគនេះ។ នៅសហរដ្ឋអាមេរិក ក្រុមហ៊ុន Inovio ក៏មានគម្រោងពិសោធវ៉ាក់សាំងមួយប្រភេទនៅខែក្រោយនេះដែរ។ កិច្ចខិតខំប្រឹងប្រែងដូចគ្នានេះ ក៏កំពុងត្រូវបានធ្វើឡើងនៅឯប្រទេសចិន កូរ៉េខាងត្បូង និងបណ្ដាប្រទេសធំៗមួយចំនួនទៀត៕

ប្រភព៖ សារព័ត៌មានបរទេស

March 16, 2020

ទីនេះសហរដ្ឋអាមេរិក…ប្រជាជនអាមេរិកនាំគ្នាតម្រង់ជួរ ចាំទិញកាំភ្លើងត្រៀមទប់ទល់ស្ថានការណ៍វីរុសមរណៈ

ខណៈដែលមនុស្សម្នាទូទាំងពិភពលោកកំពុងនាំគ្នាប្រមូលទិញក្រដាសអនាម័យ និងចំណីអាហារស្តុកទុក ក្រោមការភ័យខ្លាចមេរោគវីរុសCOVID-19 ដែលកំពុងឆ្លងរាលដាលខ្លាំងនេះ ជនជាតិអាមេរិកាំងមួយចំនួន បែរជានាំគ្នាទៅតម្រង់ជួរចាំទិញកាំភ្លើងទៅវិញ។

នៅលើបណ្ដាញសង្គមអនឡាញ មានរូបភាព និងឃ្លីបវីដេអូដែលបង្ហាញពីជនជាតិអាមេរិកបានទៅឈរតម្រង់ជួរបន្តកន្ទុយគ្នានៅខាងមុខហាងលក់កាំភ្លើង ដូចជាឃ្លីបដែលអ្នកស្រី អេមីលៀ អាដាមស៍ អ្នកយកព័ត៌មានរបស់ Nine News បាននាំយកមកធ្វីតខាងក្រោមនេះ ជារូបភាពដែលអតិថិជនកំពុងឈរបន្តគ្នាលើចិញ្ចើមថ្នល់ ដើម្បីរង់ចាំចូលហាងលក់កាំភ្លើងក្នុងទីក្រុងឡូសអ៊ែនជើលេស ប្រវែងជាង 10ម៉ែត្រពីមាត់ទ្វារចូលហាង។
អ្នកស្រី អេមីលៀ បានសរសេរថា អ្នកឈរតម្រង់ជួរទាំងនោះបានប្រាប់អ្នកស្រីថា ពួកគេភ័យខ្លាចចំពោះអ្វីដែលនឹងកើតឡើង បើសិនជាអាហារ និងវត្ថុចាំបាច់ផ្សេងៗមានការខ្វះខាត ឬលែងមានលក់ ទើបពួកគេត្រូវត្រៀមការពារក្រុមគ្រួសាររបស់ពួកគេជាមុន។

អ្នកប្រើធ្វីតធើរម្នាក់ទៀត បានស៊ែរឃ្លីបបង្ហាញពីទិដ្ឋភាពខាងក្នុងហាងមួយកន្លែង ដែលគេដឹងថា នៅក្នុងរដ្ឋកាលីហ្វ័រនៀដូចគ្នា ដែលមានអតិថិជនជាង 20នាក់កំពុងចោមរោមទិញគ្រាប់កាំភ្លើង។

ទូរទស្សន៍ CBSN បានរាយការណ៍ថា ចំនួនលក់កាំភ្លើងនៅតំបន់សាន ហ្គាប្រៀល វ៉ាលលេយ៍ ក្នុងរដ្ឋកាលីហ្វ័រនៀ បានកើនឡើងយ៉ាងខ្លាំង និងតាមរយៈការសម្ភាសជនជាតិអាមេរិកាំងសែស្រឡាយអាស៊ីជាច្រើននាក់ បានឱ្យដឹងថា ពួកគេកំពុងមានការភ័យខ្លាចថា ពួកគេអាចនឹងក្លាយជាមុខសញ្ញានៃការស្អប់ខ្ពើមខាងជាតិសាសន៍ ខណៈវីរុសកំពុងឆ្លងរាតត្បាតខ្លាំងបែបនេះ៕

ប្រភព៖ សារព័ត៌មានបរទេស

March 16, 2020

វៀតណាមនឹងផលិតម៉ាស់ 30លានបន្ទះ ក្នុងរយៈពេល3ខែ បន្ទាប់ពីចាប់បានករណីប្រមូលទិញម៉ាស់មួយទឹករាប់តោន ដែលត្រៀមបញ្ចេញលក់ក្នុងទីផ្សារ

ចាប់ពីថ្ងៃនេះ (16មីនា ឆ្នាំ2020) វៀតណាមនឹងចាប់បង្ខំឱ្យពលរដ្ឋរបស់ខ្លួន ពាក់ម៉ាស់នៅក្នុងផ្សារទំនើប ព្រលានយន្តហោះ ស្ថានីយរថភ្លើង ចំណតរថយន្ត និងនៅលើមធ្យោបាយធ្វើដំណើរសាធារណៈ។ល។ បណ្ដាក្រុមហ៊ុនផលិតម៉ាស់ក្នុងស្រុក ក៏បានត្រៀមខ្លួនរួចរាល់ ដើម្បីផ្គត់ផ្គង់តាមតម្រូវការរបស់អ្នកប្រើប្រាស់ នៅក្នុង “សង្គ្រាម” ប្រឆាំងនឹងមេរោគ COVID-19។

អនុរដ្ឋមន្ត្រីក្រសួងសុខាភិបាលវៀតណាម លោក Truong Quoc Cuong កំពុងពិនិត្យការផលិតម៉ាស់នៅក្នុងរោងចក្រមួយកន្លែងនៅវៀតណាម

នៅក្នុងកិច្ចប្រជុំមួយស្ដីអំពីការទប់ស្កាត់ និងប្រយុទ្ធប្រឆាំងជំងឺ COVID-19 នាយករដ្ឋមន្ត្រីវៀតណាម លោក Nguyen Xuan Phuc បានចេញបញ្ជាឱ្យមានការអនុវត្តវិធានការពាក់ម៉ាស់នៅតាមទីសាធារណៈ ឱ្យបានតឹងរ៉ឹងបំផុត។ នាយករដ្ឋមន្ត្រីរូបនេះ ក៏បានស្នើឱ្យក្រសួងពាក់ព័ន្ធ គ្រប់គ្រងស្ថានការណ៍ផលិតម៉ាស់ឱ្យបានគ្រប់គ្រាន់តាមតម្រូវការ និងមានគុណភាព។

អនុរដ្ឋមន្ត្រីក្រសួងសុខាភិបាលវៀតណាម លោក Truong Quoc Cuong បានឱ្យដឹងថា ចាប់ពីថ្ងៃទី30មីនា វៀតណាមត្រូវការម៉ាស់ចំនួន30លានបន្ទះ ដើម្បីទប់ទល់នឹង COVID-19។ កន្លងមក វៀតណាម ខ្វះខាតវត្ថុធាតុដើមដើម្បីផលិតម៉ាស់ ប៉ុន្តែ បច្ចុប្បន្ន វៀតណាមបានរកឃើញវត្ថុធាតុដើមផ្សេងទៀតដែលអាចជំនួសវត្ថុធាតុដើមដែលកំពុងខ្វះខាត។

អ្នកនាំពាក្យក្រសួងពាណិជ្ជកម្ម និងឧស្សាហកម្ម (Ministry of Industry and Trade) បានឱ្យដឹងថា បច្ចុប្បន្ន វៀតណាមមានវត្ថុធាតុដើមក្នុងស្រុក ដែលអាចផ្គត់ផ្គង់ឱ្យការផលិតម៉ាស់ចំនួន 30លានបន្ទះ នាចុងខែមីនានេះ។

ចាប់តាំងពីរោគរាតត្បាត COVID-19 បានរីករាលដាលខ្លាំងនៅទូទាំងពិភពលោក តម្រូវការម៉ាស់ក៏បានកើនឡើងជាបន្តបន្ទាប់ រហូតដល់ធ្វើឱ្យប្រទេសជាច្រើនត្រូវខ្វះខាតម៉ាស់ ហើយធ្វើឱ្យម៉ាស់ឡើងថ្លៃមិនគួរឱ្យជឿ រហូតដល់មានករណីអ្នករកស៊ីអមនុស្សធម៌ខ្លះ បានប្រមូលម៉ាស់ដែលគេបោះចោលបន្ទាប់ពីប្រើរួច យកទៅលក់ឱ្យអ្នកប្រើប្រាស់ទៀតផង។

ទាក់ទិននឹងបញ្ហាខាងលើ កាលពីថ្ងៃទី28កុម្ភៈ នៅប្រទេសវៀតណាម អាជ្ញាធរបានចូលត្រួតពិនិត្យកន្លែងប្រមូលទិញសំណល់អេតចាយមួយកន្លែងនៅក្នុងទីក្រុងហូជីមិញ ហើយក៏បានរកឃើញម៉ាស់ដែលគេប្រើរួចរាប់សិបការុង មានតូច មានធំ លាយឡំគ្នា។ សមត្ថកិច្ចបានឱ្យដឹងថា ម៉ាស់ទាំងនេះមានទម្ងន់ដល់ទៅ2តោន។ ក្នុងចំណោមម៉ាស់ទាំងអស់នេះ មានម៉ាស់ខ្លះជាប់ស្នាមប្រឡាក់ ខ្លះខ្ញុកខ្ញុវ ខ្លះទៀតក៏នៅជាប់ស្លាកយីហោផងដែរ។

ក្រៅពីករណីខាងលើនេះ អាជ្ញាធរវៀតណាម ក៏បានរកឃើញកន្លែងទទួលទិញម៉ាស់ប្រើរួច មួយកន្លែងផ្សេងទៀត។ ដែលនេះ បានធ្វើឱ្យក្រសួងសុខាភិបាលវៀតណាម ចាត់វិធានការ ហាមមិនឱ្យមានការប្រមូលទិញ ឬដឹកជញ្ជូនម៉ាស់ និងសម្ភារការពារសុខភាពបុគ្គល ដើម្បីរួមចំណែកក្នុងការទប់ស្កាត់ការឆ្លងរាលដាលមេរោគកូរ៉ូណា COVID-19៕

ប្រភព៖ សារព័ត៌មានបរទេស

March 16, 2020

10វិធីការពារខ្លួនពីមេរោគវីរុស រយៈដំបូងក្នុងស្ថានការណ៍បច្ចុប្បន្ន

វេជ្ជបណ្ឌិតជំនាញខាងជំងឺឆ្លងនៅក្រៅប្រទេស ជឿថា នាពេលអនាគតដ៏ខ្លីខាងមុខនេះ គ្រប់គ្នានឹងប្រថុយប្រថានក្នុងការឆ្លងមេរោគវីរុស COVID-19 ទាំងអស់ និងបានណែនាំពីវិធីការពារ និងមើលថែទាំខ្លួនដែលត្រូវប្រតិបត្តិយ៉ាងពិតប្រាកដ និងយ៉ាងម៉ឺងម៉ាត់។

10វិធីការពារខ្លួនពីមេរោគវីរុស COVID-19 រយៈដំបូងក្នុងស្ថានការណ៍បច្ចុប្បន្ន៖
1. ហូបក្តៅ ប្រើស្លាបព្រាកណ្តាលសម្រាប់ដួសម្ហូប អាហារចម្អិនឆ្អិន ស្អាតមានអនាម័យ និងតមហូបសត្វព្រៃ
2. លាងសម្អាតដៃឱ្យបានត្រឹមត្រូវ 7ដំណាក់កាល
3. ពាក់ម៉ាស់អនាម័យការពារ និងសំខាន់កុំយកដៃប៉ះញឹកញាប់
4. ក្អក ឬកណ្តាស់ ដាក់កែងដៃ(លើកកែងដៃមកបាំងមាត់) បើឈឺ គួរផ្អាកទៅរៀន ឬផ្អាកទៅធ្វើការ
5. មើលថែទាំខ្លួនឱ្យមានសុខភាពរឹងមាំល្អ
6. ចៀសវាងកុំទៅទីកន្លែងដែលមានមនុស្សម្នាច្រើន តែបើចៀសមិនរួចត្រូវការពារខ្លួនឯងឱ្យបានល្អ
7. ពិចារណាក្នុងការផ្អាក ឬចៀសវាងការធ្វើដំណើរទៅក្រៅប្រទេសក្នុងអំឡុងពេលនេះ ជាពិសេសក្រុមប្រទេសដែលមានភាពប្រថុយប្រថានខ្លាំង បើត្រឡប់មកវិញ ត្រូវបង្ខាំងខ្លួននៅដោយឡែក 14ថ្ងៃ
8. បើឈឺថ្កាត់ ពេលទៅជួបគ្រូពេទ្យ ត្រូវប្រាប់ព័ត៌មានឱ្យបានល្អិតល្អន់ កុំលាក់បាំង
9. មនុស្សចាស់ជរា ឬអ្នកមានជំងឺប្រចាំកាយ ត្រូវទៅមន្ទីរពេទ្យនៅពេលចាំបាច់ ដូចជា ពេលអស់ថ្នាំលេប ឬទៅតាមការណាត់របស់គ្រូពេទ្យជាដើម
10. កុំចែករំលែក ឬស៊ែរព័ត៌មានកុហក់ ឬព័ត៌មានក្លែងក្លាយ (Fake News)៕

ប្រភព៖ សារព័ត៌មានបរទេស

March 16, 2020

វ៉េណេស៊ុយអេឡា ដាក់បម្រាមគោចរលើរដ្ឋចំនួន7 ដោយឱ្យពលរដ្ឋនៅតែក្នុងផ្ទះ ដើម្បីទប់ស្កាត់ COVID-19

ប្រធានាធិបតី វ៉េណេស៊ុយអេឡា បានចេញបញ្ជាឱ្យបិទ និងផ្អាករាល់សកម្មភាពនៅក្នុងរដ្ឋចំនួន7របស់ប្រទេសនេះ ដើម្បីទប់ស្កាត់ការរីករាលដាលនៃមេរោគបង្កជំងឺរលាកសួតថ្មី COVID-19 បន្ទាប់ពីប្រទេសនេះ បានរកឃើញអ្នកផ្ទុកមេរោគចំនួន17ករណី។

បទបញ្ជា ដែលត្រូវបានប្រធានាធិបតី វ៉េណេស៊ុយអេឡា លោក Nicolas Maduro ប្រកាសកាលពីថ្ងៃទី15មីនាកន្លងទៅនេះ ក៏បូកបញ្ចូលទាំងរដ្ឋធានី Caracas ផងដែរ។ រាល់សកម្មភាពក្នុងរដ្ឋចំនួន7នៃប្រទេសនេះ ត្រូវបានផ្អាក ចាប់ពីម៉ោង5ព្រឹក ថ្ងៃទី16មីនា ឆ្នាំ2020 លើកលែងតែសេវាកម្មចាំបាច់មួយចំនួន ដូចជា សកម្មភាពផ្គត់ផ្គង់ផលិតផលស្បៀងអាហារ សេវាវេជ្ជសាស្ត្រ ដឹកជញ្ជូន និងសន្តិសុខជាដើម។

“នេះមិនមែនជារដូវកាលសម្រាកវិស្សមកាលនោះទេ។ វាគឺជាវិធានការបង្ខាំងទ្រង់ទ្រាយធំ ដែលទាមទារឱ្យមានវិន័យក្នុងសង្គម ក៏ដូចជាការគ្រប់គ្រងខ្លួនឯង។ ប្រជាពលរដ្ឋទាំងអស់ គួរតែនៅក្នុងផ្ទះ” លោក Maduro មានប្រសាសន៍បែបនេះ នៅលើកញ្ចក់ទូរទស្សន៍ជាតិ កាលពីថ្ងៃទី15មីនា។

នេះគឺជាវិធានការថ្មីបំផុត ដើម្បីទប់ស្កាត់ COVID-19 នៅប្រទេសវ៉េណេស៊ុយអេឡា។ កាលពីសប្ដាហ៍មុន ប្រទេសនេះបានហាមមិនឱ្យមានការហោះហើរទៅ-មក ពីតំបន់អឺរ៉ុប ប្រទេសកូឡុំប៊ី ប្រទេសប៉ាណាម៉ា និងសាធារណរដ្ឋដូមីនីកែន។ សាលារៀននៃប្រទេសនេះក៏ត្រូវបិទទ្វារ ហើយព្រឹត្តិការកីឡាជាច្រើនក៏ត្រូវបានលុបចោល។

លោកប្រធានាធិបតី Maduro បានឱ្យដឹងថា ប្រតិកម្មរបស់លោក គឺផ្អែកទៅលើសកម្មភាពនានារបស់ប្រទេសចិន នៅក្នុង “សង្គ្រាម” ប្រឆាំង COVID-19។ លោកថ្លែងថា “វិធីតែមួយគត់ដើម្បីគ្រប់គ្រងប្រភពចម្លងមេរោគ គឺអនុវត្តវិធានការបង្ខាំងទ្រង់ទ្រាយធំ និងខ្លាំងក្លានៅទូទាំងប្រទេស”។ នេះបើតាមសារព័ត៌មាន AFP។

COVID-19 បានបង្ហាញខ្លួននៅក្នុងប្រទេស និងដែនដីចំនួន157 នៅទូទាំងពិភពលោក បណ្ដាលឱ្យមនុស្សជាង 160,000នាក់បានឆ្លងរោគ ក្នុងនោះមានជាង 6,400នាក់បានស្លាប់ និងជាង76,000នាក់បានជាសះស្បើយ។ ចំណែកប្រទេសវ៉េណេស៊ុយអេឡាវិញ មកដល់ពេលនេះ បានរកឃើញអ្នកផ្ទុក COVID-19 ចំនួន17ករណី ប៉ុន្តែមិនទាន់មានអ្នកស្លាប់ដោយសារមេរោគនេះនៅឡើយ៕

ប្រភព៖ សារព័ត៌មានបរទេស

March 16, 2020

អ្នកធ្វើការ Office ត្រូវដឹង! បទពិសោធពីប្រទេសចិន “តើទៅធ្វើការយ៉ាងណា ឱ្យរួចផុតពីគ្រោះភ័យ COVID-19?”

ប្រទេសចិនបានណែនាំវិធីប្រតិបត្តិខ្លួន នៅពេលត្រូវទៅធ្វើការក្នុងអំឡុងការឆ្លងរាលដាលរបស់មេរោគវីរុសកូរ៉ូណាប្រភេទថ្មី ដោយបានចែករំលែកយ៉ាងលម្អិត តាំងពីវិធីធ្វើដំណើរទៅធ្វើការ ការស្ថិតនៅក្នុងកន្លែងធ្វើការ ពេលសម្រាកថ្ងៃត្រង់ រួមទាំងពេលចេញពីធ្វើការទៀតផង។

– ក្នុងអំឡុងពេលធ្វើដំណើរទៅធ្វើការ
. ចូរពាក់ម៉ាស់អនាម័យការពារជាប់ជានិច្ច
. វិធីដែលល្អបំផុតក្នុងការទៅធ្វើការ គឺការធ្វើដំណើរដោយថ្មើរជើង ឬធាក់កង់
. បើត្រូវប្រើសេវារថយន្តក្រុងសាធារណៈ ចូរឈរ ឬអង្គុយនៅក្នុងចម្ងាយពីអ្នកដទៃយ៉ាងតិចពី1-2ម៉ែត្រ

– ពេលទៅដល់កន្លែងធ្វើការ
. បើ Office នៅជាន់លើ ចូរប្រើជណ្ដើរជើង(កុំជិះជណ្ដើរយន្តប្រអប់)
. តែបើមិនអាចចៀសរួច ពេលឡើងតាមជណ្ដើរយន្តប្រអប់ ចូរពាក់ម៉ាស់អនាម័យការពារ និងព្យាយាមកុំ
ប៉ះពាល់អ្វីផ្សេងៗដែលនៅក្នុងនោះ។

– ក្នុងអំឡុងពេលធ្វើការ
. ចូរពាក់ម៉ាស់អនាម័យការពារជាប់ជានិច្ច
. សម្អាតចំណុចដែលមានមនុស្សម្នាប្រើប្រាស់ច្រើន និងសម្អាតវត្ថុដែលប្រើរួមគ្នា យ៉ាងតិចឱ្យបាន 1ថ្ងៃ 1ដង
. ឧស្សាហ៍បើកបង្អួចឱ្យបានញឹកញាប់ ដើម្បីឱ្យខ្យល់អាកាសបក់ចេញ-ចូល
. បិទប្រព័ន្ធម៉ាស៊ីនត្រជាក់រួម(Central air conditioning) ឬបើកជាប្រព័ន្ធឱ្យបឺតខ្យល់ខាងក្រៅចូលមកផ្លាស់ប្ដូរផង
. ប្រើប្រព័ន្ធការទំនាក់ទំនងតាមរយៈអនឡាញ
. ចៀសវាងការប្រជុំបែបធម្មតា ដោយងាកមកប្រើការប្រជុំបែប Video Conference ជំនួសវិញ

– ពេលសម្រាកថ្ងៃត្រង់
. ចៀសវាងពីអំឡុងពេល និងកន្លែងដែលមានមនុស្សដើរចេញ-ចូលច្រើន
. បើអាចទៅរួច ចូរទិញអាហារមកទទួលទានដោយឡែក
. លាងសម្អាតដៃឱ្យបានស្អាត មុន និងក្រោយការទទួលទានអាហារ
. ចៀសវាងការទទួលទានអាហាររួមជាមួយអ្នកដទៃ
. ផ្អាក ឬកាត់បន្ថយការជក់បារី

– ក្រោយពេលឈប់ពីធ្វើការ
. កុំចូលរួមការហូបចុក ឬជប់លៀងក្រោយពេលឈប់ពីធ្វើការ
. កុំទៅមើលខ្សែភាពយន្ត ច្រៀងខារ៉ាអូខេ ឬទៅដើរតាមហាងផ្សារទំនើប
. ផ្អាក ឬកាត់បន្ថយការជក់បារី

ប្រភព៖ សារព័ត៌មានបរទេស

March 16, 2020

មនុស្សជិត 6,500នាក់បានស្លាប់ដោយសារ COVID-19 នៅទូទាំងពិភពលោក ខណៈកម្ពុជាមានអ្នកឆ្លងរោគសរុប12នាក់

មេរោគបង្កជំងឺរលាកសួតប្រភេទថ្មី COVID-19 បង្ហាញខ្លួននៅក្នុងប្រទេស និងដែនដីចំនួន157 នៅទូទាំងពិភពលោក បណ្ដាលឱ្យមានអ្នកកើតរោគរាតត្បាតនេះ ចំនួនជាង6,500នាក់ បានបាត់បង់ជីវិត។

រោគរាតត្បាត COVID-19 កំពុងតែឆ្លងរាលដាលយ៉ាងលឿន ធ្វើឱ្យមនុស្សចំនួន12,701នាក់បន្ថែមទៀតត្រូវបានគេរកឃើញថាបានឆ្លងមេរោគនេះ នាំឱ្យតួលេខនៃការឆ្លងរោគ កើនឡើងដល់ 169,354នាក់ ក្នុងនោះមានអ្នកជំងឺ76.618នាក់បានជាសះស្បើយ។

ករណីឆ្លងមេរោគលឿនជាងគេនាពេលបច្ចុប្បន្ន គឺស្ថិតនៅឯទ្វីបអឺរ៉ុប ដូចជាប្រទេសអ៊ីតាលី អេស្ប៉ាញ អាល្លឺម៉ង់ បារាំង និងអង់គ្លេស។ អ៊ីតាលីទើបរកឃើញអ្នកផ្ទុក COVID-19ថ្មី ចំនួន3,590ករណីបន្ថែមទៀត ធ្វើឱ្យអ្នកឆ្លងមេរោគកូរ៉ូណាសរុប 24,747នាក់ ដែលនេះជាតួលេខខ្ពស់ជាងគេក្នុងពិភពលោក បន្ទាប់ពីប្រទេសចិន។ អេស្ប៉ាញអឺរ៉ង់ និងអាល្លឺម៉ង់ គឺជាប្រទេសដែលរកឃើញអ្នកផ្ទុក COVID-19ថ្មីបន្ថែម លើសពី1,000នាក់។

ចំនួនករណីឆ្លងរោគកូរ៉ូណាថ្មីនៅប្រទេសចិន និងកូរ៉េខាងត្បូង ធ្លាក់មកនៅកម្រិតទាប។ នៅអាស៊ីអាគ្នេយ៍ ចំនួនករណីឆ្លងថ្មីនៅម៉ាឡេស៊ី មាន190ករណី ធ្វើឱ្យចំនួនសរុបឡើងដល់428ករណី ដែលភាគច្រើនទាក់ទងនឹងពិធីបុណ្យនៅឯវិហារអ៊ីស្លាម1 ស្ថិតនៅក្បែរទីក្រុង Kuala Lumpur ដែលមានសាសនិកប្រមាណជា16,000នាក់ បានចូលរួម។

នៅទូទាំងពិភពលោក មានករណីស្លាប់ថ្មីចំនួន666នាក់ ភាគច្រើនកើតឡើងនៅក្នុងប្រទេសអ៊ីតាលី អ៊ីរ៉ង់ និងអេស្ប៉ាញ នាំឱ្យករណីស្លាប់សរុបឡើងដល់ 6,499នាក់។

នៅសហរដ្ឋអាមេរិកវិញ តួលេខថ្មីបំផុតបង្ហាញថា មានមនុស្សចំនួន3,590នាក់បានឆ្លងវីរុស COVID-19 ក្នុងនោះមាន 68នាក់បានស្លាប់ និង59នាក់ បានជាសះស្បើយ។

ចំណែកនៅកម្ពុជាវិញ គិតមកដល់ពេលនេះ បានរកឃើញអ្នកផ្ទុកមេរោគ COVID-19 ចំនួន12នាក់ ក្នុងនោះមានករណីថ្មីបំផុតចំនួន4ករណី។ ក្នុងចំណោម4ករណីថ្មី ដែលទើបត្រូវបានរកឃើញកាលពីយប់ថ្ងៃទី15 ខែមីនា ឆ្នាំ2020 គឺមានជនជាតិខ្មែរអ៊ីស្លាម2នាក់ បុរសជនជាតិខ្មែរមកពីប្រទេសបារាំងម្នាក់ និងកូនជនជាតិបារាំងអាយុ 35ឆ្នាំម្នាក់។ កម្ពុជាមិនទាន់មានករណីស្លាប់ដោយសារមេរោគរាតត្បាតកូរ៉ូណា COVID-19 នៅឡើយ៕

March 16, 2020

កម្ពុជាមានអ្នកឆ្លងរោគ COVID-19 ចំនួន8នាក់ ខណៈវៀតណាមមាន53នាក់ ចំណែកទូទាំងពិភពលោក មានជាង162.187នាក់

កម្ពុជាគឺជាប្រទេសដែលមិនមានព្រំដែនជាប់នឹងប្រទេសចិន ដែលជាសម្បុកវីរុស COVID-19 នោះទេ ចំណែកវៀតណាមវិញ គឺមានព្រំដែនប្រវែង1.435គីឡូម៉ែត្រ ជាប់ជាមួយនឹងប្រទេសចិន ដូច្នេះ តួលេខស្ដីអំពីចំនួនករណីឆ្លងមេរោគកូរ៉ូណា COVID-19 ក៏មានចំនួនលើសខ្វះគ្នាច្រើន។

តួលេខអ្នកឆ្លងរោគ COVID-19 នៅកម្ពុជា៖

គិតមកដល់ថ្ងៃនេះ (15មីនា ឆ្នាំ2020) កម្ពុជាបានរកឃើញអ្នកផ្ទុកមេរោគកូរ៉ូណា COVID-19 ចំនួន8ករណី ក្នុងនោះមាន 7ករណីជាជនជាតិបរទេស និង1ករណីជាជនជាតិខ្មែរ។

-ករណីទី1 គឺជាជនជាតិចិន អាយុ60ឆ្នាំ ត្រូវបានរកឃើញនៅខេត្តព្រះសីហនុ និងត្រូវបានព្យាបាលជាសះស្បើយ ហើយបានវិលត្រឡប់ទៅប្រទេសចិនវិញហើយ។

-ករណីទី2 គឺជាបុរសជនជាតិខ្មែរ អាយុ38ឆ្នាំនៅខេត្តសៀមរាប ដែលបច្ចុប្បន្ន កំពុងទទួលការព្យាបាលនៅមន្ទីរពេទ្យក្នុងខេត្តសៀមរាប និងនៅមានសុខភាពល្អធម្មតា។

-ករណីទី3-4-5 ត្រូវបានរកឃើញនៅឯខេត្តកំពង់ចាម ដែលជាអ្នកទេសចរ ធ្វើដំណើរតាមនាវា Viking Cruise (នាវាដែលធ្វើដំណើរមកពីប្រទេសវៀតណាម) និងសុទ្ធតែជាជនជាតិអង់គ្លេស ហើយបច្ចុប្បន្ន ទទួលការព្យាបាលនៅក្នុងទីក្រុងភ្នំពេញ។

-ករណីទី6 អ្នកជំងឺជាបុរសជាតិកាណាដា ដែលបម្រើការនៅសាលាអន្តរជាតិមួយនៅភ្នំពេញ និងទើបតែបានធ្វើដំណើរមកពីប្រទេសថៃ។

-ករណីទី7 គឺជាជនជាតិបែលហ្ស៊ិក ដែលបម្រើការនៅអង្គការអន្តរជាតិមួយ និងទើបតែបានធ្វើដំណើរពីអឺរ៉ុបមកកម្ពុជា។

-ករណីទី8 ដែលទើបត្រូវបានរកឃើញក្នុងថ្ងៃនេះ (15មីនា) ត្រូវបានក្រសួងសុខាភិបាលកម្ពុជាឱ្យដឹងថា ជាជនជាតិបារាំង អាយុ35ឆ្នាំ មកពីប្រទេសបារាំង និងចូលមកកម្ពុជាតាមជើងហោះហើរ MI 602 ពីប្រទេសសិង្ហបុរី។ អ្នកនាំពាក្យក្រសួងសុខាភិបាល លោកស្រី ឱ វណ្ណាឌីន បានឱ្យដឹងថា ជនជាតិបារាំងរូបនេះ មានប្រពន្ធ និងកូនប្រុសអាយុ4ខែ ដែលធ្វើដំណើរជាមួយគ្នា។ អាជ្ញាធរសិង្ហបុរី បានធ្វើតេស្តវត្ថុវិភាគរបស់បុរសនេះ កាលពីយប់ថ្ងៃទី13មីនា និងទើបតែចេញលទ្ធផលវិជ្ជមាននាពេលថ្មីៗនេះ បន្ទាប់ពីបានមកដល់កម្ពុជា។ បុរសជនជាតិបារាំងខាងលើនេះ ត្រូវបានអាជ្ញាធរកម្ពុជានាំទៅព្យាបាលនៅមន្ទីរពេទ្យរុស្ស៊ី (មន្ទីរពេទ្យខ្មែរ-សូវៀត)។ ចំណែកប្រពន្ធ និងកូនរបស់គាត់ កំពុងស្នាក់នៅក្នុងផ្ទះប្អូនរបស់គាត់ នៅក្នុងសង្កាត់ទួលទំពូង ទីក្រុងភ្នំពេញ ក្រោមការតាមដានពីអាជ្ញាធរ និងមន្ត្រីសុខាភិបាល។

តួលេខអ្នកឆ្លងរោគ COVID-19 នៅប្រទេសវៀតណាម៖

គិតមកដល់ល្ងាចនេះ ប្រទេសវៀតណាម បានរកឃើញអ្នកផ្ទុកមេរោគ COVID-19 សរុបចំនួន 53នាក់ ក្នុងនោះមាន 16នាក់បានជាសះស្បើយ។ ក្នុងចំណោម37ករណីថ្មីដែលទើបបានរកឃើញថ្មីៗនេះ មាន13នាក់ជាជនជាតិបរទេស និង24នាក់ ជាជនជាតិវៀតណាម។ អ្នកទាំងនេះ កំពុងទទួលការព្យាបាលនៅក្នុងមន្ទីរពេទ្យផ្សេងៗ នៅគ្រប់តំបន់នៃប្រទេសនេះ។

-នៅភាគខាងជើង មន្ទីរពេទ្យនានា (ទីក្រុង Ha Noi ខេត្ត Ninh Binh និងខេត្ត Quang Ninh) កំពុងព្យាបាលអ្នកជំងឺកូរ៉ូណា COVID-19 ចំនួន17នាក់ ក្នុងនោះមាន 9នាក់ ជាជនជាតិវៀតណាម។

-នៅភាគកណ្ដាល (ខេត្ត Thua Thien Hue ទីក្រុង Da Nang និងខេត្ត Binh Thuan) មានអ្នកជំងឺកំពុងទទួលការព្យាបាលចំនួន16នាក់ ក្នុងនោះមាន10នាក់ ជាជនជាតិវៀតណាម។

-ចំណែកនៅឯភាគខាងត្បូង (ទីក្រុងហូជីមិញ) វិញ មានអ្នកជំងឺចំនួន4នាក់ ក្នុងនោះ មាន3នាក់ជាជនជាតិវៀតណាម។

តួលេខអ្នកឆ្លងរោគ COVID-19 នៅទូទាំងពិភពលោក៖

COVID-19 បានចាប់ផ្ដើមឆ្លងរាលដាលនៅឯទីក្រុង Wuhan ប្រទេសចិន កាលពីចុងឆ្នាំ2019 ហើយមកដល់ពេលនេះ វាបានធ្វើឱ្យមនុស្សជាង 162.187នាក់ បានឆ្លងរោគ ក្នុងនោះមាន 5.974នាក់បានបាត់បង់ជីវិត និង 75.967នាក់បានជាសះស្បើយ៕

March 15, 2020

អតីតអគ្គលេខាធិការនៃអង្គការ NATO លោក Javier Solana បានឆ្លងវីរុស COVID-19

“លោក Javier Solana បានឆ្លងវីរុស COVID-19 ប៉ុន្តែ ស្ថានភាពសុខភាពរបស់គាត់ កំពុងនៅល្អនៅឡើយ” នេះបើតាមប្រភពព័ត៌មាន AFP។

ទីភ្នាក់ងារសារព័ត៌មាន AFP កាលពីថ្ងៃទី14កន្លងទៅ បានដកស្រង់ប្រភពព័ត៌មានក្នុងស្រុកមួយ ឱ្យដឹងថា អតីតអគ្គលេខាធីការនៃអង្គការ NATO លោក Javier Solana ត្រូវបានបញ្ជូនទៅកាន់មន្ទីរពេទ្យនៅ Madrid ប្រទេសអេស្ប៉ាញ ព្រោះតែបានឆ្លងវីរុសកូរ៉ូណា COVID-19។ ប្រភពព័ត៌មានបញ្ជាក់ថា សុខភាពរបស់លោក នៅល្អជាធម្មតា។

លោក Solana អាយុ77ឆ្នាំ ធ្លាប់បានកាន់តំណែងជាអគ្គលេខាធិការនៃអង្គការ NATO ចាប់ពីឆ្នាំ1995 ដល់ឆ្នាំ1999។ ក្រោយមក លោកបានធ្វើជាអ្នកតំណាងជាន់ខ្ពស់របស់សហភាពអឺរ៉ុប(European Union) ចាប់ពីឆ្នាំ1999 ដល់ឆ្នាំ2009។

ព័ត៌មានខាងលើត្រូវបានគេរាយការណ៍ ក្នុងពេលដែលអង្គការសុខភាពពិភពលោក បានព្រមានថា អឺរ៉ុបកំពុងតែក្លាយជាតំបន់ស្នូលនៃរោគរាតត្បាត COVID-19

គិតមកដល់បច្ចុប្បន្ន(14មីនា) ប្រទេសអេស្ប៉ាញ មានអ្នកផ្ទុកមេរោគកូរ៉ូណាចំនួន 6,250នាក់ ក្នុងនោះមានអ្នកស្លាប់ដល់ទៅ193ករណី។ ប្រទេសនេះ កំពុងក្លាយជាដែនដីដែលទទួលរងការរាតត្បាតនៃមេរោគកូរ៉ូណា ខ្លាំងជាងគេបំផុតលំដាប់ទី2នៅអឺរ៉ុប បន្ទាប់ពីប្រទេសអ៊ីតាលី៕

ប្រភព៖ សារព័ត៌មានបរទេស

March 15, 2020

Tag: covid-19