covid-19 - La Reine Media

WHO ៖ នឹងមិនមាន “ឱសថទិព្វ” សម្រាប់ប្រឆាំងនឹងCOVID-19ឡើយ

អង្គការសុខភាពពិភពលោក (WHO) យល់ថា ដំណោះស្រាយក្នុងការកម្ចាត់COVID-19 មិនមែនគ្រាន់តែប្រើប្រាស់វ៉ាក់សាំងដ៏ល្អឥតខ្ជោះណាមួយនោះឡើយ។

នៅក្នុងសន្និសីទសារព័ត៌មានមួយកាលពីថ្ងៃទី3សីហា មេដឹកនាំ WHO បានអះអាងថា ផ្លូវសម្រាប់ការប្រយុទ្ធប្រឆាំងនឹងCOVID-19 នៅវែងអន្លាយទៅមុខទៀត ហើយប្រទេសជាច្រើននឹងត្រូវបង្កើតយុទ្ធសាស្ត្រថ្មីដើម្បីទប់ស្កាត់វីរុសនេះ។

ប្រធានាអង្គការសុខភាពពិភពលោក លោក Tedros Adhanom Ghebreyesus និងប្រធានកម្មវិធីបន្ទាន់របស់ WHO លោក Mike Ryan បានផ្ដល់អនុសាសន៍ ក៏ដូចជាជំរុញឱ្យរដ្ឋាភិបាលនានា អនុវត្តវិធានការទប់ស្កាត់ការឆ្លងវីរុសនេះ ដូចជាការពាក់ម៉ាស់ រក្សាគម្លាតសង្គម លាងដៃជាញឹកញាប់ តាមដានករណីសង្ស័យ និងការធ្វើតេស្តរកមេរោគឱ្យបានច្រើនជាងមុន។ល។

លោក Tedros បានសង្កត់ធ្ងន់ថា “វ៉ាក់សាំងមួយចំនួន កំពុងស្ថិតក្នុងការសាកល្បងដំណាក់កាលទី3។ ទាំងអស់នេះសុទ្ធតែត្រូវបានរំពឹងថានឹងមានប្រសិទ្ធភាព។ ប៉ុន្តែ មិនមានដំណោះស្រាយងាយស្រួលណាមួយដើម្បីកម្ចាត់វីរុសនេះបានទាំងស្រុងនោះឡើយ ហើយលទ្ធភាពនេះក៏នឹងមិនអាចកើតមាននោះដែរ”។

នៅក្នុងគ្រាដែលពិភពលោកកំពុងតែរត់ប្រណាំងក្នុងការអភិវឌ្ឍវ៉ាក់សាំង លោក Tedros ថ្លែងថា មិនទាន់មានប្រការណាមួយប្រាកដប្រជានោះទេ។ លោកសង្កត់ធ្ងន់ថា “មានការព្រួយបារម្ភមួយចំនួនថា យើងមិនអាចផលិតបានវ៉ាក់សាំងដែលមានប្រសិទ្ធភាព ឬថាការការពាររបស់វ៉ាក់សាំងនឹងមានរយៈពេលត្រឹមតែប៉ុន្មានខែប៉ុណ្ណោះ។ នៅពេលការសាកល្បងព្យាបាលមិនទាន់ទទួលបានជោគជ័យ នោះយើងមិនអាចសន្និដ្ឋានអ្វីទាំងអស់”។

ប្រធានកម្មវិធីបន្ទាន់របស់ WHO លោក Mike Ryan បានថ្លែងថា “ប្រទេសមួយចំនួនក្នុងពិភពលោក គួរតែថយក្រោយមួយជំហាន និងពិនិត្យឡើងវិញនូវយុទ្ធសាស្ត្រក្នុងការដោះស្រាយបញ្ហាទាក់ទិននឹងជំងឺរាតត្បាតនៅតាមបន្ទាត់ព្រំដែនរបស់ពួកគេ”៕

ប្រភព៖ SCMP

August 4, 2020

មហាសេដ្ឋី7រូបដែលមានទ្រព្យច្រើនជាងមុនជាងពាក់កណ្ដាលនៅក្នុងសម័យCOVID-19

CEO របស់ Tesla លោក Elon Musk រកបានជាង13ពាន់លានដុល្លារបន្ថែមទៀតរាប់ចាប់ពីពាក់កណ្ដាលខែមីនា2020 ខណៈដែលស្ថាបនិករបស់ Facebook លោក Mark Zuckerberg រកចំណូលបានជិត29ពាន់លានដុល្លារ។

COVID-19 បានបណ្ដាលឱ្យមហាសេដ្ឋីជាច្រើនបាត់បង់ទ្រព្យសម្បត្តិដ៏ច្រើនសន្ធឹកនៅពេលផ្សារហ៊ុនអាមេរិកដាំក្បាលចុះកាលពីខែមីនាកន្លងទៅ ប៉ុន្តែល្បឿននៃការងើបឡើងវិញនៃផ្សារហ៊ុនបានជួយឱ្យអ្នកមានជាច្រើនស្រង់ដើមទុនបានមកវិញ ហើយក៏មានអ្នកជំនួញខ្លះថែមទាំងចំណេញយ៉ាងច្រើនផងដែរ។

ដោយប្រើប្រាស់ទិន្នន័យតាមពេលវេលាជាក់ស្ដែងរបស់ Forbes ក្រុមហ៊ុន GoBankingRates បានរកឃើញថា មហាសេដ្ឋី7រូបដែលស្ថិតក្នុងចំណោមអ្នកមានជាងគេទាំង50នាក់របស់ពិភពលោក មានទ្រព្យច្រើនជាងមុនជាងពាក់កណ្ដាលក្នុងដំណាក់កាលចាប់ពីថ្ងៃទី18មីនា ដល់ថ្ងៃទី4មិថុនា2020។ ថ្ងៃទី18 ខែមីនា គឺជារយៈពេលមួយសប្ដាហ៍បន្ទាប់ពី COVID-19 ត្រូវបានប្រកាសថាជារោគរាតត្បាតទូទាំងពិភពលោក ហើយ2ថ្ងៃក្រោយមក សន្ទស្សន៍ DJIA (Dow Jones Industrial Average) ត្រូវបានកត់សម្គាល់ឃើញថាជាថ្ងៃជួញដូរមូលបត្រមួយក្នុងចំណោមថ្ងៃជួញដូរដែលអាក្រក់ជាទីបំផុតក្នុងប្រវត្តិសាស្ត្រ។ ចំណែកថ្ងៃទី4មិថុនាវិញគឺជាថ្ងៃដែលរដ្ឋនានានៅសហរដ្ឋអាមេរិកចាប់ផ្ដើមដកបម្រាមគោចរ។

CEO របស់ក្រុមហ៊ុន Tesla និង SpaceX គឺលោក Elon Musk បានជាប់ឈ្មោះនៅក្នុងបញ្ជីនៃក្រុមមនុស្សដែលរកបានប្រាក់ចំណូលច្រើនជាងពាក់កណ្ដាលនៃទ្រព្យសរុបរបស់ខ្លួននៅក្នុងដំណាក់ចាប់ពីថ្ងៃទី18មីនា ដល់ថ្ងៃទី4មិថុនា2020។ ទ្រព្យរបស់លោក Elon Musk បានកើន55% ដែលជួយឱ្យលោកមានទ្រព្យជាង38ពាន់លានដុល្លារ។ ប្រការនេះបានកើតឡើងដោយសារតម្លៃមូលបត្ររបស់ក្រុមហ៊ុន Tesla ឡើងថ្លៃខ្ពស់។ បច្ចុប្បន្ន លោក Elon Musk កាន់កាប់មូលបត្រជិត39លានហ៊ុននៅក្នុងក្រុមហ៊ុនផលិតរថយន្តអគ្គិសនី ហើយលោកក៏ទើបតែទទួលបានប្រាក់រង្វាន់ដែលមានតម្លៃជាង700លានដុល្លារកាលពីខែឧសភាផងដែរ។

មហាសេដ្ឋីម្នាក់ផ្សេងទៀតដែលទទួលបានចំណេញច្រើនកប់ក្ដោងដែរនោះគឺម្ចាស់ Facebook លោក Mark Zuckerberg។ គិតត្រឹមដើមខែមិថុនានេះ លោក Zuckerberg មានទ្រព្យជាង83ពាន់លានដុល្លារ កើនជិត29ពាន់លានដុល្លារបើធៀបនឹងថ្ងៃទី18មីនា2020។ បច្ចុប្បន្ន ស្ថាបនិករបស់ Facebook មានភាគហ៊ុនប្រមាណជា400លានហ៊ុននៅក្នុងក្រុមហ៊ុន Facebook។

ខាងក្រោមនេះគឺជាបញ្ជីឈ្មោះមហាសេដ្ឋី7រូបដែលមានទ្រព្យកើនឡើងជាង50%នៅក្នុងសម័យ COVID-19៖

1. លោក Dieter Schwarz ម្ចាស់ក្រុមហ៊ុន Schwarz Group (អាល្លឺម៉ង់)

>ទ្រព្យសម្បត្តិនាថ្ងៃទី18/3/2020 ៖ 19.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 33.1ពាន់លានដុល្លារ
>កំណើននៃទ្រព្យ ៖ 67%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានរបាយការណ៍
>ទ្រព្យសម្បត្តិគិតត្រឹមថ្ងៃទី16/6/2020 ៖ 30.8ពាន់លានដុល្លារ

2. Mukesh Ambani – ប្រធានក្រុមហ៊ុន Reliance Industries (ឥណ្ឌា)

>ទ្រព្យសម្បត្តិនាថ្ងៃទី18/3/2020 ៖ 36.8ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 58ពាន់លានដុល្លារ
>កំណើននៃទ្រព្យ៖ 57.6%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ 68.3លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 59.4ពាន់លានដុល្លារ

3. លោក Elon Musk – CEO របស់ក្រុមហ៊ុនTelsa/SpaceX/The Boring Company (អាមេរិក)

>ទ្រព្យសម្បត្តិនាថ្ងៃទី18/3/2020 ៖ 24.6ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 38.2ពាន់លានដុល្លារ
>កំណើននៃទ្រព្យ៖ 55%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 42ពាន់លានដុល្លារ

4. លោក Alain Wertheimer – ម្ចាស់ក្រុមហ៊ុន Chanel (បារាំង)

>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ

5. លោក Gerard Wertheimer – ម្ចាស់ក្រុមហ៊ុន Chanel (បារាំង)

>ទ្រព្យសម្បត្តិនាថ្ងៃទី18/3/2020 ៖ 17.1ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 26.3ពាន់លានដុល្លារ
>កំណើននៃទ្រព្យ៖ 53.8%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 24.7ពាន់លានដុល្លារ

6. លោក Mark Zuckerberg – CEO របស់Facebook (អាមេរិក)

>ទ្រព្យសម្បត្តិនាថ្ងៃទី18/3/2020 ៖ 54.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 83.4ពាន់លានដុល្លារ
>កំណើននៃទ្រព្យ៖ 52.47%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ ជាង150លានដុល្លារ
>ទ្រព្យសម្បត្តិគិតត្រឹមថ្ងៃទី16/6/2020 ៖ 87.4ពាន់លានដុល្លារ

7. លោក Tadashi Yanai – ម្ចាស់ក្រុមហ៊ុន Fast Retailing (ជប៉ុន)

>ទ្រព្យសម្បត្តិនាថ្ងៃទី18/3/2020 ៖ 19.7ពាន់លានដុល្លារអាមេរិក
>ទ្រព្យសម្បត្តិនាថ្ងៃទី4/6/2020 ៖ 29.6ពាន់លានដុល្លារ
>កំណើននៃទ្រព្យ៖ 50.2%
>ខ្ទង់ប្រាក់ដែលត្រូវបានបង់ជាវិភាគទានទាក់ទិននឹងCOVID-19 ៖ មិនទាន់មានទិន្នន័យ
>ទ្រព្យសម្បត្តិគិតត្រឹមថ្ងៃទី16/6/2020 ៖ 29.7ពាន់លានដុល្លារ

ប្រភព៖ CNBC

June 19, 2020

តំណាងរាស្ត្ររួមនឹងមន្ត្រីជាន់ខ្ពស់ជាច្រើនរូបរបស់រុស្ស៊ី បានឆ្លងCOVID-19 ខណៈអ្នកជំងឺសរុបក្នុងប្រទេសនេះកើនលើស290,000នាក់

តំណាងរាស្ត្រជាច្រើនរូបរបស់សហព័ន្ធរុស្ស៊ី ត្រូវបានធ្វើតេស្តរកឃើញថា មានផ្ទុកមេរោគCOVID-19 នៅពេលប្រទេសនេះបានក្លាយជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។

ជំនួយការផ្ទាល់របស់ប្រធានសភាជាន់ទាប(State Duma) របស់រុស្ស៊ី កាលពីថ្ងៃទី18ឧសភាបានបញ្ជាក់ថា ក្នុងចំណោមតំណាងរាស្ត្រទាំង450រូបរបស់សភាជាន់ទាប មាន6រូបត្រូវបានរកឃើញថាមានផ្ទុកវីរុសកូរ៉ូណា។

នាយករដ្ឋមន្ត្រីរុស្ស៊ី លោក Mikhail Mishustin

Anastasia Kashevarova ដែលជាជំនួយការរបស់ប្រធានសភាជាន់ទាបរុស្ស៊ី ថ្លែងថា “គិតមកដល់បច្ចុប្បន្ន តំណាងរាស្ត្រ6រូបរបស់សភាជាន់ទាប ទទួលបានលទ្ធផលវិជ្ជមានជាមួយនឹងវីរុសCOVID-19។ តំណាង2រូបត្រូវបានអនុញ្ញាតឱ្យចេញពីមន្ទីរពេទ្យ ចំណែក2រូបកំពុងទទួលការព្យាបាលក្នុងមន្ទីរពេទ្យ និង2រូបផ្សេងទៀតកំពុងបង្ខាំងខ្លួននិងទទួលការព្យាបាលនៅឯផ្ទះរៀងៗខ្លួន”។

អ្នកនាំពាក្យរបស់វិមានក្រឹមឡាំង លោក Dmitry Peskov

មន្ត្រីជាន់ខ្ពស់ជាច្រើនរូបរបស់រដ្ឋាភិបាលរុស្ស៊ី ក៏បានឆ្លងវីរុសកូរ៉ូណាក្នុងអំឡុងពេលចុងក្រោយនេះ ក្នុងនោះក៏មាននាយករដ្ឋមន្ត្រី (Mikhail Mishustin) អ្នកនាំពាក្យរបស់វិមានក្រឹមឡាំង (លោក Dmitry Peskov) រដ្ឋមន្ត្រីក្រសួងវប្បធម៌ (លោកស្រី Olga Lyubimova) រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ (លោក Valery Falkov) រដ្ឋមន្ត្រីក្រសួងសំណង់និងលំនៅដ្ឋាន (លោក Vladimir Yakushev) និងអនុរដ្ឋមន្ត្រីក្រសួងសំណង់និងលំនៅដ្ឋាន (លោក Dmitry Volkov)។

រដ្ឋមន្ត្រីក្រសួងវប្បធម៌ លោកស្រី Olga Lyubimova

រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ លោក Valery Falkov

រដ្ឋមន្ត្រីក្រសួងសំណង់និងលំនៅដ្ឋាន លោក Vladimir Yakushev

អនុរដ្ឋមន្ត្រីក្រសួងសំណង់និងលំនៅដ្ឋាន លោក Dmitry Volkov

ក្នុងសប្ដាហ៍កន្លង រុស្ស៊ីបានលោតរំលងអេស្ប៉ាញ និងអ៊ីតាលី ក្លាយជាសម្បុកមេរោគធំជាងគេទី2នៅក្នុងពិភពលោក ដោយមានអ្នកជំងឺCOVID-19 សរុប 290,678នាក់ ក្នុងនោះមានអ្នកស្លាប់សរុប2,722នាក់។ កាលពីម្សិលមិញ ប្រទេសនេះក៏បានរកឃើញអ្នកជំងឺថ្មីចំនួន8,926នាក់ផងដែរ៕

ប្រភព៖សារព័ត៌មានបរទេស

May 19, 2020

ពលរដ្ឋក្រីក្រនៅវ៉េណេស៊ុយអេឡា ហូប “ឈាមគោ” ជំនួសបាយ ដើម្បីរក្សាជីវិតក្នុងគ្រាអាសន្ន(វីដេអូ)

ចាប់តាំងពីប្រទេសវ៉េណេស៊ុយអេឡាបានចេញបម្រាមគោចរ ជារៀងរាល់ថ្ងៃ គេឃើញមានប្រជាជនក្រីក្រជាច្រើនតែងតែនាំគ្នាមកតម្រៀងជួររង់ចាំនៅខាងក្រៅទីតាំងកាប់គោមួយកន្លែងនៅក្នុងទីរួមស្រុកភាគខាងលិចតំបន់ San Cristobal ដើម្បីទទួលយកប្រូតេអ៊ីនដោយមិនគិតថ្លៃតែមួយគត់ នោះគឺ “ឈាមសត្វ”។

ជាងជួសជុលម៉ាស៊ីនម្នាក់ ឈ្មោះ Aleyair Romero អាយុ20ឆ្នាំ តែងតែមកសុំឈាមសត្វពីកន្លែងកាប់គោ 2លើកក្នុង1សប្ដាហ៍។ Aleyair Romero បានបាត់បង់ការងារ ធ្វើឱ្យគាត់គ្មានប្រាក់ទិញអាហារហូបប្រចាំថ្ងៃ ចំណែកអាហារដែលជាជំនួយរបស់រដ្ឋាភិបាលលោក Nicolas Maduro ក៏មានការយឺតយ៉ាវ។ “ខ្ញុំត្រូវតែស្វែងរកអាហារដែលខ្ញុំអាចរកបាន” Romero ថ្លែងបែបនេះ ខណៈកំពុងកាន់កូនធុងតូចមួយ រង់ចាំទទួលយកឈាមសត្វដែលកន្លែងសម្លាប់សត្វមួយនេះកំពុងចែកជូនដោយមិនគិតថ្លៃ។

ឈាមគោគឺជាផ្នែកមួយនៃទំនៀមទម្លាប់ក្នុងការចម្អិនស៊ុប ភីឆុន(pichon)របស់ជនជាតិវ៉េណេស៊ុយអេឡានៅតំបន់ Andes។ អ្នកក្រីក្រជាច្រើន បានចាប់ផ្ដើមស្វែងរកឈាមគោតាំងពីវិបត្តិ COVID-19 ចាប់ផ្ដើមកើតឡើងក្នុងប្រទេសនេះ។

នៅក្នុងប្រទេសវ៉េណេស៊ុយអេឡា ដើមឡើយគេឃើញមានមនុស្សតិចណាស់ដែលហូបឈាមគោជំនួសសាច់ ព្រោះថា ឈាមគោមានតម្លៃថ្លៃ។ ប៉ុន្តែ ចាប់តាំងពីប្រធានាធិបតី Maduro ចេញបញ្ជាឱ្យដំឡើងប្រាក់ខែបន្ថែម 150,000បូលីវ៉ា(bolivar) (ប្រហែល1.7ដុល្លារ) កាលពីខែតុលា2019 អត្រានៃការលក់ឈាមសត្វនៅប្រទេសនេះ ក៏បានកើនឡើងពីមួយថ្ងៃទៅមួយថ្ងៃ។

បើទោះជាមានអ្នកស្លាប់ដោយសារវីរុសCOVID-19 ត្រឹមតែ10នាក់ និងអ្នកជំងឺសរុប445នាក់ ប៉ុន្តែ ប្រជាជនក្នុងប្រទេសនៅអាមេរិកខាងត្បូងមួយនេះក៏ត្រូវទទួលផលវិបាកខ្លាំងពីវិបត្តិសេដ្ឋកិច្ច និងការយឺតយ៉ាវនៃកម្មវិធីផ្គត់ផ្គង់អាហារ CLAP របស់រដ្ឋាភិបាល។

នៅមុនវិបត្តិ COVID-19 អង្គការសហប្រជាជាតិធ្លាប់បានហៅគ្រោះទុរភិក្សនៅវ៉េណេស៊ុយអេឡាថាជាវិបត្តិមនុស្សធម៌អាក្រក់បំផុតមួយក្នុងពិភពលោកនាឆ្នាំ2019 ខណៈដែលមនុស្ស9.3លាននាក់ក្នុងចំណោមប្រជាជនសរុប30លាននាក់ មិនមានស្បៀងអាហារគ្រប់គ្រាន់។ ជាលទ្ធផល មនុស្សប្រមាណជា5លាននាក់បានបង្ខំចិត្តធ្វើចំណាកស្រុក។

ថ្វីបើរដ្ឋាភិបាលវ៉េណេស៊ុយអេឡងប្រកាសថា បានរកឃើញអ្នកជំងឺកូរ៉ូណាត្រឹមតែ440នាក់ និងអ្នកស្លាប់ត្រឹមតែ10នាក់ ក៏ប៉ុន្តែ ក្រុមអ្នកតាមដានស្ថានករណ៍ជឿថា តួលេខពិតប្រាកដគឺច្រើនជាងនេះឆ្ងាយណាស់។

ទីតាំងផ្ដល់អាហារដោយមិនគិតថ្លៃ មានមនុស្សកាន់តែច្រើនឡើងៗ ព្រោះតែការយឺតយ៉ាវរបស់រដ្ឋាភិបាលក្នុងការបែងចែកអាហារ ហើយបម្រាមគោចរដែលបានចាប់ផ្ដើមអនុវត្តតាំងពីពាក់កណ្ដាលខែមីនា បណ្ដាលឱ្យមនុស្សជាច្រើនបានបាត់បង់ការងារ។ Romero បានឱ្យដឹងថា “រដ្ឋាភិបាលបញ្ជូនអាហារមកឱ្យប្រជាជន តាមតែចិត្តរបស់ពួកគេ”។

ក្រុមអ្នកបម្រើនៅឯទីតាំងចម្អិនអាហារមួយក្នុងតំបន់ក្រីក្រនៃរដ្ឋធានី Caracas ដែលចាត់ចែងដោយក្រុម Feeding Solidarity បាននិយាយថា ជាធម្មតាពួកគេចម្អិន និងផ្គត់ផ្គង់អាហារឱ្យកុមារត្រឹមតែ80នាក់ប៉ុណ្ណោះ ប៉ុន្តែបច្ចុប្បន្នពួកគេត្រូវផ្គត់ផ្គង់ដល់មនុស្សពេញវ័យចំនួន350នាក់បន្ថែមទៀត។

នៅពេលទទួលស៊ុបមួយចាន ជាមួយនឹងសាំងវិចមួយដុំ ស្ដ្រីមួយចំនួនបានទុកអាហារខ្លះឱ្យកូនហូបនៅព្រឹកស្អែក។ អ្នកស្រី Ysimar Pernalete អាយុ38ឆ្នាំ មានកូន2នាក់ បានឱ្យដឹងថា “អាហារដែលបានពីកម្មវិធី CLAP មិនគ្រប់គ្រាន់សម្រាប់ឱ្យយើងឆ្លងផុតគ្រាលំបាកនេះទេ។ តើយើងត្រូវធ្វើយ៉ាងណាដើម្បីអាចនិយាយជាមួយកូនៗថា “ម្ដាយមិនមានអ្វីឱ្យកូនហូបនោះទេ!”?។

នៅឯកន្លែងកាប់គោក្នុងតំបន់ San Cristobal មនុស្សប្រមាណពី30ទៅ40នាក់ នាំគ្នាតម្រៀបជួររៀងរាល់ថ្ងៃដើម្បីសុំឈាម។ បុគ្គលិកម្នាក់នៅកន្លែងសម្លាប់សត្វនេះថ្លែងថា ឈាមសត្វនឹងត្រូវគេស្អប់នៅក្នុងសម័យក្រោយ COVID-19 មិនខាន។

“ពួកយើងឃ្លានខ្លាំងណាស់” Baudilio Chacon អាយុ46ឆ្នាំ ជាកម្មករសំណង់ម្នាក់ដែលបានបាត់បង់ការងារដោយសារវិធានការទប់ទល់នឹងCOVID-19 និយាយបែបនេះនៅពេលគាត់កំពុងរង់ចាំទទួលឈាមសត្វពីកន្លែងកាប់គោ។ គាត់បន្ថែមថា “ខ្ញុំមានបងប្អូនប្រុស4នាក់ និងក្មេងអាយុ10ឆ្នាំម្នាក់។ ពួកយើងរស់បានដល់ពេលនេះគឺដោយសារគុណរបស់ឈាមសត្វ”៕

ប្រភព៖ សារព័ត៌មានបរទេស

May 15, 2020

អនុប្រធានាធិបតីអាមេរិកាំងនឹង “នៅឆ្ងាយ” ពីលោក Trump មួយរយៈ

អនុប្រធានាធិបតីសហរដ្ឋអាមេរិក លោក Mike Pence បានសម្រេចចិត្តថា “នៅឱ្យឆ្ងាយ” ពីប្រធានាធិបតី Donald Trump ក្នុងមួយរយៈពេល បន្ទាប់ពីអ្នកនាំពាក្យរបស់ប្រធានាធិបតីបានឆ្លងវីរុសCOVID-19។ នេះបើតាមការឱ្យដឹងពីសេតវិមាន។

“ខ្ញុំសូមបញ្ជាក់ថា នោះគឺជាការសម្រេចចិត្តផ្ទាល់ខ្លួនរបស់គាត់។ ការរក្សាគម្លាតប៉ុន្មានថ្ងៃគឺអាស្រ័យទៅលើអនុប្រធានាធិបតី”។ លេខាផ្នែកសារព័ត៌មានរបស់សេតវិមាន លោកស្រី Kayleigh McEnany បានឱ្យដឹងបែបនេះ ទាក់ទិននឹងការរក្សាគម្លាតរបស់អនុប្រធានាធិបតីអាមេរិកាំង លោក Mike Pence ជាមួយនឹងលោក Trump។

ឥរិយាបថរបស់អនុប្រធានាធិបតីអាមេរិកាំងរូបនេះ ត្រូវបានធ្វើឡើងក្រោយពី Kate Miller ដែលជាអ្នកនាំពាក្យរបស់លោក និងជាភរិយារបស់លោក Stephen Miller ដែលជាទីប្រឹក្សាជាន់ខ្ពស់របស់ប្រធានាធិបតី Trump បានឆ្លងវីរុសCOVID-19។ លោក Trump កាលពីថ្ងៃទី8ឧសភា បានអះអាងថា លោកមិនបានទាក់ទងផ្ទាល់ជាមួយនឹង Miller នោះទេក្នុងមួយរយៈពេលចុងក្រោយនេះ ប៉ុន្តែលោកស្រី Kate Miller មានទំនាក់ទំនងផ្ទាល់ជាមួយអនុប្រធានាធិបតី Mike Pence។

លោក Trump បាននិយាយបន្ថែមអំពីអនុប្រធានាធិបតីអាមេរិកាំងថា “Mike បានធ្វើតេស្តរកមេរោគ ដោយទទួលបានលទ្ធផលអវិជ្ជមាន”។ មេដឹកនាំកំពូលរបស់សហរដ្ឋអាមេរិកទាំងពីររូបនេះ សុទ្ធតែត្រូវធ្វើតេស្តរកវីរុសCOVID-19 ជារៀងរាល់ថ្ងៃ។

អនុប្រធានាធិបតីសហរដ្ឋអាមេរិក លោក Mike Pence

សូមរំឭកថា មុននេះមានទាហានពិសេសម្នាក់មកពីទ័ពជើងទឹក ដែលមានភារកិច្ចបម្រើលោក Trump ក៏បានឆ្លងវីរុសCOVID-19 ធ្វើឱ្យសេតវិមានព្រួយបារម្ភយ៉ាងខ្លាំងអំពីការឆ្លងរាលដាលក្នុងជួរស្ថាប័នកំពូលនេះ។ សមាជិកជាន់ខ្ពស់3រូបដែលស្ថិតក្នុងក្រុមអ្នកជំនាញការប្រឆាំងនឹងCOVID-19 របស់សេតវិមាន ក្នុងនោះមានមន្ត្រីជាន់ខ្ពស់ផ្នែកសុខាភិបាលនៅសេតវិមាន និងជាទីប្រឹក្សាផ្ទាល់របស់ប្រធានាធិបតីអាមេរិកាំង គឺលោក Anthony Fauci ក៏បានបង្ខាំងខ្លួនឯងផងដែរដើម្បីការពារការឆ្លងមេរោគ។

ការិយាល័យគ្រប់គ្រងសេតវិមាន កាលពីថ្ងៃទី11ឧសភាបានចេញសេចក្ដីប្រកាសណែនាំឱ្យបុគ្គលិកនៅទីនេះពាក់ម៉ាស់ជាប់ជានិច្ចក្នុងតំបន់ករិយាល័យប្រធានាធិបតី ទន្ទឹមនឹងនេះសេតវិមានក៏ស្នើឱ្យគោរពវិធានការរក្សាគម្លាតក្នុងទីសាធារណៈផងដែរ។ ក៏ប៉ុន្តែ លោក Trump ទទួលបានសិទ្ធិលើកលែងក្នុងករណីនេះ បន្ទាប់ពីជំនួយការនានានៅសេតវិមានបានឱ្យដឹងថា លោក Trump ទំនងជាមិនព្រមពាក់ម៉ាស់នោះទេ។

នៅសហរដ្ឋអាមេរិក គិតមកដល់បច្ចុប្បន្ន មានអ្នកជំងឺCOVID-19 សរុប 1,407,928នាក់ និងអ្នកស្លាប់សរុបមានចំនួន83,357នាក់ ក្នុងនោះមានអ្នកជំងឺថ្មី23,895នាក់ និងអ្នកស្លាប់ថ្មី1,654នាក់ដែលទើបបានរកឃើញក្នុងថ្ងៃនេះ។ អ្នកជំងឺដែលបានជាសះស្បើយនៅសហរដ្ឋអាមេរិកក៏បានកើនឡើងដល់293,074នាក់៕

ប្រភព៖ សារព័ត៌មានបរទេស

May 13, 2020

អ្នកជំងឺកូរ៉ូណានៅសហរដ្ឋអាមេរិកកើនលើស1.4លាននាក់! អ្នកជំនាញថា វីរុសអាចផ្ទុះឆ្លងជាលើកទីពីរ

សហរដ្ឋអាមេរិកបានរកឃើញអ្នកជំងឺCOVID-19ថ្មីជិត24,000នាក់ក្នុងរយៈពេល24ម៉ោងចុងក្រោយនេះ ធ្វើឱ្យតួលេខអ្នកជំងឺកូរ៉ូណាសរុបឡើងដល់ជាង1.4លាននាក់ ក្នុងនោះមានជាង83,000នាក់បានបាត់បង់ជីវិត។

តួលេខនៃអ្នកជំងឺសរុប និងអ្នកស្លាប់សរុបដោយសារវីរុសCOVID-19នៅសហរដ្ឋអាមេរិកនាពេលបច្ចុប្បន្នគឺ 1,407,928នាក់ និង83,357នាក់ បន្ទាប់ពីប្រទេសនេះទើបបានរកឃើញអ្នកជំងឺថ្មី23,895នាក់ និងអ្នកស្លាប់ថ្មី1,654នាក់បន្ថែមទៀតក្នុងថ្ងៃនេះ។ អ្នកជំងឺដែលបានជាសះស្បើយនៅសហរដ្ឋអាមេរិកក៏បានកើនឡើងដល់293,074នាក់។ នេះបើតាម Worlddometer ជាគេហទំព័រដែលធ្វើបច្ចុប្បន្នភាពនៃស្ថានភាពវីរុសCOVID-19 លឿនជាងគេបំផុត។

អភិបាលរដ្ឋនូវយ៉ក លោក Andrew Cuomo កាលពីថ្ងៃទី12ឧសភា(13ឧសភានៅកម្ពុជា) បានប្រកាសថា មានអ្នកស្លាប់ថ្មីចំនួន195នាក់នៅក្នុងរដ្ឋនីវយ៉ក ធ្វើឱ្យអ្នកស្លាប់សរុបដោយសារវីរុសកូរ៉ូណាក្នុងរដ្ឋនេះឡើងដល់21,835នាក់ ក្នុងគ្រាដែលតំបន់ចំនួន3របស់នីវយ៉ក ជិតបើកដំណើរការសេដ្ឋកិច្ចឡើងវិញ បន្ទាប់ពីបានបំពេញគ្រប់លក្ខខណ្ឌដែលលោក Cuomo បានដាក់ចេញ។

ទីប្រឹក្សាជាន់ខ្ពស់ផ្នែកសុខាភិបាលរបស់សេតវិមាន លោក Anthony Fauci បានព្រមានថា បើសិនជាតំបន់នានាប្រញាប់ប្រញាល់បើកទ្វារសេដ្ឋកិច្ចឡើងវិញ នោះអាចនឹងមាន “ផលវិបាកធ្ងន់ធ្ងរ”។ លោកថា បណ្ដារដ្ឋដែលមើលស្រាលការព្រមានរបស់ក្រុមអ្នកជំនាញការ ពួកគេនឹងមាន “ហានិភ័យខ្ពស់ក្នុងការធ្វើឱ្យវីរុសនេះផ្ទុះឆ្លងរាលដាលជាលើកទីពីរដោយមិនអាចគ្រប់គ្រងបាន”៕

ប្រភព៖ សារព័ត៌មានបរទេស

May 13, 2020

COVID-19 នៅអាស៊ីអាគ្នេយ៍! តារាងស្ថិតិនៃករណីឆ្លង និងស្លាប់ដោយសារវីរុសកូរ៉ូណា

បណ្ដាប្រទេសនៅតំបន់អាស៊ីភាគអាគ្នេយ៍ទាំង11ប្រទេស បានរកឃើញអ្នកជំងឺCOVID-19 សរុបយ៉ាងតិច 59.748នាក់ និងអ្នកស្លាប់សរុបយ៉ាងតិច1.910នាក់។

សិង្ហបុរីដែលជាសម្បុកមេរោគកូរ៉ូណាធំជាងគេបង្អស់ក្នុងតំបន់អាស៊ីអាគ្នេយ៍ បានរាយការណ៍ថា មានអ្នកជំងឺថ្មីចំនួន451នាក់បន្ថែមទៀត នាំឱ្យតួលេខនៃអ្នកជំងឺសរុបរបស់ប្រទេសនេះឡើងដល់23,822នាក់។ ចំណែកអ្នកស្លាប់សរុបដោយសារវីរុសCOVID-19 នៅសិង្ហបុរីបានកើនដល់21នាក់ ខណៈដែលអ្នកជំងឺបានជាសះស្បើយមានចំនួន2,721នាក់។

កំណើននៃអ្នកជំងឺCOVID-19 ក្នុងប្រទេសជិតពាក់កណ្ដាលនៅអាស៊ីអាគ្នេយ៍ នៅតែបន្តកើនឡើង ខណៈដែលប្រទេសប្រមាណជាជិតពាក់កណ្ដាលផ្សេងទៀតក្នុងតំបន់នេះ រួមមាន កម្ពុជា វៀតណាម ទីម័រខាងកើត និងឡាវ ហាក់កំពុងស្ងប់ស្ងាត់ ដោយមកដល់បច្ចុប្បន្ន មិនទាន់មានករណីស្លាប់ដោយសារវីរុសCOVID-19 ដែលត្រូវបានគេរាយការណ៍ជាផ្លូវការនៅឡើយ។

ខាងក្រោមនេះគឺជាតារាងដែលបង្ហាញអំពីតួលេខនៃអ្នកជំងឺ និងអ្នកស្លាប់ដោយសារវីរុសCOVID-19 នៅតំបន់អាស៊ីអាគ្នេយ៍៖

ប្រភព៖ សារព័ត៌មានបរទេស

May 12, 2020

ក្រសួងការបរទេសចិន បដិសេធការចោទប្រកាន់ខុសរឿង 24ចំណុចរឿងមេរោគកូវីដ-19 របស់អ្នកនយោបាយអាមេរិក

ក្រសួងការបរទេសចិនបានចេញមកបដិសេធការចោទប្រកាន់ 24ចំណុច របស់អ្នកនយោបាយអាមេរិក ដែលចិនបានបញ្ជាក់ថា គឺជារឿងកុហកបោកប្រាស់ដែលគ្មានខ្លឹមសារ ពាក់ព័ន្ធនឹងការទប់ទល់របស់ចិនចំពោះការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីថ-19 ដែលកំពុងធ្វើឱ្យមានផលប៉ះពាល់យ៉ាងធ្ងន់ធ្ងរទូទាំងពិភពលោកក្នុងខណៈពេលនេះ។

វេបសាយរបស់ក្រសួងការបរទេសចិន បានផ្សព្វផ្សាយអត្ថបទមួយដែលមានប្រវែងដល់ទៅ 30ទំព័រកាលពីចុងសប្ដាហ៍កន្លងទៅ ដែលជាការរួបរួម និងរៀបរាប់ពីការបដិសេធគ្រប់ចំណុចចោទប្រកាន់ផ្សេងៗ ដែលបានធ្វើឡើងក្នុងអំឡុងការថ្លែងការណ៍របស់ក្រសួងការបរទេសចិនកាលពីអំឡុងសប្ដាហ៍កន្លងទៅ។

ចំណុចបកស្រាយទាំងអស់ គឺជារឿងដែលពាក់ព័ន្ធនឹងការចោទប្រកាន់របស់អ្នកនយោបាយសហរដ្ឋអាមេរិក ជាពិសេសបំផុត គឺលោក ម៉ៃក៍ ប៉ុមប៉េអូ រដ្ឋមន្ត្រីការបរទេសសហរដ្ឋអាមេរិក ដែលបាននិយាយថា ចិនបានបិទបាំងព័ត៌មានពាក់ព័ន្ធនឹងមេរោគកូវីដ-19 រួមទាំងការបញ្ជាក់ថា មេរោគវីរុសនោះ មានដើមកំណើតចេញពីបន្ទប់ពិសោធន៍ក្នុងទីក្រុងវូហាន។

របាយការណ៍បដិសេធមួយនេះ បានលើកយកពាក្យសម្ដីរបស់លោក អាប្រាហាំ លិនខុន អតីតប្រធានាធិបតីសហរដ្ឋអាមេរិកដ៏ល្បីល្បាញ មកចាប់ផ្ដើមក្នុងកថាខណ្ឌដំបូងថា “លីនខុន ធ្លាប់បាននិយាយថា អ្នកអាចបោកប្រាស់មនុស្សមួយចំនួនបានគ្រប់ពេលវេលា ឬបោកប្រាស់មនុស្សគ្រប់គ្នាបាននៅក្នុងពេលខ្លះ តែអ្នកមិនអាចកុហកបោកប្រាស់មនុស្សគ្រប់គ្នាបានគ្រប់ពេលវេលានោះឡើយ”

រដ្ឋបាលចិន អះអាងថា ភ័ស្តុតាងគ្រប់យ៉ាងបង្ហាញឱ្យឃើញថា មេរោគវីរុសកូរ៉ូណា មិនបានចេញមកពីការផលិតរបស់មនុស្សទេ ខណៈដែលមន្ទីរពិសោធន៍ក្នុងទីក្រុងវូហានដែលត្រូវសហរដ្ឋអាមេរិកបញ្ជាក់ថា ជាកន្លែងផលិតមេរោគវីរុស រហូតដល់បែកធ្លាយចេញមកនោះ ក៏គ្មានសមត្ថភាពក្នុងការច្នៃប្រឌិតមេរោគវីរុសកូរ៉ូណាប្រភេទថ្មីចេញមកបាន ដូចដែលសហរដ្ឋអាមេរិកចោទប្រកាន់នោះដែរ។

ឯកសារដែលត្រូវបានផ្សព្វផ្សាយចេញមកនេះ នៅបានបង្ហាញអំពីពេលវេលាក្នុងការដំណើរការរបស់ប្រទេសចិន ដែលមានការផ្ដល់ព័ត៌មានទៅប្រជាសហគមន៍អន្តរជាតិថា វាបានដំណើរការឡើងយ៉ាងស័ក្តិសម បើកចំហ និងគ្មានលាក់លៀម ដើម្បីលាងជម្រះចំណុចចោទប្រកាន់របស់សហរដ្ឋអាមេរិកដែលថា ចិនយឺតយ៉ាវក្នុងការដាស់តឿនសហគមន៍អន្តរជាតិ ពាក់ព័ន្ធនឹងការឆ្លងរាលដាលរបស់មេរោគវីរុសកូរ៉ូណាប្រភេទថ្មីនេះ។

អត្ថបទរបស់ក្រសួងការបរទេសចិន ថែមទាំងបានបដិសេធចំណុចរិះគន់របស់ប្រទេសលោកខាងលិច ពាក់ព័ន្ធនឹងការដំណើរការរបស់រដ្ឋបាលចិនចំពោះលោកវេជ្ជបណ្ឌិត លី វឹនលៀង ដែលជាមនុស្សដំបូងគេ ដែលចេញមកដាស់តឿនអំពីការឆ្លងរាលដាលរបស់មេរោគវីរុសប្រភេទថ្មីនេះក្នុងទីក្រុងវូហាន មុននឹងសាមីខ្លួនបានស្លាប់នៅពេលក្រោយមកដោយសារតែមេរោគវីរុសដដែលនោះ ដោយអត្ថបទនោះបានសង្កត់ធ្ងន់ថា វេជ្ជបណ្ឌិតរូបនេះ មិនមែនជាអ្នកបង្ហាញពីតម្រុយរបស់មេរោគទេ ហើយគាត់ក៏មិនដែលត្រូវចាប់ខ្លួនឡើងតុលាការដែរ ដែលទាំងអស់នេះ វាផ្ទុយគ្នានឹងព័ត៌មានដែលបានផ្សព្វផ្សាយនៅក្នុងបណ្ដាប្រទេសលោកខាងលិច៕

ប្រភព៖ សារព័ត៌មានបរទេស

May 11, 2020

ជាង3.9លាននាក់ឆ្លងវីរុសCOVID-19 នៅទូទាំងពិភពលោក

វីរុសCOVID-19 បានសម្លាប់មនុស្សជាង270,000នាក់ ក្នុងចំណោមអ្នកជំងឺជាង3.9លាននាក់ នៅទូទាំងពិភពលោក។

ប្រទេសនិងដែនដីចំនួន212ក្នុងពិភពលោក គិតមកដល់ថ្ងៃនេះ(8ឧសភា) មានអ្នកឆ្លងវីរុសCOVID-19 សរុប3,915,974នាក់ និងអ្នកស្លាប់សរុប270,297នាក់។ អ្នកជំងឺកើន97,410នាក់ និងអ្នកស្លាប់កើន6,188នាក់បើធៀបនឹងតួលេខម្សិលមិញ។ អ្នកជំងឺដែលបានជាសះស្បើយក៏បានកើនដល់1,335,241នាក់ហើយដែរ។ នេះបើតាមស្ថិតិរបស់ WorldMeters។

ទ្វីបអាមេរិកគឺជាសម្បុកមេរោគធំបង្អស់ក្នុងពិភពលោក ក្នុងនោះអាមេរិកខាងជើងមានអ្នកជំងឺសរុប1,411,447នាក់ អាមេរិកខាងត្បូងមាន267,787នាក់ ខណៈទ្វីបអឺរ៉ុបមាន1,553,700នាក់ អាស៊ីមាន618,505នាក់ និងអាហ្វ្រិកមាន55,319នាក់។

សហរដ្ឋអាមេរិកនៅតែជាសម្បុកមេរោគកូរ៉ូណាធំជាងគេបង្អស់ក្នុងពិភពលោក ដោយមានអ្នកជំងឺសរុប1,290,242នាក់ និងអ្នកស្លាប់សរុប76,864នាក់ ក្នុងមានអ្នកជំងឺថ្មីចំនួន32,191នាក់ និងអ្នកស្លាប់ថ្មីមានចំនួន2,674នាក់។

ប្រទេសដែលមានអ្នកជំងឺCOVID-19 សរុបលើសពី100,000នាក់ មាន10ប្រទេស គឺសហរដ្ឋអាមេរិក អេស្ប៉ាញ អ៊ីតាលី អង់គ្លេស រុស្ស៊ី បារាំង អាល្លឺម៉ង់ ប្រេស៊ីល ទួរគី និងអ៊ីរ៉ង់។ ចំណែកប្រទេសដែលមានអ្នកស្លាប់លើសពី 10,000នាក់ រួមមាន5ប្រទេស គឺសហរដ្ឋអាមេរិក អង់គ្លេស អ៊ីតាលី អេស្ប៉ាញ និងប្រទេសបារាំង៕

ប្រភព៖ សារព័ត៌មានបរទេស

May 8, 2020

ក្រោយវិបត្តិកូវីដ-19 ធុរកិច្ចជាច្រើននឹងត្រូវផ្លាស់ប្ដូរ…

មិនអាចបដិសេធបានឡើយថា វិបត្តិការឆ្លងរាតត្បាតនៃមេរោគកូវីដ-19 បានធ្វើឱ្យជីវិតរបស់មនុស្សទូទៅផ្លាស់ប្ដូរ និងមិនត្រឹមតែប៉ុណ្ណោះទេ បណ្ដាអ្នកទីផ្សារ អ្នកសេដ្ឋសាស្ត្រ និងអ្នកធុរកិច្ចផ្សេងៗ សុទ្ធតែបានសន្និដ្ឋានទុកថា ក្រោយវិបត្តិកូវីដ-19 បញ្ចប់ទៅ ធុរកិច្ចផ្សេងៗនៅក្នុងប្រទេស ក៏នឹងប្រែប្រួលផ្លាស់ប្ដូរទៅតាមនោះដែរ ដូច្នេះហើយទើបគ្រប់ផ្នែកត្រូវត្រៀមខ្លួនជាស្រេច ដើម្បីទប់ទល់នឹងភាពផ្លាស់ប្ដូរដែលបម្រុងនឹងកើតឡើងនៅពេលខាងមុខ។

សម្រាប់ធុរកិច្ច ដែលត្រូវកែសម្រួល មានដូចជា…

1. ការលក់ទំនិញផ្សេងៗ និងធុរកិច្ចលក់រាយ៖ ត្រូវបន្ថែមសេវាកម្មតាមប្រព័ន្ធអនឡាញ ត្រូវនាំយកប្រព័ន្ធ ITមកប្រើ ព្រោះដោយសារតែវិបត្តិកូវីដ-19 បានធ្វើឱ្យមនុស្សនាំគ្នាងាកមកទិញទំនិញតាមអនឡាញច្រើនឡើង។

2. ខ្សែចង្វាក់ផ្គត់ផ្គង់៖ ដូចជាការចាត់ចែងរកវត្ថុធាតុដើម ការផលិត រហូតដល់ការលក់ទំនិញទៅដល់ដៃអតិថិជន នឹងផ្លាស់ប្ដូរ ដោយប្រទេសផ្សេងៗទូទាំងពិភពលោក នឹងងាកមកផ្ដល់ភាពសំខាន់ចំពោះការផលិត ការបញ្ជាទិញវត្ថុធាតុដើម និងទំនិញនៅក្នុងប្រទេស ឬបញ្ជាទិញទំនិញពីប្រទេសជិតខាងវិញម្ដង ដើម្បីការពារបញ្ហាការដឹកជញ្ជូន ដែលបណ្ដាលមកពីផលប៉ះពាល់របស់វិបត្តិផ្សេងៗ ដូចដែលបានកើតមានក្នុងអំឡុងវិបត្តិកូវីដ-19។ ក្រៅពីនោះ ឧស្សាហកម្មមួយចំនួន ក៏នឹងមានការផ្លាស់ប្ដូរមូលដ្ឋានផលិតផងដែរ។

3. ការវិនិយោគទុនក្នុងធុរកិច្ចហិរញ្ញវត្ថុ នឹងចែកចាយទៅក្នុងក្រុមធុរកិច្ចផ្សេងៗទៀតកាន់តែច្រើនឡើង៖ ដោយអ្នកវិនិយោគនឹងចែកចាយភាពប្រថុយប្រថាន ដោយការជ្រើសរើសវិនិយោគក្នុងធុរកិច្ចដែលសម្បូរបែប(ច្រើនមុខ) ខ្លាំងជាងវិនិយោគតែក្នុងធុរកិច្ចណាមួយតែ1មុខ ព្រោះវិបត្តិកូវីដ-19 បានធ្វើឱ្យអ្នកវិនិយោគដឹងថា ធុរកិច្ចមួយចំនួន ដែលមើលទៅស្ថិតស្ថេរគង់វង្ស និងមានកម្រៃល្អនោះ បើសិនជាជួបនឹងសភាវវិបត្តិអ្វីមួយ ក៏អាចនឹងដួលរលំគ្រាំងភ្លាមៗតែម្ដងដែរ។

4. ធនាគារ និងគ្រឹះស្ថានហិរញ្ញវត្ថុ នឹងកាត់បន្ថយចំនួនសាខា និងកាត់បន្ថយចំនួនបុគ្គលិក លឿនជាងផែនការដែលបានរៀបចំទុក ដោយសារតែវិបត្តិកូវីដ-19 បានធ្វើឱ្យអតិថិជននាំគ្នាងាកមកប្រើប្រាស់សេវាកម្ម E-Banking យ៉ាងច្រើនវិញម្ដង។

ធុរកិច្ចដែលធំធាត់ឡើង មានដូចជា…

1.ធុរកិច្ច IT ផ្សេងៗ ដូចជា ការធ្វើវេបសាយ អ៊ែបភ្លីខេស្សិន ប្លុកឆេន (បណ្ដាញការរក្សាទុកព័ត៌មាន) ដោយសារតែវិបត្តិកូវីដ-19 បានធ្វើឱ្យធុរកិច្ចផ្សេងៗ ងាកមកប្រើប្រាស់សេវាកម្មអៃធីទាំងនេះច្រើនឡើង និងក្លាយជាផ្នែកមួយរបស់ធុរកិច្ច។

2. ធុរកិច្ចបញ្ជូនទំនិញ និងអាហារ…ដោយសារតែវិបត្តិកូវីដ-19 ដែលមនុស្សម្នាត្រូវស្ថិតនៅក្នុងផ្ទះ ធ្វើឱ្យមានការបញ្ជាទិញម្ហូបអាហារ និងទំនិញតាមអនឡាញកាន់តែច្រើនឡើង និងក្លាយជារបៀបរបបជីវិតថ្មីមួយដែលមនុស្សមានទម្លាប់ ទើបបណ្ដាលឱ្យធុរកិច្ចបញ្ជូនអាហារ និងទំនិញ មានសញ្ញាថា នឹងរីកធំធាត់ឡើងយ៉ាងឆាប់រហ័ស។

ធុរកិច្ចដែលកើតថ្មី មានដូចជា…

បង្រៀនតាមប្រព័ន្ធអនឡាញផ្សេងៗ៖ ដោយសារតែវិបត្តិកូវីដ-19 មនុស្សបាននាំគ្នាងាកមកចាប់អារម្មណ៍សិក្សារៀនសូត្ររឿងផ្សេងៗដោយខ្លួនឯងតាមរយៈប្រព័ន្ធអនឡាញច្រើនឡើង មិនថាតែការរៀនធ្វើម្ហូបអាហារ រៀនជំនាញការងារសិល្បៈផ្សេងៗ ការរៀនច្រៀង ការហាត់ប្រាណ ឬការរៀនតាមអនឡាញ ដើម្បីប្រកបអាជីពផ្សេងៗ ទើបធ្វើឱ្យមានធុរកិច្ចបង្រៀនកួរតាមអនឡាញថ្មីៗកើតឡើងជាច្រើន។

ធុរកិច្ចដែលបាត់ទៅ មានដូចជា…

ធុរកិច្ចដែលបានទទួលផលប៉ះពាល់ពីវិបត្តិកូវីដ-19 បានធ្វើឱ្យអ្នកខ្លះដែលដើមទុនវិនិយោគមិនច្រើនគ្រប់គ្រាន់ ត្រូវបិទដំណើរការ ដូចជា ភោជនីយដ្ឋាន សណ្ឋាគារ កន្លែងម៉ាស្សា និងស្ប៉ា រោងចក្រឧស្សាហកម្ម ជាដើម៕

ប្រភព៖ សារព័ត៌មានបរទេស

May 7, 2020

Tag: covid-19